أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!

أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!


03-12-2014, 08:57 PM


  » http://sudaneseonline.com/cgi-bin/sdb/2bb.cgi?seq=msg&board=110&msg=1399325272&rn=1


Post: #1
Title: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 08:57 PM
Parent: #0


Post: #2
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: Balla Musa
Date: 03-12-2014, 09:15 PM

الأعضاء الجدد ينسوا أيقونة (عاجل) كيف وانت مارسلت لي رقم تلفونك ههههه

سلام ياناذر

Post: #3
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 09:21 PM

فهذه الايقونة فقدت مصداقيتها منذ امد بعيد بفعل بعض ممن يعتقدون أن خبرا مثل (عاجل : تعيين نائب معتمد جديد لمحلية قلع النخل ) هو خبرا يستحق أن تفرد له ايقون ...!!


نائب معتمد وعينوهو ...!!!

العجالة في شنو ؟!!!!

Post: #5
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: Osman Musa
Date: 03-12-2014, 09:34 PM
Parent: #3

عزيزنا الأخ ناذر
سلامات

خلو اليقع في أي أيقونة خمش
بس اليبعدنا من بوستات العنصرية .. لا حظ المنبر يا أخ ناذر .
تحياتي للجماعة

Post: #4
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: معتصم سليمان
Date: 03-12-2014, 09:24 PM

الاخ ناذر
تحية طيبة

نصيحة واجبة الإتباع من خبير

بس ياريت تكمل جميلك على فئة الجدد في الموقع
أمثالنا وتشرح لينا الاشكالية وين عشان يكون الفهم
جامع

عند اللفة بس :
-------------
غير عاجل غير عاجل غير عاجل

Post: #6
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 09:37 PM
Parent: #4

سلام يا دوك ..

Quote: الأعضاء الجدد ينسوا أيقونة (عاجل) كيف وانت مارسلت لي رقم تلفونك ههههه


رقم تلفوني في البروفايل .. أما رقم تلفون زولك داك يمين بالله رسلت لي عتاة المخبرين الصحفيين ما عرفوهو ..!!

Post: #7
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 09:48 PM
Parent: #4

سلام معتصم سليمان ومبروك الانضمام للمنبر وللموقع ....

Quote: بس ياريت تكمل جميلك على فئة الجدد في الموقع
أمثالنا وتشرح لينا الاشكالية وين عشان يكون الفهم
جامع



وبما اني خبير ذي ما ذكرت الاشكالية تتمثل في حاجتين :

الحاجة الأولى عدم الحوجة للعجالة أصلا .. لأنو اعضاء المنبر دا متمهلييييييييييييييين وما عاجلين او مستعجلين .. ينوموا ناس أمريكا يصحو ناس الخليج .. يصحو ناس الخليج ينوموا ناس استراليا .. يصحو ناس استراليا ينومو ناس شرق افريقيا .. الاعضاء عيني باردة منتشرين في كل دول العالم .. فأيقونة عاجل دي ما بتعني ليهم شي ..

الحاجة التانية الايقونة دي بقوا الناس يتلافحوها ساي !! زول ما يسمع خبر من شلة اللستك في حلتم وهو منتظر الزول البيزبط الفتة ..ومن غير ما يتأكد منو يجي طوالي مطرزن بيهو في المنبر بي أيقونة عاجل قبل ما يتأكد منو يخلع بيهو الناس ..!

وقبل ما تمر نص ساعة أو اقل بيتضح ليهو خطأ المعلومة الجابا دي ونبقي في اعتذار وتبرير وبطيخ !!

زي بتاع : عاااجل قوات لخليل ابراهيم متواجدة في شمال جنوب أمدرمان !!!!

دي كيف دي دي يعني ؟!


فهمتني ؟!!

Post: #8
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 10:04 PM
Parent: #7

سلام عثمان موسى ..

كيفك واخبارك ؟!

Quote: س اليبعدنا من بوستات العنصرية .. لا حظ المنبر يا أخ ناذر .


والله شي يطمم البطن ,, ودي حلها واحد من اتنين :

يا إما التجاهل التجاهل يا قول أختنا لنا مهدي ومروجها دكتور مصطفى محمود ..

يا أما تواجه العنصرية بعنصرية مضادة زي ما شرحت قبل كدة في بوست سابق وأثبت نجاحها ..!

واتمنى بس ما نلجأ للحل التاني دا والناس تكون عاقلة ... لأنو والله العظيم كان قمنا علي جننا الزمان داك الباقين يسألوا الله السلامة بس ...!!!

