مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ

فترة زاهية ،،، وعهد جميل ،،، وزمن أجمل مابين (83 حتى 85) فترة الناظر المميز عبدالحميد مدني
نتسائل أين أحباء تلك الفترة من الزملاء ،،،
اولى عباسي ،،،، حامد محمد أحمد قرافي ،،، خالد محمد اسماعيل البيلي ،،،، تلميذ حمدان منجل
أين أنتم وكثيرون في الفصول الاخرى ،، جمعتنا بهم هذه المنارة المشرقة والتي مازالت تقدم للجامعات خيرة النوابغ


وسنواصل ،،، ولغير الاعضاء هذا الايميل [email protected] ،، ربنا يجمعنا بيكم في ساعة خير

يا سلام عليك ، تسجيل حضور لاحد خريجي هذه المدرسة
ابوبكر

الزميل والاخ / أبوبكر .........
/ تحية كبيرة وشوق للازمان الجميلة ولخريجي هذه القلعة دون تحديد دفعة ولكن من الاهمية بمكان المساهمة والبحث عن زملاء دفعتك وأصدقاء الزمن الجميل ،،،، وأنا من يوم خشيت المنبر متفرجا وعضوا ،،،، هذه الحمامة الجميلة شعار السلام شي جميل انه تكون من نفس القلعة مرحب أخونا بكري


وسنواصل

الخرطوم الجديدة... المنارة
او المدرسة الفرنسية كما عُرفت قبلاً
المدير عبدالحميد مدني ورفاقه من كواكب علم سيارة
دارت في رحاب هذا الصرح الشامخ , وهاهي نيازكه تتوهج
ضياءاً في كل المحافل المحلية والاقليمية والدولية,ملاءوا
الدنيا وهجاً وضياء.

هلم نلتقي كل الدُفع ,وكلٍ يدلو بزكرياتة ,ويا له من عبق ورحيق طاعم من
ايام خوالي كانت ولازالت خالدة

معتصم عبدالرحيم

نحن من زمنين.الأستاذان محمد عبد الرحيم وعبد الحميد مدنى والأساتذة تاج السر (عربى) وشاهين (رياضيات) ونجم الدين (تاريخ) والرشيد والبيلى (تربية إسلامية) وقطبى (لغة عربية) جيلناالأن فى مفارقة لمرحلة الشباب ومن مشاهيره د. على الكوبانى (طبيب شرعى وشاعر) وجدى ميرغنى (رجل أعمال) عبدالناصر كبيدة (طبيب) محمد الشيخ حسين (صحفى وكاتب) وكثيرا من المميزين نتمنى أن يجمعنا بهم هذا البوست.

كل الشكر لمبادرتكم وعاشت الجديدة منارة علم وتميز

شكرا الزميل معتصم عبدالرحيم.... تحية عبقة من رحم ذكريات الزمن الجميل

شكرا على الإطلالة البهية ،، وهانحن جميعنا جنودا لهذه القلعة المضيئة،،والتي أنارت دروبنا في العلم والتعلم ،،، هيا بنا نجتر شريط الذكريات الحلوة ،، كيف لا وكلنا نجتمع داخل المدرسة وخارجها عند قدرة الفول ( الفول الزبدة )الذي هو في ناصية المدرسة ،،، هيا بنا نحكي وهيا بنا نتذكر الاحباب ،،،

ونواصل

Quote: عند قدرة الفول ( الفول الزبدة )الذي هو في ناصية المدرسة

وعند كشك المجلات في مواجه البوابة الغربية

وعند نادي الاسرة المجاور لنا ننادي ذكر ياتنا فهيا الي هناك ،

مالكم علينا بس دايرين تهيجو علينا شجونا

شكرا الاخ والزميل الاكبر / حسام بشير

شكرا على المرور والذكريات الحلوة ،،، الجديدة مدرسة فعلا خرجت نوابغ ملأت الساحة بفنون راقية ومختلفة وما زالت تنجب وتخرج الافذاذ وما جيلكم ببعيد ،، الدكتور علي الكوباني وأطباءوآخرون في تخصصات شتى ، لك التحية ولجيلك ومعلميك أجل التقدير .....
وبالمناسبة الاستاذ الرشيد ( تربية اسلامية ) درسنا أيضا وهناك قصص طريفة مع بعض الزملاء سنتحفكم بها في هذا البوست ....ودرسنا الاستاذ (شاهين في اللغة العربية )
شكرا الزميل حسام زميل العلم في منارة العلم ونأمل مداخلاتك التي لا تخلو من ذكريات حلوة عن هذه القلعة النيرة ..

شكرا للرسالة الواصلة للتو عن طريق الإيميل من الزميل اسامة ابراهيم أحمداني وهو دفعة
1987أولى أبوبكر ،، 1988ثانية عثمان،،، 1989 ثالثة طبري ،، المعروف حينها بأسامة الباز له التحية من على البعد وهو على الايميل [email protected] نحيه من على البعد ونتمنى منه المواصلة واجترار الذكريات ... ونقول للزميل الاصغر نحن دفعة قدامكم وكلنا إخوان
ومن خلال البوست المفتوح ستجد كل الزملاء الغائبين عنك لمدد طويلة فمرحبا بك

ونواصل

الاخ / أبوبكر طاب مساؤك

هيجتني الذكرى جد أغنية جميلة نتمنى من الاخوان ينزلوها لينا عشان كل النوابغ يجمعوا هنا وخليك معانا يا أبوبكر بتشوف الجديدة بتعمل ايه ،،،
فن وغنى وطرب وكله ( وعلم )



سنواصل

Quote: فترة الناظر المميز عبدالحميد مدني

له الرحمه والمغفره

Quote: وخارجها عند قدرة الفول ( الفول الزبدة )الذي هو في ناصية المدرسة

عبدالوهاب بتاع الفول فى نفس المكان بتاعو وبنفس المزاق القديم

مرحب بيك يا عبدالمحسن سيد،،، تحية من الزمن الجميل ملؤها المحبة والشوق

شكرا على المعلومة القيمة ( عم عبدالوهاب ) فهذه السنين قد أكلت منا كل المعلومات بقدر ما أكلنا من هذا الفول (الرقم ) وبقدر ما استلذذنا طعمه لم ولن يمر بي في حياتي فول مثل ذاك ،، الله الله لك طولة العمر ياعبدالوهاب وتسلم يدك ،،، بالذات لمن يكشح ليك فيه سلطة الروب ويديه شمار أخضر

بعد دا كلوا ما بتجمعوا ،،، أجمعوا يا نوابغ

وسنواصل

نترحم على استاذنا الجليل عبد الحميد مدنى وهو بذاته كان مدرسه.

يا سلام على الزمن الجميل وذكريات الخرطوم الجديدة
الناظر الرائع عبد الحميد مدنى له الرحمة والاساتذة جميعهمنذكر منهم أمين نورى (لغة عربية) البلك (تاريخ) والفصول اولى ابوبكر ثانية دقنة وثالثة الرازي وفطاحلة تلك الفترة 82 -85 قرافى ورفيق دربه حتى الآن ابراهيم اللندي والرائع طارق الأمين والبيلى ووليد ابو عاقلة، هاشم عثمان التوم، ابوبكر عبد العزيز وآخرين ومن هذه الدفعة كنا حوالى 14 فى كلية الهندسة جامعة الخرطوم بالاضافة الى بقية الكليات الأخرى
يا ترى أين هم الآن بعضهم لا يزال قابض على الجمر بالداخل وآخرين فى شتى انحاء المنافى

الاخ / ياسر شكرا جزيلا على ذكريات الزمن الجميل في المدرسة العريقة التي لا ما كان الا للممتاز فيها ، مدرسة نموزجية بحق وحقيقة . تشرفت بالالتحاق بها عام 1990 اولى عمر ، ثانية تجاني الماحي ( المجانين )، ثالثة سيناء وبعدها وبحمد الله الى جامعة الخرطوم كلية الهندسة.. بالمناسبة والدي كان معلم لمادة التاريخ من الاعوام 83 الى 86 الاستاذ ( حسن موسى ) في عهد النابغة خالد البيلي ، واتذكر وانا حينها في الابتدائي عندما يقوم الوالد حفظه الله بتصحيح اوراق الامتحانات فكان يبدا اولا بخالد البيلي لان حلوله نموذجية وكان غالبا ما يحرز الدرجة الكاملة وتوقع له والدي مستقبل عظيما ، لا ادري اين النابغة خالد الان ؟!

لم اتشرف بحضور الناظر ( الاسد الجسور ) المرحوم عبدالحميد مدني ، فقد جئنا على انقضاء فترة خدمته المدنية وكان الناظر في زمننا لفترة سنتين الاستاذ ابراهيم الجاك ثم بعدها الناظر ( عيسى ).. كانت حصة اللغة الفرنسية اجمل الحصص وذلك لانها مادة جديدة ومثيرة وذات نطق غريب على السنتنا .. لقد كانت مدرستنا الخرطوم الجديدة بمثابة لبنة لمستقبل عظيم من ابناءها .. اذكر صديقي العزيز النابغة الفذ دكتور خالد النور الذي كان طالبا مثاليا في كل شيئ ومجيد لكل شيئ ، كذلك دكتور صلاح محمد عثمان الذي احرز الترتيب التاسع على مستوى السودان ، فقد درس الطب مكرها فقط لرغبة الاهل واتيحت له فرصة الهجرة لامريكا فذهب ودرس الهندسة من جديد ونال درجة الدكتوراة في الهندسة بجانب بكالريوس الطب جامعة الخرطوم .

ما اجملك مدرستنا الجميلة ، ما اروع طلابها النوابغ!! ،،،،،،،،،،

شكرا على بوستك اخي ياسر ودمت دوما في حفظ الله ورعايته ،،،،،،،،،،،،

الأخ / أشرف الباقر ،،،،
تحية لك ذكرتنا بالمرحوم عبدالحميد مدني ،،،، وسنأتي بالحديث عنه في الايام المقبلات
لك التحية أخي أشرف ،،، وشكرا على مرورك .

الزميل وابن الدفعة / أبوبكر عثمان ،،
شكرا على مرورك وعلى المعلومات النيرة ،،، فعلا الجديدة نوابغ وما ذكرتهم من زملائنا كانوا شامخين بعلمهم وأدبهم الجم ،،،
ياسلام أيام لاتنسى وذكريات لاتحصى ،،، نرجو مساهماتك في هذا البوست حتى نتعرف على كل الزملاء وأين هم الآن واصل معنا ،،،
ومن هنا نتذكر الطالب البيلي ومادة اللغة العربية ،،، كان يشرح المعلقة للطلاب مع استاذنا الجليل أمين نوري ،،، يازمن ما أروعك

الأخ والزميل الاصغر / عبدالرحمن حسن موسى ،،،،
والدك التحية العميقة له من هذا المنبر ،،،كان موسوعة في التاريخ ،،،كنت حينها انا والبيلي في فصل واحد ثالثة أدبي ،،،
تعلمنا منه كتابة المقالات وفعلا تحصلنا على درجات عالية شديد في مادة التاريخ في امتحان الشهادة ،،، كان والدك علامة وموسوعة في هذه المادة
ومن هنا نترحم على استاذ الجغرافيا الاستاذ مصطفى الملقب بمصطفى رقة ،، كان أنيقا ورقيقا وصاحب هندام مرتب رحمة الله عليه ،،،
وكان يجيد مادته فلا تشعر بملل في حصته ،، لكل الاجلاء التحية طلاب ومعلمين ولامواتنا الرحمة ،،،
وشكرا على المعلومات الطيبة أخي عبدالرحمن ،،، ونتمنى مشاركتك على الدوام واثراء هذه المساحة ..

ونواصل

شكرا اخي الامير على اطرائك لوالدي ، كذلك هو دائما ما يثني على دفعتكم هذه
بانها دفعة مثقفة ومهذبة ومجتهدة .

لك شكري وامتناني ،،،،،،،،،،،،

يا سلام يا ابو جكة ياخي مالك علينا ياخي
هيجت ذكرياتنا الجميل

الفاضل ابوبكر عثمان
طارق الامين وخالد البيلي ديل دفعتي تماما
وطارق الامين كان معاي في الفصل (اولى عمر)
يعني الناس ديل لو دفعتك معناها انت دفعتنا انا وابو جكة


تسلموا

تسجيل حضور فقط أيضا..
درست سنة واحدة بالخرطوم الجديدة (الفرنسية سابقا) وتخرجت فيها عام 1978

تسجيل حضور
انا دفعة حسام الفوق ده
ايام جميلة
استاذ كامل لغة انجليزية
و مسيو غوني لغة فرنسية
استاذ طه لغة عربية
استاذ نورالدين تاريخ و تربية وطنية
استاذ ثروت رباضيات
استاذ فرح دين
استاذ عبدالرحيم احياء



من الدفعة في البورد:
عماد عبدالله
عصام عبدالحفيظ
الكيك
وحسام
لهم الود جميعا

التحية لكل أشاوس الجديدة القدماء من الطلاب والجديدون منهم

الاخوان والزملاء
طارق جبريل ،،،، انت خلاص عجزت بتكون بخرت كل الملامح ،،، ملامح ذكرياتك أصبحت مغارباوية
شكرا على المرور وخليك معانا دايما ،،، البوست دا اتفتح وكثيرون من اولاد الامتداد انت تعرف اماكنهم ،،، هيا معانا

عزيز عيسى ،،، ستظل زميل معانا في هذا البوست ولو درست في الخرطوم الجديدة يوم واحد ،،،فذكريات الايام والشهور والسنين
جميعها تتساوى ما دام مرت عليها الثواني والساعات فهي ذكريات بحلوها ومرها ،،، لك التحية أخي عزيز

القرضابي الهلالابي ،،،، كيف حالك ،،، ومرحب بيك زميل أمامي في هذه القلعة النيرة ،،، ودفعتكم تحكي عبقرية المكان ، وفيها من الشعر والشاعرية
والشعراء كثر منهم ( الشاعر الكوباني ) ،،، نحن في انتظاركم لتقدموا لنا ذكريات وصدى السنين الحاكي ،،، شكرا لك ولدفعتك ،، فأنت دافع لهم للتواصل عبر هذا البوست

ونواصل

الاخ ابوجكة

زكريات الخرطوم الجديدة ..حافلة ومثيرة
ومتداخلة ومتشابكة ..عن ماذا تحكي وعن من تروي
ومن أين تبدا هو السؤال الاهم

نترحم علي روح المربي الخالدفي الاذهان "عبدالحميد مدني"

فقدكنا اول دفعة في عهدة بالمدرسة ولقد سبقتة سيرتة القوية وهو
القادم من ادارة مدرسة خور طقت "مصنع الرجال",سبقتة هيبتة وقوة
ادارته وصلابة مواقفه ..وفي ذلك كثير من المواقف تحسب ايجاباً له.

من الاساتذة الاجلاء وعلي سبيل الذكر ولا الحصر في الاعوام الثلاثة

نورالدين "تاريخ",بشير "رياضيات" , عبدالرحيم "احياء" , احمد الطيب و فتح العليم الطاهر "لغة انجليزية" , واستاذ الفيزياء المصري , وكان هناك استاذ كامل وعربي الوكيل ورضاء للفنون ,, وكثير نوروا عقولنا .

من الزملاء في المراحل الثلاث

عزت ابراهيم,عماد خلف الله,الدرديري فضل ,خالد عبدالحميد ,محي الدين طيب الاسماء, محمدابراهيم امبابي ,صلاح عطاءالمنان ,سيف الله الشيخ ,عماد محمد علي" الهدندوي",
ياسر علي جبالي ,حاتم حمتو رجب, جمال يسن عبدالرحيم,علاءالدين تاج السر,طارق محمد عثمان , عمار عبدالوهاب ,شرف محمد عثمان, 'طلال لطف الله

كان فول عمك عبدالوهاب مميزاً وقبله كان دكان عمك ميرغني علي مشارف السكة حديد مميزاً هو الآخر .

كان الكديت وكان عمك الصول عثمان ان لم اخط في الاسم , كان نادي الاسرة وحصص الرياضة
وملعب الباسكت , كان بوفية عمك جعفر وكانت كباية الشاي والكركدي والحصص المدكوكة والحصن الامين.

كل اسم من هولاء وكل حدث تفرد له الصفحات ولاتكفي , وهذا علي سبيل المرور بشريط زاكرة
خربته سنوات الغربة واعترته اتربة الزمن المتخمة رطوبة جفاء قسري منعته التواصل البريء


لكم مودتي

معتصم عبدالرحيم "العربي"
"عمر,سيناء,الرازي"
[email protected]

يا جماعة الخير حد عارف استاذ امين نوري هسي وين؟

عندي معاهو ومع الصول مقلب كبير ايام الشقاوة ، لكن يوم كشفوني داك انا ادقيت في الدنيا دي بصورة ما طبيعية


والله بالجد ايام ما بتجي تاني

ياخ أنتو قدام شديد ...
شاي عم النعيم ...
بخاري عثمان الامين
الخرطوم الجديدة 87 الي 89
كان بدرس التربية الاسلامية استاذ محمد يحي ولم احضر له اي حصة واكتشف الامر وتم تحويلي الي الوكيل الاستاذ امين نوري وسألني : ليه يا ابني ما بتحضر حصص التربية الاسلامية ؟ وكان ردي : انا بعتقد( شوفتو الصعوبة دي ) انه تدريس الدين ما صاح لانه التلميذ لو رسب كانما رسب في دينه .. الاستاذ أمين نوري : طيب رأيك شنو ؟ وكان ردي : نعمل مناظرة أنا والاستاذ بكرة .. وافق الوكيل وجيت تاني يوم مجهز كل الممكن عشان اقنع المدرسة بعدم تدريس التربية الاسلامية ولكن بدلاً عن المناظرة عمل طاقم الاستاذة والصولات بنظرية ولي امري لكم اللحم ولينا العضم ورجعت البيت عضم من كترة الجلد وبالمناسبة احرزت في التربية الاسلامية 97 من 100 ومحسن محمد احمد قرافي شاهد علي ذلك

الاخوة الزملاء ،،،، تحية طيبة

وصلتني رسالة جميلة على الايميل من بدر الدين علي ( بدر الدين حامد الهاشمي ) السكة حديد الخرطوم مضمونها وعلى لسان الاخ والزميل الاكبر بدر الدين نفسه ، قائلا

نحن أول دفعة كانت عام 1966 وتخرجنا عام 1970 م ، كنا ثلاث فصول أ وب وج ،، كانت تسمى هذه المدرسة بالمدرسة الفرنسية ، كان ناظر المدرسة المرحوم محجوب شورة ، ونائبه الاستاذ نور الدين ، كان أساتذة اللغة الانجليزية هم ( علي حسن كوكو ،، وميرغني الشهير بأبي كموزة ،، ومهدي أبودقن ،،،ويوسف عمر ،،،ثم مستر اسميث ) ، أستاذ الرياضيات كان مصري اسمه محمد العربي النجار ، مادة اللغة العربية كان يدرسها استاذ عبدالحميد ، والدين استاذ الرشيد ،، والفنون يدرسها استاذ محمد عثمان ،،،وكثيرون آخرون ،، وقد كتبت عن المرحوم محجوب شورة مقالا في سودانايل ....
من زملاء أول دفعة :
المرحوم الدكتور علي فضل ،،، المرحوم الضابط عصام ميرغني ،، والضابط حيدر عوض محجوب ،،، وهاشم العطا ( تشابه أسماء فقط )
والضابط عبدالمنعم المكي ،، والضابط المهندس الصادق اسحق ،،، ويوسف ادريس ( معندس معماري بالعين ) ،،، وعبدالمحمود عبدالحليم ( سفير مشهور ) ،،، وود خليل ( المترجم الخطير بقاعة الصداقة ) ،،، وعبدالسلام بابكر ( أشطر طالب بالدفعة ) وهو الآن طبيب بالسعودية ،،،،
والماحي بلال ( بروفيسر بكلية الطب البيطري ) ،،، وسالم أحمد سالم ( صحفي كبير في باريس ) ،،،، وفتحي هارون ( خطاط موهوب بالعين ) ،،،
ومحمود عبده محمود ( الضابط المثقف ودودة الكتب ) ،،،، واسماعيل البيلي الضابط ،،، وداؤود الضابط الكبير ،،، ومحمد عبدالعزيز ( بيطري من رجالات البنوك الآن ) ،،،، ومحمد كبش الذي كان كابتنا رياضيا بالجامعة ،،،، وعبدالله سيد أحمد ،،، وحامد عبدالكريم ،،، وصلاح ،،، وكثيرون
جدا ،،،،أغلبهم أطباء واستشاريون بالمملكة العربية السعودية ،،، وكثيرون غيرهم يحتلون وظائف تدريسية كجاري في الفصل عبدالله عبدالمطلب
( الذي يجيد اللغة الانجليزية ) ،،،، ولدينا مزيد
بدر الدين حامد الهاشمي ،،،[email protected]
شكرا كثيرا وجزيلا ، على المرور الجميل ونتمنى مداخلاتك مرارا وتكرارا ،،، وشكرا على المعلومات النيرة وجزالك الله خير الجزاء
فدفعتكم فعلا هي الشموخ لهذه القلعة النيرة والتي استضاء بها العلم في السودان ،،،ولك ولدفعتك ولأ اساتذتها الاجلاء التي أنارت
هذا الطريق ورفعت اسم الخرطوم الجديدة عاليا خفاقا يرفرف في سماءآت العلم ،،،لكم منا كدفع من بعدكم كل التقدير والإجلال ،،، وأنت بيننا الزميل والاخ والمربي وقائد هذا البوست ،،، فمرحبا بك أيها الشامخ ( بدر الدين الهاشمي ) ونحن في انتظار كل ذكريات البدايات لهذه القلعة

شكرا للزملاء
بخاري الامين ،،، معتصم عبدالرحيم ( العربي ) ،،، أبوبكر أحمد ،،،، وسنبحث معكم عن كل الرايحين عن هذا البوست فقط كونوا معنا ،،،
وسنواصل

الأعزاء يثانوية الخرطوم الجديدة...!

حقيقة أنا مندهش من كمية(العسكريين الذين تخرجوا من الجديدة)!

ولكنى أقول أن أشهر شخص فيها كان أستاذ الرياضيات شاهين رحمه الله.

و بمناسبة عسكريي الخرطوم الجديدة فلم نر منهم من حمله إنقلاب أو شارك

في الوضع الديموقراطي كشخص مميز..!!

هنيئآ لكم بشاهين و قطبي و محمد عبد الرحيم اللذين أممددتكم بهم

أفضل ثانوية في السودان آنذاك إسمها الخرطوم القديمة مدرسة التفوق

الأكاديمي و الطلاب الذين يحرزون أعلا الدرجات..

و بإسم القديمة مدرسة النوابغ أرسل ليكم تحياتي...!

الاخ / عبدالرحمن حسن موسى ،،،
تحية لكل الاسرة حقيقة والدك كان بمثابة الأب لكل طلاب فصله ،،، كان انسان بكل ماتحمل من كلمه
وآخر مرة التقيته وأنا طالب بكلية القانون ،،، التقيته في الكلاكلة القبة في مأتم ،، فهو انسان يواصل الافراح والمآتم ،،، نسأل الله له طولة العمر ويديه العافية بقدر ما خرج من اجيال هي حافظة لصنيعه معها ،،، له التحية والتقدير ،،، ولك أن تحمل هذا الاسم الكبير في حدقات العيون وتدعوا له ،،،فأنت من صلب عالم .
لك ولابيك التقدير والإجلال.

الأخ / ملامح
شكرا على مرورك الجميل ،،، ومرجب بيك أيضا من احدى القلاع الشامخة ( الخرطوم القديمة ) ،،، ولكن دفع كثيرة من مدرستنا الخرطوم الجديدة كانت لا تقارع ( خاصة في مسابقات المدارس ) فعلنا العجب العجاب ،،، والتاريخ شاهد على ذلك .
مرحب بيك ملامح أخ وزميل بيننا.
ونواصل

الأخ ياسر الأمير أبوجكة

هي الزكريات محورها الوجدان وتسكبها ألسنتنا مدادا من ذهب ولك وللجديدة

الثانوية تحية ونزكر أيضا القديمة أيضا نهران يصبوا في التعليم الثانوي

آنذاك ومع أني لم أدرس بها ولكن سمعة المربي الفاضل عبدالحميد مدني تسبق

طلاب المدرسة وأذكر كنت من متابعين مسابقات المدارس والأستاذ الرائع عوض أحمد

مقدم المسابقات ولفيف من المعلمين الأجلاء وأيضا مدارس البنات الثانويات القديمة

كانت رائعة في طلابهم ولك أخي أن تفخر بها وهي قلعة تعليمية كبيرة وكنت من الذين

جلسوا علي كنبات فصولها مركزا للشهادة المتوسطة وبها منزل الأستاذ عبدالحميد مدني

طيب الله ثراه وكثيرين من أبناء الأمتداد الأفذاذ درسوا بها ومنهم الآن علي صفحات بوستك

د.طارق جبريل ومعتصم عبدالرحيم وكثيرين ذكرهم معتصم د.حاتم حمتو وطلال لطف الله والقائمة

تطول ونحن من درسوا الثانوية في شمال الوادي البعثة التعليمية المصرية بواديها

القبطية وجمال عبدالناصر ونهايتها القاهرة الفرع معلمة الكثيرين من أعلام البلاد وهولاء

هم من تخرجوا بالأمس من مدرستنا الجميلة أمتداد(3)المتوسطة ولي بوست لها بالموقع وأيضا

من طلابها د.طارق جبريل وعديدين درسوا الثانوية بالجديدة ومدارس أخري القديمة والمقرن

وحتي مدارس البعثة المصرية شكرا لك ياسر الأمير ومساحة زكري بحجم الجديدة بنين.

