الهلال x الأمل

عشرة دقائق و النتيجة التعادل السلبي

فوز الهلال اليوم يؤمن الخماسية لسهولة المباريتين القادمتين
ضد الأهلي مدني و المريخ

مساوي يضيع هدف داخل خط ستة

_______________________________

قلت لي يا قرضابي
الأمل الليلة (رجاء) الوصيف الأخير وكدا

ربنا يسترك يامجد اوه نسيت يانجم

Quote: ربنا يسترك يامجد اوه نسيت يانجم

حلوة يا عمك
خليك (قاعد) لجنس دا

يغيب اليوم للإيقاف قودوين و حمودة

تشكيلة الزعيم :
المعز محجوب

يوسف محمد
داريو كان
خالد جوليت
علاء الدين جبريل

ريتشارد
عمر بخيت
مساوي
هيثم مصطفى

كلتشي
معز كبير

الدقيقة 28 والتعادل السلبي لا زال قائما
شنو يا كلتشي ياخ ما عوايدك تأخرنا كدا

ثلاثة دقائق وقت بدل ضائع
الأمل تكتل دفاعي و إنضباط جيد
مع خطورة ملحوظة في الهجمة المرتدة

سلام للجميع

المعلق الإذاعي مزعج، لا يتغير صوته بين الهجمات الخطرة وغيرها من
باقي أوقات المباراة، ولذلك يظل المستمع له في حالة ترقب دائمة!

صدق من قال: ليس من رأى كمن سمع.

43 دقيقة والتعادل السلبي لا زال قائما.

يالله درووووووووووووووون

طرد لاعبين اثنين من الامل عطبرة في الدقائق الاخيرة من الشوط الاول.. النتيجة سلبية

Quote: يالله درووووووووووووووون

إستغفر يا عبدالله
خلي (رجاءك) في الله كبير

طرد أحد لاعبي الأمل
لضربه المعز محجوب من الخلف
أخشى من تجدد إصابة المعز
الشريف ما ببسط كان دخل

طرد لاعب اخر من الأمل يبدو للإحتجاج
إذن الأمل بتسعة لاعبين

هسي يقوليك الحكم بوتسواني

بطاقتين حمراوتين لداؤد مهاجم الأمل بعد شلوت في الرأس
وللاعب علاءالدين من الأمل للاحتجاج
بس باقي ضربة جزاء ظالمة ونكون الوصيف

Quote: باقي ضربة جزاء ظالمة

وتتعاد مرتين

..
حكاية طرد ( لاعبين اتنين) دي ( مستحقة ) ؟؟

أفيدونا يا الناس البتشوفو




الإذاعة دي بوظت اعصابنا ..
..

كما ذكر الأخوان:
بطاقتين حمراوين للاعبين من الأمل عطبرة في الوقت بدل الضائع للشوط الاول، طرد الأول
لاعتداءه على المعز محجوب بدون كرة، والثاني لاحتجاجه على حكم المباراة.

المعلق الإذاعي قال إن الاعتداء كان واضحا ولم يحتج اجتهاداً من الحكم. وأرجو ممن
يشاهد المباراة تأكيد صحة حالتي الطرد.

نهاية الشوط الاول بالتعادل السلبي.

بي تسعة إن شاءالله الأمل عطبرة فـــــــــــــــــــــــائز
3

خالـــــــــــــــــد شندي جنب عطبرة

الحكم بالغ
اللاعب احتك في الهواء مع المعز وعند هبوطهم على الارض لم يلمسه وبادر المعز بمسك رأسة تقول بيضوضان جاهوا!

الاخ راكوبة

Quote: اللاعب احتك في الهواء مع المعز وعند هبوطهم على الارض لم يلمسه وبادر المعز بمسك رأسة تقول بيضوضان جاهوا!

و الله حرام عليك،


الإخوة الكرام ،

انا أشاهد المبارة على الهواء على قناة النيل الازرق .

حالتي الطرد صحيحتان 100%

الكرة كانت ركنية ، ابعدها المعز بسهولة في الهواء و لم يكن هنالك اي داعي للإحتكاك و لكن لاعب الامل عطبرة رقم 3 بالرغم من ان ليس لديه اي حظ في هذه الكرة و من خلف المعز ضربه برجله وهو في الهواء.
و عندما سقط في الارض ضربه مرة ثانية في راسه مباشرة من الخلف. لذلك فهو يستحق الطرد.
أما الكابتن فيبدو أنه قد إحتج على الحكم و اعطاه الكرت الاصفر الثاني.


تحياتي و إحترامي


عمار يس النور
عاشق بخت الرضا

طرد المهاجم داؤد مستحق لأنه رفس المعز علي الرأس وهما على الأرض
و كانت أوضح من الشمس في رابعة النهار...
أما الاحتجاج لم نسمع ماذا قال اللاعب علاءالدين للحكم و يبدو أن اللاعب أساء للحكم
ولم يتخيل أن الحكم يمكن أن يطرد لاعبين في عطبرة

محلي ودخل عطبرة وين المشكلة؟

قلت لي آخر أمل الأمل عطبرة
ليه يوم 29 نوفمبر اجازة ولا شنو؟
وله ضامنين الله يستجيب دعواتكم زي الدورة الاولى (يا الله درون).

Quote: يوم 29 نوفمبر

يا عمك
الوصيف و جوة استاده
و ما معروف الظروف الحايجي راجع بيها كيف من تونس و المغرب وكدا
دقيقة ياخ
دي نقاطها الفنايل براها بتجيبا

Quote: الحكم بالغ اللاعب احتك في الهواء مع المعز وعند هبوطهم على الارض لم يلمسه وبادر المعز بمسك رأسه

يـُـنـظـَـر ويـُـفاد


_______________________

متوكل أحمد صلاح، مدرب، استضافه المعلق بين الشوطين فقال:

الهلال يلعب كرة حديثة... فما بالك لو كان الشغلانية فيها نقيصة وكلام زي
ده... والهلال عندو هيثم مصطفى وكلتشي وبتاع

بداية الشوط الثاني
و قووووووووووووووووون
مساوي

تبديل بخروج جوليت و دخول كرنقو

___________________________________

أحسب يا راكوبة

Quote: قووووووووووووووووون مساوي

الهدف هو التاسع لسيف مساوي في الدوري الممتاز لهذا الموسم.

بعد حالتي الطرد إن شاء تغلبوا

المعلق الإذاعي أشار لسلوك غير رياضي في أحد جهات الإستاد،
لم يذكر تفاصيل لكن يبدو أنه يقصد شغب جماهيري.

ديل رشاشات بسخنوا ياودالريح

المباراة كانت متوقفة بقرار من الحكم ومدرب الأمل يطلب من الجماهير الهدوء،

يوسف محمد خرج مصابا ودخل بدلاً عنه زرياب،

الآن تلعب المباراة في الوقت بدل الضائع.

الأمل
وعطبرة
وثمانية لاعبين
وواحد صفر

الله يكون في عونكم
وشامتين في الرجاء؟
الامل والرجاء والترجي اسم لمعنى واحد بالمناسبة.

Quote: الامل والرجاء والترجي اسم لمعنى واحد بالمناسبة.

لا يا عمك
ممكن تترجى وتأمل في اي وضع, لكن عشان الرجاء لازم إذا كنت (قاعد) تقوم على حيلك وكدا

حصلنا أصعب تلاتة نقاط و حسمنا امر الممتاز بإذن الله
الباقي حمام ميت او ما شابه
خاب (رجاء)ك يا راكوبة ومن لف لفك
لتواصل (القعاد) في (مقعد) الوصيف للعام الخامس على التوالي

نهاية المباراة بفوز الهلال 1-0.

إذا تعثر المريخ بالتعادل غدا أمام الخرطوم بإستاد الخرطوم ، ثم فاز الهلال على الأهلي
مدني بعد أيام؛ فسيتوج الهلال بطلا للدوري الممتاز للمرة الخامسة على التوالي دون
انتظار نتيجة مباراته الاخيره مع نده التقليدي.

كوت:
نهاية المباراة بفوز الهلال 1-0.

إذا تعثر المريخ بالتعادل غدا أمام الخرطوم بغستاد الخرطوم ، ثم فاز الهلال على الأهلي
مدني بعد أيام؛ فسيتوج الهلال بطلا للدوري الممتاز للمرة الخامسة على التوالي دون
انتظار نتيجة مباراته الاخيره مع نده التقليدي.


واضح انكم خايفين من نده التقليدي جداً وركز لي على تقليدي دي!

إنشاء الله التاريخ يعيد نفسه (مباراة الفرص الواحدة ) تذكر عبدالمجيد جعفر و نميري احمد سعيد (رأسيتين )

Quote: واضح انكم خايفين من نده التقليدي جداً وركز لي على تقليدي دي

انا عن نفسي -يا abdelwahab hijazi- أخشى على الهلال في أي مباراة
لأن المنافس إن لم يهزمك لضعفه فلربما هزمك الاسترخاء والاستهتار ومفاجآت
كرة القدم.

أما مباراة الهلال مع نده التقليدي فأكون كاذبا لو قلت إني لا أخشاها، فوز
أي من الفريقين على الآخر أمر معتاد، رغم أن نتائج مباريات الفريقين في
الدوري تميل لصالح الهلال بنسبة كبيرة، 12 فوز للهلال مقابل 3 فقط لنده.

أتمنى تعثر المريخ غداً مع الخرطوم ثم فوز الهلال على أهلي مدني، ويا دار
ما دخلك شر
________________________

بتصدقني لو قلت ليك إني لم أشاهد من قبل ضربة ركنية للمريخ في مباراة مع
الهلال؟!

الف مبرووووووووووووووووووك
لسيد البلد الفوز فلقد جاء بعد عناء وجهد وضرب للاعبى سيد البلد
وشغب من جمهور عطبره
وهكذا يرتفع رصيد سيد البلد ال 58 نقطه متصدر
ونخلى الوصيف خائب الرجاء فى المركز التانى كالمعتاد

يا ود الريح ما تنكت التاريخ
راكوبة وشيبا بجوك اوديوفيزوال

بصراحة عجبني كلامك الاول عن احترام الخصم وليتنا جميعاً نعي ذلك.

بتصدقني لو قلت ليك إني لم أشاهد من قبل ضربة ركنية للمريخ في مباراة مع
الهلال؟!

بصدقك لكن أنا شفت ليكم بلنتيات كتيرة وبعضها درنتو بيهو من زمن قاقارين.

Quote: انا عن نفسي -يا abdelwahab hijazi- أخشى على الهلال في أي مباراة لأن المنافس إن لم يهزمك لضعفه فلربما هزمك الاسترخاء والاستهتار ومفاجآت كرة القدم. أما مباراة الهلال مع نده التقليدي فأكون كاذبا لو قلت إني لا أخشاها، فوز أي من الفريقين على الآخر أمر معتاد، رغم أن نتائج مباريات الفريقين في الدوري تميل لصالح الهلال بنسبة كبيرة، 12 فوز للهلال مقابل 3 فقط لنده. أتمنى تعثر المريخ غداً مع الخرطوم ثم فوز الهلال على أهلي مدني، ويا دار ما دخلك شر

يا سلام عليك ياود الريح ،،،،،،،،،


اعود فقط لحالتي الطرد التي حدثت اللاعب ضرب المعز بشكل واضح لا لبس فيه ، ويستحق الطرد ، الحالة الثانية ، جعلتني افكر في قناعة لدي تجاه اللاعب السوداني (كابتن الفريق) اعتقد ان كابتن فريق في السودان يؤمن ان جزء من مهامه الاحتجاج للحكم ، وبطريقة عجيبة، كابتن الامل عطبرة قام بهذه المهمة وكانت العصبية واضحة جدا في بداية المشهد ، بعد ذلك اختفت صورة الحكم واللاعب ، لان كانت هناك مجموعه من اللاعبين بين الحكم والكاميرا ، حتي المذيع لم يعرف من هو المطرود الا بعد ان راي اللاعبين الاثنين في المدرجات .....

كتب راكوبة:

Quote: الحكم بالغ اللاعب احتك في الهواء مع المعز وعند هبوطهم على الارض لم يلمسه وبادر المعز بمسك رأسه

بينما كتب محمد البشرى الخضر:

Quote: طرد أحد لاعبي الأمل لضربه المعز محجوب من الخلف

وكتب عمار يس النور:

Quote: حالتي الطرد صحيحتان 100%

وكتب القردابي:

Quote: طرد المهاجم داؤد مستحق لأنه رفس المعز علي الرأس وهما على الأرض و كانت أوضح من الشمس في رابعة النهار

وكتب رقم صفر:

Quote: اعود فقط لحالتي الطرد التي حدثت اللاعب ضرب المعز بشكل واضح لا لبس فيه ، ويستحق الطرد

ألحق يا راكوبة؛ مصداقيتك في مهب الريح يا أخي العزيز

Quote: الهلال x الأمل

المحلى ! داخل ( أتبره !!! )
كسرة :
العرجا لمراحا ....

**************

الناس فى شنو !

و الرشاشات فى شنو !

Quote: الأمل أتبرة

خجلنا ليكم !!!!

هذه الصورة المتحركة توضح المشهد الذي طرد بعده الحكم لاعب الأمل عطبرة:



وضعك زاد صعوبة... يا راكوبة

الصورة منقولة من موقع kooora.com

Quote: هذه الصورة المتحركة توضح المشهد الذي طرد بعده الحكم لاعب الأمل عطبرة:

المحلى ! داخل ( بالطرد ! ) أتبره !!!!
و الله يا رشاشات حالتكم ( تخجل ! )
عدييييييييييييل كدى ( بالحنكشه ! )
عبدالماجد

الشيء بالشيء يذكر؛

قبل عدة مواسم، هزم هلال بورتسودان المريخ رغم أنه كان يلعب بتسعة لاعبين
منذ الدقيقة 32 من الشوط الاول(!!) كما يشير هذا التقرير عن المباراة والذي
كتبه الصحفي المريخابي مجذوب حميدة بجريدة الصحافة.



بحسب ذاكرتي فإن المباراة انتهت 2-1 وليس 2-0 كما يشير التقرير المرفق.

