نصيحة لله والرسول : لو شفتو زول قدامكم بيضبحوهو شخخخ ما تبلغوا الشرطة!

وبجي بعد شوية بحكي ليكم كيف إنو ضابط برتبة رائد في واحدة من أقسام ولاية الخرطوم كيف بيكتل في الناس الحذر الامني بمبررات واهية ، وكيف بيستخدم اسلوب الترهيب والتخويف عشان يصل لي غايتو دي ..!

صنفرة :

المرة دي ما في زول حكاها لي .. لأنو أنا زاااااااتي صاحب البلاغ المفترض دا ..!

قبل تلاتة اسابيع تقريباُ ناس حلتنا صحوا الصباح لقوا في عربية صالون بيضاء واقفة قدام واحدة من البيوت ..كانت واقفة بي طريقة مريبة وغريبة .. ناس البيت القدامو العربية ما شكوا في حاجة قالوا إحتمال تكون إتعطلت بالليل وصاحبا وقفا هنا ..

مر يوم ويومين والعربية واقفة في محلها .. أول الشارع فيهو بقالة وعندنا أطفال في البيت لمن يترسلوا للبقالة بيمروا بي قدام العربية المشبوهة دي .. ناس الحلة بدوا يسألو عن قصة العربية وصاحبا وما إتوصلوا لي حاجة .. جيت للناس القاعدين في البيت قلت ليهم يا جماعة صاحب العربية دا ما قال ليكم حاجة ؟ . كدي إتذكروا يمكن ختى وصية عن واحد فيكم وسافر مع بضايعو (البيت القدامو العربية مستاجراو شركة شحن لنقل البضائع للولايات) .. الجماعة قالوا ما بيعرفو صاحب العربية وما في زول وصاهم ..!

غايتو يا اولاد الخرطوم 3 عندكم المحن

يالطيف تلطف

بعد خمسة أو ستة أيام .. بعد ما قنعنا من ظهور صاحب العربية ، تفكيري وتفكير ناس الحلة مشى لي حتة إنو العربية دي إحتمال تكون مسروقة .. أو الإحتمال الأكبر إنها استخدمت لي جريمة أو مصيبة زمان .. أو إحتمال شايلة ممنوعات او حتى أسلحة او أي مصيبة زمان .. طبعا العربية واقفة ومقفلة وما عارفين الجواها شنو ..

قلت لي ناس البيت القدامو العربية يا جماعة أنا بشوف احسن نبلغ البوليس عشان لو في جريمة أو العربية مسروقة الأمور تتضح بي سرعة .. قالوا لي إتصل بيهم إنت ..

طوالي من تلفوني إتصلت بالنجدة وبلغتهم الحاصل وشالوا مني الوصف والتفاصيل وقالوا حا يرسلوا دورية للمكان ..

لحدي هنا مهمتي (دا اذا كانت دي مهمتي أصلاً) إنتهت مش ؟!

أبدا .. تابعوا معاي الحصل شنو ..!!

كيفك يا معاوية عبيد ..

Quote: غايتو يا اولاد الخرطوم 3 عندكم المحن

أنا ما بسميها محن .. بسميها شلاقة مني ساي ..!
أنا مالي ومال عربية واقفة مسروقة أو كاتلين فيها زول أو فيها متفجرات أو فيها بطيخ !!
مش الشرطة دايرا يكون تفكيري كدا ؟ أها من ديك وقررت تاني لو زول ضبحوهو قدامي شخخخخخخخخخخخ وواقع قدامي في طريقي انطوا وأنا ماشي زي الما حاصل حاجة وزيو زي أي حفرة او حجر في الطريق ..!!

كدودي ..

Quote: يالطيف تلطف

نسأل الله السلامة وتابع معاي ..

بعد حوالي ربع ساعة جات عربية الدورية .. نزلوا منها تلاتة افراد سالوا عن الحاصل واخدوا نمرة العربية وقالوا ماشين المرور يشوفوا صاحبا منو ويشوفوا لو فيها بلاغ أو كدة .. وقاموا نزلوا واحد من العربية شايل ليهو رشاش يقعد يحرس العربية ودوروا مشوا ..!
وانا زاتي مشيت شغلي ..!

بعد زي نص ساعة كدة واحد من أولاد الحلة ضرب لي تلفون وقال لي ناس البوليس دايرنك ؟! قلت ليهو دايرين بي شنو ؟انا بلغتهم بالحاصل وبعد داك هم يتصرفوا .. قال لي هم منتظرينك جمب العربية تعال شوفم مالم ..

إضطريت رجعت من الشغل .. جيت لقيت الجماعة منتظريني قلت ليهم خير إنشاء الله .. قالوا لي إتفضل معانا على القسم عشان سعادة الرائد دايرك !! قلت ليهم داير بي شنو ؟ قالوا لي إنت بس إتحرك معانا ..

المهم مشيت معاهم القسم ودخلوني على رائد شرطة ز قالوا ليهو دا دا بتاع البلاغ بتاع العربية ..!

يمين بالله الرائد دا عاين لي كدة .. أنا قلت حا يديني شلوت في بطني !! قال لي إنت منو ؟ قلت ليهو ناذر محمد الخليفة .. شغال شنو يا زول ؟ قلت ليهو شغال صحفي .. عاين لي من تحت لي فوق كأنو ما مصدق ..! (طبعا ليهو حق لأني جاي من الشغل وهدومي كلها اسمنت ورملة وغبار وحالتي صعبة) .. قال لي شغال في ياتو جريدة ؟ قلت ليهو : جريدة ....... لكن حاليا متفرغ لي عمل خاص ..!

قال لي العربية دي مشكلتك معاها شنو ؟ قلت ليهو انا شاكي في العربية دي لأنو ليها كم يوم واقفة وقفة مريبة وسيدا ما ظهر .. قال لي إنت مضايقاك في شنو ؟ طبعا السؤال غريب جدا لكن قلت ليو : أنا بيتي تاني بيت من العربية طوالي وعندنا في البيت اولاد صغار بيمروا قدام العربية دي يوميا وإحتمال العربية دي حصلت فيها جريمة ولا حاجة ..!
قال لي العربية دي واقفة ليها كم يوم ..؟ قلت ليهو : قالو زي ...
قاطعني بي إستنكار : قالوا !!!! يعني إنت ما متأكد ؟! قلت ليهو أنا سألت الناس القدام بيتم العربية لانهم أكيد بيعرفوا احسن مني وإحتمال انا اكون لاحظتها متأخر ..!

قال لي : شوف .. في بلاغات كتيرة بتاعت عربات واقفة جاتنا من منطقتكم دي وبعد ما نبدا في اجراءاتنا بيظهر صاحب العربية وبيكون موقفا لأنها خسرانة ومرات بيوصي زول يحرسا والزول بيمشي يخليها ..! قلت ليهو طيب هسي البيحصل شنو ؟! قال لي تمشي تفتح بلاغ في النيابة وتعمل عريضة .. قلت ليهو طيب لو ظهر صاحب العربية ؟ قال لي بنفتح فيك بلاغ إزعاج للسلطات لأنو دا ما أول بلاغ يجينا !!

قلت ليهو كان كدا البلاغ خليهو وانا زاتي إنسحبت من الموضوع دا.. قال لي اسمع إنت في حاجات ما عارفا .. انا أمشي أصلي الضهر وإنت أنتظرني لحدي ما أجي أوريك الحاصل .. قلت ليهو هسي أنا مستعجل وقدامي مشاوير لكن بجيك بعد ساعة أو ساعتين ..
قال لي خلاص بنتظرك ..

وطلعت من القسم ..!!

متابعين بس انا سبقتك في القرار دا
خصوصا في الغربة هنا

معتز القريش ..

