شركة زين للهاتف السيار .. شكرا ليكم ..!

07:28 AM Nov, 23 2015

سودانيز اون لاين
ناذر محمد الخليفة-www.nazirkhalifa.com
مكتبتى
رابط مختصر

أمتلك شريحة شركة زين منذ العام 2001 وحتى الأن .. افادتني كثيرا في التواصل في مجال العمل والاصدقاء والعائلة .. وطوال هذه الفترة الطويلة التي قاربت الاربعة عشر عاما واظبت على استخدامها واصبح رقم الشريحة
معروفا للكل .. وحتى بعد دخول شركات اخرى منافسة لم اسع لامتلاك شريحة رئيسية بخلاف الشريحة التي استخدمها وان كنت في بعض الفترات استخدمت شرائح شركات اخريات لاغراض محدودة واحيانا للفصل بين ما
هو خاص وما هو عام .. او للاستفادة من بعض الخدمات التي تقدمها الشركات المنافسة ..

ولكن ....

جيب من الاخر
يا ناذر
والنهاية المحزنة

أجد نفسي مضطرا للانتقال الى شركة اخرى ومحتفظا بذات رقمي القديم مستفيدا من قرار الهيئة القومية للاتصالات التي سمحت لكل مستخدمي الهاتف السيار بان يختارو الشركة التي يريدون
الانتقال اليها دون اي تغيير في رقمهم القديم .. وحقيقة لم اكن اريد الانتقال الى شركة اخرى ولكن سوء الخدمات التي تقدمها شركة زين والاشكاليات التي تعاني منها في الشبكة ورداءة الخدمة بصورة
عامة وعدم التطور ومواكبة تقنيات الاتصال في العالم جعلني اتخذ هذا القرار والذي ساشرع في تنفيذه عندما اجد الوقت والزمن المناسبين ...


شركة زين .. شكرا ليكم ...

والشكر موصول للهيئة القومية للاتصالات اذ جعلت ذلك ممكنا ..

سلام ابو سن ..

Quote: جيب من الاخر يا ناذر والنهاية المحزنة

نعم .. هي النهاية المحزنة بلا شك .. أنا زول ولوف جدا وحزين للتخلي عن شركة زين بعد هذه المدة الطويلة ولكن ما باليد حيلة ..
في بلاد أخرى يا عبد الحفيظ تستطع ادارة شئون حياتك بالكامل بواسطة خدمات الهاتف النقال من حجوزات طائرات وفنادق وتسديد فواتير واستلام حوالات ومعرفة نتائج المباريات
وخدمات كثيرة لا تحصى ولا تعد .. ولكن زين بخلت علينا ولم تترك لنا مجالا للاستفادة من ميزات كثيرة في الهواتف الذكية ..رغم الغلاء المبالغ فيه في التعرفة ..

ما خلت فرقة لي زول يقعد معاها


http://sudaneseonline.com/board/480/msg/هل-تستعيد-zain-بالقطع-ما-خسرته-بسؤ-شبكتها-1448101964.html

زين عالم قبيح ...

يا ناذر هسة رقمك ده تاني لو اتصلت فيهو حا يرد لي زول غيرك يعني ؟؟؟ معقول بعد 14 سنة يرد لي زول غيرك والله انا زاتي ولوف وحا اتصل واتكلم كانو صحاب الرقم انت والله صحي !! وهل ممكن تحتفظ برقمك وانت تابع لشركة غير زين ؟؟
غايتو يا ناذر الزول البيستلم الرقم بعدك ده حا يعزبوه بكثرة الاتصال ويبقو لي في رقبتو دي غايتو الله يعينو من البعامات وغيرهم .....( وش ضااحك )
على العموم تقبل سلامي واحترامي والجاتك في رقمك سامحتك

تحياتي : ياسر العيلفون ....

يا ياسر حايرد عليك الباشمهندس نفسو
بس ماحاتسمع:

ترررم تر تم

Quote: يا ناذر هسة رقمك ده تاني لو اتصلت فيهو حا يرد لي زول غيرك يعني ؟؟؟ غايتو يا ناذر الزول البيستلم الرقم بعدك ده حا يعزبوه بكثرة الاتصال ويبقو لي في رقبتو دي تحياتي : ياسر العيلفون ....