انتو مسعولين من الخير

المريخ دا متاخر ليه,,,لانه وصيف بكون منقصينو ناس الاتحاد 3 نقاط
ام حصل اتغلب من فريق ,,,,حدين افتونا ياجماعة
انا ما كنت متابع الدورى من الاول,,,,

فرضا المريخ دا بقى البطل,,هل عندو قدرةعلى مناطح الكبار
اهلى ترجى اسيك نجم اتحاد ليبى شبيبة القبائل,,

ياود الريح عشان بنغني ليكم " المحلي داخل عطبرة" تقوموا تعملوا كده في ناس " اتبرا"؟
والله يا أحمد يعقوب حكم سنار بالغتا وزي ما قال المثل الصيني " مره في سنار إنكسر مسمار، حير ناس أتبرا!"
وبرضو المحلي داخل عطبرة ومارق منها بالحكم!

Quote: المريخ دا متاخر ليه,,,لانه وصيف بكون منقصينو ناس الاتحاد 3 نقاط ام حصل اتغلب من فريق ,,,,حدين افتونا ياجماعة انا ما كنت متابع الدورى من الاول

السبب يا أبوقوتة هو فريق الموردة، وتحديداً اللاعب في الصورة أعلاه، يوسف
الصيني الذي أحرز هدف فوز فريقه على المريخ بإستاده في الأسبوع الثالث
للدوري الممتاز. تلك الهزيمة جعلت المريخ خلف الهلال الذي لم يخسر حتى الآن.

وهنا أهداف تلك المباراة:

Quote: حقق فريق الموردة فوزا كبيرا علي المريخ بهدفين لهدف في اللقاء الذي جمعهما مساء امس باستاد المريخ في الاسبوع الثالث للدوري الممتاز. بدأت المباراة بهجمات متفرقة للمريخ لم يفلح فيها مهاجمو الفريق من الوصول الي شباك الموردة بسبب التسرع وعدم التركيز خاصة من جانب هيثم طمبل والسعودي كما عاب العاب الفريق البطء في بناء الهجمات الامر الذي سهل من مهمة لاعبي الموردة في الاستحواذ علي كل كرات المريخ وافشال خطورتها. وطال انتظار المريخ حتي الدقيقة (42) من الشوط الاول ليتمكن القناص هيثم طمبل من تسجيل هدف المريخ الوحيد والذي انتهي عليه الشوط. وفي الشوط الثاني نظم فريق الموردة صفوفه بعد ان اتضحت العديد من الثغرات في دفاع المريخ والذي عاني كثيرا من غياب المالي كوني اضافة الي الشرود الذهني الذي لعب به التوغولي ابالو المسؤول عن الخطا القاتل الذي تمكن من خلاله مهاجم الموردة هنو من مراوغة بهاء الدين الذي لم يجد غير ارتكاب مخالفة داخل الصندوق يحتسبها الحكم ركلة جزاء للموردة ادركت منها التعادل وذلك في الدقيقة الخامسة من الشوط الثاني ليكتسب لاعبو الموردة المزيد من الحماس و الثقة ويبادلون المريخ الهجمات ويشلون حركة وسطه بفضل التمركز الجيد للاعبيها. وفي الدقيقة (18) يهئ عمار ابو كدوك الخالي تماما من الرقابة الكرة بمهارة للقادم من الخلف الصيني يحرز منها هدف الموردة الثاني. وسط غياب تام للتغطية الدفاعية لفريق المريخ. وبعد الهدف يمتلك فريق الموردة منطقة الوسط تماما ويتأخر الالماني اوتوفيستر كثيرا في اجراء تبديلاته قبل ان يخرج السعودي وعلاء الدين بابكر ايفوسا ليدخل عنتر وانور بابكر وصلاح الامير ليتحسن اداء المريخ نوعا ما ولكن دون فاعلية هجومية لتدخل المباراة في دقائقها الحرجة ليجد طمبل فرصة اخيرة الا ان العارضة تفشل محاولته لينتهي اللقاء بفوز الموردة بهدفين لهدف لتعتلي الصدارة برصيد الي 9 نقاط ويبقي المريخ في نقاطه الست.

يوم 29/11/2007 شوف شوف شوف (عجبكو )

Adil Attia

إنتوا (حتقعدوا) لحدي يوم 29/11 ؟؟؟؟؟؟

كل يوم اصل الي قناعة بعدم المجادلة في الكورة مع الاخوة المريخاب ، مداخلة الاخوة المريخاب في هذا البوستات او البوستات المفتوحة تدل علي ان الامر هو تشجيع وقلب للحقايق ، مثل مثل بوست احدهم الذي كتب بالخط العريض بان الهلال لم يتأهل لدورة الاربعه (بعد الفوز التاريخي علي الاهلي) ، وعندما طالبناه بالدليل ، بقي يهاتر و (كب الزوقة) ....

مباراة الامس لا ترقي الي مستوي الهلال ، بل تجد صعوبة في متابعتها من شدة الملل ، رتيبة الهلال يتناقل الكرة بثقل عجيب ، وكمية من الباصات الخطأ ... هذه حقيقة

ارضية الملعب سيئة لدرجة كبيرة ... الكورة تنطط عند لعب الباص ، ومن الغريب ان لاعبي الهلال يصرون علي اللعب الارضي

الهلال يلعب ب3 مساكين ، تحس ان هناك مساحة مفقودة اثناء اللعب ...


كل هذا واكثر ، ولو كان الاداء يحسب في النتيجة ، لكان الفريقين خسروا النقاط ....

ولكن برغم هذا كاذب من يقول ان اللاعب لا يستحق الطرد ... وكاذب من يقول ان الكابتن لا يستحق الطرد ، لاننا لم نسمع ماقاله اللاعب للحكم ، ولم نشاهده ،، (كان هناك مجموعه من اللاعبين بين الحكم والكاميرا ...


يا ود الريح ، احد اصدقائي في السودان انحرف واصبح حرامي عديل ، شغال في وزارة مهمة جدا ، المهم عشان هو بقي حرامي ، بقي في اي ونسة تسالوا عن فلان او علان يقول ليك (ياخي ده زول حرامي ساااكت )

Quote: مثل بوست احدهم الذي كتب بالخط العريض بان الهلال لم يتأهل لدورة الاربعه (بعد الفوز التاريخي علي الاهلي) ، وعندما طالبناه بالدليل ، بقي يهاتر و (كب الزوقة)

لعلك يا رقم صفر تقصد "الزول" الذي قال إن القانون تغير في مايو!

مثلك توقعت من العزيز راكوبة أن يعود مدافعا عن مصداقيته التي أضحت (في مهب الريح)
وهو من لا يعجزه الاستشهاد بالدلائل الAudiovisual لكنه -وكما عودنا- عاد ليتحدث عن
أمر آخر!!

كتب مزمل أبو القاسم -كبيرهم الذي علمهم الحاجات دي- عن حكم مباراة الأمس:

Quote: تابعنا أمس فصلاً جديداً من فصول التحكيم السوداني الباردة حينما تعرض فريق الأمل لظلمٍ فادح من الحكم (الدولي) أحمد يعقوب الذي أشهر خمس بطاقات ملونة في وجوه لاعبي الأمل في الشوط الأول وحده

Quote: أحمد يعقوب أفسد بهجة المباراة وأثر على نتيجتها وأكد ما ظللنا نكتبه باستمرار عن ضعف مستوى التحكيم في السودان

الطريف أن مصدر قيادي بنادي المريخ أكد أن التحكيم لعب دوراً كبيراً ومؤثراً في حصول
الهلال على نقاط المباراة كما صرح بذلك لجريدة الصدى وقال إن ناديه سيطالب بتحكيم
أجنبي في مباراته أمام الهلال!

بحسب ذاكرتي فإن هناك 3 مباريات جمعت الهلال بالمريخ بتحكيم أجنبي: تعادلا مرة وفاز
الهلال مرتين. أما الأكثر طرافة فهو أن الصحفي المريخي المعروف مأمون أبوشيبة اتهم
السعودي عبد الرحمن الزيد حكم مباراة الهلال والمريخ التي انتهت بالتعادل السلبي عام
2000 بالانحياز للهلال... لأنه يشجع الهلال السعودي!!

Quote: مثلك توقعت من العزيز راكوبة أن يعود مدافعا عن مصداقيته التي أضحت (في مهب الريح) وهو من لا يعجزه الاستشهاد بالدلائل الAudiovisual لكنه -وكما عودنا- عاد ليتحدث عن أمر آخر!!

ودالريح
الاحتكاك عادي جداً، والمعز معروف ممثل سيء للغاية! وكل حكام المنافسة (المحلية) يعرفون ذلك ، بل هو الذي يبادر دوما باستفزاز الخصوم والاعتداء عليهم.
الحكم قام بالواجب والأكثر، وفعلا المحلي داخل عطبرة وطالع منها بي مسخرة!

بالأمس القريب في مباراة الإسماعيلي احتسب الحكم ركلة جزاء وطرد لاعب مصري لنيله الإنذار الثاني، أقمتوا الدنيا ولم تقعدوها ، ولو كان الحكم طرد 3 لاعبين كنتوا عملتوا شنو؟!

Quote: الاحتكاك عادي جداً

طيب عادي دي عرفناها؛ جدا دي لزومها شنو يا راكوبة؟ عاوز
تزيد وضعك صعوبة؟!

بالمناسبة، إذا فاز المريخ على الخرطوم في مباراة اليوم ثم فاز
الهلال على الأهلي مدني بعد أيام فسيحتاج المريخ لأن يفوز على
الهلال مرتين قبل أن يتوج بطلا للدوري الممتاز!!

والله فعلا... المورداب سبب العذاب!

جدا لزوم التأكيد على أن كرة القدم لعبة يحصل فيها تماس والتحام فهي رياضة لا يفصل فيها بين المنافسين بشبكة أو جدار، لذلك من الطبيعي أن توجد بعض الاحتكاكات بين اللاعبين وفصلها القانون بعقوبات تبدأ بالإنذار الشفاهي ثم الكرت الأصفر ثم الأحمر.
المورد سبب العذاب بمباركة الأرباب
شال صالح عبد الله وأداهم نيجيري مصاب!

Quote: جدا لزوم التأكيد على أن كرة القدم لعبة يحصل فيها تماس والتحام فهي رياضة لا يفصل فيها بين المنافسين بشبكة أو جدار، لذلك من الطبيعي أن توجد بعض الاحتكاكات بين اللاعبين وفصلها القانون بعقوبات تبدأ بالإنذار الشفاهي ثم الكرت الأصفر ثم الأحمر

راكوبة يا أخي العزيز

كم أحمدُ اللهَ أنك لم تلتحق بكلية القانون؛ لأن تخرجك فيها محاميا يعني أنك
ستغطس حجر موكليك!

هذه "المرافعة" التي قدمتها يا عزيزي أقرب ما تكون للمطالبة بإلغاء عقوبة
الطرد المباشر بالبطاقة الحمراء استنادا إلى أن الرياضة تماس والتحام ولا
تبرئ لاعب الأمل من جريمته التي يعاقب عليها القانون الحالي!

إنت بقيت ناشـط في مجال حقوق اللاعبين ولا شنو؟!

لم أطالب بإلغاء عقوبة الطرد المباشر، ولكن طرد لاعبين دفعة واحدة أمر مثير للغاية ويدعو للريبة كمان!
كيف لا وأنتم اتهمتم الحكم البتسواني بالرشوة ومحاباة المريخ بمجرد أنه طبق القانون
ولا وقتها كنتم ناشطين في جماعة خصوم المريخ!

Quote: كيف لا وأنتم اتهمتم الحكم البتسواني بالرشوة ومحاباة المريخ بمجرد أنه طبق القانون ولا وقتها كنتم ناشطين في جماعة خصوم المريخ

راكوبة يا أخي العزيز

أنا لم أتهم المريخ برشوة حكم مباراة الإسماعيلي بل لم أتهم الحكم بمجاملة المريخ
ولو كان غيري قد فعل فهذا شأنه ولا تزر وازرة وزر أخرى. لعلك تذكر يا أخي أننا
-أنت وأنا- تجادلنا حول صحة ركلة الجزاء الأولى في مباراة الإسماعيلي وكان آخر
ما كتبته أنت يا عزيزي تعليقا على محور الجدل:

Quote: نحن غير مؤهلين لمناقشة قرار الحكام شخصياً لست بحكم وإنما صحافي فقط، ولا اعتقد أن من المتداخلين من هو حكم كرة سابق، الإلمام بقواعد الكرة نظرياً لا يكفي لتناول الموضوع

الإسماعيلي يتقدم باحتجاج رسمي ضد حكم مباراته أمام المريخ

راكوبة صحفي عندما يتعلق الأمر بالمريخ وحكم عندما يتعلق الأمر بالهلال! أما
علمتَ أن القانون يمنع الجمع بين منصبين؟!

وأنا لم أتهمك بل البوست موجه لكل الرشاشات ، والذين يرون أن تطبيق القانون مهم وواجب وضروري فيي مباريات الهلال فقط!
وماذكرته هنا مجرد رأي لا يقدم ولا يؤخر لأن أحمد يعقوب يبدو أنه كان عازما ومصمما منذ بداية اللقاء على إتمام المهمة المستحيلة!
ومرة أخرى ركلة الجزاء إياها صحيحة 100%

... بعيدا عن حادثة الطرد فإن المشهد المرفق في الصورة المتحركة
يؤكد -أكثر- أن غياب المعز عن مباراة النجم بسوسة كان مؤثرا؛ إذ
لاحظت أن المعز خرج عن منطقة ال6 ياردات وأبعد الكرة للجانب قبل
أن يصل لها لاعبا الأمل المتحفزان.

لكل مباراة ظروفها ولو شارك في مباراة النجم لما خرج من مرماه سنتميتر مربع!

/
/

ياود الريح انت زول معقول ورزين ما تبقى زي ناس فلان ديك.
حسع الصور الانت جبتها دي بامانة ضدك ما معاك.
شوف المعز هو الذي رجع بظهره على لاعبي الامل.
وحتى لو فرضنا انو القانون بديهو الحق على اساس انومثلاً هو الاعلى فالصور
لا توضح خشونة أو اعتداء عليه.
بعدين عرفنا الزول الاعتدى عليهو ادوهو احمر رغم انو مابيستاهل
التاني ده بحذروه بكرت اصفر ولا بطردوه.

قلت المورداب سبب العذاب وكلامك صحيح مية المية
انتو حدكم معانا يا الله درون
والمرة دي ان شاء الله تلقوها عند الغافل.
يعني المسمار كان لبس المعز ياهو المنبرش.
ولك صادق الود.