Quote: متابعين بس انا سبقتك في القرار دا خصوصا في الغربة هنا

في قصة حصلت في الابيض قبل كدة .. واحد جاي بي حمارو بالليل شاقي ليهو غابة صغيرة فجأة من الغابة طلعت بقرة الحمار خاف وجفل والزول الفي الحمار وقع علي راسو في حجر وأغمى عليهو .. قال ليك اليوم كلو الزول مغمى عليهو والناس تمر بيهو عادي وخايفة تبلغ يتهموها إنها الكتلت الزول دا لحدي ما جا واحد شهم ومشى بلغ البوليس .. أول حاجة عملا البوليس ختى الزول البلغ في الحراسة ورسل دورية لقوا الزول حي لكن في غيبوبة ودوهو المستشفى وقعد فيها غمران تلاتة يوم وزولنا دا مقبوض في الحراسة يدعو ربنا (إنشالله ما يموت .. إنشالله ما يموت) .. وفعلا الزول داك فاق شوية كدة المتحري سألو : يا زول الضربك منو ؟ قال ليهو ما ضربني زول براي وقعت من حمارتي وإنضربت في راسي .. والغريبة بعد ما قال كدة طوالي مات ..!

ربنا بس اراد ليهو يفوق داب ما يقول كلامو دا ويموت طوالي ..
إتخيل معاي لو كان الزول مات .. زولنا البلغ دا مصيرو يكون شنو ؟!

القصة دي موجودة في كتاب بتاع الصحفي صاحب اول جريدة أقليمية في السودان الكانت في االابيض بس هسي ما مستحضر إسم الصحفي ولا اسم الجريدة ولا إسم الكتاب زاتو ..!

جيتو القسم بعد ساعتين وقابلتو ..

قعد يحكي لي عن معاناتم مع البلاغات بتاعت العربات الواقفة وإنو أكترية البلاغات جاية من منطقتنا وإنو في النهاية بيظهر سيدا .. قام سألني قال لي : قلت لي العربية واقفة قدام شنو ؟ قلت ليهو قدام محل ترحيلات .. الضابط فرح وقال لي بسسسسسسسسسسس !! من جبيل ما تقول لي كدة !! صاحب العربية أكيد واحد من البيرحلوا البضائع وإحتمال سافر مع بضاعتو وخلى العربية ..!

طيب ليه ما ورى ناس الشركة ؟ قال بيكون وراهم أو ورى واحد منهم لكن داك بيكون برضو اتحرك مع بضاعة أو نسى يوري الباقين ..!

قلت ليهو طيب هسي يعني إذا بلغت وظهر سيد العربية حا تفتحوا فيني بلاغ إزعاج سلطات ؟!
(أنا طبعا قصدت أركز على دي تحديدا ) .. قال لي : هسي أنحنا فتحنا فيك بلاغ ؟

قام شال موبايلو وضرب لي رقم عرفت بعد داك إنو ضرب لي زول في مكافحة سرقة السيارات .. وراهو الحاصل ولون العربية بعد شوية سألني : إنت العربية نمرتا كم ؟! قلت ليهو ما عارفا .. قال لي خلاص شيل رقم تلفوني دا وامشي جمب العربية ومليني رقما ..!

طلعت منو وأنا زهجان وقافلا معاي ..! أنا وراي مشاوير وحاجات مهمة والضابط دا بدل يرسل واحد من العساكر بتاعينو يقوم يرسلني أنا .. انا ذنبي شنو ؟!

قبل ما أطلع من القسم الضابط قال لي أنا بتصل بيك لو طلعت العربية دي مسروقة أو ما مسروقة .. قلت ليهو سمح ..!!

جيت جمب العربية وضربت للضابط مليتو رقم العربية وقفلت الخط ..

الضابط لي يوم الليلة ما رجع لي ..

تاني يوم العربية في محلها ...
تالت يوم برضو في محلها ..

رابع يوم ناس مكافحة السيارات جو وفتحوها وحاولوا يحركوها لقوا الدركسون مأمن ..

خامس يوم أنا جاي من الشغل شايف العربية مفتوحة وفي زول جمبها وفي مكنيكي بيهبش فيها ..

يا زول الحاصل شنو ؟! دي عربيتك ؟ مالك ؟ مالا العربية ؟!

الزول حكى لي القصة قال إنو العربية باظت بيهو بالليل داك وقام وقفا هنا ..!
طيب إنت كنت وين الفترة دي كلها ؟ وليه ما جيت تاني يوم ؟!
قال جا كم مرة ماري بالشارع وإطمن على العربية من بعيد ..
قلت ليهو العربية دي جننتنا جن وبي سببك قربوا يدوني شلوت في بطني ويفتحوا فيني بلاغ إزعاج سلطات ..!

المهم حق الله بق الله المكنيكي كابس العربية مشيت مع الزول عشان يشحن البطارية النايمة الجماعة دوروا إتخارجو ..!
ومن ديك أتا تاني حلفت ما أبلغ عن أي شي مشبوه أو غريب ألقاهو قدامي ..

السنة الفاتت من بعد رمضان لغاية اظن لغاية بعد الحج (اكتر من 3 شهور) عربية كورولا موديل 2009 واقفة في شارع جانبي جنب العمارة الانا ساكن بجي فيها يمكن بمر بيها في اليوم 5 او ستة مرات وكل ما اجي بيها وتكون معاي المدام اقول مسكين صاحبا هسي يكون بفتش ليها قالت حقو نبلغ البوليس نقول في عربية واقفة هنا من مدة طويلة (قلت بلغي انت انا غايتو ما ببلغ ) لغاية جيت يوم لقيتا ما في حمدت الله
هنا في السعودية نفس العقلية يا خي مرة واحد انتحر نط من راس عمار وقع في عربية واقفة تحت دفعو سيد العربية الدية بتاعتو


قلت لي حرسوها واحد بكلاشنكوف اصلها ابيي ولا شنو

Quote: قال لي اسمع إنت في حاجات ما عارفا .. انا أمشي أصلي الضهر وإنت أنتظرني لحدي ما أجي أوريك الحاصل .. قلت ليهو هسي أنا مستعجل وقدامي مشاوير لكن بجيك بعد ساعة أو ساعتين ..

ناذر يا شليق

و مشيت ليهو بعد ساعتين؟؟

قصة الـــــكـلب عذبتنا بيها و سليت روحنا عشان تتمها و هسة جاينا بقصة ما تامة.. أنا لو في محل بكري برفدك لغاية ما تمشي لسعادتو دا و تجي تورينا الحاجات الإنت ما عارفا دي

محمد إبراهيم ..

Quote: هنا في السعودية نفس العقلية يا خي مرة واحد انتحر نط من راس عمار وقع في عربية واقفة تحت دفعو سيد العربية الدية بتاعتو

هههههههههه كتلتني بالضحك .. هسي صاحب العربية ذنبو شنو هههههههه

Quote: قلت لي حرسوها واحد بكلاشنكوف اصلها ابيي ولا شنو

أنا أساسا ما عارف حرسوها ليهم من شنو ؟!! العربية ليها خمسة ولا ستة يوم واقفة وما جاتا حاجة !!

بالله في السعودية برضو في حركات زي دي .. يعني الناس تفقد الحذر الأمني بتاعا مرة واحدة ؟!!

حافظ بشير ..

هو بالله بقى ###### .. غايتو أخر مرة لمن إستلموا ود فور كان جريو بتاع لبن ساي ههههههههه

Quote: قصة الـــــكـلب عذبتنا بيها و سليت روحنا عشان تتمها و هسة جاينا بقصة ما تامة.. أنا لو في محل بكري برفدك لغاية ما تمشي لسعادتو دا و تجي تورينا الحاجات الإنت ما عارفا دي

تميتا فوق سرعة سرعة ما تشيل هم ههههههههههه

ناذر سلامات

عشان تانى تتوب من ان تكون مواطن صالح




___________________________
الجماعة معاك الاسبوع القادم

سلام انتصار ..

تاني لا مواطن صالح لا طالع بس أمشي بي نظرية جحا ديك والعوجة إنشاء الله ما بتجيني ..

لجماعة أتصلوا بي قبل كم يوم واكدوا الحضور ..


مشكورة .. وتحياتي لهم ..

سلام يا ناذر،
قالوا شقي الحال بتعتر ليهو تكتو!

أها البوليس دا كان تعمل معاهو صداقة علشان الزمن لي
قدام ما معروف يمكن يخارجك من أي زرزرة محتملة في المستقبل.

من جريو لي عربية.. غايتو المرة الجاية خايف
تكون طيارة عديل واقفة قدام بيتكم نشوف تاني تمشي
تبلغ لي منو؟!