Quote: أجد نفسي مضطرا للانتقال الى شركة اخرى ومحتفظا بذات رقمي القديم مستفيدا من قرار الهيئة القومية للاتصالات التي سمحت لكل مستخدمي الهاتف السيار بان يختارو الشركة التي يريدون شركة زين .. شكرا ليكم ... والشكر موصول للهيئة القومية للاتصالات اذ جعلت ذلك ممكنا ..

شكرا الاخ اسامه الامام ... ما قصرت تب ,,, نحن الواحد بيقرا ويكون مشغول مع شغل المكتب وربك يعين العتب على النظر ...


تحياتي : ياسر العيلفون ....

يا سر يا فنان ...

Quote: يا ناذر هسة رقمك ده تاني لو اتصلت فيهو حا يرد لي زول غيرك يعني ؟؟؟ معقول بعد 14 سنة يرد لي زول غيرك والله انا زاتي ولوف وحا اتصل واتكلم كانو صحاب الرقم انت والله صحي !! وهل ممكن تحتفظ برقمك وانت تابع لشركة غير زين ؟؟ غايتو يا ناذر الزول البيستلم الرقم بعدك ده حا يعزبوه بكثرة الاتصال ويبقو لي في رقبتو دي غايتو الله يعينو من البعامات وغيرهم .....( وش ضااحك ) على العموم تقبل سلامي واحترامي والجاتك في رقمك سامحتك

ههههههههههه كويس انو اسامة الامام لحقك ...

كل الحكاية انتقال من مزود خدمة لمزود خدمة تاني لكن بنفس الرقم دون اي تغيير .. بس التبعية والفواتير وكل الخدمات حا تنتقل للمزود الجديد ..


شكرا ود الشيخ ..

.
.
.
سلام استاذ ناذر مع امنياتي لك بالتوفيق

افكر منذ شهر في ان انفذ انتقالي برقمي من شركة زين ل ام تي ان
وانتظر مواعيد الانتقال التي اعلنتها الاتصالات السودانيه والزمت بها
شركات الهاتف السيار في السودان.

ولكن لي تجربه لنفس هذه العمليه ولكنها كانت في بلد آخر سأحكي لكم
ما قابلتني من سلبيات

كنت في السعوديه ورقمي كان علي شركة الاتصالات السعوديه ( الجوال )
فضلت في العام ٢٠٠٧ م ان انتقل ل شركة موبايلي برقمي عندما سمحوا
وقتها بالانتقال من شركه لأخري
انجزت عملية الانتقال والتي تمت خلال ٢٤ ساعه فقط وبدأت مع الشركه الجديده
موبايلي حتي العام ٢٠١٤
المشاكل التي واجهتها كانت عند الاتصال بي من اي تلفون سوي ان كان ارضي ام هوائي
محلي او دولي
المتصل كان يجد فترة صمت في حدود ال ١٠ ثواني بعدها يبدأ جرس التلفون في الرنين
فكان اغلب المتصلين يغلقون الخط قبل ان يرتبط الاتصال واقابلهم لاحقا ويذكروا لي انهم اتصلوا
وكان هاتفي مغلق .

ذهبت لشركة موبايلي اكثر من مره ورفعت الكثير من الشكاوي بهذا الخصوص وتعبت ولم اجد الرد
الشافي والوافي لي الا بعد مرور اكثر من سنتين وكان الرد الفني في مشكلتي يتلخص في الآتي :-

ان رقمي أنشأ ضمن منظومة وقاعدة بيانات شركة الجوال السعودي وانا قمت بنقله ل شركة موبايلي

فالذي يحدث عند الاتصال بي انه يذهب اولاً ل الشركه الأم وبعد ذلك يتم التحويل ل الشركه الجديده
لذا هنالك فترة صمت وتأخير مدتها ١٠ ثواني تقريبا مما تجعل المتصل يظن انه الهاتف اما مغلق او خارج
الشبكه.

