الواتساب عمل اغراق يومي خيالي للنكات .. مصير فرق النكات شنو ؟!

Post: #1
Title: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-29-2014, 09:24 PM

بقى الزول يستحيل يسمع نكتة ما مرت عليو من كترة النكات البتجيو في الواتساب والبرامج التانية ..!!
زمان الزول بيحكي نكتة وهو مطمن انها جديدة هسي قبل يحكي يسأل الناس (سمعتو نكتة فلان وعلان بتاعت الفلانية والعلانية) ؟!

يعني الزول البينكت زاتو بقى ما واثق من نكتتو الحا يقولا ..!!

لي اكتر من شهر أي نكتة اتقالت في التلفزيون .. وبالذات قناة الشروق بتكون جاتني في الواتساب قطع شك ..

الوضع دا لو استمر كدة يا جماعة والناس توسعت أكتر واكتر في استخدام الهواتف الذكية وبرامج التواصل والمحادثات دي ...:

واذا كان اي زول بتجيهو نكتة بيوزعا لي مية من اصحابو في القروبات المختلفة ..

ناس تيراب والهيلاهوب وهمبريب وهلمجرا ديل يعملوا شنو ؟!

Post: #2
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: عبدالعزيز عثمان
Date: 03-29-2014, 09:37 PM
Parent: #1

عليك الله الفضل جديد شنو هسع...
لم يتبقي من حرف او كلمة تدهش...
تم اغراق الدنيا بكل شئ...حتي حل الملل.
ياخي زمان الزول الممتع تضرب له اكباد الابل...
عصر التخمة،،وقريبا ستمل الدنيا هذه التقنيات المزعجة
ونقول حليل زمن الحبوبات،،ومسامرة الساحات،،،قال صلاح ع الصبور...

“ماذا جرى للفارس الهُمامْ؟
انخلعَ القلبُ، وولَّى هارباً بلا زِمامْ
وانكسرتْ ########مُ الأحلامْ
يا من يدلُّ خطوتي على طريقِ الدمعةِ البريئه
يا من يدلُّ خطوتي على طريقِ الضحكةِ البريئه
لكَ السلامْ
لكَ السلامْ
أُعطيكَ ما أعطتنيَ الدنيا من التجريبِ والمهاره
لقاءَ يومٍ واحدٍ من البكاره

Post: #3
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-29-2014, 10:12 PM
Parent: #2

يا سلام عليك يا عبد العزيز ..

Quote: عصر التخمة،،وقريبا ستمل الدنيا هذه التقنيات المزعجة
ونقول حليل زمن الحبوبات،،ومسامرة الساحات،،،قال صلاح ع الصبور...

فعلا تخمة تكنلوجية مبالغ فيها ...

تصحى الجمعة الصباح تلقى في ستين رسالة بي كل الاشكال والالوان مكتوب فيها جمعة مباركة .!!

تلقى في سبعين حديث شريف

مية اية قرأنية ..

دشليون حكمة مأثورة ..

عشرين مقطع فيديو يعلك لامن ينزل وتشوفو ..

ستين صورة شافع عريان مع كلمات عن الطفولة وكم بيت شعر ..

ولسع الغريق قدام يا عثمان ..

Post: #4
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: الفاتح علي التوم
Date: 03-29-2014, 10:49 PM
Parent: #3

وده كوم و الرسائل التي ان لم تنشرها كوم لوحدو
حيث ان ود عمك حبوبتو سوف تصاب بنت جيرانهم
بمرض لا ينتشر الا في بلاد التبت الصينية كما جاء في الرؤيا
المناميه لحارس مرمي فريق مسجد امبابه

Post: #5
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: عمر الفاروق عبد الله الشيخ
Date: 03-30-2014, 10:45 AM
Parent: #3

Quote: تلقى في سبعين حديث شريف

مية اية قرأنية ..

إذن هذه من محاسن التكنولوجيا ,, اذكروا الله يذكركم وصلوا علي نبيكم

Post: #6
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ود الخليفه
Date: 03-30-2014, 10:52 AM
Parent: #5

تلقى في سبعين حديث شريف

سلامات وتحيات

اغلب هذه الاحاديث والاخبار مكذوبة وضعيفة وبها سطحية وسذاجه

Post: #7
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ود الخليفه
Date: 03-30-2014, 11:03 AM
Parent: #6

شيخ يلقي محاضرة ويقول للحضور قصة عن مساوئ الحلال و الحرام

فقال: في 3 دخلوا قصر وسرقوا الذهب والمال الفيهو و ختوهو علي ظهر حمارهم و مشوا.

واحد يقول للتاني: رأيك شنو نقتل الثالث و نقسم الذهب بيني وبينك، فوافق و قتلوا الثالث.

