حلم غريب بحاجة لتفسير : هل الرئيس حسني مبارك عندو بنات ؟ وأنور التكينة الجابو هنا شنو ؟؟!!!!

ما من عادتي أتذكر الاحلام البحلما .. اي حلم بحلمو بيكون حلم ديسبوزال يعني للإستهلاك ساعة النوم بس .. لكن الحلم الحلمتو أمبارح كان غريب جدا ...!

غريب لانو الحلم كان واضح جدا ومتذكرو تماما زي الفلم .. والحاجة التانية إنو الحلم دا حلمتو على جزئين .. حلم بالتقسيط وكدة !!..

الجزء الأول حلمتو أمبارح وأنا نائم ما بين الساعة خمسة العصر لحدي الساعة ستة ونص مغرب .. صحيت بعد داك وأنا مستغرب ومتمحن من الحلم .. ما اشتغلت بيهو كتير مشيت مشاويري وجيت بالليل رقدت نمت .. وبعد داك العرض التاني بتاع الحلم دور من محل ما وقف جبيل بالضبط !!.. زي التقول الحلم كان منتظرني !! والعرضين أو الجزئين مكملات لي بعض ..!!

حا احكي الحلم زي ما هو بالضبط ويا ريت لو جماعة تفسير الاحلام جو وفسروا لي الشفتو دا ..

وبرضو من غير العضوية البيلقى تفسير أرجو يراسلني في إيميلي [email protected]

Quote: حَدَّثَنَا أَحْمَدُ بْنُ حَنْبَلٍ حَدَّثَنَا هُشَيْمٌ أَخْبَرَنَا يَعْلَى بْنُ عَطَاءٍ عَنْ وَكِيعِ بْنِ عُدُسٍ عَنْ عَمِّهِ أَبِي رَزِينٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ((الرُّؤْيَا عَلَى رِجْلِ طَائِرٍ مَا لَمْ تُعَبَّرْ فَإِذَا عُبِّرَتْ وَقَعَتْ قَالَ وَأَحْسِبُهُ قَالَ وَلَا تَقُصَّهَا إِلَّا عَلَى وَادٍّ أَوْ ذِي رَأْيٍ))

ناذر صباحكـ خير

وجمعتكـ مباركة

عن نفسي ما بعرف أفسّر

لكن كدا شوف الزولة دي تابعتها فترة ولقيت تفسيرها كويس

http://www.facebook.com/?ref=home#!/pages/Ghada-Mazloum...t-mzlwm/103678137711

نازر.

بنات حسني مبارك معناه أنت بتتزكر أيامك الجميلة بقاهرة المعز.

أما أنور التكينة فهو كابوس، وأحتمال كبير تنضرب في صفقة تجارية.

Quote: أما أنور التكينة فهو كابوس، وأحتمال كبير تنضرب في صفقة تجارية.

يادينق دى قلبت فيها الهوبة عديل والله ...

الحلم بيبدأ وأنا في حتة غريبة .. خلا أو قرية أو حدود .. الكلام دا بالليل ..!! في طرمبة بنزين فيها عاملين إتنين قاعدين قداما (والعاملين ديل ما إتحركو من مكانم كلو كلو لحدي نهاية الحلم) ..!! أنا جيت طالع من الطرمبة دي شايل لي سرير تعبان ومرهق مشيت بعيد شوية من الطرمبة دي زي مية متر كدة وختيت سريري ورقدت فيهو وأنا بعاين للطرمبة .. وراي طوالي في بحر جاري وعلى يميني وأنا راقد في غرفتين لونم أبيض .. والحتة قاحلة وما فيها أي حاجة .. بعد شوية أنقرو الجا منو سايق عجلة .!!

جا زميلنا انور التكينة لابس ليهو رداء وقميص شاكيهو تحت الردا لونم الإتنين كاكي ولابس في كراعو بوت طويل وشراب لونو كاكي برضو .. زي لبس المغامرين الإنجليز زمان .. وقف عجلتو جمبي ونزل سلم علي وسلمت عليهو .. قلت ليهو الجابك هنا شنو ؟! قال لي جيت أصور !! قلت ليهو وينا كميرتك ؟! الزول طلع لي كاميرا بمبية لكن كبيرة قدر التلفزيون 14 بوصة .. وقال لي يا ها دي ..!! الزول بدا يصور .. بيصور في شنو أنا ما عارف .. الحتة ما فيها غير الطرمبة وسريري الراقد فيهو والأوضتين ووراي في بحر جاري ..!!

فضلت أعاين ليهو بعد شوية قام جاني قال لي أنا داير أقول ليك حاجتين .. قال لي أعمل حسابك من البحر الوراك دا لأنو غدار وإحتمال لو أنا نمت البحر يفيض ويغرقني !!! والحاجة التانية إنت عارف أنا جيت هنا أصور شنو ؟! قلت ليهو شنو ؟! قال لي الرئيس حسني مبارك عندو بتين وهم نازلين في الغرفتين ديل ..!! كل واحدة في غرفة .. وهسي هم أظنهم ناموا وأنا ماشي لمن يصحو ويطلعوا برة ناديني عشان أصورم ..! قلت ليو جدا يا أنور بناديك .. أنور طوالي ركب عجلتو وإتخارج ..!! والعجلة سبحان الله !! سريعة جدا أسرع من الموتر لأنو إختفى طوالي !!

عاينت للغرفتين وعاينت للطرمبة .. ما في شي غريب .. رقدت نمت وأنا بين نايم وصاحي سمعت جوطة وناس بتكورك : سرقو بت حسني مبارك !! حصلو الجماعة ديل !! صحيت لقيت في لمة جمب البحر والناس بتعاين في البحر ..! سألت واحد من الجماعة الحصل شنو ؟! قال لي إنت نايم وما شايف شغلك وفي ناس خطفوا بت حسني مبارك !!(مع إنو ما في زول مشغلني حسب علمي في الحلم) !! عاينت للطرمبة لقيت الاتنين ديلاك في نفس قعدتم ولا حتى إتحركو من مكانم ..!!

بعد شوية أنور التكينة جا تاني بالعجلة زعلان وهائج !!: يا خي انا ما قلت ليك خلي بالك من البنات ديل ؟ هسي خطفوا واحدة ؟! أنور هاج ودق جرس بعد شوية جات عجلة تانية وقفت أنقروا العجلة التانية السايقا منو ؟!!

دقيقة دقيقة .. قبل ما تنقروا أنا صحيت في الحتة دي .. ودا نهاية الجزء الأول من الحلم ..!!

نازر سلام


وأما الطلمبة فهي مؤشر لحالة (جفاف الطرمبات) ياعمك
وأماحسني مبارك والنيل والكلام ده كلو فده عندو علاقة بالسدود وأما أنو التكينة فغالباً
هو اسامة عبدالله بس تشابه عليك البقر


ـــــ
تاني ماتنوم بين خمسة وستة يانازر

Quote: والعجلة سبحان الله !! سريعة جدا أسرع من الموتر لأنو إختفى طوالي !!

