فيديو لحرامي جديد في قبضة عزابة دناقلة !!!

11:47 AM Nov, 04 2015
سودانيز اون لاين
ناذر محمد الخليفة-www.nazirkhalifa.com
مكتبتى فى سودانيزاونلاين

بس ما عارف كتلوهو ولا خلوهو بعد غسل ليهم الهدوم !!

الحبيب ناذر سلام،

غايتو العزابة ديل لو عندهم غسالة كهربائية ( و أشك فى ذلك ايش اكمنهم عزابة:) يكونو غتيتين غتاتة. لكن على أى حال أخير ليهو من الشطة على الأقل ايدينو بتعقلو يومين تلاتة و يرجع يسرق تانى، و الله شر البلية ما يضحك.


قلنا ليكم الحكايات دى قديمة فى السودان خاصة فى ظل غياب الدولة عن تطبيق القانون و ضمان أمن المواطن على مر عهود حرامية السياسة السودانية.

سلام يا انور ...

دي حاجات عادية من ما نحنا قمنا بنشوفا في الحلة والحلال المجاورة ...

هسي بعد الهدوم دي يكونو خلوهو يكنس البيت ويغسل ليهم الركشة والامجاد ويغرف ليهم البلاعة وما بعيد يخلوهو يورق ليهم الخضرة ويقرقر ليهم المحشي ....

لو فكوهو بعد دا حا يكون حاقد عليهم شديد وما بعيد يجيهم بالليل مع مجموعة شايلين سواطير وسكاكين ويضبحوهم كلهم ..!!!

تسلم ...

سلامات ناذر

لسنا فى الغابة لكي نطبق القوانين بايدينا. الفيديو مستفز ولا انسانيز وادعو الشرطة لمحاسبة منقامبتصوير الفيديو والمشاركين في تلك الجريمة.
بعدين الحرامي اغبش اشعث تفتكر زول بسيط زي دة داير يسرق لشنو؟ لو ديل أولاد حلال كان تصدقوا عليه ببعض الدراهم والطعام واطلقوا سراحه.
ناس تسرق مليارات وتجد كل التقدير والاحترام من المجتمع. وناس اجبرها الجوع لكي تسرق فقط لتأكل.
فيديو مقزز ولا انساني بالمرة

اخي ناذر.. ممارسة غير أخلاقية 100%
سلوك لا يمت بالانسانية ..
لم اسمع أحدهم يتحدث بالدنقلاوية حتى اللسان العربي فصيح
يمكن يكونوا من مواليد العاصمة ..
لكن لا أظن أن أحد يعترف بأصله او يعطي معلومة عن نفسه هو يرتكب مثل هذا الخطأ
وأحسب أنه يعرف عقابه وأنه يرتكب خطأ يمكن أن يقوده إلى الهلاك .
لا أبرأ احداً ولكن أستبعد أن شخصاً يتركب جريمة ويقوم بتصويرها ويكشف عن هويته
وخاصة إذا كان هذا الحدث بعد جريمة الشطة ..

تحياتي .. ومودتي ..

Quote: سلامات ناذر لسنا فى الغابة لكي نطبق القوانين بايدينا. الفيديو مستفز ولا انسانيز وادعو الشرطة لمحاسبة منقامبتصوير الفيديو والمشاركين في تلك الجريمة. بعدين الحرامي اغبش اشعث تفتكر زول بسيط زي دة داير يسرق لشنو؟ لو ديل أولاد حلال كان تصدقوا عليه ببعض الدراهم والطعام واطلقوا سراحه. ناس تسرق مليارات وتجد كل التقدير والاحترام من المجتمع. وناس اجبرها الجوع لكي تسرق فقط لتأكل. فيديو مقزز ولا انساني بالمرة

الأخ أمبدة تحياتي...
دي مثالية زايدة منك ومافي ليها أي داعي...
اتذكر ده حرامي ومجرم انتهك حرمة بيت وقام بترويع أهله ويمكن يكون مسلح....
يعني مااااا دق ليهم الباب و قال ليهم أنا جعان أدوني أكل...
حقو الناس تسيب المثالية الزايدة دي....
انت هسع لو جاك حرامي وانتهك حرمة بيتك وكان مسلح....حتعزمو شاي مثلا؟؟؟
أي حرامي في الدنيا حياخد ليهو علقة سمحة.....اتذكر هو حرامي و مجرم انتهك حرمة بيت....

!!!!!!!

سلام أمبدة ...

Quote: لو ديل أولاد حلال كان تصدقوا عليه ببعض الدراهم والطعام واطلقوا سراحه.

يعني هو جا ياكل بس .. ولو شاف دهب ما بيهبشو ولو شاف بت صغيرة ما بيغتصبا ولو في مرة كبيرة صرخت ما بيضربا يكتلا مش ؟!

Quote: ناس تسرق مليارات وتجد كل التقدير والاحترام من المجتمع. وناس اجبرها الجوع لكي تسرق فقط لتأكل.

Quote: يعني هو جا ياكل بس .. ولو شاف دهب ما بيهبشو ولو شاف بت صغيرة ما بيغتصبا ولو في مرة كبيرة صرخت ما بيضربا يكتلا مش ؟!

حقيقة معادلة صعبة..

جد فيديو مقزز..

تحية للجميع..

الأخ ناذر تحية طيبة

فى البدء أدين وبشدة هذا المسلك المشين من أصحاب المنزل ولابد من معاقبتهم على جرمهم هذا ،،

ولكن

أعتقد لدرجة الجزم بأن هذا الشريط مفبرك وقصد به تحويل الأنظار من الجريمة الكبرى للشريط السابق ،، وكذلك
قصد به تأجيج شق المجتمع السودانى وإشغالهم فى بعضهم البعض ،، إن ذكر كلمة ( الدناقلة ) فى محادثتهم يدل على ذلك .
وتصويرهم على أساس أنهم همج وهذا كما تعلم بعيد جدا من أخلاق النوبيين بصفة عامة حيث أن معدل الجريمة لديهم ( صفر ) .

مع التحية ،،

Quote: بس ما عارف كتلوهو ولا خلوهو بعد غسل ليهم الهدوم !!

ماحيكونو كتلوهو ياناذر .. صدقني ..
قرايبي ديل ناس نجاض ..
مثل هذا الموقف حصل لي عزابة قرايبنا برضو ..
الحرامي على التعتر ليهو جاهم صابح على جمعة ..
وماليكـ على حلفان ..
الزول صنقروهو للهدوم من الصباح لحدي المغرب ..
وملو ليهو البيت حبال غسيل ..
بعد انتهى وشرا الهدوم ..
والله حاسبوه بالقطعة ..
وأخد قروشه على داير مليم ..
واستحمى وادوهو هدوم غير بيها ..
وخرج لايلوي على شيء ..
حامد الله سيدو ..

ــــــــــــــــــــــــــــــــ

العجيبة الناس البتدافع عن زوار الليل ..
صنفين .. لاثالث لهما ..
واحدين عاملين فيها بتاعين انسانية وحساسين ..
أنا ماعارف ربنا خصاهم بالانسانية والاحساس المرهف ده براهم ..
ولاأدوهم المشاعر دي في مقرر والناس ما أخدوهو معاهم ..
ولا دي مقررات شيوعية وأجندة يسار يعني ولا من وين ؟ ..
ولا ديل ناس طيبين وإنسانيين بالفطرة ولا جابوها من وين يعني ؟؟ ..
والله أنا مستغرب !! ..
أها والصنف الأقذر والأحط المركب مكنة العنصرية ..
والعايز يصطاد في الأجواء العكره دي ..
يجيكـ ويقول ليكـ وبرضو بلا خجلة الحرامي ده جنسه وقبيلته ..
وماعارف شنو ..
يأخ ده حرامي وانتهينا يطلع زي ما يطلع ..
نحن الخصانا بي قبيلته ولا جنسو شنو ..
في زول مشى كاسو وقدم ليهو دعوة ..
وقال ليهو تعال نط بيوت الناس وأسرق ..
ولا هو جاء براهو بي كرعينو ..
وبي ارادتو وطوعه وإختياره ..
العجيبة كلامهم غير مقنع وهم ذااتم ماأظنهم مقتنعين ..
بالكلام البيلوكوهو ده ..
يأخ خاب من دافع عن كل مستقبح ..
هؤلاء وبلا أي خجلة ..
يدافعو عن المواخير وبيوت الدعارة والداعرات وستات العرقي ..
والحرامية والنشالين وحثالة المجتمعات ..
بدعاوى عجيبة جداً وبمنطق لايستقيم ..
محمّلين اللوم كله والمسؤلية للمجتمع والحكومة ..
وبمنطق عجيب وما مبلوع وتبرير فطير وغث ..
والله حقو تخجلو ..
وتختوا ليكم حصوة ملح ..
في ....
مادايرين نقول ليكم شطة ..


