باركوا معاي للفنان الصديق اللدود ناصر عباس.. والجميلة الفنانه نهله..

لم أر أي منهما من قبل.. ولا صدفه ولا لمحه... لكني أشعر بأني قد رأيتهما مراراً وتكراراً..

ناصر عباس اقترن أخيراً بالفتاة الرائعة ... نهله...

فرحتي بهما قد فاقت التصوّر... وسعادتي لهما لا يمكن وصفها...

سأتوقف قليلاً عن "مكاواتك" ناصر... وسأحاول أن أكون "ظريفة" معاك لوقت قليل... إكراماً لحبيبة قلبي العزيزة نهله....

نهله.. في أوقات مماثله.. يصعب أن تترجم السعادة لحروف...


يا جماعة.. مافي زول يدخل البوست ده من غير ما يخت شي... صورة.. أغنية.. كلمات... أفرحوا معاي بفرحتهما.. وبهما.. وكان في كاش ما بنابا







ربنا يجمعكم على الخير والسعادة والهناء... وييسر كامل أموركم.. ويرزقكم بغير حساب... ويحميكم ويفتحها عليكم...


حبوبة بس.. موش يا نهله

Mabrook Nasir and Nahla wa ogbalak ya Nadir "Nemeri" wa thanks a lot Mariam

تهانينا للعريس ناصر وعروسته الجميله نهى ..

امنياتى بحياة زوجية سعيدة وبيت مال وعيال ..

مريم اعفينى مابقدر لااجيب زهور ولاغنوة... نعساااااان واسى شايف طشاش طشاش .

العقبى ليك يامريم ..

محمد عبد الرحمن.. ألف شكر

مهدي.. تحياتي..


ملاحظه صغيرونه
عليكم الله نادر ده مسمينه الاسم الشين ده ليه "نميري"!!! ولا في أي علاقة بين الاتنين.. ولا من قريب ولا من بعيد...


بنت الحسين

امنياتى بحياة زوجية سعيدة وبيت مال وعيال

بمحمد منير.. نبدأ الحفل... والأغنية مهداة للعزيزة نهله... إهداء معه جميل المحبه.. وشديد الأماني لك بالكثير من الفرح... وكامل الأسف لعدم وجودي ...

سرقة تنفع يا مريم لغاية ما نتدبر الأمر ..
تهانينا القلبية لناصر ونهلة ..
ربنا يتم ليهم على خير ..

الف مبرووووووك ..

الف مبروك ناصر .... الف مبروك نهلة

وحياة سعيدة انشاء الله

العزيزة مريم
نعلك بخير
ما يتتوصي و ما بتنسي حاجة
شكراً يا ذوق
(ام سهي) شكراً كتير علي كلماتك

و عقبال للتانين

انسى كيف يا محمد.. إذا انا مكرهاهم عيشتهم في المسنجر.. .وما مدياهم فرصه يتونسوا مع بعض... طبعا نهله ظريفه ولطيفه.. لكن ناصر بستحملني اول خمسة ثواني... بعدها ببدا يشاكلني... وانا بتقّل ليهو دمي زياده وزياده..

لازم أتذكرهم.. ولازم افرح ليهم...

شدّو... الف شكر.. والله يبارك فيك

حميده.. ألف شكر

معتصم .. على قول الأردنيين لما تستخدم حاجه حقتهم "ع حسابك"...

شكراً ليك.. وعقبال عندك ان شاء الله...


عاينو انا بتلقى التهاني زي التقول شايفاهم.. هو ناصر ونهله ديل عايزين ليهم زول يشوفهم؟!!

معتصم دفع الله
تسلم وعقبالك

أها قلت شنو؟؟ متين؟؟ عايزين ننزليك البوست الماخمج... تعرف الجماعة بقوا يقولوا نادر أحرف زول في بوستات (كسير التلج) ما تفوت الفرصة دي أنا لما أعرس س.أونلاين دي تاني بفارقها سماها وماني فاضي ليها بصرااااااحة كده

Quote: تعرف الجماعة بقوا يقولوا نادر أحرف زول في بوستات (كسير التلج)

أجي يا يمه.. ما شفته لي زول بشكّر في روحو.. كان قصدك على البوست بتاع دكين.. شايفاك شلته قرجتك ووقعته فيه خبت.. ... غايته كان قصدك ده كسير التلج (بالقرجه).. أحرررررررررف زول

يا نادر أخوي كدي شيل الصبر ..
أنا قدامي صف طويل ..
خليني أخلص من عصابة الرياض ديل ومعاهم واحد هناك معاكم إنت عارفو ..
أها إنت كان خليت كسير التلج ..
التلج زاتو ما بخليك حا يكسرك إنت ..