Quote: أما الأكثر طرافة فهو أن الصحفي المريخي المعروف مأمون أبوشيبة اتهم السعودي عبد الرحمن الزيد حكم مباراة الهلال والمريخ التي انتهت بالتعادل السلبي عام 2000 بالانحياز للهلال... لأنه يشجع الهلال السعودي!!

Quote: حسع الصور الانت جبتها دي بامانة ضدك ما معاك. شوف المعز هو الذي رجع بظهره على لاعبي الامل

Quote: بعدين عرفنا الزول الاعتدى عليهو ادوهو احمر رغم انو مابيستاهل التاني ده بحذروه بكرت اصفر ولا بطردوه

Quote: انتو حدكم معانا يا الله درون والمرة دي ان شاء الله تلقوها عند الغافل. يعني المسمار كان لبس المعز ياهو المنبرش

الغرض من عرض الصورة يا abdelwahab hijazi هو إنو الناس تشوف
وتحكم، والتباين في وجهات النظر بعد رؤية المشهد شيء طبيعي. لكن امتداد
رجل لاعب الأمل ثم ارتدادها بسرعة يدل على تعمده ضرب المعز لسبب غير
واضح.

أما التعادل مع المريخ فلا يحزنني طالما كان سيهدى الهلال البطولة الغالية
"مثلما حدث عام 2005"، لكن أكثر المشاهد التي تقض مضاجعي هو مشهد
المعز محجوب ملقيا على الأرض إثر هدف أحمر، في الوقف الذي يقف فيه
ريتشارد وداريوكان يتلاومان (لا قدر الله)!

Quote: ريتشارد وداريوكان يتلاومان (لا قدر الله)!

في آخر علقة مباراة ( قون بي كل سايد) لام المعز الدفاع، ولام الدفاع الوسط، والسفير لام ريكاردو، وريكاردو لام الأرضية والحكم وقال بي تحت تحت برطانة برازيلية " أدوا الناس قروشا، وقبلهم قروشي شي شي"!

Quote: في آخر علقة مباراة ( قون بي كل سايد) لام المعز الدفاع، ولام الدفاع الوسط، والسفير لام ريكاردو، وريكاردو لام الأرضية والحكم

مالو قال النجيل الصناعي برضو ؟؟

Quote: انتهت المباراة بفوز المريخ بأربعة أهداف نظيفة، في مباراة متوسطة المستوى أثر فيها النجيل الصناعي على أداء اللاعبين ، إضافة إلى تعمد لاعبي تلاتة إلى الخشونة.

. بعدين يا راكوبــه إنت الاتنين الاسود لسه ماثره معاك واللا شنــو..؟
حسع الله بيسالك الحرب بتاع الجماعة بتاعين الأمل .. الأمس دا ما شايفو ..؟
بعدين سؤال صغمبوتي كدا:
مجاهد دا الليلة ادهو كرت اصفر عشان شنو..؟
إنت موافقو في العملو دا..؟
كان موافقو معناته أحمد الريح دا يكون ضيع زمنو معاكم ساكت في الشرح بتاع الفير بلي بتاع المره الفاتت .. وكان ما موافقو معناته بقيت زول كويس وتاني ما بتعمل (كاكا) عشان ما نسوي ليك (حييا).. (مرتين)
علما بأن كابتن فريق (املكم) عطبره .. احتج برضو على الحكم .. قايلنا لاعبين في رابطــة ابوعنجه أو كما ذكر الناقد والمحلل الرياضي المنطقي .. أحمد الريح..

قرار الطبيب:
عــلاج وراحــه لي راكوبــة لمدة (يومين).. الايامات دي منظرك بقى بايخ جدا والله .. بقيت تجليها ثابته .. شكلك قاعد تشوف الكورة (اتنين.. اتنين )

يعني نكتب ليك بي حروف كبيرة واللا شنــو..؟

Quote: مجاهد دا الليلة ادهو كرت اصفر عشان شنو.

لا أدري لماذا أصر أتوفيستر من البداية على اللعب بأثنين إرتكاز في مباراة مثل هذه، مع أنه كان من الأجدى أن يلعب بهكذا تكتيك في مباراة الرجاء، وبدخول قلق مكان مجاهد أصبح للوسط حيوية على الرغم من انفتاح مساحات مقدرة أمام المدافعين.
مجاهد سعى بكل السبل لنيل الإنذار ليخرج ويحرج الجهاز الفني للمريخ الذي أصر على مشاركته، ومنذ تسجيله في المريخ علاجه وزملائه الآخرون يسير على قدم وساق للتخلص من العادات الضارة التي اكتسبوها أيام الضلال!
ويا حليل الحكام البطردوا من مجرد مناقشة، ما شافوا البرنس وهو بقبقب الحكام ولافي زول بهبب ليهوا!

ياربي الكورة دي كانت في رابطة أبوعنجة؟

ما قلتوا لينا " سفير النوايا الخمسة" يستحق شنو على اللقطة دي، إذا طرد أحمد يعقوب كابتن الأمل للمناقشة!

Quote: ياود الريح انت زول معقول ورزين ما تبقى زي ناس فلان ديك. حسع الصور الانت جبتها دي بامانة ضدك ما معاك. شوف المعز هو الذي رجع بظهره على لاعبي الامل. وحتى لو فرضنا انو القانون بديهو الحق على اساس انو مثلاً هو الاعلى فالصور لا توضح خشونة أو اعتداء عليه. بعدين عرفنا الزول الاعتدى عليهو ادوهو احمر رغم انو مابيستاهل التاني ده بحذروه بكرت اصفر ولا بطردوه. قلت المورداب سبب العذاب وكلامك صحيح مية المية انتو حدكم معانا يا الله درون والمرة دي ان شاء الله تلقوها عند الغافل. يعني المسمار كان لبس المعز ياهو المنبرش. ولك صادق الود.

اخونا عبد الوهاب حجازي .. سلامات
يا خوي كلامك دا صدقني لو في زول بيعرف كوره .. بيطلعك زول بتاع العاب قوة .. ولو في زول ما بيعرف كورة بيطلعك زيو وزيك واحد.. وإنت قلت في اول كلامك لي أحمد الريح إنو زول رزين ومعقول .. يلالا كدي ورينا المعقوليه في كملاك إنت دا شنو ..
الصورة المعروضة دي صدقني بتوضح لي العميان زاتو يعرف الحاصل شنو ودي دليل واضح للشئ الحصل وما ينكره إلا زول مكابر وعايز يتكلم وينفي حقيقة دوران الأرض,..
أول حاجة مسالة تقول إنو المعز رجع بظهرو على لاعبي الأمل .. دي حاجة غريبه جدا .. حارس المرمى الشخص الوحيد الفي الميدان المصرح ليهو (بالطيران) في الهواء والتعامل مع الكورة بي (يدينو) الاتنين .. المشهد يصور كيف إنو المعز محجوب في حالة طيران ودوران للحصول على الكورة واستعمال يدينو زي ما قلت ليك .. وفي الحالة دي برضو يكون في علمك وفي المنطقة المحرمة لحارس المرمى .. أي احتكاك أو محاولة احتكاك بحارس المرمى وهو في (الجو) من دفع أو محاولة دفع ليهو .. بستحق المهاجم العقوبة باحتساب مخالفة .. وفي نفس الوقت اي محاولة لحارس المرمى استعمال (قدمه) بصورة يلاحظ فيها ارتفاعها فوق لمستوى الخصر وبمحازاة الصدر بتعمد واضح للركل أو الرفس للمهاجم يعاقب بضربة الجزاء المعروفة .. مع احتمال معاقبته بالبطاقة الحمراء .. فيا هداك الله .. شفت المعز دا غير إنو طار لمعالجة الكورة في المنطقة المحرمة الخاصة بيهو .. وتابع الدوران بشكل قوس في النهاية المهاجم ( رفسو ) في ضهرو وهو في الجو .. فكيف يكون مافي اعتداء عليه هو حساب واللا كوار .. بعدين منو القال إنو علشان الأعلى القانون بيديهو الحق .. لو هو الأعلى يا سيدي وفي طيرانو دا .. ارتكب المخالفة القلتها ليك دي أو حاول يرتكب مخالفة باستعمال يدينو بطريقة يظهر فيها الخشونة برضو بتحسب عليهو مخالفة وبرضو بتعاقب بالبطاقة الحمراء أو الصفراء حسب الحالة .. والله لو بقى طاير كدا وما نزل الوااطه زاتو ..
بعدين خليك حقاني شوية المسالة ما مكابرة .. عينك لي اللاعب بعد ما معز وقع على الأرض .. (ركلو) في الراس أو (رفسو) سميها زي ما عايز في ذمتك .. حسع دي ما بتشبه بتاعت سفاري الدفر مهاجم الرجاء .. بدون كورة وكان يستحق عليها بطاقة حمراء وجاملو الحكم بي الكرت الأصفر ..
الكداره دي يا سيدي ما بيلبسه اللاعب علشان يجي يدخل الميدان (يرفس) بيها خلق الله ... عندها وظائف تانية .. ولو أنا كنت الحكم .. كان مش بطردو بس .. بطردو وبسلمو لي ناس شرطة المرور .. وشرطة السواري .. وبدقو في ميدان عام .. لانو دي ما بقت كوره .. دي بقت صعلقة وحاجة تانية .. لانو الكورة يا حبيبي اخلاق قبلما تكون مصارعة ..
بعدين الظاهر لي إنت ما عارف الحاصل شنو لكن حبيت بس تستنتج .. بالنسبة لي البطاقة الحمراء التانية .. أنا ما عارفك هل معترض من كون إنو اللاعب إذا اعترض على الحكم ما يتعاقب بالبطاقة الصفراء ؟؟ لو معترض على المسالة دي مفترض تشجع مصارعة حره .. ولو مقتنع بي المعاقبة دي .. زي ما اخد مجاهد في حالة الاحتجاج بطاقة صفراء .. نبقى وصلنا لي فهم واحد بيناتنا .. ويبقى الفصل في إنو اللاعب واللي هو كابتن الفريق ماخد بطاقة صفراء من الأول .. وبي عقلية اللاعب السوداني بتاعت زمان مفتكر إنو كابتن الفريق ممكن يقول ويعترض على الحكم بي اي اسلوب .. الله أعلم قال للحكم شنو .. واللا هبب ليهو شنو .. وعرفت كيف إنو الزول دا ما بيستاهل ..؟ ليه بيطلع فيها وهي ماشه ..؟ واللا ما بيستاهل دي شنو..؟ يعني منقطه اكتر من مارادونا .. واللا أحرف من زين الدين زيدان..؟
والله عليكم جنس مكابره .. مضحكة .. مخجلة .. تبكي
أما لو عايز تشبكه منبرش .. وقاعد وواقف أعتقد أنو دي الطريقه المناسبه الممكن تناقش بيها .. وهنا لابد من إنك تطلع من الدور بتاع يا أحمد الريح إنت زول معقول .. ورزين .. وإلخ..
لو عندكم كلام وتنظير وتحليل .. هلال مريخ قريبه ما بعيده .. ما ترجو الناس تخلص ليكم حقكم .. وتقعدوا تساندوا فيهم بالباطل .. تعالوا الميدان بيجمعنا ... والكاس بره .. والحشاش يملى شباك التاني ..

تتذكر يا تمبس راكوبة قال الهلال مارس سوء سلوك وعملية غش واضحة
لمـّـن قودوين أخد كرت أصفر في مباراة الاتحاد مدني عشان يتوقف قبل
مباراة المريخ؟

شوف الليلة مزمل أبو القاسم كتب شنو:

Quote: الحصة الثانية شهدت أداءً متدنياً من جانب المريخ الذي خرج من جو المباراة بعد أن ضمن نتيجتها فنال ثلاثة من لاعبيه إنذارات تكتيكية (علاء الدين ومجاهد وأبالو) ليتوقفوا في مباراتي مريخ الثغر والميرغني الدوريتين ويعودون بسجل نظيف في مباراتي الموردة (في الكأس) والهلال

طبعاً راكوبة ما جاب سيرة أصلاً لانو إنذارات علاء الدين ومجاهد وأبالو
التكتيكية ستجعلهم (يعودون بسجل نظيف) قبل مواجهة الموردة والهلال،
المثير للريبة إنهم التلاتة بالذات أخدوا إنذارات تكتيكية -على حد قول
مزمل-!!

أنا غايتو ما كنت منتظر راكوبة يجيب سيرة، لأنو دوره في المنبر ده بقى معروف

نال اللاعبون الثلاثة الإنذارات بطريقة مخجلة بالنسبة لنا في المريخ، وإن كانت لا تصل لما فعله الهلال بإدخال لاعبين مصابين لنيل الإنذار واستبدالهم!

ما قلت لي رأيك في القبقبة!

ودالريح
اقرأ المكتوب فوق من أمس!

Quote: جاهد سعى بكل السبل لنيل الإنذار ليخرج ويحرج الجهاز الفني للمريخ الذي أصر على مشاركته، ومنذ تسجيله في المريخ علاجه وزملائه الآخرون يسير على قدم وساق للتخلص من العادات الضارة التي اكتسبوها أيام الضلال!

Quote: عامر تيتاوى

الحق يا تيتاوي... زولك أعاد خزعبلاتو

Quote: وحتى استجلاب الحكام الاجانب شرب فيه المريخ المقالب ولن ننسى عندما احضر لنا عمر البكري ابوحراز حكماً من السعودية اسمه عبد الرحمن الزيد اتضح فيما بعد انه يحمل عضوية نادي الهلال السعودي وانكشف امره عندما انفراد محترف المريخ المغربي الزنزون بمرمى الهلال وتوغل ليقفز لاعب الهلال وقتها مجاهد على ظهره ويطرحه ارضاً ويتجاهل الزيد الحالة التي اخجلت مدرب الهلال فوزي المرضي واعترف بصحتها في برنامج عالم الرياضة بالتلفزيون ولكن بطريقة ذكيةّ

من عمود اليوم 30/10/2007 لمأمون أبوشيبة

ود الريح
ياخي أخونا راكوبة دا صهيوني ساكت بتزرزر فيه كدا ليه فاكرو مناضل ولا شنو؟
ولا أظنك خرمان

ود البشرى
رأيك شنو في القبقبة بتاعت السفير؟

قبقبة السرور مالها كمان
برنس و سفير وكابتن الزعيم
يقبقب زي ما عايز بي حقو

Quote: يقبقب زي ما عايز بي حق

عشان كده بتشجع الضلال وعمرك ما حتشوف إنجاز!