ياخ والله شوقتنا لمشوار مشاورين في عجلة انو التكينة وفلاش فلاشين من الكاميرا ام صندوق ورنيش دي لوووووووول
يا زول حلمك ده انا كمفسر احلام سابق هو حلم سياسي مية في المية..
الطرمبة ده بترول الجنوب

والاثنين القاعدين وما اتحركو ديل ياهم ناس الحركة الشعبية
وبنات حسني مبارك الاثنين ديل واااحدة منهم (حصة مصر في مياه النيل) والثانية دي الانقاذ...
انت زااتك في الحلم م كنت ناذر فقط بل كنت (الشعب السوداني الفضل)
انور التكينة (يمثل اعلام حكومي) والتلفزيون القومي)
انهجامك كشعب عندما اندهشت لمن الناس ديل قالوا ليك لييييييه ما دافعت
هي دلالة حلمية في محاولة توريط وانت (النائم) في شكل شعب فضل ان تدافع عن بنات حسني الواحدة منهم هي الانقاذ لوووووووووول

ولسع حلملك ده فيهو تفسيرات قد نعود اليها لاحقا

.
.

الدقيقه تمت وزادت كثير يا ناذر


جمعه مباركه
.
.
.

عاين يا ناذر

البحر واللون الأخضر {زي الكاكي اللابسو أنور دي مثلاً} عند إبن سيرين تفسيرو كويس
وبدل على الخير والإنفراج واللون الأبيض برضو كويس
وإن شاءالله ح يكون خير

رجعت بالليل من مشوار إتعشيت خفيف ورقدت نمت لقيت باقي الحلم داك في وشي طوالي مع أول شخرة !!

من وقفة العجلة التانية ...

العجلة التانية جا سايقا حسني مبارك زاااتو ..!!

لابس زي لبس أنور التكينة وفي الحلم بدا شبابي شوية طوالي دخل قدامي في دراما : بنتي ..!! يا لهوي !! وجلكسات المسلسلات ديك وأنور التكينة خايف وأعصابو بايظة وأنا زاتي أعصابي باظت .. وفضلت أهدي في حسني مبارك وأقول ليهو أصبر وحا نلقاها ليك وهو يعييييييييط !!! بعد شوية قال لي أنور أمشي نادي بتي التانية ..!! أنور سرعة سرعة مشى واحدة من الأوضتين جا وجاب معاهو البت التانية .. الغريبة بت حسني مبارك التانية كانت سمرا تشبه السودانيين لكن بتتكلم مصري ..!! طوالي وقعت في حضن أبوها وقعدت تعييييييط : أخدوها اختي يا بوي !! بي لهجة صعيدية ..!! وحسني مبارك بيحاول يهدي فيها .. قال ليها انتي بس أعملي حسابك وما في حد حا ياخدك مني ..!

بعد شوية حسني مبارك قبل علي وقال لي إنت ما شايف شغلك وإنت قاعد ساكت (وأنا مستغرب شغلي شنو والمشغلني منو!!) .. أنور التكينة جا يتدخل حسني مبارك نهرو ليك وقال ليهو إنتو الإتنين أنا حا أأدبكم وقام نادى : يا عمر سلمان ؟!! يا عمر سلمان ؟؟! جات ليك عجلة تالتة وقفت (أنا ما عارف قصة العجلات في الخلا داك شنو!!) جا ليك عمر سلمان واقف .. (أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي) ..!! حسني مبارك قال لي عمر سلمان أحرس لي بتي دي وشوف لي البت التانية لو في طريقة ترجع ..! عمر سلمان مشى على البحر ومعاهو أنور .. عمر سلمان بيعاين للبحر وأنور يصور سااااااي في البحر وأنا واقف متمحن ..!! بعد شوية جا عمر سلمان قال لي حسني مبارك خلاص أنا عرفتها بتك مشت وين .. إنت أمشي إرتاح وأنا الصباح برجعا ليك .. (ولد دا .. والله كان بيرجعا ليو ما عارف) ..!!

حسني مبارك دور عجلتو وإتخارج وأنور التكينة ردف بت حسني مبارك التانية في عجلتو ووصلا أوضتا ودي كان أخر مرة أشوف أنور التكينة في الحلم !!

بعد شوية عمر سلمان قال لي أنا حا أسامحك على تقصيرك في شغلك لكن لازم تخلي بالك من بت الريس التانية (وأنا لحدي هسي مستغرب شغلي في الحلم كان شنو والشغلني منو !!) قال لي لو شعرت بي أي حركة كدة ولا كدة بس كورك لي وأنا بجيك على طول ومعاي التعزيزات ..!!

ودور عجلتو وإتخارج على كدة ..!!

عاينت لي الطرمبة لقيت الطير ديلاك قاعدين ولا شغالين بالموضوع عاينت للبحر لقيت البحر قرب شديد من سريري !! داير احرك السرير بعيد من البحر السرير أبى يتحرك .. دقيت طناش ونمت على كدة ..!!

صحيت على حاجة بتتحرك في جسمي (النوم والصحيان دا كلو في الحلم يا اخوانا) !! صحيت لقيت في يدين كبار طالعات من البحر وجارة بت حسني مبارك دايرة توديها البحر والبت تكورك ..!! سرعة سرعة نطيت من السرير وقبضت البت وأنا بجر من هنا واليد ديك تجر من هناك البت تكورك :

ألحقووونييييييي وأنا أكورك يا عمر سلمااااااااان !!

ألبت تكورك : يا لهوييييييييييييي وأنا اكورك يا عمر سلماااااااان !!

بي هنا البت تسكـلـب : يا خراااااااشييييي !! وأنا بي هناك :يا أنور التكييييييييينااااااااا !!

اليد تجر على البحر وأنا أجر برة البحر وعمال الطرمبة زي المرسومين شايفننا لكن ما دايريين يتحركوا !!

البت تكورك : ألحقني يااباااااااا : وأنا أكورك : يا عمر سلمااااااااااان !!

بعد شوية جاني كف طاير !!

فتحت عيني لقيت المرة مخلوعة : قول بسسسسسسسسسم الله !! عمر سلمان دا منو البتكورك ليهو وش الصباح !!

أها يا جماعة دا كل الحلم من غير أي زيادات أو نقيصات مني ..!!

العندو تفسير اليجدعنا بيهو ..!!

داير تعمل لينا مشاكل مع المصريين يا ناذر تاني

سلام محمد الجيلي ..

Quote: ناذر صباحكـ خير وجمعتكـ مباركة عن نفسي ما بعرف أفسّر لكن كدا شوف الزولة دي تابعتها فترة ولقيت تفسيرها كويس

غادة مظلوم دي أنا برضو كنت متابعا في برنامج تلفزيوني كانت بتقدمو في قناة مصرية بتختص بالغيبيات هسي تقريبا واقفة أفتكر كان اسمها الحواس أو حاجة بالشكل دا ..

