نهاية حزينة لسمكة نور الحمراء

للمعلومية نور هي ابنة اختي التي تدرس المعمار
قبل عدة اشهر كان عيد ميلادها
اعطينها بناتي هدية سمكة صغيرة حمراء. صارت جزء
من حمولاتها من الداخلية للكلية
تحمل شنطة يد صغيرة وشنطة بها "عدة" الشغل
وعلبة صغيرة لحفظ السمك.
تضع سمكتها فيها..
تحولت السمكة الى موضوع يتحين اولاد كليتها التحدث لنور عن طريقها..
ياتي الطالب ينظر الى السمكة يضرب العلبة باصبعه ثم يسألها
Is it a boy or a girl?
"قطعا لمثل هذه "المكنات"
احضرتها الى البيت
حيث صارت الشغل الشاغل لزاريا واشرف
وموضوع جدال لا ينتهى
انتهى بوضعها في غرفة الاستقبال
لتصبح محط اهتمام الشغالة
التي تبدا يومها بتغير الماء ووضع الطعام لها.
واحيانا يجلس زوجي ساعات محدقا فيها قبل بداية الكتابة
في مقالات يكتبها .
قبل اسبوع ذهبت زاريا الى السوق
وقررت ان تشتري للسمكة رفيقة او رفيق
(الى الان لا نعرف )
Is it a boy or a girl ?)
لم تجد سمكة من نفس فصيلتها
وجدت واحدة في حجمها ولكن سوداء
فتحت زاريا تحقيق مع البائع الصيني الذي لا يتحدث الانجليزية جيدا
وسألته
؟/hii is black fish can be friend with red fish
مع مصاحبة حركات جسدية واشارت باليد
صاح الصيني
can can can
اشترت زاريا السمكة السوداء
وتم الاتصال بنور في الداخلية واخبارها بانهم
اشترو سمكة جديدة لها
في الصباح اكتشفوا ان السمكة السوداء قد
ظعمطت "السمكة الحمراء"
واكلت جزء من الذيل وقدت عينها
وفي تمام الساعة الرابعة صباحا
اسلمت السمكة الحمراء صديقة الكل الروح.
وماتت شهيدة وضحية لسمكة دخيلة
موش بالله الدنيا دي عندها دوراتها
وهذا ما يحدث ايضا في عالم البشر؟
وقصة جدادة الخلا الطردت جدادة البيت ما جات من فراغ؟
والطريق الى الجحيم مفروش بالنوايا الحسنة


نهاية حزينة لسمكة نور

بيان

منوره البورد والف الف حمد الله على السلامه
وبجيك صادى عشان اشوف قصة السمكه السوداء الزعمطت السمكه الحمراء
الى ان وصلتها التوج

الاخت الكريمة دكتورة بيان ، حمدالله على السلامة ، تركتى فراغا كبيرا بغيابيك ، عودا حميدا ، الجات فى السمكة سامحت ، تعيش وتربى غيرها . اخشى ان يطلع واحد من الجماعة ويقول دى عنصرية سمكة سوداء اكلت حمراء ، وبعدين يقوم الموضوع يكبر .

Quote: ويقول دى عنصرية سمكة سوداء اكلت حمراء ، وبعدين يقوم الموضوع يكبر

قرقرقرقر يا هجو
في ناس هنا بغنو للعنصرية الكره الدرب المابودي ليك
الناس مرات لازمن تتفشى ولا كيف؟

علي ود عمي كيفنك؟
سعيدة بحضورك الباهي ومنتظرة عودتك
عشان نشوف اخرة سمكة الخلا دي..
كل سنة وانت طيب

لي قدام وحمدالله الف على السلامة مثنى وثلاث ورباع.

Quote: لي قدام وحمدالله الف على السلامة مثنى وثلاث ورباع.

وانت لك اضعافه ايها الضليلم

معزتي

كنتو تخلوهم يوقعوا على إتفاقية سلام وتعهد

نسأل الرحمة للفقيدة صديقة الكل

إقترح عليكم التخلص من السمكة السوداء كمان لأنها دي عدوانية وغير مأمونة الجانب

Quote: وماتت شهيدة وضحية لسمكة دخيلة موش بالله الدنيا دي عندها دوراتها وهذا ما يحدث ايضا في عالم البشر؟ وقصة جدادة الخلا الطردت جدادة البيت ما جات من فراغ؟

البقاء للأصلح
السمكة الحمراء لم تستطع الصمود أمام المنافسة الحرة ... لأنها دايما معتمدة علي المعاملة (الخاصة) .
و حقيقة .. البيت بيت منو و الخلا خلا منو ؟؟؟؟
لا تعاطف مطلقا مع السمكة الحمراء ..

