Post: #1
Title: بوست التحلية
Author: مريم بنت الحسين
Date: 06-30-2005, 01:29 PM
Parent: #0
دحين وقت ما قصرتوا معاي تب في المِلحات... وبحمدالله وشكره ظبطه لي كم ملاح كده... قلنا نقلب على التحلية.. غايته انا طلبي المحدد .. عايزه أعرف كيف بعملوا اللقيمات السودانية... لكن بديكم هنا كم وصفة بتاعت حلو.. سريع.. وظريف... وساااهل...
زولة... ورينا كان عندك شيتاً أبيض...
سلطة الفواكه بالكريما...
المقادير.. علبة فواكه محفوظة.. بتتباع في السوبر ماركت.. معاها علبة بتاعت حليب مركّز ومُحلّى.. انا غايته بستخدم نستله... وعلبة قشطه بيضا ... اها.. كبّوا كله في بعض.. وعلى التلاجه عديل... كده السلطة جاهزة.. والله وصفة ما بتخيب أصلها.. سريعة.. وبتتأكل... بس خلو بالكم من الكالوريز... (عندنا بوست قريب عن الريجيم.. )
اها.. منتظراكن
بنت الحسين
|
Post: #2
Title: Re: بوست التحلية
Author: Kostawi
Date: 06-30-2005, 02:30 PM
Parent: #1
دقيق أبيض
موية
شوية ملح
خميرة بيرة أو Baking Powder
زيت للتحمير
1
مويه+خميره+شوية دقيق+شوية ملح
إنتظري 1/2 ساعة
2
In a different container
أضيفي الماء للدقيق حتى إنتاج عجينة معتبرة
3
أضيفي الخلطة نمرة واحد لنمرة 2
حتى إنتاج عجينة معتبرة جدا
إنتظري 1/2 ساعة أو ساعة...أو أكثر لو مافي شرفة
أضعي الطوة في الكانون و صبي الزيت
و إنتظري حتى سماع شوية طقطقات متقطعة خارجة من مركز بركة الزيت.
أقطعي العجينة و دردمى وأرمي
و أقلبى.
عند طهور الشفق قبل الأحمر للزلابية
أنقذيها من عذابات الزيوت
لجنان السكر المسحون.
|
Post: #3
Title: Re: بوست التحلية
Author: أحمد الشايقي
Date: 06-30-2005, 04:57 PM
Parent: #1
جينا نشوف التحلية لقيناها
لقيـمـات؟؟؟
هي اللقيمات دي تحليــة؟؟
وسلـطـة فواكه معلبـة بالحليب والقشـطـة
بنت الحسـين
دا شـغـل عـزابــة , أحسـن أمشي شوفي ليكي تحلية غير دي
وكان ما عندك إلا دي إن شاء الله ما نحـضــر.
|
Post: #4
Title: Re: بوست التحلية
Author: zola123
Date: 06-30-2005, 05:32 PM
Parent: #1
مريم ازيك
بتقطعي في شعرك مالك؟
أنا قريت العنوان بوست التحلية جيت متوقعة أغنية
لقيتا تحلية جد جد 
طيب (أم علي) كيف معاك؟
لونا أبيض وساهلة جدا 
المكونات:
-رقاق (مصري) بتلقيه في المخابز, بكون أبيض وملان فقاقيع 
ويختلف عن الرقاق الخليجي, طبعا دا بيتعجن سريع لو مالقيتي غيره أمرك لله.
-جوز هند وزبيب ومكسرات(فستق, جوز وكاجو) أو اي حاجة عدا الفول السوداني( مابابحبه)
-علبة قشطة نستلة( البتحبيها)
- حليب وسكر للتحلية
-زبدة أو سمن نباتي
الطريقة:
-كسري الرقاق الى قطع صغيرة في صحن التقديم( قابل للادخال في الفرن)
حوالي نص اللفة بتعمل صينية واحدة
- أضيفي جوز الهند والزبيب زي نص كباية , طبعا المقادير تعتمد على ذوقك وكتري أو قلللي حسب حبك للمكونات
-اصحني المكسرات قليلا ويستحسن بدون الخلاط عشان تطلع خشنة ويمكن الاكتفاء بالفستق فقط
-قلبي المكونات الجافة(الرقاق, جوز الهند والمكسرات) ثم حضري على جنب حوالي 3أكواب حليب دافئة
- أنا باعمل 3 معالق كبيرة حليب بودرة في كل كباية وزيهم سكر وماتقولي لي دسمة ولا كتيرة كويس
-أضيفي الحليب للخليط الجاف ويمكنك تقدير زيادة الكميةأو نقصانها, بحيث يكون الناتج خليط متماسك وغير سائل كثيرا.
-أضيفي علبة القشطة وقلبيها ( ممكن اتنين لو قررتي تدكي الريجيم)
-تذوقي الخليط لو محتاج زيادة سكر زيديه
في النهاية أضيفي ملعقتين كبار زبدة أو سمنة نباتي
-ثم أدخلي الصينية للفرن على حرارة متوسطة لمدة 10-15 دقيقة لحد ما تصفر بس
-تقدم ساخنة وبالهنا والشفا
ملاحظة, لو حصلت ليكم حاجة أنا ما مسؤولة برضو 
|
Post: #5
Title: Re: بوست التحلية
Author: مريم بنت الحسين
Date: 06-30-2005, 06:32 PM
Parent: #1
|
Post: #6
Title: Re: بوست التحلية
Author: خدر
Date: 07-01-2005, 00:00 AM
Parent: #5
البوست ده فيهو كم حاجه لذيذه و مُضحكة
1
2
Quote: المقادير.. علبة فواكه محفوظة.. بتتباع في السوبر ماركت..