الحرامي ياهو الحرامي ..
الناس بتسوي فيهو الدايراهو ..
عشان البشوفوه يمشوا يشوفوا ليهم شغل شريف ياكلو منو عيش ..
والمحتاج ومالاقي ياكل يجي يفتش عن إنسانية الناس ..
شوفوا الوقت داك حيلقاها وحياكلوهو ولا حيمنعوهو ..
هنا ده مكان الإنسانية وأي استخدام تاني ليها ..
بيكون نوع من العبط والسفسطة الفارغة ..

سلام ناذر .. وضيوفك

من زمان معروف الحرامي البدخل بيت عزابه غلط ... يكون حظو سيئ جدا ...
وبعدما يغسل الملابس ... ويغسل العده .. يقوم ينضف الكمونيه ويشد الحله ...
ولو العزابه طلع عندهم زوق بيدوه كم جنيه ... عشان تاني ما يسرق ...

تحياتي ,,

والله دي عوجة كبيرة خلاص الصابتنا دي
لكن اسمح لي يا ناذر وللمرة الأولى استخدم هذا التعبير وسجن سجن غرامة غرامة
الحاصل دا عنصرية حتى ولو تمت ممارسته من غير قصد عنصري
صحيح كان يحدث في الماضي ولكن هذا ليس مبررا لاستمراره

تصوير مثل هذه الفيديوهات ونشرها سيكون أحد أدوات تمزيق ما تبقى من نسيج اجتماعي وتعايش قبلي
وفيديو وراء آخر سيقود إلى يوم أسود من يوم مجيء هذا النظام الحقير لحكم السودان

هذا المجتمع ينحدر يوميا إلى درجة أحط في سلم الأخلاق الإنسانية
أدين هذا العمل وما شابهه بكل ما أوتيت من أخلاق
اللهم لا تؤاخذنا بما يفعل السفهاء منا

أخي العزيز ناذر محمد الخليفة وضيوفك الأفاضل،
لكم التحيّة.


أفراد هذه الجماعة من السودانيين الذين تُسمَعُ أصواتهم وتُشاهَد اجزاء من جسومهم في هذا الفديو -
في حال ثبوت إنطباق المشهد المصوٍّر على وقائع حدثت بالفعل - متورّطون في ارتكاب جرائم يعاقب عليها بموجب القانون الجنائي لسنة 1991 في السودان.

فلقد اقترفوا أفعالاً توقعهم تحت طائلة القانون الجنائي المذكور وهي :

1- الأذى، وهي المادة رقم 142 المضمّنة في الباب الخامس عشر من القانون الجنائي المذكور
والمعنوّن : الجرائم الواقعة على النفس والجسم.

2- الإساء والسباب، وهي المادة رقم 160 من الباب السالف الذكر.

3- السخرة، وهي المادة رقم 163 من الباب السادس عشر من القانون الجنائي.

الأخ عثمان محمد صالح سلام و تحية،


المشكلة ما فى تشريع و مواد قانون، المشكلة فى من يفترض فيهم تنفيذ هذه القوانين و بكل حزم. لقدو و ضعو هذه القوانيين و هم و زبانيتهم أول من ينتهكونها.

الأخ الفاضل أنور تاج السر .
وعليك أفضل السلام وبعد،

عندما كتبت تعليقي باعلاه كان دافعي لايراد تلك المواد من القانون الجناءي لسنة 1999 في السودان هو الإشارة إلى ان تلك الأفعال
المصورة في الفديو والتي ربما اعتاد البعض منا على رؤيتها او سماع الحكايات عن وقوعها هنا أو هناك كجزاء " طبيعي" يلقاه اللص في السودان - أيّ لص كيفما كانت سحنته وعرقه - إذا ماوقع في قبضة جماعة ما ، هي في واقع الأمر أفعال جنائية يجرمها القانون ويعاقب عليها . فاللص إذا ماتم القبض عليه لايجوز تعريضه لاي لون من ألوان
التعذيب مهما كانت الذرائع التي يستحل بها تعذيبه حتى لو جمع بين السطو وقتل النفس التي حرم الله.
لايجوز تعذيب اللص بل تسليمه للجهات العدلية.

أما قولك عن فساد الجهات العدلية في بلادنا فلايجوز استعماله ذريعة أو تكأة للتحلل من مبدأين أولهما هو حرمة التعذيب، والثاني هو ضرورة الخضوع لسلطة الدولة المركزية حتى وهي تعاني من أدواء الفساد.
فاذا كانت السلطة المركزية فاسدة فليس الحل هو إشراع الباب
للفوضى، بل العمل لتغيير تلك السلطة الفاسدة بأخرى أفضل منها، بدلاً من خلق مراكز سلطوية متعددة كماجرى في الصومال بعد انهيار الدولة المركزية هناك وهروب الدكتاتور سياد بري. فمحل الدكتاتور القابض على كل شيء، صار هناك عدد من صغار الدكتاتوريين من زعماء الجماعات المسلّحة المتناحرين فيما بينهم لبسط السيطرة والنفوذ.

.
ود الخليفة وضيوفه سلام

أتذكر والبعض معي قصة ذلك الحرامي الذي دخل بيت العذابة نص الليل
وكانوا نائمين في الحوش ، وعندما جهز البُقجة وفيها ما فيها وخرج خلسة
ليغادر ببقجته وجد السراير فاضية ، فوضع البقجة وجلس على الأرض وأخذ
يصيح للجيران وبوليس السواري ليكفوه شر العذابة .

وفي حادثة أخرى ، كان عمنا ذلك المشهور بمنطقة بحري حيث كان في نقابة
عمال النقل الميكانيكي ، اعتاد على الرقاد في منتصف حوش منزله الواسع ،
وذات ليلة جاتو صحيه فرأى الحرامي والبُقجة أعلى السور وعلى وشك النزول
إلى الشارع.. فتناول مركوبه وزفَّ الحرامي .. المركوب الحاقد وقع في رقبة
الحرامي فسقط في الشارع !! شوف عيني الحرامي لامِن رشوهو بالموية حتى
فرفر .. طبعاً عمنا إياهو مركوبو ( قَطِعْ ) المعنى مافي مصنع بطلع مقاسو ، الشي
رِجِل صحابي .. مفاس55 .... وتم تسليم الحرامي للشرطة .

لكن بعض زوار الليل يأتون مسلحين ، وكثيرون من الذين دافعوا عن مالهم
طالتهم سكاكين وعصي الحديد التي يتسلح بها زوار الليل وبعضهم راحوا
ضحليا لاعتداءات زوار الليل ... شقيقة زميلي في العمل سبعينية ، كانت عندهم
مناسبة زواج ، ولأنها لا تستحمل السهر أعادوها للبيت في حوالي العاشرة ، الشباب
عايزين يحصلوا الحفلة ، خلوها دخلت من باب الحوش وغادروا للحاق بالحفل ،
الحرامي كان جوه البيت ، أداها ضربة واحده في نص راسها ففارقت الحياة ، ما قال
دي مرة كبيرة ولا يحزنون ..... حدث ذلك في إحدى حارات الثورة .

