رمضان في تشاد .. مدخل للتعريف بعادات وتقاليد تشادية

رمضان في تشاد .. مدخل للتعريف بعادات وتقاليد تشادية


09-13-2007, 01:17 AM


  » http://sudaneseonline.com/cgi-bin/sdb/2bb.cgi?seq=msg&board=120&msg=1190281193&rn=0

Post: #1
Title: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-13-2007, 01:17 AM

رمضان كريم
تصوموا وتفطروا على خير..
الله يقدرنا على صيامه وقيامه..
الله ينجينا من كفارته..
الله يرد غربتنا..
ومويات رمضان الجاي يا ولدي إنشاءالله من يدك مرتك..


هكذا هنأتني أمي عبر الهاتف قبل قليل بحلول شهر رمضان المبارك..




وبجيكم راجع.








_______________________________________________________________________
البوست ده حيكون معانا للعيد .. العندو راي يقولوا قبلما نبدا.
Post: #2
Title: Re: رمضان في تشاد .. مدخل للتعريف بعادات وتقاليد تشادية
Author: Tragie Mustafa
Date: 09-13-2007, 02:26 AM
Parent: #1

منورنا يا محمد نور كعادتك
وكل عام وانت بخير ,وتصوم وتفطر على خير
وربنا يديك الهديه و الرضيه البتعينك في غربتك.
وبلغ تحياتنا ومحبتنا للوالده عندما تتصل بها المره القادمه.
Post: #3
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-13-2007, 09:25 AM
Parent: #2

تراجي ازيك ومنور البوست والله
Quote: وربنا يديك الهديه و الرضيه البتعينك في غربتك.

غايتو بعد دعوتك السمحة دي ببقى ليك في رقبتك .. محل بتخطبي لأولادك ده ما تخطبي لأخوك معاك.?
مسئولة من الخير يا تراجي .. ما عندك بنية شديدة شبهك كدي ترضى بينا نتم بيها ربع دينا الما داير يتم ده؟
Quote: وبلغ تحياتنا ومحبتنا للوالده عندما تتصل بها المره القادمه.

الحاجة بتسلم عليك شديد .. وقالت ليك ما تشاكليني .. وحترسل ليك أبري مع أول زول جاي كندا.
كده يتخيل لي الحاجة ما قصرت .. بالله ركزي معانا.
Post: #4
Title: Re: رمضان في تشاد .. مدخل للتعريف بعادات وتقاليد تشادية
Author: حيدر حسن ميرغني
Date: 09-13-2007, 09:31 AM
Parent: #3

رمضان كريم ياصديقي

اعاده الله علينا وعليكم وعلى الامة الاسلامية باليمن والبركات
Post: #5
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-13-2007, 09:49 AM
Parent: #4

صديقي/ حيدر ميرغني رمضان كريم لنا جميعا.
حقق الله أمانينا جميعا.. وجعلنا من عتقائه .. وبلغنا رمضان القادم بأمن وسلام وطمأنينة.
Post: #6
Title: Re: رمضان في تشاد .. مدخل للتعريف بعادات وتقاليد تشادية
Author: مجاهد عبدالله
Date: 09-13-2007, 09:55 AM
Parent: #1

محمد نور أزيك يا محترم ورمضان كريم ..
وأعاده الله على بلادننا بالإستقرار والطمأنينة والخير الوفير ..

منظرين التعرف على العادات والتقاليد التشادية والتي فيما أظن لن تختلف كثيراً عن السودان..

شكراً لهذا الخيط ..

خالص الود ..
Post: #7
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-13-2007, 10:13 AM
Parent: #6

ما قبل رمضان:
يبلغ سكان تشاد عشرة ملايين نسمة تقريبا يدين 85% منهم بالدين الإسلامي على المذهب المالكي، مما يجعل شهر رمضان مناسبة تخص الجميع تقريبا.
يتهيأ التشاديون لإستقبال شهر رمضان منذ بدايات شعبان و الذي يطلق عليه في العامية التشادية إسم "قصير" ، وذلك تلهفا واستعجالا لشهر رمضان.
يعتمد التشاديون بشكل عام في تحري هلال رمضان على الأفراد من مختلف أصقاع تشاد بجانب الإعتماد على تخري الهلال في المملكة العربية السعودية والتي بناء عليها يتقرر الصيام من عدمه. ولذلك تجد التشاديون يتحلقون حول الراديو في يوم الشك بعد صلاة المغرب مباشرة ليأتي صوت إمام المسلمين في بيان من المجلس الأعلى للشئون الإسلامية يؤكد ثبوت رؤية الهلال، وإذا لم بثيت رؤية الهلال لأي سبب من الأسباب وأصبح اليوم التالي هو المكمل لشعبان تجد الأهالي يتحلقون حول المذياع بنفس الطريقة لسماع بيان المجلس الأعلى للشئون الإسلامية على الرغم من تأكدهم من أن غد يوم الصيام, وأصبحت تلك خصلة ملازمة للأهالي في كل رمضان. و حتى وقت قريب كان التشاديون يستقبلون شهر رمضان بإطلاق الذخائر والأعيرة النارية فور سماع البيان الرسمي لثبوت الهلال تعبيرا عن فرحتهم باستقباله.
يفرح التشاديون بشهر رمضان فرحتهم بالأعياد، فتجد المساجد والساحات العامة عامرة بالذكر والإبتهال والتضرع إلى الله منذ بدايات شعبان وحتى أيام العيد، حيث يؤم هذه المساجد والساحات أناس من مختلف الفئات والأعمار من الجنسين.
من العادات الحميدة في تشاد استقبالا لرمضان ظاهرة تبادل التهاني بين الناس، والتي ترد عبارة السماح "العفو" كمفردة مشتركة فيها، حيث تجد أفراد الأسرة الواحدة يتبادلون التهاني فيما بينهم، ويطلبون العفو من بعضهم البعض ، ويدعون لبعضهم البعض بالأمنيات الجميلة كأن يوفقهم الله لصيام وقيام الشهر ويتقبله منهم ويجعلهم من عتقائه وينجيهم من كفارته ويبلغهم رمضان القادم.
خلال شهر شعبان لا يكاد يخلو أي شارع أو زقاق في أنجمينا من روائح الأبري " الحلو مر"، والذي يتم تحضيره خلال شعبان. وعادة ما تجتمع النسوة من الجارات في بيت إحداهن، أو نساء الأسرة في البيت الكبير لإعداد "الأبري" والذي يوزعنه بينهن، حيث تحمل أي منهن ما يكفيها لهذا الشهر.
الحلو مر، السكر، الدقيق، والشعيرية مستلزمات رمضانية يحتاج إليها أي بيت تشادي تقوم بتوفيره ربة الأسرة سواء من السوق كما هو العادة في بقية الشهور، أو يتم توريده إليها من البيت الكبير.

نواصل ..
Post: #8
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-13-2007, 11:15 AM
Parent: #6

الأخ الكريم/ مجاهد عبدالله .. التحيات الطيبات الزاكيات
رمضان كريم .. جعلنا الله من عتقائه.
شكرا للمرور على خيمتنا الرمضانية التشادية هذه.
Quote: منظرين التعرف على العادات والتقاليد التشادية والتي فيما أظن لن تختلف كثيراً عن السودان..

إنت بس خليك قريب يا زول .. حنعرف مدي التقارب بعد نشوف شكل إستعدادات الناس كيف لرمضان والسحور والفطور والمطببخ التشادي وتفاصيل تانية كثيرة .. بس تاوق بجاي من وقت لآخر.
كدي اتفضل معانا سحور تشادي .. رز باللبن عليه سمن ..
Post: #9
Title: Re: رمضان في تشاد .. مدخل للتعريف بعادات وتقاليد تشادية
Author: Biraima M Adam
Date: 09-13-2007, 02:19 PM
Parent: #8


محمد نور
رمضان كريم تصوم وتفطر على خير .. وشكراعلى الأضاءة الرمضانية من تشاد .. متابعين معاك ..
وهنا لدى سؤال:
Quote: شعبان و الذي يطلق عليه في العامية التشادية إسم "قصير"
قصير من الأشهر عند البقارة فى السودان وهى: قصير - رمضان - الفطر - الضحية - التيمان التلاته - الوحيد (تنطق الويحيد) وهكذا نسيت الباقى .. هل تتطابق شهورهم مع شهورنا البقارية فى السودان.

بريمة
Post: #17
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 07:42 AM
Parent: #9

برمة المصارع شخصيا .. صديق دينق "اللدود"
زارتنا الملائكة .. مرحبا بفارس البقارة .. رمضان كريم وتفطر على خير إنشاءالله.
Quote: هل تتطابق شهورهم مع شهورنا البقارية فى السودان.

شايفك بـ شهورهم وشهورنا دي طلعتني منها ، هسع أنا محتار ذاته إنت خاتيني وين؟
الشهور متطابقة على ما أظن، أنا ما بعرفها كلها زيك كده لكن أديها صنة بجيب ليك الأكيده بعد شوية. غايتو ما بعرف الترتيب لكن مؤكد متفقين في : قصير – رمضان – فطر - ضحية - ضحيتين – وحيد...
أنا عندي رأي يا بريمة قبائل البقارة مناطقها الأصلية في العمق التشادي وليس السوداني، وأقصد هنا مكان استقاراها وانطلاقها بحثا للمراعى . حنتناول الحكاية في بوست آخر لو ربك سهل.
Post: #10
Title: Re: رمضان في تشاد .. مدخل للتعريف بعادات وتقاليد تشادية
Author: Mahjob Abdalla
Date: 09-13-2007, 05:18 PM
Parent: #1

Quote: قصير من الأشهر عند البقارة فى السودان وهى: قصير - رمضان - الفطر - الضحية - التيمان التلاته - الوحيد (تنطق الويحيد)

رجب ... قصير .. رمضان .. فطر .. فطرين .. ضحيه .. ضحيتين ... وحيد .. كرامه .. توم .. تومين .. سايق ...

ديل 11 و نسيت ال12...
شكرا يا محمد علي هذه الاضاءه الرمضانيه...
Post: #18
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 08:00 AM
Parent: #10


أخونا/ محجوب عبدالله .. رمضان كريم يا راجل .. تصوم وتفطر على خير.
أها يا اخوي وصلتوا لشنو في موضوع عرب تشاد والنيجر ومالي ديل؟
أنا والله متابع البوست من منازلهم وشايف الموضوع عامل ليه ضل.. غايتو.. فكرت أقول رأيي لكن مع الأسف الحكاية حتدخل في دائرة التصنيف السياسي فآثرت الصمت والمتابعة اللصيقة والقراية بعقل محايد.
Quote: رجب ... قصير .. رمضان .. فطر .. فطرين .. ضحيه .. ضحيتين ... وحيد .. كرامه .. توم .. تومين .. سايق ...

كل الشهور متطابقة ما عدا : توم - تومين – سايق .. والشهر الأخير الما عرفناه لسه ، ديل ما سمعت بيهم قبل كده.. بس حأتصل بالحاجة بعد شويتين نشوف التطابق لياتو حد..؟.


تسلم يا زول يا رائع.
Post: #11
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-13-2007, 06:48 PM
Parent: #1

محمد نور رمضان كريم،

خليك من مسميات غزاتنا، تشاد والسودان هذه.

انت افريقي وافريقي انا، ضمتنا قارتنا، الام، فمن يفصلنا؟

واضح من كلامك للناس الماواضح ليهم، مدي التلاحم مابين اهلنا في تشاد واهلنا في السودان.

شهر قصير، هذا التقويم القمري الكوشي، هو التقويم الرسمي، للاسرة، ومنذ ان نشات في دنقلا!

طبعا هذه من غرائب الاحوال في ديارنا، وذلك ان تستمر معطيات ثقافتنا الكوشية الاقدم علي سطح اليابسة، الممتدة لاكثر من 40,000 سنة، كماهي، ولكن دون ادني وعي ذاتي، كناية عن حالة موتنا الحالي، الاوزريسي، فهذا مايموخل بحق!

التقويم الشمسي الحالي المسمي افرنجي زورا، كوشي دم او لحم بل وعظم، مع تغيير بسيط ادخلوه الرومان، وهذا التقويم معمول به منذ اكثر من 7,000سنة في ديارنا الكوشية، بالذات الابنة الكبري، ميزريم او "كمت" اي مصر البتعني وياللغرابة، السودان، بي لغة اليوم!

طبعا حتي هذا التقويم اي الشمسي، حديث نسبيا!

التقويم القمري، او يا للنكتة، المسمي بالعربي، وهو تقويم كوشي، هو الاقدم بالمناسبة!

لدي الرغبة انبش هذه القضايا، المصيرية، ولكن السياسة ماخدة وكتنا كلو.

هسي لو كنت لبناني او بوستك عن رمضان في لبنان، الجماعة كانو وقفو صف!


معزتي.

عيييييييييييييك!
Post: #19
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 08:31 AM
Parent: #11


الأمير الكوشي بشاشا .. حبابك يا اخوي
أها إنشاءالله يكون وجع الضرس فارقك؟
الحديث عن التقارب التشادي السوداني لا يحتاج إلى كثير عناء لنقله للذين يجهلون أو يتجاهلون ذلك، وإفناعهم بواقعه اللمدهش وحيثياته التي لا يتجاوز إلا ذو مكابر، لكنه الزمن اللعين الذي لا نسابقه فيسبقنا دائما، لكن البركة في مجهوداتكم في هذا الإتجاه والتي أرى أنها أثمرت خيرا كثيرا.
حديثك عن التقويم "العربي" و "الأفرنجي" وكذلك التقويم الدارجي المعمول به في بعض المناطق في كل من تشاد والسودان شد إنتباهي بشكل لا يتصور.. أرجو الإستفاضة في هذا الإتجاه متى ما وجدت إليك ذلك سبيلا. أهدف إلي التحقق من بعض المغالطات التاريخية التي تسيطر على تفكيري منذ فترة ليست بالقصيرة.
فيما يلي مداخلة لي معك في بوست سابق لي عن الصراع السياسي بين تشاد والسودان لا أرى ضيرا من نقله إلى هذه المساحة لإتساقه مع الموضوع:
Quote: أتابع أطروحاتك الكوشية بإعجاب منذ فترة..
إبراهيم طرخان، كلود وغيرهم من الذين كتبوا عن مملكة كانم- حيث يعودأصلي - ربطوا بين قبائل
الساو التي هي أصل مملكة كانم والقبائل النيلية من أهل كوش القديمة، وقد تأكدت من بعض ما
ذهبوا اليه في زيارة لي لمتحف جبل البركل في كريمة.
حديث شيق وذو شجون في هذا المجال سأتناوله وإياك قريبا إذا كان في العمر بقية.



مرحبا بك في خيمة تشاد الرمضانية.
Post: #12
Title: Re: رمضان في تشاد .. مدخل للتعريف بعادات وتقاليد تشادية
Author: فيصل نوبي
Date: 09-13-2007, 07:09 PM
Parent: #1

كل عام و انت بالف خير يا محمد
و تصوم و تفطر علي خير

انت امسك في بشاشا ده خليو يعرس ليكـ واحده من بنات اخوانو و اخواتو ديل ..
Post: #20
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 08:47 AM
Parent: #12

نوبي .. إزيك ورمضان كريم .. تصوم وتفطر على خير
شنو ما في شريط جديد اليومين دي في الخرطوم مع بشريات رمضان دي؟
Quote: انت امسك في بشاشا ده خليو يعرس ليكـ واحده من بنات اخوانو و اخواتو ديل ..

أناسب بشاشا شرف كبير لي لو حصل الكلام ده .. يكفي أني بناسب راجل مثقف صاحب قضية بغض النظر عن اتفاقي معه من عدمه.
بس مداخلة أبو النسب بشاشا التخت مداخلتي دي ، لو صح فهمي ليها تبقى كوتتك دي فيها إيحاءات قبيحة غير مقبولة سواء كان الغرض منها أنا أو بشاشا. لا أعرف ما بينك وبين الرجل لكن الذي أعرفه أن قلمه سلاحه. ولا أطن أن بيني وبينك ما يعكر صفو رمضان الذ ي يظلنا . وحتى لا تذهب بنا الظنون بعيدا فأنت مدان لي ولبشاشا وللقراء ببعض التفسير.
وحتى ذلك الحين لك من المودة والتقدير الكثير الجميل.
Post: #44
Title: Re: رمضان في تشاد .. مدخل للتعريف بعادات وتقاليد تشادية
Author: فيصل نوبي
Date: 09-15-2007, 07:22 AM
Parent: #20

تاني سلامات يا محمد
Quote: ولا أظن أن بيني وبينك ما يعكر صفو رمضان الذ ي يظلنا

انت أمسكـ في دي كويس و يعلم الله ما في القلب لكـ من حب في الله ..

Quote: لو صح فهمي ليها تبقى كوتتك دي فيها إيحاءات قبيحة غير مقبولة سواء كان الغرض منها أنا أو بشاشا.


أما بشاشا بغض النظر عن انه صاحب قضية ولا صاحب كارو ... نساله معاكـ ..
انت يا بشاشا زعلان ليه ؟؟
فهمت شنو بمخكـ الزنخ من مداخلتي الفوق دي ؟؟
Post: #13
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-14-2007, 01:31 AM
Parent: #1

فيصل نوبي،

لزومو شنو، الكلام ده؟

بقصد انت لاتحتاج بالمرة ان تعبر بالفجاجة والوقاحة دي، عفن كراهية الذات، الجواك!

هذا مفروغ منو تماما، فدالق الجواك ليه؟

لزومو؟

هذا يحكي عنك، اكثر منو، عن انسان، اخر!

بعدين انت لسة من عصر الحريم، بتاع اديك بتي، او تعرس لي اختك، كانهم بعض قطع اثاث؟
Post: #14
Title: Re: رمضان في تشاد .. مدخل للتعريف بعادات وتقاليد تشادية
Author: Tragie Mustafa
Date: 09-14-2007, 01:54 AM
Parent: #13

الاخ الحبيب محمد نور
والعفو يا اخوي زي ما قلت اهلنا التشادين بيقولوا و الدارفورين برضوا
بيقولوا كده.
Quote: غايتو بعد دعوتك السمحة دي ببقى ليك في رقبتك .. محل بتخطبي لأولادك ده ما تخطبي لأخوك معاك.?
مسئولة من الخير يا تراجي .. ما عندك بنية شديدة شبهك كدي ترضى بينا نتم بيها ربع دينا الما داير يتم ده؟
يا ريت يا محمد نور نسبك بيشرفنا وحياتك.
الا الراجل الفاهم زيك ما عايزه له خطبه زي دي
عايزه واحده تعرف قيمتك فعلا وتقدر ثقافتك وفهمك.
وربنا بيديك ليها باذن دعوة الوالده الحلوه ديك.
اها قل ليها فتحت خشمي ورجيت الابراي اصلا امي ميته وبركه
البقى لينا امهات من تشاد يرسلوا لينا الابري.
بالله يا اخي كلماتك دي ما بالدنيا ذاتها.
ربنا ينصرك متابعين معاك استمر في البوست المهم ده.
Post: #15
Title: Re: رمضان في تشاد .. مدخل للتعريف بعادات وتقاليد تشادية
Author: غادة عبدالعزيز خالد
Date: 09-14-2007, 03:02 AM
Parent: #14

أخي الكريم
محمد

هذا بوست لطيف وراقي
وله الحيق أن يتواصل حتى العيد
في إنتظار المزيد عن العادات التشادية

كثير من الود
غادة
Post: #16
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 07:23 AM
Parent: #15


الآبري :
لم يحن الوقت بعد للتطرق إلى المطبخ التشادي في رمضان وتناول المفردات المكونة لوجبة الإفطار لدى التشاديين، ولكن أرى أنه من المهم الحديث عن الأبري "الحلو مر" ذلك المشروب الذي له فعل السحر في نفس الصائم وسيد مويات رمضان على الإطلاق بحانب الأنقارا "الكركدي" طالما بدأنا الحديث بـ " ماقبل رمضان" وأشرنا إلى السيد " الأبري " في ثنايا حديثنا الفائت.
أعرف سلفا أن أغلب أعضاء المنبر إن لم يكن كلهم يعرفون الأبري وشربوه يوما، ولكن هناك من القراء الذين يمرون على المنبر من ثقافات وقوميات أخرى، مما يحتم علينا الحديث بشكل توثيقي عن السيد " الأبري". لم أعرف أن هناك شعب آخر غير الشعب التشادي يعرف الأبري ويشربه حتى ذهبت إلى السودان لأول مرة قبل عشرة سنوات أو يزيد، فوجدت هناك توأما للمشروب التشادي الأصل والمنشأ الأبري يسمى دلعا بـ "الحلو مر".
من أهم المكونات التي يصنع منها الأبري هي الذرة ، وهي ما يعرف في تشاد بـ "البربري" ، وهو محصول زراعي ينتشر في تشاد بشكل كثيف بحانب الدخن والذي يعرف هناك بـ " الغلة" والذرة الشامي والذي يعرف عند التشاديين بـ " المصر"
المكون الأساسي الآخر في صناعى الأبري هي البهارات أو " الحرارات" كما يطلق عليها الشتاديين، وتشمل على سبيل المثال لا الحصر : الجنزبيل، القرفة، الكرنجال، الهبهان، الكمون، القرنفل، الشطة ..
يتم طحن – بالتشادي- وسحن – بالسوداني- الذرة أو البربري مع أنواع كثيرة من التوابل أو الحرار لكي تصبح دقيقا ناعما ويتم تخميرها بإضافة مادة تسمى "الذراع" وبعض المواد المخمرة الأخرى كـ "التوارة" لتصبح في شكل "لخوخة" وبعدها تعامل هذه المادة العجيبة معاملة الكسرة ، تدلق كمية منها على الصاج المسخن من أثر نيران الحطب المشتعلة تحته، وتمرر الكمية المدلوقة من العحين على الصاج بمادة خشبية أغلب ظني أنها من "الزعف" ، وتشكل بها الصانعة شكلا دائريا أو مربعا، وتمكث على النار لفترة زمنية تتفاوت حسب سخانة النار وجودة الصاج ، لتخرج بعدها قطعة دائرية أو مربعة الشكل أشبه ما تكون بقطعة الكسرة في شكلها تقريبا، و أبعد ما تكون عنها في سمكها ومذاقها ولونها. تتعرض هذه القطع الدائرية أو المربعة من الآبري للهواء بغرض تجفيفها، ومن ثم تقطيعها أو تطبيقها إلى أشكال أصغر في الحجم، ومن ثم تصبح جاهزة للإستخدام.
هناك نوع آخر من الآبري لم أجده في السودان، وهذا النوع بالذات يحمل البصمة التشادية بدون منازع وهو الآبري الأبيض، وهو أقرب في شكله إلى ما يعرف بـ الرقاق في السودان. ويتم تحضير هذا النوع من الآبري من الذرة الشامي "المصر" وهنا يكمن سر بياضه، ويتبع فيه نفس طريقة تحضير الآبري سيد الإسم.
الآبري الأبيض على الرغم من إسمه الدال على لونه والذي لا يساورك أدنى شك في بياضه إلا أن به قطع ملونة يتفنن النسوة في ذلك بإضافة بعض المواد الملونة لإضفاء بعض اللمسات الجمالية عليه.
الأبري التشادي أو الحلو مر السوداني مسميان مختلفان لكائن واحد، يمكن التفريق بينهما بالذائفة، فالأبري التشادي يتميز عن السوداني بكمية البهارات والتوابل التي به، مما يجعل الأبري التشادي في مذاقه أقرب إلى عصير الجنزبيل في الطعم أكثر من الحلو مر السوداني.
لاحظت في السودان أن المرأة السودانية على الرغم من إستخدامها للأبري بشكل يومي في مائدتها إلا أنها غير ميالة إلى صنعه وتفضل شراؤه من السوق في العالب على تحضيره في البيت، وربما يعود ذلك إلي إيقاع الحياة المتسارع في المدن مقارنة بالقرى التي أتوقع أن الأهالي هناك ما يزالون يخافطون على تقليد صنع الأبري.