Post: #13
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: عبد اللطيف بكري أحمد
Date: 03-12-2014, 11:32 PM
Parent: #7

ياعمك خلي الناس يطلعوا مداعي لي بوستاتهم

الحكاية بقت مجهود شخصي ولا صحوبية

وبعدين قنواتكم الفضائية هي قائدة الفبركة والاثارة
شوف (جنسي) دا:
http://up.nilelove.org/uploads/1394729996.jpg

http://up.nilelove.org/uploads/1394729996.jpg
تصدق نتيجة المباراة 4 / 1

ثم انو ريال مدريد ذات نفسو ماكان طرف في المباراة ههههههه

ليك وحشة ياعمك،،

عبد اللطيف خليل

Post: #14
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: معتصم سليمان
Date: 03-13-2014, 05:49 AM
Parent: #7

Quote: زي بتاع : عاااجل قوات لخليل ابراهيم متواجدة في شمال جنوب أمدرمان !!!!

دي كيف دي دي يعني ؟!


مشكوووووووور ياحبيب على الترحيب

اها

وقع لي تب الفهم

بالحييييييييييييييييييل فهمتك

Post: #9
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: مجاهد قسم السيد
Date: 03-12-2014, 10:13 PM

نحن رابطة الاعضاء الجدد احترنا نسمع كلام منو فيكم.
واحد يقول ضبب كيبوردك و التاني يقول ما تكتب عاجل و آخر يقول لينا انتو (بي قد القفه) اكتبوا اي حاجه.

Post: #10
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-12-2014, 10:21 PM
Parent: #9

سلام مجاهد ...

بالله عملتو رابطة . سجلتوها في مسجل التنظيمات الطوعية ولا هنا بس على الهواء مبالشرة ؟!


المهم نصيحة اخونا ود البوش اخدو بيها ... ونصيحتي برضو اخدو بيها ...


الكلام دا كلو في شان البورد والمنبر ما يفقد مصداقيتو ....!!!


ونصيحتي لكم أن تمهلوووووووووووو ...!!!!



واسالو الله السلامة ....!!ّ

Post: #11
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: مجاهد قسم السيد
Date: 03-12-2014, 10:37 PM

مرحبا نادر
طبعا العضو الجديد بيتعب مع الكيبورد ، يكتب و يمسح و يغير في الكلمات عشان يرتب الجمل، و بعد ده لما يجي يتفقد البوست بتاعو يلقى عدد الردود 0.

اهو انا بديت اللفخ عملت بي وصية ود البوش

Post: #12
Title: عاجل غير غير عاجل عاجل
Author: هيثم التوم
Date: 03-12-2014, 10:48 PM
Parent: #11

ناذر


ما نعجل يعني ...
طيب ما كان تقول من قبيل !

تحياتي يا اصلي..

Post: #15
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: عاطف عمر
Date: 03-13-2014, 09:40 AM

ناذر يا فن يا هندسة
Quote: يا إما التجاهل التجاهل يا قول أختنا لنا مهدي ومروجها دكتور مصطفى محمود ..

تتخيل يا ناذر السنين دي كووووولها وأنا فاكر أنو شعار التجاهل التجاهل دا حق د. مصطفى محمود
ليس أنا لوحدي
د. بلة موسى ( المنطط عينيهو ( ومستني التلفون برضو كان قايل كدا

شكراً ليك لتثبيت الحقوق .......
عليك أمان الله ناس المنبر ( أكلوا عرقي ) في مصطلح قوم إذا ( عطس ) أحدهم .. رفع المهندس بكري ( بوست عطسته ) لأعلى الصفحة الأولى
هسع ( العطسة ) بقت تمشي عاااادي لحبيبنا حسين ملاسي الذي إستخدمها بعد ذلك وما نقدر نقول تلت التلاتة كم

وبمناسبة الحقوق دي .. أحكى لأحبابنا الأعضاء الجدد قصة نجرتك لمصطلح ( تكسير التلج ) الذي عم الأسافير دون أن يعرف الناس من هو ناجره

Post: #16
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: عاطف عمر
Date: 03-13-2014, 09:50 AM
Parent: #15

تحياتنا بالطبع للغالية الأميرة لنا أم الوليد

وتحياتنا لك حبيبنا ناذر

Post: #17
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 03:33 PM
Parent: #16

سلام عبد اللطيف بكري أو خليل اور واتس إيفر ..

