Post: #1
Title: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-07-2010, 04:49 PM
هل يوجد بورداب حاليا في وادي حلفا ؟؟
طبعا ما أظن ..!!
عاملين محل إنترنيتكم الواحد دا وحُجاركم الشينة دي وسمككم المسيخ دا ..!
ولا ندروفراتكم البتعمل بالبخار دي ..!!
أنا قاعد بي هنا يومين إنشاء الله ..
لو في زول قريب يقول عووك أجي اساهر معاهو الليلة ...!!
بلدكم الما فيها مُعينات (سهر) دي ..!!
|
Post: #2
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ALGARADABI
Date: 12-07-2010, 04:53 PM
Parent: #1
فيسل هليل
هلفاوي مجرابي ومغترب في الجر
بنفع؟؟
|
Post: #3
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: احمد محمد بشير
Date: 12-07-2010, 04:54 PM
Parent: #2
راجع من مصر ولا ماشي مصر؟
|
Post: #4
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: أحمد ابن عوف
Date: 12-07-2010, 05:01 PM
Parent: #3
يا ريت يا ناذر لو كنا هناك
ان شاء الله يطيب ليك المفام
وحجارتنا الشينة بالله سلم عليها حجر حجر
والحق سريع اتعلم كلمة كلمتين من من البوست دا
|
Post: #5
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: عصام دهب
Date: 12-07-2010, 05:02 PM
Parent: #3
سلام يا ناذر
| Quote: عاملين محل إنترنيتكم الواحد |
انتا حقو تحمد ربُنا جداً عشان إنك بتنعم بالانترنت في حلفا ..
نحنا طلبة في مصر لما كنا بنروح بحلفا يمكن ما كانش فيها حتة كرهبة ..
لكن برضك :
حلفا دغيم و لا بيروت
|
Post: #6
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: welyab
Date: 12-07-2010, 05:08 PM
Parent: #3
عشان تعرف يا صبحي مدى المعناة والالم الحاصل في بوابة السودان الشمالي وميناؤها النهري .. المهم لو عاوز تصل اعلى راس في المدينة بدءا من ( معتمد المحليه) ابوبكر محمد عثمان الى اي شخص يمكن يسهل لك الامور ..
يمكنك ان تصلهم بتوصية معتمدة مني أنا welyab
بس قول ليهم جاييكم من طرف ( ولياب المزعج) .. وانشاء الله يقوموا بالمهمه خير قيام ..
|
Post: #7
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: فيصل محمد خليل
Date: 12-07-2010, 05:13 PM
Parent: #6
بو النيز
مسكاقنا
الكلمة دي لازم تتعلمها (مسكاقنا)
عشان تدخل قلوبهم و تنجى من سب الدين.
اسال عن واحد اسمو عوض هابة دا بيظبتك( ما تفهمني غلط)
Awad Haba
|
Post: #8
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: خالد عبد الله محمود
Date: 12-07-2010, 05:17 PM
Parent: #7
| Quote: بلدكم الما فيها مُعينات (سهر) دي |
أنت عايز معينات سهر زي شنو بالضبط ؟؟ 
|
Post: #9
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: welyab
Date: 12-07-2010, 05:24 PM
Parent: #7
|
Post: #10
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: welyab
Date: 12-07-2010, 05:25 PM
Parent: #7
|
Post: #11
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: welyab
Date: 12-07-2010, 05:27 PM
Parent: #7
فيصل سلامات
المشكله انو (المتنيل ده) دخل حلفا من غير تأشيره دخول معتمده ..
وعلى حظ الاغبر .. عوض مش ظاهر في الاسكاي بي ..