لوووووووووول
زكرتيني حكاية خالي فلان السكران
عندنا أهلنا كدة علي (باور) عالي جداً
يعني من النوعية البشتروا الكدايس السيامي
والحمام الزاجل والعصافير الكناري
ونافورة في نص الصالة
وحاجات كدة بطالة
زي حوض السمك الملون
اها صادف مرة كدة انا كنت شكل بايت معاهم
و أتفق أنهم كانو معزومين علي حفلة أوفر نايت
انا وخالي الله يديه العافية
قال لي ياخي ما تعمل لي كباية جبنة خلي السكرة دي تفك شوية
مشيت اعمل ليه الكباية لقيت ليك المطبخ مقفول
طبعاً حسب الشي الفي راسو قام أتضايق شوية
وطلع بيت السكر أداها ليك كبايتين علي السريع
وجاني قال لي شنو يا ود أختي
مافي عششششاء؟؟
قلت ليه عشاء يجيبوا ليك من وين والمطبخ مقفول
قام عاين كدة وعاين كدة
قال لي خلاس لقينا ليها حلل
قلت ليه كيف يا خال
قال لي نشوي السمك دة!!!
سمك شنو يا ود أمي؟
قال لي السمك العايم دة
!!!!!!!!!!!
علي اليمين بعد مفاوضات و كواريك حتين قدرت أقنعوا
انو السمك دة للزينة فقط
والجماعة لو جوا لقوهو مشوي
ح يعملوا لينا مجلس تحقيق
وما بعيد يشتكونا عند جماعة الرفق بالحيوان


هوي ها
أزيك يا نسيبتي
دة لو ما غيرتي رأيك فيني
وقلتي غير الفيني
علي قول ندي القلعة

Quote: أزيك يا نسيبتي دة لو ما غيرتي رأيك فيني

حبيب نورة كيف نغير راينا؟
افو افو...

قصة انقاذك لسمك الزينة قصة حلوة
شكرا لك لاني قد تخبلت الازمة العائلية التي كانت ستحدث لو اختفى ذلك السمك.

وخليك قريب كتاباتك تنقلني الى عوالم مجنحة..

Quote: البقاء للأصلح

تعرف اذا بدلنا كلمة الاصلح بالاقوى لكانت اكثر صدقا
لان الاصلح مرات ما بيبقى ويبقى الاقوى الما صالح
وعينك شايفة ولا كيف؟

Quote: و حقيقة .. البيت بيت منو و الخلا خلا منو ؟؟؟؟

السؤال دا بيدخل في دايلمة
هل يمكن يكون البيت بيت الاقوى؟
بدل الخلا نخت الاقوى وبدل والبيت نخت الاصلح
وتجي دورة الحياة..

Quote: السمكة الحمراء لم تستطع الصمود أمام المنافسة الحرة ... لأنها دايما معتمدة علي المعاملة (الخاصة) .

لو رجعنا لتاريخ المكان لوجدنا ان تلك العلبة تم شرائها مع السمكة الحمراء
اي ان السمكة الحمراء هي المسبب لوجود الحيز,,
ولكن لان تلك السمكة الجديدة التى استقدمت من اجل
تآنس السمكة الحمراء وتكيب هار كامبني( مبررات زاريا لشراء تلك السمكة الدخيلة)
حيث توفرت حسن النوايا والعشم من قبل من تجشم مشاق احضار السمكة السوداء
ولاحظ لولا تلهف البائع لبيع السمكة للمشترية لما ماتت السمكة الحمراء
رغم الضمانات التي وضعها البائع..
وهنا المستفيد الوحيد هو البائع
مرات كدا بنجيب ناس برة فزع وببقو وجع ولا كيف؟

Quote: إقترح عليكم التخلص من السمكة السوداء كمان لأنها دي عدوانية وغير مأمونة الجانب

شوفت غشامة نور مفتكرة انه السمكة القاتلة عوضا لتلك اللطيفة المسكينة
و لسع محتفظين بيها..ترتع وتمرح وتتقلب في العلبة ذي الما عملت حاجة
الدنيا دي كدا خاصة ناس عقلية المال تلتو لا كتلتو السائدة في السودان

على سبيل التحية

تحياتى يا دكتورة

((وهذا ما يحدث ايضا في عالم البشر؟
وقصة جدادة الخلا الطردت جدادة البيت ما جات من فراغ؟
والطريق الى الجحيم مفروش بالنوايا الحسنة))))))
ده كلام خطير يا دكتورة بل هو فعلا ما يحصل
اليوم عندنا هنا...

