تصرف غير اخلاقى مره اخرى من نجمى المتخب الوطنى ونجمى المريخ وسخط جماهيرى

للمره الثانيه على التوالى وانا الان فى مدينة الاسماعيليه العريقه
ذهبت لتشجيع هذا المنتخب الغير اخلاقى من نجوم اعتبرو انفسهم
مثل السفير على قاقرين والدحيش وكمال عبدالوهاب
فى مباراة السعوديه بعد مااحرز المنتخب السعودى هدفه الثانى صحنا فى وجه اللاعبين
والجهاز الفنى وقام النجم المعز بتدهدية الجماهير وتقبلنا روحو البطوليه
واذا بالنجم الصاعد فى المريخ كابتن المنتخب الوطنى سعيد السعودى ويلتفت الينا
ويشير الينا بيده بحركه غير اخلاقيه سخط الجمهور عليه
عليكم الله دا لاعب كوره
وكنت ذهاب لفتح محضر فى النجم سعيد مصطفى وتراجعت بعدما طلب منى الاستاتذه فى البعثه السودانيه الهدوء
الان وبعد نهاية الشوط الثانى والخمسه الجميله
ياتى الينا هذا اللاعب نصر الدين الشغيل
ويقول لنا كان انتو رجال اطلعو الشارع
ونقول لنصر الدين الشغيل نحن رجال
وخرجنا الى الخارج ولكن كاخلاق سودانيه رفضنا الاشتباك مع هذا اللاعب الغير اخلاقى
عليكم الله ديل لاعيبه يحملو شعار المنتخب
وبعد نهاية المباراة هتفت الجماهير
فاشل فاشل ياشداد

اعلن باسم روابط الطلاب السودانيين
مقاطعتنا التامه لجميع مباريات المتخب الالمبى فى الدورة العربيه
ونعلن باننا لن نشجع هذا المنتخب مره اخرى
وخاصة فى مباراة ليبيا التى ستقام فى القاهره يوم الثلاثاء

سلام يا محمّد،

لو فعلاً ده حصل من اللاعبين الذكرتهم يبقي غلط مهما كانت الأسباب ...

لكن، وخلينا نتكلم بصراحة، في حاجة ناقصة في الكلام القلتو. يعني ما ممكن يكون سعيد السعودي عمل حركة زي دي من غير سبب، ولا يعقل إنّو الشغّيل جاء من نفسو وبدون سبب قال ليكم الكلام الذكرتو ...

مش كده؟

لو سمحت أذكر لينا الحصل بالكامل عشان نقدر نحكم

وعلي كل حال زي ما قلت في البداية، لو فعلاً حصلت التصرفات دي فهي أكيد غير مقبولة. بس ما من العدل نسمع طرف واحد في القضية ونبني حكمنا بناء علي كلامو - خاصّة وإنو الكلام ما مكتمل. مش كده؟

نقطة تانية لو سمحت لي أتكلم معاك فيها

يا محمّد إنتو ما كنتو بتشجّعو فلان ولا علان عشان تقرّرو تقاطعو المنتخب بسببو. التشجيع للسودان. وبعدين لو ما وقفتو مع بلدكم وهي مغلوبة حتقيفو معاها متين؟

صدّقني ما قصدي أدّي أي زول درس في الوطنيّة ولا حاجة. وعارف إنّو كلامك القلتو عن مقاطعة المنتخب كلام زعل زي ما بيقولو. ولمّا تهدأ شويّة حتلقي إنّو ما معقول تسيب بلدك عشان فلان ولا علان - خاصّة وإنّك من الناشطين في العمل السياسي. وما في سياسي بيتبرأ من بلدو عشان إنسان مهما كان ...

ولا رأيك شنو؟

الاخ محمد تحياتي

اتذكر ايضا ان اللاعب عبد الحميد السعودي قبل عدة سنوات اشار للجمهور بنفس الحركة امام كاميرا التلفزيون التي تدخل كل البيوت

هؤلاء اللعيبة فعلا اغلبهم فاقد تربوي ويحتاجون للتربية اولا

اما عن شداد فهو فاشل بدرجةامتياز....يضيع اكبر فرصة لاعداد المنتخب السوداني في مصر وتبقي لغانا اقل من شهر ونص...ويطلب معسكر في اسبانيا....زول زي دا يخلوهوا يتحكم في مصيرنا كيف

الأولمبي ظااااطو جلس على (الرصيف)!

