مساعدة عاجلة...لصادقي الوعد

سلامكم جميعا وكل سنة وانتم بخير

احتاج لمساعدة عاجلة وهي مقالات كنت قد صورتها باكميرا دجتال
ولم يكن التصوير جيدا..
من دار الوثائق

صحيفة الصحافة الفترة ما بين
مايو 1968 الى سبتمير
مقالات عمر المكي المعنونة ببطاقة مبارزة
مقالات بقادي ومصطفي مبارك وخالد المبارك
الموجهة لصلاح احمد ابراهيم..
ومقال
لونك السياسي يا... كتبه صلاح احمد ابراهيم في يوميات الصحافة
الاربعاء8 مايو 1968

على استعداد لدفع التكلفة .
من يود القيام بهذا العمل
عليه بان يكتب لي تلفونه
في الماسنجر من داخل المنبر
ولمن يود المشاركة من خارج المنبر
[email protected]


وتحياتي لكم جميعا ومودتي
بيان

الدكتورة بيان

جيت اقول ليك حمدا لله علي السلامة

وكل عام وانتي والاسرة وبخير وانشاء الله عام محبة وسلام

استاذتي الدكتورة بيان حمد الله على السلامة وشخصي موجود ليردد قول الشاعر:
لا خيل عندك تهديها ولا مال***** فليسعد النطق ان لم تسعد الحال.

وربنا يوفقك في ان تعثر على مرادك بجاه الصمد/ الواحد/ الاحد/

الرزوقى و محمود
سلامات وشكرا


همتكم معاي
ابحث عما كتبه عبدالخالق محجوب في صلاح
كما اود ان اسأل ماذا حدث للويب سايت الخاصة بعبد الخالق لم اجدها.

مودتي

الضليلم الدقم

يخضر ضراعك في العصرة على السارية
وشكرا ليك دائما وابدا
ليتك تكتب كثيرا فأنت كاتب جاد ومنظم
ولكنك مقل جدا

مودتي

دكتورة بيان
لك التحايا والسلام والاكرام
ما تبحثي عنه بلا شك موجود وموثق ولا داير ليهو دار وثائق ولا غيرو
بس الله اعلم تلقي زول يعبرك او يخدمك
حتى كان دفعتي الملايين
انت دايرة القاتل يساعدك في العثور على السكينة ومسرح الجريمة
غايتو ما تيأسي
ووزعي الايميل والماسنجر والبرايفتات
ولو اعلنتي حجم الجائزة او الاجر المرصود للمرحلة الاولي
احتمال تلقي ليك بياع بعد ان يأمن الضياع
فتك عافية مع معزتي

كل سنة وانت طيبة يا دكتور

المقالات الطلبتيها دى انا ان شاء الله بلمها وبرسلها ليك
بس تصبري شوية .. اسبوع كدة على بال ما اراجع الارشيف و احنس الشغالين فيهو ..

و ما فيها اتعاب ... يعنى وفرنا ليك قروشك

لمن انتهى نشوف طريقة الارسال

تحياتى ليك

ولدنا مهند كيفنك؟

شكرا ليك على بوستك لي اسعدني جدا
وحسيت انني اقوم بعمل قيم بالكتابة هنا..


مودتي
عدلت اخطاء طباعة

Quote: كل سنة وانت طيبة يا دكتور المقالات الطلبتيها دى انا ان شاء الله بلمها وبرسلها ليك بس تصبري شوية .. اسبوع كدة على بال ما اراجع الارشيف و احنس الشغالين فيهو .. و ما فيها اتعاب ... يعنى وفرنا ليك قروشك لمن انتهى نشوف طريقة الارسال تحياتى ليك

يا سلام عليك يا ظلامي يا منور

دائما عندي حسن ظن عالي فيك وارى فيك نموذج لرجل حقاني..

نديك دعوة حبوبة
يعليك ما يدليك ويقويك على عدوينك

عندك شهر وتجدني مدينة ليك جدا
خاصة انه طيب الاسماء تبرع مشكورا ولكنه وجد دار الوثائق مغلقة

شكرا يا ملك
مودتي

Quote: وارى فيك نموذج لرجل حقاني..

