هل الكوميديا مرادف للسخف والعوارة؟ علي مهدي بالنيل الأزرق نموذجا

Post: #1
Title: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-17-2007, 09:41 PM

الشخصية الرئيسية علي مهدي..
إخراج محمد نعيم سعد..

والحصيلة للأسف.. عمل غاية في الركاكة..
و not funny

ماذا بعد.. إن كان ده شغل ممتهني التمثيل، دارسيه، ومدرّسيه؟!

يبدو أن المقصود تراجيديا..
والله أعلم..
_____
أرحموا من في الأرض ياخ..
ده عصر العولمة..
ونحن مازلنا ندور في فلك فنّي قديم ومهلهل..

Post: #2
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: jini
Date: 09-17-2007, 09:53 PM
Parent: #1

Quote: هل الكوميديا مرادف للسخف والعوارة؟ علي مهدي بالنيل الأزرق نموذجا

تستاهلى البوديك شنو والجابرك شنو!

يعنى خلاص البت سودانية!
على مهدى دا يستاهل يسحلوهوا ومن شنبو الزى ضنب الكديس د وجلابيتو وطاقيتو الخدرا دى ما ينفع الا بياع حلاوة مولد!
نجوان تحياتى
تصومى وتفطرى على خير
جنى

Post: #3
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Abdelmoniem ALHAJ
Date: 09-17-2007, 10:26 PM
Parent: #2

هل تعلمي إنو ده الممثل الأوحد للدراما السودانية بالداخل والخارج
وهو على كل شيئ قدير فيما يخص الدراما في البلد دي
وممكن يشتري أجعص مخرج وكاتب وأي شيئ عندو علاقة بالدراما عشان يبقى ربها
وهل تعلمي إنو هذا الشنب وراهو كمية من دارسي الدراما ( يعني عندهم بكالريوس بتاع دراما)
وبرضو دكاترة بتاعين دراما ونقاد
يعني ببساطة ممكن يشتري مدير التلفزيون ذاتو عشان يعرض التهريج ده.
وأعلمي بعد ده كلو في من يسبح بحمدو.
بالمناسبة عندو برضو ناس قاعدين يفتشو النت يعني البوست بتاعك ده ممكن يكون وصلوا أسة
وإتوقعي إنو بعد يومين كدة يجيك تلفون وتتعصر ليك كم مية ألف كدة. عشان يبقى على مهدي نجمك المفضل وأعظم كوميديان في العالم.

حأرجع ليك تاني

Post: #5
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 05:23 AM
Parent: #3

إزيّك يا عبدالمنعم..
Quote: عشان يبقى ربها
غايتو بالأداء ده.. ما أظن!

باقي كلامك هو الذي أثار حفيظتي.. وأرقّني !
لماذا لم يتم إستغلال أيا من ذلك لإنتاج عمل.. إنشالله متوسّط المستوى..

ياخ الخليجيين.. (رغم انه عندهم عوارتهم الخاصة بيهم)
لكنهم قطعوا مسافات بعيدة في غضون سنوات قليلة..

Post: #4
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 05:13 AM
Parent: #2

Quote: تستاهلى البوديك شنو والجابرك شنو!
صدقت والله يا جني..

كل سنة وانت طيب..
وتوبة!

بالمناسبة.. ما الزومة براهو!

Post: #6
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: الواثق الصادق
Date: 09-18-2007, 06:02 AM
Parent: #4

وعوارة ربيع طه في حاجه خفيفه..

وعوارة الهيلاهوب..

Post: #7
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: jini
Date: 09-18-2007, 07:23 AM
Parent: #6

Quote: بالمناسبة.. ما الزومة براهو!

