الخرطوم المهزوم ب 8 ليس ضعيفا .. لكن الهلال العائد من بطولة الزعماء (مشكله)!!

- الخرطوم أو (الخرطوم3) سابقا .. بقى (الخرطوم 8) .. ولو ما الله ستر كان حصل هزيمة المريخ من سانت جورج الأثيوبى (9/1) .. الخرطوم ليس فريقا ضعيفا .. لكن قلناها من قبل الهلال العائد من احتكاك قوى على كل من يقابله أن يكلم البعدو عشان يبل رأسو!
من يلاقى الزمالك/ الأهلى/ أسيك/ الترجى/ النجم .. اى فريق ح يقابلو حتى لو (البعيو) ح يكون (بسكويت)!!

- بعد ظهور نتيجة القرعه الأفريقيه على اتحاد شداد أن يفكر فى مدرب مؤهل وعير منحاز يناسب المرحله القادمه .. (مازدا) والعجوز المعاهو (بعد تعب) انتصروا على حى العرب بورتسودان بهدف .. ح يعملوا شنو فى تونس ؟؟

مبروك الانتصار الكبير
ولكن كنت اتمني أن يحسم كلاتشي وقودوين مسألة الهداف من خلال ال 8 أهداف دي
حتي لا تتكرر حكاية ضربة الجزاء (الخارج خط 18) بتاعت السنة الفاتت والتي عن طريقها
تمكن ايداهو من اللحاق بكلاتشي.....

تاج السر

كل سنة وانت طيب

المشكلةالوصيف ده حيكون وصيف لي متين

يادوب قدر اليوم يفوز على حي العرب بهدف دون مقابل في بورتسودان

طلب بسيط من ريكاردو

أن يخرج من نطاق التشكيلة الثابتة ويجهز البديل كي لا تتكرر مشكلة الهلال عندما غاب ريتشارد والمعز

تاني بنجيك يا بطولة ابطال افريقيا


والايام بيينا


جمال

الخرطوم تلاتة ما كان ضعيف؟

يعني لو كان ضعيف كان اتغلب 36 صفر والله شنو؟ ياخي ديل ما مسكو الكورة
وناس قودوين زي اللاعبين تمرين مع فريق السجون..ديل حتي ما كانوا مستائين من النتيجة
ومستسلمين استلام تقول قابضين قيمة كل قون يدخل فيهم..

حبيبنا القرضابى
سلام
كتبت:-

Quote: حتي لا تتكرر حكاية ضربة الجزاء (الخارج خط 18) بتاعت السنة الفاتت والتي عن طريقها تمكن ايداهو من اللحاق بكلاتشي.....

السنة الفاتت اللحاق ماتم بى ضربة جزاء وبس .. برضو لا تنسى موضوع (تحرش) صالح سنار (ولدنا) بكلاتشى من اجل اخراجه عن المباراة باى صوره .. حتى لا يلعب باقى المباريات، وقد كان .. يا اخى ما عارفين نعمل مع (الكاش البقلل النقاش ده شنو)؟؟

الحبيب جمال السنوسى
كل سنه وأنت طيب
كتبت:-

Quote: المشكلةالوصيف ده حيكون وصيف لي متين

طبعا الذ نكته يا جمال انهم (ناكرين) وما معترفين انهم (وصفاء) رغم انهم يأتون من مركز (الوصيف) للمشاركه فى البطولات .. وغاية ما يحققونه هو الحصول على كأس (الوصفاء) ويصبحوا (زعيم الوصفاء) !!
يعنى اتخيل واحد يقولوا ليهو مبروك .. بقيت (زعيم البلطجيه) أو (الرباطين) دى هسه شكره ولا نبذه .. ما أحسن منها لو بقى (طيش) الزعماء خليك من (التانى) زى (الزعيم) سيد البلد !!

المحلي داخل عطبرة ..

الأخ/ نزار حسين
تحية طيبة
كتبت:-

Quote: الخرطوم تلاتة ما كان ضعيف؟ يعني لو كان ضعيف كان اتغلب 36 صفر والله شنو؟

فى مرة كتبت بأنه سبب سيطرة الهلال على بطولة الدورى الممتاز المطلقة حتى حينما تقدم عليه المريخ فى مرة ب 7 نقاط فى الدورة الأولى فجاء (الزعيم) سيد البلد فى اللفه وحصلو وتقدم عليه ب 7 أخرى، انه (الهلال) الذى يعود من منافسة شرسه واحتكاك قوى، يجعله يلعب ينتصر على أى ناد سودانى محلى بكل يسر .. فالخرطوم 3 هى الخرطوم 3 لكن الشئ الذى تغير هو الهلال العائد من بطولة واجه فيها أسوا ظروف فى نيجيريا مثلا .. وواجه فيها اندية قوية مثل الزمالك والأهلى والنجم والترجى وأسيك.
يعنى خذا كمثال متى انتصر الهلال أو المريخ فى بورتسودان بتلك الطريقة السهلة التى انتصر بها الهلال على مريخ بورتسودان فى بورتسودان حتى وصلت النتيجة 4/ صفر؟
المريخ من قبل هزم من نفس مريخ بورتسودان بذات النتيجه وهزم من مريخ الأبيض بنفس النتيجة أى 4 / صفر وهزم من هلال بورتسودان ب 9 لاعبين 1/ صفر.
دون شك (المريخ) سوف يستفيد من أستراره فى بطولة (الوصفاء) ومن احتكاكه لأول مرة بفريقين من الأقوياء هما (الصفاقسى) و(الرجاء) فكل الأندية التى قابلها من قبل (حمام ميت) .. أو (حمام منتحر) !!