بيان ازيك وحمد الله الف علي السلامة

الدكتورة بيان

الف حمد لله على السلامة والبركة الشفناك طيبة

بالنسبة لدار الوثائق اليومين ديل هم رحلوا في مبنى جديد ولسه بيرتبوا في حالهم لكن ان شاء الله الاحد الجاي ح يكون الافتتاح للدار الجديد وبحكم عملي السابق في الدار فلي علاقات ممتازة معهم فان شاء الله ح اشوف طريقة جمعها كيف وبعدين طريقة ارسالها ح اوافيك بالتفاصيل عبر الايميل ان شاء الله تعالى

لك كل الود

الظلامي العظيم
ياسر
كيفك وكيف اسرتك
وحشتنا جدا منذ غزوة دانا وشرعنة الاغتصاب (وش ضاحك)
واخيرا بوست الامتداد صرت مختفيا متخفيا..
شايفة البورد فيه كمية من الغزوات التي تحتاج لخوضها

شكرا ليك جدا وانا في الانتظار

تحياتي لاسرتك

بس دايرة اقول ليك ان شاء الله كل يوم يروح ليك كتاب ولا وثيقة عشان تجى تفتشى عليهو هنا يااروع زول فى الكون !!

يارب تتعلى ماتتدلى يانجاة يابت عم محمود قولى اميييين ....(وش فرحان بشوفتك هنا مجددا ) !!

ست اللهيج السكري
يا اجمل قلب ربنا يحفظك وويخليك
ويديك الفي ماردك ويسعدك قدر ما بتدخلي السعادة في قلوب الناس..
في مارس ينطلق الساجور
انتظريني يا حبيبة

الدكتورة العزيزة نجاة
أولاً الحمد لله على ظهورك مرةً أخرى في هذا الفضاء الذي يسأل عنك دوماً كما نحن أيها الأخت الكريمة
بالله ما تغيبي عننا تاني .
ولو سمحتي لي أني أرحب أيضاً بالأستاذة نادية ( والله ما بتتخيلو قدر كيف بنسعد بظهوركم علينا ) ماتطولو الغيبة أصلو العشم فيكم لإثراء الساحة .
شكراً لكم على هذه الطلة رغم إنو غياب نادية كان معروف ومبرر نسأل الله لها القوة والسعادة.
ربنا يديكم الصحة والعافية.

اوووووه مجاهد الشاب الخلوق الجميل
شكرا ليك امثالك من يجعلون هذا المكان جميلا واليفا
يا جنى فيك ريحة تراب بلدي

العزيزة د. بيان

والله بس شفتي شغلتنا اموالنا واهلونا لكن اهو قاعدين في السودان الوطن الواحد ما قد كان وما سيكون. وكل الاسرة بخير وصحة جيدة الحمدلله

بعدين سيبك من الحركات دي، وين انت ومشتاقين وشنو ماعارف ، هسع ورينا حقنا كم عشان الواحد يقوم يجتهد حسب المبلغ لأنه السودان بقى مافي شي لله، ال لله راحت بقت البواجهولا، شفت هسع البزح ليك من السكة يقول ليك عايز حقي فانت هسع كدي ورينا المقال بي كم والوثيقة بي كم والكتاب بي كم وبعدين ما تقول لي انت التحدد لأنه هسع السوق بقى مقلوب يعني تمشي للتاجر تقول ليه دي بي كم؟ يقول ليك قول انت، وهو سيد البضاعة، شفتي كيف، ده الوضع هسع، تقول لي غزوات نحن هسع بقينا مجاهدي خلق عديل كده

لكن عشان دي اول مرة نحاول نخدمك فيها، وانت من الاخوات الظلاميات الذين قل ان يجود بهم هذا الزمان، فما عندك مشكلة ف ح نخليها مجانا لكن بالله المرة الجايا ترسلي الكاش في الأول لأنه هسع شعار المرحلة بقى "الكاش بيقلل النقاش"

لكن كدي بيني وبينك الكعة المرة دي وين خلينا النمشي نشمشر ساكت لأنه انحن بقينا ناس معايش ساااااكت يختي ، بقيت افتح البورد وبعاين لأسم الكاتب أوا شئ قبل الموضوع وبعدين بقرا عشان كده الغزوات دي طولنا منها

وبوست الامتداد ده ما عارف طارق عمل فيه شنو ابى يفتح معاي خالص، وهنا اليوم بقى ممحوق مافي وقت عشان الواحد يقعد ينتظر عشان كده طولت منهم وما قادر اكتب