الله المستعان

تحياتي أخ ناذر محمد الخليفة
حول هذه الممارسات كتبت في بوست آخر:
(لاخلاف حق الإنسان حماية بيته وممتلكاته إذا ما تعرض لإعتداء أو سرقة ــ ويمكن وفي ظل حرارة الموقف أن يضُرب اللص أو حتي يقتله -- أثناء حدوث الفعل الإجرامي !
** الإختلاف هنا في جزئية محددة وهي رفض وإدانة التعذيب بدم بارد ــ وحفلات الشواء الجماعي والتلذذ بتعذيب إنسان وإنتهاك كرامته أوتسبيب الأذي الجسيم له أو قتله -- بعد القبض عليه!
** بمجرد مجرد أن يتم القبض علي اللص والمتعدي وتجريده من أدوات العنف والعدوان يجب تسليمه للشرطة وترك القانون يأخذ مجراه !
* رفض حفلات الشواء والتعذيب الجماعي واجب يميله الحس الإنساني والضمير الحي ، من يشجع التعذيب والقتل بدم بارد فليتحسس إنسانيته،، مايحدث جريمة مكتملة الأركان وممارسة همجية
وغير قانونية

ود القوز كلامك ده بسموه preemptive attack و هو ما يعرف بالهجوم الوقائي بغرض تجريد
الخصوم من اسلحتهم.
الناس المختلفين معاك كلامهم واحد. تقبض حرامي توديهو البوليس و تنفض يدك من الموضوع
و الحديث عن الدوافع وراء موقفهم ذلك لن يفيد النقاش بشئ إذ أن الأجدى هو التركيز على الموضوع في عضمو.

ود القوز اعتبر كل الناس مثاليين وهذا موقف غريب
هذه ندالة ورزالة منهم ...
...الذين لا شك أن الشرفاء منهم لا يرضون بهذا السلوك..
.وسبة يريدون الحاقها بالدناقلة ...ظناً منهم أن هذا الفعل رجالة وضكرنه الجهل مصيبه
فلاحتهم على هذا المسكين ...
ديل قليلين مروءة لا أكثر
وعملهم دا ما عمل رجال
وهو بعد فعلتو دي اشرف منهم لأن السرقة نعم جرم
ولكن السرقة لا ترقى لدرجة الخسه والندالة التي هي وصفهم لا محالة
لأنه ليس للندل شرف
فالرجالة والندالة لا يجتمعان

يا سلام علي سماحة و اخلاق الاسلام

الدخول في ملكية الآخر هو إعلان حرب، يحق لصاحب الملكية أن يقتلك لو وجدك داخل ملكيته بشكل يهدد حياته وله هو وحده تقدير الخطورة.

أبوبكر عباس بعد الجواز الجديد

السيّد أبوبكر عباس،

بالنظر إلى مقطع الفديو المعروض حيث يشاهد رجل
متهّم بالدخول في بيت آخرين بهدف السرقة وهو أعزل مستسلم لأمر جماعة من السودانيين
يسيئون معاملته ويؤذونه بالقول والفعل ويحتجزونه بغض إجباره
وتسخيره لأداء عمل هو غسل ثياب الجماعة المحتجِزة بدلاً من تسليمه للشرطة. أقول بالنظر إلى كل هذا تبدو أشبه بالعرضة خارج الدارة العبارة التي أوردتها ونصّها: الدخول في ملكية الآخرين إعلان حرب يحق ؟ لصاحب الملكية أن يقتلك لو وجدك داخل ملكيته بشكل يهدد حياته وله وحده تقدير الخطورة.

يا سلام يا ناصر ياخ
ارجو أن تجعل قصة الباكستاني النيويوركي البعض ينظرون للمسألة من زاوية مختلفة..
او زي ما بيقولوا الخواجات from a fresh perspective

Quote: تقبض حرامي توديهو البوليس و تنفض يدك من الموضوع

كلامك سمح يادكتور ..
إنت قايلني يعني أنا بأيد شريعة الغاب .
متجاهلاً القانون ..
وداعياً الناس لتجاهله وعدم الاحتكام له ..
أبداً والله ..
مادفعني لتبني وجهة نظري تلكـ ..
هو أن القانون غير رادع أصلاً ..
بل ومتستر ومتساهل جداً مع الحرامية ..
وعادي ممكن جداً الحرامي ده ..
يفكوهو تاني يوم بالضمانة ..
وماتلم فيهو تاني يوم النظر في القضية ..
ليعود من جديد لممارسة السرقة وارهاب الآمنين ..
أها لو أنا وإنت كنا عارفين القانون مارادع ..
وهو أصلاً غير مستأمن ولاجاد في إنه ينصفك ويرجع ليك حقكـ ..
اها تسوي شنو ؟!! ..
برضو نلجأ ليهو !! ..

الكلام ده كيف !! ...

Quote: ود القوز اعتبر كل الناس مثاليين وهذا موقف غريب هذه ندالة ورزالة منهم ....وسبة يريدون الحاقها بالدناقلة ... الذين لا شك أن الشرفاء منهم لا يرضون بهذا السلوك.. ظناً منهم أن هذا الفعل رجالة وضكرنه الجهل مصيبه فلاحتهم على هذا المسكين ... ديل قليلين مروءة لا أكثر وعملهم دا ما عمل رجال وهو بعد فعلتو دي اشرف منهم لأن السرقة نعم جرم ولكن السرقة لا ترقى لدرجة الخسه والندالة التي هي وصفهم لا محالة لأنه ليس للندل شرف فالرجالة والندالة لا يجتمعان

منتصر أراكـ إفترضت نذالة ومن مافي وفصلتها تفصيل ..
لتكون طرف آخر للمعادلة ..

مافي نذالة يأخ ..

Quote: الدخول في ملكية الآخر هو إعلان حرب، يحق لصاحب الملكية أن يقتلك لو وجدك داخل ملكيته بشكل يهدد حياته وله هو وحده تقدير الخطورة. أبوبكر عباس بعد الجواز الجديد

وربي المعبود هجمتني يأخ ..

نحن الناس الساي ديل ..
مامطلوب مننا وعلى الإطلاق تبني أي أطروحات فوق العادة ..
أو الاضطلاع بدور استناري تحذو القاعدة العريضة بسودانيز حذوه ...
فكون وجهة النظرة المشاترة دي ..
تجي منكـ يامستنير فدي كبيرة خلاس ..
وصدقني مالايقة عليكـ المداخلة دي ..
اللهم الا يلايقوها ليكـ بي ويكة جديدة لنج ..
لاني كنت أحسبكـ ستتبني طرحاً أكثر إستنارة ..
زي الشغلة السواها الباكستاني النيويوركي ده ..
لأنها تعبر عن أرفع مستويات الاستنارة ..
جاي تقول لينا دخل ملكيتكـ ..
ملكيتكـ بتاعة الساعم كم يأخ ..
المفروض ووفق منظور الاستنارة .. ده زول ضيفكـ ..
وجاي عشمان في كرمكـ واستنارتكـ ..
تقوم تحرجو بالطريقة دي .. بالغت يأخ ..

هسه عليك الله خليتنا لينا نحن الناس الساي ديل شنو ؟؟!! ..
ياشماتة المستنيرين فيكـ يأخ ..

شكلو جوازكـ الجديد ده كان خصماً على إستنارتكـ ..

والله شفت مداخلتكـ فركت عيوني غير مصدق ..
دي رمية من غير ( رامِ ) يأخ ..
وصدقني جلت منكـ ..

Quote: أحياناً الواحد يجد نفسه في ورطة حقيقية في معرفة الصحيح من الخطأ عندما تتشابك التناقضات بصورة عجيبة ... ويختلف الناس عليها بصورة محيرة

عليكم الله، يجي واحد يقول لود القوز دا: إتّا والمستنير متفقين في الموضوع دا

Quote: عليكم الله، يجي واحد يقول لود القوز دا: إتّا والمستنير متفقين في الموضوع دا

قول يجي يقرصني يأخ وإنت الصادق ..

ماهو واحد من إتنين ...
يا إتـــــــــا (reference) الاستنارة ده بقيت زينا زول ساي ..
يانحن الناس الساي ديل إعتلينا صهوة سرج الاستنارة معاكـ ..
ودي في الغالب محتاجة لي قرصة شديدة ..

Quote: منتصر أراكـ إفترضت نذالة ومن مافي وفصلتها تفصيل .. لتكون طرف آخر للمعادلة .. مافي نذالة يأخ ..

مجرد تصويرهم لهذا المسكين وهم يحملون العصا عليه وفضحه يعتبر أكبر ندالة
لو كنا نعرف معنى الندالة ومعني الأخلاق وما هي الأخلاق لما وجد هناك تنظيم للقاعدة أو داعش أو أمثالهم
فطبيعي جداً نختلف ...ولو الناس متفقون حول هذه الأمور لكان العالم كله ينعم بالأمن والسلام.

