يا أخوانا الفار دا أعمل معاهو شنو ؟!!!

الأيامات دي عندي مشكلة عويصة خلاص ... حرب شعواء مشتعلة في البيت .. ولحدي هسي ما معروف إذا كنت هازم او مهزوم ... طافش أو مطفوش .. كاتل يا مكتول .. وعدوي المرة دي ما بشر نوع التقدر تنازلو أو تصارعو يختها ليك وتختها ليو كما جرت العادة .. خصمي المرة دي (الله يكرم السامعين) فار !! .. أي والله فار مااااااكن وتخين وخايف أقول جِقِرْ بس ما إتأكدت لحدي هسي المهم هو ما( أُم سيسي) حقنا المعروف داك !!

والقصة كالتالي :

جيت داخل البيت قبل إسبوع متأخر شوية مجرد ما فتحت باب الغرفة لقيت قدامي فار تخيييييييين واقف بيعاين لي جو عيني مباشرة التقول كان منتظرني .!! إتخلعت بالجد والفي راسي طار ! الخلعة من إنو الفار ما جرى ولا حتى إتحرك .. واقف في حتتو وبيعاين سااااااااي !! من الدهشة والخوفة ما عرفت أطردو كيف !! شبكتو ليكم بِس .. بِس وهو ما إتحرك من مكانو إلا لمن إتناولت لي برطوش حتين إتحرك وقام جرى دخل تحت الدولاب !!

قصة غريبة جداً !! رقدت أفكر وأقول يا ربي الفار دا جا من وين ؟ وداير شنو ؟ ...بما إنو الوكت كان متأخر شوية قلت أحسن إنتظر للصباح وأشوف الحاصل .. بس المشكلة إنو الفار ما إنتظر للصباح معاي .. الليل كلو شاعر بيهو حايم في الغرفة وبيفرفر من حتة لي حتة سمعت صوتو طالع في الدولاب وتحت السرير وفي طربيزة الكومبيوتر وأنا حا ولت اطنشو وأنوم لكن لاوزت يقوم يجيني فوق في السرير عشان كدة نمت بي عين واحدة اليوم داك !!

تاني يوم الصباح قمت وعملت إنفيستقيشن في البيت فإكتشفت إنو الفار دا جا داخل من بيت الجيران الناسو رحلو منو .. الظاهر كان مؤجر معاهم وبعد ما رحلو ما لقى حاجة ياكلا أو يشربا فقرر يرحل معاي أنا ، التقول انا فاتحا تكية !! ..

عملت إحتياطي ونفير في البيت وريت الجماعة كلهم إنو (في بيتنا فأر) والناس تعمل حسابا لاني ما عارفو ضكر ولا إنتاية .. متزوج ولا (علي قيد الحياة) أمكن يكون جانا بي أولادو أو يكون أنثى حامل وكايسا ليها حتة تفقس فيها .

ناس البيت عملو اللازم وأنا طلعت الشغل ومن هناك جاتني إشارة عاجلة إنو الفار حايم في البيت بي كل ثقة وما خايف من زول .. مرة في المطبخ ومرة في الحمام ومرة في الحوش لكن أكتر (المرارير) في غرفتي ،ودا الكان بيخليني أتوتر !!!

جيت نهاية اليوم لقيت الفار دا بدا يستعرض في قوة أسنانو ! لقيتو مسك وصلة الكهرباء وأكل جزء كبير منها لمن عورتا إنكشفت ، والسلوك النحاسية الجوة ظهرت !! والغريبة الكهرباء ما طقتو وكتلتو !! التقول سنونو مغلفا بي خشب !! .. قلت النخش إستحما قفلت باب الحمام وراي لقيت روحي قدام الفار دا وجها لوجه !! كنت قايل روحي زريتو واتاريهو هو الزراني .. لقيتو قاعد فوق حوض الموية وبيعاين لي بدون ما يخاف .. ودي كانت فرصة كويسة إني أدرسو عن قرب وأشوف مواصفاتو وهو اتاريهو برضو كان بيدرس فيني ويشوف مواصفاتي .. ودي عرفتها من عيونو الكانت بتعاين لي تحت وفوق بي إنتظام !! ..

فاري دا إتضح لي أثناء دراستي ليهو إنو فار منزلي وحجمو أكبر من المتوسط قدر قبضة اليد عيونو خضراء عسلية وشنباتو يمين أطول من شنباتي دي ، التقول فار جعلي جاني مهاجر من المحمية .. عندو (فراء) رمادي جميل وشكلو ناعم بس أنا ما هبشتو .. وأخطر ما في المواصفات دي سنونو وخشمو العامل زي الضفارة !! سنونو بارزة جدا لي برة طويلة وحادة زي المنشار (دا بيكون بسنها مخصوص لي غرض ما عرفتو شنو لحدي هسي ) !!

فكرت قلت أحسن أطلع من الحمام بي سرعة وأقفلو جوة .. وفعلا نفذت الشغلة دي ومشيت جبت لي عكاز ماكن وفتحت الباب وانا جاهز عشان أديهو واحدة افرطق بيها راسو ، لكن لقيتو إختفى مرة واحدة رغم إنو ما في حتة يطلع منها إلا مروحة الشفط ودي عالية والحيطة ملساء بالبلاط !! طيب طلع كيف ؟! يكون يا ربي مركب في كرعينو شفاط قزاز عشان يثبت بيهو نفسو ولا كيف ؟!! راسي ضرب وما لقيت حل إلا إنو الفار دا طلع من المروحة ، لكن عرفت معلومة جديدة أول مرة اعرفا اللي هي الفيران دي من النوع المتسلق للحيط الملساء بدون ما يقع زي الضببة (جمع ضب) ..

طبعا في الظروف دي لغيت مشروع الحمام (إستحمى كيف والفار دا بيراقبني وراجيني أتعرى قدامو يقوم يشتغل فيني قريم بي سنونو ديك ) !! .. إتشطفت ودخلت المطبخ إتغدى لقيت الفار دا بوظ الأكل لأنو بي كل حسادة أخد من كل حاجة قرمة كبيرة ما خلى أي حاجة ما قرم منها حتى طبق الكسرة قرم من السعف بتاعو لكن الظاهر طعما ما عجبو !!

مرقت بالليل وجيت متأخر كالعادة وأنا متوتر وبدعو في ربنا الفار دا يكون إتخارج مجرد ما فتحت الباب وولعت النور لقيت منظر غريب !! الفار الما بيخجل طالع في طربيزة الكمبيوتر ومتلصق جمب الفارة وخاتي خشمو في خشمها محل بيطلع السلك وقاعد يتحكحك !! ما زعلتني قلة ادبو لكن الزعلني إنو واصل في شغلتو ولا إشتغل بي في تجاهل واضح وعدم تقدير لي رجولتي وعزوبيتي وعدم مراعاة لي أحاسيسي النبيلة .. ما كضبت طوالي شلت الجزمة وفكيتا ناحية قيس وليلى ديل !! .. قيس طلع حريف جفل في أخر لحظة لكن الجزمة جات في راس ليلي وعملت ليها إرتجاج في ال SCROLL بتاعتا !!

حلفت قلت الليلة أصلو ما أنوم كان ما قبضت الفار دا او طردتو على اسوأ الفروض .. عاينت لي الجهة التانية من الغرفة لقيتو واقف بيعاين لي في تحدي واضح إتحركت عليهو بي غيظ وهو واقف لكن فجاة كدة انا زاتي وقفت بعد ما جاني خاطر في راسي !! قلت إنو الفار دا إحتمال يكون شيطان متلبس في شكل فار ،، أو فار راكبو شيطان وفي الحالة دي من الأفضل التعامل مع الموضوع بي حكمة بدل التشنج .. فكرت سرعة وأنا بعاين ليهو وهو بيعاين لي زي الداير يعرف خطوتي الجاية شنو .. طوالي فكرت قلت عشان أقطع الشك باليقين أحسن أقرا ليو كم أية كدة من القرأن الكريم لو الفار إتحرك وإتضايق يبقى اكيد دا شيطان راسو عديل وفي الحالة دي الحل ساهل .. جارنا الفكي أبكرينا قاعد أمشي أناديهو وهو بيتصرف معاهو بعد داك ..

