Post: #1
Title: الطيب بشير .... عودا حميدا ....
Author: خضر الطيب
Date: 10-08-2007, 07:50 AM
حبيبنا ابو البشير
الف حمد الله على السلامة
|
Post: #2
Title: Re: الطيب بشير .... عودا حميدا ....
Author: الطيب بشير
Date: 10-08-2007, 09:32 AM
Parent: #1
مرحبتين الغالي تمر السـوق..و.. ان قـسـّــمو ما بـحـوق
كيف حالك يا خـضـر يا حبيب؟
و عيد ســعيد ياخ
شكرآ على الترحاب..
و كل ما سمحت زحمة الخرتوم بنتاوق ان شاء الله
|
Post: #3
Title: Re: الطيب بشير .... عودا حميدا ....
Author: خضر الطيب
Date: 10-08-2007, 10:09 AM
Parent: #1
حبيبنا ابو البشير
والله ليك وحشة , منورة سودانيز اونلاين بطلتك
حالك وحال العيال عساهم بخير
وكيف الخرطوم معاك ؟ ... سؤال غريب لكن اكيد عندك ليهو اجابااات
|
Post: #25
Title: Re: الطيب بشير .... عودا حميدا ....
Author: الطيب بشير
Date: 10-10-2007, 11:13 AM
Parent: #3
| Quote: وكيف الخرطوم معاك ؟ ... سؤال غريب لكن اكيد عندك ليهو اجابااات |
يا الخرطوم..
و يا الخرطوم..
عيون الحــقّ مابتنوم ..مااااااا بتنووووم
....
حبيبنا خضر الطيب..
الحكي في الموضوع دة ختري..و بيجيب اللوم..
أحكي ليك عن الناس الجميلين الزاروني في البيت و فتحوا ضهريات عربياتهم و طلعوا منها الخرفان؟
و الله أحكي ليك عن (أصحابي) اللي كان سلامهم أبرد من أجواء كندا في يناير؟
أحكي ليك عن إفطارات فندق روتانا و بذخها؟..
أم عن فرحة سيدة إقليمية حصـلت على كيس أسمنت فارغ من العمارة الجنبنا؟
أحكي ليك عن فراغ زميل يسافر لعطلته السنوية برفقة خادمتين؟
أم عن صديقي الذي باع بيت العائلة في مدني ليجري عملية عيون، ليرتد بصيرا، ففشلت العملية و ضاع المال بسبب خطأ فني؟!!
دي الخرطوم يا خضر تبسترنا زي اللبن ..يوم ترفعنا فوووووق و تاني يوم تخبط بينا الدلجة..
تاني تجي؟؟..
|
Post: #4
Title: Re: الطيب بشير .... عودا حميدا ....
Author: Elmosley
Date: 10-08-2007, 03:26 PM
Parent: #1
مرحب مرحب شيخ الطيب
اها كنت وين وما كلمتنا
ياحوام
|
Post: #10
Title: Re: الطيب بشير .... عودا حميدا ....
Author: الطيب بشير
Date: 10-09-2007, 07:47 AM
Parent: #4
الأســتاذ موصلي
و الله أنا مبســوط، أحمد الله، لمن خايف علي رقبتي
أمبارح كنت في ندوة بمركز الخاتم عدلان فيها د. أبكر آدم إسماعيل و قبل يومين كنت في ليلة شعرية بنادي الفنانين فيها هاشم صديق و القدال و حميد و الكتيابيين الرائعين منعم و عبدالقادر..و كل يوم بمشي مشوار فني مع الرائع المدهش أبي بكر سيدأحمد ثاني اثنين إذ هما في مهرجان ميلاد الأغنيات سبقه الهادي الجبل و كلاهما عندي حبيب..بنمشي مزرعة ربيع الدنيا للأخ العزيز الفاتح في بداية قرية (الباقير) ..نلقى عوض أحمودي و ياسر تمتام و علي ابراهيم اللحو و عاصم البناو آخرين من دونهم لا تعلمونهم و هم يغنـّـوا و نحن نختار و نحتار..قبل الفطور مديح..و بعد الفطور عينك ما تشوف الا النور....في السودان بفطر أرضـآ..و أحيانآ في الشارع (في طابت)..و باكل عصيدة في صحن كبير ماهل، موش زي بتاعة كل زول براهو ديك..
الموصلي الليلة البيسكتني منك شــنو؟؟..
تحياتي للأسرة الكريمة و نرجو أن نراك (هـنـا)..أنا تاني ما راجع الغربة..
|
Post: #31
Title: Re: الطيب بشير .... عودا حميدا ....
Author: فتحي البحيري
Date: 10-11-2007, 10:24 AM
Parent: #4
Quote: اها كنت وين وما كلمتنا
ياحوام |
تعرف يا مؤسسسة
خجلان أنا كنت من روحي لما للحظة فهمت عنوان البوست أنو الحبيب الطيب بشير عاد لأمريكا
وتسجيل حضور هنا يا ود الطيبين
عسى يشفع بعض اللوم الذي لحق بنا
أن لم نسع لاكتحال أعيننا بمرآك
.... بعد
محبتي لكما
للجميع ، ولصاحب البوست بالذات
إلا تحرجونا يعني !!!
|
Post: #34
Title: Re: الطيب بشير .... عودا حميدا ....
Author: الطيب بشير
Date: 10-11-2007, 12:43 PM
Parent: #31
Quote: وتسجيل حضور هنا يا ود الطيبين
عسى يشفع بعض اللوم الذي لحق بنا
أن لم نسع لاكتحال أعيننا بمرآك |
حبيبنا البحيري
و الله ليك وحشــة أكثر من كونه عتابآ..
بنجيك أنحن و..نحن أحوج (أو كما قال الشاعر)..
تلفونك (الفي البروفايل) بيك ما خبور..ليه؟
عرفت من منعم كتيابي انو فاتني منتدى خطر في البشير الريح
الله في..انتو ما بتقولوا لينا
تحياتي للأسرة الكريمة و أبقى أظهر
|
Post: #5
Title: Re: الطيب بشير .... عودا حميدا ....
Author: bushra suleiman
Date: 10-08-2007, 03:58 PM
Parent: #1
حمدالله على السلامة ود البشير .. عوداً حميداً
|
Post: #11
Title: Re: الطيب بشير .... عودا حميدا ....
Author: الطيب بشير
Date: 10-09-2007, 07:53 AM
Parent: #5
المرهــف بشرى سليمان
أمبارح فطرت مع سعدية في دارهم العامرة..و قرينا شعر ..
و قبل يومين كنت مع اسماعيل الإعيسـر في المصنفات..
