Post: #1
Title: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 08:24 AM
Parent: #0
رسالة مهمة جدا وصلتني وتستحق طرحها هنا للنقاش ..!!
من المتعارف عليه إنه الارمله لما تطلع من بيت الحبس أهلها وأهل المرحوم وحبانها وجيرانها بكونو حاسبيين يوم المرقه وبيجو يقيلو معاها من باب الدعم من غير دعوه منها، بعضهن بيجيبن أي شئ زي ملاح أو كسره مشاركه وناس بيتها بيعملو الغدا عادي لكن بكميه أكبر لتوقع حضور ناس زياده.
ولكن بعض نسوان الخرطوم "العاملات" فيها إنهن سيدات مجتمع – ما عارفين زاتو سيدة المجتمع هي منو مواصفاتها شنو, افتونا..!- لكن السمعتو قالو هن ما بيصاحبن الا الوجه الفنان والاسم الرنان ودي كل واحد منكم على حسب فهمه ليها !!! انا غايتو عرفت انه الوجه الفنان تكون السيده من الجميلات المهتمات بلبسها وحنتها وتوبها وما اليه اما الاسم الرنان يكون الزوج يا دكتور، يا باشمهندس كبير، يا رجل اعمال، يا وزير او بيتها فيلا في واحد من الاحياء البتعتبر راقيه، الرياض، قاردن سيتي،الطايف، المنشيه، العمارات، كافوري، حي دالاس ( مقدره ) .
المهم آخر تقليعة وموضة طالعات فيها المذكورات أعلاه هو ما وصفته لي واحده من المدعوات للحفله..هي بسم الله..ليوم المرقه من بيت الحبس.
تعالو نشوف:
يوم تمت الارمله فترة العده الاربعة شهور وعشرة ايام وفي اخر يوم قدمت دعوه لصديقاتها (سيدات المجتمع زي ما هن موهومات) دعوة مفتوحه فطور وغدا, كرامة مرقتها من بيت الحبس (الله ريحن من الراجل لتتفرق الواحده لصديقاتها سيدات المجتمع للقعدات الخاصه ) و الدعوه من الارمله مباشرة بموبايلها.
لما دخلت المدعوه بيت الارملة، تشكتت في فهمها لمناسبة الدعوه وقالت في سرها يا ربي أنا فهمت غلط ؟ دي دعوه لخطوبة بت المرحوم والا يوم مرقتها..!! ده طبعا من التجهيزات العاملينها و الاستعدادت و اللبس اللابسنه المعزومات لكن طبعا اهم حاجه كانت في طبيعة و كمية الأكل المقدم.
اول شي جا الفطور:-
في عده لا توصف كل الخمته الارمله من الاغتراب طلعته للاستعراض (حليل المرحوم تلقاه من يوم ما دفع حق العده ده ما شافها تاني!!) الصواني دي كيف, طقوم العشا, طقوم الشاي, الكبابي وحتي الملاعق والسكريات وطبعا الاهم الفطور(فطور عريس عديل): كل انواع الملاحات: ملاح روب، ملاح نعيميه، ملاح تقليه مع العصيدة ( اللقمة ) وطبعا كل واحده ليها عصيده في كوره صغيره عشان يعني ماهن سيدات المجتمع الراقي والمخملي ما ياكلن كلهن في صحن واحد - ياي ايه القرف ده - وطبعا اللحمه المشويه والمحمره والمسبكه وانت بس إتمني، ده غيرالسلطات وغيرالفول والطعميه والجبن بانواعه والزيتون وكل ما يخطر على بالكم.
وتحلية الفطور: شعيريه وسكسكانيه، مديدة تمر، مديدة حلبة ( أربعين نفاس؟؟)، وفطير، فطير امريكاني، وفطير تاني ( اسمه مدور) وده بالمناسبه ألذ من الاول زلابيه ( مش لقيمات ) اصلن هن من ما ولدوهن ما بيعرفن غير الاسم ده - يعني كلمة زلابيه أرقى من لقيمات!!
اما الغدا:- فحدث ولا حرج، بوفيه مفتوح - زي الافراح في صالات الفنادق خمسه نجوم- تحتار معاه ده عرس بت المرحوم ولا خروج ارملته من الحبس- تعجب آخر هنا!!!
الصواني والرواني – كل انواع اللحوم بيضاء وحمراء دجاج وسمك ناشف ومحمر ومشوي ومسبك بالفرن وغيره وكل انواع الكفته شى لحمه وشي بطاطس وشي بالبرغل، الفطاير والسمبكسه باللحمه وبالخضار، السلطات بكل الانواع والاشكال.
اما التحلية ؟؟؟؟؟؟
كل انواع الفواكه الموجوده في السوق حتي البطيخ والشمام مع انه بتاع العامه..!!
االبسبوسه والكنافه: المحشيه بالكريمه والمحشيه بالجبنه, الباسطه, الكيك بانواعه, الجلي, كريم الكرامل, حلو الكريمه, واشياء تانية ما بقدر اوصفها لاني ما شفتها قبل ده ولا سمعت بيها- إطرشني. وتعالو للشاي: شاي بالهبهان, شاي يالنعناع, جنزبيل, قرفه يعني زي ما تحب الهانم. والقهوه: عربية, تركيه والنسكافيه .
بس الحاجه الوحيده الما كانت في..هي.. البارد.. مش المويه لكن المشروبات الغازيه والعصاير, وطبعا نظام الزوج الحبيب متوفي الله يرحمه ومافي داعي للبارد- ياهو يعني البارد هو الشنقل الريكه.
وانت - يا المسكين يا التعبك عليها راح هدر- بين يدي الله وهي تأكل في سيدات المجتمع من مالك وتعبك..!
رأيكم شنو- يا رجال وسيدات..؟!
ده جهل او او بوبار او ....... ما عارفه اوصفه .
أنا بقترح على كل سيدات المجتمع الحضرن (ألتأبين!!!..... البوفيه الحفل )
يطلبن الرحمه والغفران ليوم الحساب . رحم الله الزوج المتوفي هم السابقون ونحن اللاحقون.