عموما انا في انتظارك ولو لم تكن هنالك مشكله مثل هذه او غيرها فسأقول ل زين وداعا ايضاً.

تحياتي وتقديري
.
.
.
.
.
.

زين يا ناذر برغم السوء بتاعا دا افضل من سوداني وام تي ان (حتشوف الكلام دا لما تمشي بي غادي) ، بس حركة زي دي كويسة لانو بتجرد زين من ميزة الأرقام القاموا لقوها دي عشان يحسنو اكتر....

يا ناذر التحايا والاحترام وضيوفك الاكارم


سوْال مهم جدا لو تكرمت
ماهي شروط الانتقال
وهل مسموح لي التنقل لأكثر من شركة
وهل من الممكن الرجوع للشركة الأصل لو لقيت الحكاية بائظة
ام الامر محكوم بشروط ومدد وفترات معينة


الله يلعن زين محل ما تقبل كرهتنا حياتنا 15 سنة تسرق وتبهدل فيني

سلام بشير ..

Quote: المشاكل التي واجهتها كانت عند الاتصال بي من اي تلفون سوي ان كان ارضي ام هوائي محلي او دولي المتصل كان يجد فترة صمت في حدود ال ١٠ ثواني بعدها يبدأ جرس التلفون في الرنين فكان اغلب المتصلين يغلقون الخط قبل ان يرتبط الاتصال واقابلهم لاحقا ويذكروا لي انهم اتصلوا وكان هاتفي مغلق .

والله دي مشكلة حقيقية لو ثبت انها حا تواجه المستخدمين هنا برضو ..

أنا حاليا اكتر شي يضايقني عند الاتصال بشركة زين الدعاية والاعلان الممل البتسمعو قبل الاتصال مع الطرف الاخر ..

اما سكتة عشرة ثواني كاملة .. فعلا مزعجة وطاردة للمتصلين ...

حا اتأكد من الموضوع دا من المجربين وافيدك ...

تسلم

سلام محمد الحاج ...

Quote: زين يا ناذر برغم السوء بتاعا دا افضل من سوداني وام تي ان (حتشوف الكلام دا لما تمشي بي غادي) ، بس حركة زي دي كويسة لانو بتجرد زين من ميزة الأرقام القاموا لقوها دي عشان يحسنو اكتر....

طبعا اكيد بالنسبة للمتعاملين مع الشركات قد يلقو مزايا عند المزود البيتعاملو معاهو افضل من شركات تانية ودي بحسب تعاملك مع
الخدمات المختلفة البيقدما مزود الخدمة ...

واتمنى انو زين تحسب حساباتا وتشوف ليه الناس بتشكي من خدماتا ... ارجع في المنبر كم صفحة لي ورا وشوف عدد البوستات البتشتكي من خدمة زين

ودا هنا في المنبر بس ما استطلاع راي شامل او مكتمل ..


تسلم ..

سلام اسامة ...

Quote: سوْال مهم جدا لو تكرمت ماهي شروط الانتقال وهل مسموح لي التنقل لأكثر من شركة وهل من الممكن الرجوع للشركة الأصل لو لقيت الحكاية بائظة ام الامر محكوم بشروط ومدد وفترات معينة الله يلعن زين محل ما تقبل كرهتنا حياتنا 15 سنة تسرق وتبهدل فيني

حقيقة لا علم لي بالتفاصيل ..

ساذودك بها عند استعلامي من مقر الشركة البديلة ان شاء الله ..

الاخ الحبيب جداُ ناذر
انا عندي تجربة مع زين علي ضوءها تخليت عن خط الاعمال الخاص بي منذ اكثر اربعة سنوات
والان استخدم اريبا خط برستيج وسوداني خط واخري سوداني بري بيد
ولا علم لي بالقيود التي تتحدثون عنها للتنقل من مستخدم لمستخدم علماً بأن الشرايح مسجلة جميعها في اسمي
وعنواني .... لذ ا عقدت لساني الدهشة عندما قرأت تساؤلاتكم عن شروط الانتقال من مشغل لآخر والسماح بذلك
وهذا ما نسمعه في الدول الاخري فقط ونستغرب له
الاخ ناذر الخليفة اذا للم تكن قد اتخذت قراراً فانصحك بي إم تي إن خط وسوداني بري بييد
:
:
:
:
:
مع التحيات لله الزاكيات

سلام نصر الدين طاهر ...

