رأيت فيما يري النائم أن لاعبي الهلال......

اللهم أجعله خير
قبيل الصباح وبعد ما صلينا الصبح
نمت وشفت فى المنام أن لاعبي الهلال
كل واحد منهم أخد حافز 52 مليون جنية
اللهم أجعله خير
اللهم أجعله خير

خير اللهم إجعله خير ...

وياربي الحافز دا بالجديد ولا القديم ؟!! ...

وإشمعنى 52 بالظاااااات ؟!!!! ..

Quote: وإشمعنى 52 بالظاااااات ؟!!!!

شكلو كدا الكورة 5/2

والزول نايم في العنقريب بالقلبة
في الكرّاب يعني

وفي هلال ونجم

لصالح منو فيهم

معروفة طبعا

أطرد الأحلام يا فضل وأصحى

الملكة
نادر
راكوبة

الشئ المحيرني أنا ذاتي ليه 52 مليون جنية بالتحديد؟؟؟؟؟
يمكن تكون 25 ألف دولار لكل واحد ؟؟؟ لسه في شوية فرق...

غايتو الشئ البعرفو إنو توقعاتي بتصدق في كتير من الأحيان
إستغفر الله ،،، هي مجرد قراءة دقيقة وليس تنجيم ( من نجم طبعاً )
يعني مثلا إتوقعت إنو الهلال يصعد للمربع الذهبي بمساعدة اسيك
عشان أسيك عطل الترجي في تونس بالتعادل وعطل نفسه بالهزيمة من الأهلي في ابدجان
وقد كان

اللهم حقق حلمي وأجعلنا نبتهج مع أخواننا الصغار ونتأهل الإتنين للنهائي
ويا الله يا الله تكون مبارة السوبر سودانية خالصة
آمين أمين أمين

يا Fadl
سلام
هلوسة فظيعة يا كافي البلا ..

سلامات يا فضل كرار

أمام لاعبي الهلال فرصة تاريخية لنيل حوافز غير مسبوقة من واقع منافستهم
على بطولتين بجوائز مالية كبيرة:

* دوري أبطال إفريقيا:
ينال البطل 950 ألف دولار والوصيف 665 ألف دولار.

* كأس العالم للأندية [للفريق الفائز بدوري أبطال إفريقيا]:
ينال البطل 5 مليون دولار، والوصيف 4 مليون دولار، وصاحب المركز الثالث
2.5 مليون دولار، وصاحب المركز الرابع 2 مليون دولار، والمشتركين في المركز
الخامس مليون دولار لكل، بينما صاحب المركز الأخير "السابع" 500 ألف دولار.

وبعيدا عن الجوائز المالية والحوافز المتوقعة عند تحقيق الانتصارات المهمة، فإن
المشاركة في كأس العالم للأندية شرف كبير، وتكسب المتأهل لها زخما إعلاميا
عالميا. هذا بخلاف أن الفائز بدوري أبطال إفريقيا ينافس على كأس السوبر
الإفريقية في مباراة تقام على ملعبه مع بطل الكونفدرالية.

المجد ينتظر لاعبي الهلال الذين لو حققوا ما ذكرته أعلاه فإن حلمك سيتحقق
-بالأرقام-، لأن فوزهم بدوري أبطال إفريقيا يعني أن الواحد منهم سينال حوالي
65 مليون جنيه لو قسمت الجائزة المالية عليهم وعلى مدربهم بالتساوي "وهم
أهل لها إن أسعدوا الملايين بالكأس الغالية".

هذا المجد المنتظر وتلك الحوافز المالية المتوقعة ومن قبل ذلك الولاء لشعار
الهلال العظيم أمور يجب أن تكون دافعا لأخوان البرنس في مباراة السبت القادم،
لنا -نحن محبو الهلال- أن نحلم أحلام اليقظة والمنام، وعلى لاعبي الهلال ألا
يركنوا لها، وليبذلوا ما في وسعهم... والأمر من قبل ومن بعد بيد الله.

ودالريح
تبقى زي قروش ART السنة الفاتت اتبخرت قبل ما تصل الهلال، الديانه من عرفوا الهلال عندو قروش وقفوا صف قدام مقر الاتحاد العام، والسنة كان ربنا سهل حنلاقي ناس ريكاردو والمعز مع الديانه

يا راكو

أنت تعلم -كما أعلم- أن [شهاب الدين أسوأ من أخيه]!

