انا حقي ما بخلي للجكس...(زمان)

زمان ايام كنا تلاميذ ... مدرستنا الابتدائيه كانت مختلطه ... ما لانو كان تطبيق للسياسه المخلتطه لكن لانو عددن بسيط ولانو المنطقه كلها فيها مدرسه واحده بس و ما مسميه بنين او بنات...
الناس تقول لك دي قرايه ترك و عشان كده ما في زول بيجيب جناهو للمدرسه و كان جابو الا بعد شكل شديد في البيت... ده علي قول البنين و لمن تجي لي سيره الجكس و انو يدخلن مدرسه ... دي تبقي ذي قصه صلاح بن الباديه مع الفن...
الا برضو ذي ما صلاح ولج باب الفن ... كان نصيبنا من الجكس ليس بالقليل...
النصيحه فصلنا كان فيهو تلاته بنيات الا كانن صعبات بالحيل ... و مكونات عصابه و كان لقن واحد من الاولاد مطرف الا رجلو يسبقو... يشيلن منو الكركرو و الفقوس و كان لقن عندو التمر... معاهو دقه كمان...
عندنا واحد عامل شفت خلاص في الفصل ...و كل ما يسمع بانو فلان الليله الجكس ضربو يقوم يشيل بحال الزول... و يعمل دراما من الموضوع...
المهم هو زاتو وقع في العصابه ... اليوم داك و هو جاي من السوق و مالي كيسو فول مدمس و تمر و حلاوه دربس ... كان اليوم داك ابوهو جاهو زياره في يوم السوق و اداهو مصاريف ... بالاضافه لكيس الخميس طويره من الحاجه... "نسبت اقول ليكم المدرسه كانت داخليه لانو اغلبيه التلاميذ من قري بعيده"
صاحبنا بهدلوهو شديد خلاص الا ما في واحد فينا شافو ...كل الروايه كانت علي ذمه العصابه طبعا...

هاها ... بعد ما القصه انتشرت ... الزول حلف و قال ما بخلي حقو للجكس... و الا يرجع ممتلكانو منهن ...
قلنا ليهو يا زول هوي ... القبلك كان اشطر ...
قال لينا حتشوفو بس و الزمن الطويل...و انا الا افركش العصابه دي...
المهم... صاحبنا انتظر لغايه اجازه نهايه السنه...
===================
الضرت...
الضرت هو موسم الحصاد او باكوره الانتاج ... غالبا ما تكثر فيه مناسبات الزواج و الافراح و كذلك مناسبات بدون مناسبه...
كان حفل الزواج تلك او السبوع في قريه احدي افراد العصابه ... و عاده مثل هذه الحفلات تجمع كل الناس من القري المجاوره.
صديقنا الشفت نبهنا الي هذا السبوع مبكرا و كان في مخيلته الكثير... ذهبنا ضمن جموع الذاهبين الا صديقنا الشفت ... فهو ذاهب الي حيث يدري ...
في الحفل كانت تقاسيم الالعاب عمريا حسب ما هو متبع بين الهجوري و الجراري و هجوري الصغار ...و سباق الجمال و الجلد بالسياط ... ايضا في ركن قصي بعيدا عن الضوضاء ... يوجد اصحاب المريسه بالدوبيت...
صاحبنا الشفت كان خياره استعصي علينا فهمه في بادي الامر الا لاحقا...او جلد السياط كما اختاره هو ليكون اول قاصرا يلج هذا المجال...
و لما استعصي عليه الحصول علي التحدي مع سياط الكبار ... اختار تحويل ميدانه الي حيث نحن... اي هجوري الصغار... لم يمضي طويلا حتي قام شفت اخر باخذ السوط من التراب و بشر به امام الجكس في تحد واضح للشفت الاول الذي كان يبحث عن هذا التحدي...
الطقوس تتطلب ان يكون هو المجلود اولا ... الطقوس ايضا تتطلب ان يختار هو الرد في يوم اخر و في مناسبه اخري...
قام الشفت بقلع جلابيته مبشرا الي مجموعه العصابه "عصابه الجكس المدرسيه" و من ثم الي مركز ميدان الهجوري... حيث الكل يشاهد و بالطبع العصابه تزعرد... طالما انه لم يتزحزح و يرمش له عين...
اجتاز صديقنا الامتحان بكل ثبات...


============
سنواصل....