و بكرة فطور (الشلة) بتاعة منتدى مركز شباب أم درمان..باقتراح من الوجيه الصادق محمد يوسف..و برعاية البكـّــاي عبدالرحمن السعيد..أهـا؟..فاخرتكم انت و الموصلي و الله لأ؟..
شوق يا حبيب
و عيد سعيد
|
Post: #6
Title: Re: الطيب بشير .... عودا حميدا ....
Author: خضر الطيب
Date: 10-08-2007, 09:41 PM
Parent: #1
استاذنا الحبيب ابو هديل
لك التحية والتقدير
لنا من الذكريات مع حبيبنا ابو البشير ما اعجز عن حصره في كلمات
وكان ذلك في منتصف الثمانينات من القرن الماضي , جمعني وابو البشير
وعدد من الزملاء الذين تشرفت بهم جمعنا حوش التلفزيون وصحن البوش
وبوفية ادروب في الاذاعة وعمنا خالد امد الله في ايامه في بوفية المسرح
وفتة العدس مع شوربة القراقير , كانت تلك هي بداية دخولنا لهذا العالم
الذى عاصرنا فيه اروع مبدعي بلادي , كنا نقضى كل يومنا مابين الاذاعة
والتلفزيون والمسرح شهدت تلك الحشان الثلاثة الكثير من الذكريات مع
هؤلاء النفر كنا اسرة واحدة مانقضيه من الوقت هناك اكثر مما نقضيها
مع اهلنا .
تفرقت بنا السبل ايدي سبا وبفعل فاعل مع سبق الاصرار والترصد ,
كنا نلتقي صباحا ونفترق مع نهاية الارسال , وما ادراك مانهاية الارسال
والترحيل ولهذا قصص كثيره .
|
Post: #7
Title: Re: الطيب بشير .... عودا حميدا ....
Author: نيازي مصطفى
Date: 10-08-2007, 11:35 PM
Parent: #6
الف حمدا لله سلامة وصولكم للخرتوم وطابت
|
Post: #12
Title: Re: الطيب بشير .... عودا حميدا ....
Author: الطيب بشير
Date: 10-09-2007, 07:55 AM
Parent: #7
مرحبتين عزيزي نيازي
و العربات المصفحة دي بوليص؟ و الله ديش؟؟!!
كأنـّــه هـُــو..
|
Post: #16
Title: Re: الطيب بشير .... عودا حميدا ....
Author: الطيب بشير
Date: 10-09-2007, 08:51 AM
Parent: #6
و الله يا خضر زي ما قال سمعة شكلك عاوز تقلب علينا المواجع
أنا لا أستطيع دخول التلفزيون، أو الإذاعة إلا بترتيبات (أمنيـّــة) مسبقة و إذن و بطاقة زائر!
و الوجوه (الغريبة) في الحيشان صارت هي الأصــل!!
قابلت كمال منزول و الطيب المصوراتي و عصمت الرائع و عامر أبو الفتوح ..كان يوم جميل قبل رمضان..فطرنا فول أدروب..و كان تعليق أدروب على شكلي (شوية غـليد بقى)..أم كلثوم لا زالت تضع الثوب فوق كفها قبل المصافحة و تدلق بسمة أخوية في الهواء في محاولة لتطييب الخاطر و الإحتفاظ بما يتيسر من تطرّف و تزمـّـت فيما يشبه الجمع بين المتناقضات..الفنان ربيع عبدالماجد لا يزال يحاول المؤاخاة بين الفن و الوظيفة و يرهق كليهما صعودا..وجدته و قد وخط الرأس شيبا و اشتعل الوجه تجعيدا..
كنت حاضرآ أمام لبخة المسرح حين أصاب بوكسي العسكري الأخرق بتاع المطافي في حادث حركة الأخ إبراهيم كوميك و بعض المسرحيين بجروح و كسور قبل يومين، نتمنى أن يقوموا بالسلامة و يواصلوا (المباراة) مع زملائهم..
لقيت السواق الخرافي عمر قدور.. زهجان و عرقان زي العادة..و لقيت عم محي الدين بتاع الشاي جوة الإذاعة و قال لي (ما عرفتكش)..و أضحك علي صديقي العزيز محمد عبدالكريم الذي كان في تلك اللحظات يدعوني لحفل الإذاعة و قد أحياه الكابلي ..
كفاك؟.. و الله أزيدك؟؟..
|
Post: #8
Title: Re: الطيب بشير .... عودا حميدا ....
Author: خضر الطيب
Date: 10-09-2007, 00:48 AM
Parent: #1
الاخ بشرى
لك التحية والتقدير
شكرا لمرورك , ابو البشير اخ وزميل قل مايجود الزمن بامثاله
|
Post: #9
Title: Re: الطيب بشير .... عودا حميدا ....
Author: sumah
Date: 10-09-2007, 03:30 AM
Parent: #1
**
*
اخى خضر الطيب
لك خالص التحايا واصدقها..
وكل عام وانتم بخير.
الطيب الطيب ..
اتصلنابه كثيرا ..
ولا حياة لمن تنادى .
وحتى امس الاحد 07/10
الخدمة ليست متوفره لهذا المشترك في الوقت الحاضر..
لعل المانع خير..
د.محمد ابراهيم
يسال عنك اخى الطيب
هو في طريقه الى الصين صباح الاربعاء..
حيجيب معاه طوبة من السور.
شلت التلاوة بميامى..
ماقادرين يدخلوا منافسات ليلة القدر..
لعدم اكتمال النصاب..
اختفاءالطيب الطيب ..
يرجو التوضيح؟؟
اخى خضر الطيب
لاتفتح المواجع ..
الطيب الطيب رايحه ليه ملاريا!!
وشوية اسهالات مائية!!!
وسمعنا انة بعدالامطار ووحل الخرطوم..
تستجمرون..
ربنا يكضب الشينه..
***
|
Post: #13
Title: Re: الطيب بشير .... عودا حميدا ....
Author: حليمة محمد عبد الرحمن
Date: 10-09-2007, 08:05 AM
Parent: #9
الطيب بشير الطيب آل خلف الله
عودا حميدا مستطااااب..
والله ليك وحشة يا ابو البشير وغيابك عن المنبر لا تخطئه العين..
الحمد لله انك والاسرة الصغيرة والممتدة بالف خير..
رمضان كريم وعيد سعيد..
تحياتي لجميع افراد اسرة آل خلف الله وجميع (الاهل) بطابت..
حليمة
عدل لتصويب الاخطاء الاملائية الناجمة عن ضياع (النضَّارة).
|
Post: #15
Title: Re: الطيب بشير .... عودا حميدا ....
Author: الطيب بشير
Date: 10-09-2007, 08:30 AM
Parent: #13
أهـلآ حباب الأستاذة حليمة..الـ..بالأنسـاب عـليمة..