لا الهلال ولا المريخ يملكان من الموارد ما يدر عليهم مالا وفيرا!
ولولا مجهودات بعض الأثرياء لما توافرت لهما تكاليف السفر
للمواجهات الخارجية.

كتب الصحفي المريخي مجذوب حميدة في جريدة الصحافة بتأريخ
16 نوفمبر 2006:

Quote: جميعنا عايش الوضع الذي كان يعيشه المريخ قبل مجئ مجلس جمال الوالي المعين الاول وكيف كانت معاناة المريخ في كل المناحي وحالة الفقر المزمنة التي كانت تسيطر والتي وصلت مرحلة العدم لدرجة ان ديون المريخ وصلت قرابة المليار وكان الدائنون يهددونه واسمه يتردد في الدلالات وكاد البعض يلجأ لاقسام الشرطة إن لم يكونوا قد لجأوا بالفعل

Quote: ونذكر ان المريخ فشل في تلك الفترة في تسجيل مدافع العباسية والموردة حالياً انور كباشي بسبب مليون أو اثنين عجز المريخ عن دفعها لأنه كان لا يملكها بل لا يملك شيئاً من المال

Quote: وفجأة كانت البشارة وجاءت النعمة فكان حل ذلك المجلس وتعيين جمال الوالي وزملائه الاوائل كبدلاء وكانوا كالغيث فأحسنت جماهير المريخ استقبالهم بحرارة ورأت فيهم أنهم القوة التي ستنقذ المريخ وترقى به ولم يخيبوا الظن فيهم وكانوا عند حسن الظن بهم

بس ما تجي يا راكو وتقول لي المريخ نادي ثـري!!

ده كان في السابق ياودالريح ، الفرق الآن بين المريخ والهلال كالفرق بين ريال مدريد وماهندرا الهندي

يا راكوبة

يا أخي إنت كنت من الذين نعول عليهم نحو إعلام رياضي أفضل!

قلت [كنت] لأنك بقيت تكتب زي ناس الصدى
_____________________________

المريخ -زي الهلال- لا يملك مالا. يتكفل بعض الأثرياء بتسيير
أمور النادي وبعضهم يطالب في وقت لاحق باسترداد الأموال
التي دفعوها.

أسرة المغفور له بإذن الله عز الدين الربيع [الذي كان إداريا
بنادي المريخ] اضطرت بعد وفاته للتوجه للقضاء حتى تسترد
ديون ابنها الراحل على نادي المريخ!

Quote: الاستاذ عاصم صلاح ابو النجا ابن عم الراحل عز الدين الربيع واحد ابناء الاسرة من المهتمين بملف مديونية الراحل علي نادي المريخ التقيناه وتحدث معنا حول القضية قائلا بعد وفاة عز الدين عليه رحمة الله استمر المجلس القديم لمدة ثلاثة اشهر تقريبا وبعد تعيين المجلس السابق برئاسة جمال الوالي بدأت اجراءات الورثة ومن ضمن الاشياء تخص الورثة الوالد وابناء الراحل وزوجته مبلغ 341 مليون جنيه. ذهبت برفقة الاخ حسان لمقابلة رئيس نادي المريخ الاخ جمال الوالي. وقد تقدم مشكورا بتوجيه امين الخزينة حسن عبد السلام بتسليمنا مبلغ 40 مليون جنيه استلمها حسان الربيع من حسن عبد السلام والباقي 301 مليون جنيه وبقينا متابعين مع حسن عبد السلام والذي لم نتمكن من الوصول اليه وكان عند لقائه يقدم لنا حججا بان المريخ لا يملك مال وانه مواجه بمشاكل تتمثل في اعمال صيانة بالاستاد وهنالك لاعبون يطالبون بحقوقهم المالية .. وكان يطلب منا ان نصبر ونقوم نحن بدورنا بنقل هذا الحديث لاسرة الراحل ولكن لما طال الامر واستمر زهاء العامين راينا تحويل القضية للقضاء بناء علي رغبة الاسرة ولجوء الاسرة للقضاء جاء نتيجة لعدم استجابة المجلس حيث انهم لم يهتموا بالامر ولو كانوا اهتموا به لعملوا للسداد جدولة بشيكات

عزيزي احمد الريح ركز معانا في مباراة النجم...ناس راكوبةخليها الان ومقارناتهم دي في هيئة عالمية متخصصة اسمها هيئة التصنيف للاندية شغلها بتوضع كل نادي في مكانه الطبيعي بدون اي طق حنك او كاش بيقلل النقاش وفي اخر تصنيف كان الفرق بين الهلال والمريخ كالفرق بين
بين الارسنال ومريخ شلعوها الخوالدة..

