Post: #1
Title: كان شــالو ما بنشـــال !!
Author: 3mk-Tango
Date: 10-19-2007, 03:35 PM
Parent: #0
احترام لكل المهن والمستويات والخلفيات الثقافية للبشر ….
لكن …
ما مكن ياخ اي زول يجيبوهو في التلفزوين عاوز يعمل لينا فيها سيبويه ..
في شنو ولي شنو وعشان شنو ؟؟؟؟؟؟؟؟؟؟؟؟؟
انا اشكر التلفزوين الذي اتاح لنا هذه الفرصة .. وهاك يا تمتمه ولعثمة … لي شنو يعني ؟؟
الزول ما ممكن يمسك المكرفون دا ويتلكم زي البتكلم مع صاحبو ويقول كلام عادي جدا .. قطع شك حيكون
كلام جميل وعفوي وحيطلع كل الكلام العاوز الزول يطلعو .. في شنو الميكانيكي يتكلم فصيح ويعمل
فيها سيبويه وست الشاي تعمل فيها الخنساء .. الممثل يعمل فيها المعري .. وسواق الحافله يعمل
فيها فراج الطيب .. والبروفيسر يعمل لينا فيها بروفيسر ؟؟؟ منو القال ليكم عاوزين نسمع محاضرة
لغة عربية في نص الليل ؟؟؟
تقعدو تفتشو في الكلام فتيش تمسكو في اللغة وتطيرو لينا المعلومة .. لي بس ياخ ؟؟؟
لي شو اي زول عاوز يتكلم في التلفزيون بكون عاوز يختف الميكرفون ؟
والمذيع ما يديهو ليهو وهو يجر والمذيع يجر زي الكدايس المتشاكلين في لحمه ؟ ما من الاول المذيع
يكلمو يا الاخو :انت اتكلم وانا بكون ماسك المايك وبعدين يبدو التصوير .. ولا دي لازمة من لزوم ما يلزم ؟؟؟
لي شنو اسئله المذيعين بتكون اطول من الاجابة؟؟؟؟
واحيان كثيرة تحوي الاجابة وتحتاج من الضيف فقط ان يهز راسه بلا وغالبا بنعم ؟ ليه يعني بفترضو
في الضيف والمشاهدين انهم اغبياء ؟ وانهم وحدهم المذيعين هم العارفين الاجابة ؟
ولازمة الضيف شنو طيب …
لي شنو حسن ساتي دا يعمل لقاء مع وردي ويتكلم عن تاريخ وموافق واحاسيس وردي اكتر من وردي زاتو ؟
طيب وردي لزوم قعدتو شنو ؟؟ طيب ما تجي تتكلم براك وتخلي وردي راقد في رقدتو يا نسمعك يا ما
نسمعك
…
لي شنو ترجعوني لي نقدكم تاني في العيد دا ؟ ما من زمان انا اقتعت انو ناخدكم كدا او نخليكم كدا
… لكن عارفكم انتو ( كان شالو ما بنشال و كان خلو سكن الدار … ) ..
عليكم الله يا ناس تلفزوين السودان شوفو قناة الجزيرة وراجعو برنامج واحد قدم مؤخرا عن احمد شوقي
اسمو ( شاعر الالف عام ) وشوف البرنامج داكيف كان خفيف ودسم في نفس الوقت و كيف مر علي كل الجوانب المهمه في شعر وحياة احمد شوقي العريضة في ساعة واحدة .. ساعة واحدة وكل زول قام شاف
ليهو شغله …
قومو لفو بلا حسن ساتي بلا حماميزو معاكم ..
نفسيييييييييييييييييات ياخ …..
|
Post: #2
Title: Re: كان شــالو ما بنشـــال !!
Author: خدر
Date: 10-19-2007, 03:51 PM
Parent: #1
تنقو .. كل سنه وانت طيب ياخي
وايامك اعياد
سلامتكـ من المغسه ياخي
|
Post: #4
Title: Re: كان شــالو ما بنشـــال !!
Author: 3mk-Tango
Date: 10-19-2007, 04:03 PM
Parent: #2
خدوري كل سنة وانت طيب ولقاء وام لقاء ..
بالمناسبة امس كنت بسمع 3 اغاني بي صوتك رصاصة في قلب الغربة والله ... و3 تاني بي صوت عادي التجاني قربت ارجع البلد
ناس تلفزيون المغسة ديل خليهم قومو نفسي ياخ ..
|
Post: #3
Title: Re: كان شــالو ما بنشـــال !!