،،،،أبوقصي،،،،

الأخ الغالي جدا / أبوقصي

فعلا كانت المدارس الخرطوم الجديدة ،،،، والخرطوم القديمة ،،، والمقرن هي مثلث قوي في تلك الازمان الجميلة وخرجت أفذاذ الطلاب
وبالنسبة لطلاب الامتداد هم كثر في تلك الفترة بمدرسة الخرطوم الجديدة ،،، وأخونا د/ طارق جبريل هو قائد الاسطول في دفعتنا لطلاب الامتداد
فهم من يجترون ذكريات هذه المدرسة عبر هذا البوست المفتوح للجميع ،،، سواء من طلاب الجديدة الذين هم اعضاء بالمنبر أو الذين يسهمون معنا عبر الايميل ،،، فلكم التحية ،،، ولكل المتداخلين الاحترام والتقدير .


كن معنا ،،، وانت تعرف كل شباب الامتداد أبناء هذه القلعة ،،، لك التحية مجدي عبدالرحيم فضل .

نواصل

أتشرف بالإنتماء إلى هذا الصرح ( 80 - 82 )

درسنا فطاحل نكن لهم كل الاحترام والتجلة

اللغة العربية : الأستاذ أمين نوري

التربية الإسلامية : أستاذ الرشيد

اللغة الإنجليزية : الأستاذ أبو البشر وأستاذ كامل

الكيمياء : الأستاذ عبد الرحيم عمسيب

الفيزياء : الأستاذ رفيق والأستاذ الشايب ( مصريان )

الرياضيات : أستاذ شاهين وأستاذ صديق

اللغة الفرنسية : أستاذ رزق وأستاذ أحمد محمود

التاريخ : الدكتور عبد الرحمن

الأحياء : أستاذ أحمد

ولي عودة ......

الاخ ياسر

تحياتى

تشرفت بصحبة الاستاذة الذين ذكرهم الاخ ديامى و يبدو اننا دفعة

اتذكر ان فصلنا كان يسمى ثالثة فارابى إن لم تخنى الذاكرة

عذرا للخطأ الوارد في ايميل زميلنا وأول دفعة بدرالدين حامد الهاشمي (احذف حرف e واحد ) ،،،

وصلتني رسالة على الإيميل من زميلنا وأبن دفعتنا ونفخر بهذا الاسم ( الدكتور علي عبدالقادر سيداحمد ) يعمل الآن مشرف على طلاب الجامعات والدراسات العليا في احد الجامعات الفرنسية ،،،فخر وإعزاز كبير وهذا ليس بمستغرب على هؤلاء النوابغ،، عايشناهم ونعرفهم جيدا ،،، مكانتهم العلمية مرموقة جدا لاتتعجب اذا وجدت في كل قمم المنارات العلمية في العالم طالبا من تلك القلعة،،، فهم شموس أضاءت لنا كل المنابر بمختلف طيوفها ،، نحيي كل زملائنا من على البعد،،، شكرا لك ايها العالم الجليل علي عبد القادر سيداحمد وسر في هذا الطريق فأنت شمعة علم نتمنى من المولى القدير أن يحفظك بحفظه .
ومن دفعة هذا الدكتور الانيق :

لؤي عبدالحميد مدني ،، هشام عثمان ،،، ود الوكيل ،، أبو السعود ،، وشهاب مسيك ،، وابن خالته الدكتور عماد حسن حيمورة ،،،، وعبدالله فرح عطاالله ،،، والمرحوم فتحي صديق .

ويحي الاخ والزميل الدكتور علي عبدالقادر سيد احمد ، عبر هذا البوست الاساتذه البلك ،،، رزق ،،،والوكيل العم عثمان وابنه زميلي بمدرسة الصحافة غرب والخرطوم الجديدة

والايميل للدكتور علي عبد القادر سيد احمد هو [email protected]

شكرا أخي د/علي عبدالقادر ونتمنى حضورك بنفس الشاكلة وما على الرسول إلا البلاغ ،،،سنوافي الزملاء بكل خبر وبكل معلومة لك التحية والإجلال ونحن في إنتظار إسهاماتك النيرة .

وسنواصل

Quote: تسجيل حضور انا دفعة حسام الفوق ده ايام جميلة استاذ كامل لغة انجليزية و مسيو غوني لغة فرنسية استاذ طه لغة عربية استاذ نورالدين تاريخ و تربية وطنية استاذ ثروت رباضيات استاذ فرح دين استاذ عبدالرحيم احياء من الدفعة في البورد: عماد عبدالله عصام عبدالحفيظ الكيك وحسام لهم الود جميعا

القرضابي
ما عافي ليك ... هلالابي ودفعتك وتنساني ؟؟؟
شكرا للأخ ياسر أبو جكة على فتح هذه النافذة الرحبة للأطلال على ذكريات
الأيام الجميلة بمدرسة الخرطوم الجديدة وأسجل حضوري أيضاً...

شكرا لكل الذين سجلوا حضور في هذا البوست الذي يرفرف عاليا ، مادام الطلاب حضور وانتظام
لكل الذين شاركوا ومروا اليوم تحية كبيرة
الزملاء عصام الطيب ،،، وديامي ،،، وعادل جبارة،،،، لكم مني التحية
وهؤلاء الاساتذه كنا قد تتلمذنا على أيديهم فكان النتاج الخير لمواصلة التألق في كبرى الجامعات في العالم
نرجوا منكم المواصلة والمساهمة ،،،


ونواصل

وصلتني هذه الرسالة عبر الايميل من الزميل / محمد عيد عبدالرحيم وهذا نصها :

Quote: حياك الله لكل مجد في الورى نفع فاضل*** وليس يفيد العلم من دون عامل لن أنسى أبدا هذه المدرسة العتيقة في هذا الزمن الجميل ما بين 83 / 85 قدمت إليها من اقليم كردفان /1984 والتحقت بفصل فارابى / تخصص أحياء وكانت لي ذكريات جميلة مع / البارع / احمد عبدالله // استاذ الكيمياء ومع المولات والجبر وكذلك استاذ مادة الأحياء / الفذ/ سيف الدين / وعلى ما اعتقد قبل سنوات كان مغترب في سلطنة عمان ولكن رغم تخصصنا العلمى درسنا اتجاه أخر يربط بين المسياق العلمى والأدبي / التحقت بجامعة القاهرة /كلية الحقوق ومن ثم سافرت الى الخليج حالى حال من سبقونى منالاخوة السودانيين واقيم بمدينة أبوظبي حتى هذه اللحظة أخى الكريم ياسر كلما ذكرت مدرسة الخرطوم الجديدة تذكرت الناظر الفذ عبد الحميد وتذكرت أهل العلم وطلاب الرياضيات وخاصة حساب المثلثات ونظريات الجبر والكيمياء وتذكرت لي زميل وصديق من منطقة نوري ويسكن الأن في الخرطوم / حي اركويت / محسن عبد العاطى وأبحث عنه اوعن عنوانه اشكرك من القلب على هذا الشعور الطيب أخوك / محمد عيد عبد الرحيم [email protected]

Quote: القرضابي ما عافي ليك ... هلالابي ودفعتك وتنساني ؟؟؟ شكرا للأخ ياسر أبو جكة على فتح هذه النافذة الرحبة للأطلال على ذكريات الأيام الجميلة بمدرسة الخرطوم الجديدة وأسجل حضوري أيضاً...

العزيز عادل جبارة
والله ياخوي الكبر حصل
لكن انتا مابتتنسي
و أولى (ه) ما بتتنسي
الابتسامة الدائمة الخضرة انشاالله تكون كما كانت
لك الود

.
يا ياسر ..
الله يديك الجنة ..

نحنا أقدم .. ( أعني قردابي و الكيك و عصام ع حفيظ .. و أنا ) ..
دفعتنا منها أيضا وجدي ميرغني و أسامة عبدالعزيز و حسن حسوبة و أسامة زكي , هشام عتيق , عبدالرحمن بربر , حسين مرسيدس , محمد خير طه , صبري , محمد داؤود , بابكر عباس دياب .. و كثيرين لا يتسع المقام و لا الذاكرة لاستحضارهم .. فلهم العتبى .
( يا عادل جبارة إنت لا دفعتنا لا حاجة .. جينا لقيناك مخلل ..

دخلناها و وكيل المدرسة أستاذ عربي .. و المدير محمد عبدالرحيم ..
الأساتذة كامل و نور الدين و عبدالحميد المصري و السر و ... تاني منو يا قردابي ؟؟؟
الذاكرة أمست طشاش .. الله يهون ..

الفول كان فول نجيب القبطي .. و الشاي و البلاوي التانية في كشك عم سيد ( رحمه الله ) ..
و كنا " ندك " في حديقة القرشي او وادي النمل ( نادي الخرطوم تلاتة حاليا ) ..

سأعود إن مد الله في الآجال ..
شاكر ليك يا ياسر .
مودتي .


..

شكرا جزيلا للأخ المهندس بكري أبوبكر لتعليته البوست،،،
مرفرفا كقلعة من قلاع العلم التي أنارت كل بيوت الخرطوم ،،،
وأبهجت البيوت بالنوابغ،،،،

وشكرا للزملاء النوابغ ،،،عماد عبدالله ،،، فيصل خليل ،،،معتصم عبدالرحيم
والى الامام سيروا في تنوير الآخرين بعظمة الجديدة ،،،

وغدا صباح جميل
ود الامير

الاخوة الجديداب

تحية طيبة

التحقت بالجديدة في نفس العام الذي ترك فية المدير نور الدين

ادارة المدرسة منتقلآ الى المقرن الثانوية مديرآ لها.خلف المدير

القديم مديرها الجديد عبد الرحيم الذي كا ن يسكن خلف مباني الكلية

المهنية في منطقة حجازي.الاساتذة الذين درست تحت ايديهم اذكر الاستاذ

شاهين رياضيات.استاذ السر عربي.اسماعيل فنانون.جدعة تاريخ.عبد السلام

جغرافيا.عبد العال و عبد العظيم و كامل انجلزي وكمان الاستاذ سافونا

من احدى دول افريقيا ايضآ انجليزي.الاستاذ خضر علوم الاستاذ معتصم كيمياء

بكري محمد صالح تاريخ.الاستاذ الرشيد سوبرمان دين و في استاذ كان بيجي

بالعجلة برضو كان بيدرس دين.الاستاذ كرم المصري فرنساوي كنا بنسميهو كقم

و كان في مدرس خواجة جاي من فرنسا عندو عربية جيب كان دائمآ قاعد معانا في مصطبة المسرح.

المعلم شورة كان ساكن داخل مدرسة الخرطوم الجديدة وهو كان ناظر في

نفس مدرس الخرطوم الجديدة بس نميري عفاة لانو كان شيوعي الكلام دا

بعد الحركة التصحيحية لثورة 19 يوليو المجيدة.

درسوا معاي فطاحلة من الطلاب النابغين مثل عبد رحمن بركات ابوساندرا

حاليآ.عبد الحفيظ سنان.حسن عثمان البطل.عثمان الحاج.الفرجوني رحمة الله.

عبد المنعم الكوز.وابن ابو العباس صاحب بقالة ابو العباس والعشرة الكرام

وكثيرون لا تسعفني الذاكرة لذكرهم فارجو منهم المعذرة.اخرجنا جريدة الطليعة الناطقة باسم الجبهة الديمقراطية و حميناها من الجماعات

الكانت موالية لمايو و من ادارة المدرسة حتي لو تطلب ذاك العراك.

وزعنا مناشير ضد مايو و اعتصمنا كذا مرة في مباني المدرسة فاخرجونا

بقوة البوليس و بونبانة.شاركنا في كل مظاهرة طالبت ابعاد الديكتاتورية

المايوية.كان في جوار المدرسة كشك عمنا موسى وكان هذا الكشك يقع خلف

منزل المعلم شورة و مكتب شعبة التربية الاسلامية.كانت لنا ايام


عائدون

تواصل رائع عبر الايميل الخاص من أحد نيازك الجديدة بعاصمة الضباب

Quote: تحياتي الي كل ال الخرطوم الجديدة , واتزكر منهم عماد عبدالله وشُلته , وهو أحد الطلاب الموهوبيين ومؤكد انه لازال بتلك القامة, كما اتزكر ياسر حسن, جمال شورة,خضر علي موسي,بابكر محمد بابكر,يحي,صلاح عوض,علاء علي,نزار بشير وهوالآن جراح مقيم ب انجلترا. تحياتي للجميع عماد الدين اسماعيل

معتصم عبدالرحيم

الأخ ياسر

عميق الشكر على ترحيبك بناوإنشاء اللة يعود ويدوم التواصل بيننا جميعا.
الجديدة ايضا تميزت فى الرياضة أيام الدورة المدرسية.ابراهيم محجوب (على ما أعتقد) فى كرة القدم وأسامة عبدالعزيز بر وعلى حمد فى كرة اليد ورينق فى الكرة الطائرة.

أيضا من دفعتنا خضر أول السودان فى المساق الأدبى وأعتقد انة عمل محاضرا بجامعة الجزيرة.ونصرالين بمطار الخرطوم وحامد بالهيئة القومية للكهرباء وياسر حسن عثمان قنصل السودان بالصين.

تحياتى الحارة للأخوان عادل جبارة وفيصل خليل وقرضابى (ياريت نعرف هو منو) ومعتصم عبد الرحيم وعماد الدين اسماعيل وحقو نكلم الباقيين.

الأخ ياسر: ياريت تفتح بوست تانى للعناوين

الاخ ياسر سلامات ...

البوست بتاعكم دا جاب لي حسام أخوي

وجيت أسلم عليه و عليكم ...وأذكر حسام بزميلي في كلية الهندسة
جامعة عين شمس أسامه محجوب ربنا يطراه بالخير أينما كان
و الذي تخرج من الخرطوم الجديده...

تحياتي لكم جميعا....

مهـــا بشير

شكرا للاخت مها بشير ،،،، على المرور الجميل ،،، والبوست دا حيجمع كل النوابغ وكل الاحباب

شكرا ليك كثير ،،، وداومي على المداخلات


ونواصل

اولاد الجديدة الاعزاء

سلاماً وشوقاً

من اولاد الجديدة امتحنت الشهادة 1986م ومن عسكريين الجديدة (نقيب شرطة معاش).

كذلك في الشرطة من الجديدة (كرودي/معاوية جعفر/انور محمد الحسن/علاءالدين محمد الحسن/مجاهد/

عوض كرنديس/ياسر عثمان/شنان/احمد حجر) في الجيش (عباس عبدالله/المقداد/المرحوم ازيرق)

بالمناسبة عمنا عبدالوهاب بتاع الفول توفي الى رحمة مولاه حسب ما علمت مؤخرا

بالمناسبة الفنان المبدع خالد الصحافة من اولاد الجديدة (دفعة)

برضو فارس الهلأل عادل العونى من اولأد الجديده (دفعة)

Quote: العزيز عادل جبارة والله ياخوي الكبر حصل لكن انتا مابتتنسي و أولى (ه) ما بتتنسي الابتسامة الدائمة الخضرة انشاالله تكون كما كانت لك الود

أخي وزميلي القرضابي
أوعك من سيرة الكُبُر دي نحنا لسه شباب !!!
التحايا النواضر لك ولجميع الزملاء خاصة الكيك
الذي تكرم علي بإتصال هاتفي منذ مدة وهذا البوست
يذكرني بتقصيري تجاهه والله ،
من دفعتنا كذلك اللاعب الفذ دفع الله ( جميل )
وألأخوان عبد المجيد أحمد عيسى ويحي حسن علي
ونزار بشير وحمدي داؤود وعبد الناصر كبيدة

Quote: نحنا أقدم .. ( أعني قردابي و الكيك و عصام ع حفيظ .. و أنا ) .. دفعتنا منها أيضا وجدي ميرغني و أسامة عبدالعزيز و حسن حسوبة و أسامة زكي , هشام عتيق , عبدالرحمن بربر , حسين مرسيدس , محمد خير طه , صبري , محمد داؤود , بابكر عباس دياب .. و كثيرين لا يتسع المقام و لا الذاكرة لاستحضارهم .. فلهم العتبى . ( يا عادل جبارة إنت لا دفعتنا لا حاجة .. جينا لقيناك مخلل ..

عماد عبد الله ( الفنان )
إنت بالجد كِبِرتَ ... !!! يا خي أنا كنت أصغر واحد في الفصل وكمان قاعد قدام !!...
بعدين إنت كنت بتعمل عمايل عجيبة جداً خاصة في حصة أبو الفصل ( حسن صالح ) ؟
يا خوانا عماد ده كان أكبر مشاغب في تاريخ الجديدة
وبجيكم راجع بقصص عماد ده ...

.

Quote: عماد عبد الله ( الفنان ) إنت بالجد كِبِرتَ ... !!! يا خي أنا كنت أصغر واحد في الفصل وكمان قاعد قدام !!... بعدين إنت كنت بتعمل عمايل عجيبة جداً خاصة في حصة أبو الفصل ( حسن صالح ) ؟ يا خوانا عماد ده كان أكبر مشاغب في تاريخ الجديدة وبجيكم راجع بقصص عماد ده ...

السترة مبارية الفضيحة يا عادل ..
إنت و يوسف كنتوا أحسن ناس في السودان .. الله يعلم
و بعدين ما تنسى .. أنا كم مرة دفعت ليك حق الفطور ياخ ..
فبحق لقمات الفول التي دغنتها و مكرت عن الدفع .. أستر يا زميل ..
الله يطراهو بالخير شيخ حسن صالح ..
و يغفر لينا عمايلنا ..

و لو عدت لسيرة الشغب ح تخليني أمرق كل بلاويك مع أستاذ بتنوني ..
و قد أعذر من أنذر ..

تحياتي يا زول يا جميل .. من زمن اجمل .


..

الزملاء الاعزاء كبارهم وصغارهم دفعتنا والقبلها والبعدها

مرحب بيكم جميعا وكلكم من هذه القلعة النيرة ،،، كلكم نوابغ ،،، الإبداع ديدنكم في كل المحافل

بس دايرين أخونا خالد الصحافة يخش بأي مقطع حنين ،،وياريت عماد عبدالله يكون معاه دويتو

شكرا لك أيها الجندي المسكون نبوغ (لكل من عمل بأي من الشرطة أو الجيش وكان من نوابغ هذه القلعة ) ،،، وشكرا لك عمر عثمان على هذا الاثراء ،، وفي الحقيقة دفعتي من الجديدة من الشرطة
أحمد حجر ،، خالد جعفر محمد عثمان ،،،، ربيع محمد سالم من اولاد السجانة ونتمنى لهم دوام التوفيق
وبحييهم جميعا وبحييك أخي عمر واتمنى مداومتك معانا والعناوين مهمة جدا للتواصل


شكرا لك أشرف الباقر وشكرا لك على المعلومة وتحياتنا من على البعد لكابتن السودان الذي لعب فأبدع عادل العوني .

شكرا لعادل جبارة ولازم قصصك وحكاويك عن المشاغب عماد عبدالله وسرد الذكريات الجميلة

ومن هنا نترحم على عمنا عبدالوهاب اللهم ارحمه رحمة واسعةوأحسن اليه يارب العالمين .



ونواصل ياحبايب

ماتتغشو عادل جبارة كان بيحلق دقنو من سنة أولى وقاعد قدام لسبب بسيط هو إنو مابيشوف.

العزيز حسام بشير ،،،، كيف أصبحت

والله انتوا اولاد دفعة واحدة بتعرفوا بعض شديد ،،،، لكن ما أظن يكون أكبر منكم
لانو الشنب والدقن ما مقياس لكبر بلحين ،،،كبر عادي ،،،، وشيل شيلتك مع عادل جبارة



ما تنقطع
ود الامير

Quote: ماتتغشو عادل جبارة كان بيحلق دقنو من سنة أولى وقاعد قدام لسبب بسيط هو إنو مابيشوف.

حسام محمد بشير
الله يجازي محنك ... إيه رأيك الدقن ذاتها أبت تقوم لغاية الآن !!!
وحكاية الدقن ذكرتني زميلنا عبد الله أبو ملك الأنسانية والأدب
الرفيع .. تأثر بفريق الكيزان ( مربع 16 ) وعمل كل ما في وسعه
لتربية الدقن حتى أفلح في سنة تانية!!
أيضا من زملائنا:
محمد خير ( كان صغير زي )
وعصام عبد الحفيظ ( ما تشوف الصلعة ) كان شعرو طويل وسبيبي حتى مدرس اللغة الفرنسية ( مسيو غُني ) عندما أراد أن يشرح لنا كلمة ( إلي جولي ) يعني ( جميل ) ما لاقى أي حاجة في الفصل سمحة غير شعر عصام ... راح مسك شعرو وقال ( إلي جولي ) ومن ديك سميناه عصام جولي .. وبرضو هو كان صغير وكان قاعد قدام ( زي )
وعصام غزالي وعبد المنعم حسن وديل مباريني من مدرسة حي عبد المنعم الأبتدائية
أما الجلاكيم هم : الطيب كوكو ويونس حسن وحمزة محمد سليمان وصاحبي وود حلتي
( الكيك )
بالمناسبة عرفت ( القرضابي ) والا أقول ليك ؟؟؟
قصص عماد عبد الله مع حسن صالح أنا منتظروا يحكيها بي نفسوا والا بجيبها براي !!

Quote: العزيز حسام بشير ،،،، كيف أصبحت والله انتوا اولاد دفعة واحدة بتعرفوا بعض شديد ،،،، لكن ما أظن يكون أكبر منكم لانو الشنب والدقن ما مقياس لكبر بلحين ،،،كبر عادي ،،،، وشيل شيلتك مع عادل جبارة

ياسر
كيف حالك .. حسام بشير ساهل بجيب لك خبرو تب ... بس عماد عبد الله
ما بقدر عليهوا .. من زمان بخاف منوا

الاخ ياسر ابو جكة
تحايا لكل ابناء مدرسة الخرطوم الجديدة
اشرف الباقر ده دفعتى وكذلك عادل العونى
وكثيرون ساعود لذكرهم فى متسع

وهؤلاء كانوا هم معلمونا الكرام على حسب
قائمة الاخ ديامى ولم يتغير منهم سوى دكتور
عبد الرحمن

Quote: ]درسنا فطاحل نكن لهم كل الاحترام والتجلة اللغة العربية : الأستاذ أمين نوري التربية الإسلامية : أستاذ الرشيد اللغة الإنجليزية : الأستاذ أبو البشر وأستاذ كامل الكيمياء : الأستاذ عبد الرحيم عمسيب الفيزياء : الأستاذ رفيق والأستاذ الشايب ( مصريان ) الرياضيات : أستاذ شاهين وأستاذ صديق اللغة الفرنسية : أستاذ رزق وأستاذ أحمد محمود التاريخ : الدكتور عبد الرحمن الأحياء : أستاذ أحمد

ولا انسى استاذ العربى الذى كان الطلاب يسمونه ( معللتى )
نسبة للقصيدة العربية وكذلك وكيل المدرسة محمود الملاح
وكان ابنه صفوان يدرس معنا بنفس الفصل وكذلك المهندس
حاتم عبد الحميد مدنى ابن الناظر الجليل وناظم محمد سعيد القدال
اولى ابوبكر ثانية العباسى وعصام عبد الرحيم ووووو كثيرون
ساعود لهم مستقبلا
شكرا يابو جكة قومت نفسنا
بالمناسبة استاذ كامل الذى كنا نلقبه ( كامل كوركودايل )
موجود بالدوحة

Quote: قصص عماد عبد الله

مره أستاذ نورالدين قال في خطأ مطبعي في الكتاب مكتوب جزر الرأس الأبيض
قال لينا بالله عدلوهاأعملوها الرأس الأخضر...
عماد عبدالله بروح الرسام قال ليهو امكن لونوها يا أستاذ...