Quote: بالله في السعودية برضو في حركات زي دي

آآي وكمان من زمان.. جماعة أصحابنا كانوا شغالين في مطار الحوية
وساكنين في الطائف.. بعد ما إنتهوا من العمل ركبوا سيارة بوكس مع بعض
وفي أثناء عودتهم في طريق الطائف الحوية وجدوا أمامهم سيارة مقلوبة
عائلة سعودية رجال وحريم بأصابات مختلفة ودمهم جاري وواحدين أغمى عليهم
نزلوا من البكس وجروا قدموا مساعدة وأسعفوا المصابين وواحد منهم إتصل بالشرطة
وإبلغ عن الحادث. جاؤا ناس الشرطة وأول حاجة عملوها ألقوا القبض على السودانيين
كلهم وساقوهم ووضعوهم في الحراسة وقالوا ليهم إحتمال أنتم السبب في الحادث.
الجماعة قعدوا أكثر من أسبوع في السجن وبعد ما أطلقوا سراحهم دخلوا في دوامة ثانية
إستجواب تعال وأمشي كرهوا اليوم الخلاهم ينزلوا من البوكس وقالوا ثاني لو وجدوا واحد
قدامهم عايز يموت ما يسعفوه أو يتصلوا بالشرطة.

سلام عزيز ..

Quote: أها البوليس دا كان تعمل معاهو صداقة علشان الزمن لي قدام ما معروف يمكن يخارجك من أي زرزرة محتملة في المستقبل

الفرصة لسع مواتية ما شايفني ما كتبت لا إسمو لا الحتة الشغال فيها ههههههه

Quote: من جريو لي عربية.. غايتو المرة الجاية خايف تكون طيارة عديل واقفة قدام بيتكم نشوف تاني تمشي تبلغ لي منو؟!

تاني البلاغ إلا لله رب العالمين ..

Quote: آآي وكمان من زمان.. جماعة أصحابنا كانوا شغالين في مطار الحوية وساكنين في الطائف.. بعد ما إنتهوا من العمل ركبوا سيارة بوكس مع بعض وفي أثناء عودتهم في طريق الطائف الحوية وجدوا أمامهم سيارة مقلوبة عائلة سعودية رجال وحريم بأصابات مختلفة ودمهم جاري وواحدين أغمى عليهم نزلوا من البكس وجروا قدموا مساعدة وأسعفوا المصابين وواحد منهم إتصل بالشرطة وإبلغ عن الحادث. جاؤا ناس الشرطة وأول حاجة عملوها ألقوا القبض على السودانيين كلهم وساقوهم ووضعوهم في الحراسة وقالوا ليهم إحتمال أنتم السبب في الحادث. الجماعة قعدوا أكثر من أسبوع في السجن وبعد ما أطلقوا سراحهم دخلوا في دوامة ثانية إستجواب تعال وأمشي كرهوا اليوم الخلاهم ينزلوا من البوكس وقالوا ثاني لو وجدوا واحد قدامهم عايز يموت ما يسعفوه أو يتصلوا بالشرطة.

غايتو العرب ديل كتلوا النخوة فينا بي صورة عجيبة ..!!

Quote: انا أمشي أصلي الضهر وإنت أنتظرني لحدي ما أجي أوريك الحاصل

ناذر طلع كافر
إنتا يا الأخو محنن
مالك ما بتصلي?

مشغول قال

حسن النوايا انتهت في هذا الزمن الاسفيري الاصعب من القرون الماضية
كم ما وجدته امامي جريح ومخمور وفي غيبوبة
ولكن لن يخطر ببالي حسن نية لمساعدته
السبب الذي جعلني قاسي القلب في هذه اللحظات هي لحظات حرجة ومزعجة
لمن كنت صغير والكلام دا في كتم وعمري في ذلك الوقت10سنوات
وكنت بدرس في الصف الثالث ابتدائية ومعي اطفال 2 في الصف الاول
كنت بسأل الناس بان الولدين ديل ابوهم وين
قالوا لي ابوهم مسجون في سجن كوبر
طيب عمل شنو دخلوه سجن كوبر
طبعا ابوهم يعمل مهنة العتالة
في واحد في سوق امدرمان قال ليه تعال شيل لي شوال ملئان قطن
فقام الراجل عتل الشوال
وبعد ما وصل المحل الوصفوه له انتظر صاحب الشوال ما جاء
اعمل فيه عتالى حريف مشى بلغ البوليس
وحكي ليهم القصة
وبعد شوية البوليس فتش الشوال
لقى فيه زول مقتول
وصاحبنا بتاع الشوال هو القاتل
اتخارج ومحل ما مشى يعلم الله
ابو الاولاد راح ضحية في سجن كوبر
حكم بالاعدام ثم الى موبد
الى ان وافته المنية
والراجل دا مشهور في كتم
اسمه ابو عازة
ناس كتم القدام بكون مذكرنوا
له الرحمة والمغفرة
والحمدلله ياناذر الخليفة القصة معلقة حتى الآن في القلب
والواحد يسال الله السلامة من الكوارث
ونتمنى ان يكون عظى وعبرة للآخرين
والف حمدلله على سلامة

Quote: قالوا شقي الحال بتعتر ليهو تكتو

زمان كان بتعتر حاجة نانية يا عزيز عيسى سويتاتكة ؟؟ !!!!!



ــــــــــــــــــــــــــــــــــــــــــــ

ناذر بطل جرسة ده ماسبب يخليك تجقلب قدر ده

ان شاء الله المرة الجاية تقيف قدام بيتكم اشوفك بتبلغ ولا لا

Quote: الصحفي صاحب اول جريدة أقليمية في السودان الكانت في االابيض

قصدك الاستاذ الفاتح النور صاحب ومؤسس جريدة كردفان ..


واصل ياناذر .. ياخ انت زول ممتع فى السرد
يمين كل قصصك تنفع تكون افلام ومسلسلات !

كتبنا الرد في نفس الوكت يا مزمل

قصص نادر فعلا ممتعة ومشوقة وتنفع بس ما افلام..بل حلقات كاملة الدسم من برنامج متاعب بتاع فرقة الاصدقاء

Quote: القصة دي موجودة في كتاب بتاع الصحفي صاحب اول جريدة أقليمية في السودان الكانت في االابيض بس هسي ما مستحضر إسم الصحفي ولا اسم الجريدة ولا إسم الكتاب زاتو ..!

الصحفي هو الاستاذ الفاتح النور والصحيفة هي كردفان وعلى ما أعتقد ان الكتاب هو كردفان خلف الاخبار والحوادث المنشور عن دار كردفان للنشر في السبعينات

Quote: القصة دي موجودة في كتاب بتاع الصحفي صاحب اول جريدة أقليمية في السودان الكانت في االابيض بس هسي ما مستحضر إسم الصحفي ولا اسم الجريدة ولا إسم الكتاب زاتو ..!

الصحفي هو الأستاذ الراحل الفاتح النور

والجريدة هي جريدة كردفان

والكتاب هو صالون كردفان

لك التحية والتقدير عزيزي نادر

اها ياخ!!!!

كوستاوي ..

Quote: ناذر طلع كافر إنتا يا الأخو محنن مالك ما بتصلي?

أول حاجة الضابط ما قال لي ارح صلي معنا ..!
تاني حاجة أنا عاينت للصف لقيتو كلو أخضووووووووور .. كلهم كاكي وكلهم ظباط في ظباط !!
خفت أخش أصلي في نصهم انا الملكي دي يقومو يدوني طلقة في نص راسي مع نهاية التشهد ..!
ما عارف لو كنت حا أموت شهيد ولا لا ..! لكن الحمد لله أثرت السلامة وجمعتا الضهر مع العصر ..!
واهو ترنا حيين ..!

سلام ذو اليد ..

Quote: حسن النوايا انتهت في هذا الزمن الاسفيري الاصعب من القرون الماضية

والقرون الماضية كانت إسفيرية برضو ولا جليدية ساي !!!

