يومياتي + نبض الشارع

اعزائي تجدونني اطل عليكم عبر هذه النافذة محاولة التخلص من اعباء ذاكرتي فاعذروني ان اثقلت عليكم، في هذا البوست والذي اسميته (يومياتي + نبض الشارع) أحاول ان اقدم كل يوم حكاية على وزن فوازير رمضان يعني 30 حلقة تتباين ما بين هو هم عام وهم خاص والذي لا يخرج من اطار العام ايضا. طبعا الفوازير في نهايتها في هدايا ، ونحن هدايانا حتكون منكم ولكم محاولين الوصول لافاق حل لسوداننا العزيز بكل مكوناته. يا ريت نتمكن من تامين هدايا غالية ونفيسة تليق بسوداننا الغالي والعزيز.

حكايتي اليوم تبدأ مع ليل ممطر في مدينتي امدرمان.
الساعة الثانية بعد منتصف الليل طق طق طقطرق المطرة
- يا جماعة المطرة صبت
- الله ، حسع دة وقته
- زول ينزل معاي المراتب يا .... و يا......
- طبعا الكهرباء قاطعة يا اولاد عاينو كويس ما واحد فيكم يقع من السلم
وتمضي الثواني مملة نتقلب وتعذر علينا النوم ، ننوم كيف كهربا قاطعة جو كاتم باعوضة المهم غايتو حاله اخير منها العرس.
الساعة الرابعة صباحا وامراة الجيران (م. النقادية) تصيح تبحث عن معين وهب بعض اولاد الحي لمساعدتها في "قطف" الموية من الحوش والتي كانت تهدد بيتهم بالغرق.
الساعة السادسة صباحا رن منبه الموبايل معلنا بدء يوم كان قد ابتدا ، وإذا باصوات ولولة وكواريك وعويل عند من منزل الجارة الأخرة (س النوباوية) يا ناس الحلة الحقوني الادبخانة وقعت وهرع آخرون ملبين النداء ولم تتح لي فرصة المشاهدة او المشاركة لانشغالي في اعداد تفاصيل يومية ما بين شاي وسندوتشات.

- الله يا ولد انت ما جبت العيش
- يا امي هو امبارح بالليل ما عملوا عيش
- طيب
وفي ا لدكان
- العيش ما جاء ولا شنو
- والله اظنو عشان المطرة
-خلاص كدي النمشي الفرن
وهاك يا زحمة وفكة مافي والعيش دة مالو عامل كدة و.....
و عدنا
واستعد الاطفال للخروج
- يا امي حسع نحن نمشي كيف مع الطين دة
- يا بتي نسوي شنو ما ياهو دة السودان
- ياخي والله دي ما طريقة ماما اضربي لبتاع الحافلة خلي يجينا جوة يا بت اتي بتحلمي ولا شنو ما تمشي مشيك.
الام مستطردة: نسوي شنو يا بتي عاد لا امك عندها جواز بريطاني ولا ابوك وقع ليه اللوتري ياها دي قسمتنا الحمد لله. و يا هو دة السودان تمشي في الطين تتوسخي ما في خيار ولا جذر

في الشارع والمطر تنقط طق طق
خرج الاطفال من منازلهم بملابسهم المتنوعة ناس الانترناشونال والدبلوماتك سكول ديل اقلتهم طائرة اللوفتهانزا وناس المدارس المدارس البريطانية ديل مشو بالبريتيش اها نحن ناس قرحيتي راحت اولادي مشوا بالاماراتية ، اما ناس المدارس السودانية (مدارس الحكومة) ديك غابو عدييل كدة اصلا الطيارة ما جاتهم اقصد الترحيل ما جاء.

ورجعنا في رحلتي الثانية والاستعداد للذهاب للعمل.
الله الموية في الماسورة مافي وكمان الكهربا لسع قاطعة يعني مافي طريقة نشغل موتور. كدي النكورك للجيران
- يا ج .... عليك الله برميلكم فيه موية
- أايى لكن ساقطة شديد
- مافي مشكلة بدفي لي موية عليك الله املي لي الجردل دة ،
في المطبخ الغاز قطع يا سلاااااااااام
- طيب الانبوبة التانية ما مليانة
- مليانة وين ما الدنيا اخر شهر
- طيب في فحم
- الفحم يا هو داك ليه لكن ما صابة فيه المطر ما بيولع ليك حسع
نسوي شنو حمام بموية باردة باردة ما ياهو دة السودان .

نفس القصة تتكرر واسال نفسي حسع امشي كيف في الطين دة المهم يا اخوانا اتصرفت لبست شبشب السفنجة وختيت ليك داك يالشبشب الايطالي في الشنطة لما وصلت الزلط طبعا مواصلات مافي وزحمة شديدة ، الحمد لله انقذني ابن اخي واقلني بسيارته اللانسر "الفارهة" إلى مقر العمل ووصلت ليك نضيفة كاني جيت سايقة ال بي ام حقتي ومرقت من بيتنا ال في قاردن سيتي.

الساعة الثامنة صباحا
اول ما دخلت قلت كدي النضرب للدكتورة صاحبتي الساكنة في المنشية ،اشكرها على عزومة امبارح في امواج والتوصيلة بعربيتها الفارهة البرادو.
- الو ازيك يا دكتورة
- كويسة كيف انتي
- كويسين لكن مع المطرة امبارح ما نمنا.
- في استغراب شدييد مطرة هي بالله امبارح صبت مطرة اتاري انا شايفة السواق بالشباك يغسل في العربية قلت الزول دة مالوا الليلة ، غايتو يا حليل ايام امدرمان والنوم في الحوش اللذيذ ........................

نواصل غدا مع حكاية اخرى

ملاحظات ودروس مستفادة:
- تدني مستوى الخدمات في السودان لا بنية تحتية لا خدمات كهرباء ولا لا
- فقر يطال كل فئات المجتمع ، مع كل هذا الفقر توجد فئات اخرى تعيش في عالم اخر
- تعايش سلمي واخوي بين كافة الاثنيات والعرقيات
- رغم كل شيء عاداتنا وتقاليدنا ما زالتا بخير "جارك القريب واللا ود أمك البعيد"
- الابعاد الجندرية تبدو واضحة وجلية


صفية

Safia Mohamed .... Salamat

Quote: ملاحظات ودروس مستفادة: - تدني مستوى الخدمات في السودان لا بنية تحتية لا خدمات كهرباء ولا لا - فقر يطال كل فئات المجتمع ، مع كل هذا الفقر توجد فئات اخرى تعيش في عالم اخر - تعايش سلمي واخوي بين كافة الاثنيات والعرقيات - رغم كل شيء عاداتنا وتقاليدنا ما زالتا بخير "جارك القريب واللا ود أمك البعيد" - الابعاد الجندرية تبدو واضحة وجلية

Thanks

يا دكتورة رمضان كريم

وسلام ليك ولامدرمان واهلها الطيبين


واصلي

د. صفية

أحييك والله

صورة حية للمعاناة والمكابدة

تحياتي للمناضلين الصغار في كدهم اليومي للتحصيل.

ولابد أن تتحول بيئة بلادنا الطاردة الى بيئة جاذبة

لا يكون اللوتري والجواز البريطاني بديلا لها.

د.صفية

سلام يا بت مساعد

فعلا ياهو ده السودان

بس عندك اى احساس بانو حيتغير ؟ بقصد نحو الافضل

واصلى يومياتك وو رينا نبض الشارع

لك الود

Quote: ملاحظات ودروس مستفادة: - تدني مستوى الخدمات في السودان لا بنية تحتية لا خدمات كهرباء ولا لا - فقر يطال كل فئات المجتمع ، مع كل هذا الفقر توجد فئات اخرى تعيش في عالم اخر - تعايش سلمي واخوي بين كافة الاثنيات والعرقيات - رغم كل شيء عاداتنا وتقاليدنا ما زالتا بخير "جارك القريب واللا ود أمك البعيد" - الابعاد الجندرية تبدو واضحة وجلية

صباح الخير ياصفية..

عشان الملاحظات والعبر دى والعاوزة نكت وبحث وتحليل البوست ده مفروض مايمشى الارشيف واتمنى تكونى كتبتيهو فى بوست الارشفة عشان يفضل للفترة الجاية

ورمضان كريم

Quote: Salamat

عزيزي الفحل تسلم يا سيدي من كل اذى وقبلا يسلم سودان


شكرا على نيلكم شرف اول المبتدرين بالرد وطبعا نهنئكم بنيلكم الجائزة الاولى لفوازيرنا ، الجوائز سيتم ارسالها بالبريد الالكتروني.

اشكرك ايضا على تلمسكم لمواطن الوجع فينا نحاول ان نجد حلولا من خلال الحكايا القادمة خليك معانا وما تحول الريموت.

مع خالص الود
صفية

د، صفية يا صافية
رمضان كريم
وحاتك البوست دة تقول سرقتيهو مني
رغم إنه انا لي مدة طويلة من السودان لكن كنت عايز افتح بوست للناس عشان تحكي
ما يدور هناك للناس الغلابة والمقهوربن
يا ريت بعد ما تكملي حكاياتك (وإن كنت لا أظن إنها ستكمل)
تعملي إيميل للناس عشان تنزل معاناتها

Quote: يا دكتورة رمضان كريم

ومن يحبو كلو كريم

شكراً عزيزي حيدر
وخليك معانا للمنافسة في الجوائز القادمة
وتحية خاصة جدا من امدرمان الحنينية والأصيلة
سلام

صفية

Quote: صورة حية للمعاناة والمكابدة

عزيزي اسامة
شكرا جزيلا على على المرور وفعلا هذا هو السودان معاناة مستمرة

Quote: تحياتي للمناضلين الصغار في كدهم اليومي للتحصيل.

تحاياك وصلت وتصل يوميا عبر الويرليس كونيكشن باستشعاركم لاحاسيسهم شكرا

Quote: ولابد أن تتحول بيئة بلادنا الطاردة الى بيئة جاذبة لا يكون اللوتري والجواز البريطاني بديلا لها.

حلم نسعى لتحقيقه، حقيقي غياب الكثيرين عبر الهجرة "البرين درين" احد الاسباب التي ادت الى هذا التدهور المريع في كل المناحي نتمنى سودانا جاذبا للكل "القاعدين والمافيشين".


خليك معانا عسى ان تفوزوا باحد جوائز الفوازير القيمة
سلام
صفية
خارج النص:
يعني شنو يعني ما نقدم السنة دي للوتري

عزيزتي صفية
رمضان كريم وتسلمي على فتح جزء (بسيط) من الجرح.
تعرفي الايام دي عندنا (ظاهرة) هنا في الخليج وهي انو عدد (ما قليل) من الاسر سافرو السودان بنية الاستقرار هناك وتفاجأنا برجوعهم بنهاية الاجازة الظاهر عليهم شافوا الحاجات الانتي حكيتي عنها دي. زمان الاغتراب كان لتأمين المستقبل تاني بقى للمعيشة والعلاج والتعليم والآن بقى (عند البعض) مجرد هروب من الواقع الحكيتي عنه دة.
وتسلمي

شَيْماء

Quote: صباح الخير ياصفية..

يا دكتورة صباحك كلو نور
والله الواحد كان قايل في ناس في عظمة الدكتوة بيهتمو بمحاولاتنا ونحن في مرحلة الحبو ، كان بدينا زمان حسع كان سننا.

شكرا ليك

ونزولا عن رغبتك ساطالب بتحويل البوست للفترة القادمة. وايضا لمزيد من البحث والتنقيب لإيجاد حلول لمآسينا الكثيرة.

خليك معانا ولا مرة مرة ادينا طلة

مع خالص ودي وتقديري
صفية

يا صديقتي صفية
انتي بتخوفي فينا ولا شنو؟ يعني دايرانا ما نجي السودان؟

Quote: [الابعاد الجندرية تبدو واضحة وجلية

يا صفية مالك عاوزة تلمي
علينا الجندريات .


ورمضان كريم

يا صفية مالك عاوزة تلمي علينا الجندريات × اقتباس من ابوسامر


يعنى انت ماجندرى ياصلاح؟
والقال منو الجندر ذو خاصية انثوية فقط؟
نجيب ليك الجندرية وكلامها الرصين ولا شنو يعنى؟

ورمضان كريم يا ايا سامر ياصديقى

Quote: والقال منو الجندر ذو خاصية انثوية فقط؟

عزيزتي د. اشراقة الف مرحب بيك وانتي تضيئين مرة ثالثة بوستنا المتواضع ، تعرفي والله دي مشكلة كبيرة جدا إذا كان ناس صلاح فاكرين الجندر يعني نساء بس ، يعني الناس التانيين يقولو شنو، المهم هذا يعني مزيد من الأعباء تترتب عليك وعلى كل من هو مهموم بمستقبل البشرية عموما ومستقبل سوداننا على وجوه الخصوص حيث ان الابعاد الجندرية وتقسيم العمل من أهم الاسباب التي أدت و تؤدي الى الوضع الراهن (غياب التنمية ، وقلة والوعي وضعف الانتاج وغيره من القوائم)، عليك بتوعية صلاح الاخرون.

شكرا لاهتمامكم، والله عقدتينا بكرم حضورك المشرف .
نواصل وما حنقول ليك ما تحركي الريموت لانك بريموت ومن غيرريموت احساسك كلو معانا كما هو واضح من كم ونوع المداخلات شكرا جزيلا

صفية

Quote: يا دكتورة صباحك كلو نور والله الواحد كان قايل في ناس في عظمة الدكتوة بيهتمو بمحاولاتنا ونحن في مرحلة الحبو ، كان بدينا زمان حسع كان سننا. شكرا ليك

بالله لمن رويشاتى اتنفخن بعد ماهزاهن اطرائك، يابت امى العظمة مع الناس وليهم
اها اكان بقيت عظيمة لانك جناح العظمة الفارى فوقى يحمى افكارى العظيمة من الانكسار

Quote: اها اكان بقيت عظيمة لانك جناح العظمة الفارى فوقى يحمى افكارى العظيمة من الانكسار

عزيزتي اشراقة
مرة تالتة ورابعة شكرا نقول شنو عجز لغوي ساكت كلمة نكرر فيها لو لقيتي مفردة مرادفة تفي بالغرض بالله الحقيني بيها بالمسنجر

سلام
صفية

يا صفية.. يومياتك وأسلوبك البسيط الشيق الممتع في تصوير ووصف دراما نبض الشارع
عن ما يدور في داخل مجتمعنا السوداني جعلني أتابع حكاياتك بأعجاب وزي الكأني أشاهد
الأحداث أمامي كما في الواقع.
من خلال مجريات الأحداث تبين لنا أنه ومهما تغير الزمن والحال.. وصعبت سبل المعيشة
وندرة الخدمات، إلا أن الناس على نياتها.. وما زالت تحتفظ بواحدة من أجمل الخصال،
ألا وهو تعاونها مع بعضها البعض في تقديم يد العون للجار متى ما أراد.. ومساعدته
في تخطي الصعاب بتلبية النداء عند الحاجة بكل رحابة صدر.. وهي عادة تميز مجتمعنا
عن باقي الشعوب الأخرى.

لكن ما تقولي لي يا صفية حكاية بشكل..

في إنتظار الفزورة القادمة.

حبيت أحييك يا بت المساعد ( رمضان كريم وكل سنه وإنتى طيبه ) والله يكون فى عونكم !!!!!

يا دكتورة صفية انا مشيت للسودان إجازة 21 يوم بس تصدقي فقدت الذاكرة !!! ؟؟؟

ومن يوم ما رجعت للسعودية اول حاجة عملتا قدمت للوتري يمكن الاقي فرصة تانية احسن من السودان

الكلو باعوضة وضبان وغالي غلاء مبالغة والله كنت بغير الالف ريال للسوداني وحاتك يوم واحد بس تتلحس !!

يلا بلا سودان بلا إنقاذ بلا جبهجية بلا جهاز تعذيب العاملين في الخارج .

كتبت المتألقة صفية محمد :

Quote: بين هو هم عام وهم خاص والذي لا يخرج من اطار العام ايضا

عام يتحرش بالخاص
بدقة ملاحظتها وحسها العالي وغيريتها رصدت صفية في الحلقة الأولى لمسلسها
ذي ال 30 حلقة رصدت إنفعالات الحواري وإحتداماتها وحكاياتها وهمومها ، وهي إن بدت خاصة
لكنها تهبش عمق العام فمكابدات انسان السودان لم تعد مكابدات خاصة
فالحال المائل والاحزان في كل مكان
عدسة صفية الراصدة وعينها المفتحة من ناحية
وكوم الهموم التي توفر مادة خصبة لكل فنان من ناحية أخرى
يبشر ب صفية { انور عكاشة } لو تسنى لها مبدع في قامة إسماعيل عبدالحافظ
لشهدت الدراما السودانية أعمال مجيدة تتناول الهم اليومي العام بصيغة الخاص

ومتابعين

مهندس هشام او كما يحلو لآخرين مناداتك ود المجمر

شكرا على الطلة البهية

Quote: بس عندك اى احساس بانو حيتغير ؟ بقصد نحو الافضل

والله دة غايتو تكهنات ما معروف لكن بنحلم وبنسعى والناس لو وضعته هدف اكيد يوما ما حيتحقق. طال الزمن ولا قصر.

واللله البوست نور بيك ، وخليك معانا لانه وجودك احد انواع هدايا الفوازير فما تبخل علينا بيه.

شكرا مرة تانية

صفية

Quote: والله دة غايتو تكهنات ما معروف لكن بنحلم وبنسعى والناس لو وضعته هدف اكيد يوما ما حيتحقق. طال الزمن ولا قصر.

ماتجىء ياصفية نعمل لاجل الحلم ده
عمرى كلو مؤمنة بانو مافى حاجة اسمها مستحيل ما دام الشمس بتطلع كل يوم وان توارات احيانا خلف الغيوم الكئيبة,,,
مرات عندى احلام لو قلتها بيقولوا على مجنونة، ولو عرفوا حلاوة الجنون ده هو انو بيخليك تعيشى بامل لبكرة الاجمل رغم الواقع القاسى..
حتى التكهنات دى بنحتاج نشغل عقلنا ونحولها الى فرضيات نعمل على تحقيقها... كيف؟ دى محتاجة لخطة عمل واضحة ودة محتاج لمراكز بحوث، بس القى لى قروش كتيرة ويخلوا لى ادارة السودان لمدة عامين غايتو ياصلحتوا مع الناس الزيك المليانة بالفكرة الصاح او غطست حجرو.


* فى السنتين ديل اول حاجة بعملها بعمل عاصمة السودان الجزيرة ابا؟ نبنى فيها مطار دولى ونعملها جزيرة يرتادها السواح من كل انحاء العالم... اها ماتقولى على مجنونة، يكون ده تأثير اليوم الاول فى رمضان الكريم؟

Quote: دى محتاجة لخطة عمل واضحة ودة محتاج لمراكز بحوث، بس القى لى قروش كتيرة ويخلوا لى ادارة السودان لمدة عامين غايتو ياصلحتوا مع الناس الزيك المليانة بالفكرة الصاح او غطست حجرو.

Quote: مرات عندى احلام لو قلتها بيقولوا على مجنونة، ولو عرفوا حلاوة الجنون ده هو انو بيخليك تعيشى بامل لبكرة الاجمل رغم الواقع القاسى..

عزيزيتي اشراقة اولا كل عام وانتي بخير كنت عاملاها مفاجاة لكن سبقني جني عليها وحسع دايرين نحصل السوق قبال الصباح ما يصبح ونلقى الجماعة حجزو دورهم في التهنئة.

اكيد كل الجهود متلازمة نحتاجها كما ذكرت قبلا كل في مجاله كلمة لوحة بحث فكرة، وكلنا لولا الأحلام "كان طقعنا عديل" هي ملاذنا الآمن ولو لحين.
شاكرة ليك ثقتك العالية ، وخليك معانا.
صفية

ود جبرين كيفنك لعنكن طيبين

رمضان كريم

Quote: وحاتك البوست دة تقول سرقتيهو مني

تعرف الظاهر يا د. انه في تلاقي في منحنيات لا مرئية ، فعذرا على التغول ، لكن طبعا البينا عامرة وحقي وحقك واحد. على الرغم من انه اخراجك أكيد كان حيكون أجمل على الأقل بفارق الخبرة غير حاجات تانية.

شكرا على المرور وخليك معانا طبعا رقم مثلك في عالم السرد (حوش عوض) وجوده مهم جداجدا . وما تنسى جوائزنا القيمة. لكن خايفاها تكون ملاريات ساكت الله يستر.

عزيزتي شيماء
شكرا كتير على المداخلة الحنينة هكذا احسست كامتك نابعة من الاعماق

Quote: فتح جزء (بسيط) من الجرح

.
والله هو قد يبدو بسيطا ولكنه عميق ومتشابك ويمس كل اسباب وضعنا الماساوي.

Quote: زمان الاغتراب كان لتأمين المستقبل تاني بقى للمعيشة والعلاج والتعليم والآن بقى (عند البعض) مجرد هروب من الواقع الحكيتي عنه دة.

تعرفي هو فعلا كذلك ولكننا ندعو للوقوف عليه وليس الهروب منه. نشاهد نقرا نحلل عسى ولعل نجد حلولا.

شكرا مرة تانية

ولكي ودي

صفية

صديقي العزيز صلاح
شكرا على المرور

Quote: يعني دايرانا ما نجي السودان؟

والله يا ود امي جيتكم بندورها ومشتاقين ليها ومحتاجين ليها، على الاقل الحمل لما يتوزع بكون اخف

Quote: مالك عاوزة تجيبي لينا الجندريات

دي خليتها ل د. اشراقة أها رد ليها

بالله خليك معانا امكن المرة الجاية ما تلقى جندر شايفاك خفت منه

أها نواصل حوار عن القصاص هناك في بيتك اقصد البوست تبعك

سلام

صفية

أعزائي:
صباحكم زين ومسائكم سعيد ،،،،،
اولا لكم كثير الشكر وانت تتابعون معي هذا المسلسل اليومي ومداخلات البعض منكم المتنوعة هي الحافز لاستكمال طريق بداناه الا وهو محاولة قراءة الواقع بهدف الوصول لحلول.
من غير تخصيص كل من تداخل او فكر ان يتداخل لكم الشكر الجزيل وانت تحاولون اشعال بريق الامل فينا.

حكاية الليلة هي من نبض الشارع كل ما ذكر هنا هو حقيقة وانا كنت راصدة للحوار بحكم انني وزميلتي تشاركنا التاكسي المزعوم.