لى عوده للتحدث عن تلك السمكة الشريرة

سلام بيان..

تعازي الحارة لنور وبقية الاسرة..

قبل كم سنة كان عندي سمكة زي المرحومة.. مبسوطة وفي امان الله..
وجبت سمكة الخلا...كان لونها جميل.. أزرق غامق كدة
تصّوري الجديدة اكلت جزء كبير من سمكة البيت .. يعني كتلتها بأبشع طريقة..

والله كانت trauma مانسيتها زمـــــن بعد الحادثة..
تأثرت من جوّة قلبي...
وحزنت.. للوحشية!

العزيزة بيان

سلامات

السمكة السوداء دي تكون من فصيلة البيرانا الخطيرة آكلة اللحوم:

http://www.timstropicals.com/Photo.asp?fish=BlackPiranh...y=Piranha&Page=index

والسمكة دي محظور بيعها في اكثر من 20 ولاية امريكية لخطورتها

طالعي الـ paragraph الثاني ... السطر قبل الاخير

http://www.timstropicals.com/Inventory/Piranha/BlackPiranhaInfo.asp

سـلام يا قريبتى باللفـة،
دا الكلام.. بيان تعـود لبديـع البيان.. حمدالله عســلامـة و الظاهـر الوكعـة كانت لخيـر..
هـو القال ليه أشـرح للصينى بالإشـارة منو.. كلو شئ ولا الشـرح بإشـارة لصينى.. هـذه حقيقـة معروفـة، ليس لأنهـم لا يفهمـون، بالعكس هـم من أذكى الشعـوب، ولكن طريقـة فهمهـم بالإشـارة والتجـريـد مختلفـة من طريقـة فهـم بقيـة الشعـوب.. يعنى لو دخلتى كليـة ودرست اللغـة الصينيـة، بعدين مشيتى لنفس المحل، حتلاقى زولك لسـه يحاول تفهيمـه بالإشـارة.
فى الحالـة دى الطريقـة الوحيـدة هى أنو كان يجيب السمكة الحمـراء، ويقربهـا للسمكـة الســوداء، وأول بوادر عدوانيـة من السمكـة السـوداء، يقول (شى شى) للصينى ويمشى.. لا شـرح لا إشـارات.

د. بيان ازيك
حمدلله ع السلامة ) ما عارف الحاصل عليك شنو لكن شايف الحماعة يحمدلوا قلنا نحمدل على السلامة.
البركة فيكم، جبر الله كسركم في هذه السمكة الحمراؤ حبيبة الكل ف الداخل والخارج.
حكاية حبيب نورة دي ذكرتني نكتة محمد موسى بتاعت عربي الجزيرة البيقرا مع حنكوشات الطب ديل، يقوم على التعتر العليه يحتفل بعيد ميلاده، وتقوم حنكوشة رقيقة تجيب ببغاء هدية عيد الميلاد. صاحبنا بعد فترة سألته الأخت من الببغاء قال ليها طعمه عادي يعني زي الجداد.


Mahamat Nour

بيان
أيا امرأة من وطني تشغلها الحياة و العلم و الهموم.
جميل أن نراك تعودين إلى المكان و لو بقصة عادية كهذه.
أقول "عادية" و أنا أستحضر كتاباتك الأكثر قيمة. ما هو
غيرالعادي هو عودتك إلى المنبر من بعد غياب نأمل أن
يكون قد حفل بالعديد من الانجازات المهمة.
اغفري لي قسوتي إذ هي تنبئ فقط عن صدق و سلامة طوية
و عشم في رؤية انتاج أجود بكثير للدكتورة نجاة نرجوه
و نثق في وجوده.
مودتي الأكيدة

العزيز ابو عسل
سلامات ولك التحية..
القصة دي اصلها ما عادية رغم عاديتها
عاين للغور ..وهي ممكن تتحول لاي جهة
انسانية سياسية تسلية الخ الخ
واتمنى اكون عند حسن الظن..

محمد نور
شكرا ليك الحقيقة لي 5 سنة بمشي في ديسمبر المسشتفى
والغريبة دائما برضو بكون حردانة البورد
فتتكالب المناسبتين..
توش بجي راجعة
قصة البغباء دي بمليون دولار
ضحكت لما نفسي اتقطع..
شكرا ليك وسنوقم بتوزيعها بكل وسائل الشمار..
وشكرا ليك وربنا يقبل حمدك

سلام يا قريبي بالتواتر

تعرف الصيني بنزس مان شاطر وما عنده اخلاق اهم
حاجة يشريك الحاجة الهو يستحيل يشتريها..
بعدين الفهم عنده "سلكتف" العايز يفهمو يفهمو قبل يطير والما عايزو يعمل
ما فاهم خالص..

