ملاحظة لمن يكتبون بوستات النعي والعزاء ...

سلام للجميع وأسف للانقطاع الطويل عن المنبر لظروف العمل ..

داير أقول شنو ... نحن السودانيين بطبعنا نهرع ونسرع لأداء واجب العزاء في أقرب سانحة نحصل عليها من ساعة معرفتنا بخبر الوفاة .. وبما اننا في هذا المنبر صرنا اسرة واحدة واكثر من ذلك .. كان لا بد لنا أن نسرع بتعزية أهل المتوفي سواء أكان بالوصول لمكان العزاء أو الاتصال الهاتفي في حالة البعد والاضطرار حسب ظروف الأفراد .

لاحظت في الفترة الأخيرة أن بعض الزملاء يكتبون بوستات عزاء دون وضع وصف لمكان العزاء ودون حتى كتابة ارقام هواتف للاتصال في حالة أن كان من اهل المتوفي في دولة أخرى وكأنهم يعتقدون أن الجميع على علم بعنوان العزاء أو بارقام تلفوناته ووسيلة الاتصال به ..!!

مررت بكثير من التجارب في المنابر ,ومواقع التواصل الاجتماعي وهذا المنبر من كون أن يقوم أحدهم بكتابة بوست للعزاء ويختمه بالأية انا لله وأنا اليه راجعون دون وضع أي وصف لمكان العزاء أو وسيلة اتصال للتعزية .. !!!!

نحن في هذا المكان أسرة وحقيقة التعزية في بوستات العزاء قد لا تكفي ولا بد من اتصال مباشر أو وصول لمكان العزاء ..

عن شخصي عانيت كثيرا في الفترة الماضية ولا زلت ...

لم أجد رقم تواصل مع الاخ حسين عوضاي لتعزيته في فقد احدى والديه رغم تنبيهي لذلك في بوست النعي خاصته ..

وبالامس القريب قرات في الفيس خبر ينعي والدة الاخ الصحفي وعضو المنبر أحمد يونس مكنات دونما أي وصف واضح لمكان العزاء مما أضطرني لعمل اتصالات ماكوكية لأكثر من جهة حتى تعرفت على عنوان العزاء بفضل أخونا عضو المنبر محمد مختار الزيادي وذهبنا سويا ...

وحتى الأن اعاني بعدما قرات نعي أبن الأستاذ أبو بكر يوسف عضو المنبر دونما أي رقم تلفون أو وصف لمكان العزاء ان كان داخل السودان وراجعت البوست اكثر من مرة .. بل هم بوستين الأن اذ لمحت واحدا أخر قبل قليل ظننته يحمل معلومات وارقام ولكن كان دون أي معلومات عن مكان العزاء أو هواتف للاتصال !!

أرجو ان ينتبه الأخوة لهذه الملاحظات ..

عداك العيب يا ناذر
وكمان لو كتب سيرة مختصرة عن المتوفى وسبب الوفاة يكون افضل
يعني على الاقل مثلا، حادث اليم، بعد معاناة مع المرض، وعكة، .......

ناذر يا واعي
تنبيه مهم و في محلو
تسلم يا حبيب

حمدلله على رجوعك ياعمك
تنبيه مهم

تسلم يا الشفيع ..

Quote: عداك العيب يا ناذر وكمان لو كتب سيرة مختصرة عن المتوفى وسبب الوفاة يكون افضل يعني على الاقل مثلا، حادث اليم، بعد معاناة مع المرض، وعكة، .......

واحد بوردبي كتب قبل فترة كلامو موجها لي بكري ابو بكر عن انو الموت ما خبر .....

الموت هو نقل اسباب الوفاة وتفاصيلا وحاجات زي دي خاصة لمن المتوفي يكون بوردابي ...

ممكن يا ناذر بعد التحيه

اضيف انو الشفقه في نقل خبر الموت ما جميله ...

انا شخصيا اعرف احد الاخوان علم بموت والده من النت قبل ان يتصل به اهله ...

و ايضاً التسرع في نقل خبر الموت و كانه سبق صحفي ايضا مرفوض

صدف ان بعض الاخبار لم تكن صحيحه ...

لك التحيه و انت تسعي لتحقيق اصول الواجبات ...

Like




.



.



.

ملاحظة فى الصميم يا ناذر

الاخ ناذر سلام
ملاحظة في الصميم وتوصيات نرجوا من الاخوة الاعضاء الالتزام بها

برضـو يا ناذر الناس مفروض لما يقدموا الدعوات للمتوفى يراعو حالة الطقس.. يعنى ما ممكن فى عز البرد والجليد ودرجـة الحرارة 30 تحت الصفر،
وواحدين يدعو على المتوفى عشان الله يغسله بالماء البارد والتلج واللا البرد ما عارف.. موش احسن من دا نقول اللهم أغسله بالماء الدافئ واجعل قبره دافئـاً؟

Quote: برضـو يا ناذر الناس مفروض لما يقدموا الدعوات للمتوفى يراعو حالة الطقس.. يعنى ما ممكن فى عز البرد والجليد ودرجـة الحرارة 30 تحت الصفر، وواحدين يدعو على المتوفى عشان الله يغسله بالماء البارد والتلج واللا البرد ما عارف.. موش احسن من دا نقول اللهم أغسله بالماء الدافئ واجعل قبره دافئـاً؟

يا بوالريش
إنه دعاء ما قبل الشتات......
الآن يجب مراعاة متوفى الأصقاع والمناطق المتجمدة
(مايضير الشاة من سلخها بعد ذبحها)
B]

________________

ناذر تحياتى ياخ

الرحمة لكل المتوفين وربنا يتولاهم
فعلا زي ما قال الشفيع نبذة عن الراحل و/ أو صورة بتخلق وشيجة معاهو وبتخلي الناس تتعاطف معاهو على الأقل من اي منطقة في السودان أو درس وين الخ خاصة مع تشابه الأسماء
رحم الله أمواتنا

نازر.

