يغلبوكم تزوغو .. يغلبوهم تكوركو ..( النجــار )

أكتب هذا البوست وفي بالي .. ( عمر جورس ) النجار .. جارنــا وصاحب الورشة التي كنت اصنع فيها طيارات الخشب .. وحصالات النقود.. (والطبلية) . حيث إن شخصي الضعيف .. كان فيما سبق يعاني من احساس عالي جدا بعلم الهندسة .. وهي غير الهندسة الوراثية .. بل المقصود بها:
- هندسة صناعة (النبل) بأنواعها المختلفة .. مع مراعاة ضبط العمليات الحسابية المعقدة المتعلقة بضبط النيشان .. حيث لا يجلي الحجر الطالع منها يا .. (الوروار) كما الحال في نبل الاستك بتاع القروش ..
- هندسة صناعة العربات بنوعيها .. عربات السلوك وعربات علب اللبن .. مرات العربات بتقرب تمشي عديل كدا ..
- هندسة صناعة البرشوتات .. من أكياس النايلون.
- هندسة صناعة الصنارات والرمايات بجميع انواعها .. والتي تعرفها كل الكائنات البحرية في بحر المورده ..
- هندسة صناعة المدافع .. مدافع القرطاس ومدافع العجلات ..
أما هندسة النجارة فهذا علم قائم بذاته ..

تمبا

ما نستعجل

لبوستك بقية
وجينا للتحية

- بعدين مسالة الطبلية دي ما حاجة ساهلة .. فيها فنيات خطيرة جدا .. يعني (السلك) لازم يكون ناعم .. ونوعية الخشب تكون نضيفه وخالية من العيون .. وبعدين ما تديها بوهية .. وتكون حريص إنو ( الرزه ) تكون ما كبيرة خالص .. (والطبلة) تكون من النوعية المصنوعة في الصين ..
- (المسامير) تكن بوصة واحد .. في نوعية كدا من المسامير لونه اسود دي ما بتخارج .. يعني المسامير اللونه فضي دائما بتكون قوية .. يعني (المسمار) لا بيتعوج .. ولا بيتكسر ..
خاصة المسمار الما بتتدرن .. اقصد المسمار الما بنقلع بسهولة من الخشبة ..
ودي طبعا النوعية بتاعت الهندسة البتكلم عنها ..
وهي هندسة نوعية .. يراعي فيها المهندس كيف .. يحدد مكان المسمار .. ودرجة سقوطو على (الخشبات) ويروح طاخ .. يختو .. لو كان بالهيد .. أو بالقدم اليسرى أو دبل كك ..
يعني الطبلية ممكن في لحظة تتحول .. لي راكــوبة ..

Quote: ما نستعجل لبوستك بقية وجينا للتحية

يا هندسة .. البوست دا (سريالي).. .. أو (كاشوال) .. والفورة فيهو .. واحد صفر بس .. بالنوته.. كمان ..
يا هندسة اصحى للــون وخليك مفتح

الحمد لله يا ابوقوته عرفت قصدو

شفت البوستات الاتفتحت من الجماعه ابين درون

نسو هزيمتهم من هلال بورسودان بالتسعة لعيبة

تحياتنا يا تامبا

واصل

تمبس
سلامات

Quote: بعدين مسالة الطبلية دي ما حاجة ساهلة .. فيها فنيات خطيرة جدا .. يعني (السلك) لازم يكون ناعم .. ونوعية الخشب تكون نضيفه وخالية من العيون .. وبعدين ما تديها بوهية .. وتكون حريص إنو ( الرزه ) تكون ما كبيرة خالص .. (والطبلة) تكون من النوعية المصنوعة في الصين ..

طبلية زى دى بتشتغل معاك خمسة سنوات على التوالى

يغلبوكم تزوغو .. يغلبوهم تكوكو

والله يا تامبا حيرتنا عديل كده ..مالك بقيت تتكلم ب(الالغاز ) الناس دى كلها مقهيه قايلنك داير تتكلم عن (ناس) ستى
رجاء دى وكده ..تسويها لى هندسه ونجار وخشب .. يا اخى اتكلم عديل ..الناس دى راجيه واحد يفتح الباب..
تحياتى ,, ومودتى..

Quote: الناس دى راجيه واحد يفتح الباب..

يفتحوالباب شنو يا آدم .. اكتر من كدا يعني ؟؟
تعرف يا آدم اصلو العنوان كان شكلو كدا..
يفتحو ليكم في الخرطوم ويدقوكم في عطبره .. لكن الله ستر .. حسع كان جو طلعوني متواطئ زيي .. زي الحكم واحد..