لا أراك الله وحشة..يا أخـيـّـة
بحمد الكريم أنا و كل الأهـل بخيرين تلاتة..
ان شا الله يعود عليك العيد بالسمح و الفال..
و لقد ذكرتـُـك الجمعة الماضية مع الخال عبد العال..أمام كنتينه بحي الخشوماب بطابت..و قد أسمعنا ، كعادته، روائع أشعار حجاج..كان صديقي سيف الدين ألأمين الشيخ حضورآ..ربنا يخضـّـر ضراعو..لا زال يسعى لترميم المدارس و صيانتها و بناء الفصول الجديدة..أهلك/أهلي بألف خير..يصومون الشهر و يقرضون الشعر و يقيلون عثرات الدهر..
|
Post: #14
Title: Re: الطيب بشير .... عودا حميدا ....
Author: الطيب بشير
Date: 10-09-2007, 08:14 AM
Parent: #9
مرحبتين يا سمعة
كيف حالك
التلفون الجديد أوصلنا رقمه لبيتكم في رد إيميل لحكومتكم الرشيدة
لها تحيتي و تقديري للعيال..و البيه الدي جي..
د.محمد ماشي الصين..يطلب شنو؟؟و هو عمل Post Doctorate Research
و الله مجموعة التلاوة ليها وحشة كبيرة..و على اتصال ببعضهم
أما الحبيب خضر الطيب فسنأتي لذكرياته و نبكيكما معآ..
قبل أسبوع أقام الوجيه عبدالعظيم قمش (مأدبـة) إفطار على شرفنا..جاء فيها جاره في شطر البيت المخرج الرائع إبراهيم عوض..و قد ذبحنا خراف سيرتكم الشهية..و قمش عندو وليدات عسل..عسل ..عسل..نكاتهم لا تنتهي..و الطفلة روعة..التي اخترت أنا إسمها و تركتها في الدايات..جاءت لتحيتي و هي في كامل ثوبها (السوداني) و قد عـمـّـدها الزمان أنثى فتحسـّــسـتُ بطحة على رأسي كان لونها أبيضآ..و الله يستر..
زياراتي للتلفزيون لم تخلُ من دهشـة..
تغيُر المسجد المحزون بالطبع..
هناك الكثير من السيء و بعض القديم فيه مسحة خير
و بجيك راجع يا اسماعيل..
ان شاء الله يوم العيد بمشي بيتكم (كيتن) عليك..
|
Post: #17
Title: Re: الطيب بشير .... عودا حميدا ....
Author: عمر بانقا
Date: 10-09-2007, 11:33 AM
Parent: #14
والله ياصديقى ياطيب ليك وحشه قدر الكون دا كله
لينا مده والله ايام يازمان
كيفك والايام الجميله و السودان واهل طابت الافاضل
والاسره الكريمه وعماد احمد الطيب
تحياتى وعيد سعيد وكل سنه والكل بخير
اخوك عمر بانقا
|
Post: #18
Title: Re: الطيب بشير .... عودا حميدا ....
Author: الطيب بشير
Date: 10-09-2007, 12:46 PM
Parent: #17
يااااا هــلا و غــلا..يا مرحبتين و زيادة
عمر بانقا يا وجيه الوجهاء..
شــوق بقدر ما بيننا من مودّة..
و الله الأهل بكل خير..جميعآ و الحمد لله..و العمدة مبسووووط ما عندو عوجة..الغنوة بتاعتو في مهرجان ميلاد الأغنيات جات الخامسة من خمسطاشر..و أنا سمعتها مرتين..ألحان الباهر عبداللطيف خضر ود الحاوي..
صاحبك أنور عبد الرحمن (ود بتول) ما قصـّــر معاي..عزمني حفلة عقد الجلاد بتاعة حدائق عبود..قابلني عند الباب..و أجلسني في كرسي في مقدّمـة الجالسين.. أمسك المايكريفون عند بدء الطرب و قال للجمهور رحـّـبوا بالطيب بشير..و وصفني بكرم بالغ..أهـا..الجماعة قاموا صـفـّـقوا ..و أنا أظني اتكيـّـفت ..و كان يوم ممتع..قابلت المدهش عثمان النـّــو..و جويلي و محمد شبكة و شرحبيل و الشباب الجدد..و هتفت ضد العسـكـر..كان بالجد يوم سمح..تذكّـرناك فيه و في غيره..قابلت في الحيشان الدكاترة الماحي سليمان و أنس العاقب من قبيلتكم و سألا عنك..و عن موصلي..و بالتلفون قابلت الحبيب علي السقيد عيلا ما اتشاوفنا لسع..
تحياتي للأسرة الكريمة..و نشوفك يا صديق..
|
Post: #19
Title: Re: الطيب بشير .... عودا حميدا ....
Author: محمد مختار جعفر
Date: 10-09-2007, 01:04 PM
Parent: #18
الأخ الفاضل .. الطيب بشير ..
حمدا لله على السلامة ولكن أظنك جيت بعدى ..
بدون شك بعد ما قرأت كلامك .... الإجازة برامجها عندك ...
والله يا أخ الطيب سوداننا الحبيب رغم معاناته حلو بالحيل
وخاصة للذين يعرفون كيف يبرمجون ، فمنتدياته الثقافية
عامرة بأهلها وأعلامها ولها روادها ومحبيها .. مرحبا بك
وعودا ظافرا ميمونا بإذن الله ..
محمد مختار جعفر
|
Post: #20
Title: Re: الطيب بشير .... عودا حميدا ....
Author: الطيب بشير
Date: 10-09-2007, 01:17 PM
Parent: #19
مرحبتين حبيبنا الفنان الراقي محمد مختار جعفر
و الله كان يا ريت لو اتقابلنا في البلد
لكن ان شاء الله أنا أصبحت من بورداب الداخل..و تاني نستقبلكم حتى تنضم الموجة للمحطة الرئيسية...(هنا) بعودتكم الظافرة..و نتلمّ كلنا..
أنا شاكر كلامك الفنان يا فنان..و الله السودان سمح..سماحو مدفّـق..يعني هناك مشهد مؤثر في حفلة عقد الجلاد كنت أنوي أن أفتح به بوســت لكن الصور تأخـّــرت..ذروة سنام الروعة في ذاك المساء كانت حين
زحف واحد من المعاقين على ما تبقى من رجليه و يديه..و اعتلى خشبة المسرح بدون مساعدة..و رقص زحفآ..كانت الوصلة على محمد شبكة ..ذاك الولد الفنان ..إبن البروفيسور البيطراني عبدالعزيز الطيب بتاع شمبات ..ما كان من شبكة إلا أن جلس بحميمية بالغة و أكمل الوصـلة ملتصقآ بالصبي المعاق..جاءت وصلة شريف شرحبيل من ثم فجلس حيث شبكة و تعانقا مع الصبي المبسوط و ضجّ المسرح بالتصفيق و الصفير..و طفرت الدموع من الكثيرين..أكملوا الغنوة جالسين..و نزل بعدها الشافع مبسوط و متوازن..و كبروا هم في نظر جمهورهم..