موش حاجة تفقع المرارة!
يجيبوا ليك واحد يحكى ليك : واحد اخونا مشى ليك السعودية عمرة ونزل ليك فى الجداد معط وبعد داك جابو ليهو زبادى طلع ليك سكينو من ضراعو وقطع ليك بيها الزبادى....!
اخوهو قاليهو يا خوى ديل غنم السعودية الضاربة الضللة!
اها ما ليهو حقهم يدوا اللبنانى 15000 الف ريال والسودانى 1500ريال كان جاى قاطع ليهو بحر عشان ياكل زبادى!
بالله يا نجوان خلينى فى حالى!
هسة اقوم اشرط هدومى واكفت نفسى!
بالله فى هيلاهوب اكثر من ابوعصاية والمتعافن!
فى التلفزيون المتعافن يقولو ليك السودانيين كلهم بعد سنتين حياكلو دجاج!
يفضحنا قدام خلق الله دا والى ولا رئيس سواقين!
زمان السودانيين بقرفوا من الدجاج ما بياكلوهو هسة بقرفوا من المتعافن!
جنى

Post: #8
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 09:18 AM
Parent: #7

Quote: بالله يا نجوان خلينى فى حالى!
هسة اقوم اشرط هدومى واكفت نفسى!
بالله إنت لسه يا جني ما وصلت دي؟

المرحلة دي إحنا إجتزناها زمااان..
ودلوقت في مرحلة الهلوسة ..

امبارح (من ضمن النجاض)..
كان في سهرة في النيل الأزرق.. عن النقّة .. أعتقد.. (تخيّل؟)
ضيوفها ضمنهم كوميدي من الهيلاهوب..(إتخفّف خفّة) ..
د. البوني.. والبعيو..
كانت عبارة عن لمّة عشوائية.. وكأنها تحت شجرة في شارع الله..
لا مضمون... لا تجهيز..
ولا شئ يوحي بالمهنية.. لا من بعيد ولا قريب..

بجيك راجعة..

Post: #9
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 09:20 AM
Parent: #6

Quote: وعوارة ربيع طه في حاجه خفيفه..
وعوارة الهيلاهوب..
لا...
إنت ح تتعب كتير ياالواثق لو بديت العّد!

Post: #10
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: ahmed haneen
Date: 09-18-2007, 09:32 AM
Parent: #1

نجوان

سلامات

خليك من الضغط والسكري في عثمان دقنة ...

تعالي شوفي عوارة الهيلاهوب

في
دوبلاج بمزاااج

عشان مرارتك تنفقع

Post: #11
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: tmbis
Date: 09-18-2007, 09:53 AM
Parent: #10

Quote: علي مهدي بالنيل الأزرق نموذجا

نجوان رمضان كريم ..
الزول دا مش في (النيل الأزرق) بس .. والله في (اليابسة) برضو بفقع مرارة الواحد .. وللاسف الشديد خامي الجداده وخامي كل شئ ..
والله انا من زمن (عايز عروس مغتربة) قاعد اشوفو عشرة عشرة ..

ومن حظي السمح .. لما الروموت يقيف في اي قناة هو فيها .. تلقائيا بيكون في وضع كاتم الصوت (Mute) ..
إنت البوديك تفتشي عليهو شنو ..؟

Post: #17
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 10:59 AM
Parent: #11

Quote: إنت البوديك تفتشي عليهو شنو ..؟
كيفك يا تمبس؟

ياخي أنا لي مية سنة من الجماعة ديل..
قلت عسى ولعل..

فكرة الmute دي مفيدة جدا
حفاظا على الصحة..

Post: #16
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 10:55 AM
Parent: #10

Quote: دوبلاج بمزاااج
شفت جزء من ده يا أحمد حنين..
الظاهر بيوزّعوا نثار عباطة بين البرامج.. لزوم تصبير الناس.. ده واحد منهم..

Quote: عشان مرارتك تنفقع
تفتكر أنا فضلت لي مرارة تتفقع؟
والله فيك الخير

Post: #12
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: غباشي
Date: 09-18-2007, 10:07 AM
Parent: #1

نجوان و ضيوفها الحبان
رمضان كريم
عوارة على مهدي عارفنها من زمان
لكن البخلى محمد نعيم سعد يهبل روحو شنو؟
كمان ناس الهلاهوب بقوا عورة؟
الحاصل شنو يا جماعة ؟
الواحد عشان مافي طريقة ليهو يحضر التلفزيون و للا شنو؟
كان كدا طلعنا محظوظين !!
لكن افتوني في موضوع عوارة الهيلاهوب دي لأني اتصدمت و الله
تحياتي

Post: #13
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: عصام دهب
Date: 09-18-2007, 10:25 AM
Parent: #12

تحياتي لنجوان و ضيوفها و رمضان كريم ..