يحكمنا اسلامي ....يحكمنا شيوعي أن شاء الله يحكمنا أس................زاتو دايرين خدمات ياخي دايرين خدمات

هذه العبارة اطلقها احدهم وهو في قمة ثورته وهيجانه وزعله. وذلك بعد ان قام بدفع اربعة اضعاف قيمة التاكسي من السوق العربي للشهداء( 30 الف جنيه) و30 ضعفها بقيمة الهايس و65 ضعفها بقيمة الحافلة، وذلك اثر اختفاء وسائل المواصلات العامة ما بين الخرطوم وامدرمان نتيجة لقفل كبري "الانقاذ"ا لكبري الجديد كما يحلو للغالبية ان يسموه. والكبري يا جماعة كان مقفول لانه فيه شاحنة متعطلة ولا عملت حادث ولم يتم سحبها من تمام الساعة الواحدة ظهرا وحتى تفوه هذا الرجل بهذه الجملة في تمام الساعة السادسة مساءا.
يواصل الرجل:
- يا جماعة معقولة دي بلد دي قال عاصمة قال مصفقا يديه، مواصلا، يعني عربية خسرانة في كبري دي دايرا ليها اكتر من نص ساعة وعسكري مرور عشان يشيلوها ، بالله عليك الله عاين الناس دي ماشة كيف والله لكن حكاية،
- ويرد سائق العربة انت عارف ما الناس ديل ما هاميهم شي كل زول مشى بيته نام مافي زول عنده شغلة ناس مشو كداري ماتو ولا حيو ولا جاعو دة ما موضوع بيهم ليه زول لكن تعرف المشكلة وين
- اها
- لانه الناس دي ساكتة ساكت حسع الخلق الحايمة وماشة كداري وصارة وشوشها ديل كان قلبوها مظاهرات ما كان غيروا الحكومة
- ياخي مظاهرات شنو وحركات شنو قول اتغريت الحكومة يعني حيجينا منو ما ياهو نفس الكلام نفس الوجوه نفس القصص. انا غايتو ما عندي شغلة الحكومة القاعدة دي ولا غيرها ولا ماطيرة ولا اي حاجة تجي تمسك البلدي وتعمل لينا الحاجات النحن عاوزنها.
- الحاجات العاوزنها زي شنو يعني
- يعني انا اودي اولادي المدارس ويكون في مدارس وفيها تعليم ومجاني، امشي المستشفى القى طبيب والقى علاج مجاني، اتخرجت القى شغل مناسب يوفر لي دخل مناسب اقدر اعيش بيه حياتي في الحد المعقول ، دايرة اعرس القى بيت اسكن فيه ، امرق الشارع القى شوارع مسفلتة ومواصلات متوفرة
- امشي لقضاء اي مصلحة خاصة بي القى الموظفين قاعدين راجيني ويعملوالي الخدمة اللي انا عاوزها وباسهل اسلوب
- سائق التاكسي متهكما: ياخي انت قايل روحك في الجنة يا زول ما تنسى انت في السودان الكلام القلته دة كلو بالمشقلوب.
- لكن ما في حاجة بتمنع انه يكون بالعديل.................................

يا ربي في ما يمنع؟؟؟؟؟؟؟؟؟؟؟؟؟؟؟؟؟؟؟؟؟؟؟؟السؤال مفتوح ليكم

ملاحظات ودروس مستفدة:

- ارتفاع درجة الوعي لدى المواطنين باهمية التفافهم حول حقوق الانسان ، بعيدا عن الالتفاف حول منطلق فكري أو ايدولوجي والذي قد لا يتلمسون آثاره مباشرة او آنيا.
- لفت انتباه سياسيينا للتركيز في برامجهم الانتخابية على الهموم المباشرة للمواطن ، على الاقل مرحليا.

قوية يا دكتورة!

أبو ساندرا بشرنا بأسامة أنور عكاشة سوداني.


سأطل متابعا هذا البوست.

بالنسبة للوتري قدمي ولو في طريقة اي حل فردي تاني برضو أمشي فيه طوالي.

لكن تبقى مشكلة البلد جانب مهم منها في (هجرة العقول) زي ما ذكرت سابقا.

صباح الخير ليومياتك ونبض الشارع

لحد ما اجى تانى تابعى هنا انت وزوراك وضيوفك الكرام والكريمات

أيام القيامة السبعة فى السودان

Quote: أيام القيامة السبعة فى السودان المثل القائل {حزنانة وواعية} ينطبق على حالتى، فحين زرت السودان فى الاسبوع المنصرم وبقيت فيه فقط لمدة اسبوع كنت فى قمة حزنى، ذلك الحزن الذى لايماثلة الا عظمة الأم اذ الزيارة تعلقت بمرض أمى المفاجىء ومع ذلك فقد تحركت بوصلة التفكيك والتمحيص التى لاتهدأ فى عقلى، تمنيت كثيرا ان تصيب هذا الوعى جلطة التلبد والاستكانة حتى ارتاح ولكن لانى شقية فوعى بالاشياء يتقد مرات حد الانفجار. حين بدأت الطائرة فى الهبوط بدأت الاضواء الخافتة تلوح من بعيد، كلما ارى هذه الاضواء أحس بان {الجمرة الخبيثة} مخنوقة من {زمارتها} وفى عدد ثوانى يمكن ان {تفطس}. عندما بدأت الطائرة تفارق ارض فيينا وتصعد رويدا رويدا للسماء كنت اراقب الخضرة الكاسية المدينة، خضرة تشرق القلب بفرح غريب، كل مرة اتمنى ان تكسى هذه الخضرة {بلدنا} هناك، الطائرة تهبط وخضرة المدينة التى فارقتها قبل ساعات تنزاح قليلا قليلا لتهيئنى لقفل هذا الباب لادخل من بوابة بلد البترول اللذى حول السودان بين يوم ليلة الى دولة {ثرية}. العمارات تستطيل وتقل تلك الحيشان الحنينة، لا خضرة تبهر، حتى شجر النيم نائم نومة أهل الكهف. لعنت أبليس وحادثت نفسى {خلاص بدينا نبيشة الحال}. دخلت الى صالة الوافدين وأشار لى الضابط الى صف الاجانب وقفت هناك وقلبى يقرصنى لشىء فى نفس تاريخى { سبحان ربى، انا المن كوستى، ذلك الحى الفقران فقر السنين بقيت أجنبية، أجانب هنا وهناك ايضا أجانب} غير مهم فالنفس احيانا ايضا تصبح غريبة عنى. أثناء الانتظار كنت اتسآل لماذا لايبتسمون؟ لماذا هذا العبوس؟ اسئلة فى منتهى الغباء، وحاولت ابحث عن المبررات المقنعة، ربما الحياة القاسية سلبت ضمن من سلبتهم راحة البال والابتسامة، ربما الشمس الحارقة والجرى واللهث وراء المعايش الجبارة {كشطت} من وجوههم {الطيبانة} الفتها وسماحتها. السلام {يقلبوه فى تلتلة} والروح {تناهد من صبيحة الرحمن}. فى طريقى الى المستشفى حيث ترقد أمى لاحظت امتداد المبانى، تغيرت كثير من ملامح المدينة، عمارات تنهض بلامقدمات ومساحات تتقلص خصما على الغطاء النباتى والتوازن البيئى، على جنبات الشوارع اوراق وبقايا طعام بائس لم تجد فيه الكلاب ضالتها والغنم تعبث بالاوراق فى محاولة لاكلها والثروة الحيوانية فى {كف عفريت} منذ ان استطال ذلك البرج الشاهق فى حديقة الحيوانات التى كانت ملاذا لاطفالنا وللعشاق فى زمن بعيد، مات الفيل والعشاق هجروا الديار والاطفال يحلمون {بعفراء} التى تلكف الاسرة الفقيرة مرتب شهر كامل. رغم انى كنت فى اغسطس الماضى فى السودان الا ان الاشياء هناك تتغير بسرعة خرافية، شىء واحد لم يتغير هو الفقر. أمام المستشفى جلسن نساء منهكات تبدو آثار الحزن مرسومة على جبينهن يبعن الشاى، الزلابية والقهوة سرقت بضعة سويعات لاحادثهن و {نتشايل} مع بعض الهموم، حكت لى سكينة بانها كانت تعمل فى احدى المستشفيات الخاصة وبالاصح المخصخصة، كان مرتبها فقط 120.000 الف جنية واضطرت مرة للغياب لملازمة ابنتها التى انجبت طفلها الاول قيصريا، تم خصم الثلاثة أيام من مرتبها وحين اضطرت ان تغيب للمرة الثانية تم فصلها ولم يكن هناك بد من المجازفة ببيع الشاى والقهوة. تيقنت ان الفقراء يجب ان يموتون وهذا موضوع آخر اعد خيول قلمى لتركض على فضائه. سكينة لم تتضايق من اسئلتى وسألتنى عن حالى وعيالى وحكيت لها ماجاد به القلب حين يعرف ناسه. كانت كل صباح تعد لى قهوتى {المزبوطة} وترفض ان تأخذ حقها، فقيرة وذات نفس كريمة. وعدتها بزيارة فى يوم ما فى بيتها فى اطراف المدينة حيث الفقر والظلام المحكم ليست لهم مقدرة لبيع {الجمرة الخبيثة/الكهرباء} ودموعهم المتحجرة فى مآقى امانيهم البسيطة تضىء لياليهم وتفضح دولة البترول. سكينةحكت احتياجها ل {موبايل ماركة نوكيا} ولم استطيع أن اسالها عن ضرورة ذلك وكنت احمل جهازا يقوم بدوره فى تواصلى مع العالم وحين رأته قالت لى {ده اسمه حشرة حشرتين موديل انتهى}. حسيت بانها تنوى ان تسألنى ان كنت فعلا اعيش فى فيينا ولكنها صمتت. ليس هناك من لايحمل او لاتحمل {جوالا} ولاتصمت ولا لحظة واحدة، الرنين والكلام الهامس وتقلصات الوجوه بين الانفراجة و {الصرة}، والنغمات المختلفة بدء من سودانى بريدو، ليه بنهرب من مصيرنا، الشجن، سنتر الخرطوم الخ... يستخدمه السائق وسرعته تحرق بنزين العمر دون مراعاة لارواح المواطنين، بعضهم مشغول ايضا بالرد على مكالمة او اللعب، تذكرت طفولتنا و{الاتارى} التى لايعرفها الا اطفال الاثرياء، اذن انها حالة تعويض لحرمان الطفولة. اصريت مرة ان اتحرك بالمواصلات العادية، الكمسارى ذو العشرة اعوام يستلم اجرة الرحلة بيد وبالاخرى يتحدث فى تلفونه، اكثر من سبعة فى المركبة يتحدثون وبصوت عالى جدا لان المرجح ان الصوت غير مسموع فى الجانب الآخر. الشابة التى جلست جوارها {زهجانة} للحد الذى {انصرت فيه اخلاقى وروحى معاها} كدت ان اقول لها { ياختى فكيها شوية} خفت من {شيل الحال} حيث حدث مرة فى احدى زياراتى ان ترحلت بحافلة وحين سألت الكمسارى عن سعر التذكرة وقبل ان يجيب ردت امرأة ستينة العمر ومشلخة {مطارق} وصوتها {تريان بشيل الحال} واصبت بالصمت المبين وهى تقول بعلو صوتها { مسخرة والله، شوف بالله فلهمة بنات الزمن ده مالك بتسألى من سعر المواصلات ماتراك سودانية وديامية كمان، مش انتى ركبتى من محطة الشدرات} رديتى فى سرى { عشان برد ليك، ويحلنى الله الليلة}، وتناول الحديث رجل مسن وانحاز لصفى حين قال { ياولية الزولة دى اظنها عايشة برة وبتجى اجازات ماتظلميها} و{لفحت } الحديث أخرى {تراها دمها رايق}. لا ادرى الى متى استمر النقاش حول سؤالى ولكنى غادرت الحافلة دون ان اعرف السعر الحقيقى للتذكرة. تذكرت هذه الحكاية والشابة تنوى ان ترمى قشر التسالى الذى أكلتة بشهية من يأكل وجبة فراخ او لحم ضان، رمته من النافذة، هكذا ببساطة، كدت ان اقول لها ان حماية البيئة ايضا مسئولية الافراد، فكرت اكثر من مرة قبل ان ادخل معها فى حوار حزر قلت لها ان مافعلتة {يؤذى المشاعر} نظرت لى ولسان حالها يقول {بالله لفى كده، مشاعر شنو كمان} فوجئت بها وهى تصقعنى بكلمتين انجليزتين من نوع {الايشن} وردها كان ان {البروتكشن} للبيئة لاتؤثر عليه قشرات التسالى التى رمتها بالشباك دون أن تنتبه ان {حباية} واحدة تضل طريقها الى عين راكب آخر كافية الى تصيب بالاذى. العولمة وسياسة الانفتاح، فى الشارع العام وفى ساعات قيلولة الاوجاع والاحزان البشرية يتراص اطفال فى اعمار تتراوح بين الثامنة والعاشرة يبيعون اى شىء بدء من مناديل الورق، المفارم، المفارش ذات النقشات الصينية، المقصات، الساعات، الكباباى، ملحاحون لدرجة يمكن ان تغيير كل الانظمة الفاسدة ان وجدوا التوجيه المعارض المؤسس. اكثر ما احزننى بنت صغيرة لايتجاوز عمرها اربعة عشرة عاما، نحيفة كفروع الشجر العطشان، ملابسها مهترئية تحمل لفة فيها مولودا غضا عمره لايتجاوز بضعة اشهر، كان ذلك امام احدى المطاعم التى تتراص ومنتشرة فى كل مكان، مطاعم شامية، صينية، مخابز تركية، المانية .... الخ. استفزنى لدرجة البكاء طفولتها الضائعة، قال مرافقى {دى مافيا بتاعة شحادين} وهذا التبرير كان اشد قسوة ، ليته صمت فقد كان ظنى الأول ارحم كثيرا رغم قسوته. كانت برفقتها طفلة أخرى تحمل جهاز راديو وتعبث به وقد نجحت فى ان يعلو صوت {هنا ام درمان جمهورية السودان {اللانسانية} أكملت الجملة خطواتها التائهة. ترحلت ايضا مرة بحافلة بشارع العمارات وفى لمحة بصر {نطت} عربة بوكس {الترتوار} وانحرفت الى الشارع الموازى، دخلت فى عربة التى دخلت بدورها فى شجرة، خلت نفسى للحظة أشاهد فى فلم {كابوى}. دهشت حين مال سائق الحافلة على جانب الشارع ومد رأسه ليرى ماحدث ونتيجة للجموع التى اتت من كل صوب اوقف العربة ونزل ونزل معه بعض الركاب وشابة ثلاثنية تقول {ده شمار مابتفوت}، كنت مهتمة بان اسمع صفارة عربة النجدة والاسعاف ونتيجة {للشمارات} وتراص عشرات العربات لذات السبب اضطرينا الانتظار ساعة كاملة لحين وجدنا مخرجا وحتى ذلك الحين لم تأتى النجدة ولا الاسعاف رغم ان هناك طفلة مصابة اصابة خطرة وتنزف بغزارة قالت محدثتى، تيقنت ان أرخص مافى السودان هم فقرائه. من زمن بعيد خطيت مخطوطة عن { أكاديميات ومجتمع} باعتبارى انتمى لهذه الشريحة، بعد زيارتى الأخيرة للسودان قررت ان أنفض عنها غبار التكاسل واواصل فيها الحفر، كنت مؤمنة واصبحت اليوم أكثر ايمانا بالفرضية التى مفادها ان الفجوة بين الاكاديمين/ت والمجتمع عميقة جدا، شهادات نحملها وبعضنا {يتفلقص} ويبنى له موطنا من العاج يفصله عن مجتمعه، فماقيمة العلم والشهادات ان لم توظف لخدمة الانسان وبالطريقة التى تلامس وجدانه. تذكرت كل ذلك وطبيبة يبدو انها خريجة جديدة لانها صغيرة السن، كنت لتوى افتح باب الغرفة التى ترقد فى أمى ووجدتها تحادث بنت خالتى و {تحشر} كلمات ومصطلحات انجليزية فى حديثها حول التغذية التى تعطى لامى عن طريق جهاز مركب فى أنفها، سمعتها تقول لها عن كيفية استخدام { الفيتينق}، امتلكنى الغيظ اذ ان بنت خالتى لاتعرف عن اللغة الانجليزية شئيا ولم استطيع الصمت هذه المرة، قلت لها {الفيتينق ده اسمه بالسودانى الاكل} نظرت لى نظرة لاتخلو من غيظ ايضا ولم تستطيع ان تبرر ووجدت ضآلتى فى الحوار معها وهى {مخلوعة من بجاحتى} كيف وهى {الدكتوره}، اثناء حديثى معها جاءنا زائرا وحيانى بلقبى الأكاديمى {اوه دكتورة حمد الله على السلامة متين الجية} فجأة جادت الشابة بالكلام { انت طبيبة؟} قلت لها {لا انا بى اتش دى هولدر} وذادت دهشتها حين عرفت ان دراستى انجزتها فى علوم {النقة} اى فى الصحافة والعلوم السياسية وكلاهما لا يؤتى ثماره فى بلد مازالت تصادر فيه الكلمة و {هواء الله}. يبدو ان البنية الدكتوره سردت لزملائها وزميلاتها بانى {دكتورة} وتغيير التعامل من بعضهم وبعضهن فاصبحت التحية لطيفة لا لشىء الا لورقه اكاديمية ما فصلتها يوما عن انسانيتى ولاجلها انجزتها، لم استطيع بالطبع التعامل بعدها لانى احب ان يعاملنى الآخرين لاجل انسانى، قالت صديقتى { يازولة البلد بقت بريستيج}. ربما تناست ان {بريستيجى فى الدنيا دى } هم الفقراء اللذين أنتمى لهم ولقلوبهم الطيبة. لفت انتباهتى ايضا لون بشرة {البنات} يبدو جليا استخدام الكريمات. فى دكان فى الديم يوجد فيه كل شىء بدء من تركيب العطور، البهارات، الموبايلات ونغماتها المختلفه وفقا لحالة القلب، صبغة الشعر وانتهاء بالكريمات التى تباع بالمعلقة، كل هذه الصفوف تنتظر دورها فى المقسوم من الملاعق وفقا للحالة المادية. قلت لأختى {منو القال اللون الفاتح هو الأحلى؟} فى تلك الاثناء مرت شابة اصابنى لون بشرتها بالفرح، حسيت ان الابنوس الناعم يكسينى. فكرت للحظة ان تسارع الملاحظات بالامكان توسيعها لتصير كل ملاحظة كتابا بذاته. سألتنى قريبتنا عن {مشاط شعرى ومن التى مشطته لانه يبدو متناسقا على حد قولها} لم اقل لها الحقيقة بانى التى مشطته وانها لو دققت قليلا لاكتشفت الضفائر {المكعوجة} ولكنى ولشىء فى نفسى قلت لها {مشطتنى بت خالتى النيجيرية} فتحت قريبتى فمهما بدهشة وهى تقول {سجمى كمان عندنا عرق؟}، كنت أعرف انها ستقول ذلك خاصة وان بنت الجيران التى دخلت لتوها الجامعة علقت على {الغويشة الجلدية السوداء} التى ارتديتها فى معصمى {انتى جنيتى... شنو حركات الجانقى اللابساه دى؟}. { شيل الحال} والعين التى تفحصك وتشرحك بمشارطها قد طالتنى ايضا، {مالك جاية ضعفانة كدة؟} وقبل ان أجيب {الشيبات الظهرن ديل مالك ماكان تصبغيهن؟} والمدهش ان المشارط تتناولتنى بزوايا مختلفة، قالت جارتنا التى جاءت من كوستى لزيارة أمى { الدور ده صحتك احسن من جيتك الفاتت لكن لونك مالو غمض كده؟ يابتى مسحيهو بديانا كان يلمع شوية} قبل ان افكر فى الرد تأتى الاسئلة متلاحقة { أها عيالك ماشحموا شويه؟ انتى ماتجىء راجعة خلى العيال ديل يعرفو العربى والدين} وهناك نوع من الأسئلة التى تغظينى حد الموت من نوع { ماعملتى ليك دهب؟ مااشتريتى ليك بيت؟}. لامست حلمى بالعودة التى نويتها من أول سنه غربة ومازلت أحلم واحزم كل ليلة {هديماتى} التى طالها ايضا النقد، {حسع دى هدوم تلبسيها؟} المدهش فى الامر انى عدت فقط بلبسة واحدة هى التى كنت البسها فى طريق عودتى لفيينا حيث تم تجريدى من كل اشيائى واحتفظت باصرار { بغويشة الجانقى فى معصمى} والتى علقت عليها شابة التقيتها صدفة ودهشت وهى تقول لى {انتى انيقة والفى يدك دى لو خليتيها لى بيكون كويس؟} وعدتها ان ارسل لها كميات وبالالوان وبالفعل اول شىء فعلته ان اشتريت حتى الآن اثنين بالاسود والبنى وحافزى ان ازيد عدد اللأتى يعدن الى الجزور. فى حى المعمورة التى أجرنا فيها {شقة} ارضية لامى قبل ان تسفيرها الى القاهرة للعلاج اكتشفت أختى ان الجانب الآخر يسكنه رجال من الوحده الافريقية، سمعت جارتنا هذا الحكى وقالت {عاد اعملن حسابكن يقوموا العبّادة ديل عليكن} كانوا مهذبين جدا وقاموا بتحيتنا كلما وقعت عيونهم علينا وخلق بعضهم علاقة مع أخى الصغير الذى حادثهم بالعربى وحادثوه بالانجليزى ومع ذلك فهموا بعض لان اللغة المشتركة كانت لغة الانسانية. الغريب ان لا احد يمكن ملاحظة ان هؤلاء الوافدين من بلاد افريقية مختلفة يختلفون عن غيرهم من السودانيين. مازال بعضنا يغرق فى الوهم العظيم { بدمنا النقى وعرقنا المحصن} جال فى خاطرى سؤال المصرية التى سألتنا له فى يوم بعيد وكنت برفقة سودانية كانت دائما ماتعلق حين ترى بعض الأفارقه فى احدى شوارع فيينا المرتبة { والله الافارقة ديل بقوا كتار خلاص، كرهونا ذاتو البلد} وكنت ارد وهى تغتاظ منى { انتى قايلاه نفسك مفروزه منهم، تعالى اسألى اى نمساوية او نمساوى ممكن جدا يقول لك انك من مالى ولا الكمرون وبعدين انتى قايله دى الخرطوم؟}. وقبل ان ينفجر غيظها سألتنا مهاجرة مصرية {بتتكلموا عربى كويس فين اتعلمتوا العربى؟} وفجرت مرافقتى غيظها عليها بالرد الذى فجرنى بالضحك { اتعلمناه من افلام محمود يسن وفاتن حمامة} ولم انتبه والضحك {يشرطنى} ان المصرية تعتزر وتقسم بالنيل ابينا وحلايب أمنا. وأنا فى الطائرة خطيت خطوطى العريضه للنحت فى موضوعين يرتبطان ارتباطا لصيقا ببعضهما {العنصرية} و {نحن والآخر}. تذكرت عفيف اسماعيل الذى هاتفنى قبل سفرى للسودان وهو يحرضنى لكتابة مشاعرى وملاحظاتى وقد ظل يفعل منذ ان فرهد وعى بالاشياء التى حولى وتذكرت تخوفه بانى اذا استمريت فى الكتابة هكذا ساتسبب فى ازمة ورقية، اما ياصديقى والورق صار اليوم ابن العولمة وتبخر فى الفضاء {يعنى كلامى شايلاه الهواء} تماما كااحلام الفقراء. انتهت الأيام السبعة والقيامة التى قامت منذ ان خلق الله السودان. حين ودعتنى أختى وانا أسالها ان عن {رقم القيد} وكانت مغتاظة منى { قيد شنو انتى كمان، عندنا قيد واحد، ماتتفلهمى علينا} وكظمت الضحك والغيظ وكان على ان أطوى تجربتى قرابة الخمسة عشر عاما فى بلد يختلف فى كل شىء وان اخرج حياتى من النظام الاجتماعى للنمسا التى كل شىء فيها مرتبا، تذكرت بيتنا فى فيينا الذى تحتفل به بلدية المدينة كل عام باعتباره اول بيوت الدولة التى تم بنائها بعد الحرب العالمية الاولى وظل صامداا مثله مثل بيوت عتيقة بنيت فى القرن السادس عشر، النمسا التى دمرتها الحربين العالمتين وعاث هتلر فيها دمارا نهضت بعزيمة أهلها وبالمهاجرين اللذين بنوها وقبل ذلك بالخطط الواضحة. أخذت مكانى فى انتظار الزمن المحدد، والدقائق سلحفائية، بعد ساعتين رأيت الصفوف، سألت أحد الموظفين ما اذا كانت احدى الصفوف للطائرة التركية، أشار بيده وهمهم بكلمات لم افهمها جيدا وتبعت اشارة اصبعه، كان فعلا ما توقعت، وقفت فى الصف الى ان جاء دورى وقلت للمسئول ماحسيت بانى يجب ان يقال بانه لم يتم التنبيه بمكبر الصوت كما يحدث دائما فى المطارات الدولية واردفت بانى اقول ذلك حرصا على البلد التى أنجبتنى، نظر الى نظرة لاتخلو من الغيظ وهو يقول {نحنا حريصين وقد تم التنبيه بس انتى ماسمعتى} قبل ان ارد جاء صوت رجل فى سن أبى من خلفى {لا ابدا ماسمعنا لانو ماحصل}، هزيت رأسى وبى مابى من حسرة وامامى كم هائل من السنوات الضوئية لنصل مصاف امانينا بان يكون مطار الخرطوم مثل مطار فرانكفورت ولا فيينا {انشاءالله مطار تركيا ولا الاردن}، حيث اهتمت خاصة الدول الاولى بمواطنيها وموظفيهيا ووفرت لهم سبل الراحة ربما حين يأتى صغارنا بعد عشرات السنين الى بلاد ذويهم للبحث عن الجزور يستقبلون بالابتسامة ويفسحون لهم الطريق ممهدا لبلاد تحترم انسانية مواطنيها. لحين ذلك يبقى الناس { وسواس المحبة الساكنة روحى}. فييينا فى يوم تقمصتنى فيه الامانى ان ارى الفقراء ينهضون كالطوفان.... إشراقه مصطفى حامد *نقلا عن سودنايل بتاريخ 18 مايو 2007