والله يا دودي عادل ما عرفناك سياسي ولا مناضل ولا كورنجي ولا شنو بالضبط؟؟؟

Quote: للمره الثانيه على التوالى وانا الان فى مدينة الاسماعيليه العريقه

العراقة لقتها وين الإسماعيلية (نشأت مع حفر القناة وأسمها مشتق من أسماعيل باشا؟؟؟؟؟
الجهل خشم بيوت...

Quote: روحو البطوليه

كيف؟؟؟؟


يا أبني أرسى وأهدأ وتحسس خطاك..
أقدر طموحك لرسم شخصيتك وأرتقاء أعلى المراتب.

ولكن ليس هكذا تورد الإبل...


ركز عشان تصل صاح...

صدقني في يوم من الأيام ستذكر هذه الكلمات وآمل ألا تذكرها في لحظة ندم وتقول كان في واحد شايقي الله يرحمه مااااات زماااااان كان بقول لي وما سمعت كلامه.


الشايقي

فاوضني بلا زعل

أولا وكما قال أحد المتداخلين الرواية من جانب واحد لا تصلح للحكم والمفروض تحكي الحصل كامل عشان الناس تحكم .
ثانيا سعيد السعودي أو الشغيل كانوا يرتدون شعار المنتخب الوطني وليس المريخ حتى نصفهم بأنديتهم والمنتخب الأولمبي ده دماء شابة تمتلك الموهبة لكن التجربة كانت أكبر من عمرهم ولو لاحظتا ليهم كورتهم جميلة بس محتاجين حبة تدريب وإهتمام وإستمرارية عشان يكون عندنا منتخب قوي وشاب في نفس الوقت في السنين القادمة .
سعيد السعودي أعرفه وأعرف أخلاقه جيدا ولا أصدق أن يأتي بفعل مثل هذا


تخريمة .... والله هلالابي

Quote: سعيد السعودي أعرفه وأعرف أخلاقه جيدا ولا أصدق أن يأتي بفعل مثل هذا

Quote: لو فعلاً ده حصل من اللاعبين الذكرتهم يبقي غلط مهما كانت الأسباب

Quote: الرواية من جانب واحد لا تصلح للحكم والمفروض تحكي الحصل كامل عشان الناس تحكم

Quote: سعيد السعودي أو الشغيل كانوا يرتدون شعار المنتخب الوطني وليس المريخ حتى نصفهم بأنديتهم والمنتخب الأولمبي

أتقف مع ما اقبسته من كلمات خالد عثمان جعفر ونزار محمد صالح؛ وأضيف أن بعض
لاعبي الهلال سبق لهم أن مارسوا سوء السلوك، يعني يا محمد عادل سوء السلوك ده
"لا لون له"، وارد من لاعبي الهلال ولاعبي المريخ وغيرهم، والمسؤولية تقع على عاتق
المسؤولين في الأندية بمعاقبة اللاعب المخطئ قبل أن يعاقبه الاتحاد العام، لكن الذي يحدث
-عادة- هو الحديث عن أن الاتحاد العام قسى على اللاعب، ولم يصدر ذات العقوبة بشأن سوء
سلوك بدر من لاعب الفريق الفلاني! وهو جدل عقيم أعتقد أن الوقت قد حان -من زمان-
لتركه، لتبدأ صفحة جديدة يعاقب فيها اللاعب المخطئ بمباركة ناديه وإعلامه.

يا محمد عادل انت الوداك شنو

يعنى 2 من السعودية ما كانت كافية ليك

وشداد دا طالما حى عايش كان قامت قومة لى الكورة السودانية انا شنبى دا اعملو باروكا

Quote: وشداد دا طالما حى عايش كان قامت قومة لى الكورة السودانية انا شنبى دا اعملو باروكا

وانا كمان شنبي دا بعملوا خيط واركب فيه السبحة الاتقطعت دي ومالاقي ليها خيط.