شاهدت و ليتني لم أفعل ..

بعض من

سيد جرسة ..

و

دوبلاج بمزاج ..

و بعض أعمال لـ ..

تيراب ..

و
الهيلاهوب ..

و لم أشاهد على مهدي
و لن أجازف بمشاهدته حتى و لو أجتمع الناس عليه معجبين .. و لو عملوا لي رأسي دا كلو عيون .. لأن لي قناعة يقينية أن على مهدي ـ الممثل ـ راجل دمو عوير .. أيوووة عوير عديييل كدا مش تقيل و بس ..
و بإختصار معظم ما شاهدته أقل ما يمكن أن أطلق عليه ـ كمتلقي عادي جداً ـ إنه شغل أوانطة و ساذج ومكرر و شغل تويفه و باااايخ ..
و حتى سهرة أمس بتاعت النقة يا نجوان ..
أدتني إحساس إنو الممثلاتية و بتاعين خفة الدم ديييل فارضين نفسهم على الناس غصباً عن عين أبو أهل أي حاجة ؟؟
و صراحة ما منهم .. من الخلاهم يسرحوا و يمرحوا ..
كل واحد ألف ليهو منلوج و لَلا قلد ليهو صوت غنماية يعمل ليك فيها شكل سيدا و كدا ..
و هاك يا سخافة طلعت ميتين أيمان ناس سلافة ..
أحيييي أنا أحييييي
شكيتهم كلهم و خليتهم لي الله دا .. كان هردوا مصارينا و خلوا خشومنا ملح .. ملح ..

Post: #20
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:11 AM
Parent: #13

Quote: شكيتهم كلهم و خليتهم لي الله دا .. كان هردوا مصارينا
أثنّي هذا التصريح دون تردّد

شكرا عصام دهب..
تحدثت أخي الكريم اصالة عن نفسك..
وإنابة عن جموع شبعت أمعاؤها مغس ودغس..

والنيل الأزرق يسعى بخطى حثيثة في درب عمه الغبيان
تلفزيون السودان القومي..

Post: #14
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: abdulhalim altilib
Date: 09-18-2007, 10:25 AM
Parent: #12

الأخت نجوان ،

تحياتي ،

سهرة (النقة) بتاعت النيل الأزرق
لم يكن فيها غير البعيو (يغني بس) .
الباقي كلو كلام نقه ساكت ، عدا بعضاً
من كلام د. البوني .

عليك الله أعملي مقارنة سريعة كده بين
(نقة) امبارح و حلقة (أغاني وأغاني)
اليومية للأستاذ السر قدور في ذات القناة.
تصدقي ، أنا بسجل كل الحلقة بتاعت قدور
أما سهرة (النقة) ، فالحمد لله لم اسجل
غير أغنيات البعيو بس .

و .. نسوي شنو ، هذا هو قدرنا.. أن يكون
كبير ممثلينا هو علي مهدي (داخلياً وخارجيا)
وأن نشاهد مثل تلك السهرات الكلها نقه وبياخة.

مودتي ،

( ليمو )

Post: #21
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:16 AM
Parent: #14

Quote: لم يكن فيها غير البعيو (يغني بس)

سلام عبدالحليم..
معاك ميّة ميّة فيما تحته خط..
لانه كتير من كلام البعيو كان كلام الطير في الباقير..
ما عارفة مرضة خفّة الدم والشتارة دي نهايتها متين!

غايتو
الله في..

Post: #18
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:03 AM
Parent: #12

Quote: لكن البخلى محمد نعيم سعد يهبل روحو شنو؟
يمكن مجاملة يا غباشي لعميد المسرح السوداني..
أو مزنوق في فواتير (بعملوها بعض نجوم هوليوود)..