Quote: تصدق نتيجة المباراة 4 / 1

ثم انو ريال مدريد ذات نفسو ماكان طرف في المباراة ههههههه


ههههههههه دا زي الصحفي القبضو ملاسي بالثابتة .. في ندوة كدة مفروض يجيها كمال الجزولي على ما اظن .. ملاسي حضر الندوة وتاني يوم الصحفي قال بيوصف في الندوة وقال حضر كمال الجزولى والقى عددا من قصائدة التي نالت الاستحسان ..

اللذيذة زي ما كتب ملاسي انو كمال اليوم داك تخلف عن الحضور وما جا هههههههههههه ..

يعني في الحالة دي جنسي ديل يسووا ليهم شنو هههههه

Post: #18
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 03:46 PM
Parent: #16

مجاهد قسم السيد ..

حليلك وسواد ليلك ..

Quote: مرحبا نادر
طبعا العضو الجديد بيتعب مع الكيبورد ، يكتب و يمسح و يغير في الكلمات عشان يرتب الجمل، و بعد ده لما يجي يتفقد البوست بتاعو يلقى عدد الردود 0.


طبعا دي الحاجة البيانو منها الاعضاء الجدد غير المسجلين بي أسنانم .. بعدين ما ننس المكنبر دا فيهو شي من شللية وديل هم البيقروا لي بعض ويردو علي بعض ..

لكن لأنك زول مبروك وجبت سيرة الحاجة دي انا حا ابرك بي بوست عبارة عن بحث في كيفية استخدام تكتيكات بعينها عشان تولد براند نيو بي اسنانك من جديد .. بس كيف تطبق التكتيكات دي بي حذاقيرا ..

أخونا محمد اي سليمان الحبشي كان كاتب مغمور في البورد دا يكتب لوحده ويقرا بوستاته لوحده ويرد على نفسه بنفسه . أها لمن تابع التكتيكات ديك في وكتها بقى كاتب يشار له بالبنان وقراء بوستاتو ألوف والوف ..

فاا شنو .

خدمة مني ليك ولي بقية الاعضاء الجدد المحبطين من عدم الردوم حا أجيب ليكم الرابط دا تتابعوهو وتعرفو تستخدموا أدواتو ..

قصرت معاكم ؟!!

هاكم :

http://www.sudaneseonline.com/board/110/msg/1140196594.html


وانشاء الله يا مجاهد أجي الشهر الجاي ألقاك تقدل فوق بوستاتك والردود لا من ما تقدر تتابعا ,,

Post: #19
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 03:49 PM
Parent: #18

عوض يا شفت ...

Quote: Awad H. Abdalla
عاجل: الإشكالية كالآتي -- If everything is urgent, nothing is urgent
شُفت كيف؟


ايوة شفت ..

انت كدة اديتنا الزيت ...!

Post: #20
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 03:55 PM
Parent: #18

دي مقدمة بتاعت البوست داك :

Quote: حاولت منذ مجيئي لهذا البورد قبل حوالي عشرة أشهر أن أحصر وأحلل التكتيكات والحيل التي يتبعها كتاب هذا المنبر في إيصال الفكرة والمفهوم للقارئ ولمن يتعاملون معه في النقاش والحوار من أعضاء المنبر الذين قد يتداخلون مع بعضهم بغرض المحاورة أو المجادلة وأحيانا المناكفة والمجاملة ، وطبعا لكل شخص عضو في هذا المنبر تكتيك خاص به يستخدمه حينما يريد الكتابة أو التعبير ، قد يختلف مع التكتيكات الأخرى المستخدمة أو قد يتفق معها جذئيا ، ويعتمد ذلك على حسب طبيعة وإهتمامات الكاتب سواء أكانت فنية أو رياضية أو سياسية أو إجتماعية ..

والسبب الذي جعلني أتاخر كل هذا الوقت في حصر هذه التكتيكات هو أنني بدات عقب كل أزمة أو موضوع نقاش أكتشف أنواعا جديدة من التكتيكات غير المعروفة لي قبلا وقد تندهشون أنني فقط في المعمعة الأخيرة (وأعني بها أزمة إهدار دمي في المنبر على غرار إهدار دم سلمان رشدي ) !! قد تكشفت لي أكثر من حوالي خمسة عشر نوعا من التكتيكات التي كانت خافية عني قبلا ولم أحصرها فيما مضى !!! ، ليكون إجمالي التكتيكات المسجلة لدي أكثر من أربعين تكتيكا وإسلوب كتابة !! كلها تستخدم في هذا المنبر من قبل الكتاب أو التكتلات المختلفة الاغراض والاهداف سياسية او إجتماعية كانت !!