بس كانت مشكلتي أقرا ليهو يا تو آيات من القرآن الكريم ؟ لأني بي صراحة ما حافظ الأيات البتساعد في تهييج الشياطين والجان .. بي سرعة فكرت وقلت بما إنو القدامي دا فار فأكيد ممكن الواحد يقرا ليهو كم اية من السور الفيها أسماء حيوانات زيو زي سور العنكبوت والبقرة والفيل والنحل والنمل .. مسكت اول وأقرب واحدة اللي هي صورة الفيل ، وبديت أقرا فيها بي صوت عالي وأنا مركز على الفار لكن النتيجة كانت مخيبة بالجد لأنو الفار بدا لي ذي الإستعدل في وقفتو ودنقر راسو وبقى يستمع في خشوع !!! مع إنو زمان قرينا في العلوم إنو الفيل بيخاف جدا من الفار رغم ضخامتو لانو الفار ممكن يكتل الفيل بي كل سهولة لو قدر يطلع في خرطومو ويخش في نخرتو يكتم ليهو (النفاسات) ويرقدو سلطة !!

سورة الفيل إنتهت والفار عاين لي زي البيقول (أحسنت) أو (هل من مزيد) ؟! لكن طبعا ما كان في مزيد لأنو بي صراحة بقية السور ما حافظ منهم ولا أية !! وبالرغم من دا حمدت الله على الاقل إتضح لي إنو الفار بتاعي دا ما راكبو لا جان لا شيطان فقلت أحسن أحاول أضربو بالعكاز وبديت معاهو أشرس مطاردة في الغرفة وفي النهاية قدر يدخل جوة دولاب الملابس الكان مفتوح وطوالي بي سرعة قفلت الدولاب بالمفتاح ودسيت المفتاح في جيبي (للضمان وكدة) وأنا فرحان جدا . أخيرا أب شنبات في المصيدة وكل الحا يحصل إني أخليهو في الدولاب لحدي ما يفتر وينهكو الجوع والعطش كم يوم وبعد داك أفتح الدولاب يا لقيتو ميت يا كمان بي ضربة بسيطة من اقرب شبشب جبت خبرو وأرتحت من الهم دا ..

مشيت رقدت في السرير وأنا مرتاح وراضي عن نفسي لكن بعد ساعة أسمع ليك صوت من ناحية الدولاب فررررررر فررررررر كررررررررر ورررررررر !!!! الله الحاصل شنو ؟! ولعت النور وشفت ليكم منظر عجيب ؟!!

شوف عيني نشارة دولاب الخشب نازلة من تحت بي سرعة شديدة وبي إنتظام مع إستمرارية الصوت .. أتاريهو إبن الكلب قاعد ينشر في الخشب عشان يعمل ليهو خرمة يطلع منها وإذا طلع فبالتاكيد أول حاجة حا يفكر فيها هي الإنتقام مني ودا الهاجس هنا !!

ما كضبت طوالي مشيت ناحية الدولاب وبقيت أضرب فيهو من برة عشان الفار يخاف ويخش لي جوة .. لكن الفار واصل ينشر في الخشب ولا شغال بي (عارفا دي جلكسات مني ساي) والنشارة نازلة زي المطر (التقول مركب في خشمو فارة نجارة) ..

طيب أعمل شنو ؟!!! .. قدرت إنو الفار إذا نجح يطلع من الدولاب فبالتأكيد حا يكون عطشان ولازم يشرب عشان يبل ريقو ويغسل سنيناتو السنينات ديل !! طوالي إتذكرت واحد صحبي قال لي أخت للفار موية مخلوطة بي إسبرين أو بندول مجرد ما الفار يشربا طوالي حا يموت أسرع من سم الفار زاتو .. طوالي مشيت جبت لي صحن صغير وكباية موية ذوبت فيها 3 كورسات بندول وتلاتة كورسات إسبرين وصوتهم بالمعلقة وكبيتا في الصحن وأنا على يقين إنو الوصفة دي لو شرب منها حصان عديل طوالي حا يتلحس ، خلينا من الفار الصغير دا .. (لاحظو إنو صوت النشر بتاع الفار لسع متواصل أثناء تحضيري للوصفة دي) !! المهم ختيت الصحن قدام الدولاب ومشيت قلت أخد لي نومة لأني كنت تعبان والصباح رباح !!

جاتني كوابيس مرعبة اليوم داك .. حلمت إنو الفار طلع من الدولاب وشرب من الموية ومشى على فارة الكمبيوتر (وإتحكحك معاها شوية) وبعد داك جا متلب لي في السرير وجاني جم كرعيني عديييييييييييل !!! ... في اللحظة دي شعرت بإني لازم أقوم من النوم لكن ما قدرت ، جاتني الحاجة الإسمها (الجاثوم) البتتقل الزول لمن يجي يصحى من النوم والوكت دا الفار قرض جذء من الغطاء الكنت متغطي بيهو ودخل تحت الغطاء .. وأنا بحاول أقوم من الكابوس دا وما قادر ونفسي ماشي زايد ..

كنت نايم لا بس برمودا رياضية قصيرة والفار جاني من طرفا (فوق للركبة) وبدا يقرض وينشر وهو متقدم لي فوق وأنا كبيت عرق شديد في الصقط دا وما قادر إتحرك أو أقوم من النوم والفار متوغل وماشي وما شي .. هو والقون ... هو والقون زي ما بيقول مذيع الكورة داك وفي اللحظة دي قدرت إتنفض وأنط وأولع النور وأنا نفسي قايم شديد .. دا حلم شنو وكابوس شنو دا ؟!!

في اللحظة دي إنتبهت إنو الدنيا برد زيادة عن اللزوم عاينت لي البرمودا قربت أغمر من الخلعة لمن شفتها مشرشرة ومشروطة !! أتاريني ما كنت بحلم والفار فعلا كان في سريري .. وبالرغم من دا حمدت ربنا إنو البرمودا كان فيها سوستة وهي العطلتو .. لأنو لوكانت تكة عادية والفار قدر يمر ويمرر مخططاتو وأفكارو الشيطانية الحاقدة كان ما في حل المرة دي إلا ألغي فكرة الزواج (البأجلو كل شوية دا) مرة واحدة ، وأمشي اعتكف في زاوية أو أطلع الجهاد في أفغانستان او البوسنة والهرسك !!

مشيت ناحية الصحن عشان أعرف لو هو شرب من الموية ولا ما شرب !! من ما عاينت للصحن طوالي إتذكرت الفكي الجابو ليهو شاي بي لبن لمن شرب اللبن وفضل الشاي لأني لقيت الموية ما فيشة لكن البندول والإسبرين قاعديييين وبي نفس الكمية الكبيتا !!

الموضوع بقى جد خطير ووصل العضم طالما بقى متعلق بي مشاريعي المستقبلية وطالما الفار الفارة دا ما قادر يفرز يقرض شنو من المايقرضو شنو .!!.. عشان كدة تاني يوم الصباح طوالي مشيت السوق عشان أشوف شي يقبض الفار دا ..

*السلام عليكم !! كيفك يا حاج ؟!
*عليكم السلام يا ولدي .. إتفضل داير شنو !
*بقول شنو يا حاج .. عندك شرك فار ؟!
*داير تقبض بيهو شنو يا ولدي ؟!!
*داير أقبض بيهو سمبرية يا أبوي .. عندك ولا أشتت ؟!
*إنت زعلت ولا شنو ؟!
*كيف ما أزعل ياخ !! أقول ليك داير شرك فار تقول لي داير تقبض بيهو شنو ؟!
*خلاص ما تزعل يا ولدي عندي واحد عادي زي الزمان داك وواحد شكل قفص ؟!
*الفرق شنو في الإتنين يا حاج ؟
*الفرق الأول بيقبض الفار ويخنقو لامن يموت والتاني بيقبضو ليك حي جو القفص .
*أديني ليهم الإتنين يا حاج ..
*إنت داير تقبض الفار حي تعمل بيهو شنو ؟!
* داير أسلخو و أسوي من جلدو محفظة يا حاج ..