مودتي وشكرا للكلام الطيب في حقي والسؤال عني

Quote: السمكة السوداء دي تكون من فصيلة البيرانا الخطيرة آكلة اللحوم:

لا حولة تعرف اصلو ما كان متخيلة في سمكة خطيرة غير القرش..
بالله سمكة صغيرة كدا ممكن تكون برضو آكلة لحوم؟

شكرا لك على المشاركة المعلمة
ودمت
وسمعنا انك حللت في الجوار
ا اقامة سعيدة
تحياتي للاسرة

Quote: والله كانت trauma مانسيتها زمـــــن بعد الحادثة.. تأثرت من جوّة قلبي...

تعرفي يا نجوان تحيرني العلاقات الغربية التي تربط الانسان بالاحياء الاخرى
سمكة لا تتحدث ولا تتلاعب ولا بتعمل حركات ولكن تجدي بينك
وبينها علاقة انسانية ومحبة بموتها
تحدث تروما حقيقية..
لم اكن اعرف ان الاسرة ستفتقد السمكة الحمراء لهذه الدرجة
لو شوفتي دموع زاريا الكانت بتردد
"ا جست ونتد هار تو بي هابي"
ونور الحزينة تردد ماتت الساعة اربعة صباحا.
ماتم حقيقي.
بالله كيف ممكن انسان يقتل انسان وما يحس بالتروما دي في اقصى مضاعفاتها..
طبعا التجربة دي بتعلم انه اصلا ما تلم الوان مختلفة حتى لو كانت سمك
بدون ما تعمل قوانين تحفظ الحقوق..

مودتي لك وشكرا للمشاركة الجميلة الانسانية

Quote: لى عوده للتحدث عن تلك السمكة الشريرة

ولدنا الظلامي الكبير
نتوقونتوقع عودتك
وشكرا لكل حديثك الطيب وحثك لي للعودة

مودتي

طارق يا ضي القبيلة
شكرا على المرور المقدر
تحياتي للاسرة

د.بيان سلامات
رغم تراجيديا سمكة البيت المسكينة لكن العبرة مهمة لنا
لو كانت تعيش في النهر أو البحر ربما لازت فرارا أو ربما
وجدت الحماية من بني جنسها...
هل يا ترى حكومة الصفوة الفي الخرطوم لو جابو ليها
المهمشين في الخرطوم البيحصل شنو؟

الفنان العظيم عبدالعزيز
تعرف انا بفتكر الحكومة الفي الخرطوم ما صفوة
بفتكر دي تجربة الرعاع والرجرجة لما يجو يلقو ريسة
وقديما قال العقل الشايقي الجمعي
الله لا تدي الكديسي ريسي
لانه لو كانو صفوة لما كان هناك تقتيل ولا فساد
ولكان هناك نماء ورخاء ورفاهية
الغريبة ان هذه الحكومة بها وجوه من كل القبائل السودانية والجهات..
بس مرات نحنا ما بنشوف الحاجات كويس..
لكن راجع الاسماء والجهات منذ 1989
حتعرف انها جريمة جماعية
دفع ثمنها ملح الارض
ولا يفوتني ان اذكر حركة التحرير التي لا تقل جرما من
حكومة الخرطوم
والله في..

سلام يا أستاذة د.بيان

حكومة الصفوة البعنيها ليك والمثملة في النظام الحالي هي ليست على ما أعتقد
صفوة عرق.. هي صفوة مصالح uppertied mentalityممكن على كراسيها
جالس الزغاوي, الشايقي, الدينكاوي, الهدندوي إلخ.. مجموعة عصابة
جمعت بينهم مصالح تقوم على قهر وسحق الآخرين..
لا نظلم الحركة الشعبية أو حركات التحرر التي ما زالت تقاتل لتستوفي
شروط جلوس حكومة العصابة هذه معاها للتفاوض..
المطالبة بمجتمع تسوده الرفاهية والعدل والحرية لكل مكوناته هو حق
وعين العقل ينبغي أن يتحقق بأي وسيلة.. نعم بأي وسيلة لأنه تحقيق شرع
الفضيلة شرع الآدمية التي كرمها الله..
مع تحياتي..