وإنني إذ أعلن الان ضربة البداية لهذا البوست والذي أجزم منذ الأن انه سيكون طويلا جدا بسبب كثرة التكتيكات المستخدمة وربما بما سيضيفه القراء من تكتيكات اخرى قد تكون ضلت طريقها إلى مفكرتي ، لا أبغي من خلف ذلك إلا مزيدا من الشفافية والصراحة في تعاملنا مع بعضنا البعض وحتى يفهم أينا الاخر جيدا حتى لا تختلط علينا الامور أثناء مداولاتنا لمختلف الموضوعات ...

وربما قد يصيب الرشاش بعضا من الاعضاء هنا من جراء تناولي لأمثلة وإقتباسات حية من صميم هذا المنبر وإرشيفه وقد لا أعمد أحيانا إلى ذكر إسم الكاتب صراحة وقد يغضب البعض مني ممن يعتقدون ان تكتيكاتهم وإستراتيجيتهم كانت خافية ويضعون في أذهانهم انني من أوضحتها للناس ولكني على كل حال مستعد لكل الإحتمالات وردود الفعل المختلفة ، وذلك لن يمنعني منذ الان من الإعتذار مقدما لكل من سيغضب مني وكل رجائي أن يقدر ويتفهم الفائدة المرجوة التي ستعم الجميع في نهاية البوست ولهم العتبى حتى يرضوا (على اعتبار ما سيكون) ..

أما الإسلوب الذي سأتبعه لحصر تلك التكتيكات فهو سيعتمد على شرح التكتيك وإسمه (بعض التكتيكات لم أستطع إستنباط أسماء لها حتى الأن) !! أما الأمثلة والتطبيق فستكون في شكل صنفرات وافية الجوانب والشرح سأكتبها أحيانا باللهجة الدارجة حسب طبيعة التكتيك وظروفه مدعما بالأمثلة والإقتباسات واللنك المباشر (إن وجد) مع ملا حظة أن هناك تكتيكات سأذكرها بصورة عارضة وقد لا توجد لها أمثلة مباشرة أو ربما ان الجميع يعلم تلك التكتيكات ولا داعي للأمثلة والتطبيق !!!

ورغم انني واثق تماما أن الطريق سيكون وعر جدا والإبحار فيه سيكون ضربا من المغامرة غير المأمون عواقبها ، إلا انني كما أسلفت جاهز تماما ومستعد لكل الإحتمالات ولكن ....!!!

هل انتم جاهزون ومستعدون للمجازفة مهما أتت من نتائج عكسية عليكم ؟؟!!
أجبتم بالإيجاب ؟؟؟!!
حسنا سنختبر ذلك عبر هذا البوست ...

Post: #21
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 04:05 PM
Parent: #18

هيثم توم ..

وينك يا راجل !! والله زمن طويل جدا ما اتصادفنا ..

أخبارك شنو بالله ؟!

Quote: ما نعجل يعني ...
طيب ما كان تقول من قبيل !

تحياتي يا اصلي..


لا تعجل ولا تخت ايقونة الوش البينفخ في النار الخاتيها دي .. لأنو الجمرة والنار بيحرقوا الواطيهم ههههههههه

Post: #22
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 04:16 PM
Parent: #18

سلام باش مهندس عاطف ..

Quote: تتخيل يا ناذر السنين دي كووووولها وأنا فاكر أنو شعار التجاهل التجاهل دا حق د. مصطفى محمود
ليس أنا لوحدي
د. بلة موسى ( المنطط عينيهو ( ومستني التلفون برضو كان قايل كدا

شكراً ليك لتثبيت الحقوق .......
عليك أمان الله ناس المنبر ( أكلوا عرقي ) في مصطلح


أبدا وحاتك .. أول ما جا دكتور مصطفى محمود للمنبر كان باي نوكيا ساي .. عندو كيبورد ما معرب .. كان مرة مرة بيكتب بالانقليزي بعد شوية اظن شعر الناس ما فاهماو (هو بيني وبينك انقليزيو كان عامل زي عربي جوبا الخاص داك) !! بعد شوية فكر كدة قال احسن طريقة عشان يوصل رسالتو يستعمل اسلوب القطع واللزق !! طبعا الماوس في الحالة دي اطرش بيقطع ويلزق اي حاجة كان عربي كان امازيقي !!