شلت الشركين وجري على البيت .. الوكت دا ناس البيت كانو جابو سم فار وشتتوهو في الغرفة لكن بعد أقل من ساعة لقو الفار أكل السم كلو ولسع بيتحاوم في الأوضة (التقول أكل حبوب منشطة ما سم فار) !!

ما صبرت لحدي يجي الليل ..طوالي نصبت الشركين وطلعت لمن جيت راجع بعد فترة لقيت الشرك التقليدي ما قبض الفار رغم إنو الفار جا وأكل الطماطماية الفيهو لانو الشرك طلع قوي ومعصلج حبتين وما حساس لي حركة الفار .. والشرك التاني زي القبض الفار لكن الفار قدر يطلع منو بعد ما أكل اللحمة الجواهو لأنو الزول العمل الشرك كان طيرة ساي وعمل السقف من البلاستيك والفار طلع في باب الشرك ونشر السقف عمل فتحة متساوية الأضلاع وإتخارج !!

هسي العمل شنو يا أخوانا مع الفار دا ؟!! انا هسي بكتب في البوست دا وأهو الفار قدامي في الطربيزة مع محبوبتو الفارة بيتحكحك فيها كالعادة ولا شغال بي الشغلة ؟!!

شنكل :

أنا غرضي كلو حاليا حماية مستقبلي لاني بالجد داير أعمل لي أطفال وأبناء لي قدام .. جاتني فكرة مجنونة من وحي بوستات هشام هباني المرسوم فيها البتاع داك .. لكن لمن رجعت السوق أسأل لو كان في منو واحد مصفح أو من الصلب الزول الباع لي الشرك داك سألني :

ودا داير تستعملو فوق شنو يا ولدي ؟!!

Quote: انا هسي بكتب في البوست دا

الدنيا ليل ولا نهار يا ناذر ..

Quote: جيت داخل البيت قبل إسبوع متأخر شوية مجرد ما فتحت باب الغرفة لقيت قدامي فار تخيييييييين واقف بيعاين لي جو عيني مباشرة التقول كان منتظرني .!! إتخلعت بالجد والفي راسي طار ! الخلعة من إنو الفار ما جرى ولا حتى إتحرك .. واقف في حتتو وبيعاين سااااااااي !!

ده بيكون صاحبي بيجو .. بس انت كنت طاشن شوية ببتاعاتك ديك ..!

يا ناذر يا خوي
نوم علي ضهرك وما تتقلب
لحدي ما تعرف الفار ده نفسياتو كيف

ناذر

خوفي تكون جبتا (تيراب) الفار ده من الهند في شنتطك اللي كنت بتملاها بالصندل



الفار ده لونه شنو

يا شوشتا ..

Quote: الدنيا ليل ولا نهار يا ناذر ..

الدنيا هسي نهار لكن البوست دا كتبتو أمبارح بعد الساعة إتناشر ولمن جيت أنزلو لقيت الكونكشن قاطع

الطاهر ساتي ..

Quote: ده بيكون صاحبي بيجو ..

قلنا فار ياخ ما حاجة تانية

ود طيفور ..

Quote: لحدي ما تعرف الفار ده نفسياتو كيف

عرفت نفسياتو من أول هجمة شناها علي في السرير

لكن برضو معاك حق أحسن الواحد يكون حريف و يعمل حسابو

حيدر ..

Quote: خوفي تكون جبتا (تيراب) الفار ده من الهند في شنتطك اللي كنت بتملاها بالصندل الفار ده لونه شنو

فار لايوق وشليق زي دا أصلو ما قابلني ولا حتى في الهند .

الفار لونو رمادي لكن لمن ينقبض وأجلدو بي سوط العنج لونو حا يقلب كاروهات بالاحمر

Quote: ناذر خوفي تكون جبتا (تيراب) الفار ده من الهند

ناذر كان بجيب من الهند حاجه كان جاب عبدالكريم العدل والمساواة
وريح الجمل والجمالى(ماداير اقول تور قور)

جوه الموضوع
درب الفار على الكمبيوتر
وفى نوعية بوستات ما محتاج تداخل فيها
سيبو يقوم بالواجب
احتمال يقنع بقال ويريحك من البحث عن عبد الكريم الهندى

محاذير
بس اعمل حسابك
لو طلع تفتيحه سينافسك فى نجومية العام القادم

أوسلي ..

Quote: ناذر كان بجيب من الهند حاجه كان جاب عبدالكريم العدل والمساواة وريح الجمل والجمالى(ماداير اقول تور قور)

الإتنين ما بنقدر عليهم وبوست الصور داك خليتو اليغطس

Quote: جوه الموضوع درب الفار على الكمبيوتر وفى نوعية بوستات ما محتاج تداخل فيها سيبو يقوم بالواجب احتمال يقنع بقال ويريحك من البحث عن عبد الكريم الهندى

الفارة ما داير الكمبيوتر .. داير الفارة بس

بختك يا ناذر دا ما فار ( فار ) دى جنية عايزة تتزوجك بس اول حاجة

عايزة تتعرف عليك وعلى ناس البيت والبيت زاتو وبعدين تفاتحك فى الموضوع

( مش قلت الفار دا مركز على غرفتك ) يعنى الحكاية ظاهرة عرس عديل كدا

اوعك تحاول تأزيها لانك كدا بتكون خسرت اى حاجة ( لانك اذا الامور ظبطت معاك

حتريحك جدا وبينى وبين احسن ليك الجنية من الانسية )


صنفرة

ما تنسى تعزمنا فى العرس


أحمد العمار

العمار ..

Quote: ( مش قلت الفار دا مركز على غرفتك ) يعنى الحكاية ظاهرة عرس عديل كدا اوعك تحاول تأزيها لانك كدا بتكون خسرت اى حاجة ( لانك اذا الامور ظبطت معاك حتريحك جدا وبينى وبين احسن ليك الجنية من الانسية )

هو مركز على غرفتي ومركز في حاجة تانية برضو كمان


بعدين من مرازاتو لي فارة الكمبيوتر إكتشفت إنو فار ضكر مراهق ساي

شنكل :

ما شايف الشنبات

يا ناذر بسيطة وما تغلب حالك.. محلولة
انا ارسل كديس ايراني من الدوحة هنا..تاني الفار الفاره ده اليجي يتحاوم بجنبكم..!!
............
الكديس الايراني بالدوحة ده نوع من انواع الكدايس المغتربة في الدوحة
كديس عيونو حمر..وزهجان اربعة وعشرين ساعة..وتلقاهو بالليل الا تفك ليهو السكة..!!

!!!!!!

Quote: مجرد ما فتحت الباب وولعت النور لقيت منظر غريب !! الفار الما بيخجل طالع في طربيزة الكمبيوتر ومتلصق جمب الفارة وخاتي خشمو في خشمها محل بيطلع السلك وقاعد يتحكحك !!

أها صورتو ليكم

ناذر يا فرده
انت من زمن الشرك بختو فيهو طماطم ولا جبنه
الفار دا لازم تجذبو بحاجه تفتح نفسو وتخليهو يجي الشرك براهو وهو مبسوط
لمزيد من الشرح انظر للصورة ادناه:

فاره بيضاء ماهله وعيونا عسليه وشعرا طويل

كيكي ...