Quote: السبب الذي جعلني قاسي القلب في هذه اللحظات هي لحظات حرجة ومزعجة لمن كنت صغير والكلام دا في كتم وعمري في ذلك الوقت10سنوات وكنت بدرس في الصف الثالث ابتدائية ومعي اطفال 2 في الصف الاول كنت بسأل الناس بان الولدين ديل ابوهم وين قالوا لي ابوهم مسجون في سجن كوبر طيب عمل شنو دخلوه سجن كوبر طبعا ابوهم يعمل مهنة العتالة في واحد في سوق امدرمان قال ليه تعال شيل لي شوال ملئان قطن فقام الراجل عتل الشوال وبعد ما وصل المحل الوصفوه له انتظر صاحب الشوال ما جاء اعمل فيه عتالى حريف مشى بلغ البوليس وحكي ليهم القصة وبعد شوية البوليس فتش الشوال لقى فيه زول مقتول وصاحبنا بتاع الشوال هو القاتل اتخارج ومحل ما مشى يعلم الله ابو الاولاد راح ضحية في سجن كوبر حكم بالاعدام ثم الى موبد الى ان وافته المنية والراجل دا مشهور في كتم اسمه ابو عازة ناس كتم القدام بكون مذكرنوا له الرحمة والمغفرة والحمدلله ياناذر الخليفة القصة معلقة حتى الآن في القلب والواحد يسال الله السلامة من الكوارث ونتمنى ان يكون عظى وعبرة للآخرين والف حمدلله على سلامة

لا حول ولا قوة إلا بالله ..!!

هو فعلا عظى للأخرين لكين مصير النخوة والشهامة شنو ..!
وين ناس ابو مروة ؟! البي فرارو يجيك من جوة ؟!
معقولة الناس تلقى زول مرمي في الشارع محتاج لي مساعدة وما تساعدو ..!!

أنا غايتو ما بلوم الناس ديل لكن بقول الله لا خت زول في حتة يحتاج مساعدة فيها من زول وما يلقاها .!

مشكور ذو اليد ..

جمال الباقر ..

Quote: ناذر بطل جرسة ده ماسبب يخليك تجقلب قدر ده ان شاء الله المرة الجاية تقيف قدام بيتكم اشوفك بتبلغ ولا لا

شفت لو صحيت من النوم ولقيتا واقفة تحت سريري ما اشتغل بيها الشغلة ..!
العمر مش بعزقة ..!!

مزمل خيري ..

Quote: قصدك الاستاذ الفاتح النور صاحب ومؤسس جريدة كردفان .. واصل ياناذر .. ياخ انت زول ممتع فى السرد يمين كل قصصك تنفع تكون افلام ومسلسلات !

أيواااااا هو زاتو الله يرحمو ويحسن إليه ..

أمتع الله ايامك يا أبو جوان ..

سلام ايزابيلا ..
أختنا التي يواشنطن دي سي ..

Quote: الصحفي هو الاستاذ الفاتح النور والصحيفة هي كردفان وعلى ما أعتقد ان الكتاب هو كردفان خلف الاخبار والحوادث المنشور عن دار كردفان للنشر في السبعينات

جزاك الله خير لكن لا أعتقد ان هذا هو إسم الكتاب ..

سلام أستاذنا القرشي ..

Quote: الصحفي هو الأستاذ الراحل الفاتح النور والجريدة هي جريدة كردفان والكتاب هو صالون كردفان لك التحية والتقدير عزيزي نادر

بالضبط الكتاب هو صالون كردفان ..

به قصص جميلة جدا تحكي عن الحياة في كردفان وايضا تصوير بيئة عمل الصحيفة في ذلك الوقت كما به حكاوي وقصص معتبرة عن الصحفي الراحل الريفي الذي عمل بالصحيفة فترة من الزمن ..

مشكور أستاذنا ..

Quote: واهو ترنا حيين ..!

يا زول!!
كان أخير ليكـ تموت!!

أميرة فاروق كيفك ..

Quote: اها ياخ!!!!

وإنتهينا علي كدة .. غنتي بتقري سطر وتفطي سطر ولا شنو هههههه

راجعي أخر سطر من القصة ..

بسيطة يا ناذر

لو حصل موقف مشابه إتصل من تلفون عمومي ( فاعل خير )
ويا دار ما دخلك شر .. النخوة والشهامة ما حاتموت بإذن الله ....

سلام منتصر ..

Quote: بسيطة يا ناذر لو حصل موقف مشابه إتصل من تلفون عمومي ( فاعل خير ) ويا دار ما دخلك شر .. النخوة والشهامة ما حاتموت بإذن الله ....

تلفون عمومي ..!! إنت قايل دي السعودية ..!
التلفونات العمومية زمااان شلعوها الشماسة وتاني أصلو ما ركبوها ..!!

الخرطوم دي ما فضل فيها تلفون عمومي واحد ..!!

ود الصائم ..

Quote: يا زول!! كان أخير ليكـ تموت!!

غايتو الشفع ديل بعد مرات عندهم أسئلة تعسفية خلاص ..

التسوي بيدك يغلب أجاوديك ياناذر
يا أخ السلطات والضباط ديل مشغولين بالأهم لا تزعجوهم ...
شوف ليك طريقة شيل رقمك من الزول ده .. ما يقوم يدق عليك وأنت بره الخرطوم ويقول ليك بعد عشرة دقائق أنت عندي ...
وبعدين ديل قتلوا الرجال النخوة شنو كمان ...
أح يا بلد
الشفيع ابراهيم

ناذر..كيفك يا حبيب
أها..أنا اقارن ليك بي عقليتنا في السودان و بي دول فيها حكم قانون و أحترام المواطن:
يوم مشيت زيارة في الويكند لي واحد صاحبنا..المهم الونسة جرت مع الشباب و قال لي يا زول بيت و أمشي الصباح..أصلو تاني يوم أجازة و كدا..المهم نمتا..الصباح بدرييي..زي ستة وللا سبعة صباحاً دق جرس الموبايل..
رديت(ألو)..
جاني صوت خواجا :(صباح الخير سيدي..معاي السيد زياد ج. عبدالله؟)
رديت:(نعم أنا هو)
قال:(أنا سينير الكونستابل(...) - ما عارف رتبة كونستابل بتعادل عندنا بالعربي شنو - من براماتا بوليس ستيشن..هل تملك سيارة رينولت كليو باللوحات (...)؟
قمت مخلوع من السرير و قلت:(نعم..هذه سيارتي)
قال:(و أين السيارة متوقفة الان؟).
قلت:(في منطقة تلوبيا ..لماذا؟)
قال:(في شارع (...) في تلوبيا؟
قلت:(نعم...قضيت الليلة هناك و سيارتي في الشارع..هل هناك أمر خطأ؟)
قال لي:(لا فقط دورية الشرطة مرت ووجدت سيارتك متوقفة في مكان غريب..خارج موقف الزوار..و شككنا أن تكون مسروقة لما وجدنا صاحبها مقيم بمنطقة أخرى)
قلت:(متأسف..فقط كان الليل متأخر و لم أجد مكان شاغر و كنت مستعجل...سأقوم بتحريكها في أقرب فرصة)
قال:(لا بأس..آسف لأزعاجك مبكراً..يوم سعيد)
رددت:(يوم سعيد..شكراً)
هذا ترجمة لما دار بيني و بين ضابط البوليس...و أقارن بما قصصته يا ناذر..و...أتأمل!!!

الشفيع ..

Quote: شوف ليك طريقة شيل رقمك من الزول ده .. ما يقوم يدق عليك وأنت بره الخرطوم ويقول ليك بعد عشرة دقائق أنت عندي ... وبعدين ديل قتلوا الرجال النخوة شنو كمان ... أح يا بلد

يا خي الحمد لله العربية وموضوعا إنتهى تاني لو قال دايرني غلا عشان يدخلني الحراسة بي سبب البوست دا ..!

اغرب ضابطين اقابلم في حياتي الأول النقيب الفي قصة الجريو ديك والتاني الرائد دا ..!

زمان ياناذر حبوبتى السره الله يرحما كانت بتقول(البوليس شوك كتر)بكسر الكاف والتاء واظنها دى واحده من سمات البوليس فى بلدانا المضروبه دى لانه البوليس فى الدول المحترمه بيحرص على علاقته مع الناس وبيشحعم على المساهمه فى محاربة الجريمه..المؤسف ان ما يحدث فى بلادنا لن يؤدى الا الى(قلة المروه)بين الناس وقلبى على وطنى..