Quote: طبلية زى دى بتشتغل معاك خمسة سنوات على التوالى

يا ابو التيت ..
الخوف كمان في الخمسة سنوات دي .. من (خمسات) كل يوم (سبت)

Quote: الحمد لله يا ابوقوته عرفت قصدو شفت البوستات الاتفتحت من الجماعه ابين درون نسو هزيمتهم من هلال بورسودان بالتسعة لعيبة تحياتنا يا تامبا واصل

يا عبس .. ياخي (الرجــاء) ما تحرق لينا دمك مع الجماعة ديل .. إنت كل المطلوب منك تخليهم ينزلو حاجاتهم دي .. بعد نهاية الكورة .. وتجي من الصباح تلقطهم واحد واحد وتلمهم .. وتجي تعمل ليهم فرش متاع هنا.. وتستمتع بي المغصة بتاعتهم دي .. وكان بقيت عندك زمن كافي .. تقعد تلعب لعبة التوقعات .. يعني مثلا:
تتوقع العناوين كان شكلها ح يكون كيف لو مثلا .. غلبناهم خمسة صفر .. العناوين ح تكون كيف في حال إننا اتعادلنا .. العناوين ح تكون كيف في حال انو نحن غالبين بي المسمار دا .. واتطرد مننا هيثم مصطفى لاقدر الله وكلاتشي ..
ياخ اقول ليك حاجــة:؟
عييييييييك عديل كدا

غايتو الهلالاب ديل..
لا بيخجلو..
لا بيختشو..
...........
............
............
فرحانين كمان؟!!!

طيب
عشان نحن ناس نجــارين .. وفينا مهندسين .. بتاعين اي حاجــة .. وعلماء منطق كمان .. نحن حريصين جدا إنو عزيز الأمير الكوشي بشاشا يكون في تابوت واحد معاهو .. اقصد في الصورة .. علشان كدا عزيزي القارئ نحن ح نجيب ليك الحقائق كلها .. أو بي كدا نكون (عريناهم) زي كل مرة ..
واحد:
بمساعدة الحكم وطرد لاعبين من الشوط الاول ..حااااااحا يا تاج السر..
إتنين:
نجح ((فريق الحُمار الفطيس)) بمساعدة الحكم ((أحمد يعقوب)...ز على الامل((عطبرة))
تلاتة:
موقعة ذات الكروت بعطبره ومشروع قتل الامل



هذا ما تم رصده حتى الآن .. وصاحب الطبلية يميز..

Quote: غايتو الهلالاب ديل.. لا بيخجلو.. لا بيختشو.. ........... ............ ............ فرحانين كمان؟!!!

والله جنس فرح يا عقيد .. فــرح بسيسو بس
اصلو نحن ناس واضحين
المحلي ده بنموت ليك فيهو موت ..
بلو راسكم بس ..
تلفونك خبارو ما بيرد
من ايام العيد بيقول لي التلفون دا غير مستخدم ..
بعد الضرب بتاع المرة الفاتت داك .. ابو اتنين اتنين .. بقى يقول لي (الرجاء) محاولة الاتصال مرة اخرى .. الرجاء .. الرجاء

تامبا
سلام يا صاحب

Quote: ابو اتنين اتنين

انت ما سمعت ولّأ شنو.. في جماعة هنا بقو يطردو ليهم (اتنين اتنين)
وبرضو (يجيبو واحد)..

Quote: بقى يقول لي (الرجاء) محاولة الاتصال مرة اخرى

وانت الصادق.. بقى يقول:
(الأمل) أن تعمل اتصالين في (فت مرة)

الرقم اهو 00249915167541



بالله أمشي سطح بيتكم وارفع يدك كدا بالتحية للفيصلية..

اشتقنا

Quote: انت ما سمعت ولّأ شنو.. في جماعة هنا بقو يطردو ليهم (اتنين اتنين) وبرضو (يجيبو واحد)..

يا عقيد .. بعد كدا الخطه اتغيرت يا صاحب .. مش كانت عامله كدا .. سبعة ونقط نقط .. يلالا بعديها تلاتة ونقط نقط .. وبعيدها مسمار جحا دا .. يللا بعداك (الاتنين ) واعمل حسابك من الاتنين وطردت الاتنين ..ما تبقى عليكم حكاية السعودي القعد يقالع في الناس بعد نهاية الكورة .. اصلكم وتعودين .. زمان زيكز شاله وطلع بي وشو .. التقول قالو ليهو الكفر نازل وماشي (ينفخــو) ..
والله يا جنابو كلما اجي ماشي بي جمب الفيصلية بصنقع ليك .. أما في ساعات الزروة والقرفه العارفه ديك .. مكاني بيمكون في السطوح قريب للسماء .. وانوار الفيصلية بتكون ضاربه يعني اللحظة البكون بعد فيها الطيارات البتجي ماشه في السماء .. بنديك طله برضو ونقيف على اماكن كنت فيها .. طبعا نحن في الطابق (التاني )
الطابق ( التاني ) دي ما قاصد بيها حاجة .. قاصد ليك مقابلين عمارة الفيصلية .. مننا والسطوح