معاها علبة بتاعت حليب مركّز ومُحلّى.. انا غايته بستخدم نستله... و
علبة قشطه بيضا ... اها.. كبّوا كله في بعض.. وعلى التلاجه عديل...
كده السلطة جاهزة.. |
دي كلها حاجات جاهزة طبعا
حبوبه كوستاوي
3
| Quote: إنتظري 1/2 ساعة أو ساعة...أو أكثر لو مافي شرفة |
4
Quote: أنقذيها من عذابات الزيوت
لجنان السكر المسحون. |
احمد الشايقي
5
| Quote: وكان ما عندك إلا دي إن شاء الله ما نحـضــر. |
زولة 123
6
Quote: مريم ازيك
بتقطعي في شعرك مالك؟ |
7
| Quote: أو اي حاجة عدا الفول السوداني( مابابحبه) |
8
| Quote: ملاحظة, لو حصلت ليكم حاجة أنا ما مسؤولة برضو |
9
Quote: ( ممكن اتنين لو قررتي تدكي الريجيم)
|
|
Post: #7
Title: Re: بوست التحلية
Author: مريم بنت الحسين
Date: 07-01-2005, 04:21 AM
Parent: #1
عمو كوستاوي .. ما اتعرفته عليك نهائي.. خطر عديل كده... لقيمات مرّه واحده كده... والله يا عمو أمي بتعمل لقيمات... ما بتبيت أصلها.. موش عشان شويه طبعاً.. عشان بتطلع جناااااااااااااان... بعدين بترميها بي مزاج... وحاة الله الواحده تطلع مدوووووووووره.. زي الكوره بتاعت البينج... خطره عديل كده... غايته الجاح ومروان مسافرين بعد بكره.. شكلي حأجربها في مازن... يا أكلها.. يا ساب الجامعة واشتغل في السلك الدبلوماسي...
زولة .. اختيار "خطر"... عفيت منّك... يختي انت شكلك باله راسك للحلاقه.... ما شاء الله تبارك الله.. عيني بارده عليك.. "قل هو الله أحد"... حصوة في عين كل عين تشوف وما تصلي على محمد... تعرفي انا أظن لأنك البنت الوحيده ... الأمر ده بخليك تدخلي مع الوالدة المطبخ كتير.. ودخلة المطبخ بتعلم... احنا بالمناسبة زي بعض .. انا برضه بت واحده في تلاته أولاد.. لكن أنا الكبيرة فيهم... الصورة دي حقت الترافيل... تكتبي لينا الوصفة ولا أجي أحكيها ليكم بعدين؟
الشايقي.. عاد انت يا يابا قطع شك في دم رباطابي... يازول انت لاقي تحلية زي دي.. عزابة ولا غيرهم.. كله جاهز.. لكن شوف النتيجة بتطلع كيف... غايته تابع معاي.. انا لسه ما دخلت في التخصص.. دي كده "الرمية"
لووووووووووووووووووووووول يا خدر... بالله جاي تضحك فيني.. داير تتسدى في الشبشب حقك.. شين.. شيييييييييييييييين... الشبشب شييييييييييين يا خدر... :P
أسمع.. وقت بكيت وقشقشت دميعاتك واستغفرت ربّك.. أبكي معانا بي جاي
خميس وآخر شهر
يا جماعه عن إذنكم... الجاح عازمنا غدا وداع.. :P... موش مفروض نعزمه احنا؟!! :P غايته قال يعمل لمروان غسيل معده من المعاناة مع أكلي...
ابقوا عشرة على البوست ده.. أمسكوا الشايقي ده ما ياكل أم علي.. عارفاه عينه عليها
زولة.. بديك شمار شد الشعر بعدين
بنت الحسين
|
Post: #8
Title: Re: بوست التحلية
Author: معتصم دفع الله
Date: 07-01-2005, 04:58 AM
Parent: #7
هسي عليك الله يا بنت الحسين غديتينا لمن جايه تعملي لينا تحلية ؟..
أنا لي هسي منتظر ملاح أم رقيقة ..
حتى أسألي تمبس ومعتز وشتات ..
القاعدين حارسين بي هناك ..