حبيبنا زياد .. كيف أخبارك وعامل كيف مع العود ؟!

Quote: ناذر..كيفك يا حبيب أها..أنا اقارن ليك بي عقليتنا في السودان و بي دول فيها حكم قانون و أحترام المواطن: يوم مشيت زيارة في الويكند لي واحد صاحبنا..المهم الونسة جرت مع الشباب و قال لي يا زول بيت و أمشي الصباح..أصلو تاني يوم أجازة و كدا..المهم نمتا..الصباح بدرييي..زي ستة وللا سبعة صباحاً دق جرس الموبايل.. رديت(ألو).. جاني صوت خواجا :(صباح الخير سيدي..معاي السيد زياد ج. عبدالله؟) رديت:(نعم أنا هو) قال:(أنا سينير الكونستابل(...) - ما عارف رتبة كونستابل بتعادل عندنا بالعربي شنو - من براماتا بوليس ستيشن..هل تملك سيارة رينولت كليو باللوحات (...)؟ قمت مخلوع من السرير و قلت:(نعم..هذه سيارتي) قال:(و أين السيارة متوقفة الان؟). قلت:(في منطقة تلوبيا ..لماذا؟) قال:(في شارع (...) في تلوبيا؟ قلت:(نعم...قضيت الليلة هناك و سيارتي في الشارع..هل هناك أمر خطأ؟) قال لي:(لا فقط دورية الشرطة مرت ووجدت سيارتك متوقفة في مكان غريب..خارج موقف الزوار..و شككنا أن تكون مسروقة لما وجدنا صاحبها مقيم بمنطقة أخرى) قلت:(متأسف..فقط كان الليل متأخر و لم أجد مكان شاغر و كنت مستعجل...سأقوم بتحريكها في أقرب فرصة) قال:(لا بأس..آسف لأزعاجك مبكراً..يوم سعيد) رددت:(يوم سعيد..شكراً) هذا ترجمة لما دار بيني و بين ضابط البوليس...و أقارن بما قصصته يا ناذر..و...أتأمل!!!

غايتو ما عارف لكن القصة دي لو حصلت هنا تاكد إنو ما في زول بيضرب ليك لأنو ما حا يعرفو سيد العربية دي أصلا .. انا بسأل الضابط بقول ليهو دخل رقم العربية في سجلات المرور عشان تعرف سيدا وعنوانو .. والضابط بيقول لي .. خليك من دا وركز معاي !!

لو دا حصل عندنا بيجوا ناس الدورية ينزلوا عسكري بي كلاشنكوف ينتظرك لحدي ما تجي ولو حظك منيل واسود وجيت ولقيت العسكري قاعد إحتمال كبير يرشك بي كلاشو عشان تقتنع وعشان تاني ما تضيع وكت الحكومة ساي !! ولو حظك كويس والعسكري ما رشاك حا يوديك القسم لي ضابط ينهزرك ويمهزرك ويمسح بيك الواطة وفي النهاية يديك كمية من الإيصالات بما يعادل زي مية دولار كدة مخالفات ..!

توقفوا عرباتكم في الصقيعة ساااي وتمشو .. إنتو قايلين الشرطة دي في خدمتكم ولا شنو ؟؟!!

صراحة كدة الرائد دة كان تعامله معاك كويس رغم انه كرر ليك انه بلاغاتكم كترت

ياخى خف على ناس البوليس وان كنت اشك بانك سوف تتخلى عن حسك الصحفى ..........

ناذر انا عايزك فى موضوع خاص لك فيه باع طويل ( غير ناس البوليس) ما عارف طريقة الاتصال بالخاص كيف ...ضرورى

كن بخير

سلام يا دكتور ..

Quote: ..المؤسف ان ما يحدث فى بلادنا لن يؤدى الا الى(قلة المروه)بين الناس وقلبى على وطنى..

ودا الحاصل والحصل بالنسبة لي مروءتي أنا على الأقل ..!!

سلام يا حامد رجل أعمال الجريو ..!!

Quote: صراحة كدة الرائد دة كان تعامله معاك كويس رغم انه كرر ليك انه بلاغاتكم كترت

كلامك دا(بلاغاتكم كترت) ذكرني بي موقف لذيذ جدا ..

نهاية التسعينات في فترة بتاعت اقل من تلاتة شهور البلد إتملت عربات أتوس الكورية .. كانت موضة .. أخوك كان عندو واحدة .. يوم كدة في شارع الصحافة زلط بتاع ركشة عصرني وأنا عصرتو المهم وقفنا برة الشارع والشكلة دورت .. واحد جا عامل فيها ناقش قال لي : بي صراحة إنتو سواقتكم كعبة شديد .. أنا طبعا إستغربت !! قلت ليهو نحن منو ؟!.. قال : إنتو ناس عربات الأتوس !!

Quote: ناذر انا عايزك فى موضوع خاص لك فيه باع طويل ( غير ناس البوليس) ما عارف طريقة الاتصال بالخاص كيف ...ضرورى

معقولة ما عارف الطريقة وليك تلاتة سنة في المنبر يا حامد ههههه

تعرف لو إجتهدت شوية كدة وضغطت على البروفايل صدقني حا تلقى الدايرو ..

أما لو ما داير تجتهد ممكن بس تجدع حاجة هنا [email protected]

قصرت معاك ..!!؟!

سلامات ياناذر ... والله سردك ممتع ومحنك عجيبة

Quote: وقالوا ماشين المرور يشوفوا صاحبا منو ويشوفوا لو فيها بلاغ أو كدة .. وقاموا نزلوا واحد من العربية شايل ليهو رشاش يقعد يحرس العربية ودوروا مشوا ..!

إنتو البلد ما قالوا فيها بترول وطفرة .. وكاميرات في الشوارع لزوم التغطية الأمنية وكدا .. وين الإتصالات وغرف العمليات !!؟

Quote: انا بسأل الضابط بقول ليهو دخل رقم العربية في سجلات المرور عشان تعرف سيدا وعنوانو .. والضابط بيقول لي .. خليك من دا وركز معاي !!

.. هههها ..

تعرف ياناذر هنا في السعودية من اول الدروس الإتعلمناها... حكمة جحا ذاتا
زمان قالوا كان في عمليات نهب للحجاج في الحجاز ..لانو وسائل السفر بين مكة والمدينة كانت بدائية والطرق ما معبدة وكدا .. آها لمن جا الملك عبد العزيز الله يرحمو قام حارب المسألة دي بكل قوة وحسم .. يجي الشليق الذيك يقوم يلقي ليهو شوال تمر مرمي في الشارع يعمل فيها شاطر ( بعدما كان بقلعها من صاحبها زاتو) يعمل فيها مواطن صالح يمشي يبلغ يقول ليهم ياخوانا في شوال تمر في الشارع في الحتة الفلانية .. يقوموا يزرزروه ليك كيف عرفت إنو فيها تمر؟... يقول هبشتها بيدي ... يقطعوا ليه يدو الجانية( طبعا مبالغة ) المهم يأدبوه عشان تاني كان لقي شنو داك لا يمش جنبه لا يهبشه لا يزعج السلطات... اها من ديك وعيك
صنفرة علي قولك
ياخي ما تشوف لينا معاك في (صحافتك) الفيها غبار وتراب وأسمنت دي

عارف .. قبل فتره كنت شايف عربيه واقفه في مكان واحد في ميدان كبير في المنشيه قصاد مطعم مشهور
كلما اجي ماري ألقي العربيه واقفه ومافي زول .. كم يوم بالطريقه دي .. العربيه تابعه لبعثة ال UN
الموضوع دا عمل لي ساحوته في راسي .. طوالي مشيت قسم الرياض بلغت عنها
اخدوا بياناتي واقوالي .. وجاء معاي تيم من المباحث للموقع .. عملوا معاينه للعربيه ومشوا
عملوا اتصالاتهم مع ناس ال UN واتضح انها متعطله ومراقبة ذاتو .. لكن كيف ما عارف

......