كتب ودالقوز

Quote: الحرامي ياهو الحرامي .. الناس بتسوي فيهو الدايراهو .. عشان البشوفوه يمشوا يشوفوا ليهم شغل شريف ياكلو منو عيش .. والمحتاج ومالاقي ياكل يجي يفتش عن إنسانية الناس .. شوفوا الوقت داك حيلقاها وحياكلوهو ولا حيمنعوهو .. هنا ده مكان الإنسانية وأي استخدام تاني ليها .. بيكون نوع من العبط والسفسطة الفارغة ..

وكتب بابكرعباس

Quote: الدخول في ملكية الآخر هو إعلان حرب، يحق لصاحب الملكية أن يقتلك لو وجدك داخل ملكيته بشكل يهدد حياته وله هو وحده تقدير الخطورة. أبوبكر عباس بعد الجواز الجديد

فكتب ودالقوز ردأ على بابكر

Quote: فكون وجهة النظرة المشاترة دي .. تجي منكـ يامستنير فدي كبيرة خلاس .. وصدقني مالايقة عليكـ المداخلة دي .. اللهم الا يلايقوها ليكـ بي ويكة جديدة لنج .. لاني كنت أحسبكـ ستتبني طرحاً أكثر إستنارة .. زي الشغلة السواها الباكستاني النيويوركي ده .. لأنها تعبر عن أرفع مستويات الاستنارة .. جاي تقول لينا دخل ملكيتكـ .. ملكيتكـ بتاعة الساعم كم يأخ .. المفروض ووفق منظور الاستنارة .. ده زول ضيفكـ .. وجاي عشمان في كرمكـ واستنارتكـ .. تقوم تحرجو بالطريقة دي .. بالغت يأخ ..

فكتب بابكر رداً

Quote: عليكم الله، يجي واحد يقول لود القوز دا: إتّا والمستنير متفقين في الموضوع دا

ورد ودالقوز
ملوحظة الرد التحت معاهو أيقونه وجه ضاحك ماقدرتة أضيفو .

Quote: قول يجي يقرصني يأخ وإنت الصادق .. ماهو واحد من إتنين ... يا إتـــــــــا (reference) الاستنارة ده بقيت زينا زول ساي .. يانحن الناس الساي ديل إعتلينا صهوة سرج الاستنارة معاكـ .. ودي في الغالب محتاجة لي قرصة شديدة ..

أتوقع المستنير بابكر يجي يحكي ليك قصة صاحبو المستنير البيعمل كباية الشاي للزول البيكون ردو خطير داك :) .
وسمح القول فى خشم سيدو .
.............................................................
حكاية الحرامي القبضو عذابة وغسل ليهم الهدوم دى بنسمع بيها من زمن حفرو البحر وكنا بنضحك وبنعتبره نكتة طريفة .
اليوم إكتشنفنا إن الحكاية لافيها طرافة ولا ظرافة بالعكس لاتخلو من همجية وعدم إحترام للقانون وإنسانية الانسان .

هو الحرامي دا الوداهو للدناقلة ديل شنو؟
التركينج كلو صفيحتو بما يعادل عشرة دولارات بسوق السجانة

سلام يا بدر الطائف

السيد أبوبكر عباس،

قرأت محاولنك للخروج من عنق الزجاجة باللطافة المعرقنة التي أسفرت عما هو قار في صدرك من سخائم عرقية ضد جنس الجماعة التي عذبت اللص وشهرته.
وظهور هذه السخائم هو من مترتبات تحللك من اليسارية التي تخلصت منها مع الوطن القديم .
وليس بعد التحلل من الولاء القديم شيء سوى صيرورتك مهرجاً يتسلى به الناس .

سلاماات ياناذر و ارجو قبول اعتذاري ولكن كان لابد مماليس منه بد وهو الرد على هذا اليساري المتظارف المتحلل من الولاء القديم.

الأخ الكريم عثمان صالح،

تيك ات ايزى يا عزيزى، هسة انت ما وريتنا متعاطف مع الحرامى ولا مع الدناقلة ولا مع ارث وثقافة المجتمع السودانى؟ كما ذكر الأخ بدر الطائف لغاية اول امبارح القريبة دى كنا بنعتبر الممارسات و الحكايات دى نكات و ونسة و ضحك، خلاس دايرين هسع دى نعشق نمرة اربعة و نتخلص منها؟

أرجو يا أخى أن لا تشن على أى هجوم ضبعى (من ضبع) وتصنفنى بالأنتماء لأى تيار سياسى أو قبلى.

كسوداني من أصل نوبي لست سعيدا البتة بمافعلته هذه الجماعة من اهلي بالرجل الفقير. الذي ساقه الحظ العاثر إلى دارهم فاعتلى سورها.

مغتم انا بمافعلته هذه الجماعة وعلى راس سيءاتها
السخرة المحرمة قانونا. ولست لها نصيرا في الباطل الذي اقترفته . اما اعتزازي بنوبيتي فليس يخلخل عماده ماجرى قيد انملة .
لست مؤلها ارومتي ولست مشيطنا الجماعات الأخرى التي تقاسم
النوبيين سكنى الوطن . فلقد حررتني اليسارية المغمسة في عجوة الوطن واممية الكادحين الفيحاء منذ وقت باكر جدا من غلواء الانتماء الذي يراه في الذات كل المناقب وفي الاخر كل المثالب.

كسوداني من أصل نوبي لست سعيداً البتة بمافعلته هذه الجماعة من أهلي بالرجل الفقير لمغبلى أهلي. الذي ساقه الحظ العاثر إلى دارهم فاعتلى سورها.

مغتم أنا بمافعلته هذه الجماعة وعلى أرس سيئاتها
السخرة المحرمة قانونا. ولست لها نصيراً في الباطل الذي اقترفته. أمّا اعتزازي بنوبيتي فليس يخلخل عماده ماجرى قيد انملة .

لست مؤلهاً أرومتي ولست مشيطناً الجماعات الأخرى التي تقاسم
النوبيين سكنى الوطن . فلقد حررتني اليسارية المغمّسة في عجوة الوطن وأممية الكادحين الفيحاء منذ وقت باكر جداً من غلواء الانتماء الذي يراه في الذات كل المناقب وفي الآخر كل المثالب.

وحرامية الانقاذ وضعهم شنو في الحالة دي ؟

العقوبة دي للحرامي مش لانو سرق لكن لانو ضعيف لو كان قوي ما كان هللو وكبرو ليهو زي ما بيحصل مع الولاة والجباة وتجار الدين

شعب يخاف ما يختشي

يا عثمان، أنا لمان أدخل بوست بكون داير أفتح فيهو محاور الناس العاديين ما بكونوا شايفنها
وبعدين، أنا ما قاعد أكتب هنا بالمجان زيك
بعدين تاني، أنا لم اتحرر من اليسار، أنا ومعاي شيوعيين سودانيين كتيرين بأمريكا بنمثل اليسار الراسمالي الجديد، صعب عليك وإتّا قاعد بدول العالم التالت تميزو من اليمين الراسمالي

دكتور أبوبكر،

هسة انت عرفت كيف انو الأخ عثمان صالح قاعد فى دول العالم الثالث؟ لكن برضو أحى فيك سرعة تعلم المفهوم الجديد و المتحضر لليسار و اليمين و أنت الذى كنت بالأمس القريب مقيم فى عمق العالم الثالث:)

" اليسار الراسمالي" بضاعة مغشوشة لن تتمكن من تسويقها الا بين جمهور الأذكياء.

السيّد المستنير المتظارف أبوبكر عباس،

إنّ ماكتبه بعاليه ليس إلا سخائم معرقنة قارة في الصدر وجدت منفذاً للانعتاق عندما بلغ بك ضيق الصدر مداه.
لقد عايرت معذبي اللص الفقير برقة الحال ومعناها الفقر يا أيّها اليسلري ، ساخراً من علامة تمّيز طعامهم كنوبيين.

لا اله الله. وخيرا في غيرا.

Quote: هو الحرامي دا الوداهو للدناقلة ديل شنو؟ التركينج كلو صفيحتو بما يعادل عشرة دولارات بسوق السجانة

الاخ ابو بكر .... سلام

الكلام دا شين منك .....
يعني عشان اتامركتااااا .. تفتري على بني جلدتك ..... ؟؟؟؟
انت كدا ا بتسيئ الى قبيله كاملة .... ودا كلام عنصري مرفوض ..
رجاءا اسحب هذه المداخله .... واعتذر لهم ....

