صفقوا معي لزوجتي المسيحية

كنت آذهب معها إلى الكنيسة..
أنتظرها في (كافتيريا) الكنيسة لحين فراغها من الصلاة..
ولا تذهب معي الى المسجد.. لأنني ببساطة (أدك) الحصة..

تخربشنى في كل جسمي حين نتشاجر على أي موضوع تافه..
ولا تنام حتى أرجع مـن الخارج
في فمها إبتسامة..
وعلى المائدة لقمة تعوض كل ما سال من دمائي..

حين تطبخ لي ملاح ويكة بالشرموط ..
أتذكر حليمة بت أب شنب (حبوبة الشاعر حميد) ..
ومقولتها الشهيرة (كلاب برة جابنلهن جلد)..
تمسح بكل عنفوان الويكة عنف الأيام
وتعنيف الضمير..

Devoted ككراس تلميذ نجيب.. Dedicated كقلم الأستاذ الأحمر..

صارمة كثورة أكتوبر.. هشة كإنتفاضة أبريل

في العيد..
ذهبت في جولة ميدانية لتبارك لكل السودانيين ..
ولم أفعل أنا..

لا أعتقد أنني أحبها حبا جارفا..
تؤمن بي أكثر من إيماني أنا بالله (لا غرو ولا غرور)..

ثم.. جربنا الإنفصال لمدة ثلاث شهور..

وأنا أودعها في المطار كنت أضمها وأبكي بكاءا هستيريا..
تلملم حولنا الخواجات وصفقوا لنا طويلا ..
كما يفعلون مع الجنود العائدين من العراق..

ضعت بعدها ثلاث أشهر ..
كنت أشرب خلالها وكأنني جندي عاص في جيش جالوت..
أنام على الأرض وكأن باعوضة تزن في جمجمتي ..
ولا تسكت حتى أضربها بكلتا قبضتي..

علمت هي بأمري ..

أتتني لا كما يأتي محمد إلى الجبل..
ولكن كما تأتي الأخبار الطيبة..

في غرفة العمليات ..بكيت مرة أخرى حين أتت (لنا) بـ (أمونة)..
ترك الخواجات الـ c-section ..
وبدأوا في عمل lollaby للمولود الجديد..
الذي هو أنا..




صفقوا معي لها..
فأنا أعتقد أنني..
أحبها
حبا
جارفا..

أنا أصفق لك .. و لها ..
و للعلاقة البركان .


و .. للنص الصادق ده .

فعلا النصوص الصادقة
قليلة ياعماد
وهذا اصدقها
لكم مودتي ومحبتي

وأنا اصفق لكم ايضاً بإعجاب.

نصفق لها...

ولكما...

وندعو بدوام المحبة...
...
.
وحيث انك ولدنا...

وصاحب النعمة محسود..

نوصيك ان تستوصي بها خيرا

ثم نثني على صدق روايتك..


وكونا (دايماً) بخير

وانا اصفق ليها وليك شايفه انكم بتكملو بعض تسلمو يارب انتو

مثلك أنا













صفقة ليهن الإثنين

الفكرة (طاعمة) والنص بديع ....


مودتى


عبد الرحمن قوى

يا صابر انا اصفق لك لاننى و لأول مره اشوف زوج يثنى على زوجته
و يعلن حبه لها هكذا على الملأ!!!!!!!!!!!!!!!!
انت استثناء

صابر كل عام وانتم وآمونه الصغيره بخير
وربنا يديم عليكم نعمته( رغم عدم ايمانك كما قلت ).











العزيزه سهام المجمر وين انت يا زوله
لا ياختي عندنا اخوة افضال كثر ما قصروا كتبوا عن زوجاتهم
ابو ساندرا عن رشيده واحمد موسى... وقبلهم بفترة محسن خالد
ولكنه الممسوخ كان يحدثنا عنها كذكرى ....وآخرين.يبدو ان
هنالك تطور في عقلية السوداني وصرنا نعرف كيف نتحدث عن الايجابي
بدلا عن السالب فقط.

Quote: يا صابر انا اصفق لك لاننى و لأول مره اشوف زوج يثنى على زوجته و يعلن حبه لها هكذا على الملأ!!!!!!!!!!!!!!!! انت استثناء

الحمد لله انه ليس استثناء ولكن تناوله اكثر حميميه وخصوصيه.

ادينا سبب واحد يخلينا نصفق ليها؛
و الصفقوا ليها ديل صفقوا ليه!!

