أولاد شيوخ البطانة.. (يهمبتون) المنبر..

لسان حالهم:
الهمباتة نحن أصِلنا معروفين
غير حق الرجال ما عندنا تعيين
(المنبر يمين) نشيلو حُمرة عين
...

وبالفعل.. (لكن بلا حُمرة عين).. بل بعين عميقة النظر، بعيدة غور البصر
وبحروف واعية.. وكلمات فهمانة، وعبارات تريانة..
أكتسب المنبر وجها زاهيا بهذه الكوكبة الجديدة التي انضمت له..
ثلة منهم من عيال بطحان وآخرون من هنا وهناك..

هذا ترحيب متأخر (بسبب الغيبة) بالأقلام النيرة التي أضافت كثيرا للمنبر..
الوزير الدكتور ابو حريرة
والفنان عاصم البنا
والشاعرة بت ود طلحة
أيضا ترحيب بالأستاذ الفاتح يوسف جبرا
وبالكاتب الساخر معاذ حسن

وكذلك الشكر لمحمد المرتضى حامد، وفاروق حامد محمد، والطيب شيقوق
وكل من أسهم في رفد المنبر بهذه الكوكبة الرائعة..

ولحديث الهمباتة بقية..

التحية لهؤلاء النجـــوم الجد د
ومــرحب بعودتـــــك مجددا الثائر دوما ودعقيــــد المفيد

حباب ود الاهل ود عقيد ..
سيد الفهم والرأى السديد
السلام مو بالليد..
قلدة محنةورجعة بعيد..
ولمة بعاد بعد شوق شديد
وفرحة اهلنا وقدح العيد..
****
نيابة عن اهل البطانة واهلى البطاحين
بقول ليك حبابك يا الحنين
الجيت بعد غياب بتفقد الطيبن
تسلم يا ود الجروف والطين
شكرا غيمه ومطرتين..

اسماء الجنيد / مسقط

سوما
إخيتي التومة
حبابك وليكِ القومة
أهلِك تجار السومة
الما ببيّتوك مظلومة

أشكر لك هذا الترحيب الحنين
لك ولأهلك عيال بطحان عظيم تقديري ومحبتي
من أتى منهم ومن سيأتي
ففي حما داركم الأمان
وفي رفقتكم المنعة والأخوة

أخي محمد الحسن
لك التحية والتقدير
ولك الشكر على الترحيب بالعودة
وبقدوم عيال البطانة ومن زاملهم إلى المنبر
فإني آنست فيهم ملامح سودان نعرفه
سودان كِدنا نفقد بوصلته قبيل إيابهم
ولكنهم أعادوا لنا تلك الروح الهائمة

مودتي

رأينا كلمة( البطانة ) فهفت النفس لمراتع الصبا
ورأينا كلمة ( همبتة ) فتحسسنا ( عكازنا المضبب )

معك أرحب أو أعيد الترحيب بالكوكبة التي ذكرتها

وأرحب وكلي سعادة بعودتك أخي ود عقيد

شقيقي عاطف عمر
تحياتي والمودة
بمعرفتك ازدادت محبتي للبطانة وأهلها
وازداد تقديري لعبقرية رفاعة ومن أنجبت
منذ الحاردلو وبابكر حتى عاطف عمر وصديقه وراق ومن يليكم.

لك المحبة

Dear Abdallah
Quote:
حباب ود الاهل ود عقيد ..
حباب ود الاهل ود عقيد ..
سيد الفهم والرأى السديد
السلام مو بالليد..
قلدة محنةورجعة بعيد..
ولمة بعاد بعد شوق شديد
وفرحة اهلنا وقدح العيد..
****
نيابة عن اهل البطانة
بقول ليك حبابك يا الحنين
الجيت بعد غياب بتفقد الطيبن
تسلم يا ود الجروف والطين
شكرا غيمه ومطرتين..

Since I am also from Rufaa, the capital
of Butana, I will say Welcome Back, and let us develop the discussion on your post about the local administration system in Northen, and Central Sudan
Regards

ومعـك نـرحـب بهـذه الكـوكـبة النيرة المـفيدة كما ونرحـب
باقلامـهم التي لا نشـك في انـها سـترفـد المنبر بكل ما هـو مفـيد

مـرحـب بعـودتك اخـي عـقيد

واحـترامـي

هلا بود عقيد وألف مرحبا بك محاورا مهذبا جميلا

أين كنت يا رجل ؟ أشتقنااليك والى مداخلاتك

الاسلامية الجميلة البعيدة عن أهل الانقاذ,,,,,


الف حمدالله على سلامتك ونرجو ان لا تغيب

أخي الأكبر فاروق
لك التحية
أكرر لك شكري على إسهامك في (تطعيم) المنبر بهذه الأقلام الواقية من الانحطاط.

أحد زملائي في العمل علق بأن (كتابة فاروق أصبحت ممتعة في الآونة الأخيرة)..
فحاولت تفسير الأمر بأنك وجدت (ربعك) الذين تألفهم ويألفونك فانطلقت القريحة
وأصبح البساط أحمدي..
ولازلنا ننتظر منك الكثير من الإبداع

لك تقديري

أخي العزيز الخير
لك التحية والتقدير
المنبر عامر بكم وبمن ضمهم مؤخرا من أقلام عملاقة
لك وافر شكري
ومحبتي

عزيز أبو نورة
لك التحية والتقدير
هاهم أبناء بطانة الخير يأتون تباعا
وهاهي عبقرية رفاعة تتجلى
أي سحر تخبئه هذه الأرض الساحرة في أبنائها!!
أي إبداع تسقيهم، وأي رجولة تغذيهم!!
مرحى بكم قدامى وجدد

وشكرا على تذكيري بذلك البوست..
ولنتعاون على إعادته للواجهة ومواصلة النقاش
في موضوعه: متى تعود النظارة لقبائل الشمال والوسط؟!!

لك تقديري

.
مرحبا بعودتك اخي عقيد

مرحبا ود عقيد

افتقدناك كثيرا .. عاوزين نتشاكل شوية

ومرحب بكل (بطانابي) لو كان بجمال من رحَبت بهم هنا

مرحب شيخ العرب مرحب خريفنا الجانا، مرحبتين حابو يتباشربنو ديارنا، تركت مكانك شاغرا ، فى ناس جاتها رجفه قالوا طفشنا ود عقيد.

ابن عمي الهمام أبو محمد
لك التحية والتقدير

Quote: فى ناس جاتها رجفه قالوا طفشنا ود عقيد.

يطفشم ابوي حامد البطحاني بركة النبي

بيني وبينك طفشتي جات بي فايدة..
فلعل هذه الوجود الجديدة النيّرة كانت ترى المكان مزدحما
أو ربما كانت (كراعي حارة).. فما إن ذهبت حتى (ترطب) المكان
ببهاء القادمين..

لك المودة

أخي العزيز حيدر حسن
لك التحية والتقدير
ظللت أتابعكم من الخارج إلا أنني افتقدت
الحوار وحتى (الشكَل)..
بالرغم من أن بعض الشكل (شكَلَاً ما عندي ليهو رقَبة)..

مودتي

شقيقي حاتم ابراهيم
لك التحية
ولك جزيل الشكر والتقدير
ظللتُ موجودا في المنبر بوجودك وأشقاء آخرين
بيني وبينهم اتفاق جاء بلا اتفاق، ووداد بلا سابق معرفة
وهم مشتكر ورؤية متطابقة.. تجعلني أطمئن على كوني في الاتجاه الصحيح.