تعرف سقف الزنك بتاع جيرانا الرحلو ديل .. يوميا بعد الساعة عشرة بالليل تسمع صوت الكدايس نننيييييييييووو نااااوووووووو نرررررررررررر قريب الستة وعشرين كديسة .. يكرهوك النوم زااتو .. ما عارفم بيعملو شنو فوق بالليل كدة !!

فكرت والله أفتح ليهم الشباك يجو داخلين الغرفة يكابسو لي الفار دا أكان قدرو عليهو ، لكن خفت اخارج الفار أبقى في الطريقة التخارجني من الكدسة !!

كدي جرب رسل لي واحد إيراني نشوفو حا يعمل شنو مع بتاعي السوداني دا !!

معاوية ..

Quote: الفار دا لازم تجذبو بحاجه تفتح نفسو وتخليهو يجي الشرك براهو وهو مبسوط

شركك عينة بس المشكلة أنا بدون ما أجرب الشرك دا فاري جا متلب طوالي على فارة الكمبيوتر
يعني بعد دا هو الحا يشرك لي بيها مش أنا

Quote: داير تقبض بيهو شنو يا ولدي ؟!! *داير أقبض بيهو سمبرية يا أبوي .. عندك ولا أشتت ؟!

ههههههههههه
اعصابك يا ناذر
رغم انو لدي الحل الا اني مسمتمع جدا بالوضع الحالي
النشوف اخرتا شنو؟
بالمناسبة يقول ليك
(الفار لعب في عبو)
يعني جاتو شكوك وملاوزه كدا
العلاقة شنو بين الفار والتوهم؟.

الاخ ناذر تحياتي:
اعتقد ان (الجقر) العندك عفو (الفار) العندك ربما يكون جن، عليه اقترح عليك ان تذهب ل(فكي) وتعمل لي كادوك (رتينزة)واحد لييك والتاني لطرد الفار، انا كلمتك وانتا حر.

ناذر

أنا عارفة لي علاج "باتع"
لكن ما بقولو ليك إلا لما أسمع الفار دة عضاك عضة صحي صحي.

ود الخليفة كيفنك،
اها الفار بتاعك العامل فيها صعلوق ده انا جبت ليهو السم القدر غداهو الغلبك انت تجيبو من الهند، عملتها لي كلها صندلية و سرتية.

بعدين شايف الخرم التحت عينو، ده جهاز اشعة تحت حمراء بشوف بيهو في الضلام يعني كان الكهربا قطعت فجأة، فارك الفارة ده ما حايقدر يدقسو.

صنفرة:
اوعي ياكل ليك الماوس بتاع الكمبيوتر.

شنكل: عليك الله لمن الدبيب ده يبدا يشتغل ما تشغل ليهو الاغنية دي عشان بتشوش علي اجهزتو الملاحية

كيفك يا معاذ ..

شنو الحل معاك وما داير تقولو !! دي حرككات جديدة منك ولا شنو !!
أخوك مزنوق ياخ والفار دا أمكن يجي متلب في أي لحظة

Quote: بالمناسبة يقول ليك (الفار لعب في عبو) يعني جاتو شكوك وملاوزه كدا العلاقة شنو بين الفار والتوهم؟.

ما أظن في علاقة بين الإتنين لكن أنا متذكر واحد جارنا في الحلة كان لمن يزعل مني او أقول ليهو كلام ما مظبوط يقوم يقول لي : إنت عندك فار في راسك ولا شنو ؟

شنكل :

والظاهر كلامو صاح لاني فعلاً اليومين دي عندي فار في راسي والفار زاتو عندو زول في راسو !!

يـاتـــو مـــاوس

محمود الدقم ..

Quote: اعتقد ان (الجقر) العندك عفو (الفار) العندك ربما يكون جن، عليه اقترح عليك ان تذهب ل(فكي) وتعمل لي كادوك (رتينزة)واحد لييك والتاني لطرد الفار، انا كلمتك وانتا حر.

أها ولو طلع عندو جن والجن مسلم تفتكر الفكي حا يحلني ؟!
والله بعد دا إلا أطير

هنادي يوسف ..

Quote: أنا عارفة لي علاج "باتع" لكن ما بقولو ليك إلا لما أسمع الفار دة عضاك عضة صحي صحي.

فال الله ولا فالك يا خي ليه كدة بس
بعدين لو عضاني ما مشكلة .. عضة وبتروح ..

لكن لو قرم مني حتة زي ما هو ناوي .. أمشي الجهاد ولا إعتكف ولا أعمل شنو !

أنور تاج السر يمين بالله إنت ما جادي معاي !!

Quote: اها الفار بتاعك العامل فيها صعلوق ده انا جبت ليهو السم القدر غداهو الغلبك انت تجيبو من الهند، عملتها لي كلها صندلية و سرتية.

أسمعني سؤال بسيط بس ما زي سؤال دكتور قور داك :

البصيرة أم حمد بتبقى ليك شنو ؟!

هسي في زمتك لو الدبيب أبو الدفان الجبتو لي دا قدر يقبض الجقر بتاعي ، تفتكر في حيوان تاني يقدر يمرق المخلوق دا من الغرفة !!

صنفرة :

يا زول اختاني أخير لي جقوري دا .. حلاااااااتو سمح بالحيل يونسني ويبقى لي بودي قارد .. أدوعل فيهو وأربيهو لا من يموت وبعد داك أسلخ جلدو وأدبغو وإتبرع بيهو لي ناس نداء الجهاد !!

أقطع وشك العامل زي وش الدبيب دا

ناذر،

اول حاجة انت ما تخاف ساكت، ياخي ده دبيب محترف موش زي دبايب السودان ناس قريعتي راحت. الدبيب ده عارف انو عندو مهمة محددة حينجزها و يقبض حقو و يتخارج طوالي لو كتر كده و اتعولق حيجازف الماوس بتاع الكمبيوتر.
تاني حاجة، هو ذاتو ما فاضي ليك عندو مية تعاقد غير مشكلتك الجزلانة دي، و لعلمك انا اقنعتو بعد تعب يعملا ليك لكن خذلتني و طلعت ما بتنفع فيك الحسنة.

شنكل: انت بتاع كدايس ولا شنو!

أخي الحبيب ناذر الخليفة


تحية عطرة وجميلة جميل تسطيرك الشيق ، ، ،،


يا أخوي أحسن حاجة الفار ده تجيب ليهو قطعة صفيحة قوية وتثبتها في الأرض بمسامير وتخت فيها غراء لاصق معد خصيصاً للفيران وتخت فيها قطعة لحمة وقطعة طماطم وبصلة ولما يجي يدخل علشان يأكل الغراء بيمسك في رجليهو وتاني ما بيقدر يتحرك لا يمين ولا يسار ويظل واقف كده إلى أن يموت . أها جربها وأديني رأيك والله أنا مجربها وناجحة 100% . وربنا يحل زنقتك دي وتعدي على خير . وســلام .

يسري معتصم ..



كديستك العلي الشمال أم شنبات دي والله واقعة معاي في جرح !!
دي الوحيدة الممكن تصلح للمهمة عليك اللله رسل لي الكتلوج بتاعا

Quote: ياخي ده دبيب

!!