انت كفاك تصقف لبنات الصادق المهدى
والنميري

ده شنوا ؟؟
شنو يعني زوجتي المسيحية ؟؟؟
داير تورينا إنك ليبرال ولا شنوا؟؟ ومؤمن بالتنوع والتسامح الديني ؟؟


...
...
...


هكذا كنت أفكر وأنا أقرأ العنوان
وبحدة فتحت البوست لأقرأ سريعاً حتى أقول رأي بأعلاه
ثُم ...


...
...
...
قرأت
وقرأت
وقرأت

...
...
...

إحساس بشئ لزج وجميل , لم أتبينه



كانت دموعي !!!
للعلاقة
للنص
ولها لأنها إنسان !!!

تحيات عطرة ليك ولها

وربنا يديم عليكم السعادة ويخلى ليك البنيات

بنيات اسمرا ديل حنينات ويستاهلن كل خير

صفقة شديييدة
للمحبين الحنان وما بتحولوا

جمال

مائة سنبلة وباقة ورد
مودتى وتقديرى

Emad Abdulla
محمد سني دفع الله
سامي عبد الوهاب
ود أبو حريرة
ماجدة خوجلي
حيدر ميرغني
Giwey
سهام المجمر
تراجي
ملاسي
محجوب علي
Ahmed Musa
هادية بدر الدين
جمال السلام
محمد عكاشة
_______________

صفقوا معي لكم..

..

أعتقد أن النص (( خاص جدا ))
ويكتسب خصوصيته من كونه خاص
ويستحق (( صفقة )) خاصة منك إليها
ونحن نكتفي بأن ندعو لكما بأن يؤدم بينكما ..

..

.. أسدل الستار ..
فهناك من يتلصصون الموقف ..


..

نص جميل
وصادق فعلا..

قراءة منعشة
تتفّوق على فنجان قهوتي الصباحية

Quote: ادينا سبب واحد يخلينا نصفق ليها؛ و الصفقوا ليها ديل صفقوا ليه!!

ملاسي
لو كانت زوجتي مميزة وعلم على رأسه نار لما إحتجت كتابة هذا البوست..
فمن عاديتها ويوميتها استحقت كل هذا التصفيق..
هاك سبب آخر للصفقة:

زوجتي أتقنت اللغة العربية..
لدرجة إنها تقول ليك (أنا مافاضية..
عايزة أدخل أغسل "المواعيد")
وآه.. حين تغضب..
فإنها تكسر كل "المواعيد".. وتلقي بها في الـ trash.

ومايفضل ولا موعد واحد في البيت..
يكفي للخروج له..

صفقت لها ولك ..

شكوكو
نجوان
------------
سال مني الكلام من غير سابق ترصد..
تماما مثل الخطوط الحمراء في انبوبة معجون الاسنان..
دائما هي موجودة هناك ..
فقط لكي تظهر
نحتاج أن نضغط عليها برفق..
ولكي تظهر..
لابد لها من وجود خلفية بيضاء..
قلوبكم
خلفية
بيضاء..

عادل عبد العاطي السمح..
شكرا


Ahmed Musa

Quote: كانت دموعي !!!

أنا كنت عايز صفقة بس..
دموع فرح
دايما
وأبدا..

Quote: زوجتي أتقنت اللغة العربية.. لدرجة إنها تقول ليك (أنا مافاضية.. عايزة أدخل أغسل "المواعيد")

يااااالله

جنس حلاة عليكم لكن

مواعيدكم تلمع

ربنا يحفظكم..

وبدأوا في عمل lollaby للمولود الجديد..
الذي هو أنا..


Mbrooooook haza al7'la9 .....

مريم الطيب
منى خوجلي
Muhib
_____________

إن شاء الله
نشرة أحوالكم الداخلية..
دائما..
clear skies

ام سارة اشاء
يوم صفيقا مايجى

Quote: إذا كان بيرأسونا وياكلوا اموالنا عشان قالوا جدهم النبي .. طيب نحن جدنا علي تروس يعني ولا شنو..

شايفك اليومين ديل
بقيت (جدي) خالص..

أهديك (وصية) وردي..
من عمر جعفر..
رأيك شنو ??

http://www.sudaneseonline.com/video/Omer_Jaafar_alwa9iyya1.ra

Quote: ادينا سبب واحد يخلينا نصفق ليها؛ و الصفقوا ليها ديل صفقوا ليه!!