مودتي

الأخ الكريم عبدالله عقيد

لديارك العامرة عودا أحمد
رعاك الله ياكثير المحـا مد
مـن شــر نفــث العـقـــد
ومـن كـل عـيـن تـحـســـد
مرحبا بك فى دارك ونحنا ضيوفك وانت عزيتنا ورحبت بينا
ازداد المنبر ألقا وبهاء بعودتك وفى شوق لسماع حديثك
كما قلت:ـ( ولحديث الهمباتة بقية..)
وهاك البدايه من الخال الشيخ عبد العزيز قال:ـ
نحنا بنركب التيس البسـولو صـريمة
ونحنا السـلط الهـيبة هيلـنا قديمة
نحنا أخـوان البـرمولا بـريـــمـــة
نحنا دربـنا زلقيبة ومقـابل الشـيمة
ولك الود والتحية باسم كل أولاد بطحان(عيال شلاعة)
سمية الحسن محمد طلحة

Quote: حباب ود الاهل ود عقيد .. سيد الفهم والرأى السديد السلام مو بالليد.. قلدة محنةورجعة بعيد.. ولمة بعاد بعد شوق شديد وفرحة اهلنا وقدح العيد..

مرحيا بعودتك اخى ود عقيد
وعبرك مرحبا مره اخرى بابناء شيوخ البطانه

العزيز ود عقيد
مرحبا بعودتك اولا .. فقد طالت غيبتك
ومرحبا باهل البطانة ..
اخي ود عقيد
مثلك من يجعلون المنبر مكانا اكثر احتراما لابداء الراي وللحوار ..
ومثلك من يجعلنا نعود كلما انقطعنا بسبب خروج عن النص هنا وهناك..
لتبقى انت وامثالك وليذهب الزبد جفاء.
لك كل مودتي

أخي وأستاذي البشاري
لك التحية والود
دائما تجعلني كلماتك أزداد زهوا وأتمايل طربا
شكرا لهذا الكرم.. وأرجو أن أكون دائما عند حسن ظنك.

لك محبتي

ود عقيد


مرحب بيك وبي ضيوفك


وعندنا سؤال عادة في شعر البطانة ما ندر تجد كلمة امي او يمة, رغم انهم يسافرون كثيرا حتي خروجهم لصيد لاتجد كلمة يمة عندهم , ولكن في الاونة الاخيرة سمعت احد شباب البطانة يلقي احد قصائده وررد كلمة يمه مرتين في القصيده

ود عوج الدرب
لك التحية والتقدير
حرصي على تسلل الردود جعلني أؤخركم.. حتى جاء الشباب
وردوا على سؤالك..
وسأحاول مناقشة المعوضوع معهم فيما بعد

لك تقديري

أخي علي بشير
لك التحية والتقدير
بك وبالأحبة يزدان المنبر ويكتسي روح التسامي
معكم ظللت على الدوام
ومعكم أعود لننشر المودة معا

لك ودي

بت شيخ البطانة بنادِرا وحلّالا
بيك يزهو المكان أنوار تشِع تتلالا
عيال شلّاعة أهلك ما بيعرفو فسالة
مالهم للجميع لكين عروضهم لالا

مرحبتين حباب ودعقيد



ومراحب الاف بالشيوخ البطانيين من ود اب حريرة وبت الشيوخ بت الحسن طلحة

واقرانهم وأبناء عمومتهم في النسب وفي الهــوى,

ونحن منهم بالتأكيد

هنبتة مطلوبة وفي محلها, حتى لا يصبح المنبر نهبا للترابلة,


أحمـد الشايقي

هلا هلا يا ود العقيد كلامك فيه ريحة همبريب الطرفه كلامك يفوح منه عطر النال .
سمعت بالبوست ده ومن الصباح بروغ ليهو والحمد الله عترت فيهو عترة سااااااااااااى وعايز اهمبته هو ذاااااااتو من حلاتو اعملوا حسابكم . وهمبتي انا زى همبتة مضوى ود السيال الدخانابي (اسد البطانة) الرفقاهو فيها ن الاغراب العجبة ود يوسف والتاي ود ابي سمرة من دندرنا وطه ود ابراهيم القلع من حفيرة ومكامنهم اطراف اللباتور وضهاري البطانة .

نحن مشتاقون لنسمع عن نمة ود الشوبلي في بطانة ابي على وحسان وغناء ود البناء في كرم البطاحين
وود شعيت وود امنة في سماحة الرجال وخبة الجمال .

هيا نتحكر فيه ونحكي عن بلدنا وعن ثقافتنا وعن اهلنا الطيبين و باخوانا واخواتنا سمية بت الصالحين وسومة بت اللحويين والبطاحين ما تقصروا خلوهو يبقى ملاذ لكل واحد راسه ضارب يرتاح وينجم فيهو .

لك معزتى اخي ود العقيد

شيقوق

من اهلكم القواسمة ناس الدندر
نظارة منصور ود العجب

أهلا بطلّة الأخ ود عقيد.

حقّا، الشخصيّات التي أتيت علي ذكرها كسب عظيم للبورد زادته ألقا و بهاء.
قرأت معظم مساهماتهم النيّرة و شعرت بالفخر و الإعزاز لما يجمعني بهم من روابط الدين،الدم, اللغة، و الوطن. أطّلاعي علي حصائد أقلامهم السايبيريّة عمّق من قناعتي الفكريّة أنّنا نحن السودانيين عرب العرب و أعربها.


طارق الفزاري
ود زينب

أخي العزيز ود زينب
لك التحية والتقدير

Quote: أطّلاعي علي حصائد أقلامهم السايبيريّة عمّق من قناعتي الفكريّة أنّنا نحن السودانيين عرب العرب و أعربها.

وكاذب من يدعي غير ذلك.
لم أكن أدرك أن بعضنا يتشكك في هويته لولا هذه الزوابع التي أثيرت مؤخرا..
ولكنها تظل (زوبعة) ستقضي عليها حقائق الواقع والتاريخ والثوابت التي لن تزيلها هذه الخزعبلات
ستثبت البطانة سافل وصعيد، وستثبت كردفان شمال وجنوب، وستثبت بوادي النيل الأبيض وسنار، وستثبت
حضائر النيل حتى دنقلا العجوز.. وستثبت أرجاء دارفور.. بأن السوداني عربي، أصلا، ثقافة، لغة، ومسلم دينا..
لن يغير قناعاتنا الراسخة من يسعون لطمس هويتنا ممن يفتقدون بوصلة الهوية
ولا المتنكرين لأصلهم من بني جنسنا، الذين (استغربوا) أو (تأفركوا) بفعل غسيل الذهن
الذي جعلهم ينكرون دينهم وينكرون أصلهم سعيا وراء لعاعة ثقافة مفرنجة هشة..
سيظل هؤلاء معلقين في الهؤاء يتأرجحون بين مطمح خُلّب لن ينالوه، وبين منبت راسخ طمحوه..

لك المودة

ود عقيد عوداً حميداً

حبابك وحباب ضيفوك اولاد وبنات القبايل،بالرغم من اني في الجزء الشمالي الغربي من السودان ولكن البطانة اقرب منطقة لبيئتي من حيث الثقافة والمفردات والنشاط الرعوي وعليه انشاء الله سوف اكون متابعاً..