اللهم ارحم جميع الازواج رحمة واسعه عدد ما صرفت اراملهم.
.
|
Post: #2
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: قلقو
Date: 12-17-2009, 08:32 AM
Parent: #1
طيب ياناذر مش اخير من الراجل البيعاين للنسوان المعزيات وبيفكر فى البديل وهو قاعد يستقبل العزاء فى وفاة زوجتو ؟
|
Post: #5
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: مريم بنت الحسين
Date: 12-17-2009, 09:18 AM
Parent: #2
ندين طبعا التصرفات الزي دي... بوبار وسلوك ما طبيعي اساساً
لكن برضه قلقو ده عنده وجهة نظر مهمة...
|
Post: #3
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Salwa Seyam
Date: 12-17-2009, 08:42 AM
Parent: #1
سلام يا ناذر
اقترح بأن يكون العنوان
يا رجال سيدات المجتمع تعالو شوفو آراملكم بيعملو شنو ( بعد موتكم طبعاً ) ..!!
عشان الكلام ده ما بخص ناس قريعتى راحت .
|
Post: #4
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: khaleel
Date: 12-17-2009, 08:45 AM
Parent: #3
Quote: يا رجال سيدات المجتمع تعالو شوفو آراملكم بيعملو شنو ( بعد موتكم طبعاً ) ..!!
|
فدود القبر في عينيك يرعي
وترعي عين غيرك في ديارك
ناذر مشتاقين
|
Post: #6
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: حيدر حسن ميرغني
Date: 12-17-2009, 09:38 AM
Parent: #4
بالله الخروج النهائي من الدنيا دي يكلف ده كلو
ياحليل زمن الجهل
|
Post: #7
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Hala Hassan
Date: 12-17-2009, 09:48 AM
Parent: #6
ناذر،،
أكيد إنت قاصد شريحة (جهلاء )المجتمع،
و ليس وجهاء المجتمع،،،،
|
Post: #8
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Alshafea Ibrahim
Date: 12-17-2009, 10:18 AM
Parent: #7
سلام ياناذر
عش رجبا ترى عجبا
يعني فوق البكايات والنايحات جابت ليها يوم مرقة ... طيب مش كان أحسن ليهن يستأجرن قاعة ماسية أو ذهبية وشنو ما عارف ويكون هذا الاحتفال فيها ... أها يا ناذر أخوي مديح ولا غنى مصاحب لهذه الاحتفالية ؟؟
تحياتي تاني
الشفيع ابراهيم
|
Post: #9
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Zoal Wahid
Date: 12-17-2009, 10:48 AM
Parent: #8
يا اخوي الارامل ديل يكونن محتفلات بالورثة.
|
Post: #10
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: محمد فرح
Date: 12-17-2009, 11:05 AM
Parent: #9
ومالو!
الزول دا حاسد ساكت
فترة الحداد 3 يوم ، وبالنسبة للمرأة الشهور المحبوسة فيها دي ما للحداد ولكن لمآرب أخرى
خلي المرة تشوف برنامجها ، يعني هي منكوبة وحزينة وكانت محبوسة مستكترين عليها تعمل ليها عزومة بوبارية كاربة يوم طلوعها؟!
ولا عاوزنها تكون زي الهندوس وتلبس الابيض لمن تموت!
ناذر
مؤنة عام من الود
|
Post: #11
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 02:54 PM
Parent: #10
قبل ما أجي راجع أقرو معاي التعقيب الجاني في الإيميل دا :
Quote: والله ياخوي الكلام ده مظبوط وهو بالمناسبة اصبح عادة لدي جميع الطبقات يعني عادي الواحدة – ياكافي البلا واضان السامعين طرشا – بتعزم ليوم مروقا من بيت الحبس كان من سيدات المجتمع الراقي ولا العادي ويتلملمن النسوان وده يوم معترف بيه عالميا اظن . بالمناسبة انا اتغربت فترة في دولة عربية في غرب افريقيا وعزمتنا واحده من اهل البلد زوجها سوداني اتوفي يوم التالتة - يعني ابكر شوية – وقدموا لينا اكل فاخر من كسكس ودجاج محمر ولحمة محمرة تتبعها كل انواع الفواكه ومن ثم الشاي او الاتاي معاه كمية معتبره من الخبائز الفاخرة كل ده بمصاحبة اصناف المياه الغازية وانتا تاخد البتفضلو ، الحقيقة في الاول استغربت لكن بعد رجعت السودان وشفته اليوم التاريخي البتداعي له النساء من المعارف والاحباب واهل المرحوم – يعني النسابة زااااتم – آآآآآمنت انو المرأة العربية داااايما بتبتكر طرق لاعلان احتجاجا علي السيطرة الذكورية – خلينا نفلسفا شوية –
بالمناسبة طفل قالو ليه عمتك مارقه بكره من بيت الحبس عشان راجلا مات، فصرخ فيهم قائلا ( لكين هي ما قتلتو ليه حبسوها ) ، فهل يدخل الرجال بيت الحبس ؟؟؟؟؟
|
|
Post: #12
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:19 PM
Parent: #11
سلام قلقو ..
| Quote: طيب ياناذر مش اخير من الراجل البيعاين للنسوان المعزيات وبيفكر فى البديل وهو قاعد يستقبل العزاء فى وفاة زوجتو ؟ |
والله يا حبيب غايتو أنا أول مرة أسمع بالقصة الجاتني في الإيميل دا ... لكن البعرفو إنو في عاداتنا السودانية لمن المرة تطلع من الحبس بإنتهاء شهور العدة باقي الصويحبات بيمشوا ليها وبيشيلوا معاهم أو بيعملوا هناك رز بي لبن ولقيمات وإحتمال فطور متواضع نعيمية بي لقمة او حاجة بالشكل دا ويدعوا الجميع بالمغفرة والرحمة للمرحوم ويجوا راجعين ..
لكن حكاية الإحتفال البذخي المصاحب للطلوع من الحبس أول مرة أسمع بيهو في الإيميل دا ..