بالمناسبة يا ناذر عدم اغاثة الملهوف او المتعرض للموت او لجريمه ح تقع عليهو جريمة يعاقب عليها القانون
يعني اذا رافضت تساعد زول محتاج ليك وقلت انا مالي ؟ دي جريمة تعاقب عليها
طبعا بشرط انه التدخل وتقديم المساعدة دا ما يضر بيك انت
طبعا في القوانين الغربيه الكلام دا مافي .. واي زول بشوف زول بغرق بقول انا مالي

لك التحايا

قبل ما ارد خلونا نخت المساهمة دي :

Quote: lslum alukm Uats Nader I really like your story, I left Sudan in 1991 i grow up in khartoum 3 , iknow so many people in Nadi alssura , Khaild Bshier and Adel abueaz were my best friends, and so many other nice people like you, ialmost read every thing at sudanese onlineline, any way back to your story is is all about customer services and Mhinai. Ilive in Sterling Virginia US, I have a real case ,two cars parkings were useed for more than one month one chevy had a flat tire the other one Iguess the in a vaccation, Iwant o report them to the local police But sometimes the answer will We knew about every thing do you want to tell us our job...so Iam still strugling to get my car every moring at 4.00 am.becuse it is still Very dark, so thank you for the nice story, keep doing the good job.. Mohamed Mergani Khogali Va

سلام يا نازر
وسلامتك !
القصة دي ورتني لحد وين بلادنا متأخرة
ومحتاجين سنين طويلة جدا عشان نصل لي ربع الوصلوه الناس هنا
تصدق هنا بي تكة زر واحدة البوليس او البوليسة تعرف عربيتك وانت ماشي ما جايب خبر !!
يعرف اسمك منو وساكن وين ـ وموديل العربية ـ
مرخصة ولا ما مرخصة ـ عندك رخصة ولا ما عندك ونوع رخصتك شنو
ـ واشتريت العربية متين ومن منو !! ـ
والعربية صالحة لحد متين ـ واخر مرة عملت ليها عمرة متين
ـ والعربية مؤمنة ولا لا ومؤمنة في يات شركة ونوع تامينك شنو
ـ ولمن تسوق مفروض تكون لابس نضارة ولا ما لابس
ـ وعليك غرامة ولا لا ـ دفعتها ولا لسع
و... و.... !!!!

Quote: يمين بالله الرائد دا عاين لي كدة .. أنا قلت حا يديني شلوت في بطني !!

Quote: توقفوا عرباتكم في الصقيعة ساااي وتمشو .. إنتو قايلين الشرطة دي في خدمتكم ولا شنو ؟؟!!

Quote: قال لي:(لا فقط دورية الشرطة مرت ووجدت سيارتك متوقفة في مكان غريب..خارج موقف الزوار..و شككنا أن تكون مسروقة لما وجدنا صاحبها مقيم بمنطقة أخرى) قلت:(متأسف..فقط كان الليل متأخر و لم أجد مكان شاغر و كنت مستعجل...سأقوم بتحريكها في أقرب فرصة) قال:(لا بأس..آسف لأزعاجك مبكراً..يوم سعيد) رددت:(يوم سعيد..شكراً) هذا ترجمة لما دار بيني و بين ضابط البوليس...و أقارن بما قصصته يا ناذر..و...أتأمل!!!

عزيزي ناذر الفقرة الأخيرة من المقتبسات أعلاه تذكرني بقصة الفارسي الذي خبر عدل عمر ووجده نائما تحت الشجرة فقال مقولته ( لقد عدلت فنمت ياعمر ) ،فهؤلاء الرجال أسسوا نظاما فتحقق لهم هذا التكريم والاحترام أما نحن فليس لنا إلا ما جاء في الفقرتين أعلاه لأننا لم نؤسس نظاما فكان حقا علينا أن نعامل بهذا الأسلوب فرجال الشرطة أنفسهم يشعرون بالغبن من رجال الجيش والساسة الذين يسيطرون على مقاليد الأمور ويتحكمون بهم ولا يملكون الجرأة أو الطموح لبلوغ شأوهم فيعوضوا عن ذلك باضطهاد المواطن المسكين ويمارسوا كل أنواع السادية معه فمجتمعاتنا تحكمها القوة الحسية الغليظة وهي دائما راجحة ليس فيها توازن مما يجعل الظلم أهم مظاهر هذا الرجحان وللأسف هذا الأمر يقوم به المتعلمون من الطرفين المهيمن والخانع ومن بينهم المحامي والقاضي والصحفي ورجل الأعمال كذلك ضابط الجيش والسياسي وضابط الشرطة وهم معرفيا يدركون خطأ هذه المعادلة ولا يفعلون شيئاً بل يكتفون بما توصلوا إليه من حلول فردية .

أبوحمــــــــــــــــــــــــــــــــــــــــــــــــــــد

سلامات يا ناذر ومشتاقين

قصة محبطة ومؤسفة وفعلآ مافي زول بلومك تاني لو مشيت جنب الحيط

معقولة الناس دي لسه بتتعامل مع الناس كده؟؟؟

عمومآ كتر خيرك إنك ختيتنا في الصورة

وكده أخدنا تجربة كأنها مرت بنا تمامآ

خالص الود

Quote: قام شال موبايلو وضرب لي رقم عرفت بعد داك إنو ضرب لي زول في مكافحة سرقة السيارات .. وراهو الحاصل ولون العربية بعد شوية سألني : إنت العربية نمرتا كم ؟! قلت ليهو ما عارفا .. قال لي خلاص شيل رقم تلفوني دا وامشي جمب العربية ومليني رقما ..! طلعت منو وأنا زهجان وقافلا معاي ..! أنا وراي مشاوير وحاجات مهمة والضابط دا بدل يرسل واحد من العساكر بتاعينو يقوم يرسلني أنا .. انا ذنبي شنو ؟!

Quote: ناذر تحياتى رجال البوليس وصلوا العربية وحرسوها بشرطى مسلح بكلاشنكوف، و العجيبة لم يكلفوا أنفسهم يكتبوا نمرة العربية وموديلها؟ !!

جاييكم ..

يا ناذر رسلت ليك ايميل اديه طلة

سلام الشفيع ..

Quote: إنتو البلد ما قالوا فيها بترول وطفرة .. وكاميرات في الشوارع لزوم التغطية الأمنية وكدا .. وين الإتصالات وغرف العمليات !!؟

البترول مشى مع الجنوب .. الكاميرات لسع ما وصلوها في نص الحلة .. الإتصالات وغرف العمليات قاعدين وجو ونزلوا عسكري شايل كلاشنكوف وكدة ..!!

Quote: يجي الشليق الذيك يقوم يلقي ليهو شوال تمر مرمي في الشارع يعمل فيها شاطر ( بعدما كان بقلعها من صاحبها زاتو) يعمل فيها مواطن صالح يمشي يبلغ يقول ليهم ياخوانا في شوال تمر في الشارع في الحتة الفلانية .. يقوموا يزرزروه ليك كيف عرفت إنو فيها تمر؟... يقول هبشتها بيدي ... يقطعوا ليه يدو الجانية( طبعا مبالغة ) المهم يأدبوه عشان تاني كان لقي شنو داك لا يمش جنبه لا يهبشه لا يزعج السلطات... اها من ديك وعيك

والله يا جماعة غايتو طمنتوني أنا قايل روحنا برانا لكن ما دام البلدان الحوالينا كلها زينا فنمشيها كدة وموت الجماعة عرس ..!

Quote: ياخي ما تشوف لينا معاك في (صحافتك) الفيها غبار وتراب وأسمنت دي

انا اساسا شغال في مجلة (اليوم السابع) البتعنى بي شئون الإعمار والمباني وكدة ..
فما غريبة أجي من الشغل وهدومي بالطريقة دي ..!

نوفل ..

Quote: عارف .. قبل فتره كنت شايف عربيه واقفه في مكان واحد في ميدان كبير في المنشيه قصاد مطعم مشهور كلما اجي ماري ألقي العربيه واقفه ومافي زول .. كم يوم بالطريقه دي .. العربيه تابعه لبعثة ال UN الموضوع دا عمل لي ساحوته في راسي .. طوالي مشيت قسم الرياض بلغت عنها اخدوا بياناتي واقوالي .. وجاء معاي تيم من المباحث للموقع .. عملوا معاينه للعربيه ومشوا عملوا اتصالاتهم مع ناس ال UN واتضح انها متعطله ومراقبة ذاتو .. لكن كيف ما عارف

غايتو بعد البوست دا إياك تمشي تتشالق تاني ..! الظروف ما معروفة يمكن تلافي الضابط بتاعي دا بي هناك يندمك ليو ..!!