المهم صادف انو اختنا لنا مهدي كاتبة بوست بتدعو لي تجاهل بوستات الكيزان وكتبت فيه (ما أتو لحوار .. التجاهل التجاهل ) قامت الجملة وقعت في عين اخونا دكتور مصطفى .. يمين بالله نجضا نجاض اليهود في الافران .. شالا ولزقا في أي بوست يصادفو .. يا خي أمكن قريب الخمسة وعشرين الف مداخلة ما فيها غير العبارة دي .. حتى انا لاحظت في اخر اياماتا بقى لمن يعمل كوبي و بيست .. بتنزل في البوست مسهوكة !!

التحية لأخونا دكتور مصطفى وأختنا لنا مهدي ..

Quote: وبمناسبة الحقوق دي .. أحكى لأحبابنا الأعضاء الجدد قصة نجرتك لمصطلح ( تكسير التلج ) الذي عم الأسافير دون أن يعرف الناس من هو ناجره


صدق يا عاطف .. قصة المصطلح دا موجودة في بوست التكتيكات الانا ختيت رابطو فوق .. لكن أحيطك علما ان اخونا اساسي زعم انه أول من استخدم هذا المصطلع في المنبر وخارجه ..

مشكور يا هندسة ..

Post: #23
Title: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: هيثم التوم
Date: 03-13-2014, 04:54 PM
Parent: #22

اها يا ناذر
قاعدين

Quote: لا تعجل ولا تخت ايقونة الوش البينفخ في النار الخاتيها دي .. لأنو الجمرة والنار بيحرقوا الواطيهم ههههههههه

النشوف اخرتا ... البركة في برالمة and#1634;and#1632;and#1633;and#1636;
طوبتنا ختيناها ...

---------------------------
تسلم والله فعلا زمن طويل من يوم المصادفة ديك !

Post: #24
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 07:18 PM
Parent: #23

!!!!!

Quote: البركة في برالمة and#1634;and#1632;and#1633;and#1636;


دي سكريبتات العصر المسماري ولا شنو يا هيثم ؟!

Post: #25
Title: Re: أتمنى الا يقع أعضاء المنبر الجدد في فخ وضع أيقونة (عاجل) حين كتابة بوستاتهم ..!!
Author: ناذر محمد الخليفة
Date: 03-13-2014, 07:23 PM
Parent: #23

أنا سوداني ..

كدي قبل ما ارد عليك من منازلهم انتهز فرص ليبيا الفاتحة دي وقدم لي بكري عشان تاخد عضوية ..!!

Quote: دأ البوست بالقنابل الذرية التى اسقطت فى اليابان وينتهى بى سعر العجور فى المجلة بى كم....دا حال كل منشورات السوادنيين


طيب مالو !!!

دا طبعنا كدة كسودانيين .. كلو عندنا صابون .. وكلو عندو علاقة بي بعض .. خلصنا وحلينا موضوع القنابل الذرية وقلنا بالمرة نحل ارتفاع أسعار العجور وننتهي من العصفورين بي حجر واحد ..!!

بالمناسبة سمعت نكتة المرة المسكت العجورة وسالت من سعرها والبياع ردا ليها وقامت قالت ليهو كيف عرفت اني هانم ما آنسة ؟!


















لو ما سمعتها ...لمن بكري يديك العضوية تعال لي فوق عشان ارسلا ليك في الخاص !!

Post: #26
Title: ايقونة عاجل
Author: هيثم التوم
Date: 03-13-2014, 11:57 PM
Parent: #25

Quote: دي سكريبتات العصر المسماري ولا شنو يا هيثم ؟!




عليك امان الله دي كلها كانت اربعة ارقام بس ..انا ما عارف الريس كيفن قلبا سكريبتات كدي .. تصدق بس : الفين واربعتاشر ؟؟؟؟

ههههههههه

Post: #27
Title: Re: ايقونة عاجل
Author: ناذر محمد الخليفة
Date: 03-14-2014, 12:03 PM
Parent: #26

أنت هين أنا بعاني من مشكلة تانية ..

لمن أدوس أيقونة (شاهد قبل نشره) عشان اراجع البوست قبل ما ارسلو الكتابة كلها بتنقلب لغة هيروغلوفية ..!!

عندك جل للمشكلة دي ؟!