لكن ما بستبعد حكاية الراجل البيعاين للنسوان المعزيات عشان يفتش بدل فاقد دي ، لاني بعرف زول إتزوج بعد وفاة زوجتو من واحدة أول مرة يشوفا في بيت العزاء بتاع المرحومة ..!
|
Post: #13
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:21 PM
Parent: #11
سلام مريم ...
Quote: ندين طبعا التصرفات الزي دي... بوبار وسلوك ما طبيعي اساساً
|
عشان الحركات دي حقو الواحد لو عندو قروش يكون زي فراعنة زمان ..!
يوصي إنو كل ممتلكاتو وقروشو تُدفن معاهو في القبر بما فيها شهادة البحث بتاعت البيت ..
عشان مرتو بي وراهو ما تلقى حق قزازة البيبسي !!
|
Post: #14
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:24 PM
Parent: #11
سلوى صيام سلام :
Quote: سلام يا ناذر
اقترح بأن يكون العنوان
يا رجال سيدات المجتمع تعالو شوفو آراملكم بيعملو شنو ( بعد موتكم طبعاً ) ..!!
عشان الكلام ده ما بخص ناس قريعتى راحت . |
تتصوري البورد دا مليان بي أسياد وسيدات المجتمع !
وناس قريعتي راحت بيتعدوا على أصابع تلاتة أربع يدين بس ..!
عشان كدة حقوا يعملوا حسابم ..!
وناس قريعتي راحت لا خوف عليهم ولا هم يحزنون .....
|
Post: #15
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:25 PM
Parent: #11
كيفك خليل ..
والشوق بحر :
Quote: فدود القبر في عينيك يرعي
وترعي عين غيرك في ديارك
ناذر مشتاقين |
وبيت الشعر دا مُعبر تماما ومتسق مع موضوع البوست ...
|
Post: #16
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:26 PM
Parent: #11
سلام حيدر ...
Quote: بالله الخروج النهائي من الدنيا دي يكلف ده كلو
ياحليل زمن الجهل |
هو طبعا ما بيكلف الزوج أي حاجة لانو خارج بي كفن !!
لكن بيكلف الزوجة من بعد الزوج الكثير من حر ماله ..!
|
Post: #17
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:29 PM
Parent: #16
سلام هالة ..
Quote: ناذر،،
أكيد إنت قاصد شريحة (جهلاء )المجتمع،
و ليس وجهاء المجتمع،،،، |
والله بقى كلو سيان لو دي أفعالم ..
|
Post: #21
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Elmosley
Date: 12-17-2009, 03:50 PM
Parent: #17
ناذر اخوي
وماذا يضير الشاة سلخها بعد الذبح
====
انا بس اشتقت ليك
ومالقيتك عشان اقول ليك
كل سنه وانت طيب
|
Post: #18
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:31 PM
Parent: #16
سلام الشفيع :
Quote: فيها ... أها يا ناذر أخوي مديح ولا غنى مصاحب لهذه الاحتفالية ؟؟
|
لا مديح لا غُنا ..
دي حالة محتاجة لي حكامة ..!
|
Post: #19
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:32 PM
Parent: #16
زول واحد :
| Quote: يا اخوي الارامل ديل يكونن محتفلات بالورثة. |
هو بعد الإحتفال البذخي دا بيفضل فيها حاجة ..!!؟
|
Post: #20
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-17-2009, 03:34 PM
Parent: #16
محمد فرح ..
Quote:
فترة الحداد 3 يوم ، وبالنسبة للمرأة الشهور المحبوسة فيها دي ما للحداد ولكن لمآرب أخرى
خلي المرة تشوف برنامجها ، يعني هي منكوبة وحزينة وكانت محبوسة مستكترين عليها تعمل ليها عزومة بوبارية كاربة يوم طلوعها؟!
ولا عاوزنها تكون زي الهندوس وتلبس الابيض لمن تموت!
|
والله رايك برضو يستحق النقاش ..
بس حقو نحاول نراعي شعور المرحوم في قبرو !!
|
Post: #22
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: على محمد على بشير
Date: 12-17-2009, 04:19 PM
Parent: #20
لا حول ولا قوة الا بالله
المجتمع السودانى اصبحت فيهو ظواهر غريبه جدا
انعل ابو العولمه ظاطا 
|
Post: #23
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: غادة عبدالعزيز خالد
Date: 12-17-2009, 04:39 PM
Parent: #22
Quote: عشان الحركات دي حقو الواحد لو عندو قروش يكون زي فراعنة زمان ..!
يوصي إنو كل ممتلكاتو وقروشو تُدفن معاهو في القبر بما فيها شهادة البحث بتاعت البيت ..
عشان مرتو بي وراهو ما تلقى حق قزازة البيبسي !! |
في هذا الأمر يا ناذر.. وصلتني رسالة على الإيميل منذ فترة
تقول أن رجلا ثريا مرض وشعر أنه في أواخر أيامه
فنادى زوجته وقال لها أريد أن تدفني معي كل أموالي في التابوت
حتى أتمكن من التمتع بها في حياتي المقبلة
فصمتت الزوجة وقالت له سأفعل..
لكن كلماتها لم تعجب الزوج فأصر عليها، وظل يلح..
حتى أستوثق منها الوعد وحتى حلفت له بأغلظ الإيمان أنها ستضع
كل ثروته في تابوته ليصاحبه في موته..
وتوفى صديقنا المليونير بعد أيام قليلة
وقبيل إنزال التابوت في قبره طلبت الزوجه مهلة لكي تتحدث مع زوجها
بينما الجمع ينتظر ..
وبعدما إنتهت قالت لها صديقتها.. طبعا لم تضعي الثروة في التابوت!!
فنظرت إليها الزوجة شذرا وقالت لها
"إنني مسيحية متدينة وبالطبع وضعت كل الأموال في التابوت كما وعدته"
وإستعجبت الصديقة وهي ترد.. لكنني لم أر أية أموال في تابوت المتوفي
فردت الزوجة.. لقد حررت له شيكا بكل ثروته.. فإذا كان هنالك بنك فيمكنه صرف الأموال
والتمتع بها كما يريد في حياته المقبلة..