اخونا صابر

سلامات

يمكن الموقف يتاع زغاريد

انا شخصيا بصفق
عشان الوفاء والمودة
هي قامت بأكثر من واجب الزوجة
وهو رد الجميل
اعلن عليها الحب

تصفيقات حارة يا صابر..
ولا أدري هل أنت صديق القاهرة الفنان أم الصابر الهادي المحب لزوجته

رغيم
كنت متوقعك تعمل quotation لموضوع الويكة..
سيبك من ملاسي ده..
تسلم ياحبيب..
________________

شعيب يا جميل
أثبت علماء علم الحياة والإنتحار
إنو ممكن (الواحد) يكون أكتر من (واحد)..

والدليل:
معرفتي اللصيقة بالجمال متعدد الجوانب..
الذي تعيشه
انت واسرتك الجميلة..
تحياتي لكم جميعا..

احتاج تلفونك على الماسنجر..

لن أصفق لها وحدها بل لكما معا دام حبكما !!!

بس ما تنسى من الحب ما قتل ,,, ربنا يسعدكم ...

كل سنةوانت طيب أخ صابر

كلمات تدل على الوفاء وطيب المعشر...

أدام الله المودة والرحمة بينكما

تقديري

اخواتي
عواطف
سلمى
______________
شايف كل الحلوات من الجنس اللطيف
إتلموا حول البوست ده..
أنا بعد ده شكلي
ح أتقمص شخصية ضابط في الأمن..
وأعمل إستدعاء لعدد من رجالة البورد
ليقوموا بالتصفيق
ولا بأس من بعض
(الطيارة قامت).. و (أرنب نط)
وح يكون هناك إستدعاء خاص
للاستعدائي الأول في البورد بلا منازع
الأخ حسين ملاسي
وأخليهم يعملوا الصفقة
فوق صلعتو المملسة ديك..

Quote: رغيم كنت متوقعك تعمل quotation لموضوع الويكة..

والله يا صابر وقفت عندها
و لفيت حولها
لكن
قلت بتاعت تنسي دي
ما حتحصل بتاعت المناصير
تتصور ويكة المناصير
صارت من ضحايا الخزان برضو

اها بتعمل ليها مرقة ماجي
ولله سن برق

غايتو بوستيك لملم الحريم كلهم
خبر يرفع معنوايتم

لكن بيني وبينك خير فعلت مالك ومال الهم والغم


يابختك بيها

Quote: اها بتعمل ليها مرقة ماجي ولله سن برق

تصدق إنو تينسي
فيها خرفان زوارية
مستوردة من (أمري) مباشرة
عن طريق FEDEX.

أمال إنت قايل الخزان ده
بنوهو كيف..???

Quote: غايتو بوستيك لملم الحريم كلهم خبر يرفع معنوايتم لكن بيني وبينك خير فعلت مالك ومال الهم والغم

محمد الطيب
____________
والله ياخوي
بعض البوستات في
البورد ده كان عاوزة
ناس محمد علي كلاي وبروس لي
يكونوا مشتركين فيهو..

قلنا نحليهو بـشوية أم رقيقة..
مش تقول لي رقيق وجلابة..

وبيني وبينك
القوارير ديل
ما بيجي من وراهم
إلا كل خير..

بس إنتو خليكم وراهم

Mistakenly posted here … apologize

ياســــــلام علي صدق المعني
الله يخليكم لبعض .
محتاجين نبشر الناس بمثل هذا النموذج الرائع و الممكن .

اوصيك عليها شديد ..

Quote: .اوصيك عليها شديد .. .

حبيبنا طارق..
مؤكد ح أعمل بوصيتك..
وأنسى وصية عمنا
(سماعين ود حد الزين)..
الموجودة في الغنوة
الفوق دي ..

الأخ صابر عبد الهادي:
العاطفةالقوية التي قد تجمع بين مسلم ومسيحية هي عندي من عظمة معاني التعايش في الإسلام، إذ يمكن لمسيحية أن تكون حبيبة قلبك وشريك حياتك.
خلافاً للرأي السائد عن بوستك هذا أراه مضطرباً، متكلفاً حتى في عاطفته، رغم الدموع والأحضان، والعناق التي هي صور لم تتسق كثيراً مع بعض ما جئت به من معاني.
فقولك مثلاً:

Quote: تخربشنى في كل جسمي حين نتشاجر على أي موضوع تافه..