ما بعرف ناس الهيلاهوب قبل كده
لكن الجابوه ليهم في النيل الأزرق.. يؤهلهم ان يكونوا ملوك للسخف

Post: #15
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: صلاح شكوكو
Date: 09-18-2007, 10:42 AM
Parent: #1

..
نجوان وضيوفها

أنا في تقديري أن هذه الشوارب المفتعلة
وهذا الجلبات الأخضر ةالعمامة المنفلتة
تعبير سايكلوجي يدلل على الخواء .. أو لعلها
حالة للفت الإنتباه ..

المشكلة أننا نعاني من حالة درامية ‘سمها
(( سجم الرماد )) كبوبهاهذه (العواره )
وهذا العبط الخرافي ..

لكن الأروع هي أن حياتنا العادية والتلقائية
في الشارع فيها صور درامية يمكن مشاهدتهادون
أن تسلط عليها الكاميرات ..

فقد جلست أتأمل طريقة عمل الكمساري وبائع (( التمباك ))
والخضار والخبازين .. فوجدت صورا للحياة يمكن أن تضاهي
صور أسامه أنور عكاشة .. لكن تترك حيث هي دون تناول درامي
حتما سيفسدها ..

حاولوا شوفوا الصور دي بحياد وإياكم إصطحاب الكاميرات
لأنها ستتحول الى مسخ تطغى في الشوارب على الخشوم
وستتحول العبارة الى (( آآآآآآآآآآآآآآآي ))

شكرا للموضوع الجميل في الشخوص العبيطة

..

Post: #22
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:20 AM
Parent: #15

Quote: لكن الأروع هي أن حياتنا العادية والتلقائية
في الشارع فيها صور درامية يمكن مشاهدتهادون
أن تسلط عليها الكاميرات ..
يا سلام عليك يا شكوكو..

لو في طريقة Reality TV (جد جد)..
ولا يتدخل فيه أيا من إياهم..
تكون حاجة رائعة..

Post: #19
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: سامى عبد الوهاب مكى
Date: 09-18-2007, 11:06 AM
Parent: #1

كمان عوارة علي مهدي على الطبيعة حاجة فظيعة!!

الله لا وراكم ليها!!

Post: #23
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:23 AM
Parent: #19

Quote: كمان عوارة علي مهدي على الطبيعة حاجة فظيعة!!

ما حصل لينا الشرف لسه يا سامي

Post: #24
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: ابوحراز
Date: 09-18-2007, 11:27 AM
Parent: #19

ان شاء الله العزابة المعانا في البيت يشوفوا الردود دي
لأن هذه الردود تمثل انتصاراً كبيراً لعمك ابوحراز يانجوان
واحد أمس قال لي والله يا ابوحراز كرهتنا
ياخي في واحد عاقل يشاهد أخبار الجزيرة بعد الفطور مباشرة ؟؟
انا تصدقي مشكلتي واحد مادح عجيب جداً عندو مدحة { اسمها { جيتك جاري }
والله العظيم كان الزول دا ماشي { حبيان } يعني على اربعة كرعين كان لحد الآن وصل
فتحت السودانية لقيتو جاري
فتحت هارموني برضو جاري
فتحت الشروق لقيتو جاري
فتحت حاجة اسمها سحور أظنها برضو عمك جاري
والله العظيم كنت اتوقعو في اي لحظة يجي جاري على ايمان بنورة والقيامة تقوم

لكن بصراحة شاهدت مقطع من فرقة الأصدقاء لأول مرة أشاهده في حياتي
يبدو لي اسمه كابتن { كابو }
شيء ظريف جداً
وخفف علينا وعثاء السفر
وقيظ رمضان
وهل هذه الممثلة الظريفة جداً هي تماضر شيخ الدين ؟؟
ماتزعلوا مني لأني والله لأول مرة أشوف تماضر على المسرح
وبالتالي إن كانت هي فإن عمرنا كله قد ضاع
مشكلة ياخي في أهل العوض لم تكن التلفزيونات متوفرة
وهذا الحرمان التلفزيوني قد ضيّع علينا الكثير

أنا دائماً لاأحب أن أرفع ضغطي
يعني عادي لو قفلت معاي بشوف أقرب نشرة جوية وبجكس فيها

قال جيتك جاري قال !!!!