لك التحية..
غادة
|
Post: #24
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Abdelmuhsin Said
Date: 12-17-2009, 05:10 PM
Parent: #23
Quote:
المجتمع السودانى اصبحت فيهو ظواهر غريبه جدا
انعل ابو العولمه
|
ودالخليفه الارباب سلامات .
وانا من هنا اناشد الاخت الزميله تراجى بعمل فديو بتاع يوتوب لهذه الظاهره
الدخيله على مجتمعنا و محاربة الفساد والعادات السلبية التى لم نسمع بها من قبل
أو نتخيل حدوثها أتمنى من تراجى عمل اللازم فى هذا الموضوع .
---------------------------------------------------------------------
فى طريقه املح معاك باكر للعقد بتاع تمبس لو ربنا سهل .
|
Post: #25
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: عزيز عيسى
Date: 12-17-2009, 05:11 PM
Parent: #23
سلام يا نادر،
هسع يا نادر عليك الله لو إتصلت بيك واحدة أرملة من سيدات المجتمع
الذي تتحدث عنه تدعوك وتطلب منك تحضر عودك وتجي تعمل ليهن
حفلة كاربة بعداد كارب.. أها تمشي ولا ترفض؟
أنا لو منك أمشي وكمان أغني ليهن: الشاغلين فؤادي وتايهين فائقين.
صنفرة من صنفراتك:
الأخ الخاتم زميل دراسة سابق معك في الهند
معانا هنا في هيوستن.. وصاني أسلم عليك.
|
Post: #26
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: بشير أحمد
Date: 12-17-2009, 05:18 PM
Parent: #23
الاخ/ناذر
تحياتي؛؛
الوالد الله يرحمه ويحسن إليه ومعاه عمي مختار ليهو الرحمة
برضو ؛
كنت جالس معاهم جلسة مُغربية مع الشاي
حسيت منهم انهم خلاص مودعين الدنيا ؛
ابوي قال لـ عمي مختار :
شوف يامختار ياخوي قسّم المزرعة للاولاد والبنات من بدري
عشان بعدين لمن تموت الاولاد مايتشاكلوا ؛
ضحك عم مختار ضحكة طويلة (الله يرحمه ويحسن اليه)
وقال:
عليك الله يا احمد ياخوي بعد ما اموت
ح ارفع راسي تاني واشوفهم اتشاكلوا ولاّ لا ؟
الله يرحمهم جميعا .
فدحين ياناذر ياخوي ؛بعدما نموت ح نرفع روسينا تاني
نشوف النسوان بسون في شنو ؟
|
Post: #27
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: خالد المحرب
Date: 12-17-2009, 06:58 PM
Parent: #26
والله ياناذر الراجل كان مالى مركزو المراء لن تنساه ابدا والعكس صحيح
وطبعا الحبس دا سنه لابد منها ولكن فى حريم دايرنها تنتهى بس شى مفروض
عندنا امثله كتيره طرحها هنا تنقيص من قدرها
|
Post: #28
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: د.يوسف محمد طاهر
Date: 12-17-2009, 08:06 PM
Parent: #27
دا لو تمت الحبس يا ناذر , وإلا شفت واحدة
راجلها مات شهر ما تمتو واقفة قدامي في
سوق السمك .
|
Post: #29
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Abdelrahim Elamin
Date: 12-17-2009, 10:28 PM
Parent: #28
الاخ ناذر والاخوة المتداخليين
تحياتي
قمة الانصرافية من بعض النسوان
الواحدة تفتش ليها مناسبة من مافي عشان تظهر
ما مشكلة طهور، سماية، عرس، خروج من بيت الحبس، عيد ميلاد...الخ
وده كله عشان البوبار!!!
ربنا بس يصلح الحال
|
Post: #30
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Dr. Salah Albashier
Date: 12-18-2009, 01:04 AM
Parent: #29
الأخ العزيز ناذر
لك التحية والود
يا سيدي "الحي أبقى من الميت" ، سنغادرها بكفن بدون جيوب، فلا تحزن، فإن كانت الحكومة تبوبر بمال الشعب الشبع موت، فما بالك بسيدات المجتمع "العامل" راقي. لا تحزن تعددت الأسباب "والبوبار" واحد.
مع خالص تحياتي
د. صلاح البشير
|
Post: #31
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Egbal Elmardi
Date: 12-18-2009, 01:27 AM
Parent: #30
| Quote: بالمناسبة طفل قالو ليه عمتك مارقه بكره من بيت الحبس عشان راجلا مات، فصرخ فيهم قائلا ( لكين هي ما قتلتو ليه حبسوها ) ، فهل يدخل الرجال بيت الحبس ؟؟؟؟؟ |
|
Post: #32
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Luay Elhashimi
Date: 12-18-2009, 01:56 AM
Parent: #31
(الأخ الخاتم زميل دراسة سابق معك في الهند
معانا هنا في هيوستن.. وصاني أسلم عليك.)
يا عزيز عيسي
انتو هوستن دي فيها سودانيين وكمان بورداب ..
وين انتوا..
--------
تحياتي للجميع خاصه ناس قريعتي راحت
|
Post: #33
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:03 AM
Parent: #32
سلام يا موصلي
كيفك وأخبارك ؟!
أول أمبارح في سيرتك مع دكتور إبراهيم عبد الحليم ...
الأيامات دي هو بي هنا وماشاء الله نشاطاتو ملحوظة في التلفزيون والإذاعات والمنتديات ..
متوقعينك الشهر الجاي ..
تسلم ..
|
Post: #46
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Elmosley
Date: 12-18-2009, 01:01 PM
Parent: #33
باذن الله وهانت
تحياتي لابراهومه
|
Post: #34
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:16 AM
Parent: #32
علي :
Quote:
لا حول ولا قوة الا بالله
المجتمع السودانى اصبحت فيهو ظواهر غريبه جدا
انعل ابو العولمه ظاطا |
للأسف الشغلة ما عندها علاقة بالعولمة ..
دا منتوج محلي بحت ..!
|
Post: #35
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:19 AM
Parent: #32
سلام غادة ..