فأين قوة العاطفة في الشجار في الأمور التافه، دعك من الخربشة في كل الجسم في شجار في امر تافه.
ثم أراك نسفت المعنى العاطفي في استرضائها لك بإدراجك للقمة تملأ بطنك، ما أيسر حل الخلاف معك إذن.

Quote: وعلى المائدة لقمة تعوض كل ما سال من دمائي..

ثم لا أدري ألم تجد مثلاً تبين به قدرة الأجنبية على تجويد الطبخ السوداني من مثال الكلاب؟ (كلاب برة جابنلهن جلد)، حقيقة تعجبت من هذا التشبية، وأرجو أن تصوبني إن لم أفهم كلامك لأن التشبيه بالكلب عندي بعيد من الحب جدا؟
ثم لم التركيز على البطن مرة أخرى في ملاح الويكة بالشرموط والزعم بأنه يمسح كل عنف الأيام وتأنيب الضمير! ليت كل السودانيين كانوا مثلك في نظرتهم للويكة، والسودانيات كن مثلها في تجويد طبخها إذن لاستقرت بيوت كثيرة.
ثم ما هذا الاضطراب:

Quote: لا أعتقد أنني أحبها حبا جارفا..

ثم تأتي لتقول:

Quote: أعتقد أنني.. أحبها حبا جارفا..

ما أسرع ماتغير رأيك.
بقي أن أقول أن نصك هذا لا يعبر عن التعايش الذي قصدته في مستهل مداخلتي هذه، ببساطة لأنه مادام أنكما اجتمعتما في الذهاب إلى الكنيسة، واجتمعتما في عدم الذهاب إلى المسجد، وأنها تؤمن بك أكثر من أيمانك أنت بالله، فلا اري في النص تعايش مع الإسلام، طبعا هذا الكلام ليس لك بل لم رأى أن في النص تعايش بين الإسلام والنصرانية.

نزار
شايفك دخلت الفيزياء
في الكيمياء في الدين..
زي ما بيعمل الزنداني..

ياخي ده موضوع أدبي..
وما بيستحمل ..

Quote: نزار شايفك دخلت الفيزياء في الكيمياء في الدين.. زي ما بيعمل الزنداني.. ياخي ده موضوع أدبي.. وما بيستحمل ..

كنت أظن أن جل كلامي كان في الآدب والنص والعاطفة وصدق التعبير عنها!

نزار
ركزت على اللقمة..
ونسيت الإبتسامة... ودي كيمياء

ذكرت التشبيه بالكلب..
ونسيت إنو الواحد ممكن يستحضر
مشاهد كاملة عن طريق الطعم والرائحة..
دي أظنها فيزياء .. أو أحياء لوجود الكلب..

ذكرت الكنيسة والمسجد..
ونسيت المطار..
وده دين..

ود الجيران..
دي جديدة والله..
أول مرة أشوف لي
بوست طاشي..

أسه إنت قاعد في بيتكم..
ولا عند الجيران..
كدي اتأكد كويس..

والله يا صابر
منذ "زمانٍ يليق بموتي" ما عتّبت المكان ده
لكن جابتني "حِرَّةْ" الصفقة، ونفس الكان بجيبني ليك "بلا مواعين" في أيامنا ديك.
وفي أحوالنا ديك.
جيت أصفّق ليها ..
وأصفق ليك ..
و أصفق لي، لأني لقيتك..
،
بجيك في محل يحتمل الداير أقولو..
فهذا المكان لها وحدها، ست الريده وست كل هذا الجمال...
،
محبتي،،

بدري
صاحب السوميتة النقي..

أراني أمير شمعون
واحد من كتاباتك له..
جاء في إحداها:
(سلم لي على صابر...
أنا ما خايف على زول من الغربة..
قدر خوفي على صابر ده)

... الخوفة الدخلت فيني من اليوم داك
لليلي ما مرقت..
لدرجة إني إنكفأت على نفسي
لمدة قاربت الخمسة سنين..
بقيت حتى شمعون ماقادر أشوفو..
.. خوفك كان في محلو تمام..
وخوفتي كان مصدرها إنو:
(هل من الـمعقول
أن يبلغ تآلف روحينا هذا المبلغ..
أنا وإنت يابدري..??)..
_____________

طمني على الفنان محمد جبارة..
ووريني كيف خليتو وراك..
ومشيت لبلاد يركبها الأفيال..???!!!