|
Post: #9
Title: Re: بوست التحلية
Author: Osman M Salih
Date: 07-01-2005, 05:42 AM
Parent: #1
في هذا المنبر توابيت
هي لأقلام لم تكبح غـلـواءَ شرها نواميسُ أديان
أرواحٌ تصحّرت تربة الخير فـيها وطمرت جروفها كـتمة هـبـّوت
و حوّلتها المتاهة الجرداء لكواسر
تمدّدتْ على فـراش الموت زمناً طويلاً ثم لفـظتْ أنفاسها الأخيرة أمس
توابيتُ أسماء ليس بيني وبينها قاسمٌ ولا تضم أصحابها وصويحباتها
قائمة معارفي
توابيت لا تجد من يثكلها وينوح عليها ولامشيّعين
أراها تتحلـّل في حرارة هذا الصيف اللاهـب منبوذةً وليس من يتبرّع
بإيداعها رحمة رطوبة المثوى الأخير
أراد النائمون في رحاب التوابيت ـ يسوقهم إلى حتـفهم كيد وخبث
ـ دفعي لحافة الجنون والإنتحار فإنتحروا جميعاً وهم يصارعون إرادة
كلمة طاهـرة وصبورة على المكاره لم تنحدر يوماً طلباً لـنصر عاجل
و رخيص
لو لم أكن واثقاً من النصر لما صارعـتُ بيد أن الأمر لم يكن سهلاً
غامت رؤيتي في هـفـوات هنا وهناك وأنا أجوس قـرابة العام في
بيداء لغة ملعونة رعـديدةوشمطاء ـ هـفـوات غـفـرها لي أناس
طيبو القـلـب حقا منحوني من المودة والإحترام ما جعل السكة أمامي
مضيئة، أسماءٌ مباركة من كل ألوان طيف بلادي ناصرتني أنا الذي
لا أنتمي لعُصبة ولن تكون أحداث الأشهر الأخيرة تكأةً للتراجع عن عزلة
إخترتها طوعاً بحثاً عن أمان رخيص في حمى هذا الفـريق أو ذاك
توابيت وأيّ توابيتْ!
|
Post: #10
Title: Re: بوست التحلية
Author: Osman M Salih
Date: 07-01-2005, 05:44 AM
Parent: #1
Osman Salih
|
Post: #11
Title: Re: بوست التحلية
Author: أحمد الشايقي
Date: 07-01-2005, 06:28 AM
Parent: #1
بنت الحسين
| Quote: الشايقي.. عاد انت يا يابا قطع شك في دم رباطابي... يازول انت لاقي تحلية زي دي.. عزابة ولا غيرهم.. كله جاهز.. لكن شوف النتيجة بتطلع كيف... غايته تابع معاي.. انا لسه ما دخلت في التخصص.. دي كده "الرمية" |
والله أنا pure حسب صك الأنساب المحفوظ بخزنة جدو لكن بس التحلية حقتك ما شادة حيلها.
| Quote: ابقوا عشرة على البوست ده.. أمسكوا الشايقي ده ما ياكل أم علي.. عارفاه عينه عليها |
بصراحة دي, حقيقة والشركة عندها مطعم فيه (شيف) مغربي بيظبطها آخر حلاوة ولما عرفني مداوم عليها في الصباح كل يوم سماني (أبو علي)
أنا بفضلها بنية يعني زيادة استواء
ادرسيها كويس واشكري لينا الأخت زولة , يعني كدا ممكن نجرب نعملها, برضو أحسن من سلطة الفواكه تبعك.
تحياتي
|
Post: #12
Title: Re: بوست التحلية
Author: zola123
Date: 07-01-2005, 11:04 AM
Parent: #1
هدية لمريم بت الحسين وأحمد الشايقي
طالعة يادابا من الفرن, ما شحتفة والله
بس انتوا شوفوا ليكم طريقة صاحبوا مضيفات طيران الخليج وأنا أرسل ليكم معاهم العايزينه
مريومة
راسي ناشف قلنا ليك, أحلف يعني؟
يا حبيبة أنا ما بادخل المطبخ كتير للأسف مع الدوام المزعج ولسة أرفل في دلع الست الوالدة ربنا يخليها. باحب الطبخ بس بمزاااااااااج, فادتني فترة الجامعة اتزنقت فيها واتعلمت معظم الأشياء عشان ما باحب أكل بره
وكانت فترة ذهبية. جيراني كانوا بقولوا للاند ليدي بتاعتي البت السكنتيها جديد دي ما بنسمع حسها بس نشم ريحة أكلها الحلو.
تصدقي والدي أول مرة يضوق أكلي كان في سنة تانية جامعة, جاني اجازة شهرين في المجر وعملت ليه أول يوم سفرة رهيبة ملوخية ودجاج في الفرن وسلطات لمن اتخلع وقام ضرب للوالدة في الامارات قال ليها : بتك طلعت بتعرف تطبخ!!
الترايفل أكتبيه براك عشان الأولاد ديل يبطلوا نقة ويصدقوا انك بتعملي حلو كويس
خدر
البورد أحلى حاجة فيه بوستات مريم, بعد ما باقي البنات طفشوا
|
Post: #13
Title: Re: بوست التحلية
Author: معتز تروتسكى
Date: 07-01-2005, 11:43 AM
Parent: #12
اولا مريومه
شايفه كلام معتصم ده حتي بعدين نتفاهم
Quote: هسي عليك الله يا بنت الحسين غديتينا لمن جايه تعملي لينا تحلية ؟..
أنا لي هسي منتظر ملاح أم رقيقة ..
حتى أسألي تمبس ومعتز وشتات ..
القاعدين حارسين بي هناك .. |
ثانيا اضافه لى كلام كستاوى
بدل السكر المسحون ممكن تعملليى ليها مويه السكر وترشيها عليها + جوز الهند. .
العزيزه
zola123
شنو ياااااااااا
بالطريقه دى يوم حتاكلونا السايبر ده. .
بالهنا والشفا. .
|
Post: #14
Title: Re: بوست التحلية
Author: نادر
Date: 07-01-2005, 11:44 PM
Parent: #1
لووووووووووووووووووووووووووول
ضحكني ليك وصف كوستاوي للزلابية
قال الكانون
مريم ده البوتجاز أيام المهدية ...
