بعض الاسماء السودانية ..النطق الخطا والمعنى الغائب

توجد كثير من الاخطاء الشائعة فى نطق بعض الاسماء السودانية بطريقة صحيحة, او كما ينبغى على قول السيد صادق المهدى مع الجهل بمعنى الاسم , وطبعا الجهل بالشئ ما عيب , لكن العيب المكابرة وادعاء المعرفة , وهنا سوف استدل بثلاثة اسماء على سبيل المثال وادعو كل من لديه مثال ان ياتى به الى هنا لتعم الفائدة .
المثال الاول : اسم( دولا او دوله ) ارجو ان تنطق الحرفين الاوائل( الدال والواو) مثل نطقك للرقم 2 فى لغة الكوتشينة مثلا تقول فى لغة الكوتشينة (دو شيريا , دو دينارى ) مع الاخذ فى الاعتبار بان ( دو شيريا) مثلا بيتكون من كلمتين اللى هى الدو ونوع الدو, لكن فى حالةاسم ( دولا او دوله) الكلمة واحدة مع فتح حرف اللام والالف او الهاء المربوطة, واسم دولا فى اللغة النوبية معناه الكبير او البكر , واى بيت نوبى اذا وجدت فيه شخص يلقب بدولا تاكد بان هذا هو الابن البكر وهو اسم( ذكر) واذا ما بكر لكل البيت بيكون بكر فى الاولاد وهنا اقصد بالاولاد( الذكور ), وايضا يطلق على الجد باعتباره الاب الكبير و يسمى (ابادول)ومن تصريف (دولا ) ايضا (دولى) بكسر اللام , وهذا الاسم هو الاسم الثالث للاستاذ البانكر و القطب الهلالى الكبير الاستاذ احمد عبد الله دولا وفى اسم السيد احمد عبد الله دولا لاحظت ان الناس ينطقون هذا الاسم خطا, كانما الاسم معناه (قطر) مثلا قطر السودان او دولة السودان , والنطق بهذه الطريقة يغير معنى الاسم تماما , و استغرب جدا عند ما اجد الاستاذ احمد دولا لم يقم بتصحيح الاسم للذين ينطقونه خطا , وهو الشئ الذى يجعلنى اشك فى معرفة الاستاذ احمد دولا نفسو بمعنى ونطق هذا الاسم , وشكى ده ممكن يكون فى محله مادام الاستاذ احمد دولا من دناقلة ام درمان على وزن دناقلة لندن .

المثال الثانى
اسم ( كودوده ) بضم الكاف والدال الاول وفتح الدال الاخير , واصل الاسم ( كدود) بنفس الشكل بتاع كدوده , بس الهاء فى كودوده ضمير راجع للمنادى به والاسم معناه (الصغير) فى اللغة النوبية , وهذا الاسم اسم عائلة الخبير الاقتصادى الدكتور فاروق كدودة واستاذى الجليل خفيف الظل المرحوم احمد بدر كدودة , هذا الاسم اى اسم (كدوده ) ينطقه ايضا الكثيرون بطريقة خاطئة, وزاد استغرابى فى البروف كدوده اكثر من الاستاذ دولا عند ما اراه يترك مثل هذا الخطا يمر مرور الكرام لان النطق هنا ايضا يغير فى المعنى رغم انه لا يوجد معنى للنطق الخطا فى اسم كدوده , وزاد استغرابى فى البروف كدوده لانو هو ما من محس لندن , بل من محس المنبع ( عبرى) , ولد وترعرع ونشاه ودرس كل المراحل الاولية هناك , بيعرف النطق الصحيح ومعنى الاسم يمكن كمان يورينا سبب التسمية يعنى بالعربى (نوبى دسم) .