لو عنك رقم جواله اديه رنه ..
|
Post: #12
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: mayada kamal
Date: 12-07-2010, 05:32 PM
Parent: #11
مالك يا ناذر على اهلي الحلفاويين ديل
الرجاء الاتصال على الرقم 999
|
Post: #13
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: فيصل محمد خليل
Date: 12-07-2010, 05:45 PM
Parent: #12
يا ابو النيز قالوا بقيت بتاع سينما و بتاع
المرة الجايا جيب معاك مخرج
عشان يخرج لينا الكيزان من حلفا
|
Post: #14
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ولياب
Date: 12-07-2010, 06:17 PM
Parent: #13
يا ناذر يافنان سلام
أنت متأخر خالص من زيارة وادي حلفا كتا تجي قبل 47 سنة ، وتشوف جمال المدن .
إن شاء الله الأخوان فيصل وولياب (محمد سليمان) ما حيقصروا .
بالرغم من أن الحلفاويين في أقصى الشمال وفي قلب البطانة بالشرق إلا أننا ( حتة واحدة) مالم يكن هناك إعتراض من السيد بشبش .
نأمل لك التوفيق ،،،،
|
Post: #15
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: معتصم محمد صالح
Date: 12-07-2010, 06:22 PM
Parent: #14
يا عمك انشاء الله زبطوك .. او كما قال ظبطوك
|
Post: #16
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: فيصل محمد خليل
Date: 12-08-2010, 09:48 AM
Parent: #15
ان شاء الله الناس انسترت معاك يا بلد
|
Post: #17
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: welyab
Date: 12-08-2010, 10:35 AM
Parent: #16
شكلو كده يافيصل دخل في ( غياهب الجب ) ...
او قال يتصرف .. و راح في حته ما فيها انترنت .
ساهر يعد النجوم وماقدر يصجى لغاية دلوقت....
واحد جاي من العاصمة وبيفتش على مقهى انترنت ... تخلف !!!
جبوباتنا متواصلين معنا عبر النت باللابتوبات من بيوتهم ياناذر
|
Post: #18
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:29 PM
Parent: #17
القرضابي ..!!
Quote:
فيسل هليل
هلفاوي مجرابي ومغترب في الجر |
يا خي تراهو فيصل ود المجراب دا مشهور هنا جنس شهرة ..!!
أمبارح مشيت منتزه المحلية كان عندهم حفل تبع القوات المسلحة .. يا خي أي زول عرفني غريب .. مجرد ما يعرفو إني بكتب في النيت يسألوني .. بتأرف فيسل مهمد خليل ؟؟!!
|
Post: #21
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: فيصل نوبي
Date: 12-08-2010, 02:35 PM
Parent: #18
ناذر رسل لي رسالة من موبايلك الشغال عشان ارسل ليك ناس البيت يظبطوك برضو
|
Post: #19
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:31 PM
Parent: #17
أحمد ..
| Quote: راجع من مصر ولا ماشي مصر؟ |
راجع منها .. كشوني بالباخرة ..!!
|
Post: #20
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:33 PM
Parent: #17
أحمد بن عوف ..!!
Quote: يا ريت يا ناذر لو كنا هناك
ان شاء الله يطيب ليك المفام
وحجارتنا الشينة بالله سلم عليها حجر حجر
والحق سريع اتعلم كلمة كلمتين من من البوست دا |
والله حجارتك الشينة صقعتنا بالبرد لمن نشفنا نشاف ..
وحاجة تدفينا في بلدكم دا ماف ..!
والامور هنا كتامي لا من درى لا من شاف
|
Post: #22
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:35 PM
Parent: #17
عصام دهب ..
Quote: انتا حقو تحمد ربُنا جداً عشان إنك بتنعم بالانترنت في حلفا ..
نحنا طلبة في مصر لما كنا بنروح بحلفا يمكن ما كانش فيها حتة كرهبة .. |
لا لا هسي أحسن بي كتير ..
في ها كهارب ومنتزه ونادي ومحل إنترنيت عبد الواحد وإستراحات ما بطالة ..!!!
وفيها خواجات صر.... ما عارف بيعملوا هنا شنو ؟!
|
Post: #23
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:38 PM
Parent: #17
سلام ولياب ..