Quote: بالمناسبة يا ناذر عدم اغاثة الملهوف او المتعرض للموت او لجريمه ح تقع عليهو جريمة يعاقب عليها القانون يعني اذا رافضت تساعد زول محتاج ليك وقلت انا مالي ؟ دي جريمة تعاقب عليها طبعا بشرط انه التدخل وتقديم المساعدة دا ما يضر بيك انت

بس عندنا هنا أكيد حا يضر بيك ..!

خالد العبيد ..

Quote: سلام يا نازر وسلامتك ! القصة دي ورتني لحد وين بلادنا متأخرة ومحتاجين سنين طويلة جدا عشان نصل لي ربع الوصلوه الناس هنا تصدق هنا بي تكة زر واحدة البوليس او البوليسة تعرف عربيتك وانت ماشي ما جايب خبر !! يعرف اسمك منو وساكن وين ـ وموديل العربية ـ مرخصة ولا ما مرخصة ـ عندك رخصة ولا ما عندك ونوع رخصتك شنو ـ واشتريت العربية متين ومن منو !! ـ والعربية صالحة لحد متين ـ واخر مرة عملت ليها عمرة متين ـ والعربية مؤمنة ولا لا ومؤمنة في يات شركة ونوع تامينك شنو ـ ولمن تسوق مفروض تكون لابس نضارة ولا ما لابس ـ وعليك غرامة ولا لا ـ دفعتها ولا لسع و... و.... !!!!

انا متأكد الحاجات دي أنحنا عندنا ليها ..!

بس ما عارف ليه الضابط دا ما لجأ ليها ..!!

سلام أبو حمد ...

Quote: عزيزي ناذر الفقرة الأخيرة من المقتبسات أعلاه تذكرني بقصة الفارسي الذي خبر عدل عمر ووجده نائما تحت الشجرة فقال مقولته ( لقد عدلت فنمت ياعمر ) ،فهؤلاء الرجال أسسوا نظاما فتحقق لهم هذا التكريم والاحترام أما نحن فليس لنا إلا ما جاء في الفقرتين أعلاه لأننا لم نؤسس نظاما فكان حقا علينا أن نعامل بهذا الأسلوب فرجال الشرطة أنفسهم يشعرون بالغبن من رجال الجيش والساسة الذين يسيطرون على مقاليد الأمور ويتحكمون بهم ولا يملكون الجرأة أو الطموح لبلوغ شأوهم فيعوضوا عن ذلك باضطهاد المواطن المسكين ويمارسوا كل أنواع السادية معه فمجتمعاتنا تحكمها القوة الحسية الغليظة وهي دائما راجحة ليس فيها توازن مما يجعل الظلم أهم مظاهر هذا الرجحان وللأسف هذا الأمر يقوم به المتعلمون من الطرفين المهيمن والخانع ومن بينهم المحامي والقاضي والصحفي ورجل الأعمال كذلك ضابط الجيش والسياسي وضابط الشرطة وهم معرفيا يدركون خطأ هذه المعادلة ولا يفعلون شيئاً بل يكتفون بما توصلوا إليه من حلول فردية .

إنت كدة لخصت البوست كلو وجبت الخلاصة ..

تسلم

سلام أشرف ..

Quote: سلامات يا ناذر ومشتاقين قصة محبطة ومؤسفة وفعلآ مافي زول بلومك تاني لو مشيت جنب الحيط معقولة الناس دي لسه بتتعامل مع الناس كده؟؟؟ عمومآ كتر خيرك إنك ختيتنا في الصورة وكده أخدنا تجربة كأنها مرت بنا تمامآ خالص الود

كيف اخبارك ...

أي والله لسع بيتعاملوا كدة ..
وتاني لو شفت زول بيضبحوهو شخخخخخ تمشي في طريقك زي الماشفت حاجة ..!

نادر الفضلي ..

Quote: تحياتى رجال البوليس وصلوا العربية وحرسوها بشرطى مسلح بكلاشنكوف، و العجيبة لم يكلفوا أنفسهم يكتبوا نمرة العربية وموديلها؟ !!

الشالوا رقم العربية في الأول ديك ناس الدوريات ..
اظن لمن وصلوا القسم نسوا يدوا الضابط دا رقم العربية ..
شالوا الرقم معاهم ..!!
أو ملوهو للضابط لكن الضابط نساو ..!!

سلام يا حامد ..

Quote: يا ناذر رسلت ليك ايميل اديه طلة

رديت ليك في وكتو ..

راجع إيميلك وفتش في الجنك ميل إنشاء الله بتلقاو ..

أو أرسل ليك رد تاني بدل فاقد ..!!

يا ناذر رسله تانى أنا الجنك بدلتو عميانى.......ضرورى

شكرن

سلام يا ناذر

تعرف زمان كنت ساكن مع نسابتي
في امتداد الدرجة التالتة، يوم صحيت الصباح ماشي اصلي الصبح
في الجامع يا زول لقيت ليك عربية كدة من العربات الكورية دي
اسمها شنو كدة المهم كانت واقفة جنب الباب لدرجة اني اتحكيت مع الحيطة عشان اقدر
أمرق من الباب. المهم مشيت صليت وجيت والعربية واااقفة،
زي الساعة ستة وتلت كدة وانا بشرب في الشاي الباب دق
مشيت فتحت الباب لقيت عسكري بي كلاش
وفي نص الشارع هناك بوكس دورية راكب فيهو نقيب
ومستف عساكر أها العسكري قال لي:
السلام عليكم. إنت ساكن هنا
(والغريبة أنا جاي طالع بي جلابية النوم وشايل جك اللبن)
قلت ليهو: نعم
العسكري: العربية دي حقت منو؟
أنا: والله ما عارف أنا جيت أمبارح بعد 11 ونص بالليل ما كانت موجودة
وانا طالع صلاة الصبح لقيتا هنا.
العسكري: طيب مالك ما بلغت؟
أنا: أبلغ وانا نايم يعني؟ و أبلغ ليه زاتو؟
ما إمكن بتاعة واحد من الجيران، بعدين هي متين أصبحت؟
الضابط من داخل السيارة: في شنو يا فلان؟
العسكري: مافي حاجة يا سعادتك
أنا: أها دايرين مني حاجة عشان أنا عندي مواعيد؟
العسكري: لا خلاس بس العربية دي مسروقة. ممكن كباية شاي؟
أنا: جداً ... سادة ولا بي لبن.
العسكري: سادة
ومشيت الشغل وجيت لقيت العربية مافيشة
سلام يا سعادتك ولزوارك الكرام

والله محن
ضحكته لمن فترت
كر علينا
لكن موضوع الزول الوقع من الحمااااااااااار ابداع
يعنى يندموا الزول على المساعده

فى مره جيت سجن النساء فى امدرمان عندى تبرعات دايره اسلمها لمنظمه جوا السجن حقت اطفال المسجونات
ودايما بصور اى شى عشان انزله فى الموقع الخاص بالشغل الخيرى
واللحظه الوقفت اصور اليافطه الهى فى نص شارع الزلط
جو الحراس لفحوا الكاميرا والشنطه وموبايل وقدامنا على المأموووووووووووور
يا ناس يا جماعه
وكمان لغتى شكلها جاطت الحكايه
لكن المسئول طلع زول مهذب
قعدنى وفهم الحاصل واعتذر عن الجماعه قال لى ديل اتجاه واحد
ورجعوا لى حاجاتى
تانىىىىىىىىىىىىىىىى سجن امدرمان ما بمر بشااااااااارعه زاطووووووووووووووو بعد الحصل
وتبرعات ليهم خليتها


ناذر بوست ظريف والله برغم ان حقيقته مؤسفه

يا حامد ..

Quote: يا ناذر رسله تانى أنا الجنك بدلتو عميانى.......ضرورى

مشيت أرسلو تاني ما لقيتو !!
لكن والله العظيم أنا متأكد إني رسلت ليك ..
حتى بالإمارة جامع أبونا البرعي ..