العزيز شيقوق..

يازول والله صحيت فينا مفردات تقول الزول يشيل مخلايتو وجرابو هسع يرجع لضهاري السافل

Quote: بروغ .. وضهاري ... نتحكر .. خبة الجمال

Quote: يازول والله صحيت فينا مفردات تقول الزول يشيل مخلايتو وجرابو هسع يرجع لضهاري السافل

يا حليك يا ود اعمى إت قايل ضهاري السافل زى ضهاريك الاديتها قفاك . يا حليل ضهارينا الزمان وقت بنشيل اللقيمة والبصيلة والزيتة في مخلايتنا وندرعها في كتيفاتنا ووقت يجى وقت الهجير نتحكر ليها تحت الهجليجة ام ضلا رهيييييييييين . تفتح مخلايتك زى الفاتح ليك بئر بترول ام بيوض والسمبرمعششة في راسك والبوييض قائم بطرفك تحكحكوبالنجامة بجاى وبجاى لحدى تتوسر في محل نضافتك وتقعد تاكل في لقمتك الاحلى من البيتزا والكنتاكي . ويجوا فيك اهلك العرب فازعين وتابعين اتر بهائم مسروقة يطلبوا منك حبة شاى حب للسبارس وتديهم ويمشوا يلحقوا الابل يجوك راجعين بقرعتهم مليانه لبن النياق المري - يا حليل ايام زمان.

نواصل

شيخ العرب شيقوق
لك التحية
رديت على مداخلتك الأولى.. فنزل الرد تحت مداخلتك الثانية
ذلك بسبب (تزاحم الأكتاف) تبارك الله.. وعدم استطاعتي ملاحقة المداخلات
أول بأول..
أرجو أن يعذرني بقية الأخوة..
وأنا ماشي (بالترتيب) والسايقة واصلة، والمحبة أيضا واصلة
الدار داركم..

مودتي

أخي عبده جاد الله
لك التحية والتقدير

Quote: بالرغم من اني في الجزء الشمالي الغربي من السودان ولكن البطانة اقرب منطقة لبيئتي

أها إنت زولي تب..
أنا في مكان (رمانة الميزان) بينكم وبين البطانة..
بل أدعي أنها كلها البطانة، لولا أن النيل قسمها إلى نصفين
كل شيء في جانبيها يشبه الآخر..
البيئة نفسها مشتركة.. قليل من الاختلاف في طريقة نطق بعض الكلمات..
ولا شيء آخر مختلف.

لك المودة

الأخ الأديب الطيب شيقوق
لك التحية ولك الشكر
ريحة همبريب الطرفة وعطر النال أصبح فوحا على المنبر منذ قدوم
هذه الكوكبة النيّرة التي لم تكتف بإبداعها فقط، ولكنها جعلت
(شعرة جلد القدامى تنطلق).. وأنعشت فيهم روح الإبداع فتدفق العطر
من أردان المنبر..
عدد من الإخوة أبناء البطانة هنا.. اعتبروني من أبنائها.. عندما
قرأوا هذا البوست..
أنا بالفعل أنتمي للبطانية حُبا وصدقات واستمتاع بأدبها وعبقريتها
وإن كنت من مكان يجاورها.. حيث يفصلني عنها (مقطع بحر).. بغرب كبوشية.
ربما يعترض علي قيسان ويعيدني إلى رشدي بتأكيده انتمائي للبطانة..
فبلدته على مرمى حجر من بلدتي وهو ابن البطانة الفخور بانتمائه لها.
(لا أخفيك يا الطيب) هناك ما يربطني بالبطاحين.. بحبل قوي.. وهو حبل النسب.
فأجعلوني منكم وإليكم.. (أدوني التابعية) وسأهبكم نفسي وما أملك..

لك وللبطانة بجميع بطونها المحبة
ولنا عبق أريج البطانة وعبقرية أبنائها المبدعة

شيخي ود الشايقي
لك التحاياالشُداد

Quote: واقرانهم وأبناء عمومتهم في النسب وفي الهــوى

أها ديل نحن..
أقرانهم وأبناء عمومتهم في النسب وفي هوى البطانة وحبها
أنا وانت وكثيرون معنا.
دعنا نمهد لهم تمهيدا
فيعطونا من الإبداع مزيدا

لك الوداد

مرحب بكل أهل البطانة معنا في دارهم ..
عذراً إن لم يجي ترحيبنا بهم في البوستات المعنية ..


تحياتي يا ود عقيد وعوداً حميداً ..

أخي الحبيب معتصم
لك التحية
مرحبا بك وبأهل البطانة..
ولا أشك أن ترحيبك قد وصل وأن عذرك قد قُبِل
فهذه شيم الكرام.. وأنت منهم

محبتي

Quote: وعندنا سؤال عادة في شعر البطانة ما ندر تجد كلمة امي او يمة, رغم انهم يسافرون كثيرا حتي خروجهم لصيد لاتجد كلمة يمة عندهم , ولكن في الاونة الاخيرة سمعت احد شباب البطانة يلقي احد قصائده وررد كلمة يمه مرتين في القصيده

سلامات ..

بشرى البُطانة :

يالملكه ماك متزعمه
ياساريه فى الزمن النحل
ياضل على البلدات رمى
يالكادحه من أجل الوليد
شان راسو إصبح فى السما
ويالفوقا ماف غير الله شئ
وحتى الله زاتو معظما
والجنه أيه تصبح معاك
أرخص وأقل من مقدما
ودايساها بين كرعيك حبت
فى قاع مدايسك مرغمه
ويايمه شوق قطع حشاى
واوجعة الدمع الهما
إشتقتا لى مطر الخريف
وكتين حفايرو إحزما
وبهيمنا فر تال التبر
أماتو واردات الضما
كوعتا فوق العنقريب
بتشرف العيش اللتيب
والعفرا تتقاطا الرحل
منظر دواخلى يأزما
مرصوص متل عقد الكنار
منضوم على جيد السما
إتحكرتى فوق بنبر حطب
قهوة ضحا وجلسة لما
خيلانى وأعمامى الكبار
خالاتى والجد العمى
ونسه وصراحه وقرقراب
متفائله بالضل الرما
والتايا بت عوض الكريم
المالكا قلبى مقسما
منصره فى طرف الصعيف
نادتنى هيي أصبحتو كيف ؟؟
بيناتنا شاشاق الحطب
همساً دقاق مو همهمه
قالولكن
الليله أمى مكرمه
طرزتا ماراعيت كبير
عاد تايا كيف ؟؟ وإنشاالله خير!!
قاتلى شديده وإلا عيب
وسط الرجال بتناغما
وتب قبلت ماشفتا غير
كفلاً رطن كاجر الطريحه محشمه
إلا إمى واضيعة رجاك
من ولدك الطشطش عما
أنداح تبع زخم المدن
ضيّع بداوتو وحطما
وسلام من البلد السجم
سموها يمه العاصمه
ويايمه ولدك ضاع خلاص
تايه مبارى العولمه
ماياهو ضرغام الرجال
الكان قبيلتو معظما
وياحليلو روبك والسمن
ياحليل لذايذ الأطعمه
ضوّق لسانى طعم جديد
بيرغر .. وجامبو المفرمه
ومعدتى ذاتا إطوطوت
ما أظن عصيدتك تهضما
خدعتنى كندشة الوهم
حمام وريحه وهندمه
راجيانى فوق النار أقع ؟؟
وأنا هالشمس مابلزما !!
دايرانى فوق دلوكه أهز ؟؟
راجيانى أسل سيفى وأرز ؟؟
وألعب مع التوم ود حمد
صقريه درقه محكمه !!
وأنا داك بقيت سيد الرقيص
مرات قرد ..مرات كتيفتى أبرما
دايرانى بى سوط العنج
أركز مع السر وادما؟؟
إنفره سروالى البجر
أربط بتينتى وأحزما
شبال من التايا وأهز
طاقيتى شنقا وأقرما
وفوق ضهرى داداب العنج
وأصفاحى نازفات الدما
أيمه ولدك ضاع زمان
زمان
وحكايتو بقيت مؤلمه
باريت لؤى وقصى ومى
وين تانى كاكوم وادما !!
ضهرى الممسح بتلصف
راقد لحايفو منعمه
ما أظنو بتحمل لبع
والخرشه ماأظن بلزما
سروالى ماياهو القبيل
سديريتى جكه مجضمه
حاجات مجبصه كلها
وطاقيتى كاوبوى وإنما
والكاوى قلبى وشاوى شى
كان شفتى واحدى مقرضمه
لابسه البناطلين زينا
والله ماتفرزيها تب
كان فارده شنبه تبرما !!!
لكنو مهما الزول بعد
حكايتو القبيل مابهدما
جاييك وشايل بقجتى
جواها ورقه مختمه
أياهو حلمك وجبتو ليك
داك جمه ريقى من الظما
بتمنى من الله الكريم
إمد أيامك وإقدما
وتحجى فى كل عام إهل
وتعودى سالمه وغانمه
يايمه
وتعودى سالمه وغانمه