المثال الثالث
اسم (نورى) بفتح النون وكسر الراء والياء , اسم منطقة فى الشايقية فى شمال السودان , ودائما كنت بلاحظ خطا نطق هذا الاسم فى نشر الثامنة مساء فى راديو ام درمان عندما ياتى اخبار الوفيات فى الزمن اللى كان الناس بتعتمد على توصيل خبر الوفاة عن طريق اذاعة ام درمان , مثلا المذيع يقول ليك توفى فلان الفلانى بمستشفى الذرة بالخرطوم ويقام الماتم بالصحافة مربع 35 وبنورى مركز مروى , ويقوم ينطق اسم نورى كانه نورى اسم الانسان المذكر بضم النون , وهنا يتم تغيير المعنى رغم انى لا اعلم معنى اسم نورى بالفتحة ( اسم المنطقة)

احلام
خدر

ياخالد

Quote: ويقام الماتم بالصحافة مربع 35 وبنورى مركز مروى

مربع 35 ميدان كورة

Quote: مربع 35 ميدان كورة

عبدالدائم
سلامات
شكرا على المرور من هنا , مع انى ما فهمت انت عايز تقول شنو.

فووووووووووق

خالد تحياتي
( اشميق ) و يعني بالنوبية الليف القوي الذي يحمي جسم النخيل و ينطق حاليا ( عشميق ) ، ولم يقم ال عشميق الدناقلة الاقحاح بتصويب الاسم و المعني .

حمد أمبس

ساتى معناهو شنو ...؟؟

ساتي دول الدنقلاوي القح جدا
هال مندي
معقول ما عارف معناها شنو ؟؟؟

عموما
هي حسب علمي معناها ( الشيخ بتاع الدين ) موش الشيخ التانية اللي هي ( سمل )
اذا انا غلطان صححني

والله ياحمد انا سمعت ليهو معانى كتيرة
منها ( شيخ الدين ) ده
لكن فى ناس تانين كدة بيقولو معناهو ( سعيد اوسعد )
عشان كدة انا وابوى لينا كم سنة مجهجين ...وماقادرين نرسى على بر ..
كدى غايتو شيل سعيده مع شيخ الدين وشوف ليك حاج من حجاجنا العاصرو بعانخى وأسالو ..
مودتى

الأخ خالد ..
بوست مفيد لكن للأسف لا أذكر الآن أسماء محدده ..
علي العموم ح نتابع معاك ونشارك بما نعرف ..
فيما يتعلق بسؤال الأخ الطاهر ..
( ساتي ) حسب معرفتي معناه الشريف ..
هذا ما علمته من عمتي رحمها الله ..
واللقب فيما علمت كان يحمله احد أجداد محمد احمد المهدي ..
إن لم تخني الذاكرة أظنه ( ساتي علي )..
كما حمل ذات اللقب ثلة من أسرة (الزياداب ) في المنطقة ..
والله أعلم .

محمد الملك ... سلامات ياخى

Quote: ( ساتي ) حسب معرفتي معناه الشريف ..

المزيد من الجهجهة ........

سعيد
شيخ الدين
الشريف
اقرض على ياتو في ديل
طبعا احسن لى الشريف وخاصة انو كان جد المهدى كما جاءت في رواية عمتك ...
كدى نشوف عم ولياب احتمال يكون عندو اسم رابع
وشهادتو موثوقة طبعا عم ولياب ده اقربنا لتاريخ ميلاد اللغة النوبية ..
مودتى

انا بستبعد سعيد
لانه عندنا في جنوب دنقلا في مراقد الشيوخ بيقولو عليها ( ساتي فلان ) يعني ساتي علي و ساتي محمد و ساتي حمد و دي قباب مشهورة لي شيوخ في القولد
و الله اعلم

و حدثنى صديقى الدنقلاوى ان ساتى هو النطق الاعجمى للاسم العربى ساطع
مزيدا من الجهجه

عمر .. كيف حالك

ده مستبعد تماما

Quote: و حدثنى صديقى الدنقلاوى ان ساتى هو النطق الاعجمى للاسم العربى ساطع

ساطع ده من الاسماء النطقها صعب شديد عندنا ، ولو حاولنا ننطقها بيجينا اللوز ...
شوف لينا خيار تانى
مودتى

ده جدنا

Quote: ساتي حمد

لكن قبتو فى كلتوس .. الجابها القولد شنو ..؟
ولا ياربي بيكون عندو واحدة تانية هناك ونحن ماجايبين خبر ...؟
كدى اتاكد لى قبة القولد دى في ارض زراعية واسعة ولا عطرون ساى ..!!