غايتو حا ارسل ليها أشوف لو عندها فكرة ..!!

مشكور كتير يا حبيبنا ..

طرمبة + لبس كاكي + بحر ببلع + كاميرا وصحافة + اختطاف بنت + حسني مبارك + عمر سليمان + تعزيزات + اتنين ممحنين = جاطت جاطت شديد الله يستر ....

دينق ..

Quote: نازر. بنات حسني مبارك معناه أنت بتتزكر أيامك الجميلة بقاهرة المعز. أما أنور التكينة فهو كابوس، وأحتمال كبير تنضرب في صفقة تجارية.

والله في ما يختص بقاهرة المعز إحتمال كلامك صاح لكن الجاب أور التكينة شنو ؟!!

تعرف يا دينق قدر ما قلبتها جاي وجاي لقيت التفسير الوحيد الطلعت بيهو من حلمي دا إنو أنور التكينة عميل للمخابرات المصرية ..!!

خضر :

Quote: نازر سلام وأما الطلمبة فهي مؤشر لحالة (جفاف الطرمبات) ياعمك

تعرف كلامك اقرب للحقيقة خاصة إنو عمال الطرمبة ديلاك كانوا قاعدين ساكت بدون زبائن .. يعني الحالة واقفة وكدة ..

Quote: وأما أنو التكينة فغالباً هو اسامة عبدالله بس تشابه عليك البقر

المحيرني أنور التكينة جا شايل ليهو كاميرا بمبية كبيرة خلاص والغريبة ما كانت تقيلة لأنو كان بيحركا بي كل سهولة ..!

Quote: تاني ماتنوم بين خمسة وستة يانازر

تاني توبة .. يقوم المرة الجاية يجيني القذافي بي شربكة جديدة .!!

حسن بشير ...

Quote: الدقيقه تمت وزادت كثير يا ناذر جمعه مباركه

الدقيقة في الحلم حاجة كتيرة خلاص ...

العلماء قالو أطول مدة ممكن يحلم فيها الإنسان ما بتتجاوز خمسطاشر ثانية ..!!

ما عارف كلامم دا كيف ..!!

محمدالجيلي طمنتني الله يطمنك ...

Quote: البحر واللون الأخضر {زي الكاكي اللابسو أنور دي مثلاً} عند إبن سيرين تفسيرو كويس وبدل على الخير والإنفراج واللون الأبيض برضو كويس وإن شاءالله ح يكون خير

طيب تفسير ظهور حسني مبارك وأنور التكينة في الحلم عند إبن سيرين بيعني شنو ؟!!!

تعرف يا ناذر الحلم دا شكلو كدا لسه ما انتهي

انت شفقان مالك ... ياخي

كدي اديها نومة تانية ... و وافينا بالاخبار

كيكي :

Quote: والاثنين القاعدين وما اتحركو ديل ياهم ناس الحركة الشعبية وبنات حسني مبارك الاثنين ديل واااحدة منهم (حصة مصر في مياه النيل) والثانية دي الانقاذ... انت زااتك في الحلم م كنت ناذر فقط بل كنت (الشعب السوداني الفضل) انور التكينة (يمثل اعلام حكومي) والتلفزيون القومي) انهجامك كشعب عندما اندهشت لمن الناس ديل قالوا ليك لييييييه ما دافعت هي دلالة حلمية في محاولة توريط وانت (النائم) في شكل شعب فضل ان تدافع عن بنات حسني الواحدة منهم هي الانقاذ لوووووووووول

والله تفسيرك دا ريحني كيف ..!!

كدي تعال راجع لي تفسير الجزء التاني إحتمال يطلع كلامك صاح ..!!

قلت لي مفسر أحلام سابق ههههههههه

Quote: والله تفسيرك دا ريحني كيف ..!! كدي تعال راجع لي تفسير الجزء التاني إحتمال يطلع كلامك صاح ..!! قلت لي مفسر أحلام سابق ههههههههه

ايوووه يا ناذر مفسر احلام قديم ولكن اعتزلت الشغلانة ولكن حلمك ده اعادني للملاعب
وياااخ العجلة البتجري فووووووووو مغرية وبتخلي الزول يرجع للملاعب الحلمية...لووووووول
حلمك واضح يا ناذر وما داير مباصرة شديدة وما محتاج لاستعانة بالاسطوري ( كازا تقلوا) مساعد الياي بتاعي في تفسير الاحلام الذي سرحته من العمل ...
بت حسن مبارك الما ضاعت هي حصة مياه النيل..
ومن حلمك ده الجنوب منفصل منفصل والاثنين المجككين (جنب الطرمبة) لاحظ انهم في حلمك ده ما رمشت ليهم عين في كل الكركبة الحصلت دي... وما اشتغلو بيك الشغلة ولا بالكوريك والعووة العمولها الناس الكوركو
سرقوها سرقوها...
البحر لو لاحظت البحر عمل حاجتين في حلمك ده..
1- غرق بت حسني
2- فاضي وانحني وجا قريب للعنقريب الكنت نايم فيهو انت
فلذا وحسب التفسير فان هذا البحر هو (النيل ) ماااااااااا راضي من بت حسني الثانية عشان كده
كردنها رغم العووووووووة والجوووووووطة
ولو لاحظت ايضا بان عمر سليمان وانور التكنية عملو منك حميييييييل وما جو للدعم والمساندة...!!!
لمن كنت بتكورك وعامل جووووطة والحقوني وهكذا جرس...
لاحظ ايضا عمر سليمان قال ليك يا زول مافي مشكلة بس البت الثانية خلو بالكم منها

-انت زاتك في الحلم ده لاعب زي كم دور كده ما دور الشعب السوداني فقط
لا فانت في نومك واندهشك من اجبارك علي الدفاع والمسئولية عن بت حسني كن شعب سوداني فضل
ولكن لمن مششششششيت قاعد تجر بت حسني من البحر فانت في دور تاني هو دور الذين يحاولو اخراج الانقاذ من جحرها من الساسة والناس الكبار كبار في الدولة ...

ياااخ ده حلم عينة
انا لو منك بمشي بلبد وبنوم تاني عشان يجيك الدور الثالث من الحلم
ونشوووووووووف بت حسني الغرقت دي طلعت ولا البحر اكلها
لانو لو طلعت بالله ادينا عووووووووووك
عشان نس###### ونكورك الليلة وووووووووووووووب علينا



وقود حلم يا نازر
علي وزن قوووووووود ويرك

الكباشي .

Quote: داير تعمل لينا مشاكل مع المصريين يا ناذر تاني

والله منهم هم .. أنا ما ذنبي نايم جمب البحر وضارب الهمبريب ..!!

دا كان يوم عبوساً قمطريرة

Quote: (والعاملين ديل ما إتحركو من مكانم كلو كلو لحدي نهاية الحلم) .