تحياتي ,,,

يا مجيدو يا أخي، المداخلة دي ما فيها عنصرية وتقرأ ضمن عنوان البوست:
الحرامي التعيس البوديهو لبيت عزابة شنو؟
وما دام صاحب البوست حدد قبيلتم بالدناقلة (وان كان ما في قبيلة بالاسم دا) حبيت اسخر من ذلك بإيرادي لوجود التركينج كأغلى ما يمكن أن يكون موجود لدى هؤلاء العزابة الدناقلة

شكراً كثير مجيدو .. تحياتي أبوبكر
هذه مداخلتي .. صاحب التصوير ربما لديه ما أراد أن يؤلب الناس على الدناقلة
ولا أصدق أن أحداً يرتكب جريمة مصورة ويحدد هويته ..

اليكم المداخلة في بداية البوست

Quote: اخي ناذر.. ممارسة غير أخلاقية 100% سلوك لا يمت بالانسانية .. لم اسمع أحدهم يتحدث بالدنقلاوية حتى اللسان العربي فصيح يمكن يكونوا من مواليد العاصمة .. لكن لا أظن أن أحد يعترف بأصله او يعطي معلومة عن نفسه هو يرتكب مثل هذا الخطأ وأحسب أنه يعرف عقابه وأنه يرتكب خطأ يمكن أن يقوده إلى الهلاك . لا أبرأ احداً ولكن أستبعد أن شخصاً يتركب جريمة ويقوم بتصويرها ويكشف عن هويته وخاصة إذا كان هذا الحدث بعد جريمة الشطة .. تحياتي .. ومودتي ..

اذا جاك حرامي في البيت بكل بساطة سلمو الشرطة وانتهى الموضوع خلي القانون ياخد مجراهو ولحد هنا الحرامي مذنب ويستحق العقاب
لكن الشايفو دا الناس بيضربو الحرامي لدرجة ممكن يموت وبالتالي اجرمو جريمة اكبر من السرقة نفسها ودا كلو من اجل اظهار قوة زائفة على انسان في حالة ضعف حتى لو كان حرامي ودا اسمو العدوان التعويضي
الناس ديل لو كان عندهم نخوة بالجد يطلعو ويطالبو بحقوقهم من الحرامية الحقيقيين

تحية طيبة للجميع

Quote: الدخول في ملكية الآخر هو إعلان حرب، يحق لصاحب الملكية أن يقتلك لو وجدك داخل ملكيته بشكل يهدد حياته وله هو وحده تقدير الخطورة.

الكلام الفوق ده هو الخلاصه

Quote: اذا جاك حرامي في البيت بكل بساطة سلمو الشرطة وانتهى الموضوع

واضح ديل ذاتهم شرطة

Quote: لقد عايرت معذبي اللص الفقير برقة الحال

عايرهم كعزابة جايز ..
فعلى مستوى الأفراد قد يوجد استثناء ..
لكن كقبيلة صعب وحتى لو فعل ..
فده كلام ساي وبلا أي تأثير يذكر .. لأنه ماواقع إطلاقاً ..
فخرطوم السجم دي ..
وعلى مدى سنين للوراء وصولاً للفترة الحالية ..
مافي قبيلتين طاروا السما ..
كراسمالية متوسطة وعلى مستوى عريض جداً ..
حتى تغيرت الكثير من مستويات الأسر المادية ومقدرتها الشرائية ..
واسهامها في سوق التجارة في البلد ..
ودخل أفرادها كأسر وجماعات مترابطة جداً على مستوى العلاقات فيما بينها ..
سوى قبيلتين الدناقلة والزغاوة ..
بعدين شنو مابدوا سرهم لي زول من بره كان صنقر ..
وعندهم ترابط إثني (مادايرين نقول عنصرية ) ..
يشهد به القاصي والدانِ
فما تتحسس ساي ياعثمان صالح ياقريبي ..
لكن كان عندكـ دفاس تاني وفي محاور أخرى ..
مع المستنير ده .. ماترفع منو أصلكـ ..
لكن حتة معايرة وما معايرة دي مابتجوز أصلاً ..
ولاوجود لها البتة ..

بعدين يأخ التركين ده زيو وين ..
والله العليبة الصغيرونة ديكـ بي 20 الف ..
لحدي ماتكمل باقي لوازم حلة الفطور ..
بتكون الشغلة سرحت ووصلت قريب الخمسين جنيه ..
أها البفطروا بي خمسين في البلد كمهم ؟..
والله إلا ناس مقرشين ...
يأخ اغلب الناس مقصنها فطور فول وفتة مابيفوتن ال 20 جنية ..
تقول لي تركين برضو ..
والله التركين ده مستعد انا شخصياً آكلو تلات وجبات فطور وغدا وعشا ..
حتى كنت في فطور رمضان القبل الفات بفطر تركين في فطور رمضان ..
يعني يمكن زي تلاتة أربعة يوم في رمضان ..
فطوري كان تركين كارب وقراصة حااارة وبصل وشطة ..
ثم أقبل ليكـ على ناس حلو مر وقنقليز ..

وأخخخخخ من التركين الني كان لحق بات في التلاجة ..
تبوخو على خفيف تاني يوم مع صحن شطة بالدكوة والبصل ..
وتبقى مارق ..

طبعا الجمعة فطور ثابت تركين ني وبصل تقيل ..
والله بمشي صلاة الجمعة وبتخير ناسنا وقرايبنا وأصلي جنبهم ..
عشان أكيد حيلقوا لي العذر من الريحة القوية ..
ده لو مالومك بعد الصلاة .. إنك ماعزمتهم معاكـ
واضعف الايمان إنك مارسلت ليهم حرف حرفين بي ساخن بارد ..
مع صحن ملاح تركين كاااارب ..




يابدر الطائف ..
خلي المستنير يحكّينا عن صاحبو زول الشاي ده ..


يامستنير حلوة حكاية تسويقكـ للشيوعية الراسمالية دي ..
يأخ إنتو برنامجكم الاشتراكي كله خستكـ ..
ولم يتبقى لكم سوى العودة للراسمالية ..
عبر التمسح والتبركـ بي أمريكا ..
والتنصل عن كل الفكر الاشتراكي اليساري ..
يعني مشروع اليسار كلو شرب موية ساقطة ..
وانبرش على بطنو ..
بعدين ده قدركـ إن تكون مصدرا للالهام الاستناري ..
وبثه عبر سودانيز ..
وقد أفلح بكري بالتعاقد معكم ..
وقروشه تب ماراحت ساي ..

وهل يأتيك الحرامي ليستسلم لك بكل بساطة ، إنهم لا يتركون مجالاً للتعاطف معهم .

وفي ظل تساهل القوانيين يتعامل الناس في عقابهم بحسب رؤيتهم ، نعم هو خروج

عن القانون أن تأخذ حقك بيدك أو تعاقب كيف ما تشاء ، ولكن الكثير من أفراد

مجتمعنا تضرروا من جرائهم التي وصلت لحد القتل لمن يواجههم ، فأحد أجدادي

في نهايات الثمنينات ، وعند إستيقاظه في وقت متأخر من الليل دخل لقضاء حاجته

في الحمام وعند خروج كان هناك لص على الجدار ، لم ينتبه رحمه الله فإذا بذاك

الجبان يباغته بحجم كبير من السور محطما وجهه وكل أسنانه وفر هارباً ، كان

جدي مصاب بمرض السكري ، وتدهورت حالته وبعد فترة ليست بالقصيرة

فارقنا إلى رحمة الله ، هذه قصة من آلاف القصص ومعاناة الناس مع الحرامية

إستيلاء على الممتلكات وقتل وزهق للأرواح ، وإن كانت الحكومات تضربهم

بيد من حديد ، لا أعتقد أن الشعب كان سيمثل بهم ، ويبدو أنهم يطبقون قول

العين بالعين والسن بالسن والبادي أظلم ، ويتحملون ما يجري لهم .