Quote: الوحيدة الممكن تصلح للمهمة

طيَب لو قام ضرب ليهو عبَار مكرَب وجا قال ليك ... أين القط .. حاتقبَل وين

ناذر
أقول ليك حل
عشان الفار المراهق ده ما يتصرف تصرف
مش مظبوط إتجاهك شوف ليك فارة إنتاية
و كلها إسبوع و يكون عنده عيال و بعد
داك يبدأ في مشاكل الدنيا و المعيشة و
العيال و الزوجة وكنت وين وهاك يا نقة
وخاصة لو قدرت تملي راس الزوجةبي حبة
كلام و النقة تدور ويكره عيشتة
وإنت تقعد تتفرج في فعائل الفارة

النتيجة
1. صاحبك الفار حيكره حياتو ويهرب
2. إنت يا ظريف موضوع العرس حتتكلو علي جنب
3. قلبك الرهيف حيحن علي الفار و تصعب عليك
حياتو وتبداًٌُ تفكر معاه في حل مشكلة نقة الزوجة
و مشاكل المعيشة والعرس والاولاد ووووووو...
وتهربوا سوي الي ,,,,,
أنا عارف الفار حيمشي وين؟
ولكن إنت الله أعلم ؟ في ست قالوا جميلة فايته الحد
في الخليج بتفتش في عريس (عارفك مابتقصر شفت البوست)
.
أنا و لؤي و نادية وغادة و سفيان و ست البنات
حنزكيك وإنت أصلك نجم 2007

وكده ياظريف ضربت عصفورين
الفار و العرس

رأيك شنو مش أقوي من سجارة هباني

بقول المثل:ـ
العرسة أم فلس ولا البورة أم فار*


إنت غرفتك دى مخليها فاضيه مالك, ماتجيب ليك عروس تحييها,بدل يعنكب ليك فيها فار

...................................................................................
المثل محرف من مثل معاذ(الفره الشنو كدا ماعارف للجمل ولا القعده أم بوم)*

Take e'm to the creek !!

عرس ليهو

يا ناذر ..
سلام
عارفك ّّذكي ولماح ..

ما ترحلو لبيت الجيران موطن صاحبك الاصلي وتحتلوه وهو يبقي لاجئ في بيتكم ؟
شفت كيف

مودتي
ابوبكر

أنور ...

Quote: شنكل: انت بتاع كدايس ولا شنو!

لا لا .. وحاتك أنا بتوع الأوتوبيس

إنعام حيمورة ..

Quote: Quote: ياخي ده دبيب !!

ما تندهسي ولا يغرنك الدبيب الجابو أنور دا وشكلو زي الكوبرا .. يمين دا يجي قدامك تحسي بيهو زي الصارقيلة بتاعت الشجر ما يسوي التكتح !!

شنكل :

لكن برضو الزول لازمن يكون حريف ويعمل حسابو !!

حيدر ..

Quote: طيَب لو قام ضرب ليهو عبَار مكرَب وجا قال ليك ... أين القط .. حاتقبَل وين

حا أقول ليهو أنساني من القط هسي ووصف لي المحل الإشتريت منو عبارك دا

حسن الطيب يا سين ..

Quote: ناذر أقول ليك حل عشان الفار المراهق ده ما يتصرف تصرف مش مظبوط إتجاهك شوف ليك فارة إنتاية و كلها إسبوع و يكون عنده عيال و بعد داك يبدأ في مشاكل الدنيا و المعيشة و العيال و الزوجة وكنت وين وهاك يا نقة وخاصة لو قدرت تملي راس الزوجةبي حبة كلام و النقة تدور ويكره عيشتة وإنت تقعد تتفرج في فعائل الفارة

كلامك دا ما أعوج عديل يا زول !!!
يعني دايرني أشتغل خاطبة !! ولي فار كمان !!
هو أنا لاقي لي زوجة لي روخي المحرقاني دي عشان كمان أفتش لي أم سيسي لي فاري دا !!
هوي يا زول ها .. فتح عيونك أحسن ليك

Quote: النتيجة 1. صاحبك الفار حيكره حياتو ويهرب 2. إنت يا ظريف موضوع العرس حتتكلو علي جنب 3. قلبك الرهيف حيحن علي الفار و تصعب عليك حياتو وتبداًٌُ تفكر معاه في حل مشكلة نقة الزوجة و مشاكل المعيشة والعرس والاولاد ووووووو... وتهربوا سوي الي ,,,,, أنا عارف الفار حيمشي وين؟ ولكن إنت الله أعلم ؟ في ست قالوا جميلة فايته الحد في الخليج بتفتش في عريس (عارفك مابتقصر شفت البوست) . أنا و لؤي و نادية وغادة و سفيان و ست البنات حنزكيك وإنت أصلك نجم 2007 وكده ياظريف ضربت عصفورين الفار و العرس

والله غايتو ذكرتني بي أنور اللي هو ذكرني بالبصيرة أم حمد بي نتائجك دي

Quote: رأيك شنو مش أقوي من سجارة هباني

ولا في أدنى مقارنة

!!!!!!!

Quote: بقول المثل:ـ العرسة أم فلس ولا البورة أم فار*

دي قوية والله يا باش مهندس

والله لو كان في جائزة في المنبر دا لي أجمل تعليق أو أسطل تعليق كنت تستحقو والله على مثلك الجبتو دا

وبعد إذنك تاني المثل دا حا أستخدو انا طوالي لي قدام مع حفظ الحقوق الأدبية

Quote: المثل دا حا أستخدو انا طوالي لي قدام مع حفظ الحقوق الأدبية

خد راحتك ياحبيب


والله يابوالنيذ ماعايز أحكى ليك عن فيران (جقور)هنا,عشان ما أزيد حالة الإضطراب الأمنى الدخلت فيها
علا بشير ليك لقصة حكاها لى من سبقنى فى الغربة هناإنوا فى فار وقفت قدامو كديسة مركبه مكنة كلب بكل بساطة وقف قداما وعلى أرجله الخلفية
وفت خبتة فى أنفها لمن خلاهاتلف صينية.


أنا ماعارف بوب ليه ما أهداك أغنية بوب مارلى (RAT RACE)

Oh, it's a disgrace
To see the human-race
In a rat race, rat race!
You got the horse race; <<<---- ,,وده أظنك بى هناك قالو وقعت من ضهرو
You got the dog race; <<<------,,, وده أظن الصينيين ماخلو ليك كلب حايم
You got the human-race; <<<------,,,وده عايشنو كلنا
But this is a rat race, rat race! <<<----,,, لكن جنس ده قبلك ووحدك

بوب ..

Quote: Take e'm to the creek !!

أي دونت نو إنقلش .. بليس رايت إن أرابيك سو أس تو ليت مي ريبلاي تو يو

Quote: أي دونت نو إنقلش .. بليس رايت إن أرابيك سو أس تو ليت مي ريبلاي تو يو

يـاناذر

لوكتبته ليك بالعربى الفار المغرم بيك ده بعرف الحنك شنو
والخطه شنو ..!!

انتا الفار ده مالو مامشه لاى واحد من الجيران !!!
انتا قلته ليهو شنو ...غايتو يامان يا انتا عامل كمين
ياهو عامل كمين ... بقيتو تخوفوا اليويمن دى!!!.

كــدى حاول اصل معاهو لحل

صباح حسين ..

Quote: عرس ليهو

ولو عرس فارة الكمبيوتر بتاعي .. الحل شنو وأنا ما بعرف إستخدم الكيبورد براهو

أبو بكر ...

Quote: ما ترحلو لبيت الجيران موطن صاحبك الاصلي وتحتلوه وهو يبقي لاجئ في بيتكم ؟ شفت كيف

ممكن لكن أنا شاعر إنو فاري دا بقى ولوف علي ،، ولو رحلت لي بيت الجيران أكيد حا يجي راحل معاي دا لو ما مشى قدامي أو رحل معاي العفش

يعني أكون ما عملت أي حاجة

صباح الخير ***مساءالنور

حلك واحد ما فى غيرة وما تعب روحك....
توقت للمجروس بتاع الكشه (مش الكشة الزمان) الكشة الحديثة
وسيب الموضوع عليهم..


زنقة:

الخوف هنا وين.. بعد اتمام المدة والتخرج.... ده بكون الدفعة 100

حيدر عثمان ..

Quote: توقت للمجروس بتاع الكشه (مش الكشة الزمان) الكشة الحديثة وسيب الموضوع عليهم..

دا هسي حل لي مشكلتي ولا حل لي مشكلة الفار

Quote: قلنا فار ياخ ما حاجة تانية

???????????????????????????????