Quote: عشان تعرف يا صبحي مدى المعناة والالم الحاصل في بوابة السودان الشمالي وميناؤها النهري .. المهم لو عاوز تصل اعلى راس في المدينة بدءا من ( معتمد المحليه) ابوبكر محمد عثمان الى اي شخص يمكن يسهل لك الامور ..
يمكنك ان تصلهم بتوصية معتمدة مني أنا welyab
بس قول ليهم جاييكم من طرف ( ولياب المزعج) .. وانشاء الله يقوموا بالمهمه خير قيام .. |
كتر خيرك والله ما بتقصر ..
لكن فعلا بوابة السودان الشمالي دايرا شغل كتير ..
يا خي والله الميناء يخجل رغم عوائد الجمارك الخرافية دي ..!!!
بس مشكلتكم ما عندكم غابة تخشوا فيها زي ما قال إدوارد لينو ..!!
|
Post: #28
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: حسبو عكاشة
Date: 12-08-2010, 02:53 PM
Parent: #23
| Quote: وفيها خواجات صر.... ما عارف بيعملوا هنا شنو ؟! |
بيتظبطو يمكن!!
سلامات يا ناذر
|
Post: #32
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: حسبو عكاشة
Date: 12-08-2010, 03:01 PM
Parent: #23
| Quote: وفيها خواجات صر.... ما عارف بيعملوا هنا شنو ؟! |
بيتظبطو يمكن!!
سلامات يا ناذر
|
Post: #24
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:40 PM
Parent: #17
يا فيصل مسكاقنا
Quote: بو النيز
مسكاقنا
الكلمة دي لازم تتعلمها (مسكاقنا)
عشان تدخل قلوبهم و تنجى من سب الدين.
اسال عن واحد اسمو عوض هابة دا بيظبتك( ما تفهمني غلط)
Awad Haba |
قريت مداخلتك إتلفت على صاحب محل الإنترنيت سألتو من عوض حبة .. قال لي هسسسسي هو كان قاعد جمبك هنا .. صاحب المحل بيسلم عليك شديد إسمو طارق نجم الدين ..
كدي النسأل من عوض حبة نشوف برنامجو شنو في الصقط دا الليلة ..!!
|
Post: #25
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:45 PM
Parent: #17
خالد عبد الله ..
| Quote: أنت عايز معينات سهر زي شنو بالضبط ؟؟ |
زي الفازلين والجلسرين والحاجات البتخلي الزول ما يشعر بالصقط لمن يساهر ..!!
وفي حاجات تانية بنعرفا أنا وعوض حبة إنت أطلع منها ..!!
|
Post: #26
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:48 PM
Parent: #17
ولياب ..
Quote:
فيصل سلامات
المشكله انو (المتنيل ده) دخل حلفا من غير تأشيره دخول معتمده ..
وعلى حظ الاغبر .. عوض مش ظاهر في الاسكاي بي ..
لو عنك رقم جواله اديه رنه |
والله فعلا متنيل ..!!
لو ما متنيل أسأل من عوض حبة يقولوا لي هسي كان قاعد جمبك وطلع ..!!!
|
Post: #27
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:50 PM
Parent: #17
ميادة ..!!
Quote: مالك يا ناذر على اهلي الحلفاويين ديل
الرجاء الاتصال على الرقم 999 |
هذا الرقم لا يمكن الوصول اليه لا حاليا لا مستقبلا من هنا ...!!
|
Post: #29
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:54 PM
Parent: #17
فيصل ...
Quote: يا ابو النيز قالوا بقيت بتاع سينما و بتاع
المرة الجايا جيب معاك مخرج
عشان يخرج لينا الكيزان من حلفا |
الدين قالوا زي ما دخل من مصر طلعتوهو عن طريق مصر ..!
أها الكيزان ديل حا تطلعوهم بي وين وإنتو ما عارفينهم دخلوا بي وين ؟!!
ما تجاوب ساي وما تخليك دقوسة هههه
|
Post: #30
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 02:58 PM
Parent: #17
ولياب ..