يا ممكونة
كل سنة وانتى طيبة ورمضان كريم
زمااااااااااااان فى السودان كان فى وزارة اسمها الاشغال
دى مهمتا قبل الخريف بتفتح الجداول والخيران
الناس كانت بتفتح السباليق فى البيوت
البيتو منخفض بردمو عشان الافات حقت الخريف
اها وزارة الاشغال بقت مافى
والخريطة بتاعةالمدينة بقت مجوبكة
وحقيقة ما المدينة (العاصمة ) كل السودان
بقت المدن ملخبطة مافى بنية اساسية
يعنى مافى تخطيط
كل المدن بقت عشوائية
الكان مقرر لعشرة بقى لمليون وهكذا
عشان كده اقل مطرة بتفضح كل المقولات عن المدينة وتخطيطا الاصلا معمول من ايام الحكم الانجليزى
وزى ماقال اخونا امجد ابراهيم محتاجين لمدينة جديدة هو سماها عاصمة ونحنا بنسميها سودان كامل
لانه المشهد الحكيتى عنه دا فى اى مدينة حايم وقاعد
من اقصى الى ادنى وشفت مدن زى كسلا فضيحة كبيرة للدولة والابيض وكل يوم بتسمعى عن مدن محاصرة بالمياه جراء الفيضان
طبعا بنحلم وخلينا نحلم بوطن معافى من الملاريا والازمات الصحية الماعندها حد وال........ عيييييييييك
قلتى لى فى ناس بتجيهم الحافلة ؟
اسالى عبد الباقى شحتو بصل لمسكنه كيف ؟
تعرفى مافى عربات ولا اى ترتارة بتمر (كارو بس )
واسالى ناس الشقلة بعد تنزل نقطة مطرة مواصلات كيف ؟
وناس امبدة ؟والقائمة تطول
اقول ليك حزينة جدا واكتر من حزينة
وكل سنه وانتى والوطن بخير

Quote: يا ممكونة

سلمتنا

انتى قاصدة ممكونة ست الاسم
ولا قاصدة انو صفيه ممكونة بيوميات المعاناة ونبض الشارع؟

كدى قولى لى اظنى عطشانة

وتصومى وتفطرى على خير

Quote: لحد ما اجى تانى تابعى هنا انت وزوراك وضيوفك الكرام والكريمات

ترانا قاعدين وراجين بالله كان عندك مشكلةاو دايرة مساعدة في عمل الاجراءات النهائية للاحتفال بعيد ميلادك نحن قاعدين بس ادينا خبر نجيك هوا.................. بس مسكال او اس ام اس.

سلام
ونشوفك بعد عيد الميلاد ولازم صورة
وكل سنة وانتي طيبة مقدما.

صفية

كتب العزيز / ابومهيار :

Quote: قوية يا دكتورة! أبو ساندرا بشرنا بأسامة أنور عكاشة سوداني.

ومستعد {أراهن }






بعيوني المطششة
فهل تقبل الرهان يا أسامة؟

والله يا صفية ما عارفة أقول ليك شنو
قريت الحكاية وبس مديت يدي وإتمحنت

نتابع في حتى،، هذه اللحظة
فلم نقوى على الكلام

ودي
غادة

Quote: ملاحظات ودروس مستفدة: - ارتفاع درجة الوعي لدى المواطنين باهمية التفافهم حول حقوق الانسان ، بعيدا عن الالتفاف حول منطلق فكري أو ايدولوجي والذي قد لا يتلمسون آثاره مباشرة او آنيا. - لفت انتباه سياسيينا للتركيز في برامجهم الانتخابية على الهموم المباشرة للمواطن ، على الاقل مرحليا.

والله يابت مساعد برلومة بسنونك طبعا برلمة بورد..... في الدنيا الكبيرة دي انتي استاذتنا

Quote: يومياتك وأسلوبك البسيط الشيق الممتع في تصوير ووصف دراما نبض الشارع

الأخ العزيز عزيز،،
سعدت كثيرا بمداخلتك بما حوت من تشريح وتحليل ومااسعدني عمق تحليلك وتركيزك على الاسلوب حيث تبدو مداخلتك متميزة بتناولها لهذا المنحى فلك الشكر واهو نحن بنتعلم لسع برالمة زي ما قال بهاء.

شكرا كثيرا وخليك معانا يبدو انك حتكون من أصحاب الجوائز الخاصة بتناولك الدقيق لجزئية لم يتطرق لها الآخرون ليس اقلالا لما كتبوا بل تمايزا لما كتبت. ايضا تعليقاتك تبدو ذات اهمية بالنسبة للمقدرة على الاستمرار.

شكرا مرة اخرى اخي

خليك معانا


صفية.

Quote: حبيت أحييك يا بت المساعد ( رمضان كريم وكل سنه وإنتى طيبه ) والله يكون فى عونكم !!!!!

أستاذنا بشير
تحية طيبة ورمضان كريم وربنا يكون في عونا ، ودعمكم ولو معنويا
تسلم اخي
وشكرا على المرور
خليك معانا
صفية -
المديرة كما يحلو لك ان تناديني

Quote: ومن يوم ما رجعت للسعودية اول حاجة عملتا قدمت للوتري يمكن الاقي فرصة تانية احسن من السودان

اخوي هاشم ازيك ، والله ما بنكضب عليك كلنا اللوتري ساكنها ، لكن برضو جوة ولا برة السودان همنا الأول والأخير ، والبكاء قالوا ما بحرروه الا اسياده والبلد دي حقتنا.
طبعا معاك حق تزعل وتحرد وتسافر لكن بيني بينك ما بتكون مشتاق للسودان ولناسه وللحر احيانا.
صدقني أنا مرات كتيرة لما كنت غايبة من السودان حتى الحاجات البايخة جدا ومواصلات مافي كنت بحن ليها كتييير، المهم نديك فرصة تراجع نفسك وكان وقع اللوتري حتسافر وبرضوالسودان وهمومو وراك وراك وخليك معانا عشان السودان امكن نلقى حل
سلام( وما تصعبا ) بما انك جاي من السودان جديد اكيد فهمتها دي

صفية

أعزائي صباحكم سعيد مسائكم زين.
حكاية اليوم حتتحدث عن موضوع خاص جدا ولكنه لا يخرج من الاطار العام ايضا. ولكن قبل أن ابدا اود ان شكر كل المتداخلين واحب ان انوه ان حرف د. الذي يسبق اسمي هو له علاقة بالطب البيطري وليس ال بي اتش دي ، الأمانة العلمية تستوجب ذلك على راي صديقتي دولت ، لسع باقي 3 سنين على ما يكون حقيقي .

حكاية اليوم والتي اخترت لها اسم ( أنا والحجاب) تبدأ وانا طفلة في الرابعة أو الخامسة من عمري لا أذكر تحديدا ولكن "قبال ما اخش" المدرسة:

المرة الاولى:
الوقت موعد صلاة العصر
يستعد ابي للصلاة
- اقول له: يا ابوي انا دايرة اصلي معاك
- طيب اتوضيتي
- اي مش يعني غسلت يدينd وكرعيني وراسي
- ايوا لكن كل واحدة 3 مرات غير الراس مرة واحدة
- هو ليه 3 مرات
- عشان يكون نضيف
- كويس
بدا ابي يستعد للصلاة ووقفت انا بجانبه
- اختي من بعيد صائحة: لا انتي اقيفي بورا
- ليه
- كدة
- ورد ابي عشان انا كبير وانتي صغيرة
مرة اخرى اختي انتي ما مغطية راسك
- ليه
- لازم تلبسي طرحة
- وليه ابوي ما مغطي راسه
- يا بت كدة غلط محاولة تغطية راسي
- أنا غايتو ما بغطي راسي لو ابوي ما غطا راسه
ابي مرة اخرى يتدخل خليها بكرة تكبر وتعرف
لك الرحمة ابي وانت تغرس في نفوسنا اهمية احترام راي الاخرون ولو كانو بصغروننا سننا ومعرفة ، سلام عليك وانت ارسيت في عقولنا مبادئ قبول الراي والراي الآخر سلام عليك وانت من كان يستحثنا ويدعونا للنهل من دروب العلم والمعرفة ألف رحمة ومغفرة . ونقول لك نحن على الدرب سائورن (العلم والصوفية) صنوان لا يفترقان.

المرة الثانية
وانا عمري 8 سنوات
احضر لنا ابي من الحج طرح مزركشة بالوان جميلة وارتيدناها فرحين وصادف ان اليوم جمعة وذهبنا بيت جدي ، وهناك فوجئنا بخالي يثور غضبا لمجرد رؤيتنا نرتدي هذه الطرح: يا بت انتي دايرة تقفلي عقلك. وكلي استفاهامات حول العلاقة بين لبس الطرحة وقفيل العقول ولكني رضخت معقول البروفيسور يقول كلام خطأ ما ممكن.
مؤخرا فهمت مغزى حديثك خالي حول أهمية تركيز الانسان على تغذية عقله بالمعرفة ، والبعد عن التركيز على الجسد سواء( بكشفه او تغطيته) الصراع بين المحسوس واللامحسوس في الانسان.

المرة الثالثة:
وانا في سكن الطالبات في مدينة الزقازيق وزميلتي في الغرفة كانت من ناس الاتجاه الاسلامي وكذا مرة فتحت معي الموضوع بلطف وانا لازمة الصمت في عقلي هذه الجملة البسيطة حول حول العلاقة الطردية بين لبس الحجاب وانغلاق الذهون، فكنت اهرب من النقاش ليس ضعفا وانما احتراما للراي الاخر.
المرة الرابعة:
بعد ان التحقت بالعمل في احدى الوزارات في بداية عهد الانقاذ
الجماعة جوا قالوا لي المدير قال دايرك ، مدير شنو الدايرني انا وانا بااذات ليه
- امكن الجماعة دايرين يستقطبوك
- اسمع من "بؤكم" ربنا وانا لاقية دايرني ابقى مقطعة زيكم كدي النمشي نشوف لكن موضوع استقطاب دة ما وارد طالما ما انا مبارياكم الله يستر الحكاية ممكن يكون فيها رفد
وذهبت لمكتب المدير وبعد حديث عام عن بعض متعلقات العمل
المدير :يا دكتورة انتي مفروض تلبسي زي اسلامي
- طيب ممكن اتكلم ولا امر
- لاما امر ممكن تتكلمي
- مستعجل ولا اتكلم براحتي
- اخدي راحتك
- من غير مقاطعة
- من غير مقاطعة
- طيب انا في الموضوع حق الحجاب حا اتكلم معاك في 3 نقاط اما خلاصة حديثي فهي النقطة الرابعة:
اولا النقطة الاولى: مصطلح زي اسلامي هو موضع جدل كتير وفي تيارات اسلامية متعددة بتتحدث عن هذا الموضوع يعني للآن لا يوجد نموذج موحد باعتباره المثالي من الاكثر تحفظا وللاكثر ليبرالية ، وذكرت راي خالي كمثال.
النقطة الثانية:
أاتي هذه الوزارة بصفتي طبيبة فقط ولا اسمح لايا كان ان يناقش معي مواضيع خارج اطار عملي: حضوري غيابي وكفاءة أدائي ا ما غير ذلك فهو يظل في اطار الخاص اللي غير مسموح تداوله.
النقطة الثالثة:
لها علاقة بالمرتب يعني باختصار شديد وبعملية حسابية بسيطة مرتبي دة انا لو مشيت بيه بالمواصلات العامة بكفيني امشي واجي لمدة 15 يوم واذا فيها شاي 10 يوم واذا فيها شاي وفطور 5 يوم. طيب هنا حيجي سؤال انا بجي الشغل ليه الاجابة مزاج تقضية وقت اكتساب خبرة اي حاجة يعني الشغل حقكم دة انا بصرف عليه كريمات وريحة وملابس واحذية وشغالة في البيت باختصار لو قعدتو تقولول لي كاني وماني القصة اصلها خسرانة خسرانة ما لازمنا شغل نصرف عليه.

أما نقطتي الأخيرة
فهي لو سمحت يا دكتور ممكن توقع لي على طلب الأجازة بدون مرتب عشان أنا مسافرة برة السودان
وتشكراتي.

علق المدير مبتسما:
- مشاكسة ربنا يهديك
- ربنا يهدي الجميع
وخرجت بلا عودة للوزارة.

Issues Raised &Lessons Learned:
The importance of conceptualization, especially during dialogue
Way of socialization determines someone visions
Level of knowledge and awareness on your rights determines the way you fight to obtain them.
Knowledge is important in determining power relations.

Quote: يبشر ب صفية { انور عكاشة } لو تسنى لها مبدع في قامة إسماعيل عبدالحافظ

العزيز أبو ساندرا،

I cant beleive is it me ?
Would you please minimze this because i dont deserve it really i am just lerning from you and others.
ابو ساندرا صعبتها شديد غايتو انا عملت العلي وقلت ما بستحق كل هذا الاطراء منكم يعني كان حصل حاجة كدة ولا كدة براك تشيل الشيلة انا بريت روحي.
سعيدة جدا حتى بمجرد توقيع حضورك فها انت تمطرني مدحا ليست لي.

اها من دربي دة ماشة اقرا فرنسي او اي لغة تانية تعرف ليه لانو حاولنا نعبر عربي ما عرفنا قلبنا خواجاتي لقينا لسع المعاني كتييرة والحروف محدودة ، اها من هنا لحد ما نتعلم لغة جديدة بحروف تعبر عن امتناننا لمداخلتك "الانيقة" كما يحلو لك استخدام هذا اللفظ نكتفي بها القدر.
خليك معانا عشان ما تخسر الرهان اقصد كمستشار.
لك ودي
صفية

تواضعت دكتورة صفية :

Quote: سعيدة جدا حتى بمجرد توقيع حضورك فها انت تمطرني مدحا ليست لي.

لست بمادح
وإنما هي الحقيقة الساطعة
أو الحقائق المجردة
إنجازاتك تشهد لك
ونظرتك الثاقبة
وفكرك ووعيك يا ريس

عزيزتي سلمى
شكرا كثير والف مرحب بيك في دارنا ومبروك الخمسين وعقبال الف وكل سنة وانتي طيبة في بيتنا طبعا بتختلف لما تكون هناك.

Quote: اقول ليك حزينة جدا واكتر من حزينة وكل سنه وانتى والوطن بخير

أنا لمحزونون جميعا لكن اهلنا في المثل قالوا عين بتبكي وعين تفشت (يعني تشوف الجاء عزا من الما جاء عزا ) اها ياها دي حالتنا حزينين وبنفتش لمخارج.
خليك معانا عشان نفتش سوا امكن نلقى الابرة في كوم القش دة.
وشكرا
صفية

د . صفيه

لكي منا كل الود والتقدير

Quote: انوه ان حرف د. الذي يسبق اسمي هو له علاقة بالطب البيطري وليس ال بي اتش دي ، الأمانة العلمية تستوجب ذلك على راي صديقتي دولت ، لسع باقي 3 سنين على ما يكون حقيقي .

من ألان نبارك ال بي اتش دي ..

من يملك كل هذه القدرة علي تنزيل الواقع بالصورة فنيه المبهرة تبقي الشهادة مسألة وقت

في انتظار المزيد ونحنا متابعين ومعرفة المشكله نصف الطريق للحل ..

الفاضلة العزيز صفية..

رمضان كريم وكل عام وأنت بخير..

شكرا كثيرا لهذه الزاوية المريحة والممتعة..

أعزائي صباحكم سعيد مسائكم زين.
دي طبعا لانه في ناس حسع عندهم صباح وناس مساء كل زول يشيل المواعيد المناسبة وبعد التحية نهني الدكتورة اشراقة بمناسبة عيد ميلادها اليوم .
حكاية اليوم حتتحدث عن Rule of the law حتتناول حادثتين من نبض الشارع الأولى حدثت في عام 2003 والثانية في عام 2007.
الحادثة الأولى2003:
الساعة الثالثة والنصف بعد الظهر والدنيا حر شديد طلعت من المكتب في سوبا في طريقي لمنزلنا في امدرمان بيني وبين نفسي قلت ما اضرب ل ....ود خالتي حسع تلقيه حايم بهنا ما دي اراضيه ، وفعلا حصل .
• ازيك يا ......
• اهلا بالدكتورة
• حايم في حلتنا
• آيي
• طيب نرجع معاك
• لكن بالاول عندي غشوة لناس المرور
• ماقي مشكلة مش بعد داك حتوصلني البيت
• آيي
• اوكي اتفقنا.
وفي طريق العودة بالقرب من كبري امدرمان القديم (كبري النيل الابيض) صاحبنا عمل مخالفة وجاه ليك عسكري المرور.
• با زول انت ما عارف ان دي مخالفة
• آي عارف
• طيب تدفع الغرامة
• يا زول ما بدفع
• ما على كيفيك انت غلطت وتتحمل نتيجة غلطتك
• يا زول انت ما عارف بتتكلم مع منو
• ان شء الله تكون عمر البشير ذاتو زول غلط يدفع غرامة ما فيش حد اعلى من القانون
• يا زول كلامك دة بتاباه
• المهم تدفع
ودفع ابن خالتي الغرامة وهو يبرطم والله الزول دة كان ما وريته هو قايلنا نحن في البلد دي هينين اليستنى لي.
بعد يومين اتصل بي ابن خالتي متفاخرا،
• زولك داك ما ادبته ليك
• اها عملت ليه شنو
• اشتكيته ليك ناس المرور ديل كلهم ما اصحابي
• تعرفي ادوه ليك جزاء خصمو منو راتب عشرة يوم وكمان خصموا منه الغرامة الدفعتها ورجعوها لي
• ياخي حرام عليك انت غلطت وهو كان بينفذ في القانون
• انت عشان ما عارفة البلد دي ماشة كيف نحن والله كان ما عملنا كدة ما نعرف ناكل عيش بلا عساكر بلا قرف.

الحادثة الثانية 2007:اتصلت بي صديقتي الساعة الثامنة والنصف صباحا:
• صفية ازيك
• اهلا
• الحقيني
• مالك
• ناس المرور
• شلاقتك مالك عملتي شنو
• ما شايلة رخصة
• والمطلوب
• مفروض ادفع غرامة وما عندي قروش
• بت وزير وما عندها قروش غرامة دي غريبة شوية
• وحاتك ما عندي
• طيب ما تقولي ليهم انتي منو
• لا ما انا غلطت وما في زول اعلى من القانون
• والله دي غريبة شوية لكن يسلم " تمك" تعرفي لو ما قلتي كدة زاتك ما بتكوني صاحبتي الحمد لله البلد بخيرها اريت كل الوزراء بحال ابوك ،لكن غايتو ابوك دة حالة شاذة لحسع مسكنكم في بيتكم داك ولا جير ما ضربوا.
• طيب خلاص انتي وين
• انا جنب الهيلتون
• خلاص جاياك دايرة كم
• 30 الف
وذهبت لموقع الحادث وا ذا بي افاجا لا احد هناك لا ناس مرور و لاعربات محجوزة ولا بت الوزير.طوالي قمت اتصلت بيها.
• وين انتي انا جيت ما لقيتكم
• ما شفتي الحصل
• اها الحصل شنو
• تعرفي في اثناء ما نحن واقفين جاء ليك زول سايق عربية فارهة ونضيف وقيافة
• أها
• الزول كان عايز يمشي بشارع النيل قام عسكري المرور صفرليه الزول وقف طوالي ورجع بتاع المرور قال ليه ياخي ممنوع تمشي بهنا
• خلاص علم .
• لكن تدقع غرامة
• يا زول انت ما قلت ممنوع ونحن جينا الغلط وين هنا وادفع غرامة ليه وريني القانون البقول كدة
وتدخل الضابط :
• ياخي ما في قانون مزاج كدة بس تدفع الغرامة
• يا زول مزاج شنو معقول حسع انت ما بتخجل من روحك ضابط كبير كدة وتقول لي مزاج
• آي مزاج
• كويس هاك دي الغرامة ومعاها الزول طلع بطاقتة قال ليه معاك وكيل نيابة .......... تجيني حسع انت وعساكرك ديل عشان نشوف حكاية المزاج دة.
• حاضر سعادتك بس انت ما كنت تقول بالاول
بعد ما فات وكيل النيابة تواصل صديقتي الجماعة ضربو الجرسة ياخي انت ما تتحرى من شخصية الزول غايتو انا ما بعرف لكن الموضوع لابسك لابسك
العسكري حاضر سعادتك
نقيف لحد هنا.
• تحليل:
• ما قبل وبعد اتفاقية السلام يوجد تغيير ملحوظ في نبض الشارع وهو علامة جيدة وفيها دروس مستفادة التغيير الايجابي ات ات وهي مسالة وقت.
• Level of knowledge and awareness on the law, among People determines their attitude and practice.
• Still there are spotlights regardless the blackening Image
• Powerless people are Victims all through

Quote: ومستعد {أراهن } بعيوني المطششة

يسلموا عيونك من الطشاش عزيزي ابو ساندرا.
كن مستعدا في حالة عدم فوزك بالرهان

تسلم وشكرا على المرور والحضور والكشف والدفع والرفع شيل كل كلمة من ديل ختها في سياقها.
صفية

Quote: نتابع في حتى،، هذه اللحظة فلم نقوى على الكلام

عزيزتي غادة
شِكرا على المرور ، انا قلت ااجل الرد شوية تكون حالة الاندهاش خفت ، لاننا لا نستطيع ان نحتمل صمتك كثيرا فرجاءا بوحي لكي تكتمل فرحتنا.

شكرا مرة تانية وخليك معانابوجودك يكتمل البدر وبكدة نكون كملنا نص رمضان والباقي بنتمه كدة وكدة.


صفية

بهاء بكري سيد الاسم
ازيك وكيف امل وخالد وطارق تحياتي ليهم كلهم

Quote: في الدنيا الكبيرة دي انتي استاذتنا

والله كدة صعبتها يا بهاء معقولة نسيت لما كنت استاذنا بتاع الرياضيات في مكتبة امدرمان المركزية والبريتيشكاونسل.

شكرا على المرور سيدي وخليك معانا عندنا جوائز قيمة تليق باساتذة الرياضيات.