شكراً صاحب البوست على فرد هذه المساحة المضيئة .

تماضر الخنساء

بس كتلتيهو ده الكلام اظنو امه شايقية ولا كدي ولا بطانة بي مكنة شايقي

Quote: سلامات .. بشرى البُطانة : يالملكه ماك متزعمه ياساريه فى الزمن النحل ياضل على البلدات رمى يالكادحه من أجل الوليد شان راسو إصبح فى السما ويالفوقا ماف غير الله شئ وحتى الله زاتو معظما والجنه أيه تصبح معاك أرخص وأقل من مقدما ودايساها بين كرعيك حبت فى قاع مدايسك مرغمه ويايمه شوق قطع حشاى واوجعة الدمع الهما إشتقتا لى مطر الخريف وكتين حفايرو إحزما وبهيمنا فر تال التبر أماتو واردات الضما كوعتا فوق العنقريب بتشرف العيش اللتيب والعفرا تتقاطا الرحل منظر دواخلى يأزما مرصوص متل عقد الكنار منضوم على جيد السما إتحكرتى فوق بنبر حطب قهوة ضحا وجلسة لما خيلانى وأعمامى الكبار خالاتى والجد العمى ونسه وصراحه وقرقراب متفائله بالضل الرما والتايا بت عوض الكريم المالكا قلبى مقسما منصره فى طرف الصعيف نادتنى هيي أصبحتو كيف ؟؟ بيناتنا شاشاق الحطب همساً دقاق مو همهمه قالولكن الليله أمى مكرمه طرزتا ماراعيت كبير عاد تايا كيف ؟؟ وإنشاالله خير!! قاتلى شديده وإلا عيب وسط الرجال بتناغما وتب قبلت ماشفتا غير كفلاً رطن كاجر الطريحه محشمه إلا إمى واضيعة رجاك من ولدك الطشطش عما أنداح تبع زخم المدن ضيّع بداوتو وحطما وسلام من البلد السجم سموها يمه العاصمه ويايمه ولدك ضاع خلاص تايه مبارى العولمه ماياهو ضرغام الرجال الكان قبيلتو معظما وياحليلو روبك والسمن ياحليل لذايذ الأطعمه ضوّق لسانى طعم جديد بيرغر .. وجامبو المفرمه ومعدتى ذاتا إطوطوت ما أظن عصيدتك تهضما خدعتنى كندشة الوهم حمام وريحه وهندمه راجيانى فوق النار أقع ؟؟ وأنا هالشمس مابلزما !! دايرانى فوق دلوكه أهز ؟؟ راجيانى أسل سيفى وأرز ؟؟ وألعب مع التوم ود حمد صقريه درقه محكمه !! وأنا داك بقيت سيد الرقيص مرات قرد ..مرات كتيفتى أبرما دايرانى بى سوط العنج أركز مع السر وادما؟؟ إنفره سروالى البجر أربط بتينتى وأحزما شبال من التايا وأهز طاقيتى شنقا وأقرما وفوق ضهرى داداب العنج وأصفاحى نازفات الدما أيمه ولدك ضاع زمان زمان وحكايتو بقيت مؤلمه باريت لؤى وقصى ومى وين تانى كاكوم وادما !! ضهرى الممسح بتلصف راقد لحايفو منعمه ما أظنو بتحمل لبع والخرشه ماأظن بلزما سروالى ماياهو القبيل سديريتى جكه مجضمه حاجات مجبصه كلها وطاقيتى كاوبوى وإنما والكاوى قلبى وشاوى شى كان شفتى واحدى مقرضمه لابسه البناطلين زينا والله ماتفرزيها تب كان فارده شنبه تبرما !!! لكنو مهما الزول بعد حكايتو القبيل مابهدما جاييك وشايل بقجتى جواها ورقه مختمه أياهو حلمك وجبتو ليك داك جمه ريقى من الظما بتمنى من الله الكريم إمد أيامك وإقدما وتحجى فى كل عام إهل وتعودى سالمه وغانمه يايمه وتعودى سالمه وغانمه

يمه جات كتير خلاص هنا

الأخت تماضر الخنساء
لك التحية
أنت أيضا شكلتِ إضافة متميزة للمنبر
وقد أصبح لحضورك وقعا جميلا في صفحاته
لمثلك تُفرد المساحات لتضيئيها بوهج الإبداع
محربا بك مجددا
ولك التقدير

ود عقيد .....سلام
نرحب معك باهل البطانة ونشكرهم علي اخراجك من عزلتك الاختيارية

ودعقيد
حمداً لله على سلامة العودة


عليك الله شوف جنس النضم ده

Quote: نحنا دربـنا زلقيبة ومقـابل الشـيمة

هيــــــ ياسميةــــــع
أها ده الكلام البخلى الزول يمشى يقع فى بحيرة (أونتاريو) فى البرد ده

حقاً يا ود عقيد. ديل ناس سمحين وكلامهم يعدل ميزان القلب.

التحية لكل أفراد المجموعة التي ذكرتها و"أكان ما الظرْف سفر ما كُنا تب بنفوتكُن".