نص بديع يا صابر
يلا صفقوا كلكم


يا حسين ملاسي!
ذكرتني النعام آدم رحمه الله
استدعى حبيبك النميري الفنان النعام ادم
وقال له:
الفنانين ديل كلهم غنوا لي الا انت!
المانعك شنو؟
فرد عليه النعام:
والله انا بغني للبنوت!!
دحين انت صفق لي بنات سيد صادق
ذي ما قال اخونا محجوب

مودتي يا صابر

خالد ود العبيد

الحمد لله البوست
إتملى رجال..
وأي رجال..??!!!

نوعية.
____________

(الهجين ما ببقى عجين)
قال مندوب إتحاد مزارعي القضارف
حين حاول بعض التجار
إدخال نوعية جديدة مهجنة من العيش في المشروع..


هذا ينطبق على بعض الناس .. أيضا

الأخ صابر
تحية طيبة

Quote: بنيات اسمرا ديل حنينات ويستاهلن كل خير

إنصرف إلي ذهني من الوهلة الأولي أن الزوجة المسيحية المعنية هنا زوجة مسيحيةغربية، بسبب الهجرة المكثفة ، ولإرتباط المسيحية ثقافياً ودينياً بالغرب ، رغم كونها ديانة شرقية .وأود أن أضيف إلي العبارة المقتبسة ، أن بنيات أسمرا ديل (مسيحيات ومسلمات ) حنينات ويستاهلن كل خير ، ولايقلل من شأنهن سمرة اللون ، إن لم يزدهن رفعة .
إختلاف المفاهيم التربوية يجعل المرأة المسيحية ،والغربية بصفة خاصة،أقل عقداً في التعبير عن عواطفها، وأنا هنالاأصدر أحكاماً قيمية مسبقة .
المرأة المسيحية ( أقرأالغربية ) ،إن أحبت فهي إعصار .وإن تزوجت عن حب ، فهي إعصار وبركان وأمطار وشموس .
لاأجيد التصفيق ، ولكني أفهم ما تقول وأغبطك علي نعمة الحب .
فهنيئاً لكما .

Quote: فهي إعصار

زولتي برضو كده

وسونامي كمان

تاميلية مسيحية

وسمراء

سيف
وحيدر..
___________
قلبتوها جغرافيا
و global warming
أوع يلم فيكم نزار محمد عثمان..

برافووووووووووووو

صفقة وزغرودة ليكم الاتنين

الله يخليكم لبعض

اختي حواء..

تسلمي..
ويسلم كل من حولك..

آمين..

Quote: صفقوا معي لزوجتي المسيحية

أولا إذا كنت تجب زوجتك ما علاقة ذلك بمسيحيتها وهل تريدنا نصفق لها أم لمسيحيتها لإلتزامها أم لخيبتك؟؟!!!
أي حب هذا الذي تقلل فيه من شأنك وترفع من قدرها في شئ لا ترومه لنفسه وتراه فيها أهو حب أم مركب نقص؟!
ودجلك عن تصفيق الخواجات ليك يؤكد مركب نقصك وداير توحي بانها خواجية طيب ما شأن هذه الصغيرة المسكينة هل عقدتك برضو خلتك تغدر بأمها عشان تشكر لينا خواجية؟!
إنت تحب فيها كمالها ومتأكد هي تكره فيك هذا النقص لانه تعلقك بغير هويتك وعدم إعزازك بهويتك يجعل الآخر بلا ريب يحتقرك!
أنا ما عارف الناس ليه بتبارك ساي بدون ما تعرف المغزي الواضح الخبيث من البوست وخاصة أن صاحب البوست ليست له إسهامات في هذا البورد سوي محاربة وتشويه النمازج الإسلامية وكأنه بس ناذر نفسه لهذه المهمة لا تراه يتداخل أبدا في القضايا والكوارث التي تعج بها بلادنا

بدلتك
والقلم
في الجيب..
كان بيصرفوهم
لناس الأمن زمان..
بعرفهم
مما كنت
عضو في إتحاد طلاب جامعة الخرطوم المصادم عام 90/91..
وين إنت كنت الزمن داك..
أظنك كنت مع الجماعة الدقيناهم
وحبسناهم جوة الجامع..
هم والسيخ بتاعهم..
شفت الجوامع بتستخدم اليومين ديل لشنو ??
تخزين السيخ والأسلحة لإرهاب الطلاب والناس البسـطاء..
عرفت ليه أنا مابمشي المسجد..??
ولا أقولو ليك تاني..