Quote: فردت الزوجة.. لقد حررت له شيكا بكل ثروته.. فإذا كان هنالك بنك فيمكنه صرف الأموال
والتمتع بها كما يريد في حياته المقبلة..
|
دي غايتو زوجة تفتيحة بالجد ..
غايتو لو كان نسوان فراعنة زمان عندهم دفاتر شيكات كانو الفراعو إندفنو هم ورقبتم في الأهرامات ..
ويكون الله ريح الجماعة من لصوص القبور ..
|
Post: #38
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: هواري نمر
Date: 12-18-2009, 10:24 AM
Parent: #35
Quote: انتو هوستن دي فيها سودانيين وكمان بورداب ..
وين انتوا..
-------- |
بالحيل
في سودانين و بورداب كمـــــان
تحياتي و اظهر
لو معانا في هيوستن...
ناذر الخليفة تحياتي
وبوستك...
في السلك لكن..
مستمتعين معـــــــــاك
|
Post: #36
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:21 AM
Parent: #32
عبد المحسن :
Quote: وانا من هنا اناشد الاخت الزميله تراجى بعمل فديو بتاع يوتوب لهذه الظاهره
الدخيله على مجتمعنا و محاربة الفساد والعادات السلبية التى لم نسمع بها من قبل
أو نتخيل حدوثها أتمنى من تراجى عمل اللازم فى هذا الموضوع .
|
يا أخوي رفقا باليوتيوب .. تراجي ما فاضية من الإنتفاضات الايامات دي ..
| Quote: فى طريقه املح معاك باكر للعقد بتاع تمبس لو ربنا سهل . |
بجي ماري عليك بعدين نمشي سوا ..
|
Post: #37
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:23 AM
Parent: #32
عزيز ..
Quote: هسع يا نادر عليك الله لو إتصلت بيك واحدة أرملة من سيدات المجتمع
الذي تتحدث عنه تدعوك وتطلب منك تحضر عودك وتجي تعمل ليهن
حفلة كاربة بعداد كارب.. أها تمشي ولا ترفض؟
أنا لو منك أمشي وكمان أغني ليهن: الشاغلين فؤادي وتايهين فائقين.
|
والله الفنان بيغنب من أجل الفن ، لكن في الحالة دي بغني مناحات ..
علي اللحو وكدة ..
Quote: الأخ الخاتم زميل دراسة سابق معك في الهند
معانا هنا في هيوستن.. وصاني أسلم عليك. |
يا سلاااااام الخاتم يا ..
زول سنير بالجد ..راجل رائع بالله سلم عليهو شديد وقول ليهو حسين الفاضل في الخرطوم الايامات دي ..
تسلم ..
|
Post: #39
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:25 AM
Parent: #32
سلام بشير ..
Quote:
ضحك عم مختار ضحكة طويلة (الله يرحمه ويحسن اليه)
وقال:
عليك الله يا احمد ياخوي بعد ما اموت
ح ارفع راسي تاني واشوفهم اتشاكلوا ولاّ لا ؟
الله يرحمهم جميعا .
فدحين ياناذر ياخوي ؛بعدما نموت ح نرفع روسينا تاني
نشوف النسوان بسون في شنو ؟ |
حكمة والله ..
بس الوصايا مرات بتكون مهمة عشان ما الأهل والجيران يشيلو حس الأولاد لو خصلت مشاكل لا قدر الله ..
لهم المغفرة ..
|
Post: #40
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:27 AM
Parent: #32
الأرباب المحرب .
كيفك وكيف الجماعة ؟
Quote: والله ياناذر الراجل كان مالى مركزو المراء لن تنساه ابدا والعكس صحيح
وطبعا الحبس دا سنه لابد منها ولكن فى حريم دايرنها تنتهى بس شى مفروض
عندنا امثله كتيره طرحها هنا تنقيص من قدرها |
أيوة المراة ما بتنسى زوجها لكن برضو دا ما معناهو تحد عليهو العمر كلو وما تعيش حياة طبيعية من بعدو ..
حكم الإسلام شنو في الحبس ؟ لاني بعرف نسوان ما بيتحبسوا المدة المقررة في العدة !!
|
Post: #41
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:29 AM
Parent: #32
دكتور يوسف :
Quote: دا لو تمت الحبس يا ناذر , وإلا شفت واحدة
راجلها مات شهر ما تمتو واقفة قدامي في
سوق السمك . |
وكمان نفسها مفتوحة تشتري سمك ؟؟؟!!!!!!!
|
Post: #42
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:32 AM
Parent: #32
سلام عبد الرحيم ..
Quote:
قمة الانصرافية من بعض النسوان
الواحدة تفتش ليها مناسبة من مافي عشان تظهر
ما مشكلة طهور، سماية، عرس، خروج من بيت الحبس، عيد ميلاد...الخ
وده كله عشان البوبار!!!
ربنا بس يصلح الحال |
والله بس نقول ربنا يصلح الخال ..
|
Post: #43
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:33 AM
Parent: #32
دكتور صلاح ..
Quote: يا سيدي "الحي أبقى من الميت" ، سنغادرها بكفن بدون جيوب، فلا تحزن، فإن كانت الحكومة تبوبر بمال الشعب الشبع موت، فما بالك بسيدات المجتمع "العامل" راقي. لا تحزن تعددت الأسباب "والبوبار" واحد.
|
والله زي ما قلت الحي أبقى من الميت ..
بس ما في داعي للبوبار زي الكأنو إحتفال بي وفاة الزوج ..!
|
Post: #44
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:34 AM
Parent: #32
إقبال المرضي ..
ما هي الحكمة من حبس الرجال ؟
حكمة حبس النساء معروفة ولها مبرراتها ..
|
Post: #45
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-18-2009, 10:36 AM
Parent: #32
سلام هواري ..
تسلم يا حبيب وما تقصرو مع ولدنا لؤي
|
Post: #47
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Luay Elhashimi
Date: 12-18-2009, 01:01 PM
Parent: #45
شكرا يا ناذر علي (ولدنا) دي...اسقتني شاي الصباح بي (دفوها)..
|
Post: #48
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: عزيز عيسى
Date: 12-18-2009, 05:34 PM
Parent: #47
معليش يا ناذر بعد إذنك أسمح لي أرد على الأخ لؤي.