الأخ حسام...
كنتا ساكن قريب من الحديقة ناحية كمال يني مقار
وكنتا طويييل كده ووجيه وعندك شنطة سمسونايت وبتلبس شرابات بيض وأبوك سفير في الخارجية
صاح؟؟؟؟؟؟

Quote: السترة مبارية الفضيحة يا عادل .. إنت و يوسف كنتوا أحسن ناس في السودان .. الله يعلم و بعدين ما تنسى .. أنا كم مرة دفعت ليك حق الفطور ياخ .. فبحق لقمات الفول التي دغنتها و مكرت عن الدفع .. أستر يا زميل .. الله يطراهو بالخير شيخ حسن صالح .. و يغفر لينا عمايلنا .. و لو عدت لسيرة الشغب ح تخليني أمرق كل بلاويك مع أستاذ بتنوني .. و قد أعذر من أنذر .. تحياتي يا زول يا جميل .. من زمن اجمل .

حسام بشير ود السفير
أها شفت عماد ؟؟ ما قلت ليكم بخاف منو ؟؟
عمدة يا فنان إنت البشبهك منو .. هادي ورزين من يومك
سلام يأبو الصحب ...

أصدقاء من الزمن الجميل:

أولاد سيد أحمد الشيخ ( عبدالعظيم وتاج السر)من كبار رجال الأعمال
أولاد داؤد حسن قرناص ( محمد الأزهري و حمدي)محمد مهندس طيران في أبوظبي وحمدي مقيم بهولندا
نزار بشير الحسن ( جراح قلب في بريطانيا)
سيف الدين عبدالله مقيم في أمريكا
فتح الله حسين حمد مقيم في كندا
الياس عبدالغني بالسودان
عثمان زين العابدين( هبار) رجل أعمال
حسين عثمان الحسن( مرسيدس) السعودية
نصرالدين الجزولي عباس ( مخلص بمطار الخرطوم)
جلال عوض بالسعودية
عادل حمد (صيدلاني السعودية)
الخزين علي الخزين ( وزارة التربية بالامارات)
مأمون علي سعيد السعودية
عماد محمد علي(الهدندوي) مهندس طيران في أبوظبي
عبداللطيف علي البشري مقيم ببريطانيا


ولي عودة لأواصل

الزملاء المتداخلين ،،،اولاد الدفعة ،،،،، طاب مساؤكم


الأخ / عادل جبارة

والله ماشاءالله دفعتكم ديل الظاهر كانوا مفتحين قبل مايجوا الجديدة ،،، راس هوس كلهم ،،، بس كانوا نوابغ في العلم ما بصاقعوا (ماشاء الله عليهم )

قلت لي عماد كان مجنن الاساتذه ،،، والله كان في واحد بشبه شبه في دفعتنا (كان دي صورتوا الفي بوست دا ) اسمه محمد عبدالله من اولاد العمارات او الرياض ،،لكن كان فقري جدا جدا ( معذب الاساتذة والطلبة ) ياخ دا تحلف تقول مربى في عشش فلاته ،،،صعب شديد ،،،خش الجيش حيكون جنن الناس جن ،،، بس بلاوذ من فريق كرة القدم كنا عتاولة شوية ( عضلات تبش) ...

الاخ / تيتاوي
وين ياخ البوست في انتظار ذاكرتك النيرة ،،، ودايرين نشوف دفعتكم كانوا كيف ،،،العلم دا خلي على جنب الجديدة (نوابغ ) دايرين باقي الطباع والتميز في المناشط وداخل الحوش ،،، ما تتأخر علينا .

القرضابي ،،، كيف حالك


والله دفعتكم لذيذة ،،، ياريتني لو كنت معاكم ،،، بس ما تشيلوا حالي تسلبطوا فيني تقولوا امكن تكون معانا

حسام بشير ( شنطة سمسنايت ،،، شرابات بيض ،،،ابوه سفير ) دي لكن ما علامات التفوق ياقرضابي الله يديكم العافية ،،،والله دفعتكم نيرة وعالم جمعت كلوا نبوغ وفكر والآن وظائف مرموقة ،،،التحية لكم جميعا.

نواصل

Quote: نحن أول دفعة كانت عام 1966 وتخرجنا عام 1970 م ، كنا ثلاث فصول أ وب وج ،، كانت تسمى هذه المدرسة بالمدرسة الفرنسية ، كان ناظر المدرسة المرحوم محجوب شورة ، ونائبه الاستاذ نور الدين ، كان أساتذة اللغة الانجليزية هم ( علي حسن كوكو ،، وميرغني الشهير بأبي كموزة ،، ومهدي أبودقن ،،،ويوسف عمر ،،،ثم مستر اسميث ) ، أستاذ الرياضيات كان مصري اسمه محمد العربي النجار ، مادة اللغة العربية كان يدرسها استاذ عبدالحميد ، والدين استاذ الرشيد ،، والفنون يدرسها استاذ محمد عثمان ،،،وكثيرون آخرون ،، وقد كتبت عن المرحوم محجوب شورة مقالا في سودانايل .... من زملاء أول دفعة : المرحوم الدكتور علي فضل ،،، المرحوم الضابط عصام ميرغني ،، والضابط حيدر عوض محجوب ،،، وهاشم العطا ( تشابه أسماء فقط ) والضابط عبدالمنعم المكي ،، والضابط المهندس الصادق اسحق ،،، ويوسف ادريس ( معندس معماري بالعين ) ،،، وعبدالمحمود عبدالحليم ( سفير مشهور ) ،،، وود خليل ( المترجم الخطير بقاعة الصداقة ) ،،، وعبدالسلام بابكر ( أشطر طالب بالدفعة ) وهو الآن طبيب بالسعودية ،،،، والماحي بلال ( بروفيسر بكلية الطب البيطري ) ،،، وسالم أحمد سالم ( صحفي كبير في باريس ) ،،،، وفتحي هارون ( خطاط موهوب بالعين ) ،،، ومحمود عبده محمود ( الضابط المثقف ودودة الكتب ) ،،،، واسماعيل البيلي الضابط ،،، وداؤود الضابط الكبير ،،، ومحمد عبدالعزيز ( بيطري من رجالات البنوك الآن ) ،،،، ومحمد كبش الذي كان كابتنا رياضيا بالجامعة ،،،، وعبدالله سيد أحمد ،،، وحامد عبدالكريم ،،، وصلاح ،،، وكثيرون جدا ،،،،أغلبهم أطباء واستشاريون بالمملكة العربية السعودية ،،، وكثيرون غيرهم يحتلون وظائف تدريسية كجاري في الفصل عبدالله عبدالمطلب ( الذي يجيد اللغة الانجليزية ) ،،،، ولدينا مزيد بدر الدين حامد الهاشمي ،،،[email protected] شكرا كثيرا وجزيلا ، على المرور الجميل ونتمنى مداخلاتك مرارا وتكرارا ،،، وشكرا على المعلومات النيرة وجزالك الله خير الجزاء فدفعتكم فعلا هي الشموخ لهذه القلعة النيرة والتي استضاء بها العلم في السودان ،،،ولك ولدفعتك ولأ اساتذتها الاجلاء التي أنارت هذا الطريق ورفعت اسم الخرطوم الجديدة عاليا خفاقا يرفرف في سماءآت العلم ،،،لكم منا كدفع من بعدكم كل التقدير والإجلال ،،، وأنت بيننا الزميل والاخ والمربي وقائد هذا البوست ،،، فمرحبا بك أيها الشامخ ( بدر الدين الهاشمي ) ونحن في انتظار كل ذكريات البدايات لهذه القلعة شكرا للزملاء بخاري الامين ،،، معتصم عبدالرحيم ( العربي ) ،،، أبوبكر أحمد ،،،، وسنبحث معكم عن كل الرايحين عن هذا البوست فقط كونوا معنا ،،، وسنواصل

Dear Yassir Aby Jakka,,,,
The man who mentioned above Yousif Idries (Architect
he is my father and he is a member is this discussion board also he can write more about al khartoum al gadeeda ....
brb

العزيز / ساري الليل ،،،، تحية كبيرة ليك
ونتوقع من والدك المهندس أن يتحفنا بفنونه ،، خاصة وأنه يعتبر من جيل العباقرة وأول دفعة ،،، ومن حسن الصدف فهو عضو معانا وله أن يكتب
كل ما هو جميل من ذكريات ،،، شكرا ساري الليل ،،،،، لم تسري في هذا الليل إلا وقد حملت معك نسمة سنلاطفها حتى بزوغ الفجر ( والدك الله يديه الصحة والعافية ) ونستقي منه كل ما هو رائع وجميل ،،،وكلنا في انتظار أن يدهشنا بالمعلومات خاصة وأنه شاهد عصر النبوغ وحاضر بفنه وذهنة .


أيها الزملاء :
هؤلا بعض من الزملاء مثلنا الخرطوم الجديدة في الدورة المدرسية في السنوات (83-85 ) وهم ( نصر الدين ابره سالم غبوش ،، والآن على قمة بنك الغرب الاسلامي ،،، تخرج في كلية الاقتصاد جامعة الخرطوم ،، لعب لنادي الموردة ،،، نصر الدين لاعب النيل العاصمي من الصحافة ربما يكون التحق باحدى كليات الهندسة لانه امتحن تخصص ،،، عصمت الامتداد لاعب الموردة الذي هز أركان هلال مريخ في اواخر الثمانينات فتلاعب كيفما يشاء بنجوم الفرقتين وبباقي الاندية ،،، والتحق بفريق هلال بورتسودان ومن ثم حي العرب ثم ما أن لبث قليلا وهاجر للمللكة العربية السعودية واستقر بالمدينة المنورة
عماد غزال النحيف الخفيف الجناح الطاير ،،، من ابناء الامتداد ،،، اسامة جعفر أبوالروس القاطرة البشرية ورأس الحربة قاهر الخصوم ،،،تعرفه الصحافة وملاعبها لعب لاندية حلفا الجديدة ،،، حمدالنيل ابراهيم بلال لاعب فريق صقورالجديان وهدافه البارع ،،(ضابط شرطة الآن ) ،،،
عادل من ديم الحجر لاعب وسط فنان لعب لاندية الاقاليم ايضا ،،،، عماد الزومة لاعب الهلال السابق ،،، ياسر الرميلة (لاعب وسط مهاجم ) صاحب قدم صاروخية يجيد الاختراق سريع وقوي كثيرا ما يهدد مرمى الخصوم ،،، عبدالرحمن جكسا درس في تركيا من ابناء الصحافة شقيقه الاكبر جكسا وكثيرون لم تسعفني الذاكرة ربنا يجمعنا بهم ،،، زلزلنا فرق الثانويات خاصة التدريب المهني الذي كان يضم فرقتي هلاريخ موردة ،،، وتعادلنا معه لنخرجه من دائرة التنافس .

ولنا عودة

رسلت email لنزار بشير يمر على البوست.

لكن خلونانتفق:

1- أولاد الجديدة كانوا والى الأن أشطر ناس.

2-كلهم شينين ومغبشين وماتغشكم البدل والكرفتات بتاعة الأيام دى. وكمان جنس قجج.

3-كنا لما نجى دافرين من محطة القرشى للمدرسة كلاب الشارع بتزوغ من القباحة.

4-مافييهم واحد حضر سبعة حصص.

5-السندوتشات دى ماسمعوا بيها الا الأيام دى.

6-الأردية الرمادية (الشورتات: توضيح للدفع الجديدة) كأنها من مخلفات الجيش الإنجليزى.

ولا شنوا ياعادل يإبنى.

]قرضابى منو فى الناس ياخى

Quote: رسلت email لنزار بشير يمر على البوست.

الله علي الزول ده ياخ
ملاك في شكل انسان

سلم لي عليهو
وبلغو اشتياقي الزايد
وحبي لهو
سلم لي عليهو

شكرا للزملاء ،،،،أبناء الدفعة ،،،، حسام بشير ،،، قرضابي

منتظرين تيتاوي ،،،، وعادل العوني وأشرف الباقر والشباب ،،،، حامد قرافي ،،،، عثمان من نفس الدفعة امتحن تخصص
ودخل الهندسة درسنا كورس في جامعة الخرطوم قبل امتحان الشهادة توثقت المعرفة ،،،، نابغة بحق وحقيقة
عبدالله عبدالقادر شعرون هندسة الخرطوم ،،،، وشباب الامتداد الكتار في دفعتنا (83-85) وين النوابغ ياناس ،،،الايميل موجود بالبوست

اتحفنا ياعمر عثمان ،،، شا يفك في الفرع درست حقوق ،،، وأدي خبر لجنود الوطن ،،ونوابغ الجديدة


ونواصل

ابو جكة كيفنك
تعرف انا اكتر حاجة كانت محيراني الازيار البي مواسير ديك

العزيز طارق جبريل ،،،، وين انت ،،،أظهر ونكت لينا اولاد الامتداد الكتار الكانو معانا ،،،،

عارف والله المواسير دي أنا زاتي محيراني فكرتها عجيبة ،،، يكون عملها واحد من دفعة ناس قرضابي ،،،ديل كانو شفوت
يا أخ ديل كانو بعملوا العجب ،،، وأسألوا عادل جبارة ،،،دا بحكي لي حكاوي تجنن ..بس أسمعوا على لسانه بيجيكم طالي انتظروه


من هذا المنبر نترحم على زميلنا اللاعب الكبير والخلوق وابن الدفعة ( صديق يعقوب ) لاعب الأهلي العاصمي وهلال بورتسودان
الهداف الخطير وصاحب الرأس الذهبية ،،، عليه الرحمة وكان لاعب طائرة في المدرسة ايضا .

تعرف ياياسر مرة الناظر محمد عبدالرحيم فصلنا من المدرسة شهر ومارجعنا إلا بعد واسطة من الوكيل عربى لأنو نصرالدين الجزولى وعبدالرحمن بربر ومعاهم كورال لحنو وغنو (سلوى ياسلوى مالك بتبكى)

أشرف الباقر سلام ، طالما عادل العوني دفعتك فهو دفعتي

وأزيدك :

مأمون محجوب البدوي

عماد خضر علي

طارق محمد النور

السلام عليكم
التحية لمدرسة وجنود مدرسة الخرطوم الجديدة قديما وحديثا
اخوكم احمد محمد الحسن احمد حميدة (فويل)كما يعرفني ابناء الجديدة, من الدفعة المتخرجة سنة 1986 وأذكر من الدفعة
عبد الرحمن المهدي اعتقد طبيب الان
ابراهيم تاج الدين مقدم جيش
مكي بلال عبدالسلام سوداتل
عماد حسن عبدالرحمن مسند محامي
عمر سيداحمد عبدالرحيم محامي
المعزلدين الله عبدالغني احمد سعد طبيب
فاخر..... طبيب
محمد عوض عبدالرحمن فضل محاسب بالسعودية
بهاء الدين سلطان مهندس بترول
عباس عبدالله مقدم جيش
تاج الدين ابراهيم طبيب
احمد يسن احمد ملاح تاجر
محمد عبدالله ادم محاسب
عصام ابو عاقلة مهندس
عصمت محمود استاذ محاضر بالجامعة
محمد نصر تاجر
علاءالدين ابو عاقلة موظف
في هذه الفترة كان المدير عبدالحميد مدني رحمة الله عليه والوكيل كان استاذ شاهين التاريخ استاذ البلك الجغرافيا استاذ مصطفي رحمة الله عليه الفرنسي ختم المبدع الانجليزي عباس نور الدايم وعباس ركس العربي امين نوري الرياضيات هاشم التربية الاسلامية استاذعبدالله الاحياء عمر عبيد وسيف الدولة الكيمياء احمد عبدالله الفيزياء ...الذاكرة خربت .
ولمن اتذكر تاني بجي راجع
عوافي
يارب تغرس الود في نفوسنا

الأخ ياسر أبوجكة
المرحله الثانويه من أجمل المراحل وهى عامره
بالذكريات والمقالب والطرائف والتمرد
أنا درست بالخرطوم القديمة ما تقول لى دفعة كم
شايفكم ذكرتم الكوره ولاعبين خرجتهم الخرطوم الجديدة
الجديدة فازت بكأس بطوله كره القدم لأول دوره مدرسيه
و نال لاعبها الحريف هاشم عزالدين الصادق جائزة أحسن لاعب
وعظمه الإنجاز أن فرق المدارس المنافسه كانت تضم لاعبين مشهورين
مثل مصطفى النقر بمدرسه المؤتمر بأم درمان،
وحمورى الصغير (المريخ) وعبدالمنعم الصياد (الموردة) ومتوكل (الهلال)
وآخرين ضمهم فريق مدرسه بيت الأمانه بام درمان
هاشم عزالدين لعب بفريق الزومة ثم الأهلى الخرطومى

مع تحياتى لكل الدفع من الزمن الجميل

نادر الفضلى

ديامى
ازيك يا دفعة والله الاحباب الذكرتهم فى شوق اليهم ولجميع الدفعة المميزة
اها قول تلأتة انا وانت و الصحفى المتميز تيتاوى وانشاء الله يكتمل بقية العقد الفريد

بالمناسبة انا برضو اساسا ديامى مولود فى الديم ومعظم فترة دراستى فى الجديدة كنت مستقر فى بيت جدنا فى الديم ولعبت فى فريق الشعلة

ياسلام عليكم ياخي انتو ماهيجتو ذكرياتنا بس
انتو رجعتونا لي زمن جميل لا يكاد يوصف
يا اميركمان انت طلعت دفعه من زمن الصحافه غرب أبدا ليك منها وأجيك جاي
أستاذ كمال استاذ صديق أستاذ مصطفى الطويل الناظر كداره استاذ حسن علي الطاهر استاذ مزمل
وزملائنا وقتها (والذين تزاملنا معهم كذلك فيما بعد بالخرطوم الجديده) عوض محمد علي النور وليد ابوعاقله و أسامه الأمين و أحمد حجر علي ادريس علي القوني ياسر حمد مدني , صديق محمد علي وصلاح علي عبد الرحيم عوض كرنديس طارق الأنصاري شهاب مسيك وووو وناس بدوي وخالد الكوز وخالد ذالنون وذو النون و ياسر أبراهيم البشاري ومحمد عبدالله يوسف ومحمد عبدالله بركات وسعيد مصطفى سعيد والصادق محمد علي واخوه؟
وفي الجديده طبعا ( الذاكره أصبحت خربه) كنا في اولى علي وثانيه ماعارف شنو كده اما تالته بتذكر كان ابونا استاذ سيف
وطبعا مسابقات المدارس ديك خليها ساكت المبدع طارق الأمين (المجد دوما لبلادي) ومعه المبدعين عبدالله يوسف ومحمد عبد الله من الإمتداد على ما اذكر
أما معنا في فريق الجديده عصمت الأمتداد ونصر الدين إبره ونصر الدين حميده برضو الإمتداد يوم أن تعادلنا مع المقرن بدون أهداف بإستاد الخرطوم وكان المقرن وقتها يلعب معهم دحدوح غداة تسجيله للمريخ
وأما الأساتذة الأجلاء المرحوم بإذن الله عبد الحميد مدني والبلك وامين نوري واستاذ رزق وأستاذ ختم (فرنسي) والمرحوم بإذن الله مصطفى رقه وأستاذ الرشيد ( وإستقبله الحائط وشج رأسه )
ياخي الواحد عايز ليه هزه عنيفه عشان يصحى من الذكريات الجميله دي
وكمان خليني اجيك بعدين راجع لي زكريات المظاهرات ده يوم خليه ساكت
أبقوا على حبل الود موصولا
كمال حسن علي
الصحافه

الفاضل كمال حسن
يا زول كلامك دة انت دفعتي عدييييييييييييييييييييييل

العزيز ياسر
من اولاد دفعتنا ايضا نادر حامد فردة على العونى لعب معه فى الزومة
ومن ثم المريخ

الاخ ديامى

طالما انت دفعة اشرف الباقر فانت ايضا دفعتى اناكنت فى اولى ابوبكر
تحت بيت الناظر المرحوم عبد الحميد مدنى وتانية العباسى وتالتة الفارابى
وقد وقعت حادثة طريفة عندما انتقلنا من تانية لتالتة حيث كانت هناك خمسة
فصول ابن سيناء رياضيات تخصص وابن رشد رياضيات احياء والادبى فى الفاربى
والطبرى وابن خلدون اعتقد وكان التقسيم للعلمى والادبى والتخصص لا يتم
بالرغبات وانما بالنتيجة فى نهاية العام المهم انا كنت واحد ممن تم استيعابهم
فى تالتة ابن رشد علمى احياء مع اننى كنت ادبى راسى عديل كده وفى اول يوم
من الدراسة دخل الى الفصل الاستاذ عبد الرحيم عمسيب احياء وقال يعنى هسه
كلكم دايرين تخشوا الطب بصراحة تسعة بس بخشوا والباقى اخير يشوفو المكان
المناسب بعد داك عينك ماتشوف الا النور هجرة تقيلة للفارابى
وقد كانت نصيحة استاذ عمسيب فى محلها فقد اقتنع الكثيرون بما قاله وحققوا
نجاحا كبيرا ودخلوا جامعة الخرطوم كلية الاقتصاد واذكر منهم خالد محمد نور
واحمد عبد الكريم حنتوش من نمرة 2 والطيب هارون من الصحافة كلية القانون
وغيرهم

الاعزاء الزملاء ........... حبابكم عشرة


العزيز حسام بشير ،،،
فصلوكم شهر كامل ،،، ودبرتوا نفسكم كيف في الشهر دا ،،، بتقولوا لاهلكم شنو
والله دفعتكم دي حيرتنا عدييل ،، السبب ( سلوى ) لو فتشو سلوى وجابوها ما كان بتحلكم ،،، والله اتمنيت اكون معاكم ( كان ليهسة بضحك)... واصلوا

الزميل المخضرم ،،، ديامي
ياديامي دايرين اسهاماتك ،،، طوالي مشغول ،،، بس تطل وتقول دفعة عادل العوني ،،، الكلام دا ماحلوا
دايرين نوثق ونحكي قصة الازمان الحلوة ،، في انتظارك حرك الذاكرة شوية.

الزميل ود الدفعة
قووت اقوود( احمد محمد الحسن حميدة ( فويل ) نتمنى منك مداخلة تانية وقوية ذي سابقتها ما تخذلنا في انتظارك.شكرا على مرورك النير .

الاخ / نادر الفضلي
شكرا على المرور الجميل وشكرا على ذاكرتك الحلوة الظاهر انت كنت رياضي مطبوع في الزمن الجميل
زمن ( النقر جا ) ،،،الصياد ،،، ومن هنا نحي مدرسة الخرطوم القديمة ايضا هي من القلاع العلمية التي توشح بها صدر السودان في سنين عديدة ،،، شكرا على مرورك وفي انتظار مداخلاتك الثرة.

كمال حسن علي
نحن أولاد دفعة ذي ما قال طارق جبريل ،، وفعلا هؤلاء الشباب النيرين الذكرتهم كانوا معنا والتحية لهم ،، وكثيرا ما كانت تجمعني الاختبارات مع ياسر حمد مدني له التحية اينما كان ،، ولذاكرتك الحلوة التحية ايضا ،، وداوم معنا وفعلا مباراتنا مع مدرسة المقرن كانت على صفيح ساخن وقفلنا كل المنافذ على دحدوح ،،شكرا كيمو

الحبيب طارق جبريل ،،، يا أخوى فتحنا البوست ونحن متفقين نجر كل الزملاء والاخوان ،،، وانت كل ماتلقى زول جاب سيرة زمنا تقول والله دا دفعتي عدييييييييل وتنوم في الخط ،، ما كان اتفاقنا أصحى يابريش ( شايف بريش الليلة في التلفزيون في احتفال في عالم الرياضة (ياحليلوا لو قال ليه اجري في حوش بيتهم ما بقدر ) زمن ولى ما برجع ،،،بريش كان لمن تلعب الموردة المدافعين خصومه الواحد من البيت بجي شايل هم بريش ) ولا ما كدا يا تيتاوي

العزيز عامر تيتاوي
نادر الزومة كان لاعب حريف جدا ،، مثل مع العوني ثنائيات جميلة في الزومة ،،،لكن لو داير تستمتع بلعبه تعال الدورات في العشرة والصحافات والحلة الجديدة معاه اخوه القصير بعملوا البدع
شكرا عامر ومنتظرين الكثير ..