نواصل.
Post: #22
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 09:36 AM
Parent: #15

الأخت الكريمة / غادة
رمضان كريم .. تصومي وتفطري على خير.
شكرا للمرور على الخيمة الرمضانية التشادية دي.
قلنا نبدأ بالأبري وحتان نجي للكركدي .. أها عندك آبري لرمضان ده ولا نرسل ليك.؟
خليك قريبة .. لمن نخش المطبخ التشادي حنحتاجك شديد..
إنت يا ماما وديتي بوستينا حق "العورا " قصدي البكور وين؟ عندي فيه باقي كلام ما قلته.
مبروك نجاح حلقة سان فرانسيسكو .. شاهدت بعضا منها في بوست مجاور قبل قليل.
وبالمناسبة ، قناة النيل الأزرق كيف السبيل لمشاهدتها من أميركا؟


مع عاطر التحايا والمنى
Post: #21
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-14-2007, 08:57 AM
Parent: #14

تراجي ازيك .. و الأولاد .. وعاملة كيف مع أبو الروم؟
أها.. أقري الكلام الفوق عن الآبري التشادي وقارنيه بالحلو مر السوداني .. وسمعينا رأيك.
Quote: الاخ الحبيب محمد نور
والعفو يا اخوي زي ما قلت اهلنا التشادين بيقولوا و الدارفورين برضوا
بيقولوا كده.
Quote: غايتو بعد دعوتك السمحة دي ببقى ليك في رقبتك .. محل بتخطبي لأولادك ده ما تخطبي لأخوك معاك.?
مسئولة من الخير يا تراجي .. ما عندك بنية شديدة شبهك كدي ترضى بينا نتم بيها ربع دينا الما داير يتم ده؟
يا ريت يا محمد نور نسبك بيشرفنا وحياتك.
الا الراجل الفاهم زيك ما عايزه له خطبه زي دي
عايزه واحده تعرف قيمتك فعلا وتقدر ثقافتك وفهمك.
وربنا بيديك ليها باذن دعوة الوالده الحلوه ديك.
اها قل ليها فتحت خشمي ورجيت الابراي اصلا امي ميته وبركه
البقى لينا امهات من تشاد يرسلوا لينا الابري.
بالله يا اخي كلماتك دي ما بالدنيا ذاتها.
ربنا ينصرك متابعين معاك استمر في البوست المهم ده.

الحاجة بتسلم عليك شديد وقالت ليك عشان كلامك السمح ده حترسل ليك الآبري وكمان كعك العيد. (وجوه ضاحكة)


تعديل كلمة التحت بكلمة الفوق في السطر الثاني.
Post: #23
Title: Re: رمضان في تشاد .. مدخل للتعريف بعادات وتقاليد تشادية
Author: محمد البشرى الخضر
Date: 09-14-2007, 11:08 AM
Parent: #1

رمضان كريم يا عمك
يعود عليكم و علينا بالخير و النماء إن شاء الله
متابعين ومستمتعين




يا خي عينك للشريف وتقولي تناسب منو ومنو
Post: #37
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 05:21 AM
Parent: #23

وين يا عمك .. سلامات ورمضان كريم
Quote: يا خي عينك للشريف وتقولي تناسب منو ومنو

الشريف مبسوط مني .. بس مع الأسف ما عنده بنات.

خليك قريب ورمضانك أخضر..




_________________________________________________________
خم الرماد ما عندك يا عمك .. قندهار ومانديلا وإنت ماشي .. أريتو حالنا
Post: #24
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-14-2007, 03:56 PM
Parent: #1

Quote: الحديث عن التقارب التشادي السوداني لا يحتاج إلى كثير عناء


ابو النسب، محمد نور،

تقارب شنو ياشيخنا، احنا هتة واحدة، زي ما قال الكوشي من حلفا، بلاش نوبي!

المفردة العزيزة علي قلبي، ولكن للاسف، تلوثت تماما!

لافرق علي الاطلاق مابين تشادي اوسوداني، بالذات ثقافيا.

في الونسة مع صديقة نيجيرية، حقيقة راس شطب عديل لمان لقيت التطابق حتي لي درجة، قلع او سرقة، ملابس الزول الجاي من السفر، بواسطة الاصحاب او الاهل!

كنت فاكر الحاجة البسيطة دي، خاصة بي ناس دنقلا ولااقول الدناقلة، حيث متعودين احنا، كيف السفاري لمن يجي من السفر، اصحابو بملصو حتي هدومو الخاصة!

يعني تعلق الشالية، القميص ولا المنطلون القشرة في "الواوور" في دنقلا، او الحمار بي لغوة البندر العربية، تلقي بي بساطة، دارعو صحبك البكابس في سماية ناس "سيبية"* وهو جالس علي يمينك، من دون يرمش حتي!!

حتي عادات الكباس او مخاتفة الاكل بين الاهل بالذات في المناسبات، حدثتني عنه، هذه الصديقة في ريف ليغوس!

فياعزيزي، مابنعرف بعض كافارقة خالص خالص، ولكن في السودان نعرف عن مصر، مثلا، اكثر من بعض المصريين زاتم! هل ده كلو صدفة؟ ابدا! كلو by design!

بزمتك واصل حديثك عن العادات والتقاليد في تشاد في المناسبات، مثل رمضان.

محبتي.




*سيبية تنطق Say Bia، اسم كوشي للاناث منتشر في دنقلا.
Post: #38
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 05:47 AM
Parent: #24

Quote: ابو النسب، محمد نور،

ألأمير الكوشي .. والله الفرحة ما ساعيانا بهذا النسبب المشرف .. وكده بدينا نرسم للتربع على عرش كوش من هسع.
Quote: فياعزيزي، مابنعرف بعض كافارقة خالص خالص، ولكن في السودان نعرف عن مصر، مثلا، اكثر من بعض المصريين زاتم! هل ده كلو صدفة؟ ابدا! كلو by design!

إنت داير تجيب لي الهوا مالك يا أبو النسب .. قبل كده قلت كلام قريب لده في زول في البورد نط لي في حلقي وخلاني قربت أرجع لبكري باسويرديه. عموما بدبحه تاني وسجن سجن غرامة غرامة.
لا للإساءة للتشاديين من خلال تراجي ... دعوة حب إلي علاء...كين وذاك الفلسطيني..

تسلم يا أبو النسب ..
Post: #25
Title: Re: رمضان في تشاد .. مدخل للتعريف بعادات وتقاليد تشادية
Author: Raja
Date: 09-14-2007, 04:22 PM
Parent: #1

العزيز محمد نور..

كل عام وأنت والوالدة وكل من معك بألف خير..
ورمضان كريم عليكم وعلي الجميع يا رب..

لفتة جميلة منك هذا البوست.. تسلم
Post: #39
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 05:56 AM
Parent: #25


رجوية العسولة شخصيا
Quote: كل عام وأنت والوالدة وكل من معك بألف خير..
ورمضان كريم عليكم وعلي الجميع يا رب..

لفتة جميلة منك هذا البوست.. تسلم

كل عام وإنت بخير يا بت امي
ورمضان الجاي - ولا قبله حتى – زي ما انت عايزه .
الوالدة بتسلم عليك برضو وبتقول ليك تصومي وتفطري على خير .. وقالت ليك عليك الله خل الشكل.



خليك قريبة بنحتاج ليك
Post: #26
Title: Re: رمضان في تشاد .. مدخل للتعريف بعادات وتقاليد تشادية
Author: Nasr
Date: 09-14-2007, 04:27 PM
Parent: #1

رمضان كريم
وكل سنة وتشاد الحبيبة بخير
المدهشني الإبداع الإفريقي في التعامل مع الذرة فمنها تصنع الكسرة والعصيدة والمريسة والأبري ومن عيدانها ملاح الويكاب وغير إنها علف للبهائم تصنع المنازل من عيدانها
أنظر للإبداع في القطية كيف أنها باردة في الصيف ودافئة في الشتاء
المستلبون ثقافيا عندنا
أستبدلوا القطية العظيمة ببيوت الزنك حارة جدا في الصيف وباردة في الشتاء ومزعجة في المطر.
إستبدلو الكسرة والعصيدة المصنوعة في المنزل بالرغيف المصنوع في المخبز ومستف بروميد البوتاسيوم ومن ثم تقاطروا زرافات ووحدانا لمستشفي الذرة في الخرطوم.
إستبدلوا الأبري بالببسي والكوكا كولا
إستبدلوا المريسة بالشري والبيرة
وصارت الذرة عماد الناس الأساسي ضد المجاعات حقيرة ومبتذلة أعز منها قمحا من أمريكا جاي معونة (للغاف). وبدلا من مطامير الذرة التي تحفظ الذرة لعدة أعوام ضمانا من الجفاف والسنوات الكعبة صارت هناك مخازن التجار وصوامع الحكومة.
وضاع الأمن الغذائي (والهوية) تحت أحذية السوق العالمية والمحلية.
Post: #42
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 07:05 AM
Parent: #26


حبيبنا Nasr
كل سنة وأنت طيب .. تصوم وتفطر على خير..
Quote: المدهشني الإبداع الإفريقي في التعامل مع الذرة فمنها تصنع الكسرة والعصيدة والمريسة والأبري ومن عيدانها ملاح الويكاب وغير إنها علف للبهائم تصنع المنازل من عيدانها
أنظر للإبداع في القطية كيف أنها باردة في الصيف ودافئة في الشتاء
المستلبون ثقافيا عندنا
أستبدلوا القطية العظيمة ببيوت الزنك حارة جدا في الصيف وباردة في الشتاء ومزعجة في المطر.
إستبدلو الكسرة والعصيدة المصنوعة في المنزل بالرغيف المصنوع في المخبز ومستف بروميد البوتاسيوم ومن ثم تقاطروا زرافات ووحدانا لمستشفي الذرة في الخرطوم.
إستبدلوا الأبري بالببسي والكوكا كولا
إستبدلوا المريسة بالشري والبيرة
وصارت الذرة عماد الناس الأساسي ضد المجاعات حقيرة ومبتذلة أعز منها قمحا من أمريكا جاي معونة (للغاف). وبدلا من مطامير الذرة التي تحفظ الذرة لعدة أعوام ضمانا من الجفاف والسنوات الكعبة صارت هناك مخازن التجار وصوامع الحكومة.
وضاع الأمن الغذائي (والهوية) تحت أحذية السوق العالمية والمحلية.

بمثل هذا الحديث الواعي المشخص للداء والشارح له تأتي البدايات الصحيحة للعودة إلى أمجادنا.
أعتقد أن أفريقيا ستعود قريبا إلى عزها و مجدها وستعيد سيرتها الأولى .. فقط نحتاج إلى من هم في وعيك وإدراكك للمشكل.

أخي/ نصر .. سعدت بملاقاتك لأول مره عبر هذا الخيط .. أرجو أن يتواصل الحوار بيننا.. دم بخير
Post: #27
Title: Re: رمضان في تشاد .. مدخل للتعريف بعادات وتقاليد تشادية
Author: شول اشوانق دينق
Date: 09-14-2007, 06:11 PM
Parent: #1

كل سنة والبورداب (اعضاء وزوار سودانيزاونلاين) بخير.
كل سنة والسودان واحد يعمه السلام والإستقرار ولو كره الكارهون.
كل سنة وإفريقيا تعلم عن التقارب والتلاحم ما بين قاطنيها.
كل سنة وكل الاحباب والاعداء بخير.
رمضـــــــــــــــــــان كريــــــــــــــــــــم.
تصــــــــــــــــــوموا وتفطروا علي خيـــــــــــــر.

Quote: المدهشني الإبداع الإفريقي في التعامل مع الذرة فمنها تصنع الكسرة والعصيدة والمريسة والأبري ومن عيدانها ملاح الويكاب وغير إنها علف للبهائم تصنع المنازل من عيدانها
أنظر للإبداع في القطية كيف أنها باردة في الصيف ودافئة في الشتاء
المستلبون ثقافيا عندنا
أستبدلوا القطية العظيمة ببيوت الزنك حارة جدا في الصيف وباردة في الشتاء ومزعجة في المطر.
إستبدلو الكسرة والعصيدة المصنوعة في المنزل بالرغيف المصنوع في المخبز ومستف بروميد البوتاسيوم ومن ثم تقاطروا زرافات ووحدانا لمستشفي الذرة في الخرطوم.
إستبدلوا الأبري بالببسي والكوكا كولا
إستبدلوا المريسة بالشري والبيرة
وصارت الذرة عماد الناس الأساسي ضد المجاعات حقيرة ومبتذلة أعز منها قمحا من أمريكا جاي معونة (للغاف). وبدلا من مطامير الذرة التي تحفظ الذرة لعدة أعوام ضمانا من الجفاف والسنوات الكعبة صارت هناك مخازن التجار وصوامع الحكومة.
وضاع الأمن الغذائي (والهوية) تحت أحذية السوق العالمية والمحلية.


نصر الجميل...
بصراحة لما الزول يلقي زول بيكتب كتابة زي حقك ده بيكون من حقه يفرح ... بيكون من حقه يحس إنو الدنيا لسه بخير ... بيكون من حقه يحس إنه في ناس بتعرف مواضع الداء وممكن جداً يلقوا الدواء.
نصر انت لا تدري ولا اقول ليك you made my day

محمد نور احمد كل التحايا النواضر والف شكر علي البوست الرائع ده.


تسلموا يا سمحين.

شول اشوانق
Post: #29
Title: Re: رمضان في تشاد .. مدخل للتعريف بعادات وتقاليد تشادية
Author: Imad Khalifa
Date: 09-14-2007, 06:57 PM
Parent: #27

الاخ محمد نور
رمضان كريم وكل عام وانت وكل الاحباب بدولة تشاد بخير.
Post: #47
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 07:39 AM
Parent: #29

أخونا/ Imad Khalifa .. كل سنة وإنت طيب .. تصوم وتفطر على خير
شكرا للمرور .. واتفضل معانا أنقارا يا زول.
Post: #34
Title: Re: رمضان في تشاد .. مدخل للتعريف بعادات وتقاليد تشادية
Author: Nasr
Date: 09-15-2007, 03:57 AM
Parent: #27

تسلم يا شول
إنت برضو Made my day
وبالمناسبة أنا نسيت حاجة مهمة تصنع من الذرة وهي الدلكة، وإنت عارف ما هو البديل (الأكثر سخفا) للدلكة، وقانا الله شر كل مستحضرات التجميل غير الطبيعية.
Post: #46
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 07:35 AM
Parent: #27

Quote: كل سنة والبورداب (اعضاء وزوار سودانيزاونلاين) بخير.
كل سنة والسودان واحد يعمه السلام والإستقرار ولو كره الكارهون.
كل سنة وإفريقيا تعلم عن التقارب والتلاحم ما بين قاطنيها.
كل سنة وكل الاحباب والاعداء بخير.
رمضـــــــــــــــــــان كريــــــــــــــــــــم.
تصــــــــــــــــــوموا وتفطروا علي خيـــــــــــــر.

شول اشوانق دينق
شكرا على التهنئة .. وشكرا تاني على مرورك.
استوقفتني تهنئتك كثيرا .. خاصة تمنيك الخير حتى لأعدائك
وتلك دلالة صارخة على معدنك وكرم أخلاقك ونبل شخصيتك
تهنئك توحي لي بـ What kind of a man you are
هنيئا لنا جميعا بك وبفكرك.
Post: #28
Title: Re: رمضان في تشاد .. مدخل للتعريف بعادات وتقاليد تشادية
Author: Elawad
Date: 09-14-2007, 06:55 PM
Parent: #1

الأخ محمد
والله دا من أجمل البوستات. رغم انقطاعي عن المنبر مؤقتا جذبني موضوعك. كنت مثلك أظن الآبري مشروب سوداني لا يشترك معهم فيه شعب آخر. بالمناسبة الآبري الأبيض برضو بتعاس و يتشرب في السودان و هو شايع جدا غريبة انك ما شربتو أو لاقاك هناك.
لك الشكر مرة أخرى و تحايانا للوالدة ربنا يحفظها ليك و يمتعها بالصحة و العافية.
Post: #48
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:03 AM
Parent: #28

Quote: والله دا من أجمل البوستات. رغم انقطاعي عن المنبر مؤقتا جذبني موضوعك

أخونا/ العوض ..ازيك يا جميل .. رمضان كريم .. تصوم وتفطر بخير.
شكرا للإطراء الجميل .. ونحمدالله أن نالت خربشاتنا هذه إعجابك .. ولو لم يثمر البوست غير أنه أعادك إلى المنبر بعد طول انقطاع لكفانا ذلك فما بالك إن فعل ذلك وزاد عليها إعجابك؟ حق لنا أن نفرح.
Quote: كنت مثلك أظن الآبري مشروب سوداني لا يشترك معهم فيه شعب آخر

هي كان بقت على الآبري مافي مشكلة .. لكن في دشليون حاجة في السودان مقرونة بالسودان .. ويصر السودانيين أنهم الوحيدين من بين سكان المعمورة يتداولون هذا الشئ والحقيقة ما كده.
ما قاعد أبالغ يا العوضلو قلت ليك الجلابية والعمة والطاقية والسروال والتكة والعراقي ديل البتسموهم الزي السوداني القومي ده من الله خلقنا لقيناه قدامنا أبواتنا لابسنه وقبله أبواتهم وما كنا متخيلين أنه موجود في أي حته غير تشاد لمن فتحنا ووعينا وقرينا وعاشرنا سودانيين وسافرنا السودان حتى اقتنعنا انه ما حقنا برانا.
مما اتولدنا أمهاتنا وأخواتنا غيرالتوب البتقولوا عليه توب سوداني ده ما لبسن غيره.. على الطلاق كان ماشات الدكان مش مناسبة من غيره ما بيطلعن.. أها التوب ده ما عرفنا انه سوداني الا لمن حصلت لينا النقلة دي.
الأكل .. الشراب .. المهن .. ألعاب الشفع .. نظام الزراعة .. المحاصيل .. الغناء بالسلم الخماسي .. اللغة العربية (عربي الله والرسول الواحد ده .. الخ ومليون حاجة تانية ما كنا قايلين في شعب تاني غير التشاديين بيعرفها لمن اتعرفنا على المجتمع السوداني..
أها شن قولك.

تقبل تحيات الوالدة .. وانشاءالله تجينا راجع بجاي
Post: #30
Title: Re: رمضان في تشاد .. مدخل للتعريف بعادات وتقاليد تشادية
Author: Walid Safwat
Date: 09-14-2007, 07:04 PM
Parent: #1

Quote: هناك نوع آخر من الآبري لم أجده في السودان، وهذا النوع بالذات يحمل البصمة التشادية بدون منازع وهو الآبري الأبيض، وهو أقرب في شكله إلى ما يعرف بـ الرقاق في السودان. ويتم تحضير هذا النوع من الآبري من الذرة الشامي "المصر" وهنا يكمن سر بياضه، ويتبع فيه نفس طريقة تحضير الآبري سيد الإسم.


الاخ محمد نور أحمد
رمضان كريم

الآبري الأبيض موجود بنفس الاسم في السودان
البعض يطلق عليه "خلع الضيف"
وكذلك رايته وتناولته في نايجيريا
والنيجر وبعض السنغالين يتناولونه
وكلهم البلاد اعلاه يعرفون الابري الاحمر والابيض

اما الغريب فهم الغجر الاسيويين HMONG
فسقوني مشروب قريب من الابري الاحمر
ويستعملونه لمقاومة العطش ومقاومة الفشل الكلوي
ويتم تحضيره من نفس المكونات لدينا
واقرب ترجمة انجليزية للاسم هي Wheat Germ Drink
Post: #49
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:56 AM
Parent: #30


Quote: الآبري الأبيض موجود بنفس الاسم في السودان
البعض يطلق عليه "خلع الضيف"
وكذلك رايته وتناولته في نايجيريا
والنيجر وبعض السنغالين يتناولونه
وكلهم البلاد اعلاه يعرفون الابري الاحمر والابيض

اما الغريب فهم الغجر الاسيويين HMONG
فسقوني مشروب قريب من الابري الاحمر
ويستعملونه لمقاومة العطش ومقاومة الفشل الكلوي
ويتم تحضيره من نفس المكونات لدينا
واقرب ترجمة انجليزية للاسم هي Wheat Germ Drink

الأخ الكريم/ Walid Safwat
رمضان كريم يا وليد .. وتفطر على خير إنشاءالله
إنت يا خوي وكت لفيت افريقيا دي كلها .. مشيت نيجيريا والنيجر والستغال مالك فطيت تشاد ؟ في شنو في ديل نحنا ما عندنا ليه عشان ما تدينا غشوة؟ ده احتجاج واضح وصريح مننا ومعاه دعوة لتشاد .. مرحب بيك في بقعة أخري من أفريقيا .
كثرة تسفارك ده يلقى عليك بمسئولية كبيرة في توعية الشعب السوداني بمن حوله من الشعوب، ينتابني إحساس أحيانا بان بعض السودانيين ما يزال يعتقد في خرافة أن الأفارقة من آكلي البشر، وقد صادفتني في السودان أسئلة غبية من ناس متعلمين على شاكلة عندكو في تشاد شارع زلط؟ وعندكو كهرباء؟ و انتو مسلمين؟ وبتتكلموا عربي زينا؟ أسئلة لا تدري ماذا تفعل حيالها؟ تجهش بالبكاء أم تتحسر على هذا الوعي الجاهل.
من الطرائف الصادفتني في السودان في هذا الخصوص، أحد الشباب التشاديين من أب وأم مسلمين وجده حتى بدايات الإسلام قد يكون صحابيا، يحفظ القرآن الكريم عن ظهر قلب، أوفد من قبل الجامعة إلى أحد أحياء الخرطوم ليصلي بالناس التراويح والتهجد. ولأنه ينتسب إلى قبيلة غير عربية فإن إسم والده إسما أعجميا، فاعتقد أعيان الحي أنه اهتدى لتوه إلى الإسلام وحفظ القرآن ، فسألوه عن إسمه فعندما أخبرهم باسمه الذي يحمل أعادوا السؤال مرة أخري " نقصد إسمك قبل الإسلام" فانفعل الرجل وأرغى وأوبد وأسمعهم اسطوانة ما كان له أن يشغلها لهم وغادر المسجد إلى غير رجعة.
وفي السودان كثير من الطلاب الأفارقة الذين يتحدثون العربية مثل جميع من في البورد وإسلامهم فطري أفضل من إسلامنا جميعا لكنهم يجب أن يبرزوا وثيقة إسلام من جهة في السودان تثبت أنهم مسلمون قبل الحصول على تأشيرة عمرة أو حج.
فشوف حتى إسلامنا مشكوك فيه عندكم في السودان..