بعدين في حــاجة محيراني

الهلال دا يطقطق .. الخرطوم تلاتة .. مية لي صفر .. يجوز السمكرجية الصباح قبلما يفتحوا الورشة .. يقولو ليك الخرطوم تلاتة امس فاتحه عديل كدا للهلال ..
نقول كويس .. ونسكت ساكت والضحك يفقعنا ..
نمشي عطبرة بلد الحديد والنار .. والجماعة برضو خاتين بالهم .. نقوم نضرب جماعتنا المحرشنهم .. بي المسمار الشهير .. الما بتدرن داك .. يجو يشبكونا ليك:
والله الحكم خاين ..
الطبلية بتاعتكم دي .. مليانه كلها لبــان ..
يمسكوهم .. يقعدوا يفلقو في الناس ..
..
المضحكني في القصة دي:
الناس دي قالت المحلي داخــل عطبره .. وإنتو ناس محليين .. ونحن ناس بتاعين كاسات وبنجيبه ليكم من بره ..
طيب خلونا نحن في محليتنا دي .. ومع الأمل عطبره .. ومع الخرطوم تلاتة .. خلصو اموركم وتعالو لينا لما نغلب الناس جوه هنا .. إنتو خليكم بعيد عشان الدم ما يرشكم .. والمسامير دي احتمال تعمل ليكم تاتنوس ..
لما نغلب ليكم الناس ديل .. ما تقولو ليهم جدعوهم بالحجار .. وطقعوهم، الكلام دا عيب منكم .. إنتو ناس كبار وعالميين .. خليكم من محليات عطبره والدامر وجزيرة الفيل دي ..
(الرجــاء) منكم عدم التدخل في الشؤون الداخليه لحدت ما تدخلو في عنق الزجاجة .. وتجو راجعين بي وشكم .. وبتلقونا راجنكم .. كان في عطبره .. كان في العرضة ..

إزيك يا حاج تم تم
"التا دى عليها ضمة، وضمة شديدة كمان"