Post: #26
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-18-2007, 11:45 AM
Parent: #24

Quote: انا تصدقي مشكلتي واحد مادح عجيب جداً
شفته كتيـــــر
وكنت مفتكرة دي مشكلتي براي

Quote: وهذا الحرمان التلفزيوني قد ضيّع علينا الكثير
يا ليت تلك الأيام عائدة للجميع..
في مشارق الأرض ومغاربها..

Post: #25
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: alsngaq
Date: 09-18-2007, 11:30 AM
Parent: #1

اسي انتو بصحكم عندكم اشتراك فى قناة النيل الازرق؟؟؟؟

فى حد بشتري المرض والسخف بفلوسه اللهم اني صائم

يا نجوان شوفي ليك اشتراكات تانية وارحمي نفسك من العوارة دي

رمضان كريم

السنجك

Post: #27
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: معاذ حسن
Date: 09-18-2007, 11:59 AM
Parent: #25

نجوان
رمضان كريم
الاسخف والاسمج والابيخ هذاالعام والاعوام التالية عن جدارة كاميرا ربيع طه وشكر الله

فن الكاميرا الخفية كمتلقى عادي استطيع ان الخصها في وضع الضحية في موقف غريب وطريف ومشاعر متناقضة وحاجات ما منطقية كدا بدون تجريح او اساءة وبدون التسبب في مقتله.
دا القاعدين نشوفو في كل الدنيا.

ربيع طه وشكر الله فهمهم للكايمرا الخفية ((التخويييييييييف)).
في حلقة امبارح الفكرة هي اتهام الضحية انو حرامي وسراق والامساك بخناقه وتهديده باستدعاء الشرطة!!

في الحلقة التي بثت تاني يوم كاد ان تتسبب في مصرع مواطن مسكين اطلق ساقيه للريح بعد ان خوفوه بمارد يحمل عكاز والمصيبة موقع التصوير كان على طريق سريع والمواطن المسكين قطع الطريق جري كان ممكن ببساطة يرح فيها.
والنتيجة توتر المشاهد من بداية اي حلقة لنهايتها.

Post: #36
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:22 AM
Parent: #27

Quote: ربيع طه وشكر الله فهمهم للكايمرا الخفية ((التخويييييييييف)).
في حلقة امبارح الفكرة هي اتهام الضحية انو حرامي وسراق والامساك
بخناقه وتهديده باستدعاء الشرطة!!
ده يا معاذ طبعا لما يتم إستيراد فكرة
وتطبيقها قبل فهمها...
إنشالله يكونوا بيستشيروا الضحايا إن كان لديهم إعتراض على بث الكليب..

Post: #35
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:18 AM
Parent: #25

Quote: فى حد بشتري المرض والسخف بفلوسه
سؤال وجيه جدا يا السنجك..

Post: #28
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: mamkouna
Date: 09-18-2007, 12:54 PM
Parent: #1

كيفك يا نجوان..
كل سنة و إنتي طيبة . تصومي و تفطري على خير.

على مهدي يا ستي..لسه معلق معاهو دور الأهبل الساذج في (( عرس الزين ))..
و لا يا ربي ما كان تمثيل؟؟!!!

و بالمناسبة حلقة أمبارح الفيها البعيو كان فيها إمتهان لشخص محترم و رزين و رصين زي عبد اللطيف البوني...أنا لو منو كنتَ إعتذرت عن إكمال السهرة....
تقولي لي...ست الودع!

Post: #29
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Hussein Mallasi
Date: 09-18-2007, 01:19 PM
Parent: #28

Quote: وهل هذه الممثلة الظريفة جداً هي تماضر شيخ الدين ؟؟

دي اسمها ناهد حسن يا ابو حراز او نحو ذلك.