Quote: يا عزيز عيسي
انتو هوستن دي فيها سودانيين وكمان بورداب ..
وين انتوا..
--------
تحياتي للجميع خاصه ناس قريعتي راحت |
سلام لؤي،
الصديق هواري نمر كثر خيره ما قصر رد عليك.
Quote:
بالحيل
في سودانين و بورداب كمـــــان
تحياتي و اظهر
لو معانا في هيوستن...
|
زمان في التسعينيات كان عددنا في هيوستن لا يتعدى أصابع اليد..
لكن اليوم ما شاء الله عددنا أصبح كبير والبورداب
في سودانيزأولاين عدد لا بأس به.. منهم بارز ويكتب في سودانيز
أونلاين وبعضهم مستخبيء..
خذ مثال:
أستاذنا الكبير عاطف إرنست جبران (سوداني عجوز)
الدكتور أحمد الصائم (عضو قديم لكن ما بدخل على المنتدى نظرا لمشغولياته)
الدكتورة ندى
المهندس عبدالرحمن العجيل
الشاعر عادل عبدالرحمن بخيت
الأستاذ عادل فيلب - بلير Player
الأستاذ هواري نمر
الأستاذ حسن التوم
الأستاذ عبدالرحمن الخليفة
الأستاذ مكي محمد مكي
بالإضافة الى شخصي عزيز عيسى.
وكان معانا المسرحي والشاعر الأستاذ خطاب حسن أحمد
الآن في فرجينيا وحتما سيعود الى هيوستن وإن طال السفر.
وذي ما قال ليك هواري إنت لو معانا هنا في هيوستن نعطيك
الأمان إظهر.
وإيه رأيك الليلة عندنا حنة واحد أخونا سوداني إسمه عزيز
وحيتزوج من سودانية كمان.. ربنا يتمم على خير.
|
Post: #49
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Yassir Tayfour
Date: 12-18-2009, 06:06 PM
Parent: #45
يا ناذر سلامات،
هل يضير الشاة سلخها بعد ذبحها؟ أنا غايتو ماعندي مشكلة، إن شاء الله كل سنة تحتفل بعيد وفاتي، يكفيني منها تحملها وصبرها عليّ حتى مماتي..
___
يا غادة سلامات، فكرة "تحرير شيك بكامل ثروته" دي فكرة ذكية ومُرضيَّة للطرفين 
|
Post: #50
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: عادل عبدالعزيز عبد الرحيم
Date: 12-18-2009, 06:37 PM
Parent: #49
اقول ليك حاجة يا نادر حقو يكون رد الرجال عليهم عملى
والواحد اول ما تموت زوجته يتزوج ويعمل حفلة ويهجج
المشكلة هم ما بيموتوا قدامنا نحن البنموت قدامهم
|
Post: #51
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Osman Musa
Date: 12-18-2009, 07:17 PM
Parent: #50
المك ناذر
سلامات
.. المرحوم ده لو عارف كدى .
ما كان مات .
. بعدين يا ناذر حى دالاس ده وين ؟؟
هو ده ما هو السبب البخلى الراجل يقوم يجى بعاتى بعد يموت .
|
Post: #52
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: الشفيع محمد صادق
Date: 12-18-2009, 08:14 PM
Parent: #51
Quote: .. المرحوم ده لو عارف كدى .
ما كان مات .[/QUOTE
باللآااي .. ماكان مات ؟!.. علي كيفو هو..؟. رجلو فوق رقبتو يموت
وبعدين ياناذر دا يوم فك التسجيلات .. والحي أبقى من الميت ياخ
|
Post: #53
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Luay Elhashimi
Date: 12-19-2009, 00:56 AM
Parent: #52
هواري وعزيز.. تحايا وشكر.. اتمني تلفون منكم -رقمي في البروفايل-او email وشكرا لناذر والارامل..
|
Post: #54
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: AnwarKing
Date: 12-19-2009, 06:12 AM
Parent: #53
ناذر سلامات وكل سنة وأنت طيب...
صراحة أكتر حاجة عجبتني في البوست ده...هي مناشدة الأخ عبد المحسن لتراجي لعمل فيديو يوتيوب...
Quote: وانا من هنا اناشد الاخت الزميله تراجى بعمل فديو بتاع يوتوب لهذه الظاهره
الدخيله على مجتمعنا و محاربة الفساد والعادات السلبية التى لم نسمع بها من قبل
أو نتخيل حدوثها أتمنى من تراجى عمل اللازم فى هذا الموضوع .
|
وأناشده هو أيضاً والمناشدة موصولة للجميع بعمل فيديوهات يوتيوب لمخاطبة جميع المشاكل في حياتنا...
التحية
|
Post: #55
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Dania Elmaki
Date: 12-19-2009, 09:09 AM
Parent: #54
موتوا موتكم و خلونا نحن و ضمايرنا :) (ما بعرف اعمل وش مادي لسان)
يا اخواننا والله السودان ده فيه عجايب زي الهند بقي, يا ربي ده من شنو؟؟
قبل فتره يا نادر اتفرجت على شريط حفله في السودان بفرفور و الحفله لي دي صارفين عليها اكثر من ميه مليون (ما بعرف بالجديد ولا القديم) المهم لا عروس لا عريس بس نسوات قاشرات قشره صاح اها سالت ست الشريط الحفله دي بمناسبة شنو؟ قالت انه بنت صاحبتهم عرسها راجل غنيان و عذبها عذاب الله اكبر و ابي يطلق البنت و سافر دبي خلاها معلقه و في اثناء المحاكم و القضايا الراجل اتقلبت بيه عربيه و مات و البنت ورثت. ما قدرت استرسل في اسئلتي لانه ماما كانت بتحدر لي وقتها ان اسكت لكن كان نفسي اسالها و ده احتفال بالورثه, ولا انه الراجل مات و لا انه البنت اتحلت من العذاب و الاهم من كده الدفع قروش الحفله منو؟ ما يكون المرحوم بعد موته, شئ يحير
|
Post: #56
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:00 PM
Parent: #55
ياسر ...