Quote: ابو النيز مرحب بيك فى ام تى ان بنظبطك

يا حبيبنا مشكور على الاهتمام والدعوة ... اها زي اهتمامك دا هو البيعني حرص الشركات على كسب الجمهور .. انا متأكد البوست دا وصل ناس زين ولي كل المسئولين هناك .. لكن اي زول بيقرأ فيهم
لسان حالو من اصغر مسئول لي اكبر واحد بيقول ... خليهو يشتت .. هو قايل روحو منو ؟! في عشرة مليون غيرو قاعدين ... يعني شنو لو شتت واحد !!

دا الفهم العندهم للاسف لانو دا ما اول بوست ولا اخر بوست عن انتقاد زين في الموقع دا ... وهم ما بيراجعوا اثر البوستات الزي دي في خلق راي عام موحد او شبه موحد ...



ومشكور حبيبنا على الدعوة الكريمة والشكر لكل طاقم ام تي ان من خلفك وامامك ..

سلام محمد حمزة ...

Quote: لذ ا عقدت لساني الدهشة عندما قرأت تساؤلاتكم عن شروط الانتقال من مشغل لآخر والسماح بذلك وهذا ما نسمعه في الدول الاخري فقط ونستغرب له

الحكاية دي ليها تقريبا اسبوع بس بعد ما اكتملت كل التجهيزات الفنية لبدء عملية الانتقال بين الشبكات ..

غايتو يا ناذر أنصحك بدراسة الأمر جيداً قبل الإقدام على هيك خطوة ..
حسب خبرتي البسيطة مع شبكات الإتصالات أعتقد أنها تتوقف على المنطقة التي أنت موجود فيها ..
مثلاً :
أنا أملك خطين واحد زين والثاني سوداني
في مكان عملي بالخرطوم أجد صعوبة كبيرة فى التعامل مع الخطين وبالأخص زين فلا تقرأ أبدا الــ 3G وأفضل السوداني فى الإنترنيت وزين فى المكالمات الصوتية
أما فى مكان سكني ببحري فأجد صعوبة ومشقة كبيرة فى التعامل مع خط سوداني وأفضل خط زين فى الإنترنيت ..
الكلام ده ليهو سنين !!!!

يعني يا ناذر بالواضح كده ..
في مناطق شركة زين فيها شغالة زي الورد ..
وكذلك فى مناطق أخرى شركة سوداني شغالة فيها مية مية ..
وبسؤالي ..
عرفت إنو الشغلانة دي بتتوقف على عدد المستخدين للمخدم فى المنطقة من نفس الشركة وبالذات فى الداتا !!
والله أعلم .