شيخ العرب ود شنتير
لك التحايا الكِبار
لا أفتأ أتلفت بحثا عنك منذ بدأت الاطلاع على هذا المنبر
ولكنك تبخل علينا كثيرا وتحرمنا من طلتك..
يكفينا منك هذان السطران كل مرة.. فهي لنا مثل (شربة العاتِم)
كما قال الشاعر:

خلّنا يا نديم ناخُد شرِبةَ العاتِم
وأظنها الجرعة التي يتلقاها من اشتد عليه الظمأ
وقد اشتد علينا
فخذ لنا من وقتك (برهة) ولك محبتنا

ودعمي الضو
الما بقولولو سو
شقيقي ياسر
لك التحية

Quote: أها ده الكلام البخلى الزول يمشى يقع فى بحيرة (أونتاريو) فى البرد ده

إن كنت فاعل.. فأرجو أن توفر بحيرة أونتاريو
لتفعلها في (بحرنا) تشاقق بين جزائر التميراب
حينها نجلس معا نجُر النمّّّّّّّّّّّّّّّّّّّّّة ونغني ونقولها بقلب جامد
"نحن دربنا زلقيبة ومقابل الشيمة"

لك المودة

صديقي بهاء
لك التحية والتقدير
شكرا لترحيبك الأنيق ولحضورك الباهي
لك محبتي

ود عقيد ...

حبابك وحباب عودتك ..

وبالمناسبة دي أهديك الغنية :

ابن عمي النورابي ناذر
لك التحية والشوق
شكرا للهدية الجميلة المعبّرة
"يا ضو آمنة ورقية"
عندما يتحدث الناس عن حقوق المرأة
يجب أن يأتو إلى أهلنا هنا ليعلموا أن للمرأة ما هو أكثر من الحقوق
فلها عندنا العزّة ولها الرفعة.. لآمنة ورقية ما ليس لغيرهن في الدنيا
ذلك ما نعيشه ممارسة بعيدا عن التنظير والكلام الفاضي..
سلمت إخواتنا جميعا أمنة ورقية وسامية وسميّة..

ولك المودة

الاخ الكريم ودعقيد تحياتى واشواقى والله مشتاقين
طول الغيبات جاب الغنايم كما يقول اهلنا العرب
وانت خير كثير وعرضك وافر
واول الخيرات اكرمتنا بى اهلنا البطاحين السمحين
اهل الكرم والشكرة
نشكرك حتى تستغيث ارجو الا تطول الغياب
سوف احاول ان اعثر على قصيدة الفحل يوسف البنا فى فروع البطاحين
وان عثرت عليها ارجوك نزلها لينا واكيد عند تمبس موجوده
.لك التحية مجددا ولضيوفك الكرام
ابو الصادق

Quote: يازول والله صحيت فينا مفردات تقول الزول يشيل مخلايتو وجرابو هسع يرجع لضهاري السافل



يا حليك يا ود اعمى إت قايل ضهاري السافل زى ضهاريك الاديتها قفاك . يا حليل ضهارينا الزمان وقت بنشيل اللقيمة والبصيلة والزيتة في مخلايتنا وندرعها في كتيفاتنا ووقت يجى وقت الهجير نتحكر ليها تحت الهجليجة ام ضلا رهيييييييييين . تفتح مخلايتك زى الفاتح ليك بئر بترول ام بيوض والسمبرمعششة في راسك والبوييض قائم بطرفك تحكحكوبالنجامة بجاى وبجاى لحدى تتوسر في محل نضافتك وتقعد تاكل في لقمتك الاحلى من البيتزا والكنتاكي . ويجوا فيك اهلك العرب فازعين وتابعين اتر بهائم مسروقة يطلبوا منك حبة شاى حب للسبارس وتديهم ويمشوا يلحقوا الابل يجوك راجعين بقرعتهم مليانه لبن النياق المري - يا حليل ايام زمان.

نواصل

واول الخيرات اكرمتنا بى اهلنا البطاحين السمحين
اهل الكرم والشكرة
نشكرك حتى تستغيث ارجو الا تطول الغياب
سوف احاول ان اعثر على قصيدة الفحل يوسف البنا فى فروع البطاحين
_______________________________________________________________________

الأخ الكريم / مهدي الصادق السيد
الله يشكر شاكرك وإنشاء الله يوم شكرك مايجي .
إن لم تعثر على طلبك فهو موجود لدينا ،
وحبابكم آلاف .

سمية الحسن طلحة

الأخت الأستاذة سمية الحسن طلحة
مرحبا بك مجددا
هذه المرة نثرا..
فقد رأيت أن يكون ردي الأول على مداخلتك منظوما
كما تستحق ملك الدوبيت..
وإن كان للنثر مكان أيضا.. فبيان العرب كله طيّب
نظما ونثرا.. وأرجو أن تكون حروفنا في الترحيب بك طيبة
وأن ترقى لمستوى قامتك الرفعية ومقامك السامي بيننا
ولك التقدير

أخي الكبير أبو الصادق
لك التحية والتقدير

Quote: طول الغيبات جاب الغنايم كما يقول اهلنا العرب

يا زول غنايم تقيلة في الطريق .. بس لوكو الصبُر ساكِت..
ما دام سحابكُم غيّم
نديمكم ما بيتّيَّم
يصُب صبيب.. لامِن يقولو ديَّم

أرحك معانا نتجول في سهول البطانة الخضراء
أرضها الراقدة ديمة تِحِت أديما
البِنعِش نسيما وبيتهادى غيما
يلّاك يا ابو الصادق..
نباري يوسف البنا
ونستمع لنشيده وهو يعدد فروع أبناء البطانة وقبائلهم
يذكر شيوخها وعربانها وووديانها..

خليق قريب
وابحث معنا عن ود البنا

لك المحبة

يايمه فيديو

حباب ودعقيد ود الفهم الرأي
ومرحب كمان باهلنا ناس البطانة ناس الجود والكرم
وهاك دي لحدي ما جايك صادي دحين شايفي لي برقاً في الصعيد بدور أشوف خبر شنو
****************************
قَصَدْ العُقـــــــدة فات بِي سَافــــــــل الرَتَّاجْ
جَاء نَاطحْ الحَــــــــاكِم اللابس البِدل والتاجْ
تيس الحِنــــــُّو الهبَّرْ شـــــــــــِروكْ القَاجْ
قَيَّل فيهــــــــــــا قَبْل الحَر يجيب لي ازعَاجْ
مَابــــــــي النزلة ضــــــَرَّاع النَقيباتْ سَاجْ
دَاير الفــــــي الجِدلْ طابقــة السُوار والعَاجْ
يِكشِّرْ نايبــــــو في ارض الحَصَى أب دَهَّاجْ
مَا خَصَّاهــــو في الهُرْبَة المِســــِى مُدْهَاجْ

Quote: أنا بالفعل أنتمي للبطانية حُبا وصدقات واستمتاع بأدبها وعبقريتها

كتر خيرك يا ود العقيد اخوى نحمد فيك هذا الانتماء الوجداني لارض البطانة . صحيح البطانة هى السودان بثقافتها وادبها وجود وكرم واهلها فقط لديها خصوصية تتجسد بشكل خاص في طبيعة إنسانها الرعوي والزراعي .

تكون البطانة في الصيف خالية من الانعام ويبدا اقبال الرعاة لها في بدايات الخريف . احلى سني حياتي هى تلك الايام التي اكون فيها امام حلتنا اشاهد الرعاة باسرهم راحلين الى ارض البطانة . تجد حسنواتهم على اصاهب جمالهم مع تخصيص زينة من الحرير والبروش والشمال ليضيف اليهن مزيدا من الحسن والبهاء .