اخونا ود الأبيض الاستاذ/ عصام دهب

Quote: المحلي داخل عطبرة ..

وما احلى المبيت بى عطبره !!
خاصة مع زنقة (مريخاب) السياسه من (باقان) .. تشبة (زنقة) الوصيف من (الصفاقسى)!!
دى يا عصام (فرمالتكم) .. وعاملين زى الزول الببخس فى روحو لأنه لولا (مركز الوصافه) فى هذه البطولة (المحليه) لما فرد (البعيو) ساقيه وشارك فى منافسات (الوصفاء) !!
المره دى عندنا مزاج نكبر (بيت الطاعة) ونجمع بين بطولتى كاس السودان والدورى الممتاز .. ونطالب بالمشاركه بفريقين واحد مع الزعماء والثانى مع الوصفاء .. لكن من يقنع (شداد)؟؟

من منطلق حرصنا الأكيد على الوطن وسمعته ونحن اولى به من غيرنا .. نطالب فورا بابعاد الكابتن (مازدا) فهو غير جدير لقيادة المنتخب الوطنى فى هذه الظروف التى اوقعته ضمن مجموعة الموت.
وبالأمس القريب رأينا مدربا كبيرا مثل (الفاتح النقر) معروف انه افضل من (مازدا) فى مجال التدريب ولا توجد اى مقارنة بينهما، يقف متفرجا لا حول له ولا قوة وفريقه يهزم ب 8!
نحن نخشى من هزائم مثل هذه تضيع هذه الفرصة التى انعم الله بها علينا بملاقاة منتخبات (حمام ميت) خلال التصفيات اوصلتنا الى ما فيه الآن من حال!!

كتب سامى:-
تاج السر أكد لي حرصك على سمعة البلد!!
- حرصى على البلد يتمثل فى مطالبتى الأكيده بابعاد (مازدا) فورا ودون مجامله و(تكريمه) رغم عدم قناعتى به كمدرب (موهوب) لكنه ما قصر تحمل مسوؤلية الأشراف على المنتخب وخدمه الحظ كثيرا بملاقاة منتخبات (ضعيفه) .. ورغم عدم قناعتى بشئ اسمه (عدم الأنحياز) يمكن أن يتصف به مدرب له ونه رياضى معروف هو اللون (الأحمر) .. فنحن فى زمن قلت فيه (الفضيلة) و(الأخلاق) وانقطع فيه (الوحى)!!
- حرصى الأكيد على البلد يتمثل فى ايجاد مدرب مؤهل لقيادة المنتخب للمرحله القادمه سودانى أو اجنبى لا يفرق الأمر كثيرا، المهم أن يكون متابع لكرة القدم السودانيه ويعرفها جيدا فلو أتينا بمدرب لا يعرف كرتنا مهما كان مستواه لن يقدم شيئا مفيدا لأنه من الصعب أن يتعرف على اللاعبين وقدراتهم فى هذا الزمن القصير جدا، وحسب وجهة نظرى الخاصه أن (ريكاردو) مدرب الهلال الممتاز، مشكلته الأساسيه انه لم يتعرف على لاعبى الهلال حتى الآن، بدليل انه يضع لاعب موهوب مثل (صالح عبدالله) على دكة البدلاء ويصر على اشراك (مساوى) أو (مهند الطاهر)، ويفعل نفس الشئ مع (جوليت)!!
- حرصى الأكيد يتمثل فى وقفتى الصلبه مآذرا (الصفاقسى) التونسى حتى يجتاز (البعيوات) وحتى يعرفوا حجمهم الطبيعى ولا يتطاولوا على سيد البلد وزعيمها، لكنى لا اتمناها هزيمه شنيعه تصل حد (فضيحه) سانت جورج الأثيوبى 9/1 .. اى اريدها على طريقة (اللهم لا اطلب منك رد القضاء، وانما اللطف فيه)، وذلك لسببين الأول حتى لا يضطر المدرب المسوؤل عن المنتخب أن يختار منهم عدد من اللاعبين لا يمتلكون للمهارات الأساسيه للعب فى منتخب قومى، ويظهر ذلك فى غانا .. وفى الحقيقه المريخ ليس فبه أكثر من لاعبين مكانهما (دكة البدلاء)!
والسبب الثانى حتى لا تشوه أو تشوش هزيمة (البعيو)، اذا جاءت كبيره - لا سمح الله - على انتصارات الهلال الرائعه المدوية، التى وللاسف الشديد يبنى عليها كثير من الذين لا يعرفون كرة القدم للتحدث بأننا نمتلك منتخبا قويا يمكن أن يفعل شيئا فى غانا!!
علينا أن نعرف ونعترف بحجمنا ومستوانا قبل الذهاب (لغانا) وأن نطوع كل الظروف للخروج بنتائج مشرفه!!
- حرصى الأكيد يتمثل فى رفضى المطلق لتحقيق الأنتصارات بصورة غير شريفه أو نزيهة مثلما حدث خلال مقابلتى (الأسماعيلى) فى مصر والسودان، فالرياضة أدب وأخلاق ونزاهه وقيم وسلام ومحبة لا انتصارات تحق بوسيلة (الكاش الذى يقلل النقاش)!!
-أن الذين يفرحون لتحقيق الأنتصارات باى وسيلة حتى لو كانت وضيعه ويعتبرون ذلك نوع من (الوطنيه) عليهم مراجعة انفسهم، لأنهم بهذا الأسلوب يدعمون ما يحدث داخل الوطن من ازمات وجراح وفساد وبيع وشراء للذمم .. لأن المبادئ لا (تتجزأ)!!!