يا زول سعدت بوجودك في البوست واتشرفت بمعرفتك.. وخليك قريب.
Post: #31
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-14-2007, 07:17 PM
Parent: #1

بكري ابوبكر، رجاء اشنق البوست ده فوق هناك.

دي فرصة نعرف بعض كافارقة للمرة الاولي، من نصف قرن!
Post: #32
Title: Re: رمضان في تشاد .. مدخل للتعريف بعادات وتقاليد تشادية
Author: محمد هواري
Date: 09-14-2007, 07:43 PM
Parent: #1

بوست ظريف فعلا ونرجو من الأخ محمد نور مواصلة سرد التفاصيل عن أوجه الحياة الرمضانية في تشاد وأوجه الحياة عموما في البلد الشقيق.

أنا عندي نظرية عن أصل مشروب الحلو مر أو الآبري.
في رأيي أن هذا المشروب المعقد (تأتي بالعيش، وتبله، وتزرِّعه، وتطحنه، وتخمر العجين وتضيف له البهارات، ثم تصنع الخبز (الكسرة) لتأتي بعد هذا كله لتشرب منقوع ذلك الخبز) يبدو أن مراحل صناعته أطول وأكثر تعقيدا من أن يكون الغرض منها المشروب بعد عمل الكسرة منه. لذا أعتقد أن الحلو مر هو من المنتجات العرضية للمريسة. فلو لاحظنا أن العملية واحدة إلى مرحلة العجين (تزريع العيش زريعة وإعداد عجين من الزريعة) بعد ذلك تختلف طريقة التخمير وإضافة البهارات المنكّهة للآبري دونا عن المريسة. وفيما يبدو أن إحدى جداتنا من الصانعات خطر لها في مراحل تصنيع المريسة أن تعوس من العجين خفيف التخمير طرقة أو طرقتين لتشربهما "موص" أو "كسرة بي موية" أها، لما اكتشف الناس أن ماء كسرة المريسة له لون وطعم خاص، تفننوا فيه وأضافوا له البهارات الأخرى وأسموه آبري وأصبحوا يعملونه لذاته!
Post: #33
Title: Re: رمضان في تشاد .. مدخل للتعريف بعادات وتقاليد تشادية
Author: بكري اسماعيل
Date: 09-14-2007, 09:10 PM
Parent: #32

محمد نور يا حبيب
رمضانك كريم وتصوم وتفطر على خير ..
كما تفضلت هناك تقارب شديد بين العادات والتقاليد التشادية والسودانية فيما يتعلق بالمأكولات والمشروبات التي تعد في مثل هذه المناسبات لاحظت ذلك أثناء زيارتي لتشاد قبل عشرة أعوام تقريباً فالتركيبة الموجودة في دارفور وخصوصاً الجنينة تكاد تكون هي نفسها الموجودة في شاد مدينة أبشى خير مثال ..
بالنسبة للمأكولات البلدية لم أتناولها بكثرة وبالتالي لم أتعرف عليها عن قرب وذلك لتركيزي على اللحوم والأقاشي فكل من يأتي من دار صباح على قول أهل الغرب يكون محتاج لأكل اللحوم نسبة لغلاتها عندهم عكس دارفور وتشاد التي يكاد أن يكون طلب الفول فيها أغلى من اللحمة ..
متابعين معاك لحدي الفطر كان الله مدّ في الأيام ..
Post: #35
Title: Re: رمضان في تشاد .. مدخل للتعريف بعادات وتقاليد تشادية
Author: غادة عبدالعزيز خالد
Date: 09-15-2007, 04:11 AM
Parent: #33

Quote: الأخت الكريمة / غادة
رمضان كريم .. تصومي وتفطري على خير.
شكرا للمرور على الخيمة الرمضانية التشادية دي.
قلنا نبدأ بالأبري وحتان نجي للكركدي .. أها عندك آبري لرمضان ده ولا نرسل ليك.؟
خليك قريبة .. لمن نخش المطبخ التشادي حنحتاجك شديد..
إنت يا ماما وديتي بوستينا حق "العورا " قصدي البكور وين؟ عندي فيه باقي كلام ما قلته.
مبروك نجاح حلقة سان فرانسيسكو .. شاهدت بعضا منها في بوست مجاور قبل قليل.
وبالمناسبة ، قناة النيل الأزرق كيف السبيل لمشاهدتها من أميركا؟


أخي العزيز
محمد

الخيمة دي من أجمل المظلات (الحايمة) في البورد اليومين ديل
عندي صديقة هنا، سودانية الأصل لكنها تعتز بانها عاشت في تشاد
أكثر سني عمرها الأخيرة،، وتعتبر نفسها تشادية أكثر منها سودانية
وكلنا واحد
أها يا سيدي، عندي آبري أحمر، الأبيض ما عندي
لكن أنا عندي غرام مع الكركدي والجونجليس،،
يا ترى بتستمتعوا بالجونجليس زينا كده؟
يعني تاكلوا بالشطة والدكوة وتشربوهو بعد شوية عصير باااااارد
في كوز يكون كمان مندي؟..
الله أني قربت أصوم
ويا سيدي لما تكونوا على المطبخ ، بس شاوروا
بكمكم أطراف البلوزة ونتحزم ونقيف في نص المنقد..كده كيف؟
شكرا على التهنئة بالحلقة يا محمد، قناة النيل الأزرق
هي قناة فضائية خاصة وتتبع لقنوات أي آر تي،، لكنها لا تقدم ضمن باقاتها
في امريكا، عكس دول الخليج ولا أدري لماذا..
المساعي مستمرة، وحتى وقتها، الله يخلي لينا يوتوب
وتلفزة تمبس الجاهزه دي

تصوم وتفطر على خير يا صديق

غادة
Post: #53
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 10:57 AM
Parent: #35

صاحبتي غادة السمحة .. ازيك والأولاد وأبوهم .. أبو الروم يكون منستر معاكم؟
شايفك كابة الجرسة في بوست مجاور وأبو الروم لم يشتد عوده بعد . . الله المستعان.
Quote: الخيمة دي من أجمل المظلات (الحايمة) في البورد اليومين ديل

شكرا جميلا كثيرا جدا خالص على رفع المعنويات .. والحسنة بعشرة أمثالنا في رمضان طبعا .. مظلتنا جميلة لإنك فيها يا ماما.
Quote: عندي صديقة هنا، سودانية الأصل لكنها تعتز بانها عاشت في تشاد
أكثر سني عمرها الأخيرة،، وتعتبر نفسها تشادية أكثر منها سودانية
وكلنا واحد

Pls, do me a favor سلمي لي عليها كثير جدا خالص وقولي ليها نحنا ذاتنا معتزين بيها جدا، وسعيدين جدا بإنها باقية على العشرة والملح والملاح والآبري والأنقارا والكركنجي. وهدي دعوة مننا ليها لزيارة تشاد مرة أخرى، ويا بختها بيك.
Quote: أنا عندي غرام مع الكركدي والجونجليس،،
يا ترى بتستمتعوا بالجونجليس زينا كده؟
يعني تاكلوا بالشطة والدكوة وتشربوهو بعد شوية عصير باااااارد
في كوز يكون كمان مندي؟..

وعشان إنت بتحبي الكركدي قلنا نكرمك بيه وكتبنا ليك عنه تحت، وقدر ما سألت عم قوقل يديني كباية كركدي سمحة مندية كدي أقدمها ليك مع الرد ما لقى لي ، عم قوقل لومني معاك والله يا غادة.
هسع كلامك عن القنقليز بلعني جردل ريق .. الحمدلله الما بقيت بكتب وأنا صايم .. كان الله سألك من يومي ده.
القنقلبيز ده فيه أجمل عصير الواحد ممكن يشربه ويحس إنه بشرب ليه حاجة نافعة .. بتاخد مكانها في الجسم مباشرة بدون أي إجراءات رسمية في البطن. مع الأسف القنقليز كعصير ما منتشر في تشاد الا في إطار ضيق.. لكن بيسحنوه وبيسفوه الشفع زي الـ Amise Guele ، ويستخدم في تزبيط الشطوط برضو عندنا زي ما اتفضلتي. الغريبة أنا لفيت ليه هنا في دالاس كل استورات المكسيكانس ما لقيته .. غايتو كان طلع عندك نتقدم بطلبنا هذا راجين النظر فيه بعين الإعتبار .. والـ UPS علينا.
Quote: قناة النيل الأزرق
هي قناة فضائية خاصة وتتبع لقنوات أي آر تي،، لكنها لا تقدم ضمن باقاتها
في امريكا، عكس دول الخليج ولا أدري لماذا..
المساعي مستمرة، وحتى وقتها، الله يخلي لينا يوتوب
وتلفزة تمبس الجاهزه دي

هسع يا غادة عمك كامل بتاع الأي آر تي ده ما ببالغ .. شن فائدة قنواته دي وقت ما بتتشاف في أمريكا الله أكبر .. لكن غلطانين أنتو البعتو ليه النيل الأزرق .. أصلو بعد ده زول بيشوفها مافي قول يت عم سوركتي قالوا مشت مع قوات صديقة .. تشيلوا شيلتكم ساكت .. ما تشوفي المثقفاتية الكضابين ديل كلهم بيحضروها عشان البنيات السمحات ديل .. غايتو أنا صاحبي فيها سعد الدين والبنية النضامة الضكرانة أبو ساوند سستم الكانت تقدم مزازيك زمان .. الله يديني اسمها .. عفاف حاجة كده. غايتو وإلى أن يسمح لينا عمنا كامل بمشاهدة النيل الأزرق من أمريكا الله يخلي تمبس الخطير.
يعيش تمبس
تعيش غادة
وعاشت البصمة الزرقاء
وعاش نيل يا ليل
يسقط با بكر حنين
وتسقط ساعة مع حنين
Post: #51
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 09:18 AM
Parent: #33

أخونا/ بكري إسماعيل .. ازيك زرمضان كريم .. أعتق الله رقابنا فيه من النار
Quote: فالتركيبة الموجودة في دارفور وخصوصاً الجنينة تكاد تكون هي نفسها الموجودة في شاد مدينة أبشى خير مثال

إنت عارف يا أبو بكر .. الشاطر جدا هو البيقدر يفرق بين الجنينة وأبشة. السودان وتشاد متشابهان إلى حد التماثل لكن كمان الجنينة وأبشة حاجة كده بغادي للتماثل والتشابه ذاته في اي شئ تقريبا.
انت مالك ما بينا كدي يا اخوي من عشرة سنوات تقريبا تاني ما رجعت ؟ والله بالغت وشذيت .. ما عندم عشرة يا زول.. ياخي كان ما اشتقت للناس البتعرفهم ما مشتاق للتشة؟ قلت لي ضربت التشة ابو شطوط ديك لمن ربنا غفر ليك مش؟


حبابك ألف يا زول في البوست التشادي الجنسية ده .. ومرحب بيك في تشاد قريب.
Post: #50
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 09:05 AM
Parent: #32



محمد هواري .. ازيك يا اخوي .. رمضان كريم وكل سنة وانت طيب .. يعود علينا جميعا بالخير.
Quote: أنا عندي نظرية عن أصل مشروب الحلو مر أو الآبري.
في رأيي أن هذا المشروب المعقد (تأتي بالعيش، وتبله، وتزرِّعه، وتطحنه، وتخمر العجين وتضيف له البهارات، ثم تصنع الخبز (الكسرة) لتأتي بعد هذا كله لتشرب منقوع ذلك الخبز) يبدو أن مراحل صناعته أطول وأكثر تعقيدا من أن يكون الغرض منها المشروب بعد عمل الكسرة منه. لذا أعتقد أن الحلو مر هو من المنتجات العرضية للمريسة. فلو لاحظنا أن العملية واحدة إلى مرحلة العجين (تزريع العيش زريعة وإعداد عجين من الزريعة) بعد ذلك تختلف طريقة التخمير وإضافة البهارات المنكّهة للآبري دونا عن المريسة. وفيما يبدو أن إحدى جداتنا من الصانعات خطر لها في مراحل تصنيع المريسة أن تعوس من العجين خفيف التخمير طرقة أو طرقتين لتشربهما "موص" أو "كسرة بي موية" أها، لما اكتشف الناس أن ماء كسرة المريسة له لون وطعم خاص، تفننوا فيه وأضافوا له البهارات الأخرى وأسموه آبري وأصبحوا يعملونه لذاته!

يا اخوي نظريتك دي أنا معاها ومؤيدها 100% وسبب واحد يخلي النظريات العلمية و الإجتماعية التانية صحيحة وحقتنا دي ما صحيحة مافي.
العندو رأي يجي يقول لينا .. يعني نيوتن وداروين وديكارت وسارتر ديل أحسن مننا في شنو؟ أها وكمان نسميها Theory of Hawary أها رأيك شنو؟


شكرا على المرور يا جميل.
Post: #36
Title: Re: رمضان في تشاد .. مدخل للتعريف بعادات وتقاليد تشادية
Author: Mahjob Abdalla
Date: 09-15-2007, 04:31 AM
Parent: #1

Quote: هناك نوع آخر من الآبري لم أجده في السودان، وهذا النوع بالذات يحمل البصمة التشادية بدون منازع وهو الآبري الأبيض]

يعني يا محمد نور ما حصل شربت عصير TISSUES في السودان!!!
Post: #41
Title: Re: رمضان في تشاد .. مدخل للتعريف بعادات وتقاليد تشادية
Author: manubia
Date: 09-15-2007, 06:57 AM
Parent: #36

Quote: أنا عندي نظرية عن أصل مشروب الحلو مر أو الآبري.
في رأيي أن هذا المشروب المعقد (تأتي بالعيش، وتبله، وتزرِّعه، وتطحنه، وتخمر العجين وتضيف له البهارات، ثم تصنع الخبز (الكسرة) لتأتي بعد هذا كله لتشرب منقوع ذلك الخبز) يبدو أن مراحل صناعته أطول وأكثر تعقيدا من أن يكون الغرض منها المشروب بعد عمل الكسرة منه. لذا أعتقد أن الحلو مر هو من المنتجات العرضية للمريسة. فلو لاحظنا أن العملية واحدة إلى مرحلة العجين (تزريع العيش زريعة وإعداد عجين من الزريعة) بعد ذلك تختلف طريقة التخمير وإضافة البهارات المنكّهة للآبري دونا عن المريسة. وفيما يبدو أن إحدى جداتنا من الصانعات خطر لها في مراحل تصنيع المريسة أن تعوس من العجين خفيف التخمير طرقة أو طرقتين لتشربهما "موص" أو "كسرة بي موية" أها، لما اكتشف الناس أن ماء كسرة المريسة له لون وطعم خاص، تفننوا فيه وأضافوا له البهارات الأخرى وأسموه آبري وأصبحوا يعملونه لذاته! [/
QUOTE]


يا محمد .... أنت زول خطر عديل ... و نظريتك دي اثبتت لي انو نحنا اصلا شعب مخترع و فنان ... بس متحفظ شوية


متابعين يا محمد نور
Post: #55
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:14 AM
Parent: #41

أخوناmanubia .. رمضان كريم .. شكرا على المرور وخليك متابع
Post: #54
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:09 AM
Parent: #36


Quote: يعني يا محمد نور ما حصل شربت عصير TISSUES في السودان!!!

والله يا محجوب الشئ الجايبه اسمه غالبني أقراه .. لكن إحتياطا كدي بضمن ليك اني ما شربته .. ده هو من ياتو فصيل ما يكون من ناس الشربوت ولا فوق .. تكون اتلومت معاي يا محجوب.
لكن انت عارف أي محل عصير في السوق العربي " أبو جنزير" أنا شريت منه .. الشئ ده لو واقع في الحته شربت تب إنشاءالله كان فيه أربعين سوط.
في محل عصير ما متذكر اسمه في ناصية الأوقاف الفاتح على البنك السوداني الفرنسي طوالي مشغل ود اللمين .. ده أنا بكون شربت منه زي بي عشرمية مليون (بالقديم طبعا)، وفي واحد فاتح عاى موقف أم درمان اسمه ملك العرديب ده فتح ليه على الأقل محلين تانيين ومشى الحج من قروشي أنا براي.
غايتو ..
Post: #40
Title: Re: رمضان في تشاد .. مدخل للتعريف بعادات وتقاليد تشادية
Author: أبوالزفت
Date: 09-15-2007, 06:46 AM
Parent: #1


محمد نور
رمضان كريم وتصوم وتفطر على خير
ياخى ده بوست جميل وهادى
اتمنى يستمر على كده
والله يكفى هذا البوست من السياسة والعنصرة
اها يا محمد الخشبة البوزعو بيها العجين فى الصاج
اسمها "قرقريبة"
وقطعة القماس البيمسحو بيها الصاج اسمها معراكة
ومن مكونات الزيت بيمسحو بيه الصاج الطاييق
وده النخاع الشوكى للخرف
Post: #43
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 07:10 AM
Parent: #40


الأنقارا:

نحدثكم اليوم عن مشروب تشادي آخر يعرف بـ " ألمي أنقارا" - أي ماء الأنقارا- أو " أنقارا" مجردة هكذا، ويسميه السودانيين " الكركدي". وهو مشروب أحمر اللون يصنع من ثمار نبات يعرف في تشاد بـ "الكركنجي". ويطلق التشاديون لفظة "الكركنجي" على النبات الذي يثمر "الأنقارا" المستخدم في المشروب الرمضاني الجميل، والذي يدلعه السودانيين بلفظة "الكركدي". ويعتبر "ألأنقارا" أحد أهم المشروبات التي يتناولها التشاديين بجانب "الأبري" وعصير "العرديب" و عصير الـ الكلاكوكا" وهو ما يعرف في السودان بالقنقليز.
أعتقد أنه لابد لنا من الحديث أولا عن أصل " الأنقارا" وهو "الكركنجي" والذي هو نبات من فصيلة الـ Spinish وإن كان يختلف عنه في المذاق إلي حد ما، و يزرع الكركنجي" في مناطق مختلفة في تشاد، و يحتل موقعا متقدما في المطبخ التشادي بجانب "الملوخيا" و"البامية" و " البطاطس" . نبات "الكرنجي" بجانب إنتاجه لمادة "الأنقارا" التي يستخدمها التشاديون في صناعة العصير المعروف فهو مادة عذائية في حد ذاته مثله مثل " الملوخيا" يأكله التشاديون مع الأرز وشطة حارة تسمى "شطه نشامري" نسبة إلى إحدى القبائل النيجيرية. ويعتبر الأرز بملاح الكركنجي إحدى الأكلات الشعبية الموسمية المرتبطة بموسم الخريف، ويحدث أن يأكل فيه التشاديون في اليوم الواحد بنظام بامية – ملوخية – كركنجي وبالعكس.. ولأن الكرنجي مادة غذائية رخيصة الثمن ولذيذة المذاق فإنها تكاد تكون سيدة المائدة التشادية في فصل الخريف. ولأن إعداد ملاح "الكرنجي" فيه يعض التعقيد الذي لا أفهمه فلن أخوض فيه كثيرا، ولكنني متأكد من أن أهم مكوناته هو ورق أو صفق " الكرنجي" و الفول الأحمر المسحون ، وهو ما يطلق عليه السودانيين " الدكوة".
عودة إلى السيد / " أنقارا" موضوع الحديث، يمكننا القول أنه المنافس القوي والأوحد "للآبري" ، ويتم تحضبره بنفس طريقة تحضير "الآبري" . ويختلف " الأنقارا " عن "الآبري" في المذاق حيث الأول به درجة عالية من الحموضة مقارنة بالتاني، بحانب أن الأول لونه أحمر صارخ والثاني بني اللون. وكما أن لـ "الآبري" نوعان : أحمر وأبيض فإن " الأنقارا" أيضا أحمر وأبيض، ولا يختلفان عن بعض في شئ سوى اللون ، والذي يعود في أغلب الظن إلى الجينات الوراثية لنبات "الكركنجي". ولكن يظل الأنقارا الأحمر هو الشائع والذائع الصيت والمعروف لدى الجميع لونا وطعما وشكلا.
يعتقد التشاديون ان مشروب "الأنقارا" له فوائد صحية كتنظيم نبضات القلب وعلاج إرتفاع وانخفاض الدم وتنظيم والنزلات والإلتهابات الصدرية وأمراض الكلي والبول.
و لفائدة إجراء بعض المقارنات بين تشاد والسودان من حيث إنتشار هذا المشروب أكاد أجزم أن كل السودان تقريبا وبلا استثناء يتناول هذا المشروب بنفس الطريقة التي يتناولها تقريبا كل التشاديين وبلا استثناء أيضا. بينما لم تقع عيناي أو يتذوق لساني أو تبطش يداي أو يشم أنفي أبدا ملاح الكركنجي الذي سبق الحديث عنه.
كما يمكن القول أيضا ومن خلال معايشتي للمجتمعين التشادي والسوداني أن مشروب الأنقارا أكثر شعبية في تشاد منه إلى السودان، والسودانيين الذين عاشوا في تشاد أو سبق لهم أن زاروها يدركون هذه الحقيقة.