تخريمة :
انتو محمد عادل ده الف القصة دي ومشي وييييييييييييييين ....؟
تحياتي
هارون دياب

Quote: تصرف غير اخلاقى مره اخرى من نجمى المتخب الوطنى

ونجمى المريخ

Quote: واذا بالنجم الصاعد فى المريخ كابتن المنتخب الوطنى سعيد السعودى

Quote: ياتى الينا هذا اللاعب نصر الدين الشغيل

Quote: اتذكر ايضا ان اللاعب عبد الحميد السعودي قبل عدة سنوات اشار للجمهور بنفس الحركة امام كاميرا التلفزيون

Quote: أتفق مع ما اقبسته من كلمات خالد عثمان جعفر ونزار محمد صالح؛ وأضيف أن بعض لاعبي الهلال سبق لهم أن مارسوا سوء السلوك، يعني يا محمد عادل سوء السلوك ده "لا لون له"، وارد من لاعبي الهلال ولاعبي المريخ وغيرهم، والمسؤولية تقع على عاتق المسؤولين في الأندية بمعاقبة اللاعب المخطئ قبل أن يعاقبه الاتحاد العام، لكن الذي يحدث -عادة- هو الحديث عن أن الاتحاد العام قسى على اللاعب، ولم يصدر ذات العقوبة بشأن سوء سلوك بدر من لاعب الفريق الفلاني! وهو جدل عقيم أعتقد أن الوقت قد حان -من زمان- لتركه، لتبدأ صفحة جديدة يعاقب فيها اللاعب المخطئ بمباركة ناديه وإعلامه.

ربنا يكملك بي عقلك يا ود الريح ...

والله زدت إحتراماً في نظري أكثر وأكثر ...

يا محمد عادل
هذا الشبل من ذاك الأسد !!!

لآ اذكر فى الهلال لاعبا واحدا تصرف على هذا النحو والا واجهته الأداره، واذا لم تواجهه وجهناهما معا.. ارجو الا يستهان بغضبة محمد عادل من اجل المجامله واخفاء الحقائق!
يا محمد عادل
اخونا احمد الريح بحاول دائما (يعطف) على البعيوات لكن تاريخ الهلال حافل بالسلوك القويم، لهذا نحن هلالاب والحمد لله .. حينما شطب المريخ كابتنه (سليمان عبدالقادر) ومهاجمه (حمورى الصغير) لسوء السلوك، وكان وقتها حمورى الصغير أفضل مهاجم فى السودان، طلب بعض أقطاب الهلال من رئيس النادى وقتها المرحوم (الطيب عبدالله) لتسجيلهما للهلال، فرفض الطيب مجرد الحوار معهما وقالها بكل وضوح:-
(لاعب شطبه المريخ لسوء السلوك ، لا نتشرف به فى الهلال)!!
وحينما شطب الهلال لاعبه الكبير (الدحيش) لنفس الأسباب تلهف له المريخ وسجله ولم يستمر معهم، وحينما شطب الهلال (علاء الدين طياره) لنفس الأسباب، تلهف له المريخ، وسجله (فوراهم النجوم) عز النهار.
يا أحمد الريح
لا تجامل بغير حق .. لو كان الهلال مثل المريخ لتركناه وتخلينا عنه !!
على الأقل نحن لا نصمت لقلة الأدب وسوء السلوك حتى لو صمتت الأدارة !!
تذكر ماذا حدث يوم أن مد (السعودى) يده للجمهور؟؟
دافع عنه اعلام الأفك والضلال مثلما دافع عن (فاروق جبره) ومثلما دافع عن (مازدا).
أعطينى مثالا واحدا فى الهلال كى ادينه واشجبه علنا دون مجامله!!

Quote: يا محمّد إنتو ما كنتو بتشجّعو فلان ولا علان عشان تقرّرو تقاطعو المنتخب بسببو. التشجيع للسودان. وبعدين لو ما وقفتو مع بلدكم وهي مغلوبة حتقيفو معاها متين؟

ضد اي سلوك غير رياضي من اي كان !..
ومن يلعب للمنتخب اسمى من اي لون ازرق احمر او بني فهؤلاء صقور جديان
دفعوا ضريبه العشوائيه و اللعب بالمناسبات بدون اعداد جيد و بدون
مباريات كبيره و ميزانيه واضحه المعالم ..

هم اهلنا ونحترمهم وانتم قمتم بواجبكم في التشجيع ونحترمكم ..
والعيب اداري اداري .