الناس ديل فنانين بالجد يا أستاذ..و السودان حلو بيهم..
تقديري لك..
|
Post: #21
Title: Re: الطيب بشير .... عودا حميدا ....
Author: محمد مختار جعفر
Date: 10-09-2007, 07:13 PM
Parent: #20
..... هذه هى الإضافة والأخذ بدرجات ، من إبداع السودان ، وشباب السودان
لذلك لم يكن مستغربا أن أجد الكثير ينهال على \ الطيب بشير بالتحية
وسلامة العودة ..
ترى لأنهم يعلمون أو تعودوا على أن الأخ ود بشير سوف يأتيهم بما عنده من جديد ؟؟؟ ..
... كثيرا ما كنت أتمنى أن ينقل كتاب البورد مشاهداتهم لكل موقع ينتقلون إليه لتعم
الفائدة ...
البروفيسور\ عبد العزيز الطيب ، من حسن الحظ أنه جارى بالصافية شمال ومنزله مقابلا
لى وكثيرا ما نتحدث عن إبداع هؤلاء الشباب رغم تعنصرنا لإبداع الماضى التليد ..
فقد أحسنا صنعا إبنه الفنان \ محمد وزميله إبن شرحبيل ، فى هذا المشهد الرائع الذى ذكرت ،
لذلك إقتلعوا التصفيق بصورة رائعة ، ولعمرى إن شبابنا الفنانين بخير وألف خير
وأنت بخيــــــر ..
لك شكرى وتقديرى .. ...
محمـد مختـار جعفـر
|
Post: #23
Title: Re: الطيب بشير .... عودا حميدا ....
Author: الطيب بشير
Date: 10-10-2007, 08:27 AM
Parent: #21
Quote: البروفيسور\ عبد العزيز الطيب ، من حسن الحظ أنه جارى بالصافية شمال ومنزله مقابلا
لى |
مرحبتين الفنان محمد مختار جعفر
أمانة انت ما جاورت..
و هم أيضـآ ..
و ربنا يجمعكم في الخير دايمآ..
أشكر لك كلامك اللطيف ..و نتمنى أن نلتقي في البلد قريبآ
تقديري العميق
|
Post: #32
Title: Re: الطيب بشير .... عودا حميدا ....
Author: omer ibrahim
Date: 10-11-2007, 11:27 AM
Parent: #20
الطيب ياطيب
اليوم داك الأيميل قال لي رسل لي الطيب بشير النعمنو عيد ميلادو جا! أنا بيني و بينك كدة "خجلت ليك" أها أنا لبدت بالموضوع دا لأنو خفتك تتحسس باقي أنا سيرة العمر دي بقت تعمل لي نفسيات فما بالك بمعالي سعادتك يا سعادتك.
بعدين موضوع (طلاق الغربة) دا حيرني ليك و فاجأني عديل كده (أها بشير جاك طابق ولا شنو؟) باقي غربة أمريكا و أوروبا دي بتجرس الناس أول ما الشباب يفرفر ولا دا تعب غربة ساي يا كمبس؟
أما أحمدنا فتوه إبتدأ توزيع القبل يمني و يسري و إن استمر بنفس المنوال فلا أرين نفسي هنا أكثر من سنتين.
أستاذ محمد كاتب البوست هذا أهو أستاذ محمد مختار الفنان الكتاب صاحب الخط الخرافي ذاته؟ أم آخر؟ زرته مرة واحدة في داره و حين كررتها بمعية آخرين و منهم جاره البروف ووقفنا علي أطلال حي كامل .. أرتحل.
الطيب
بالله عليك تقبل تحايا العيد لك و لام بشير و عندما تلتفح شالك و العمة و تقصد شمبات أن تعيد علي أستاذ محمد و للود الفنان الذي ذكرته هنا
| Quote: محمد شبكة ..ذاك الولد الفنان ..إبن البروفيسور البيطراني عبدالعزيز الطيب بتاع شمبات |
و لأبيه كل التحايا و التجلة.
"أنا أيضاً كنت جارهم في زمن مضي"
|
Post: #38
Title: Re: الطيب بشير .... عودا حميدا ....
Author: الطيب بشير
Date: 10-11-2007, 12:57 PM
Parent: #32
يا ســلااااااام ياخ
عمر المصـندل بالفرح..
ألف إزيك ياخ..و ان شا الله ديار العربان متسـركنة معاك
سألت عليك زي مليون مرة كدة..في جلسة شيشة عند أسامة..و أثناء البامية بتاعة خالتي ام سلمة..و في مكتب القانوني يويو بوسط السوق العربي..و في كل مرة تأتي الإجابات أنك فاتح للناس أجمعين..و تدري قناعة السوداني بموت الجماعة..
إن شا الله انت مبسوط
و الولد و أمو؟؟..
Quote: بعدين موضوع (طلاق الغربة) دا حيرني ليك و فاجأني عديل كده (أها بشير جاك طابق ولا شنو؟) باقي غربة أمريكا و أوروبا دي بتجرس الناس أول ما الشباب يفرفر ولا دا تعب غربة ساي يا كمبس؟
|
طلاق الغربة بين زهجة منها و بين الهلع من بشير يقوم يدخل طابق..
كل ما سبق ذكره صحيح
هو لسع ما فرنب..لكن أسئلتو زادت..و قلت أستعين عليه بالـsupport system الموجود في السودان..و والله ما شاء الله..أجدادو..أخوالو..أعمامو..المدرسـة..حتى نساء البيت في تعاملهن العام دون أن يقصدنه بشيء تجد رشاش خيرهن بلغ مكانه..و هو الآن تسودن تمامآ..
قلنا قبل ما يكبر (لم يكمل تسعة بعد)..نحاول نسوق ليهو السودان..و هو حتى الآن لم يعترض إلا على الركـشــة قال it is not safe و أنا موافقو بالحيل.
سنبلغ تحاياك العطرة للفنان شبكة و الوالد العظيم..و نزور التشكيلي صاحب الخط المدهش الأستاذ محمد مختار في وقت وجوده بالبلد ان شاء الله.
بركة بالطلة..و عقبال ما نشوفك ياخ...
|
Post: #22
Title: Re: الطيب بشير .... عودا حميدا ....
Author: Nasr
Date: 10-10-2007, 02:27 AM
Parent: #1
مرحب بالطيب
إفتقدناك كثيرا
|
Post: #24
Title: Re: الطيب بشير .... عودا حميدا ....