Quote: إن شاء الله كل سنة تحتفل بعيد وفاتي، يكفيني منها تحملها وصبرها عليّ حتى مماتي..
|
غايتو يا المسنوح ليها حق تحتفل لانك بتكون منجضا نجاض قبورة ..!!
|
Post: #57
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:01 PM
Parent: #55
عادل ..
| Quote: المشكلة هم ما بيموتوا قدامنا نحن البنموت قدامهم |
|
Post: #58
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:02 PM
Parent: #55
عثمان :
Quote: سلامات
.. المرحوم ده لو عارف كدى .
ما كان مات .
|
أو قبل ما يموت كان سجل ممتلكاتو اوقاف ..!
|
Post: #59
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:03 PM
Parent: #55
الشفيع :
| Quote: وبعدين ياناذر دا يوم فك التسجيلات .. والحي أبقى من الميت ياخ |
ما قلنا شي .. لكن الشغلة ما تكون بالطريقة دي ياخ ..!!
|
Post: #60
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:05 PM
Parent: #55
سلام انور ..
Quote: صراحة أكتر حاجة عجبتني في البوست ده...هي مناشدة الأخ عبد المحسن لتراجي لعمل فيديو يوتيوب...
|
أنا ما عجبتني ..
دي قضية إنصرافية ساي .. خلي تراجي تركز في المظاهرات والإنتفاضات وكدة ..!
|
Post: #61
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-19-2009, 01:07 PM
Parent: #55
دانيا :
| Quote: قبل فتره يا نادر اتفرجت على شريط حفله في السودان بفرفور و الحفله لي دي صارفين عليها اكثر من ميه مليون (ما بعرف بالجديد ولا القديم) المهم لا عروس لا عريس بس نسوات قاشرات قشره صاح اها سالت ست الشريط الحفله دي بمناسبة شنو؟ قالت انه بنت صاحبتهم عرسها راجل غنيان و عذبها عذاب الله اكبر و ابي يطلق البنت و سافر دبي خلاها معلقه و في اثناء المحاكم و القضايا الراجل اتقلبت بيه عربيه و مات و البنت ورثت. |
الموت ما عندها لكن ...!
| Quote: لكن كان نفسي اسالها و ده احتفال بالورثه, ولا انه الراجل مات و لا انه البنت اتحلت من العذاب و الاهم من كده الدفع قروش الحفله منو؟ ما يكون المرحوم بعد موته, |
طبعا بتكون قروش المرحوم ..
يعني بقت عليو موتة وخراب ديار من وراو ..!
|
Post: #62
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Abuelgassim Gor
Date: 12-19-2009, 02:43 PM
Parent: #61
يا ناذر يا ولدى
النسوان ديل غايتو!!
طيب .. نستعمل آخر كرت ...يعنى الواحد يقوم يبقى بعاتى يجى يجوطهم ويرجع تانى لقبرو زاتووووووووو
|
Post: #63
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: وجن
Date: 12-19-2009, 04:37 PM
Parent: #62
موضوعك جميل كعادة مواضيعك
تسلم للطرح
تصدق قبل فترة سمعت بنفس الموضوع دا هنا في السعودية وما استنكرتوا لآن
السعوديات هنا مقهورات ومعذبات وضايقات الويل والثبور من أزواجم
اما السودانيات بطبعهم ولوفات وحنينات فكون الواحده تبتهج البهجه دي كلها ففي الموضوع أكيد إنه
عموما التقليعات أصبحت كتيره جدا وكل زول بظهر بطريقتو والحاجه أم الإختراع
|
Post: #64
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Osman Musa
Date: 12-19-2009, 07:10 PM
Parent: #63
ياناذر
واحد عرس بعد سنتين زوجتو ماتت .
عرس تانى برضو بعد سنتين ماتت .
صاحبو قالو اسمع النوع البموت سريع ده وين ؟؟؟؟ ها ها ها هههههه .
..
يا ناذر كدى وصف لى حى دالاس .
سلام
|
Post: #65
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: بكري الصايغ
Date: 12-19-2009, 08:14 PM
Parent: #1
سعودى يحتفل بزفــافه الثانــي بعـد 24 ســاعة على وفــاة زوجتـه الأولى
------------------------------------------------------------------
http://www.hanein.info/vb/showthread.php?t=144342
فى واقعة مثيرة، قامـ
خمسيني سعودى بإكمال
وإتمام تجهيزات زواجه
الثاني ولمـ يثنه حزن فراق
زوجته التي لمـ يمر على
وفاتها سوى 24 ساعة .
وذكرت صحيفة "الرياض" أن الزوجة المتوفاة دخلت العناية المركزة بعد صدمتها بخبر خطبة زوجها،
حيث استغل الزوج هذه الفرصة ليحدد موعد الزفاف دون أن ينتظر مصير زوجته وصادف الموعد بعد وفاتها
بساعات في حين أتمـ العريس مراسمـ الفرح بزواجه
الجديد في موعده المحدد
رغمـ توافقه مع حالة الحزن والعزاء التي يعيشها أبناؤه
وأسرة زوجته الأولى.
|
Post: #66
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: فتحي البحيري
Date: 12-19-2009, 08:39 PM
Parent: #65
Quote: تتصوري البورد دا مليان بي أسياد وسيدات المجتمع !
وناس قريعتي راحت بيتعدوا على أصابع تلاتة أربع يدين بس ..!
|
وأنا اقول احساس الالفة دا جاييني من وين
كنت قايلنا أقلية !!
|
Post: #67
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-20-2009, 08:38 PM
Parent: #66
بروف قور ..