زولا12345678910 زاتو
أم علي دي مااااا جهجهت الحلة كلها ... شبعنا شوف عين ... شكراً كتير
مريم سويتي ليك عداءات مع (مثلث الأوغاد خدر تمبس تنقو) الله يعين بوستك ده ما يجوهو بي شباشبهم
|
Post: #15
Title: Re: بوست التحلية
Author: مريم بنت الحسين
Date: 07-02-2005, 01:42 AM
Parent: #14
أجي يا نادر... مالي ما بعرف الكانون.. بس ما بعرف أشتغل بيهو... انا تربية حبوبات برضه... ياما حبوبتي ستنا قعدتني ليك (أسوط) ليها الملاح... كنت بقعد معاها بالساعات أسوط.... بعدين البيت عشان مافيهو أطفال.. كنت بحس بإنه دي أكتر متعه ممكن ألقاها...
زولة... ما تخربي علينا الريجيم يا انتي... انا مجتهده شديد الأيام دي.. وشغاله آيروبيكس وقصص كده أسكتي منها ساكت.. بحكيها ليك بالمهله... تعرفي.. أم علي دي ماما عندها ليها فلم لزيز كده.. مثلاً لو عملنا باسطه.. أو أي شي من الرقاق.. أو سامبوكسه مثلاً.. تقوم المكسّر منه تخته في صينيه في الفرن.. وتحمّصه.. وتخليه في الفريزر... اها.. لما تهف ليها أم علي.. تلقى الرقاق بتاعها جاااهز... اها... تكب ده في ده.. وتديه غليه بالفرن أو بالمايكروويف لما تكون مستعجله... والناس دي تجهجه... شكراً على الصورة.. شبعته تب..
الترافيل يا شباب.. الشايقي (كان جيتنا يوم... زبادي بي سكر ما بديك ليهو)..
انا بعمله بطريقه معينه... غير عن الشفتهم في الوصفات كلها.. حلو الزول يضيف نكهته الخاصة.. ولا شنو؟ اها.. تجيبوا كيك جاهز.. او تعملوهو في البيت ما مشكله... ومعاه كسترد أصفر او أبيض .. وجلي (بفضّل الأحمر.. توت أو كرز).. فواكه (ممكن جاهزه.. وممكن باقي فاكهه في البيت).. اها.. ترصّوا الكيك في قاع صحن التقديم يا جماعه.. ما صحن ساي.. وتسقّوهو بي عصير فاكهه ... ومن فوق للكيك ختّوا الفاكهه..يتعمل الكسترد أول عشان الكيك ما بتشرّبه شديد... ويتكب.. حااار فوق الكيك.. وتخلوهو لحدي ما يجمد.. بعداك يتعمل الجلي من فوق للكسترد.. ويدخل التلاجه عشان يجمد.. ممكن الجلي يتعمل في نفس الوقت مع الكسترد عشان الزمن.. ويتسكر الجلي فوق الكسترد.. دي يتدي الترافيل شكل جميل برضه... بعداك تكبو الويب كريم... لو عايزين تسمنوا طبعاً... انا بخت بعض الكرزات فوق.. بحب انعكاس الأبيض والأحمر مع بعض كده.. بدوا احساس بالجمال والطعامه... وهنا وشفا...
اها.. ما عندكم لينا شي سوداني.. وروني المديده بتاعت التمر بعملوها كيف عليكم الله... نفسي فيها بصورة مبالغ فيها...
|
Post: #16
Title: Re: بوست التحلية
Author: waleedi399
Date: 07-02-2005, 03:12 AM
Parent: #15
|
Post: #21
Title: Re: بوست التحلية
Author: bint_alahfad
Date: 07-02-2005, 03:54 AM
Parent: #15
السلام عليكم ورحمة الله وبركاته
مريومه سلامات
انا ما كنت عارفه انى غيابى عنك حيخليكى تعملى فى نفسك كده براحه على شعرك شويه لحسن العريس لما يجى ما حيلاقى شعرك فضل فيهو حاجه
انا خلاص بعد قطيع شعرك ده اقتنعت انك بتعزينى صحى صحى
شكرا للوصفات الجميله متابعاها من بعيد, وصراحه حكايه ابوكى مسافر ده ما دخلت لى راسى
تكونى خفتى عريس الغفله ما يكشف حالك ويقول ليكى انتى الشهرين الاتعلمتى فيهم الرقيص ده ماكان تتعلمى فيهم الطبيخ
صراحه عجبتنى وصفات كوستاوى والحبيبه زوله ـطلعو ما ساهلين والله
حسى ما بلقى لى عندكم وصفه بسبوسه معتبره????
الشووووق كميات
وفى امان الله
لا اله الا الله
|
Post: #17
Title: Re: بوست التحلية
Author: أحمد الشايقي
Date: 07-02-2005, 03:24 AM
Parent: #1
د زولة 123
الهدية وصلت وخالص الشكر
أصلنا موعودين بالحرمان من الترافيل
بنت الحسين
بعد الترافيل دا ممممممممم, شكلنا حنتصالح
والواسطات تقوم وتقــع
تحياتي
|
Post: #18
Title: Re: بوست التحلية
Author: ودقاسم
Date: 07-02-2005, 03:38 AM
Parent: #1
مريم
أنا عندي ليك تحلية فنانة ،،،
تشتري بطيخة بعد ما تنقري عليها وتسمعي صوتها زي صوت الطبلة ( البنقز ) ،،، تمشي تقطعيها وتختيها في الثلاجة ، ولو مستعجلة في الفريزر ،،، وبالهنا والشفا ...