Author: الطيب بشير
Date: 10-10-2007, 08:30 AM
Parent: #22
مرحب بيك انت يا ناصر
و ألف شكر..من سنار لا حدي لوس أنجليس 
|
Post: #26
Title: Re: الطيب بشير .... عودا حميدا ....
Author: Amir Omer
Date: 10-10-2007, 04:19 PM
Parent: #1
ربما لم نلتقي أخي الطيب وجها لوجه ولكن ألتقيتك كثيراً من خلال كتاباتك
حمدلله ألف على سلامة عودتك للوطن ..
حمدلله ألف على طلاق الغربة المُــرة ..
رجائي أن لا تحرمنا من مواضيعك الإجتماعية الجميلة والتي أتابعها دوماً وأستمتع بها من على البعد
الشكر عبرك للأخ خضر الطيب الذي أتاح لنا هذه المساحة لنرحب بك من جديد
تقبل ودي وإحترامي
أمير عمر
|
Post: #28
Title: Re: الطيب بشير .... عودا حميدا ....
Author: الطيب بشير
Date: 10-11-2007, 07:46 AM
Parent: #26
مرحبتين الأخ الكريم أمير عـمـر
أشكر لك كلامك اللطيف .. و ترحيبك الحار
و ها قد التقينا يا عزيزي في حوش بكري
و نتمنى أن نلتقي في رحاب الوطــن
و معك أردّد بوجه الغربة البغيضة(طلقانة بالتلاتة)..و شكرآ على ما قدمتيه لنا..
و نسأل الله أن ييسر العودة لكل مهاجر و كل مهـجـّــر و لكل مهجور!!
أسعدني أنك تجد في كتاباتي ما يعجبك، و هذا لعمري غاية منى الكاتب، و أستطيع بذل وعد بالكتابة إن شاء الله ..ذلك أن المزاج بالبلد راااايق ع الآخــر..و دفء الأهــل حلو..و لولا الركـشــات و عساكر المرور لكتبت كتبآ لا مقالات فحســب.
شكرآ تاني..ليك و لعزيزنا خضر الطيب..
|
Post: #27
Title: Re: الطيب بشير .... عودا حميدا ....
Author: tariq
Date: 10-10-2007, 10:49 PM
Parent: #1
الطيب الطيب كل سنة وانت طيب والف حمدالله على السلامة . .
|
Post: #29
Title: Re: الطيب بشير .... عودا حميدا ....
Author: الطيب بشير
Date: 10-11-2007, 07:49 AM
Parent: #27
ألــف أهـلآ بالعزيز طارق
شكرآ لك حبيبنا على المرور و الترحــيب
و عيد سعيد و سنة حلوة بيك و ع شانك
تقديري و الشـوق
|
Post: #30
Title: Re: الطيب بشير .... عودا حميدا ....
Author: خضر الطيب
Date: 10-11-2007, 10:17 AM
Parent: #1
استاذنا وحبيبنا سمعة
لك التحية والتقدير
وللاسرة بطرفكم , دائما يسعدنا حضورك بابتسامتك المميزة
في حضرة حبيبنا ابو البشير , فهنيئا لنا به من اخ كريم
واعلامي متمكن ,
حبيبنا الطيب طبت وطابت ايام اقامتك بين اهلك واحبابك
ننتظر منك ان تحكي لنا عن زيارتك للسودان وبالتحديد
حوش التلفزيون وعن زملاء اعزاء مازلنا نحملهم في دواخلنا
وذكريات لنا معهم لن تمحوها الايام .
|
Post: #33
Title: Re: الطيب بشير .... عودا حميدا ....
Author: الطيب بشير
Date: 10-11-2007, 12:36 PM
Parent: #30
سلامات يا حبيبنا خضر
و الله أنا انفتح فيكم حكاوي تاني ما أسكت أصلو...
أبدا ليك بالشمارات؟؟..
إنت دحين زواج اتنين اتين دة دخل الحوش متين؟؟..
و بعدين تعال..ليه عاملنو بالدّس؟؟...
هو الواحدا لمن راجل لامن بيطبق النسوان أوّل تاني خايف من منو؟
خليك من الحروم..قول لي برضــو حكاية لبع القروش دي دخلت الحوش بتين؟؟..
و صبغة شعر الدفعات القدامنا برضها حيرتني شوية..
تاني الشمار شنو؟؟..
بجيك صاد..
|
Post: #35
Title: Re: الطيب بشير .... عودا حميدا ....
Author: mamkouna
Date: 10-11-2007, 12:49 PM
Parent: #1
كل سنة و إنت طيب يا أبو بشير..
تحياتي لأم بشير و بشير و موحى..
و كل سنة و إنتو تامين سالمين غانمين بإذن الله.
بره الموضوع:
كنا بنلاقيك أكتر لمن كنتَ في الخارج..
(( الداخل ))...دا مالو دسٌاك كدا؟؟!!
|
Post: #36
Title: Re: الطيب بشير .... عودا حميدا ....
Author: Ishraga Mustafa
Date: 10-11-2007, 12:50 PM
Parent: #35
عودا حميدا ابو بشير
|
Post: #37
Title: Re: الطيب بشير .... عودا حميدا ....
Author: azhary awad elkareem
Date: 10-11-2007, 12:57 PM
Parent: #35
الأخ وإبن الدفعة الطيب بشير
لك تحياتى والف حمداً لله على السلامة
عجالة هذى قصدت بها فقط الترحاب وأأمل أن نلتقى إن لم تكن عدت
لك محبتى
أزهرى -المسلمية
|
Post: #39
Title: Re: الطيب بشير .... عودا حميدا ....
Author: Ishraga Mustafa
Date: 10-11-2007, 01:00 PM
Parent: #37
الليلة يا ابوبشير مالك جايب لروحك الهواء، حروم شنو كمان ونحن فى القرن الكاسح ده؟
كل سنة وانتو طيبين
|
Post: #41
Title: Re: الطيب بشير .... عودا حميدا ....
Author: الطيب بشير
Date: 10-11-2007, 01:11 PM
Parent: #39
مرحبتين الدكتورة إشراقة..منوّرة بالحــيل
يا دكتورة جنس البيعرسوهن طبق طبق ديل حرّوم و بس..
و البنات الجادّات وصفهم في قصيدة غنائية كتبتها قبل ساعتين أنزلها ليك هنا هسع
بِـت عـصـريـّـة
*******
يا بـت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
******
قـول للحبسوك بـرّة الفـِـكرة
الفرضـو عليك أنثى و بـِـكرة
دفنوك في البارح و نسـوا بـُـكرة
أنا هنا يا ديل ..
أنا هنا يا ديل ..
