تحية وهدية للكوبانى .. ومتى تعود الشاعره (ناديه عثمان) .. ولحظات رائعه فى حضرة (اسرار بابكر)!!

هذا بوست خواطر متشابكه ومتداخله ومتفرقه .. اوجدته ظروف استثنائيه .. انه شئ جميل أن تسمع بخبر ورود شاعر الى مكان انت موجود فيه بقصد و عمد أو (بالصدفه) ..
و(اللقيا أجمل فى الحقيقه بلا انتظار)!!
صباح اليوم بشرنا (القرضابى) الذى يحمل الينا دائما الخير والبشرى معه مثل نهر النيل المعطاء، بقدوم (الشاعر) الجميل الدواخل (الكوبانى) الذى التقيته فى الأمارات من قبل مع أحد اقطاب النادى الأهلى ووالده وشقيقه الأكبر، وهو من الشعراء الذين تغنى لهم الفنان صاحب الصوت الشجى التطريبى الدافئ (كمال ترباس) بعدد من الأغنيات (كلمات ولحن).
وبالأمس قضينا ليله (ساهرة) تضمنت محاسن .. (من كل روضه عينة ومن كل عينة زهرة) .. على ضفاف نهر النيل بالعجوزه وخلال حفل للفنانه الرائعه (أسرار با بكر) .. كذلك وجدت نفسى (بالصدفه) بين شاعرتين جميليتين (سعادة عبد الرجمن ابراهيم) وهى شاعرة صاحبة بصمة خاصة بها اذا كتبت باللغة الفصحى أو العاميه .. وللذين لا يعرفون (سعادة) فهى ابنة شقيق الفنان (كمال ترباس) مباشرة.
اما الشاعرة الثانيه فهى شاعرتنا المتمردة فى تناولها للمواضيع الشعريه رغم انها .. حياء وبساطه ورقة وعفوية تمشى على قدمين .. أضحكتنى حينما قلت لها هامسا أن (فلان) الذى كان معنا فى الحفله (كلامو كتير لأنه شبعان) !!
فقالت لى مندهشه:-
والله ما أكل حاجه .. لأنه الأكل ذاتو ما وزعو ؟؟
انها الشاعره صاحبة الحرف الندى (ناديه عثمان) .. عضو مشارك لكنها فى الفترة الأخيره سجلت غيابا طويلا فى عدد من المنابر، لا أدرى هل اخذها العمل الصحفى أم (دى الظروف يا حلوه دائما لى عيون حلوه بتجيبنا)؟؟
ودى هديه يا كوبانى .. قصيدة قديمه .. حتى نحرضك على كتابة الجديد:-

(سيد الناس وكل الناس)
____________

بتستغرب ..؟؟
وتسأل عن سؤالنا عليك وتستعجب ؟!
منو القال ليك ...
بلاك الدنيا، تصبح دنيا،
فى عينينا ..
شايله جمالها من عينيك ؟
منو القال ليك ...
حروف كلماتنا تتعطر
وتلبس توبها تتمخطر
وتمشى هوينا تتبختر
تضم الحانها
بى حنيه تتوزن وتصبح غنيه
ترحل ليك؟
منو القال ليك
حلم طول وكان منيه
نشوفو الليله فى الواقع
وزى قمرا توهط
فى السما السابع
وحاتك أنت يا رايع
جمال الدنيا فى عينيك
بتستغرب .. ؟
وتسأل عن سؤالنا عليك وتستعجب؟!
وأنت هوانا والأنفاس
وأنت الطيبه والأيناس
وروعة رنة الأجراس ؟
منو الأداك عيون حلوات
وللحلوات بقت مقياس ؟
منو الأهداك جمال أحساس؟
بتستغرب وتستعجب ؟!
وأنت الناس وسيد الناس وكل الناس؟

من ديوان (سعاده) .. "أغنيات بلون مختلف" .. كتبت فى قصيدتها:-
(عفوا .. ولكن سيدى)
ما كان لى يوما
أقص مخالبى ..
وتصير كل مآربى ..
رجلا الى حسن الجوار ..
عفوا .. ولكن سيدى
ما كان لأمراة سواى تخوض فى حرب (التتار) ...
انى عشقتك ما على ؟!
ومالها الدنيا تقوم ولا تثار ... ؟!
اخطأت حين عشقت ملء فضيلتى
حطمت عرف قبيلتى
وخرجت عن أهلى وأزمعت الفرار ...
اخطأت حين رفعتها بيضاء راياتى
والحرب مسجلة ضحى وحفيفها عات
وبسطت مائدة الحوار ؟ ...
أنى أحار !!!!!
الآن أحمل وذر ما صنعت يدايا
أدور والدنيا تؤاخذنى على هفواتها
ولبئس ما كان المدار ...
لم تخلق الدنيا أثنتين
أنا وذاتى
كى تنازعنى القرار ..!
هذى لتطرب أن يشف مسامعى همس
تدس انوفها حدس
تبيع وتشترى رهقى
وامعن فى الحصار ...
تبا لذاتى أن تثير حفيظتى عشقا
ولست بها أعار
انا لست بأمراة أعاير بالأنوثة
كى أسلم رايتى طوعا
وأفتعل الوقار ...

أما (ناديه عثمان) .. كتبت فى ديوانها "ميلاد عصيب لرجل ما":-
قصيده بالعاميه بعنوان:-
"زول تانى"
الحبيتو ما أنت .. انا الحبيتو زول تانى
زول فتشتو طول عمرى .. وفجأة لقيتو ولقانى
هادى زى النسيم مرهف .. وزى فجر الربيع حانى
الزول العرفتو انا .. زاد بالريده ايمانى
ده ما أنت .. انا الحبيتو زول تانى
* * *
الحبيتو ما انت .. انا الحبيتو زول انسان
شفيف الرقه ما لياهو .. زول زول عاشق جميل فتان
محبوبى الهويتو أنا .. غرقتى فى بحورو حنان
ده ما انت .. انا الحبيتو زول تانى
* * *
الحبيتو ما انت .. وخلاص بنهى الحكايه أكيد
خدعتنى بى حنان زائف .. وبى احساس غريب وجديد
وهمتنى بالسعادة معاك .. نعيش الحب غنا وتغريد
لقيتك انت ما انت .. انا الحبيتو زول تانى
زول تانى!!