بدون عاطفية فجة (الهلال سجمان )

بدون عاطفية فجة (الهلال سجمان )


07-23-2007, 08:55 AM


  » http://sudaneseonline.com/cgi-bin/sdb/2bb.cgi?seq=msg&board=118&msg=1201287728&rn=0


Post: #1
Title: بدون عاطفية فجة (الهلال سجمان )
Author: محمد حامد جمعه
Date: 07-23-2007, 08:55 AM

اول حاجة ..صباح الخير .. البوست دا يا جماعة رياضى و(بس ) فرجاء ما تشيلو لينا تودوه خيران ساس يسوس .. كويس
يا جماعة مع حبنا وتقديرنا لاى انتصار كروى لكن الهلال الامبارح دا ما بجيب كاس البطولة ..

ما تبقو ناس عاطفيين .. الحق حق

Post: #2
Title: Re: بدون عاطفية فجة (الهلال سجمان )
Author: إدريس البدري
Date: 07-23-2007, 08:58 AM
Parent: #1

تصدق يا جمعة كلامك ده عين العقل

ودي أكبر حقيقة...بس البقنع زول زي تاج السر شنو؟



تحياتي

Post: #3
Title: Re: بدون عاطفية فجة (الهلال سجمان )
Author: abuguta
Date: 07-23-2007, 09:01 AM
Parent: #1

Quote: ما تبقو ناس عاطفيين .. الحق حق



كلامك صاح ياعميد

لكن ليه ما قلت كلامك دا يوم الترجى
شفت ناس الاهلى مما شالو النقاط الثلاث الى اليوم فرحانين
ما قالو شالها لينا الحكم...
عارفين نفسهم بدافرو الى ان يصلو للفاينال
اسى خلينا ندافر كدا

شكرا ليك وعلى اخلاقك الرياضية وانت اصلا لو ما رياضى
كان فت من هنا زمااااااااااااااان

Post: #4
Title: Re: بدون عاطفية فجة (الهلال سجمان )
Author: محمد حامد جمعه
Date: 07-23-2007, 09:19 AM
Parent: #3

الهلال نال ( 6 ) نمر عن طريق الحظ و(الكلفتة ) ولا يوجد اى (شغل ) وترتيب وعمل مقنع وبالمناسبة هلال (87 ) الوصل النهائى امام الاهلى القاهرى كان يحرز نتائج مدعومة ومخدومة باداء مبهر
ما يحدث الان ان الهلال يدخل المباراة بمنهج رزق الكورة بالكورة واقرب مثال كورة امبارح دى ...

Post: #5
Title: Re: بدون عاطفية فجة (الهلال سجمان )
Author: abuguta
Date: 07-23-2007, 09:44 AM
Parent: #4

Quote: ما يحدث الان ان الهلال يدخل المباراة بمنهج رزق الكورة بالكورة واقرب مثال كورة امبارح دى



ذكرتنى عبارتك دى..واحد شعبى معارض من اولاد الشيخ..على قناة الجزيرة
قال الحكومة دى شغالة رزق اليوم باليوم
وكلامو دا ليه 3 سنوات...

اها كلامك دا قالو واحد اخونا قبلك ايام ناصراو
ولسع الهلال بدافر...
لكن دعواتك ياعميد...لو الهلال تصدر المجموعة
النهائى فى ام درمان
لكن اسى دواتك معانا ياشيخ ودى سياسة احمد الريح كل ما نخلص
من فريق يمشى للبعدو

Post: #6
Title: Re: بدون عاطفية فجة (الهلال سجمان )
Author: abas
Date: 07-23-2007, 09:48 AM
Parent: #4

والله يا مريخاب ويا مؤتمراب

في لعب الكورة ده عاوزينها تجي بي مزاجكم

اسمع يا جنابو

نحنا الهلال ده لو لعب شدد عاجبنا ولعبو لذيذ

اها اللعبو انتو نحنا لينا الغلب

ما تضايق لكن ده هلال الحركة الوطنية

Post: #7
Title: Re: بدون عاطفية فجة (الهلال سجمان )
Author: محمد حامد جمعه
Date: 07-23-2007, 09:54 AM
Parent: #6

Quote: ده هلال الحركة الوطنية


يا اخوى دا الحزب الاتحادى ولا الهلال

Post: #9
Title: Re: بدون عاطفية فجة (الهلال سجمان )
Author: abas
Date: 07-23-2007, 10:00 AM
Parent: #7

يا اخوى دا الحزب الاتحادى ولا الهلال

اها يا حبيب ورينا الاكبر منهم الاتنيني في البلد منو

Post: #8
Title: Re: بدون عاطفية فجة (الهلال سجمان )
Author: حمزاوي
Date: 07-23-2007, 09:56 AM
Parent: #1

اخوي محمد حامد
مسكاقمي

Quote: لكن الهلال الامبارح دا ما بجيب كاس البطولة ..