صفية

د. صفية

رمضان كريم وكل سنة وانت طيبة

متابعة لهذا السرد الجميل


كل التقدير

د. صفية


رمضان كريم وكل سنة وانت طيبة

في انتظار المزيد

د. حاتم
سلام للناس الحلوين

Quote: ومعرفة المشكله نصف الطريق للحل ..

دة الكلام تسلم سيدي

تحياتي للجميغ خليك معانا، بالمناسبة توجد في آخر رمضان جوائز لاجمل تعليق ولاكثر المتداخلين كما وكيفا ولأول المتداخلين عقب كل حكاية. فخليك معانا

صفية

Quote: - تعايش سلمي واخوي بين كافة الاثنيات والعرقيات - رغم كل شيء عاداتنا وتقاليدنا ما زالتا بخير "جارك القريب واللا ود أمك البعيد"

دي اكيد حي العمدة

قلت لي في المنشية المطرة ما بحسوا بيها ؟

مقعدي محجوز طيلة الشهر الكريم
صياما مقبولا ان شاء الله

الأخ العزيز د. محمد حسن
تحية اكيدة من الاعماق

Quote: دي اكيد حي العمدة

لكن لقيتك والله "نقاش" خلاص ، ما نقاش بتاع البوهية

Quote: مقعدي محجوز طيلة الشهر الكريم

الف مرحب بيك وكمان قي درجة كبار الزوار ما سياحية ساكت

ما حنقول ليك خليك معانا لكن بنتمنى انك تفوز باكثر المتداخلين او اولهم في حكايات كل يوم
صفية

عزيزيتي راجا
سلام كتيير

Quote: رمضان كريم وكل عام وأنت بخير

..
وأنتي بخير يا ستي

Quote: شكرا كثيرا لهذه الزاوية المريحة والممتعة..

دب من ذوقك بس ، خليك معانا واكيد نحن كسبانين طلتك

خارج النص:
س: سؤال: قدر ما حاولت اعرف الشايلاه في يدك دة( ولا يد منو ما عارفة) شنو غلبني بالله اشرحي لينا ولو بمسنجر

د . صفيه

Quote: - الحاجات العاوزنها زي شنو يعني - يعني انا اودي اولادي المدارس ويكون في مدارس وفيها تعليم ومجاني، امشي المستشفى القى طبيب والقى علاج مجاني، اتخرجت القى شغل مناسب يوفر لي دخل مناسب اقدر اعيش بيه حياتي في الحد المعقول ، دايرة اعرس القى بيت اسكن فيه ، امرق الشارع القى شوارع مسفلتة ومواصلات متوفرة - امشي لقضاء اي مصلحة خاصة بي القى الموظفين قاعدين راجيني ويعملوالي الخدمة اللي انا عاوزها وباسهل اسلوب ..

الزول ده بعد شويه حيقول دايرين الحريات الأساسيه وحقوق الأنسان و و و .... وبس

العزيزة سلمى صبحي

أهلا بالناس الرقيقة وكلها ذوق.

شكرا ليك على الجية ويا ريت تجونا تاني وتاني تعرفي كل ما اكون متنرفزة او زهجانة وانا في النت بقوم بفتش يا ربي سلمى عندها شنو الليلة بيزيل الزهج
شكرا ليك وخليك معانا
صفية

أخونا محمد صباحي أزيك
أن شاء الله طيبين ، سعيدين بحضوركم

Quote: في انتظار المزيد

ان شاء الله ربنا يقدرنا لكن طبعا وجودكم بكون دافع كبير جدا للزيادة
سلام
صفية

نتابع هذا الحكى الجميل
ونبض الشارع هو البتكام
رمضان كريم
ومزيد من الابداع
المبدعة صفية

د. صفية

Quote: شكرا ليك على الجية ويا ريت تجونا تاني وتاني تعرفي كل ما اكون متنرفزة او زهجانة وانا في النت بقوم بفتش يا ربي سلمى عندها شنو الليلة بيزيل الزهج

كيف ما نجيك يا د. صفية حتى لو نسلم وتستاهلي كل خير.

كويس والله رفعتي معنوياتي وهسي في واحد شفتيه ولا لا...
وده الرابط
ويطـيب لـنا الجلـووووس فـي......( الخيــــمة الرمضــــانـية )

خلاص لازم تزورينا

كل التقدير

الأخ العزيز عبد المنعم سيد أحمد

نورت وشرفت واسعدت ف Keep in Touch

تجدني آسفة على التاخير في الرد.
صفية

الاخت صفية
رمضان كريم
شكلنا كدة اتاخرنا وفاتنا كم حلقة
لكن باقى لينا حلقات كتيرة

المهم انا قاعد ليكى تانى

بس يومياتك دى بجد وبدون مجاملة تحكى عن واقعنا
وكثيرة ما تحدث حولنا او لنا مثل هذا او بعض الاشياء

حقيقة انهايوميات حلوة

واصلى فيها

أعزائي صباحكم سعيد مسائكم زين.
قربت الليلة أفط الحلقة ، تعرفوا ليه لأنه امبارح كان يوم الأحد (يعني ما في شغالة وكدة). وانا كنت شغالة (عمل منزلي) من الساعة الرابعة بعد الظهر للساعة التاسعة مساء وبعد داك بستقبل في ضيوف من الساعة الثامنة مساء مساء لحد الساعة الحادية عشر ونص ليلاً لحد ما اخر ضيف وضيفة ما طلعوا من عندنا وبعد داك كملت باقي العمل المنزلي وهاك يا رقدة في السرير الساعة اتناشر ونص واحدة كدة.
قلت خلاص يا جماعة انا اعتذر عن حلقة الليلة ونعوضها يوم الخميس أوالجمعة.

طبعا أحيانا الواقع بيفرض نفسه حاحكي ليكم قصة صغيرة وعارضة ولكن بصغرها هي كبيرة بمحتواها على الاقل لي.(1/3)

طبعا وبتحريش من صديقتي تيسير قمت باستئجار عربة لتقلني من وإلى العمل في ايام شهر رمضان، الصباح وانا في طريقي للعمل سائف العربة بيسالني

• اها الليلة أجيك في نفس المواعيد
• لا
• بدري ولا متاخر شوية
• والله غالبا ما أتأخر لانه عندي تقرير لازم اجهزه
• تتاخري كيف يعني انت ما عندك اولاد وراجل تجي تعملي ليهم الفطور.
السؤال الموجع: طيب يا سيدي بس قبل ما أجاوب ممكن اسالك انت سؤال وبناءا على ردك ضمنيا انا بكون رديت على تساؤلك.
تعرف حسع انت لو قالو ليك عندنا حتتين مفروض تشتغل فيهم وعليك تختار بيناتهم :
في الحتة الاولى نحن بنهيء ليك كل احتياجات الشغل من ادوات وخدمات ومعدات وكدة، وبعد داك انت قاعد في مكان مكيف وبارد عندك تواصل مع الاخرين بالهاتف الفاكس والانترنت وطبيعة العمل هو ذهني يعني انت عليك تفكر وتكتب، بالاضافة لذلك عندك آخر كل شهر مرتب ، بالاضافة ألى مكافاة اخر السنة وبدل اجازات وذا مرضت بنعالجك ، ومرة مرة كدة بنسفرك تشارك في منتديات او مؤتمرات او دورات تدريبية.
والشغل التاني: اول حاجة فيه انه اغلبه شغل عضلي وفيه تعامل مع النار ، وما فيه ساعات عمل محددة ولا طبيعة عمل محددة ولا اجازات اسبوعية ولا سنوية ولا في المناسبات ولا الأعياد ممكن تشتغل الساعة اتنين صباحا وممكن تكون شغال ثلاثة ورديات وحتى اماكن الشغل متغيرة ومتنوعة ومتعددة ، أما اي متطلبات للشغل عليك توفيرها بنفس ، والأدهى والأمر هو انه الشغل دة ما فيه مرتب ولا فيه مكفاة نهاية خدمة ولا عمر محدد للمعاش.
أها يا اخوي انت بتختار ياتو ، وبناء على اختيارك انا بكون جاوبت انه انا مفروض اخلص شغل المكتب اول ليه.
نواصل التحليل غدا

Quote: والشغل التاني: اول حاجة فيه انه اغلبه شغل عضلي وفيه تعامل مع النار ، وما فيه ساعات عمل محددة ولا طبيعة عمل محددة ولا اجازات اسبوعية ولا سنوية ولا في المناسبات ولا الأعياد ممكن تشتغل الساعة اتنين صباحا وممكن تكون شغال ثلاثة ورديات وحتى اماكن الشغل متغيرة ومتنوعة ومتعددة ، أما اي متطلبات للشغل عليك توفيرها بنفس ، والأدهى والأمر هو انه الشغل دة ما فيه مرتب ولا فيه مكفاة نهاية خدمة ولا عمر محدد للمعاش.

سبحان الله لكن أنا ما كنت قايلو عامل كده

د.صفية

سلام

انت حكاية... حكاية

فى حكاياتك بساطة و لمس لقضايا كبيرة و تزيدين بتوضيح موقفك منها بحزم مفرح

اشهدانك من الجندريات المفيدات جدا لهذا البورد

واصلى بنفس النهج

و متابعين

Quote: والشغل التاني: اول حاجة فيه انه اغلبه شغل عضلي وفيه تعامل مع النار ، وما فيه ساعات عمل محددة ولا طبيعة عمل محددة ولا اجازات اسبوعية ولا سنوية ولا في المناسبات ولا الأعياد ممكن تشتغل الساعة اتنين صباحا وممكن تكون شغال ثلاثة ورديات وحتى اماكن الشغل متغيرة ومتنوعة ومتعددة ، أما اي متطلبات للشغل عليك توفيرها بنفس ، والأدهى والأمر هو انه الشغل دة ما فيه مرتب ولا فيه مكفاة نهاية خدمة ولا عمر محدد للمعاش.

لحدى ما احىء بس اخلص الفى يدى واللى بيشبه الاقتباس الفوق ده

فتحت صفية في الحلقة الفاتت موضوع في غاية الأهمية
فالأعباء المنزلية بتستغرق وقت وبتستنزف طاقة وجهد
قد يكون مهضومآ في وقت مضى أن تقوم المرأة بخدمة البيت
ويتصدى الرجل للعمل خارجه لكسب المال
لكن في ظرفنا الحالي ومعظم الأسر تعمل نسائها في الدواوين الرسمية
كتفآ بكتف حزى زميلها الرجل
وكلاهما يعودا للبيت بذات وسيلة المواصلات التي يتطلب الحصول عليها مهارات وعضلات لا تتوفر للمرأة
قد يعودان في ذات الوقت
تتجه هي رأسآ على المطبخ والتجهيزات
بينما يستلقى هو يطالع جريدة
وبتتضاعف المغصة لمن تكون الجريدة هي الميدان وفيها مقال عن النقابات والحقوق
والأجر المتساوي للعمل المتساوي ، وكاتب فيها من الله عن حقوق المرأة ، وقد يكون صاحبنا
المستلقي قد هز رأسة إعجابآ وإستحسانآ لدعوات المساواة التي حفل بها مقال من الله
المساوة التي لم يسهم في إشاعتها في البيت

قد أعود فالليل اليل
وطال بينا السهر
رحماك يا قدر

د. حاتم
ازيك و شكرا على المرور مرة تانية

يا اخوي انت قايلة بطري كوبر ولا حلة كوكو تجينا مرة مرة ، ما تنسى دة مستشفى امدرماااااااااان. يعني الحضور يوميا

تسلم وما تنسى تسلم لي على الجندرية الجديدة

صفية

Quote: والشغل التاني: اول حاجة فيه انه اغلبه شغل عضلي وفيه تعامل مع النار ، وما فيه ساعات عمل محددة ولا طبيعة عمل محددة ولا اجازات اسبوعية ولا سنوية ولا في المناسبات ولا الأعياد ممكن تشتغل الساعة اتنين صباحا وممكن تكون شغال ثلاثة ورديات وحتى اماكن الشغل متغيرة ومتنوعة ومتعددة ، أما اي متطلبات للشغل عليك توفيرها بنفس ، والأدهى والأمر هو انه الشغل دة ما فيه مرتب ولا فيه مكفاة نهاية خدمة ولا عمر محدد للمعاش.

د.صفية

دي أجرو عند الله أكبر

Quote: وحقوق الأنسان و و و .... وبس

حاتم حمدتو
ازيك وسلام للناس الحلوين

هي حقوق الأنسان كلها ووووبس ، هو في زول داير اكتر منه.
سلامي
صفية
خليك معانا

أعزائي صباحكم سعيد مسائكم زين.
حنحكي اليوم بقية القصة الصغيرة.(2/3 )
بناءا على اتصال هاتفي من صديقتي اضيف مداخلتها هذه ، كمان ما تنسي تقولي انه:
-There is no advertisement for job, nor contract and/or employer.
If you want to resign you will find no body to submit you resignature.
The most disastrous issue is that you don’t know when and how you got in and why you are continuing and how to quit.
كلام صديقتي دي فعلا خلاني امبارح الاحظ :
بناتي الكبيرة عفيت منها طالعة لامها جنها وجن شغل البيت ، أها الصغيرة جنها شغل بيت ما عارفة جبدتها حبوبتها ولا واحدة في عماتها ولا واحدة في خالاتها ، المهم بتي العمرها 7 سنوات حسع هي موظفة كبيرة جدا في هذا الشغل ياخي دي من ما فتحت كدي جنها تضاير وتلملم ودة وشنو تفاصيل المفروص انها ما عندها معاها شغلة يا ربي القصة وراثة.
اها نجي للحتة التانية حسع انا امي دي قربت للسبعين لليلة دي ما في زول قال ليها انتي وصلت سن المعاش ولا قالوا ليها نعمل ليك عقد بالمشاهرة . ولسع شغالة ربنا يديها الصحة والعافية.
اها النقطة المهمة اللي لفتت انتباهي أيضاً انه الشغل دي داير مهارات عالية وخبرات وممارسة يعني انا في رمضان دة غايتو اكتسبت جنس خبرات والله 15 سنة زواج وعشرين سنة قراية ما اتعلمتها.

المهم القصص دي مدورة في كل العالم وبس حنوقف مع الاحصائية دي وبكرة نواصل نفس الموضوع
أحصائية عملها برنامج الامم المتحدة الانمائي بتقول:
ان النساء يعملن 66% من ساعات العمل في العالم
ويستلمن 10% من الأجور في العالم
ويمتلكن 1% من الأصول في العالم

نواصل غدا

Quote: أحصائية عملها برنامج الامم المتحدة الانمائي بتقول: ان النساء يعملن 66% من ساعات العمل في العالم ويستلمن 10% من الأجور في العالم ويمتلكن 1% من الأصول في العالم

الدوك

طلعنا اولاد حلة وزملا

الاحصا ئية الفوق حتخليكم تنتفضو فينا انتفاضة عصماء
بس
اديك حاجة ظريفة

اتضح انو 70% من الودائع البنكية في السعودية تخص النساء

تقولي 1% من الاصول
ناس الامم المتحدة ديل بس فالحين لافين لي في المظاهر وحي العمدة
الرياض دي مالها
ورمضان كريم

Quote: قد أعود فالليل اليل

عزيزي ابوساندرا

عد عودا حميدا مستطاب

جاياك بعدين بعد العصيدة

صفية

Quote: اتضح انو 70% من الودائع البنكية في السعودية تخص النساء

عزيزنا الدكتور محمد حسن،،
شكرا للسماهمة ، لكن دي ما ودائع بنكية بس حاجة خفيفة على الماشي ما اصول وعقارات وشركات ودي برضو بتحمل أبعاد جندرية حيث فيها دلالة واضحة ان مشاركة النساء في البيونس ضعيفة نسبيا بحكم المعوقات الأخرى الاجتماعية وغيره وبالتالي هن يلجأن لاسهل انواع ابيزنس وتحقق ارباح من غير مجهود وهي نظام الوديعة لكن هل قالوا ان 60% من الشركات أو العقارات مملوكة للنساء؟؟
وشكرا مرة اخرى على المرور.
خلي بالك البنبر بتاعك دة ما يزح من مكانه الناس دي كلها ساوة ليها نيالات وامتدادات نحن الوحيدين اللي ما عملنا امدرمانات على الاقل آزرونا مؤازرة امدرمانية ,
تسلم
صفية

أخونا محمد صباحي شكرا على المداومة

Quote: دي أجرو عند الله أكبر

ونعم بالله

لكن برضو اجر الله ما بيمنع معاها شوية اجر دنيا ولا رايك شنو
شكرا
وخليك معانا

صفية

عزيزي طارق ود المكي
ألف مرحب بيك
و الله الليلة شرفتنا جنس تشريفة ، قربنا نضبح ليك (انا خايفاها تكون الكديسة)

والله كويس الناس قالوا اهم حاجة في حل المشكلة هو الشعور بانه في مشكلة.

يعني

اختني الدكتورة صفية الفنجرية

رمضاااااان كريم

الله اديك الصحة يا صفية السفرتي اخووووك بعد ( خلاص كبرتي وليك تسعطاشر سنة)السودان السمح الشين الزين المكعوج الملولو المنخشم المدقشم المهكع المخستك المجوبك المعولق المخولق المسجم المرمد ظااااطو مجانا بذاكرة ( ديجتال) بحسدك عليها ويا ناااااس يا شر كفاية اررر وبعد شناتو دي بريدو اهاااعيبوهو لي!ّ

تصومي وتفطري علي خير

ما حا أقول ليكـ يا دكتورة.

لأني متعود أقول يا صفية...ممكن لو رديتي تقولي لي يا ود.


طول عمركـ شاطرة وبتعرفي توصلي المقصود بكل سهولة.

يعلم الله بقدر ما شعرت بالسعادة لجودة المطروح من مذكرات وعِبر..
بقدر ما ندمت على أني عثرت على هذا البوست بالمصادفة.

واصلي يا صفية فالإبداع فيكم غير مستغرب ابدأً.

تحياتي لكلـ اهل الدار العامر

عزيزي دوت
تجدني اعتذر عن عدم الرد في حينه
وشكرا كتيرا على المرور واجهاد النفس بالرد والتعليق

اتفق معك تمانا ان هذه الحكايات تتشابه في نواحي كتيرة مع حكايات آخلاون يعيشون معنا في نفس السياق السايسي والاقتصادي وحتى الجغرافي.

تتباين المعاناة من هنا وهناك ولكن يظل سوداننا الحبيب محظ اتظارنا نعمل له رغم كل.

شكرا وخليك معانا هنا

ونشوفك يوم السبت في الخرطوم

صفية

Quote: وبتتضاعف المغصة لمن تكون الجريدة هي الميدان وفيها مقال عن النقابات والحقوق والأجر المتساوي للعمل المتساوي ، وكاتب فيها من الله عن حقوق المرأة ، وقد يكون صاحبنا المستلقي قد هز رأسة إعجابآ وإستحسانآ لدعوات المساواة التي حفل بها مقال من الله المساوة التي لم يسهم في إشاعتها في البيت

غايتو ابوساندرا بفتح فى المواضيع البتجيب الهواء...
صحى مغصة ومغصة كبيرة لكن الانفصام
نقول شنو تانى؟!

بجى راجعة

أعزائي صباحكم سعيد مسائكم زين.
حنحكي اليوم بقية القصة الصغيرة.(3/3 )

ان النساء يعملن 66% من ساعات العمل في العالم
ويستلمن 10% من الأجور في العالم
ويمتلكن 1% من الأصول في العالم
طبعا في ناس كتار بقولو لا لا ما ممكن النسب دي ما صحيحة، لكن طبعا ال 66% دي جاية من الشغل القلنا عليه فوق دي زي ما واحدة اختصرته في نموذج اليبضة:
الزولة دي قالت يا جماعة حسع البيضة دي من ما كانت امها سوسيوة هي عمل يقوم به احدهم اذا كان عامل او طبيب بيطري او تقنيات هندسية وفنية اها الجدادة كبرت وبيضت وجاء العامل او ماكينة اللم ولموا البيض وختوها في الصناديق كل مرحلة من المراحل دي بيقومو بيها ناس معينين وبيكون دي شغلهم اللي بياخدو عليه أجر ، ويجي مندوب التوزيع يشيل الاقفاص ويوزعها للبقالات ولحدهنا دي وظيفة مدفوعة الأجر ، بس يا كافي البلة يا حايد المحن من ما تجي المرة تشتري طبق البيض (في اثناء الشوبنج) ودي طبعا ما معممة في كل دول العالم لكن غايتو عندنا هنا في الخرطوم الشوبنج حق الاكل اغلبه بعملوه النسوان ، الشغل بقى مجانا اها بس دايرة زول يقول لي الفرق شنو بين الموزع الجابها من المزرعة والزولة الشالتها من البقالة للبيت مش زول بذل مجهود وبناءا عليه ياخد أجر وهي زولة بذلت مجهود ولكن لا تاخد أجر امسك دي واحدة اها يلا من العربية ولا حتى الرقشة قامت المرة شالت طبق البيض ودخلته في ديك يا التلاجة برضو شغل عضلي غير مدفوع الاجر ، وجات بعد يومين نفس الزولة شالت البيض من التلاجة وو ختت الطوة في النار وعملت بيها طبق أوملت لزوجها وممكن تكون هي اصلا ما بتاكل البيض!!!!!!!!!!!!!!!!!!!!


طبعا الحوار حياحدنا لمناحي كتيرة لكن اخر حتة دايرة اقولها ان منتج هذا العمل ومعه جهود اخرى بتنتج لينا اهم منتج في الاقتصاد اللي هو الانسان الشخص السوي السليم كامل البنية الجسدية والنفسية ويحمل منظومة اخلاق ويمتلك معرفة ومهارات تكلفة انتاج هذا الشخص لا توضع في الحسبان في الاقتصاد الكلي ، بالتاكيد انتاج شخص ليس من عمل البيت لوحده وانما به تتضافر جهود كثيرة من المجتمع والاسرة والزوج والدولة Human Capital

Issues Raised lessons learned:
Human capital appears as a concept.
Women between productive, reproductive, and community roles are loosing their time (women are time poverty people)

صفية نواصل

Quote: أوملت لزوجها وممكن تكون هي اصلا ما بتاكل البيض!!!!!!!!!!!!!!!!!!!!

وهي تعمل اوملت ليه ولزوموشنو وجع اليدين ما تفقعن ليه في الطوة عيون والسلام

بالمناسبة يا دوك بالنسبة للسودان وهو حالة شاذة في كل الدراسات الثقافية والاثنية والسياسية والاقتصادية والزواجية والمزاجية
الاية مقلوبة
البنات ماشاء الله عليهم شغالات تلقي الواحدة شغالة دوامين الصباح في شركة والمسا في شركة وبتقرا او تحضر
وعندهم الكنجالات وراكبين عربات ( اصول)او فاتحين مكاتب سمسرة بالدولار او مكاتب تجارية

والاولاد قاعدين تحت الشجر يحلقوا لي بعض ويشربوا في الموية الباردة واصحاب المعاشات مكدسين في عمارة الضرايب سماسرة
وابقي عشرة على بنبري

عزيزي الدكتور ،
ضحكتني لما قلت لي ما تفقعوا ساكت اها حتى كان فقعته ما هو مجهود برضة.
لكن

Quote: البنات ماشاء الله عليهم شغالات تلقي الواحدة شغالة دوامين الصباح في شركة والمسا في شركة وبتقرا او تحضر وعندهم الكنجالات وراكبين عربات ( اصول)او فاتحين مكاتب سمسرة بالدولار او مكاتب تجارية

عاد ما بقول ليك ما حاصل لكن دي طبعا مجوعة بسيطة بعد ما ضاق بيهن الحال يسووا شنو سفر ممنوع والعرس لزومو شنو وجع الراس اها يسوو شنو ياها طاقات كامنة اجادو توظيفها وانا بقول ليهم للأمام القصة كلها في economic empowerment اوعى يغشوكم بالكلام الفاضي.