ولا أقول ليك ما تجي نخليها جماعية ..
أهو سجن سجن غرامة غرامة ..

الحبيبة مريومة

تخنقني عبراتي وانا اتلقى هذا الخبر المفرح .....
الف مبروك لناصر ونهله وعقبال ما نفرح بنادر قريب يا رب
وعقبال محمد وسامي

ربنا يحفظكم يا نادر ويبدل حزنكم فرح دائم يا رب
ودعواتي الصادقة للحبيبة الغائبة أم الكل
اراحها الله في مرقدها

تسلمي الأخت أم سهى
ودعواتنا تتلاحق لعودة زهير بالسلامة ان شاء الله
تحياتي للأهل بالسودان وأنت تستعدين لمعانقة تراب الوطن

أم سهى الحبيبة.. الله يبارك فيك... ويطمّنك على أبو عيالك.. ربنا يرجعه بالسلامه.. ويعم الفرح الجميع... ناصر ونهله فيهم الخير.. فرّحونا شديد... وانا ناويه انشر فرحهم ده على الجميع...

نصيحة .. شايفه ليك دكين منشن على سهى بتك.. عليك النبي أديهو على راسو الملان جكس ده... فشّي لي فيهو شويه كده...

مبروك
ناصر عباس
نهلة مهدي محي الدين

وليقيني أن هناك الكثير من الأصدقاء الذين قد تختلط عليهم الأمور، أو الذين قد يقعون نهب التساؤل المحير ، فناصر عباس محمد الحاج خريج كلية الفنون الجميلة قسم تلوين 1994م مقيم الآن ببلجيكا، ونهلة مهدي محي الدين تشكيلية خريجة كلية الفنون الجميلة عام 1999م، لها إسهامات عديدة من خلال جمعية التشكيليات السودانيات في معارض فردية وجماعية في كل من السودان ومصر، إضافة إلى مشاركاتها في فقرة الرسم ببرنامج الأطفال بقناة النيل الأزرق.


تسلمي الغالية مريم على هذه اللفتة البارعة ... وعقبالك أغني في فرحك وأقول ... أجمل غنية عندي تفرح كل زول ...


الصديق (مهدي) ناصر عبد المنعم إبراهيم ... تحياتي وعقبالك .. بالمناسبة أنا منتظرك ومنتظر ضياء الدين عووضة .. بس شكلها طالت الشغلة فمعليش حأزوغ وكده ... أكلوا ناركم براكم .. معاكم في كل حاجة إلا الجهجهة دي ... السعودية مع العزوبية دي عنترة بن شداد بي جبروتو داك كلو ما قدر يستحملها ...

محمد عباس محمد الحاج وينك طولنا من إبداعاتك ... الامتحانات وانتهت حاول تعال وأنثر ابداعك المتألق هنا ... ومبروك لناصر وعقبالك ...

مبروك مرة أخرى ناصر ونهلة
وعقبال للشباب الحلو القاعدين (كلويتا) عجل حديد

عزيزنا ندورات
ليك وحشة، وينك، طولنا منك قاطع الحركة مالك
مبروك لناصر و عقبالك يا سيدي قريب
طبعا كم مهول من النوادر حصل
خلصت أنا قبلها بي يوم و طبعاً سعدت جداً لما لقيتك نازل علي البورد بي نفس
خليك بي خير

ناصر عبد المنعم ازيك
لكم جميعاً الود

نادر... انا ما بشكروني على ده.. انا مفروض أكون مع نهله حسي بنظّر ليها في تقاليد المجتمع البائته.. وانقنق معاها على الحنّة والدخّان.. ويمكن كمان أسوقها ونزوغ نمشي السوق العربي.. عشان لما نجي راجعين اي زول في الشارع يشاكلها "في عروس تمرق".. نهله وانا ربطنا شيء شديد الجمال... ويمكن عشان كده ناصر كل ما يلاقيني يشاكلني "غيران"... لكن أقول له.. "موت غيظاً"...