Quote: مجاهد سعى بكل السبل لنيل الإنذار ليخرج ويحرج الجهاز الفني للمريخ الذي أصر على مشاركته

داير الصراحة يا راكوبة العزيز:

كلامك ده قرأته بالأمس وفهمت منه إنو مجاهد (ما داير يلعب) لسبب لا أعلمه
رغم إصرار الجهاز الفني، ولم تكن به إشارة لأنه تعمد نيل الإنذار حتى
يتوقف مباراتين ليعود أمام الموردة والهلال. هذا مع ملاحظة أنك لم تورد
في تعليقك ما كان من أمرِ علاء بابكر وأبالو.

Quote: نال اللاعبون الثلاثة الإنذارات بطريقة مخجلة بالنسبة لنا في المريخ

شفت كيف يا راكوبة أن ما تتهم به الهلال قد يحدث في المريخ؟!

عشان كده أنا بقول ليك إنو تسليط الاضواء على إخفاقات الهلال وإتهامه بإنو
شرير ومجرم ومفروض يودوهو السجن نوع من التعصب المفروض تخليهو يا
أخي العزيز.

ودالريح
نال لاعبو المريخ الإنذارات وهم في الملعب في مخالفات واضحة، وليس إداخلهم إلى الملعب فقط لنيل الإنذار ومغادرته، والأمر يختلف تماماً، بدليل عدم سحب الجهاز الفني لعلاء الدين وأبالو بعد نيلهم للإنذارات وكان من الممكن أن يطردوا لأي سبب ، خاصة وأن الحكام الأيام دي شايفين شغلهم على الآخر!

Quote: ود الريح ياخي أخونا راكوبة دا صهيوني ساكت بتزرزر فيه كدا ليه فاكرو مناضل ولا شنو؟ ولا أظنك خرمان

يا محمد البشرى

من ناحية خرمان... خرمان، لكن البركة في jini وخدر، ولا زلنا
نأمل في يعزنا الله -أو كما قال ملاسي- بآخرين

لكني دعني أذيع لك سرا:

أعكف هذه الأيام على دراسة عدة كتب عن تأريخ المؤامرات
وزرع الفتن في العصور الحديثة والوسطى والقديمة. الدراسة
تهدف لاستنباط كيفية الاستفادة القصوى من تربع جمال الوالي
-وهو جبهجي معروف- على رئاسة نادي المريخ بإيغال صدر
المناضلين عليه حتى يطلبوا من بكري مقاطعة أخبار المريخ
وقناة الشروق الفضائية.

آمل أن أكمل دراستي وإحكام خيوط المؤامرة قبل حلول نهائي
الكونفدرالية... STAY TUNED

ودالريح
قناة الشروق هنا بالكاش الذي يقلل النقاش، وماتخليني أقول ليك بكري أبوبكر ده (ولدنا)

Quote: ما قلت لي رأيك في القبقبة

لو داير أكون متعصب فسأقول إنها قبقبة عادية جدا

لكن -لو عايز الجد- هذا أسلوب مرفوض من هيثم مصطفى الذي يحب
الهلال ويخلص له، لكنه يفقد أعصابه كثيرا وهو أمر لا يليق بلاعب كرة
ناهيك عن أن يكون قائدا لفريقه.

هل يكون نقاش كابتن الأمل مع أحمد يعقوب أشد من القبقبة؟!
الملفت أن بعد هذه القبقبة لم يتم توجيه أي نوع من التوبيخ أو اللوم لسفير النوايا الخمسة سواء من الضلال أو الاتحاد العام

يالطيييييييييييييييييف
يا علاء يا ود أخوي انت غبينتك دي قدر ده من كلامي الشوية ده؟
زي عندي إحساس انو عندك زعلة من حاجة تانية... (صدقني أنا ما عارفه شنو!!! لكن ممكن أخمن).
نوريك المعقول في كلامي أنا وكلام ود الريح زاتو كمان إيه رأيك؟
طيب ود الريح قال لي الآتي:
(الغرض من عرض الصورة يا abdelwahab hijazi هو إنو الناس تشوف
وتحكم، والتباين في وجهات النظر بعد رؤية المشهد شيء طبيعي. لكن امتداد
رجل لاعب الأمل ثم ارتدادها بسرعة يدل على تعمده ضرب المعز لسبب غير
واضح.)
ده ليه كلام معقول؟ عشان خلى فرقة للتباين في وجهات النظر.
واظنك عارف انو حتى بعض الحكام لما يراجعوا عملهم بالفيديو يمكن يقولوا أنهم أخطأوا بحسبان أنهم
بني آدمين زي زيك يمكن أن يفوتم منظر ولا لقطة ولا حتى يدقسم حارس المرمى الواقع وهبش دماغوا شربكة ساكت زي ما بنقول. هسع انت النسألك انت اللعبت الكورة وقطعتها عليك الله في زول بتهبشو كدايس الكدارة في راسو يقوم تاني زي الماحصل حاجة.
ليه كدايس ولا حنة؟

طيب القانون قال شنو في حالات الطرد والانذار
قانون الفيفا ختاها كدة:
Disciplinary Sanctions

Only a player or substitute or substituted player may be shown the red or yellow card.
The referee has the authority to take disciplinary sanctions, as from the moment he enters the field of play until he leaves the field of play after the final whistle.
Cautionable Offences

A player is cautioned and shown the yellow card if he commits any of the following seven offences:

1. is guilty of unsporting behaviour
2. shows dissent by word or action
3. persistently infringes the Laws of the Game
4. delays the restart of play
Cautionable Offences

5. fails to respect the required distance when play is restarted with a corner kick, free kick or throw-in
6. enters or re-enters the field of play without the referee’s permission
7. deliberately leaves the field of play without the referee’s permission.

A substitute or substituted player is cautioned and shown the yellow card if he commits any of the following three offences:
1. is guilty of unsporting behaviour
2. shows dissent by word or action
3. delays the restart of play
Sending-Off Offences

A player, substitute or substituted player is sent off and shown the red card if he commits any of the following seven offences:

1. is guilty of serious foul play
2. is guilty of violent conduct
3. spits at an opponent or any other person
4. denies the opposing team a goal or an obvious goalscoring opportunity by deliberately handling the ball (this does not apply to a goalkeeper within his own penalty area)
5. denies an obvious goalscoring opportunity to an opponent moving towards the player’s goal by an offence punishable by a free kick or a penalty kick
6. uses offensive or insulting or abusive language and/or gestures
7. receives a second caution in the same match.

A player, substitute or substituted player who has been sent off and shown the red card must leave the vicinity of the field of play and the technical area


يعني كلامك عن حق الحارس في (الطيران) في الهواء والتعامل مع الكورة بي يدينو و... و... ده كلو اجتهاد منك عشان تثبت أنو في فاول serious أو خشونة متعمدة زي ما قال القانون أو غير كده. وده كلو زي ما قال ود الريح وجهة نظر بتتباين من زول لزول.
مش انت قلت انو سفاري كان يستحق بطاقة حمراء وجاملو الحكم بي الكرت الأصفر .. ده تقديرك انت. خلينا ياخ انحنا برضو نقول تقديرنا.
أزيدك شوية ... انتو حسع كلكم مش احتجيتوا في ضربة جزاء العجب مع الدراويش؟؟؟
وطيب!

بالنسبة لي البطاقة الحمراء التانية كلامك الفوق ده برضو كلو تقدير. لكن أنا بقبلوا لانو القانون فيهو فسحة زي دي.
بس انت حل مشكلتك مع راكوبة ونصيحتي حاول تقول الكلام الحقاني القالو احمد الريح في هيثمكم (وهيثم السودان عشان ما تزعل).

تعرف يا علاء أكتر حاجة زعلتني في كلامك انك فهمت انو أنا بشجع عدم الانضباط وسوء السلوك. والحق أنني أعلم أن ذلك هو سبب طامات السودان كلها. وللأسف دي نقطة ضعف عندنا وما لم يتم معالجتها سنفقد كلو الكسبناهو في الآونة الأخيرة. عشان تصدقني جادي في كلامي ده راجع البوستات الشاركت فيها مؤخراً حتلقاني ركزت في الحتة دي أكتر من أي شيء آخر للحد الذي انتقدت فيه مازدا وعبد الحميد السعودي وغيرهم. وراكوبة كتر الله خيرو عمل كده برضو.
ياخوي انحنا مشجعين مش متعصبين ومتشنجين. وكان انت فهمت غير كده برضو تكون غلطان.

تخريمة:
أمس الأول في مباريات السنترليق للصعود للأولى وفي مباراة الأحرار والصبابي طرد حكم المباراة الفنان جمال فرفور لكثرة احتجاجاته على قراراته.
تعليق:
كان يعمل فيها سفير الأغاني الحلوة ما كان بنطرد

Quote: يالطيييييييييييييييييف يا علاء يا ود أخوي انت غبينتك دي قدر ده من كلامي الشوية ده؟ زي عندي إحساس انو عندك زعلة من حاجة تانية... (صدقني أنا ما عارفه شنو!!! لكن ممكن أخمن).

الأخ عبد الوهاب حجازي ..
سلامات
يا سيدي قبلما تخمن وتتعب نفسك ... وبكل صراحة والله على ما اقول شهيد .. ما حصل انتبهت لي اسمك هنا من قبل ..او بالأحرى ما ركزت في كلام ليك .. ولا اعتقد إنو اسمك مر علي .. ود ما تقليل من شخصك لكن لانو كلام غباين واي ما عارف الكتبتو فوق دا أنا ما النوعية البتعامل بيها .. والحاجة التانية .. نادر جدا ارد في السجالات الكروية هنا لعدة اسباب لانو المسالة من فترة اصبحت ماليها علاقة بي حاجة اسمها رياضة .. وأنا من طبيعتي الحوارات العقيمة دي .. ما قاعد احبها واسلوب العشوائية والتعصب دا ما قاعد احبو .. وبستغرب خالص لما اللقي لي كلام في غير محلو .. ومن فترة طويلة جدا ومن بداية القرعة للهلال .. استغربت لكل البتكتب هنا دا .. ضد الهلال من كونو فريق لاعب بي اسم السودان ومن وقتها قررت إني اكتفي بالمداخلات في مناطق محدده .. ومع اشخاص محددين .. ولحدي الآن في نوعية لو كتبت من هنا لي بكره مستحيل اخسر لي ثانية واحده علشان اكتب ليها أو حتى اقرا كاتبين شنو .. ودونك النماذج كتيرة ..
علشان كدا يا سيدي مسالة غبينة والمفردات الغريبة دي .. ارجو إنك تشيله من راسك كلما هناك لنا سجالات مع اشخاص نعرفهم هنا ومتواصلين معاهم حتى خارج حدود هذه المساحة ونعرف نفسياتهم ويعرفون نفسياتنا .. لذلك احيانا نتنازل عن الكثير وندخل في حوارات الغرض منها كسر الروتين ليس إلا .. والظاهر لي فعلا اثبتت الحوارات دي إنها ما منها فائده طالما الواحد بيوضح في حاجة .. بيجي واحد يكتب ليهو عندك غبينه وعندي احساس وحاجات زي دي ...
الحاجة المهمة يا سيدي انا ما جاي استعرض في معرض ردي ليك .. كل ما في الأمر الكلام القلتو ما راق لي .. وانا متابع كنت للكورة بشكل كويس من خلال التلفزيون وما صاحبها من تفاصيل كتيرة جدا بعكس شخصك وما وصل منك هنا إنك ما تابعتها من خلال البث أو حتى لو تابعتها متابعتك ليها كانت بمنظار آخر..
والاهم من كدا وبدون مسالة بتاعت شــوو .. واستعراض .. لعبت في درجات مختلفة في منشط كرة القدم.. شاركت بالدورات المدرسية المختلفة منذ الإبتدائية .. والدرجات المختلفة .. وخانتي التي اللعب بها واعشقها هي خانة حارس المرمى .. بالتالي لما رديت ليك رديت ليك رد الشخص العارف بي منطقتو .. وأحتمال لو كان المسالة دي بتتعلق بي اي خانة تانية في الملعب ما كان افتيت ليك اكتر من كدا .. لانو ما من شيمتي الافتاء في شئ ما عارفو ..
اتمنى اني اكون وصلت ليك جزو من شئ غايب عنك ..
مع كامل احترامي..

Quote: لعبت في درجات مختلفة في منشط كرة القدم.. شاركت بالدورات المدرسية المختلفة منذ الإبتدائية .. والدرجات المختلفة .. وخانتي التي اللعب بها واعشقها هي خانة حارس المرمى

تامبا ( القول كيبر)
هل صحيح ما يتردد أن سبب اعتزالك هدف جاء من هوبا؟ وما سر المباراة التي ( قبقبت) فيها الجمهور؟ طلعت زميل أبوستة شريف من ورانا

Quote: ( قبقبت) فيها الجمهور؟ طلعت زميل أبوستة شريف من ورانا

وغنت الصادق .. (ملصتها) زي بهاء الدين ..
تعرف يا راكوبــة .. مرة واحده في حياتي ملصتها دخلت لي بي تحت كرعيني في مباراة كاس والهل واجعاني لحدي الآن .. رغم اننا غالبين تلاتة صفر .. والمباراة دي نحن كنا بنلعب في الرابطة .. بعديها مباشرة انتقلنا أكتر من عشرة لعيبه من الفريق للدرجات المختلفة بما فيها الأولى .. يعني كان لما (تملص) ليك كورة في (رابطة) كانو بيودوك السجــن .. مش زي جماعة كدا المهاجم قاعد في الواااطه وراقد وخالف رجلو يقوم يجيبه قووون .. ويرجع تاني يرقد .. ياخي دي كورة واللا لوكاندة وادي حلفا..؟
بعدين بالمناسبة في فترة من الفترات دربني (برهان تية) .. يعني مسالة الأمل عطبرة دي .. وسياسة الشلاليت والعفص دي ورفع كدايس الكداره في راس الخصم محسومة عندي .. وحمدو في بطنــو..