Quote: نظلم الحركة الشعبية أو حركات التحرر التي ما زالت تقاتل لتستوفي شروط جلوس حكومة العصابة هذه معاها للتفاوض..

الحركة الشعبية لتحرير السودان هي السبب الجابت الانقاذ
لما حاربت حكومة منتخبة في السودان.
واسع جات صالحتها بعد انهار من الدم..
اتقسموا القروش معاهم ..
اتخيل لو قرنق من نميري وقع جا صالح الحكومة الانتقالية
وشارك في الانتخابات الديمقراطية وحقن الدماء
هل كان ناس الجبهة ديل بيجو ويسمو نفسهم الانقاذ كمان؟

وطبعاهو عارف لو كان اترشح في الجنوب ما كان حيفوز لانه ناس الجنوب نفسهم
شايفنهم ذي ما نحنا شايفين الانقاذ..
ودي بترجعنا للسمكة الماتت سمبلة دي.
لو زاريا كانت ما حسنة النية وصدقت الصيني
لو الصيني كان امين وما شغال بس يبيع لو
السمكة دي اكلت زاريا ذاتها ما هاميه.
ولو السمكة الحمراء قاومت وظعمتت السوداء
ان لو تدخل عمل الشيطان
حسن النية مع الجهل بعلم "السمكولوجي"
هو الكتل السمكة الحمراء.
ولك التحية
وربنا يحفظ وطنا من الفتن ما ظهر منها وما بطن
ولك مودتي..

لانه لو كانو صفوة لما كان هناك تقتيل ولا فساد
ولكان هناك نماء ورخاء ورفاهية



دا كلام جميل يا دكتورة نجاة ...
تعرفي كنا فاقدين ناس تمتعك بالقدرة على التعبير وإيضاح الرؤية والتعبير عن الذات ...
بمنتهى السلاسة والإقتدار ...
لك التحية أختي الكريمة ...
وعوداً حميداً مستطاب ...
لكن بالله عشان ما يظهروا قطاع الطرق حاولي غيري لون السمكة حتى لو تركوازي أولون زينت لأنو التمييز في اللون خصوصاً تسمية الملتهب من الألوان بيصحي عقدة الدونية في فاقدي الثقة في أنفسهم ... فيفتحون النار بلا هوادة عليك ... ويزكون أوار جمرة الوطن المتقدة ...
مودتي

قريبتى بالتواتـر،

تصـدقى الكلام الفوق داك صحيـح، تمشى الدكان أشــرح المويـة بكل وسيلـة، فى النهايـة لما عرفوهـا جابو لى كبايـة
تشــرحى عشـان تشتـرى صحن يجيبوا ليكى معلقـة، تشــرحى معلقـة يجيبـو ليك رز. مـرة واحـد يشـرح لى اليوم كلو كيف استعمل كرت التلفون، لما ما فهمت فى النهايـة مشى جاب ورقـة وقلم، وكتبو لى بالصينى.. هسـى تقولى شنـو فى دا. فى النهاية تبت من حكايـة الشــرح باليدين.. أمشى الكومبيـوتر ومن النت أطبع الصـورة الدايـرا.. دى الطريقـة الوحيـدة النفعت.. هسى أفكـر أطـور الموضـوع دا لأنو جمعت (صـور كتيرة ممكن تكون مفيـدة لكتيرين زيى)

الدكتورة بيان
تحياتي وحمد لله على السلامة
ربما هناك أيضا جنون السمك كما البقر ؟؟

Quote: ربما هناك أيضا جنون السمك كما البقر

يا عادل يا اخوي الجنون دا يبدو في كل حاجة.
اهم حاجة تدهشك انه السمكة لما تموت بتتطفح
بالله موش قصة عجيبة؟

ابو الريش

انا مرة البتجاز بقت فيه مشكلة نارو ضعيفة
جبتا صيني قالي
المشكلة ما البوتجاز المشكلة في الخرطوش
بعداك قالي انا ببيع ليك خرطوش يقفل اتومتك

بي 80 عشان انت سيدة لطيفة طبعا اختك بتريد الشكير(وش ضاحك من الاضان للاضان)
اشتريت الخرطوش بعدا اسبوع اضطرينا نشتري بوتجاز جديد لانه المشكلة في البوتجاز,,
وعرفت ان الخرطوش دا بي 50

شوفتا عاقبة حب الشكير وصديق الصينين..

مودتي

الاخت العزيزة بيان

سلمى لى على نور كثير

سعدنا لعودتك...