بس ما تأكلي البذور ...
|
Post: #19
Title: Re: بوست التحلية
Author: mamkouna
Date: 07-02-2005, 03:49 AM
Parent: #1
|
Post: #20
Title: Re: بوست التحلية
Author: mamkouna
Date: 07-02-2005, 03:51 AM
Parent: #1
:
|
Post: #22
Title: Re: بوست التحلية
Author: bint_alahfad
Date: 07-02-2005, 04:53 AM
Parent: #20
| Quote: أنا لى هسه منتظر ملاح أم رقيقه |
ملاح أم رقيقه الهينه ده???
المقادير
حله متوسطه الحجم وياحبذا لو كانت كبيره
بصلتين كبار
هبهان وفلفل, شويه كسبره
توم حى منظفف
ويكه مسحونه
ملح
ضلعه (يد ولا رجل الخروف ما بتفرق المهم تكون منظفه كويس وتنوم براحه فى الحله)
كسره من الدكان
الطريقه
تغسل الضلعه جيدا وتضعها فى الحله مع كميه مناسبه من المياه, الافضل تكون نصف الحله لانو الضلعه بتاخد وقت فى النضوج
تقطع البصلتين كل واحده على اربعه
تضع الفلفل والملح والكسبره والتوم
والهبهان وتغطى الحله بنصف غطاء, يعنى ماتكون مغطيه كلها عشان المويه ما تتدفق بره
تقلب الضلعه كل ربع ساعه حتى يضمن نجاضها من جميع الاجزاء
بعد التأكد من نضج الضلعه وهى تصبح هشه فى هذه الحاله يتم اخراج الضلعه ووضعها فى اناء اخر ويضيف الويكه على الا تذيد عن ثلاثه معالق كبار وتكون بتدوب فيها بالمعلقه او المفراكه على حسب المتواجد, لو كانت خفيفه شديد يمكن ذياده الويكه بصوره معقوله على الا تكون كثيره وحسب كميه الشوربه
تترك على نار هادئه حتى تغلى
ماذا عن الضلعه المسكينه?
توضع بعض الليمون مع البهارات والملح وقليلا من الصلصه فى اناء وتضع الضلعه عليها وتغطى جيدا بهذا الخليط, تمسح صينيه الفرن بذيت وتضع الضلعه عليها وتضع فى الفرن حتى تنضج مع مراقبه الفرن حتى لا تحرق
وتقدم ساخنه
وبالهناء والشفاء
سورى مريومه بوظنا ليكى التحليه
وفى امان الله
لا اله الا الله
|
Post: #23
Title: Re: بوست التحلية
Author: معتصم دفع الله
Date: 07-02-2005, 05:13 AM
Parent: #22
تصدقي يا بنت الأحفاد ..
أنا لي هسه منتظر مريومة تجي تغدينا ..
قامت عملت ليها تحلية ..
شفتي شغلة الشحتفة دي ..
أنا حا أرفع عليها دعوة لمنظمة الطباخين الدولية ..
ودي ما ليها أي علاقة بمنظمات الأمم المتحدة ولا تابعة ليها ..
لكن بيني وبينك أنا حا أغير ..
وأبقى على ملاحك بتاع أم رقيقة دا ..
وبالله كتري لينا منو لانو المعازيم كتار ..
ودا على شرف رجوعك للمنتدى ..
ألف حمداً لله على السلامة بنت الأحفاد ..
|
Post: #24
Title: Re: بوست التحلية
Author: mamkouna
Date: 07-02-2005, 07:31 AM
Parent: #1
إلى بنت الأحفاد:-
بسبوسة مختلفة لكن مضمووووووووووونة......
الكوب = mug الشاي العادي
المقادير:-
كوب سميد+ نصف كوب سكر+ نصف كوب زبادي+ ملعقة كبيرة باكنج باودر+ نصف كوب سمن+ كوب شيرة
الطريقة:-
اخلطي السميد + السكر+ الزبادي + الباكنج باودر . نضع الخليط على صينية الفرن خارج الفرن لمدة نصف ساعة .(( ليه؟؟؟؟ ما عارفة ))..!!!!
بعد كده ادخل البسبوسة الفرن . اول ما تبتدي تحمر اطلعها و اسكب فيها السمن و ارجعها الفرن تاني حتى يكتمل نضجها (( يعني السمن لا يُخلط مع الخليط إنما يُسكب على البسبوسة النصف ناضجة ))......
تُسقى بعد تمام نضجها بالشراب البارد و هي ساخنة و تجمل بجوز الهند......
و بالهنا و الشفا....
|
Post: #25
Title: Re: بوست التحلية
Author: مريم بنت الحسين
Date: 07-03-2005, 03:39 AM
Parent: #1
وليد... شفته الشعر ده البنيه دي شاداه كيف؟ خليها هي التشده ... انا غايته بس بتفرّج، ما بقدر على جنس ده...
اللللللللللللللللللله بنت الأحفاد بي جاي.. يا سلااااااااااام... والله ده خبر الموسم... ياخ ده خبر جميل بشكل ... خلاص ليك علي يا عسل الوصفه الجايه كيكة الشوكولاته... عشان خاطر عيون وجودك يا ست البنات.. والله وصلت الجاح ومروان اخوي حسي للمطار وجيت... احنن كان شفتيني في البيت برااااي الله ورقبتي، مازن اخوي في الجامعة...العريس ياختي، لا حيلم في رقيص لا في طبيخ... الله يعينه بس...