معليش رسل لي تاعشان أعرف إيميلك وأراسلك ..

إبراهيم قناوي :

Quote: أنا: أها دايرين مني حاجة عشان أنا عندي مواعيد؟ العسكري: لا خلاس بس العربية دي مسروقة. ممكن كباية شاي؟ أنا: جداً ... سادة ولا بي لبن. العسكري: سادة

والعسكري الفجغان دا طبعا شربا براو ولا أدى الناس المعاو في العربية مش ؟!

قصتك دي معناها تاني الزول لو لقة عربية واقفة جو حوش بيتم زاتو يعمل أضان الحامل طرشاء ..!

سلام رانية ..

Quote: فى مره جيت سجن النساء فى امدرمان عندى تبرعات دايره اسلمها لمنظمه جوا السجن حقت اطفال المسجونات ودايما بصور اى شى عشان انزله فى الموقع الخاص بالشغل الخيرى واللحظه الوقفت اصور اليافطه الهى فى نص شارع الزلط جو الحراس لفحوا الكاميرا والشنطه وموبايل وقدامنا على المأموووووووووووور يا ناس يا جماعه وكمان لغتى شكلها جاطت الحكايه لكن المسئول طلع زول مهذب قعدنى وفهم الحاصل واعتذر عن الجماعه قال لى ديل اتجاه واحد ورجعوا لى حاجاتى تانىىىىىىىىىىىىىىىى سجن امدرمان ما بمر بشااااااااارعه زاطووووووووووووووو بعد الحصل وتبرعات ليهم خليتها

انا طبعا حصلت لي قصة تاني منها بقيت لمن اجي أصور إتلفت يمين وشمال وتحت وفوق كمان حتين أخد لقطات ..

في عساكر كدة أجارك الله كل ما يشوفوا ليهم كاميرا طوالي يتحسسوا مسدساتم ..!

يوم كدة كنت قريب من مجمع اليرموك الصناعي جهة أبو أدم .. حصل إنفجار ضخم ونيران جوة المجمع .. أنا من غير وعا جيت جمب بوابة المجمع .. لقيت حتى الحراس الشمار كتلم وخلوا الحراسة وجرو محل الحريق .. وانا قلت يا أبو النيز الليلة يومك .. إنقشطت جو المجمع وشغال تصوير في الحريق وفي القدامي .. لمن جيت طالع لقيت البلد مليان أمن وعساكر وأستخبارت وحرس صيد ومش عارف إيه !!

شافوني كدة قالوا لي : دا شنو يا زول ؟ كنت وين إنت ودخلت بي وين وجاي من وين ؟!

شفتي نوعية الأسئلة التعسفية دي ؟! وانا بي كل براءة والملائكة الصغار البنشوفا في أفلام الكرتون ديك لافة حول راسي قلت ليهم : دخلت بي هنا وكنت بصور في الحريقة جوة !!

الجماعة تلبوا فيني واحد قلع الكاميرا وواحد سألني قال لي شغال شنو إنت يا زول ؟ وواحد مط يدو إتجهز عشان يديني بونية في وشي !! قلت ليهم أنا صحفي .. وريتم البطاقات شالوها وشالوا العدة وطردوني ..!

المهم الشغلة إتحلت بعد كم يوم كدة لكن منها إتعلمت زي ما قلت ليك لو داير اصور لي اي حاجة الا اعمل الحاجات القلتهم ليك فوق ..!

Quote: قبل ما أطلع من القسم الضابط قال لي أنا بتصل بيك لو طلعت العربية دي مسروقة أو ما مسروقة .. قلت ليهو سمح ..!! جيت جمب العربية وضربت للضابط مليتو رقم العربية وقفلت الخط ..

** ود محمد الخليفه..
** ســلام ,, وصباحك خير..
## مثل هذا العمل الذى قمت به فى الدول التى تحترم شعوبها وتحترم القانون :- يُسمى الحس الأمنى العالى للمواطن لتجنب وقوع الجريمه قبل حدوثها أو إكتشاف اول خيوط الجريمه عند حدوثها والعثور على الأدله قبل طمسها..
## مثل هذا العمل يُكرم صاحبه بمنحه شهاده تقديريه وحافز إى كان نوعه مادى أو عينى "فى شكل هديه"..
** الذى أغاظنى من مثل هذا الضابط :- إستفزازه وتعليماته إليك بأن تذهب عند العربيه وتمليهو الرقم ,, طيب الدوريه الجات دى من أهم اولوياتها :- أخذ رقم العربيه ,, الإتصال بالعمليات لمعرفة صاحبها ,, وأخيراً يجب أن تُسحب العربيه الى حوش القسم المُختص..
## أنــه زمن المهازل ,, بكلامك دا الواحد يعمل حميل من إى فعل خير قـد يقود الى مركز شرطه..
(ودام الود بيننا)
(ابو محمد فؤاد) - الماكيكى..

## كـسـره :- إنتو ناس الشُرطه الكمبيوترات العندهم دى جايبنها ليهم عشان يلعبوا بيها كوتشينه ولى فيها بيانات عن العربات والمطلوبين ؟؟؟؟ !!!!!

هلا الما كيكي

Quote: مثل هذا العمل الذى قمت به فى الدول التى تحترم شعوبها وتحترم القانون :- يُسمى الحس الأمنى العالى للمواطن لتجنب وقوع الجريمه قبل حدوثها أو إكتشاف اول خيوط الجريمه عند حدوثها والعثور على الأدله قبل طمسها..

وفي الدول الما بتحترم شعوبا زي هنا وزي السعودية دا بيسموهو شلاقة والزول البيتصرف كدة بيسموهو متلقي حجج !!

Quote: مثل هذا العمل يُكرم صاحبه بمنحه شهاده تقديريه وحافز إى كان نوعه مادى أو عينى "فى شكل هديه"..

ومثل العمل دا لو هنا بيدو الزول العملو شلوت في بطنو وفي السعودية بيطفشوهو برة البلد !!

Quote: طيب الدوريه الجات دى من أهم اولوياتها :- أخذ رقم العربيه ,, الإتصال بالعمليات لمعرفة صاحبها ,, وأخيراً يجب أن تُسحب العربيه الى حوش القسم المُختص..

ناس الدورية شالوا رقم العربية لكن ما عارف عملو بيهو شنو ؟!! أظن إتصلوا بالرقم من موبايلم والرقم ما جمع قاموا رموهو !!
في السعودية ما عارف بيتصرفوا كيف في الحالة دي !!

Quote: إنتو ناس الشُرطه الكمبيوترات العندهم دى جايبنها ليهم عشان يلعبوا بيها كوتشينه ولى فيها بيانات عن العربات والمطلوبين ؟؟؟؟ !!!!!

إنت شفت الكمبيوترات العندهم ولا بتتكلم ساي !!

غايتو يا الما كيكي .. نقول شنو .. بس نصبر ونسأل الله السلامة واللطف ..

تسلم ...

سلام يا ناذر

Quote: انا اساسا شغال في مجلة (اليوم السابع) البتعنى بي شئون الإعمار والمباني وكدة .. فما غريبة أجي من الشغل وهدومي بالطريقة دي ..!

ناذر يا اخوى الصحفى يا بكتب يا بصور انت شكلك كده كنت بتبنى عديل كده!!!!

سنة 92 وانا جاى من هولندا واحدمن ضباط الجوازات كان بيملأ فى معلوماتى
لاحظت انه كتب مكان العمل جامعة امدرمان الاسلامية وانا كنت اعمل بجامعة
جوبا. انا شهامة او شلاقة قلت اصلحو قلت ليهو جامعة جوبا فوضع القلم
جانبا ونظر الى نظرة ايقنت ان ما سياتى بعدها لن يكون خيرا
قمت قلت ليهو والله العظيم انا كنت بره البلد يمكن نقلونى واناما جايب خبر
واكيدالحكومة ادرى منى بمكان عملى.
طبعا ضحك واعتذر وخلص الاجراء.

فيااخى باس الشرطة السودانية ديل ابداع.

ارقد عافية.

ههههههههههههه


جاييك يا فوزي ..