كنت اخى العقيد احس بسعادتى عندما اسمع رنين جرس الهودج ايام النشوق ويسعدنى اكثر عندما تكون حركتهم في شكل اسراب منتظمة في مسارها .

لم يكن النشوق للبطانة حكرا لقبيلة بعينها - وان كان ثمة صراع خفى حول ملكية عينها ولكنه صراع اولاد البيت الواحد والاسرة الواحدة الذى يستحى اي منهم ان يطفيه على السطح . القبائل المشهورة بالنشوق للبطانة هم الشكرية والبطاحين ورفاعة الهوى ورفاعة الشرق ورفاعة الاولى (الهوي) هم اهلنا ناس الناظر يوسف ود ابي روف وهم من قبيلة كنانة التى ينتمى اليها الونساب والشبيلات والضبانية ( والضبانية اهل محمود ود زائد سيد تومات ود زائد بالقضارف) اما رفاعة الشرق فنظارتها الناظر منصور العجب المنحدر من اسرة ود ابي جن ولهولاء علاقة مصاهرة بالشكرية واهم قبائل رفاعة الشرق هم الحمدة كما اسلفت والقواسمة ولهولاء ينتمى الناظر ود جميل في قرية الشبارقة شرق واد مدنى والحلاويين والعقليين والغلاتيين وقبائل اخرى مثل الكواهلة ولهولاء نظارة ود عجبنا بقرية دوباوالحفيرة غير ان هولاء اى الكواهلة اكثر تمددا سكانيا من غيرهم لتواجدهم على امتداد القطر وينتسبون الى جهينة.

لماذا النشوق للبطانة في فصل الخريف بالتحديد؟ سنواصل للاجابة عليه لاحقا

Quote: اى الكواهلة اكثر تمددا سكانيا من غيرهم لتواجدهم على امتداد القطر وينتسبون الى جهينة.

ويتواجدون في شمال غرب كردفان في ام سنطة وام بادر والمشروع مقر ناظر الكواهلة الشيخ أمحمد الهرديمي له الرحمة والمغفرة.

جيت يا ودعقيد شايل الخبار الزين

بشر بي وجودك واصحابك الزينين

شايلين للقلم ..وللسلام دايرين
..............


مرحيتين حبابك واليوم السعيد الليلة الجابك ..

نورت البورد بعودتك

شقيقتي القلب النابض
لك التحية والود
البورد منوِّر بك أنتِ
فأنت مشكاته وقلبه النابض.
لك الشكر والتقدير على هذا الترحيب
ولكننا لا نكتفي به.. فهاتِ سهمك عن البطانة وأهلها..
حتى ولو (سؤال)..

لك التقدير

Quote: اى الكواهلة اكثر تمددا سكانيا من غيرهم لتواجدهم على امتداد القطر وينتسبون الى جهينة.

كككككككككككككككككككككككككككككككككككككككككككككككككككككككككككككككككككككككككككككككككككككككككك
الشاعر قال فيهم:ـ
قبيلةًً واسعة في اليوم اب بشاتن ماهــلـة
وين ما تمشي في السودان بتلقى كـواهـلـة
الدك البعجـنـو الخـيــول الصــاهـــلـة
هم صمدوا التلبة ابان قماقمن باهــلـــة

شـكرى على البـطاحـين ياالكواهـلة عجبكم
أصـلكم دار كـرم وأصـلو السـمـح بعـجبكم
من عين الحـسـود خالــق البرية يحجبكــم
ما بــنـبـح ضـيـوف الـهجعـة خلقة كلبكم



ودمتم دا كرم.

Quote: تجد حسنواتهم على اصاهب جمالهم مع تخصيص زينة من الحرير والبروش والشمال ليضيف اليهن مزيدا من الحسن والبهاء . كنت اخى العقيد احس بسعادتى عندما اسمع رنين جرس الهودج ايام النشوق ويسعدنى اكثر عندما تكون حركتهم في شكل اسراب منتظمة في مسارها .

عـربــك هـدمـوا عزلوا لك عقيد الراس
حـورك كـلــو ينــدل حـرحـرة وجــراس
قطعوا العيسياب نزلوا العلو اب حصحاص
حلبوا لك بكارن ضـيـر عـلـي البـــلاس


يا ام كتفن بعيد مـن اذنـك اب خـــراس
عاشـقك يعدد النجـــم الطـلـع الــغاس
شايلالو السـنين ضـربـك فقايــة الـراس
فــوق وجنيك بـشـوف قهـريـة العـــباس


شوف فصاحة العرب ديل و جمال اللوحة الشعرية دي ::نفخر بأننا منهم::

Quote: هذا ترحيب متأخر (بسبب الغيبة) بالأقلام النيرة التي أضافت كثيرا للمنبر.. الوزير الدكتور ابو حريرة والفنان عاصم البنا والشاعرة بت ود طلحة أيضا ترحيب بالأستاذ الفاتح يوسف جبرا وبالكاتب الساخر معاذ حسن وكذلك الشكر لمحمد المرتضى حامد، وفاروق حامد محمد، والطيب شيقوق وكل من أسهم في رفد المنبر بهذه الكوكبة الرائعة..

ود عقيد كيف تنسى واسطة عقدنا وأكثرنا اسهاما

أخانا وحبيبنا الباشمهندس أبوبكر سيد أحمد الذي

لولا اسهاماته الأكثر علما وفهما ونضجا ونبلا وجمالا

يفوق حد الادهاش والإذهال لما كان هناك ما يشاد به ....

وهو الصديق الوفي الذي إن غبنا عن البورد تفقدنا

بتلفوناته فردا فردا .... هؤلاء هم النوبيون أعظمنا

في كل السودان وفاء وخلقا ونبلا وكرما وأصالة...

Quote: ود عقيد كيف تنسى واسطة عقدنا وأكثرنا اسهاما أخانا وحبيبنا الباشمهندس أبوبكر سيد أحمد الذي لولا اسهاماته الأكثر علما وفهما ونضجا ونبلا وجمالا يفوق حد الادهاش والإذهال... والذي إن غبنا عن البورد تفقدنا بتلفوناته فردا فردا .... هؤلاء هم النوبيون أعظمنا في كل السودان وفاء وخلقا ونبلا وكرما وأصالة...

اللوم بيجي بالغفلات يا اخوانا لكن دى بس كبيرة شوية اتلافوها يا ود العقيد

Quote: عـربــك هـدمـوا عزلوا لك عقيد الراس حـورك كـلــو ينــدل حـرحـرة وجــراس قطعوا العيسياب نزلوا العلو اب حصحاص حلبوا لك بكارن ضـيـر عـلـي البـــلاس

لله درك يا بت البطانة الله يحفظك ويخليك دوما تسعدينا بهذا الابداع الجميل

Quote: حـورك كـلــو ينــدل حـرحـرة وجــراس

جبتي من وين ده هسه؟ والله كأني هسه لابس عميمة صغيرة في راسي وسروال طويل وجنب لديات اللبن المقنن في حلتو وتحت السدرة كمان والبهم داااااااااك ياهو مالي زريبتو يرغي مع العصرية حاري امهاتو يجن من الخلاء يرضع زييييييييييين .

ووووووووب انا من ايام زمان

Quote: قطعوا العيسياب نزلوا العلو اب حصحاص حلبوا لك بكارن ضـيـر عـلـي البـــلاس

ده كلام فنتاستيك خالس خالس. حلبوا لك بكاراً ضير على البلاّس.