Author: هاشم أحمد خلف الله
Date: 10-19-2007, 03:53 PM
Parent: #1
Quote: لي شو اي زول عاوز يتكلم في التلفزيون بكون عاوز يختف الميكرفون ؟
والمذيع ما يديهو ليهو وهو يجر والمذيع يجر زي الكدايس المتشاكلين في لحمه ؟ ما من الاول المذيع
يكلمو يا الاخو :انت اتكلم وانا بكون ماسك المايك وبعدين يبدو التصوير .. ولا دي لازمة من لزوم ما يلزم ؟؟؟ |
3mk-Tango
والله ملاحظة في الصميم كل سنة وانت طيب والعيد عليك وعلينا يتبارك يارب .
|
Post: #5
Title: Re: كان شــالو ما بنشـــال !!
Author: مهيرة
Date: 10-19-2007, 05:32 PM
Parent: #3
| Quote: كان شــالو ما بنشـــال !! |
دة كان زمان ياتنقو ولدى
اسع تشيلو وبالريموت كمان!!!
الا النصيحة كلامك صح
تحياتى
|
Post: #6
Title: Re: كان شــالو ما بنشـــال !!
Author: رأفت ميلاد
Date: 10-19-2007, 07:09 PM
Parent: #5
عمك تنقو
كل سنة وأنت ظيب ومشتاقين والله
ياخى إتعامل مع الناس بحكمة "ولله فى خلقه شئون"
ولا القصة تجيب ليك ضغط وقهر ... والفينا مكفينا
للأسف يا تنقو التلفزيون ضاع بعد أمجاد . يعنى ما نقول فى البداية ويمكن يتحسنوا . ديل ضيعوا مجهود ضخم جدآ .
مودتى
|
Post: #15
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:22 PM
Parent: #6
حبيبنا رأفت وانت بالف خير ومشتاقين ليك والله
من نحاية ضيعو مجهود ديل ضيعو بلد كامله ياخ
كانو بسمحو الاعمال الثقافية والفنية وبسجلو فيها ساحات الفداء
ما عندي امل فيهم والله لكن مرات المغسة بتزيد ويفيض بينا
|
Post: #14
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:18 PM
Parent: #5
والله يا مهيره الريموت قريب بس مرات الواحد بكون خرمان لي حاجة سودانية
بس الناس دي مصرة انها تخلينا نجيب بطاريات جديدة للريموت بي حركاتها دي ..
احترامي
|
Post: #13
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:15 PM
Parent: #3
وعليك يتبارك يا هاشم ...
الواحد عندو قولون والناس دي ما عاوزة تقدر ياخ
|
Post: #7
Title: Re: كان شــالو ما بنشـــال !!
Author: عاطف عمر
Date: 10-19-2007, 07:11 PM
Parent: #1
يآآآآآآآآآآه يا عمك تنقو
إنت زاااااتك مالك علينا بتقلب في المواجع ؟؟؟
كلامك دا كلو في محلو وأضيف ليك عليهو آفة الآفات عندنا
التقليد
التقليد البليد الأعمى
- مذيع يصر على تقليد مذيع قناة الجزيرة جميل عازر في كيفية جلسته وحتى في ( تأتأته ) .
- أتى قبل فترة ( فنان ) يؤدي أغنيات الراحل المقيم عثمان الشفيع . للحقيقة فقد أدى الأغنيات بصوت يقترب من صوت الشفيع إلا أن الذي لفت نظري أكثر أن يد ( الفنان ) أيضاً مقطوعة فقلت في سري بأن سبحان الله العظيم . عند إنتهاء الأغنية رجع ( الفنان ) ليجلس حيث كان المذيع فإذا بيديه سليمتان فقد كان ( مدخل يده ) داخل القميص ليبدو كما كان الأستاذ الشفيع .
- شاب آخر يقلد الراحل المقيم الفنان محمد أحمد عوض . لم يدع حركة أو طريقة وقفة أو مسكة للرق أو إبتسامة في نص الأغنية كان يعملها الفنان محمد أحمد عوض إلا وأتى بها .
- هذا الشاب الذي هو حفيد الشاعر أبو صلاح قدمه التلفزيون في رمضان فقدم أغنية بدور القلعة في تقليد ممل للأستاذ محمد الأمين في ( كل شئ ) استطاعه .
