إنه الهـــلال وكفى ..

تتجه أنظار الملايين مساء اليوم إلى ملعب سوسه لمتابعة اللقاء الهام والذي يجمع بين فريقي الهلال والنجم الساحلي التونسي وكان لقاء الذهاب قد إنتهى لصالح الهلال هدفان مقابل واحد للنجم الساحلي ..
ويكتسب اللقاء أهميته لأن الفائز من الفريقين يصعد للمباراة النهائية وكذلك صعوبة المباراة للفريقين وفرصها الضيقة ..
من الملاحظ هبوط مستوى الهلال في الفترة الماضية وعدم وجود البديل الذي يحل محل الأساسيين ومخاوف ريكاردو بالزج بلاعب غير جاهز وهذه من الأخطاء التي تحسب عليه لأن المنافسة مشوارها طويل وكان يلعب في نفس الوقت في بطولة الدوري الممتاز مما ساعد على إرهاق اللاعبين وتعرضهم للإصابة ..
الوقت ليس للمحاسبة بل للعمل للخروج من مباراة اليوم بنتيجة طيبة تؤهله للمباراة النهائية ..
لاحظنا أيضاً لعب ريكاردو بطريقة 4 4 2 ولم يغير فيها شئياً طيلة الفترة الماضية ومن المعروف أن طرق اللعب تتغير بتغير الظروف المصاحبة للقاء الخصم والمدرب الشاطر يلعب بعدة طرق لإرباك خصومه ..
إذاً على ريكاردو اللعب على الهجوم مع تأمين تام للدفاع لا سيما بعد عودة ريتشارد والمعز في لقاء اليوم وإرجاع علاء الدين يوسف لخانة الوسط مع الإبقاء على سيف مساعد في دكة البدلاء لأن علاء من اللاعبين المقاتلين ومهم في مثل هذه اللقاءات ..




حاشية ..
لاحظت الحرب التي يشنها كتاب المريخ في المنبر ولعمري أنه التعصب الأعمى والذي أقعدنا كثيراً عن اللحاق بالدول التي تقدمت عنا كثيراً في هذا المجال ..
ونقول لهم أبعدوا أقلامكم عن الهلال وأرفعوا أياديكم عنه ..

وسيبقى الهلال عشق الملايين ..

سيد البلد يامو

*** أزرق هـــدر *** تاريخ نــــدر ***

سلام يا ملكي ومشتاقين ..
رمضان كريم ..

نعم إنه سيد البلد ..
ونفتخر أننا هلالاب ونحبه حتى النخاع ..
سيظهر هلال شوال من اليوم وستخرج جماهير العرضة شمال وجماهير السودان مهلله ومكبرة بفرحة تملأ أرجاء الوطن ..
من غيره يعيد البسمه لشفاه الملايين ..
من غيره ..
إنه الهــــلال وكفى ..

Quote: إذاً على ريكاردو اللعب على الهجوم مع تأمين تام للدفاع لا سيما بعد عودة ريتشارد والمعز في لقاء اليوم وإرجاع علاء الدين يوسف لخانة الوسط مع الإبقاء على سيف مساعد في دكة البدلاء لأن علاء من اللاعبين المقاتلين ومهم في مثل هذه اللقاءات ..

..

تعرف علشان كدا انا يوم كورة الهلال .. ما قاعد انضم خالص .. ولا ارى ولا اسمع ولا اتكلم .. كلامي كلو بيجي بعد نهاية الكورة ..
سيف مساعد دا بتاعنــا دا .. سجلوهو متين ؟
والله الليلة ما يمرقك مني إلا صفارة الحكم .. والماتش كسبناهو .. لكن لا قدر الله لو في اي حاجة كدا واللا كدا .. غايتو شوف ليك بلدا تانية .. بجيب ليك (علــم) النجم الساحلي وعلم اسيك .. وعلم المريخ ..
..
.

Quote: لاحظت الحرب التي يشنها كتاب المريخ في المنبر ولعمري أنه التعصب الأعمى والذي أقعدنا كثيراً عن اللحاق بالدول التي تقدمت عنا كثيراً في هذا المجال .. ونقول لهم أبعدوا أقلامكم عن الهلال وأرفعوا أياديكم عنه ..

. يا معتصم ..
لا عليك ..
للاسف هذا هو الهلال العظيم قدره أن يتطاول عليه الاقزام .. كل ما يكتب هنا ضد الهلال يا معصتم .. ناتج من اشخصات اعمتهم بصيرتهم من جهــل ..
منتهى الاسفاف وقمة السقوط ..
لكن
سنكتب عن هلالنا العظيم ... ودعهم يكتبون ضد هلالنا العظيم .. وستظهر كل التشوهات الداخليه والفرق سيكون واضح ..
لن نكتب ضد المريخ .. ولا ضد المورده ولا ضد التحرير .. لكن سنعرف كيف نرد ونزود عن الهلال في الوقت المناسب ..
وضع تحت الوقت المناسب الف خط ..

Quote: تعرف علشان كدا انا يوم كورة الهلال .. ما قاعد انضم خالص .. ولا ارى ولا اسمع ولا اتكلم .. كلامي كلو بيجي بعد نهاية الكورة ..

ياخي ما تجرسنا معاك ..
تعرف يا تامبا ..
يوم يكون الهلال لاعب بكون في حال تاني ..
وما بتكون عندي قابليه أقرأ أو أطالع أي جريدة ..