Quote: وسياسة الشلاليت والعفص دي ورفع كدايس الكداره في راس الخصم محسومة عندي .. وحمدو في بطنــو

وأنا أقول تشجيع الضلال ده ما من فراغ على العموم اعترافك ب(الملصة) ونكرانك ل(قبقبة) تشفع لك بعض الشيء، الكلام في ودالريح الذي ورد لنا عنه قبل قليل أنه في أحد الأيام الخوالي تم ( قياسه) بالكرة وقع على إثرها وقعة أكعب من إنبراشة ( مرق) وهب واقفا ينفض ويتمتم (القيسة دي ما قانونية، التعديل الرابع عشر قال الزول البقيسو لو وقع، لا تعتبر قيسة كاملة)

Quote: لا أدري لماذا أصر أتوفيستر من البداية على اللعب بأثنين إرتكاز في مباراة مثل هذه، مع أنه كان من الأجدى أن يلعب بهكذا تكتيك في مباراة الرجاء

نتونس شوية عن مباراة الصفاقسي!

التأمين الدفاعي يا راكوبة العزيز أوجب من الاندفاع الهجومي. أوتوبفستر مدرب
خبير ولا أظنه يغفل هذه الحقيقة وله -هو بالذات- خبرة لا تقل عن 25 عاما في
التدريب بإفريقيا فهو بلا أدنى ريب يعلم أسلوب لعب فرق شمال إفريقيا وأن
لاعبيها يتميزون بوعي خططي كبير يمكنهم من إجادة الانتشار والسيطرة على
وسط الميدان.

لكن أوتوبفستر أسير قدرات لاعبيه ولا يمكنه وضع خططه بمعزل عنها. وأنت تعلم
يا صديقي أن المريخ يعاني نقصا في لاعبي الوسط المميزين ذوي النزعة الدفاعية
[مجاهد+أليجا البطيء+سعيد الموقوف عن لقاء الذهاب مع الصفاقسي+الشغيل قليل
الخبرة] مع وفرة في لاعبي الوسط ذوي النزعة الهجومية [قلق+باولينو+العجب+
عنتر+إيفوسا+صلاح الأمير].

في ظل هذا النقص الواضح قد يكون "التوليف" هو أفضل خيارات أوتوبفسر وقد
جربه من قبل بإشراك سفاري في خانة المحور مع مجاهد والاعتماد على أمير دامر
مع أبالو في قلب الدفاع. وإن كنت أرى أن هناك حوجة -أخرى- ملحة لإشراك أمير
دامر أمام الصفاقسي في مركز الظهير الأيمن لأن النواحي الدفاعية لعلاء بابكر لا
تبعث على الاطمئنان وقد يكون هو الجهة التي يؤتى المريخ من قبلها في وجود
صانع الألعاب الماهر عبد الكريم النفطي في الجهة اليسرى لخط وسط الصفاقسي.

للحديث عن صفع الصفاقسي ، نحيلك لبوست المباراة
فلا يجوز الحديث عن المباراة النهائية في بوست محلي
كيف يحصل المريخ على كأس الكونفدرالية ؟؟؟ ...... مشوار...تين و لا ثالث لهما .

Quote: فلا يجوز الحديث عن المباراة النهائية في بوست محلي

راكوبة يا عمك
إن من جوز إفطار اللاعب و قون القاعد
حري به ان يجوز الحديث اعلاه إينما تيسر
ف(رجاءا) لا تشادد


ياخي (القعدة) هنا حلوة ورايقة

Quote: ياخي (القعدة) هنا حلوة ورايقة

نعم القعدة حلوة، لا هموم ولا مباريات ولا استحقاقات ولا مباريات كوؤس ولا يحزنون، لا (مجد) لا (هوبا) لا تونس لا ( شرميطي) لا بيضوضان لا (رجاء).
جمهور الضلال مستريح مباراة في عطبرة ومباراة في زريبة العيش محلي × محلي، يفتحوا الفضائيات يتابعوا اخبار الزعيم ومبارياته القادمة عربيا وأفريقيا وإعداديا أمام الإنترميلان، يملئهم الحقد والحسد، يتوجهوا إلى النت ويكتبوا " قون القعدة حلو حلاه"! خلاص كده نالوا من الزعيم وشغلوه عن الأهم الذي ينتظره في كل ملاعب القارة.
حالتكم تحنن والله!

راكوبة ياخي أظنك بقيت مناضل بالجد
حالتنا إحنا البتحنن وإحنا زي ماقلت ما عندنا هم غير المحلي و شغالين بيكم
ولا إنتو الكنتوا بكرة لاعبين في نيجيريا في مجموعات الكونفيدرالية وهمكم كلو مع أسيك سوى شنو و فلافيو مالو و الترجي وبتاع الكان بقرأ ليكم يفتكركم إنتوا المشاركين في دوري الأبطال

Quote: قون القعدة حلو حلاه

دي شديدة وما فكرنا فيها
لكن برضوا فضلة خيركم الغنيتوا للهوبا و الشرميطي

Quote: لكن برضوا فضلة خيركم الغنيتوا للهوبا و الشرميطي

هذا الثنائي مرقكم (ميطي) عربيا وأفريقيا على التوالي فوجب الغناء من المنافسين ووجب البكاء من الأنصار!
أما نحن فمازلنا ننافس عربيا وأفريقيا، فشتان بين الحالتين
و(أقعد) إتفرج في المحلي بي عافية!

ود الريح :

Quote: صانع الألعاب الماهر عبد الكريم النفطي

السروالي - السباعي - النفطي ..
إنتو بتجيبوا الأسامي دي منين يا مرسي

Quote: لا يجوز الحديث عن المباراة النهائية في بوست محلي (*)

بمناسبة يجوز ولا يجوز:

عندما سافر المنتخب الوطني في رمضان قبل الفائت لملاقاة نظيره التونسي في
تصفيات أمم إفريقيا، أفتى مولانا مأمون أبوشيبة يومها بجواز إقامة بعثة
المنتخب في مدينة تبعد عن العاصمة تونس مسافة تتيح للاعبين الإفطار عند
السفر يوم المباراة لأداءها!

مأمون ده بالذات لذيذ جدا! فبعد أن تعثر تجنيس النيجيري صنداي لحراسة
مرمى المريخ اقترح أن يجنسه المريخ ب[ نــيــة ] تسجيله مدافعاً ثم تحويله
من بعد ذلك حارسا!
_________________________________

(*) معليش، بس الكلام عن الارتكاز جاب الكلام عن الارتكاز.

Quote: جمهور الضلال

???????

Quote: للحديث عن صفع الصفاقسي

!Slow down brother, speeding causes accidents

Quote: القعدة حلوة

السباعي يطالب بعثة المريخ ببمبر سوداني في مباراة العودة

Quote: السروالي - السباعي - النفطي .. إنتو بتجيبوا الأسامي دي منين يا مرسي

أصلهم ناس شمال غرب إفريقيا ديل كده يا عمر الفاروق!
عندهم برضو:

الحكم المغربي: العرجون
المهاجم التونسي: الشرميطي
المعلق الليبي: الكاديكي
النجم الجزائري: الوزاني

ما عندك حاجة لى جبهة البوليساريو؟

والحكم المغربي : لاراش
والمهاجم المغربي : بيضوضان

والله المغرب العربي ما قصر معاكم خالص

بمناسبة صفع الصفاقسي دي يا ودالريح
لاحظت في إحدى مقالات مزمل بعد مباراة"القاعدة في ملتقى النيلين" تغيير الحديث عن رج الرجاء إلى كمين الرجاء

وبالمرة شوف إسماعيل حسن كاتب شنو الليلة

Quote: وستبقى الأسئلة المشروعة.... لماذا ضرب لاعب الأمل داؤود حارس الهلال المعز بدون كرة لينال البطاقة الحمراء؟؟!! ولماذا إحتج زميله الكابتن علاء الدين على قرار الحكم وهو يعلم أنه منذرٌ بالبطاقة الصفراء وأن هذا الإحتجاج سيطرده من الملعب ويفقد فريقه لاعبين إثنين...... لماذا لماذا؟؟!!

للامانة كتاب الصدى خيالهم واسع و يجيدون نظرية المؤامرة ولهم قدرة على تحوير الحقائق و الجدال يحسدون عليها
توقيعاتكم لمنحهم عضوية الموقع علهم يقيلوا عثرة الجماعة

شكرا محمد البشري

Quote: وستبقى الأسئلة المشروعة.... لماذا ضرب لاعب الأمل داؤود حارس الهلال المعز بدون كرة لينال البطاقة الحمراء؟؟!! ولماذا إحتج زميله الكابتن علاء الدين على قرار الحكم وهو يعلم أنه منذرٌ بالبطاقة الصفراء وأن هذا الإحتجاج سيطرده من الملعب ويفقد فريقه لاعبين إثنين...... لماذا لماذا؟؟!!

بس كلام أسماعيل فيه أقرار بصحة حدوث العنف الغير قانوني والاحتجاج المفرط = أي صحة قرار الحكم
= وطبعا هذا يناقض طرح حجج بعض مريخاب المنبر الذين زعموا أن ماحدث
تلامس ناعم يدخل في أطار اللعب المشروع والاحتجاج تصرف في الحدود
العادية.........
فمن نصدق?
غايتو المثل بقول الفيك" بدربو ا" يا أسماعيل!!!
كمال

دا يا كمال توزيع الأدوار
يعني أبوشيبة يقول الحكم ظلم الأمل و يوحي بمحاباته للهلال
و إسماعيل من ناحية تانية يسأل بطريقة توحي تعمد اللاعبين أخذ الكروت لمصلحة الهلال
طبعا ما مهم الأسباب بقدر اهمية النتيجة وهي محاباة الهلال وبالتالي حصوله على البطولة تشوبه الشوائب و تحيط به علامات الإستفهام
الغريب في الأمر أن حسم اللقب كما هو واضح بيد المريخ , فقط عليه هزيمة الهلال مرتين
فمافي داعي لتجهيز الأعذار مسبقا

Quote: للامانة كتاب الصدى خيالهم واسع و يجيدون نظرية المؤامرة

بمناسبة نظرية المؤامرة دي شايف راكوبة اتهمنا -ضمنا- بعرقلة
إعداد المريخ لنهائي الكونفدرالية! الزول ده بقى مناضل فعلا يا
محمد البشرى!
_________________________

كتب اسماعيل حسن في مقاله اليوم مخاطبا لاعبي المريخ:

Quote: إخوتي وأبنائي اللاعبين

دي معناها في لاعبين قدر أولادو وفي لاعبين قدرو هو شخصيا

أما أطرف ما كتب فكان توبيخه لفيصل العجب:

Quote: فيصل عجب لعب بأطراف أصابعه، وأكثر من التمريرات الهبلة

وزي ما قال كمال عباس: "كلام اسماعيل فيه إقرار بصحة العنف
غير القانوني والاحتجاج المفرط"... وده المهم.

Quote: دي معناها في لاعبين قدر أولادو وفي لاعبين قدرو هو شخصيا

يا ود الريح زولك لو ما خجل كان قال وأبائي ..

غدا الخميس 1 نوفمبر مباراة الهلال وأهلي مدني بإستاد الهلال وهي المباراة
الأخيرة للهلال في الدوري الممتاز قبل مواجهة نده التقليدي في 29 نوفمبر.

الهلال سيقيم معسكرا إعداديا في رأس الخيمة بالإمارات لمدة 14 يوما بدءا
من 8 نوفمبر. تفاصيل المعسكر الإعدادي في هذا الخبر الذي ورد بعدد اليوم
من جريدة الاتحاد الإماراتية:



فريق كرة الكرة بنادي رأس الخيمة يلعب في دوري الدرجة الثانية بالإمارات
ويحتل حاليا المركز الثاني عشر بعد 4 مباريات وهو ليس من الفرق الكبيرة
في الإمارات [مثل العين والوحدة والجزيرة]. لذلك أتمنى أن يفلح الهلال في
أداء مباريات مع فرق المقدمة هناك وأن تكون الجدية والانضباط سمات هذا
المعسكر حتى يعود منه الهلال بالفائدة المرجوة.

بختكم يا ALGARADABI ومحمد البشرى الخضر!

سامعين تحت تحت كده مجلس إدارة الهلال بعد لمباراة دولية مع رأس الخيمة على كأس الخيمة!
نظام خيمة محمولة جوا

الأخ الأستاذ علاء الدين
السلام عليكم ورحمة الله
صادق تحياتي لك،
1/ شاكر لك أيضاً طول البال ومحاولة الوصول بالحوار إلى نهايات نافعة للكرة وللبلد وللناس.
2/ كلامك معقول ومقبول وتوضيحك حول حارس المرمى وحساسية الأمر بالنسبة لك كحارس سابق أيضاً مقبول ومحترم.
3/ وإنت برضو ما طالبني حليفة كلام الأحاسيس والغبائن انت فهمتو غلط ياخي. ما كنت أقصده وتاني بقول ليك ما طالبني حليفة هو غبينتكم الجماعية وخوف أمتكم من عدم تحقيق الحصول على بطولة الدوري الخامسة على التوالي والهي الحاجة الوحيدة الممكن تعزيكم اليومين ديل. من شنو؟
من انو المريخ اتقدم في البطولات الخارجية وانتو خرجتو بدري. صحي ما بدري خالص لكن المهم المريخ مواصل حتى الآن على الأقل.
ودي برضو ما حاجة سلبية عشان الناس السنة الجاية تحاول أكثر وأكثر.
"أمتكم" دي ما تبقى ليك كبيرة! مش أنتو اسمكم أمة الهلال ولا أنا غلطان.
4/ سعدت كثيراً بحديثك عن السجال بالبورد والصداقات التي تجمع الناس خارجه وبالقطع سأكون سعيد لو تعرفت عليك خارج السايبر. فأنت رغم قطامتك (ودي ما تعمل لي منها قبة) إلا إنو ونستك وصحبتك ممكن تكون لذيذة جداً. قطامتك دي أنا جبتها من وين؟ من مداخلاتك الكتيرة الأنا تابعتها في السابق قبل أن أمنح عضوية المنبر حتى.
قطامة شنو ياخي إنت في ناس كدة كنت قاعد تخت ليهم كدايس الكدارة في وشهم عديل كده.
بالمناسبة دي ما رديت على سؤالي: كدايس كدارة الزول داك حنة ولا شنو؟؟؟؟؟؟
كن بخير وصحة
مع صادق التقدير

Quote: يا ود الريح زولك لو ما خجل كان قال وأبائي .