الطاهر مادام ما مقتنع هاك دي..

Satis زوجة خنوم وتصور في شكل أنثي آدمية ..
سيدة جزيرة الفنتين عند اسوان ، تؤلف مع خنوم والآلهة عنوقيت ثالوث منطقة النوبه ..
أنظر د. محمد إبراهيم بكر ـ تاريخ السودان القديم ـ ص 240 تحت عنوان أشهر معبودات السودان القديم.
عرفت ليه أبواتك لبسوا القفطان ..
لكن ما دام من كلتوس إنتو زياداب .

من الأسماء التي نخطئ في نطقها وكتابتها إسم (خضر) أو(الخضر) فينطقونها (خدر) وهو خطأ جلي بين .

يقول أهلنا (نبي الله الخدر) ويسمون عليه (خدر) أحد زملاء المنبر إسمه(خدر)

والتسمية بهذا الإسم تأتي تبركاً بإسم الخضر عليه السلام .

وهو العبد الصالح الوارد ذكره في قصة موسى عليه السلام في سورة الكهف (فَوَجَدَا عَبْدًا مِنْ عِبَادِنَا آتَيْنَاهُ رَحْمَةً مِنْ عِنْدِنَا وَعَلَّمْنَاهُ مِنْ لَدُنَّا عِلْمًا) وهو (نبي)على أصح الأقوال وسمي الخضر لأنه كان إذا قام للصلاة إخضر ماحوله، وقيل أنه صلى على أرض عشبها يابس فأخضرت . وهو حي إلى أن يشاء الله كما صرح بذلك أهل العلم .

اللطيف أن جداتنا (حبوباتنا) يعتقدن أن لونه أخضر أي أسمر فتقول إحداهن "رأيت الخدر في المنام لونه (أخدر) ويلبس جلباباً أبيض"

فهناك خطاً في النطق فيقال (خدر) وهو تصحيف والصحيح (خضر)

أما الخدر في اللغة العربية فهو البيت أو المكان الذي تخبأ فيه العذراء أي (البكر) التي لم يمسها الرجال . جاء في الأثر أن النبي كان أشد حياءً من العذراء في خدرها(تعبيراً عن شدة حياء الرسول الكريم صلى الله عليه وآله وسلم) والتشبيه بالعذراء لأنها تكون أشد حياءً من الثيب ومن غيرها والعذراء تكون أشد حياءً كذلك إذا كانت في خلوة أو بمفردها مخافة ان يظن أنه يفعل بها .

ويقول الشاعر إمرؤ القيس :

وبيضة خدر لايرام خباؤها ــ تمتعت من لهو بها غير معجل


تحياتي وتقديري لصاحب البوست وإن شاء الله يتواصل البحث .