أعتقد ديل كانو ناس النظام العام لابدين و منتظرين اللحظة الحاسمة
و الحمد لله شكلك صحيت فبل (الحلم) ما ينتهى , هسع كان اتجلدت

متعه والله يا ناذر

Quote: بعد شوية حسني مبارك قبل علي وقال لي إنت ما شايف شغلك وإنت قاعد ساكت (وأنا مستغرب شغلي شنو والمشغلني منو!!)

احييييييي يا مصاريني
الله يديك العافيه يا ناذر ياخ

يا ناذر الله يكضب الشينة لكن من منطلق المعطيات والحقائق حادلو بدلوي المتواضع

بت حسني مبارك الاولي ( الما خطفوها ) دي حلايب لانها موجودة في يده
اما التانية الخطفوها وبفتشو فيها دي فهي حلفا ( توجد اطماع حقيقية فيها) وخصوصا بعد الانفصال لانو التور بعد ما يقع بتكتر سكاكينو
اما الطرمبة فهي سد مروي لانه كل المناطق الواقعة شمال السد دي المصريين عينهم عليها في تامين امنهم الغذائي


وبعدين يا عمك في حاجات غريبة

قبل فترة انتا جيت من مصر بطريق حلفا ؟
حاول اربط الحلم دا مع وقائع زيارتك لحلفا


بجيك راجع

حسنى مبارك.. (حسنى و مبارك).. هو الشعب الســودانى

البت الخطفوها هى الجنوب

البت الكنت بناتل فيها هى دارفـور

الزولين القاعدين مرسومين فى الطرمبة هم المعارضة.. والطرمبة زاتها هى المكاسب المادية

عمر سليمان هو الرئيس عمر البشـر.

أنور التكينة وانت مثقفى الشعب السودانى، مهمتهم الحفاظ على الوطن ويتكلوها على بعضهم..

البحر الطوفان الذى يهدد الوطن.



قضى الأمر.

ود الخليفه

كيفك ياخى وجمعتك مباركه

غيتو والله حلم متعه واكيد صاح

غيتو الاتنين الفى الطرمبه ديل الوطنى والحركه والطرمبه بترول السودان

البت الخطفوها دا الجنوب

التانيه فى النيل دى المصريين دايرين يضموا الباقى ليهم وانت بتمثل الشعب وبتناتل فيهم براك

ركنيه

Quote: وأنور التكينة ردف بت حسني مبارك التانية في عجلتو ووصلا أوضتا ودي كان أخر مرة أشوف أنور التكينة في الحلم !!

لازم تاخد غمضه تانى عشان انور يرجع لينا سالم وما يتخطف هو كمان



مودتى
.

جنابو عمر

Quote: طرمبة + لبس كاكي + بحر ببلع + كاميرا وصحافة + اختطاف بنت + حسني مبارك + عمر سليمان + تعزيزات + اتنين ممحنين = جاطت جاطت شديد الله يستر ....

أساسا هي جايطة وأدوها حلم ...!!

ناصر ..

Quote: تعرف يا ناذر الحلم دا شكلو كدا لسه ما انتهي انت شفقان مالك ... ياخي كدي اديها نومة تانية ... و وافينا بالاخبار

غايتو لو تفسيرات كيكي صاح فعلا يا هو الما إنتهى ..!!

كدي الننوم بعدين في نفس المواعيد ..

كيكي :

Quote: لانو لو طلعت بالله ادينا عووووووووووك عشان نس###### ونكورك الليلة وووووووووووووووب علينا

كيكي :

Quote: ولو لاحظت ايضا بان عمر سليمان وانور التكنية عملو منك حميييييييل وما جو للدعم والمساندة...!!! لمن كنت بتكورك وعامل جووووطة والحقوني وهكذا جرس...

تعرف دا الشي المزعلني ..!!

أول مرة بعد خطفوا البت الاولى جو براهم من غير ما زول يكورك ليهم وفي المرة التانية دقوا طناش ..!!

أكورك ليهم ما يجو أجيهم يكوركو ..!!

فيصل مسكاقنا ..

Quote: دا كان يوم عبوساً قمطريرة

يعني الواحد تاني ما ينوم ولا شنو ؟؟!

نصر الدين ...

Quote: أعتقد ديل كانو ناس النظام العام لابدين و منتظرين اللحظة الحاسمة و الحمد لله شكلك صحيت فبل (الحلم) ما ينتهى , هسع كان اتجلدت

كان تكون مصيبة دي يلم فيني قدو قدو بي هناك يوريني لي ..!!!
لكن كنت طوالي بكورك لي عمر سليمان وأنور التكينة !!

حسبو عكاشة ..

Quote: متعه والله يا ناذر

متع الله أيامك بي كل خير ..

أهاااااااااا

يا كيكي تعال شوف بكري عباس حللا كيف ..

Quote: بت حسني مبارك الاولي ( الما خطفوها ) دي حلايب لانها موجودة في يده اما التانية الخطفوها وبفتشو فيها دي فهي حلفا ( توجد اطماع حقيقية فيها) وخصوصا بعد الانفصال لانو التور بعد ما يقع بتكتر سكاكينو اما الطرمبة فهي سد مروي لانه كل المناطق الواقعة شمال السد دي المصريين عينهم عليها في تامين امنهم الغذائي

برضو تحليل ..

Quote: قبل فترة انتا جيت من مصر بطريق حلفا ؟ حاول اربط الحلم دا مع وقائع زيارتك لحلفا

ذكرتني حاجة يا بكري ..

بيئة الحلم بتشبه لي حد كبير بيئة حلفا القديمة .. بالذات البحر القدامي طوالي والحجار في طرفو .. بالإضافة طبعا إنو حلفا ما فيها معالم واضحة كتيرة وفي الحلم برضو ما في معالم ظهرت غير الطرمبة والأوضتين وعجلات ناس حسني مبارك والتكينة ..!!

في حاجة أنا نسيتا برضو ..

في الحلم أنا كنت شامي ريحة السمك بي كثافة جدا ..
وفي حلفا نفس الشي ..!!

بس ماعارف أربط البتاعات دي مع بعض كيف ..!!