ياخ مالكم??..كلما ندخل جادين.. تضحكونا !!

Quote: المريخ اتقدم في البطولات الخارجية وانتو خرجتو بدري

واحد مسطول سألوه: ما رأيك في الزواج المبكر؟
فقال: مبكر زي الساعة كم كده؟!

وبهذه المناسبة -يا abdelwahab hijazi- أسالك: الهلال خرج من البطولات
بدري زي شهر كم كده؟!

الهلال -كما هو معروف- خرج من البطولتين العربية والإفريقية في شهر 10
ومن المحتمل أن يغادرهما المريخ في شهر 11... بقت على الشهر الواحد ده
يا عبد الوهاب؟!

يا تمبس: تعال أمسك الزول ده أنا الكوتش قال لي ركز مع راكوبة

Quote: يا تمبس: تعال أمسك الزول ده أنا الكوتش قال لي ركز مع راكوبة

واحد (بقبقب) والتاني ( كدايس الكدارة في الوش) مين البقبقب ده يا (هوبا)

.


ياود الريح
فايتنكم بمباريتين في العربي
وفي الافريقي زيهم وتقول لي شهر
ياخ انتو فضيتوهو سيرة وبقيتو تفتشو حته تعسكروا فيها للمريخ
وياريتو يجيب "حق العبار" عند تامزين.

واحد مسطول قاليك مباريهو كلب من أول الشارع لحدي آخرو ما فكاهو. وهو شابكو ليك جر
يا كلب جر لما لف بالشارع التاني الكلب رجع
اتنفس بنفس وقال ياخي ده كلب طويل طول
هسع مباريتين المريخ ديل باقيات ليكم طويلات طول.

000محلي وخارجي
الخازوق يامريخاب وبعد الفصاحة والفلهمة دي كلها ثتطلعوا من المولد
بدون حمص !!! ........لا محلي ولاخارجي ...وماعارف يومها حا تقولوا أيه??????

حنقول وصلنا النهائي ما ( ميطي)!

Quote: الهلال سيقيم معسكرا إعداديا في رأس الخيمة بالإمارات لمدة 14 يوما بدءا من 8 نوفمبر. تفاصيل المعسكر الإعدادي في هذا الخبر الذي ورد بعدد اليوم من جريدة الاتحاد الإماراتية:

ود الريح ، كم اتمني ان يكون هذا المعسكر في احدي الدول الافريقية السمراء تماما (خاصة) ، لابد للهلاب من اجل احراز البطولة التعود علي اللعب في اراضي خارجية ، فهذه هي مشكلة الهلال ، وكذلك المريخ ،،،،

لابد من لعب اكبر عدد من المباريات كاعداد في الدول التي ستنافسنا مستقبلا ، وبلغة الاعمال المكتبية لابد من الخبرة ، فلو استطاع الهلال حل معضلة اللعب خارج السودان لاشك في احرازه نتائج باهرة ...

مسيرة الهلال في الافريقية (دور المجموعات) اتي بنقطة واحدة خارج ارضه ,,,, اذكر ان الاتحاد السعودي قبل سنين قليلة لعب نهائي آسيا ، واتغلب في السعودية ، وكانت المفاجأة ان انتصر بعدد كبير في ارض الخصم ، هذا ما نرغب ان يجيده الهلال ......

Quote: الأمل يعقد مؤتمراً صحفياً لتوضيح الحقائق استنكر سكرتير نادي الأمل العطبراوي الأستاذ أسامة علي ما ورد على صفحات بعض الصحف الرياضية مؤكداً بأن الشغب الذي حدث لم يتجاوز الدقيقتين نتيجة لظلم التحكيم. وابان لو كان هناك شغب مرتب أو غير ذلك لحدث عندما تم طرد اللاعبين داؤود وعلاء الدين ولكن الجمهور اقتنع بالحالتين لذلك لم يقدم على أي أعمال تضر بالنادي. واضاف أن الحكم أحمد يعقوب تسبب فيما حدث بشكل كبير حيث سبق وان رفعنا فيه تقريراً للاتحاد العام وطلبنا عدم اسناد مباراة له لفريق الأمل لسوابقه معنا الا أن الاتحاد لم يتعظ. واكد ان هناك حالتين كبيرتين تغاضى عنهما عندما اعتدى علاء الدين جبريل على داؤود قبل طرده وضرب يوسف محمد لجبارة وهذه الحالة بالضبط التي جعلت الجمهور يثور. وقال إن الجمهور حقيقة أحس بالظلم ولم يكن هناك منفذ لتفريغ الظلم. وأكد أن ما حدث لا يرقى لمرتبة الشغب كما أنه لم يستهدف لاعبي الهلال.. حيث ظل الجمهور يصفق للاعبي الهلال ويهتف لهم نهاية المباراة فالحكم تغاضى عن الحالات وسط مسمع ومرآى الجميع. فالأمل كان طيباً والهلال اطيب طوال شوطي المباراة واتحدى أن يكون زجاج الاستراحة قد تكسر قائلا أن الاعلام عمل على تكبير القضية وتضخيمها من أجل الاثارة وطالب بمعاينة الاستراحة وتوضيح المكان الذي تكسر ان كان قد حدث. وقال: إن كان الاعلام قد استمع لوجهة نظر طارق محمد نور كان عليه الاستماع للطرف الآخر حتى تكون هناك حيادية كما اوضح ليس من حق الاعلام أن يوضح اذا ما كان الأمل يلعب بأرضه ام حرمانه فهناك جهات اختصاص. وقال: إن تحذيراتنا للاتحاد بعدم اسناد مباريات الأمل بعطبرة للحكم أحمد يعقوب ذهبت ادراج الرياح. واختتم حديثه بأن نادي الأمل سيعقد مؤتمراً صحفياً بالخرطوم يوضح خلاله الحقائق كاملة والملابسات التي صاحبت المباراة.

الكابتن 31/10/2007

Quote: واضاف أن الحكم أحمد يعقوب تسبب فيما حدث بشكل كبير حيث سبق وان رفعنا فيه تقريراً للاتحاد العام وطلبنا عدم اسناد مباراة له لفريق الأمل لسوابقه معنا الا أن الاتحاد لم يتعظ.

وديعقوب مسير وليس مخيراً .. ولا ما قام به كان خياره هو؟ الحكاية فيها خيار وهوبا

Quote: ود يعقوب مسير وليس مخيراً

أعمل حساب الأرشيف يا راكوبة!

حكم المباراة أحمد يعقوب المتهم بالانحياز للهلال لأنه طرد لاعبين من الأمل
أدار مباراة الأمل والمريخ في الدوري الممتاز يوم الأربعاء 12/10/2005
في عطبرة وطرد لاعبا من الأمل ومنح المريخ ركلة جزاء في الدقيقة 93 حقق
بها فيصل العجب هدف الفوز!

Quote: عاد المريخ بانتصار ثمين وصعب خارج ملعبه امام الامل عطبرة بنتيجة 2/1 في مباراة مثيرة جدا ضمن مباريات الجولة العشرين من بطولة الدوري السوداني حيث احرز المريخ هدف الفوز في الدقيقة 93 من ركلة جزاء احرزها قائد الفريق فيصل العجب . وكان المريخ مطالب بالانتصار اذا اراد مواصلة التنافس على لقب الدوري ولذلك دخل الفريق بقوة منذ البداية لتحقيق الفوز فقط وهو ماتحقق مبكرا عندما احرز عبد الحميد السعودي الهدف الاول للمريخ في وقت مبكر . وفي الشوط الثاني كانت السيطرة متبادلة بين الفريقين وان كانت الخطورة اكبر لصالح المريخ وكاد بدر الدين قلق ان يضاعف النتيجة من تسديدة اصطدمت في العارضة ولكن في الدقيقة 88 فاجأ متوكل احيمر الجميع باحرازه هدف التعادل للأمل الذي جعل المريخ في وضع حرج الا ان اليمني على النونو استطاع ان يستغل مهاراته في الوقت الضائع لينفرد بالمرمى لتتم عرقلته من الخلف ليحتسب الحكم ركلة جزاء احتج عليها فريق الامل كثيرا ليطرد الحكم احد لاعبي الامل ويحرز فيصل العجب الركلة لينقذ المريخ من موقف حرج.

شنو يعني ضربة جزاء صحيحة 100%

Quote: الا ان اليمني على النونو استطاع ان يستغل مهاراته في الوقت الضائع لينفرد بالمرمى لتتم عرقلته من الخلف

Quote: شنو يعني؟ ضربة جزاء صحيحة 100%

أنا ما قلت إنها ما صحيحة يا راكوبة [أنا ما شفتها ذاتي]. لكن حكم منحاز للهلال
لن يحتسب ركلة جزاء للمريخ في الدقيقة 93 ليفوز بها في مباراة مهمة.
______________________

هاك دي برضو:

أحمد يعقوب أدار مباراة مباراة الميرغني والمريخ بكسلا في الدوري الممتاز
يوم الإثنين 15/5/2006 واحتسب ركلة جزاء للمريخ احتج عليها لاعبو
الميرغني ومدربهم وسكرتير ناديهم!!

Quote: حقق المريخ فوزاً مهماً مساء امس باستاد كسلا على الميرغنى بهدفين نظيفين

Quote: وفي الشوط الثانى ارتفع المستوى العام للمباراة وشكل الميرغنى خطورة على دفاع المريخ بعد دخول الطاهر حماد الذى تحرك بفاعلية ولكن المريخ استطاع في الدقيقة 62 من اضافة هدف ثانى من كرة تسلمها مامون زولو وتوغل بها داخل منطقة جزاء الميرغنى لتتم عرقلته من الخلف ويحتسب الحكم احمد يعقوب ركلة جزاء تصدى لها بنجاح ايداهو محرزاً منها الهدف الثانى وسط احتجاج واضح من لاعبى الميرغنى .. اجبر الحكم احمد يعقوب على اشهار البطاقة الصفراء لمدافع الميرغنى تيتا

Quote: عقب المباراة هاجم سكرتير نادى الميرغنى توفيق محمد على بعنف التحكيم وقال انه ذبح الميرغنى رغم ان المريخ ما كان في حاجة لمساعدته مبيناً ان ركلة الجزاء التى احتسبها الحكم احمد يعقوب لو كان جمال الوالى رئيس المريخ حكماً للمباراة لما قام باحتسابها وذهب في نفس الاتجاه مدرب الفريق مجدى مرجان والذى هاجم الحكم بعنف وقال انه اثر في نتيجة المباراة وتحامل بشكل سافر على الميرغنى

Quote: رغم ان المريخ ما كان في حاجة لمساعدته

الزول عاوز يعمل علاقات ، قايل كل الأندية ( ضلال)

Quote: عقب المباراة هاجم سكرتير نادى الميرغنى توفيق محمد على بعنف التحكيم وقال انه ذبح الميرغنى رغم ان المريخ ما كان في حاجة لمساعدته مبيناً ان ركلة الجزاء التى احتسبها الحكم احمد يعقوب لو كان جمال الوالى رئيس المريخ حكماً للمباراة لما قام باحتسابها

الارشيف لا يكذب ولا يتجمل
عشان كده ياراكوبة ما تتكلم بدون سند
واحمد يعقوب طلع حقكم بكذا بلنتى وطرد
كمان وهو لم يحتسب للهلال بلنتى فى المباراة
ولم يحتسب هدفا من تسلل ولكن طرد لاعب لاعتداء واضح
على حارس المرمى واخر لم يتحسب لكونه حاصل
على البطاقة الصفرء
يعنى ياراكوبة عندكم احمد يعقوب محليا
وباثيللى دوليا
عينى باردة

وأمس في الصحافة سكرتير الأمل قال نفس الشيء وزاد بطولة الحكام لا تشرفنا!

بعض مما قاله سكرتير الامل ن مباراة فريقه مع الهلال

Quote: !وقال إن الجمهور حقيقة أحس بالظلم ولم يكن هناك منفذ لتفريغ الظلم. وأكد أن ما حدث لا يرقى لمرتبة الشغب كما أنه لم يستهدف لاعبي الهلال.. حيث ظل الجمهور يصفق للاعبي الهلال ويهتف لهم نهاية المباراة فالحكم تغاضى عن الحالات وسط مسمع ومرآى الجميع. فالأمل كان طيباً والهلال اطيب طوال شوطي المباراة

Quote: أحمد يعقوب طلع حقكم بكذا بلنتى وطرد كمان

إنت شفت حاجة يا تيتاوي؟!

أحمد يعقوب -ذاتو- أدار مباراة مباراة حي العرب والمريخ في بورتسودان في الدوري
الممتاز يوم الخميس 03/8/2006 واحتسب هدفا تعادل به المريخ احتج عليه لاعبو حي
العرب وجماهيرهم مما أدى لتوقف المباراة أكثر من 10 دقائق!!

Quote: في مباراة شهدت أحداثاً مؤسفة المريخ يخطف التعادل أمام السوكرتا احتجاج عرباوي على هدف المريخ التعادلي بورتسودان: مجذوب حميدة تعادل المريخ وحي العرب بورتسودان أمس ضمن منافسات الدوري الممتاز في الأسبوع الثاني من دورته الثانية بعد مباراة قوية ومثيرة شهدها استاد بورتسودان وسط حضور جماهيري كبير آزر فريق حي العرب بورتسودان بقوة.

Quote: وفي الشوط الثاني واصل المريخ هجماته عن طريق الاطراف والعمق وقابلها السوكرتا باستماتة دفاعية، حتى الدقيقة 35 حيث تمكن السعودي من احراز هدف التعادل وارتدت الكرة أكثر من مرة من حارس المرمى واحتسبها الحكم هدفاً تعادلياً ، احتج عليه لاعبو حي العرب بحجة أن الهدف غير صحيح ، وتوقفت المباراة أكثر من 10 دقائق ، حيث حصبت جماهير حي العرب الملعب بالحجارة احتجاجاً على الهدف الذي احتسبه حكم سنار أحمد يعقوب ، وبعد ذلك تدخل الجهاز الفني والاداري لحي العرب وهدأت ثورة الجماهير، واستمر اللعب حيث تواصل الاداء بين الطرفين بغية تعديل نتيجة المباراة

وكتب الاخ راكوبة

Quote: حنقول وصلنا النهائي ما ( ميطي)!

وذلك ردا علي

Quote: الخازوق يامريخاب وبعد الفصاحة والفلهمة دي كلها ثتطلعوا من المولد بدون حمص !!! ........لا محلي ولاخارجي ...وماعارف يومها حا تقولوا أيه??????