أدام الله عليك الصحة والعافية

تحياتى

ولدنا مجاهد
شكرا على كلامك الطيب اللطيف

من قبيل بفكر في قصة تغير لون السمكة وقلب الحقائق
توخيا لسلامة

(وش خايف شديد)

دكتورة نجاة سلام

نورتي البلد والبلدين

تعازينا في سمكة نور لكن انا بإحساس المؤامرة

البقا يلازم الناس الزمن دة رجحت إنو الصيني

بتاع البزنس قرر يبيع أكبر عدد من أسماكه

يعني السمكة السوداء تاكل الحمرا ولمن ترجع ليهو

زاريا يقول ليها خلاص شيلي واحدة خضرا وبعد ما تاكل

السودا يديها لون زينب وبي كدة تكونو اشتريتو سمكو كلو

شفتي نظرية المؤامرة دي كيف( وجه عامل حريف )

Quote: وقصة جدادة الخلا الطردت جدادة البيت

جدادة الخلا لو عملت إبادة لكل جداد الحلة ما ممكن تبقى جدادة بيت

دي قسمتا .. وجداد البيت البنهزم لي جداد الخلا يستاهل الطرد

تحيتي

Quote: في الصباح اكتشفوا ان السمكة السوداء قد ظعمطت "السمكة الحمراء" واكلت جزء من الذيل وقدت عينها وفي تمام الساعة الرابعة صباحا اسلمت السمكة الحمراء صديقة الكل الروح.

أها يا دكتورة انا لوني اسود كما هو واضح في الصورة

والناس الشعارهم أحمر أخير يختوني

عشان ما يحصل ليهم الحصل لي الحمراء

Quote: والناس الشعارهم أحمر أخير يختوني عشان ما يحصل ليهم الحصل لي الحمراء

وين تاني عاد ما طاقيتهم عندك
بس تسردب اهم حاجة ما تختفي تكون قاااااااااااااعد
دي بتجننهم جن.
الله يستر اسع بيكونوا بيالفو ليك في قصة
لما كنت بتلعب بالتراب.

اها قلت لي شنو في طاقيتي؟

Quote: يعني السمكة السوداء تاكل الحمرا ولمن ترجع ليهو زاريا يقول ليها خلاص شيلي واحدة خضرا وبعد ما تاكل السودا يديها لون زينب وبي كدة تكونو اشتريتو سمكو كلو شفتي نظرية المؤامرة دي كيف( وجه عامل حريف )

سلمي يا خترية
دا احسن تحليل سمعتو للقصة دي
تعرفي الموضوع دا الا كان كدي
لانه السمكة السوداء اسع وحدانية
وتعاني من كراهية اي زول الا اشرف
الذي يصر على الاحتفاظ بها عشان يدلل على بلادة وغباء زاريا
ويدخلها في تأنيب ضمير مستاصل كلما تشوفها.
شكرا للكلام الطيب و التفسير العبقري لنفسية الصيني العجيب

إزيك بيونتي..

نرحب بالسمكة ودروسها وقدإستوعبناها تماما حبيبتي..

Quote: في الصباح اكتشفوا ان السمكة السوداء قد ظعمطت "السمكة الحمراء" ..

لا حولا

ليلتها كانت سودة..

وأتت السمكة السوداء على آخر الأفكار بظعمطتها جنيحات السمكة الحمراء الفقيدة..

وراحت فيها ما بين يقين زاريا بهترشات الفكي الصيني

وراحت فكرة التعاضد والتآزر في خبر كان الذي ينطوي على خصائص السمكة السوداء آكلة اللحوم


يا حليلك يا سمكنا..
يا ريتا كان جفت بركنا..

تحياتي للدكتورة نجاة
لقد سعدنا بحضورك وهذا الموضوع المؤثر

Quote: وراحت فكرة التعاضد والتآزر في خبر كان الذي ينطوي على خصائص السمكة السوداء آكلة اللحوم

سلام يا المسافر ولد بلدي

احيانا الطريق الى الجحيم مفروش بالنوايا الحسنة..
بس الزول ما يدقس..
مودتي

الغالية منى
شكرا محضرك دائما يبعث المحبة والسلام..

الاشياء الصغيرة نتعلم منها دروس كبيرة
مودتي

يا دكتورة اذيك

غيرة بس ما أكتر

Quote: يا دكتورة اذيك غيرة بس ما أكتر

يا مراحب ببت استاذنا العظيم
شكرا ليك على المرور يا جميلة

دكتورة / بيان

حتي سمكـ ماليزيا ( وفى قاع الأمواج )

يمارس العنصرية !!!!!