شروط الانتقال لشركة اخرى يا ناذر :
ان تكون الشريحة نشطة وشغالة لمدة 3 شهور سابقة على الاقل
وتدفع 10 جنيهات رسوم انتقال (بالنسبة للدفع المقدم) واكتر شوية للخطوط
وتحضر اثبات شخصية
وتنتظر تقريبا 24 ساعة
- طبعا كل الخطوات السابقة بتقوم بيها في مكاتب الشركة اللي عايز ترحل ليها
لكن :
بتعرف احمد وحاج احمد ؟ دي ياها شركات الاتصالات السودانية
يعني اي شركة بتتفوق على التانية في السوء والبشاعة وقلة احترام المشتركين
مثلا شركة زين :
قبل فترة ، قاموا - عمدا - بايقاف خاصية رسالة التنبيه عند انتهاء اشتراك الانترنت بما يعني انو حيخصمو رصيدك كلو اذا انتهى اشتراكك ونسيت تفصل الانترنت
انا شخصيا اتصلت وسألت من الحاصل دا ، قالو لي دا عطل في الشبكة وحيتصلح
طبعا مرت شهور وما اتصلح ، واكتشفت انو الحركة دي مقصودة - لسرقة ارصدة المشتركين عن طريق الاستهبال عليهم -
اما شركة سوداني :
اكتشفت انو انا مشترك في خدمة بتاعت رسايل نصية بتخصم من الرصيد ، بدون ما اشترك فيها
اتصلت عليهم، قعدو يغالطو فيني انو انا اشتركت.
قلت ليهم انا متأكد انو ما ممكن اشترك في خدمة زي دي اصلا، ( عن الطبيخ والمكياج وشنو ما عارف) وتلفوني مابستخدمو زول غيري ، سالتهم من طريقة الاشتراك، قالو ترسل رسالة لرقم معين ، قلت ليهم طيب هل عندكم في سجلاتكم ما يفيد اني ارسلت رسالة اشتراك في التاريخ المحدد؟ فبهت الذي كفر
واكتشفت انها برضو حركة القصد منها سرقة رصيد المشترك.
اما ناس ام تي ان ، فديل ناس كلامهم كتير ، بفترضو الغباء في مشتركينهم ، كل دقيقة يرسلو رسايل تذكير وتنبيه بالخدمات ، يعني مسألة مزعجة جدا جدا

في الفترة الاخيرة كل الشركات بقى عندها مشاكل في الشبكة ، بقى الاتصال العادي دا ما بيتم الا بعد خراج روح.
--

الكلام دا كلو كوم ، وخدمات الانترنت بتاعت الشركات دي كوم براهو
هل تعلم انو الان خدمة الجيل التالت ، اللى الناس اتجاوزوها زماااان ، ما موجودة الا في مناطق محددة بالعاصمة؟ يعني باقي السودان شغالين تو جي بتاع العصر الحجري داك.
غايتو الخدمة بتاعت الانترنت البتقدمها الشركات كلها ، تشيلها تختها في شوال خيش ، وتكب فيها جردل بنزين، وتقول بسم الله ، وتولع فيها
منتهى الاستهبال والغش والتفاهة وعدم الاحترام.

نصيحة يا ناذذر ، ما تحول لشركة تانية ، لكن اسعى ليك اكتر من شريحة ، واشتغل بالمتاح حسب التساهيل.

يا عم ناذر

أهم شئ بس ما تجهجهنــا

وما تجهــجــه الجكــس

Quote: وتدفع 10 جنيهات رسوم انتقال (بالنسبة للدفع المقدم) واكتر شوية للخطوط وتحضر اثبات شخصية وتنتظر تقريبا 24 ساعة

انا حولت من stc لموبايلي مجاناً واتفعل طوالي - الشركة الجديدة مستفيدة عشان كده الداعي شنو للعشرة جنيه؟!!

سلام ابو دية ..

Quote: غايتو يا ناذر أنصحك بدراسة الأمر جيداً قبل الإقدام على هيك خطوة .. حسب خبرتي البسيطة مع شبكات الإتصالات أعتقد أنها تتوقف على المنطقة التي أنت موجود فيها .. مثلاً : أنا أملك خطين واحد زين والثاني سوداني في مكان عملي بالخرطوم أجد صعوبة كبيرة فى التعامل مع الخطين وبالأخص زين فلا تقرأ أبدا الــ 3G وأفضل السوداني فى الإنترنيت وزين فى المكالمات الصوتية أما فى مكان سكني ببحري فأجد صعوبة ومشقة كبيرة فى التعامل مع خط سوداني وأفضل خط زين فى الإنترنيت .. الكلام ده ليهو سنين !!!!

تفاوت المناطق التي تعمل بها الشبكات تظل هي العقبة والاشكالية التي تعترض مشروع الانتقال داخل الشبكات بذات الرقم ..
اعتقد أن على الهيئة القومية للاتصالات اجبار جميع الشبكات بتحسين بث شبكتهم وتوسيع نطاقات التغطية ...

Quote: وبسؤالي .. عرفت إنو الشغلانة دي بتتوقف على عدد المستخدين للمخدم فى المنطقة من نفس الشركة وبالذات فى الداتا !! والله أعلم .