Quote: والاولاد قاعدين تحت الشجر يحلقوا لي بعض ويشربوا في الموية الباردة

والله هم برضو ضحايا مجتمع باكملة مجتمع يطالبهم ويطالبهم و عجز عن توفير ادنى متطلباتهم لذاكدى تحولوا لحالة اللا مبالاة بس صدقني دي حالة عارضة وكل واحد فيهم لو لقى فرصة اكيد حيبدع.

Quote: وابقي عشرة على بنبري

بنبرك دة نحن حاجزين ليك معاه العشر الاوائل

شكرا على المرور
وتحياتي وسلامي
صفية

د.صفية رمضان كريم رغم اننا بقينا فى نصه

وتحية زقازيقية رغم انى حييتك اكثر من مرة فى حوشنا وانت ماشغالة بينا معقول كده ناس امدرمان ديل نسابتى وانا عارفهم بحبو التعارف والاجتماعيات والله الدنيا تغيرت ؟؟

البوست بتاعك جميل ومكتوب باللغة البسيطة الحلوة وكذلك فيه تداعيات الاحداث اليومية بس انا مختلف معاك فى حكاية ال 66% دى و ال 10%

لان النساء وخاصة فى الشرق مجتمع استهلاكى فقط يعنى المرأة عندنا همها الاول هو الشوبنج الشوبنج والاستهلاك بالنسبة لهن اولى من الانتاج

وانا بتحدث عن الاغلبية من النساء والتى من خلالها يأتى الحكم (النساء مجتمع استهلاكى فقط) اعداء للانتاج والتحويش للزمن ....

Quote: وانت ماشغالة بينا معقول كده ناس امدرمان ديل نسابتى وانا عارفهم بحبو التعارف والاجتماعيات والله الدنيا تغيرت ؟؟

عزيزنا عبد السميع والله والله يعميني كان شفت تحيتك انت براك جاوبت دي ما عوايد ناس امدرمان ، لكن لك العتب حتى ترضى ونعتذر ونعتذر ونعتذر الى ان يموت الاعتذار خجلا (يا ربي دي صح كدة.
نجي لموضوعنا:

Quote: انا مختلف معاك فى حكاية ال 66% دى و ال 10% لان النساء وخاصة فى الشرق مجتمع استهلاكى فقط يعنى المرأة عندنا همها الاول هو الشوبنج الشوبنج والاستهلاك بالنسبة لهن اولى من الانتاج

طبعا اللي انت بتقول فيهدي اصلا ما بيدخل ضمن ال 10% بل هو تبع 66% اللي هو استهلاك يعني ما انتاج وهنا ن يقمن باستهلاك الاموال التي جناها شخص ما زواج اب او اخ ولا يكونن في دائرة المنتجات.

مع تحياتي وخليك معانا
اها من دربي ماشة بوست ناس الزقازيق اجدع ناس ارد التحية
وشكرا على المرور
وعازمنك ونسة في الحوش في امدرمان تشرب ليك فيه حلو مر وونسة لذيذة على انغام العود واغاني الحقيبة، واختار الاغاني اللي عاوز تسمعها
مع السلامة
عسى ان نكون اوفيناك حقك من الاعتذار
خليك معانا
صفية

عشام ود هباتي
أزيك ورمضان كريم
لكن بالفت والله ما تسيتا البوست تبعكم لكن زي ما شفت الزمن تك (يعني عدماني الرمادة)بالله لو عارف في زول عنده زمن اضافي يسلفنا كلمنا بيه سلف بس ما شراية.

شكرا مرة أخرى على المرور
وتحياتي
ونتمنى نشوقك تاني وتالت و....

صفية

أعزائي صباحكم زين مسائكم سعيد
الليلة دايرين نغير النكهة شوية من شغل البيت ونمشي نشوف الشارع فيه شنو
حكاية الليلة برضها صغيرة جدا الغريبة اغلب الحكاوي دايما بتكون جنب الهلتون السر شنو ، المهم ونحن في صينينة الهلتون راكبين في الهايص جات ليك عربية رئاسة جمهورية والشارع زحمة شدييييييدة
طبعا ناس المرور فضو ليك الشارع عشان عربية رئاسة الجمهورية تمر قوم يا سواق الهايس الراكبنها انقشط ليك ورا عربية رئاسة الجمهورية
نط ليك واحد من ورا يا زول انت البتعم فيه دة مخالفة ممنوع تمشي وراء عربية رئاسة الجمهورية
ورد متطوع آخر ما يمشي عربية رئاسة الجمهورية يعني فيها شنو ما ناس عرفنا اي حاجة خليناها ليهم يا اخوانا شارع الله دة ساكت ما دايرننا نشاركهم في والله حاجة غريبة خلاص
ورد آخر هو الغريبة الناس ديل قاوا هم اسلاميين طيب حسع عمر بن الخطاب كان لمل يجي ماشي بيفضوا ليه الشارع
ووتطوع آخر انت خليهم ناس عمر ديك حسع ناس عبد الله خليل والازهري ما كانو بيمشو ساي
ورد المتداخل الاول يا جماعة نحن عاد وي الصحابة والرسل ، والله غايتو السودانيين ديل ينضموا ساكت حسع ما شتو في مصر القريبة دي الرئيس بيمشي داخل القاهرة بطيارة
وامن اخر على حديثه الناس دي تتكلم ساكت وينضمو والله حسع السودانيين ديل كان يمشو لدولة تانية حسع في المغرب دي والله تجيب سيرة الملك والله اهلك ما يعرفوا ليك طريقو ناس في نعيم وانضموا ساي وبرضو ما عاجبهم جاحدين نعمة
وقامت واحدة من هناك والله غايتو انا كان سايقة عربية ياني الماشة ياني الماشة والدايرين يسوو اليووه كان لي الغرامة سبب بلا سبب بغرمونا وكان للسجن السجون مليانة بالحرامية والوطنيين في شنو تاني ولحد هنا كنا وصلنا السوق العربي

ملا حظات
مساحة من حرية التعبير قكثيرون يستخدمونها قليلون يثبطون من الهمم
المقارنة مع الاسوا لاظهار الوضع الحالي افضل (الطشاش في بلد العمي شوف)
الشارع يعج بحيوية مبشرة برياح تغيير أت
صفية
نواصل

Quote: مساحة من حرية التعبير

" الكلب ينبح والجمل في مشيهو" .
كل ما جري في الهايص من هجايص هو نفس الذي يحدث في كل مكان

Quote: الشارع يعج بحيوية مبشرة برياح تغيير أت

ما قال بجي مالو ما جا
يبدو أن رياح التغيير تصطدم بأحزمة ما أو أنها تأتي والناس نيام فتقفل راجعه .. فأنا أسمع بهذه الرياح منذ عقد من الزمان ولا تأتي .

إستمري

استاذنا ود المكي
كتر خيرك كتير لبيت الدعوة.

نحن بنحاول نكون (اوبتمستك) متفائلين.

شكرا على المرور ونشوفك

صفية

كتبت إشراقة مصطفى :

Quote: غايتو ابوساندرا بفتح فى المواضيع البتجيب الهواء... صحى مغصة ومغصة كبيرة لكن الانفصام نقول شنو تانى؟!

تعالي نقول الكثير في { فصامية الرجل التقدمي }

غايتو أبو ساندرا يفتح في المواضيع
ودكتورة إشراقة تنتبه
وتشعلل الموضوع

تعالي راجعة

Quote: وقامت واحدة من هناك والله غايتو انا كان سايقة عربية ياني الماشة ياني الماشة والدايرين يسوو اليووه كان لي الغرامة سبب بلا سبب بغرمونا وكان للسجن السجون مليانة بالحرامية والوطنيين في شنو تاني ولحد هنا كنا وصلنا السوق العربي

تعرفي يا دوك

اتذكرت لما كنت في السودان وهامش الحرية زي هامش انك تكون انسان في السودان منتصف التسعينات
راكب في الحافلة والساعة تقريبا العاشرة صباح وجنبي بنتين باين عليهم ممتحنين شهادة لانهم بيذاكرو
فلما جا الكمساري ادوه نص القيمة، قال ليهم لا
قالوا ليه طلبة
قال ليهم الطلبة من 6-7 صباحا
فقلت ليه
الطالب طالب
وبعدين ديل بنات ممتحنات مامعروف ظروف بيتهم شنو
وجايز ما عندهم حصص بدري
رد علي قال لي ده القرار
قلت ليه القرار غلط والاصدره غلط
نط السواق قال لي هسة لو وديتك محل طلعوا القرار بتلحس كلامك
قلت ليه وديني
نط رجل نذقون وقال لي انت قلت الحكومة غلط؟
قلت انا قلت القرار غلط والطلعوا غلط
ااستلم زمام المبادرة واحد ما خد ركن في الحافلة وقال ليه
اسمع انت الزول ده قال القرار غلط
وانا بقول ليك
اقرار غلط
والطلعوا غلط
والحكومة غلط
وانت غلط
كرهتونا البلد

وبنبري

شكرا دكتور على الحضوروالمداومة والمشاركة المرحة يبدو انك حتلملم الجوائز كلها
لكن يخسي عليك دي ما كن ترسلها لي بالايميل تشففني ليها يعني كان حليتني من يوم
وشكرا مرة تانية


صفية

Quote: تعالي نقول الكثير في { فصامية الرجل التقدمي }

عزيزنا أبو ساندرا والغالية لدكتورة
والله غايتو القصة دي صعبة بالحيل تعرفوا بتذكرني مرة نقاش دار بين اتنين
الاول قال ليه ياخي الحاصل شنو الطلاقات دي كترت نحن زمان ناس اماتنا وحبوباتنا الظلاق دة ما كان كدة

قام التاني قال ليه اقول ليك قولة نسوان ورجال زمان حاجاتهم كانت واضحة ومعروفة وكل زول قايم بدوره
لكن ناس حسع الماسكين العصاية من النص ديل لا قادرين يمشوا الحاجات زي زمان ولا قادرين يتخلصوا من الزمان ويبقو على الجديد.
أها ياها دي الحالة مسك العصايا من النص والمهم في الموضوع دة كلو ان الضحايا هم النساء في كل الأحوال ولا رياكم شنو يا جماعة.
صفية

Dear Safia,


Ramadan Kareem

Your nice words are a wonderful mixture of descriptive reality tales and cream of wisdom and knowledge

Will be here waiting for the rest I am quite sure will be the best!

Dear Nadia
Thank you for passing through really i am too happy for hearing those nice words which i dont deserve, , because this my first time with puting my thoughts int keboard touches, thanks for your encouragmen.
Keep intouch
by

أعوائي عزيزاتي
صباحكم زين مسائكم سعيد
غايتو حكاية الليلة بتتكلم على حاجة بتخوف عدييل كدة ، يعني اي واحد فينا او اي واحدة فينا لما تسمع كلمة ناس الأمن دي قلبه/ قلبها ببقيف عديل كده ، دة الحصل لي فيي وم من أيامي اقصد تلاتة مرات: الأولى وانا طالبة في جامعة الزقازيق والتانية في مطار القاهرة والأخيرة في الخرطوم السودان دي كل حكاياتي مع ناس الأمن، غايتو ما تشيلو هم ما حصل دخلت سجن.
أنا وناس الأمن
في صباح يوم شتوي في مدينتي الغالية للقلب الزقازيق ، حضر الى الكلية بط"ة بتاع" الأمن هكذا كنا نطلق عليه ، وسال عني وتطوعت احداهن باخباري بان بطة" بتاع" الأمن يسال عنك، ودق فلبي يا ربي "الحاصل شنو عملت شنو" باي شيء ازعجت سلطات الأمن" ومش اي الامن الأمن المصري" وتزداد الاسئلة ويزداد الخوف تبعا لها وما بين خوفي واستفاهاماتي ذهبت لمقابلة عميد................ في مباحث أمن الدولة حيث اخبرني بذلك بطة "بتاع" الأمن .
وفي مكتبه الكبير الأنيق قدم الضابط نفسه وانا كلي تلهف لاصل لنقطة النهاية او قد تكون نقطة بداية لمآسي كثيرة تليها.
حضرتك الآنسة صفية
نعم
بتدرسي في اي كلية
بيني وبين نفسي ما انت عارف بتسال ليه في الطب البيطري
مصر عاجباكم
اكيد
حضرتك بتروحي دار اتحاد الطلبة
أي اتحاد؟
اتحاد الطلبة السودانيين بيني و بين قلبي حسع ده يجاوبو ليه كيف شنو السؤال اللي بعده عشان بناء عليه االف الاجابة وسكت وانا ارتجف واتصبب عرقا رغم ان حرارة الغرفة قد تكون في حينها 20 درجة مئوية
مالك حضرتك تعبانة ولا حاجة
لا بس خايفة
خايفة من ايه ما اهو نحن قاعدين بندردش مع بعض مافيش حاجة تخوف
طب حضرتك بعت تناديني ليه
لا بس شوية اسئلة وبعيدن تروحي
اتفضل حضرتك
نواصل غدا

أعزائي صباحكم سعيد مسائكم زين
نواصل انا وناس الامن

- ردا على سؤاله عن ذهابي لدار الاتحاد حاولت ان اجيب اجابة تحتمل التعدد في التفسير
- ايوا بروح احياناأسام صرف الاعانة الشهرية و بعض الانشطة الثقافية
- طب بتعرفي (.....) وردد قائمة طويلة باسماء رموز السياسة في الزقازيق من كل الوان الطيف
- لا ما بعرف
-لا يعني خالص خالص ما بتعرفيش اي حد ؟
- بكل صدق اكيد بكون بعرف بعض الاسماء لكن مش هي المعرفة العميقة
- طب بتعرفي بيسكنوا فين مثلا وفي تلك اللحظة اخرج رزمة فلوس
- بيني وبين نفس قلت الحمد لله يعني القصة شوية معلومات مقابل فلوس يعني ولا متهمة في جريمة ولا ازعجت السلطات ، طيب تلقاها عند الغافل خلاص كدي النستعدل ليك في الرد بعد ما قلبي برد وان الكنت قلبي في يدي تكون في جريمة ولا كارثة لفقوها لي
وتوالت اجاباتي بالنفي ،
وفهم رسالتي وتفارقنا
هكذا نحن نختلف ولكن لا نخون
ونواصل

-

Quote: انت حكاية... حكاية

مهندس هشام
والله دة بس من زوقك
شكرا كتيرا على المتابعة
وخليك معانا
صفية

تعرفي يا صفية في الشهرونصف الفاتوا انا برة السودان
و مشغول شديد ونادرا ما اجد زمن كافي لتصفح مواضيع
البورد.... لكن انا ندمان شديد واكثر ندمي لعدم متابعة البوست
ده من البداية.... المهم هسع لمن اكتسفت البوست ده فت قعده
نفضته ليك كله... اجمل بوست واعتقد انه اي زول عايش في
السودان بيلقي نفسه هنا نفس المواقف ونفس القصص بس
تلقي ليها زول راقي ورائع يعبر عنها
ليك مليون ود.....

انا هنا في هذا البوست
............. طوالي

والي

شكراً جميلاً دكتورة صفية
الكتابة عن الحياة اليومية العادية باسلوب ادبي وشعبي شي صعب واقول لك بدون اي مجاملة اننا نشهد مولد يحيي فضل جديد
تصوير واقي لمصاعب الحياة اليومية السودانية بطيبة اهلها وسخف سياستها والمضحك المبكي

صفية

كل سنة و إنت بألف خير

Quote: - زول ينزل معاي المراتب يا .... و يا......

الإجازة الفاتت دي .. دة كان حالي كل يوم .. و أنا ما أتكيف إلا لنومة السطوح أو الحوش

دمت

العزيزة صفية
من زمن بعيد وانا بحاول ان تتاح لى فرصة المداخلة
ولكن هو الرهق اليومى ونتائجه .

يوميات رائعة وجميلة السردية التصويرية للذاكرة .

لك مودتى واصلى ونحن فى الانتظار

Quote: لأني متعود أقول يا صفية...ممكن لو رديتي تقولي لي يا ود.

سامي يا ود

كيفك وكيف اخبارك والاولاد وامهم
شكرا على المرور والتشجيع

تحياتي للجميع

خليك معانا

صفية

صفية

تحياتى

مواضيعك دخلت الحوش

بذكرى بتاعين الأمن و على عكس ما يظن الناس بمعرفتهم لى كمتردد سجون فانا بحمد الله لم أدخل معهم فى اى موضوع مباشر او غير مباشر رغم انهم كانو الأدلاء ليلة إعتقالى ولكن امضيت 20 شهرا فى المعتقل دون ان ارى احدهم و دون ان يحقق معى لاهم ولا غيرهم.

المهم المرة الأولى احتك بهم كان عقب خروجى من المعتقل فى العام 1991م وكنت قد قابلت صدفة فى الشارع زميلة دراسة وصديقة ذهبت لأكمال دراستها فى دولة اوربية وعادت للسودان فى اجازة قصيرة.

التقينافى شارع البلدية و بعد السلام قررنا أن نذهب لمكان نجلس فيه و نتجاذب اطراف الحديث بعد هذه المدة الطويلة ( عشرة سنوات تقريبا) وذهبنا للفندق الكبير.

فى الفندق وفى أثناء الحديث قررت زميلتى هذه ان تدخن سيجارة و استاذنتنى فى ذلك

ما أن اشعلت سيجارتها حتى أنشقت الأرض وخرج لنا صبى مفتول العضلات و طلب منها أن تطفئ السيجارة
سألته هل التدخين ممنوع هنا؟

قال ليها وكمان بتتفاصحى؟

التدخين ما ممنوع لكن يظهر انك شيوعية ما بهمك دين ولا زول

أطفئ السيجارة و يلا معاى

قالت له يلا وين

نمشى محل ما بوريك انو البتعملى فيهو ده قلت ادب وصياعة

حاولت أن ترد فمنعتها أنا

قلت له لو سمحت انت من اى جهاز فقد كان يلبس زيا مدنيا

قال لى جهاز الامن.

قلت له على جنب: يا أخى نحن آسفين البنت دى أعذرها جاية من برة وما فاهمة حاجة

قال رافعا صوته أعذرها كيف دى واحدة ما مربية وو...

فى هذه اللحظات كنت اشير لصديقتى بالسكوت وفقد رأيت القهر فى عينيها و خفت أن تتحدث حديثا يفسد على محاولة اخراجها من هذه الازمة بسلام

المهم بعدشتائم و محاضرات فى الدين والاخلاق و العرف تكرم سيادته و سمح لنا بالذهاب مع تعهدها بعدم تكرار ذلك الفعل

صديقتى انقجرت بالبكاء حال خروجها من الفندق واستمرت ذلك البكاء زمننا طويلا

الحلسة التى كان مفترض فيها جلسة ذكريات زملاء دراسة واصدقاء تحولت لكابوس

عذرت بكاءها الطويل فالقهر حار خاصة عندما تضطر ان تسكت

Quote: لكن ناس حسع الماسكين العصاية من النص ديل لا قادرين يمشوا الحاجات زي زمان ولا قادرين يتخلصوا من الزمان ويبقو على الجديد. أها ياها دي الحالة مسك العصايا من النص والمهم في الموضوع دة كلو ان الضحايا هم النساء في كل الأحوال ولا رياكم شنو يا جماعة. صفية

سلامات ياصفية وناس الحوش

اتفق معك ان المشكلة فى مسك العصاية من النص، مرة فى قمة التطور والتقدم ومرة... احسن نسكت دى قضية بتقلب المواجع بس بجيها يوما ما بتحليل علمى رصين...
لكن ياصديقتى فى الهم وبكرة الاجمل: اختلف معك جملة وتفصيلا بانو فى الموضوع ده ان الضحايا هم النساء... لا انظر ابدا للمرأة باعتبارها ضحية، نحنا مساهمات بشكل او بآخر فيما يحدث سلبا او ايجابا، بصمتنا او بالفعل المناوىء وبمسك العصاية برضو من النص.. تفتكرى ياصفية انو النساء المتقدمات ماماسكات العصاية من النص؟ عندى دراسة ليها ستة شهور ولحدى حسع ماخلصت. دبابيس على جسد الحركة النسوية/النساسية السودانية بتناول فيها ابعاد مختلفة منها مسك العصاية من النص ومنها حالات الانفصام التى نعانيها... حالات لاتنفصل عن انفصام البلد ذاتها..