التعميم لا يقبله عاقل
ونحن لا نتعاطف مع اللصوص
ولكن ليس اللصوص هم فقط الاشرار فهناك اشرار أكبر منهم ومجرمين أكبر جرماً منهم
أمثال هؤلاء اللئام الذين تعاملوا مع هذا اللص بهذه الطريقة
قمة الجبن والندالة عشرة رجال مكتفين واحد وشايلين ليهو عصي
أصلو هو أسد؟!
وهذه الأفكار الحمقى في تجاوز القانون والسلطات الرسمية
هو ما ولد داعش وقبلها تنظيم القاعدة الضالين الخبيثين وجعل وجعلت هذه المفاهيم المسلمون مسلمون بلا اسلام أو مسلمون منزوعي الأخلاق
ما يعلمه عباد الفئران والبقر من الأخلاق يجهله كثير من المسلمين للأسف وربما تجد بعضهم أئمة مساجد.

بالتاكيد ما قاموا به هولاء وغيرهم مرفوض ومدان ويجافي كل القيم الانسانية
ولا يمكن قراءة هذا بمعزل عن التدهور المريع الذي اصاب البلد
وهي نتيجة طبيعة ومنطقية لربع قرن من الحكم الاسلاموي الفاسد الفاشل
ايضا لا يمكن قراءة تصرف هولاء واصحاب الشطة بمعزل عن العنصرية التي ازكى
وتزكي نارها السلطة غير مبالية باثرها المدمر واهمة انها تزيد من عمرها
الشطة والتلذذ بالتعذيب والسادية المفرضة سمة من سمات الانقاذ كيف وهي التي بدات ببيوت الاشباح
ودق المسامير في الجمجمة وحشر السيخ في الدبر
ذات الممارسات والصفات تنتقل لجيل تربي على الحروب والكراهية والقبيلة والجهوية لذلك تجد حتى
الذي يستول بالسيارات الفارهة في شوراع العاصمة
يعرف نفسه بانه ابن عرب
من الواضح ان العودة الى مربع ما قبل 29 يونيو 1989م سوف يكون مكلفا جدا

نرجع لاخونا او المسنتير ابوبكر محمد احمد عباس
حقيقة لابد منها
الرجل لا يمت للعنصرية بصلة وليس من العنصرين لا الجدد ولا القدامي
يساري جديد - قديم ما عندي علم
الدكتور عاش مع الدناقلة في دنقلا وقرى دنقلا ومن الرعيل الاول الذين افتتحو جامعة دنقلا
يجهل هذا المستنير قيمة التركينغ ولذلك يبخس من قيمة التركينغ
لا يعلم المستينر ابوبكر ان هذا الحرامي عاثر الحظ لم يتسلل للدناقلة الا للظفر بصفيحة تركيينغ
التحية للدكتور المسنتيبر وانا شخصيا يا دكتور رغم اني مشغول جدا جدا وكل يوم في مطار
لكن لا افوت لك مداخلة واجزم كثيرين مثلي لذلك لا استغرب ان يدفع لك بكري ابوبكري
فواصل يا مستنير في بث نور ونار الاستنارة في شعب كنت يوما منهم ولم يبخل عليك بشي
تكفل بتعليمك حتى اصبحت ما انت فيه اليوم

Quote: الدكتور عاش مع الدناقلة في دنقلا وقرى دنقلا ومن الرعيل الاول الذين افتتحو جامعة دنقلا يجهل هذا المستنير قيمة التركينغ ولذلك يبخس من قيمة التركينغ لا يعلم المستينر ابوبكر ان هذا الحرامي عاثر الحظ لم يتسلل للدناقلة الا للظفر بصفيحة تركيينغ التحية للدكتور المسنتيبر وانا شخصيا يا دكتور رغم اني مشغول جدا جدا وكل يوم في مطار لكن لا افوت لك مداخلة واجزم كثيرين مثلي لذلك لا استغر

شكراً علاء على هذا التعريف الرائع .. نشكرك كثير ..
وأنت في حدقات العيون يا دكتور .. ياسلام ..
تحياتي من القلب .. وأنت من وضعوا أساس تلك الجامعة الشامخة .. وأكيد علاء كمان ..
لكن يا دكتور ما دام عشت معانا لازم النطق يكون صحيح ( تركينج ) مش ( تركينيغ )


تحياتي ومودتي علاء وشكراً كثير ..

علاء الدين دهين سيرا
وعثمان دهين ملي

يا علي عبد الوهاب، أعتقد انو الحرف الأخير من فسيخكم اللذيذ ليس غيناً ولا جيم
لكنو حرف بينم الاتنين

Quote: وعثمان دهين ملي

حبيبنا أبوبكر ..

بعد السير حتى البرقيق حدود كرمة البلد بالشرق ..
اللكنة مختلفة شوية ..
دهين ... ينطق ( دسين ) بدل هاء (سين)
ملي .. مقابله ( أوسو )

يعني عندنا شمال دنقلا ( عثمان دسين أوسو )

يا أخي انت زول بتعرف أندادي كويس ..
الجمل التي أوردتها صحيحة بكل مكوناتها ..

التحية لصاحب البوست .. وعذراً لهذه الاستراحة .. وجميل أن نعرف شخص بمقام الدكتور


معليش مليون تحية لصاحب البوست .. عشان الدناقله في البوست ده صورتهم ما كويسة
ما تخافوا .. يا أخي نحن ناس مساكين .. من بعد معركة الحدق
تاني ما رفعنا سلاح ..

تحياتي .. ومدوتي

يا أخوانا، ناذر دا زول كريم وواسع
دخلنا عملنا شكلتنا وطلعنا وما سلمنا عليهو ولا طايبناهو؟؟
وما قال لينا أي شيء ولا اتماسخ علينا
سلام يا فنان

في عام 2010 بنت شقيقتي ذات الخمسة سنوات كادت لولا لطف الله ان تلقا حتفها علي يد حرامية امراءة ورجل
داخل منزلنا وهي قادمة من هولندا لزواج شقيقي . بينما الناس منشغلون بحفل سوط نهارية ومع زحمة الناس
إقتادت اللصه بمعاونة رجل بنت شقيقتي للطابق العلوي حيث شقة شقيقي وجردتها من اسورة ذهبية بيدها وعندما
همت بخلع السلسل ورفضت الطفلة لم تجد المراءة اي وسيلة آخري غير أن تخنقها ولولا دخول شقيقي بالصدفه
الي شقتة وراي المنظر لكانت الطفله في عداد الموتي . يلا اصحاب القلوب الرقيقة وبتاعين المثاليات تعالو خبروني
لولا دخول شقيقي بالصدمة ماذا كان سيجري وماذا كان ينفعنا ؟ لا أتعاطف مع أي حرامي دخل الي منزل الغير لانو
اصلا مافي قانون رادع يخليهم يرعو . يموت ذاك بالششطة ويغسل هذا الملابس والثالث ينتكي وينضبح كالشاة حيخاف
بقية الحرامية .

واحد عذابي بينام في حوش بيتو وجارو متزوج والجار المتزوج لايحلو له ممارستة حقه الشرعي مع زوجته الا تحت
الحيطة الفاصله بينه وبين جارو العزابي والعازابي كلو يوم يسمع في اصواتهم والنوم يغلبو . أها يوم كدة بينما العزابي
بيتقلب يشوف ليك حرامي فوق الحيطة ماكضب مسك الحرامي نزلو وقلع ليهو ملابسو وبقا يغتصب فيهو والحرامي
يكورك . الجار المتزوج علي صوت كواريك الحرامي مد راسو بالحيطة وشاف المنظر وقال لجارو يازول انت مجنون أحميتنا النوم
العزابي رفع راسو وقال لي جارو مالك ومالي ما أنت كل يوم كوراكم واصلني لحدي هنا وقدر مادخلت راسي تحت المخدة
وبرضو سامعكم . جارو قال ليهو يامخبول دي زوجتي وانا حر فيها . العزابي شغال في شغلو قال ليهو وانا دا زاتو حراميا
وحر فوقو .


أي حرامي يدخل في منزل ناس يتحمل عواقب ذلك ولا بكايا عليه .