ونواصل

Sent : Friday, August 31, 2007 6:38 AM
To : [email protected]
CC : [email protected]
Subject : الخرطوم الجديدة

| | | Inbox


سلام عليكم يا أستاذ ياسر أبو جكة:

و شكرا للتوثيق لمدرسة الخرطوم الجديدة (الفرنسية سابقا)

مواصلة لما ذكرت في الرسالة السابقة عن المدرسة (الجامعة) التي تشرفنا بالدراسة و التخرج فيها (1966 - 1970) أود ذكر التالي:

1. تلقي والدي سائق القطار في يونية 1966 خطابا من وزارة التربية و التعليم تفيد بقبولي في مدرسة الخرطوم الثانوية الجديدة (الفرنسية سابقا) و كان هذا هو أسمها عند إنشائها. أطلعي الوالد علي الخطاب في مكان العمل (ورشة القطارا) إذ كنت أعمل في فترة الإجازة في السكة حديد (في وظيفة مساح، يقوم بنتظيف الوابور و تجهيزه للسفر، و كان راتبنا هو 10 جنيهات و 25 قرشا كاملة!!). صدمت بشدة لذلك الخبر إذ كنت أحلم بحنتوب و خور طقت و بورتسودان (أو علي الأقل الخرطوم الثانوية (قرب الجامعة)! و لكني قبلت علي مضض خاصة و إنها قريبة من مسكنا الكأئن بحي السكة حديد. و أنا الآن أنظر خلفي في سعادة لتلك الصدفة التي جعلتني أتخرج من أعظم مدرسة ثانوية في نظري، إذ كانت المدرسة نموذجية بالفعل. بها 3 فصول فقط بنيت علي نمط فرنسي بديع و في كل فصل 40 طالبا فقط. كل المقاعد و الكنب و كل شئ جديد ( من الورقة أو المصنع). بعد أسبوع من بدء الدراسة أتي لوري ضخم محمل بهدية من المجلس البريطاني به أعداد هائلة من كتب الأدب الإنجليزي المبسطة و الكاملة. ثم أتي لوري لا أدري من أين يحمل أعدادا كبيرة من كتب الأدب العربي، و كانت لنا نعم الزاد لأربع سنوات قادمات.كنا ندرس الإنجليزية عن الطريق المعتاد و هنالك حصص أخري عن طريق التلفزيون كان يقدمها أستاذ إنجليزي (لعله من المعهد الفني)، و كان ذلك في 1966 عملا رائدا (علي سبيل التجربة)

2. نسيت أن أذكر في المرة السابقة من الذين درسوا في أول دفعة عبد العليم الطاهر (و كان من الإخوان المسلمين) و لعله شغل عدة مناصب سياسية و تنفيذية في السنوات الماضية. و رأيته مرة يقدم برنامج إرشادي في التلفزيون بعنوان صورة مقلوبة (علي ما أعتقد). من الطلاب أيضا (من أبناء إشلاق البوليس بالسجانة): مامون (محامي الآن و كان إشتركيا) و المرحوم عوض صديق (دكتور بيطري و من الإسلاميين) و فاروق الموظف بالخدمةالعامة و غيرهم

2. كانت المدرسة خلية نحل في مجالات الندوات الثقافية و العلمية و كانت قبلة للسياسيين من كل الأطياف، فرأينا فيها الأستاذ علي عثمان (نائب الرئيس حاليا) و كان حينها طالبا في كلية القانون يقف تحت شجرة نيم ظليلة شمال المدرسة و يتحلق حوله الطلاب و هو يدعوهم لفكره و يوزع كتيبات حسن البنا. و كان للشيوعيين أيضا نشاط كبير (مع أستاذ علم الدين المدرس بالإتحاد الوسطي و مع الأستاذ محمود بابكر جعفر الذي كان يسكن بالقرب من المدرسة). خرج الديمقراطيون من طلاب الجديدة في مظاهرة عام 1968 ضد حادث "رقصة العجكو" في قاعة الإمتحانات بجامعة الخرطوم و من ضمن شعاراتهم "تراثنا تراثنا يحيا تراثنا). و كان للجبهة الديمقراطية و الأخوان جرائد حائطية كان المرحوم شورة في غاية التسامح معها. و كنت - علي المستوي الشخصي- أصدر جريدة حائطية باللغة العربية أسميتها اليقظة و أخري بالإنجليزية أسميتها (The Revival) .

3. قدم المرحوم محمود محمد طه محاضرة عامة في المدرسة في مساء يوم من أيام في عام 1968 أو 1967 في الفسحة التي تقع جنوب بيت الناظر شورة أمها كل الطلاب و كذلك سكان الخرطوم 3 و غيرهم. كذلك دعونا الفنان الكابلي لتقديم محاضرة عن الفن الشعبي في عام 1968 و أذهلنا الرجل بمحاضرة دسمة و أستشهد فيها بأبيات من الشعر العربي و الغربي (بلغته الأصلية) و طلبنا منه غناء "لو تصدق" و كانت أغنية الموسم حينها...,ودعناه في مظاهرة صامتة لعربته الفلوكسواجن الصفراء الصغيرة اللامعة. كذلك أقام فرقة الديوم الشرقية عام 1967 - متبرعين- حفلة ساهرة أمها الكثيرون.

4. دبر لنا أستاذ الرياضيات المصري محمد العربي النجار و أستاذ التربية البدنية (نسيت أسمه) زيارة إلي مصر عن طريق القطار و الباخرة و ذلك في مايو 1969 (شاركنا فيها إبنين من أبناء الأستاذ المربي طلسم هما نادر و آخر نسيت أسمه ، وإبن لناظر حنتوب محمد عبد الباقي). كانت المرة الأولي التي نسافر فيها خارج السودان، و طلب من كل طالب دفع مبلغ 20 جنيه لكامل التكاليف. (حمل كل طالب معاجين الأسنان و أمواس ناست و شاي لبتون و أقلام تروبن لبيعها في مصر لزيادة المصروف..إذ كانت مصر تعيش عصر الإنغلاق الإقتصادي وقتها). كانت رحلة ممتعة شارك فيها مع 20 آخرين صاحب الصوت الصاخب الكردي (صار ضابطا كبيرا بعد سنوات) و صديقنا الصدوق يوسف إدريس المعماري بالعين و الماحي بلال (الاستاذ بجامعة الخرطوم) و آخرون. و بدأنا الزيارة بالسد العالي في أسوان ثم ذهبنا إلي القاهرة بالقطار المجري (و كانت نقلة حضارية كبيرة) و أستضافتنا أمانة الشباب بالإتحاد الإشتراكي و أسكننونا في "الجزيرة" قرب البرج و النادي الأهلي . زرنا د/ مفيد شهاب (و كان وقتها أمين الشباب) في مكتبه الضخم و تصورنا معه. ثم ذهبنا إلي الوادي الجديد ثم الإسكندرية و التي علمنا أثناء زيارتنا لمصنع محرم بيك فيها بقيام إنقلاب مايو. من أهم ما أذكره في تلك الرحلو هو أنها صادفت إخراج دار الهلال لكتاب الطيب صالح (موسم الهجرة)، و كنا نقرأه و نعلق - كمراهقين- علي سفاهة بعض أبطاله!

هناك مزيد من حكاوي الخرطوم الجديدة أتركه لوقت آخر

بدر الدين حامد الهاشمي (خريج أول دفعة . مارس 1970)





وصلتني الرسالة اعلاه
شكرا للزميل بدرالدين ومزيدا من المعلومات

الأخ ياسر

تحياتى وودى

لنذكر اهل النبوغ المبكر بيننا:

1-علاء الدين على. برز تميزة من السنة الأولى وتوقعنا إسمة بين الأوائل فى الشهادة فقد كان مجدا دون توقف.طبيب استشارى.
2-عبدالنصر يعقوب كبيدة. كان جادا فى حياتة.حاذقا فى دروسة وذا تصميم عالى. ساخرا فى هدوء.طبيب استشارى.
3-على الكوبانى.واثقا من قدراتة فجمع بين الهرج والتفوق.طبيب استشارى لو قمت بزيارتة فى مكتبة لما سمعت شعرة.
4-نزار بشير.عالى الذكاء.رقيق التعامل.دائم الأبتسام. ولة أخت فى نفس تفوقة.طبيب استشارى.
5-خضر. كان واضح الرؤية منذ السنة الأولى فإتجة الى القسم الأدبى ونحت إسمة فى لوحة شرف أوائل السودان.أستاذ جامعى.
6-حامد وعبدالطيف. جيران فى تالتة إبن سينا. رياضيات فى رياضيات. وكان الجميع متاكدا من دخولهم هندسة الخرطوم ففعلوا.
7-صلاح عوض. عالم ودبلوماسى.والصديق الصدوق. أيضا هندسة الخرطوم.نسأل اللة لة السلامة والصحة والنجاح أينما كان.

وليذكرنا الأعزاء عماد عبداللة وعادل جبارة وقرضابى السرى ببقية هؤلاء النوابغ فقد كانت أياما ولود.

طارق جبريل ياخي كيف غايتو انا متذكرك والإسم راكز لي في راسي تماما عموما طول المده بيخلي الذكريات تصعب شويه
طبعا يا ياسر ياسر حمد مدني ده أولا جاري و رفيق دراستي المدرسية في كل مراحلها أولا الحزام شمال الإبتدائية ثم الصحافة غرب المتوسطة (وقتها) القدس حاليا ثم الخرطوم الجديدة الثانوية إفترقنا في الجامعة هو ذهب للمغرب وانا للهند
وياياسر طبعا دليل الذاكره بقت خربه دي انا حقيقي مامتذكر انك كنت بتلعب ياتو خانه لكن أنا كنت الحارس في المباراة الشهيره بتاعتنا ضد المقرن وهي من اجمل المباريات التي لعبتها في حياتي وتظل عالقه بتفاصيل دقيقه خاصة وأنا وقتها لم أكن قد إنتقلت للدرجة الثالثة (الخرطوم تلاته) بعد وكنت لا أزال ألعب بفريق المشترى برابطة الصحافه
كنا ونحن نتأهب للصعود إلى الحافلة التي أقلتنا فيما بعد لإستاد الخرطوم من داخل مباني المدرسة وهناك حشد من طلاب القسم المسائي يلوحون لنا بالهزيمة النكراء وان دحدوح سيحرز أربعة أهداف لوحده
كنت معنيا بالأمر أكثر من الجميع، وكانت تهكماتهم (يلحقني طرفها) خاصة وانا حينها كنت نحيلا بدرجة مفرطه (الله يسامح الكرش والصلعه الحاليتين) وكان فريقنا (الخرطوم الجديده) بكامله لم يكن بيننا من يلعب درجه سواء نصر الدين إبره (البرنس إن لم تخني الذاكرة) ونصر الدين حميده وعصمت( الإمتداد) أي أن ثلاثتهم كانوا (ليق) أما المقرن فكان جلها درجة أولى وقلة منهم كانوا بالليق
قلت انني كنت معنيا أكثر من الباقين طبعا ناس الدفاع كذلك لكن هزيمة كما توقعها طلاب المساء كانت كفيلة بأن ترافقني بقية حياتي وتتسبب في نهاية مشواري الكروي(حلوه دي موش)
غايتو انا كنت مليئ بالحماس حتى النخاع لأنها الفرصة الأكبر للظهور وقتئذ
عموما وبي إختصار أنا لعبت مباراه قدمت فيها كل جهدي وكان التوفيق حليفي طوال التسعين دقيقة وأكاد أجزم بأن كل دقيقتين كنت أواجه هجمة شرسة من دحدوح ورفاقه إما تصويبة أو إنفراد شبه كامل أوكامل وأذكر أن الدقيقة التسعين كانت الكرة قد وصلت لدحدوح وبمجرد دخول التمنطاشر أطلق قذيفة كانت ستهد كل ما بنيناه طوال التسعين دقيقة وبآخر جهد صديت الكرة التي طارت للأعلى ثم نزلت على الجانب الآخر من جهة إرتمائي على الأرض والهجوم كلهم جايين جارين وأنا بي قدرة قادر وبي آخر نفس قدرت أنط الجهة الأخرى وأمسك الكرة وبعد ان قمت بتمرير الكره مباشرة للأمام جاءت صافرة الحكم بنهاية المباراة
أخوك جا ماشي بالقرب من دحدوح (أمني نفسي بي كلمة من لاعب في حجمو وقتها يقول لي تمام يا كبتن والله كده ) لكن طبعا فتحا مبينا منو
شوفت يا ياسر التفاصيل الدقيقة دي ظلت عالقه في زهني كيف وأنا الما قادر إتذكر إسم الفصل بتاعنا في تانيه اسمو شنو؟
ده يوم ما حاينافسو يوم سواء يوم المظاهرات الجانا داخل فيها البوليس المدرسة ونحن لم نجد ملاذا غير مسجد المدرسة فأقتحموه علينا ده خليني اجيكم ليه المره الجايه بي مزاج كده

هاتفني بالأمس زميل الصحافة والخرطوم الجديدة الدكتور علي عبد القادر وكانت مفاجأة جميلة إجتررنا بعض الذكريات الحلوة كان يسبقني بدفعة لكن هناك من القواسم المشتركة ما جعل من مهاتفته إياي سعادة حقيقية أتمنى أن تتواصل على جميع المستويات والفضاءات الإسفيرية ثم تتوج قريبا بلقاء إما على ضفاف نهر الماين أو هناك تحت برج إيفل
كمال حسن علي

العزيز كمال حسن ،،،،،
تحية كبيرة لذاكرة الزمن الجميل والمباريات الجميلة ،،،،
كنت العب في الهجوم تارة رأس حربة وتارة جناح (كنت العب في فريق البراعم برابطة القوز ،،
وفي نفس موسم الدورة المدرسية فضلت فريق الرميلة لقربه من القوز على اشبال المريخ كان بواسطة
المرحوم محمد عبدالمجيد ( مسئولا في الاشبال ) حينها ولعبت بالليق موسمين ثم ركنت للمستقبل والدراسة ولله الحمد .
معي في الخانة ،، عماد غزال( الامتداد ) وحمد النيل ابراهيم بلال ( صقور الجديان ) ،،، واسامة ابوالروس ،،،ترهاقا ،،ثم انتقل لحلفا الجديدة
وآخرون ،،، في الوسط عادل من ديم الحجر ،،، عصمت الامتداد ،،، عبدالرحمن ملقب ببلاتيني من اولاد الصحافة ،،،،
سافر لتركيا للدراسة ثم رجع يعمل بوزارة الخارجية ،،، ربنا يطراهم جميعا بالخير تكاتفنا جميعا ،،، وزي ماقلت ما كان في لعيبة درجات إلا نادرا
حتى انا وعصمت كنا لعيبة روابط حينها ،،، فقط نصر الدين حميدة ( النيل ) وابره ( الموردة ) لهم ولك جميعا التحية

وشكرا للتواصل مع الزملاء عبر هذا البوست ،،،، لك التحية أخي كمال وتلفوني على الملف التمس منك المواصلة



نواصل

العزيز / أشرف الباقر ،،،،

شباب الديم كانوا كثيرين في الخرطوم الجديدة ،،،،وانت و ديامي
بس اجتروا الذكريات وحاولوا أجمعوا صفوف النوابغ من دفعتكم ،،،
شوية شوية بدت تظهر ملامح الدفعة،،، نادر الزومة ،،، عادل العوني ،،، عامر تيتاوي ،،،دفعتكم هي الاقل حضورا في البوست
،،،اجتهدوا شوية معانا


ونواصل

وين ياناس اوروبا ،، وامريكا والدول الاخرى ،،، اجمعوا ياناس ورونا انتو وين

ياكمال ماتكتب ورينا ذكرياتك ،،، طارق جبريل ،،،ديامي ،،،تيتاوي ،،،قرضابي كل الناس بتسأل
خاصة اولاد دفعتك ( اسمك منو بالكامل ) نحن في انتظار الذكريات الحلوة.


ونواصل

اولا لابد لى من شكر الاخ ياسر الذى ارجعنا الى اجمل الايام واجمل الاخوان من رفاق مدرسة الخرطوم الجديدة المميزة .
مدرسة الجديدة تعتبر من المدارس الكبيرة فى السودان ذات الخمس انهر اى خمس فصول فى كل مرحلة ..
يقبل فيها الطلاب المميزون بدرجاتهم العليا فى الشهادة المتوسطة لذا تجد معظمهم متقاربون فى المستوى الاكاديمى .. اى كلهم شطار فى كل شىء حتى المناشط والهوايات يعنى مثلا دكتور كوبانى كان مميز بانه عازف ممتاز ومهووس بالموسيقى من الزمن داك ..
عماد عبدالله كمثال كان راجل فنان فى كل شىء ومشاغب من الدرجة الاولى كما قال الاخ والزميل عادل جبارة وهو رجل موهوب وفنان فى كل شىء رسام ومغنى وممثل بارع ومقلد ممتاز للفنان محمد الامين ..
الاخ عصام احمد عبد الحفيظ فنان بالفطرة وهلالابى راقى وكنت انا وهو يوم انتصار الهلال من يقيم الاحتفالات ويوم فوز الهلال بكاس الذهب كتب عصام بخطه الجميل فى منزلهم بقشلاق الشرطة فى الخرطوم جنوب ..عبارة ..هلالنا صعب كاساته ذهب .. لا زالت موجودة على الحائط ..
وكانت جمعية الموسيقى بالمدرسة من اكبر الجمعيات ولها حضورها فى الوسط الفنى داخل ولاية الخرطوم وتملك من الاجهزة والالات ما لا يتواجد الان فى اماكن مهمة ..
ذكر الاخوان عمر محمد الحسن القرادابى وعادل جبارة وعماد عبد الله بعض اسماء الزملاء وهم للمعلومية الان فى المرحلة الثانية من الشباب اولادهم وبناتهم الان فى الجامعات بنت عماد فى مرحلة واحدة من الدراسة الجامعية مع ابنى شريف الذى يدرس فى السودان ورغم ان عادل جبارة لا يريد ذكر الكبر لكن والله يا عادل ماك صغير شوف ولدك ولا بتتك اليوم وين وانت تستذكر تلك الايام الجميلات فى الخرطوم الجديدة ..
بس انا لو عرفت بعض الاخوان الذين ذكرهم عماد اين هم الان مثل اخونا هشام صالح عتيق اكون شاكر ومقدر ..
قد تكون ذاكرتى فى هذا الاتجاه احسن من بقية الاخوة لاننى متواصل مع اكثر اولاد الجديدة داخل وخارج السودان لكن القردابى يتميز بانه فى سنتر العالم دبى حيث يستقبل الغاشى والماشى منهم وكل بعد فترة يتصل بى والله السر سيداحمد كان معى والله عبد العظيم وهو ما شاءالله محافظ وفى نفس هيئته التى رايته فيها اول يوم فى الجديدة ...اواصل

معظم طلاب مدرسة الخرطوم الجديدة هم من احياء الصحافة والامتداد والحلة الجديدة والسجانة والخرطوم ثلاثة والسكة حديد وقليل منهم من برى والشجرة ..
ولكن معظمهم من الصحافة وامتداد الثالثة والحلة والسجانة وهؤلاء هم ابناء الطبقة المتوسطة التى كانت موجودة بالسودان فى ذلك الزمن الجميل قبل ان يحول الاخوان المسلمين السودانيين الى طبقتين عليامنعمة وسفلى مسحوقة .. كما نراه الان ..
كنا جميعا متقاربون فى كل شىء فى الماكل والملبس والمظهر العام والفهم والادراك للاشياء وسرعان ما اندمجنا بعضنا البعض لان لا فوارق بيننا تذكر ..
جميعنا يركب البص المخفض ابوقرش وناكل الفول عند عمك سيد او دكان ربيع ..
كانت الخرطوم الجديدة مميزة بفريق كرة القدم واشتهر سعد زكريا والتاج محجوب وبكرى عبد الجليل وهاشم السنجك والعونى كاحسن لاعبى الدرجة الاولى فى الخرطوم ..
وكان فريق السلة والذى كان اشهرهم رينق رينق المعروف من اعمدة الفريق القومى الذى فاز بكاس العرب فى يوم من الايام ..
تميز طلاب الخرطوم الجديدة بانهم اول من تصدى لنظام جعفر نميرى وكان اتحاد الطلاب والذى كان يقوده الاخ حسن البطل من اميز الاتحادات واقواها ..واستطاع هذا الاتحاد توحيد اتجادات طلاب ولاية الخرطوم تحت راية واحدة ضد نظام الاتحاد الاشتراكى فى ذلك الوقت واستطعنا افشال زيارة كان يزمع مهدى مصطفى الهادى القيام بها للمدرسة وكان هدفنا ابعاد اى شكل من اشكال السلطة عن المدرسة والحفاظ عليها كمكان اكاديمى بعيد عن الاستقطاب السياسى .. اواصل

قامت سلطة مايو بحل الاتحادات الطلابية وطاردت اعضاء تلك الاتحادات ومنها بالطبع اتحاد مدرسة الخرطوم الجديدة وتم اعتقال الاخ حسن البطل ومن ثم اطلق سراحه ولكنه لم يياس وحاولت السلطة احلال شعب للاتحاد الاشتراكى داخل المدارس لتحل مكان الاتحادات اطلق عليها اسم شعب الطلاب لتقوم بمقام ودور الاتحاد الذى كان ينظم الرحلات الصيفية داخل وخارج السودان ويرتب العمل الصيفى لبعض الطلاب الذين يرغبون فى العمل باجر اثناء الاجازات لمساعدتهم فى تحمل مصاريف المدرسة وتقديم بعض الخدمات للطلاب ..
تولت شعبة الطلاب عمل الاتحاد وفشلت فى استقطابهم او التعامل معهم لان معظم الطلاب قاطعوها وكانوا ينظرون اليها كما ينظر بقية الشعب السودانى للاتحاد الاشتراكى وقتها .. وظلت شعب الطلاب كيانا فوقيا لا علاقة له بالطلاب الى ان انتهتى امرها وزالت دون ان تؤثر على وعى الطلاب الذين ثاروا فى رجب ابريل واقتلعوا ا النظام المايوى الفاسد من جدذوره الى غير رجعة..
من اميز الاعمال التى قام بها طلاب مدرسة الخرطوم الجديدة هى مساهمتهم فى انشاء وتكوين نادى الاسرة بالخرطوم وجعله حديقة من اجمل حدائق ولاية الخرطوم تضم الانشطة والملاعب الرياضية المختلفة ويقع فى مواجهة المدرسة ميدان عبد المنعم سابقا .. وتكريما لما قاموا به اعطيت لهم اسبقية استخدام ميادين النادى لطلاب المدرسة فى جميع المناشط .
قبل ان يهجم عليه مهندسو الغفلة فى ولاية الخرطوم ويشيدوا عليه مبانى شوهت الحديقة ومنظهرها والغرض الذى كانت تخدمه وقامت من اجله .. اواصل

عندما تم قبولنا بالمدرسة تم توزيعنا داخل الفصول والتى كانت مرقمة بالجروف اب ت ث هاء
وكنت وعمر محمد الحسن والاخ عادل جبارة فى اولى هاء بالقرب من مكتب عربى الوكيل..
كان نظام القبول فى ذلك الوقت يخلط الطلاب من اماكن وبيئات مختلفة لصقل قوميات السودان المتعددة .

انا مثلا تم قبولى من مدرسة العفاض المتوسطة فى شمال السودان وجاء معى اخر من المقل فى منطقة الشايقية اسمه قسم سيداحمد الحسن كان معنا فى اولى هاء وهذا كمثال ..
ومن اسماء دفعتنا فى هذا الفصل اذكرهم
علاء على
عادل فضل .. الصحافة
الهادى جبريل وله اسم اخر هو وداعة الله وهو قادم من مدرسة المقل ايضا
عبدالله ابو ..من الصحافة مربع 20
حمزة محمد سليمان ..الامتداد مربع 6
عمر محمد الحسن ..الامتداد
السر سيداحمد ...الامتداد
عبد العظيم سيداحمد ...الامتداد
كمال عبدالله ....الامتداد
عصام احمد عبد الحفيظ ...القشلاق القسم الجنوبى
محمد الزبير ..
القشلاق القسم الجنوبى


عصام الغزالى ..السجانة
عماد فخرى ....السجانة
ابوبكر محمد غالب ..العمارات
الطيب كوكو .الامتداد
سيف الدين داود ...العشرة ...وكان الوحيد من العشرة واطلق عليه الاخ عبدالله ابو اسم سيف العشرة
الخزين عبدالله ..الامتداد
اسامة الصحافة
عادل جبارة الصحافة
يونس حسن ساتى ...اللاماب وجاء من مدرسة سالى شمال السودان
عبد الدافع عوضالله .جبل اولياء
خالد فرح ..الشجرة
محمد جابر البدوى ..ديم الحجر

ابوالقاسم على محمد .. الشجرة
ابوالقاسم على ..الصحافة
صلاح عوض ..كونتا ...الصحافة مربع 33

الياس عبد الغنى ..الصحافة
فتحالله حسين الصحافة .
خوفو ..الخرطوم 2
ابراهيم محمد احمد ..الصحافة ..توفى الى رحمة الله
مصطفى ....الخرطوم 3 توفى الى رحمة الله
حسن محمد حسوبة ...الخرطوم 3
اواصل

ياسلام عليك يالكيك ،،،،انت ماشاء الله عليك موسوعة دفعتك ،،،،نتمنى منك الكثير
وماشاء الله حاضر الذهن ،،، ربنا يمتعك بالصحة والعافية ،،،، ودفعتكم المميزة أعطت للمدرسة نكهة خاصة ، لانها دفعة مشكلة تشكيل فنوني
بجانب العلم برزوا في جوانب شتى ،، وهذا ما لمسته من خلال مداخلاتهم ، صراحة انت أضفت على هذا البوست نكهة لاتوصف ستجعله بلون
مغاير عما بدأ..... لك التحية وننتظر المزيد ...