بعدين اواصل،

وفى انتظار ابوساندرا البفتح فى المواضيع الصعبة والبتجيب مش الهواء فى الحقيقة دى بتجيب عواصف عواصف بنحتاجها، ممكن تقلب النظام

Quote: و سمح لنا بالذهاب مع تعهدها بعدم تكرار ذلك الفعل صديقتى انقجرت بالبكاء حال خروجها من الفندق واستمرت ذلك البكاء زمننا طويلا

تعرف يا هشام قصتك دي حصلت علي مع تعديل بسيط

اول سنوات الانقاذ(92) وانا في عز عزوبة يحسدني عليها اصيع متزوج

سقت البنية السكرية
وعلى شاطئ ابوروف الذي احبه
وقعدنا نغزل في النيل والقمر والظلال
فجأة يطب ليك علينا حاجة كدة 6X6 وهاك يا هرشة والاخ يطلع ملازم كوز جيش امن
والبنية اتخلعت
المهم قلت ليه يا خي ليه نمشي القسم ونبهدل بت الناس
وتجادلنا طويلا وكنت هادي وكل تفكيري انو البت ما تصل القسم ، في الاخر وراني انو زعلان لانو دي حلتهم وخايف علي بناتهم
قلت ليه يا اخي انا ذاتها دي حلتي وزي ما هو خايف على بناتهم انا برضو مراعي المسألة دي
الراجل فصل بس قال لينا تقوموا
قلت ليه جدا
ركبنا العربية وكانت بوكس ، وبطارية العربية من الجهجهة نامت
نزلت ليه
وقلت ليه يا ابن العم يدك معان
اخونا ما قصر ونادى شباب الحي وادوني دفرة جامدة والعربية فللي
اما بتنا
فانفقعت بكا وضحك
بكا من الموقف
وضحك من الضابط المدينا دفرة


وبنبري

Quote: لاانظر ابدا للمرأة باعتبارها ضحية، نحنا مساهمات بشكل او بآخر فيما يحدث سلبا او ايجابا، بصمتنا او بالفعل المناوىء وبمسك العصاية برضو من النص

عزيزتي اشراقة
شكرا لك وانت تتحفينا بمرورك العميق .
لا أختلف معاك وعلى العكس اتفق تمام لان النساء يساهمن مساهمة مباشرة في هذه الحالة حالة الانفصام بعدم قدرتهن على تجاوز الخطوط الحمراء في مناطق محددة خاصة فيما يتعلق بالعادات والتقاليد وقد يكون قد خانني التعبير انا كنت أعني ان النساء هن من يدفعن الثمن غاليا.
شكرا مرة اخرى
صفية

عزيزنا هشام
الف مرحب بيك مرة تانية ويبدو ان حتكون من المنافسين في جوائزنا

Quote: ولكن امضيت 20 شهرا فى المعتقل

لا حول الله عشرين شهر دة ما عمر انت عارف لو كنت في بلد بيحترم حقوق الانسان ولم تثبت ادانتك كان طلعت ليط بتعويض يكفيك تعيش العمر كله عليه
المهم حمد الله على سلامتك ومع تناولنا لبقية حكايتي واناس الامن سنتعرض لمصطلح الامن وهل هو امن المواطنولا امن الدولة خليك معانا.
صفية

أعزائي صباحكم سعيد مسائكم زين
نواصل حكايتي مع ناس الأمن
المهم الحدث التاني زي ما قلت ليكم كان في مطار القاهرة
قبل ما اصل المطار انا كان مفروض اسلم الشقة لصاحبتها بعد سفر زميلاتي ، المهم يا جماعة وانا بلملم في الحاجات لقيت ليك رصاصة بتاعت واحدة زميلتي اهداها ليها الجكس بتاعها (هو حب شنو دة الهداياها رصاص حمانا الله) المهم انا قلت يا بت بدل ما تخلي الرصاصة في الشقة اتخلص منها عشان ما نترك سيرة وحشة وختيت ليك الرصاصة في الشنطة ، وعيييك وحاتكم ما اتذكرتها الا وانا في تفتيش المطار والصفارة بتصفر وطق اتذكرت ليك الرصاصة الله يا صفية الليلة ما تعبتي حسع يسووا ليك فيها سين وجيم معاك جماعة وارهابيين ودايرين تختطفو الطيارة وحلك لما يسمعوا اقووالي ويتبينو من صحتها يا زورلة امانة ما تعبتي غايتو اجازة صيفية راحت عليك دة لو ما قرايتك كلها طيروها ليك في راسك حسع انا الخلاني اختها في الشنطة شنو ما كان اخليها في الشقة على الاقل ما حيكون فيها استجواب ولا سين ولاجيم كل الخواطر دي مرت بخيالي في الثواني مابين رنة الصفارة وذهابي للبت اللي حتعمل لي تفتيش، المهم قبل ما تعمل لي نفتيش قامت فتحت الشنطة حقت اليد حقتي. الحمد لله لاقتها ليكم وش المكحلة النحاس اللي اصرت امي اخدها معاي على حسب رايها الكحل دي ما مؤذي بالعيون ، التقول انا كنت قاعدة اتكحل هو صحي يا جماعة النسالكم النسوان ليه مفروض يتحكلوا يعني الفهم شنو؟ سؤال؟ مرات في حا جات كدة الواحد لما يتعمق فيها ويقعدد يحلل فيها القى روحو تاه وما وصل لحل (لماذا الكحل) او بصور عامة لماذا دائمام فروض ان تتجمل النساء لينلن استحسان الرجال. سؤال هل سمعتم عن رجال يتيزينون لينلن استحسان النساء. هنا الحكم واضح زي ما بقول المثل الراجل عيبو جيبو، سوري يا جماعة مرقنا من الموضوع. نرجع تاني للمطار البت لما شافت مكحلة النحاس قالت آآه يبدو ان الصفارة من حتتة النحاس دي خلاص روحي. ومرة ثانية تنفست الصعداء مؤقتا. ما لسع في الفحص بالتلفزيون واكيد حيلقوا ليك الرصاصة مقنقنة الحل كيف المهم ما بين البت وفحص التلفزيون عثرت على حمام واخيرا تخلصت من الرصاصة
معليش يا جماعة النهاية ما زي ما متوقعة
نواصل بكرة حكايتي مع ناس الامن والمرة دي في السودان 2003
صفية

عزيزنا الدكتور محمد حسن

Quote: تعرفي يا دوك وبنبري

افتقدنا الكلمتين ديل لعل المانع خير
صفية

د.صفية مساء او صباح الخير

معليش مداخلتي جات في اعلي الصفحة
وبعدين حبيت اجاوب علي السؤال ده

سؤال هل سمعتم عن رجال يتيزينون لينلن استحسان النساء

طبعا وانت قايلا الاولاد ديل بتلبسوا وبحلقوا دقيناتهم وبتريحوا
عشان شنو يعني

Quote: افتقدنا الكلمتين ديل لعل المانع خير

تعرفي يا دوك

بديت دراستي بي مصر
وكنت مدمن قراءة
وبحب النشاط الثقافي والسياسي
ورغم اني ما منظم سياسيا لكن كنت ولا زلت مكاجر الكيزان
المهم في ليلة من ذات ليالي الشتاء البارد
ما اشوف الا اربعة دواليب محاصرني في الغرفة في الشقة
وقالوا لي انت محمد
نططت عيوني كبااااااااااااااار وقلت ليهم ايوة
شالو كل الكتب بتاعتي بصورة حرقتني شديد
( بالمناسبة ناس الامن بكرهو الكتب ليه؟)
وقالوا لي يلا معانا
مشيت معاهم
نحن قاعدين في كنبة من الساعة 2:30 صباحا لحد ما جا الضابط الساعة 6 تقريبا
وطبعا اخوك ما عارفه ضابط والا ما ضابط لانه كان لابس ملكي
ما احس ليك الا واني ضربته بي وشي على ايده
لمن صحصحت
وقال لي
ليه ما وقفت على طولك لمل جيت ماري
المهم انما كنت بغلي
وبعاين ليه
صوروني صورتين ، المزعلني للان ما شفتهم فما عارف طلعت قيافة بعد القلم ده والا وشي معووج
واسالة بايخة تدل على انه المسالة ملعوب من اتحاد الطلاب
واتضح لي هذا الامر اذ ذهبت الى القنصلية مباشرة واشتكيت شكوى رسمية
وصادف انه رئيس الاتحاد وقتها كان موجود وقلت ليه اذا انت فعلا بتمثل الطلاب السودانيين فيجب ان تتخذوا موقفا
لانو من خلال التحقيق ثبي انه ما علينا شي
من ضمن الكتب كتاب عزيز علي شديد
اسمه كلام في الممنوع لعبد الرحمن الابنودي لي هسة واجعني

وبنبري

دكتور والي الدين

ألف مرحب بيك
وعقبال ما تجي بالسلامة

Quote: انا هنا في هذا البوست ............. طوالي

مرحب بيك تاني وكان ما شالتك الشاشة نشيلك بالكيبورد والفلاش ديسك

تسلم وشكرا

صفية

الدكتورة الكبيرة / صفية مساعد

والله لكن ما شاء الله كتابة كتابة .. والحاجات ده زماااان كانت وين؟
أقصد أيام الجامعة .. ولا يا ربي نحن الماكنا فاضين نشووووف

انا منذ التخرج من الجامعة حتى هذه اللحظة لم أستقر في السودان أكثر
من عامين فقط..

يعني بعيدين من المعاناة اللذيذة ده ....

لكن تعرفي يا صفية انا بفكر بجد بعد بوستك ده ارجع السودان نهاااائي

عشان ما تفوتنا المتع ده

رايك شنو؟

حقيقي بوست جميل ويدل على ملكة قصصية كبيرة ومتمكنة

يلا مزيد من الإبداع والإمتاع

أحمد

د. أحمد أمين

الف مرحب بيك
وانت تتحفنا بزيارتك الغالية

Quote: ولا يا ربي نحن الماكنا فاضين نشووووف

لا لا حاشاك بس دي مكتشفات جديدة لسع بنتدرب

Quote: لكن تعرفي يا صفية انا بفكر بجد بعد بوستك ده ارجع السودان نهاااائي

يا زول انت عندك حمى ولا شنو كدي اقرا بين السطور كويس يقولوا ليك امراض وملاريا وبيئة ملوثة وتدني في الخدمات والكهرباء قاطعة والموية ملوثة وتعليم صفر وصحة صفرين وبعد داك محسوبية وعدم عدل وغياب القانون ومؤسساته يا زول حالة صعبة تقول لي تجي كان عاجباك المطرة والنوم في الحوش تعال صيف في الخريف.
شكرا ليك وخليك معانا

صفية

عزيزي دكتور والي الدين
تشكر مرة اخرى

Quote: طبعا وانت قايلا الاولاد ديل بتلبسوا وبحلقوا دقيناتهم وبتريحوا عشان شنو يعني

والله انا قايلة عشان النظافة من الايمان ، لكن بجد أنا عنيت التفاصيل الكثيرة الخاصة بتزيين النساء من اي مكان في جسدها والوان وبهرجة ورسومات ولون الجسم كيف وملمسه كيف كل دي ما بتدخل تحت طائلة النظافة ولكن الحمام والتعطر دي هي الحاجات العادية لكن التفاصيل ديك حنة ودخان وشخبطة وشنو ومنو بجد ما عارفة ليه في اهتمام بيها اكتر من اللزم ليه الاهتمام بجسد المراة فقظ لامتاع الرجل. سؤال؟

شايفك يا دكتورة مستعجلة على حتة الجندرة .. ح توصلي براحة .. براهم بوصلوك ..

الأخ العزيز نستة

اولا : شكرا لتلبية الدعوة والحضور
ثانيا: تشكر على التوصيلة

Quote: براهم بوصلوك ..

ثالثا: تعرف القصة ما دايرة منو يصل لشنو لكن الحكاية مترابطة المهم الفكرة الأساسية

رابعا خليك معانا

صفية

د. حاتم حمدتو
ويين ليك يومين مسجل غياب لعل المانع خير؟
صفية

أعزائي صباحكم سعيد مسائكم زين
الليلة ما حنقدر حنكمل حكايتي مع ناس الامن لاسباب امنية ، احتمال ناجلها لاخر رمضان ختامه مسك.


صفية

دكتورة صفية ازيك

بس انا راجى حكايتك مع ناس الامن دى بفارق الصبر

وياهو قعدة ليكى

شكراً جميلاً دكتورة صفية
الكتابة عن الحياة اليومية العادية باسلوب ادبي وشعبي شي صعب واقول لك بدون اي مجاملة اننا نشهد مولد يحيي فضل جديد
تصوير واقي لمصاعب الحياة اليومية السودانية بطيبة اهلها وسخف سياستها والمضحك المبكي
**************************************************
حاجة آمنة أصبرى
عارف الوجع فى الجوف شديد
عارفك كمان ما بتقدرى
اصبرى .. اصبرى
جاهلك شكى وجاهلك بكى
وفى بيتك المرق اتكى
والشيء البحير ومابحير
مابيه يا حاجة الزكاة ...
طلع الصباح لو ليك مراد
يا حاجة ما تطلع شمس
والليلة عندك زى أمس
لسه الرويدى مع الصباح
من مدة ماجاب ليك خبر
كان جوفو زى جوف العيال
من مدة داير ليه حجر
والله على الزمن الحجر
المابى بالصبر اتكرى
سرحتى فى هموم العيال
كيفن يعملوا مع الدروس
وسرحتى فى حق الفطور
باقى الامور البى القروش
واحد زمن داير ردا
واحد خلاص قلموا اتكسر
زى التقول أكلوا الصبر
يا حاجة آمنة اصبرى
مشيتى لى برج الحمام
برجك صفحتين ما بزيد
ومشيتى لى برج الحمام
كان تلقى ليك جوزاً جديد
يمكن بعد طلع الصباح
يغشاكى زولاً يشترى
هبشتى جاى فتشتى جاى
كان تلقى سكر بس محال
باقى الرطيل الفى الكرت
يا حاجة سفوهوا العيال
يا حليل زمان وسنين زمان
يا حاجة لو تذكرى ... يمه
وسمعتى صوت جاك من بعيد
وبعد قليل بابك ضرب
وسمعتى صوت جاك من بعيد
شالك تعب ... ختاك تعب
يا حاجة ناس المويه جوك
أصلو الشهر روح جرى
يا حاجة آمنة اصبرى
بعد صراع وصراع طويل
يا حاجة بينك والمحال
ما لقيتى فى داك النهار
شيتاً ويجو ياكلوا العيال
حبة عدس ما بسوى شيئ
وينو البصل وينو اللحم
حبة عجين ما بسوى شيئ
وينو الدقيق وينو الفحم
من جاى لجاى
هبشتى جاى فتشتى جاى
كان تلقى شيئ
لازمك كتير شان تقدرى
لازمك كتير اتقدرى

عزيزي أبو يسرا
شكرا ليك كتير ونورت الحوش

Quote: لمصاعب الحياة اليومية السودانية بطيبة اهلها وسخف سياستها والمضحك المبكي

اعجبني تعبيرك والذي استطاع ان يلخص كل ما كتب في جملة واحدة، حقيقي لو قيل أن اوصف ما اكتب تجدني افشل في صياغة هذه العبارة الشاملة

شكرا ليك على المرور


وخليك معانا
صفية

يا دكترة,
متابعين
وجد البوست ده جميل وحينافس على جائزة أحسن بوست
لمن بكري يتذكر الناس الهنا
ويعمل جائزة شموع سودانيز أونلاين
بس حكاية الخلاصات الفي آخر القصة دي بتذكرني
كتاب المطالعة زمان
والسؤال الشهير :
ماذا إستفدت من هذه القصة؟
وبتدل على إنك فعلاً زولة شغالة
في معهد الإنتخابات بالجندر بالطعمية
حيث لازم يكون في خلاصات
والناس تقيم ما إستفادوه من
الورشة - السمنار - حلقة النقاش- الندوه - المؤتمر - ......

سؤال جادي يا دكتورة
إنتي الفرق بين ما ورد أعلاه من مسميات, شنو ؟
سؤال بشبه أسئلة الثانوي العام .... صااااح ؟

‘زيزنا دكتور محمد
حمد الله على السلامة
قلت لي ناس الامن عنك معاهم حكايات برضو والله يبدو اننا حنغير عنوان البوست ليومياتنا بدل يومياتي، غايتو الكتاب الا تسافر القاهرة تفتش على واحد غيره

Quote: صوروني صورتين ، المزعلني للان ما شفتهم فما عارف طلعت قيافة بعد القلم ده والا وشي معووج

تفتكر يعني حتكون كيف ؟؟؟؟
أها ودعتك الله وشكرا على المساهمة اللطيفة وبنعتذر اليوم عن حكاية قصة الامن لاسباب ذاتية.
سلام
باي
وبنبرك والعشرة الاوائل قاعدين

العزيزة صفية
رمضان كريم ليكى ولكل المعاك هنا تصومو وتفطرو على خير يارب
طبعا كلمه ممتع شديد عن الكلام الداير هنا والفكرة من اساسه والداير كلو داخل البوست ده
بتكون بسيطه عليه لكن والله انا عن نفسى مستمتعة بيه كتير شديد تسلمى يارب واعذرى الدخول
المتاخر لكن الغفله ما مقصودة تحياتى حبيبه

Quote: بس انا راجى حكايتك مع ناس الامن دى بفارق الصبر

أخونا دوت
أزيك طبعا المرة دي ازيك طعمها مختلف من كل مرة يعني الواحد وهو برسل التحية قادر يجسد الشخصية.
سعدنا برؤستك وسعيدين بوجودك معنا وسعيدين اكثر بانك حتكون قاعد راجي ناس الامن.

سلام
صفية

أخونا معتز اهلا بيك نورت الديار

Quote: بس حكاية الخلاصات الفي آخر القصة دي بتذكرني كتاب المطالعة زمان والسؤال الشهير : ماذا إستفدت من هذه القصة؟ وبتدل على إنك فعلاً زولة شغالة في معهد الإنتخابات بالجندر بالطعمية حيث لازم يكون في خلاصات والناس تقيم ما إستفادوه من الورشة - السمنار - حلقة النقاش- الندوه - المؤتمر - ......

اقول ليك حاجة تعليقك دي عجبني خالص لانه فيه نقد بمعنى ان فيه اضافة نوعية ، اما السؤال دة حنخليه مفنوح وقصصص المطالعة هنا كان لازم تجي لالن انا بحكي عن نفسي يعني هي ما قصة من الخيال يقصد المؤلف انه يذكر احداث محددة فيها دلالة لمواقف محددة وايرادها هنا هو استفهامي اكثر من استعراضي يعني هل هذ صح ام خطا ما استنتجته اواستفدته؟

Quote: سؤال جادي يا دكتورة إنتي الفرق بين ما ورد أعلاه من مسميات, شنو ؟ سؤال بشبه أسئلة الثانوي العام .... صااااح ؟

الفوق ياتو بين الطعمية ولا السمنار ولا الجذر اوضح لو سمحت.
صدقني مداخلتك رائعة رائعة
وشكرا ليك وخليك معانا.
صفية

أعزائي صباحكم زين مسائكم سعيد.

الليلة حنمشي لنبض الشارع ونشوف الحكاوي التانية ، المرة دي غايتو هو نبض شارع غير شارع الله والرسول يعني ، يعن شارع الدكاترة لا مش شارع الدكاترة ال في سوق امدرمان يعني دايرين نشوف ونسة ناس دكاترة وبروفيسورات .
في الجريدة قريت ليك الاعلان
الله على عينك يا تاجر
"تقييم تجربة الدولة .... دراسة حالة .........ا"
بيني وبين نفسي يعني الناس دي بصحها يقيم مركز........ بجامعة .....ورشة..............وذلك بقاعة..... في الفترة من ..
ومشيت ما في نفس المواعيد كحال السودانيين الا الغريبة الجماعة يبدو انهم "خواجات" يعني في مواعيدهم بدو اها بصراحة كدة ما حضرت الورقة قالت شنو لكن غايتو من النقاش واخيل لي دة المهم النقاش الي هو "نبض شارع الدكاترة".
- ياخي انا شخصيا بفتكر انك انت كنت براغماتي يعني احس ان الورقة فيها براغماتيزم (ذرائعية) ، يعني ما ممكن تجي تقول لي انا ما كنت خاتي في البال اكستيرنال انفيرونمنت ، فور اكسامبل اف يعني انت لو داير تعمل ليك اي مشروع انت بتشوف كل العوامل اليي اففيكتد ان اور اففيكتد ويذ لكني اعتقد كون انك من داخل النظام تو كريتيك فروم ويذان اذ ا قوود سيقنالل . وتقدم النقد دي حاجة جميلة منك على الرغم ان هو زي نقد الام لابنها ما فيه حدة وانما نقد بدلع عموما الورقة جيدة ووثقت لمرحلة تاريخية في السودان بقراءة نقدية بالتاكيد مفيدة لنا في تدوين تاريخنا.
- مؤثرات خارجية كثيرة وعلى راسها مسالة الحصار اثرت على كفاءة الدولة
- انت كسياسي مفروض تكون واعي وقارئ واقعك السياسي يور كونتكست كل العوامل المؤثرة فيه .
- انا بفتكر ان الورقة فيها تضليل للحقائق وما ركزت على الجوانب السلبية اللي صاحبت التجربة السودانية ، وأول حاجة تجاهلتها الورقة هي الفساد انا اطالب بفتح ملف الفساد
- طيب ما دام داير تفتح ملف فساد حقو تفتحو من الاستقلال
- اي نفتح ملف الفساد من الاستقلال.
قامت جات ليك بت فصيحة خلاص بالله ما خلت ليك للانقاذ دي صفحة ترقد عليها. الذاكرة ما اسعفتني لكن في جملة ما زالت محفورة "يعني الانقاذ بدل ما يكون همها انه انا طرحتي وقعت مني ولا في راسي كان يكون همها النسوان العواجيز القاعدات يشحدن في السوق العربي ديل تشوف همهن شنو" و........ وتواصل البت ما خلت حاجة معليش يا جماعة اعذروني زهايمر بعيد عنكم. وصفق الحضور يعني انتو غالبكم تقول جنس كلامها دة مدام عاجبكم مالكم ما قلتوه .........
واستمر النقاش ووانشغلت انا ببعض الصديقات حول بعض امورنا التافهة. ولم اعرف إلى ماذا توصل البراغماتيزميون.
حرصت في نفس الورش على حضور مشاركة المراة في الحياة السياسية.
قدمت الورقة اللي اعدتها دكتورة....... وقدمتها أستاذة............... وناقشتها ال دكتورة............ يعني كلهن من النوع الحريمي
مقدمة الورقة قدمت باختصار محتوى الورقة حريصة على التحدث بلغة عربية فصيحة تماما تحاشت ادخال مصطلحات اجنبية ففكان طريقة التقدييم اجمل ما في الورقة(على حسب رأي)
- مناقشة الورقة د......... عاد ما خلت ليك للورقة دي حتة ترقد عليها فلفلتها فلفلتها وبلغة افصح واسلم من لغتي الكتابة والتقديم.
- منتقدة ان الورقة ركزت على الحديث العام حول اهمية وشرعية مشاركة النساء في الحياة السياسية ، ولم تقدم لنا عن التجربة السودانية الا القليل وان الورقة اقفلت مراحل تاريخية حول مشاركة المراة السودانية في الحياة العامة.
المهم قامت ليك من هناك شافعة فصيحة كدي :
انا/أ ...... باحثة جامعة.................
"اتفق مع مناقشة الورقة في كل ما ساقته حول ان الورقة لجات للتأصيل ودي مرحلة نحن اتجاوزناها تماما نحن لا نبحث اليوم عن ان النساء مفروض يشاركو أم لا انما نبحث عن مدى فاعلية مشاركتهن في التجربة السودانية بناء على عنوان الورشة ولكن الشي اللي انا لقيته هنا هو شوية احصاءات عندنا كم مرة برتبة شنو وعندنا كم موظفة في الدرجة الكم وعندنا كم مرة في البرلمان بنسبة كم. الشيء المحيرني ان كل هذه الارقام لا يوجد لها مصدر وانا اقول المصدر مهم جدا من باب التوثيق وليس التشكيك برضو كمان لفت نظري عدد ضابطات الجيش لكن هل يعلم الحضور هنا ان النساء في الجيش ياخدن مقابل مادي كبدل تحية يعني ما في عسكري يقيف لتحيتهن، يحييهن كيف ما هن نسوان ، والله لكن نسوان مظلومات.
المهم واصلت البت حديثها حول اذا افترضنا جدلا ان نسائنا ديل الموجودات في البرلمان يمثلن فسؤالي هل هن يمثلن احتياجات نساء بلادي ام يمثلن احتياجات الذكور في احزابهن السياسية. مع العلم ان احتياجات ورغبات نساء السودان تختلف ما بين ريف /حضر، متعلمات/غير متعلمات، اغنياء/ فقرا ،اختلافات جغرافية وهكذا. فمن هي التي تمثل في البرلمان. وطبعا نص كلامها دة بالانجليزي اطنها التقول علي بتقرا في امريكا ولا الجامعة الامريكية ما عارفة المهم جابت سيبرة امريكا والكلام العربي تلقطيه منها لقيط؟

دي زكرتني مرة واحدة بتكتب في مقال عن المراة السودانية قامت قالت والله حسع انا ممكن اقول عشة المرة الشغالة معانا دي هي النموذج واقددم صورتها ولا يا ربي افتشخر للناس بالبروف بتاعتنا ديك اقول بس ياهن ديل السودانيات ولا الدكتورة جارتنا ولا المهندسة العندها شركة كبييرة ولا النسوان الماليات السوق العربي فارشات طواقي وهدوم ولا البنات الببيعوا الفول والتسالي اااه يا نسا ء بلدي اختلاف ولكن في المعاناة تشابه فيها.

دة كان كلام الدكاترة يا جماعة في زول قال لي ما تكتبي ما استفدته من القصة الليلة حتجرب كلامه وبالمرة نشوف رايكم

سلام
صفية

just to say Iam here

صفية

دعينى احييك على البوست الهادف
والسرد الجميل جدا

استمتعت بكل قصة فى يومياتك..

