شاشاي.. يا اخواننا وينا الريدة؟!!

يا ناسنا هوي سلام
يا الـ كلكم كِرام
مبروك بداية العام
تتبارك الأيام

نبداه بي شاشاينا
ونقعد نجغِّم شاينا
فرحتنا تبقا باينة
وتاني التكون الكاينة

نتصالح ما نتخاصم
ننسى الأمس نتسالم
بي كل زوق نتناضم
سامعني يا ابن آدم!؟

البزعل والبشاتِم
والبِملى الدار مآتم
دايما للفرحة كاتم
صبحو ومساهو عاتم

يا اخواننا وينا الريدة؟!!
من بدري طلقت قيدا
وهربت بقت بعيييدا
خلوها تعود لي بليدا

خلونا نعيش أحباب
نتلم نبقا قُراب
نحيا ونموت أصحاب
ما تقفلو لينا الباب

لو كان بيّضنا النية
وشلنا القباحة شويّة
نتنازل من جهوية
وسوداننا يكون هوية

مرحب جراب الراي
سيدي و حوار فقراي
للخيل عقيد جاراي
جاييك و ماني براي

***

جاييك معاي القوم
حاضرين معاك اليوم
لي قولك المعلوم
للفارغة مافي لزوم

***

نتلاقى ناس أصحاب
مغنى و فكر و آداب
لا جيهة لا أنساب
(درب السياسة خراب)

الطيب سيد القوم
سمحا ختاك اللوم
بلحيل للخير لَزوم
وبي الشكرة دوام ملزوم

حبابو شيخ ام مرِّح
جيتك للناس تـفرِّح
تطب الكان مسرِّح
وتداوي لي المتجرِّح

من جاب لنا ناس منصور
ونزار بندورو حضور
بخاري ويحي حبور
وباقي الشباب والحور

سوداننا يا سماحتو
ديما مخضرة ساحتو
شعوبو زايدة ملاحتو
وداميا تفتش راحتو

جيب الأدب والنمة
خلينا بس ننجمة
بي فرحة وكيف ننتمَّ
وفي بلد الخير نتلمِّ

معكم بجر شاشاى
اهلى البعقدو الراى
اخوى ودعقيد سواى
ود ابواتى حداى

انا ليكم بضرب القوق
ياهلى القراب والفوق
من غيركم دمى ما بروق
وشوقى ليكم زايد شوق

الطيب وليد طابت
وين لياليك الغابت
روحى ليك اتشابت
خيول ودعقيد ما خابت

اليكم بقول نشيد
وعندكم كلام الريد
سودانا بقى طريد
تباشيرنا بالعام الجديد

مرحب حباب ابقوتة
يا الدراك ما بنفوتا
مفرِهدة مي مكبوتة
وبنحب ناسا وبيوتا

اتحَكّر اُطلق النوق
وفوق اهلك سوي القوق
انده لي الناس الفوق
واملاهم ريدة وشوق

قول ليهم نحن حُنان
جيرتنا سلام وأمان
ما خيّبنا العشمان
وجرابنا دوام ملان

يا ناس بلدنا حليلا
طريت جروفا ونايلا
متين اعود وامشيلا
في الهاجرة اضوق مقيلا


طريقت خُدُرت الساقية
وجداولا المتلاقية
الـ لي قشيشا ساقية
وفوقو الغصون مِتّاقية

ود عقيد

يمكن كلامي ما شاشاى .. لكن بدور أدلو بدلوي .. :

***

نحن يانا .. و أنتو ياكم ..
ياها ذاتا الوجوه أل من زمان
و نفس النوايا الطيبة ..
نحن و إنتو .. كنا و لا زلنا ... و يمكن نكون
نبْذُر الآمال للخلِق .. و نحن أحوج ما نكون
( و كل المسألة .. أن نكون أو ما نكون )
منو ال من جدودنا فارق ترابو
و سلك مِتْلَنا ... درباً للسفر مجنون ؟
أرْكِزْ يا بلد

و نحن يانا و إنتو ياكم
نفرد جناحاتنا صوب الغربة
طابقين جراحاتنا سنين و دنين
نعاود السفرة بعد السفرة
لا فتر عصا الترحال .. لا عزيمة تلين
نضلل سماواتنا و سماواتكم
و نرجع نحن يانا و إنتو ياكم
تلاقونا و نلاقيكم :
يا حشاى
و حليلك إنتي يا حبيبة قساى ..
يا بعد جوع روحي الطويل .. طاعم عشاى
نفس السؤال الما بارح خيالاتنا و خيالاتكم
يا ألف مرحب و يا حبابكم
حالكم و أحوالكم ..؟
وليداتكم ..؟ غنيماتكم ؟
نعل ما في زولا حِرِد عشاهو
فلانة عساها .. و فلان داك عساهو
لا تكِلّوا من كتر السؤال .. لا نحن من الردود بِنْمِل

نفس الإمتحان و نفس الدرِس
و إنتو ياكم .. لابسين من زمان ذات اللبس
في خريفكم و في شتاكم
لافحات نفس التياب
شايلين نفس العِصي
متوشحات توب القدر الما بِتْعَصي
فاردين شراع الصبُر .. شاقين بحر الصعاب

نحن يانا و إنتو ياكم
جبلا و الله ما بهزو الريح
تاريخاً كِتَاُبو .. سِفْراً ما بيلزمو التوضيح
لساناً تصاريفو عجَب ... رَطِن أعاجمو فصيح
و نحن يانا و إنتو ياكم
واقف محلو زمن .. قادوس حياتنا و تِرِس حياتكم
لا بِقَدم لا بِأخّر ..
زى ساعات الميادين العتيقة
و زى عُنُق الحقيقة ..لا بِتْلَوي لا بِنْكَسِر
إمشي يا يا بلد .. ما تقيف محلك سِرْ
أركز يا بلد

و إنتو ياكم
مضمونين تمام .. ضمان موية الدميرة
معجونين شديد بي طمْينا .. حنة و ضريرة
أعلام ترفرف فوق كل القمم
مزاحمين كل الأمم
شهوداً لا يَحَلْفُوا يمين لا بِأدّوا قَسَم
مواثيق عهود و بصمات ذمم

و إنتو ياكم
بي صيامكم و خم رمادكم
معفّرة بي أديم الأرض جِباهْكم
سديدة في قلب الهدف رمية سهامكم
و كل البلاوي الجات مسامحانا و مسامحاكم
في المال و الولد ..و في هامات مقامكم