محلوظة: الافتتاح بتاع دار الوثائق الجديد الاحد القادم 2 نوفمبر ان شاء الله ما الاحد البكرة ده

لك خالص تحياتي

شنو يا ياسر شايف الهزايم وعامل نايم
ياخي دا موسم الغزوات دائما بتبدأ يوم 18 يناير وتخلص يوم16 مارس
لكن بالجد بقيت شغلتنا اموالنا واهلونا وبقيت من القاعدين..
افو افو
بقيت تؤمن بالمادية الجدلية ولا شنو
ذي اخونا الجازلوت الخنفشاري الذي قال انه يؤمن بالمادية
وتدفع قدام تنبسط. حين اراد بيع تلك القصيدة لملاسي,
المقال بجوز حمام اها دي كيف؟

Yassir7anna
صراحة كده وبدون مجاملة
انت زول لذيذ لذيذ لذيذ
حاسي بطعم كلماتك وشهدها في لساني
طبعا بيان ديك عسل مقطر ومعروف
معزتي

ولدنا مهند
انت بقيت من بورداب الدوحة ولا مستنير تلمع في الظلايين اصحابك؟
لانه عادة التلميع دا بيعملوا المستنيرين ولا ناس الدوحة*



















ناس الدوحة اجمل ناس بهظر معاكم(وش خائف)

حمد لله على السلامة يا دكتورة

وأهو الأستاذ الطاهر ساتي حا يقوم بالواجب

سلامي للأسرة

ساااااااالومي
اليوم الابيض جابك
مشتاقين والله
شدي سلك ياخي

تحياتي لمن معك

سلامات بيان انشالله بلغتي الصحه


الحمد لله على الطله ده بياكد انك احسن حالا قلت اسلم واطمئن عليكى


تحياتى

العزيزة ماجدة
الله يسلمك ويحفظك يا ست الستات
بس عوجة كدا وبجي راجعة
مودتي لك وللوالدة الحبيبة
والاخوات

الأخت دكتورة نجاة
سلام

حتى الآن لم أجد بوست ذكريات المعهد المهم مواصل في البحث عنه


الأخ ياسر الخليفة

سلام
يازول ياظريف ومتين رجعت السودان


مودتي

يا دكتورة بيان ..

سلام وشووووق والبركة الشفناكي .. ولو في دار الوثائق البريطانية كان قلنا ليك عوووك لكن البركة في حنا وساتي ..

مشتاقوووون ولي نادية العسل معاك ..

فقدناك في الغزوات ..

خاصة غزوة يناير ..الدورية

تحياتي ..

سلام يا قلبنا النابض ومتوحشنك ومشتاقين ليك

المرة دي الصلاة على النبي عيني باردة
مسيطرين على الموقف تماما
انا خلوني لغزوة 8 مارس
وانا اسع جيت لانه في زول كدا راسم سيناريو لي
وبما اني بتاعة مسرح بموت في السيناريوهات
بص اصبري
توووووووووووش تلقيني داخلة ذي الما حاصل شئ
كيتا في المابيني.

مودتي ليك وبالله شدي سلك

الصديق الاخ العزيز رضا
ناس سودان نت الحلوين
كيفك؟
عارفاك ما بتقصر يا ود العم

مودتي و مودة دومة

Quote: حتى الآن لم أجد بوست ذكريات المعهد المهم مواصل في البحث عنه

Ridhaa
تدفعوا كم نساعدكم في العثور على المفقود
بالمناسبة كده في بوستات بتختفي في ظروف غامضة زي ما بقولو
معزتي

Quote: تدفعوا كم نساعدكم في العثور على المفقود

ناس انتهازيين بشكل ......