طيب إذا كان الشخص الذي وضع الخبر يريد أن يكتفي بتقديم العزاء في البورد فقط ولا يريد أن ينشر معلوماته الخاصة؟
حسب توجيهات صاحب العزاء.

Quote: ممكن يا ناذر بعد التحيه اضيف انو الشفقه في نقل خبر الموت ما جميله ... انا شخصيا اعرف احد الاخوان علم بموت والده من النت قبل ان يتصل به اهله ... و ايضاً التسرع في نقل خبر الموت و كانه سبق صحفي ايضا مرفوض صدف ان بعض الاخبار لم تكن صحيحه ... لك التحيه و انت تسعي لتحقيق اصول الواجبات ...

يحي قباني.

كلامك ده صحيح.

في واحد في البورد هنا أسمو مين كده أبو دية. قبل كده نشر نعي لأب شخص عضو أخر في هذا المنبر من دون أن يستأذن منه ومن قبل حتى أن يقدم له تعزية، ولا توجد سابقة معرفة بينهم من قبل خلاف هذا البورد.
والأخ عضو البورد ده كانت لديه ظروف عائلية سافر بسببها لولاية أخرى داخل أمريكا، ولم يكن متواجد بمنزله. أها بعد كده أتصور عدد المكالمات وعدد الناس اللي حضرو لتقديم العزاء له وهو للم يكن موجودا في منزله حتى اليوم التالي.
في ناس ما عندها أخلاق أبدا حتى في مسألة الوفيات دي. والزول الل أسمه أبو دية ده أنا أشتم فيه رائحة الأمنجية.

نسال الله الرحمة لجميع موتانا

فعلا انت طولت الغباب

ونحن نسينا نسال منك !!!!

حمد الله علي السلامة

Quote: وكمان لو كتب سيرة مختصرة عن المتوفى وسبب الوفاة يكون افضل

صدق د. بلة موسى إذ قال ذات يوم أن لا أحد يقرأ في هذا البورد
رغماً عن بوست صديقنا ناذر هذا .....
رورغماً عن أن بكرينا قد إستشعر أهمية البوست فعلقه في واجهة المنبر

فهناك أيضاً من ينعى ( زملاء المنبر ) بأسلوب التشويق .... والكتابة سطر في كل مداخلة

http://www.sudaneseonline.com/board/460/msg/1393658584.html



مافيش فائدة


________________

مشتاقين يا ناذر
وجزيل الشكر على البوست على ( بوست هذا العام )

شكرا أخ بكري أبو بكر لتثبيت البوست الهام ..

شكرا للمتداخلين والمعلقين من صفحات الفيس ..


سلام دينق ..

Quote: طيب إذا كان الشخص الذي وضع الخبر يريد أن يكتفي بتقديم العزاء في البورد فقط ولا يريد أن ينشر معلوماته الخاصة؟ حسب توجيهات صاحب العزاء.

اذا بكل بساطة الزول الكتب الخير يضيف : انتهى العزاء بنهاية هذا البوست وخلاص !!

ناذر
جزاك الله خير على ما تطرقت إليه
بس ،،،،،، ،،، في حاجة مهمة ما تطرقت ليها

حكاية الصور الضاحكة في بوست التعزية
يعني ما ممكن بي صورتك دي ( الفي بروفايلك دا ) تعزي ليك واحد في عزيز لديه
أنا شخصياً ما بقبل تعزيتك لو كانت معاها صورتك دي
وكونو الواحد يغير صورة بروفايلو حسب المناسبة ما حاجة صعبة

أتمنى أكون جانبني الصواب في ما تطرقت إليه

نسأل الله الرحمة لأمواتنا وأموات المسلمين
وسلامتكم

Quote: والزول الل أسمه أبو دية ده أنا أشتم فيه رائحة الأمنجية.

الزغلباني دينق

البوست اجتماعي حزائني نرفض جملة وتفصيلا تسييسه

شكرا ناذر

شكرا قباني ملاحظتك جديرة بالاهتمام والتنفيذ

سلام سيف الدين محجوب ..

Quote: وكونو الواحد يغير صورة بروفايلو حسب المناسبة ما حاجة صعبة أتمنى أكون جانبني الصواب في ما تطرقت إليه

للاسف جانبك الصواب ..

لانو في المنبر العضويتو بالالاف دا يكون في زول داير تعزيهو في ولدو المات وفي نفس الوكت زميل تاني داير تشاركو فرحة طهور ولدو الحي !

والاتنين في وكت واحد .. أها في الحالة دي تركب ياتو وش وياتو صورة ؟!!!

النجيضة : أقبلو تعازينا وتهانينا دون النظر لصور البروفايلات والله اعلم ما في الصدور ..!