وشهد شاهد من اهله
اذا قال الرشاشة ود حمعة فصدقوه
محمد اخوي
ابوجريشة قال ليهم بدري لو عايزين تجيبوا كاسات محمولة جواً
امشوا ابدو من سيكافا وتعالوا ماشين

Post: #10
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 10:15 AM
Parent: #1

الاخ محمد حامد جمعه
كنت بصدد فتح بوست لتحليل فرقه الهلال (لاعبين-مدربين-خطط) بصوره موضعيه ومعرفه
هل هناك امكانيه ان يحرز الهلال كاس البطوله بهذه الفرقه لكن لا باس من استعمال بوستك ده
لايصال الفكره رغم تحفظي الشديد علي العنوان لا لشئ الا لانه مستفز اكثر من الازم وسيجعل كثير من الهلالاب
(very defensive) في مشاركتهم وتنتفي بذلك الموضوعيه

Post: #11
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 10:20 AM
Parent: #1

في البدايه يجب ان نثبت نقطه اساسيه
ان الهلال كان محظوظا للغايه في انتصاره امس
وان اسيك استحوذ علي الكره اغلب فترات المباره
ولو كانت هناك احصائيه لنسبه استحواذ الكره كما في المباريات العالميه
لكانت النسبه 60% لاسيك 40% للهلال علي اقل تقدير
وفريق اسيك امس كان يستحق التعادل علي اقل تقدير

Post: #13
Title: Re: بدون عاطفية فجة (الهلال سجمان )
Author: عبدالكريم الامين احمد
Date: 07-23-2007, 10:31 AM
Parent: #11

يابوب انت كلامك علي العين والراس وقل كما قال مالك في الخمر الهلالي ليوم امس...
لكن (محمد جمعة ده ماعندو اي حاجة) والناس دي غايظهم فرح الشعب السوداني بس..!!!
شوية فرحة وبهجة بفوز الهلال دايرين يقطعوها لينا في راسنا
عالم حاقدة علي الشعوب حتي في فرحتهم

Post: #12
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 10:31 AM
Parent: #1

مع الاعتراف بتفوق اسيك امس الا انني اعتقد ان هذه المباره كانت اسوأ
مباره قدمها الهلال في البطوله حتي الان خاصه شوطها الثاني فباستثناء مباره نيسارو
التي اقيمت بنيجيريا والتي لم اشاهدها عبر التلفاز (الاذاعه بتبوظ اعصابي
عشان كده بتجنب سماع مباريات الهلال من الاذاعه)
باستثناء هذه المباره والتي لا اعرف كيف كان المستوي العام للفرقه - غير الهزيمه القاسيه-
لم يظهر الهلال متباعد الخطوط في اي من مباريته كما ظهر امس
هذه نقطه مهمه جده ونحسب في صالح الهلال لان الفرق الكبري
والتي وصلت لمستوي معين من النضج الكروي هي وحدها التي تستطيع الانتصار
حتي وان لم تكن في احسن حالتها ومباره الهلال مع الاهلي القاهري خير دليل علي ذلك

Post: #14
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 10:37 AM
Parent: #12

سلامات يا كيكي

اخونا (محج) - حقوق الطبع وغيره محفوظه لعصام جبره الله- قال ده بوست كوره
عايزين نتكلم معاه في الكوره

Post: #15
Title: Re: بدون عاطفية فجة (الهلال سجمان )
Author: ابو عثمان
Date: 07-23-2007, 10:41 AM
Parent: #1

Quote: تصدق يا جمعة كلامك ده عين العقل

ودي أكبر حقيقة...بس البقنع زول زي تاج السر شنو؟




Post: #16
Title: Re: بدون عاطفية فجة (الهلال سجمان )
Author: Nesta
Date: 07-23-2007, 10:44 AM
Parent: #15

سجيمان يا سعادتك ..

Post: #17
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 10:46 AM
Parent: #1

ناتي الان للسؤال المهم
الان ونحن علي اعتاب دوري الاربعه
هل الهلال قادر بفرقته الحاليه احراز كاس البطوله؟
في تقديري الاجابه علي هذا السؤال ذات شقين
الشق الاول يتعلق بالهلال وامكانيته الفنيه و البدنيه وما الي ذلك
والشق الثاني يتعلق بالفرق المشاركه في البطوله
وسوف ابدا ياستعراض سريع للشق الثاني ومن ثم ربطه بالشق الاول

Post: #19
Title: Re: بدون عاطفية فجة (الهلال سجمان )
Author: Nesta
Date: 07-23-2007, 11:13 AM
Parent: #17

...........................