Quote: حتي سمكـ ماليزيا ( وفى قاع الأمواج

العنصرية دي مرض وقيل ان الحصارة الغربية الحيجيب خبرها
العنصرية..
لك التحية

حمد لله على السلامة الاخت بيان

المره دي قلتي احسن تبدي بالسمك ،،، على حسب القول سمك بياكل سمك!!!

تحياتي

امين

حمد الله على السلامة يابيان..



يعنى كان لازم تدوخينا ورآك الدوخة دى كلها؟

وتجيبى لينا الهوا الطآير؟

والكتآحة؟

وريآح الخمآسين؟

وال ?hericane Caterena

مع أرآذل البورد؟

حتى تجى؟

...

تلفونك مالوه؟

اللعزيزة بيان ...

تعازي الحارة لــــــــــنور في فاجعتها الأليمة

ويمكن أن أكون ـ أنا العبد الضعيف ـ أكثر من يشعر بعمق مأساتها ويتعاطف معها
في هذا المنبر علي الأقل ....وكده

ولذلك سبب بليغ أحكيه لك في هذه النمة القصيرة ..

ذات مرة زرتُ صاحب لي في بيته .. ولمّا كان يقع بعيدا من بيتي

وتأخرتُ معه في السمر فقد أصر ذاك الصاحب علي بياتي عنده .. وهذا ما كان..

غير أنني في الحقيقة لم أنم ..!!
فسبب ضيق الشقة لم يجدوا لي موضعا يصلح للنوم إلا صالة أو هول /
المهم حاجة زي الصالون كدا بس أصغر منو..

وانتبهت قبل أن أغرق في النوم علي بنته الصغيرة وهي تدخل ببطء محاولة عدم أيقاظ النائمين

وتمشي جهة الركن الزوي البعيد وتزيح ستارة ظننتها من جهلي وُضعت بغير قصد لتكشف حوض سمك
لا بالصغير هو ولا الكبير ..

وتفتح ضوء أحمر صغير بآناة من يعرف ماذا يفعل .. ثم تأخذ قليل من بودرة وتوزعها علي أسماك
الحوض ...

كان الحوض تعلوه زخرفة علي شكل قبة بها مأذنة ذهبية

وعلي جوانبه الزجاجية نقوشا تصور فارسا علي حصانه وهو يقاتل تنينا له عدة
رؤوس وسط غابة من الأزاهر ..

في الحقيقة لم أحسب عدد رؤوس التنين كما لم أنتبه لشكل الفارس بدقة فلا تسألينني
أكان ملتحيا أم بغير لحية يقاتل !!

فقد شغلني عن كل ذلك هذا المنظر البديع ... الفتأة وهي تناجي السمك الذي بدا وكأنه يفهم عنها

شكواها ..!!

والسمك يقبل الزجاج أو قولي يصطدم به كانه يريد أن يخترقه ليوانس الفتأة في وحشتها وسط الليل

سبع سمكات كعدة السنابل في رؤيا الملك صاحب يوسف النبي .. أدخلن في قلب الفتأة وأنا معها

البهجة

... منهن الصفراء ومنهن الحمراء والسوداء ، الألوان لم تكن في ذاك الوقت بذات أهمية ولا

الجنس ..لكنهن سلين عن الفتأة وحشتها وأدخلن في حشا قلبي المحبة


لذا ومن غير أي مبالغة أنا أكثر من يشعر بمأساة بنت أختك ...

فلا يعلم العشق إلا من يكابده... أو علي الأقل يراه كما هو في حالتي


تعازي لــــنور مرة أخري

د. بيان تقبلي خالص التعازي القلبيه على سمكتكم الحمراء

والجاتك في سمكتك سامحتك

ــــــــــــــــــــــــــــ

غايتو أنا ممكن أطلع من القصه دي بي عبره إنو أحياناً الوحده أفضل مئة مره من العيش مع شريك ضار ..

وللا شنو ياأخوانا...

Quote: غايتو أنا ممكن أطلع من القصه دي بي عبره إنو أحياناً الوحده أفضل مئة مره من العيش مع شريك ضار .. وللا شنو ياأخوانا...