ألف مبروك ليهم

ناصر عباس اقترن أخيراً بالفتاة الرائعة ... نهله...


فرحتي بهما قد فاقت التصوّر... وسعادتي لهما لا يمكن وصفها...


thanks Mariam

Sadig

الله يبارك فيك أستاذ الصادق.. تحياتي للأسرة.. وتحية خاصة لمريم.. عقبال نفرح بيها عروس...

البقية.. بجيكم راجعه بعدين.. الفنان الثاني ليحي الحفلة... الأستاذ....


ولا ..

خليه مفاجأة

نقطة نظام
مهدي غداً سيذهب أهله لمقابلة أهل العروس والاتفاق على ترتيبات العقد والزواج

مبروك ألف ألف مبروك وربنا يتمم على خير
وستعرف يوماً يا ناصر عبد المنعم كيف أن هذا التاريخ تحديداً غريب وعجيب ومضحك، وستنجلي سخرية القدر ... كمان في بحري

مهدي..

Quote: Mariam ask Nadir about the name he can tell the story

انتو قصتكم شنو مع الأسماء.. انت مسمي نفسك مهدي.. وبقولوا ليك عبد المنعم.. ونادر مسمينه نميري... غايته انا سألته.. ورفعت مذكره رسميه بعدم الرضا والاحتجاج على الاسم الشين ده.. انا بعمل لي حساسيه.. وحاله نفسيه.. وبعدين اساسا هو ما بشبه نادر.. حتى لو حصل سنة ولادته... عليكم الله غيروهو.. ادوهو اي اسم.. ان شا الله "فضل الله"، "خدر".. "الزين حرسنا" المهم... بس الاسم ده لا لا لا...


ألف مبروك يا مهدي.. ولابد بالله.. كيف المعنويات الليله.. وريني وين في بحري.. احنا بيتنا في بحري.. يمكن تطلع جارتنا

نادر بالمناسبة نهله عندها اختها ساكنه قريب من بيتنا... اصبر لي بعرف ليك شمارها..

Mariam ask Nadir about the name he can tell the story
Mohamed Elhaj kaifak wa ogbalak inshallah
Nadir I send you an email two weeks agao check your email

مريم

ياخي مبروك ليهم ..

بس الصورة بتاعة البت البتمعط في شعرها دي بتعمل لي نيرفز..

قدر ما اشوفها بتضرسني ..

يا تزحيها ياكمان تزحيها ..

الف الف مبروك

ناصر ونهلة

.....
.....

وعقباااااااااااااااال ليك يا مريومة

الملك.. عقباااااااااااااااااالك يا ملك... شكراً ليك يا ناجي.. ونبارك ليك السمح ان شاء الله...

دكين.. الله يبارك فيك ياخي. .وما حأقول ليك عقبالك.. عشان الزوله الببليها الله بيك ما اتعلّق انا ذنبها...

بعدين الصورة مالها ياخ.. بتعبر عن غليان قوات الشعب المسلّحه.. خليني افكّر... لكن لو بتغيظك، ده بكون دافع عشان اخليها... انا اساسا كنت ناويه أغيّرها.. لكن وقت ضايقتك... (حأفكر)


غايته فتشته ليك كركديه جاهز ما لقيت.. هاك ديل بلّهن في مويه.. واعمل ليهن سكر وروح موز.. واشرب...

الف مبروك و التهانى القلبية لحبيبنا الفنان ناصر عباس والشابة الرائعة نهلة مهدى ... وعليك الله يا مريم ورديتين ...

وعقبال ليك ... وعقبال لى نادر صاحبى ..

وبالله ادونا تلفون .. كباية .. شبشب اخدر .. ميرندا .. اي حاجة ..


وتانى الف مبروك .

تحياتى


ابراهيم

الشرغوف...الله يبارك ليهم ان شاء الله ويجمعهم قرييييييييييييب

Quote: وعليك الله يا مريم ورديتين

شبشب خدر ده يدخل البوست ده على جثتي...