والله دي كبيرة جداُ
يا ناذر
فاكر البنت صاحبة إعلان الزواج

بالغتتتتتت
أرسلت لي رسالة بالمسنجر وقالت العجب

إنت مالك علي يا عمو عاوزني اعرس لي

حربوية
يغيير صورتة كل دقيقة

هاهاهاهاهاهاهاهاها
طبعا الاستاذ لؤي مييت من الضحك


و بالمناسبة الفار حقك لو سمع حربوية
دي بيشتت دي كمان معاها هيظار لسانة متر

برضة

؟؟؟؟؟؟؟؟؟؟؟


يا ناذر

يا ناذر يا ولدى
المهم البطل فى القصة منو؟
هل انت البطل ولا الفار؟
هذا من ناحية دراميه

أما من ناحية رجاله
يا ولد بطل الحنكشه بتاعتك دى
فار شنوه؟
هسع انت بتحكى فى القصة دى أنا بلعت ريقى عديل
أحلى لحم هو لحم الفار
بعدين يا ولد .. الجقر ما ظاهر ..بس عاين ليه من الخلف

دكتور قور سلامات،

Quote: بس عاين ليه من الخلف

انت قصدك يعني يعرفوا من الخطر بتاعو ولا شنو؟؟(انا قاصد زي الموتر يا ناذر ما تعملا لي زي حكاية ابو سنام و ابو سنامين).

Quote: ممكن لكن أنا شاعر إنو فاري دا بقى ولوف علي ،، ولو رحلت لي بيت الجيران أكيد حا يجي راحل معاي دا لو ما مشى قدامي أو رحل معاي العفش

تعرف يا ناذر ..صحيت من النوم (الساعة دحين اربع صباحا) مفزوع حلمت بصاحبك دة واها انا مصنقر فوق كرسي عالي وململم كراعيني خايف منو ؟ .. ات متاكد انك ما حتسافر الي دبي بشان كمان من كترة ولوفو عليك يسافر معاك و يسوي ليهو درب الي بيتنا هنا ....

حسن الطيب ...

Quote: بالغتتتتتت أرسلت لي رسالة بالمسنجر وقالت العجب إنت مالك علي يا عمو عاوزني اعرس لي حربوية يغيير صورتة كل دقيقة

كنت تقول ليها (نسأل الله الثبات)

عمو قور كيفك .

Quote: يا ناذر يا ولدى المهم البطل فى القصة منو؟ هل انت البطل ولا الفار؟

لا أنا لا الفار .. البطل الفارة بتاعت الكمبيوتر

عمو قور كيفك .

Quote: يا ناذر يا ولدى المهم البطل فى القصة منو؟ هل انت البطل ولا الفار؟

لا أنا لا الفار .. البطل الفارة بتاعت الكمبيوتر

العبوها بلنتيات ياناذر ...!!

بس ما قلته لى يا ناذر هو فارك ده بلغ ولا لســه!!


كتــاحة:
ربنا اكفينا شر فيران اليويمن ديـل!!

والله أنا ألقى الفار بتاعك دا ياناذ
أمسكو كده ههح
وأضرب يه الوطاه للللب طاخ
وأمزقوا جررررررررررر جرررر
وامضق ليك أضانيه
,أقرمشو ليكم قرمش قرمش قرمش
نخن البقاره بنقتل الأسد ذاتوا
الفار دا يا جماعه
أصلو فار ولا أ قوم جارى
الفار فار بتاع أولد خرطوم ساكت
هسع ناذر دا يجينى بعد يومين
يطقطق فى أصابعينوا
يا عمو قور
يا عمو قور
يا ولد ما تتكلم
يعنى يا عمو الواح زى عاوز يقول
أنا وفلانه بنتك دى

هسع هو الفار جاب آخرو
كيف يمسك البنت

أنور ..

Quote: انت قصدك يعني يعرفوا من الخطر بتاعو ولا شنو؟؟(انا قاصد زي الموتر يا ناذر ما تعملا لي زي حكاية ابو سنام و ابو سنامين).

المشكلة إنو الفار دا عينو قوية وأصلو ما حصل أداني قفاهو هسي أعرفو كيف !!
دكتور قور أقول ليهو دا الفار يقول لي أحلبو

أبو بكر ....

Quote: تعرف يا ناذر ..صحيت من النوم (الساعة دحين اربع صباحا) مفزوع حلمت بصاحبك دة واها انا مصنقر فوق كرسي عالي وململم كراعيني خايف منو ؟ ..

يا زول أعمل حسابك !! أوع تكون بتنوم لا بس برمودا بدون سستة !!!
أم تكة دي أبعد منها نهائي .. الزمن دا الزول يحلم في أوضتو في حصان لمن يصحى يلقاهو قدامو طوالي

بوب ..

Quote: بس ما قلته لى يا ناذر هو فارك ده بلغ ولا لســه!!

لسع ما بلغ الفي مرادو

ما شايف حبوب البلوغ في وشو !! دا معناتو شنو ؟!

Quote: لسع ما بلغ الفي مرادو

بس انتا ماتفرط..

Quote: ما شايف حبوب البلوغ في وشو !! دا معناتو شنو ؟!

معناته جهـز نفسك ساكت!!

يا ناذر تدفع كم وما اجوط ليك البوست ده

Quote: يا زول أعمل حسابك !! أوع تكون بتنوم لا بس برمودا بدون سستة !!! أم تكة دي أبعد منها نهائي .. الزمن دا الزول يحلم في أوضتو في حصان لمن يصحى يلقاهو قدامو طوالي

برمودا ؟؟؟ ولا جزر القمر .؟. بلغنا من العمر عتيا .. انا لمان شاتوني بر البلد ات كان عمرك 6 شهو واسبوع .. ات بس احسب ؟؟ عموما حانوم واقف زي الحصان اصلي متخصص في تصميم وبناء اندية الفروسية والبولو ..والعشرة طالت مع الحصين ...

يا ناذر ..
بعد لحدي واحد بس
وبعده

يا ترد على مداخلتي الفوق دي ولا بدور ليك البوست ده بالخطوه السريعة على الخور

والله لكزه واحده وعينك ما تشوف الا النور


تدفع كم وما اوديه الخور ؟

بوب ..

Quote: بس انتا ماتفرط..

حسب الظروف

Quote: Quote: ما شايف حبوب البلوغ في وشو !! دا معناتو شنو ؟! معناته جهـز نفسك ساكت!!

وليد الشفت متعهد الخيران ..

Quote: يا ناذر تدفع كم وما اجوط ليك البوست ده

بتقدر !!! شايف دواك موجود معاي في البوست


شنكل :

ما تعمل فيها شفت يا الشفت

Quote: بتقدر !!! شايف دواك موجود معاي في البوست

هاهاهاهاهاهاهاها

ما انا قاصد ليك كده

هسع افتح ليك غتاية الدوه واخليه ينكشح ليك هنا .. ويجلبط ليك البوست


تدفع ولا افتح الغتاية

أبو بكر ..

Quote: عموما حانوم واقف زي الحصان اصلي متخصص في تصميم وبناء اندية الفروسية والبولو ..والعشرة طالت مع الحصين ...

برضو وإنت نايم واقف زي الحصان ألبس أي حاجة فيها سوستة
أوعك من التكة .. قرضها ساهل لي نوعية فاري دا

عارفك لسَه مزنوق

هاك ... دي بالصمغ

http://www.youtube.com/watch?v=9x7SBG5U0H0

ودي بالكلب

http://www.youtube.com/watch?v=sSbJ8VBkbTQ


والباقي تلقاهو في الرابط نفسو

حيدر كيفك ..

البصمغ دي ما بتنفع يا حبيب لأنها قبضت أم سيسي ساي زي ما انا شايف ..

لكن الكلب القباض دا والولد الشجاع دا بينفعوا معاي دا غير إنو الجقر القنصوهو مواصفاتو زي الفار العندي هنا ..