واصل

الأخ الحبيب ياسر أبوجكة و الإخوة الجديداب ســلام من الله عليكـم أينما كنتــم.... و ربنا يجمع شملكم بكل خير...

طبعــاً أنا ما جـديدابي .... لكـن فقط أحب أن أذكرك يا ياسر بأن هؤلاء من أشطر طلاب القوز الذي درسوا في الخرطوم الجديدة و قد يكون أحد زوار البوست أو بورداب الخارج من دفعتهم و هم:

أخي و شقيقي المرحوم علي عبدالعزيز محمد الشهير بإسم عــلام كان مغترب في المغرب و ليبيا و أخيراً السعودية حيث توفى هناك...

الضابط عبدالقادر أحمد عبدالرحيم (مدير مركز شرطة نيالا)

نزار شيخ إدريس عبدالله أبوزيد (تـاجــر)

فى عام 1978 تم تغيير اسماء الفصول من الحروف الى اسماء عربية وتاريخية واصبحت الفصول تسمى بالرازى والطبرى وابن سيناء وهكذا
وفصل الادبى تم تسميته بالطبرى ونحن اول دفعة بعد الاسم الجديد واشهر شخص كان معنا فى الفصل الادبى وكان مصدر ازعاج دائم للاساتذة كان الاخ والصديق حسين مرسيدس ويماثله صديقه عماد عبد الله
واكثر شخص اليوم يتسم بالرزانة والصرامة والصدق فى القول والفعل هو حسين مرسيدس نفسه فسبحان مغير الاحوال ..
ولا اعرف اين هو الان ولكنى عندما خرجت من السودان تركته هناك يسب ويسخط فى الحال وله قصص يحكيها عن ما يحصل فى السودان قابلته مرة ووقفنا فى الشارع اكثر من ساعة يحكى لى وطبعا هو تخرج من كلية الفنون وهو بطبعه راجل فنان وهو من انتشل عماد من كلية الشرطة واتى به الى مكانه الطبيعى فى كلية الفنون بعد ان ضل الطريق..
شخص اخر هو اخونا الخضر على موسى وهو الان معنا بالامارات استاذ فى جامعة عجمان سوف احكى لكم عنه .... ومنه اواصل

Quote: الأخ الحبيب ياسر أبوجكة و الإخوة الجديداب ســلام من الله عليكـم أينما كنتــم

الأخوة ( الجديداب )
بعد غياب يومين من البورد لظروف قاهرة أعود اليوم وأجد المنبر
وقد إزدان بالعديد من أولاد الدفعة ،،، وما أن قرأت لأولهم صديقي
وزميلي ( الكيك ) حتى تملكتني رغبة الكتابة ..
قال الكيك :

Quote: واشهر شخص كان معنا فى الفصل الادبى وكان مصدر ازعاج دائم للاساتذة كان الاخ والصديق حسين مرسيدس ويماثله صديقه عماد عبد الله واكثر شخص اليوم يتسم بالرزانة والصرامة والصدق فى القول والفعل هو حسين مرسيدس نفسه فسبحان مغير الاحوال .. ولا اعرف اين هو الان ولكنى عندما خرجت من السودان تركته هناك يسب ويسخط فى الحال وله قصص يحكيها عن ما يحصل فى السودان قابلته مرة ووقفنا فى الشارع اكثر من ساعة يحكى لى وطبعا هو تخرج من كلية الفنون وهو بطبعه راجل فنان وهو من انتشل عماد من كلية الشرطة واتى به الى مكانه الطبيعى فى كلية الفنون بعد ان ضل الطريق..

طيب من البداية ...
لازال الأخ حسين مرسيدس يتسم بنفس الهدوء والرزانة والصلابة التي فارقته عليها أخي (الكيك ) وهو موجود بالسعودية - الرياض
أما ( شلةالمشاغبين ) فبيني وبين عماد عبد الله عهد أن لا ننبش الماضي !!! وأنا عند عهدي
أما وأنك ذكرت موضوع دخول عماد لكلية الشرطة ، فأنا والله كنت في غاية الأستغراب فالأخ عماد المسكون بحب الفنون والمرح وسرعة البديهة الدالة على الذكاء وهي كلها وإن كانت صفات مطلوبة عند ضابط الشرطة إلا أنها كانت في ذلك الوقت أبعد مما كان متوفرا من عناصر شرطة وخيراً فعل حسين مرسيدس الذي انتشل الفنان عماد عبد الله من مجال لا يشبهه ..

وقال الكيك أيضاً :

Quote: عندما تم قبولنا بالمدرسة تم توزيعنا داخل الفصول والتى كانت مرقمة بالجروف اب ت ث هاء وكنت وعمر محمد الحسن والاخ عادل جبارة فى اولى هاء بالقرب من مكتب عربى الوكيل..

يا سلام .. لا زلت تختزن الذكريات الجميلة كعهدي بك دائماً بينما نحن من أصابنا السهو والنسيان .. حقيقة لقد استمتعت وسعدت بالذخيرة المعلوماتية الهائلة عن زملاء العهد الجميل زمن الجديدة .. وأكون أسعد لو استزدت لنا من تلك الذكريات خاصة ما بعد نهاية الحصص حيث كنا نركض للتسابق نحو ( الحمامات ) لترتيب ( أشكالنا ) العجيبة التي ذكرها حسام بشير وذلك استعدادا لمحطة ( الزهرة ) تلك المحطة التي خَرَّجتْ شعراء الرومانسية في زمن الوله البرئ من أمثال زميلنا الياس عبد الغني والشفيف فتح الله حسين ..
أعد لنا ذلك الزمن الجميل أيها الجميل وفي انتظار المزيد نتواصل بالشكر والمودة للأخ ياسر أبو جكة

Quote: ياسلام عليك يالكيك ،،،،انت ماشاء الله عليك موسوعة دفعتك ،،،،نتمنى منك الكثير وماشاء الله حاضر الذهن ،،، ربنا يمتعك بالصحة والعافية ،،،، ودفعتكم المميزة أعطت للمدرسة نكهة خاصة ، لانها دفعة مشكلة تشكيل فنوني بجانب العلم برزوا في جوانب شتى ،، وهذا ما لمسته من خلال مداخلاتهم ، صراحة انت أضفت على هذا البوست نكهة لاتوصف ستجعله بلون مغاير عما بدأ..... لك التحية وننتظر المزيد ...

الأخ ياسر
الكيك ... وما أدراك ما الكيك .. رجل بقامة نبي ،،، خلوق صدوق ... تقي أمين تشهد له صلاته ... منذ الصغر يرتاد المساجد وحلق الذكر ... سامية أخلاقه عالية همته ،، مثقف لماح ،، رجل مبادئ ومثل ،،،
وهذه والله ليست شهادتي وحدي بل يشهد له كل من يعرفه ...
ستجد لديه كل الذكريات فهو موثق للتاريخ من الدرجة الأولى ...

الأخ الأكبر والأستاذ بدر الدين حامد الهاشمي
لا يجمعنا بوست الخرطوم الجديدة فقط ، بل قبله حي السكة حديد وقبله الزمالة التي تربط بين والدينا - حامد الهاشمي وجبارة بانجية عبد الله - رحمهما الله فكلاهما من أوائل مفتشي السكة حديد ، وهم أول دفعة انتدبت لجمهورية مصر لتعلم قيادة قاطرات الديزل الحديثة في ذلك الوقت ومن ثم تحولوا لمعلمين بمدرسة السائقين الجديدة ثم لمفتشي وابورات ...
كنت أرافق الوالد رحمه الله أحيانا في زيارته لمنزلكم بالسكة حديد وأستمتع ( بالونسة ) الدسمة وأنا صغير ... منزلنا في السكة حديد كان يقع في الزاوية جوار خلوة الفكي الحسن - يرحمه الله
وعل ما أظن كان في السابق لديك بوست توثيقي جميل لحي السكة حديد أتمنى أن تعيده مرة أخرى حتى تتواصل الذكريات الجميلة ...
لك التحية أخ بدر الدين والشكر مجددا للأخ ياسر أبو جكة الذي جمعنا
عادل جبارة

الاخ الكيك ،،،، تحية لمعلوماتك الثرة ،، وننتظر منك الكثير
الاخوان / هيثم عبدالعزيز ،،، ومحمد الكاب ،،، شكرا على المرور الجميل

الاخ / هيثم من هذا المنبر نترحم على أخوك علي عبدالعزيز ( علام ) اللهم ارحمه رحمة واسعة
وانا بتوقع يكون دفعة بعد ناس الكيك لانو لو كانوا دفعتهم كان ورد ذكرهم ولامحال ستتضح ملامح دفعتهم قريبا .

العزيز / عادل جبارة ،،، لابأس عليك وربنا يطرد منك مثل هذه الظروف التي تطرأ دونما ترتيب ،،،
والحمد لله ربنا جمعكم باسرة عمكم وصديق الوالد المرحوم حامد الهاشمي وستكون ذكرياتكم موجودة عبر هذا البوست .

الاخ / عصام عبدالحفيظ ،،،،
تحية خاصة لإتحاف الجميع بهذه الصور المعبرة ،، والتي تحكي عظمة المكان وجميل الزمان ،،ونتوقع منك المزيد والمشاركة الفعالة

ونواصل

B]الأخوة الأعزاء
تحية من الزمن الجميل
الاخ الكيك
هيجت الاشجان و الذكريات
لكن عندي سؤال هل علاء علي هو الساكن قرب حديقة القرشي جوار ناس كوباني؟؟
لأني أعتقد أسمو علاء الدين محمد حسنين وكان أشطر واحد في الفصل خاصة في حساب المثلثات و المتطابقات
والأستاذ ثروت( مصري الجنسية)كان يقول الواد ده حا يطلع الأول علي جمهورية السودان....
فيرد عليه هشام صالح عتيق شكرا يا أستاذ( مدعيا أن الاستاذ يقصده هو)
فيرد عليه أستاذ ثروت: أقعد يابني لحسن تبرد!!!!

وعلى ذكر هشام أذكر أزهري مختار( ده عمرو ما لبس الزي المدرسي) وكان دايما مخالف للزي ومطرود وأعتقد أنهم ( هو وهشام ومعاهم واحدسمين كده نسيت اسمو) كانو عازفين في فرقة قنية...
وأذكر الاستاذ طه (لغة عربية) كان أبو الفصل وكان أديبا يتحفنا بقصائد من عيون الشعر العربى
كان دائم الابتسام,,, له التحية أينما كان

الاخ عصام
المعالم تغيرت بعض الشي
ولكن الجرس هو هو
لازالت رنته في أذني
وكأني بالصول ينظر لساعته بانتظار نهاية اليوم الدراسي

[

الأخوة الأعزاء

كأنها الأمس القريب من سرد الكيك وصور عصام عبد الحفيظ. وبالمناسبة ياعصام لى شهرين بفتش عليك وإتصلت بمحمد الأمين عن طريق محمد الشيخ.هشام عتيق كان فى قطر لفترة وهو الأن بالخرطوم ويسكن الرياض. علاء الدين هو علاء الدين على محمد حسنين وهذا المساء علمت أنة قد تخرج بيطريا ويدير الأن مزرعة بجبل أولياء.ايضا عبدالرحمن بربر اخر مرة رايتة فيها قبل زمن بعيد كان مراقبا جويا بمطار الخرطوم.

........................

إزيك ياعمر قردابى وياعادل جبارة حنشوفك مع هيجة الإتصالات دى ولا بدرى.

يا جماعة مدرستنا دي كانت انضف من كدة !
ولا نحنا كنا غُبش ساكت؟!

مكتب المدير علي اليمين
و السلم الكنتا بزوغ بيهو قدامك طوالي

الصور أحيانا أصدق تعبيرا من الكلمات

لو في عندو صور للمدرسين الأجلاء يسعفنا بيها

اقترح أن يتبنى هذا البوست تكريم هؤلاء الرسل

على أن يتم ذلك في حفل داخل مباني المدرسة

يحدد له الوقت المناسب ويعد له خير إعداد

الصور أحيانا أصدق تعبيرا من الكلمات

لو في عندو صور للمدرسين الأجلاء يسعفنا بيها

اقترح أن يتبنى هذا البوست تكريم هؤلاء الرسل

على أن يتم ذلك في حفل داخل مباني المدرسة

يحدد له الوقت المناسب ويعد له خير إعداد

الشكر اجزله للاخوان والزملاء المتداخلين والمعلقين على ما كتبت ولعلهم احسوا باننى اختصر الزمن والمسافات والسبب هو اننى لا استطيع سرد تلك المرحلة التى كانت عامرة بهم وبنشاطهم الذى لم ينقطع الى ان تفرقوا شذر مذر بعد نهاية اخر سنة فيها ..
فى السنة الثالثة تم تقسيم الطلاب الى علمى وادبى وكان للادبى فصل واحد هو الطبرى وثلاث فصول علمى احياء وفصل واحد لتخصص الرياضيات ..
فصل الادبى كله دخل الجامعات سواء داخل السودان او خارجه وايضا فصل الرياضيات كان جل المقبولين فى كلية الهندسة جامعة الخرطوم منهم والبقية درسوا فى جامعات اخرى داخل وخارج السودان ..
اعود لفصل الادبى وكان يضم الاخوان الذين ذكرتهم والتقينا فيه مع اخوة جاؤونا من فصول اخرى واعنى الف وباء وجيم ودال ..
وكان من بينهم الاخ الخضر على موسى من الشقيلاب جبل اولياء ..
وكنت اجلس خلفه ومعى الاخ مامون محمد عثمان حجر وهو الان بجدة يعمل فى الراجحى .. وكان معه امامنا الاخ الهادى جبريل ..
من اول يوم ابدى الاخ الخضر الجدية فى احراز نتيجة مشرفة وكنا نلاحظ ذلك فيه وكنا نداعبه انا والاخ مامون وكان يرفض ذلك السلوك منا وهو مهتم بما يقال فى الحصة اثناء الدروس وكان يغضب منا ويعود فى اليوم التالى بصفاء قلبه المعهود .. وكنا نتعمد ان ناخذ واحد من كيتبهم هو والهادى ونتركهما مشنركان فى كتاب واحد وهو ما كان يثيره ..ماطلبة انتو ما تجيبوا كتبكم معاكم كانت هذه جملته التى يكررها لنا كل يوم..
عند ظهور النتيجة كان ترتيب الاخ الخضر عاشر السودان وذهبنا اليه انا والاخ حمزة محمد سليمان وعبدالله ابو والهادى ومامون الى قريته للتهنئة وهناك اكرم اهله وفادتنا وتعرفنا عليهم وكانت زيارة لن ننساها قلتها للخضر عندما التقينا فى ابوظبى قبل عامين ..
الاخ الخضر درس اقتصاد جامعة الخرطوم واستطاع ان يجد بعثة من الجامعة لنيل درجتى الماجستير والدكتوراة من بريطانيا ..
وتم فصله للصالح العام من جامعة الجزيرة لانه لا ينتمى او يتعاطف مع تنظيم الاخوان المسلمين وهذا شرف له بلا شك ..
هاجر وعمل فى عدة دول واستقر به المقام فى دولة الامارات ..اواصل

الزميل ياسر وابناء الجديدة الكرام
اذكر فى سنة 81 اثناء زيارة عادل امام
للسودان وعرض مسرحية شاهد ما شفش حاجة
فى قاعة الصداقة قام الاتحاد الطلابى
بتنظيم زيارة عادل امام للمدرسة وقد
كانت الزيارة عصر احد الايام

الأخ الأستاذ ياسر أبو جكه ،

لك كل الود ،

رغم أنني لم أدرس في قلعتكم ، قلعة العلم
والشموخ ، الخرطوم الجديدة ، إلا أن روعة
وحلاوة الذكريات العذبة وطلاوة الطُــرَف والقفشات
في هذا البوست من كافة خريجي هذه القلعة ،
أقول كل ذلك دفعني لكي أغوص في حكاويكم وأستمتع
بها .. علماً بأنني درست فترة ثلاثة شهور فقط في
شقيقتها ثانوية الخرطوم القديمة ، وبعدها تمكنت
من الانتقال لمدرسة بحري الثانوية ، والتي أيضاً لنا
فيها بوست ضخم متخم بالذكريات والحكاوي والطرائف
ومازالت الأحاديث تترى فيه ، والبوست فتحه أخونا
(المهندس هشام المجمر) ، ولقد تجاوزت المداخلات فيه
أكثر من 500 مداخلة ومازال ليل الذكريات فيه طفلاً يحبو.

بعدين ما عاوز أقول أنا كبير ، لكن ذكرياتكم تدور في
بدايات أو منتصف الثمانينات ، أي أنكم خريجو تلك الفترة
بينما نحن ، الجيل الذي تخرج قبلكم بعقد كامل !!


( أخي عادل جبارة .. بتعاين لي مالك ؟! نحن دفعة ؟! )


لقد استمتعت وأيم الحق ، وحتى الثمالة بهذا البوست
الرائع ، والذي آمل أن يظل مرفوعاً دوماً .


وهذه دعوة لكم أيضاً لزيارتنا في بوست بحري المدرسة.. المدينة (هشام المجمر)



تخريمة : والله يا حسام بشير ، قطعت مصاريني بالضحك :



- أولاد الجديدة كانوا والى الأن أشطر ناس.

2-كلهم شينين ومغبشين وماتغشكم البدل والكرفتات بتاعة الأيام دى. وكمان جنس قجج.

3-كنا لما نجى دافرين من محطة القرشى للمدرسة كلاب الشارع بتزوغ من القباحة.

4-مافييهم واحد حضر سبعة حصص.

5-السندوتشات دى ماسمعوا بيها الا الأيام دى.

6-الأردية الرمادية (الشورتات: توضيح للدفع الجديدة) كأنها من مخلفات الجيش الإنجليزى.



لكم جميعاً عاطر المودة ، ومزيداً من هذا الإبداع يا شباب .

وتسلم أخي ياسر ، مع عاطر محبتي ،




( ليمو )
الريــاض

Quote: ايضا عبدالرحمن بربر اخر مرة رايتة فيها قبل زمن بعيد كان مراقبا جويا بمطار الخرطوم.

الأخ حسام
العزيز عبدالرحمن بربر يعمل مراقبا جويابمطار العين بالامارات
وأصبح معلم كبير ( يعني بنزل الطيارة بالصدر)
أيضا رفيق دربه مبارك طاشين بالامارات

وصلت الرسائل الاتية من الزميل (عماد البيلي ) ، ونحن نتأسف لعدم إنزالها في موعدها لظروف خارجة عن الارادة

وهذا ايميله [email protected]

Quote: سـلامات أحب أن أرسل أعذب الأماني لأسرة الجديدة. أنا كنت بدعم عادل جبارة ضد عماد عبدالله.. عادل كان صغيرا لأنه درسنا سوياً في مدرسة عبدالمنعم و عماد كان شيخ الدفعة لا زلت أتذكر قفشات و نكات عماد خصوصاً ضد ياسر حسن عثمان و بابكر و لكن أتذكر إنه كان شاطر في الفنون و أيضاً مسلي للفصل. الكلام عن اللحية، كان هنالك زميلنا أشيب الشعر و إسمه عنان، و كان عندنا فريق كرة قدم ممتاز- جميل، أرباب، علي حمد، الحنان. أرجو أن ترسل تحاياي لي عادل جبارة و عماد عبدالله و بقية الفريق الذهبي لفصل أولى د و شكـراً/ أخوكم عماد البيلي / نورثهامبتون/ بريطانيا. هذه رسالتي الثالثة و التي أود أن أشارك بها ذكرياتي الجميلة معكم. أشعر و كأنني غير مقبول. أعتذر لك لكتابتي بالإنجليزي لعدم إقتنائي لوحة مفاتيح عربي. عندي طلب خاص للكيك ، لو أمكن أن يرسل لي البريد الإلكتروني للأخ الخضر علي موسى و أكون شاكراً و كنا جيران في الفصل و كان جاري الآخر جمال شورة. عاطر التحايا لكل أسرة الجديدة.. عماد البيلي من عماد الدين إسماعيل و قال لا يزال يستمتع بذكريات الجديدة و هؤلا زملاؤه : نزار بشير خالد فرح علاء الدين علي علاء خوفو ديمتري الفريد خوفو ديمتري عبد الناصر يعقوب كبيدة عماد عبدالله يحي الحسن صلاح عوض محمد محمود عبدالله التهامي محمد صديق محمد هاشم محمد خير علي الكوباني علي حامد أسامة عبد العزيز ير وجدي ميرغني ياسر حسن عثمان كمال سعد أسامة محجوب محمد عبدالرحمن (العربي) و شخصي عماد البيلي مع إعتذاري للذين لم أستطيع ذكر أسماؤهم لذاكرتي الضعيفة لأنه أنا حالياً أكبر من عماد عبدالله و عادل جبارة.

الأخ ياسر أبوجكة،

في مداخلة لي مع الأخ ناذر خليفة ذكرت له بأن مدرسة الخرطوم الجديدة
كان إسمها (المدرسة الفرنسية).. وكان الطلبة يلبسون بنطلون أسود
وقميص أبيض..
قال لي: ليه كدا يا عزيز..
أول مرة أعرف إنه أسمها المدرسة الفرنسية..
هنالك من يعرف إسمها بالمدرسة الإنجيلية.

الاعزاء والاخوان والزملاء ،،،، تحية مباركة

الاخ / ابوبكر ،،،
شكرا للصورة وزي ما قال ديامي التوثيق بالصور ،،،هو اصدق من الكلمات حقيقة

العزيز / ديامي ،،،
اقتراحك جميل وسيجد انشاء الله الدعم بالتأييد لعمل احتفائية كبيرة بالاساتذة الأجلاء ونتمنى لم الشمل لكافة الدفعات أو من يمثلها على أقل تقدير

الاخ / تيتاوي
زيارة عادل امام للمدرسة فعلا تستحق التوثيق ،،،فعادل نجم كوميدي عالمي وهذه البادرة من طلاب 81 كانت جميلة وملفتة .

العزيز قردابي
ذاكرتك ومواصلتك لابناء دفعتك شي جميل ،،، ودفعتك ما شاء الله لسة فيها معلمين بختوها في الصدر ؟

الاخ والزميل عزيز عيسى :
كلامك للاخ ناذر صاح لانو المعلومة دي معروفة لاول دفعة (66-1970م ) بأنه كان مسمى المدرسة (المدرسة الفرنسية)
شكرا على مروركم الانيق وفي انتظار جميع النوابغ.