لك مودتى/ رباب

والله يا دكتورة لو ما عملت حسابك
شايف بوستك ده ماشي بخطي حثيثة نحو موضوع
الجندر....اضبطيه شوية ولانه بوست جميل
عاوزنك تشوتي في كل الاتجاهات... اقصد اتجاهات
نبض الشارع السوداني التي تعكس معاناته وانفعالاته
وليك كل الود

up

دكتورة صفية انت وين
رمضان سخن ولا الجماعة ديل لموا فيك

Quote: والله يا دكتورة لو ما عملت حسابك شايف بوستك ده ماشي بخطي حثيثة نحو موضوع الجندر....اضبطيه شوية ولانه بوست جميل عاوزنك تشوتي في كل الاتجاهات... اقصد اتجاهات نبض الشارع السوداني التي تعكس معاناته وانفعالاته وليك كل الود

يا والى الدين

سلام

دعنى اختلف معك شوية

هو فى أكثر من الجندر دليل على نبض الشارع السودانى؟

المرأة هى ترمومتر هذا الشارع فدع صفية تكتب من غير قيود

Quote: والله يا دكتورة لو ما عملت حسابك شايف بوستك ده ماشي بخطي حثيثة نحو موضوع الجندر....اضبطيه شوية ولانه بوست جميل عاوزنك تشوتي في كل الاتجاهات... اقصد اتجاهات نبض الشارع السوداني التي تعكس معاناته وانفعالاته

Quote: يا والى الدين سلام دعنى اختلف معك شوية هو فى أكثر من الجندر دليل على نبض الشارع السودانى؟

ياسلاااااام ياهشام المجمر
بالجد لمن فكرت ارد لدكتور والى الدين كانت جملتك الاخيرة دى هى بالضبط العاوزة اكتبها

هو فى أكثر من الجندر دليل على نبض الشارع السودانى؟


* واصلى ياصفية متابعة وان انشغلت بفوانيسى ومعاول نحتى

د . صفيه

متابعين ومنتظرين

عارفين رمضان والسودان

منتظرين هذا الحكي الجميل

تحياتي لضيوفك

وراجعين

أعزائي صباحكم سعيد مسائكم زين
عذرا عن غيابي لمدة 48 ساعة وذلك لاسباب خاصة جدا ، ساعود خلال اليوم وشكرا للمتداخلين والمتداخلات حنرجع بعدين بالتفصيل لكل زول.
عندكم في زمتي 2 بوست
سلام
صفية

العزيزة ماجدة عوض

شكرا لك كثيرا على المرور والتعبير الصادق النابع من القلب
لا تهتذري ولكننعتذر نحن اذ لم نق بالواجب تجاه الاعلان عنه بوقت كافي
شكرا ليك مرة تانية وخليك معانا
صفية

ياصفية حضرنا ولم نجدك.

وقرينا الفاتنا.

وفي انتظار الجديد.

أرجو أن يكون داعي الغياب خير.

أعزائي
صباحكم زين مسائكم سعيد
ولا تزال الظروف الخاصة تقهرني
الى اللقاء
صفية

هو فى أكثر من الجندر دليل على نبض الشارع السودانى؟

الاعزاء المجمر و د اشراقة الجندر مهم طبعا لكنه ما المشكلة
الوحيدة عشان كدة قلنا د صفية تشوت في كل الاتجهات

ودي

انا طبعا الا بعد ماجمعتا الزقازيق + السرد السلس والممتع وشلتا معاى الواحد وأبو مهيار اووووووووو= د. صفية مساعد ..
ياسلام فلاش باك وأخوة وأصدقاء
كل سنة وانت طيبة والاسرة الكريمة
خالص الود

سامى الطاهر

عشان ينبض الشارع

أعزائي صباحكم سعيد مسائكم زين
طبعا الردود كتيرة والمداخلات اروع لكن كدي بالاوال النكتب قصة الليلة قبال ما تروح مع زحمة الغسالة وغسيل العدة وسواة العصيدة. 1/3

حكاية الليلة حتتكلم عن قصتي مع الناس العندهم قروش اها يا الحبان الحكاية فيها قصتين واحدة زمااااااااااااااااااااااااان ما تسالوني من التاريخ لكن لما كنت في اول ثانوي والتانية حسع دي كان اربعة كان خمسة شهور فاتن.
في يوم من ايام العيد افتكر كان عيد الفطر ذهبت انا واختي لزيارة صديقة في بيتهم في الحوش ، اهلها من كبار رجال الاعمال في ابلد مش زمان قاعدين يقولو امدرمان مدينة الراسمالية والخرطوم بحر يمدينة العمال والخرطوم مدينة الموظفين ، يا جماعة ما تزرزروني التقسيم دي انا ما عملته لكن سمعته ساي من ناس الدنيا طبعا التقسيم دي كان ساري المفعول في الستينات واوائل السبعينات افتكر حسع القصة غير زي خكاية جدة غير عشان ناس بحري ما يزعلو.
اها ونحن قاعدين نتونس في بيت صاحبتي وشلة من صاحباتنا وبنات اهلها قامت جات ليك بت خالها الساكنين في العمارات وكانت بتقرا في القاهرة ومعاها خطيبها ولا الجكس بتاعها ما عارفة المهم اذكر انه كان زول قياافة كدة قعدو شوية المهم بت خال صاحبتي اصرت اننا نجي بكرة نقيل معاهم في بيتهم في العمارات ، قمت انا قلت ليها يا بت هيي هي العمارات دي بيمشو ليها كيف نحن يا دوب نزور صاحباتنا واهلنا بالكداري بالكثير نركب البرينسة لاهلنا في الثورة معليش ما حنقدر نجيك ، قامت قالت لا لا برسل ليكم السواق
كويس لكن ما وعد القصة دايرة تصريحات من ناس البيت وكدة وبعدين السواق دة ما يقوم يجيني براه يقومو ناس الحلة يكتروا الكلام لازم انتي تجي معاه
المهم السواق جاء وجات معاه بت خالتهم التانية ورحلنا الى العمارات ، الشوراع كيف كيف التقول دي اول مرة اقطع الكبري او امرق من امدرمان من اساسه. المهم ما اطول عليكم قمنا وصلنا بيتهم وعاد لكن هو ما حكاية حاجة كدة ولا في الاحلام خارج الوصف زي قصة الزول الساقوه من الصحراء لبغداد وقال عيون المها بين الرصافة ........ كان للحديقة ديك التقول بس غابات استوائية والشجر كيف المهم طلعنا شوية سلمات كدة ودخلنا وقالوا دي الرسبشن وبعد قعدنا شوية في الصالة شربنا العصير ، دخلنا اوضة بت خال صاحبتي ، غايتو طبعا الذاكرة خربة جدا لكن قصة انه الملايات ال في السرير زي الستاير بالظبط دي حيرتني شوية ياربي الناس ديل كلما يغيروا الملايات بغيروا السائر والله لكن دي حكاية ما شافو نحن كيف قصتنا كانت مع ستارة واحدة عشان نفصل بيها اوضتنا عشان تبقى اوضتين تعبنا كيف التقول اختي الكبيرة دخلت ختة للقماش وختة تانية للماسورة المصدية حكمتو بالغة.
وقاموا قالوا الغداء جاهز اشكال والوان واصناف بس ما بقدر اقول عليه الا الحادات والسنو والرعيف والسنو لانه نصهم ما بكون شفتهم، بس اطرف موقف كان في الغداء لما جات اختها الكبيرة وقالت لينا الله جايبة ليك حاجة لذيييذة خالص حتخلوا الاكل دة كلووتاكلوها معاي قلنا اتلفتنا نشوف الحاجة اللذيذة تتخيلو طلعت شنو كسرة بملاح بامية مفروكة وبيني وبين نفسي قلت الزولة دي ما نصيحة كسرة شنو البنخلي ليها الاكل دة كلو هي ما عرفة انه طول عمرنا نحن ناكل في الكسرة والرغيف عندنا زي الحلاوة ، وحكمتو بالغة الكسرة دي قاموا اكلوها بالملاعق .
ونسة في ونسة فيديو في فيديو قامت يت خال صاحبتي قالت لي
- يا صفية ايه رايك او خطبناك لعمو ص .....
- انا دي ؟
- اي انت دي
- افتكر ما بكون عند مانع
- والله افتكر عندي 4 موانع
- اها النسمع صفية فلسفة الموانع شنو
- اولا حاجة عمو ص دة قلتي اتخرج من الجامعة ليه عشرة سنين يعني بعملية حسابية بسيطة كدة انا على ما اخلص جامعة يكون الفرق بيني وبينه 18 سنة عمر زول يعني
- وتاني حاجة انا جني وجن الناس العندهمم قروش عمك دة عنده كم مصنع كدة وكم فيللا وحاجات انا لا بعرف ليها ولا بعرف اتعامل معاها ، تعرفي اذا حصل يعني زواج زي دة بكون تمامة عدد يعني زيي وزي اي حاجة قاعدة في البيت ، واتانيا هو ذاتونحن حنتفاهم كيف يعني قولي الحال مشى لو جا زارنا في البيت حيقعد وين انتي عارفة بيتنا دة عاملة زي القاهرة مش فيها كثافة سكانية عالية وبتكون بالنهار اكتر نحن نفسو بس بالعكس بتكون بالليل اكتر (الصباح الناس في الشغل والمدارس) بس البغلط يجينا زيارة بالمساء يكون جنى على نفسه ما بلقى ليه حتة ساكت يقعد فيا ن اها وخالك دة كان قال داير اخش الحمام مااظن حيعرف لادبخانتنا يا بتي القصة كدة ما راكبة همها

ونواصل
2/3
- اها يا صفية فلسفة وتالتا
- وتالتا عمك دة ذاتو حكااام تعرفي اليوم داك انا كنت جاية ل ن صاحبتي قمت ليقيت ليك شفع الحلة الصعاليك ديك قاعدين جنب باب النسوان لفيت ليك بالحوش التاني ودخلت بباب الصالون لقيت ليك عمو ص وبابا ي قام بعد ما سلمت عليهم عمو ص قال لي انت مالك جنك تلبسي بناطلين قمت قلت ليه مزاج اها شوفي جنس التامر دة هو مالو ومالي الحالة يعني انا صاحبة بنات البيبت بس يعني لما اكون جزء من البيت حيقول لي شنو
- اها ورابعا عشان نرد ليك
- ورابعا يا ختي الكلام دة زاتو رايك انتي يعني ما رايه هو والواحدة لماتحب تعرس على الاقل الزول الداير يعرسها يكون هو دايرة مش خطبوها ليه اهله
- نعرفي كلامك دة كلوا ما دخل راسي اولا قصة الغنيان وما الغنيان دي ارزاق يعني هو ممكن يكون عندو قروش الليلة وبكرة يكون ما عندو اما العمر بالعكس الذ حاجة تعرسي ليك زول اكبر منك علىالاقل يدلعك وكل طلباتك اوامر اما قصة انه دة ما رايي بالعكس دة راي عمو قال لي ياخي صحبتكم دي قدر ما احاول اتكلم معاها طوالي بتقفل المواضيع وحكى لي قصة البنطلون وهو قال ليك وكان متوقع انك تقولي ليه ليه كدة ما احلى ويقوم يدخل معاك في حوار خاص انتي قمتي طوالي عاينتي ليه من فوق لتحت وختيتي يدك في كوعك وقلت ليه مزاج ومعاها نظرة تعجب وعتاب انه هو ما من حقوا يسال سؤال زي دة
- طيب هو ما يتكلم طوالي شنو اللف والدوران عشان رد ليه طوالي حار حار
- تعرفي انتي ما عارفة نحن قاعدين نستغل اسمك يعني تذكري عيد ميلاد ن السنة الفاتت مش جبنا عجاج
- ايي
- طبعا عمو هو الجابو لينا قال لينا بالحرف الواحد لو صفية حا تجي عيد الميلاد انا بجيب ليكم عجاج وحفلة حيدر بورسودان ديك لمن ودعنا ا لما كانت ماشة امريكا برضو هو كان جايبوا لينا
- يا مجرمات والله كدة طلعتو ما اصحابي ، لكن خلاصة القول قولي لعمو صفية قالت لا لانك كبير وغنيان وكمان ما شجاع عشان تتكلم براك، وبعد ستة شهور بس من الحوار دي توفي عمو ص في حادث حركة وهو كا بيستعد لزواجه طبعا من واحدة قريبتهم.

ونواصل

Quote: قال لي ياخي صحبتكم دي قدر ما احاول اتكلم معاها طوالي بتقفل المواضيع وحكى لي قصة البنطلون وهو قال ليك وكان متوقع انك تقولي ليه ليه كدة ما احلى ويقوم يدخل معاك في حوار خاص انتي قمتي طوالي عاينتي ليه من فوق لتحت وختيتي يدك في كوعك وقلت ليه مزاج ومعاها نظرة تعجب وعتاب انه هو ما من حقوا يسال سؤال زي دة - طيب هو ما يتكلم طوالي شنو اللف والدوران عشان رد ليه طوالي حار حار

عارفة يا صفية تكتيكاتك ضعيفة خالص يعن الزول ده ما فهمتى قصدوا بس اقول ليك ربنا خارجك من انك تكونى ارملة طبعا فى السودان الراجل لم يموت قبل العرس العروس بتبقى شوم وبعذبوها ليك عذاب (شفتى الديسكرمينشن ده كيف )

لك ودى وواصلى

أعزائي صباحكم زين ومسائئكم سعيد
نواصل
3/4
اها القصة التانية كانت قريبات دي، في زي مجموعة كدة من البنات جمعتني بيهم ظروف دراسة ، المهم صادف انهن كلهن من الناس الهاي يعني العندهم قروش السايقة كامري والسايقة برادو والعن
ها هامر والتعبانة فيهم ديك عندها اتوساية.
بس انا حا احاول اقدم مقتطفات من حوار سوا انا كنت طرفي فيه ولا لا
المهم واحدة من البنات كان مفروض نشغل مع بعض شغل جماعي بيتطلب اننا نقعد مع بعض
- اها يا صفية تجيني ولا اجيك
- الزولة دي ما نصيحة تجيني وين يعني هي ما عارفة نحن سايبين الشاة كلها وساكنين في اوضة واحدة، فكرت شوية كدة وقلت ليها على كيفك غايتو كان جيتينا حتستمتعي جدا جدا حتلاقى ناس كتار يونسوك ويحكوا ليك حكايات كتيييرة وناس بيعزفو عود وناس بيغنوا وناس مصاقرين الانترنت وعلى مزاجك تختاري الحتة العجبتك تحجزي فيها لكن قصة اننا نقعد نقرا دي مافي.
- لا بجد كدي شوقتيني خلاص انا ح اجيكم اول مرة والمرة التانية انتي تجينا في بيتنا في الرياض
- اوكي
المهم في تاني يوم في العيد قامت جاتني هي واولادها الاتنين وزوجها ، وطبعا يعجوك ناس البيت وناس الحلة كمان اخر تراحيب وعلي العلي البت هي سمحة سماحة فايتا بنات طارق جبريل ال في حوش عوض ديك لغادي بالله التقول اصلها ما والدة ، اها والناس تتطاقش الجرى جاب البيبسي والمشى مسح الكراسي والصلح الملايات وطبعا عربيتها شفع الحلة اتلمو ليك فيها ذكروني ليك افواه وارانب ، المهم ماناغاني الحقيبة وعزف العود والشربوت نسيناهم ليك روحهم وطلعو اخر اليوم مبسوطين جدا
- لكن ناس بيتكم ظريفين خلاص والله الواحد يحسدكم على اللمة
- بيني وبين نفسي قلت ليها هي يا اختي ما لمة اختياري دي لمة اجباري عاد من وين نقدر ناجر ياهو كل زول فينا جاء اتكامل في بيت ابوه الى ان يفعل الله امرا كان مفعولا
- غايتو يا ناس امدرمان حياتكم حلوة خلاص نحن بالله هناك تكوسي لزول تنضمي معاه ساي ما تلقيه ناس حلوة وصافية ومستمتعة بحياتها.
- والله دة من زوقك لكن لا يخلو الامر من باعوضة ليلا وقاهرة مساءا يعني لو لحقتي اتاخرتي ممكن ما تلقىليك سرير تومي فيه ، الحمد لله الحكاية حجز بس.
- انتي مستهبلة
- وحاتك ما مستهبلة انا غايتو عشان عندي اولاد وراجل حالتي اخير من عامة الشعب يعني في شوية خصوصية لكن باقي الشباب الانتي شايفاهم ديل الشكل الصباح الصباح في السراير والمخدات والسفنجات يعني ما في خصوصية حياة مشاعية بدائية
-
ونواصل حكاية صاحبتي الساكنة في الرياض

ونواصل حكاية صاحبتي الساكنة في الرياض



يا سلام يا صفية نحن منتظرين شديد

بعدين يا صفية ده مشروع كتاب يحمل نفس عنوان البوست

وديـــــــــــــــــي

د . صفيه

هسي لو عرستي عمو ص ده ما كان موضوع المخدات و السفنجات اتحلا

لكن الخير في ما اختار الله .. ربنا يحفظ ليك اولادك .. يا بنات الزمن الجميل

Quote: ورحلنا الى العمارات ،

الدوك


الصيام قام بيك

متابع بشغف




بنبري

دكتورنا والي الدين
مبروك ال دي تي ام
شكرا ليك عزيزي وانت تتحفنا بمرورك الرائع، طبعا شايف نصائحك بقى عندها اثر وشوية حولنا للخاص ، وقللنا من الشئون ذات العلاقة بخانة الجندر لكن تعرف برضو ما قدرت اهرب منه فهو يسكنني فتجد كثير من المواقف الخاصة جد تضج جندرا رغم ادعائها البراءة منه.
شكرا لك مرة تخرى ويبدو انك حتكون من االمنافسين على جائزة اكثر المتداخلين.
شكرا ليك
صفية

Quote: فانفقعت بكا وضحك بكا من الموقف وضحك من الضابط المدينا دفرة

د. محمد حسن تعرف انا طوال فترة التسعينيات شاءت الظروف ان اكون خارج السودان فيبدو انه فاتتني مواقف طريفة زي دي الرجاء كتابة المزيد للتوثيق لهذه الفترة وخاصة جانب الحريات الخاصة.

Quote: ورحلنا العمارات

خطا مطبعي او لغوي
اختار البتعجبك نحن طبعا عاملين زي السمك كان طلعوه من الموية بموت ياها دي حكايتنا ونحن وامدرمان نرحل ويييييين دايرنا نموت يعني. برضو لا يخلو الامر من رمضان حااااااااااار شديييييييييييي وكهرباء يا اما قاكعة قطع الله الرسول او قاطعة قطع جيب خاصة مع آخر الشهر وقباله رمضلن وجاييه عيد ففاتورة الكهربا هي اول حاجة يتم الخنصرة منه.


شكرا ليك
وخليك معانا
صفية

Quote: ولكن هو الرهق اليومى ونتائجه .

الحبيبة تيسير ألف مرحب بيك في حوش ناس مساعد ونورتي وآنستي وشرفتي.
طبعا انتي جبتي اللي فيها المفيد الرهق اليومي هو منهكنا وهو يدعونا للابداع
شكرا للمرورو وخليك معانا
صغية

Quote: من جاى لجاى هبشتى جاى فتشتى جاى كان تلقى شيئ لازمك كتير شان تقدرى لازمك كتير اتقدرى

عزيزيز ابو يسرا شكرا على المداومة والاهتمام والاغنية والقصيدة تعرف فعلا يا هو دة حالنا في السودان مع تفاوت درجات المعاناة لازمن كتيييييير كا نقدر واهو بنتقدر

شكرا وخليك معانا
صفية

Quote: just to say Iam here

Dear Dr.
Just to say you are wellcom any time any where seven days a week 24 hours a days

Safi

Quote: لك مودتى/ رباب

أووه رباب الكارب ضخصيا والله دة شرف عظيم جدا لينا ، حقيقة اسمع عنك كثيرا وسعدت جدا بتعلقياتك شكرا ليك خليك معانا واكيد وجودك بيفرحنا وفيه دعم معنوي كبيير.
ودمتي
صفية

Quote: رمضان سخن ولا الجماعة ديل لموا فيك

د. والي الدين تشكر على الاهتمام تعرف لا هذه ولا تلك بل الجندر ، كيف دي بجيك ليها برواقة ومعاها كباية شاي ولقيمات
صفية

Quote: UP

شكرا ليك ابو يسرا للاهتمام وان شاء الله ترفع يديك في الكعبة وتدعو لكل السودان ينفرح همو قول آمين
صفية

Quote: بس انا راجى حكايتك مع ناس الامن دى بفارق الصبر

الجميل دوت
شيل الصبر معانا شوية الموضوع عند مستشارين للاخراج
تسلم
وشكرا على الاهتمام
صفية

Quote: كل سنة و إنت بألف خير Quote: - زول ينزل معاي المراتب يا .... و يا...... الإجازة الفاتت دي .. دة كان حالي كل يوم .. و أنا ما أتكيف إلا لنومة السطوح أو الحوش دمت

ابو جهينة شخصيا لا الكلام بعد دة دخل الحوش لكن المرتتب دايرة تمرق منه نسوي شنو يا هو دة السودان يا هو دة الفقر
شكرا كتييير شرفت وانست وأسعدت نتمنى تتكرر الجية و ما حالة الفقر تكون سبا في نفوركم
سلام
صفية

Quote: هو فى أكثر من الجندر دليل على نبض الشارع السودانى؟

د. اشراقة مهندس هشام والله صدقتو هو ما في اكتر من الجندر دليل على نبض الشارع واضيف ليها لو ما استوى موضوع الجندر وعلاقاته مشاكل العالم وبما قيه السودان ما يتتحل

شكرا على المرور والاهتمام

وخليكم معانا
صفية

Quote: انا طبعا الا بعد ماجمعتا الزقازيق + السرد السلس والممتع وشلتا معاى الواحد وأبو مهيار اووووووووو= د. صفية مساعد .. ياسلام فلاش باك وأخوة وأصدقاء كل سنة وانت طيبة والاسرة الكريمة خالص الود سامى الطاهر

الله سامي الطاهر الزول القيافة شخصيا لا حول الله ياخي انا سعيدة جدا باني اسمع عنكم ولو عن طريق الكيبورد، اخبارك شمو وقاعد وييين وعملت شنو كدي دة داير ليه ونسة براني ضروري ترسل لي ايميلك مع تحياتي وشكري على مرورك

تقبل تحيات طارق، محمد13 ، ايثار9 ،الق7، عبد الجليل5
وخليك معانا
صفية

ياسلام يا دكتورة ...

متابعين . .

لكن وينا قصتك مع الجماعة .

أؤيد اتجاه جمع هذه التحف في كتاب ....

Quote: د . صفيه متابعين ومنتظرين

كتر خيرك دكتور حاتم
وشكرا على الدعم والمرور
ودي
صفية

Quote: لكن وينا قصتك مع الجماعة .

عزيزنا نستة زولنا
تعرف الموضوع اديناه لمخرج يتفادى لينا فيه الاخطاء الفنية ويصحح اللغوية تقريبا حيكون الحلقة اللي قبل اخيرة لان اخيرة حتكون عن نتائج المسابقة واعلان الفائزين
شرا على المرورو وخليك معانا
صفية

Quote: ياصفية حضرنا ولم نجدك. أرجو أن يكون داعي الغياب خير

.

عزيزنا ابو مهيار
والله الحمد لله في النفس الطالع ونازل ، لكنه كما قالت تيسير الرهق اليومي
شكرا على المرورو وخليك معانا
صفية

Quote: الديسكرمينشن

تيسير النوراني منورة ياختي

المخ ما بقى تخين قعدت نص ساعة عشان افهم ديسكرمناشن دي شنو المهم في الاخر فهمتها ، لكن بيني بينك ارملة غنيانة بتلقى كتار دايرين يعرسوها مش؟

شكرا ليك مرة اخرى وخليك معانا

سلام صفية

Quote: عشان ينبض الشارع

يا سلام ابو ساندرا اخجلتم تواضعنا شكرا ليك

اعزائي صباحكم زين مسائكم سعيد
نواصل حكاية صاحبتي الساكنة في الرياض
اها تاني يوم طوالي جاتني هي وراجلها عشان يسوقوني اقيل معاهم لزوم انه عندنا قراية وكدة،

في الطريق
الحوار بينه وبيني فقط اين هي لا ادري هل يا ربي انا "براية" ولا هي ما لاقية مداخل الله قدر ما حاولت اصلح مجرى الحوار كمان هي ما مساعداني برة الشبكة في عالم تاني وكتين حكة قصة حكت عن سهرهم في الكوافير مع الحنانة هل نان دة انا شهرا ما عندي فيه نفقة لا عارفة اسامي الحنانات ولا المشهورات فيهن، ولا الكلام عن مدرس الموسيقى بتاع بتها ، هو بالله الموسيقى بجيبوا ليها مدرسين خصوصين في البيت قادر الله.

