شلة الأنس

البوست دا انا عامل مخصوص لي ناس الفرفرشة
واوعا يجيني واحد يعمل لي فيها قلبه محروق على الباندودث
بقطعها ليه في راسه
دا منبر عام وصوت من لا صوت له



مرحبا بالأشقاء في شلة الانس
مرحبا بالصوار الاحرار
البوست بوستكم ونحن منكم واليكم

مواكبة للأحداث سوف نجعل هذا الأسبوع ، أسبوعا للفلم الهندي
الطايرا ليهو رقصة يجي يفكها هنا

والبعرف اسمه الفلم دا ليهو جائزة قيمة

والله ايامك يا التمباك
عندك قرين كارد و تقدل ساكت في نيويورك

يا الامين ..
ما عارف يه ذكرتني القــاعة .. قاعة الصداقة بي فلمك الهندي دا
كانت في موجة بتاعت افلام هندية جديدة دخلت السودان فجأة كدا .. والله البجيبو الافلام وقتها كان ما (غنو) تاني لي يوم الدين ما (يغنو)..
طبعا شارع النيل بيكون مقفول عديل كدا والدخول للقاعة بالبوليس .. نوعية الافلام دي ليها عشاقة طبعا الفترة الصباحية بيجو معظم طلاب الجامعات وبعض الثانويات . البجو (يدكو) بي هناك .. والفترة المسائية بيجو الناس (الحالمين) الاكثر (رومانسية) ..
بيجو داخلين كل واحد بيكون ماسك ليك حبيبتو من (ايدهـ) بقطع بدل تزكرتين تلاتة تزاكر .. وخمسة علب سجاير .. املا قادر افسرو لحدي الآن انو الواحد فيهم لازم يكون لابس ليهو بنطلون جينز (كونس) واديداس لونو ابيض الواحد فيهم يدخل الفلم ويجي يطبقو مع (حنانو)..
بتذكر اول ما عرضو الفلم دا في اول يوم كان عندي شغل في القاعة بالليل .. ولما اكون شغال بمشي بملح مع الاستاف طوالي ..
المهم ..
اليوم داك وانا داخل على القاعة شايف الناس كتار جدا وكل الناس اتنين .. اتنين منتهى الرومانسية وشئ من الواقعية والوجودية كل اتنين داخلين الصالة جوه متماسكين مع بعض شديد جدا..
المهم بعدما الفلم انتهى .. بلاي والناس دي جات طالعة .. شفت الاتنين الكانو متماسكين ديلاك .. بلاي المسافة بين كل واحد والتاني بقت نص متر وكل واحد بلاي يعاين للتاني ولامؤاخذه (يبزغ)
من البوست بتاعك دا اتذكرت اسم بطل وبطلة الفلم ومشيت فتشت عليهو في اليو تيوب ..
اهديهو لي (زول) كدا .. ولي شلة الانس.

تمبس : قولوا ( 1 )
والله يا تامبا متوقعك اول زول يتداخل وما خيبت ظني فيك ، ومتوقع لي ناس تانين كمان
قبل ما ادخل في موضوع الهندي والقاعة ، خليني ارحب بيك على طريقتي الخاصة
ترحيبا يليق بمقامك السامي عندي

افسحوا الداره لي تامبا

جاي هسه من الدوام الاول ، بجيك بعدين انشاء الله
ياخي ما تجي تتغدا معاي
عامل لي رجلة بي عدس مسبكة جنس تسبيكة
والله ما شدة ما تخينة تشمي فيها الشبشة عادي وما تجيها أي حاجة

تامبا

Quote: كانت في موجة بتاعت افلام هندية جديدة دخلت السودان فجأة كدا .. والله البجيبو الافلام وقتها كان ما (غنو) تاني لي يوم الدين ما (يغنو).. طبعا شارع النيل بيكون مقفول عديل كدا والدخول للقاعة بالبوليس

كلامك صحيح وكانوا بعرضوا دعاية الافلام دي في التلفزيون عديل
والحبيبة ما يدوك الدرب

Quote: بنطلون جينز (كونس) واديداس لونو ابيض

الكونس دا كان عندي منو خمسة
وهاك يا تشنيط اما الاديداس ما بلسها الا في الكورة وفي الكورة كنت بفضل عليها الباتريك

Quote: وكل الناس اتنين .. اتنين

وفرح يتكلم بي لغتين
والله يا تامبا عايز ترجعنا لي زمن اصلو ما برجع كلو كلو

لكن فلمي الذكرك القاعة دا ما اتذكرته مالك
طيب انعش ليك ذاكرتك واجرو شوية لحدي ما اوصله منطقة الولد
ياخي الفلم دا قديم جدا ويعتبر من اعظم واضخم ما انتجتة السينما الهندية
وفي فنان زمان اظنه اسمه ابو حراز كان عندة اغنية لي ثورة مايو ماخد لحنها من لحن الاغنية دي
بعد دا كان ما عرفته الا اجيبو ليك في البيت

بقينا مشهورين مشينا البرلمان

معا لاجل التضامن الفاعل والفعلى مع سودانيزاونلاين


قالوا الحكومة عايزة تحظر سودانيزاونلاين !!!!!!!!!
الحكومة دي جنت وما براها
يعني هسه لو لقوا ليهم زول يتصفح في سودانيز اونلاين يقبضوا ؟!!!
ويحاكموا بي ياتو تهمة ؟
السُكر مثلا
يا حليلك يا ابو النيذ اخوي
يوماتي حيقضبوك تمزمز بي قوقل وطاشم بي سودانيز اونلاين

الأن حصريآعلىsudaneseonline فلم الهندي!

الفلم دا ما عجبك ولا شنو يالامين أخوي

Quote: الفلم دا ما عجبك ولا شنو يالامين أخوي

احمد اخوي
كيفنك
صدقني افلامك الهندية دي ما شفتها الا بعد ما جبت اللنك
يا زول افلامك دي دايرة ليها اجازة عديل وتفرغ تام عشان اشوفها كلها
تسلم يا سيدي
وكلنا في الهندي شرق





ــــــــــــــــــــــــــ
يا جماعة انتو وينو ود البشرى
يا ود البشرى ما تجيب البتاعة وتعال وفر مع اللمينز
ما تبقى خوتك خوة نت ساكت ياخ
يعني بالطريقة دي لو جيت الشارقة بتمسح عادي