عمنا فاروق
سلامات
...
أبوبكر سيد أحمد abubker
...
والله الرطاني دا أنا مبسوط منو بسط..!!
ومتابعو متاعبة لصيقة..
وكايس لي فيهو لمّة..
ويعلم الله ما نسيتو، ولا اتجاهلتو.. لكني ظللت أبحث عن مدخل إليه..
ورغم إنو (زي ما قال شيقوق) اللوم بجي بالغفلات..
لكني أشكرك يا أستاذ على هذه الملامة.. التي سوف أستغلها أيما استغلال
لأتخذها مدخلا لهذا الرجل الرائع..
له العتبى.. ولك
مع وافر محبتي

Quote: لأتخذها مدخلا لهذا الرجل الرائع..

مدخل شنو يا زول على الطلاق الرطانة ديل الواحد غبينتو زى غبينة الجمل للحول ما ينساها الله رماك ود العقيد والله الناس ديل انا عاشرتهم كتير زى ابو الدقيق بس .

Quote: . تاريخ التسجيل: 04-09-2002 مجموع المشاركات: 2014 Re: أولاد شيوخ البطانة.. (يهمبتون) المنبر.. (Re: Yassir Tayfour) حقاً يا ود عقيد. ديل ناس سمحين وكلامهم يعدل ميزان القلب. التحية لكل أفراد المجموعة التي ذكرتها و"أكان ما الظرْف سفر ما كُنا تب بنفوتكُن

إذا تسبّبّت سيرة إخوتنا: أولاد شيوخ البطانة في إعاذة الإنسان الشفيف المسكون بالجمال: شيخ العرب: شنتير لدوحة سودانيزاونلاين بعد أنقطاع طال أمده فأنّ ذلك يعتبر شرفا كبير ا و كسبا جديدا يعود الفضل فيه لأولاد شيوخ البطانة. و طبعا تعبير "أولاد " في اللغة العربيّة بيشمل البنين و البنات.
تشرّفنا بعودتك ، أخي شنتير. و نأمل أن تطول إقامتك بيننا هذه المرّة.

طارق الفزاري
ود زينب

Quote: يا ام كتفن بعيد مـن اذنـك اب خـــراس عاشـقك يعدد النجـــم الطـلـع الــغاس شايلالو السـنين ضـربـك فقايــة الـراس فــوق وجنيك بـشـوف قهـريـة العـــباس شوف فصاحة العرب ديل و جمال اللوحة الشعرية دي ::نفخر بأننا منهم::

بِت ود طلحة عُربانك أعَز الناس
حاقِّين الفخُر ينشالو فوق الراس
ما دام في معالي القوم بنولِك ساس
ابِشري وباشري فوق أبواتِك الفُرّاس

ود عقيد

شيخ العرب شيقوق
سلامات

Quote: لماذا النشوق للبطانة في فصل الخريف بالتحديد؟ سنواصل للاجابة عليه لاحقا

في الانتظار..

أخي الحبيب ابراهيم علي
لك التحية
مرحبا بك وبأهازيج البطانة..
مَابــــــــي النزلة ضــــــَرَّاع النَقيباتْ سَاجْ
دَاير الفــــــي الجِدلْ طابقــة السُوار والعَاجْ
يِكشِّرْ نايبــــــو في ارض الحَصَى أب دَهَّاجْ
مَا خَصَّاهــــو في الهُرْبَة المِســــِى مُدْهَاجْ
يا سلام عليك
دا كلام حلو خلاص..
"ضرّاع النقيبات" دي ذكرتني أبيات لود ضحوية:
"يا الغول النقيب سويلو سوق الساقية"
بِت مُهرة هضاليم الخلا المِتَّاقية
عكينها يا امروبة.. النشوف الباقية..

كنت أفكر كثيرا بحثا عن معنى هذا (النقيب) بتعطيش القاف وإمالة الياء..
حتى وجدت عندك (النقيبات)..
وما دام هذا يضرعها، وهذا (يسوي لها سوق الساقية)..
فهي إذا مساحات من الأرض.. لا أدري ما صِفتها..
لننتظر (الشُراح) أهل الذكر بأدب البطانة..
ود شنتير وشيقوق والآخرين..

لك المودة

شكرا لك يا خنساء
وشكرا لبشرى البطانة

مرحب وألف مرحب بأهل البطانة

في المنبر 00 ومرحبا بك أيها

الأخ الجميل ود عقيد بعودتك للمنبر

بعد غياب افتقدنا فيها قلمك مصادما

في صناعة الجمال 00


مرحب مرة أخرى 00


مع مودتي 000

أستاذي الفنان القدير
عثمان سيد احمد
لك التحية
بصحبتكم يا أستاذي يُصنع الجمال
ففي حضوركم جمال
وفي حروفكم جمال
وها نحن نقتبس من نوركم لنضيء

تحياتي لقبيلة مبدعينا المسرحيين
وتعازي في زيملكم مجدي النور

ولك المودة

فى انتظار شيخ العرب / شيقوق
لماذا النشوق للبطانة فى الخريف
التى قال فيها الفنجرى:ـ


برقك شال سحابو ولح متوطيك
صبح ماك راكب فوق ضهر عاليك
القلب قام مع عرباً نشوقن فيك
عقب ياعينى حرمان السهاوى عليك

Quote: فى انتظار شيخ العرب / شيفوق لماذا النشوق للبطانة فى الخريف التى قال فيها الفنجرى:ـ برقك شال سحابو ولح متوطيك صبح ماك راكب فوق ضهر عاليك القلب قام مع عرباً نشوقن فيك عقب ياعينى حرمان السهاوى عليك

الاخ ود العقيد
الاخت بت طلحة

اسباب النشوق هي بسبب طبيعة ارض البطانة في الخريف حيث يصفها العرب بانها ارض قفر خالية من الاشجار اللهم الا النباتات الزاحفة بجمالها التي وصفها به ود الشوبلي في مسدار البطانة - التبر والحنتوت والدمبلاب واحيانا ام مامليحة وهى نباتات اغلبها زاحفة لا تمنع حركة نسام وهواء البطانة النقي والجميل ولهذه الاسباب مجتمعة يندر تواجد الضبان او السريته والبعوض التى تاذي الحيوان في الخريف .

على النقيض من ذلك نجد ان محلات اقامة العرب في الصيف تنتشر فيها الاشجار بكثافة كما ان نباتات تلك الامكنة في الخريف عالية جدا مثل العدار والرزة والانيس وابو قفاء وكلها تصلح لتواجد الحشرات المذكورة اعلاه والتى تاذى الحيوان وتمنعة من النوم والرعي .


يلاحظ ان العرب يعودون لاماكن مصيفهم عند الدرتية او نهاية الخريف حيث تنعدم الحشرات وتتوفر موارد المياه في الانهر والحفائر والميع . كما يلاحظ ان ارض البطانة لا توجد فيها موارد للماء في الصيف .