فلو عندك عنوان للكلب والولد دا رسل ليهم لأنو الحل غالبا إلا عندهم

صنفرة :

لكن الكلب قفش ليك الفار قفشة ما اداهو فرصة يقول سيك زااتو

الشفت ..

Quote: تدفع ولا افتح الغتاية

يا زول ما تسأل اسئلة تعسفية

العزيز
ناذر
تحياتي
عندي ليك حل ما يخرش المية
تدفع كم؟؟؟؟
ولا اقول ليك ... ما بيناتنا

المهم اسمعني كويس ..تشيل الماوس تقوم تختو جنب التلفزيون ( شرك يعني )
يلا تقوم تشيل الريموت معاك وتطلع من الغرفة وتخلي الباب متاكي
ومن ورا الباب تقوم تفتح قناة ( ام بي سي ) ثري او (اسبيس تون )
بمجرد ما صاحبنا يجي ويحضن الماوس .. وساعتها حيلقي (جيري) في وشو
وحيقوم (جاري ) شفت كيف
وبيني بينك احسن ليهو فارك ده من ( توم )
تخريمة :
واحد صاحبي قاعد جنبي قال لي
صتحبك ناذر البيجهجهو فار ده هو ذاااااااااااااااااتو زول (فاره)
مع اكيد مودتي يا لذييييييييييييذ
جمال

اها يا ناذر دة زولك ؟ ودي ا "كانت" اوضتك !!!

Quote: إلا ألغي فكرة الزواج (البأجلو كل شوية دا) مرة واحدة

صدقني الفار ده فار مأجور ومحرش من قبل الجماعه عشان تستعجل و تتلحلح

ولو اتلحلحت حتعيش عمرك كلو في خوف لأنو الخواف بيربي عيالو، يعني ارهاب في

جميع الحالتين




خليك صنديد وابقى عشره على السوسته

جمال إدريس ..

Quote: بمجرد ما صاحبنا يجي ويحضن الماوس .. وساعتها حيلقي (جيري) في وشو وحيقوم (جاري ) شفت كيف

سمعت كلامك ونفذتو بالضبط وفعلاً الفار قام جاري وشفت كيف !!

شنكل :

بس جرى ودخل تاني في الدولاب بتاع الهدوم الكنت زاريهو فيهو داك

أبو بكر ...



بس ما شايف الفارة بتاعت الكمبيوتر !! بعد ما رطب فكاها عكس الهوا ولا شنو ؟

أي بي سي دي إي

Quote: صدقني الفار ده فار مأجور ومحرش من قبل الجماعه عشان تستعجل و تتلحلح ولو اتلحلحت حتعيش عمرك كلو في خوف لأنو الخواف بيربي عيالو، يعني ارهاب في جميع الحالتين

هو العكس .. كدة يا دوبي الما إستعجلت

Quote: خليك صنديد وابقى عشره على السوسته

أنا هين بس إنت شوف ليك حل للبامبرس خالي سوستة اللابسو دا

Quote: أنا هين بس إنت شوف ليك حل للبامبرس خالي سوستة اللابسو دا

البامبرس ده شرك يا كيشه

!!!!!

Quote: البامبرس ده شرك يا كيشه

شركك دا لو ما قبض الفار والفار مشى لا قدام تاني ما يحلك إلا عملية بواسير

Quote: بس ما شايف الفارة بتاعت الكمبيوتر !! بعد ما رطب فكاها عكس الهوا ولا شنو ؟

داك في الاول دحين هو زي ما شايف مشغول في جمع معلوما ت ... عنشنو ؟ الله اعلم ؟؟؟

أنا كان لقيت الفار بتاعك دا ياناذ
أمسكو كده ههع
وأضرب يه الوطاه للللب طاخ
وأمزقوا جررررررررررر جرررر
وامضق ليك أضانيه
,أقرمشو ليكم قرمش قرمش قرمش
نحن البقاره بنقتل الأسد ذاتوا
الفار دا يا جماعه
أصلو فار ولا أ قوم جارى
الفار فار بتاع أولاد خرطوم ساكت
هسع ناذر دا يجينى بعد يومين
يطقطق فى أصابعينوا
يا عمو قور
يا عمو قور
يا ولد ما تتكلم
يعنى يا عمو الواحد زى عاوز يقول
أنا وفلانه بنتك دى

هسع هو الفار جاب آخرو
كيف يمسك البنت

أبو بكر ..

Quote: داك في الاول دحين هو زي ما شايف مشغول في جمع معلوما ت ... عنشنو ؟ الله اعلم ؟؟؟

الله يستر .. ما يكون بيجمع معلومات عن نوع المعدن الإتصنعت منو السوستة !!

يا عمو قور ..

Quote: نحن البقاره بنقتل الأسد ذاتوا الفار دا يا جماعه أصلو فار ولا أ قوم جارى الفار فار بتاع أولاد خرطوم ساكت هسع ناذر دا يجينى بعد يومين

بتقتلو الأسد لمن يكون قدامكم لكن زي الفار دا تمسكوهو كيفن عشان تكتلوهو ؟!!
أنا ما غالبني أكتلو .. بس كيف ألم فيهو وهو يبطل يحمر لي !!

Quote: يطقطق فى أصابعينوا يا عمو قور يا عمو قور يا ولد ما تتكلم يعنى يا عمو الواحد زى عاوز يقول أنا وفلانه بنتك دى هسع هو الفار جاب آخرو كيف يمسك البنت

الفار جاب خبري عديل مش أخري

أحكي ليك قصو واقعية حصلت جمبكم في الموردة بمناسبة البت اليمسكوها دي ..

واحد صاحبنا من أسرة عريقة ومعروفة في بانت زول إتقدم لي أختو وكان زميلا في الجامعة .. أبو صحبي دا زول دقيق جدا مسك ليك ود الناس سألو سؤال منكر ونكير .. عصرو عصر الجن : البت دي حا تأكلا شنو ؟ حا تفسحا وين ؟ إنت بتشخر في السرير ولا حا تحميها النوم؟ لو ولدتو وجبتو ولد لازم يتسمى على إسمي !! ..

غايتو سأل صاحبنا قريب الميتين ستة وعشرين سؤال وصاحبنا كابي عرق وبيجاوب .. في النهاااااية الأبو وافق على الزول ودخل جوة يوري ناس البيت موافقتو لمن جا طالع لقى الضيف ما فيش سأل ولدو : الضيف مشى وين ؟ ولدو قال ليهو دخل الحمام قال مزنوق .. الأبو إتخلع سألو : يا ولد قال ليك مزنوق ؟! الولد : أأي يا أبوي قال مزنوق في شنو ؟!

الأبو طوالي قال لي ولدو: لمن يطلع وينتهي من زنقتو وصلو لحدي الباب وقول ليهو معليش ما وافقنا ليك .. الولد إستغرب سأل أبوهو : يا أبوي إنت هسي ما قلت موافق الحصل شنو ؟ الأبو قال ليهو بي ضيق :

يا خي دا من هسي قال مزنوق .. أومال لي قدام لمن يحصل الجد يعمل شنو !!

!!!!!!!




صعب عديييييييييييييييل يا أبو بكر كلو مقفل

جربت أربعة طرق والحمد لله كلها طلعت فاشلة

الواحد ينوم قفا بعد دا

واحدة بتوصل وات جيت جنبها وخليتها ..دة ما الولف ذاتوووو

!!!!!

Quote: واحدة بتوصل وات جيت جنبها وخليتها ..دة ما الولف ذاتوووو

ما ظنيت ...

بس الفار لو عرف الطريق دا إنشالله يرضو يوصل جنبها ويخليها ..

بلا ولف بلا بطيخ

ناذر

Quote: المشكلة إنو الفار دا عينو قوية وأصلو ما حصل أداني قفاهو هسي أعرفو كيف !!

يعني معقول الفار المديك وشو 24 ساعة ده ماحصل في اي مرة كان في وراه مرايا.
ياخي قول زايغ من الاجابة زي ما كل مره قاعد تعمل مع اسئلة دكتور قور.