Quote: يا ناذر يافنان سلام
أنت متأخر خالص من زيارة وادي حلفا كتا تجي قبل 47 سنة ، وتشوف جمال المدن .
إن شاء الله الأخوان فيصل وولياب (محمد سليمان) ما حيقصروا .
بالرغم من أن الحلفاويين في أقصى الشمال وفي قلب البطانة بالشرق إلا أننا ( حتة واحدة) مالم يكن هناك إعتراض من السيد بشبش .
نأمل لك التوفيق ،،،، |
قبل 47 سنة أنا أتأخرت من زيارة الدنيا كلها خليها حلفا ...
بس بي صراحة طبع البلد عجبني ..
بلد هادية وجميلة ونظيفة وناسا ظريفين جدا وودودين ...
بإستثناء واحد إسمو عوض في شرطة جمارك المينا ..!!
يا خي دا شغال في الناس نقة وشتيمة وكلام فارغ ولزيز ونهير زي التقول هو خالقم ..!!
اوعى يكون دا هو زاتو عوض حبة يا فيصل وولياب ..؟!
أخر حاجة دايرا في الصقط دا زول ينهرني ؟؟!!
|
Post: #31
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 03:00 PM
Parent: #17
معتصم ....
| Quote: يا عمك انشاء الله زبطوك .. او كما قال ظبطوك |
فيصل قال لي أوع تفهمني غلط ..!!
تقوم إنت التفهمو غلط ؟؟!! بالغت يا خ هههه
|
Post: #33
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 03:02 PM
Parent: #17
فيصل ...
| Quote: ان شاء الله الناس انسترت معاك يا بلد |
إنسترت تب والله الناس هنا ما قصرت ...
|
Post: #34
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 03:05 PM
Parent: #17
ولياب ..
Quote:
شكلو كده يافيصل دخل في ( غياهب الجب ) ...
او قال يتصرف .. و راح في حته ما فيها انترنت .
ساهر يعد النجوم وماقدر يصجى لغاية دلوقت.... |
غياهب الجب لسع ما دخلناها .. كايسين لها كواسة وما لامين فيها ..!!
والسهر ما لا قيهو .. البلد بتنوم هنا من الساعة تسعة صباحا ..
إنتو خايفين تاني يوم تصحو تلقوا بكرة ما في ولا شنو ؟؟؟!!
|
Post: #35
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 03:25 PM
Parent: #34
!!!!!
فيسل :
Quote: اسال عن واحد اسمو عوض هابة دا بيظبتك( ما تفهمني غلط)
|
معتصم نيستا :
| Quote: يا عمك انشاء الله زبطوك .. او كما قال ظبطوك |
روميو ..
| Quote: ناذر رسل لي رسالة من موبايلك الشغال عشان ارسل ليك ناس البيت يظبطوك برضو |
Quote: بيتظبطو يمكن!!
سلامات يا ناذر |
يا جماعة الواحد أصلوما يغيب إسبوعين ؟؟!
البلد بي وراي بقت كلها ظباط في ظباط !!!
|
Post: #36
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-08-2010, 03:28 PM
Parent: #35
يا روميو ..!!
وصف لي أي حتة الواحد يتدفا فيها الليلة ..
وبالعدم أقرب محل بتاعات ألقى عندو أي حاجة تدفيني إنشالله كريم نيفيا ..!!
|
Post: #37
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: abubakr
Date: 12-08-2010, 04:02 PM
Parent: #36
ياناذر .. اكثر من اربعين سنة والناس الشايفهم دييل زحفو امام مياه اكبر سد مائي الي عمق صحراء لا نبت فيها ودون اي سند او رعاية من اية حكومة مركزية منذ العام 1963 ..كانت ومازالت خياراتهم كثيرة لتكون لهم محلات انترنيت افخم ومطاعم بها ماكولات اشهي ولكنه الخيار ... اختارو ان يكونو حيث ارضهم وارثهم حتي ولو كان علي بعد اميال وفي عمق مئات الامتار تحت الماء ...العزيمة التي جعلتهم يفعلو ذلك اكييد ستحفز اجيالهم القادمة لبناء وادي حلفا جديدة فخيمة يتباهون بها ....مرحبا بك ...