Quote: وخاصة أن صاحب البوست ليست له إسهامات في هذا البورد سوي محاربة وتشويه النمازج الإسلامية وكأنه بس ناذر نفسه لهذه المهمة لا تراه يتداخل أبدا في القضايا والكوارث التي تعج بها بلادنا

اخونا صابر
لك المحبة
الكلام الفوق دا كلوا امسحوا لى فى وشى .
قريبي ادروب دا ..... اخير الفيزياء والكيمياء
واجمل حاجة الهوية عندو هى الدين !!! وهو ثورى بجاوى !!!
انت ياصابر اخوى .. الويكة دى مابراها هوية ثقافية؟؟
ــــــــــــــــــــــــــ
مستمتع جدا بالبوست

أي محجوب
الزول ده خلي بالك ما سمعني
بغني (أوولقا أشور أنا..
هامينات كالافانا)..
كان مسح الكلام الكتبو ده في وشو هو..

ويسلم وشك يازول ياحلو..

عارف أنا ح أكلم ليهو
الزعيم/ محمد طاهر أبوبكر
يرفدو من الثورية بتاعتو دي..

والله أول مرة أشوف لي
بجاوي مخو كعب..
بعدين قول ليهو
زوجتي دي إريترية وليست خواجية..
وبنتي - ياخي -
إسمها:
آمنة..
أمونة..
حجر الطاحونة..

صديقي الجميل الشفيف الفنان صابر عبد الهادي

احبكم جميعا انت وهي وامونة وقبلكم الوطن
والله اخليكم واديم المودة والمحبة والرحمة بين
الجميع.

هباني

سندة: بالمناسبة يا صابر لازم بعد ده تنكرب و ترسل لينا علي المنبر دندنة من دندناتك الشجيةوالعذبة بالعود من روائع الراحل مصطفي او السامق الشفيع حسبما تختار لنا.

هشام..
زي أخونا أدروب ده
يغنوا معاهو كيف..??

والله لو غنيت ليهو
(باب الروح متاكا إنسربي)..لعاطف خيري
وهو السي دي بتاعي under construction
إلا يهدر دمي..
وأبقى زي سلمان رشدي..
حايم في المنافي..
بدون دم..!!

طق طق طق طق طق طق

لمن يديني حمرن
سلامات ايها لرائع صابر عبدالهادي والتحايا عبرك لامونة
ووالدتها .


دندنة من دندناتك الشجيةوالعذبة بالعود من روائع الراحل مصطفي او السامق الشفيع حسبما تختار لنا.
ياهباني انت داير ادروب ازعل اكتر ماهو زعلان , الراجل كان عارف ان صابر متزوج مسيحية والمغسة كتلتوا دايروا يعرف ان صابر بغني لموصطفي سيداحمد وبالعود يعني( جلابي)

وطق طق طق طق الي يوم الدين

كاجوري دي
أول مرة
أسمع بيها يا بدر الدين حمد..

تحياتي لك ولأبودقجة..
كمال قسم الله..
خالد راسخ..
سمعريت..

وكل أعضاء المافيا
بأستراليا..

محبة صادقة

تصفيق حار


تدوم السعادة والمحبة ..

مودتي
منعم

منعم..
الوكت ده كلو..
كنت منتظر
طلتك
البهية..

تصدق...???

فأنا أدمن
ما تفعله هنا..

Quote: والله أول مرة أشوف لي بجاوي مخو كعب..

قرقرقرقر
ادروب محل تقبل تاخد عكاز فوق نافو خك
طبعا موضوعك انو الخواجيه دي جلابيه

اها طلعت كوشيه عديل اصلي بلادها
وصابر طلع ما مستلب
نظريات بشاشا يوم بتغتس حجرك,
-----------------------

و تصفيق حار للمسيحيه

شكرا doma

طمنونا على الوليد ده..

مافي أخبار عنو??

Quote: ثم.. جربنا الإنفصال لمدة ثلاث شهور..

Quote: في غرفة العمليات ..بكيت مرة أخرى حين أتت (لنا) بـ (أمونة)..