الأخ خالد حاكم والإخوة المشاركين
تحية مباركة
يوجد بوست في إرشيف الربع الثالث للعام 2007 بعنوان(اللغة النوبية هل هي أصل اللغات العالمية) فيه الكثير المثير
وعن الأسماء السودانية فخذ هذه الإجتهادات:
ساتي : هي نطق أهلنا لكلمة (سيد) العربية ولذلك تجد ساتي علي - ساتي أحمد - ساتي حمد - ساتي عبد القادر والكثير
شمت: وهي أيضا من الكلمة العربية(شيخ محمد)
همت: ........................ (حاج محمد)
التنقاري: وهي أسرة كبيرة معروفة منها البروفسير التنقاري, وتنسب للكلمة النوبية(تنقار) وتعني الغرب
وجير : وهي أسرة البرفسير أحمد وجير أستاذ الإقصاد بجامعة الخرطوم وهي من كلمة(وجير) بكسر الجيم وتعني السوط أو العصاة
النو: وهي من الأسر المعروفةوتنسب للكلمة النوبية(أنو) وهي الجد
تبت : وهي أسرة معروفة تعمل في سوق الحديد والأسمنت بالسجانة وتعني بالنوبية الحداد

الأخ خالد حاكم ....

بوست جميل ومفيد ...

وشايفكم مركزين على الأسماء النوبية .. دي إنتو أدرى بيها وصححوها لينا ولي أهلها (شايف ساتي ما عارف معنى إسمو) .. بس كمان في أسماء عربية كتيرة تنطق خطأ، بل وتستخدم خظأ. يعني مثلاً تسمية بنت (سارية) خطأ شائع حسب ظني، لأن سارية كان رجل، بل وكان قائد جيش الخليفة عمر بن الخطاب (يا سارية الجبل). أيضاً نسمي (كلتوم) والصحيح كلثوم وهو إسم ذكري، والصحيح أيضاً أن نقول (أم كلثوم).

بالمناسبة أنا ما عاجباني حكاية تسمية الأولاد بإسم (جمال) ... السبب الوحيد هو معنى الكلمة ... مش أنسب يكون إسم بت؟

شكراً على البوست .... وإكان إتذكرت حاجة تانية بجيك

Quote: و استغرب جدا عند ما اجد الاستاذ احمد دولا لم يقم بتصحيح الاسم للذين ينطقونه خطا ,

تصحيح نطق اسم (فضل) وهو إسم جدى
إسم فضل ينطق بالخطأ فضول أي بضم حرف الضاد
والصحيح فضل بفتح حرف الفاء وتسكين حرف الضاد وهو بمعني الشرف والرفعة




............................................................................
وقد أعظر من انظر

التعديل لتصحيح حرف

أيضاً إسم (مُحي الدين) بضم الفاء أي مجدد الدين ينطقها أهلنا (مَحي الدين) بفتح الفاء أي إزالة الدين .

خربوا الإسم خراب الرقدوا (على قولة سجيمان)

أيضاً إسم (يُوسُف) بضم السين أهلنا ينطقونها (يُوسِف) بكسر السين .

(فاطمة) إسم السيدة الزهراء أم أبيها صلوات الله عليها، أهلنا حرفوا الإسم إلى (فاطنة).

(عبد الرزاق) ـ الرزاق ـ من أسماء الله الحسنى (إن الله هوالرزاق ذو القوة المتين) .

أهلنا يسمون (عبدالرازق ) والرازق ليس من الأسماء الحسنى وإن كان المعنى صحيحاً فالله هو الرازق .

في القرآن الكريم (والله خيرالرازقين )

(عائشة) أهلنا يقولون (عشة)

(خديجة) بعض أهلنا يلفظ الإسم (خجيجة)

(سُكينة) بضم السين وتعني الفتاة الظريفة أو خفيفة الدم النشيطة، ومن أعلام هذا الإسم أي (سُكينة) بالضم السيدة سُكينة بنت الحسين بن علي بن أبي طالب .

وأهلنا ينطقون الإسم (سَكينة) بفتح السين والسكينة هي الطمأنينة وزوال الخوف والرعب وهي لغة المهابة والرزانة .

ولعل هذا مراد أهلنا من التسمية فيكون في هذه الحالة صحيحاً.

إسم (عبد الله) أهلنا يلفظون الإسم (عبد اللاي)

قربوا يقولوا (عبد اللات) الصنم المشهور ، بس ربك ستر .