Post: #18
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 11:01 AM
Parent: #1

امكانيه وصول الهلال لدوري الاربعه:
الهلال تبقت له ثلاث مباريات

مع اسيك بابديجان
مع الترجي بتونس
مع الاهلي بامدرمان
اي ان الهلال له مباريتان خارج ارضه ومباره بارضه
حسابيا ونظريا الهلال محتاج ال 5 نقاط لكي يضمن التاهل بدون الاعتماد علي اي من
نتائج المباريات الاخري. لكن بما المباريات متداخله ففي تقديري الهلال عمليا محتاج لثلاث نقاط ستكون كافيه
لتاهله

Post: #20
Title: Re: بدون عاطفية فجة (الهلال سجمان )
Author: Omar Bob
Date: 07-23-2007, 11:22 AM
Parent: #1

اذا افترضنا ان الهلال سوف يتاهل من هذه المجموعه الي جانب
الاهلي القاهري وهو الاقرب للمنطق بالواقع الحالي
اذن سوف نستعرض فرقه الاهلي بالاضافه الي الاربع فرق من المجموعه الثانيه
وترتيبها بعد اداء كل منه لثلاث مباريات علي النحو التالي
1/ النجم الساحلي التونسي ...7 نقاط
2/ الاتحاد الليبي............4 نقاط
3/ شبيبه القبائل الجزائري...3 نقاط
4/ الجيش الملكي المغربي.....3 نقاط

الملاحظ ان فرق هذه المجموعه متقاربه المستوي جدا وم معروف من الذي يمكن ان يتاهل منها
عكس المجموعه الاولي والتي يغرد فيه الاهلي خارج السرب متبوع قريبا بالهلال و الترتيب كالاتي
1/ الاهلي القاهري...........9 نقاط
2/ الهلال السوداني...........6 نقاط
3/ اسيك ابيديجان العاجي.....1 نقاط
4/ الترجي التونسي...........1 نقاط

يتفوق شبيبه القبائل الجزائري علي الجيش الملكي المغربي بفارق الاهداف
كمايتفوق اسيك ابيديجان العاجي علي الترجي التونسي بفارق الاهداف

Post: #21
Title: Re: بدون عاطفية فجة (الهلال سجمان )
Author: hatim ibrahim
Date: 07-23-2007, 11:49 AM
Parent: #1

.
سلام محمد حامد جمعة
Quote: بدون عاطفية فجة (الهلال سجمان )

لو كنت ختمت عنوان البوست بكلمة ( امبارح )
كنت حأوافقك بنسبة 100 بالمية
ولكن لو خليتو بالشكل المطلق ده
فأكيد بختلف معك 100 بالمية
لانو الهلال في السنتين الفاتو ( فرض ) نفسو عربيا وإفريقيا
وكل الأندية بقت تعمل ليهو ألف حساب
وبعيدا عن العاطفة .. الهلال بالفعل فريق ( كبير )
لا يقل عن الأهلي القاهري ..الترجي .. الرجاء البيضاوي .. اسيك ابيدجان
وكل الأندية المعروفة في القارة السمراء وفي الوطن العربي
وكونك تقول (( الهلال نال ( 6 ) نمر عن طريق الحظ و(الكلفتة )))
فدي فيها تجني كبير على نادي كبير...

**
أما بالنسبة لامبارح
فالهلال فعلا كان سجمان ورمدان كمان ..
وبدون مبالغة ..
الهلال وقت انهزم من الرجاء البيضاوي 5 / صفر
في البطولة العربية
ما كان سجمان بالصورة الظهر بيها امبارح ..
**
ولأنو الهلال عودنا دائما على الأداء الجيد
والظهور بطريقة مشرفة
حتى وهو خسران
حتلاحظ - حتى على صعيد المنتدى هنا -
انو الهلالاب ما قادرين ( يحتفلوا)
لانو الأداء الشفناهو امبارح
ما بيشبهنا ..
ــــــــــ
وطبعا لو كان المريخ هو الانتصر امبارح
الصفحة الأولى دي كنت حتلقاها كلها باللون الأحمر
وده الفرق ( التاريخي )
بين الهلال والمريخ
والهلالاب والصهاينة

**
نتمنى من الهلال العملاق ( إدارة وجهاز فني ولاعبين )
تدارك الأمر قبل المباراة القادمة
وثقتنا كبيرة في وصولهم لمنصة التتويج بالبطولة
ان شاء الله ..