في حاجة أزعجتني انو الحلم علي مرحلتين...قد يكون الموضوع فيه قطعة في النص وده ممكن يودرك... لكن يبدو إنك يا ناذر رجل صالح...
إنه الايمان يا اخي ناذر فمن تمسك بشعاب الايمان يري في حلمه الجنة
البحر الطامح= الجنة
الاتنين الثابتين في الطرمبة= شهود عدل عشان يمرقوك من اي ورطة
بنات حسني مبارك= منكر ونكير والحمد لله نكير اتخطفت
عمر سليمان= خازن النار ومن جوبيقه تعرف انك ما عندك شغلة بيه
حسني مبارك= السلطة
من رأي السلطة في منامه فإن عزه يزيد ومن اليوم ده يا ناذر يلاقيك عسكري بتاع مرور ما تلاوز...اديه كف...وكيل نيابة امسكه اخنقه...القاضي ده طوالي تطلع سوط العنج من ضهرية عربيتك وانا متأكد انو بتكون خاتيه واديه سوطين لامن يكورك واي يا امي
دربك مرق يا خينا...ابقي نابل وما تلاوز...انه السلطان والعز والجاه
بالمناسبة دي حتقلب لينا الحكومة دي متين؟؟؟


انا أميل لتفسير كيكي كخيار ثاني...بالمناسبة يا كيكي انت بالجد كدة بتبالغ! المداخلة الفاتت ديك الا بتاع سطلة غايتو؟؟

_
غايتو انور التكينة مخابرات مخابرات التهمة لابساه لابساه

أبو الريش /

Quote: حسنى مبارك.. (حسنى و مبارك).. هو الشعب الســودانى البت الخطفوها هى الجنوب البت الكنت بناتل فيها هى دارفـور الزولين القاعدين مرسومين فى الطرمبة هم المعارضة.. والطرمبة زاتها هى المكاسب المادية عمر سليمان هو الرئيس عمر البشـر. أنور التكينة وانت مثقفى الشعب السودانى، مهمتهم الحفاظ على الوطن ويتكلوها على بعضهم.. البحر الطوفان الذى يهدد الوطن. قضى الأمر.

غايتو يا أبو الريش تفسيرك نجيض وخاصة في دي :

Quote: الزولين القاعدين مرسومين فى الطرمبة هم المعارضة.. والطرمبة زاتها هى المكاسب المادية

الناس ديل ما أتحركوا أصو متيبسين تحت الطرمبة مع إنو وكت الخطف كان في جوطة وناس تكورك وهم بس قاعدين هناك يتفرجو بي كل برود ..!!

غايتو ياناذر لو بتاكل كوارع بطلا
والله انا كم مرة اكلت كوارع ونمت حصلت احلام اغرب من حلمك دا واكلتها في حناني



خالص الود

هلا هلا صديق مطر ..

Quote: غيتو الاتنين الفى الطرمبه ديل الوطنى والحركه والطرمبه بترول السودان البت الخطفوها دا الجنوب التانيه فى النيل دى المصريين دايرين يضموا الباقى ليهم وانت بتمثل الشعب وبتناتل فيهم براك

حسب كلامك وكلام أبو الريش الإتنين ديل يا معارضة يا فعلا زي ما قلت الوطني والحركة ..!!

Quote: وانت بتمثل الشعب وبتناتل فيهم براك

معقولة داير تطلعني مناتل على أخر حلمي هههههههه

قمر بوبا :

Quote: في حاجة أزعجتني انو الحلم علي مرحلتين...قد يكون الموضوع فيه قطعة في النص وده ممكن يودرك... لكن يبدو إنك يا ناذر رجل صالح... إنه الايمان يا اخي ناذر فمن تمسك بشعاب الايمان يري في حلمه الجنة

قريت كلامك دا صدقت روحي مشيت صليت ركعتين لامن شعرت في نور كشاف 60 شمعة ضوى من جبهتي .!!

Quote: الاتنين الثابتين في الطرمبة= شهود عدل عشان يمرقوك من اي ورطة

دي غايتو ما فكرت فيها اصلو لا أنا لا كيكي لا عباس لا أبو الريش ..!!

Quote: من رأي السلطة في منامه فإن عزه يزيد ومن اليوم ده يا ناذر يلاقيك عسكري بتاع مرور ما تلاوز...اديه كف...وكيل نيابة امسكه اخنقه...القاضي ده طوالي تطلع سوط العنج من ضهرية عربيتك وانا متأكد انو بتكون خاتيه واديه سوطين لامن يكورك واي يا امي دربك مرق يا خينا...ابقي نابل وما تلاوز...انه السلطان والعز والجاه

لا لا ياخي ما كدة كمان ..

لانو أنا طوالي بشوف السلطة في منامي .. كم مرة شفت ود الطائع بتاع موريتانيا داك وشفت إدريس دبي ومرة شفت بيل كلينتون معاو مونيكا (نسألأل الله السلامة) ومرة شفت صدام حسين وكم مرة شفت الشيخ زائد الله يرحمو ..!!

يا خي ديل كلهم جليهم .. تتصور أنا شفت بكري أبو بكر بذات نفسو أكتر من مرة ؟!!

وبعد دا لا عزي لا زاد لا نقص لا بطيخ !!

Quote: غايتو انور التكينة مخابرات مخابرات التهمة لابساه لابساه

أنا منظرو يجي هنا يوريني الشربكو مع الجماعة ديل شنو وكميرتو القدر صندوق البيبسي دي قصتا شنو ؟؟!!

يا جماعة أنا داير أعرف إنتو ليه بتفسرو الحلم دا تفسير سياسي ؟؟!

أنا زول فنان وما عندي علاقة بالسياسة يعني مثلا قولو :

بتاعين الطرمبة ديل ثنائي العامراب منتظرين وصلتم
أنور التكينة بي كمرتو دي بتاع شركة إنتاج فني داير يطلع لي شريط
بنات حسني ديل هم الموديل في الكليب الجديد
عمر سلمان دا هو بتاع المصنفات الما حا يجيز الشريط
ضربة شومة .. طعنة مطوة .. أي علامة ظاهرة كدة ..!!

بيناوي ..

Quote: غايتو ياناذر لو بتاكل كوارع بطلا والله انا كم مرة اكلت كوارع ونمت حصلت احلام اغرب من حلمك دا واكلتها في حناني

الكوارع دي أنا بطلتها من بدري جدا عارف متين ؟!!

من قبل كم سنة عبد المنعم بيجو فتح ليهو بوست قال الكوارع بتخلي الزول شين وإستشهد بي نفسو وإنو كان زول وجيه وقيافة لكن أكل الكوارع الكتير بوظ ليهو الشغلانية ..!!

أها أنا من الزمن داك خليت الكوارع وبقيت زايد في الوجاهة ..!!!

عشان كدة الكوارع ما عندها علاقة بالموضوع نهائي ..!!

!!!!!

Quote: لازم تاخد غمضه تانى عشان انور يرجع لينا سالم وما يتخطف هو كمان

ويا صديق كمان ما تقول لي .. ديلك عندهم قدو قدوهات بالنسبة ليهم قدو قدودينا هنا يقولوا ليهو إنت شنو

Quote: بعد شوية أنقرو الجا منو سايق عجلة .!! جا زميلنا انور التكينة لابس ليهو رداء وقميص شاكيهو تحت الردا لونم الإتنين كاكي ولابس في كراعو بوت طويل وشراب لونو كاكي برضو .. زي لبس المغامرين الإنجليز زمان .. وقف عجلتو جمبي ونزل سلم علي وسلمت عليهو ..