احمد الشايقي.. غايته حتبذل مجهود كبير.. عشان انت خربته العلاقات الدبلوماسية.. شوف ليك واسطه كااااربه.. بفكّر في الموضوع :P
معتصم .. كيفنك.. قلت لي خلاص، قنعتوا من كسرة عند بخيته؟ ... حسي ما هدا ملاح ام رقيقة حق بت الأحفاد بي ضلعته كمان... غايته انا يا بوني لو مكانك.. الضلعه دي بعد ما تتسلق... أبهرها بي توم وزبادي وصلصه وبهارات... والفرن عديل... وداك يا العزومة الما خمج.. هيع.. عفيت منّك يا بتهم... لكن الكلام ده ببقى ليك حااار بعدين يا معتصم
عمو ود قاسم.. والله دي التحلية البحبها الجاح... هي والشمام.. أصله ما بتفاهم بيناتهم.. رغم اني بتغاااااااظ من قطّيعهم... لكن مجبره بنتك على الصلاة ...
ممكونه... شكرا على الصور الظريفة.. غايته بسبوستك سمنتها فايحه... خربتي علي ريجيمي ياخ.. أصلي اليومين ديل مجتهده... لقيت ليك روحي عامله زي نسوان الخمسينات، بخش الباب بالطول... ...
ما قلتوا لي مديدة التمر بسووها كيفن يا جماعة؟
بنت الحسين
|
Post: #26
Title: Re: بوست التحلية
Author: أم سهى
Date: 07-03-2005, 03:56 AM
Parent: #1
بت الحسين سلام
ياخي شهيتيني عديل .. كل يوم افتح البوست ده ونفسي تدخل في اكلاتكم اللذيذة البتودي الاخرة (من دسامتها)
لكن ما تقول لي من البسبوسة رهيبة .. اصلو نا لي زمن من الاكل ربنا يجيبو راجع بالسلامة
عليك الله شوفي معتصم ده .. الناس فس شنو يقول ليك ملاح ويكة.. انا غايتو كان لقيت المره الاخترعت الطبايخ دي كنت جضمتها .. اخترعته لي عذابنا ... قدر ما تنوعي الراجل يقول ليك ياخ اعملي لينا الغموس
عالم متعبة
اها انا عاوزة لي وصفة رايحة علي ما بلقاها عندك ؟ بالجد بعملوا ملاح الخدرة المفروكة كيف؟؟ ما تضحكوا على
كليني بيه في سري عشان ما يجوا ينطوا فيني الجماعة ويتشالبوني بالتنظير
معتصم اعمل حسابك من كسير التلج
تحياتي مريومة
|
Post: #27
Title: Re: بوست التحلية
Author: Kostawi
Date: 07-03-2005, 04:07 AM
Parent: #26
| Quote: بس ما تأكلي البذور |
يا ود قاسم إنتو لسع بطيخكم فيه بزور?
|
Post: #28
Title: Re: بوست التحلية
Author: Kostawi
Date: 07-03-2005, 04:11 AM
Parent: #27
|
Post: #29
Title: Re: بوست التحلية
Author: معتز تروتسكى
Date: 07-04-2005, 04:49 AM
Parent: #28
مريم
سلامات وعوافى
شنو ياخ خلاص الجوع ماخلى فينى شى..
ومنتظرين الناس بعد ماياكلوا من يدينك
انتى زوله كسيبه لينا
عشان ده زوله مصحباكى
|
Post: #30
Title: Re: بوست التحلية
Author: Elawad Eltayeb
Date: 07-04-2005, 06:55 AM
Parent: #29
| Quote: أمي بتعمل لقيمات... ما بتبيت أصلها.. موش عشان شويه طبعاً.. عشان بتطلع جناااااااااااااان... بعدين بترميها |
لييييييييييييييييه؟
|
Post: #39
Title: Re: بوست التحلية
Author: مريم بنت الحسين
Date: 07-05-2005, 04:09 AM
Parent: #30
العوض... ترميه في الزيت...
|
Post: #38
Title: Re: بوست التحلية
Author: مريم بنت الحسين
Date: 07-05-2005, 04:01 AM
Parent: #29
تروتسكي.. زولة تصاحبني ولا اصاحبها انا؟ ياخ انا طلعته ليك كيشه بشكل... عليك الله عاين لصينية ام علي الفوق دي... ما بتخرب ميزانية الدولة
|
Post: #37
Title: Re: بوست التحلية
Author: مريم بنت الحسين
Date: 07-05-2005, 03:49 AM
Parent: #28
عمو كوستاوي.. أريتك بطيخ الهنا .. طبعا الجاح بمووووووووت في البطيخ.. والجاحه بتمووووووووووت في النظافة.. والبطيخ والنظافة لا يلتقيان.. عشان كده الجاح لما الجاحه تسافر بشبع بطيخ... حسي سافر وخلا لي بطيخه ونص في التلاجه.. والله ماعارفه أعمل فيهم شنو... انا ما بحبه زي أمي...
|
Post: #31
Title: Re: بوست التحلية
Author: مريم بنت الحسين
Date: 07-04-2005, 10:51 AM
Parent: #26
أم سهى... صحة وهنا يا ستهم.. وعقبال ما نعمل ليك لقيمات كرامة رجعة زهير بالسلامة... احنا طبعا الكرامه عندنا كده.. يا لقيمات.. يا بليله... غايته نوجّه عناية السادة المشاهدين.. كان في زول بعرف الخدرة المفروكة.. يلحقنا بيها عشان أم سهى عايزاها. ,انا زااااااااااااتي عايزاها...
|
Post: #32
Title: Re: بوست التحلية
Author: mamkouna
Date: 07-04-2005, 02:09 PM
Parent: #1
عاد يا أم سهى و مريومة دخلتنيٌ في أضافريني.....