Post: #22
Title: Re: بدون عاطفية فجة (الهلال سجمان )
Author: محمد حامد جمعه
Date: 07-23-2007, 11:54 AM
Parent: #21

شكرا يا بوب

واضيف اليك ظاهرة ستكون قاصمة للهلال وهى تدنى مستوى فريق الهلال ففى حيت يصعد ايقاع الاداء لدى كل فرق المجموعة يتراجع اداء الهلال

Post: #23
Title: Re: بدون عاطفية فجة (الهلال سجمان )
Author: بدرالدين يعقوب
Date: 07-23-2007, 12:03 PM
Parent: #1

Quote: يا جماعة مع حبنا وتقديرنا لاى انتصار كروى لكن الهلال الامبارح دا ما بجيب كاس البطولة ..

ما تبقو ناس عاطفيين .. الحق حق



ياجمعة لكل كورة ظروفها . وانا في رائي ده الوقت الحقيقي والفرصة الوحيدة التي ممكن

تستطيع فرقنا ان تحقق فيها بطولات , بوجود محترفين علي مستوي فني وبدني عالي , ولو الفرصة

دي ضاعت لا يمكن ان نحقق بطولة . مبروك للهلال والمريخ النصر, وموعدنا مع بطولة قادمة للسودان

باذن الله

Post: #24
Title: Re: بدون عاطفية فجة (الهلال سجمان )
Author: محمد حامد جمعه
Date: 07-23-2007, 12:15 PM
Parent: #23

صحيح يا جماعة انتصارات الهلال والمريخ والمنتخب الوطنى حاجة كويسة وربنا يزيد ويبارك بس كمان الكلام عن تصفيات وتدرج لنهائيات حاجة والفعل المصاحب حاجة تانية هسة مثلا نادى الهلال موقفو ما بطال كسب مبارتين فى ارضه ولكن السؤال هل كان مقنعا هل انتصر بمظهر يطمئن الاجابة لا انتصر الهلال بدرهم حظ وبالتالى المفروض الناس تبحث بعمق فى كمية سلبيات مصاحبة للاداء مثلا ملاحظين انو اداء دفاع الهلال مش مظبوط بدليل شنو دخول ثلاثة اهداف فى مرماه - كان ممكن تزيد امبارح - ناهيك عن الاداء العشوائى خالص لكامل طاقم الدفاع ، اما الوسط فحدث ولا حرج فمن المؤكد ان تاثر بالاصابة هيثم مصطفى اربك تماما تلك الخانة وطاقمها بالكامل فيما تبقى الحسنة الوحيدة فى خط الهجوم وححيث قودين وكلاتشى ويمكن لاى مدرب شفت يملك مدرسة مراقبة صارمة ان يخرجهما نظيفين كما حدث بالامس مع كلاتشى

Post: #25
Title: Re: بدون عاطفية فجة (الهلال سجمان )
Author: abuguta
Date: 07-23-2007, 12:31 PM
Parent: #24

ود جمعة دى طبعا كورة مش سياسة

مع انو ما رديت على فوق ..لكن جيتنا فى اللحم الحى
فريق الحركة الوطنية...

امشى اتفرج فى كاس اسيا وتعال..

شوف الفريق السعودى يتهبع كيف
وبكرة يلعب الفاينال..

ولا اقولك ارقيك شوية

شوف كاس كوبا اميركا
السامبا عملت البدع
على الرقم من ترشيح الارجنتين
لكنها خالفت المنطق
المنطق بقول الكاس للارجنتين
لكن المدرب دنقا قال لا
شفت كيف..اها نحن هنا بنخالف المنطق
وبقولك الهلال هو تانى المجموعة
ولا اتنح عقلى شوية( اتنح كلمة خليجبة)
اقولك قول الرشيد المهدية الهلال ينافس على المركز الاول
كويس ياسياتو
ذاكر كوريا وتعال....لكن اسى سويتو شنو فى منكوبى السيول
والامطار...قالو فى ناس مضررين سكنوهم فى الفلل الوزارية
الكلام دا صحيح

Post: #26
Title: Re: سجمان إنته
Author: نادر
Date: 07-23-2007, 12:36 PM
Parent: #1