وينك مختفي يا راجل ؟!!
| Quote: طيب .. نستعمل آخر كرت ...يعنى الواحد يقوم يبقى بعاتى يجى يجوطهم ويرجع تانى لقبرو زاتووووووووو |
|
Post: #68
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: سناء عبد السيد
Date: 12-20-2009, 08:42 PM
Parent: #67
| Quote: طيب ياناذر مش اخير من الراجل البيعاين للنسوان المعزيات وبيفكر فى البديل وهو قاعد يستقبل العزاء فى وفاة زوجتو ؟ |
يسلم كيبورديك يا قلقو
|
Post: #69
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Yousif A Abusinina
Date: 12-21-2009, 07:03 AM
Parent: #68
"إنني مسيحية متدينة وبالطبع وضعت كل الأموال في التابوت كما وعدته"
وإستعجبت الصديقة وهي ترد.. لكنني لم أر أية أموال في تابوت المتوفي
فردت الزوجة.. لقد حررت له شيكا بكل ثروته.. فإذا كان هنالك بنك فيمكنه صرف الأموال
والتمتع بها كما يريد في حياته المقبلة..
ماقصرت اوفت يا غادة كتبت شيك
والله يا ناذر اخوى حقوا عشان ما تزعل وانت بعد خرف فى قبرك تتفق مع المداااام على برنامج المرقة من بيت الحبس بتكون كيف ؟؟؟؟؟؟
بس حاول اتفق معها فى موضوع الفنان يكون مداح مش فنان او فرقة الصحوة هههههههه
|
Post: #70
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-21-2009, 07:08 AM
Parent: #69
عثمان موسى :
Quote: يا ناذر كدى وصف لى حى دالاس .
|
والله يا عثمان علمي علمك ..!!
البلد كل يوم والتاني فيها أحياء جديدة ومرات القديمة بيعملوا ليها (رينيم) بواسطة أهلا الساكنين فيها ..
|
Post: #71
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: Siham Elmugammar
Date: 12-21-2009, 11:49 AM
Parent: #70
سلامات يا نادر
اها يا سيدى الامنتى ليك
مره زمان انا سألت السؤال بتاع ليه الواحده لازم تمشى تحمدل السلامه( يوم المروق)
ده اسمو بالمناسبه
اها امى قالت لى لانو زمان النسوان كان بفتكرو لما الواحده راجلها بيموت بيجرها معاهوو بتلحقو
سريع وهى لسه فى الحبس
اهااا فترة الحبس دى بالنسبه ليهن كانت زى الواحده فى "الاعراف" مابين الموت و الحياه
لو نجت النسوان بتلمن و كل واحده بتعمل ليه نوع من الاكل و ناس البيت بعملو رز بى لبن (لاحظ ارتباط الرز باللبن عندنا فى الصدقات و الكرامات للنجاة من الشرور) والحبس طبعا شر بالنسبه ليهن.
و كان الواحده لما تجى داخلها اول شى بتقول لى مرة الميت حمدالله على السلامه و عادة ما بيكون فى دميعات حقيقه او مجامله المهم الناس بتعبر انها حامده الله انو الارمله نجت و فى نفس الوقت بياكدو الحزن على المرحوم عشان كده بعد حمدالله على السلامه بيقول ليهو الله يعوض عليك فى وليداتك و كان ما عندها اولاد مافى زوله تستجرىء حتى تدعو عليها بالسنه و هى ان ربنايجيرها فى مصيبتهاويخلف ليها خير منها.. وده ممكن يكون اسبابو كتيره لكن خلينا منها هنا بس نقول جزء من الاسباب دى هو المحافظه على الجو الحزين
اقول ليك حاجة يازول عشان كسلت اتم باقى الكلام (مووباااالغه موش)
الجديد شديد و الاثرياء الجدد يا ما دخلو مظاهر عجيبة
وانا برضو سمعت القصه دى قبل فترة طويله ومن مصدر موثوق كمان
|
Post: #72
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: محمد عمر جبريل
Date: 12-21-2009, 12:34 PM
Parent: #71
Quote: رأيكم شنو- يا رجال وسيدات..؟!
ده جهل او او بوبار او ....... ما عارفه اوصفه . |
أبدا ....
دي حسادة منك ساااااااااااي
ياخ ما ياكلن كان دايرين ياكلن ..
ياها عدة البيت وأكل البيت..
يمشي يجيبو عدة من الجيران ومن بيت ناس حبوبة
عشان ما يجرحوا مشاعرك ؟؟
اكلي وقولي الحمد لله
وكمان المفروض تديهم دعوة حلوة كدة ..
اللهم زد وبارك ..
مثلا ..
|
Post: #73
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-21-2009, 03:23 PM
Parent: #72
رأي أخر من الإيميل :
Quote: في رأي ان هذه المرأه ناكرة للعشرة متبلدة الاحساس ولم تراعي حتى لابنائهم واكيد الابناء لا يوافقو على هذه التصرفات . وظاهر من الاحتفال الخرافي الذي عملته ان المرحوم لم يبخل عليها بشئ . هي منقاده وراء المظاهر والمثل البيقول الدنيا سمع وشوف. ونست ان هناك من ينتقدها خاصه اهل المرحوم واكيد لم تدعهم لهذه الاحتفاليه لانه بالتاكيد لا يرضو بهذا. اما من يقول ان الزوج يتزوح عند موت الزوجه فهذا لا يبرر افعالها وربما يكون محتاج لمن ترعى الابناء وربما يريد ان يعف نفسه ولاتنسو ان الشرع حلل له باكثر من واحده.
هذه الظاهره تدل على جهل وسوء فهم ولا أظن تأتي بها متعلمه مثقفه وهنا نأتي لتعريف من هي المثقفه؟ هل هي من درست حتى مستوى جامعي ؟ في رأي لا.. بل هي من تحسن التصرف مع كل الاشياء بمعنى ان لا تشذ عن المجتمع الذى هي فيه وأن تكون صغيره مع الصغير وكبيره مع الكبير وان لا تتعالى على من هم دونها علماً ومقاماً مادياً او إجتماعياً أى ان يكون تصرفها حضاري
|
|
Post: #74
Title: Re: يا رجال تعالو شوفو آراملكم بيعملو شنو ( بعد موتكم طبعاً ) ..!!
Author: ناذر محمد الخليفة
Date: 12-22-2009, 01:42 PM
|
|
|