ما بتعرفن الخدرا المفروكة.....و فاتحات نفسكن للبسبوسة و التحلية  ؟؟؟؟؟!!!!!!!
المقادير:-
كيلو عجالي أو ضأن فيهو عضم (( يعني ما مشفى ))
بصلتين و ثوم
ملح
هبهان.....قرفة.....فلفل أسود
خدرا مورٌقة و مغسلة.....+ نصف ملعقة صغيرة كربونات.
الطريقة :-
كل المقادير الأولي مع بعض......ماعدا الخدرا و الكربونات
بعد تمام نضوج اللحمة و بعد الشوربة تبقى طااااااااااااااااااااعمة......
طلعي اللحمة برة الحلة......اضيفي الخدرا المورٌقة للحلة...بعد تغلي شوية مع الشوربة أضيفي ليها الكربونات
افركيها بالمفراكة حتى تذوب و إذا كنت مستعجلة استعملي مفراكة الكهرباء الظاهرة في اسفل الموضوع.....
رجعي اللحمة تاني للحلة.....يمكن إضافة توم......و بالهنا و الشفا.
ملاحيظ:
* يمكن إستبدال الخدرا ب الشمار الأخضر أو السلج....لكن يلايق الملاح بالويكة في النهاية..
* يمكن أن تؤكل الخدرا المفروكة مع الكسرة أو.....القراصة........
|
Post: #41
Title: Re: بوست التحلية
Author: مريم بنت الحسين
Date: 07-05-2005, 04:20 AM
Parent: #32
عاد يا ممكونه ما عرفتك.. وبي مفراكتك الكهربائية كمان؟ حربيه عديل كده.. طبعا المفراكه دي.. الحاجه عندنا كانت بتفتش عليها زمن لما كنا في الاردن.. بعد اسبوع من جيتنا قطر... طوالي لقتها واشترتها... لكن يخربني ما شفتها استخدمتها... شكرا على الوصفه.. لكن دايره اسألك.. اللحمه موش مفروض تكون من غير عضم؟ انا بشوف ماما بتعملها من غير عضم.. وبحسها الذ...
|
Post: #33
Title: Re: بوست التحلية
Author: أم سهى
Date: 07-04-2005, 04:59 PM
Parent: #1
مريومة الحبيبة
انشااااااااااء الله يرجع زهير بالسلامة ونعمل ديك يا اللقيمات والبليلة ونوزعها لكل البورداب انشاء الله (بالاتاش منت
ممكونة الحبيبة
تعرفي انا مرات لمن (اتزنق) بشتغل خلاط طوالي وكل الحاجات مع بعض (القطر قام يا قول تنقو ) وبعدين سبحان الله بتطلع لذيذة كيف؟؟ وحياتك ما عارفة
اسمعي ناس معتصم ديل خليهم على انا عارفة دواهم كويييييييييس
تحياتي
لكم مودتي بقدر ما ونستوني وفرقتو على شوية
|
Post: #44
Title: Re: بوست التحلية
Author: مريم بنت الحسين
Date: 07-06-2005, 07:01 AM
Parent: #33
| Quote: انشااااااااااء الله يرجع زهير بالسلامة ونعمل ديك يا اللقيمات والبليلة ونوزعها لكل البورداب انشاء الله (بالاتاش منت |
وليك علي من هنا يا أم سهى.. نعمل لقيمات.. كرامه وسلامه.. بإذن الله... عارفه.. لما البنت السودانية كانت مخطوفة في الرياض.. انا قلبي مشغول عليها شديد خلاص.. أول ما رجعت.. طوالي مشيت للحاجه قلت ليها أعملي لينا لقيمات كرامة رجعة البنيّة...
| Quote: لكم مودتي بقدر ما ونستوني وفرقتو على شوية |
لا لا... انت ماشه وين كده... معقوله ما بتعرفي بسووا مديدة التمر كيف؟ ادينا وصفتها ..ولا بحرّش ليك ناس معتصم ديل... اقول ليهم ام سهى بترسل ليكم ام رقيقه بالدي اتش إل
|
Post: #34
Title: Re: بوست التحلية
Author: أحمد الشايقي
Date: 07-04-2005, 05:46 PM
Parent: #1
مريم بنت الحسين
سعيا لاعادة العلاقات (بدون واسطات) الواسطة ستكون مديدة التمــر حسب طلبك
(التعليقات تمتنع والمديدة لم تحرقني)
طبعا حاستنجــد بـ صديقـة , وإرضاء للخاطر آخــد منها ملعقة (ملعقتين)
وصــافيــة (تـمــر) , والمرة الجاية صـافيـة (حلبة)
مع التحيــة
|
Post: #35
Title: Re: بوست التحلية
Author: Shinteer
Date: 07-04-2005, 05:57 PM
Parent: #34
أنا غايتو بحلّي بالعدس وبس. لو في أي زول عندو شوية محسنات لأبو عديس ده يلفانا بيها.