Quote: ناس انتهازيين بشكل

الزول دا من سمع بجوز الحمام اجتهد ناس الا تتكري(وش زعلان)
طيب يا دناقلة
صفيحة ملوحة.اها كيف معاكم؟
بعد الاغراء دا عارفاكم الليلة دي بتلقوا المقالات دي
لو كتبتوها انتو لازم تلقوها
زمن عجيب(وش زعلان شديد)

الاخت نجاة بت محمود-مساك الله بالخير

وها انت قد عدت كالنسمة -وفى الليلة الظلماء يفتقد البدر -طال غيابك من المنبر ان شاء المانع خير -- عندى بعض المقالات والمعلومات عن الصديق الراحل صلاح احمد ابراهيم فان كانت تفيد فسوف انشرها تباعا لانو يبدو انت بتحضرى فى حاجة قد يكون صلاح جزء منها طبعا دا مجرد احساس قد يصيب وقد يخيب- حمد الله على الظهور ولك جليل مودتى يا دكتورة

سلام يا احمد
شكرا للكلام الطيب الذي يدل على الاصالة
الحقيقة انا اتغيبت لاني زهجت من المكان دا
وكمان الايام دي شغالة في مشروع بدا من سنة 2005
وهي نشر المقالات السياسية التي نشرها صلاح في سنوات الستين
لاني مهتمة بسنوات الستين و كتابها
الحمدلله الان اكتملت المقالات
ولكن كنت صورت مقالات المذكورة اعلاها ولم نستطع معالجتها.
واي حاجة عن صلاح تفيدني جدا
ولك الشكر مقدما

ومودتي

الدكتور بيان

نحن هسع قربنا نبقى من المؤلفة قلوبهم عشان قلنا يمكن الجماعة ديل يحنوا علينا شوية

قبل فترة راكب مع بتاع امجاد اها في الونسة كده قام سالني قال لي طولت بره؟ قلت والله 16 سنة بس ، قام عاين لي كده قال لي لو عايز نصحيتي كبر الدقن دي شوية

والله هنا مع الزحمة نسينا اي تاريخ، لكن بيني وبينك قمت طوف كده على البوستات لقيت ليك الجماعة معصروين وبقوا في امرا ضيق خلاص والله لما حنيت عليهم

عزيزي مهند

تشكر عزيزي ده من زوقك بس والله

العزيز رضا

من زماااااااااان من شهر 11 السنة الفاتت وهسع بدينا نفكر في الهجرة التانية الله يديك العافية وتشكر عزيزي الغالي

Quote: نحن هسع قربنا نبقى من المؤلفة قلوبهم عشان قلنا يمكن الجماعة ديل يحنوا علينا شوية

والله يا ياسر اخوي الناس ديل يجو يمسكو
الا تبقى من الفي الرقاب سيبك في المؤلفة قلوبهم.
بعدين نهاجر للغرب ونبقى مناضلي كيبورد.

Quote: وبقوا في امرا ضيق خلاص والله لما حنيت عليهم

بوست مهيرة كان بمثابة الشراب الرمى السلك
الله يخضر ضراعها.وضراع الظلامين كلهم يارب

بيان حمد لله على السلامة!

ربنا يقبل حمدك يا خالد

مالك سمعتو ولا جابو ليك؟

الصديقة بيان

مايكون سبب العودة هو بيان المساعدة العاجلة

تعرفى يادكتور امى بتسمى الشكل عوة

قلت لزميلك فى الظلامية معتز القريش ياخى حاجة غريبة

لكل العوات المدورة فى المنبر دى ماتجيب بيان انت بيان دى

دايرة تخذلنا وتبقى مستنيرة

عودا حميدا ياسيدتى

وتحياتى لعصافيرك

وسلام خاص وللعصفورة صديقتى

تعرف يا عزيزي الامير

انا حزينة شديد
عشان ما جيت فتحت بوست شكرتكم فيه

تعرف ليه
لانه من جيت العوات تكاثرت على
وكل يوم القى لي بوست مفتح باسمي
ناس تكضب والعيال تعمل حاجات عجيبة من ورايا
وباظ المود
ولكن ليكم وعد يا ناس الدوحة
اجيكم واديكم حقكم المضاع
وانتو يشهد الله اجمل ناس..