ودالريح
صدقني امور كثيرة تغيرت في المريخ، وقصة الراحل عزالدين الربيع اخذت مجراها الطبيعي وتلاحظ عدم تناولها اعلاميا مرة أخرى مما يعني أنها حلت. وهي دين على المجلس الحالي من المجلس السابق.
أما المشكلة الحقيقية في أبوالهل السابق واللاحق كلو واحد! وفي النهاية جابت ليها شحدة شبك وماكينات قص نجيل!
تقول لي المريخ زي الهلال برضو

Quote: نمت وشفت فى المنام أن لاعبي الهلال كل واحد منهم أخد حافز 52 مليون جنية

يا زول استغفر الله وقوم وبعد داك تم نومك

52 مليون مرة واحد الدنيا رمضان والشياطين مربطه

الله غالب

Quote: صدقني امور كثيرة تغيرت في المريخ

لم يتغير شيء يا راكوبة العزيز سوى أن على رأس المريخ رجل ثـري لو
أمسك يده لاضطر ناديكم للبحث عن ممول آخر. تماما كما الحال في الهلال
مع صلاح إدريس.

يا دكتور ياسر

الهلال والنجم أهم -ولا أدنى ريب- لكن كمان ناس راكوبة ديل كان خليناهم
سرحو بي ورانا بيطلعو المريخ زي A C Milan

عندهم في الكتابة عن المريخ حاجة كده زي بتاعة عادل إمام:

[... الشقق كتيرة والرغيف كبير والمواصلات فاضياااا...]

ودالريح
وما اجمل الكتابة عن المريخ العظيم، على الأقل نكتب عن شيء واقع وملموس ورأينا نتائجه بأعيننا، الكلام في الكتابة عن الضلال والأمنيات والأحلام منذ إنشاء الفريق وحتى اللحظة؟
جرب غير فإن لم تكن مريخيا فمازال هناك متسعاً من الوقت

Quote: وما اجمل الكتابة عن المريخ العظيم، على الأقل نكتب عن شيء واقع وملموس ورأينا نتائجه بأعيننا، الكلام في الكتابة عن الضلال والأمنيات والأحلام منذ إنشاء الفريق وحتى اللحظة؟

أسـي يا راكوبة في زول قال ليك ما تكتب عن المريخ العظيم؟

أكتب زي ما عاوز لكن لو حاولت تضخم الأمور حا تلقاني
[راجيك فـي الأماسي وفـي المرافي وفـي الملمات الخطيرة]

Quote: جرب غير فإن لم تكن مريخيا فمازال هناك متسعاً من الوقت

يعني عاوزني أشجع المريخ عشان عندو مكنة قص نجيلة؟!
طيب ما أمشي أشجع ناس Caterpillar ... عندهم مكنات
زراعية قدر الليلة وباكر

غايتو أنا عشان أبقى مريخابي لازم أول حاجة أغير اسمي
وعاداتي الغذائية... بعد داك أشوف طريقة أغير بيها
فصيلة دمي الما عاجبني لونو ده

ودالريح
ناس كاتربلر عندهم ماكينات لاكين ما عندهم كوؤس محمولة جواً زي المريخ العظيم.
وزي ناس كاتربلر الهلال والموردة والعباسية والتحرير وهلال الأبيض .
تغير الاسم والعادات الغذائية بنتحمل تكاليفو في نادي المريخ في ميزانية محددة لإخراج الناس من (الضلال) إلى النور
اما فصيلة الدم دي ما عندك فيها طريقة أحمر يعني أحمر

Quote: اما فصيلة الدم دي ما عندك فيها طريقة أحمر يعني أحمر

البركة في قمصاني الكلها زي قميص فوزي المرضي اللبني داك
_____________________________

قميص فوزي المرضي اللبني داك شاهدته به [سنة 1999] وهو "يتوعد"
حكم هلال/ترجي بعد ضربة جزاء نتج عنها الهدف الرابع... وشاهدته به
[قبل شهر ونصف] وهو يستقبل هيثم مصطفى الخارج سعيدا من مباراة
الأهلي!