عاش الكركنجي..
عاش الأنقارا..
عاش الكركدي..
عاشت نميري..



ونواصل..







_______________________________________________________________________
مافي اي تعديل في الفكرة .. شوية مشاكل تذكير وتأنيث .. أصلنا رطانة ما عرب .. وبث
Post: #56
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:22 AM
Parent: #40

أبو الزفت يا ..
Quote: اها يا محمد الخشبة البوزعو بيها العجين فى الصاج
اسمها "قرقريبة"
وقطعة القماس البيمسحو بيها الصاج اسمها معراكة
ومن مكونات الزيت بيمسحو بيه الصاج الطاييق
وده النخاع الشوكى للخرف

بس قرض على كده يا زول .. إت كتلتها تب.. يا ها ذاتها .. طبعا نفس المفردات لكن طارت مني ، قدر ما حاولت استدعي ذاكرتي ما قدرت أجيبهم.
والله بعد حاجاتك الجبتهم ديل ما ناقصنا غير دقيق الذرة المذرع .. كان نسوي مريسة و لا أبري نحنا أحرار .. أها رأيك شنو يا اخوي.
شكرا يا أبو الزفت على المرور والإضافة.
خليك قريب يا زول .. ممكن نتزنق تاني في حاجة.
Post: #45
Title: Re: رمضان في تشاد .. مدخل للتعريف بعادات وتقاليد تشادية
Author: Tariq Mohamed Osman
Date: 09-15-2007, 07:22 AM
Parent: #1

صديقنا محمد نور
سعيد بهذا الحكى لان سبق لى
ان عايشت ذلك فى انجمينا
وشعب تشاد جدير بالاحترام
والتقدير

ورمضان كريم

مع مودتى
Post: #52
Title: Re: رمضان في تشاد .. مدخل للتعريف بعادات وتقاليد تشادية
Author: الزنجي
Date: 09-15-2007, 09:24 AM
Parent: #45


عزيزى محمد نور
احييك على السرد والعرض لتلك التقاليد والعادات التشادية ـ السودانية
فتوجد عدد من العادات والتقاليد الاجتماعية يا جبذا لو عرجت على العادات الاجتماعية فى تشاد

من خلال زيارتي لتشاد من ادرى الى ابشي ، اتية وحتى انمينا لم اجد فرق كبير بين السودان وتشاد
فهو امتدا اثني وقبلي وعقائدي مشترك .

شكرا لك على اخذنا الى تلك البقاع الحبيبة .. ونواصل
Post: #58
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:50 AM
Parent: #52


الزنجي .. إزيك يا اخوي . . إنت ياكا زولنا والله.. رمضان كريم يا زول.
Quote: من خلال زيارتي لتشاد من ادرى الى ابشي ، اتية وحتى انمينا لم اجد فرق كبير بين السودان وتشاد
فهو امتدا اثني وقبلي وعقائدي مشترك

إنت عارف البوست يا دوب عمل 48 ساعة بس و أنا لاقي زي عشرمية سوداني كانوا في تشاد في قترة من الفترات، يا جماعة قولوا للشعب السوداني ده في حلة بجاي اسمها تشاد واحكو ليهم عننا.. عليك الله يا الزنجي كان ما قريت ردي لوليد صفوت فوق شوية.

تسلم يا اخوي.
Post: #57
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:40 AM
Parent: #45

الصديق/ طارق محمد عثمان
مرحب بيك .. ورمضان كريم.
Quote: سعيد بهذا الحكى لان سبق لى
ان عايشت ذلك فى انجمينا
وشعب تشاد جدير بالاحترام
والتقدير

أشكرك بالإنابة عن شعب تشاد وكتر خيرك على هذا التقدير والإحترام اللذين لا يخرجان إلا من شخص محترم.
آها يا اخوي .. إنشاءالله تكون صمت ليك رمضانين ثلاثة في تشاد تلحقنا وتفزعنا في البوست ؟

تحياتي ومحبتي
Post: #59
Title: Re: رمضان في تشاد .. مدخل للتعريف بعادات وتقاليد تشادية
Author: Raja
Date: 09-15-2007, 12:07 PM
Parent: #57

الزول الحبًوب محمد نور..

أعجبتني طريقتك في الردود على المشاركين.. تحية كبيرة على الرقي والذوق..

Quote: الوالدة بتسلم عليك برضو وبتقول ليك تصومي وتفطري على خير .. وقالت ليك عليك الله خل الشكل.

ههههههههه والله أنا ما شاكالة. ودايما بفترض حسن النية لغاية ما يثبت العكس.. ويا ويل ويله من البيغلط في حقي أو حق واحد من أخواني..

تحياتي للوالدة وأشكرها على دعواتها المحتاجة ليها شديد..

لك وافر الود
Post: #66
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 07:38 PM
Parent: #59

رجوية صاحبتي .. إزيك .. أها .. So far إنشاءالله أبو الروم منستر معاك.؟
Quote: أعجبتني طريقتك في الردود على المشاركين.. تحية كبيرة على الرقي والذوق..

إنت برضك مشتركة في جمعية رفع المعنويات ? .. شكرا على الإطراء ..


مسئولة من الخير يا رجاء .. البنية الفي بروفايلك دي منو؟ عيونافيها شئ يحير يغير إتجاه الزول . كمية من البراءة والإستجداء .. البنية دي وراها قصة حزينة ومأساة إنسانية.


كدي أحكي لينا عنها عليك الله.
Post: #60
Title: Re: رمضان في تشاد .. مدخل للتعريف بعادات وتقاليد تشادية
Author: بكري اسماعيل
Date: 09-15-2007, 12:27 PM
Parent: #57

كيفك يا محمد نور

Quote: ياخي كان ما اشتقت للناس البتعرفهم ما مشتاق للتشة؟ قلت لي ضربت التشة ابو شطوط ديك لمن ربنا غفر ليك مش؟


أنا أكتر حاجة عجبتني هناك لحمة كبار كدة زي الشية بتاعتنا لكين على أكبر شوية نسيت اسمها والله بعدين ما تنسى أم جنقر والقدو قدو من الكورة ولل... عدل زي ما بقولوا ..
والله يا نور ناسنا الهناك كلهم اقفرقوا ولم يبقى منهم أحد لكين يا حبيب وعد مني لو غرّبت عما قريب حا ازوركم واعيد تلك الأيام الجميلة ..
Post: #67
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:06 PM
Parent: #60

صاحبي بكري اسماعيل..
Quote: أنا أكتر حاجة عجبتني هناك لحمة كبار كدة زي الشية بتاعتنا لكين على أكبر شوية نسيت اسمها والله بعدين ما تنسى أم جنقر والقدو قدو من الكورة ولل... عدل زي ما بقولوا ....

أها يا بكري اللحم الكبار ده اسمه "تشيلي" وبيعملوه بطريقتين ، إما يختو اللحم أنصاص كبيرة بعد يدوه المحسنات البديعية ويختوه على نيران جمر ، وده بياخد وقت طويل عشان يستوي.. النوع التاني كمان يقطعوا اللحم فيه لشرائح يمسحوها بالمحسنات البديعية ويدوها النار ، ودي بستتوي نسبيا أسرع من الأولي..الإتنين أي نوع أحلى من الأخر.
إنت عارف يا بكري أقرب شية لشيتنا التشادية أكلتها في كسلا، حاجة اسمها "السلات" ومعاها بت عمها لزم اسمها "القرار" إن لم تخني الذاكره. كما أتذكر شيتنا التشادية ديك يزداد كرهي BBQ الأمريكي.
هو ي يا زول إنت كان باريتك بتجرح لي صيامي بالشطة والليمون وبصل أبشة "المكادة".
أم جنقر سيكون موضوع حلقتنا الليلة .. فمن الوفاء له أن تظل قريبا من هنا.
أما القدقدو فهو شعرا ما عندي ليه رقبة، وحكاية من البتاع للبتاع دي دعايات تجار ساكت.
Quote: والله يا نور ناسنا الهناك كلهم اقفرقوا ولم يبقى منهم أحد لكين يا حبيب وعد مني لو غرّبت عما قريب حا ازوركم واعيد تلك الأيام الجميلة

آآآآآآآآآآ زول ها .. ده كلام شنو البتقول فيه ده .. مشينا وين نحنا .. من الليلة دي نحنا ناسك الهناك ذاتهم .. مرحب بيك في أي لحظة .. إن ما شالت إنجمينا نشيلك فوق رأسنا بس إنت تجي.
Post: #61
Title: Re: رمضان في تشاد .. مدخل للتعريف بعادات وتقاليد تشادية
Author: Hatim Yousif
Date: 09-15-2007, 12:44 PM
Parent: #1

أخي / محمد نور أحمد ..............سلام
-
عن الكركدي .... برضه يوجد منه (كركدي أبيض ) .... طبعاً ليس أبيض 100% ...... يعنى تقريباً شبيه بلون الآبرى الأبيض .....
-

-
واصل ياخ ............ حكي جميل

-
-
Post: #62
Title: Re: رمضان في تشاد .. مدخل للتعريف بعادات وتقاليد تشادية
Author: حاتم الياس
Date: 09-15-2007, 02:06 PM
Parent: #61

تشاد هى الأقرب ألينا..وحالتنا واحده..تقريباً نحن شعب واحد


...الله يديم علينا هذه المتعة فى (الضرا) (هنا شاد)..وتحياتى لمحمد نور





...بعض مداخلات الصديق بشاشا نبهتنى الى أنه ربما كانت جذور المشروبات الرمضانية من أبرى أبيض وأبرى أحمر ربما تعود لثقافات نوبية قديمة وكوشية..فحتى الن يجهل الكثيرين تاريخها وموطنها
Post: #63
Title: Re: رمضان في تشاد .. مدخل للتعريف بعادات وتقاليد تشادية
Author: Biraima M Adam
Date: 09-15-2007, 03:22 PM
Parent: #62


الأخ محمد نور
والأخوة المتداخلين

رمضانا كريم

هنا يا محمد أنت ذكرت كلمة مر عليها بشاشا مرور الكرام ..
Quote: وسيد مويات رمضان على الإطلاق بحانب الأنقارا "الكركدي"

كلمة الأنقارا التى تعنى الكركدى أيضاً كلمة بقارية خالصة ويستعملها كل البقارة فى السودان لذات الكلمة الكركدى .. دا يعنى أن شهورهم بقارية وليس كوشية كما يقول بشاشا ..

بريمة
Post: #71
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:40 PM
Parent: #63

حبيبنا/ بريمة البقاري .. سلامات يا زول يا رائع.
يا اخوي إنت وبشاشا رسونا على بر .. نحنا بقارة ولا كوشيين.؟ عشان كان بقينا بقارة نجهز للإتحاد الكونفدرالي الجاي ( بس ما تسألني مع السودان ولا تشاد)، وإن بقينا كوشيين كمان زيتنا في بيتنا .. لا انكسر القزاز ولا اتدفق السمن.. حصل لينا القرب من بشاشا.
Quote: كلمة الأنقارا التى تعنى الكركدى أيضاً كلمة بقارية خالصة ويستعملها كل البقارة فى السودان لذات الكلمة الكركدى .. دا يعنى أن شهورهم بقارية وليس كوشية كما يقول بشاشا ..

شايف كلمة "ألمي" ما استوقفتك زي ما فعلت "ألأنقارا".. البقارة ديل يا بريمة لو ياهم القبائل ذات الأصول العربية البيمتهنوا رعي الأبقار ويتميزوا بالترحال والفروسية -وده أبسط تعريف للبقارة- تبقوا أنتو تشاديين ما سودانيين.
بالمناسبة قريت ليك قبل كده ورقة عن قبائل البقارة .. يا ريت لو قدرنا فتحنا حوار في خيط منفصل عن البقارة بين تشاد والسودان وجبته لينا.. في خيط شبيه بالموضوع ده Already مفتوح بس موغل في السياسة أكثر منه في التاريخ.. نقول كده وكده ينطوا لينا في حلقنا ساي.
Post: #69
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:25 PM
Parent: #62


أخونا/ حاتم إلياس .. رمضان كريم .. تصوم وتفطر على خير..
Quote: تشاد هى الأقرب ألينا..وحالتنا واحده..تقريباً نحن شعب واحد

ياليت قومي يعلمون !!
Quote: ...بعض مداخلات الصديق بشاشا نبهتنى الى أنه ربما كانت جذور المشروبات الرمضانية من أبرى أبيض وأبرى أحمر ربما تعود لثقافات نوبية قديمة وكوشية..فحتى الن يجهل الكثيرين تاريخها وموطنها

إنت يا إلياس يا اخوي في الآبري ولا فينا نحنا في عضمنا .. شايف انبرى السيد/بريمة يرضو وأكد على بقاريتنا.. غايتو إلا ننتظر بشاشا يجي عشان نشوف نحنا وين .. بقارة ولا كوشيين ..؟
Post: #68
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 08:14 PM
Parent: #61

أخونا/ Hatim Yousif .. رمضان كريم يا زول .. حبابك بهنا.
Quote: عن الكركدي .... برضه يوجد منه (كركدي أبيض ) .... طبعاً ليس أبيض 100% ...... يعنى تقريباً شبيه بلون الآبرى الأبيض

أها الليلة كمان جايبا ليها أم جنقر .. عليك الله كان ما جيت فطرت معانا في الخيمة التشادية دي.
Post: #64
Title: Re: رمضان في تشاد .. مدخل للتعريف بعادات وتقاليد تشادية
Author: Hadia Mohamed
Date: 09-15-2007, 03:37 PM
Parent: #1

رمضان كريم وكل سنة وانت طيب

العفو والعافية

فكرة البوست جميلة

Quote: هناك نوع آخر من الآبري لم أجده في السودان، وهذا النوع بالذات يحمل البصمة التشادية بدون منازع وهو الآبري الأبيض، وهو أقرب في شكله إلى ما يعرف بـ الرقاق في السودان. ويتم تحضير هذا النوع من الآبري من الذرة الشامي "المصر" وهنا يكمن سر بياضه، ويتبع فيه نفس طريقة تحضير الآبري سيد الإسم.
الآبري الأبيض على الرغم من إسمه الدال على لونه والذي لا يساورك أدنى شك في بياضه إلا أن به قطع ملونة يتفنن النسوة في ذلك بإضافة بعض المواد الملونة لإضفاء بعض اللمسات الجمالية عليه.
الأبري التشادي أو الحلو مر السوداني مسميان مختلفان لكائن واحد، يمكن التفريق بينهما بالذائفة، فالأبري التشادي يتميز عن السوداني بكمية البهارات والتوابل التي به، مما يجعل الأبري التشادي في مذاقه أقرب إلى عصير الجنزبيل في الطعم أكثر من الحلو مر السوداني.
لاحظت في السودان أن المرأة السودانية على الرغم من إستخدامها للأبري بشكل يومي في مائدتها إلا أنها غير ميالة إلى صنعه وتفضل شراؤه من السوق في العالب على تحضيره في البيت، وربما يعود ذلك إلي إيقاع الحياة المتسارع في المدن مقارنة بالقرى التي أتوقع أن الأهالي هناك ما يزالون يخافطون على تقليد صنع الأبري.


نواصل.



محمد الناس الفطرتة عندهم بس دسو منك الابرى الابيض:

طبعا من اهم المشروبات فى السودان وبتعمل فى رمضان فى كل البيوت السودانية

ومحبوب لخفتة وخاصة لكبار السن واصحاب المرض لانة خالى من البهارات او الحرارات

لا يوجد اختلاف فى عاداتنا والعادات التشادية صديقاتى فى كندا تشاديات

نتبادل الاطباق الرمضانية ونجهز لرمضان بشكل جماعى

اما صناعة الابرى حتى خروجى من السودان فى التسعينات يحضر فى المنازل

تتجمع نساء الحى فى مكان واحد لعمل التخمير ثم الكوجان او كما قلت اللخوخ

ولا انسى انهن يحملن البطاريات ليلا للكشف على العجين وتزوقة لمعرفة ان كان تخمر

او لا وتكون العواسة والكوجان بالدور للنساء حسب الظروف وترتيب العام المنصرم

ويتفنن الامهات فى عمل صوانى الفطور والغداء فى ايام العواسة والقهوة والشاى

وهى فرصة للونسة والحكاوى والذكريات الجميلة وايضا اللوم والتعافى

على فكرة انا بعرف من النوبيين المحس لانهم نسابتنا قالو ما شافو الابرى الا فى الخرطوم

وعندهم فى صاى وصوارة فكرة الابرى فكرة دخيلة دخيلة.

مودتى
Post: #65
Title: Re: رمضان في تشاد .. مدخل للتعريف بعادات وتقاليد تشادية
Author: غادة عبدالعزيز خالد
Date: 09-15-2007, 04:26 PM
Parent: #64

سلامات يا محمد

عصير الـ TISSUES القالوا ليك أخونا محجوب قاصدبيهو الآبري الأبيض
ودي كانت نكتة معروفة عن بت (حنكوشة) جدا
بتقول لعصير الآبري الأبيض عاوزة عصير تيشوز
لأنو شكلو زي منديل الورق (الإتفتفت) في الموية

على فكرن، النيل الأزرق لم تباع لقنوات أي آر تي
بل هي بدأت كجزء من مظلتها خاص بالسودان فقط
ويبدو أنهم منتظرين أن القناة تكبر وتكون لها شعبية
لكي تكبر مدارها وتتسع مساراتها
وإن شاء الله ربنا يخلي تمبس وتحيا يوتوب

أها نتابع، علشان لم تكونوا عاوزين تخشوا المطبخ ندخل معاكم
وتحياتكم لصديقتي موصولة، بس وجهتوا ليها دعوة زيارة تشاد وأنا
مافي زول هبب لي...
دنيا!
Post: #73
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 09:16 PM
Parent: #65

صاحبتي غاده .. ازيك.
Quote: وتحياتكم لصديقتي موصولة، بس وجهتوا ليها دعوة زيارة تشاد وأنا
مافي زول هبب لي...
دنيا!

والله دي بس زرة السحلية جنب باب الحمام
على الطلاق تمشي تشاد والـ Ticket two ways علينا كمان .. كدي كيف؟
لكن يا ماما برضنا شحدناك حبة "قنقليز" شايفك مثلت ميتة ولا عملت نائمة ما عارف .. الحالة اتشوبرنا وقلنا الـ UPS علينا.
غايتو دي ما قوية زي الزرة .. لكن واحدة بواحدة .. ويحيا العدل.. وبرضو سلم لي على بتنا التشادية الهوى والمزاج.
Post: #72
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 09:03 PM
Parent: #64

أختنا Hadia Mohamed .. ازيك والأولاد .. رمضان كريم .. وانشاءالله رمضان الجاي الفي مرادك يا بت أمي.
Quote: محمد الناس الفطرتة عندهم بس دسو منك الابرى الابيض:

والله يا هادية يا اختي دي فسالة منهم ساكت .. كمان عصير الـ TISSUES ده - على قول محجوب وغادة - يتفاسلوا فيه.. الله يسامحهم.
Quote: لا يوجد اختلاف فى عاداتنا والعادات التشادية صديقاتى فى كندا تشاديات
نتبادل الاطباق الرمضانية ونجهز لرمضان بشكل جماعى
اما صناعة الابرى حتى خروجى من السودان فى التسعينات يحضر فى المنازل
تتجمع نساء الحى فى مكان واحد لعمل التخمير ثم الكوجان او كما قلت اللخوخ
ولا انسى انهن يحملن البطاريات ليلا للكشف على العجين وتزوقة لمعرفة ان كان تخمر
او لا وتكون العواسة والكوجان بالدور للنساء حسب الظروف وترتيب العام المنصرم
ويتفنن الامهات فى عمل صوانى الفطور والغداء فى ايام العواسة والقهوة والشاى
وهى فرصة للونسة والحكاوى والذكريات الجميلة وايضا اللوم والتعافى

أولا بالتبادي خلينا نتعنصر ونسلم شديد على صحباتك التشاديات .. وقول ليهم "لاليكو" و"قيلتو عافي".
أما لمة الأبري الخليتيها في سودان زمان داك منه العوض وإليه العوض.. حريم السودان الجديد اليومين لا يعوسن لا يخبزن.. يشهد الله المرة منهن تباري الجبنة والشمار والشوبار وعرس فلانة وسماية فلتكانة، وهاك يا الحنة والدخان .. تجي ساعة الفطور ولا العشاء .. يا ولد هاك الجك – كان ما الراجل طبعا- .. جيب فول بي 500 (بالقديم طبعا)، جبنة 250 ، زيت 250، طعمية بي 100، (ده طبعا لو ما زادت عليها خل بتاع الدكان يديك شوية ملح)، وجيب معاك عيش من الفرن.. بتكون ملاحظة أنا ما حبت سيرة للغداء لأنه مافي زول قاعد يتغدى .. العالم دي كلها عايشة 1-0-1 .. تقول لي يعوسوا أبري.!!!!؟؟؟



سعدت بمرورك يا هادية .. وخليك قريبة .. وتاني سلم لي على بنات بلدي
Post: #70
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-15-2007, 08:28 PM
Parent: #1

wrong place
Post: #74
Title: Re: رمضان في تشاد .. مدخل للتعريف بعادات وتقاليد تشادية
Author: محمد البشرى الخضر
Date: 09-15-2007, 09:25 PM
Parent: #1

Quote: البنية الفي بروفايلك دي منو؟
بالله ختفتها من كيبوردي

و يا رجاء
Quote: كدي أحكي لينا عنها عليك الله.
Post: #75
Title: Re: رمضان في تشاد .. مدخل للتعريف بعادات وتقاليد تشادية
Author: ombadda
Date: 09-15-2007, 09:56 PM
Parent: #1

رمضان كريم
لاليكم ...لالينا
الوالد كان من التجار السودانيين الذين تغربوا فى تشاد فى اواخر الخمسينيات وحتى اواخر السبعينيات وطفولتى قبل المدرسة كانت فى فورتلامى
....
Post: #76
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-15-2007, 11:30 PM
Parent: #75

ombadda.. ازيك .. رمضان كريم يا زول .
Quote: الوالد كان من التجار السودانيين الذين تغربوا فى تشاد فى اواخر الخمسينيات وحتى اواخر السبعينيات وطفولتى قبل المدرسة كانت فى فورتلامى

عليك الله كلم الناس ديل يشوفوا الإغتراب في الخمسينات كان لوين .. تقول لي خميس مشيط وعنزه وبطيخ؟ .. والله إنت قديم خلاص يا أمبده .. هسع عليك الله إنت من زمن "فورلامي"، وقت داك نحنا كنا لسه في الفواكه.
في عدد كبير جدا من السودانيين الذين نغربوا في تشاد منذ منتصف القرن الماضي وعملوا بالتجارة وأثروا الحياة التشادية بالكثير المفيد ، أتذكر منهم أعمانا تاج السر كروم و ابراهيم الطاهر والمأمون الحسن طه، وحامدأبو عصاية ، وعم عبدالرحمن وناس مختار نصر .. أسر كثيرة ما يزال بعضها يعطي بسخاء ويساهم بقدر كبير في ترقية الحياة الإجتماعية، وأغلبهم اكتسب حق المواطنة في تشاد وأصبحت الأجيال الجديدة منهم في مراكز صنع القرار السياسي والحياة الإقتصادية في تشاد.
لو حضرتوا بدايات السبعينات فبتكون قطع شك حضرت إفتتاح مدرسة الصداقة السودانية التشادية بأنجمينا على إيد أبو غاج "المشير جعفر نميري في فبراير 1971م والتي خرجت ولا تزال المئات من الشباب التشادي الذي يصنع الحياة في تشاد وغيرها من أطراف العالم.
هوووووووووي يا أمبده .. أنا كان باريتك في الكلام ده يا هو الفطرت موية سادة ومن المأسورة.. أخير لي أمش بوست الحريم بقيادة لنا بت مهدي أشزف لي وصفة سريعة التنفيذ أحلل بيها صيامي .. وربك كريم.