|
Post: #36
Title: Re: بوست التحلية
Author: صلاح الدين عبدالله محمد
Date: 07-05-2005, 03:23 AM
Parent: #35
بت الحسن
تحياتى
عاوزين نقيمها
ندخل المطبخ
ولا تجيبوها برة
منتظرين
|
Post: #40
Title: Re: بوست التحلية
Author: صبري
Date: 07-05-2005, 04:16 AM
Parent: #36
وصفةللعذابة
الاسم القطر قام
كيلو لحم ضاني 3ح بصل/ 3ح طماطم شطة خضراء +بهارات حسب الرغبة
كل المقادير مع بعض وتشد الحلة في الكانون وبعد 10د او بعد ريحة البصل واللحم قلب شديد
وخليها علي نار هادئة وتقلب كل بعد فترة وجهز سلطة دكوة طماطم+بصل اخضر+شطة خضراء
حدود الساعة تقريبا الحلةتكون جاهزة وبالهنا والشفاء
|
Post: #46
Title: Re: بوست التحلية
Author: مريم بنت الحسين
Date: 07-06-2005, 07:17 AM
Parent: #35
لوووووووووووووووووووول... انا برضه العدس ده ما عنده أخو عندي... لكن ما للتحلية يا شنتير.. بالغته فيها دي...
|
Post: #45
Title: Re: بوست التحلية
Author: مريم بنت الحسين
Date: 07-06-2005, 07:05 AM
Parent: #34
الشايقي... شايفاك رخيت النار ... يا زول انت ما جعلي ولا شنو؟ كده النشوف المديدة.. كان جبتها لي تمام.. بنفكر في موضوع الصلح العام ده...
|
Post: #42
Title: Re: بوست التحلية
Author: Osman M Salih
Date: 07-05-2005, 04:22 AM
Parent: #1
التوابيت الواجب تشييعها في الحال
______________________________
- متوكل التوم و هو القاص الذي فـتح عليّ
باب شره عـندما قـدمتُ إلى هذا المنبر مجهولاً
إلاّ من قـلّة أهـل ومعارف. أرشيف ذلك السجال
الذي دار بيني و متوكل التوم حاضرٌ إليه
تمتد جذور كل مايحدث و Emailsاعتذاره قبل
عام في الحفـظ و الصون
- خدر و ثـلة الفـَراش الدائر حول سراجه
الكابي
- ناذر محمد الخليفة
- حسين ملاسي
Humida
- سجيمان
-محمد حامد جمعه
- مريم بنت الحسين
- هاشم نوريت
-صباح أحمد
A.Razek Althalib
- سامى عبد الوهاب مكى
ShinningStar
-الرفاعي عبدالعاطي حجر
- عبد الحميد البرنس
-الملك
لم يتبقى لهذه الأقلام شيء سوى الهضربة
النهارية بلغة خبيثة ورعديدة
تتملـّص من قـبضة الكلبشات
أستثني كل الذين تراجعوا عـن الغي
إلى صراط مستقيم
أراقـب للاضافة سلوك بعض الأقلام
التي تـتقافـز بلا مبدئية من مربع
إلى آخر
النصر حليف الكلمة
|
Post: #43
Title: Re: بوست التحلية
Author: Elawad Eltayeb
Date: 07-05-2005, 09:52 AM
Parent: #42
| Quote: العوض... ترميه في الزيت... |
والله عارف. لكن يعني إلا نشحد عديل كده، أرموا لينا لقيمايايه لقيمايتين.
والمصطلح ذكرني:
رمي اللقيمات
خت الشاي
عواسة الكسرة
وليع المكوة
تسخين العربية... ده لو ما كانت عايزه لزة
أكيد حا تقولي لي انت من زمن مكوة الفحم!
صدقي أنا أقدم من سجيمان زاتو. ما تغشك الصورة.
|
Post: #47
Title: Re: بوست التحلية
Author: أم سهى
Date: 07-06-2005, 09:23 AM
Parent: #1
مريومة
انا ما عاوزة الخبط ليك الريجيم وكدة - باقي نحن (اخوات في الانسانية9
عشان كدة ما نخرب ريجيمنا بي مديدة التمر - وبعدين اصلنا نحن حلوين وما محتاجين تحليه 
تحياتي
اها كيف معاك عمل المش؟؟؟؟؟
وملاح الشطة الخضراء
اذكر مره زميل كان شغال معانا وجا لقانا بناكل في ملاح الشطة وشكلو زي (الفسييخ) ونحن عرفنا انه ما بياكل الشطة فقلنا ليه ده فسيخ
يلا اتخيلي منظره كان كيف وختي في بالك انه (لقمة الرجال بشيلوها كبيرة
يلا سلام ما يجونا ناس التوابيت اسه ناطين علينا
|
Post: #48
Title: Re: بوست التحلية
Author: صديق الموج
Date: 07-06-2005, 12:17 PM
Parent: #1
Quote: سلطة الفواكه بالكريما...
المقادير.. علبة فواكه محفوظة.. بتتباع في السوبر ماركت.. معاها علبة بتاعت حليب مركّز ومُحلّى.. انا غايته بستخدم نستله... وعلبة قشطه بيضا ... اها.. كبّوا كله في بعض.. وعلى التلاجه عديل... كده السلطة جاهزة.. والله وصفة ما بتخيب أصلها.. سريعة.. وبتتأكل... بس خلو بالكم من الكالوريز... (عندنا بوست قريب عن الريجيم |
..
السيد الرئيس مريم...اول مرة اشوف حاجة بتعمل روحها،،،،
جيت مارى قلت اضوق
|
|