متابعك يا عمر مع التحفظ على المكان وصاحب المكان لكن عشان خاطر عين ...
ده كان رأيي من بدري منذ بداية البطولة إنو الهلال فيهو شيء غلط ومستواه والضجة الحولو وحول انتصاراتو أكبر من إمكانياتو وأصدقك القول برغم هلاليتي الصارخة التي تعلمها أنت جيّداً إلا أني حتى الآن مندهش من الانتصارات المتوالية الحاصلة دي ... هناك كم هائل من القصور الفني في أداء لاعبي الهلال لعل أبرزها أن لاعبي الهلال لا يجيدون الضغط على الخصم وهو تكتيك أصبحت كل الفرق العالمية تعتمد عليه في انتصاراتها وأصبح الفريق الذي يجيد لاعبوه الضغط على الخصم (بكرة وبدون كرة) هو الأقرب للفوز ... بنظرة بسيطة على ما حضرته من شوطي مباراة أمس نجد أن لاعبي الهلال كانوا يعتمدون على السند الجماهيري الكبير وتركو المباراة لخصمهم قائد الفريق هيثم مصطفى كان في أسوأ حالاته وهو بالمناسبة أكثر لاعب لا يجيد الضغط على الخصم ويعتمد على تغطيات زملاءه (عمر بخيت مثلاً) ... علاء الدين جبريل مستواه لا يؤهله للعب في الهلال ... ممكن يلعب رايضة قفز مسافات طويلة بس كرة قدم دي sorry ومثله مهند الطاهر لا أعلم كيف ضم كشف الهلال هذا اللاعب ... الناس دي عايزة شغل كتير قبل أن يرشحوا للوصول لربع النهائي، وأعتقد أن المحكات الحقيقية ستبدأ أو بدأت منذ مباراة أمس، فالقادم أصعب وأصعب كما ترى ... واصل تحليلك الفني أرى أنك تسير في طريق الحقيقة التي قد لا تفيد الكثيرين ... حلل أداء الهلال فنياً وسترى أن ما حدث فيه شيء من حتى.
أمس سألتني مريم عن النتائج وكانت حايمة وجاية في البيت ما بتحضر في الكورة قلت ليها الهلال غلب 2/1 والمريخ اتعادل مع الاسماعيلي في القاهرة قالت لي : ياخي الناس ديل كويسين أنت متحامل عليهم يا نادر ... أديتها ضحكة وقلت في سري "الله يكضب الشينة" فعلاً بواقع النتائج الهلال والمريخ بخير ومستواهم متطور ومنافسين فرق ليها وزنها، بس بواقع الأداء فنياً من خلال نظرة كروية محترفة الأمر مختلف تماماً.
تحياتي لك ولأم العيال ولعموم الأهل والأحباب بطرفك
نادر
(وش مكشر لي صاحب البوست وهو قافل الباب وماشي)

Post: #27
Title: Re: بدون عاطفية فجة (الهلال سجمان )
Author: omar altom
Date: 07-23-2007, 03:06 PM
Parent: #1



مستر جنابو

مثلك مثل مستر فرانكلي لستما معنيين

بفوز او هزيمةاو تواضع الهلال لسبب بسيط هو انه ليس لديكما فريق بمستوي هذه البطولة(دوري

ابطال افريقيا) نحن وحدنا الذين نقارع الكبار ....نجلبهم الي ملعبنا............نلعب

معهم....... ..... ونجندلهم.......بعد ان يقدموا فروض الولاء والطاعة للهلال ويذهبون (الي حال

سبيلهم) وكل فريق يحمل ذكري سيئة من السودان!!!!! ....اما ان نفوز ام لا!!!! نظهر بمظهر

باهت ام مشرق نحرز البطولة ام لا !!!!!!!....(مش شغلك)!!!!!!.هذا يسمي ( دوري الكبار) اي

الابطال ......فمعذرة ياشباب ....انتما في المكان الخطأ.....

احترامي كبير

Post: #28
Title: Re: بدون عاطفية فجة (الهلال سجمان )
Author: Abd Alla Elhabib
Date: 07-23-2007, 05:30 PM
Parent: #27

Quote: يا اخوى دا الحزب الاتحادى ولا الهلال
..!!! "You Just said "NO POLITICS
!! It itches you ..huh

Post: #29
Title: Re: بدون عاطفية فجة (الهلال سجمان )
Author: وليد شريف
Date: 07-23-2007, 06:23 PM
Parent: #28

ياجماعة الهلال محتاج لطبيب نفسي بارع جدا لياهله نفسيا من الاحباطات التي تلازم اللاعبين بمجرد احراز هذف في شباكه وايقاف الانهيار الفجائي الذي يصاحب اداء اللا عبين مباراة القاهرة ليست بعيدة لازم مسلسل الاحباط ده ينتهي مش كفاية احباط انهم بيلعبو في ظل حكومة ذي العندنا دي .