** ود الخليفه..
** جُمعتك مُباركه ومساءك خير..
## أنا بفسر ليك الجُزء الفوق دا :-
** الجاك راكب عجله بتاع (العوائد) عليك مُتأخرات فى البيت وفى الدكان ,, والكاميرا الشوفتها فى الحِلم دا دفتر العوائد ,, والزوول دا فعلاً بشبه أنو التكينه وإسمو عمك طلب..
** ياخوى أدفع العليك من متأخرات ,, عشان تتخارج من ناس عمر سليمان ديل قبل مايجيك أمر القبض من النيابه..
(ودامت أحلامك سعيده وبعيده عن الكجر والدفع)
(أبو محمد فؤاد) - الماكيكى..
(مُفسر أحلام الضرائب والعوائد والجبايات والزكاه التى لايحول عليها الحول)
** كسره :- بالنسبه لحسنى مُبارك "التشييع حيكون من عمر مكرم" إثر نوبه قلبيه ونقص فى وصول الأُكسجين الى المخ.

غايتو با ناذر انا ما حأتدخل لما اكمل مذاكرة فى كتاب ابن سيرين ..
لكن جيت اقول :
دينق ... واحد معقد
مزمل خيرى .. بتاع امن اقتصادى ( او كما قال عمار ادم ) لكنه يتملق مرتزق ..


بجيك بى رواقة .

بجيكم بكرة بي رواقة أنا برضو ..
جبيل جليت نومة الساعة خمسة مخصوص عشان ما أقابل عمنا عشماوي بتاع المشنقة المرة دي ..!! ههههههههههههه

عشان كدة هسي جايي نعساااااااااااااااااااان !!

بكرة بجي للردود والتعقيبات ...!!

Quote: جبيل جليت نومة الساعة خمسة مخصوص

والله خيرا فعلت

الخوف كان الجزء التالت تقول حلمته بى التكينه وهو فى الاوضه بيحمض فى الفلم..ههههههههههه

مش قلت جى شايل كمرتوا معاه


ركنيه


التكيته اظهر سريع ابن سيرين شنو دا وقتو .. الحق الزول دا قبل ماياخد ليهو غمضه ويورطك مع المصريين


تحياتى .

يا ناذر

حلمك ده بسيط شديد وتفسيرو واضح ، بس بقت ليك صعبة لأنو تفاصيلو كترت في الحلمة ، كالآتي :

بما إنو أنور في المنبر ده طوالي بي كاميرتو فهو إذن بتاع توثيق ، ويعتبر ‎- بالنسبة للمنبر ‎- بمثابة عمر الجزلي وهو يوثق لبرنامج أسماء في حياتنا ، وحيث إنو عمر الجزلي لما يستضيف زول في برنامجو عارف براك بيحصل ليهو شنو ، ودي بيعني إنو أنور ظهر في الحلم بتاعك عشان يوثق لي حسني مبارك ، وحيث أنو أنور وعمر الجزلي مهتمين بالتوثيق ، ولأنك جمعت بين أنور وحسني مبارك في حلم واحد فده بيعني أنو عمر الجزلي إستضاف حسني مبارك ممثلاً في أنور ، ولما عمر الجزلي يستضيف حسني مبارك فيعني حسني مبارك تعيش إنت!!


"والله أعلم بتأويل الأحاديث"

كيف بالله؟

سلام يا ناذر

يا ناذر ما دام دخل في الحلم حسني مبارك أنا ح أفسر ليك الحلم دا
على الصعيد العام، وتفسير آخر على صعيدك الشخصي.

على الصعيد العام: تفسيري قريب من تفسير كيكي
أولاً بنات حسني مبارك البيضاء والسمراء ديل النيلين الأبيض والأزرق
والبت الخطفوها البيضاء دي هي النيل الأبيض خطفتو حكومة الجنوب
أو الحركة الشعبية بعد الإنفصال، وغفلت هيئة السدود
واللي هي بتمثلها إنت، إنت هيئة السدود أو رئيسها أسامة عبد الله، نايم
وما جايب خبر، وأنور التكينة هو الحكومة السودانية، وحسنى مبارك
الحكومة المصرية، وعمر سالم هم إدارة الري المصري. ومنازعتك في البت
وقابضها من يدها، سيكون هنالك نزاع ما بين الحكومة السودانية والمصرية
ضد حكومة جنوب السودان بخصوص مياه النيل الأبيض. الطرمبة والنفرين
ما متحركين من مكانهم ديل هما شعب شمال السودان وشعب جنوب السودان،
والطرمبة هي غلاء في المعيشة في شمال وجنوب السودان بعد الإنفصال،
والشعبين ساكنين وما بطلعوا مظاهرات.

أما على الصعيد الشخصي: البحر أو السمك في الحلم دائماً يرمز للرزق
والخير الكتير، وشكلو كدا في اليومين الجايين ديل ح تقبض ضحاكات كويسة،
وما بعيد تكون بضاعة مصرية لوول.

تحياتي

عبد الكريم الما كيكي :

Quote: ** الجاك راكب عجله بتاع (العوائد) عليك مُتأخرات فى البيت وفى الدكان ,, والكاميرا الشوفتها فى الحِلم دا دفتر العوائد ,, والزوول دا فعلاً بشبه أنو التكينه وإسمو عمك طلب.. ** ياخوى أدفع العليك من متأخرات ,, عشان تتخارج من ناس عمر سليمان ديل قبل مايجيك أمر القبض من النيابه..

أها والبتين ديل منو ؟؟!!

والبحر طلع شنو ؟ّ

كدي حسبا تاني يا عبد الكريم ودخل معاك الطرمبة والإتنين القاعدين تحتا ...

أنور التكينة ..

Quote: غايتو با ناذر انا ما حأتدخل لما اكمل مذاكرة فى كتاب ابن سيرين ..

غايتو منظرك كان قيافة جدا في حلمي ...

بس الكاميرا كانت كبيرة شديد وشكلها ما سياحي .. لكن لونا بمبي زي الكانت ساكاك بيها تراجي ..!!

صلعة مهذبة ونضارة دهبية ورشاقة وكرش ما في وكمان عجلتك ما شاء الله عليها حتى طريقة سوقك ليها كان (إصطايل) !!..

قالوا ركوب العجلة ما بتنسي .. انت كان عندك عجلة زمان يا ود التكينة ..!

!!!!!!

Quote: الخوف كان الجزء التالت تقول حلمته بى التكينه وهو فى الاوضه بيحمض فى الفلم..ههههههههههه

ما عشان كدة جلينا النومة يا صديق ..

هونولولو ..

Quote: بما إنو أنور في المنبر ده طوالي بي كاميرتو فهو إذن بتاع توثيق ، ويعتبر ‎- بالنسبة للمنبر ‎- بمثابة عمر الجزلي وهو يوثق لبرنامج أسماء في حياتنا ، وحيث إنو عمر الجزلي لما يستضيف زول في برنامجو عارف براك بيحصل ليهو شنو ، ودي بيعني إنو أنور ظهر في الحلم بتاعك عشان يوثق لي حسني مبارك ، وحيث أنو أنور وعمر الجزلي مهتمين بالتوثيق ، ولأنك جمعت بين أنور وحسني مبارك في حلم واحد فده بيعني أنو عمر الجزلي إستضاف حسني مبارك ممثلاً في أنور ، ولما عمر الجزلي يستضيف حسني مبارك فيعني حسني مبارك تعيش إنت!!