_________
اطرق باب اي بيت من بيوت اهلي هناك وهم ذاتهم اهل ولياب وفيصل فلي ابناء عمومة وعمات وانساب كثر فاكييد ما حيقصرو معاك ...
|
Post: #38
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: فيصل محمد خليل
Date: 12-08-2010, 04:46 PM
Parent: #37
كتب ابو النيز
يا خي تراهو فيصل ود المجراب دا مشهور هنا جنس شهرة ..!!
أمبارح مشيت منتزه المحلية كان عندهم حفل تبع القوات المسلحة .. يا خي أي زول عرفني غريب ..
مجرد ما يعرفو إني بكتب في النيت يسألوني .. بتأرف فيسل مهمد خليل ؟؟!!
يا ابو النيز لو اهلي ما عرفوني الحيعرفني منو !!!!
المهم انك انبسطتا و انسترنا معاك
|
Post: #39
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: nabielo
Date: 12-08-2010, 08:12 PM
Parent: #38
ابو النيز سلام
عليك الله ارفع لينا شوية صور حتي لو بالموبايل
التخليص الجمركي في حلفا ولا في دنقلا ؟
لو ما غلطان لحدي 2005 كان في دنقلا
و حلفا ما كانت بتستفيد من ايرادات الجمارك
Quote: لكن برضك :
حلفا دغيم و لا بيروت |
ده كان قبل الاغراق اخي عصام دهب
راجع بوست فيسل عن حلفا و شاهد صور حلفا قبل الاغراق
كانت من اجمل مدن السودان
و سنعيدها لسيرتها الاولي ان شاء الله
|
Post: #40
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: Ammir Mohamed
Date: 12-09-2010, 07:30 AM
Parent: #36
| Quote: بلدكم الما فيها مُعينات (سهر) دي ..!! |
معينات سكر في لمن تقيف قرد! أو كما يقولون حتى ترى الديك حماراً
Quote: وصف لي أي حتة الواحد يتدفا فيها الليلة ..
وبالعدم أقرب محل بتاعات ألقى عندو أي حاجة تدفيني إنشالله كريم نيفيا ..!! |
لو لقيت الأولى التانية دي ما بتحتاج ليها.
حاول اتعلم ليك كلمة كلمتين رطانة (مسكاغرو .. أفيالوغو .. إكا نايينا.. سيدو إرينمانغا جوريا؟) بحلوك لو اتزنقت.. وحاول اتخارج سرعة من هناك عشان مصلحتك! ..ضهب مبالغة!
والتحية لأهلي الحلفاويين فردا فردا وأحي فيكم روح التسامح وقبول التعامل مع السودانيين قرقرقرقرقر (هسع تجي راجع من هناك تفتح ليك بوست بتاع عنصرية!!)
أمير أوية
|
Post: #41
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-09-2010, 09:30 PM
Parent: #40
أشكرك حتى تستغيث يا حبيبي فيصل نوبي ...!
حقيقة لقد قمت بأكثر من الواجب نيابة عن كل من تداخل في هذا البوست ونيابة عن كل سكان وادي حلفا ..!!
وأهم حاجة خليتني أشعر بالدفو من الصقط دا ..!!
ولولا أني أعرف أنك تكره أن يتحدث عنك وعن جمايلك أي أحد لكتبت الكثير عن الإعانات اللوجستية التي توفرت لي هنا بفضل كرمكم وعلاقاتكم وإتصالاتكم المستمرة بشخصي ومعارفك وعائلتك هنا لتجعل الكثير ممكنا ..!!
سأعود غدا للرد على المتداخلين فردا فردا وأيضا نشر بعض الصور ..
مشكورين يا شباب ..
|
Post: #42
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-10-2010, 11:17 AM
Parent: #41
سلام باش مهندس أبو بكر ...