الاخت مريم
سلامات

الف مليون مبروك
وبيت مال وعيال
واحنا جاهزين بالفنان

كوكي.. حلاااااااااته الفنان بتاعكم... غايته كان ما بيبي لزيز كان قلت ده ناصر.. اصله ما بتاع تلوين وبس... واسألوا ناس حمزة سليمان واصحابه ناس عقد الجلاد.. واسألوا برضه نادر .. قال إيه بدندن معاه... غايته كان غنّى معاه تبقى مصيبه...

يا بنات البورد... تعالوا.. نهله حترمي البوكيه .. النشوف البعدها منو؟ انا غايته بقيف اصوّر البتقع والبتقيف

الفنان البعده... او الأغنية البعدها ... مع الشكر لأساسي...

الأخت مريم بت الحسين
نهارك سعيد
جئت مهنئاً

عرفني عليك هذا الفضاء
لست راغباً في رؤية قلمك
حبيس تابوت
أتمنى لك الخير ولاشيء
سوى الخير
عثمان محمد صالح

الأستاذ عثمان ...

ربما كنت بطيئة الفهم قليلاً.. لكني أصل ... وكما يقول المثل.. better late than never... فهمت الآن ما كنت تريد أن تلمّح به إليّ.. والحقيقة فهمت هذا التلميح قبل فترة.. ومنذ ذلك الحين قررت أن اقرأ فقط ما تكتبه...

هذا لأخبرك بأن رسالتك قد وصلتني.. رغم انها كانت غريبه بعض الشيء...


شكرا لك على تهنئة صديقيّ ناصر ونهله...


هل لاحظتم أن لهما نفس حرف البداية...


بنت الحسين

التهاني القلبية للاصدقاء نهله وناصر ..
وعقبال اي زول وزولة عايزين يعرسو .. وعقبالي انا برضو ..

يا مريم
الليلة الجمعة جينا ويدنا فاضية تكوني طالبنا انت والعرسان..

تمبس... الجمعه دي مكنتك... جيتنا ملولح إيديك؟ لا لا لا .. ما ينفع..

عشان كده نديك برتقان.. ما زي باقي الناس :P




العريس والعروس....يا جماعة قولوا ماشاء الله.. حصوه في عين العين التشوف وما تصلي على النبي محمد.. صلى الله عليه وسلم

مريم ازيك
كيفنك
بعدين التشخت دا شنو يعني
الزعلك منو
لابد ليك في الماسينجر ما بتدخلي
(في خبارات بتكوني دايرة تسمعيها عن امس) (شفتي التملس دا)
و بعدين حكاوي عن يوم 19 يوليو
ما غريبة يكون زواجهم يوم 19 يوليو
قبل يومين ناصر حكى لي نكتة (مدرس و مدرسة رياضيات اتتزوجوا جابو ولد و استنتجو الثاني)
شكلهم كدا ديل حيكون عندهم مناضلين كبار
غايتو اذا الشريط طلع سالم من يدي سالم (لأنو ناصر ممكن يمسكك لي الشغلانيات دي 45 سنة حاديكم تشوفوه)
يلا عقبالكم
تحيات
مبروك ناصر عبد المنعم

ود الحاج.. ازيك... غايته لا زعلانه لا الله قال.. انا لما ازعل بقول ليك طوااااااااالي.. بعدين انت عامل عمله تزعّلني ولا شنو؟ اصبر بجيك اونلاين النشوف الشمارات كيف عندك...

وينه الطناش.. ما كتبته ليك تعليق انا؟!! كان ما كتبته معناها ده عامل السن وكده.. حاكم الذاكرة خربت ياخوي.. الكُبر حصل...

مبروووووووووووووك بتنا نهله مهدى
يارائع
التشكيليه
مبروك ناصر عباس وبيت مال وعيال
ومبروك مريم

الله يبارك فيك يا فرح... ربنا يخلي الأيام جميعها فرح وسعادة.. شكرا ليك على التهنئة...

مبروك عزيزنا ناصر مبروك الفنانة نهلة

نميري مبروووووووووووووووووك وعقبال الجميع

أبو حلمي

الله يبارك فيك يا عاكف.. موش خبر حلو؟ أحلى اتنين (ناصر ما تصدق عليك الله)... اخيرا بقوا سوا..