نسأل الله السلامة ..!!

يا راجل مالك داير تغطس لينا حجر طويل العمر ..!!

النزير :

Quote: واللي هي بتمثلها إنت، إنت هيئة السدود أو رئيسها أسامة عبد الله، نايم وما جايب خبر،

دقيقة .. ما تبهتني ساكت .. أنا صاح كنت نايم لكن جايب خبر وحاسي بالحاصل ..

Quote: سيكون هنالك نزاع ما بين الحكومة السودانية والمصرية ضد حكومة جنوب السودان بخصوص مياه النيل الأبيض

دي غايتو حاجة مؤكدة ...

Quote: والطرمبة هي غلاء في المعيشة في شمال وجنوب السودان بعد الإنفصال، والشعبين ساكنين وما بطلعوا مظاهرات.

ودي برضو بتكون صدقت فيها لأنو طوال مدة الحلم ما في زول كب بنزين من الطرمبة ...

أو إحتمال الشغلة هناك كلها عجلات ساي وما في عربات من أصلو والإتنين ديلاك أصحاب الطرمبة ومتمحنين لانهم شعروا إنهم إنضربو فيها ..!!
أو الطرمبة عبارة عن مشروع متعطل زي الإستاد الاولمبي داك وزي كبري الدباسين بتاع الشجرة الهناك داك ..!!

ههههههههههههههههه

استغفرتك يا مالك روحي ...

غايتو تفسير الحلم الجاني في الإيميل ما بيتقال ولا بينكتب هههههههههههههههههههههه



يجازي محنك يا ود القوز دا كلام شنو دا ههههههههههههههههههه

يا جماعه الساعه خمسه فى السودان بالظبط وقت غمضة ناذر اليوميه

حفاظا على الوطن وهو بيمر فى مرحله حرجه يجب تعطيل الغمطه البتجيب الحلمه

تكاتفوا جميعا وارسلو ليهو شفع الحله يصرخو جنب سريرو او يلعبو شليل وين راح جنب البيت المهم اى موضوع

المهم يجلى الغمضه الليله من اجل سودان خالى من الاحلام

مبروك

تعرض عليك وظيفة عالمية فيها سفر بالطائرة

ويجب أن تجهز ليها أوراقك كاملة والسيرة الذاتية

وتتوقف الوظيفة على الشخية الهامة التي تحتاج تزكية منها
لازمك ثلاثة أشخاص لدعمك في الوظيفة
تحتج لدعم مادي لتسوية مواضيعك القديمة كلها

واحد استعداد

هذه الفرصة ليست أقل من فرصة عمرك الضائفة والتي تعرفها جيدا وان أثنين من أرحامك وأقربائك كان يمكنهم مساعدتك ولكنك لم تطلب منهم ذلك
في هذه المرة لازمك تطلب المساعدة من كل من يمكنه مساعدتك ومحتاج للقيام برهن ممتلكاتك لتسوية مواضيعك المادية وتحتاج لطلب المساعدة المادة من أحد أعمدة أسرتكم فلا تتردد في طلب العون
ظروفك وفرصتك على كف عفريت

اثنين ضرب نار

وأمر الحلم كله يقف على لون اللبسة التي كانت تلبسها بت حسني مبارك التي جاءت واستلقت في حضن أبيها ... في تلك اللحظة ماذا كانت تلبس

لو كان اللون الأبيض أو الأخضر فأنت يمكنك المحافظة على هذه الفرصة الجديدة ( والحظ لا يعاود مرتين إلا لذي حظ عظيم )
لو لون آخر أجري جري الوحوش عشان تحوش

أجري يا ناذر

ثلاثة كوف

ههههههههه يا صديق مطر ..

Quote: حفاظا على الوطن وهو بيمر فى مرحله حرجه يجب تعطيل الغمطه البتجيب الحلمه تكاتفوا جميعا وارسلو ليهو شفع الحله يصرخو جنب سريرو او يلعبو شليل وين راح جنب البيت المهم اى موضوع المهم يجلى الغمضه الليله من اجل سودان خالى من الاحلام

لا لا إطمن أنا نويت ما أنوم الوكت دا وأحضر بدل النومة كرتون سيمبسون في فوكس موفيس ..

يعني ما حا أنوم تاني لحدي يوم 15 موعد إعلان نتيجة الإستفتاء هههههههههه

سلام سلمى :

Quote: مبروك تعرض عليك وظيفة عالمية فيها سفر بالطائرة ويجب أن تجهز ليها أوراقك كاملة والسيرة الذاتية وتتوقف الوظيفة على الشخية الهامة التي تحتاج تزكية منها لازمك ثلاثة أشخاص لدعمك في الوظيفة تحتج لدعم مادي لتسوية مواضيعك القديمة كلها

استعدينا

Quote: هذه الفرصة ليست أقل من فرصة عمرك الضائفة والتي تعرفها جيدا وان أثنين من أرحامك وأقربائك كان يمكنهم مساعدتك ولكنك لم تطلب منهم ذلك في هذه المرة لازمك تطلب المساعدة من كل من يمكنه مساعدتك ومحتاج للقيام برهن ممتلكاتك لتسوية مواضيعك المادية وتحتاج لطلب المساعدة المادة من أحد أعمدة أسرتكم فلا تتردد في طلب العون ظروفك وفرصتك على كف عفريت

يا لطيف ..!!

Quote: وأمر الحلم كله يقف على لون اللبسة التي كانت تلبسها بت حسني مبارك التي جاءت واستلقت في حضن أبيها ... في تلك اللحظة ماذا كانت تلبس

للأسف عصرت ذاكرتي وما إتذكرت نوع اللبسة أو لونا !!

Quote: لو لون آخر أجري جري الوحوش عشان تحوش أجري يا ناذر

والله يا سلمى ما طمنتيني أصلو ههههههههههه

Quote: .. الغريبة بت حسني مبارك التانية كانت سمرا تشبه السودانيين لكن بتتكلم مصري .

بتكون جاملتك عشان انت نايم في السودان

لو كان حلمتك دي كانت في العتبة بمصر كان بتشوفها تشبه البريتش وتتكلم عبري

أتاري أنا أقول ناذر ده البنوموا العصر شنو ؟؟؟ يعني بتنوم علشان تحلم ولا شنو يا ناذر لاني إتصلت عليك مرتين في اليوم داك وما رديت لو بتذكر أنا ما بعرف أفسر الاحلام لكن بنصحك نصيحة لي وش الله تعالي زمان عندي حبوبني بتقول لي نوم المغارب ما كويس ،،، وأنا هسسسسسسة ده بقول ليك ما تنوم المغارب تاني ،، أها شوف نوم المغارب العملها فيك وفي البلد البقت كل يوم بي مصير دي ،،،، لووووووووول





تسلم يا شفيف وتقبل سلامي وبلغه للأخ عاطف وما تنقطع ياخ ،


تحياتي : ياسر العيلفون

المسافر ..