Quote: ياناذر .. اكثر من اربعين سنة والناس الشايفهم دييل زحفو امام مياه اكبر سد مائي الي عمق صحراء لا نبت فيها ودون اي سند او رعاية من اية حكومة مركزية منذ العام 1963 ..كانت ومازالت خياراتهم كثيرة لتكون لهم محلات انترنيت افخم ومطاعم بها ماكولات اشهي ولكنه الخيار ... اختارو ان يكونو حيث ارضهم وارثهم حتي ولو كان علي بعد اميال وفي عمق مئات الامتار تحت الماء ...العزيمة التي جعلتهم يفعلو ذلك اكييد ستحفز اجيالهم القادمة لبناء وادي حلفا جديدة فخيمة يتباهون بها ....مرحبا بك ...
_________
اطرق باب اي بيت من بيوت اهلي هناك وهم ذاتهم اهل ولياب وفيصل فلي ابناء عمومة وعمات وانساب كثر فاكييد ما حيقصرو معاك |
تعرف با أبو بكر انا أية حتة أمشي ليها ما بمر بيها مرور الكرام .. لا زم أقعد وأعرف تاريخا واحوال أهلها وعايشين كيف وعايشين علي شنو ورايم في كتير من الاوضاع ..
طرقت عدة منافذ للحصول على معلومة تفيدني وأقدر أستفيد منها عن العيش في أطراف السودان وإهتمام الحكومات المحلية أوالولائية بهم ...!!
وادي حلفا يحمد لها أن لها ميناء يجلب لها دخلا خرافيا كل يوم ولكن هل تذهب عوائده أو بعضا منها لخدمة اهالي المنطقة وابناءها ..
وقبل ذلك هل يعقل أن يكون هذا هو ميناء عبارة عن بوابة للسودان الشمالي :
فقط عبارة عن رصيف وبعده إثنين جملون أحدهما للتخليص الجمركي والأخر لجوازات المغادرين + حوش للبضائع ؟؟!!
وأقول صراحة أنني لاحظت أنه حتى معظم العاملين من الرسميين في هذا الميناء من غير أبناء وادي حلفا .. هذا إذا أستثنينا العمال اليوميين وبعض من عمال الكافتريا والمهن الغير رسمية الاخرى ..!!
لا أريد عقد مقارنة أو نشر صور عن ميناء أسوان الذي من المفترض أن يكون صنو لميناء وادي حلفا رغم أن البضائع الأتية إلى وادي حلفا أضعاف أضعاف تلك الذاهبة إلى أسوان .. بمعنى أن ايرادات وادي حلفا اكثر من ايرادات أسوان .. فلماذا لم ينعكس ذلك إيجابا على أوضاع مدينة وادي حلفا وسكانها ؟!!!
سأعود ..
|
Post: #43
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-10-2010, 11:19 AM
Parent: #41
فيصل ..
Quote: يا ابو النيز لو اهلي ما عرفوني الحيعرفني منو !!!!
المهم انك انبسطتا و انسترنا معاك |
بالجد إنبسطت ومن غير اي مجاملة ...
يا خي لو ما مبسوط معقول ماكل لي حوالي 45 سمكة في تلاتة أيام ؟؟؟!!!
|
Post: #44
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-10-2010, 11:21 AM
Parent: #41
نبيلو ...
Quote:
التخليص الجمركي في حلفا ولا في دنقلا ؟
لو ما غلطان لحدي 2005 كان في دنقلا
و حلفا ما كانت بتستفيد من ايرادات الجمارك
|
التخليص الجمركي في ميناء وادي حلفا نفسه ..
Quote: راجع بوست فيسل عن حلفا و شاهد صور حلفا قبل الاغراق
كانت من اجمل مدن السودان
و سنعيدها لسيرتها الاولي ان شاء الله |
بوست فيصل داك وثيقة تاريخية وتوثيقية هامة جدا ..
تابعته في وقته واستفدت منه الكثير ..