أنا رقم صحيح و بـَعَـدل الميل
أنا بت البلد ...... أنا مليون ميل
أنا جوهر و ماس..و انا ببقى الفاس.. الببني البيت لي كل الناس
***
يا بـت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
*******
أنا بت عـصـريـّـة
شايلة الـلاب توب في الكليـّــة
أنا رقم أساسي فــ حزب سياسي ..كبير مهموم بالحريــّـة
***
أنا بت عـصـريـّـة
لو قـدر الشيلة تعال يا ود
فرحتنا الليلة تكون بالجــد
و نغني عديلة لحلم الغــد
للبلد الصابرة و منســيـّــة
*****
و أنا بت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
***
الطيب بشير الطيب
العاشر من أكتوبر 2007
الخرطوم بحري
|
Post: #42
Title: Re: الطيب بشير .... عودا حميدا ....
Author: الطيب بشير
Date: 10-11-2007, 01:16 PM
Parent: #37
أهلين أزهري الطريفي يا دفعة يا حبيب
أصدقاء الزمــن الســمح..ثمانينات..الجامعة..و روابط الأقاليم
و الله جميل انو نلقى أخبارك
و لو تفضلت علي برقمك في الماسنجر أكون شاكر
ع شان نتواصل
تحياتي لأهلنا في المسلمية كلهم
و شكرآ للطلـّـة
|
Post: #40
Title: Re: الطيب بشير .... عودا حميدا ....
Author: الطيب بشير
Date: 10-11-2007, 01:07 PM
Parent: #35
مرحبتين الممكونة
و الله ليكم وحشــة انتي و الممكون
عيد سعيد بالحيل..و سنة سمحة بجواركم
شكرآ لدخولك..و التحايا..
الداخل جاب ليهو وظيفة شغلها كتير..
و عاوزين ننستر معاكم
تحاياي لكافة عموم الممكوناب
|
Post: #43
Title: Re: الطيب بشير .... عودا حميدا ....
Author: sama7
Date: 10-11-2007, 01:22 PM
Parent: #1
السلام عليكم
عودا حميدا مع ان معرفتنا بيه بس من خلال كتاباته
تعليق صغير على كلام ممكونة
بره الموضوع:
كنا بنلاقيك أكتر لمن كنتَ في الخارج..
(( الداخل ))...دا مالو دسٌاك كدا؟؟!!
دا فى نظرى الفرق بين الغربة والركلسة فى السودان ما بس كدا لكن الاختلاف بظهر اكتر فى اسلوب الكتابة ولا غلطانة وظهرت بشدة فى الطيب خصوصا بطل شوقه للاكل لووووووول
كل سنة وانتو طيبين
|
Post: #48
Title: Re: الطيب بشير .... عودا حميدا ....
Author: الطيب بشير
Date: 10-16-2007, 06:44 AM
Parent: #43
مرحبتين يا سماح..كل سنة و انت طيبة و مبسوطة
شكرآ يا أميرة على رأيك في كتاباتي..و نحاول دايمآ نعمل حاجة كويسة..
دحين انتو يا ناس غربة الغرب، أوروبا و أمريكا، موش بتشتاقو للأكـل السوداني شديييييد؟؟
ياخ هنا أي مطعم تدخلو بتلقى فيهو أكل سوداني!!..و أي بيت يعزموك فيهو بيعملوا بلدي ضماااان..
و أظنك واحشاك موية السلطة يا سماح..صاح..
نبعتها ليك يا ستي في البريد
تقديري..و العيد السعيد
|
Post: #44
Title: Re: الطيب بشير .... عودا حميدا ....
Author: خضر الطيب
Date: 10-11-2007, 01:36 PM
Parent: #1
Quote: سلامات يا حبيبنا خضر
و الله أنا انفتح فيكم حكاوي تاني ما أسكت أصلو...
أبدا ليك بالشمارات؟؟..
إنت دحين زواج اتنين اتين دة دخل الحوش متين؟؟..
و بعدين تعال..ليه عاملنو بالدّس؟؟...
هو الواحدا لمن راجل لامن بيطبق النسوان أوّل تاني خايف من منو؟
خليك من الحروم..قول لي برضــو حكاية لبع القروش دي دخلت الحوش بتين؟؟..
و صبغة شعر الدفعات القدامنا برضها حيرتني شوية..
تاني الشمار شنو؟؟..
بجيك صاد.. |
لاحولا , جيتني في جرح , اهي دي الحكاوي ولابلاش
ودي طبعا مؤشرات لحاجات كثييييييييييييييرة
واصل ... بعد الفاصل , وخليك حريف ذي ماعهدناك
وهات من جوة ..
|
Post: #49
Title: Re: الطيب بشير .... عودا حميدا ....
Author: الطيب بشير
Date: 10-16-2007, 08:12 AM
Parent: #44
أهلين حبيبنا نبي الشاشة الخضر
و الله ليك وحشة و شوق
كيف عيدكم مع بلد الضباب؟
و الحكاوي تترى..أرخي سمعك
|
Post: #45
Title: Re: الطيب بشير .... عودا حميدا ....
Author: خضر الطيب
Date: 10-11-2007, 01:42 PM
Parent: #1
Quote: و البنات الجادّات وصفهم في قصيدة غنائية كتبتها قبل ساعتين أنزلها ليك هنا هسع
بِـت عـصـريـّـة
*******
يا بـت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
******
قـول للحبسوك بـرّة الفـِـكرة
الفرضـو عليك أنثى و بـِـكرة
دفنوك في البارح و نسـوا بـُـكرة
أنا هنا يا ديل ..
أنا هنا يا ديل ..
أنا رقم صحيح و بـَعَـدل الميل
أنا بت البلد ...... أنا مليون ميل
أنا جوهر و ماس..و انا ببقى الفاس.. الببني البيت لي كل الناس
***
يا بـت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
*******
أنا بت عـصـريـّـة
شايلة الـلاب توب في الكليـّــة
أنا رقم أساسي فــ حزب سياسي ..كبير مهموم بالحريــّـة
***
أنا بت عـصـريـّـة
لو قـدر الشيلة تعال يا ود
فرحتنا الليلة تكون بالجــد
و نغني عديلة لحلم الغــد
للبلد الصابرة و منســيـّــة
*****
و أنا بت عـصـريـّـة
شا يلة التلفون..و كتاب و مجلة دوريـّــة
عضو لجنة و سايقة العربيـّـة
***
الطيب بشير الطيب
العاشر من أكتوبر 2007
الخرطوم بحري |
ياسلاااااام يا ابو البشير , شفت الابداع من الداخل بيكون كيف ؟
واصل ياحنيين
|
Post: #46
Title: Re: الطيب بشير .... عودا حميدا ....