ناذر خليفة سلام وتحايا

تصوير مثل هذه الفيديوهات ونشرها سيكون أحد أدوات تمزيق ما تبقى من نسيج اجتماعي وتعايش قبلي
وفيديو وراء آخر سيقود إلى يوم أسود من يوم مجيء هذا النظام الحقير لحكم السودان

هذا المجتمع ينحدر يوميا إلى درجة أحط في سلم الأخلاق الإنسانية
أدين هذا العمل وما شابهه بكل ما أوتيت من أخلاق
اللهم لا تؤاخذنا بما يفعل السفهاء منا

السيد ابوبكر عباس اليساري المؤيد للسخرة جزاء للسارقين ،

لك ان تعلم ان لود القوز عندي تقدير فهو من أصحاب الرأي في هذا المكان. يستميت دفاعا عن ذلك ولايختبيء وراء رأي غيره من الناس.
كن مثله واكتب رأيك بوضوح في الفديو المعروض هنا، وفي ماجرى للص الآخر الذي لقي حتفه من جراء التعذيب.

ياجماعة الخير. الزول الفقير المقهوم المجبور على السخرة في الفديو دا لايتحمل المسؤلية الا عن أفعاله هو لا غير.

المستنير المتظارف أبوبكر عباس،

لايخفي عليك انو كلامي الأخير الموجه ليك هو قفلة بالضفة والمفتاح
. فاذا تمسكت بعبارتك التي مستهلها " الدخول في ملكية الاخر هو
اعلان حرب" ، وخاتمتها "وله وحده تقدير الخطورة " كان ذلك ووبا ، واذا بلعت العبارة اياها بلاماء كان ذلك ووبين. فاختر بين الووب والوبين فكلاهما مر ولاجدوى الان من دروس تعليم اللغة النوبية في الزمن الضائع لتقليل الخسائر. وبالله التوفيق.

احي الدناقلة ديل والله
اسياد بلد جاي إنت يا الفالح تسرقهم
كان يغسلوا بيهو حق الجيران كمان شنو شابكننا فقر وجوع وبطيخ دا مبرر مثلا يخليك تسرق ولا شنو ياخ ما تموت من الجوع والله الحرامي دا يستاهل اكتر من كدا والسبب المكتر الحرامية ديل في البلد دي ياهو التساهل معاهم ماف اي قانون بحاسبهم ولا في اي نظام بسألهم يبقى انا احمي بيتي كيف يعني اقوم اجري اوديهو القسم مش!!؟بفكوه بكرة تاني بجيني يتلب لكن لو إنت اديتو علقة من امها مظبوووطة كدا ولا حشرت ليهو الشطة في عيونو بتأدب تاني كان قالوا ليهو اسرق ما بسرق
هسي في الجريف عرب الجرافة ديل اي حرامي يجيهم قالوا بختو جوا شوال ويدو البحر هسي بيوتهم مفتحة للصباح ماف ضيف ذاتو بجيهم بعد العشاء
كل ما كانت العقوبة رادعة يبقى ليه عظة وعبرة وتاني ما بسرق حتي في الشرع حد السرقة قطع اليد لو كانت مطبقة ما كا سمعنا بحرامي

وو سوركتي اننقا،
بالله من بجيد اوسكا كسمي.

طبعا أنا لمان تسألني لازم أجاوب (دافعين لي)، موش زيك عثمان أول ما أسألك سؤال زي "الشطة" طوالي تقول لي: جوازك، يساريتك، سخائم!!
الإجابة يا سيد عثمان:

من باب دعاء الحيران الوحلان
----------------------------

يامالك الملك هذا أمري بين يديك وكربي وحيرتي لايخفيان عليك ، وهذا تظارفي المفتعل قد ذهب سدى ، وتقشّبي كنار القصب ماأغني عنّي شيئاً ، وبانت للقصيّ والداني عيوب استنارتي أنا الّذي عمّدت نفسي بنفسي مستنيراً بين أبناء قومي السابقين الغارقين في الظلام.هذا طرفي من جنسية تجمعني بهم.

بالضبة والمفتاح., كدا ووب، وكدا ووبين فزوّدني بالحيلة الماكرة يا أرحم الراحمين.

طيب نبدأ من جديد، أسأل سوالك بشكل مباشر وبجاوبك.

سؤال مباشر من غير لولوة، أنا جني وجن الشيوعيين البرتدوا وبتشعبطوا في الثقافة الإسلامية ديل!
قول سؤالك بشكل مباشر ما تجيب لي فيهو سخائم وعزائم واحد اتنين تلاتة

السيد ابوبكر المستنير المتظارف،
لست بالغارق هنا لاتعلق بقشة الدين . انما اسخر الدعاء شنكلا تتدلى منه يساريتك المزعومة لترى (التاء مضمومة والراء مفتوحة ).

طيب برد ليك على السؤال القديم ما دام ما داير تبطل لولوة:
النط في البيوت بغرض السرقة بالليل والناس نيام بعتبرو مهدد أمني خطير للحياة، وأدعم أن تتبنى الدولة قانون يجيز للمقيم بالبيت قتل من يقتحم عليه بيته، وأن لا يحبس القاتل اثناء التحقيق والمحاكمة والاكتفاء بضمان مكان الاقامة.
يعني وإتّا نائم حسيت انو في زول في بيتك ممكن تلبت ليهو تضربو في مكان قاتل.

لكن إذا قبضتو وانتهى الخطر فعليك تسليمه للشرطة

واحد في دنقلا شهر واحد حسّا انو في حرامي داير ينط ليهو في البيت، مشى التلاجة طلع جك الموية من الفريزر وكسر التلجة الخفيفية الفوق ولبد للحرامي مكان الحيطة قصيرة، مع نطت الحرامي في البيت كشحو ليك بالموية الباردة في وشو
الحرامي قال ليهو: يلعن أبوك، ما عندك عكاز؟!

المستنير المتظارف أبوبكر عباس،
اطلعت على رأيك أعلاه فرايت ماتحت القبة وقهقهت مرددا : تمخض الجبل فولد فارا.

Quote: كتب Osman M Salih‏( وو سوركتي اننقا، بالله من بجيد اوسكا كسمي.

اوو عثمان آندي سرن بيكومن ار بلي/ مناااورن دي إلكين بلد سن مقسي سووتد جنقي ‏بون ولا ترقي مرتل لامون

وين تناقض ردي الأخير مع ما كتبته سابقا في هذا البوست؟

أو لست أبابكر عباس الذي كتب هذا :

عليكم الله، يجي واحد يقول لود القوز دا: إتّا والمستنير متفقين في الموضوع دا

المستنير المتناقض ابوبكر عباس،

تركت لك بعاليه خيارين احلاهما مر، وهانتذا تبتلع جملتك تلك (وتقرا موقفك ) تبتلعها بلاجرعة ماء. وتنحاز الى الموقف الاقل خسرانا.

السيد أبوبكر عباس،

انت عندي مثال ليساري متحلل يتخذ موقفه من القضايا من زاوية الربح والخسارة كالتويجر. وتتجلى هذه الذهنية في تنازلك المؤسف عن موقفك الأصلي من تعذيب السراق . لقد تنازلت عن رايك للحفاظ على صورة النجم الجماهيري وابتلعت بلاماء ماخطه كيبوردك بغير اشهار مدعيا توفر عنصر الاتساق في كل ماكتبته وهذا ادخل في باب الاستهبال. هذا والسلام.

المستنير ابوبكر عباس،

كان في داعي للشوبرة من الاساس؟. اوهو زي ما انت شايف اتشوبرت لامن الجرة الانت شايلا خرت فوق رأسك.

Quote: العجيبة الناس البتدافع عن زوار الليل .. صنفين .. لاثالث لهما ..

أخي جمال ود القوز

تحياتي

أنا غايتو ما شايف التصنيف هنا و في البوستات التانية مبني على أصطفاف الناس دفاع عن زوار الليل و ناس الحلة العذبوهم

أنا شايف الناس الظهرت في الفيديوهات ديل كلهم ضحايا ثقافة يتجذر فيها العنف.. ثقافة مجتمع ما قدر يخلق قيم يستمد منها أخلاق ترتقي بيهو درجات أعلى من الإنسانية..

الحرامي طبعاً هو ذاتو عنيف و ممكن يطعن بسكين و يكتل ناس بريئين و ممكن و ممكن .. و ناس الحلة لو قبضو الحرامي عنيفين و هاك يا شطة و يا كبع و لبع.. الحرامي كعب و ناس الحلة برضو كعبين و منو المسؤول من كعوبيتهم دي زي الجدادة من البيضة ولا البيضة من الجدادة

مكافحة الجريمة ما كلها عقوبات بس سواء عقوبات قانونية او غير قانونية.. أنجح وسائل مكافحة الجريمة بتتطلب تحقيق تصالح إجتماعي ببين الأفراد و مجتمعاتهم..

