يا جماعه شوفوا لى حِتّه (إتزَرَّق) فيها...!

قررت بصوره حاسمه وقاطعه الهروب من مشاهدة مباراة اليوم بين الهلال والنجم الساحلى...
وقرار الهروب –هذا- تم تحت ظل الحكمه –السودانيه-القديمه:"مُضارفة المؤمن على نفسو حسنه"
فمصرانى العصبى...وتذبذب مستوى السكر فى دمى لا يسمحان لى بالمغامره أمام شطحات السيد ريكاردو...
وبعد ولوج هدف المجد -قاصمة الظهر- فى مرمانا دخلت فى حالة هبوط تام...وذهبت سريعاً للمطبخ لأشرب ماء ملح+سكر...
وطبعا قبل اى مباراه لأبو الهل الحبيب..أحتاط بشراب كميه معتبره من الحرجل المدقوق...وأعتبر أن هذا اليوم هو بمثابة (حقنة نضافه) ناجعه لبطنى المسكينه..
حقنه تشبه –تماماً-فى فعاليتها ونجاعتها الحقنه التى تعطى للمرأه الحامل قبل (ولادتها) بلحظات...!
لكن الشئ المحيرنى ويعطينى الإحساس بالتوهان...هو أننى لم أقرر بعد أمشى أطير إتزَرَّق وين؟
أى مساعده سيجعلها الله-بالتأكيد- فى ميزان حسناتكم..!

بما إننا في العشر الأواخر فنصيحتي لك الاعتكاف..

تشيل ليك كيس هدوم وتمشي ليك مسجد فيهو معتكفين وتدخل من قبل المغرب وتصلي التراويح والتهجد وتقرأ قرآن للصباح وبالمرة تدعو ربنا ينصر الهلال..

ولو الهلال اتغلب بكون عندك أجر الاعتكاف يعني رصيد في الآخرة..

بس ما تجي طالع من المسجد لو سمعت الهلال غلب