سلام يا محمد

القصة دي قصة شفافة ممكن تطلع منها باي عظة..
ولك التحية على المرور

Quote: اللعزيزة بيان ... تعازي الحارة لــــــــــنور في فاجعتها الأليمة ويمكن أن أكون ـ أنا العبد الضعيف ـ أكثر من يشعر بعمق مأساتها ويتعاطف معها في هذا المنبر علي الأقل ....وكده ولذلك سبب بليغ أحكيه لك في هذه النمة القصيرة .. ذات مرة زرتُ صاحب لي في بيته .. ولمّا كان يقع بعيدا من بيتي وتأخرتُ معه في السمر فقد أصر ذاك الصاحب علي بياتي عنده .. وهذا ما كان.. غير أنني في الحقيقة لم أنم ..!! فسبب ضيق الشقة لم يجدوا لي موضعا يصلح للنوم إلا صالة أو هول / المهم حاجة زي الصالون كدا بس أصغر منو.. وانتبهت قبل أن أغرق في النوم علي بنته الصغيرة وهي تدخل ببطء محاولة عدم أيقاظ النائمين وتمشي جهة الركن الزوي البعيد وتزيح ستارة ظننتها من جهلي وُضعت بغير قصد لتكشف حوض سمك لا بالصغير هو ولا الكبير .. وتفتح ضوء أحمر صغير بآناة من يعرف ماذا يفعل .. ثم تأخذ قليل من بودرة وتوزعها علي أسماك الحوض ... كان الحوض تعلوه زخرفة علي شكل قبة بها مأذنة ذهبية وعلي جوانبه الزجاجية نقوشا تصور فارسا علي حصانه وهو يقاتل تنينا له عدة رؤوس وسط غابة من الأزاهر .. في الحقيقة لم أحسب عدد رؤوس التنين كما لم أنتبه لشكل الفارس بدقة فلا تسألينني أكان ملتحيا أم بغير لحية يقاتل !! فقد شغلني عن كل ذلك هذا المنظر البديع ... الفتأة وهي تناجي السمك الذي بدا وكأنه يفهم عنها شكواها ..!! والسمك يقبل الزجاج أو قولي يصطدم به كانه يريد أن يخترقه ليوانس الفتأة في وحشتها وسط الليل سبع سمكات كعدة السنابل في رؤيا الملك صاحب يوسف النبي .. أدخلن في قلب الفتأة وأنا معها البهجة ... منهن الصفراء ومنهن الحمراء والسوداء ، الألوان لم تكن في ذاك الوقت بذات أهمية ولا الجنس ..لكنهن سلين عن الفتأة وحشتها وأدخلن في حشا قلبي المحبة لذا ومن غير أي مبالغة أنا أكثر من يشعر بمأساة بنت أختك ... فلا يعلم العشق إلا من يكابده... أو علي الأقل يراه كما هو في حالتي تعازي لــــنور مرة أخري

العزيز محمد
يا سلام
هذا نص موازي ابدع من القصة الاصلية لله درك
لا ادري احسست بسعادة غامرة انك شاركت به..
لك التحية على هذا النص البديع
وكن قريبا..

العزيزة ست الناس
نور
كيفك يا حبيبة

شكرا ليك على سعيك الحثيث ان اعود
مما كان له اثر بالغ في داخلي

اين انت الان؟
في لندن ام كندا

Quote: المره دي قلتي احسن تبدي بالسمك ،،، على حسب القول سمك بياكل سمك!!!

العزيز الامين
زمان بيقولو الدنيا غابة اسع احسن نقول الدنيا بحر

تحياتي

مودتي

بيان كيف الحال سمك لبن تمر هندي ولدي الصغير عامل لي ازعاج شديد داير ارنب وسمك وكديسه يعني عايز يقلب لي البيت جنينة حيوانات وانا بتزاوغ منو بانو نمشي جنينة الحيوانات والموضوع ينتهي على كدة لكنو مصر على الارنب بقوليهو انت زاتك ارنب بطل الغلبة

حزنت وتأثرت كثيرا للطريقة الخاطئة لفرض سيطرة العريس الأسمر بوجوده فى حيز الزوجية
وتأثره بالنهج الآسيوى المتبع يوم الدخلة بذبح البسة (الكديسة) للم الزوجة فى علبها من أول يوم.
لا ولم يكون نهجه عنصريا قط
ألا لايجهلن أحدا عليه ويفتى بعنصريته


الليلة البحر ضاق بيك.. يالمحمر لونك
أبوسمرة بفرض سلطة.. مابضربك لكيانك
عدم (البسه) ..أبدا مالقصد يقلل شانك
طفت الحقيقة المرة يوم قللوها أوزانك
تختلف الطباع ..وأبدا مابدينو دهانك
...............................................................
أما لماذا طفت السمكة الحمراء؟مابين أرشميدس ونور
فأبشرى بطول مجادلة ياأستاذة بيان