انا عواتي المفضلة عوات 8 مارس
لانه المستنيرين بجو يضحكوني ويكونوا عاملين فيها مستنيرين باجد
وحقوق مرة شنو والمرة هي شنو
والواحد تلقاه السنة كلها شغال القرف في الظلاميات.
والحد يمضى اسمو ناشط في حقوق الانسان
اها كدا دابو بتعجبني العوة
لانه بشتغل من دقنو فتلو
ونرفع شعار ضلامي عديل ولا مستنير مجهجه
وعوات 18 يناير فقدت طعمها من هوبفول غير دينو واساسي عقل
وبقى ابو عيال.
زمان البوست يبقى ريحتو طير طير.
بعد مداخلتين من هبوفول واساسي.
الله يطراهم بالخير
اما صديقتك عندنا فقد بدأت الجامعة الاسبوع الفات
ولاول مرة تستخدم ذلك العطر المدسوس خصيصا للمناسبة دي
وهي بتسلم عليك شديد ..
وفي انتظاركم
مودتي لك دائما وابدا

الأخ ياسر
تحية طيبة

يازول ماتفكر تغترب مرة تانية كلنا راجعين السنة دي باذنه تعالى


ياياسر في تعبير انت قلته قبل كدا في بوست قديم عن الدجال القابلك
وقعدته ترجف ذي القصبة
كلو ماأتذكره أقعد اضحك ضحك شديد
نرجو ذكر قصة ذلك المشعوذ الدجال

خالص مودتي

الأخت دكتورة نجاة
سلام

هذا هو الأرشيف القديم الخاص بسودان نت نرجو البحث فيه عن بوست المعهد

تحياتي


http://web.archive.org/web/*sa_/http://www.sudan.net

الأخ مهند
سلام

هذا هو الارشيف نرجو مساعدة الدكتورة للعثور على البوست المعني

http://web.archive.org/web/*sa_/http://www.sudan.net


الأخ الطاهر ساتي
سلام

شفت مهند دا لعيب حريف كيف طوالى عاوز حقو

خالص تحياتي لكم ياأعز ناس

ويا جازلوت ومن لف ملفه لو مريت من هنا
ضروري تكتب لي
اسم استان سلافسكي بالانجليزي
واسم كتاب اعداد الممثل مع الدار الناشرة
وشكرا ليك مقدما وابدا
وشكرا على المكالمة المشجعة...
وما عدمناك يا فتى

مرور
الأخت الفاضلة/ دكتورة بيان كما يحلو لك ودكتورة نجاة محمود كما يحلو لناس شندي
كفارة وسلامة ونحمد الله العلي الكريم الذي عافاك ورد لك الصحة لتنعمي بها بين اهلك واسرتك واصدقائك

بالمناسبة أمال التوم بتسأل منك وتبلغك كثير سلامها وهي تعيش في لندن متزوجة وعندها طفلين

لك تحياتي واشواقي

خالد علي محجوب

سلام يا ابنكنبة خالد

والله اسع قلبي عايز ينفجر من الفرح
امال التوم شخصيا
ما بصدق.
يا حليل معهد التربية شندي عشت فيه اجمل طفولة ممكنة
اكتب لي تلفونها في الماسنجر
والله يا حليلك يا خالد
وربنا يحفظك سباق دائما للخير.
عادل اخوي بيكتب باسم عادل أمين
لو عرفك وامال التوم
حيسعد جدا
يلا يدك معانا وين مها عطالله؟

Yassir7anna
عزيزي لا شكر على قول الحقيقة والتعبير عن الشعور الطبيعي
أدام الله الصداقة والخوة والمودة بيننا
معزتي

العزيز رضا

ياخ ذكرتني حاجات لذيذة، تعرف انا هسع بقيت اجتر في الذاكرة واحاول اذكر الموضوع واضحك فعلا كانت قصة غريبة خلاص وانا لي هسع ما قادر استوعبها وشايفها زي الحلم حلم، الله يديك العافية عزيزي

ياهندي القصة:

Quote: تعرف كان في كلام داير عندنا هنا انه في شخص شكله متدين وشايل سبحه ولابس هدوم نضيفة وكده، بيقوم يجي يسلم عليك ويقول اعطيني من مال الله تقوم انت بكل حسن نية تتطلع الفيه النصيب وتديه ليه، يقوم يقعد يتدعى ليك ويقول ليك انت راجل مبروك، والوقت ده كلو بيكون ماسك يدك، وانت ما عارف ايه، ويقوم يرجع ليك القروش ويوقول ليك ياخ دي كتيره شكرا ليك، ويقول جيب ايدك ويختها ليك القروش في ايدك ويقعد يدعوا ليك تاني ويقول يالله اقرا الفاتحة، المهم بعد داك يقول ليك اديني السبحة المعلقة في العربية،(يمكن عشان كده متلح السودانين لأن اغلبهم او كلهم معلقين سبح في عرباتهم هنا) او اي حاجة عنك قلم ساعة اي مصيبة زمان،المهم تديها ليه يقعد يمفركها ليك بايده ويوقم ويرجعها ليك، اها هنا الفلم، بعد ما تستلم السبحة دي انت بتصبح مسلوب الارادة تماما، يقوم يقول في جيبك في كم، تقول كده، يقول جيبو، في البنك في كم، تقول ليه كده يقول ليك يلا دور ارح نمشي البنك، تمشي معاه البنك بكل طيب خاطر وتسحب قروشك كلها وتديها ليه، وبعد ده يقول بالله وصلني معاك الحتة الفلانية، تقوم توصلوا هناك وتشكروا وتتدعى ليه انت كمان وتدور تمش، بعد فترة تصحى من الغيبوبة وتذكر العملتو تقعد تجري للحتة النزلته فيها تلقاهو فص ملح وداب، والقصة دي حصلت لأتنين من السوداني هنا وبعرفهم وسحب قرشوهم كلها عدمهم نفاخ النار، وفتحوا بلاغات في الشرطة دي القصة اما قصتي انا، الليلة اتاخرت من دوام المساء والمغرب اذن علي في السكة لي شلاقتي قلت انزل اصلي في مسجد قريب كده واواصل، اها بعد الصلاة جيت اركب العربية القى زول في الباب بيدعوا ويطلب مساعدة، قمت طلعت الفيها النصيب واديتها ليه اها قعد ايدعى لي قلت ما بطال وانا أأمن وقرينا الفاتحة، اها قام قال لي ياخ القروش دي كتيرة ورجع ليه، وهي نص دولار ما تامة، اها هنا اخوكم جقلب، ياربي ده هو ولا ما هو، بعد شوية قال اديني السبحة دي، طبعا عملت لي فيها مجنون رسمي وسحبت باب العربية وقلت ليه عن اذنك انا اتاخرت لو سمحت وقفلت الباب، وطبعا الوقت داك عرقت عديل كده والحمدو والاخلاص ديل قدر ما كستهم ما لقيتهم نهائي، غايتو بعد تعب اذكرت الاخلاص وبقيت اقرا فيها اقول بسم الله يا الله، اها لما اظنو لقى القصة بايظة قال لي خلاص اديني حاجة كده تعشيني انا والعيال، قلت والله ما عندي اي شئ، قال خلاص اديني قروش اقدر اشتري بيها لبس لي، قلت شوفت اغير الاديتك ليه ما عندي اي حاجة تانية ولو سمحت انا مستعجل، لم قنع خلاص وانا بديت اتحرك، قال لي خلاص جيبهم، اديتهم ليه وجري جيت المكتب هنا برجف زي القصبة، ولي هسع ما مصدق اني اتخارجت منه ويا ناس مسقط هي والله اعمله حسابكم

وده الرابط

اللللللللللللليلة لاقيتو!!!! يا اخوانا حمدلوا لي السلامة

وشكرا ليك ولي مهند مرة تانية على الكلام الطيب واسال الله العلي العظيم ان اكون عند حسن ظنكم دايما

ست البوست د. بيان

والله على كيفك غايتو، نحن استلمنا البوست بتاعك وعملنا ليك قعدة ونسة واجترار ذكريات ما ناقصها الا الشاي والقهوة لكن كويس انا قصدي نقعد نتونس كده لغاية ما ناس دار الوثائق يفتحوا ونقدر نجيب ليك طلباتك، شفتي كيف

د. بيان كيفنك
لي زمن منك ان شاء الله كل الامور عال العال
الوثائق دي لو كانت في المغرب كنا شلخناها ورسلناها ليك


تليشة:
تعرفي ياسر حنا دة ليه زايغ من بوست الامتداد
لانه مزرزر زرزير عدوك

طارق ضي القبيلة
يقصر الملح عاد
شكرا ليك ياسر حنا بقى زول معايش ومكابسة
تعرف السودان دا اليوم كان يكون فيهو 50 ساعة
عشان تقضي المجاملات وتكابس الرزق
وهو بيجي دائما كالخيول الاصيلة في اللفة.

في زول جاي آخر الشهر ماليزيا

تلفوناتكم يا شباب

د بيان

عليك الله راجعي الايميل ضروري جدا