يعني الوصول للنهائيات يعد كبير ياركوبة!!!!!وطبعا مع ملاحظة
النهائي الذي وصلته الان وأقتنصته فيما سبق نهائي بطولة ثانوية يعني
درجة ثانية!!!!!

ود الريح
تحياتى
وتقدير كبير لما تقوم به اعتمادا على الوثائق
والتاريخ المؤرشف

Quote: في مباراة شهدت أحداثاً مؤسفة المريخ يخطف التعادل أمام السوكرتا احتجاج عرباوي على هدف المريخ التعادلي بورتسودان: مجذوب حميدة

والجميل فى الامر اه باقلام مريخية فالزميل
مجذوب حميدة احد اصدقائى وهو مريخابى للطيش
يعنى ما بكتب كلام زى ده والا يكون حقييييقة
لك الود وانتا تنورنا بالحقائق

الحقيقة شنو يا أبوالتيت
الاحتجاج أم عدم صحة الهدف!

ياراكوبة لاحظ الاسلوب المرتبك فى التعليق ووصف الهدف
وانت تعرف ماقصدته بالحقيقة :

Quote: تمكن السعودي من احراز هدف التعادل وارتدت الكرة أكثر من مرة من حارس المرمى واحتسبها الحكم هدفاً تعادلياً

ماذا يقصد مجذوب بان الكرة ارتدت اكثر من مرة حارس المرمى واحتسبها الحكم هدفا
هذا يعنى ببساطة ان هناك شك فى كون الكرة عبرت خط المرمى او على الاقل هذا فهمى
لمثل هذه العبارة ولماذا لم يستخدم تعبيرا اقوى مثل ان كرة السعودى ولجت الشباك
او انه سدد كرة عبرت الحارس وغازلت الشباك
هذا والله اعلم

ممكن أن تكون الكرة هدفا دون أن تلمس أو تهز أو تغازل الشباك

Quote: ممكن أن تكون الكرة هدفا دون أن تلمس أو تهز أو تغازل الشباك

ولكن هنا يبرز الشك طالما ان هناك دربكة امام المرمى وايضا احتجاج
ودون ان نبعد عن القضية الاساسية وهى ياراكوبة ان احمد يعقوب حكم سنار صاحب
سوابق مريخية وانتم تحاولون لى عنق الحقيقة لمجرد انه طرد لاعبين يستحقان الطرد
ده كلو كوم وحكم بتسوانا باثيللو كوم طرد لاعبين واحتسب بلنتيين وفى رايكم
فانه قداتخذ القرار الصحيح اما طرد لاعب يرفس برجله واخر يسب الحكم ترونه ظلما
معايير مزدوجة بشكل

Quote: لمجرد انه طرد لاعبين

والله بالغ وماشاف شغلو.. المفروض كان يطرد الباقين كمان
انتوا احمد يعقوب ده ما تسوقوا معاكم في المحافل ، يمكن يساعد في الإنجاز الأول

Quote: انتوا احمد يعقوب ده ما تسوقوا معاكم في المحافل ، يمكن يساعد في الإنجاز الأول

طيب البغلب ليكم منو تانى فى الممتاز

Quote: طيب البغلب ليكم منو تانى فى الممتاز

نحنا هينين عندنا إنجازات ومستنين الباقين، الكلام في الآخرين

Quote: انتوا احمد يعقوب ده ما تسوقوا معاكم في المحافل ، يمكن يساعد في الإنجاز الأول

طيب البغلب ليكم منو تانى فى الممتاز

على قولك يا تيتاوي "الأرشيف لا يكذب ولا يتجمل". ما أوردته من
مقتطفات من الأرشيف قد لا يعني أن أحمد يعقوب ينحاز للمريخ لكنه
-وبنسبة كبيرة- ينفي عنه تهمة الانحياز للهلال!

وأختتم باستعراض أحداث مباراة الهلال والمريخ في الدوري الممتاز
في ختام موسم 2002 والتي أدارها أحمد يعقوب وطرد فيها لاعبا
من الهلال ونقض له فيها هدفا بحجة التسلل!

Quote: الهلال يصطاد المريخ بهدف في ختام الممتاز امس معتز كبير اكد بأنه كبير والشباك الحمراء توجته هدافاً للممتاز

Quote: حقق الهلال فوزاً غالياً وهاماً علي نده المريخ بهدف احرزه مهاجمه معتز كبير الذي توج نفسه هدافا للممتاز برصيده 15 هدفا وذلك في الجولة التي ضمتهما في ختام الممتاز مساء أمس باستاد المريخ خلال اللقاء الذي شرفه السيد حسن عثمان رزق وزير الشباب والرياضة وقادة العمل الرياضي ونجح المعلق العالمي عدنان حمد في اضفاء متعة رائعة للقاء عبر تعليقه الرائع للقاء التاريخي

Quote: وينذر الحكم احمد يعقوب مدافع الهلال صالح سنار بالبطاقة الصفراء لتأخيره الكرة وينشط تبري في قيادة العديد من الطلعات الهلالية الخطرة التي تمكن دفاع المريخ بقيادة الضو ودامر من احباطها ويحرز صلاح الضي هدفا الا أنه جاء من تسلل لم يتوان الحكم في عدم احتسابه ويتحرك المريخ عن طريق هيثم الرشيد الا ان مراقبة سنار اللصيقة قللت الخطر المريخي

Quote: ويشهر الحكم البطاقة الحمراء في وجه مدافع الهلال صالح سنار لنيله بطاقة صفراء اولي ويشن المريخ هجوما مكثفا عن طريق العجب وابوحشيش وهيثم الرشيد فيما برز الدفاع الهلال بقيادة ريتشارد وبسطاوي في احباط الهجوم المريخي

ود الريح
وهذا دليل دامغ اخر
اخوتنا المريخاب عندما لم يجدوا بدا
من الهزيمة قالوا كورة المعز غيرت
مسارها فى حفرة امام حارس المريخ
حتى هدف بسطاوى الغريب براسية من
منتصف الملعب فى شباك عمار مكى رموه
على ما وصفوه بنوافير سقاية النجيل
فطبيعى بعد فوز الهلال على الامل فى
اخر مبارياته فى الولايات ان يرموا
سهام النقد على الحكم صاحب السوابق
المريخية وهذا تمهيد لسنة خامسة
من الحرمان لبطولة الممتاز

Quote: حتى هدف بسطاوى الغريب

بسطاوي، وبوصفك هدف غريب ومخالف للطبيعة!

والله أولاد عمنا ديل حيرونا يا تيتاوي!

لكن بالمناسبة: اتهام المريخاب المستمر للهلال بأنه مسيطر على الإعلام والحكام
والاتحاد العام نوع من الإحساس بالدونية ودليل آخر على زعامة الهلال للكرة
السودانية لأن هذا الأمر يواجهه الأهلي في مصر والهلال في السعودية ويوفنتوس
في إيطاليا

سؤال:

بكرة في مباراة أهلي مدني: لو الحكم حسب لينا 3 ركلات جزاء وطرد 3 من لاعبي
الأهلي... هل سيجرؤ راكوبة العزيز على اتهامه بالانحياز للهلال بعد السياحة
الأرشيفية دي؟!

والله حيرتنا إنت يا أبو حميد
يا خي دي خرمة قوية خلاص الخلتك تجيب ارشيف أحمد يعقوب
بعد قريت مجموعة المداخلات الأخيرة دي إتخيلت راكوبة حيكتب ليك بلاش إستهبال معاك ورينا دورك في الحريقة
نتلاقى بعدين في كورة التتويج بإذن الله

الأمين البرير ما بقدر يعمل كده يا ودالريح، مع إنني لا أستبعد الخلاكم تمشوا لحدي رأس الخيمة استعدادا للزعيم بخليكم تواصلوا جهودكم مع الحكام.

Quote: ممكن أن تكون الكرة هدفا دون أن تلمس أو تهز أو تغازل الشباك

كلامك صاح يا راكوبة لكن ما ممكن تكون هدف لو ما عدت الخط بكامل محيطها

وبامناسة اليوم دخلنا فى نوفمبر وهو الشهر الحادي عشر في السنة الميلادية

يقابل ذو القعدة فى السنة الهجرية.

Quote: ليوم دخلنا فى نوفمبر وهو الشهر الحادي عشر في السنة الميلادية يقابل ذو القعدة فى السنة الهجرية.

بختك!

Quote: كم اتمني ان يكون هذا المعسكر في احدي الدول الافريقية السمراء تماما (خاصة) ، لابد للهلال من اجل احراز البطولة التعود علي اللعب في اراضي خارجية ، فهذه هي مشكلة الهلال ، وكذلك المريخ

سلامات يا رقم صفر

معسكر رأس الخيمة للإعداد لمباراة المريخ في ختام الدوري الممتاز، وللمباريات
المتبقية في كاس السودان.

وأتفق معك على ضرورة أن يتجه الهلال والمريخ لدول إفريقية للاستعداد للموسم
الإفريقي الجديد. الامر ذاته ينطبق على المنتخب الوطني الذي يتأهب لخوض غمار
بطولة أمم إفريقيا، إذ أن مباريات الإعداد بالسودان لا تعكس قدرة المنتخب على
المنافسة في غانا مع المنتخبات التي تلعب أفضل منا بعيداً عن أرضها.

الأخ عبد الوهاب حجازي ..
سلامات تاني ..
كدي اول شيل لي الاستاذ دي .. وخليها تمبس يا علاء (ميطي).. و (ميطي ) دي بتريح راكوبة شديد.
بعدين ردك دا مالو عاملو لي .. واحد إتنين، تلاتة ، أربعه كدا زي امتحان الجغرافيا كدا.؟؟

Quote: ما كنت أقصده وتاني بقول ليك ما طالبني حليفة هو غبينتكم الجماعية وخوف أمتكم من عدم تحقيق الحصول على بطولة الدوري الخامسة على التوالي والهي الحاجة الوحيدة الممكن تعزيكم اليومين ديل. من شنو؟ من انو المريخ اتقدم في البطولات الخارجية وانتو خرجتو بدري. صحي ما بدري خالص لكن المهم المريخ مواصل حتى الآن على الأقل.

أول حاجة شكرا والحمد لله إنك قدرت تتخيل إنو الغرض ما غباين بقدر ما هو توضيح .. وشايفك جيت تاني بالغباين دي .. يا عزيزي دي كورة .. وبالنسبة لي امتنا والخوف من المتوالية بتاعت الخماسية دي .. نوم قفا وخلصو مشاويركم وتعالو راجعين .. وجيبو الكاس وبرضو تعالو راجعين .. المسالة وما فيها عبارة عن رد لي الجقلبه البتعملو فيها دي .. كل ما في الأمر الناس دي عارفه وشايفه كويس إنكم مركزين علينا شديد من بداية المنافسة دي ومن بداية القرعة اها طلعنا من المنافسة الافريقية والعربية .. برضو ساكننا في المحلية وكل البيعملو فيهو الخبراء بتاعين الهلال هنا الجماعة الشايفهم قدامك ديل هو بس رد لي جمايلكم المغرقانا .. يعني بي اختصار بندافع عن نفسنا ضد اعلامكم الموجه للهلال المتمثل في راكوبه في البوست دا بالتحديد وفي البوستات التانية .. وضد بوستاتكم المفتوحه كل يوم للهلال .. يعني ساكننا في القاهرة وسوسه والواغ الواغ .. لحدي ما وصلتونا عطبره وشئ صفر دولي وشئ المحلي داخل عطبره .. وبرضو الجقلبه دي ما بتحلكم .. أما خروجنا البدري دا فموضوعو كبير جدا فكونك تخرج بدري ( من السيمي فاينال) وتغلب فريق القرن تلاتة صفر مع الرأفة .. وتدخل النجم الساحلي في علبو هو بين اهلو وعشيرتو واللي هم الفريقين المتنافسين على الكاس الآن وتضع بصماتك في كل شبر وتخلي الناس دي تعرف انو في حاجة اسمها هلال وهو عظيم جدا وتعمل ليك ألف حساب وتخلي امتكم تعمل متل العمائل دي .. دي براها محتاجة ليها خمسة كاسات .. امتكم دي كبيرة اصلو من غير ما تدخله بين قوسين .. ودي طبعا ما قاعدين نناقش فيها لانو موضوعه منتهي من بدري ..

Quote: سعدت كثيراً بحديثك عن السجال بالبورد والصداقات التي تجمع الناس خارجه وبالقطع سأكون سعيد لو تعرفت عليك خارج السايبر. فأنت رغم قطامتك (ودي ما تعمل لي منها قبة) إلا إنو ونستك وصحبتك ممكن تكون لذيذة جداً. قطامتك دي أنا جبتها من وين؟ من مداخلاتك الكتيرة الأنا تابعتها في السابق قبل أن أمنح عضوية المنبر حتى.

سجال البورد لابد منو ودا الغرض الاساسي من مواقع الحوار .. لكن لما السجال يكون عقلاني وفيهو من الموضوعيه بيكون كويس وبيودينا لي قدام .. عكس السجال المبني على حقايق مغلوطه الغرض منها فقط السجال البيودي لحتات ضيقه .. ويسعدني جدا برضو اتعرف بيك هنا وفي اي مكان تاني .. لو ركزت في موضوع القبه دي ح تلقاني صحبه لذيذه .. وجيب قبتك معاك برضو بتلقي الصحبه بي قبته دي مفيده .. إلا تكون قبتك دي ما تحتها ولي .. أها بالنسبة (للقطامه) دي طوالي بحلولك لي مداخلتك الأولى عن بقجة الغبائن بتاعت بشاشا .. يعني بي صورة أوضح إنت الجيت شايل بقجة بشاشا ومركز علي وانا بي حسن نيه رديت ليك .. وقمت طاااخ كبيت البقجه دي وطلعت منها أول حاجة يا لطيييييف .. زي الكأنك شفت قودويين بيحاور في بهاء الدين .. ودا الفرق بين إنك تكون باني ليك تصور مسبق عن زول ومصنفو من بدري بي إنو قطيم .. وهلالابي كمان . أو بي كدا مجرد ما رد عليك تجيب بندقيتك .. ودي طبعا من افرازات السجال البيدور هنا وتجي تبني مداخلتك مع الزول دا وشايل بقجة الغباين وحتى لو كتب كلام في محلو .. تقوم تجيب ليهو القبه ..