طبعا حا تجي تقول لي مازدا بيلبس بدل وكرفتات

ودالريح
فوزي مسكين والله يعمل شنو بس، هو ريكاردو حالتو حالة، بدفعوا ليه شهر وشهر لأ، وناس كلتشي سيد الشقة كل يوم عامل معاهم شكلة قروشي شي شي
مازدا يتقاضى من المريخ 10 ملايين جنية سوداني قديم غير الحوافز، ويدرب الفريق القومي نظام زكاة وكده

قل يا راكوبة إن المريخ ناد ثـري... لأسألك من أين له هذا؟
وما هي موارده؟

أما كفاكم تصويرا للمريخ على أنه زي مغتربين الخليج زمان:
مـروق وقروشو كتيرة؟!
_______________________

حركاتكم دي أعملوها لغير المتابعين

ودالريح
بعد شوية حتقول لي " هل امتدت أيادي الوالي الطويلة إلى شركة كاتربلر؟"

بالله ياابوحميد طلعو اكلي مال اليتامي كمان...والكاش دا مابيقلل نقاش اليتامي؟

الله يرحمك ياعزالدين الربيع...افنيت حياتك ومالك في سبيل المريخ ودا اخر الجزاء

مكنة قص نجيلة ومكنة تخطيط ومئات الالوف من الدولارات يمين وشمال....

حاسبوا قبل ان تحاسبوا

قرأت أنهم ردوا الحقوق لأهليها يا دكتور ياسر [بعد عامين على الأقل كما يشير
المنقول أعلاه]

ما أردت إيضاحه -لمن يقرأ هذا المقال- هو عكس ما يسعى أبناء عمومتنا للإيحاء
به من ثراء ناديهم وهم -مثلنا- يعلمون أنها أموال أفراد "صلاح وجمال".

ما أن أسد الطريق على راكوبة حتى يسلك طريقاً آخر لنقل [ نصف الواقع ]!

إدارة الهلال تمهد للهزيمة القادمة وتبدأ بالفندق والجمهور .. مرفق صور!

والغريب أن صحف الخميس الرياضية نقلت أنباء مشابهة عن بعثة المريخ في نيجيريا!!
لكن نعمل شنو مع ناس راكوبة بتاعين [ نصف الواقع ] ديل!

Quote: قدم رئيس البعثة محمد جعفر قريش احتجاجاً شديد اللهجة لمندوب الاتحاد النيجيري الذي كان في انتظار البعثة في المطار محملاً إياه مسئولية فشل المريخ في الوصول الى كلبار في نفس يوم وصوله كما كان مخططاً، مؤكداً لأنهم قدموا لدولفين في الخرطوم كل مساعدة ولم يجد الفريق النيجيري أي صعوبة في أداء تمرينه الأول بعد وصوله بـ24 ساعة.. مندوب الاتحاد النيجيري تقبل حديث قريش بصدر رحب وأوضح له أن الاتحاد النيجيري غير مسئول عن التضارب الذي حدث لأنه قام بتوفير الطائرة ولكن بعثة المريخ لم تتمكن من اللحاق بها مبدياً اعتذاره عما حدث ومؤكداً أن الاتحاد النيجيري على استعداد لتقديم كافة المساعدات لبعثة المريخ حتى يتمكن الفريق من أداء المباراة في جو معافى وبعيد عن الحساسيات

Quote: تزامن وصول اللاعبين للفندق مع موعد الإفطار وكانت المفاجأة غير السارة عدم وجود أي أغذية بالفندق من أي نوع ليضطر المدير الإداري مصطفى توفيق للقيام بإعداد وجبة إفطار (طارئة) مستعيناً ببعض المواد الغذائية التي حملتها البعثة معها من دبي تناولها اللاعبون على مضض وسط احتجاج شديد من قبلهم خاصة وأنهم جميعاً كانوا في حالة صيام وإرهاق شديد جراء الرحلة الطويلة الا أن إدارة البعثة أقنعتهم بأن هذا هو الموجود وأن ما حدث لم يكن في الحسبان واعدين بمعالجة الأمر

جاء في الصدى اليوم:

Quote: إبراهومة وإيداهو يشتبكان مع مندوب دولفين و(الصدى) تكشف الأسباب وصلت بعثة المريخ إلى مدينة كلبار أمس قبل الإفطار بدقائق وكان في استقبالها مندوب من نادي دولفين الذي رفض استضافة العدد الزائد من البعثة بل ورفض توصيل أعضاء البعثة للفندق الذي تقيم به البعثة مما قاد إلى مشادة كلامية حادة واشتباك من ايداهو وابراهومة بالمندوب وكاد الموضوع يتطور إلى اشتباك وضرب بالإيدي

Quote: الديسكو يزعج لاعبي المريخ اشتكى عدد من لاعبي المريخ من الازعاج الذي تسببه لهم صالة الديسكو الملحقة بفندق جنيل فيو مقر إقامة البعثة وقال اللاعبون إن المرقص يعمل منذ وقت مبكر من المساء وهو ما لا يمكنهم من أخذ القسط الكافي من الراحة

أحد الصحفيين المريخيين من يقتدي بهم ناس راكوبة كتب:

Quote: * مرة أخرى ترددت أنباء تفيد معاناة بعثتي المريخ والهلال إلى نيجيريا وتونس من سوء الاستقبال وتأخر إنجاز إجراءات الخروج وتواضع الفنادق. * وكانت معاناة المريخ مضاعفة بسبب عدم تمكن بعثته من اللحاق بالطائرة المتجهة إلى مدينة كلبار.. الشيء الذي أجبرها على الانتظار في المطار بحثاً عن فندق ملائم تقضي فيه ليلتها بلاغوس. * وقد اضطر اللاعبون لتناول وجبة متواضعة حللوا بها صيامهم عقب وصولهم إلى لاغوس.

الموضوع ما بيحتاج Post لأنو الحاجات دي معتادة في المشاركات الإفريقية،
بس تقول شنو مع ناس راكوبة ديل، الناس ديل الهلال عمل ليهم شنو؟!

Quote: يعني عاوزني أشجع المريخ عشان عندو مكنة قص نجيلة؟! طيب ما أمشي أشجع ناس Caterpillar ... عندهم مكنات زراعية قدر الليلة وباكر

صدقني يااحمد المشكلة ليست في الهلال او المريخ كناديين المشكلة في طبيعة الاشخاص نفسهم...فراغ وخواء فكري مبالغ فيهو...يعني ناس عندنا مكنة نجيلة ديل يتفاهموا معاهم كيف؟

قبل امس فاز سيلتك علي ميلان حامل كأس اوربا...ولم يتطاول عليه احد بأن خسر من حمام ميت كما فعلوا مع الهلال...المشكلة في الناس يااحمد عشان كدا يااحمد ماتضيع الوقت وخلينا في المهم

ودالريح
عليك الله عاين لي صور قصر الشرق ولي صور مطعم فندق المريخ بنيجيريا، وركز على الحلة (السخان) وعصائر (الكراتين) والصحن القدام إيداهو والله مطاعم الفول في السودان خلتو! و تقول لي متعودين على زي ده.
الفرق بين تونس ونيجيريا زي الفرق بين المجد والنجم الساحلي، التوانسة ما قصروا معاكم (خالس) بره الملعب، والموعد داخل الملعب كمان

اولاً تحياتي الأخ فضل كرار وكل سنة وانت طيب


عجبتني جداً المجادعات بين راكوبة واحمد الريح
حاجة كده زي مجادعات الدوبيت والمطارحة الشعرية
جميلة لذيذة وما فيها خروج عن النص ولا تجريح وخدش
فعلاً دي المناكفات الجميلة البنتمناها بيننا نحن (المريخاب)
وبين احبتنا (الهلالاب) .. وانا من بيت منقسمين بالتساوي بين
مريخاب وهلالاب ولي من اعزّ الأصدقاء والأحباب اخوة هلالاب أمثال زملاء
المنبر عامر تيتاوي وعبد الغفار وبدر الدين يعقوب وتمبس ومعتصم
يعني اكيد مسألة المهاترات دي لم تخرج من اطار انها (خلاف لا يفسدوداً)


شكراً كتير راكوبة واحمد .


تخريمة :

Quote: المجد ينتظر لاعبي الهلال

انت قاصد ياتو مجد يا احمد الريح!!!!!