نواصل

نتمنى المداخلة من الجميع ،،، وأكيد في صور واشياء جميلة دايرين نشوفها

اتجه هذه المرة للحديث عن الاساتذة الذين عاصرناهم وطبعا المدير فى عهدناكان الاستاذ محمد عبد الرحيم او اب عاج كما كنا نطلق عليه . فعلا اب عاج كان قمة فى الحزم والحسم والشجاعة .. الكل عنده سواسية واستطاع فى خلال الفترة التى قضاها بالمدرسة جلب احسن المعلمين فى الوزارة ومعظمهم كانوا مميزين ..
كان نظام الشعب هو السائد اى تجد اكثر من استاذ لمادة واحدة مثلا شعبة الرياضيات وكان يراسها الاستاذ شاهين ومعه حوالى اربعة معلمين اخرين وشعبة اللغة العربية والدين وكان يراسها الاستاذ فرح او الرشيد والرشيد هو اقدم استاذ عمل بالمدرسة ظل بها فترة من الزمان الى ان تقاعد وهو معروف بزيه الازهرى ولن ينساه احد درس بالجديدة ومعه استاذ البيلى والرشيد وطه والسر وكان عصام عبد الحفيط يطلق على استاذ الرشيد اسم طلقها .. استاذ فرح كان معروف بعجلته.. دائما ياتى المدرسة بالعجلة ..
شعبة الفزياء والكيمياء كان يراسها استاذ انصارى
شعبة اللغة الانجليزية وكان يراسها الاستاذ الشايقى وخلفه استاذ كامل وهو استاذ مميز لن ينساه احد
شعبة التاريخ والجغرافيا وكان يراسها حسين العجوز كما كان يطلق عليه استاذ شاهين لان شعبة الجغرافية فيها استاذ اخر بنفس الاسم هو الاستاذ حسين الطاهر وكان شابا فى وقتها ومعهم عبدالله فتح الرحمن وهتاك عبدالله اخر بنفس الاسم واستاذ حيدر استاذ التاريخ وكنا نطلق عليه اتاتورك لانه كان ينفعل فى وصف الثورة التركية وهو من ادخل فينا حب فصل الدين عن الدولة واثره على المجتمع .. لن ننساه ..
عندما كنا بالسنة الاولى كان التنافس فى الفصل بين الاخ خالد فرح ومحمد جابر البدوى كل واحد يحاول التفوق على الاخر وكان خالد ساخرا جدا يجلس امامى و دائما ما يعلق بسخرية على اجابات محمد جابر .. طبعا الاثنين درسوا طب فى جامعة الخرطوم وقابلت محمد جابر بالصدفة فى مستشفى امدرمان قيل ثلاثة عشر سنة من الان وعرفنى ولم اعرفه فذكرنى بالجديدة وتمعنت فيه وتقالدنا وسلمنا على بعض ونسينا المريض وكان وقتها هو اخى .. اما خالد فرح منذ ان خرجت من السودان للدراسة لم اراه ولا اعرف اين هو الان منذ فراقنا بعد الامتحانات واتمنى ان اسمع او يدلنى احد اين هو الان ..اواصل

Quote: أحب أن أرسل أعذب الأماني لأسرة الجديدة. أنا كنت بدعم عادل جبارة ضد عماد عبدالله.. عادل كان صغيرا لأنه درسنا سوياً في مدرسة عبدالمنعم و عماد كان شيخ الدفعة لا زلت أتذكر قفشات و نكات عماد خصوصاً ضد ياسر حسن عثمان و بابكر و لكن أتذكر إنه كان شاطر في الفنون و أيضاً مسلي للفصل. الكلام عن اللحية، كان هنالك زميلنا أشيب الشعر و إسمه عنان، و كان عندنا فريق كرة قدم ممتاز- جميل، أرباب، علي حمد، الحنان. أرجو أن ترسل تحاياي لي عادل جبارة و عماد عبدالله و بقية الفريق الذهبي لفصل أولى د و شكـراً/ أخوكم عماد البيلي / نورثهامبتون/ بريطانيا.

الأخ عماد البيلي
يالروعة البوست وجمال المشهد عُدت بنا يا عماد الى ذكريات أبعد وأجمل إطارها نقاء الحياة وبراءة الطفولة ... ذكريات مدرسة حي عبد المنعم الأبتدائية التي قضينا في رحابها ست سنوات لا تنسى وكيف تنسى قياسا لتلك المرحلة اليافعة اليانعة من العمر ،، ومن جمال اللوحة أن ضمت مدرسة الخرطوم الجديدة مرة أخرى كوكبة رائعة من زملاء مدرسة حي عبد المنعم الأبتدائية ، عماد البيلي واحد من طلاب مدرسة حي عبد المنعم المشهود لهم بالتفوق والأدب الرفيع والهدوء والإتزان منذ الصغر ... سعادتي لاتوصف أخي عماد بوجودك هاهنا وأتمنى أن تكون عضواً في حوش بكري الواسع وأمنياتي لك بكل التوفيق ،، من الصدف أن قابلت الأستاذ فتح الله ( رياضيات ) هنا في الرياض وهو موجود حتى الآن ..
تحياتي لك عماد .. ولي عودة
عادل جبارة

الاخ ياسر
عميق تحياتي
وعن استاذي امين نوري حاحكي ليكم

اولا قال لنا فيما كان يقول ان اسم مدرستنا الخرطوم الجديدة حوله نظر فقال مثلا اذا اقامت الوزارة مدرسة تانية فهل تطلق عليهااسم مدرسة الخرطوم الأجد.

كشف لنا استاذنا عن اخطاء كثيرة وكبيرة يرتكبها المذيع في اجهزة الاعلام في النطق والنسب الي البلدان مثل عطبرا وكسلا ..والخ

ثم في درس اضرب الخبر قال ان الخبر يمكن ان يقال لصاحبه صادق او كاذب وهناك ادوات لتوكيد الخبر
مثل انّ والاّم والقسم
ومضي ضارب لنا مثلا حيا فقال: الامتحانات في مارس
وياولد انت ممكن ماتصدق فاقول لك : ان الامتحانات في مارس
لو ماصدقت ساقول لك: ان الامتحانات لفي مارس
برضو لو ماصدقت ساقول ليك
والله ان الامتحانات لفي مارس
وايضا ان لم تصدق ساقول لك: تالله ان الامتحانات لفي مارس

بعد ده ياولد لو ماصدقت الا اقول ليك

علي الطلاق الامتحانات في مارس

استاذنا امين نوري له فلسفته الخاصة في توصيل المادة لطلابه فهو يوظف النكته والضحكة والطرفه لتلعب دور حيويا في توصيل وتحبيب المادة للطلاب.

Quote: أحب أن أرسل أعذب الأماني لأسرة الجديدة. أنا كنت بدعم عادل جبارة ضد عماد عبدالله.. عادل كان صغيرا لأنه درسنا سوياً في مدرسة عبدالمنعم و عماد كان شيخ الدفعة

نعم في تلك المرحلة كنا صغار العمر والحجم وإن قال ( الكيك ) بأن ذلك أصبح من الماضي طالما انتسب أبنائنا للجامعات ..(أمنية عادل جلست لأمتحان الشهادة السودانية هذا العام )
مسعولين من الخير .. عماد عبد الله ( شيخ الدفعة ) طفش وييين ؟؟؟

الاعزاء ،،،والزملاء
ليمو ،، شكرا على المرور الانيق والاطراء الجميل واعجابك بالبوست ،،، بس عادل جبارة صاحبك دا هو نوارة البوست وأصغر من دفعته لانو كل دفعته شهدوا بذلك ،،،ودي كثير بتحصل بين الدفع


مطر قادم ،،الزميل والحبيب
الاستاذ أمين نوري فعلا علامة زمانه ،،،، وكان بوصل المعلومة بكل يسر لك الشكر أخي مطر على المرور الانيق

العزيز عادل جبارة ،،، اللقى أحبابه نسى أصحابه ،،، ما طليت قريب إلا بعد ما ظهر صديقك عماد البيلي

اتصل الزميل طارق ابوالقاسم زميل دفعة 86 والان بالرياض ووعدنا بالمداخلة عبر الايميل ،،،نحن في انتظارك

ونواصل

عن الزملاء بالمدرسة اقول بان الاخ ابوالقاسم سعد كان يعمل فى شركة الجزيرة تخرج من جامعة القاهرة وهو من الصحافة مربع 35 ودائما ما كنت التقيه فى الفترة التى كنت فيها بالسودان ..
ايضا الاخ عبدالله ابو الصحافة مربع 20 تخرج فى كلية اداب الخرطوم ويعمل الان استاذا للغة الانجليزية بالسودان ..
حمزة محمد سليمان تخرج ايضا من اداب لغة فرنسية وهو فى لاغوس بنيجريا طاب له المقام هناك قبل اكثر من عشرين عاما ..
بالصدفة قابلت الاخ المهندس عماد فخرى وهو تخرج فى كلية الهندسة وعمل بمشروع كنانة قابلته فى احد المصانع بالخرطوم بحرى الذى التحق به بعد ابعاده عن عمله لانه ليس من مؤيدى افكار الاخوان المسلمين مثله مثل اخونا الخضر ..
الزميل محمد الشيخ حسين الان بالسودان يعمل فى ادارة العلاقات العامة فى مصنع جياد وهو بالمناسبة درس معنا صحافة واعلام بمصر وعمل فترة من الزمن بالسعودية مؤسسة الشرق الاوسط .. وايضا من الزملاء الذين درسوا معنا بمصر الاخ عمر محمد الحسن القرادابى الذى تخرج فى جامعة عين شمس كلية الزراعة ..
الاخ مبشر شاشوق درس هو ايضا معنا بمصر كلية العلوم ذهب الى ليبيا وانقطععت اخباره ولا اعلم اين هو الان ..
الاخ كمال عبدالله الاحمر من الامتداد مربع 11 تخرج فى كلية الخدمة الاجتماعية حلوان وكان يسكن معى فى القاهرة الان هو فى امريكا مع الاخوان صلاح عوض كونتا الذى تخرج هو ايضا من مصر لغات وترجمة ..
الاخ المهندس صلاح محمد على من الصحافة مربع 22 تخرج من جامعة المنيا الان بالسودان مقاول مبانى .
اخونا عمر اليمنى شقيق الفنان عثمان اليمنى تخرج من كلية عطبرة ويعمل الان بالسودان فى بيطار او مشروع الرهد لا اعرف ..ومعه ايضا اخونا عمر عثمان من جبرة هو راسمالى وصاحب شركة خاصة ..
قسم سيداحمد الحسن من ابناء المقل لم يواصل دراسته الجامعية دخل الى تنظيم جماعة انصار السنة وتفرغ لها فى منطقته بشمال السودان .
يونس حسن ساتى يعمل فى سوق السجانة مع اهله فى بيع مواد البناء واكثر الاخوان الذين كنت التقيهم ويزورنى على الدوام فى متجرى بالسوق العربى ..
الاخ محمد زبير الرجل الحمس درس بالهند هندسة طيران وعمل فى دولة الامارات والان عاد للسودان ..
هناك اخوان وزملاء منذ ان فارقتهم بالجديدة لا اعرف اخبارهم وهو الاخوة
خالد فرح
محمد خير
ابوالقاسم على محمد
حمدى داوود
هشام صالح عنيق
علاء على ...كان فى جامعة اسيوط وتركها ولا اعرف اين تم تعليمه الجامعى ..
الطيب كوكو
خوفو
اواصل

الاخ / الكيك ،،،، تحية مباركة ،،،،شكرا كثير على المعلومات الثرة والسرد الرائع ،،،،

وصراحة ناس دفعتك مثلما توقعوا ،،،بأن الكيك ستكون عنده كل الاخبار والمعلومات عن الزملاء وصدقت توقعاتهم

نتمنى المداخلة منك على الدوام


ونواصل

الاخ ياسر والزملاء الاعزاء
تلقيت اتصالا هاتفيا من الاخ محمدعبد الرحيم محجوب ( كبش )
وهو من دفعة الجديدة الاولى 1966 وقد ورد ذكر اسمه فى مداخلة
احد الاخوة السابقة وساعود فى وقت لاحق للحديث عنه وذكرياته
عن المدرسة عندما يسعف الوقت ولكنه حملنى امانة يجب ان انقلها
باسرع ما يمكن عبر هذا البوست وهو اقتراح بالدعوة لاقامة
رابطة لخريجى الخرطوم الجديدة فى كل انحاء العالم وفى اعتقادى
ان هذا البوست سيكون نواة طيبة لهذا الاقتراح الذى ينتظر ارائكم

عامر تيتاوى

Quote: اقتراح بالدعوة لاقامة رابطة لخريجى الخرطوم الجديدة فى كل انحاء العالم

الأخ عامر تيتاوي
أثني ..... وبشدة
وفي إعتقادي سيكون لهذه الرابطة شأن عظيم يسهم في توطيد أواصر
العلاقة بين الخريجين بمختلف دفعاتهم وبين المدرسة ..

Quote: الاخ عبدالله ابو الصحافة مربع 20 تخرج فى كلية اداب الخرطوم ويعمل الان استاذا للغة الانجليزية بالسودان

مولانا عبد الله أبو الرجل الخلوق .. ربطتني به صداقة من نوع فريد
أتمنى أن ألتقيه بعد كل هذه الغيبة

Quote: حمزة محمد سليمان تخرج ايضا من اداب لغة فرنسية وهو فى لاغوس بنيجريا طاب له المقام هناك قبل اكثر من عشرين عاما ..

أيضا حمزة محمد سليمان نكاد لا نفترق طيلة أيام الأسبوع يأتي من الأمتداد للصحافة وقد امتدت هذه العلاقة حتى أصبح صديقا لأصدقائي في مربع 23

Quote: يونس حسن ساتى يعمل فى سوق السجانة مع اهله فى بيع مواد البناء واكثر الاخوان الذين كنت التقيهم ويزورنى على الدوام فى متجرى بالسوق العربى ..

يونس ... يا سلام هذا الأنسان الطموح .. إجتماعي من الدرجة الأولى

Quote: هناك اخوان وزملاء منذ ان فارقتهم بالجديدة لا اعرف اخبارهم وهو الاخوة خالد فرح محمد خير ابوالقاسم على محمد حمدى داوود هشام صالح عنيق علاء على ...كان فى جامعة اسيوط وتركها ولا اعرف اين تم تعليمه الجامعى .. الطيب كوكو خوفو

محمد خير بعد أن تخرج من جامعة الخرطوم لم يتجه للوظيفة وبدأ نشاطاً تجارياً ( تجارة الزيوت ) وفي آخر مقابلة معه بالخرطوم وجدته من كبار تجار الزيوت بالسوق المحلي ويشار إليه بالبنان - أسأل الله تعالى له التوفيق وقد انقطعت أخباره عني منذ فترة .
حمدي داوود كان يعمل في طاقم الضيافة الجوية بالخطوط الجوية السعودية وقابلته مرات عديدة خلال سفرياتي ولكن منذ فترة لم أقابله .
بقية الزملاء أخبارهم مقطوعة .... شكرا ( الكيك ) على تجديد ذاكرتنا وتنشيطها ولو قليلا
ملحوظة : الكيك والله ضيعت جوالك ولم أجده بالبروفايل أرجو أن ترسله لي عبر المسنجر لو تكرمت وأكون شاكرا

الاعزاء ،،،عامر تيتاوي ،،،عادل جبارة ،،،تحية طيبة

أرجو وضع ايميلاتكم على البوست حتى نستقبل ذكريات كثير من أبناء الخرطوم الجديدة ونلقي بها في هذا البوست لتوثيق التعارف
كما أناشد برأي الاخ في تكوين رابطة لكل خريجي الجديدة ونتمنى ذلك لجمع الشمل والله ولي التوفيق .



نواصل

الأخ ياسر
هذا هو عنوان البريد الألكتروني الخاص بي وأتمنى أن التقي من خلاله بالمزيد من الزملاء
مع التحية للجميع ،،،

[email protected]

[email protected]
[email protected]

يا جماعة متذكرين كتاب التربية الوطنية وبياختة.

عماد عبداللة: مالك محاربنا.عادل جبارة سكت خلاص.

العزيز / حسام بشير ،،،،تحية طيبة

اتأخرت علينا كثير وغبت فجأة انشاءالله المانع خير ونتمنى عودتك بقوة

وفي انتظار مساهماتك ،،، شايف الكيك وهو دائما (كيك ) أرجو أن تحزو حزوه ،،،
أثرى البوست بمعلومات وحكاوي جميلة ،،،
ما دايرك تقول لي أي هو متذكر كويس لانو أصغر مننا ،،،،،


ونواصل

بعد تسع وعشرون عاما تم التواصل بينى والأخوان عادل جبارة وعماد البيلى . أيضا تعرفت على الأخ الأصغر ياسر أبوجكة وهذا من ثمرات هذا البورد.

شكرا ياسر أبوجكة وشكرا بكرى أبوبكر

مرحبا بليمو التلب منتسبا أو مستمعا فى صفوف الجديدة.


ياقرضابى باللة لمنا فى بربر وطاشين.


ياسر: الكيك أظنو كان ألفة ونحن طبعا الحصص البنحضرها بنط الحبطة جنب شجرة المسكيت والماسورة خلف المدرسة.


الكيك: فى إنتظار موبايلك على المسنجر.

العزيز حسام بشير ،،،، تحية طيبة
صراحة دفعتكم دفعة نشيطة ومن خلال تداخلاتهم شعرنا بأن هذه الدفعة صراحة ممكن تكون من أميز الدفعات التي مرت على الجديدة
من ناحية الصلات والتواصل الاجتماعي ولكن الزميل بدر الدين الهاشمي (زميل مدرسة ) عندو راي في هذه النقطة ربما تكون دفعتهم
ايضا لها تواصل واتصال ولكن هذا البوست انشاء الله سيكون تواصل لكل الاجيال ،،،


ونواصل

شباب الجديدة كيفنكم
والله والله يا جماعة انا في حاجة في المدرسة دي كانت فاقعة مرارتي وقربت اخلي القراية عشانها
(التربية الوطنية) يمين المادة دي كانت تطمم البطن وكان بيديها استاذ حلبي طويل كدة وليه نظارات
قربت اجيب لي معاي نبلة وانيشو في نضاراتو ديل



ود ابو جكة بجيك اصبرلي

شكرا
فترة زاهية ،،، وعهد جميل ،،، وزمن أجمل مابين (83 حتى 85) فترة الناظر المميز عبدالحميد مدني

سجل عند خريج 1993

Quote: العزيز حسام بشير ،،،، تحية طيبة صراحة دفعتكم دفعة نشيطة ومن خلال تداخلاتهم شعرنا بأن هذه الدفعة صراحة ممكن تكون من أميز الدفعات التي مرت على الجديدة من ناحية الصلات والتواصل الاجتماعي ولكن الزميل بدر الدين الهاشمي (زميل مدرسة ) عندو راي في هذه النقطة ربما تكون دفعتهم ايضا لها تواصل واتصال ولكن هذا البوست انشاء الله سيكون تواصل لكل الاجيال ،،،

الأخ ياسر أبو جكة
والزملاء الأعزاء
نعم هو بوست التواصل واللقاء فقد التقيت من خلاله بالعديد من أبناء الدفعة وغير الدفعة ... وتلقيت رسائل بالإيميل واتصالات هاتفية من الأخ والزميل الدفعة حسام بشير وعماد البيلي الذي كلفني بنشر رسالته وسأنشرها تالياً وكذلم رسالة من الأخ الأكبر وزميل حي السكة حديد الأستاذ بدر الدين الهاشمي هذا خلاف الأتصال من صاحب البوست المبدع ياسر .. وهناك تواصل ممتد بإذن الله ...
إذن فلنبارك الدعوة الموجهة لقيام رابطة خريجي مدرسة الخرطوم الجديدة ...
ولكم جميعا الود صافيا

تلقيت هذه الرسالة باللغة الإنجليزية بالإيميل من الأخ عماد البيلي وطلب مني ترجمتها وإيرادها عبر هذا البوست ولعلني أكون قد وفقت في التعبير عن مشاعره تجاه الزملاء :
أخي عادل ، تحية طيبة
أتمنى أن تكون والأسرة بخير وعافية ،، أشكر لك كلماتك الطيبة عن شخصي الضعيف حيث حملتني ما لا أحمل من صفات حسب ظني وإن أحسنت الظن بي فهذا من فضلك وكرمك ... أرجو أن تبلغ تحياتي للأستاذ فتح الله الذي حبب إلينا مادة الرياضيات في ذلك الزمان البعيد !!! في عام 1997 م قابلت الأستاذ محمد عبد الله الذي سألني أين أعمل الآن وقلت له إنني الآن أعمل بمستشفى التجاني الماحي وعندها أطلق ضحكة كبيرة وقال لي نعم لقد قابلت أيضا قبل فترة دكتور علي الكوباني (مشرحة مستشفى الخرطوم ) وأسأل الله أن لا أحتاج لكما بتاتا أنت والكوباني .. لأنني لا أريد الجنون أو الموت ...
لا زلت أتذكر خلوة الفكي الحسن وأتمنى أن أجد لديك أخبارا عن الأخ مصطفى أحمد محمد الحسن ،،، وقد أخبرني شقيقي أن حمزة طه يعد الآن لعمل حصر لكافة طلبة مدرسة حي عبد المنعم الابتدائية ومنهم الأخوة وجدي ميرغني ومجدي عبد العزيز ( أظنك تقصد مجدي عبد الحليم محمد ) ومعتصم عبد الرحمن ( لا أذكره ولكني أتذكر معتصم ميرغني )
ختاما لك ولجميع أبناء الجديدة تحياتي وتقديري
ملحوظة : أملك الفكرة والمعلومات الوافية عن هذا البوست الذي أتابعه بحرص لاحتوائه على الذكريات والمشاعر الصادقة بين الزملاء حيث لا توجد أي مساحة للمهاترات والمشاكسات غير المحمودة التي أجدها بكثرة في هذا المنبر
لكم التحية جميعا
عماد البيلي

Quote: قابلت الأستاذ محمد عبد الله الذي سألني أين أعمل الآن وقلت له إنني الآن أعمل بمستشفى التجاني الماحي وعندها أطلق ضحكة كبيرة وقال لي نعم لقد قابلت أيضا قبل فترة دكتور علي الكوباني (مشرحة مستشفى الخرطوم ) وأسأل الله أن لا أحتاج لكما بتاتا أنت والكوباني .. لأنني لا أريد الجنون أو الموت ...

صورة حديثة(قبل اسبوعين) للدكتور الصديق علي الكوباني
استشاري الطب الشرعي بشرطة رأس الخيمة

اجترار جميل لذكريات زمن أجمل ،،، ونرحب بالزملاء اينما كانو واينما حلو ،،،،
ومزيدا من الضوء على هذه القلعة ومميزوها طلاب واساتذة ....

ولنا عودة لمواصلة هذا السرد الجميل




ونواصل

Quote: الكيك: فى إنتظار موبايلك على المسنجر.