Quote: سيف مساعد دا بتاعنــا دا .. سجلوهو متين ؟

سيف من اللاعبين الذين ينفذون تعليمات المدرب من ناحية تكتيكية معينة لذلك يبقي عليه ريكاردو ..
ولكن مثل هذه المباراة تحتاج لواحد مقاتل مثل علاء الدين يوسف ولو لاحظنا إنعدام روح الوسط حينما رجع علاء الدين لخط الدفاع رغم وجود حمودة بشير وعمر بخيت ..

Quote: للاسف هذا هو الهلال العظيم قدره أن يتطاول عليه الاقزام .. كل ما يكتب هنا ضد الهلال يا معصتم .. ناتج من اشخصات اعمتهم بصيرتهم من جهــل .. منتهى الاسفاف وقمة السقوط ..

هذا شي مؤسف يا تامبا ولن يخدم الرياضة في شي ..
نعلم جيداً حجم الهجمة التي يتعرض لها الهلال وسنتصدى لها بكل قوة إن شاء الله ..

Quote: لكن سنكتب عن هلالنا العظيم ... ودعهم يكتبون ضد هلالنا العظيم .. وستظهر كل التشوهات الداخليه والفرق سيكون واضح ..

نعم هذا الكلام السليم ..
ونقول لمن أعمتهم بصيرتهم وتشجيعهم المتعصب لن تنالوا من الهلال ولو إجتمعتم جميعاً ..
أكتبوا ما شاء الله لكم عن مريخكم ودعوا الهلال في حاله ..
نحبه هكذا ..
بكل تفاصيله القاعدين تذكروها ..

إنه الهلال وكفى ..

ما أجملك ..
هلال في شكل فنان ..
ما أروعـــك ..
زايد حــــلا ..
ما أروعـــك ..

وما أجملك يا عمران وفي إنتظار البشريات وهلالنا منتصر بإذن الله ..

Quote: Quote: سيف مساعد دا بتاعنــا دا .. سجلوهو متين ؟ سيف من اللاعبين الذين ينفذون تعليمات المدرب من ناحية تكتيكية معينة لذلك يبقي عليه ريكاردو .. ولكن مثل هذه المباراة تحتاج لواحد مقاتل مثل علاء الدين يوسف ولو لاحظنا إنعدام روح الوسط حينما رجع علاء الدين لخط الدفاع رغم وجود حمودة بشير وعمر بخيت ..

تمبس
صاحبك لسه سادر في جرستو و ما جايب خبر هو بكتب في شنو






غايتو انا عندي محل كدا في الجمعية لمن اقعد فيهو و احضر اي مباراه للهلال قاعد يغلب
قول يا رب القي محلي فاضي و ما محجوز
عشان الهلال يغلب

Quote: تمبس صاحبك لسه سادر في جرستو و ما جايب خبر هو بكتب في شنو

انت يا حمد ما تمشيها جايي طابزه تاني ..
أنا قلت صاحبي الكاشف راحت فيهو وفاااااتت ..

Quote: غايتو انا عندي محل كدا في الجمعية لمن اقعد فيهو و احضر اي مباراه للهلال قاعد يغلب قول يا رب القي محلي فاضي و ما محجوز عشان الهلال يغلب

إن شاء الله تلقى محلك فاضي ومافي زول قعد فيهو ..
تاني حاجة قول لي صاحبك ثابت ما تحضر كورة الهلال اليوم ..
عارف المريخاب ديل يحضروا كورتنا يستمتعوا باللعب السمح ( ويكجونا ) أنا عارغهم عوارض ..

قول معانا يا رب ..
والهلال يسطع بدراً اليوم في سماء تونس ..
ويعود بالفرحة للديار السودانية ..

الآن إقتربت ساعة اللقاء والكل في ترقب وإنتظار ..

هناك تغيير في طريقة اللعب مع وضع خالد جوليت كمتوسط دفاع ..
وكنا قد نوهنا أن خالد جوليت أحسن من يلعب في خانة متوسط الدفاع بديلاً لريتشارد ولكن لا أدري إصرار ريكاردو على ابقائه خارج التشكيلة ، خالد يجيد قراءة الملعب جيداً وتصحيح أخطاء زملائه اللاعبين وتوجييهم في الملعب لا سيما وهو قائد وكابتن للهلال في غياب هيثم ..
نتمنى أن يقرأ ريكاردو الخصم جيداً ويتعامل معه بحذر شديد مع حث اللاعبين على اللعب بروح قتالية حتى يحققوا النصر ..
نتمنى لفتية الهلال الظفر بنتيجة المباراة وتحقيق حلم الصعود للنهائي ..

العزيز معتصم

حمد الله سلامة العودة
الله بس ربك يستر
و يتوفق الهلال يا رب
للمساكين الزينا دا رابط الاذاعة
يمسعوا التعليق


http://www.sudanradio.info/media/

معتصم الجميل

اتمنى فوز الهلال اليوم
عشان انتا وتامبا تتعشوا كويس الليله

كيفكك يا علي سلام شديد ..
والله دي الروح الرياضية العازينها والبتقدم الكرة في بلادنا ..
ومافي ما يمنع المناكفات في حدود الإحترام وأن لا تخرج عن حدود الذوق ..
غايتو أمس أنا وتمبس يومنا كان حزين وكئيب ..
عقبال ما يفوز المريخ اليوم ويعيد لينا الفرحة ..

شكراً يا حبيب ..

الحبيب نصار ..
تحياتي وسلامي ..
عذراً لتأخر ردي ..
وهاردلك خسارة هلالنا العظيم ..
فقد توقف قطاره عند محطة دور الأربعة ولم يحقق حلم جماهيره الغفيرة التي تنتظره ..
ولكنه توقف موقت إلى حين العودة مره أخرى إلى ساحات التنافس الأفريقي وهو أكثر قوة ..


محبتي ..