وبالليل واحد فيهم قال لنفسه ليه ما اقتل ده و اشيل القروش كلها لي،

فقتلو و هو في الطريق عضاهو ثعبان و مات. فرجع الحمار بالذهب للقصر.

شفتوا الحكمة؟ مال الحلال برجع لصحبه.

واحد مسطول قام وقال ليهو والله يا شيخنا قصتك سمحة وكلها حكم ومواعظ ،

بس لكن ياشيخنا القصه دي حكاها الحمار يعني ولا عرفتوها كيف؟

Post: #8
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: مجاهد محمد الهادي
Date: 03-30-2014, 01:27 PM
Parent: #1

Quote: عصر التخمة،،وقريبا ستمل الدنيا هذه التقنيات المزعجة
ونقول حليل زمن الحبوبات،،ومسامرة الساحات،،،قال صلاح ع الصبور...

وخوفاً من كدة بتعامل بحذر شديد مع هذه الاستحداثات التقنية - ليس جهلا والحمدلله لكني أؤمن أنها سوف تجعل حياتي مملة لا طعم ولا رائحة لها

لم أعمل واتساب ولا سمارت فون ولا خلافو ومتردد بالجد حتى لا تنسرق الدهشة مني وهي نعمة لا أريد لها أن تُسرق

سلام أخواني ناذر وعبدالعزيز وكل الحضور والجايين كمان

Post: #9
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-30-2014, 08:05 PM
Parent: #8

سلام الفاتح ....

Quote: وده كوم و الرسائل التي ان لم تنشرها كوم لوحدو
حيث ان ود عمك حبوبتو سوف تصاب بنت جيرانهم
بمرض لا ينتشر الا في بلاد التبت الصينية كما جاء في الرؤيا
المناميه لحارس مرمي فريق مسجد امبابه

الحمد لله الشيخ محمد احمد حسن ريحنا بي فتوى عاي مسئوليتو ..

قال كان جاتكم رسالة زي دي انشروها من باب الثواب ونشر الخير ..

وأن جاتكم بي صيغة تهديد وما دايرين تنشروها ما تنشروها والحبة دي ما بتجيكم ..

Post: #10
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-30-2014, 08:07 PM
Parent: #8

!!!

[QUOTEا]ن هذه من محاسن التكنولوجيا ,, اذكروا الله يذكركم وصلوا علي نبيكم

صلعم ....

Post: #11
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-30-2014, 08:10 PM
Parent: #8

فعلا يا ود الخليفة ..

Quote: غلب هذه الاحاديث والاخبار مكذوبة وضعيفة وبها سطحية وسذاجه

والله مرات بتجيني حاجات كدة لمن اتمحن ..!!

Post: #12
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-30-2014, 08:12 PM
Parent: #8

!!!!!!

Quote: بس لكن ياشيخنا القصه دي حكاها الحمار يعني ولا عرفتوها كيف؟

ههههههههههههههههههههه

Post: #13
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-30-2014, 08:15 PM
Parent: #8

سلام مجاهد ....

Quote: وخوفاً من كدة بتعامل بحذر شديد مع هذه الاستحداثات التقنية - ليس جهلا والحمدلله لكني أؤمن أنها سوف تجعل حياتي مملة لا طعم ولا رائحة لها

لم أعمل واتساب ولا سمارت فون ولا خلافو ومتردد بالجد حتى لا تنسرق الدهشة مني وهي نعمة لا أريد لها أن تُسرق

حتي قبل شهرين كنت احمل تلفونا صينيا أب تلاتة شرائح وكان يكفيني تماما ..

لكن ما صمدت لانو العالم داير وسائل تواصل سريعة ووقتية فأضظريت الحق بأخر عربات العولمة ..

Post: #14
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: Mohamed E. Seliaman
Date: 03-31-2014, 06:31 AM
Parent: #13

((ههههههههههههههههههههه ))
---------------------------
هذه الضحكة نسفت فكرة البوست!
---------------

مع التحيات للجميع

الواتساب ظاهرة تستحق الدراسة
وكانت بعض موضوع خطبة الجمعة الماضية !

Post: #15
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ود الخليفه
Date: 03-31-2014, 08:18 AM
Parent: #14

هذه الضحكة نسفت فكرة البوست!

امكن بجامل فيني

ثم اني لم اوردها كنكته وانما للتدليل على سذاجة بعض ما يصلنا باسم انشرها تؤجر

Post: #16
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: Frankly
Date: 03-31-2014, 08:24 AM
Parent: #15

صدقت يا ناذر بعدين نكات "الشايقية" دي ح تخليني أقفل الواتساب

والغريبة يرسلها ليك واحد شايقي

الفهم شنو؟؟

Post: #17
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: سفيان عثمان قرضيه
Date: 03-31-2014, 09:01 AM
Parent: #16

Quote: ناس تيراب والهيلاهوب وهمبريب وهلمجرا ديل يعملوا شنو ؟!