Quote: قطامة شنو ياخي إنت في ناس كدة كنت قاعد تخت ليهم كدايس الكدارة في وشهم عديل كده.

أها زي كلامك دا بيخليك مغلوب (اتنين) صفر مش تعادل (اتنين اتنين) .. الناس القاعدين نخت ليهم الكداره في وشهم ديل .. الواحد فيهم بيكون (قاعد) في الواااطه وعايز يجي يجيب قون بالزاوية الضيقه ويرجع يقعد تاني .. وزي ما قلت ليك نحن حراس المرمى ديل .. (بنطير) ونرفس ونقلع بي يدينا بي كرعينا وكلو قانوني .. بس المهم ما تجيب قون .. ياخي اقول ليك حاجة:
مع اني ما عايز اكتب ليك من الارشيف بتاعي لكن كلامك بجيب الكلام .. طبعا إنت صدقت اني كنت حارس مرمى ودي كويسه منك .. انا القدامك دا (كسرت) ايد واحد من اعز اصدقائي .. في مباراة كاسه بره .. وطبعا ما كان الغرض تعمد الاصابة لكن حارس المرمى الحريص إنو شباكو تكون نضيفه بيكون حريص إنو يغطي مرماهو بشكل سليم .. ويكون في نفس الوقت العين بتاعت العشرة انفار زملاهو البلعبو قدامو وهو آخر واحد وراهم .. والعين بتاعت الحداشر البلعبو ضدو ودي مهمه صعبة جدا طبعا واقل غلط من حارس المرمى نتيجتو ما بتغتفر .. وممكن تفقدك المباراة عكس الغلطات التانية الممكن يضايره ايواحد تاني .. المهم صاحبي دا بالرغم من انو لعاب واي حاجة .. لكن عادي جدا بيخت ليك كدايس الكداره في وش الحكم زاتو .. ودي حركة ما كويسة .. والنوع العامل زي قودوين داك لو انفرد بتلقاها جوه الكيس .. النوعيه دي ياحجازي عايزه معامله خاصة .. والميدان دا جواهو في حاجات كتيرة جدا لا الحكم لا المشجع ولا حتى زميلك بيكون احيانا شايفه .. دي طبعا لو اتعملت بي حرفنه .. يعني عندك مثلا زين الدين زيدان .. كلمة صغيره خلتو ينطح وياخد كرت احمر وناسو في اشد الحاجة ليهو وكاس العالم بره .. ودي فهلوه من اللاعب الايطالي يعني ما استعمل كدايس كدارتو زي صاحبكم البتدافعو عنو دا .. وعمله ظاهرة زي زيدان .. وفي نفس الوقت المعز استغل الحاجة دي .. بي فهلوه الميدان القلتها ليك دي .. زي الفهلوه بتاعت العجب العمل بيها ركلة جزاء مع الاسماعيلي .. المدافع طاقيهو من اللوحة بتاعت طعم طفلك من نص الميدان .. ولما الكورة بعدت منو .. اتدردق ووقع ليهم في المقرن .. وعليك الله تعال جيب بقجة غباينك وغالطني كمان .. في حاجة تانية ممكن تقعد بيها اللاعب بره .. والحكم يديك حقك بالكامل .. ومرات بيصفق ليك .. يعني زي صاحبي دا عايز يجي يفرفر .. ويجيب قون، يعني منفرد من نص الميدان وانا وهو والقون والله بس .. وحيات ابتسامتك انا طلعت ليهو بره الطمنطاشر .. وردمتو ليك لمن استغرب .. ووديتو الجير .. وكدايس كدارتي ما النوع البتعوق .. لكن حارس المرمي لازم يكون عامل زي ابو القدح البيعرف يعضي اخوهو من وين .. يعني بي صراحة عندو معالجه خاصة لي حالات الانفراد .. ولي حالات اللعيبه البتقوم تضرب راسيه داخل الخط .. واللعيبه المزعجة العامله زي رونالدو بتاع البرازيل الكل ما ترفع راسك بتلقاهو قدامك .. في المعالجه الممكن تعمل منها ضربه تفقدك الكتير واحتمال توديك بره الميدان وفي منها البتودي اللاعب المزعج بره الميدان .. صاحبي دا عفصتو في المحلات البتوديهو بره وتريحني انا.. لانو في الحالة دي لو ما اتعاملت معاهو كدا .. كنت بروح فيها انا ممكن يحاورني واحتمال يدخله لي بي تحت كرعيني واملصه زيي وزي بهاء الدين واحد .. واحتمال اتشبك معاهو يقعدني بره يا يوديني الجير .. عفصتو قبلو بي طريقة قانونيه .. وهو طار زي العجب علشان يقع جوه الطمنطاشر .. قام وقع علي ايدو كسره .. اها حسع غلطان أنا واللا العجب حبيبي ..؟

Quote: بالمناسبة دي ما رديت على سؤالي: كدايس كدارة الزول داك حنة ولا شنو؟؟؟؟؟؟

..

Quote: هسع انت النسألك انت اللعبت الكورة وقطعتها عليك الله في زول بتهبشو كدايس الكدارة في راسو يقوم تاني زي الماحصل حاجة. ليه كدايس ولا حنة؟

انا طبعاما رديت ليك لي سبب واحد .. لانو قلت لي لعبت كوره وقطعتها ولانو كتير من كلامك ما وقع لي ولانك بديته بي يا لطيييييف الطويله دي .. ولاني حسيت انك خاتي ليك بقجة غباين مسبقه .. وللحقيقه ما كنت ح ارجع علشان ارد ليك تاني .. ومداخلتي ليك السابقة كنت معتبره الاخيره لانو دخلت في السجال القلناهو فوق داك لو بتتذكر .. لكن طالما جيت ورديت وشلت البقجه القديمه.. ولو جيت ارد عليك حسع دي بقول ليك بي بساطه جدا .. لو إنت لعبت كورة وحتى لو ما قطعتها مفترض تعرف إنو في حالات اللاعب بيستعمل فيها المكر .. والدهاء .. يعني ممكن يديك (كف) صاموطي والحكم يسمعو لكن ما يشوفو لا رجل الخط .. ولا الحكم الرابع .. ويشوفو كل الميدان . ولما انت تكون بليد (وبعد الشر عليك) .. تقوم تردها ليهو يقوم طاااخ يطير ويقع والميدان كلو يشوفك والحكم .. وناس بيتكم زاتهم وهنا ياخد (الكرت الأحمر والنضاره).. على وزن القرد الاعمش والنضاره .. ويطلع هو بليد جدا .. وتتدردق في الوااااطه ويجيبو ليك الاسعاف واي زول يشوفك يقول الزول دا يغطو .. ويعدو ليك لي مية ما تقوم .. يكبو ليك موية في راسك وبعد شوية تقوم واحتمال تمشي تجيب قون كمان .. فيا عزيزي معليش لكن شكلك ما لعبت كوره انت .. يا مسخنه معاك فهلوة المعز القدر يستثمره زي ما قلت ليك زي استثمار العجب الاجنبي .. ويطلع بيها اللاعب خارج الملعب .. لانو كل الناس دي شافت الزول دا رفع كدايس الكداره للزول دا في راسو .. وما عايزه ليها اتنين يتغالطو فيها .. أقول ليك حاجة:
والله دا لو الحضري كان لحدي الآن بتدردق وكان الحكم طرد معاهو الحداشر لاعب .. والمشجعين زاتهم .. بلاي إنت يعني كنت عايز الحنه دي تجيب دم يعني .. علشان يحلل الكرت الأحمر دا..؟
ياخي معقولة ..؟

هوي يا جماعة معليش انا قاعد اعمل للزول دا فرش متاع علشان كدا ردي طويل .. والجماعة ديل لو ما عملتو ليهم كدا .. بيبقو زي راكــوبة دا .. ويمشو يشيلو البوست دا .. ويرفعوهو في اليوتيوب .. ويقولو ليك المهاجم بتاع الأمل عطيره قاصد (يحنــن) المعز ما قاصد يضربو..
والله حالتكم (تحنــن) (المعز وشوماخر وهيقيتا ونوكونو زاتو)..
أي سؤال..؟

طبعا مع صادق التقدير .. وقواسيب مودتي .. ومؤنة عام من الموده
وبدون بقجة غباين ..

Quote: . وخليها تمبس يا علاء (ميطي).

الله يريحك ي تمبس، تصدق أو جملة أقراها اليوم
بعد شوية حتقول أنا بحب الشرميطي

سؤال معسكر الإعداد للمريخ
بالجرورة
ولا مكرمة
ولا تضافر جهود
ولا كاش؟

ده بوست غريب و عجيب
و اخونا كمال عباس كمان إتجدع شديد ( تحياتي )

النضم اللي كنا ح نكتبو زاتو راح ..

_
راكوبة
مفروض المريخاب في المنبر يعملو ليكـ تمثال زي تمثالنا اللي ح نعملو لأخونا أحمد الريح

نوبي
ودالريح جاب كأس من ورانا ولا شنو، أبو الهل ظاااااااطو حصاد سبعين سنة كورة " صفر دولي كبيرة" خلي ودالريح

يا راكوبا اسمع كلامى وشوف ليك بوست تانى
زرزرة اخونا احمد الريح ليك خلت مداخلاتك باهتة
وشكلها باااااااااايخ

منطقيتك فايتة الحد يا أحمد الريح وبالبتعملو هنا
اظنو ياهو المطفش مزمل ابو القاسم من المنبر ده
لانو لو عملت معاهو زى ما بتعمل لى راكوبا حيطلع من جو
اللعب او حيتطلب الاستبدال وشكلو حيبقى
بااااااااايخ خالص خالص

Quote: يا راكوبا اسمع كلامى وشوف ليك بوست تانى زرزرة اخونا احمد الريح ليك خلت مداخلاتك باهتة وشكلها باااااااااايخ

(باللاهي)!

Quote: (باللاهي)!

يازول كان زعلت العفو والعافية

Quote: يا تمبس: تعال أمسك الزول ده أنا الكوتش قال لي ركز مع راكوبة

وين الزول دا مشى ..؟
يا حجازي .. زي ما شايف الكوتش قال أوديك الجير .. وهو زي ما شايف عامل لي راكوبــه موية في (ضهرو)
المهم .. في الموضوع زي ما قلت ليك إنت هبشت المسالة بتاعت حراسة المرمى دي .. ودي المنطقة المحظورة حقتنا عشان كدا صعب جدا تقوم تجيب ليك قوون فينا من النص ...
عايز اقول ليك حاجة بتتعلق بالشيطنة الفي الميدان وخليك من المسالة بتاعت الرفس والضرب ..بقصد هنا المسالة بتاعت التكنيك داخل الملعب ..
تعرف إنو حامد بريمه دا من اشطن الناس الكانت بتعمل الحركة دي ..؟
ودا متعلق بي قراية فكر المهاجم .. والتوقعات والتخمين .. يعني تعرف مثلا وليدطاشين بجيب قون بالراس من ياتو حته ووالي الدين الله يرحمو ممكن يعمل لي (دبل كك) من ياتو مكان وتدخل وين .. هنا حامد بريمه كان بيمارس حاجة عجيبه جدا .. ما موجوده في اي حارس مرمى مر على السودان لحدي الآن من فترة ما مشى حامد بريمة .. لا تقول لي معز لا تقولي لي بهاء الدين ملوص ..
حامد بريمة كان بيتعمد يغري اللاعب .. يلعب ليهو في المكان العايزو هو .. العايزو حامد بريمه ما العايزو المهاجم .. بي صورة اوضح .. حامد بريمة كان ممكن يديك مساحة كبيرة جدا تخليك تشوف القون دا قدر الضربة .. واللحظة البتلعب فيها الكورة في المكان الشايفو انت كبير دا والفتحو ليك هو بمحض ارادتو .. بتلقاهو حسب خطواتو تمام جدا واللي هو مسبقا عارفه .. وينقض على الكورة سواء كانت في الحلق يا في اضيق زاوية في الارض .. خلاف كدا حامد بريمه كان داخل خط سته مستحيل إنك تجيب فيهو قون بي فوق بالذات الكور العالية لانو مع ضربة الكورة بيكون طلع صاح وحسب خطواتو البيهجم بيها والخطوات البرجع بيها في حال انو فشل أو ارتدت الكورة لي اي سبب .. بعد يستلم كورتو بعداك بيفكر يتصرف معاك كيف .. يضربك او يستهبل على الحكم بي اي احتكاك صغير معاك ودي كانت مشكلة المهاجمين البيلعبو قصاد حامد بريمه يعني بي اختصار القون البجي فيهو دا .. إلا حاجة من الله بس .. ولو عايز يطردك كان بيطردك عادي جدا..


يا أحمد الريح عن اذنك عايز اسال راكوبــة دا سؤال لو سمحته يعني

يا راكوبــة .. إنت صحي حامد بريمة دا كان (رشــاشة) واللا دا كلام (مجالس) ساكت..

ياتمبس
أسمع الحكاية دي عن حامد بريمة عن جارنا مدرب المريخ السابق(بعرفو عامر تيتاوي)

قال حامد بريمة شوهد في عربة ودملاح عشية مباراة هلال مريخ...
المدرب قال فور تلقيه الخبر اتصل بالحاج شاخور وسأله عن العمل وهل يشرك حامد بريمة أم لا؟؟
ولم يفيده شاخور بشيء
قال بعد منتصف الليل وقفت عربة تاكسي أمام منزل المدرب وجا سواق التاكسي وقال ليهو حاج شاخور عايزك(مانزل من التاكسي)
قال لما مشيت لي شاخور بادرني قائلا:
شوف يا......
الزول ده كان بايع بنتغلب واحد
لكن لو وقفتا لينا الاحتياطي الرمة ده بناخد ستة

وفعلا تم اشراك حامد بريمة و انتهت المباراة تعادل بعد أن كان المريخ متقدمابهدف طوال زمن المباراة أحرز النقر هدف التعادل قبل النهاية بدقائق
و كان بريمة النجم الأول في المباراة

Quote: يا راكوبــة .. إنت صحي حامد بريمة دا كان (رشــاشة) واللا دا كلام (مجالس) ساكت.

تامبا
في حاجة بتمنع الإنشان للخروج من (الضلال) إلى الهدى
تخريمة
انتا زاتك عندك وقت