____
تماضر أظرف كتير.

Post: #30
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: jini
Date: 09-18-2007, 03:57 PM
Parent: #28

Quote: و بالمناسبة حلقة أمبارح الفيها البعيو كان فيها إمتهان لشخص محترم و رزين و رصين زي عبد اللطيف البوني...أنا لو منو كنتَ إعتذرت عن إكمال السهرة....
تقولي لي...ست الودع!

البعيو شخص محترم ولا يقل عن البونى ان لم يزد عليه يا الممكونة!
جنى

Post: #31
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: mamkouna
Date: 09-18-2007, 06:57 PM
Parent: #30

الأخ جني..
كلُ من كان في السهرة..مُحترم.
لكني عنيت أن لكل مقام مقال..
و مقام الرقص و السكسكة و الترترة والتنكيت و الودع و الغنا و النقة..
غير مقام المقالات و النقاش الهادف و تبادل الآراء.
و لا شنو..؟؟!!!

إحترامي الشديد لكل حضور و متابعي السهرة المذكورة
و إحترام خاص ليكَ يا جني..

Post: #38
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:29 AM
Parent: #31

معاك في دي يا ممكونة..

أي غنا في التلفزيون أصبح ربّة..
حقيقي لا يوجد تمييز.. بين جلسة إستماع.. حفل عام.. ولا صبحية..

Post: #32
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Azhari Nurelhuda
Date: 09-18-2007, 11:58 PM
Parent: #28

Quote: على مهدي يا ستي..لسه معلق معاهو دور الأهبل الساذج في (( عرس الزين ))..
و لا يا ربي ما كان تمثيل؟؟!!!

غايتو دي يا ممكونة
مبالغة (و الميم فاتحة)
يجازي محنك.........

و رمضان كريم

Post: #33
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Saber Abdelhadi
Date: 09-19-2007, 00:16 AM
Parent: #32

فقط لو فتحوا حنفية الإمكانيات لأمثال سيد عبد الله صوصل
لتغير الحال..هذا الرجل فنان بحق شرط ان يكون العمل (بانتومايم).

Post: #34
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: ahmed khidir
Date: 09-19-2007, 03:37 AM
Parent: #33

الاخت / نجوان
ســـــــلامات
ممثل كبير على صفحات الجرائد ونقابة الممثلين العرب فقط ............
يملك مسرح البقعه بامدر مان.........
وقرية الاطفال sos (رئيس مجلس الادارة) ..؟
على مهدى رغم ظهوره المبكر الا ان انتاجه الفنى القليل لايتناسب مع عمره .......

اثر بشكل سلبى على المسرح والممثلين خاصة فرقة الاصدقاء المسرحيه
واحد مدير مسرح البقعه والاخر موظف فى قرية الاطفال SOS...

احمــد خضــر

Post: #40
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:44 AM
Parent: #34

Quote: على مهدى رغم ظهوره المبكر الا ان انتاجه الفنى القليل لايتناسب مع عمره .......
أحمد خضر..
لو ده إنتاجه.. فالقلة محمودة إذاً

Post: #39
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:33 AM
Parent: #33

Quote: حنفية الإمكانيات
يبدو أن المفتاح لهذه عند النجار يا صابر..
والنجّار عايز فلوس...
والفلوس ...

تأسفت للإنتاج المكلّف لعمل هزيل.. ومحرج..

Post: #37
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-19-2007, 05:24 AM
Parent: #28

Quote: و لا يا ربي ما كان تمثيل؟؟!!!
أنا برضو قلت كده يا ممكونة..

Post: #41
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Siham Elmugammar
Date: 09-20-2007, 08:40 AM
Parent: #37

نجوان و ضيوفها الكرام سلام و رمضان كريم
يا جماعه انا لى 4 سنوات ما بتابع مسلسلات بشكل عام
اما الدراما السوادانيه فلى منها تاشر الف سنه كده
عمود الزومه من افتح الصفحه الفى النص دى طوالى بطفى ليك عينى اليمين
بس الله يكفينى شر اخونا جنى