حسام بشير
وعادل جبارة

العزيز / الكيك ،،،،، تحية طيبة
كل الزملاء في انتظار اجترار ذكرياتك الحية ،،، وسردك الراقي
تحية كبيرة من كل الزملاء لك ونتمنى المداخلة العاجلة وسكب ذكريات الزمن الجميل



ونواصل

الاخوان الاعزاء سوف اعود اليكم وارد على كل مداخلات الزملاء والاخوان والسبب كثرة العمل والى حين عودتى اخليكم مع حال الخرطوم اليوم طبعا اصبحت ما هى الخرطوم الامس التى تعرفونها .وهى عبارة عن ملاحظاتى كتبتها هنا بعد غياب عشرة سنوات ..
اقراوا وشوفوا المتعافى عمل فى الخرطوم شنو
انقر


وهل استطيع شكركم ...؟احاول .......ملاحظات عائد من السودان

رسالة من الاخ / محمد عبدالمجيد عثمان ،،،هذا نصها
ايميله [email protected]

Quote: Sent : Tuesday, September 11, 2007 1:30 PM To : [email protected] Subject : الخرطوم الجديدة الاستاذ ياسر المحترم السلام عليكم ورحمة الله وبركاته , كنت بقراء ذكرياتكم الحلوة ايام الدراسة بالخرطوم الجديدة , وأفيدكم بأنني كنت أحد طلاب الخرطوم الجديدة في الفترة من 73 الى 76 ومن دفعتي الاخ فيصل محمد خليل والذي نسي يجب سيرتي و الاخ هاشم أحمد محمد , والتاج محجوب , سعد زكريا واخرون لا يسعني المجال لذكرهم . وكنا صعاليك بالمعنى المفهوم لكن وقت الجد جد , كما أفيكم بأن أخي الاستاذ/ عثمان عبد المجيد درسنا رياضيات سنة اولى (عام 1973م ) ثم أنتقل لمدرسة المقرن وكان المدير الاستاذ/ محمد عبد الرحيم واستاذ الرياضيات الاستاذ شاهين الله يرحمه كان رئيس الشعبة وهناك ايضا استاذ صديق على ما اعتقد . والاستاذ ابو زينب لمادة الانجليزي والاستاذ سيد الحلفاوي للتاريخ ( تاريخ السودان ) وكان دائما يطردني دائما من الحصة وكنت اقول ليه اصلو تاريخ السودان ما عاوز ليهو استاذ يدرسو ( اصبح سفير في احد الدول ) هنالك قصة طريفة حصلت معاي وأنا في سنة ثانية أدبي وبعد الفراغ من الامتحانات اعطونا اجازة اسبوع وبعدها النتائج , ولقد اتصل بي الزميل هاشم احمد محمد ( الان مستشار قانوني في أبوظبي ) وقال لي أن احد الزملاء ( وما في داعي لذكر أسمه ) قد قام بتصيح مادة الرياضيات لنا بدلا عن الاستاذ صديق الذي كان صاحبو , ولقد كانت علاقتي مع ذلك الزميل مش ولا بد – وتخيلت أنه سوف يسقط حجري في المادة , فقمت بالذهاب الى المدرسة وكانت خالية الا من بعض المدرسين ودخلت لمدير المدرسة وأخبرته بأن الزميل فلان قد قام بتصحيح مادة الرياضيات لنا . طبعا المدير ( الله يطراه بالخير كان هو عايش ويرحمه اذا توفي ) لم يصدق الرواية وقام بالاتصال بالاستاذ شاهين الله يرحمه للتحقيق في الموضوع فورا وطلبو مني الانتظار خارج المكتب لحين التأكد من كلامي . جاني الاستاذ شاهين وقال لي اذا ثبت ان كلامك دا ما صاح سوف نقوم بفصلك من المدرسة فورا , قلت له ما مشكلة , وبعد 45 دقيقة تقريبا نادوني لمكتب المدير وقالوا لي بعد ان طلعنا ورقك وقمنا بتصحيحه من جديد أتضح ان الدرجة المفروض تاخدها اعتقد كانت 75 من 100 بينما التصحيح القديم 63 من 100 ( ومن دون ما اشعر انهمرت الدموع من عيوني واجهشت بالبكاء ( طبعا دي حلاوة الانتصار ) .. الله يرحم أيام زمان وكنا مشاغبين جدا في المدرسة – من زملاء الدراسة ونفس الفصل كان قاعد في اخر الصف دكنور مالك عقار الوزير الحالي في الحركة الشعبية . مع خالص تحياتي ,, محمد عبد المجيد عثمان مدير سابق لاحد البنوك في السعودية , وحالياً مدير لاحد الشركات الالمانية في الدمام ,,

---

Post: #139 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-11-2007, 06:36 PM Parent: #1 رسالة أخرى تأخر نزولها بسبب المشغولية نأسف يازميلنا الهاشمي Quote: Sent : Wednesday, September 5, 2007 4:14 AM To : [email protected] Subject : الخرطوم الجديدة سلام عليك مواصلة للتوثيق لمدرسة الخرطوم الجديدة أود ذكر بعض أسماء الأساتذة و الطلاب ممن فاتني ذكر أسمائهم في المرة السابقة. في مادة اللغة العربية درسنا (في أعوام 66 - 70) الأساتذة عبد اللطيف و عبد الحميد و فرح في مادة الجغرافيا بيومي و في التاريخ إبراهيم شاطر ( و كان مغرما بتلقيننا أن كلمة "قبطي" معناها مصري) و في مادة الكيمياء درسنا محمد الحسن عثمان ( و قد صار لاحقا من حملة الدكتوراة في التربية و أظن أنه من أبناء الحلفايا). في مادة الرياضيات درسنا أحمد الرفاعي (و صار مهندس طيران في الجيش فيما بعد) و المصري محمد العربي النجار (الذي أخذنا في رحلة "تاريخية" لمصر عام 69 ) و آخر مسيحي أنسيت أسمه أذكر أنه كان يبدأ الحصة بأن يطلب من أحد الطلاب الخروج من الفصل و إحضار كوب ماء كبير من الأزيار المجاورة لملعب كرة السلة. و كان يشرب كوبه الكبير بتلذذ واضح ثم ينطلق في تفاضله و تكامله. في مادة الإنجليزي درسنا علي حسن كوكو (من الباوقة)و يوسف عمر (من أم دوم)و ميرغني و مهدي (و الذي كان نعرفه ب "أبو دقن و لم يكن يخلو من بعض جنون و شذوذ و كان يحلو له مقارنة نفسه بعبد الله الطيب و يقول أن علم عبد الله الطيب علم دنيا (فقط) و لكن علمه هو علم تقوي و دنيا!أو كما قال) و مستر إسمث ( الرجل الساخر...حضر أحد طلاب السجانة الكارهين للإنجليزية للفصل متأخرا ، و لما إستفسر إسمث عن السبب أجاب الطالب في ثقة: بسبب" الضباب FOG " فما كان من الأستاذ إلا أن وضع كتابه علي الطاولة و خرج خارج الفصل و هو ينظر في السماء بحركات مسرحية! كان التدريب العسكري (الكديت) إختياريا، فكنا مجموعة صغيرة من المسالمين pacifists لا نشترك في الكديت و نستغل حصتي التدريب العسكري صباح الأربعاء في ركوب العجلات و طرق أبواب السفارات الأجنبية طلبا للمطبوعات السياحية الدعائية و المجلات و الكتيبات. من الطلاب الذين لم أذكرهم المرة الفائتة علي عثمان (أستاذ فنون بالعين) شقيق فنان الكاريكاتير عز الدين عثمان و إبراهيم سليمان يحي (من أبناء عمال السكة حديد و يعمل كطبيب بالقصيم) و من أبناء ديم القنا صلاح حسن عثمان (زراعي) وعبد المنعم (و هو الوحيد من دفعتنا بفصولها الثلاث الذي درس صيدلة بجامعة الخرطوم) و سعد (الذي عمل موظفا بالجمارك) و كان مغنيا (كثنائي) في فرقة الديم للغناء الشعبي، و يس (من أبناء الشجرة) و علي عثمان (عمل طيارا بالجيش) و من أبناء الإمتداد السيخ شيخ الدين (الضابط السابق) و حسن محمد احمد الحاج (حجر العسل) و هو أستاذ جامعي بجامعة الجزيرة وإبن عمه السر (بالعين) و يس محمد الحسن ( بيطري حصل علي دكتوراة و يقيم بأمريكا) و عثمان جبارة (ذلك الطالب الوسيم الذكي) و درس في كلية الزراعة، و من أبناء الخرطوم 3 النحاس و هاشم إبراهيم (الوحيد الذي درس الهندسة الميكانيكية من دفعتنا). جلسنا لإمتحان الشهادة السودانية في مارس 1970 و كان عدد الطلاب من جميع أنحاء السودان لا يفوق ال9000 طالب دخل منهم نحو 1000 لجامعة الخرطوم كان 720 منهم في العلوم/الأحياء. و من مدرستنا العتيدة قبل جميع طلاب فصل ج (نحو 40 طالبا) في كلية العلوم ، و ذهب إلي الآداب أربعة فقط منهم من درس الروسية مثل عبد المحمود عبد الحليم (السفير و الرياضي) و محمد أحمد خليل (من أبناء السكة حديد و هو من كبار المترجمين). ذهبت بقية الدفعة للكلية الحربية و المعهد افني (فنون) و جامعة القاهرة الفرع،...و لنا عودة بدر الدين حامد الهاشمي

---

Post: #140 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-12-2007, 06:01 PM Parent: #1 نهنيء جميع الزملاء بحلول شهر رمضان ونتمنى لكم دوام الصحة والعافية ،،، وربنا يتقبل منا ومنكم ،،،بس ماتنقطعوا من البوست التهنئة موصولة لكل الزملاء داخل وخارج ارض الوطن ونتمنى من جميع الاخوان المداخلة واثراء البوست ولم الشمل. نواصل

---

Post: #141 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: saif khalil Date: 09-12-2007, 08:05 PM Parent: #140 الاخوة الكرام رمضان كريم وكل عام وانتم بخير هذا البوست لفت انتباهي ودعاني للمشاركة..لانه يعود بي الي محطة من محطات حياتي..اذ انني كنت مدرسا بمدرسة الخرطوم الجديدة وانا حديث التخرج..في العام 1985 حين كان استاذي المرحوم عبد الحميد محمد مدني مديرا والاستاذ شاهين وكيلا...مؤكد ان من بين المتداخلين كثير من تلامذتي..من الطلاب الذين درستهم بالفعل ..الباشمهندس سامي عبد الحميد محمد مدني...كنت استاذا للغة الانجليزية.. وقد زاملني في تلك الفترة في شعبة اللغة الانجليزية الاستاذ محمد عبد القادر والاستاذ عمر الجمهوري..وفي العلوم الاستاذ عمر العبيد وفي التاريخ استاذ البلك وعز الدين في الرياضيات..وقد ربطت بننا صلات متينة..آمل ان تسمح ظروفي بالمساهمة في هذا البوست.. لكم مودتي

---

Post: #142 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-12-2007, 10:35 PM Parent: #1 العزيز الاستاذ / سيف خليل ،،،، تحية طيبة شكرا على مرورك الانيق ،، ونحن في انتظارك لتزيين هذا البوست خاصة وأنك من جيل تدريس كانت تعتبر فيه مدرسة الخرطوم الجديدة مبرزة بشكل لفت الانظار في تلك الفترة وقد كنا على اعتاب التخرج وكان معاك في الشعبة (عباس ركس ) نحن في انتظارك يااستاذ لاثراء البوست ...ولنا عوده ود الامير

---

Post: #143 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Husam Bashir Date: 09-12-2007, 11:20 PM Parent: #1 الأخ العزيز ياسر نرحب معك بالأستاذ سيف خليل ونتمنى زيارة كل من جلسنا اليهم طالبين العلم ومشاركتهم فهم كبار أسرة الجديدة ,إن تقدم العمر بكثير منا. الجديدة لم تكن متميزة فى فترة من الفترات وإنما بدأت وإستمرت ولازالت متميزة. فليعتز خريجيها بذلك وليكن دافعا لطلابها الأن المحافظة على هذا الموقع. أيضانتمنى من الأخوان على الكوبانى وخالد الصحافة تزيين هذا البوست بالجديد من إبداعهم إثراء لة ووفاء للجديدة. مرحبا بالأخ عماد البييلى فى السودان الذى يفترض وصولة لة هذة الساعة وفى إنتظار لقائة بعد ثلاث عقود من الزمان. مودتى للجميع

---

Post: #144 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-13-2007, 10:28 AM Parent: #1 العزيز حسام بشير ،،، كل عام وانت بخير تصوم وتفطر على خير ... فعلا الجديدة ترحب بكل طلابها ومعلميها ونحن في انتظار كل المبدعين واثراء هذا البوست بكل فنون مبدعي الجديدة نواصل

---

Post: #145 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Emad Abdulla Date: 09-13-2007, 08:18 PM Parent: #144 طلعتوني شيخ الدفعة ؟؟؟ طيب .. قالوا صاحب اللسان فقري و فلسان .. تزاملت مع ياسر حسن عثمان في كلية الشرطة بعد تخرجنا من الجديدة , و كان طوال فترة الكونفاينمنت يتجنبني كما يُتجنب الطاعون : عماد ياخ أنا داير أتخرج .. إنت زول بتاع لولوة و تليب سور و زوغان في بري و سهر .. الكلام ده ما بينفع معاي . و قد كان له ما أراد .. حتى الصديق أبوبكر سليمان - و هو من دفعتنا في الجديدة و الأخ الأصغر للأستاذ المربي الجميل محمد سليمان فضل الله - أبو بكر هذا كبّر مني اللفة و نحن طلبة شرطة ( هو الآن عميد شرطة و كذا الأخ ياسر ) .. الشاهد أنهما صدقا فيما ذهبا إليه , فقد فصلت من الشرطة بعد حين ( و الحمد لله ) . عبدالرحمن بربر .. أخي و صديقي و حبيبي , درسنا سويا كل مراحلنا التعليمية : الديم شرق واحد الإبتدائية / الأتحاد المتوسطة / الخرطوم الجديدة .. و هو الأقرب إلى الفلب لايزال , و بيننا ما بيننا من قواسم اشتركنا فيها منذ يفاعتنا ( هو الآن زوج أختي الأستاذة القانونية هند ) .. و الرجل شخصية فذة بكل المقاييس , لا يضحكني كما يضحكني بربر .. و هو فقط من يسطيع شحني بتفاصيل التفاصيل ذوات الشجن .. و قاريء نهم هو , و مثقف من طراز قلّ النظير , و فوق ذاك فذائقته متعافية تجاه الموسيقى و الغناء الجليل و الشعر و الأدب , و كافة أشكال الإنتاج الإبداعي الإنساني , و له في علوم السينما و الدراما معارف عظيمات . غزونا في مرة حديقة القرشي داكين ( و كنا ندك جماعات جماعات .. إذا ليس بمستساغ أن يدك صاحبك و انت في الفصل ) .. فدهمنا في الحديقة الأستاذ محمد عبدالرحيم دون أن نحس دخول عربته الزرقاء إنجليزية الصنع , صاح بربر : كشة . لكن .. كان السيف قد سبق العزل , و أذكر أننا فصلنا من المدرسة - ثلاثتنا الذين دُفِسوا في المقعد الخلفي للسيارة الهنتر - حتى حضور أولياء أمورنا . حسين مرسيدس لم يكن ضمن الكشة - و ما زلت أتهمه بالإشتراك في المؤامرة تلك لأننا رفضنا أن يدغن معنا فول جورج إلا أن يدفع الشير - أشار غلي حسين ان يأتي بقريبه التكاسي : محي الدين .. و أن يتولى محي الدين هذا ولاية أمري أمام المدير المرعب محمد عبدالرحيم , و قد كان . فوجئت بمحي الدين يكيل لي السباب أمام المدير , و يكور شفاهه بكرضمة كبيرة من سوائل فمه و تفوووووووو ( و لم نكن متفقين على ذلك ) .. ثم عمل حركة كدة بتاعة كف كف .. ( و كانت كفة يده كالمخدة ) فعملت ساتر سريع خلف الأستاذ عربي - الوكيل - .. و ثار ولي أمري محي الدين ثورة عظيمة حتى حسبته خالي جد جد . المهم .. وقّع الرجل التعهد و إتخارج .. و شمطنا أنا و حسين مرسيدس في قريبه الذي صدّق الموضوع , و في أن حسين لن يكون شريكا في الفطور حتى يدفع مثل بقية خلق الله - حيث أنني وكيل تظبيط الفطور - نلت على إثرها بُنية من حسين لا زلت أذكرها فأتوجع فأسب له و لخاله . في مرة أخرى بعدها قررنا أن نحلق صلعة .. ( هفت لينا كده ) فحلقنا : مبارك طاشين / بربر / مرسيدس / زهير المرضي / محمد خير طه / و أنا .. فقد زهجنا من حكاية : أحلق شعرك يا ولد في كل نهاية أسبوع نسمعها , فتنغص علينا الخمائس و القشرات و الحبيبات اللائي يتباهين بكبر قجة الحبيب و دورانيتها المظبوطة ( و كانت الدنيا خنافس زمانئذ ) .. و كل الخرطوم تزح تحت قجج الآفرو .. فواسينا شعورنا بالموسى - مغسة بس - و جلطنا عليها مما تلى أيدينا من زيوت و جئنا المدرسة خمستنا داخلين . مارين من أمام مكتب المدير العبقري المرعب محمد عبدالرحيم في أمانة الله و مطمئنين لنظافة رؤوسنا اللامعة , حتى فوجئنا به يرعد و يكورك : تعال يا صعلوك إنت وهو .. ذاك اليوم صُفعنا و شُلتنا زي الترتيب : آآآ عاملين عصابة صلع يا صيّع !! .. ح أوريكم . و قد ورانا النجوم في عز الظهيرة ( تأكدنا بعدها ان الناس الكبار ديل ما نصيحين .. تعمل الصاح يدقوك , ما تعمل .. برضو يدقوك ) . سأعود لعادل جبارة ( و قد كان الألفة .. و كنا نسميه : عادل الراجل لأنه أكبرنا و يخبيء في شنطته عدة حلاقة الدقن ) ..عادل الذي كان الأستاذ ثروت يزجره باللهجة المصرية : إكتب يا حمـ .. فيغضب عادل و يطنطن : حمـ ... منو يا زول ؟؟ فيرد الأستاذ ثروت : مش إنت يا حبيبي .. مش إنت يا خويا , الحمار هوّ اللي ورا اللي قدامك فيرضى عادل بالتسوية . هشام صالح عتيق هو الآن محامي في دولة قطر .. أسامة زكي رجل أعمال و كذلك وجدي ميرغني .. خالد فرح و نزار أطباء الآن .. و كانوا مكرهننا الشطارة منذ الإبتدائية ( الغريبة أنهما الإثنان من أصحاب الرؤوس المربعات الكبيرة .. و الإضنين النتشه , يعني خلاقة يا نزار ) .. تسلم يا ياسر .. و شكرا لمتعة الإبحار في بحر الجديدة .. مودتي .

---

Post: #147 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ALGARADABI Date: 09-14-2007, 10:11 PM Parent: #145 Quote: ( هو الآن زوج أختي الأستاذة القانونية هند ) والله يا عمدة أنتا محظوظ بهذا النسب الراجل ده بحبو لله كده وكل البعرفو بحبو التقول عندو إرق مهبة لكن بيني وبينك هو لا يقل حظا عمدة... كوباني ناوي عليك انتظرونا قريبا جدا

---

Post: #146 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Husam Bashir Date: 09-13-2007, 11:35 PM Parent: #1 الأخ عماد أخيرا. لكن برضوا مسنسرة. عايزين النص الأصلى وكمان البقية. تحياتى الحارة لعبدالرحمن بربر ودعواتنا لكم جميعا بالتوفيق والصحة. عادل جبارة: تم تأكيد صدارتكم من إثنين الى الأن. شيل شيلتك مع عماد.

---

Post: #148 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: KOSTA Date: 09-15-2007, 04:28 PM Parent: #146 ابناء الخرطوم الجديدة الاوفياء انا جيت عابر سكة فايت و جيت ازوركم لم نتشرف بالدراسة فى الخرطوم الجديدة ... و كنا جيرانكم فى المقرن الثانوية( المدرسة الجامعة) لكن سنة كم دى اسالوا منها اخونا و دفعتنا عمر القرضابى ( ما تعاين لى يا برعمة ). حقيقة و لتشابه السمات والدفعات بين المدرستين و لانقسام ابناء الدفعة الواحدة فى المتوسطة فى القبول بين الجديدة و المقرن كنا نعرف اخبار الجديدة و طلابها و اساتذتها من خلال ابناء المدارس المتوسطة الذين لهم اصدقاء و زملاء بالجديدة و العكس صحيح .... كما ان انتقال الاساتذة غالبآ ما يكون من الجديدة الى المقرن او من المقرن الى الجديدة و فى احيان اخرى تكون ما بين المدارس الثلاث فى ذلك الوقت الجديدة ، القديمة ، و المقرن . و لادلل على ذلك فان الناظر نورالدين وجدناه مديرآ للمقرن الثانوية قبل ان نقبل بها و هو كان من قبل مديرآ للخرطوم الجديدة .. فى العام الذى امتحنا فيه للجامعة تم نقل الناظر نورالدين من المقرن و تم تعيين الناظر المرعب بحق و حقيقة ابراهيم ارباب مديرآ لها( و كان قبلها مديرآ للخرطوم القديمة) . دعونى احىّ تلك المدارس الثلاث( الجديدة ، المقرن، و القديمة ) والتى احتضنت نوابغ الطلاب فى مديرية الخرطوم فى ذلك الوقت و تخرج منها العديد من النابهين فى شتى ضروب العلم و المعرفة . وتحية خاصة للاخ و الصديق و الدفعة عمر برعمة ( القراضابى )

---

Post: #154 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ALGARADABI Date: 09-17-2007, 03:01 PM Parent: #148 الحبيب كوستا يارجلا من زمن الحب أيام عين شمس لا تقل روعة عن أيام الخرطوم الجديدة كل ما أشوف صورتك في البورد..تهيج الاشجان بذكري تلك الايام الجميلة( حياهما الغمام) ويخطر على البال أحمد تملي و بشري واسماعيل و الوزير الشاعر معالي وبكرى( شعري بني؟) لك الحب يا رجلا من زمن الحب

---

Post: #162 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: KOSTA Date: 09-18-2007, 10:50 PM Parent: #154 قرضابى تحياتى و رمضان كريم اها و انت الصادق شلة " الجينز " بعين شمس كانت كالتالى : عمر محمد الحسن ( الخرطوم الجديدة) احمد محمد عثمان ( حنتوب ) ابوالمعالى عبدالرحمن ( مدنى الثانوية) المرحوم عماد غانم ( خورطقت) اسامة زكى عبدالحميد ( الخرطوم القديمة) بشرى محمد احمد ( بحرى الحكومية) اسماعيل تاج السر ( بورتسودان الثانوية ) بكرى عبداللطيف (الخرطوم الجديدة) صديق محمد نورالدين ( المقرن الثانوية ) و تلاحظ عراقة و قوة المدارس الثانوية التى اتى منها افراد الشلة و هذا سر تميزهم الاكاديمى و الاجتماعى و ( الفنى ). طبعآ يا عمر جاءت تسمية الشلة ب( شلةالجينز) لان جميع افرادها كانوا يمتطون الجينز صيفآ و شتاءآ الا لمامآ ( لزوم الصيانة السنوية ) هل نقول : بلينا و ما تبلى النجوم الطوالع ؟؟؟

---

Post: #149 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-15-2007, 10:39 PM Parent: #1 الزملاء الاعزاء ،،، تحية رمضانية مباركة الاخوان : عماد عبدالله قردابي حسام بشير جاكم عماد بذكريات ملهلبة ،،، ودايما الذكريات الفيها ( دك ،،، وحلاقة ،،، وكبيع ،،، وتصليح فول ) بتكون جميلة وحكاويها شيقة اخونا كوستا .....شكرا على المرور الانيق ونحي عبر مشاركتك معنا وتداخلك الانيق كل الزملاء من مدرسة المقرن ونواصل

---

Post: #150 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عادل جبارة Date: 09-16-2007, 11:37 AM Parent: #149 الزملاء الأعزاء قبل العودة للنص ( المظبط ) من كبير الدفعة وزعيم المشاغبين عماد عبد الله ، أريد أن أعبر عن شجون شتى أثارتها مكالمة هاتفية مطولة من السودان إنتهت للتو وليتها لم تنتهي فقد كان الوعد واللقاء مع إخوة أشقاء زملاء لهم في القلب مكان ولهم في المساحة زمان ، إخواني وزملائي حسام بشير وعماد البيلي ... عادوا بي لذكريات لا تنضب وتحدثنا حديث الشجون والمتون عن ذاك العهد الذي مضى ... الدكتور عماد البيلي المتخصص في الأمراض النفسية قدم من بريطانيا وفور وصوله الخرطوم بادر فورا بالمرور على حسام بشير بمكتبه ولكم أن تتخيلوا لحظة لقاء بعد سنين عددا ،،، التحية لكم إيها الأخوة المتحابون في الله وهنيئا لكم إجتماعكم ولقائكم ، ولي عودة ،،، عادل جبارة

---

Post: #151 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عادل جبارة Date: 09-16-2007, 12:00 PM Parent: #150 Quote: سأعود لعادل جبارة ( و قد كان الألفة .. و كنا نسميه : عادل الراجل لأنه أكبرنا و يخبيء في شنطته عدة حلاقة الدقن ) ..عادل الذي كان الأستاذ ثروت يزجره باللهجة المصرية : إكتب يا حمـ .. فيغضب عادل و يطنطن : حمـ ... منو يا زول ؟؟ فيرد الأستاذ ثروت : مش إنت يا حبيبي .. مش إنت يا خويا , الحمار هوّ اللي ورا اللي قدامك فيرضى عادل بالتسوية . لا حول ولا قوة إلا بالله ... ده أنايا عمدة ؟؟؟ تلفون حسين مرسيدس ضايع مني ، لكين ليك علي والله أفتشوا وأنكتوا وأجيب ليك حسين مرسيدس زاتوا هناعشان يكون شاهد على ( العصر ) ياخي أنا وعماد دنقل الله يرحمه كنا أصغر وأقصر اثنين في المدرسة .... وزي حكاية ياسر حسن عثمان كنا بنتجنب مجاورة شلة ( العجايز ) الزيكم Quote: في مرة أخرى بعدها قررنا أن نحلق صلعة .. ( هفت لينا كده ) فحلقنا : مبارك طاشين / بربر / مرسيدس / زهير المرضي / محمد خير طه / و أنا .. حكاية الصلعة دي والله متذكرها كأنها أمبارح بس صاحبي ودفعتي ( عمرا) محمد خير أبو إضنين ما عارف اللماهو معاكم شنو ؟؟ بالمناسبة يا عمدة حسام بشير وعماد البيلي بيسألوا عنك بشدة لو كنت في الخرطوم عايزين تلفونك