Quote: بتكون جاملتك عشان انت نايم في السودان لو كان حلمتك دي كانت في العتبة بمصر كان بتشوفها تشبه البريتش وتتكلم عبري

يا خي هو قالوليك أنا كنت عارف روحي نايم وين هههههه

بس كان نفسي أقابل بتو التانية لكن ما حصل الشرف ..!!

سلام يا نازر



اول حاجه النومه كانت الساعه كم واحكم على زلك!!

ـــــــ

من الواضح يا ناذر انك ماعاجباك حكاية انو السودان هو بوابة مصر الجنوبية
وان الشعب السودانى هو مجرد حارس لهذه البوابة(ودا الجاب ليك غضبة الفرعون وتحرشات حاجبه)
لا مبالاتك (كشعب سودانى)فى اداء مهامك بالميلاد- شغلك ومهنتك واساس مواطنتك ان تكون كبواب لمصر فى السودان هذا هو التقصير الذى تقرع عليه .
اهمال الشعب السودانى لدوره الطبيعى الذى لا يشعر به فى الحفاظ على.. وحماية مصر
حتى ولو يظل متفرجا مدى عمره كالابله على خيره وثرواته.. .
ذلك ما يشكل الحضور الكثيف للخديوى وحاجبه وكل اطراف السدانة الخديوية.

اما حكاية العجلات دى خليها ساى ..

ناس العجلات ديل جايين جايين وعجلاتهم جاهزة متكلة على الحيطان ولياقتهم عالية
بس ما حايكون راكبنها ناس التكينة وحسنى مبارك - كمان انت ما تندهش شديد – اصبر ما بتغرق- ناس العجلات ديل مهمتهم كبيرة وسريعة فى نفس الوقت.

بوب ..

وينك يا مان ؟!!

Quote: سلام يا نازر اول حاجه النومه كانت الساعه كم واحكم على زلك!!

نومة العصر وجرت لحدي المغرب ..!!

الفحل ...

Quote: وان الشعب السودانى هو مجرد حارس لهذه البوابة(ودا الجاب ليك غضبة الفرعون وتحرشات حاجبه) لا مبالاتك (كشعب سودانى)فى اداء مهامك بالميلاد- شغلك ومهنتك واساس مواطنتك ان تكون كبواب لمصر فى السودان هذا هو التقصير الذى تقرع عليه .

كتر خيرك وبارك الله فيك ..

يا دوب كدة عرفت أنا كنت شغال شنو في الحلم ..!!

الموضوع عندو علاقة ببت ابليس ؟

!!!!

Quote: الموضوع عندو علاقة ببت ابليس ؟

هههههههههههههه بالغت !!

ازيك يا ناذر
يا خوى حكاية بنات حسنى دى مقدمه حاولت تغطى بيها موضوع انور وانت فى الاساس بكون عندك راى فى زيارة انور للقاهره واحسن تقول الموضوع ده عديل من غير احلام لكن نصيحتى تختى الزول ده لانه لو لحق انشبك فيك بالكاميرا بتاعته دى بجيب خيطك مع تحياتى...

دكتور محمد با بكر ..

Quote: يا خوى حكاية بنات حسنى دى مقدمه حاولت تغطى بيها موضوع انور وانت فى الاساس بكون عندك راى فى زيارة انور للقاهره واحسن تقول الموضوع ده عديل من غير احلام لكن نصيحتى تختى الزول ده لانه لو لحق انشبك فيك بالكاميرا بتاعته دى بجيب خيطك مع تحياتى...

أنا لحدي هسي مستغرب الشربكو مع نا عمر سلمان شنو ..!

بعدين الجماعة ديل عجلاتم كللللها ماركة واحدة ولبسم واحدة ..

وعجلة التكينة فيها ميزة الردف لأنو ردف بيها الزولة ديك ومنها وإختفى في الحلم ..!!


إنت أنور التكينة مالو زايغ من البوست دا بعد ما إتعرفت الفيهو !!!!

ناذر يا بعاتي

علي اليمين حلمك يخوف

اكتر حته ممكن انظر ليك فيها

Quote: (أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي)

في بعض الاحيان تمر بنا احداث صغيره ليس لها اي قيمة عندنا, فلا يبقى منها شيء في الذاكرة
لكن المخ العجيب قد يحتفظ بجزء منها لا اراديا في مكان ما وقد تتم استعادة هذا الجزء في وقت اخر و في ظروف مختلفة

اليك هذا السيناريو الافتراضي:

كنت انت ناذر تتحدث في الموبايل مع احدهم و تشاهد التلفزيون في نفس الوقت..
اثناء اندماجك بالمكالمة ورد خبر عن مصر و فيه تم ذكر اسم عمر سليمان و عرض صورته
لم يكن الخبر الوارد بذي الاهمية عندك و لم يلفت انتباهك عن المكالمة, ة بالتالي هذا الحدث الصغير الهايف بالنسبة لوعيك مر مرور الكرام اثناء مكالمتك, لكن الصورة التي رايتها دون قصد و الاسم الذي سمعته دون قصد تم القرن بينهما لا اراديا و الاحتفاظ بهما في مكان ما من مخك. هذه المعلومة المخزنة دون علمك قد يتم استرجاعها في ظروف اخرى عند الحاجة كما حدث معك في الحلم.
و كان من الممكن ان يحدث الاسترجاع بطريقة اخرى, كأن تفتح احدى الجرايد مثلا و تجد صورة عمر سليمان فتعرفه دون ان تقرأ اسمه. او ان تمر بالتلفزيوت و تجد عمر سليمان يتحدث في احدى القنوات فتعرفه على الفور, و عند عرض اسمه بعد قليل في الشاشة تفسر ذلك بانك استنتجت الامر لذكائك.

والله اعلم.

والله يا عمكـ .. بقيت حلاّم خلاس!!

حلمك تحقق بالتفصيل من خلال احداث مصر
ناذر يا بعاتي
اوعى يوم تشوفي في حلم
اها هاك التفسير وفقاً لسير الاحداث
- البحر يعني المظاهرات الهادرة
- انور التكينة يعني الاعلام والصحافة
- عمر سليمان هو نفسه عمر سليمان وقد استنجد به الرئيس وقام بتعيينه نائباً له
- البنتان .. الاولى المخطوفة هي الترشح لفترة رئاسية أخرى
- البنت السمراء الصعيدية.. هي فترة حكمه الحالية (السوداء- المغضوب عليها) ولو تم اختطفاها في الحلم لتمت اقالته في الواقع
اما انت فمجرد عنقالي سااااااااااكت ضارب بتاعة وجايي يأخد راحتو
والله اعلم