ديل بضيفوا للنكتة بهارات وشمارات فتخرج بصورة مقبولة ومهضومة أكتر من المكتوبة
وأعتقد أن الأداء الكوميدي وجذب الإنتباه مهم جداً في صياغة النكتة

Post: #18
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 03-31-2014, 10:07 PM
Parent: #17

لحدي بكرة ..

Post: #19
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: mohmmed said ahmed
Date: 04-01-2014, 05:27 AM
Parent: #18

والله يا ناذر
انا لامن شكيت فى قدراتى التذوقية

اسمع نكت كل يوم فى القنوات الفضائية

واقول هسا النكتة وين
المفارقة وين
المضحك شنو

طبعا مهم فى النكتة الاداء
ودا مفقود فى الغالبية

الاكلشيهات والعبارات المكررة تفقد النكتة تاثيرها

الفرق الكوميدية زادها فقير جدا ومتشابه

ابكر وابكرونا
واحد رباطابى مسيخ
واحد حبشى
تقليد للاطفال
تقليد للفنانيين

واستضافات فى القنوات
وسهرات فى الفنادق
وحفلات فى الجامعات

حكى لى باسى الصديق عادل حربى نائب عميد كلية الدراما

ان كليات الجامعة والتى تضم كلية الدراما
تستضيف فرق الكوميديا بنكاتها العنصرية وبادائها الباهت داخل حرم الجامعة

Post: #20
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 04-01-2014, 01:46 PM
Parent: #19

هلا الحبشي ,,وود الخليفة ..

Quote: هذه الضحكة نسفت فكرة البوست!

امكن بجامل فيني

أي والله بجامل فيهو .. زول ضيفي جا لحدي بوستي وكتب النكتة الطويلة وعريضة دي أخلي تعبو يروح ساي !!

أفو !! أماج جعلي فوق كم ؟!!

النكتة دي جاتني في الواتساب قبل تلاتة اسابيع تقريبا وحتى قبل الواتساب سمعتها لكن بي طريقة تانية ..

Post: #21
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 04-05-2014, 10:59 AM
Parent: #20

Post: #22
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: جلال الدين القرشي أحمد محمد
Date: 04-05-2014, 11:27 AM
Parent: #21

هاكم النكتة دي ....جديدة وما اظنكم تكونوا سمعتوا بيها
الما سمعها قبل كدا يضحك
والسمع بيها يعمل نائم
ومنها نكون ساهمنا في رفع بوست أخونا ود الخليفة

النكتة :(( واحدة بايرة شديد ....لاقت ليها واحد
قالت ليهو تعال نلعب دس دس ...
لو لقيتني تعرسني
ولو ما لقيتني ...انا في الدولاب ))

Post: #23
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: Abd-Elrhman sorkati
Date: 04-05-2014, 02:24 PM
Parent: #22

الفنان ناذر. لك التحايا ولضيوفك...... والله انا انبسطت جدا لفكرة اندثار فرق النكات دي... لانها ضارة اكثر من نافعة..... النكتة او الطرفة منذ بدء الخليقة يتداولها الناس في مجالسهم واي شخص ممكن يحكي النكتة وما بتحتاج لقدرات.... ففكرة انه يكون في فريق كامل يردد النكات امام جمهور ما هي فكرة جات في زمن الجدب الثقافي الذي نعيشه الان... والغريبة انهم مصنفين نغسهم دراميين.... هذه الفرق اذكت نار العنصرية وتناولت بدونية مهن وشخصيات ومواقف.... اتمني شخصيا اندثارها....

Post: #24
Title: Re: الواتساب عمل اغراق يومي خيالي للنكات .. مصير فرق النكات شنو ؟!
Author: ناذر محمد الخليفة
Date: 04-06-2014, 08:54 PM
Parent: #23

ظروف العمل لم تمكنني من الرد علي جميع المتداخلين ..

المهم .. البوست بوستكم والصالون صالونكم ..

واصلو النقاش والمداخلات وأنا متابع للجميع ..

بس في حاجة داير أقولا ...

جبيل واحدة من القنوات بثت حفل تكريم للممثلة القديرة فايزة عمسيب من النادي الالماني في الخرطوم ..

جايبين فرقة اسمها همبريب للنكات وتقليد الفنانين والحاجات المستنسخة دي ..

الحاجة الداير اقولا انو نكاتم القالوها كلها دون استثناء حتى الواتساب يخجل يرسلا لو قلنا ليهو رسلا ..

نكات من زمن المتوسط الكاكي بي ردا ..

بعدين ياخي شنو الفهم يجيبو زول يقلد كم فنان ؟!! الزول دا لو عندو موهبة زي دي مش احسن ليهو يكون فنان مستقل بي نفسو ؟!!