كرهونا !

كرهونا !! ... والله العظيم كرهونا !

عبارتين رمى بها فى مسمعى صاحب مكتبة وهو يسارع الى انزال اطرافها الحديدية شاحذا همة الصبى العامل معه للاسراع باحضار عكاز وسيخة - حدد موقعها داخل المكتبة - ثم اضاف وانا امد له بحزمة اوراق نقدية قيمة صحف ومجلات .. ياخ نحن مالنا ومال الحكومة ومشاكل عبد الواحد معاها واولاد الغرب .. نحن مالنا .. واضاف بضجر ظاهر وضيق رسم تقطيبة كبيرة على وجهه ( انا ذنبى شنو كل يومين تلاتة القى السوق بقى فاضى والناس جارية وزباينى يطشو لانو فى ولدين تلاتة لامين فى الناس خبط من طرف ) .. ومضى وهو يعلن الارض وما فيها من عالم ومن اشباح ومضيت انا اتلمس طريقى بصعوبة وسط السيارات المرتاعة هربا من مظاهرة عنيفة جوار برج البركة لا تسمع فيها هتافا او ترى فيها شعارا لكن الذى تراه حجارة تنهال على المارة وحرق عشوائى للسيارات ومهاجمة لبعض المتاجر تحت غطاء رفض اتفاق ابوجا !
المسالة تكررت بالخرطوم مؤخرا وخسر مواطنون عزل وابرياء ممتلكات اصيبت باضرار ،احدهم وهو ضيف فى اجازته السنوية فوجى عقب خروجه من مكتب احد المحامين بعربة شقيقه التى يستغلها تحترق امام ناظريه رغم انه لا علاقة له بالحكومة والجبهة الاسلامية وعلى النقيض تماما فقد هاجر (البروف ) مطلع التسعينات بعد ان طاله سيف الصالح العام فالتمس الرزق فى احد الدول الغربية ناشطا باحد مراكز البحوث ، والرجل الذى تربطنى به اصرة دم وصلة قربى التقيته مساء امس الاول محتارا وان تسامح مع خسارته التى وقعت عليه وقال لى حديثا مؤثرا خلاصته ان هذه الافعال الخرقاء لن تفعل شيئا سوى تكريس صورة شائهة عن مطالب هؤلاء الرافضون لابوجا حيث ستصطدم بالاغلبية الصامتة من السودانيين والذين يجبرهم هؤلاء على دفع فاتورة لا يملكون لها دفعا مشيرا الى ان العنف سلوك مؤذى بالقضية مهما كانت مشروعيتها وسلامة مقصدها وهو فى النهاية اى العنف يولد ردة فعل مضادة منها ما هو ظاهر كرد العدوان على المعتدى ومنها ما هو مستتر كتكوين موقف يمقت تلك الجهة ويكرهها وبالتالى يحاصر اى مستقبل لها من جهة القبول فى الشارع .
اصدقكم القول .. ما قاله الرجل صحيح .. كثيرون ممن واجهوا المظاهرات الاخيرة - وهى محدودة - صارت مواقفهم (كارهة ) وبصورة بينة لهذا السلوك وبدا ان لديهم استعداد لقبول اى تحرك حكومى لسحق اى مظاهرة مقبلة بعنف وشدة وتراجع وبصورة مريعة حجم اى تعاطف قد يذكر مع موقف عبد الواحد نور او اى من القائلين برفض اتفاق السلام فى ابوجا وقضية دارفور جملة وهى قضية رغم عدالة كثير من اوجهها فان الطريقة المتحاملة والمتحيزة والسالبة والمجرمة فى عرضها وشرحها اضعفتها بشكل بين
فهل يتعظ اولئك الذين يروعون العمال وطالبى الارزاق باليومية من اصحاب متاجر وباعة واهل مصالح واغراض من العامة بالكف عن شكل هذا السلوك المرفوض فى التعبير ام يواصلون افعالهم ومن ثم يفسدون قضيتهم ..

سلام يا كمندان

تعرف الناس ديل بذكروني قصة حكاها لينا واحد صاحبنا ربنا يطراهو بالخير , قال مرة ناس القرية عايزين يطلعو مظاهرة ضد الحكومة , ولما كانت هذه القرية في الاصل خاوية على عروشها , وما فيها نفاخ النار , قامو مشو لحدي صهريج الموية , قدوهو وبشتنو حالو وجو راجعين بيوتهم !!!
..
عليك الله ده فهم شنو ده !!
وطبعا لمن الحكومة تصلح ليهم صهريجهم ده تاني , يكون العطش كتلم
..
اسي هم كده بعاقبو في منو !!
وحا يجنو شنو !!
..
مودتي

Quote: اسي هم كده بعاقبو في منو !!

بيعاقبو انفسهم .. ويضرو قضيتهم .. بس

ود جمعه

الشوق حنفيه مكسوره فى بيت عزابه

وبخصوص المظاهرات التى تحرق وتخرب ..اظن انو ديل الرجرجه والدهماء
وليس اهل القضيه الحقيقيين الذين اكتوا بنيران الحرب والتشريد
ويحمدون الله كثيرا على السلام
لذلك على الحكومه ان تضرب بيد من حديد على كل من يحاول خلق فوضى
ومعركه فى غير معترك ... لان اهل دارفور الفرحين بالسلام لا يأتى
من قبلهم هكزا تصرف .

تخريمه : -

قالوا موقعكم فيهو صور رهيبه عن السودان .. رجاء وضع الرابط هنا .

مودتى

ادخل هذا الرابط يا على

http://www.smc.sd/ar/armap.asp?aCK=AXA

وفى الطريق مفاجاة حنشوفك السودان مدينة مدينة وشارع شارع صورة فوتغرافية وفيديو .. ونديك رابط التحميل ... قريبا .. مفاجاة اكملنا ترتيباتها