يعنى بالتو، ما بالتا

بعدين عايزين نسميك كدا لأنه وزى ما إنت عارف طبعا

التمتم ده إيقاع سماوى عديل، إيقاع عبقرى

عشان كده لما الزول يكون سماوى "أزرق وأبيض" بنسميهو عليهو

ندخل فى الموضوع

تعرف ناس الهلالاب الما مقتنعين ديل

ما عندهم والله عيب يقولو عليهو

غير لون الهدوم البلبسوها دى

الأحمر براهو مافيهو كلام، الأصفر براهو شرحو

لكين ما ممكن ياخ كمان تلبس ليك هدم احمر وأصفر

وين الحس الجمالى ووين التذوق الفنى ووين الهارمونى والكاونتربوينت ذاتو

طيب خليها أحمر وأبيض، معقولة شويه مش؟

خليها اصفر وأزرق

الزول يبقى ياخى زى المتنكر فى هيئة جالون زيت شل

بعدين عايز اقول ليك شنو تانى كمان

النجارة دى برضو مهنة سماوية

قول لى كيف

سيدنا المسيح عليه السلام مش كان نجار برضو

ولا أنا لخبطت الموضوع

وأزرق جميل عاجبنى لونو

والله يا مطر الواحد بعتقد فيك كتير جدا .. بالذات في مسالة المزيكا البتتركب في الاسماء دي .. لانو زي المزيكا دي ما بيعرف يفرتقه ويطلعه من حتات زي دي .. إلا زولا ابيض وازرق عديل كدا .. يعني بي كل وضوح زول فنــان ..
قبل يومين بحضر في التلفزيون جابو الدكتور الاسمو محمد حسين كسلا .. الولد النجيض دا .. والله يا مطر عاينت فيهو كدا مع اني ما حضرت زمنو .. لكن عرفتو ليك كان بلعب كيف .. بلاي كلامو زاتو فيهو فن..
كدي ندخل في موضوعك دا يا مطر وخلينا نخلط الأحمر مع الأصفر دا .. يا ربي بيدينا شنــو ..؟
دي بتطلع لينا حاجة مجوبكه خالص .. بعيد عنك .. شترا عديل كدا ..
لكن كدي شيل الابيض دا .. ودخلو في اي حاجة .. بيعدل ليك مزاجه ..
شيل الأزرق دا ودفقو ليهم في الأحمر بتاعهم دا .. شوف ليك البنفسج البنديهم ليهو دا .. والفرح البنصنعو ليهم .. إنت قايلهم حسع دي ساكننا كدا ليييه يا مطــر ..
ما ياهو شان الفرح دا ..
الفرح والخوف الاتنين مع بعضيهم ..
نفرحهم ليك بي جاي .. ونرهبهم ليك بي جاي ..
والله ما كتر غلا النجارين عندنا .. بلاي الواحد فيهم شايل اللوح بي ايد .. والالوان بي ايد ويرسم ليهم .. وما بنيسى برضو يهندسه ليهم .. وينجر من طرف ..
لعب .. فن .. وهندسة ..
والله يا مطر انا بقترح إنو الأولاد ديل بعد كدا يجو داخلين الميدان بي عدتهم.. يعني بدل ما يجو شان يلعبو كوره .. ويشتروهم .. ويجدعوهم بي علب الموية والبيبسي .. (ومنافيخ) العجلات .. بقترح إنو الاولاد ديل يجو داخلين تاني بي كمنجات بس ..
الشوط الأول يسمعوك المامبو السوداني بي توزيع الفاتح حسين ..
وبين الشوطين يجيبو ليهم ساكسفونات .. ويسمعوهم شوية حقيبة على مارشات اسماعيل عبد المعين
والشوط التاني يدوهم واحد صفر
وبرضو بالمزيكا ..

الواحد جاته رغبة يمشي يجيب ( صعوط ) من ( الجمري ) ..
..
..
ذكرتني ( محمدو ) جارنا .. اخو ( احمد يكيني ) بتاع ( الخرطوم تلاتة ) ..
كان بلم ليك ( شفع الحلة ) .. وبفكها ليك فيهم ذي ( فكتك ) دي ..
..
..

Quote: (ومنافيخ) العجلات

يا حليلك ..
هسع الواحد بجي داخل ( الاستاد ) وشايل معاهو ( بلكات ) العربية ( اتوز او كليك في غالب الاحيان ) ..
انت من زمن ( المنفاخ ) ..

Quote: وبفكها ليك فيهم ذي ( فكتك ) دي ..

..

Quote: يا حليلك .. هسع الواحد بجي داخل ( الاستاد ) وشايل معاهو ( بلكات ) العربية ( اتوز او كليك في غالب الاحيان ) .. انت من زمن ( المنفاخ ) ..

.. تعرف يا حافظه مشكلتك إنك بتعرف حاجات كتيرة جدا .. دي اكبر مشكلة ممكن تواجهك في الدنيا دي ..
المرة الفاتت قاليك اعمل حساب الصاعود بتاع الجمري دا لو ما فطرته كويس .. لانو بكوفر بيك ..


يشيل معاهو البلقات بلاي ..؟
واتوز
وكليك ..؟
شفت عشان الحركات دي .. احسن ليك تشتري ليك عجلة ..
أجيب ليك عجلة واللا كدا كويس ..؟

والله صحي ذي ما قال ( ابو جهينة ) ..
الناس ديل بقوا ( حساسين ) خلاص ..
..
..
كان ما عرست يا ( تمبس ) .. تاني ما بجي أرد عليك ..!

صديقي الودود تمبس

مساءك سعيد دوماً ،،،،


هسه بجي الخريف واللواري بتقيف والمايشتري يتفرج وتذكر كلامي هذا جيداً ،،، وسنلتقي . بس بل رأسك


مودتي


عماد

Quote: صناعة (النبل)

Quote: صناعة البرشوتات

Quote: صناعة المدافع

أمنجي وعرفناها... كمان شغال في التصنيع الحربي؟!

تمبس ، ودالريح

عندما تقرأ التاريخ ، وتنظر لعظماء الكرة ، ستعرف لماذا شجعت الهلال .... وعندما اقرأ لك ولود الريح ، اعرف لماذا انا انتمي (لكم ) ....

عليك الله يا ود الريح اعمل لينا بحث عن كباتن الفريق القومي ، وشوف لينا الكابتن كان ينتمي لي منو علي مدي التاريخ ،، انا متأكد ستصل الي نتيجة ستدهشك .... وهاك دي فقط عشان (تآمنوا )

النقر

طارق احمد آدم

هيثم مصطفي

وقبلهم علي قاقرين

والحبل علي الجرار ....

سلام يا امنجية ...