المهم وصلنا البيت ، يا جماعة معليش طبعا المرة دي كبرنا يعني ما حصلت لي حالة انبهار زي الاولى ديك لكن يبدو بيتهم جميل انيق ينم عن زوق راقي في الاختيار ويخلو من البذخ المتعمد فيه اناقة واضحة مع بساطة جميلة. بعد ان اوصلنا زوجها اللي اصر ان يصطحبنا بعربته الخاصة على الرغم من امتلاكها هي الاخرى عربة اخرى "قال عشان جاي يشكر الناس على اليوم اللذيذ القضاه معاهم". خرج الزوج بعد ذلك مصطحبا طفله وطفلته "هو الشفع ساقوهم ليه ما كل واحد منهن عندو بيبي ستر فلبينية دة غير الشغالة الحبشية المسئولة من المطبخ. والزول المسئولة من النضافة والغسيل والمكوى باختصار الشغالين اكتر من ناس البيت.
قعدنا في الصالون ثم حولنا لغرفة المعيشة.
حوار
- انتي تعالي النسالك راجلك دة بتعامل معاك كدة ليه؟
- يعني لاحظتي مش
- طبعا واضح جدا يعني لاغيك تماما في اي حاجة دة شنو دة يا ختي
- دة هين انتي ما شفتي لما يصحيني الساعة اتينين بالليل عشان اقوم اسوي ليه العشاء.
- تسوي عشا ليه والجماعة ديل ماجرنهم ديكورات
- قدر ما اقول ليه ما الشغالة بتعمل ليك العشا ء يقوم يقول لي انا معرس الشغالة قومي بلا دلع بتاع نسوان
- هو اصلا ليه بيساهر
- ما لمن يخلص سكرو مع شلته
بيني وبين قلبي الله الحكاية فيها سكر وشراب تعبتي عاد ديل ما تساليني منهم انا ، الله يكون في عوننا!!!!!!!
- برضو ما مبرر انه يلغيك تماما انا بالمناسبة اتعقدت جدا قلت حسع انت تفتكري شنو
- لا لا ما تتعقدي ولا حاجة اصلا هو عادته كدة من ما يشوف ليه ناس جداد بحب استعرض عضلاته ويرسل الرسالة اياها انه انا ما بعرف حاجة وما بفهم حاجة واني تمامة عدد ديكور يعني زيي وزي اي كرسي في البيت .
- طيب انتي ما تتكلمي معاه او خلي زول تاني من اصحابكم يناقشة، ولو ما عندك مانع انا بتكلم معاه هو باين عليه زول راقي واتولد في لندن واتربي في كل بقاع العالم ابوه ما كان سفير مش واتخرج من اكسفورد يعني ما زول اي كلام.
- لا لا لا انتي مالك دايرة تجيبي لي المشاكل لو حصل انك فتحتي معاه موضوع زي دة حيقول ليك انتي كلام لذيذ واجي انا ينجضني بجاي كمان اخر الزمن انا بقيت ملطشة اليسوى واللي مما يسوى يجي يناقشني ويعلمني كيف اتعامل مع زوجتي كل منك انتي اكيد بتحكي ليهم حاجات من بنات افكارك تافهة سطحية ما عندك مخ وما بتعرفي اي حاجة في الدينا نفسي يوم اشوفك بتتصفحي في جريدة ولا بتقرا في كتاب او بتشاهدي في برنامج هادف عليك الله حسع انتي فايدة حياتك شنو ياهو تنومي وتاكلي وتنومي وتمشي الكوافير والحنانة.
- طبعا امبارح علق لي عليك قال لي اول مرة تصاحبي ليك واحدة زي الناس على الاقل بتعرف تتكلم مش زي صاحباتك القاطعاهم من راسك حاولي اتعلمي منها.
- غايتو رجال الدنيا ديل ، طبعا حسع لو سالتي راجلي مني حيقول ليك ياخي دي كرهتنا الحياة في البيت دي ذاتو ما بتعرف تقول ليها كلمتين الا وقاطعتك تقصد شنو والمصطلح مفهومه شنو حيقول ياخي انا نفسي نقعد نتكلم كلام عادي زينا وزي ناس الدنيا يعني ما كلة كلام مثقافتية ، حيقول ليك كمان نفسي اسمعها يوم تقول ماشة اتحنن ولا ماشة الكوافيرالرجال ديل كلهم ما في زول عاجبه العنده .
-لكن انا شاعرة بيك متاثرة شديد يعني في سحابة كدة من حزن دائم رغم محاولتك اخفائها
- اي والله ما عارفة انا لو استمريت معاه بالطريقة دي حا اجن ما الزول برضو محتاج لكلمة طيبة حلوة تعزز ليه ثقته بنفسو وتديه دوافع انه يستمر لكن معاه كدة انا شاعرة اني كل يوم بدمر حا اصل مرحلة اللا عودة
- طيب انا اقول ليك نصيحتي شنو لحالتك دي
- اها
- اول حاجة تحاول تكوني نفسك ابحث عنها اكيد حتجديها انت مشكلتك لانك خاتاه هو محور في حياتك وهو ما معتبرك شريك ابقى ليه الصورة المقلوبة دي ابعدي من دائرته وكوني نفسك
- ما فهمت اكون نفسي كيف
- يعني حاولي اعملي الحاجات اللي انتي عاوزاها بتحبيها بتقدري تبدعي فيها
- انا ما عارفة لي حاجة محددة
فكري واكيد حتلقي وتعرفي مثلا تنسيق زهورالحديقة ،عمل طوعي ، رسم شخبتة تلوين زيارة معارض قراءة او ونواع معينة من القراءات المهم اي حاجة بشرط انك تكوني حاباها.
- انا غايتو بحب السفر
- خلاص سافري
-نان البخليني اسافر براي منو معقولة دي
- حاولي امكن
- وبعد عدة شهر اتصلت لي قالت لي انا ماشة كندا ادرس لغة انجليزية من هنا حتكون نقطة البداية ان شاء الله
- قلت ليها مبروك لكن ما تاخديني في دوكة اقنعتيه كيف
- معليش اعذريني اقنعته بيك
- كيف يعني قلت ليه صفية قالت لي لازم تحسن مستوى اللغة الانجليزية عندك عشان تقدري تلقي شغل ، وانا دايرة شغل اجد من خلاله نفسي)
- شبابك معاك
- لا قاعدين في البيت مع ابوهم
-والله لكن قوية مبروك علمناهم السرقة سبقونا عالابواب حسع انا لي ستة شهور بقنع في راجلي عندي سفرة طويلة شوية بقنع فيه اني اخلي معاه الاولاد واسافر براي ما مقتنع.


ونواصل

كتبت اشراقة

Quote: وفى انتظار ابوساندرا البفتح فى المواضيع الصعبة والبتجيب مش الهواء فى الحقيقة دى بتجيب عواصف عواصف بنحتاجها، ممكن تقلب النظام

ونضم صوتنا لها
صفية

اعزائي صباحكم زين مساءكم سعيد
يخسي عليكم يا ... و..... و.... يعني اعيا لي يومين القى بوستي نزل الصفحة الرابعة ، كتر خيركم.

المهم نواصل بعد ان استرديت قليل من العافية ، في ناس قالوا لي دة ما عيا قولي دايرة تزوغي من رمضان لكن والله العظيم الكلى دي عندنا وراثة ، غالبية اهلنا بيكونو ماتو بسبب الفشل الكلوي. المهم الحمد لله طلعت شوية املاح اها كان ما دايرين تعلقو على البوست قولي لي سلامتك ساي ان شاء الله.

ونواصل

صفية
سلام

دى عين

عين منو ما داير اقول

سلامتك وناس البورد كلهم كرامتك

ارجعى لحكاياتك الجميلة بسرعة

منتظرنك

Quote: منتظرنك

د. صفية منتظرين حكاويك
محبتي الاكيدة

أعزائي صباحكم زين مساءكم سعيد

اولا اشكر كل من كلف نفسه عناء الاتصال التلفوني او البريد الالكرتوني للاسفسار عن والاطمئنان على حالتي الصحية خاصة الناس الضربت من خارج السودان . "الحمد لله نحن بخير ووصلنا مكة ونازلين على المدينة" طبعا العبارة دي بتذكرني اللقاءات في الراديو والتلفزيون ايام الحج قبال انفجار ثورة المعلومات والاتصالات.
اها يا الحبان نرجع لحكاوينا المرة دي من نبض الشارع وبالتحديد يوم 30/7/2007 ولا يا ربي 30/6 ما متذكرة بعيد عنكم زهايمر "هو زهايمر ولا خرف جد جد" ما معروف. طبعا المرة دي بكل شجاعة كتبنا التاريخ ما مافيها حساب عمر طبعا في حكايتي الفاتت ديك لمن قلت ليكم كنت في اولى ثانوي وقلت ليكم اوعى تسالوني من التاريخ تذكروا. طبعا النسوان جنهن وجن حساب العمر انا غايتو ما عارفة أ/سلمى ود/ اشراقة ديل جابو الشجاعة من وين ولا انا الحالة الشاذة الوحيدة عندي احساس اني عمري لسع 18 سنة.
المهم يا جماعة نرجع لموضوعنا اليوم دة كان اخر يوم لتبديل العملة في السودان من الدينار للجنيه الجديد ، والله غايتو الدينار دة مسكين خلاص جاء ما في زول رحب بيه وقعد معانا كمين سنة مافي زول ناداه باسمو بس الا كان يشوف روحو مكتوب "يقول دة انا اسمي مكتوب" ومشى ما في زول حزنان عليه مسكين غايتو الدينار..
المهم ونحن راكبين في الهايس ولسع ما اتحركت جات ليك من هناك مرة كدة انا غايتو قاسمة شباب بعتبرها وفي ناس شايفنها كبيرة وفي ناس يا حليلة صغيرة كل زول على حسب احساسو بعمرو ، المهم المرة دي عمرها بكون زي اواخر الاربعين بداية الخمسين.

 المرة للسواق الحافلة: يا ولدي الحافلة دي بتوديني البنك المركزي
 لا لا مابتوديك كان ركبتي الحافلات ديك بيودنك لانه نحن بنطلع بالكبري القديم
 واحد اخر: هو انت دايرة البنك زاتو ولا ماشة جنبه
 لا دايرة البنك
 وثالث يا حاجة الساعة اربعة بعد دة ما في بنك فاتح
 لكن ما قالوا القروش بيغروهن في البنك والليلة اخر يوم
 اي لكن بعد دة بنك السودان بكون قفل
 وتطوع اخر: لكن ما في مراكز لتبديل العملة
 \ويسالها اخر انتي ساكنة وين
 انا ساكنة في الجريف
 طيب ما كان تمشي حلة كوكو جنبكم هناك في بنوك ومراكز نبديل
 عاد يا ولدي انا شن دراني
 واخرخلاص يا حاجة تخشي بجاي فرع شارع الجمهورية وتلقي الناس قاعدين يغيروا ليك
 سمح يا ولدي لكن بدور اركب ولا امش ساي
 ونط شاب دقيقة دقيقة يا حاجة انا بوصلك
 والله كتر خيرك يا ولدي
ونزل صاحبنا ذو ال 25 عاما واول ما نزل قام واحد من هناك حسع الولد دة تحريهو لي نزل بس عشان يوصلها والله انا خايف يكون ناوي على نية
 يا خي حرام عليك الولد قام بكل شهامة
 غايتو كان ناوي الينوي بالله القروش بس عند النسوان والاولاد والرجال عواطلجية ومفلسين
 والنسوان بايرات
 والله لكن حكاية
المهم الزمن دة كنا وصلنا جنب الهلتون قام الكمساري قعد يكشكشك في اشارة لدفع اجرة العربة وهنا بدا الفلم ، واحد من الركاب اداه ليك الجنيه القديم
 الكمساري يا زول دة ما بنفع ما بشيلوا
 انا مالي ومالك تشيل غصبا عنك مش الليلة يوم 30 اخر يوم يعني تشيله وما تشيله المهم في تشيله وما تشيله ديك الحكاية جاطت ، واحدين اخدو جنيهاتهم القديمة واحد بس عكلت عكلتة شديدة بالقانون انت مفروض تشيلها المهم قام السواق حسما للخلاف اللي داير بين الكمساري والركاب قال ليهي ياخ شيلها وجيبها لي قام الولد اداها ليهو السواق طولي مسكها وقطعها وجدعها في الشارع الزمن داك كنا وصلنا حديقة الموردة.
قطيعته ليها كدا قام الزول الاداها ليه يبدو انه القطيعة حرقته ، قال
 انت عارف العملته ده غلط
 كيف غلط
 دي قروش تقطيعها بيعاقبك عليه القانون
 مواصلا ايوا الدولة بتخسر عليها فلوس عشان تتعمل وانت عارف بنص المادة..... من قانون......
 قام ليك واحد من ورا بس بس اقيف لحد هنا بس هو نص المادة كدة من قانون كدةما جاء الا لمن الزول دة قطع قروشه حكمة الله هي قروش جايبها بعرق جبينه يعني لا مختلسها لا مغسلها لا سارقة من الناس عليك الله يا اللخو كان عندك قانون كدي خلي الالف بتاعت الزول دة وامش شوف الحرامية الكبار ناس غسيل الموال وناس الاختلاسات ونحن ديل الحمد لله هو زاتو ما عندنا قروش عشان نقطعها ولا يقولو جبناها من وين الحمد لله للفلس احيانا فوائد.

للحكاية بقية


صفية

Quote: عندي احساس اني عمري لسع 18 سنة.

يعني أنا اكبر منك بسنتين تلاته كدي غايتو...

أنا إحساسي بأنه عمري يعني 28 أو 29 كدي ..

آآآآييي يا ود جبريل الداير يطفر .. يطفر ما لى دعوة ...

أما موضوع تبديل العملة وا ادراك ما العملة وا|لإنتخابات وكده

الحاجات ده أصله ما شفتها ولا شاركت فيها منذ 1988م

وحكاياتك ده يا دكتورة تنفع مسلسل في الإذاعة وليس التلفزيون

لأنه بصراحة بموووت من الغيظ لمن أشوف السودانيين بمثلوا..

هم في وادي والتمثيل في وادي آخر ...

غايتو الأ تطلعي كبسول وجمال محمد سعيد( عشان بحب الكوميديا)

دكتورة ياخي معليش على الخربطة ده ..

هوالموضوع كان شنو ؟؟؟!!!

Quote: هوالموضوع كان شنو ؟؟؟!!!

انا عارف؟
شكرا دكتور على المرور وتسلم

حمدالله على السلامة

البورد نور

-

Quote: البورد نور

دكتورنا ازيك والله البورد منور باصحابه
سلام
صفية

Quote: آآآآييي يا ود جبريل الداير يطفر .. يطفر ما لى دعوة ...

د. احمد
ما قلتو نوبة



د. صفية كيفنك

Quote: سلامتك وناس البورد كلهم كرامتك ارجعى لحكاياتك الجميلة بسرعة

مهندس هشام تسلم من كل اذى
شكرا على الاهتمام
خليك معانا
سفية

د. صفية

تحياتي وأشواقي وكفارة وألف بعد الشر عليك

اسباب كثيرة حرمتني من متابعة هذه الجمال ولكن منذ الآن سأكون أكثر حرصا، على الأقل، على المتابعة .

أخونا نستة
ازيك ياخي
كتر خيرك وان شاء الله ما نفقدك في شينة واها مواصلين بس النكرم الضيوف الجونا اول مرة ديل وبعد داك جاياكم ويديني كلهن دقيق وسمن الله حلانا من العصيدة
سلام
صفية

أووه صديق حمدتو كلو بهنا
والله لكن ده خبر سعيد الف مرحب بيك شرفت نورت وآنست
تحياتي للشباب وامهم
تسلم وخليك معانا
صفية.

د. طارق جبريل ازيك وزي ما قال اخونا احمد

Quote: الداير يطفر .. يطفر ما لى دعوة

تحياتي وكل سنة وانتو طيبين مقدما
صفية

أعزائي اها نواصل قصة اخر يوم في تبديل العملة

قامت واحدة كانت راكبة قدام ، واللي هي انا، وبحماقة شديدة طلعت ليها 10 الف من الشنطة وقامت قطعتها وقالت ليه يا انت الشابكنا خطا والقانون وما ادراك ما القانون اها دي انا حسع قطعتهم كمان عشرة ما الف واحد عشان اوريك الجعولية الما بتعرفها،، هو انتو يا اخوانا سؤال عارض كدي يعني شنو المتلازمات بتاعة الجعليين عورا ولا لما يحبو يدلعوها يقولوا حمقاء والشوايقة (جبارين) مع الاعتذار يا جماعة دي ما تقسيمي دة سمعته من ناس الدنيا والحلفاوييين ما عندهم علاقة مع الدين والجنوبيات قوام فاره و.. والغرباويات سويات للأكل وناس الشرق ديك بس خلي ليهم القهوة صحي الكلام دة يعني صاح ؟؟؟ سعال
كدي قبال ما ندخل في السوال النشوف قصة اخر يوم العملة
بالمناسبة (الزمن داك كنا وصلنا شارع بيتنا) انا اسمي صفية و ساكنة في الشارع دة "اقيف يا بتاع الحافلة النتم ليه الكلام حتى تمشي" وكان سالت اي عصفورة في الشارع دة من بيتنا بتوريك ليه بتاع الموبيليا ولا الجزار ولا بتاع الخدار ولا سيد الدكان ، بالمناسبة انا بطلع من بيتنا الساعة 8 صباحا بعدين عشان اسهل قبال 8 تجيب عساكرك وتجي تقبضني عشان حكاية العشرة الف جنيه ديل لاني والله حابة اتعرف بالقانون ومواده وكمان ما تنسى تاخذ اسم زولين من الحافلة عشان يكونوا شهود لاحسن انا انكر وكدة. وكان ما حصلتني في البيت انا شغالة في العمارات شارع 15 جنب المحاميد يعني لو وقفت هناك كل يوم الساعة تسعة بتلقاني اوكي.
بيني بينكم وانا بقول ليه في الكلام دة وما مقتنعة بانه صح ما هو كلامه برضو فيه نوع من الموضوعية لكن تقول شنو حالة تمرد تملكتني او الجعولية شالتني اها حسع العشرة الف دي كان انا اديتا لمسكين ساي ما اكان اخير من اقطعها غايتو يالجعليين عليكم جنس عوارة ايوا دي رجعتنا لقصة الصورة النمطية لبعض المجموعات الاثنية والقبائلية ان وجدت غايتو انا شخصيا اصلي ما قاعدة اعتبر روحي جعلية الا من شوية الحماقة مش يعني ما جعلية بس انتمائي هو لمدينتي امدرمان لبلدي السودان الذي ما زلت احمل جوازه حسع كان كانو غيروه بجواز امريكي ما كان اخير يا ربي هو اخير؟ والله ما عارفة لكن سودانا على راي ود هباني بكرورو دة عاجبنا ودايرنه يكون احسن بلد ولا ما كدة
يا جماعة.
سوري يا جماعة لكن حاجات الخبيز جات وقايمة اعمل " كع وعك" على راي اسمو منو متولي الشعراني ولايوسف القرضاوي ما عارفاه من فيهم. ولسع حنواصل في موضوع الانتماء والهوية والصورة النمطية.

قصة القروش انتهت على كدة لا في زول جاني ولا عيوناتو لكني والله دايرة اعرف القانون لو في زوا عارفو يورينا ليه

يا دكتورة الله يديك العافية













عاش الزقازيقاب

Quote: قامت واحدة كانت راكبة قدام ، واللي هي انا

يا الله ..أحييك

Quote: - انتي تعالي النسالك راجلك دة بتعامل معاك كدة ليه؟

ناس ماعندها غير خراب البيوت

حالة أخير منها العرس
صفية الامدرمانية

تحيات طيبات

Quote: عاش الزقازيقاب

أخونا حيدر تحيا مصر عاش هرابي وعاش الزقازيقاب
شكرا على المرور والله يديك العافية انت وخليك معانا
صفية

أخونا حسين محي الدين

Quote: تحيات طيبات

الله يحييك نورت الدار
شكرا على المرور وخليك معانا
صفية

Quote: ناس ماعندها غير خراب البيوت

بهاء بكري
حمد الله على السلامة
والله ما خراب لكن صليح
شكرا على الطلة وخليك معانا
صفية

Quote: يا الله ..أحييك

اخونا نستة

يا سلام عليك شكرا للتشجيع

وخليك معانا
امكن تفوز بجائزة

صفية

ود جبريل
أزيك نورت الدار
خليك معانا وما تطول الغيبة كدي
صفية

كل عام وانتي بخير ياصفية
في انتظار يوميات رمضات

العزيزة صفية

كل سنة وانتى طيبة/مبدعة وجندرية واعية بهموم كل الكمينونتى { دى مالها بقت زى الكمونية كدى.. }


المهم ياستى رسلى لى تلفونك على الماسنجر، ضرورى!!

يومك طيب

Quote: دى مالها بقت زى الكمونية كدى.. }

د. اشراقة كل سنة وانتي طيبة
مالك علينا جايبة لينا الكمونية من حسع
رسلت ليك التلفون في المسنجر
صفية

up

العزيزه صفيه،
و صلت متاخره و رغم هذا
تذوقت حلاوه نبض الشارع
و تابعت السرد و التعقيبات
و ناقشت من هم حولي حول جمال الحكي و حلاوته
و حول الربط ما بين عده احداث هنا و هناك
و طبعا استمتعت حثي الثماله
و في انتظار النبض القادم
ايا كان،
مع ودي

ازيكم يا ناس

سلام خاص يا اميرة
يا سلام عليك يا اميرة احييتي في بوستي الروح بعد ان حسبته رحمه الله
شكرا على المتابعة والتعليق
الحكاوي كتييرة وجاياك
صفية

عزيزتي صفيه،

"يا سلام عليك يا اميرة احييتي في بوستي الروح بعد ان حسبته رحمه الله"
بوست زي ده ما حيروح فقد دخل فينا و في تاريخ البورد
برشاقته و خفه دمه و نبضه الحقيقي

والله انا مثل صاحبته يا أميرة
كنت فاكرو إنتهى بنهاية رمضان
ولحق الزينين
وامهات طه
شأنه والمسلسلات
أو هكذا فهمت من صافية النية

عزيزنا ابو ساندر
اولا بالتبادي حمد الله على السلامة

Quote: كنت فاكرو إنتهى بنهاية رمضان

انا ذاتي قايلاه هيك لكن نزولا عن طلبات الجماهييييييييييير ( هي بس اميرة) حينزل تاني ابتداءا من يوم السبت القادم ان شاء الله الحكاوي كتيييرة وما بتخلص
اها ودعتك الله

صفية

العزيز ابو ساندرا،

مره اخري الف حمد الله علي السلامه
و بوست زي ده ما حيلحق "امات طه"
...
"لكن نزولا عن طلبات الجماهييييييييييير ( هي بس اميرة"(

لا و الله فالجماهير من القراء بالكوم

أميرة اهلا بيك تاني وتالت
غايتو قدر ما قلت زول يجي يقول سلام ما جاء زول اها قلنا نشركرك مرة تانية.
وعلى حسب وعدي يوم السبت مع حلقة جديدة
بس اوعى تتمقلبي زي مع طارق جبريل كل ما اخش اقول تم الحكاية القاه بسل معلى زول

سلام صفية

الاخت صفيه

و الله ابداع

و متابعيين


مي الاسيد