إنت امبده ياتا فيهم يا اخوي .. هسع عليك الله الواحد كان جاي يفطر معاك في البيت بقول لي ناس البيت أنا الليلة فاطر مع أمبده ?.. ما بيقولوا علي جنيت .. أقلاها بيقولوا ما بيعرف عربي.



أبقى متحاوم بجاي يا زول .. حنحتاجك .
Post: #77
Title: Re: رمضان في تشاد .. مدخل للتعريف بعادات وتقاليد تشادية
Author: Biraima M Adam
Date: 09-16-2007, 02:05 AM
Parent: #76


الأخ محمد نور
لك ألف شكر على الدعوة لفتح حوار عن البقارة فى السودان وتشاد .. وأخوك جاهز ولا اريد أن أقطع لك حبل تفكيرك الأن .. هذا البوست بالنسبة لى فاكهة رمضانية أبحث عنه كل يوم بعد يوم عمل طويل وأعتبر مداخلاتى بمثابة رفع للبوست حتى تعم فائدة هذا الأضاءة المهمة ..
جانب أخر ما أردته أن أوضح أننا فى غرب السودان لنا أمتداداتنا الأثنية فى جوارنا الغربى وتلك الأمتدادات الأثنية لم يتم أستثمارها بصورة جادة .. ولا أدرى لماذا الأستثمار فى دول جوارنا من ناحية الشمال والشرق لدرجة وصل الأمر أن الزائر من تلك الجهات لا يجد غربة كبيرة فى وسط الخرطوم فى حين أبناء جوارنا الغربى يعزلون بصورة تنم عن عنصرية بائنة .. وهذا البوست يساعدنا فى التعرف على عمق أستراتيجى بالنسبة لنا أبناء الغرب وأنا أريد أن نرى أكثر من التعرف، أن يصل الأمر إلى تبادل الزيارات الفنية والأدب والمسرح .. وأعرف أن كل الثورات المهمة فى تشاد أنطلقت من السودان ويتعبر السودان وطن ثانى لأغلب التشاديين لكن البعد الشعبى ظل بفعل الجلابة أمثال بشاشا الرافضين للغرابة مختزل تماماً .. وهذا البوست بمثابة بعد شعبى، أتنمى أن يعى الجلابة مغزاه ..

بريمة
Post: #96
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 11:13 PM
Parent: #77


الأخ الكريم /بريمة
Quote: لك ألف شكر على الدعوة لفتح حوار عن البقارة فى السودان وتشاد .. وأخوك جاهز ولا اريد أن أقطع لك حبل تفكيرك الأن .. هذا البوست بالنسبة لى فاكهة رمضانية أبحث عنه كل يوم بعد يوم عمل طويل وأعتبر مداخلاتى بمثابة رفع للبوست حتى تعم فائدة هذا الأضاءة المهمة ..

وجودك بجاي ه مكسب كبير لي شخصيا وللبوست .. فقط ننتظر إسهاماتك ومقارناتك .
بخصوص البوست .. وعد قاطع مني على افتراع بوست خلال قادمات الأيام والتحدث فيه عن البقارة في الشق الآخر من مناطقهم ومراعيهم "تشاد"، وحيكون من غير مشاكل زرقة وعرب، نريده بوستا تاريخيا علميا إنشاءالله.
Quote: جانب أخر ما أردته أن أوضح أننا فى غرب السودان لنا أمتداداتنا الأثنية فى جوارنا الغربى وتلك الأمتدادات الأثنية لم يتم أستثمارها بصورة جادة .. ولا أدرى لماذا الأستثمار فى دول جوارنا من ناحية الشمال والشرق لدرجة وصل الأمر أن الزائر من تلك الجهات لا يجد غربة كبيرة فى وسط الخرطوم فى حين أبناء جوارنا الغربى يعزلون بصورة تنم عن عنصرية بائنة .. وهذا البوست يساعدنا فى التعرف على عمق أستراتيجى بالنسبة لنا أبناء الغرب وأنا أريد أن نرى أكثر من التعرف، أن يصل الأمر إلى تبادل الزيارات الفنية والأدب والمسرح .. وأعرف أن كل الثورات المهمة فى تشاد أنطلقت من السودان ويتعبر السودان وطن ثانى لأغلب التشاديين

الشق ده الكلام فيه كثير والحديث فيه الآن سيخل بموضوع البوست .. إذا دعنا ندخره للبوست الموعود.



تسلم يا بريمة.
Post: #89
Title: Re: رمضان في تشاد .. مدخل للتعريف بعادات وتقاليد تشادية
Author: ombadda
Date: 09-16-2007, 02:41 PM
Parent: #76

Quote: عليك الله كلم الناس ديل يشوفوا الإغتراب في الخمسينات كان لوين


ما دة الأغتراب الخلانا نسكن أمبدة بدلا من الصافية

Quote: أتذكر منهم أعمانا تاج السر كروم


دة تبعنا


Quote: إنت امبده ياتا فيهم يا اخوي .. هسع عليك الله الواحد كان جاي يفطر معاك في البيت بقول لي ناس البيت أنا الليلة فاطر مع أمبده ?.. ما بيقولوا علي جنيت ..




شيف الزول دة قال هو ما شبه أمبدة يا ربى يكون شبه ناس الصافية ولا الرياض



ما تزعل ياخى نحن أولاد جعل نكرم الضيف ولو فى كسرى(بضم الكاف وكسر الراء)

بالمناسبة كان يطلق على السودانيين المقيمين فى تشاد كلمة جلابة
Post: #98
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 11:41 PM
Parent: #89

صاحبي/ أمبده بالردمية .. ازيك تاني.

Quote: Quote: عليك الله كلم الناس ديل يشوفوا الإغتراب في الخمسينات كان لوين



ما دة الأغتراب الخلانا نسكن أمبدة بدلا من الصافية


Quote: أتذكر منهم أعمانا تاج السر كروم



دة تبعنا



Quote: إنت امبده ياتا فيهم يا اخوي .. هسع عليك الله الواحد كان جاي يفطر معاك في البيت بقول لي ناس البيت أنا الليلة فاطر مع أمبده ?.. ما بيقولوا علي جنيت ..





شيف الزول دة قال هو ما شبه أمبدة يا ربى يكون شبه ناس الصافية ولا الرياض



ما تزعل ياخى نحن أولاد جعل نكرم الضيف ولو فى كسرى(بضم الكاف وكسر الراء)

بالمناسبة كان يطلق على السودانيين المقيمين فى تشاد كلمة جلابة

يا اخوي إنت زعلت ولا شنو؟ .. التعليق كان بسبب إنه إسمك أم بده مش لأنك ساكن أمبده.
أنا ذاتي يا اخوي زول هامش كان في تشاد ولا في السودان.. في تشاد من أقصى الغرب على الحدود مع النيجر .. وفي السودان سكنت الحاج يوسف وليوم الليلة أهلي فيها.. تقول لي امبده .. أمبدتكم دي بالنسبة للحاج حفر بلد حناكيش ساي .. أخير منكم ناس الصافية.

السودانيين الفي تشاد ما يزال يطلق عليهم نفس المسمى "الجلابة"، وهذه أظنها مسمى لقبيلة أنثر من كونها مصطلح يحمل نفس معاني كلمة الجلابة هنا في المنبر. قبيلة مشهورة في تشاد إسمها "حلابة نمرو" لست متأكدا من وجودها في السودان بنفس المسمى، لكن الشائع لدى التشاديين أنها قبيلة سودانية.
Post: #78
Title: Re: رمضان في تشاد .. مدخل للتعريف بعادات وتقاليد تشادية
Author: Bashasha
Date: 09-16-2007, 02:59 AM
Parent: #1

ابوحميد،
ايضا من الطقوس الماموجودة في الخرطوم، في رمضان في دنقلا، الشعرية المعمولة في البيت.

طبعا من عاداتنا هناك، عيب كبير الصغار يصحو وقت السحور ماتعرف ليه!

وهذه الشعرية باللبن الطازة من البقار في المراح، في السحور، بالله ماتدي الجمك!

احيانا كنت بتحايل عشان مااقوم واشارك او خجلان شديد من هادي عملة!
Post: #79
Title: Re: رمضان في تشاد .. مدخل للتعريف بعادات وتقاليد تشادية
Author: bob
Date: 09-16-2007, 05:05 AM
Parent: #78

الاخ / محمد

رمضان كريم يا زول!!

متابع لسردك الجميل عن اثقافه التشادية فى رمضان وتثقيفنا بيها
وان جات الحقيقة معاكسه لذلك هى ثقافة سودانيه افريقيه او افريقيه مشتركه لكثير من
الدول مثل تشاد تشاد بعض من اجزاء النيجر سنغال اجزاء من نجيريا
غانا وبعض الدول الاخرى...
الثقافة التشادية هى تقريبا نفس الثقافة السودانية
معا الاختلاف فى اللغه والبعض التقاليد الاخرى التى ربما وجدت فى السودان او
تشاد...بعتبرهما دولتين اصحاب قبائل مشتركة فمن الطبيعى وجود عادات
وثقافات تسود بينهم...

مــلاحـظة:
Quote: " ألمي أنقارا" - أي ماء الأنقارا


ذكرت الكلمتين ديل معا تفسيرتهم ..على ما اعتقد بانك لاتدرى بان
الاثنين كلمتنين سودانتين عامتين ايضا
فمثلا الكركدى الانقارا الالمى وهى كلمات عاميه يسود
استعمالهم من شمال كرفان الى دارفور اذا صح التعبير

لذلك لا اجد بان هناك فرقا كبيرا بين السودان وتشاد ماعدا
اللغة الاوله واختلاف المستعمر!!
وهنالك الكثير المثير!!!

Regards
ـــــــــــــــــــــــــــ
Edited for a reason
Post: #80
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 05:20 AM
Parent: #79

الأخ الكريم بوب .. رمضان كريم .. تصوم وتفطر على خير.
شكرا على المرور والمتابعة .. ولفائدة القراء فإن اللغات الرسمية في تشاد هي الفرنسية والعربية على السواء لا أفضلية لإحداهما على الأخرى. ولأن الإستعمار الفرنسي قد كرس حهده لمحاربة اللغة العربية منذ دخوله البلاد في العام 1900م فإن الصفوة الغالبة في تشاد من المثقفين بالفرنسية. وقد بدأ التنامي الثقافي العربي يستعيد عافيته منذ سبيعينيات القرن الماضي، ويكاد يتفوق الآن على الفرنسية أحيانا في بعض مستوياتها الآن.
وعلى الرغم من هذا التركيز الإستعماري للثقافة الفرنسية على العربية إلا أن اللغة العربية كانت وما تزال لغة الشارع والتخاطب بين الناس على الرغم من اللكنة المحلية التي بها.
ولذلك فإن تشاد تشترك مع السودان حتى في اللغة.. فالعربي الذي تتحدثه قبائل البقارة في دارفور هو بالضبط العربي المتحدث به في الشارع التشادي بشكل عام مع بعض الإضافات أحيانا حسب المناطق الجغوافيه، فتجد مثقفي الفرنسية يتحدثون الدارجية التشادية مخلوطة بمفردات فرنسة ، وكل قبيلة تستعين يقدر ما تحتاج من لهجتها وتضيفه إلى العربية ، ولكنه يظل عربيا مفهوما للجميع.


شكرا يا بوب أن جعلتني أضيف هذه الجزئية التي ما كنت سأتطرق إليها لولا إضافاتك الثره.
Post: #81
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:44 AM
Parent: #80



صفرة رمضان في تشاد:


في خضم فرحتي بكم في هذه الخيمة الرمضانية التشادية اختلط علي الأمر، فبدلا من أن أحدثكم أولا عن وجبة الإفطار لدى الشعب التشادي، ذهبت بعيدا لأحدثكم عن جانب من مكونات صينية رمضان لدى التشاديين مركزا على بعض العصاير المحلية. ولذلك أسمحوا لي عبر هذه المساحة في حلقة الليلة أخذكم في جولة سياحية في فطور رمضان لدى الشتاديين.
تبدأ رحلة الإفطار لدى أي أسرة تشادية بقش ورش حوش البيت، والذي يجب أن يكون قد هيأ (بضم الهاء) قبل أيام بدور" رمل" من قلاب مانع. وتبدأ إجراءات تهيئة الميدان الخاص بالإفطار منذ الرابعة عصرا يوميا لتنتهي عند الأذان. ويقوم الأطفال عادة بهذه المهمة إراحة للكبار الذين هم عادة ما يكونوا في حالة دروخة في مثل هذه الساعة، و توددا لهم لضمان مقعد في صينية الفطور بجانب الكبار لتناول مالذ وطاب.
Post: #82
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:45 AM
Parent: #81

ظاهرة الإفطار الجماعي لكل سكان الحي في الشارع العام أو الزاوية أو ميدان المربوع الذي يتبعه السودانيون كتقليد عام في رمضان، يوجد في تشاد بشكل مختلف إلى حد ما, فالناس - على الأقل في المدن الكبيرة - لا يفطرون في الشوارع كما يفعل السودانيون لأن شوارعهم أصلا في بطون حيشانهم. فالتشاديون يعيشون في نظام الأسر الممتده، ففي البيت الواحد تجد ما بين 10-15 شخص، ويمكن أن يصل العدد إلى الضعف في رمضان. وتعتبر هذه هي الصفة الملازمة للأسر في تشاد. ولذلك فلا حاجة لأحدهم بحمل صينية إفطار والخروج بها إلى الشارع.
ولكي تتضح الصورة تخيلوا – مثلا - أنني منذ أن وعيت على الدنيا أكاد أتذكر عدد المرات التي تناولت فيها وجبة في رمضان أو غيره مع الوالدة والأخوات في صينية واحدة، وما ذلك إلا لأن بالبيت عدد لا بأس به من الأهل والأقرباء الذين لا أسمح لنفسي في وجودهم بالأكل مع "الحريم" ، وهذه إن حدثت فتعد سقطة لا يمحوها التاريخ ويمكن أن تساهم في رفضك من قبل عروس أو طردك بواسطة نسيب تطلب منه القرب.
Post: #83
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:49 AM
Parent: #82

النساء في تشاد مسكينات لحد يعجز الإنسان عن وصفه، لا يصلحن في نظر الرجل التشادي لغير المطبخ والفراش، وما عدا ذلك فهن ناقصات عقل ودين وعلى الرجال هجرهن وضربهن متى استدعى الأمر. حالة التعب والإرهاق التي تجد فيها أي مراة تشادية في رمضان تلهث لإرضاء زوج مغرور قمة همومه إرضاء ذاته تدعوك للإشفاق عليها.
فعلى المرأة في رمضان الإستيقاظ باكرا لفطور الشفع الما صايمين ، ونظافة البيت وتجهيز أغراض البعل المفتري، بدءا من حمامه وحتى تلميع جزمته لتهيئته للخروج، وبعدها بلبلة المويات من الأبري والكركدي وما إلى ذلك، ومن ثم الذهاب إلى السوق للخضار واللحم والذي منه ، ثم العودة إلى البيت للدخول إلى المطبخ، حيث يبدأ قطيع اللحم والبصل والخدار وشد الحلل، ولا ينتهي هذا المسلسل إلا بعد أن ينتهي السادة الرجال من إفطارهم ويتناولون الشاي والقهوة والمكيفات الأخرى
Post: #84
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:51 AM
Parent: #83

ويعتصرني الحزن حتى اللحظة عندما أتخيل شكل الحاجة الوالدة وهي في رمضان، مطبخ ملئ بالأدخنة والروائح الكريهة ، و تضطر أحيانا كثيرة إلى بلبلة توبها وسكب الماء على نفسها، وأخذ المروحة معها إلى المطبخ أحيانا لتتمكن من المقاومة والصمود حتى تعد لنا إفطار رمضان
Post: #85
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:52 AM
Parent: #84

صينية رمضان والتي يصر التشاديون على تسميتها بالصفرة إرجاعا لأصلها العربي تتكون من مكونات أساسية يشترك فيها تقريبا كل التشاديين، فقيرهم وغنيهم، لا أدعى أنه لا توجد إستثناءات، ولكن السواد الأغظم في تشاد يشترك في هذه المكونات، وهي:
1- ألمي عطرون ، وهو مشروب محلي يتكون من دقيق الدخن المسحون مع البهارات. ويغلي هذا الدقيق في ماء مع العطرون. و يحلل به التشاديون الصيام بجانب التمر. ولم أجد موازيا لهذا المشروب في السودان.
2- المديدة ، وهي ما يسمى في السودان بالنشا، وتتفنن فيها المرأة االتشادية بطريقة مدهشة، فبعضهن تصنعها بالدخن وهو ما يعرف في السودان بـ "أم جنقر" ، وبعضها بالقمح ، أو بالأرز، أو بالذرة الشامي أو بالبربري "الذرة". وللشهادة فإنني لم أجد في السودان من كل هذه الأصناف سوى صنف واحد وهو مديدة الدخن "أم جنقر".، ويعتبر الروب والذي يصر التشاديون على تسميته بـ "الروابة" والسكر هما العاملان المشتركان في كل هذه الأنواع من المدايد ( جمع مديدة).
3- الشوربة: وتوجد في السودان بنفس المسمى أيضا، فالبعض يفضلنها بلحم الضأن والبعض بالعجالي أو لحم الحمل. وفي بعض الأحيان البعض يطبخن شوربة اللحوم البيضاء كالدجاج والحمام والسمك وبعضهن تفضل شوربة الخضار. وأكاد أجزم أن هذه هي جميع أنواع الشوربة المعروفة لدى التشاديين. وتظل شوربة اللحم الضاني هي الأكثر شيوعا لمذاقها اللذيد مقارنة بالعجالي والجمالي ومعقولية سعرها مقارنة بالسمك والدجاج والحمام.
4- الزلابيا، وتعرف لدى التشاديين بـ "الفنقاسو" وهي العنصر الملازم للشوربة ويشكلان جبهة واحدة كتحالف ضد الرغيف والذي يصر التشاديون على تسميته بـ "العيش".
5- اللوبيا وهي نوع من الفاصوليا الذي يصنع بنفس طريقة الفول المطبوخ في السودان، بعضهن تفضله بالملح كطبق آخر بجانب الشوربة والفنقاسو ، والبعض الآخر تفضلنه بالسكر كتحلية لو جبة الإفطار.
6- البليلة، وتختلف هذه عن البليلة السودانية التي تأتي مع البلح لتحليل الصيام، فالبليلة التشادية تصنع من القمح ، أحيانا بالملح وأحيانا باللبن والسكر كتحلية.
أما المشروبات فبجانب تراميس الشاي الأخضر والأحمر والقهوة نجد عصاير الفواكه المختلفة كالمنقة، الجوافة، الموز باللبن، الأفوكا، والكركدي والآبري.. وغيرها الكثير.
Post: #86
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 07:54 AM
Parent: #85

ما أوردته أعلاه من أطباق متواضعة يتناولها تقريبا كل التشاديون في رمضان، ومن بعد ذلك يأتي التفاوت بين الناس حسب الحالة المادية والمكانة الإجتماعية.. وبنجي للفطور الـ Luxury في حلقات قادمة.

ونواصل ..
Post: #95
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 10:45 PM
Parent: #78


أبو النسب .. إزيك ..

Quote: ايضا من الطقوس الماموجودة في الخرطوم، في رمضان في دنقلا، الشعرية المعمولة في البيت.

طبعا من عاداتنا هناك، عيب كبير الصغار يصحو وقت السحور ماتعرف ليه!

وهذه الشعرية باللبن الطازة من البقار في المراح، في السحور، بالله ماتدي الجمك!


أها كان كدي نحنا ناس دنقلا ساي يا اخوي..إنت عارف أهم وجبة يمكن تناولها في السحور لدى الشتاديين هي إما الأرز باللبن أو الشعيرية باللبن..الشئ ده يخليك تقهي اليوم كله في خلايق الله .. العطش كان دفع ليه 20$ في الساعة ما بيجي جنبك..