اخونا امير
تحياتي
ودالريح هلالابي جهراً ومريخابي سراً، قال منتظر كأس الكونفيدرالية لإشهار مريخيته على العلن ، وقال أيضا ان هناك أمريكيا قال له بالحرف الواحد " مستر (رايح) Dont waste ur time with useless and loser team, be winner or at least be one of Almerrikh fans وشكلوا اقتنع بالكلام، على الفكرة الخواجه مهندس في كاتربلر

اللهم لا شماتة
كنت هنا في استاد العباسيين في دمشق
وشهدت اكبر مهزلة بطلها الهلال
فريق المجد السوري لامجد له ولا جمهور ولا ترتيب ومصنف هنا كفريق حواري
لكن هانت
غدا الحلقة الاخيرة من مسلسل اسمو الهلال
تابعونا على قناة الاي ار تي
توقع واربح جوايز قيمة
انا اتوقع خمسة صفر
ويتحقق جزء من الحلم

امادو
سلامات
اليوم فاز المجد ( كابتن ماجد) على فريق الحرية ( بسام) في الدوري السوري بهدفين أيضا لزينو ورجا رافع، الجماعة شكلهم اتعودوا، بس ما عرفنا فيها هوبات ولا (سليقة)

Quote: ودالريح هلالابي جهراً ومريخابي سراً، قال منتظر كأس الكونفيدرالية لإشهار مريخيته على العلن ، وقال أيضا ان هناك أمريكيا قال له بالحرف الواحد " مستر (رايح) Dont waste ur time with useless and loser team, be winner or at least be one of Almerrikh fans وشكلوا اقتنع بالكلام، على الفكرة الخواجه مهندس في كاتربلر

راكوبة

هو ود الريح براهو ؟؟؟
سمعنا تحت تحت انو عمك تاج السر ذاتو بيموت فى المريخ
علا ... مكابر ساكت
او كما قيل : من الحب ما قتل !!!

Quote: أما كفاكم تصويرا للمريخ على أنه زي مغتربين الخليج زمان: مـروق وقروشو كتيرة؟

ههههههه: وفي الحقيقة حق التذاكر ما عندهم:

Quote: هو ود الريح براهو ؟؟؟ سمعنا تحت تحت انو عمك تاج السر ذاتو بيموت فى المريخ

العزيز كوستا

انت عارف عندي اخوي هلالابي مابفوت تمرين للهلال وبشجع شيلسي الانجليزي وبقول شيلسي ده زي الهلال بالضبط ويقول اي هلالابي المفروض يشجع شيلسي ..

ولكن عمك تاج السر يقول انا بشجع مانشستر يونايتد والاهلي القاهري ..
يعني الزول دهـ مريخابي عديييييل كدهـ ..


والتحية للجميع ..

حلم الجعان العيش

حبيبنا ود المايقوما ....

ومش بشجع مانشستر والأهلي ...

لا كمان بشجع برشلونة والشعب الإماراتي ...

المتداخلين كلكم
سلام عليكم
( وما نحن بتفسير الأحلام بعالمين ) صدق الله العظيم
لكن لاحظت حاجة
النهار دا 24 رمضان يوم مبارة الهلال والنجم
يعني ليلة 25 رمضان
ركزوا معاي
ليلة خمسة وعشرين رمضان
أولا
هي ليلة تتحري فيها ليلة القدر
ثانيا
العدد 25 مكون من نفس أرقام العدد 52 ( قروش الحلم ) ولكن بالعكس
يعني ممكن نقول زي ما بقولوا ناس العربي ( جناس شبه تام)
يعني تشابه فى النوع وإختلاف فى الترتيب
عليه
( شكلها بقت محاضرة عديييييييييييييييل )
تاني ،، عليه
وبما أنو شفتا فى المنام إنو لعيبة الهلال بيحفزوا فيهم بي 52 مليون
في ليلة 25 رمضان ،، يمكن نفسر الحلم بإنو الهلال فاااااااااااااائز إنشاء الله
قوقوا آمين

Quote: وبما أنو شفتا فى المنام إنو لعيبة الهلال بيحفزوا فيهم بي 52 مليون في ليلة 25 رمضان ،، يمكن نفسر الحلم بإنو الهلال فاااااااااااااائز إنشاء الله قوقوا آمين

كده الجماعة حيقولو نحن فعلاً حمام ميـت يا فضل
_________________________

... ومع ذلك: آمين يا رب العالمين.

أحمد الريح
( وما من شئ إلا يسبح بحمده ولكن لا تفقهون تسبيحهم )
صدق الله العظيم

رغم طرافة الفكرة إلا أنني أعترف أنها كانت خطأ مطبعي
غفر الله لي ولك ولسائر المسلمين