Author: anwar abu gaidaa
Date: 10-11-2007, 01:58 PM
Parent: #45
وين يا كوتش شنو عامل شتات من يوم ال .........................؟
والله مشتاقيين
ياخى عيدك وين نحن يوم فى الخرتوم وعقب ماشين دارفور
كنا دايرنك معانا والله رايك شنو؟؟
على كل خليك على ملمس؟؟؟
وبنديك سلك ما تشتت.. يا حنين
لانو عازمنك سمك فى الخزان بعد العيد
وقبلها البروفه فى قندهار والقهوه فى كاستيلو
والخدار من الباقير
والبتيخ؟؟؟ من الفكى هاشم
والنبق من شريمات
والعيزو انت اشر نحن نجيبو؟؟
وليك الود
انور ود بتول الغناى
|
Post: #50
Title: Re: الطيب بشير .... عودا حميدا ....
Author: الطيب بشير
Date: 10-16-2007, 08:54 AM
Parent: #46
حبيبنا الأولاني...انور ود بتول الغناى
و الله ليك وحشة يا عزيز
عافية دارفور ..و..عافية سودان..و خالد شــلــن كمان
تقدير عميق لمجهوداتكم لإسعاد الأهـل هناك..
سمك الخزان بالحيل بندورو، لما ترجع بالسلامة، و ترجع أيامنا الجميلة..
كان يوم سمح برفقتكم يا حلوين..
هل من عودة تاني؟ أم هي (مووووستاحيييلا)..
كن بالـف خير
|
Post: #47
Title: Re: الطيب بشير .... عودا حميدا ....
Author: abuguta
Date: 10-11-2007, 02:03 PM
Parent: #45
الطيب
بوستك دا شفتو اسى دى,,ومن الصباح قاعد بدون مشغلة
باقى ليك انا زول قروى, عربية السوق ضرب بوريها
لو فاتتنى الا اعيد فى سوق ود ابقوتة
اليوم خميس واخر عيد فى الرياض بكرة معيدين معيدين
جلاببة العيد فى شارع غبيرا العام الا البسها وفيها زيت المكنة
عيد سعيد
وفتك عافية
|
Post: #53
Title: Re: الطيب بشير .... عودا حميدا ....
Author: الطيب بشير
Date: 10-16-2007, 11:03 AM
Parent: #47
مرحبتين أبقوتة..قنبلة الود الموقوتة
و الله مشتاقين
العيد بوجودك، أكـيد، بيكون أحــلـى
ناس أبقوتة طيبين و مبسوطين، لاقيت السماني الطاهر خلف الله و الكعك
أريتك تبقى طيب إنتا..
|
Post: #51
Title: Re: الطيب بشير .... عودا حميدا ....
Author: Dr. Ahmed Amin
Date: 10-16-2007, 09:01 AM
Parent: #1
والله الواحد بيسعد جدا لعودة اللذين شغلتهم المشاغل لحين ..
خصوصا ناس في قامة الأخ الطيب ...
نشتاق الى مساهماتك المفيدة ...
ومرحب بعودتك...
وكن بخير دوما
|
Post: #54
Title: Re: الطيب بشير .... عودا حميدا ....
Author: الطيب بشير
Date: 10-16-2007, 12:24 PM
Parent: #51
مرحبتين الأخ الكريم دكتور أحمد أمين
عيدكم مبارك ..و كل عام و أنتم بألف خير
أشكرك أخي على الكلام اللطيف..و ان شاء الله نعود للكتابة تاني
تقديري
|
Post: #52
Title: Re: الطيب بشير .... عودا حميدا ....
Author: معتصم دفع الله
Date: 10-16-2007, 09:44 AM
Parent: #1
كويس انو البوست دا فيهو ..
خضر الطيب ..
والطيب بشير ..
سلام أهلنا وليكم وحشة يعلم الله ..
وكل سنة وانتو طيبين العيد يتبارك عليكم ..
يا خضر عملتها ظاهرة لا تليفون ولا جواب أبقى اظهر ..
الشباب هنا كل واحد بقى في مكان ووين وين نشوف بعض الله يطراها من أيام ..
حدثني صلاح شتات انو لاقاك يا الطيب بشير مع المقص وكانت فرصة حلوة ..
والله وحشتنا لمة السوق ديك والونسة السمحة ..
ربنا يجمعنا كده سالمين في وطن سالم ومعافى ..
أبقو طيبين ..
|
Post: #56
Title: Re: الطيب بشير .... عودا حميدا ....
Author: الطيب بشير
Date: 10-17-2007, 06:55 AM
Parent: #52
أهـلين صديقي الجميل معتصم دفع الله
عيدكم مبارك يا لطيف
و الله ليك وحشـة شديدة الخصوصية..
تعرف..
الدنيا كانت رمضان شديد اللهجة..
بعد غياب عقد من الزمان من رمضانات السودان..
و إذا بي أرى صلاح شتات جهرةً!! يمشي في الأسـواق و يحادث الناس..
و الله يا معتصم فرحتُ به جدآ..و قلت لي قرايبو (إنتو ماشين مع صلاح شتات و ما فيكم زولآ يضرب الروراي؟)..طبعآ حناكيش البورد ح يجوا (يسألونك عن الروراي)..لا عليك..المهم أنني إتكيَـفت حـدّ الدهشـة الكبرى..و فرحــت..
عسى الله أن يأتني بكم جميعآ..
يعود عليك بالخير يا معتصم دفع الله
يا صاحب..
|
Post: #55
Title: Re: الطيب بشير .... عودا حميدا ....
Author: عاطف عمر
Date: 10-16-2007, 12:55 PM
Parent: #1
مليار مرحباً بأبي البشير
مليار مرحباً بصاحب الكلمة الأنيقة
ومليار مرحباً بصاحب الرأى النجيع
ومليار مرحباً بسليل أسيادي القوم
كل الشكر أخي خضر الطيب
|
Post: #57
Title: Re: الطيب بشير .... عودا حميدا ....
Author: الطيب بشير
Date: 10-17-2007, 07:08 AM
Parent: #55
باشمهندس عاطف عمر
ناس رفاعة السمحين..أريت حالك زين
طال علينا فراقكم و الله يا غاليين
قدر ما ننسى العلينا ..برضو مشتاقين..و الله..و الله مشتاقين..
طبعآ أنا جنس ملياراتك دي ما عندي ليها دبارة مجاراة..لكن ننتهج المنهج الكيفي في الرد..أو آتينـّـك بمقلب هندسي ختمتُ به مدحةً قال البعض إن الصلاة على الرسول فيها أحدثت سبق رقمي ..
تعرف أن المادح يختم مدحته بالصلاة على الرسول (ص)..و يذكر إسمه..