اكيد لها علاقة بعدد المستخدمين ويلحظ هذا التفاوت في استخدام البيانات وشبكة الانترنت .. اذ تلاحظ في اوقات معينة ان الشبكة قوية وسريعة
بينما في اوقات الذروة والعمل ان الشبكة بطيئة جدا ..


تسلم ...

سلام وائل ..

Quote: شروط الانتقال لشركة اخرى يا ناذر : ان تكون الشريحة نشطة وشغالة لمدة 3 شهور سابقة على الاقل وتدفع 10 جنيهات رسوم انتقال (بالنسبة للدفع المقدم) واكتر شوية للخطوط وتحضر اثبات شخصية وتنتظر تقريبا 24 ساعة - طبعا كل الخطوات السابقة بتقوم بيها في مكاتب الشركة اللي عايز ترحل ليها لكن : بتعرف احمد وحاج احمد ؟ دي ياها شركات الاتصالات السودانية يعني اي شركة بتتفوق على التانية في السوء والبشاعة وقلة احترام المشتركين

تسلم على التنوير ...

Quote: مثلا شركة زين : قبل فترة ، قاموا - عمدا - بايقاف خاصية رسالة التنبيه عند انتهاء اشتراك الانترنت بما يعني انو حيخصمو رصيدك كلو اذا انتهى اشتراكك ونسيت تفصل الانترنت انا شخصيا اتصلت وسألت من الحاصل دا ، قالو لي دا عطل في الشبكة وحيتصلح طبعا مرت شهور وما اتصلح ، واكتشفت انو الحركة دي مقصودة - لسرقة ارصدة المشتركين عن طريق الاستهبال عليهم -

حدث معي ذات الموقف قبلا ولم انتبه له الا بعد ان تم سحب رصيدي كاملا لانني لم انتبه لتوقف الرسالة وتاريخ الاشتراك ..

Quote: اما شركة سوداني : اكتشفت انو انا مشترك في خدمة بتاعت رسايل نصية بتخصم من الرصيد ، بدون ما اشترك فيها اتصلت عليهم، قعدو يغالطو فيني انو انا اشتركت. قلت ليهم انا متأكد انو ما ممكن اشترك في خدمة زي دي اصلا، ( عن الطبيخ والمكياج وشنو ما عارف) وتلفوني مابستخدمو زول غيري ، سالتهم من طريقة الاشتراك، قالو ترسل رسالة لرقم معين ، قلت ليهم طيب هل عندكم في سجلاتكم ما يفيد اني ارسلت رسالة اشتراك في التاريخ المحدد؟ فبهت الذي كفر واكتشفت انها برضو حركة القصد منها سرقة رصيد المشترك.

شركة سوداني من اسوأ الشركات .. لا يقدمون لك شيئا سوى الوعود والغلاط والمحاججات .. كثيرا ما احتديت معهم واحتدو معي وتكون النتيجة صفرا كبيرا ..

Quote: غايتو الخدمة بتاعت الانترنت البتقدمها الشركات كلها ، تشيلها تختها في شوال خيش ، وتكب فيها جردل بنزين، وتقول بسم الله ، وتولع فيها منتهى الاستهبال والغش والتفاهة وعدم الاحترام.

والله ما قلت الا الحق .. نحن متخلفين جدا في هذه الجزئية تحديدا ..

عمنا الشايقي ...

Quote: يا عم ناذر أهم شئ بس ما تجهجهنــا وما تجهــجــه الجكــس

هههههههههههه لا لا اتطمن تماما من الناحية دي ...

سلام مهندس أيمن ...

Quote: انا حولت من stc لموبايلي مجاناً واتفعل طوالي - الشركة الجديدة مستفيدة عشان كده الداعي شنو للعشرة جنيه؟!!

فعلا .. مفروض الخدمة تكون من غير رسوم .. الا لو كانت الرسوم دي مفروضة من هيئة الاتصالات ... لانو لو انا في محل الشركات دي وعشان ارغب
الجمهور بعمل التحويل مجانا وكمان اي واحد يحول بديهو عشرة جنيه رصيد هدية ...