تسلم يا حبيب
Post: #87
Title: Re: رمضان في تشاد .. مدخل للتعريف بعادات وتقاليد تشادية
Author: Tariq Mohamed Osman
Date: 09-16-2007, 09:04 AM
Parent: #1

محمدنور
سلامات
تعرف عزمنى صديق فى مطعم كندى
وجابوا الشوربه مها بسكويت
فضحكت وقلت لية وين الفنقاسو
قال لى ده شنو قلت ليه ده فى
تشاد ذلابيه مع الشوربه وبعدها
تحوارنا طويلا عن ثقافة الطعالم
عند الشعوب وتواصلنا فكرة البسكويت
ماخودة من الفنقاسو

وتحية وسلام لمزجان دفق
Post: #92
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 10:16 PM
Parent: #87


أخونا طارق/ Tariq Mohamed Osman
Quote: تعرف عزمنى صديق فى مطعم كندى
وجابوا الشوربه مها بسكويت
فضحكت وقلت لية وين الفنقاسو
قال لى ده شنو قلت ليه ده فى
تشاد ذلابيه مع الشوربه وبعدها
تحوارنا طويلا عن ثقافة الطعالم
عند الشعوب وتواصلنا فكرة البسكويت
ماخودة من الفنقاسو

لكن يا طارق "الفانقاسو" المغمس في الشوربة زيو وين. طبعا ما أظن بيكون فايت عليك إنه في نوعين من الفانقاسو، الواحد يا هو اللقيمات المعروف ده ،والتاني فانقاسو كبير نسيت إسمه، في حجمه وشكله بالضيط زي الـ سة Pizza.
الغريبة يا طارق الصينين بيعرفوا "الفنقاسو" بتاعنا التشادي الواحد ده، بتلقاهو في بوفيهاتهم، ياهو الفانقاسو حقنا الواحد ده. غايتو الليلة دي لو ربك شاء الفطور في بوفيه صيني عشان خاطر السيد/ فانقاسو.. أي وصايا؟؟


تسلم يا حبيب
Post: #88
Title: Re: رمضان في تشاد .. مدخل للتعريف بعادات وتقاليد تشادية
Author: ombadda
Date: 09-16-2007, 02:25 PM
Parent: #1

Quote:


أتذكر منهم أعمانا تاج السر كروم









دة عمنا طوالى ....شوفت كيف
Post: #93
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 10:26 PM
Parent: #88


حبيبنا / أمبده بالردمية .. وينك يت زول.؟

Quote: Quote:
أتذكر منهم أعمانا تاج السر كروم
دة عمنا طوالى ....شوفت كيف


أها عمك تاج السر كروم عنده بته دفعتي من أولى إبتدائي ،أنا وهي ما افترقنا الا في الثانوي، وجينا تاني اتلاقينا في جامعة واحدة في السودان... طلعنا أهل تب .. اتحرك على الماسنجر لتفاصيل أكتر.



تسلم يا أبو القرب
Post: #90
Title: Re: رمضان في تشاد .. مدخل للتعريف بعادات وتقاليد تشادية
Author: علي سيد همد
Date: 09-16-2007, 05:14 PM
Parent: #1

محمد رمصان كريم وكل عام وانت بخير
بوست جميل بل هو درس في الوطنية ويؤكد انك تحمل وطنك في حدقات العيون ويؤكد ايضاً انك خير سفير لوطنك في اي محفل ترتاده وهو وطن يحق لك ان تفتخر به ولو علمت عنه قليلا من خلال بوستك هذا ولكن ما اعلمه انكم قوم مسالمون تشع الطيبة من طلتكم والتعامل معكم سهل ويسير ونفخر بجيرتكم ايما فخر ولك التحايا والود
Post: #99
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-17-2007, 00:04 AM
Parent: #90

أستاذي/ علي سيد همد.. رمضان كريم .. وحقق الله الأماني والمنى.
Quote: بوست جميل بل هو درس في الوطنية ويؤكد انك تحمل وطنك في حدقات العيون ويؤكد ايضاً انك خير سفير لوطنك في اي محفل ترتاده وهو وطن يحق لك ان تفتخر به ولو علمت عنه قليلا من خلال بوستك هذا ولكن ما اعلمه انكم قوم مسالمون تشع الطيبة من طلتكم والتعامل معكم سهل ويسير ونفخر بجيرتكم ايما فخر ولك التحايا والود

نحن كذلك .. شعب مسالم .. يسلم الناس من أيادينا وألستنا .. رحماء بيننا .. شديد بأسنا .. طيبي المعشر والجيرة .. بنا بعض من حماقة .. نحمل وطننا أينما حللنا .. لكنها السياية والحرب قاتلهما الله .. جعلانا نتذبل قائمة الأمم الواعية .. ونتأخر عن ركب الحضارة .. لكن شمسنا ستشرق قريبا .. لإيماننا بأن أحلك ساعة الليلة ظلمة هي تلك القريبة من الفجر.




تسلم يا أستاذ/ همد
Post: #91
Title: Re: رمضان في تشاد .. مدخل للتعريف بعادات وتقاليد تشادية
Author: Mahjob Abdalla
Date: 09-16-2007, 09:10 PM
Parent: #1

Quote: سلامات يا محمد

عصير الـ TISSUES القالوا ليك أخونا محجوب قاصدبيهو الآبري الأبيض
ودي كانت نكتة معروفة عن بت (حنكوشة) جدا
بتقول لعصير الآبري الأبيض عاوزة عصير تيشوز
لأنو شكلو زي منديل الورق (الإتفتفت) في الموية

شكرا يا غاده...
انا من امبارح شايل هم و انو كيف اشرح النكته الانا سمعتها قبال 15 سنه و زياده ..دي لمحمد...
و يا محمد نور...
لسه ما وصلت لينا حته عصير القضيم و القرقدان ... و ... و
Post: #94
Title: Re: رمضان في تشاد .. مدخل للتعريف بعادات وتقاليد تشادية
Author: Mahjob Abdalla
Date: 09-16-2007, 10:34 PM
Parent: #1

Quote: 1- ألمي عطرون ، وهو مشروب محلي يتكون من دقيق الدخن المسحون مع البهارات. ويغلي هذا الدقيق في ماء مع العطرون. و يحلل به التشاديون الصيام بجانب التمر. ولم أجد موازيا لهذا المشروب في السودان.

ده عندنا في دارفور بنسمي "دشيشه"
Post: #97
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-16-2007, 11:25 PM
Parent: #94

محجوب .. كيفنك .. شكرا للحوامة بجاي.
Quote: ده عندنا في دارفور بنسمي "دشيشه

على الرغم من إني صمت 9 رمضانات تقريبا في السودان وتناولت افطار رمضان في مدن مختلفة من أرجاء السودان، لكن ما حصل لي الشرف إني تناولت إفطار في دارفور، وطبعا أصدقائي من دارفور الفي الخرطوم والمناطق التانية بيكون حصل ليهم " إستلاب ثقافي رمضاني" زي بيقول بشاشا - ورمضاني دي من عندي- ، فما شفت الدشيشة يا محجوب.
المحيرني في الموضوع يا محجوب إنه الـ "المي عطرون" أو "الدشيشة" في السودان محصورة فقط في دارفور وتكاد تكون الآن ما موجودة في الثقافة الغذائية لسكان دارفور الحالييين ، أو موجودة في ‘طار ضيق ، بينما في تشاد هي قاسم مشترك بين كل القبائل.. لا تجد أسرة في تشاد لا تحلل صيامها بهذا المشروب.. أهم من التمر ذاته..
عندم لي أي تفسير يا محجوب..


شكرا على طلاتك يا أخوي.. وخليك معانا طوالي.
Post: #100
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 05:09 AM
Parent: #97

نحدثكم اليوم عن عادة تشادية أخرى تمارس في رمضان وفي غيره من أيام الله ، وإن كانت تزداد قوة وظهورا في رمضان، وهي علامة بائنة على كرم أهل تشاد وعطائهم، ألا وهي ظاهرة تبادل إفطار رمضان بين الناس، لا نتحدث هنا عن الإفطارات الجماعية في المساجد والشوارع والميادين العامة، فذلك حديث سنتطرق له في وقت لاحق، وإنما نريد تسليط الضوء على مبادلة "صواني الفطور" بين الأسرة والأهل والأقارب.
Post: #101
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 05:28 AM
Parent: #100


منذ اليوم الأول لشهر رمضان وحتى آخره يستوقفك مشهد يتكرر يوميا في طرقات إنجمينا ، مشهد الصو اني على رؤؤس الشغالين والشغالات أو على عربات النقل الصغيرة، كل منهم يشد الخطى ويزيد السرعة للحاق بوجهته قبل مواعيد الإفطار، حتى لا يعرض الذين هم في إنتظاره لمخارطة أن يؤذن الأذان في حالة اللاصيني واللا أكل. وعادة ما تكون هذه الصواني التي تشابه في شكلها الأطباق الفضائية الطائرة محملة بكل ما لذ وطاب من أطباق رمضان وغيره من الشهور، حتى الشطة والملح والسكر والمعالق ليست عرضة للنسيان.
Post: #102
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 05:51 AM
Parent: #101

تبدأ المرأة التشادية قبل بداية رمضان بوضع جدول لصواني الإفطار التي ستبعث بها إلى الأهل والأقارب أينما حلوا في مدينة إقامتها، ولابد من البدء بمنزل النسايب " الحميان" ، ثم يليهم منزل والديها، ثم من هم في خانة أهل زوجها من أعمامه وخيلانه وبيوت أخوانه وأخواته، ثم من بعد ذلك أهلها هي وأقاربها، ومن بعد ذلك تتفرغ المرأة لصواني أصدقاء الأسرة والمعارف بدءا بمعارف زوجها أيضا وأصدقائه.
يجب أن ننوه لأن هذه الصواني الرمضانية ليست بديلا لدعوات الإفطار "العزومة" التي تقيمها المرأة التشادية لمنزلها بناء على شبكة علاقات زوجها، والتي عادة ما تشمل بجانب أفراد الأسرة زملاء العمل والأصدقاء في كل المراحل وأهل الحي.
Post: #103
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 06:28 AM
Parent: #102

من الملاحظات التي تستوقف المراقب لهذه العادة هي ظاهرة إهتمام المرأة التشادية بأهل زوجها وتقديمهم على أهلها في تفاصيل حياتية كثيرة في ظل موافقة تامة من الزوج والإصرار على ذلك أحيانا، مع أنه من غير المتوقع أن تتجرا إحداهن وتعكس هذا الترتيب في أوليات الإهتمام. و الأغرب من كل ذلك تجد المرأة هي الطرف الأحرص على المحافظة على هذا الترتيب في أحيان كثيرة. ولا أدري إن كان ذلك من باب إرضاء الزوج أو إرضاء أهله أو فقط لمجرد التمظهر الإجتماعي.
Post: #104
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 06:45 AM
Parent: #103

من جماليات هذه العادة التي تجعل منها معلما آلية من آليات التكافل الإجتماعي بين الأسر في تشاد، حرص المرأة الراغبة في إرسال صينية الفطور إلى بيت ما على تبليغ صاحبة البيت قبل فترة معقولة بأن تخرج من إعتبارها في ذلك اليوم تحضير فطور الرجال، و قد يسمح لها بتحضير شئ يسير لبقية أفراد الأسرة الذين لا يشملهم هذا البند كالنساء والأطفال.
Post: #105
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-18-2007, 06:56 AM
Parent: #104




في السنوات الأخيرة في تشاد، وفي ظل تغيير مفاهيم إجتماعية كثيرة، وفقدان المبادرة و أريحية الأفعال، تحولت هذه العادة الإجتماعية الجميلة إلى مجرد مظهر إجتماعي للتفاخر "الشوفونية" بعد أن كانت وسيلة من وسائل التكافل الإجتماعي والتعاون بين الأسر والوقوف إلى جانب بعضهم البعض. فجعلها البعض مطية للرياء والنفاق، وبعض المن والأذى الذي يبطل الأعمال، ويفقدها البركة.


غدا نواصل ..
Post: #106
Title: Re: رمضان في تشاد .. مدخل للتعريف بعادات وتقاليد تشادية
Author: muntasir
Date: 09-18-2007, 08:07 AM
Parent: #105

الأح محمد
رمضان كريم تحيه لك من أحد خريجى مدرسه الصداقه وآشهد آنه من معايشتى للشعب التشادى لم آر شعب آكثر طيبه وحبآ للسودان والسودانيين من التشاديين
وعشان آوريك انو انا بعرف فى إنجمينا اكتر منك تعرف مقر مدرسه الصداقه الأول كان وين قبل موقعها الدائم
ما تقول عجوز لكنى حضرت آخر آيام تمبلباي وحضرت فيلكس مالوم وهبرى وعويدى وكنت بفورتلامى حين إنجم التشاديون
من دفعتى من الأخوه التشاديين صالح صوصل وآخرون تفرق بنا الزمن ولم أسمع بهم من سنين
Post: #107
Title: Re: رمضان في تشاد .. مدخل للتعريف بعادات وتقاليد تشادية
Author: Raja
Date: 09-18-2007, 03:09 PM
Parent: #106

الفاضل محمد نور..

سلامات وعوافي..

Quote: مسئولة من الخير يا رجاء .. البنية الفي بروفايلك دي منو؟ عيونافيها شئ يحير يغير إتجاه الزول . كمية من البراءة والإستجداء .. البنية دي وراها قصة حزينة ومأساة إنسانية.


كدي أحكي لينا عنها عليك الله.


البنية دي شدًتني وعجبتني من أول نظرة.. لا أعرفها ولا أعرف جنسيتها.. ولكنها حسبما هو واضح فهي مننا وعلينا.. وكم من مآسي شهدته بلودنا..

تحياتي وتقديري..
Post: #112
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 00:03 AM
Parent: #107



Quote: البنية دي شدًتني وعجبتني من أول نظرة.. لا أعرفها ولا أعرف جنسيتها.. ولكنها حسبما هو واضح فهي مننا وعلينا.. وكم من مآسي شهدته بلودنا..


البنية دي يا رجاء ملامحها مألوفة جدا بالنسبة لي .. ربما لا أعرف عنها شيئا لكني أرى فيها أطفال بلادي من اليتامى والمشردين وأطفال الحرب من مظاليم المجتمع .. أشعر بها كأنها تسائل فينا عن أي ذنب جنوه..؟ حقو يا رجاء تفتحي ليها بوست زي بوست معتز القريش بتاعت أنتو قالت ليكم شنو ديك؟


تسلمي يا رجاء.
Post: #114
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 01:11 AM
Parent: #106

منتصر التشادي .. إزيك يا زول .. رمضان كريم..
Quote: ما تقول عجوز لكنى حضرت آخر آيام تمبلباي وحضرت فيلكس مالوم وهبرى وعويدى وكنت بفورتلامى حين إنجم التشاديون

والله إنت اتلومت معانا يا منتصر .. هسع قعدت في تشاد الزمن ده كله .. وقريت في الصداقة الواحدة دي .. وحضرت أواخر أيام تمبلباي .. وحاضر حرب الـ 9 شهور وبتعرف مالم وقوكوني و هبري .. وقاعد متوهط هسع في منبر بكري ده وعندك باسويرد وما جايب سيرة لتشاد؟
Quote: وعشان آوريك انو انا بعرف فى إنجمينا اكتر منك تعرف مقر مدرسه الصداقه الأول كان وين قبل موقعها الدائم

أنا عارف إنه الصداقة كانت في موقع آخر قبل الحرب، وبعد الحرب لمن أعيد إفتتاحها في عام 1983 جابوها موقعها الحالي ، لكن والله غلبني أتذكرها ليك. كدي خليني أستعين بالحاجة .. بالمناسبة الحاجة إحتمال تكون دفعتك . . غايتو قرت لغاية رابعة إبتدائي تقريبا في الصداقة القديمة حتى قامت الحرب ( هسع في زول قال إنت عجوز؟).
Quote: من دفعتى من الأخوه التشاديين صالح صوصل وآخرون تفرق بنا الزمن ولم أسمع بهم من سنين

صالح صوصل ما بعرفه معرفة مباشرة لكني شايفه .. هو بخير وموجود في تشاد الآن .. مهموم بالعمل العام.
لو صالح صوصل دفعتك معناها برضو خالي/ د. محمد آدم كلبو مفروض يكون دفعتك برضو .. يعمل الآن نائبا للقنصل التشادي بدبي. و برضو السيد/ محمد ناصر وزير البترول التشادي الأسبق مفروض يكون دفعتك..


ما سح الجماعة مالك يا منتصر؟ .. ياخوي إنت مننا وفينا تب .. أبقى علينا جاي..
Post: #109
Title: Re: رمضان في تشاد .. مدخل للتعريف بعادات وتقاليد تشادية
Author: Gaafar Ismail
Date: 09-18-2007, 04:11 PM
Parent: #105


الأخ العــزيز محمد نور
ســلامات
رمضان كريم وكل سنة وأنت طيب.
أتابع هذا البوست الظريف الممتع باهتمام بالغ.
يا أخي الفاضل عندي استفسار بسيط لو سمحت. كان معنا في طوكيو قبل عشر سنوات أخ تشادي حافظ للقرآن إسمه (يوسف الجقر) كان يصلي بنا صلاة العشاء والتراويح بالمعهد العربي الإسلامي طوال شهر رمضان.غادر طوكيو حوالي عام 2000 وكان على اتصال بنا لبعض الوقت ثم انقطعت أخباره..أتمنى تكون عارف عنوانه.الشيخ يوسف ، كما كان يحلو لنا أن نسميه، رغم أن أحد المصلين كان يقف خلفه حاملا مصحف ليصححه إذا غلط إلا أنه لم يغلط ولا مرة واحدة وختم القرآن في ذلك الشهر مما نال اعجاب واستحسان وإشادة كل المصلين .أسأل الله أن يكون بخير.
صادق مودتي وفائق احترامي.
Post: #113
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 00:41 AM
Parent: #109



شيخنا جعفر إسماعيل .. زارتنا البركة والله .. سلامات يا راجل يا طيب .. رمضان كريم
Quote: أتابع هذا البوست الظريف الممتع باهتمام بالغ.

أنا ذاتي يا شيخنا والله العظيم معجب جدا بمداخلاتك الحكيمة .. وبتابعك محل ما قبلت يشهدالله .. الكلام ده مش لأنك في بوستيني، لكن دي الحقيقة الما لقيت فرصة قبل كده أعبر ليك عنها.. وجودك في المنبر ده مهم جدا لحفظ التوازن في هذا الإسفير الملتهب. ربنا يجزيك عننا خير..
حقو مولانا/ محمد البشرى الخضر يضيف قسم جديد لتقييمه السنوي للمنبر ويسميه جائزة حكيم المنبر وبتبقى مناصفة بينك وبين أستاذنا/حيدر قاسم .. ربنا يديكم الصحة والعافية.
Quote: أخ تشادي حافظ للقرآن إسمه (يوسف الجقر)

مع الأسف يا مولانا ما بعرف شيخ/ يوسف الجقر ده. إسم الجقر ده ما شائع في تشاد .. على الأقل في مجتمع أنجمينا الأنا اتربيت فيه .. غير كده اشتغلت في العمل العام لسنوات كتيرة فتقريبا بعرف الشباب المن دفعتي في أنجمينا كلها، خاصة وأن إنجمينا مدينة صغيرة جدا من حيث المساحة والسكان . حأسأل عنه وبفيدك إنشاءالله.



شكرا على المتابعة يا بركة
Post: #116
Title: Re: رمضان في تشاد .. مدخل للتعريف بعادات وتقاليد تشادية
Author: Gaafar Ismail
Date: 09-19-2007, 01:33 AM
Parent: #113


أخي الحبيب محمد نور
شكرا جزيلا على الرد السريع على استفساري .
الأخ يوسف الجقر كان هنا يتمتع بعلاقات طيبة واسعة مع الجالية السودانية الصغيرة وبحكم علاقته المميزة معي كان الإخوان يسألونني دائما عن أخباره . أتمنى أن يكون بخير وصحة جيدة.
لا يفوتني أن أشكركم على الإطراء وأتمنى أن أكون دائما عند حسن ظنكم.

عاطرتحياتي وفائق احترامي ومودتي.
Post: #143
Title: Re: رمضان في تشاد .. مدخل للتعريف بعادات وتقاليد تشادية
Author: عمار عبدالله عبدالرحمن
Date: 09-29-2007, 09:56 PM
Parent: #100

رمضان بنكهة الداميرقة,,,
لا ادري كيف غيبت عني معرفتي شاد وانا المعبئ بمعرفة جغرافياوتاريخ دول العالم البعيد,,,
فقبل ان الوذ بشاد لم تكن معلوماتي تتعدى معرفة اسم العاصمة انجمينا,, وحكاوي عن تمبل باي ,, وقليل من الاساطير عن المحايات والحجبات,,
دخلت الي شاد مكرها لا بطلاً قاطعا المسافة بين وادي ادكونغ من الجانب السوداني الي ادري مشيا علي الاقدام مع توجسات من مقبل الايام,,,
اول ما ادهشتني اتسخدام اللغة العربية المنكهة بكلمات فرنسية وكثرا من اللغات الافريقية ذات الصياغات الخاصةفي تركيب الجمل, مما جعلني اشتاط غضبا في الاستي(مقر الامن)
نتيجة لسؤ الفهم فكثيرا ما كرر علي ضابط الامن (اسمه جبريل) جملة انت لو...(كلمة قبيحة في لهجتنا) في راسك, فاهيج حتى تصل لمرحلة الفرش (الجلد بالفلقة,) والتى لم اعرف معناها الا بعد خروجي من الاستي بعد اسبوع,, ومن الجمل الاخرى التي استقبلة بها قبل استضافتي في الاستي (شم دا ما ترب سودان ده هنا شادنادم هوان),,
بعد اطلاق السراح نزلت في البارملي (مطعم شبيه بالبنسيون)حيث بدات تنهار تخوفاتي من الاوهام التي لازمتني عن الشاديين,

مهمد نور اعذرني ان خرجت عن المود الرمضاني لكن بجيك راجع
Post: #108
Title: Re: رمضان في تشاد .. مدخل للتعريف بعادات وتقاليد تشادية
Author: حواء سليمان ابراهيم
Date: 09-18-2007, 04:02 PM
Parent: #1

الاستاذ محمد نور

لاليك ياخيى

والله بوستيك دا ذكرنى انجمينا بكل جمالها واجتماعياتها التى لا تختلف فى شى عن السودان

بست شايفاك نسيتى اهم حاجة فى رمضان وهى مديدة الفول دى طبعا غير موجودة فى السودان

وكمان ملاح الكركنجى برضو ما مر علي فى السودان المهم انا متابعة معاك بس ما لقيت فرصة اتداخل

وفى مديدة تانية اسمها ام بردم على ما اظن ، المهم بجيك برواقه لنحكى عن اجمينا من جمب البحر لدمبى

ومرور برضينا وشقوا واردب جمال وكل الاحياء الجميلة



رمضان كريم
Post: #115
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 01:26 AM
Parent: #108



الأستاذة / حواء سليمان .. ازيك يا بت امي .. رمضان كريم .. تصومي وتفطري على خير.
Quote: والله بوستيك دا ذكرنى انجمينا بكل جمالها واجتماعياتها التى لا تختلف فى شى عن السودان
بست شايفاك نسيتى اهم حاجة فى رمضان وهى مديدة الفول دى طبعا غير موجودة فى السودان
وكمان ملاح الكركنجى برضو ما مر علي فى السودان المهم انا متابعة معاك بس ما لقيت فرصة اتداخل
وفى مديدة تانية اسمها ام بردم على ما اظن ، المهم بجيك برواقه لنحكى عن اجمينا من جمب البحر لدمبى
ومرور برضينا وشقوا واردب جمال وكل الاحياء الجميلة

هسع عليك الله يا حواء زمنك ده كله لابدة ساكت .. أتاريك بتنا .. مننا وفينا .. غايتو بعد ده حقوا بكري يتحسس مسدسه .. حنقلبها تشاديين أون لاين.
كان على المدايد .. مما فتحت بوستيني ده متمحن في البيحلني من مديدة الفول والأم بردم منو؟ أها البركة الله جابك تحليني من زنقتي.. غايتو "الكركنجي" بتاعي ده قدر ما نبحت مافي زول هببوا لي إلا إنت .. كتر خيرك يا بت امي .. غايتو بتعرفي أحياء إنجمينا أحسن من ناس اتولدوا فيها ..