وفعلا الصور تبين مدى جمال المدينة ..-
|
Post: #45
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-10-2010, 11:25 AM
Parent: #41
امير ...
Quote: معينات سكر في لمن تقيف قرد! أو كما يقولون حتى ترى الديك حماراً
|
يا زول أنا كتبت معينات سهر .. إنت كتبت بتانية ولا بتارية ؟؟؟!!
Quote: لو لقيت الأولى التانية دي ما بتحتاج ليها.
|
فيصل نوبي ما قصر .. لقيتم الإتنين بعد ما رسم لي خارطة طريق هههههههه
Quote: حاول اتعلم ليك كلمة كلمتين رطانة (مسكاغرو .. أفيالوغو .. إكا نايينا.. سيدو إرينمانغا جوريا؟) بحلوك لو اتزنقت.. وحاول اتخارج سرعة من هناك عشان مصلحتك! ..ضهب مبالغة!
|
إتعلم وين مع الصقط دا .. دا حالتو المن إندكم قالو الجو لطيف الايامات دي وما في برد ..!!
Quote: والتحية لأهلي الحلفاويين فردا فردا وأحي فيكم روح التسامح وقبول التعامل مع السودانيين قرقرقرقرقر (هسع تجي راجع من هناك تفتح ليك بوست بتاع عنصرية!!)
|
يا زول إطمن بعد ما شفت وادي حلفا دي إتضح إنو العنصريين نحنا ما إنتو ههههههه
|
Post: #46
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-10-2010, 11:38 AM
Parent: #45
ملاحظة لاحظتها ...
الميناء لا يوجد به اي مركب أو لنش يتابع نزول الركاب والبضائع من البواخر القادمة من مصر ..
فإذا فرضنا لا قدر الله ان أحد المسافرين سقط في المياه العميقة جدا كيف سيتم إنقاذه ؟!!
اقول هذا لأن حقيبة احد المسافرين سقطت في المياه وظلت في حالة طفو لمدة أكثر من نصف ساعة وهي تسبح مبتعدة وتبعثرت محتوياتها دون أن يجد صاحبها اي مساعدة لإنقاذها ولا حتى مركب بالجوار حتى غرقت الحقيبة مع حمولتها .. والضباط يحذرون أي شخص من القفز في الماء لإنقاذ الحقيبة ..
فماذا لو سقط انسان وليس حقيبة ؟! هل سيتفرج الجميع عليه حتى يغرق ؟!
لماذا لا تتوفر اي وسيلة طواري هنا للإنقاذ ؟؟!!
|
Post: #47
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: Ammir Mohamed
Date: 12-11-2010, 09:56 AM
Parent: #46
أكيد الشنطة كان فيها ممنوعات عشان كدة وقعت عشان كدة ما في زول حاول يطلعها
على العموم مرحب بيك في بلدك الثاني حلفا ونرجو أن نكون تركنا انطباعا جيدا
أمير
|
Post: #48
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-11-2010, 04:10 PM
Parent: #47
سلام أمير ..
واله صاحب الشنطة داير يتلب وراها عدييل كدة ..
بس الضباط قالوا ليهو الحتة دي عمقها عشرين متر لو شنطتك بتستحق الموت انزل وراها ..!!
واتضح انها ما بتستحق الموت وراها ..
والله يا أمير شعرت بي إرتياح شديد في حلفا
مدينة طبعها جميل وناسا طيبين .. إنشاء الله حا تكون واحدة منمحطاتي الدائمة ..
تسلم ..
|
Post: #49
Title: Re: عاجـل لأعـضـاء الـمـنـبـر الـحـلـفـاويـيـن !!!
Author: ناذر محمد الخليفة
Date: 12-11-2010, 04:35 PM
Parent: #48
محمد سيد أحمد ...
مشكور جدا يا حبيبنا .. وصلني مرسولك هاتفيا وكنت في ذلك الوقت قد غادرت حلفا على أمل العودة قريبا ..!!
عاطر التحايا لك وللتيمان وأمهم ..!
|
|