بعد مرور سنوات على الزواج، كثيراً ما تحدث حالة من التكرار والملل و الزهج..
لذلك ينصح علماء النفس الزوجين..بتجديد الحياة الزوجية و إعادة التوهج لها..بالآتي:


1/ تغيير المنزل أو..أثاث المنزل.
2/ الظهور بمظهر مختلف..أو نيو لوك..تنحيف..تسمين..تمليس..تخشين..إلخ.
3/ الذهاب معاً في إجازة... بعيداً عن الحياة الزوجية التقليدية.
...
...
4/ إنجاب طفل جديد ينعش الحياة الزوجية، ويضفي عليها مزيداً من الحيوية.
5/ الانفصال المؤقت... أي أن يأخذ كلا الزوجين إجازة من شريك حياته.


ربنا يخليكم ل بعض...و ما تنفصلوا تاني..و لو مؤقتاً.

Quote: و ما تنفصلوا تاني..و لو مؤقتاً.

mamkouna

لا نحن ولا جنوب السودان..
آمين..

Quote: واجمل حاجة الهوية عندو هى الدين !!!

إنت يا محجوب والله مواقفك غريبة جدا وبهناك أديت منعم المبرر للهجوم علينا ما عارف إنت مننا ولا علينا بطريقتك ده حتخلينا ننفصم فيك
واضح أنك هنا ما قادر تفرق بين الإسلام والدين فالإسلام رسالة وليس هوية أما الدين هو التطبيق الواقعي له بغض النظر عن صحته أو خطأه فهو يمثل الثقافة المتراكمة بالإضافة إلي الشحنة اللغوية التي يحملها والنمط التفكيري الذي يحتويه ولهذا فهو من أهم عناصر الهوية!

Quote: حتخلينا ننفصم فيك

أعصابك ..
يا مولانا!!!

Quote: بدلتك والقلم في الجيب.. كان بيصرفوهم لناس الأمن زمان.. بعرفهم مما كنت عضو في إتحاد طلاب جامعة الخرطوم المصادم عام 90/91..

أولا يا صابر الفي الصورة ده ما أنا ده الشيخ أنتي ديوب وبعدين أنا ما إعتراض علي التصفيق لزوجتك ولا حتي الإشادة بالدين المسيحي ولكن ليس علي حساب الطعن بالإسلام فكلاهما دين ولكل أتباعهما
ألم يكن من الممكن أن تشيد بزوجتك دون ذكر دينها مثلا؟!
حسب متابعتي لبوستاتك للأسف تخلط شديد بين الإسلام والمسلمين يا سيدي هؤلاء بشر كغيرهم مشكلتهم مثلك تمسكوا بقشور الإسلام وعجزوا عن وصال الدين بالواقع ومواكبة تطورات الحياة فأصيبوا بصدمة وعقدة حضارية مذبذبين بين ذلك لا إلي هؤلاء ولا إلي هؤلاء وقد تسأل هل العيب فيهم أم في الرسالة أقول لك فيهم وفي عجزهم عن تطويع الواقع الذي سخرهم الله لهم نتيجة لقوة الإستلاب من الطرف المنتصر في المعركة الحضارية!

علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين!

Quote: علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين!

ادروب يعني الله في المسيحيه ما في ؟؟؟
ما كلهن ديانات سماويه يهوديه مسيحيه اسلام وكل فرح بما عنده .
الزول دا فرحان بحب المسيحيه وحبه ليها وكلنا فرحانيين معاهم.
يا ولدي صفق ليهم وابقي متخارج ما تقلبو لينا دين ووعظ وارشاد تعال لينا هناك في بوست شبقبق

يا صابر العاشق
سلام عليك في المترعين صبابة
و أدب

صفقة كبيببببرة لحبيبتك أم أمونة
و هي (تمسح بكل عنفوان الويكة عنف الأيام)
على الأقل لأنها
غلبتك بالعيال و بالعشق و بالدين
و بعدما بقيت (زي سلمان رشدي)... مهدراً دمك...
خلتّك (حايم في المنافي) بدم المحبة...
و استكتبتك بالشهد
ينقط علينا
حبة
حبة

سلام عليك و عليها
و على البنت أمونة
ذرية الحنين و الأخبار الطيبة
كأنها مدوزنة على لحنك و موقعة على طعم القهوة و نكهة أمها الشرقية.


و لكن كمان، حرام عليك يا صابر ـ أحسست بشفقة عليهن، من (إعلانك) الحب الجارف، تتسامعه اللواتي عرفناهن في الوكت الأخضر، قد تركن لك (باب الروح متاكا) فإنسربت إليها وحدها!