خليك قريبة يا حواء
Post: #110
Title: Re: رمضان في تشاد .. مدخل للتعريف بعادات وتقاليد تشادية
Author: عدلان أحمد عبدالعزيز
Date: 09-18-2007, 04:53 PM
Parent: #1

عزيزي الأخ محمد نور أحمد، أطيب التحايا..

بوست تعريفي ولطيف.. في كل مناطق الشمال النيلي في السودان -تقريباً- أيضاً يسمون شهر شوال ب "قِصيِّر" والماء "ألمي"، وقد قال الشاعر حِميد: ما طال في بحرك في مي..

تحياتي للمرأة التشادية - كما للمرأة السودانية- في عناءهن ومكابدتهن، خاصةً في شهر رمضان.. تصوم مثلها مثل الرجل، ومع ذلك عليها إطعام الشفع، والمرضى، والصائمين.. يعني من دُقش الرحمن هِـن مصاغرات النيران.. شاي وفطور الصباح، الغداء، فطور رمضان وأطباقه ومشروباته، العشاء، السحور.. الله ليهم، وإتقوا الله فيهن يا أحباب.

وعبرك يا محمد نور أحي أصدقائي التشاديين الذين تقطعت بيننا سبل التواصل.. العم الهجرو محمد آدم السنوسي، والدكتور عبدالملك، والنقيب يعقوب، والملازم آدم، حيث جمعتني بهم أيام صعيبات وذكريات عبقة..

لكم جميعاً خالص التقدير، ورمضان كريم..

عدلان.
Post: #111
Title: Re: رمضان في تشاد .. مدخل للتعريف بعادات وتقاليد تشادية
Author: اميرة الحبر ادريس
Date: 09-18-2007, 06:05 PM
Parent: #110

الاخ محمد نور ..سلام ورمضان كريم
اتيحت لي الفرصة عدة مرات لزيارة انجمينا لطبيعة عملي
الصحفي وتربطني معرفة جيدة بعدد من المسئولين والوزراء في الحكومة
التشادية ..ولم احس وانا في انجمينا قط بانني غادرت السودان نفس الملامح
وبساطة الشعب.. ولقداعجبت جدا باللهجة التشادية الممزوجة
بالكلمات الفرنسية والعربية..

حقاانجمينا مدينة لاتنسي
اميرة
Post: #120
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 05:23 AM
Parent: #111



الأساذة الصحفية/ أميرة الحبر .. سلامات ورمضان كريم
Quote: اتيحت لي الفرصة عدة مرات لزيارة انجمينا لطبيعة عملي
الصحفي وتربطني معرفة جيدة بعدد من المسئولين والوزراء في الحكومة
التشادية ..ولم احس وانا في انجمينا قط بانني غادرت السودان نفس الملامح
وبساطة الشعب.. ولقداعجبت جدا باللهجة التشادية الممزوجة
بالكلمات الفرنسية والعربية..

وأنا أقول أنجمينا مالها مرات كدي بتكون باقة نور في نص االكهرباء المقطوعة طوالي دي .. فاتتنا حاجات سمحة كتيرة والله .. أقلاها شرف إستقبالك في مطار إنجمينا.. عليك الله المرة الجاية أدينا خبر.. كان بره البلد بنجي عشانك بنجي..

عليك الله شفتي كيف عربينا الخطير ده؟ حاجة كدي خاطف لونين .. لونين شنو عشرة ألوان.. شئ عربي بالفرنسي .. وشئ عربي بالباقرمي .. وشئ عربي بالسارا وشئ عربي بالعربي ظاااااااتو.. وبرضو نحنا ما عرب.. أوع تكون اتخلعت زي نص الشعب السوداني الواجهني بسؤال " بالله يتتكلموا عربي زينا؟”
مرحب بيك تاني وتالت يا أميرة .. البلد بلدك ..



تحياتنا عبرك لكل أسرة الرأي العام ..
Post: #117
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 02:48 AM
Parent: #110


العزيز/ عدلان عبدالعزيز.. سلامات .. رمضان كريم
سعدت كثيرا بوجودك هنا .. شكرا على المرور والمتابعة ..
Quote: وعبرك يا محمد نور أحي أصدقائي التشاديين الذين تقطعت بيننا سبل التواصل.. العم الهجرو محمد آدم السنوسي، والدكتور عبدالملك، والنقيب يعقوب، والملازم آدم، حيث جمعتني بهم أيام صعيبات وذكريات عبقة..

والله يا عدلان أنا عندي حساسية مع العساكر .. ما بحبهم لله في لله .. بتمسكني كاروشة عديل لمن أشوف لي كاكي ساكت .. و ناسك القلتهم ديل كلهم عساكر ، إلا عبدالملك ده ما عرفته. لكن عمنا هجرو السنوسي راجل ليه إسهامات وطنية مقدرة لكن برضو عسكري عمل في الجيش السوداني حتى وصل رتبة الملازم ، وفي التشادي هو أحد القادة العسكريين لجيش فرولينا ، أخطر ثورة سياسية عسكرية في تاريخ تشاد المعاصر وآخر عهدي به في تشاد قبل عشرة سنوات إن لم تخني الذاكرة..
أوع تقول لي يا عدلان إنك من الإسلاعروبيين الكانوا وراء قيام فرولينا ومصائبها في تشاد .. حأزعل منك جدا، وما بعيد أطالب بمثولك في لاهاي .. فرولينا دي يا عدلان على الرغم من إنها قامت ضد الظلم والقهر والتسلط القبلي، لكنها برضو سبب أطول حرب في تشاد بدت من 1962 في نيالا و ما تزال مستعرة إلى يوم الله هذا..

يبدو إنه كانت ليك علاقة كيسة بالشأن السياسي في تشاد .. شكرا على المرور يا عدلان.









___________________________________________________
التعديل لتصحيح معلومة تاريخية
Post: #118
Title: Re: رمضان في تشاد .. مدخل للتعريف بعادات وتقاليد تشادية
Author: HAYDER GASIM
Date: 09-19-2007, 03:26 AM
Parent: #117

Quote: في السنوات الأخيرة في تشاد، وفي ظل تغيير مفاهيم إجتماعية كثيرة، وفقدان المبادرة و أريحية الأفعال، تحولت هذه العادة الإجتماعية الجميلة إلى مجرد مظهر إجتماعي للتفاخر "الشوفونية" بعد أن كانت وسيلة من وسائل التكافل الإجتماعي والتعاون بين الأسر والوقوف إلى جانب بعضهم البعض. فجعلها البعض مطية للرياء والنفاق، وبعض المن والأذى الذي يبطل الأعمال، ويفقدها البركة.

عزيزي ... محمد نور

الرجل الطيب ... يسلم

إتوكلت وقلت أخش وأنا أسير بينكم لأول مرة على أمشاط رجلي ,
ليتكفل كعبها عناء الدخول لمقام رفيع وسجال وضيئ وحبر صميم .
ليس فى إمكاني اللحاق بقطار مدارستكم الحيوية هذه ولما عدت محطات
وتفرعت سبل المنقبية والتحصيل ... فهنئيا .
Quote: في السنوات الأخيرة في تشاد، وفي ظل تغيير مفاهيم إجتماعية كثيرة، وفقدان المبادرة و أريحية الأفعال، تحولت هذه العادة الإجتماعية الجميلة إلى مجرد مظهر إجتماعي للتفاخر "الشوفونية" بعد أن كانت وسيلة من وسائل التكافل الإجتماعي والتعاون بين الأسر والوقوف إلى جانب بعضهم البعض. فجعلها البعض مطية للرياء والنفاق، وبعض المن والأذى الذي يبطل الأعمال، ويفقدها البركة.

كما قلت في غير هذا الموضع ... فمحمد نور يرمي دوما إلى ما وراء الظاهرة ,
ليقيم الحجة ويستفصح أحوال الظاهرة ودواعيها ... ثم يفيض عليها بالتحليل الرفيع
حتى تستقر فى ذهن القارئ معلومة متكاملة الأضلاع والزوايا , فيسهل هضمها
وإستيعابها والإرتكان إليها فى معرض الحال ... بل وفي تمدداته الإجتماعية ذات
الصلة ... فهنا مرجع سوشيولوجي متحرك ... وهنئيا لمن يتصفه .

مع مودتي
Post: #122
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 08:36 PM
Parent: #118


أستاذنا / حيدر حبابك ألف
Quote: إتوكلت وقلت أخش وأنا أسير بينكم لأول مرة على أمشاط رجلي ,
ليتكفل كعبها عناء الدخول لمقام رفيع وسجال وضيئ وحبر صميم .
ليس فى إمكاني اللحاق بقطار مدارستكم الحيوية هذه ولما عدت محطات
وتفرعت سبل المنقبية والتحصيل ... فهنئيا .

كده البوست ياداب استعدل .. بعد كده الواحد يسنن قلمه ساكت (بالتشادي بيقولوا يطرق/يطرن) ويستعيد معلوماته ويرصها زي الناس .. البوست جاب حكماء المنبر بلا الفطاحلة الكانوا فيه أصلا .. مرحب يا أستاذ/ حيدر والدار نورت .. أبقى داخل لقدام .. أها تشرب شنو يا اخوي .. ا أنقارا ولا أم بردم ولا شاي بنعناع؟
Quote: كما قلت في غير هذا الموضع ... فمحمد نور يرمي دوما إلى ما وراء الظاهرة ,
ليقيم الحجة ويستفصح أحوال الظاهرة ودواعيها ... ثم يفيض عليها بالتحليل الرفيع
حتى تستقر فى ذهن القارئ معلومة متكاملة الأضلاع والزوايا , فيسهل هضمها
وإستيعابها والإرتكان إليها فى معرض الحال ... بل وفي تمدداته الإجتماعية ذات
الصلة ... فهنا مرجع سوشيولوجي متحرك ... وهنئيا لمن يتصفه

إن كان ذلك كذلك ، فهو فضل من الله ومنه، وهو كذلك بعض مما تعلمناه من القراءة لكم.. سنسعى لتجويده وتحسينه ليرقي إلى مصاف كتاباتكم .


تسلم يا أستاذ/ حيدر وشكرا على المرور والمتابعة والإشادة.





__________________________________________________________________________
الليلة غايتو جاي أفطر معاكم بغادي .. أصلو البوست داك من البوستات الصديقة البنمر عليها بشكل يومي.. بس إنشاءالله رجاء تجيب الشوربة المغربية عشان يسكت طارق جبريل .. وغادة تجيب الكنافة ..
Post: #119
Title: Re: رمضان في تشاد .. مدخل للتعريف بعادات وتقاليد تشادية
Author: عدلان أحمد عبدالعزيز
Date: 09-19-2007, 04:04 AM
Parent: #1

يا عزيزي محمد نور أحمد، مساك الله بالخيرات..

مالك يا أخوي داير تفجعني في الجماعة ديل.. العم الهجرّو آدم السنوسي بدأت معرفتي به عندما كان يعمل في إدارة التدريب العسكري للمدارس الثانوية (الكاديت) آواخر سبعينيات القرن الماضي.. أما د. عبدالملك فقد كان أستاذي للغة الفرنسية في فصل كُنا قد أنشأناه أثناء فترة إعتقالنا في سجن كوبر سنة 95/1996 حيث كان عبدالملك ويعقوب وآدم من المعارضة التشادية وقتها، وقد تم إعتقالهم ضمن تدخلات نظام الإنقاذ في الصراعات الدائرة في تشاد، وقد نشأت بيننا صداقة داخل السجن قوامها الإحترام المتبادل والتفاكر في الشأن الديمقراطي العام كوسيلة وحيدة للحكم في بلداننا.. والآن لا أعرف إلى أين ساقتهم الأقدار، وإلى أي مدى هُم ملتزمين جانب الديمقراطية.. عموماً يازول العساكر في ثكناتهم ما عندنا معاهم مشكلة، مشكلتنا مع البتلبوا يسرقوا السلطة يقهروا العباد ويخدموا في السلاطين الجائرين.

معليش عرجنا ليك بالبوست الظريف ده حبة، لكن ياهو نحن كدة.. همومنا واحدة كشعبين حاملين للكثير من الخصائص المشتركة.

مودتي، مع كورية فيها مديدة دخن دافيء، ورمضان كريم..

عدلان.
Post: #121
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-19-2007, 05:51 AM
Parent: #119


عزيزي عدلان .. سلامات .. كده طمنتني الله يطمنك دنيا وآخرة..
Quote: التدريب العسكري للمدارس الثانوية (الكاديت) آواخر سبعينيات القرن الماضي

عمك هجرو – ربنا يطراه بالخير محل قاعد- من مواليد 1933 بضواحي أم التيمان في وسك تشاد .. قدم إلي دارفور للإلتحاق بأخوه الكان جندي بالجيش السوداني في فترة الحرب العالمية التانية. والتحق السيد/هجرو السنوسي نفسه بالجيش السوداني في منتصف الخمسينات، وتدرج فيه حتى وصل رتبة الملازم أول.. كان من المفرغين من الجيش السوداني لمساعدة الثوار التشاديين في الحوانب العسكرية بجانب عمله العادي بالقيادة الغربية .. وربما جاءت معرفتكم به في إحدى هذه الفترات .. وقد أبلى بلاء حسنا مع بعض رفاقه العسكريين من ذوي الأصول التشادية في الجيش السوداني في تبني العمل العسكري في فرولينا.. وفرولينا هي أول ثورة عسكرية قامت ضد حكم الرئيس السابق تمبلباي بأبعاد عربية إسلامية برعاية سودانية وليبية ودعم مادي من بعض الدول الإسلامية آنذاك... والحديث عن فرولينا سيحيل البوست إلى نكد وغم نحن في غنى عنه.
Quote: أما د. عبدالملك فقد كان أستاذي للغة الفرنسية في فصل كُنا قد أنشأناه أثناء فترة إعتقالنا في سجن كوبر سنة 95/1996 حيث كان عبدالملك ويعقوب وآدم من المعارضة التشادية وقتها، وقد تم إعتقالهم ضمن تدخلات نظام الإنقاذ في الصراعات الدائرة في تشاد، وقد نشأت بيننا صداقة داخل السجن قوامها الإحترام المتبادل والتفاكر في الشأن الديمقراطي العام كوسيلة وحيدة للحكم في بلداننا.. والآن لا أعرف إلى أين ساقتهم الأقدار، وإلى أي مدى هُم ملتزمين جانب الديمقراطية

عبدالملك ده زولي تب .. إسمه عبدالملك أبوبكر دوده من أبناء الوداي "البرقو" .. يعمل دبلوماسيا في الخارجية التشادية ومسئول عن قسم الترجمة بالخارجية حتى اليوم.. و بجانب عمله في الخارجية كنا نعمل سويا في منظمة دولية تعمل في مجال العمل الإنساني والتنمية في تشاد ، وما يزال هو يرأس فيها إدارة المشروعات.. كان ضمن حركة د. الحارث التي نشأت بإيعاز من السودان وانتهت أيضا على يد الحكومة السودانية وأنت أعلم يا أخي عدلان بما تبقى من تفاصيل طالما تزاملتما في كوبر.. سأبلغه تحاياك بكل تأكيد.


يعقوب المعاه ده ما عرفته .. لو بتعرف إسمه بالكامل بجيب ليك خبره .




هوووووووووووي يا عدلان .. أطلع من البوست بتاعي .. مالك داير تقلبوا لي سياسة وسير وأعلام .. بكلم ليك بكري والله.












_____________________________________________________________________
التعديل لتصحيح خطأ إملائي ..
Post: #123
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-20-2007, 05:13 AM
Parent: #121


قراء وزوار البوست الأعزاء .. مساءاتكم زينة.
كان في المراد نحدثكم الليلة عن عادة جديدة في تشاد، وهي الإفطارات الجماعية في رمضان.. لكن مع الأسف الشديد لم فينا صداع نصفي – الله لا وراكم ليه- جهجهنا جهجهة توم لجيري .. نكتب الآن بأصابع شبه مشلولة.. نعاود الكتابة بكره كان الله سهل.

تسلموا جميعا.
Post: #124
Title: Re: رمضان في تشاد .. مدخل للتعريف بعادات وتقاليد تشادية
Author: حواء سليمان ابراهيم
Date: 09-21-2007, 01:46 AM
Parent: #123

محمد نور سلامتك يا خيى

انت عارف الليلة عملت مديدة فول والله اتذكرتك طوالى

بس ما تقول لى الفول لقيتى وين ؟؟؟ انا براى سحنته طبعا

ما زى فول انجمينا الابيض الناصع لكن برضو مشى الحال

لانو انا وولدى الصغير بس البنشربو .

يا خيى ببوستيك دا تخلينا تفكر فى الرجوع لانجمينا

ولو انها ما بتتنسى ابدآ




اختك حواء
Post: #125
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 01:23 AM
Parent: #1

الشعب التشادي مثل غيره من شعوب العالم الإسلامي يغتنم فرصة رمضان للتبتل والإنقطاع للعبادة والتقرب إلى الله لفعل الخير والإحسان . الإفطارات الجماعية، صلاة التراويح، الزكوات وأعمال الخير الأخرى من سبل التقرب إلى الله في رمضان، وتعد هذه العبادات الرمضانية قديمة في تشاد قدم رمضان والإسلام نفسه في تلك الأنحاء .. والتشاديون أجود ما يكونوا في رمضان بجانب غيره من شهور الله ، ولذلك ارتبط شهر الصيام عند هم باوثق ما يكون بالإنفاق في أوجه الخير. ففي كل المساجد الكبيرة في تشاد دون إستثناء تعقد مجالس لتفسير القرآن الكريم والسيرة النبوية الشريفة وفتاوى الصيام وغيره من التفاصيل الحياتية الأخرى للمسلمين. ويؤم هذه المجالس جموع المواطنين من مختلف الفئات العمرية. ولذلك فإن المجلس الأعلى للشئون الإسلامية أكثر إنجازا في رمضان عن غيره من الشهور، وأقرب ما يكون إلى حياة الناس ومعاملاتهم فيه.
Post: #126
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 01:24 AM
Parent: #125

و المساجد في تشاد على كثرتها عادة ما تكون عامرة طيلة العام بالصلاة والذكر إلا أن إعمارها أكثر كثافة من في رمضان عن غيره من بقية أيام الله. وصوت الذاكرين في عصريات رمضان ينساب إلى أذنيك كلما مررت بمسجد أو ساحة ظليلة فلا تملك إلا أن تردد:
اللهم صل على سيدنا محمد .. الفاتح لما أغلق .. والخاتم لما سبق .. ناصر الحق بالحق .. والهادي إلى صراطك المستقيم .. وعلى آله حق قدره ومقداره العظيم..
وليالي إنجمينا الرمضانية تكتسب هذا المسمى منذ بدايات شعبان ، حين تصلك أصوات المادحين تنساب إلى أذنيك عبر مكبرات الصوت أينما حللت حاملة إليك مديح المصطفى عذبا طروبا سلسا، يحملك إلى ملكوت الله وحضرة رسوله، فتوقن أن الله حق وأن محمدا عبده ورسوله، وأنت في تلك الحالة لا تملك إلا الترديد مع المادح :
عليك صلاة الله ثم سلامه .. صلاة ترقنا إلى الذكر والحب.
وتتمايل طربا مع آخر يشدو من أطراف المدينة الأخرى:
اللهم صل علي سيد الذات المحمدية .. واغفر لنا ما قد يكون وما قد كان.
وثالث من هناك يجعل الشكوك تساورك في أيهما أجمل صوتا وألطف معنى وأكثر عمقا قبل أن تردد خلفه بكل ما أوتيت من تركيز:
لا إله إلا الله .. محمد رسول الله .. القرآن كلام الله .. لا إله إلا الله.
Post: #127
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 01:25 AM
Parent: #126


وتعد صلاة التراويح أيضا في رمضان من العبادات التي تجد من قبل التشاديين حرصا كبيرا يجعلها في قمة أولوياتهم في رمضان. وتصلي أغلب المساجد الكبيرة في تشاد بجزء من القرآن الكريم يوميا في صلاة التراويح ، بحيث تختتمه بإنتهاء الشهر المبارك، هذا بجانب ختمها للقرآن الكريم في العشر الأواخر من رمضان أيضا بحيث يصلي الناس بثلاثة أجزاء يوميا
Post: #128
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 01:31 AM
Parent: #127

وتتعرض أغلب الساحات العامة وساحات المساجد في تشاد للتفاوض والتداول بين التجار من فاعلي الخير ولذين يتنافسون على إقامة موائد الرحمن للصائمين من أبناء السبيل والمساكين والفقراء . كما وأن المنظمات الإسلامية في تشاد والتي تعد على أصابع اليد الواحدة والتي يصدر معظمها تقاريره الدورية بالإفطارات الجماعية مما يجعل رمضان أيضا موسما للنشاط المكثف لإطعام الصائمين من الفقراء والمساكين.
Post: #129
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 01:33 AM
Parent: #128

من المظاهر الجميلة التي تميز رمضان عن غيره من الشهور لدى التشاديين أنه موسم لأداء زكواتهم، في ظل غياب بيت/ديوان الزكاة لعلمانية الدولة، فتجد عالبية رجال الأعمال و التجار الصغار والمسئولين الذين يسر الله في الرزق يحرصون على أن يكون حول زكاتهم في رمضان مما يضاعف الأجر في المقام الأول و يدخل فرحة غير إعتيادية في نفوس المستحقين .
Post: #130
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-22-2007, 03:08 AM
Parent: #1




حواء .. إزيك .. وكيف أبو الروم على حسك؟
Quote: محمد نور سلامتك يا خيى
انت عارف الليلة عملت مديدة فول والله اتذكرتك طوالى
بس ما تقول لى الفول لقيتى وين ؟؟؟ انا براى سحنته طبعا
ما زى فول انجمينا الابيض الناصع لكن برضو مشى الحال
لانو انا وولدى الصغير بس البنشربو .
يا خيى ببوستيك دا تخلينا تفكر فى الرجوع لانجمينا
ولو انها ما بتتنسى ابدآ

الليلة برضو اجتهدت عملت لي مديدة ، لكن غلبتني في نص الطريق .. ما حلتني إلا واحدة قريبتنا بعد كم مكالمة.
والليلة مديدة مسيخة وما عندها طعم .. بدل الروابة عملت ليها زبادي وشوية ليمون.
إن بقيت راجعة لأنجمينا أدينا خبر نفرش الأرض ورود وزهور .. غايتو اتصبري بالبوست لمن تلقي ليك حل.