تسجيل حضور ومتابعة

شكرا اخي خالد حاكم على هذا البوست المفيد بعيدا عن سيدتا المنبر السياسة والكورة، وياريت توسع لينا الموضوع شوية ليشمل كل الأسماء السودانية الأخرى العربية منها والأفريقية بدلا عن حصره في الأسماء النوبية ..

Quote: وزاد استغرابى فى البروف كدوده اكثر من الاستاذ دولا عند ما اراه يترك مثل هذا الخطا يمر مرور الكرام لان النطق هنا ايضا يغير فى المعنى رغم انه لا يوجد معنى للنطق الخطا فى اسم كدوده , وزاد استغرابى فى البروف كدوده لانو هو ما من محس لندن , بل من محس المنبع ( عبرى) , ولد وترعرع ونشاه ودرس كل المراحل الاولية هناك , بيعرف النطق الصحيح ومعنى الاسم يمكن كمان يورينا سبب التسمية يعنى بالعربى (نوبى دسم) .

صديقتنا وزميلتنا بالجامعة غادة ابنة الدكتور فاروق كدودة تعبت معنا كثيرا في تصحيح نطق اسم جدها كدودة بضم الكاف والدال الاول وفتح الدال الاخير كما تفضلت .. لا ادري لماذا كنا نناديها بإسم الجد غادة كدودة بدلا عن اسم الأب غادة فاروق؟ ربما لقوة اسم الجد ـ كدودة ـ وغرابتة لذا طغى على اسم الأب ـ فاروق ـ .. بعد سنوات من كثرة تكرار الخطأ في نطق إسم جدها رضخت صديقتنا وسلمت امرها لله وواصلنا في نطق اسم جدها كدودة كما يحلو لنابفتح الكاف وضم الدال الأول وفتح الدال الاخير .. اؤكد لك ان الدكتور فاروق كدودة حاول تصحيح الناس في نطق اسمه وفشل هو الآخر وسلم امره لله ..

الصاوي

الاخوة
حمد فتح الرحمن
الطاهر ساتى
محمد على الملك
omer Abdalla omer
محمد ابوالعزائم
Alazhary2
sadig sati
Eng .Mohammed
نادية عثمان
Elsawi
شكرا ليكم جمعيا على المرور من هنا والاضافة واسف على التاخير عليكم.
خالد حاكم

الاخ حمد فتح الرحمن
ار سى
بما ان مداخلتك هى الاولى واتى بمثال حى من نوع الامثلة التى قصدتها , عايزك تكون الالفة بتاع البوست وتكتب لى المهرجلين وعايزك تبدا بكبير المهرجلين الطاهر ساتى.
الطاهر ساتى
ار سى
شنو داخل توش بلا سلام ولا كلام وكمان بتسال بدون استئذان , البوست ده قلنا الناس تجى بامثلة من نوع امثلتى الفوق ديك ومثال اخونا حمد فتح الرحمن, مش بوست كشكول الزول يقول ويسال فيه اللى هو عايزو, لكن ابدا ما حاكسفك وحاخليهو كما اردت بوست كشكول وخلينى اسالك سؤال كشكولى , النوبة او اللغة النوبية لاتتميز بالتعريف وحتى الاسماء العربية او الاسماء اللى معانيها عربية غير معرفة عند النوبة والتعريف هنا اقصد به التعريف بالالف واللام والتعريف بالالف واللام من ميزة العرب واللغة العربية, على سبيل المثال طاهر , حسن , زبير , سؤالى ليك يا اخى الطاهر , هل عم ساتى الذى ولدك فى قرية كلتوس او جزيرة ارس بمركز دنقلا بالمديرية الشمالية سماك الطاهر وليس طاهر ؟ قبل سنين سمعت بان والد الدكنور صابر محمد حسن محافظ البنك المركزى الحالى احتج احتجاج شديد اللهجة عند سمع فى الاعلام بان اسم والده حسن ينطق خطا هكذا (الحسن) عندما ياتون باسم ابنه فى الاعلام, وعامل حسابك اولادك ما يجوا يقول نحنا مسقط راسنا جزيرة (عرس) بدلا عن (ارس).