تحيات لحبيبتك و لأمونة
و لناس ناشفيل بالأخص عمّك علي و محمد طاهر أبوبكر و يوسف
_______
أدروب، خليه ساكت ، ما تشتكيه للزعيم و أصلو ما تغني ليه كلو كلو، لا بي عود و لا بي الباسنكوب.

Quote: . علي كل إذا كان عندك مشكلة أصلا في الإسلام وعاجباك المسيحية ما تتعب نفسك وما في زول جابرك والباب يمرق جمل والله غني عن العالمين

أدروب..
طيب تقدر ترجع لي
الجلدة القطعها
مني الحكيمباشى/ حسن علي
يوم (طهوري)..
بشفخانة كريمة سنة 69..
قبل ما تطردني من الباب
الإنت ماسك مفاتيحو ده..??
--------------------------
لغاية قبل شوية
البوست ده كان
very romantic
لكن يظهر بعد كده
ح نبتدي قلة الأدب..

أنا عايز الجلدة بتاعتي هسي..
لا صلح.. لا مساومة..لا إستسلام

وتعال لي تاني...

الأخ صابر:
قلت:

Quote: نزار ركزت على اللقمة.. ونسيت الإبتسامة... ودي كيمياء ذكرت التشبيه بالكلب.. ونسيت إنو الواحد ممكن يستحضر مشاهد كاملة عن طريق الطعم والرائحة.. دي أظنها فيزياء .. أو أحياء لوجود الكلب.. ذكرت الكنيسة والمسجد.. ونسيت المطار.. وده دين..

أولاً: لو صح ما ذكرته في كلامك عن الكيمياء والفيزياء والدين ... فواضيعة العمر إذن.
ثانيا: تخريجك لكلامي بطريقة الكيمياء والفيزياء هذه يمكن أن أصفه بصفات عديدة أخفها أنه لا يمت للموضوعية بصلة.
ثالثا: أنا لم أنس الابتسامة والمطار ونحوه كما زعمت، بل قلت ما يفيد أن نصك فيه عواطف لكنك نسفتها بالإكثار من الاهتمام بالبطن والطعام، وتشبيه زوجتك بالكلب، ونحو ذلك مما يشي أن عاطفتك مظهرية (شوفونية) مضطربة.

نزار ياأخي..
والله .. والله..
أنا أحب إبتسامتك جدا..
وأراها لا تتسق مع اللحية..

.. ده تجريد..

أها غالطني في دي كمان..

الأخ صابر

Quote: نزار ياأخي.. والله .. والله.. أنا أحب إبتسامتك جدا.. وأراها لا تتسق مع اللحية.. .. ده تجريد.. أها غالطني في دي كمان..

الرد السابق في نظري ـ من غير غلاط طبعاًـ حيدة لطيفة عن جوهر الموضوع. أقبل بها مختتماً لحديثي.

ما أيسر حل الخلاف معك..
يا صاحبي..

شفت (الشرك) ..
الوقعتك فيهو ده كيف..??

Quote: لناس ناشفيل بالأخص عمّك علي و محمد طاهر أبوبكر و يوسف

عمك علي خضر..
شيوعي ونقابي مخضرم..
جعلي من كلي..

محمد طاهر أبوبكر..
the global leader
بتاع مؤتمر البجا..
بشاري من بورتسودان..

يوسف..
جنوبي من البطانة..
يجيد رقصة العرضة..
ويتقن الـ DUI..
------------

هسه يا دكتور هاشم..

عليك الله التشكيلة دي
ما بتكسب الـ Power Ball..??
---------
الوكت الأخضر ده
ما تخلي (بابو متاكا) أحسن..
مالك داير تجيب لينا المشاكل..??
------------
تحياتي لعبد الرحمن ود السمين..

الأخ صابر

Quote: شفت (الشرك) .. الوقعتك فيهو ده كيف..??

ذكرتني زميل دراسة بعيد وهو يصيح بعد انتهاء (قيم) شطرنج: (لولا أنني أوقعتك في الشرك لما استطعت أن (تأكل) ملكي)!.

quote
زميل دراسة بعيدquote


نزار..
أوع زميلك ده يكون
دكتور محجوب الحارث..
بتاع الـ physical chemistry

أخيرا ملاسي ظهر..
وكمان جايب ليهو
أسنان المرة دي..

هباني معانا.. ما تغشانا