في يوم من الأيام حتتطور الإنسانية و تحقق مقدار من العدالة الإجتماعية تنتفي بيهو محفزات السرقة.. في الوقت داك الحرامي ما حيعاقبوهو لكين حيودوهو للسايكاتريست يعالجوا لأنو ما بيكون في مبرر للسرقة غير ال Kleptomania

و Kleptomania ذاتا إحتمال تنقرض

الفيديوهات دي بتوري نحن في ياتو مرحلة من تطورنا الإنساني
____
كسرة

ابو بكر عباس الإستنارة الشديدة جهرت عيونو.. فلا تؤاخذوه إذا غشيه بعض العشى

أخونا حافظ بشير ..
خلا التصنيف الإنت ماشايفه والأنا ماقلته من فراغ ..
فوجهة نظركـ حصيفة جداً ويعتد بها ..
وتضعكـ وبلا جدال في مصاف المستنيرين ..
عدالة إجتماعية تمنع السرقة في المجتمعات دي ما ظنيتها تجي ..
لأنه ده تدافع وحراكـ بشري ..
لن تبلغ فيه العدالة الإجتماعية المرجوة درجة الكمال ..
حتى تنتفي مهنة السرقة دي ..
آي مهنة والله ..
زيها وزي الشحادين والنشالين ومن لف لفهم ..
دي أنواع من البشر تتخذ الأمر مهنة ..
ومهما بلغت خسة هذه المهن ..
فهي بالنسبة لهم مهنة ومصدر دخل ..
يعني ما أظن البيحركـ الحرامي ده إنه جعان ..
وإلا فمصادر الكسب والحصول على مايقيته كثيرة ومتعددة ..
هو يريد أن يحقق طموحات ومكاسب ..
ترتقي فوق سلم الضروريات الملحة بكثير ..
وبعضهم مريض بلا شكـ ..
يعني حتى لو وفرت ليهو كل المتطلبات الأساسية ..
والعدالة الاجتماعية الهو عايزها ..
برضو حيمشي يسرق ..
لأنه حينظر للناس الأعلى منه في سلم التراتيبية في المجتمع ..
ولن يرضي بأن يكون أقل منهم ..
وده ماحيتحقق ليهم لأنه لابد من التنوع ..
بعدين القروش والغنى ماحكر على طبقة اجتماعية بعينها ..
بالعكس الغالب الاعم اتوا من قاع المجتمعات ومن ادنى سلمها الاجتماعي ..
وارتقوا بكدهم وعرقهم وصاروا قمم سوامق يشار اليها بالبنان ..
ولم يلجأوا مطلقاُ للسرقة ونهب الناس والاحتيال عليهم ..
دي انماط لن تنقرض من أي مجتمع مهما سمت قيم العدالة الاجتماعية فيه ..
لانه الناس ما كلهم واحد .. لابد من التنوع الاثني والطبقي ..
أها اخواننا الحرامية واللصوص ديل ..
أو بمعنى أصح من يدافعون عنهم .. ( لانهم هم عارفين دوافعهم جيداً ) ..
البدافعو عنهم ديل رايح ليهم الدرب ساي ..
وبيحاولوا يقولبوا المسألة وفق قوالب تخضع لمنظورهم البحت ..
وماليها أي علاقة بواقع ربما كان مخالفاً للأمر برمته ..
الشغلة اكبر من عدالة إجتماعية أو حقد طبقي ..
دي مهن لابد للمجتمع ان يحاربها ببتر شأفة من يتخذونها مصدر دخل ..
كنوع من الحفاظ على المجتمعات من الانحراف والانجراف ..
تخيل ناس بتدافع وبشراسة عن نماذج زي دي !! ..
البمنع شنو إنه المهن دي تصبح من الأمور المستباحة والمصرح بها ..
خصوصاً في ظل قانون متساهل ومايع ..
يشجع على مضي الناس قدماً في تقنين المهن دي بطرق مستترة ..
اريت الناس البتدافع على رأيها المثالي ده ..
تركز على كلامها ورأيها كان خاضت تجربة الحرامي ..
البيعتدي على الاعراض ويقتل الناس جوه البيوت ..
دون أن يرف له جفن ..
أها النشوف بعد داكـ وجهة نظرهم حتتغير ولاّ لا ..
بعدين يأخ حتة يودوا الحرامي للبوليس دي ماجايبها حقها ..
وأنا بشوفها نوع من الهروب والمراوغة ..
لأنه الحرامي لمن تقبضو وتعصر عليهم بيقعد يكورك يااااابوليس ..
يعني هو عاارف خلاصو في البوليس ..
الاكيد حيفك الحرامي أو حيديهو حكم غير رادع ..
طيب وكتين هو داير قانون البوليس الخلاهو يفارقو شنو ؟ ..
ومنو البيتحمل مسؤلية قراره ده .. هو أم المجتمع ..
الحرامي يتردع لامن يعرف حاجة ...
عشان المجتمعات تمشي لي قدام ..
ولاتكون رهن لقانون ومشيئة حثالاتها ورجرتها ..
ولاّ شنو ..

ـــــــــــــــــــــــــــــــــــــــــــــــــــــــــــــــــــــــــ

المستنير يعبر عن مراحل متقدمة لم نبلغها بعد ..
والانسان العادي لقصر نظره .. عدو مايجهل ..
فأكيد نلتمس لعرابيّ الاستنارة ألف عذر ..
فهم نبراس المجتمعات المستقبلية المنشودة ..
هسه البيمنعنا نضيفكـ إنت حافظ بشير ده ..
لي قوائم الاستنارة شنو ؟!! ..

أول مرّة يا عثمان تقول ليك كلام صاح
مداخلتي بتاعة اتفاقي مع ود القوز بتخلي كلامي فيهو تناقض.

قصرت معاك
يلا أمشي مني كدا ولّ كدا، خلينا نتحاور مع المثقف الكبير حافظ

امام الاستنارة ابوبكر عباس،

انا هين. تراني مشيت. المشكلة في تأثير هذه الشكمة الضرورية على حماس جمهورك.

طيب الدناقله ديل ما الشرك شالهم يا جماعه

هذا المقطع يوضح جليا ما وصلنا له من تردي مريع في الاخلاق ... الاخلاق بمعناه الشامل .
ثانيا ..كل ال في مقطع - العزابة - من ( جيل الانقاذ ) اذا جازت التسمية يعني قامو لقو قريبو
ول جارو ول صاحبو في الامن والطريقة الاتبعوها نفس طريقة جهاز الامن القذر ..فبالتالي
بنديهم العذر لانو دي الثقافة العامة منذ مجي الانقاذ .. اعادة صياغة الانسان السوداني وفعلا
اعادونا للعصر الجاهلي ... وصلنا مرحلة اللا عودة .

Quote: ولا أصدق أن أحداً يرتكب جريمة مصورة ويحدد هويته ..

الفيديو صحيح مية بالمية والشباب ديل دناقلا وساكنين في البلد وطلاب في الجامعات بالخرطوم

التحية ل صاحب البوست ناذر وضيوفه

تحياتي لك أستاذ ناذر...
في رأيي الفيديو عادي جدا ولا غبار عليه...بالعكس العزابة كانو ظريفين مع الحرامي كونو يخلوه بس يغسل ليهم!!!!
بالجد ناس المثاليات الزايدة ديل حاجة غريبة جدا جدا....حرامي ومجرم ويمكن يكون مسلح وانتهك حرمة البيت وعمل ترويع لناس
البيت ويقولو ليك ده زول مسكين كان تدوهو أكل ويمشي!!!
ديل مستهبلين ساي....لو جاهم حرامي كان حيضربوه لمن يقول بس!!!
علينا وضع الأمور في نصابها...ولكل مقام مقال...
أي حرامي في الدنيا يستاهل علقة تمام...لأنه حرامي و مجرم انتهك حرمة بيت....
لو كان مسكين و جعان و داير ياكل يجي يدق الباب عديل بكل أدب....