-
-
-
يا عمك تنقو
كل سنة وأنت بألف خير
|
Post: #16
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:27 PM
Parent: #7
عاطف سلام
يا عاطف ما مشكلة التقليد لكن المشكلة زي ما قلت يكون اعمي ...
مصيبة المصايب انقطاع جيل من المبدعين في التلفزيون وابدالهم بي
جيل الممثلين القاعدين ساي دا ..
ياربي نحنا كبرنا ولا بقينا شنافين ساي ؟؟
|
Post: #9
Title: Re: كان شــالو ما بنشـــال !!
Author: abubakr
Date: 10-20-2007, 05:16 AM
Parent: #1
انتو كلكم بجاي بس زورونا هناك
درر ودرّاب... مقتطفــات فضــائية.. فاضية...
بالصوت والصورة وكمان حوافز ,,,,بس اية واحد عندو حساسية شديدة وبيعطس يبلع الدوا ويجي ...
|
Post: #10
Title: Re: كان شــالو ما بنشـــال !!
Author: Nader Abu Kadouk
Date: 10-20-2007, 05:46 AM
Parent: #9
تنقو يالذيذ
كل عام انت والاسره بالف خير
ياخوي الدقق بتاعة ناس حمزه و عوض ابراهيم عوض دي
بطلنا نشاهده
عارف ليه
الصحه بقة ما بتستحمل و كده
فتناك بعافيه
ودابكدوك
|
Post: #11
Title: Re: كان شــالو ما بنشـــال !!
Author: الزنجي
Date: 10-20-2007, 06:08 AM
ياخى المغسة كتيرة . لكن الغريبة الدواء موجود
لكن بيخافو منو اهل الاعلام
فلا بد من ثورة شعبية ضد من يسمون انفسهم بادعاء اعلاميين
|
Post: #19
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:47 PM
Parent: #11
الزنجي ما تجيب سيرة البحر ياخ الثورات دي نحن سكن حنرحل منو ..لوووول
ارجع للارشيف في بوست اسمو ( كرهت تفاهه الثوار ) اتمني ما يكون ذهب مع الريح
لانو بوست كان روعة جدا .,.
الحل في الريموت يا الزنجي اسمع كلام مهيرة دا ثورة ما حتنفع لانو حتجيب اسواء منهم
|
Post: #18
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:42 PM
ود ابكدوك سلام واحترام
مرات بتكون محتاج لي جرعة سودانية .. لكن كمان الناس ديل بقي
الدوز بتاعهم عالي وبعمل اثار جانبية اكبر من المرض زاتو
الواحد يفتح التلفزوين ويخت جنبو حلبة للقولون ..
|
Post: #17
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:39 PM
Parent: #9
الاعزاء ممكونه وابوبكر ..
مشيت المقصلة بتاعتكم ولقيتكم ولقيت اجابة علي سؤالي الفوق داك
اطمئنيت انو لا كبرنا ولا بقينا شنافين تلفزيونا كعب بس
جاييكم بي بنبري ..
|
Post: #12
Title: Re: كان شــالو ما بنشـــال !!
Author: معتصم دفع الله
Date: 10-20-2007, 10:23 AM
Parent: #1
يا عمك ..
الزعلك منو ؟
بس انت ما تتضايق وتعال لينا بي هناك ..
|
Post: #20
Title: Re: كان شــالو ما بنشـــال !!
Author: نجوان
Date: 10-20-2007, 07:48 PM
Parent: #12
عمك تنقو سلام..
قبل ما أعرف موضوع خيطك ده..
إجابتي على عنوانه كانت إسم شخصية تلفزيونية 
___
وكما تفضّلت ممكونة والباش
مرحب بيك في مقصلة الدرّاب ..
وما تتعب نفسك بمبرك جاهز هناك.. وفي انتظارك..
|
Post: #21
Title: Re: كان شــالو ما بنشـــال !!
Author: 3mk-Tango
Date: 10-20-2007, 07:49 PM
Parent: #12
يامو ..
انفردو بي ياخ وتبمس بقي يضقل بينا بي النيل الازرق عشان السنة دي انا مسكين
اها خليتونا لي الوجع دا ..
| Quote: بس انت ما تتضايق وتعال لينا بي هناك .. |
انتو في هوت بيرد ولانايل سات ؟؟
|
|