و قد سبقني المادحون بالقول من شاكلة (صلوات عدد الرمل و النجم و الحصى و التراب)..و ما إلى ذلك..فكتبتُ الصلاة في قصيدة (الإصـطـفـوك)، و هي مجاراة للحن (الأوصـفوك) و نسق كلمات الغنوة، تقول الصلاة على النبي في ختام المدحة:
قول يامـُـريد لا فـُـضّ فـوك
صلوات على بدر الحلوك
عـدّ الزوايا الفي النسيج..و الموجِ يركض أو يهيج
عدد أحرف الروضِ البهيج..
بيها العسير يصبح يسير
للناظم الطيب بشير
عسى يرتفع..و بها ينتفع
متل القبيل الأوصفوك
يا الشيخ ...الإصطفوك
فلو تلاحظ (عـدّ الزوايا الفي النسيج)..
دي صلاة هندسية بها إمكان توليد عدد لا محود من الزوايا!!
هي مقدار الرقم الذي نواجه به محبتك المليارية هذي و التي لا قبل لنا بها
العيد مبارك عليك..
|
Post: #58
Title: Re: الطيب بشير .... عودا حميدا ....
Author: صلاح شعيب
Date: 10-17-2007, 07:11 AM
Parent: #57
ألف مراحب بالاستاذ الطيب بشير
صاحب القلم المعبر ثقافة ورقي
|
Post: #59
Title: Re: الطيب بشير .... عودا حميدا ....
Author: الطيب بشير
Date: 10-17-2007, 11:11 AM
Parent: #58
مرحبتين حبييبنا نجم (الصحافة) صلاح شعيب
و الله ليك وحـشـة
و متابعك من الداخـل ..
تقديري يا أمير
|
Post: #60
Title: Re: الطيب بشير .... عودا حميدا ....
Author: عاطف عمر
Date: 10-17-2007, 08:52 PM
Parent: #57
Quote: قول يامـُـريد لا فـُـضّ فـوك
صلوات على بدر الحلوك
عـدّ الزوايا الفي النسيج..و الموجِ يركض أو يهيج
عدد أحرف الروضِ البهيج..
بيها العسير يصبح يسير
للناظم الطيب بشير
عسى يرتفع..و بها ينتفع
متل القبيل الأوصفوك
يا الشيخ ...الإصطفوك |
تكرمنا كثيراً أخي الطيب لو أنزلت هذه المدحة الطيبة كاملة فقد فاح أريجها وعطر هذا البوست .
وتكرمنا أكثر ( والعشم في الكرام مباح ) لو أنزلتها مؤداة صوتياً
وقبل وبعد هذا لك المحبة التي تعرف
|
Post: #61
Title: Re: الطيب بشير .... عودا حميدا ....
Author: soma
Date: 10-17-2007, 09:32 PM
Parent: #60
الاخ الطيب حبابك واليوم السعيد الليه جابك
عودا حميدا
وكل سنة وانت طيب
العيد مبارك عليك .. علينا وعليك يتبارك
العفو لله والرسول
شكرا اخى خضر وكل سنه وانت بالف خير
اسماء الجنيد/ مسقط
|
Post: #63
Title: Re: الطيب بشير .... عودا حميدا ....
Author: الطيب بشير
Date: 10-18-2007, 07:19 AM
Parent: #61
ألـف أهـلآ اسماء الجنيد..
العيد سمح بي طلتك و كلامك ..
و العيد يعود عليك بالرضـا و الفال السمح..
بدأ يومي هذا بمنشم بخور عـُـماني رائع..جاءني هديـّـة عيد من أحلام بشير، في قرية نزوة، و أعجبني لدرجة أنني أحرقته في البيت و العربية و المكتب، وسط سخرية الزملاء في العمل، و .. هـا هو بخور كلامك اللطيف يعبق أجواء البوســت..
ألف رضـا و عفو ..عنكم جميعآ آل البيت الإبداعي..آل الجنيد..في مسقط و الجريف غرب و أيوا..و ..تحية خاصة لك ..عزيزتي ســومـا..
|
Post: #62
Title: Re: الطيب بشير .... عودا حميدا ....
Author: الطيب بشير
Date: 10-18-2007, 07:11 AM
Parent: #60
أكـرم الله مقامك أخي الحبيب عاطـف
و الله تستاهل المدحـة ..و..أكثر
و ان شاء الله أسعى لتسجيلها لك بصوت الجيلي إبن خالي أحمد ناصر
و هو مادح لا يـُـشـقّ لـه صـفـاء..
بس شوية عاوزة يومين تنسيق..
و أشكر لك إهتمامك يا أمير
|
Post: #64
Title: Re: الطيب بشير .... عودا حميدا ....
Author: الجيلى أحمد
Date: 10-19-2007, 10:41 PM
Parent: #62
طيب القوم خاتى اللوم,
حباب الشيخ
حباب البركة
تلفونك فى الخاص
العيد إتبارك عليك
وتحايا لأزهارك
|
Post: #65
Title: Re: الطيب بشير .... عودا حميدا ....
Author: الطيب بشير
Date: 10-20-2007, 09:51 AM
Parent: #64
الحبيب الغالي..شيخنا الجيلي
كيف حالك..و عيالك
العيد السعيد..يعود عليك بالأماني الطيبة..
يبعدك من حرائق سيسيليا..و يحفظ ليك الحلوين
الونسـة معاك بالحيل كايس ليها..و تلفوني بتلقاهو في الخاص..عيلا لا تتأخـر
تحياتي و تقديري..
لك..و لعكود..
ما ضـمـّـكما ماسينجر..إلا و كنـتُ ثالثكما..و هل هناك (شيطان) أكبر مني
كن بألف خير
|
Post: #66
Title: Re: الطيب بشير .... عودا حميدا ....
Author: سجيمان
Date: 10-20-2007, 10:20 AM
Parent: #1
الطيب ازيك
انا لايمك لوم شديد
اليوم داك ما بتسلم علي مالك يا جنا؟
يا عاجبلك انا برضو تغيان ونفسي عجباني.... وبعد مرات وحات الله لما البس الكرفتة واقدل اقول يا دنيا ما فيك علا انا...صح انا حسي شين ومبشتن... لكن اصبر كان ما بقيت سمح زيك كدي.... نان اكان هببتو ليك لومني
|
Post: #67
Title: Re: الطيب بشير .... عودا حميدا ....
Author: الطيب بشير
Date: 10-20-2007, 12:42 PM
Parent: #66
يا مرحبتين يا دكتور سيجيمان
العيد مبارك عليك يا أخي..
إنت قيافة بدون كرافتات ياخي..لكن يوم متين دة قول لي؟؟
إنت قاعد وين يا سي جي؟.. في السعودية و الله السودان؟؟..
و هل كانت (رؤية) مشاهدة؟..أم (رؤيا) شوق للأخوان؟..
إنت أصـلك مدروش من يومك و داير تدروشنا معاك!!
تقديري ..و شكرآ لمرورك
|
|