---

Post: #152 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Husam Bashir Date: 09-16-2007, 10:53 PM Parent: #151 الأخ الأكبر عادل بعد حديتنا الشيق معك إتصلنابالأخ محمد الشيخ حسين ولدية صديق مشاتر حاولنا إقناعة بأن يعرضة على د.عماد (يمكن أن تكون الحكاية جن ما شترة !!!) أيضا إتصلنا بالأخ نزار بشير بإنجلترا ويسأل عن قرضابى بشدة وبشرنا بحضورة للإستقرار بالسودان بنهاية هذا العام وبالمناسبة ياعماد هناك إسمة مستر الهاسان (الحسن). الواد دة حركاتوا ماعايز يخليها. ياجماعة مازلنا فى إنتظار على الكوبانى. مشغول فى شنو الميتين ديل لا مستعجلين لاعندهم نقة!!!! تحياتى للجميع

---

Post: #153 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ALGARADABI Date: 09-17-2007, 06:10 AM Parent: #1 تواصل من الرائع الدكتور الفنان علي الكوباني: Quote: يا عمر يا رائع تحياتي لك وللأخ ياسر كاتب هذا البوست المتفرد..والذي استطاع أن يخرج من جخانين الأرض ..أناس ظننا أنهم تلاشوا مع تباريح هذا الزمان الصعب...مداخلات حسام بشير ذلك الراقي..والكيك تقول كان عندو كومبيوتر..!!مع أنو في ذلك الزمن لم يتوفر أي حاسوب في كل أفريقيا...نعم يا عمر القاراضابي...أخيراً اعترفت بأنك دفعتنا..هاهاها..ما كنت ناكر لحدي وقت قريب...؟؟؟(يديك العافية يا ياسر)...يا سلام على الخرطوم الجديدة..(الجديدة يا مدرسة لعب وفن وهندسة)..كل الحب والأشواق لكل من ذكرهم الأخوان في البوست من الدفعة أو من كان حاضر الجديدة على أيامنا...وشيخ الدفعة عماد عبد الله..والله ليهو حق ياسر حسن عثمان يزوغ منك...وطبعاً شايفك جبت سيرة وادي النمل..وكده على الماشي..على العموم من تاب تاب الله عليه...لكن خلي ياسر...ياخي كنت داير تضيعني أنا من الأيام الأولى مع المربي الفاضل المرحوم محمد عبد الرحيم..الناظر الرائع والد الطبيب الفنان هشام..وأذكر يا عمدة أن محمد عبد الرحيم داهمنا ونحن ندخن.. أنا وأنت في كنبة كشك العم سيد رحمه الله..والناس كلها جرت وأظن عم سيد معاهم..إلا أنا وانت...وبعد أن حاصرنا الناظر لاحظ برودنا في عدم الانفعال بوجوده المهاب..فسألنا : بتقروا وين أنتو..؟؟؟ فكانت اجابتنا معاً في نفس الوقت..: في الخرطوم الشعبية...فرد علينا: أنا ذاتي بفتكر كده...!! طبعاً أنا تاني ماشافني جنب مكتبو إلى أن استلم الناظر الرائع أيضاً والمربي العظيم المرحوم عبد الحميد محمد مدني..والذي تشرفت أيضاً بمزاملته في النادي الأهلي الخرطومي..تحية لأسرته العظيمة.. يا عمدة تحياتي لبربر الجميل..وخلي الطابق مستور...بس حقو الناس تعرف أنك مسكون بالابداع منذ نشأتك الأولى وفعلاً ما زول بوليس..انت فنان حتى النخاع..زي ابراهيم كوجان.. والله كانت لنا أيام فعلاً...مدرسة كانت لا تقل عن جامعة في أي شئ.. بس كانت بالأردية..ونفسي واحد يذكرني بالزميل الذي كان مشهور بالرداء القصير جداً وليس كأرديتنا بتاعت البوليس الزمان..لدرجة أن الناظر قال ليهو: والله يا أبني رداك ده..أنا تحت البنطلون ما ألبسوا... لكم جمعياً كل الود..حسام بشير..الكيك..عمدة..عادل جبارة.عماد البيلي.وعمر وكل من كتب في هذا البوست العظيم والشوق لكل أبناء الدفعة المنتشرين في بقاع الأرض وكل خريجي الجديدة العظيمة قبلنا أو بعدنا....يا الكيك بالله واصل في سردك التاريخي...وبالمناسبة عماد فرح درس جيلوجيا..وعمل فيها دراسات عليا..وأذكر أنه أعطاني محاضرة خاصة عن النوبيان ساندستون لا زالت عالقة في ذهني حتى الآن.. كل الريد يا قاراضابي وأنشاء الله تشيلو كأس أفريقيا كانت هذه رسالة الرائع كوباني مع وعد بمواصلة حديث الذكريات

---

Post: #163 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: KOSTA Date: 09-18-2007, 11:13 PM Parent: #153 Quote: عماد فرح درس جيلوجيا..وعمل فيها دراسات عليا..وأذكر أنه أعطاني محاضرة خاصة عن النوبيان ساندستون لا زالت عالقة في ذهني حتى الآن.. قرضابى لفت نظرى فى مداخلة د. الكوبانى الفقرة اعلاه ... و مادعانى للتعليق عليها ان ابن عمى و هو مهندس جيلولوجى ايضآ و درس معنا بالمقرن الثانوية و يحضر الآن دراسات عليا دائمآ ما يحدثنا عن النوبيان ساندستون Nubian sandstone ، و الشاهد انه يفعل ذلك بحماسة و بلا ملل حتى ظننت انه سيورثه !!!. بس لو نعرف العلاقة بين الجيولوجين عمومآ و بين الحجر النوبى شنو ؟؟؟ سنرتاح .... امتنانى

---

Post: #155 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-17-2007, 05:13 PM Parent: #1 التحية لهذه الدفعة الرائعة بسردها وحكيها عن ايام دراستهم والتحية لكل الطلاب وزملاء الدفعات السابقة ونتمنى المداخلة ومزيد من عكس ذكريات تلك السنين النضرة والتاريخ الناصع لهذه المدرسة العريقة ،،،، وشكرا على الرسالة الانيقة للدكتور علي الكوباني وفي انتظار المزيد من مشاركتك ونتمنى الاتحاف بشي من قصائدك الراقية ،،،، شكرا قرضابي ،،،، ونواصل

---

Post: #156 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Emad Abdulla Date: 09-17-2007, 07:01 PM Parent: #155 كتابة وجدتني كتبتها عن المنعول كوباني في مكان ما .. Quote: : بتك دي جايه بالقلبة , ما دايرة تستعدل راسها عشان نخلص ، ح نضطر نولد بسرعة و بأي طريقة . كان كلامه حاسما لايشبه كلام صاحبي كوجان الذي أعرف , قلت فافعلوا ، خلصوها يا كوجان و خلصوني ياخ . جاء “ الكوباني بعدها ” تسبقه ابتسامته ، لا أعرف من أين أتى . فحمدت الله أن إتلمّ عليّ أطول لسانين في التاريخ ، : يا عمدة ، قالوا لي جايبها مقلوبة ، ده الكلام و الله ( ثم يضحك و يحتضنني ) . علي الكوباني هذا من مصائب الكون منذ أن كنا طلاباً في الخرطوم الجديدة الثانوية . يتصعلك معنا عند كشك عم سيد و وادي النمل و البحر و سينما غرب و الأزقة التي لا تنام شمال حديقة القرشي التي يعيرنا بأنها من أملاك آل كوباني أو كابوني ، يفعل معنا كل ذلك ثم ينجح بتفوق . قلت : علي إنت بتاع طب جنائي ، يعني مشرحة و ميتين و حنوط و التفت الساق بالساق ، إتخارج لينا بالله ، مش كفاية كوجان . دخل الإثنان ، طبيبان و ثلاث دايات و ممرضة واحدة بصرة وش . .. الكلام جاب الكلام .. الزول ده من أجمل مخاليق الله السعرانة .. و أنا ما قلت للناظر محمد عبدالرحيم أي حاجة .. كنت مسكين و طيرة و صغير .. عمكم علي الكوباني ده هو القال نحنا من الشعبية . و برضو عمكم عادل بيكون قال حاجات زي دي .. صاح يا ود البيلي ؟؟؟ وللا شنو يا حسام ؟ قردابي ياخ خلي عندك زمة .

---

Post: #157 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Husam Bashir Date: 09-17-2007, 11:51 PM Parent: #1 ألعزيز صغير الدفعة عماد ياخى قلبنا عليك الخرطوم كلها ماعايز تظهر مالك. باللة بلغ بربر تحاياناالحارة. عليك اللة المنبر دة مش عايز لية حانوتى ( شاعر) بعظمة. ماتكلم ياخى بكرى أبوبكر.إتخيل كوبانى دة لو كان جراح تجميل كان كتب شنو. طبعا هو حايقول إنو جراح تجميل لكن خسارة فى الزمن الضائع. كوبانى: منتظرين حاجة لسع ماطلعت يعنى لاسمع بيها كمال ولا حتى كرم اللة. التحية للجميع

---

Post: #158 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-18-2007, 00:02 AM Parent: #1 Quote: الزول ده من أجمل مخاليق الله السعرانة .. دي تعابير قوية ،،، وحكي يميت من الضحك ،،،، قلبت فيها الهوبة طلتك يا ودعبدالله حلوة ،،، لكن كل ابناء دفعتك صنفوك ( شفت الدفعة ) ونواصل

---

Post: #159 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: منذر نقدالله Date: 09-18-2007, 09:31 AM Parent: #158 الاخوه طلاب الخرطوم الجديده رمضان كريم بوست جميل وعامر بالذكريات ماآظن انو زاملت احد من المتداخلين لانو انا جيت في الزمن الضايع الفتره89- 92 حيث بدات المدرسه تحتضر زيها زي باقي مدارس السودان التانيه لكن برضو كانت زكريات جميله واتذكر انو آول يوم في المدرسه جيت متاخر واخدت لي دقه من الصول وانا الولد المسكين اليادوب جاي من السعوديه اتمني المداخلات من اولاد الدفعه للتواصل تحياتي

---

Post: #160 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-18-2007, 11:13 AM Parent: #1 العزيز / منذر نقدالله ،،،، تحية طيبة ومرحب بيك زميل أصغر نتمنى مداخلاتك وحاول ذكرناباولاد دفعتك ،،،انت ماجيت في الزمن الضائع والجديدة ما انتهت عامرة بالنوابغ حتى اللحظة . ونواصل

---

Post: #161 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-18-2007, 10:20 PM Parent: #1 أين أنتم يانوابغ ؟ عماد عبدالله (شيخ دفعتو ) ،،، الكيك ،،،عادل جبارة ،،، القردابي ،،، حسام بشير وكل الزملاء الذين تداخلو ،،، نلتمس منكم اثراء البوست ،، نواصل

---

Post: #164 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-19-2007, 12:12 PM Parent: #1 وصلتنا هذه الرسالة من الزميل / محمد عيد عبدالرحيم وهذا نصها Quote: الأخ الكريم / ياسر الأمير حياك الله لكل مجد في الورى نفع فاضل*** وليس يفيد العلم من دون عامل لن أنسى أبدا هذه المدرسة العتيقة في هذا الزمن الجميل ما بين 83 / 85 قدمت إليها من اقليم كردفان /1984 والتحقت بفصل فارابى / تخصص أحياء وكانت لي ذكريات جميلةمع / البارع / احمد عبدالله // استاذ الكيمياء ومع المولات والجبر وكذلك استاذ مادة الأحياء / الفذ/ سيف الدين / وعلى ما اعتقد قبل سنوات كان مغترب في سلطنة عمان ولكن رغم تخصصنا العلمى درسنا اتجاه أخر يربط بين المسياق العلمى والأدبي / التحقت بجامعة القاهرة / كليةالحقوق ومن ثم سافرت الى الخليج حالى حال من سبقونى من الاخوة السودانيين واقيم بمدينة أبوظبي حتى هذه اللحظة أخى الكريم ياسر كلما ذكرت مدرسة الخرطوم الجديدة تذكرت الناظر الفذ عبد الحميد وتذكرت أهل العلم وطلاب الرياضيات وخاصة حساب المثلثات ونظريات الجبر والكيمياء وتذكرت لي زميل وصديق من منطقة نوري ويسكن الأن في الخرطوم / حي اركويت / محسن عبد العاطى وأبحث عنه اوعن عنوانه اشكرك من القلب على هذا الشعور الطيب أخوك / محمد عيد عبد الرحيم [email protected]

---

Post: #165 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عادل جبارة Date: 09-19-2007, 12:45 PM Parent: #164 Quote: كتابة وجدتني كتبتها عن المنعول كوباني في مكان ما .. المنعوول عماد وماذا لو عرفت أن المنعول كوباني كان منعولا منذ المرحلة الأبتدائية ( حي عبد المنعم ) ومنذ ذلك الوقت كان يمارس الشفتنة ثم يكون أول الصف .. أذهل الناظر علي عباس النعمة ( رحمه الله ) بهذه الإزدواجية العجيبة فكانت تمثل حالة نفسية معقدة في كيفية التعامل مع طالب ( شفت ) لكن شاطر .... هذه الحالة انتقلت للطلاب أنفسهم لأن الشطار كانوا يمتازوا بقلة حجمهم أما صاحبنا المنعول فكان ضخما بمقاييسنا في ذلك الوقت .. ولأن يوم النتائج كان يوما خاصا للشطار يختبئون فيه ويتوارون عن الأنظار بسرعة خوفا من بطش ( الغير شطار ) لذا كنت تجدهم إختفوا جميعا ما عدا صاحبنا المنعول كوباني ( يضرع ) وكأنه ( الطيش ) ... يكون جميلا جدا إذا انضم هذا المنعول لهذا المنبر الأكثر لعنة والذي جمعنا هنا نحن ( الغير مناعيل ) بأمثالكم ( المناعيل ) فيا ليت يكون السعي لذلك لدى بكري أبو بكر .... سلام وتحية ،،،

---

Post: #166 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Haytham Abdulaziz Date: 09-20-2007, 04:49 AM Parent: #165 الأخ ياسر أبوجكة و الإخوة الجديداب رمضان كريم و كل عام و أنتم بخير.... هذا إهــداء بسيط لكم للذكرى .... و هيجتني الذكرى....

---

Post: #167 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-20-2007, 12:57 PM Parent: #1 العزيز هيثم ،،،، شكرا على المرور الانيق وانت دائما عودتنا على الاتحاف ونقل الجديد والمبتكر من العم قوقل لك الشكر ،،، عندنا دكان عمك عبدالوهاب حيث الفول الكبده رايح مننا نتمنى البحث عن موقعه وتشكر نواصل

---

Post: #168 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-24-2007, 11:11 PM Parent: #1 الزملا ء في جميع اصقاع الارض نتمنى لكم صوم وافطار على خير ،،، بس فقط حاولوا تعالوا نبحث عن النوابغ الغائبة عن الساحة وهم كثر دفعات كثيرة غائبة عن بعضها البعض نتمنى من الله أن يلم شملهم وتعود المحبة والتوادد ونواصل

---

Post: #169 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: الكيك Date: 09-25-2007, 05:29 AM Parent: #168 رغم ان الاخ كوبانى حاول الدخول وقول شىء الا اننى ارى انه غتيت يخفى الكثير المثير الذى كنا نتوقعه منه .. اما الاخ عماد فهو عماد... الصراحة كاتلاه .. يهبش جاى وجاى لكنه الانسان عماد الواضح الدوغرى ويبدو ان كوبانى خائف من ابنائه يتاثروا بهذا البورد .. رغم اننى قضيت حوالى عشر سنوات فى دولة الامارات حتى الان لم اتشرف بلقائه وتواصلنا عبر التلفون فقط هو فى راس الخيمة وانا فى ابوظبى وبيننا دبى وعجمان والشارقة وام القيوين شفتوا المساحة الشاسعة دى هى الفيصل او الفاصل بالمعنى الصحيح بيننا ولكن عمر محمد الحسن احسن منه فى صلة الرحم الثانوية والجامعية .. هذا الكلام كتيته لاستفزازه ليقوم ولو لمرة واحدة بزيارة ابوظبى وهو يملك سيارة وانا لا لاننى مريض سكرى ومتعتع ومربوط بعمل الجرايد الذى لا يسمع بالاجازات اطلاقا يا ربى الكلام دا بيؤثر فيه شوية وبخطف رجله ويجينا ولا يعمل ما شاف المداخلة دى نشوف وسوف اخبركم .. رغم الخضر على موسى متواجد فى دولة الامارات والكمبيوترات فى كل غلرفة ما عدا الحمامات الا انه يبخل بالمشاركة هو ايضا .. اعود للاخوان وانا سالت عن الاخ خالد فرح وليس عماد فرح وخالد فرح درس طب يا كوبانى ولا اعلم اين هو ولازم اعرف ولو من السودان لاننا كنا اصدقاء ومنذ ان فارقت السودان انقطعت اخباره عنى اى منذ بداية المرحلة الجامعية ..اواصل

---

Post: #170 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: الكيك Date: 09-27-2007, 05:11 AM Parent: #169 علشان خاطر الخضر على موسى نرفع البوست

---

Post: #171 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 09-29-2007, 01:10 AM Parent: #1 نتمنى من أخونا دكتور كوباني يزور أخونا الكيك ولو في اجازةالعيد وحتى يدوم التواصل وتدوم محبة هذه الدفعة نحن مع اخوناالكيك وربنا يشفيك من السكر ودمتم أيها الاعزاء. ونواصل

---

Post: #172 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 10-01-2007, 11:28 AM Parent: #1 الاعزاء الزملاء الحلوين ،،،، كل عام وانتم بألف خير رمضان دساكم ،،، ضاربين المنامة والكندشة ،،، الله يديكم العافية ونواصل

---

Post: #173 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 10-12-2007, 07:39 PM Parent: #1 كل عام وكل الزملاء بألف خير ،،، أنا على بعد مرمى حجر من قلعة العلم والشموخ عاودني حنين غير عادي وصممت أن أحوم حولها لما تربطني بالحي من علاقات وطيدة مع ساكنيه ( الخرطوم تلاتة) يالها من أيام وذكريات جميلة سأعود

---

Post: #174 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عبدالرحمن حسن موسى Date: 10-24-2007, 02:39 PM Parent: #173 الاخ / ياسر ربنا يوفقك في إجازتك السعيدة بالسودان ، وبالله طل على قلعة الشموخ وبلغها عنا جميعا التحايا والتقدير واسكب عليها دمعات وتنهد فيها بعبرات تحكي تاريخ كفاح علمي وتربوي طويل . خالص ودي ،،،،،،،،،،،،،،،،،

---

Post: #175 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عبدالرحمن حسن موسى Date: 10-24-2007, 06:10 PM Parent: #174 الاستاذ ابراهيم البلك معلم التاريخ له اسلوب جميل وشخصية قوية يهابها جميع الطلاب نسال الله طول العمر ، وكذلك اذكر الاستاذ امين نوري و أستاذ عثمان مضوي المبدع في الأدب العربي لهم مني التحايا العطرة ودوام الصحة والعافية .

---

Post: #176 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 10-24-2007, 09:15 PM Parent: #1 شكرا كثيرا الحبيب / عبدالرحمن حسن وانشاء الله أزور قلعة العلم والشموخ ،،، وأزور كل الشامخين ابناء هذه القلعة المتواجدين داخل القطر لك ولهم التحية ،،،، وكل عام وانت والاحبة بكل خير،،، ودمت وسنواصل

---

Post: #177 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: Ahmed El Gasim Date: 10-25-2007, 06:48 PM Parent: #176 مثلما عشقت المقرن احببت الجديدة ففيها درس بعض من اعز اخوتي واصحابي دفعة 80-83 ابن خالتي الطيب اسماعيل عبد المطلب مهندس كمبيوتر د رفعت محمد صالح عبد الله مدثر حسن محمح سليمان (زراعة اسبوط) عصام الطيب حسن زميلنا بالبورد (اقتصاد الخرطوم) عصام عبد الله اسماعيل اخصائي تحاليل عماد الدين حسن اسماعيل شاعر واديب و...انسان د حسام فرح التجاني النور علي(اقتصاد الخرطوم) من اطفال مع بعض..بس لمن كبر مشي امريكا وخلانا.. مصطفي النقيب(اقتصاد الخرطوم) رجل لا ينسي..مؤدب ...اخ كريم وزميل صبا ...وما زال.. سيف اليزل ابو شيبة البلولة(صيدلي) ابن اهلي ازكر المرحوم الناظر الفد عبد الحميد المدني..له الرحمة واظن ان ابنه طبيب الان.. وتعرفت علي كثيرين عن طريق هؤلاء من الجديدة وبجيكم تاني انشاء الله.. تحياتي لصديفنا القردابي وهو رجل مميز ماشاء الله ورجل مجتمع له الود ولكم ولياسر قائد الاسطول...

---

Post: #178 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: عادل جبارة Date: 10-26-2007, 11:28 AM Parent: #177 Quote: كل عام وكل الزملاء بألف خير ،،، أنا على بعد مرمى حجر من قلعة العلم والشموخ عاودني حنين غير عادي وصممت أن أحوم حولها لما تربطني بالحي من علاقات وطيدة مع ساكنيه ( الخرطوم تلاتة) يالها من أيام وذكريات جميلة الأخ ياسر كل عام وأنت بألف خير ،،، أمنياتنا لك بالتوفيق والسداد فيما تصبو إليه وتحياتنا ممدودة لكل الأهل والعشيرة ولطلاب ومعلمي مدرسة الخرطوم الجديدة

---

Post: #179 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 10-26-2007, 06:54 PM Parent: #1 العزيز أبدا عادل جبارة ،،،، تحية طيبة فعلا أنا على مقربة من هذه القلعة وأتمنى أن أكون عند حسن الظن ونلم شمل الزملاء ،،، فقط أصبروا علينا شوية وستروا الكثير المثير الخطر وسنواصل

---

Post: #180 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: abdelwahab hijazi Date: 10-26-2007, 09:54 PM Parent: #1 لأخ ياسر والزملاء الكرام الشكر الجزيل على هذا الرابط الثر المفيد. وقد استفدت منه الشيء الكثير خاصة ما ورد بمداخلات الأستاذ بدر الدين حامد الهاشمي حول أصل المدرسة ونشأتها وخريجيها الأوائل. أنا أنتمي إلى دفعة الفترة من 76/1977 إلى 79/1980. التحقت بعدها بكلية الاقتصاد جامعة الخرطوم معية مجموعة من ذات الصف أذكر منهم كمال محمد أحمد الفكي وخالد مصطفى الزبير وبدوي محمد عبد القادر. أكثر ما أذكر من الأساتذة الأستاذ عبد الله الشيخ البشير رئيس اتحاد أدباء السودان. وقد كان له الفضل الكبير في ربطنا على نحو ما بالثقافة العربية. وكان رحمه الله يقوم بشرح معلقة عنترة بطريقة رائعة تجعلك مأخوذاً طوال الحصة بروعة تصويره لعبارات المعلقة. كما كان يحرص طوال الشرح على القيام بمقاربة أبيات المعلقة بأبيات من الدوبيت أو العامية السودانية. كم تمنيت أن يكون أحدهم قد حفظ هذا الإرث الثمين. أذكر كذلك الأستاذ كامل في مادة الانجليزي والذي كان يقوم بشرح كتب الأدب الانجليزي ببهاء يقرب من سحر الأستاذ عبد الله الشيخ البشير. أسفت أن المدرسة اعتمدت في نهاية فترتنا على عدد من الأساتذة الجدد ممن كانوا في حاجة إلى خبرة أكثر رغم أن بعضهم قد ذاع صيته بعد تخرجنا من الجديدة. ذكريات الجديدة تتداخل للأسف مع ذكريات مدرسة الاتحاد الثانوية حتى أنني أحياناً أكاد لا أميز بين زملائي هنا وهنا وأساتذتي هنا وهناك أيضاً. عموماً لكم الشكر الجزيل وكلي أمل أن يتواصل هذا السرد الشجي.

---

Post: #181 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: ياسر الامير ابوجكة Date: 11-26-2007, 10:53 AM Parent: #1 نأسف للانقطاع الطويل ،، وشكرا للذين مروا في غيابي ،،، وهانحن عدنا ونواصل

---

Post: #182 Title: Re: مدرسة الخرطوم الجديدة الثانوية ،،، قلعة العلم والشموخ ،،أجمعوا يانوابغ Author: مجدي عبدالرحيم فضل Date: 11-26-2007, 11:06 AM Parent: #181 Quote: نأسف للانقطاع الطويل ،، وشكرا للذين مروا في غيابي ،،، وهانحن عدنا أخي ود الأمير حمدا علي السلامة ومرحب بالجديدة المدرسة. ،،،،أبوقصى،،،،