مريومة
والله لوم الجبال معاكـ و مع اصحابكـ
لكن بت عمكـ دي بي جاي معذباني

والله مابقعد في النت زي زمان
اصحابكـ فوق راسي ده و كان بقي ناصر ده هو( زولي البعرفو )
ببقي اتلومت مليون مرة

مليون مبروكـ ناصر .. نهلة




دقيقه انادي بارعه تزغرد ليكم

بري يا يمه.. اللوم راكبك راكبك.. جاي يديك فاضياااات كده انت وتمبس يايمه يقصّر الملح...


لكن برضه عشان ما جبته لينا صورة الشبشب داك.. نديك العصير المفضّل بتاعي...

مريـــم
والله نسيت الحفلة ..
وانت اصلو ما بتريحي ..

Quote: لكن برضه عشان ما جبته لينا صورة الشبشب داك

مريــــــــــــــم
الكرت الفوق ده محملو في مكان خاص
ومديهو اسم قريب لي ملف تاني
اها بعد التحميل ..
تتخيلي لقيت شبشبك الاخدر قاعد
قلت خليهو الشبشب الاخدر بينفع في اليوم الاسود..
الشبشب ده ( محمدك ) يا مريم
والذي نفس تمبس بيده
اقشطو ليك في شنطة الشيلة..

Quote: والذي نفس تمبس بيده اقشطو ليك في شنطة الشيلة

تمبس.. بريييييييييييي يا يمه.. شبشب زي ده في الشيله.. فال كعب تب.. غايته انا كلمتكم من حسي.. أخير لييييك.. هو احسن شي اننا اساسا في عرسنا مافي شيله وقصص زي دي.. ما بديك فرصه زي دي.. وكان حترسل لي هدية زي دي.. ماااا بدورها... يازول هوي.. ده شبشب ممكن يخرب العلاقات الإجتماعية والاقتصادية.. اخير ليك.. ببقى ليك حااار الكلام ده ..

مريوم
كان ما زغرودة بارعة ما كنتا سمعتا بالبوست دة يعني؟؟؟
الف مليون مبروك لاحبابك و عقبالك
السنة دي ما الجاية
محبتي يا حبيبة

لنا مهدي.. الله يبارك فيك.. وعقبال أحبابك كلهم ان شاء الله...

Quote: كان ما زغرودة بارعة ما كنتا سمعتا بالبوست دة يعني؟؟؟

يعني انا من أول امس اشيل واجيب في الأغاني زي الDJ .. ده كله ما جابكم.. ... شكرا ليك يا لنا..

بت الحسين

مبرووك زالبقدر اخطه هو
جعله الله زواج مبارك تدثره السعاده والمال والبنون
وليك يا بت الحسين الشكر وعقبالك
تحياتى

بلدي يا حبوب.. ألف شكر ليك على الكلمات الجميله.. انا سعيده جداً عشانهم.. واتخيل اضطريت أعمل هدنه مع ناصر عباس لمدة دقايق عشان خاطر المناسبة الجميله دي.. شكرا على المرور الأنيق..

العزيزة بت الحسين

الف مبروك للنونين نهلة و ناصر
و ان شاء الله تكون حياتهم اجمل لوحة تزينها السعادة و وردات و ورود
كما يشتهيان. بالمناسبة باركي لي تشرفي بلقاء خدر و اسمهان و الشبشب
الاخضر لووووول...التفاصيل تأتي تباعا..فرحتك لنهلة و ناصر فرحتنا
و طالما ناصر قريب لينا هنا نتمني يصلونا لنحتفي بهم و يغني ليهم خدر

عم نصّار.. تعرف .. انا بتكيف اناديك عم نصّار ليه؟ عندنا شخصية من الشخصيات التي تعلق في الذهن من اول لحظه... رجل تشعر بأنه كالملاك.. ويناديه الجميع عم نصّار... يذكرني طبعا نداؤك به.. ويذكرني سلامك المستمر مع من هم حولك ومع نفسك، بروحه... شكرا لك على الكلمات اللطيفه.. ومتأكده انه ناصر نهله حيقرأوا الكلمات دي.. وحيكونوا سعيدين بيها جداً... أما شبشب خدر الأخدر، عليك الله كان قريب منّه أرميه في أقرب كوشه... وادعي ربنا انه ما يئذي انسان بي منظره..

Nadir, I am waiting for you in the email, the dates are really surperising
I will be waiting to hear this good news from you personally.