اها ظهرت لينا نجوان و على مهدى
يا نجوان شيلى بنبرك ده و قومى من قدام التلفزيون

عارفه فى التمنينات و نحن طلبة جامعة و كده ساقتنى ليك واحده صحبتى كانت عارفه انى بحب المسرح جدا (اخر مسرح دخلتو كنت انا الممثله ) المهم الزوله المسلطه دى جات خمتنى قالت لى تمشى معاى بروفه بتاعت ناس فرقة الاصدقاء المسرحيه ..انا اطول ..طوالى مسكنا الشارع و ركبنا الظلط..مشيت ليك يازوله و الجماعه بدو النقاش حول العرض و انا انطويت لى فى كرسى بعيد كدى ..ما كمان فى حضرة ملوك الكوميديا فى ذلك الزمان.. اسمع ليك (على مااذكر) محمد نعيم بيقول حقو نقول شنو كده الفحم ..(بمعنى انهم يشيروا الى غلاء سعر الفحم) جمال قال ليهو لا ياخ قولناهاالمره الفاتت و الناس ضحكت ما اظن يضحكو تانى فيها!!! و استمر الجدل والاقتراحات حول الجمل و القفشات الممكن تضحك الناس!!!!
اسفت شدة الاسف... لانى ما كنت متصوره اختزال قدر ده للمسرح من مسرحيين!!!
المهم طبعا انا عملت ابوحنيفه طوالى فردت كنكشتى و قعدت فى الكرسى عديييييييييل و خلفت رجلى كمان

Post: #42
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-20-2007, 10:22 AM
Parent: #41

Quote: يا نجوان شيلى بنبرك ده و قومى من قدام التلفزيون

كيفك يا سهام..

تعرفي إنه الحنين.. لريحة البلد..
(كتّر خيرهم طيّروه لي من راسي)
آخر عهد لي بالتلفزيون السوداني.. سنين طويلة جدا...
واصبح دلوقت a click away
فقلنا مع العولمة والثورات المعلوماتية.. والإعلامية..
نكون مشينا شوية للأمام...

بس لسه ما حصل..
وكل المبدعين الحقيقيين قد تركوا البلد (أو تركتهم هي)..
واصبحت مقاليد الأمور عند من لا يملك شئ يقدمه..

مش بس المسرح...
كل الفنون تم إختزالها في نكات ومنولوجات سمجة..

Post: #43
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: سلمى الشيخ سلامة
Date: 09-22-2007, 00:20 AM
Parent: #42

يا نجوان كل سنه وانتى طيبة ورمضان كريم
والعوارة ما بشارة
حقيقة ماشفت اى دراما والحمد لله
لكن المشكلة ما على مهدى براهو
المشكلة الدراما السودانية القاعدة تتراجع كل يوم
والسبب انه ناس الدراما ما بشوفو غير روحهم
ولا مستعدين
وفى تجارب جميلة جدا لكن ممنوعة من دخول التلفزيون
لانه مدير الدراما السودانية خريج علوم البحار
ونايبه خريج الاشعة
وهكذا
تجارب معملية مافى
وخبرات متراكمة مافى
عشان كده بشوفو روحهم فى مرآة الذات ودى بتخلق زول نرجسى
هذا بعض من ماسى الدراما
ولو تعرفى انه (زمان) كانت دراما التلفزيون اول دراما عربية وعلى الهواء مباشرة
هسى مسجلة (ومرمدة) حالها يغنى عن سؤالها
وزى ما قالوا ليك يا حبيبة انتى البوديك تشوفى التلفزيون شنو؟

Post: #44
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: jini
Date: 09-22-2007, 00:31 AM
Parent: #43

Quote: لانه مدير الدراما السودانية خريج علوم البحار
ونايبه خريج الاشعة

طيب يا سلمى ما يعملوا لينا على مهدى مدير علوم كلية البحار ومحمد نعيم سعد مدير كلية الأشعة التشخيصية!
عشان تبقى الصداقة قرابة
ونكسب الودين !
شى عجيب!

