أرماجدون خرطومية....مشاهد من قيامة المواصلات(ضع أنت الصورة)

(1)
سحابة كثيفة تغطي سماء الخرطوم،أشد كثافة من المعتاد، إذ أن السخط والسخانة ازدادا بأكثر مما اعتاد الناس في يومياتهم المنهكة....
ماعندي كاميرا، عشان كده خت صورتك

(2)
فتاح ياعليم ، رزاق ياكريم..ز
من موقف الشهدا إلي(الخرطوم)، القوسان لأكون أكثر دقة.
بعد أن توهطنا في الهايس، سمعنا منادي من (الركيبة) ينادي: عربي الموقف القديم يا...وكررها واضحة لا لبس فيها ولا غموض، بما يوحي بكياجماعة انزلوا من هايسكم واركبوا هايسنا. وقد كان له ذلك.
نزلنا وركبنا.عندما وصلنا الخرطوم اتجه سيد الهايس نحو الاستاد لا تعتره على مقصده قشة!!!وبدأت الطنطنة: يا زول ما بي هنا. ياأبو الشباب انت ماشي وين؟ وخلافه من عبارات الاستنكار الضعيفة.
سيد الهايس انفعل وقال: انا ماقلتل الموقف القديم أنا قلت الكبري القديم.
حركة الاستهبال اثارت الركاب فانفعلوا بزيادة، احد الاعمام فش غبينته بيا حرامي، ونعى الأخلاق السودانية.
واحد من الشباب خاطب السائق بانكسار لطيف: يعني داك عربيتو أجد من بتاعتك، وكنت راكب جنب بت سمحة، يعني حأكون نزلت ليه؟؟
بتاع الحافلة واصل الاستهبال: لو مشيت الموقف القديم حيدفعوني 30 ألف.
وبحركة مسرحية أخرج (حديد) من جيبه: ياخ ما تجوطوا فينا ساكت، الداير قروشو يشيلها ويمشي.ولم يأخذ أحدا شيئا لزوم النخوة السودانية.
ونزلنا.
بتاع الحافلة راقب المنظر ظافرا، دردم سفته وهويقول: فلاحتكم فينا بس.

(3)
استاد الخرطوم
نص النهار
_لو سمحت ياخ، مواصلات ظلط بي وين؟
ترتد الحيرة مضاعفة: والله ما أأأأأأ عارف، لكن كدي شوف بجاي، جنب الكشك داك.
_عليك الله دي ظلط؟
_لا لأ، الحاج يوسف
!!!!!!!!!!!!!

(4)
على امتداد البصر ،أكوام البشر تغطي الأفق، من تقاطع الميريديان شرقا حتي صينية القندول غرباالتجمعات الحائرة واقفة. بيد تجفف العرق وباليد الاخرى تؤشر لاي دابة تمر بالشارع.
الكداري تعذر على كل كبير وسمين و زهجان.
على الرغم من ذلك اضطر الكثيرون لاكمال المشوار حتى الاستاد و (حي جاكسون) مشيا.خصوصا وأن اصحاب المركبات اتخذوا مسارات بعيدة عن قلب الخرطوم.
أصحاب الهايسات معظمهم يقف في مكان وسط خارج الموقف القديم وفي نفس الوقت لا يصل للموقف الجديد.
غايتو جنس تشبح!!!!!!!!!!!

(5)
(التجارات الصغيرة) كاملة الحضور في الموقف الجديد.
الموية، تشاشة الجرايد،جماعة ورنش، فراشة المناديل، ستات الشاي......
و......النشالين.
ملحوظة: يوجد مجمع دكاكين جديد( ويوافق مواصفات تطوير العاصمة الحضارية) على يدك الشمال وانت داخل الموقف الجديد من المدخل الشمالي.
ياربي الحريف الاشترى بدري هناك منو؟
غايتو ناس تحويل الرصيد الجنب عمارة الدهب دقسوا.

(5)
إحدى الموظفات قالت بانها وصلت الشغل الساعة عشرةإلا....وراجية زول يفتح خشمه معاها عشان تنبزو. ماأي زول جا الشغل بدري معناها عندو عربية، وشوف براك ، ياتو موظف العندو عربية.