أها ترانا أنا والقراء راجنك لوصفة المدايد .. ما المديدة حرقتني عشان ما يجوني ناس المشاكل.

تحياتي ليك ولوليداتك.
Post: #131
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-23-2007, 07:27 AM
Parent: #1




مقلب رمضاني:


كان العام 1996م أول مرة أسافر فيها إلى السودان، وتصادف أن كان ذلك في رمضان، وكنت متأكدا من واقع معلوماتي عن الشعب السوداني أننا نحمل نفس العادات والتقاليد، وتأكدت من الكثير منها فور نزولي من الطائرة وحتى مكان إقامتي. وأول إفطار رمضان أتناوله لم يكن لدى أقاربي الذين أضعت عنوانهم ووسيلة الإتصال بهم، ولا في المدينة الجامعية التي لم أذهب إليها فور وصولي لإصرار صديق سوداني عزيز كنت وإياه في نفس الرحلة أن أقضي الليلة معه ويقوم بتوصيلي إلى الجامعة في اليوم الثاني. وعندما حان موعد الإفطار أخذني إلى منزل عمه الذي يقع في نفس الشارع، لأن أسرته كانت في أنجمينا. وكان المشهد غريبا بالنسبة إلي، عدد من الناس يربو على الـ 30 كل يحمل صينيته قاصدا مكان تجمهر الناس، ففهمت منه أن هذه هي عادة الإفطار لديهم. وتحت إصرار بعضهم جلست في صينية بعيدة عن تلك التي جلس عليها صديقي المضيف، وأذن الآذان، فأخذت "جغيمات" من كوب عصير كان أمامي بعد التمر والماء، ونهضت قاصدا مكان الصلاة، ولم ينتبه إلي أحد لأن الجميع كان منهمكا يأكل أو يشرب، ولم أنتبه أنا أيضا إلى أنني الوحيد الذي قام للصلاة خاصة وأنني كنت أؤدي ركعتي السنة، يجانب أنه كان من المحرج بالنسبة لي أن أعود إلى المائدة بعد أن قمت منها للصلاة، فانتظرت حتى قدم الناس وصلينا المغرب، وبعد التسابيح والنوافل لاحظت أن الجمع قد تفرق، كل حمل أغراضه وتوجه صوب منزله، ومضيفي كان يحسب أن الذي أصر علي أن أجلس في صينيته قد استوصى بي خيرا.
سكت على الحوع والعطش برهة من الزمن، ثم قررت أن أحدث الرجل بالمقلب الذي تعرضت له، وفي أقل من ثانية أصبحت موضع إهتمام جميع من تبقى في المجلس للأنس والكيف، فاعتذر جميعهم عن ذلك، وتعرض صديقي لكثير من اللوم والعتاب على أنه لم يقدمني للحضور كضيف حتى أكرم بما يليق، وهنا فقط أصبحت نجم المجلس وخطفت الأنظار والتركيز، واوتييت لي صينية أخرى من منزل عم مضيفي لا تقل حجما ولا نوعا عن الأولى، وأكلت وسط ضحكات الحضور وأسئلتهم عن العادات المتبعة في رمضان.
جرت العادة في رمضان أن يتناول الناس إفطارهم بعد صلاة المغرب، يكتفي الجميع بتحليل "بتكسير" صيامهم بالتمر والماء و "ألمي عطرون" أو الدشيشة، ثم يقومون إلى الصلاة ويأتوا بعد ذلك لتناول ما لذ وطاب من أطباق رمضان.


مع حبي وتقديري للجميع
Post: #132
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-24-2007, 06:00 AM
Parent: #131

غدا أحدثكم عن المجلس الأعلى للشئون الإسلامية في تشاد والمنظمات الإسلامية ومناشطها في رمضان.
Post: #133
Title: Re: رمضان في تشاد .. مدخل للتعريف بعادات وتقاليد تشادية
Author: عدلان أحمد عبدالعزيز
Date: 09-24-2007, 04:52 PM
Parent: #1

تعرف يا محمد نور، قصتك بتاعت المقلب الرمضاني دي، ذكرتني ب مقلب مضاد حكاه القاص يحي فضل الله في تداعياته..

Quote: هجمة خميس الشرهة

بنات الحلة الصغيرات كنسن الساحة في ذلك العصر
الاطفال الصغار بمتعة متناهية تنتمي الي اللعب رشوا رمل تلك الساحة بالماء
داخل البيوت كانت النسوة يقمن بتجهيز تفاصيل الافطار الذي سيخرج الي
تلك الساحة في الصواني المغطاة بالاطباق الملونة دائما النسوة يتنافسن
في افطار يوم الجمعة يوم الجمعة يوم خاص في ايام رمضان لذلك لابد
من توسيعة فيه اطباق طعام خاصة في ذلك اليوم مشروبات خاصة
تكسر ديمومة مشروب الحلومر و الابري الابيض في الايام العادية.
اقتربت الشمس من مغيبها و قد رصت البروش علي تلك الساحة بدأت
صواني الطعام تتوافد من داخل البيوت الي الساحة الشيخ عبد التواب كان
اول من جلس في الساحة يعترض طريق المارين في الشارع داعيا اياهم
للافطار و بالحاح سوداني تلقائي لا علاقة له بالموائد المفتعلة جدا هذه الايام
آذن الاذان و بدأت الحلوق تستقبل المشروبات الرمضانية الاصابع تتلقف
البلح الملين بالماء و كعادة الشيخ عبد التواب اكل بلحتين و شرب القليل
من الماء و نادي في ذلك الجمع و كأنه يحاول التخلص من عبء الامامة
الصلاه يا اخوانا
وهم الجميع ابعدت صواني المشروبات ووضعت بجانب صواني الاكل المتنوع
و الشهي في ذلك اليوم الجمعة رصت كل الصواني خلف البروش و اقام
محمدين الصلاة بصوت قوي.
اثناء اصطفاف الجمع و حين كبر الشيخ عبد التواب التكبيرة الاولي كان
خميس قد اقترب من تلك الساحة بعد ان خرج من مخبئه خلف صريف
بيت صلحة الدلالية خميس عادة ما يداهم موائد الافطار في رمضان و
يداهم ملمات العوازيم بمناسباتها المختلفة كان خميس ابله لا يؤاخذ علي
افعاله و هي افعال ادمنت اقتحام العزائم لان به شرها مجنونا للطعام يستطيع
خميس ان يقضي علي عزومة كاملة تكفيلاكثر من عشرين شخصا المهم
اقترب خميس من صواني الطعام و المشروبات و المصلون كانوا ينحنون
للسجدة الاولي من صلاة المغرب القريبون من تلك الصواني الموضوعة
خلف البروش احسوا باقتراب خميس هكذا كان الوضع خميس خلف
المصلين و امامه الصواني متاحة
خميس يقترب اولا من الصواني التي بها ال مشروبات الرمضانية يرفع غطاء
كورة و يصيح بانفعال
كركدي لا اله الا الله
و يسمع المصلون حركة مشروب الكركدي و هو يمر بحلق خميس بقرطعة
عالية
الشيخ عبد التواب يحس بمداهمة خميس و يرفع صوته عاليا بالتكبير و
محمدين يكرر ذلك بصوت اعلي و كأنه يحاول بذلك ايقاف فعل خميس
خميس يرفع غطاء سلطانية و يصيح فرحا
قمر دين لا اله الا الله
و يعلو صوت الشيخ عبد التواب بالتكبيرمتماهيا مع محاولة ابعاد خميس
و يعلو بدرجة اعلي صوت محمدين مقيم الصلاة و هي محاولة ايضا لابعاد
خميس عن الصواني و لكن علي طريقة اياك اعني يا جارة
قدو قدو لا اله الا الله
المصلين يتململ منهم من يتململ برية داخلية تحاول ادعاء الخشوع
خميس ينتقل الي صواني الطعام يرفع طبقا عن صينية و يصيح متهللا
لحمه محمره لا اله الا الله
و يتداخل صوت الشيخ عبد التواب العالي اكثر من اللازم وهو يقرأ سورة صغيرة من القران مع صوت مضغ خميس النهم
حمام محشي لا اله الا الله
محمدين يهدد بصوته خميس و هو يقول سمع الله لمن حمده
كمونية لا اله الا الله
الصلاة تضطرب و الخشوع بهتز بهذا المهدد الخطير
باميه مفروكة لا اله الا الله
احدهم في الصف الاخير لا يملك الا ان يلتفت ليري خميس و هو يشرب
ملاح البامية بطريقة غريبة و يرجع الي صلاته خائفا من فضيحة انفلات
خشوعه
جداده محمره لا اله الا الله
و هنا لم يحتمل الامام الشيخ عبد التواب هجمة خميس الشرسة و الشرهة
علي صواني الطعام و بعد ان فقد خشوعه ما كان منه الا ان قطع الصلاة
صائحا
ما ما معقول يا خميس
و هجم بقية المصلين علي خميس الذي فر و هويحمل بين يديه صحن
فته كبير مزينا بالارز و اللحوم و كان يضحك بطريقة غريبة
و بغضب جائع قال نور العين الترزي للشيخ عبد التواب
يا شيخ عبد التواب تاني ناكل اول حتي نصلي
و هكذا تغيرت طريقة الشيخ عبد التواب في اداء صلاة المغرب في رمضان
و ذلك خوفا من هجمة خميس الشرهة


Post: #134
Title: Re: رمضان في تشاد .. مدخل للتعريف بعادات وتقاليد تشادية
Author: عمار عبدالله عبدالرحمن
Date: 09-25-2007, 01:23 PM
Parent: #133

الله يوفقك لك خير

فعلا بوست يسد فجوة في نظرتنا غربا ,, ياليتك كتبته قبل عام 1995م,, حين حملت عصا ترحالي هربا
من المشروع الحضاري وقومه ,,

,, اذكر انني دخلت ابشي في ثاني رمضان , ليستضيفني جهاز الامن التشادي (الايستي) لمدة 4 ايام
ومن بعدها يطلق صراحي لامرح في شق الفقرا ,, ثم اتشرف بالعيد في مدينة بيلتنغ في ضيافة سلطانها ابراهيم عراده,,,,,,,,,

بجيك راجع وبحكي ليك كيف شفت تشاد من وادي ادوكونغ الي قرو,,, وعن رمضان ,,,,

طبعا الحكي حيكون كتير
Post: #136
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-26-2007, 04:09 AM
Parent: #134

الأخ/ عمار عبدالله عبدالرحمن .. رمضان كريم .. وتقبل الله الصيام والقيام
Quote: فعلا بوست يسد فجوة في نظرتنا غربا ,, ياليتك كتبته قبل عام 1995م,, حين حملت عصا ترحالي هربا
من المشروع الحضاري وقومه ,,

,, اذكر انني دخلت ابشي في ثاني رمضان , ليستضيفني جهاز الامن التشادي (الايستي) لمدة 4 ايام

أولاد الذين ديل ما لازم يكرموك يا عمار .. ما برضو عندنا مشروع حضاري بغادي لازم يوروك ليه.. إنت قايل أنتو براكم العندكم مشاريع حضارية
Quote: ومن بعدها يطلق صراحي لامرح في شق الفقرا ,, ثم اتشرف بالعيد في مدينة بيلتنغ في ضيافة سلطانها ابراهيم عراده,,,,

لكن يا عمار تمرح في شق الفقرا .. وتعيد في مدينة بلتن وكمان في ضيافة جلالة سلطانها إبراهيم عراضة عليك ما تستأهل ليها 4 أيام مشروع حضاري .. والله دي يا عمار أنا الإتلودت واتربيت في تشاد وعندي فيها ما لإدريس ديبي فيها ما لقيت اللقيتو إنت الشارد من المشروع الحضاري .. حقو يحبسوك 4 أيام تاني والمرة دي في ميزون داري
Quote: بجيك راجع وبحكي ليك كيف شفت تشاد من وادي ادوكونغ الي قرو,,, وعن رمضان ,,,,

يا ريت يا عمار .. أخوك مزنوق والله .. ومن فرج عن مسلم كربة دي عارف باقيها إنت ..وكمان في رمضان.




شكرا يا عمار على المرور والمتابعة.
Post: #135
Title: Re: رمضان في تشاد .. مدخل للتعريف بعادات وتقاليد تشادية
Author: ابوالقاسم ابراهيم الحاج
Date: 09-25-2007, 05:54 PM
Parent: #1

(يا خاين)!!
لو قالوا ليك أوصف جمالك تفتكر تقدر تقول كل الحقيقة, يا الحديقة!!.
محمد نور يا نور يا ضو العشا,
رمضان كريم

بس مشيت فى درب المستحيل تبغى الممكن وهل ممكن توصف جمال وكمال ونكهة رمضان فى تشاد بكليمات زى لقيمات?!!.

جاييك أعينك مع التحية.
Post: #137
Title: Re: رمضان في تشاد .. مدخل للتعريف بعادات وتقاليد تشادية
Author: حيدر حسن ميرغني
Date: 09-26-2007, 04:14 AM
Parent: #135

ود نور يا صديقي

أدخل هنا

http://www.11c11.com/vb/showthread.php?t=12407
Post: #138
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-26-2007, 04:56 AM
Parent: #137

صاحبي حيدر ميرغني .. إزيك..
من بدايات البوست كده سلمت علينا وتاني ما شفناك .. الحاصل شنو يا زول .. إلا نعزمك فطور تشادي في البوست يعني.
http://www.11c11.com/vb/showthread.php?t=12407
أما أهل الرابط .. فديل كانوا ناسي .. وما زالوا .. بس ما دخلت بغادي لي سنة .. عشان كان قلت بغم بيرفدوني و أنا ما بحب الرفد.
الجماعة شموليون للطيش .. أخير منهم الإنقاذ ( كان حقتنا ولا حقتكم).

شكرا على المتابعة.










___________________________
التعديلين لزوم للضرورة أحكام
Post: #139
Title: Re: رمضان في تشاد .. مدخل للتعريف بعادات وتقاليد تشادية
Author: حيدر حسن ميرغني
Date: 09-26-2007, 05:04 AM
Parent: #138

شكرا محمد

فى الحقيقة عجبني فى الموقع ده الركن الخاص بالمطبخ وكان قصدي نستفيد منه فى بوستنا ده

لكن منبرهم عامر وموقعهم تصميمه جميل جدا



قلت لي طلعو شموليين .. وبيطردوا كمان

منهم خوفة اذا كده
Post: #140
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-26-2007, 07:35 AM
Parent: #135


أبو القاسم يا عثل ..
وين يا حبيبنا .. مشتاقين شديييييييييييييد والله.
توقعتك أول الفاطرين معاي في الخيمة دي يا اخي .. تقوم تجي بعد العيد!!!!
وبعدين ما ترد على تلفونك ده .. ما ممكن كل يوم بس تجيني خواجيتكم الإنجليزيها ما مفروز داك.
البوست ده إلا تجينا نتكالب عليه .. لو خلتني براي بخليه يغطس في خيران بكري البي غادي ديك .. ويبقى العفش داخل البص على مسئولية صاحبه.

راجيك يا عمك.
Post: #141
Title: Re: رمضان في تشاد .. مدخل للتعريف بعادات وتقاليد تشادية
Author: ابوالقاسم ابراهيم الحاج
Date: 09-26-2007, 03:07 PM
Parent: #1

الحبيب(الخاين)!! محمد نور.
وخاين يعنى مختفى متوارى عن الأنظار فى لغة قوم لا بتحدثون بغيرها?!.

وهى من عجيب وغريب اللغة.
أعجبتنى فكرة تناولك رمضان بتشاد, وقد بذلت جهدا مقدرا لتوضيح الصور الشعبية وجماليات العادات فى المائدة التشادية فى رمضان.

وسوف آتيك بلقطات ونفحات ومزيدا من الصور الجمالية والوجدانية فى رمضانيات تشاد والدراما التشادية فى رمضان بالإذاعات المحلية FM
وتحلق الناس حول الراديو لسماعها لما تحتويها من تصوير دقيق للواقع وطرق حل المشاكل المثارة بما يتماشى ةالحالة الروحانية للشهر الكريم ومقابلاتى مع الفنانين المسرحيين الشباب , أزرق, مندرقة, والجنرال, وطرف من ملحاتهم وكذلك ما يهددون به ترهيب جراء محاكات لهجات ولغات بعض الأقوام!!.

حتى الملتقى.
Post: #142
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 09-29-2007, 12:08 PM
Parent: #141


أبو القاسم .. سلامات .. وين إنت يا زول؟
Quote: وسوف آتيك بلقطات ونفحات ومزيدا من الصور الجمالية والوجدانية فى رمضانيات تشاد والدراما التشادية فى رمضان بالإذاعات المحلية FM
وتحلق الناس حول الراديو لسماعها لما تحتويها من تصوير دقيق للواقع وطرق حل المشاكل المثارة بما يتماشى ةالحالة الروحانية للشهر الكريم ومقابلاتى مع الفنانين المسرحيين الشباب , أزرق, مندرقة, والجنرال, وطرف من ملحاتهم وكذلك ما يهددون به ترهيب جراء محاكات لهجات ولغات بعض الأقوام!!.

عملت لبنا تشاهد غدا وزغت
خليت خشمنا ملح ملح.
غايتو .. الله في .. فاتح خشمي وبوستني وراجيك
تلحقنا وتفزعنا يا شيخ عبده
Post: #144
Title: Re: رمضان في تشاد .. مدخل للتعريف بعادات وتقاليد تشادية
Author: nada ali
Date: 10-05-2007, 02:39 AM
Parent: #1

الاخ الكريم محمد نور احمد

شكرا لهذا البوست، فكرة جميلة جدّا ان تكتب حول عادات و تقاليد اخوتنا و اخواتنا فى تشادّ.

فى صغرى كان لوالدى ووالدتى حفظهما الله اصدقاء من تشاد، الخالة هبّابة و العم ابراهيم. عن طريقهما تعرفنا على اسر تشادية اخرى، و على عادات و تقاليد كثيرة مشتركة. بالطبع لا استطيع ان اعمّم خصال بعينها على شعب كامل، لكن الانطباع الذى تركته لدينا الاسر التى تعرّفنا عليها هى ان الشعب التشادى حقيقة شديد الكرم (يكفى انكم تأوون الالاف من اهلنا ممن ضاق بهم السودان على اتساعه بسبب الحرب و التهميش المتواصل)، و ان التشاديين عشرتهم/ن طيبة كما تقول امى حين تذكر خالتى هبّابة، و ان النساء التشاديات شديدات الجمال و يهتممن بزينتهن ايما اهتمام (مثل الكثير من النساء من مختلف انحاء السودان).

عرضت لنا فى هذا البوست من خلال كتابتك حول الطقوس المربوطة برمضان شكل تقسيم العمل السائد بين النساء و الرجال، و كيف ان المرأة تقوم بأعباء كثيرة خلال هذا الشهر، الخ. هل لك ان تحدثنا عن الحركة النسائية او المجموعات النسائية فى تشاد و دورها فى مقاربة قضايا المرأة و المشاكل التى تواجهها؟

لك الشكر

ندى
Post: #145
Title: Re: رمضان في تشاد .. مدخل للتعريف بعادات وتقاليد تشادية
Author: محمد نور أحمد
Date: 10-10-2007, 02:55 AM
Parent: #144



مرحب بالأخت ندى علي .. كل سنة وإنت طيبة ..
Quote: صغرى كان لوالدى ووالدتى حفظهما الله اصدقاء من تشاد، الخالة هبّابة و العم ابراهيم. عن طريقهما تعرفنا على اسر تشادية اخرى، و على عادات و تقاليد كثيرة مشتركة. بالطبع لا استطيع ان اعمّم خصال بعينها على شعب كامل، لكن الانطباع الذى تركته لدينا الاسر التى تعرّفنا عليها هى ان الشعب التشادى حقيقة شديد الكرم (يكفى انكم تأوون الالاف من اهلنا ممن ضاق بهم السودان على اتساعه بسبب الحرب و التهميش المتواصل)، و ان التشاديين عشرتهم/ن طيبة كما تقول امى حين تذكر خالتى هبّابة، و ان النساء التشاديات شديدات الجمال و يهتممن بزينتهن ايما اهتمام (مثل الكثير من النساء من مختلف انحاء السودان).

شكرا على الكلمات الجميلة يا ندى في حق الشعب التشادي والأسر التشادية التي عاشرتيها ..
Quote: عرضت لنا فى هذا البوست من خلال كتابتك حول الطقوس المربوطة برمضان شكل تقسيم العمل السائد بين النساء و الرجال، و كيف ان المرأة تقوم بأعباء كثيرة خلال هذا الشهر، الخ. هل لك ان تحدثنا عن الحركة النسائية او المجموعات النسائية فى تشاد و دورها فى مقاربة قضايا المرأة و المشاكل التى تواجهها؟

عاد لكن يا ندى جايانا قبائل العيد ورامية لينا موضوع كبير قدر ده ..
أتمنى أن أجد عض الوقت لأكتب عن الجانب ده..
لكن مبدأ كدي يا ندى بقول ليك أنو وضع المرأة في المجتمع التشادي لا يسر ..
نحتاج إلى سنوات ضوئية كثيرة لتنال المرأة التشادية بعض حقوقها..
بوعدك إني حأكتب عن الموضوع ده قريب.


كل سنة وإنت والأهل بخير يا ندى ..