Post: #1
Title: الكشة في جده ـ قصيدة حلمنتيش
Author: محمد جميل أحمد
Date: 11-11-2007, 12:30 PM
من بورسودان
قطع التذاكر للسفر
الود خلاص قال اغترب
كبّا الهموم فى راسو كب
هم للعرس
هم للقرش
هم للملابس والدهبْ
بتَّ الحلا ل قالتلو يا زولي الحبيب
والحاجة قالت ( يا مجيب)
نجّيهو لىْ من كلو (جيب)
والود كمان شال الدُعا
يا ربى يّسر لى سبب
***
قطع البحر
لا قى الهبايب والخطر
لمّن وصل( جّدة) بسلام
وقتو الوصل . من تاني قام شال الدُعا
يا كاشف الشر والكُرَب
نجيّني من جِيب ( العرب)
(جيب) النصايب والتّعب
و الكشّه والحظ الكَعَب
والناس تهاتي (الكشّه) جات
(الكشّه)راحت بى هناك
(الجيب) ظهر فوق الدَّرِب
الزول خلاص قلبو اضطرب
عقلو انشطب
فكر وحاول فى مفر
(لوحات حُمُر) فى السّكه
زى لمبات خطر
داقش يمين داقش شمال
لمّن وقع فوق المطب فى (باخشب)1
قام خابى خب
خاف السؤال
(وين الهوّيه) سؤال صعب
يرميكا فى ساعة غضب
من جدّه لمن ((ديم عرب)2
***
كابوس لعين
عامل كمين
سمّوه كشه فى كل حين
منَّ الصباح لما المسا
جيبات كتيره مكدّسه
ناساً تقول صابينا صب
***
صاحبنا قال عامل(مقيم)
زرّوه فى حي (النعيم)
شالوه فى الجيب واعترف
ساقوه لى سجن القرف
والود هناك ضاق الشّقا
وضاق العذاب لمن فتر
قال ما خلاص ما فيش مفر
الجانى فى اللوح إنكتب
أحسن اكابس فى البلد
أزرع أرض
أصبر وأكل فى القرض
أنا أصلى قُبّال انقبض
فى جدّه ما خليت محل
أسأل أفتش فى عمل
والزول هناك مهما انتعش
لا بدّ فى الجيب ينخمش
والناس هناك مغشوشة غش
(بالكبس)3 بس تعمل كرش
***
أهلى الغُبش
أحسن لى من جمع القرش
أنا ما هنالك شفتا العجب
أنا تاني مِنّّـأ التوبه تب
لا كشه لا جيب لا تعب
لا جّده لا جيب لاعرب
ــــــــــــــــــــــــــــــ
1 باخشب = شارع مشهور في جدة
2 ديم عرب = من أحياء بورسودان المعروفة
3 الكبسة = الأكلة المفضلة في السعودية
|
Post: #2
Title: Re: الكشة في جده ـ قصيدة حلمنتيش
Author: هاشم أحمد خلف الله
Date: 11-11-2007, 12:36 PM
Parent: #1
محمد جميل تصوير بديع جداً سلمت أناملك يا شفيف .
|
Post: #3
Title: Re: الكشة في جده ـ قصيدة حلمنتيش
Author: محمد جميل أحمد
Date: 11-11-2007, 02:46 PM
Parent: #2
شكرا هاشم على شفافية العشق للكلمات ، فالكلمات في النهاية هي التعبيرالذي يصور مشاعرنا
مودتي
محمد جميل
|
Post: #4
Title: Re: الكشة في جده ـ قصيدة حلمنتيش
Author: هاشم أحمد خلف الله
Date: 11-11-2007, 05:32 PM
Parent: #3
اخي الشاعر المرهف محمد جميل آمل منك المواصلة والمواظبة إحساسي بكلماتك لها دلالات ومعاني واصل ونحنا معك نقراء ونستمتع .
|
Post: #5
Title: Re: الكشة في جده ـ قصيدة حلمنتيش
Author: محمد جميل أحمد
Date: 11-11-2007, 07:05 PM
Parent: #4
عزيزي هاشم تحياتي ...
شكرا على الثقة وحسن الظن . هذه القصيدة كتبتها قبل 12 عاما بمدينة جدة (أم جداد) وتكاد تكون القصيدة اليتيمة لي في الشعر الحلمنتيشي والدارجي وكنت قد نشرتها في حينه بصحيفة (نبض الكاركتير) بالخرطوم (بتاع منعم حمزه). فأنا عادة أكتب الشعر بالعربية الفصيحة. لي ديوان مخطوط بعنوان (بريد الحواس) ... ومع ذلك حين يهطل الشعر لا يترك للشاعر خيارا في اللغة . فاللغة هي قالب الإبداع سواء أكانت دارجة أم فصيحة . أما الإبداع فهو ينبع من الذات ، وهو أيضا الذي يختار للشاعر لغته .
مودتي
محمد جميل
|
Post: #6
Title: Re: الكشة في جده ـ قصيدة حلمنتيش
Author: يازولyazoalيازول
Date: 11-12-2007, 08:02 AM
Parent: #5
تسجيل صوت إعجاب بالقصيدة وشاعرها الأستاذ محمد جميل
تسلم
|
|