مريم

ازيك

متابع البوست ده وشكلك قعدتى ليهو بمزاااج ..البوست جميل جدا
بس كمان صراحة مرات (فهمى تقيل شويه )
ناصر ونهلة ديل عرفتهم من خلال تقديمهم هنا وفرزتهم (تب).
بس الشيء ا لمحيرنى حبيبنا (مهدى) العريس المرتقب (حسب ماتقول مجالس البورد)
مهدى دا علاقتو بنادر ونهلة شنو ؟
رجاء فك ا لاشتباك وتوضيح العلاقة بين العريس ناصر والعريس (المرتقب ) مهدى اللهو
ناصر ( والعريس المرتقب هنا نقلا عن مجالس البورد والماسنجرات الليلية التى اختفى منها
ناصر اللهو مهدى اي ليس ناصر العريس )

اها حليها يامريم ...ومرة اخرى الف مبرووك للعرسان ..

محمد عبدالرحمن.. شكرا ليك.. انا والله مبسوطه عشان كده البوست طلع جميل.. ناصر ونهله عزيزين علي شديد...

شوف يا سيدي.. انا بعرفهم الاتنين عن طريق الانترنت... صاحبتهم صحبه شديده.. ده غير انه عندنا معارف مشتركين.. ناصر عباس.. اتزوج نهله مهدي... دي انتهينا منها؟ كده القصة الأساسية بتاعت البوست انتهت.. أما مهدي يا سيدي.. فهو صديق لنادر وهو أخو ناصر عباس... نادر عباس هو اخو ناصر عباس... العريس.. ومهدي (ده ما اسمه الحقيقي) هو صديق للعائله دي.. مهدي جا بارك لناصر واتمنى العقبى لنادر... والحصل انه قام نادر عرف انه مهدي برضه خطب وفي طريقه للزواج.. فقام هنأه... أحي النفس انقطع.. عاد لكن يا محمد عبدالرحمن الكلام ده ما واااااضح... ما داير ليهو مترجم... وصلت؟

الف مبروك يامريومة للجميلة نهلة
والوجيه ناصر
وبيت مال وعيال
اها عشان ما تقولوا دخلنا ايدينا فاضية عارفانا اصحاب واجب

هوزي الظريفة.. حاشاكم ما بتقصروا... شكرا ليكم.. و"البوكيه" وصل ... تحياتي للفاتح



بنت الحسين

Mariam,
Thanks a lot for your congratulation, and it is enough for you, we are going to change your status in this post, so you have to leave this post to me and I will take care of it, Nadir is ignoring and don't reply to my email but I will keep bothering him by lots of emails,

Mohamed Abe Elrahman you are smart enough to distinguish which is which and you are in Qatar so close to the event, and I will show up specially for you in the messenger soon inshallah,

Nadir " will no longer call you with that name" what is going on with you, will wait for you in the email, and don't tell me it is hard to stay alone in Saudi, Man I have the experience for two years and in the Qaseam are so thank Allah you are in Hollywood of the peninsula ha, I am not going to put a pressure on you guy, but I am really happy for you and specially the compatibility of the place and time and will tell you a lot in the email

ناصر يا حبيب
كيفنك
ما لقيت أي ايميل منك على nadirabas(at)yahoo.com ده ايميلي ومنتظر منك رسالة، علماً بأني طلبت منك رقم الهاتف في آخر رسالة مني ليك لو تذكر، واتصلت بالسودان طلبت رقم هاتفك وإلى الآن لم يصلني من ضياء رد ... على كل أنا بانتظار رسالتك ورقم تلفوني هو 00966502868365
تحياتي وكثيف أشواقي

الأخ مهدي.. تحياتي..

Quote: Mariam, Thanks a lot for your congratulation, and it is enough for you, we are going to change your status in this post, so you have to leave this post to me and I will take care of it, Nadir is ignoring and don't reply to my email but I will keep bothering him by lots of emails

ألف مبروك مرّه تانيه يا مهدي.. لا لا.. البوست ده حق ناصر ونهله.. ... ألف ألف مبروك.. وربنا ان شاء الله يتمم ليك على خير.. ويجمعكم ويسعدكم ويهنيكم...


بنت الحسين

ألف مبروك لناصر ونهلة
وبيت مال وعيال وعقبالي

Ok Mariam will leave this nice post for Nasir and Nahla however I will wait patiently till August to make one for you guys you really deserve it