سهام المجمر
ما ليكم الا الزومة كان ترضو كان تابو
الا تقولوا لى بكرى عليك الله قول ليهو لا!
جنى

Post: #45
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: Abdelmoniem ALHAJ
Date: 09-22-2007, 09:47 PM
Parent: #44

البخلي محمد نعيم يهبل نفسو شنو؟؟؟؟
القروش طبعا
علي مهدي لأنو ماعندو موهبة بشتري ناس يشتغلو ليهو
وعندو صكوك غفران برضو يعني كان رضى عنك بتشتغل وتسافر (وتعمل أي حاجة) وكان ما رضى (ما بتشمها)
كتير من المبدعين ما بقدموا اعمالهم في التلفزيون لأنو عندهم موقف وما بقدروا يبيعو نفسهم. وبالمناسبة المبدئيين ديل اسمهم في الوسط النتن ده (طليعيين).
أستاذة سلمى الشيخ
اتناقشنا قبل كدة في وجود بهاء الدين هاشم في الموضوع دة ووصلنا لي انو ده زمن عاطلين الموهبة والمطبلاتية
الموضوع أبعد من كدة كتير القصة قصة دولة كاملة بتشجع زي السخف دة وادارات هي نفسها تفتقر للموهبة والحس الاداري
ومسألة الفنون المربوطة بالوعي دي (ما عندها فيها).
ده مخطط كامل ومدروس لتشويه الذوق العام السوداني.
المسألة تحتاج لفتح ملفات من المتخصصين والموجوعين على الدراما السودانية

Post: #46
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: معتصم ود الجمام
Date: 09-23-2007, 01:07 AM
Parent: #45

نجوان
طيب الله مساءك
يا جماعة شوفوا الوشوش البتجي كل سنة في رمضان قاعدة تتغير ؟
اوريكم عيوب موش تاخر الدراما تاخر البلد كلها
اسمعوا الكلام الحار ده
ممكن مخرج كبير ولا ممثل ليهو اسم وشنه ورنه
لو لقى ليهو بت في الشارع عجبتو وهي خفيفه ولفيفه بتبقى ممثلة
في تلاتة ايام بـــــس
سلمى الشيخ ما تزعلي مني
الموضوع موضوع اخـلاق عديل كده كم من الممثلات طلعن خشبة المسرح ولا
خش التلفزيون من الشارع ساكت
اسف للكلام البلدي ده لكن والله هسه في نجمات في تلفزيون السودان كل علاقتهم بالدراما
علاقة بفحل من فحووووووول الدراما
انتو سمعتو قبل كده بممثلتين جلدن بعض في المسرح القومي بسوط عنج
عشان واحده متهمة التانية انها عاوزه تقلع راجلها
ولكــــــــــــــــــــــــــــــــن
هناك ممثلات بحق وحقيقة وتوزن اخلاقهم بالدهب
انا بالمناسبة قدر كلامي ده وما بزح منو شبر ولو ختو فوق رقبتي السيف
معتصم سيد احمد
خريج درامـأ سابقا ومغترب حاليا

Post: #49
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-23-2007, 10:52 AM
Parent: #46

إزيك يا معتصم..

توزّيع الوظائف والفرص بناءا على المعرفة دون إعتبار للمؤهلات
من أكبر مشاكلنا.. ومتفشّي في كل المجالات..
ومع ذلك نتعجّب لمستوى الإنتاج..
(هذا إن كان هناك إنتاجا)

Post: #48
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-23-2007, 10:45 AM
Parent: #45

Quote: القصة قصة دولة كاملة بتشجع زي السخف دة
وادارات هي نفسها تفتقر للموهبة والحس الاداري
ومسألة الفنون المربوطة بالوعي دي (ما عندها فيها).
ما قلت إلا صدقا..

شكرا عبدالمنعم..

Post: #47
Title: Re: هل الكوميديا مرادف للسخف والعوارة؟ علي مهدي بالنيل الأزرق نموذجا
Author: نجوان
Date: 09-23-2007, 10:39 AM
Parent: #43

كيفك يا سلمى وكل سنة وانتي طيبة..
Quote: وفى تجارب جميلة جدا لكن ممنوعة من دخول التلفزيون
واقع محزن فعلا..
النرجسية داء عضال ..