Quote: كدى نشوف عم ولياب احتمال يكون عندو اسم رابع وشهادتو موثوقة طبعا عم ولياب ده اقربنا لتاريخ ميلاد اللغة النوبية ..

بصراحة البوست جميل ..و عاوز واحد يتفرغ ليه .. لكن المشغوليات كتيرة اليومين دول...!!

عموما لا اعتقد أو لا استطيع أن اجزم بنوبيتها فالاسم " ساتي" الذي اخذ في دلالاته بعض المعاني الأقرب إلى الوجاهة و علو المكانة . ولكن من مبدأ عدم انتشاره في كامل المناطق النوبية حيث لا وجود له في المناطق النوبية الواقعة شمال دنقلا وتكاد تنعدم كلما اتجهنا شمالا ، وله وجود ملحوظ في المناطق الواقعة جنوب دنقلا وحتى ديار الشايقية ... لذا يرجح عندي كفة تحريفها من نطق أو دلالة عربية.

فوووووووق

فووووووووق

دار حوار بين زميلين تربطهم صلة قرابة عبر جهاز راديو ,احدهم من مدينة ودمدنى حيث يعيش هناك , بينما مسقط راسه تنقسى الجزيرة مركز الدبة بالاقليم الشمالى والاخر من مدينة الدبة حيث يعمل هناك بينما ايضا مسقط راسه تنقسى الجزيرة, حيث عمل الاول بمدينة الدبة ردحا من الزمان قبل الانتقال الى اسرته فى مدينة ودمدنى مرة اخرى , وهؤلاء ينتمون الى قبيلة البديرية الدهمشية التى تنتمى الى المجموعات العربية فى السودان.
واليكم نص الحوار
عمر : بابكر ازيك
بابكر: مرحب عمر
عمر : كيفك انت وكيف الاهل ؟
بابكر: والله تمام , كيفك انت وكيف الاهل طرفك؟
عمر: والله كلهم تمام وبيسلموا عليك
بابكر : الله يسلمهم
عمر : اها انتهيتو من حصاد البلح ؟
بابكر: اى حصدناهو , لكن البلح ما طلع كشوش
عمر : كلو طلع كشوش؟
بابكر : لا جزء كبير منو
عمر : اذن مافى داعى الكشوش تخزنوهو , بيعوه طوالى
بابكر :اى انا ذاتى قلت كده
عمر : الاخبار التانية شنو هناك فى البلد؟
بابكر: عبد المنعم دعوتو يوم الخميس الجاى , عايز يعرس
عمر : عليك الله يا بابكر تهانينا ليهو وعامل لى الكسيق معاك
بابكر: يصل انشاء الله , عامل ليك الكسيق كم؟
عمر: 20 جنيه
بابكر: جدا , يالا مع السلامة
عمر : مع السلامة

اعزائى عندما نقول بان الدارجة السودانية فى اللغة العربية ملقحة باللغات السودانية كما النخيل , لا نقول هذا الكلام من فراغ وعلى سبيل المثال المفردات النوبية الموجودة فى الحوار اعلاه وبتتناول هذه المفردات النوبية عند عرب الشمال كانما هى عربية باضافة الالف اللام وبتحريف بعض الكلمات فى النطق كما فى الامثلة اعلاه (الكشوش والكسيق) واصل الكلمات بالترتيب( كشوش) وليس الكشوش , و (كسى) بفتح الكاف وتشديد السين وليس الكسيق . معانى الكلمات التى تحتها خط والتى تحدثنا عنها افتكر معانيها مفهومة من حيث موقعهما فى الجمل , اذا كانت غير مفهومة مستعد لشرح معانيهما لمن يرغب.