نواصل

الأخ الحبيب ود عقيد
عوداً حميداً إلى الديار بعد غيبة أو ربما بعد حردة
وأنتهز هذه الفرصة الجميلة لأزجي التحية وأرحب بالكوكبة
النيرة التي ذكرتها، فهم جميعاً مكسب كبير للمنبر.
وعبرك أرحب بصديقي أحمد يوسف أبو حريرة الذي جمعتني به
الغربة فوجدته رجلاً حقيقياً لا يصدأ
وأرحب معك بالأخ الباشمهندس أبو بكر سيد أحمد
صاحب المشاركات العميقة وأنا مثلك أتربص به في كل البوستات
هذه لفتة جميلة يا عبد الله لكنها ما غريبة منك..
التحية لعموم أهل البطانة أصحاب النخوة والكرم..

أخي العزيز نصر الدين البشير
لك التحية
ومرحبا بك في رحاب أهل البطانة سافلها وصعيدها

Quote: وأرحب معك بالأخ الباشمهندس أبو بكر سيد أحمد صاحب المشاركات العميقة وأنا مثلك أتربص به في كل البوستات

ولا زلنا ننتظر (إشارة) الرضا من أبو بكر
أو حتى الإشارة الأخرى.. لنقوم بما في وسعنا لاسترضائه..
ولكنه ظل (مستعصما بالبعد عنا)..
وسنظل نتربص.. وننتظر

ولك المحبة

شيخ العرب شيقوق
لك التحية والاحترام
ولبنت الكرام سمية

هنالك الكثير مما نحتاج لمعرفته عن البطانة.. حدودها، فروع عربانها، قراها وحلّالها وحواضرها
ثرواتها، ثقافتها، أبنائها الذين أسهموا بجهدهم في صالح البلد عموما وفي صالحها خصوصا..
كل هذا وغيره ننتظر أن تسرده لنا في رحلة النشوق.. وأن يساعدك آخرون في تبيينه للناس.


لك التقدير

Quote: كل هذا وغيره ننتظر أن تسرده لنا في رحلة النشوق..

اخي العزيز عبد الله

يؤم البطانة في موسم النشوق مجموعة قبائل فاهلنا عرب رفاعة الشرق والغرب ( عرب كنانة وعرب الدندر) غالبا لديهم مسار واحد وهذه المجموعة يمكنني متابعة مساراتها والقري التي يمرون بها وثقافتهم وغيرها . عليه اقترح ان يكلف آخرون لمتابعة المسارات الاخرى من ابي دليق وتمبول صوب البطانة واعتقد ان الاخت بت طلحة مؤلهة لتبني هذا الدور .

لك مودتى

شيخ العرب شيقوق
لك التحيةوالتقدير

قبل يومين شاهدت فيملا توثيقيا عن البطانة في التلفزيون بعنوان (الانقيب).. حوى الكثير
من المعلومات والمناظر.. ولكن المناظر كانت هي الأجمل.. وقد حدد الفيلم البطانة بالنيل
الأزرق غربا ونهر عطبرة شرقا.. ولعله اختصر.. فامتداد النيل الرئيسي حتى عطبرة أيضا يحد
البطانة من الغرب.. ولكن خطر في بالي بناء على تحديده هذا أن هناك (بطانتان).. أو قسمان
للبطانة، القسم الجنوبي منها ينتمي إلى إقليم مناخي يختلف عن القسم الشمالي.. والجنوبي
هو القسم المأهول أكثير من الآخر.. بسبب غزارة الأمطار فيه واتساع مساحة الخضرة وازدياد
الأراضي الصالحة للرعي والزراعة..
أما القسم الشمالي الذي (نعرفه نحن جيدا) فأهله يعتمدون على الوديان.. في زراعتهم ورعيهم
وقسم كبير منه فضاء جاف خاصة أقصى الشمال (الضهيرة) التي تعتبر صحراء بلقع..
كما أن البطانة تتوزع في التقسم (الإداري) إلى عدة ولايات.. الجزيرة والقضارف ونهر النيل.. وربما كسلا..

بانتظار الآخرين يمكنك أن تبدأ بالمسار الذي تعرفه.. كما أرجو أن تصحح لي المعلومات أعلاه

مودتي

هييييييييع!

تبارك شيخ الدين
لك التحية
ألف مبروك
ومرحبا بك في سودانيز أون لاين
أرجو أن يطيب لك المقام هنا
ولك الشكر والتقدير على (هزّتك) دي..

Quote: بانتظار الآخرين يمكنك أن تبدأ بالمسار الذي تعرفه.. كما أرجو أن تصحح لي المعلومات أعلاه

معاك ياابن عمي خليني انجم شوية الايام دى برتب مسافر عولي للعيد.

أكان كدي يا شيخ العرب خلينا نفتح بوست جديد
بعد تمشي وتجي بالسلامة إن شاء الله

أنا براي مخطط امشي اعيد مع عولي.. بس ربك يسهِّل

لك وللجميع خالص الشكر والتقدير
وكل عام وأنتم بخير

يا ود عقييييييييد

حبابك ألف



إنشـاء الله لسـة ما صاريها

عودآ حميدآ

رأفت ميلاد

أهلا حبابك يا رأفت
لك التحيات

Quote: إنشـاء الله لسـة ما صاريها

لا ياخ.. أنا طلقتها من أول مرة..
أنا يا زول شعاري "تيك إت إيزي"
يعني (لا تصُر ولا تضُر.. ولا ترفع من الكلام المُر)

لك تقديري

الاستاذ عبد الله عقيد
السلام عليكم
أولا اشكرك يا سيدي على الترحيب
البوست دسم وممتتع ويجبرك ان تبقي به طويلا.
لك التحية..والتحية الاستاذة سمية الحسن طلحة.
بس يا ود عقيد كلام ناس البطانة دا دايرا ليهو دكشنري.
بالله ما عندك نسخة من منجد الطلاب

أهلا بك يا معاذ
في المنبر.. وفي البوست

Quote: بس يا ود عقيد كلام ناس البطانة دا دايرا ليهو دكشنري.

يا اخوي اظنك حنكوش عاصمي..!!
البشوفك يقول عريبي جايي من البطانة لي الخرطوم ترانزيت السعودية
كدي خلينا نعمل ليك اختبارات.. وبعد فترة بنديك النتيجة
هل تحتاج لي دكشنري فعلا.. ولّا بتتحنكش..!!

لك التقدير

Quote: أكان كدي يا شيخ العرب خلينا نفتح بوست جديد بعد تمشي وتجي بالسلامة إن شاء الله

ود العقيد نحن البوست ده ما بنفرط فيهو انا من شدة اهتمامي بيهو قررت اشيل اللابتوب بعد امشى السودان وامشى الحلة اتحكر بيهو تحت تنضبة( سروبة) او ضل هجليجة رهيييييييييييين وعلى تبروقة كمان ومن هناك احكى ليكم كيّة لناس ابي بكر الصنعوا الآيتي . وحرم اجمع ليكم الغنايين ومن خشومهم للمنبر العام طوالي طازج .

أخي شيقوق
لك التحية
المشكلة أنني لم أطلب نقل البوست إلى الفترة القادمة
وأخشى أن الأوان قد فات..
لكن حديثك هذا شجعني على محاولة نقله.. عسى أتمكن.

Quote: لكن حديثك هذا شجعني على محاولة نقله.. عسى أتمكن.

العقيد اخوى كل شيئ ولا البوست ده انا والله مسافر يوم السبت 23 ديسمبر وهمى كلو اجمع ليك معلومات عن كل المسارات ومحلات الاستجمام والرواغة والبركة والسبر الفي قنبور وليد العرب اجيبو ليك وحاجات كتييييييييرة .


اطيب المنى