بعدين السودان ده ما كلو مليان كوارث، ياخي ريح نفسك و سلط واحده منهم علي الفار بتاعك ده.

شوف يا ناذر ......

اول شئ : نحدد هدف الجقر بمعنى ترحل من الاوضه (وترحل فارة الكمبيوتر معاك) اذا فضل قاعد في اوضتك معناها دا مجرد لاجئ وماعندو اى اهداف استراتيجيه اخرى .. اذا مشى وراك للاوضه الجديده معناها قاصدك ولا قاصد الفاره التانيه .. تقوم تطلع من الاوضه وتخلى فارة الكمبيوتر (لكن تحجبا اوع تخليها بدون حجاب دى خلوه غير شرعيه وبعدين جقرك دا ما محرم عليها والفاره دى تحت وصايتك) المهم كان قعد فى الاوضه كدا عرفنا قاصد منو .. كان مرق وراك معناها قاصدك عديييييل..

طيب اذا قاصدك نحدد نوع الجقر (فار ولا جنى) ودى حسب كلامك انك حددتها لكن زياده فى التاكيد لانو الجماعه ديل ما معاهم لعب .. وزى ما قالو ليك برضو احتمال تكون جنية مكسره ومعجبه فلازم تتاكد من المساله دى .. كيف .. طيب .. تتحكر تقعد فى بطن الواطه .. اعمل ساتر وادى الجقر وشك ما ضهرك عشان تكون كاشف ارض المعركه ... واول ما يواجهك اقرا ليهو (وما كفر سليمان ولكن الشياطين كفرو .... الخ) اذا عيونو لاجت وزغللت .. كب الزوغه ونادى الفكى طوالى .. اذا ركز وخشع زى ما قلت ابشر انت امام جقر عادى لكن ضكران ...

طيب اذا اتاكدنا هسى انو جقر عادى .. لكن مستقصدك انت بالتحديد حدد الحل هل .. تحاول عقد تحالف معاهو؟ والمساله دى بتتم بى انك تاكلو وتشربو وتقدم له ما لذ وطاب من طعام وشراب .. وممكن تجيب ليهو سرير صغير تفرشو ليهو وبى كدا تضمن اولا انو ما ح يطلع سريرك ثانيا ح تكسر عينو بى كرمك الحاتمى وما ح يضرك ...

اما اذا كان الحل المواجهه... فدى مساله دايرا ليها تكتيك حربى خصوصا انو فارك دا حاد الذكاء وقاعد يتخارج كل مره ....
.
.
.
.
.
.
.
كدى النفكر لينا فى حل كان الله يهونا.....

ناذر..

لقيت ليك كديس حررررربي !!

أنور ..

Quote: يعني معقول الفار المديك وشو 24 ساعة ده ماحصل في اي مرة كان في وراه مرايا.

كيف يعني يكون وراهو مرايا !! إنت قايلني ساكن في صالون حلاقة ولا شنو ؟!!

قاعد تشوف وشك في مرايات الطبالي الصغار ديلاك ولا شنو.

رندة حاتم ..

Quote: اول شئ : نحدد هدف الجقر بمعنى ترحل من الاوضه (وترحل فارة الكمبيوتر معاك) اذا فضل قاعد في اوضتك معناها دا مجرد لاجئ وماعندو اى اهداف استراتيجيه اخرى .. اذا مشى وراك للاوضه الجديده معناها قاصدك ولا قاصد الفاره التانيه .. تقوم تطلع من الاوضه وتخلى فارة الكمبيوتر (لكن تحجبا اوع تخليها بدون حجاب دى خلوه غير شرعيه وبعدين جقرك دا ما محرم عليها والفاره دى تحت وصايتك) المهم كان قعد فى الاوضه كدا عرفنا قاصد منو .. كان مرق وراك معناها قاصدك عديييييل.. طيب اذا قاصدك نحدد نوع الجقر (فار ولا جنى) ودى حسب كلامك انك حددتها لكن زياده فى التاكيد لانو الجماعه ديل ما معاهم لعب .. وزى ما قالو ليك برضو احتمال تكون جنية مكسره ومعجبه فلازم تتاكد من المساله دى .. كيف .. طيب .. تتحكر تقعد فى بطن الواطه .. اعمل ساتر وادى الجقر وشك ما ضهرك عشان تكون كاشف ارض المعركه ... واول ما يواجهك اقرا ليهو (وما كفر سليمان ولكن الشياطين كفرو .... الخ) اذا عيونو لاجت وزغللت .. كب الزوغه ونادى الفكى طوالى .. اذا ركز وخشع زى ما قلت ابشر انت امام جقر عادى لكن ضكران ... طيب اذا اتاكدنا هسى انو جقر عادى .. لكن مستقصدك انت بالتحديد حدد الحل هل .. تحاول عقد تحالف معاهو؟ والمساله دى بتتم بى انك تاكلو وتشربو وتقدم له ما لذ وطاب من طعام وشراب .. وممكن تجيب ليهو سرير صغير تفرشو ليهو وبى كدا تضمن اولا انو ما ح يطلع سريرك ثانيا ح تكسر عينو بى كرمك الحاتمى وما ح يضرك ...

مبالغة لكن .. الحل ما عندك مش زي حلول ناس قريعتي راحت

المشكلة في دي :

Quote: واول ما يواجهك اقرا ليهو (وما كفر سليمان ولكن الشياطين كفرو .... الخ)

ما عارف رد فعل الفار دا لو قريت ليهو الأية دي حا يكون شنو !! كل خوفي يكون فار مسلم يقوم ما يرضى إني بعاملو معاملة الجان والشياطين ..

Quote: كدى النفكر لينا فى حل كان الله يهونا.....

كدي خليني النجرب حلولك الفوق دي كان ربنا يهونا

مولانا



هيععععععععععع !!!!!!!

سلفستر ستالون دا بالغت فيهو عديييل
لميت فيهو وين دا بالله
ويجيني عبد الكريم يقول لي عندهم كدايس إيرانية شرسة
شوف الكدسة كيف هنا يا كيكي تورا بورا بس

يا مولانا كديسك العامل زي جك نورس دا عليك الله رسلو لي في أقرب دي إتش إل والذخيرة والسلاح علي

صنفرة :

طار طار جقرنا طار .... نار نار في قلب الفار و(مين كدا) الزياني إنهزم يا رجالة

انا خايف الكديس ده بعد ما ينتهي من الفار، يحتسبوك انت عند الله شهيداً.

الكديس ده بعد ما ينتهي من الفار، الظاهر انت حايحتسبوك عند الله شهيداً.

والله يا انور رغم إني شاعر الكديس دا بعد ما يقرض الفار حا يصاب بالغرور يقوم يفتح سلاحو في ني أنا زاتي ويقوم يطالب بي راس الفارة حبيبة الجقر المكتول

يا عماد ..

Quote: يا أخوي أحسن حاجة الفار ده تجيب ليهو قطعة صفيحة قوية وتثبتها في الأرض بمسامير وتخت فيها غراء لاصق معد خصيصاً للفيران وتخت فيها قطعة لحمة وقطعة طماطم وبصلة ولما يجي يدخل علشان يأكل الغراء بيمسك في رجليهو وتاني ما بيقدر يتحرك لا يمين ولا يسار ويظل واقف كده إلى أن يموت . أها جربها وأديني رأيك والله أنا مجربها وناجحة 100% . وربنا يحل زنقتك دي وتعدي على خير . وســلام .

لو عاينت في الصفحة الأولى حا تلقى رابط بتاع فيديو فيهو طريقتك دي لكن المشكلة إنو الفار بتاعي دا ما أم سيسي (جقر وكدة) والطريقة دي ما بتنفع معاهو لأنو حا ينفض رجلينو من الغراء ويتخارج زي الما حاصل حاجة ..

لكن برضو حا أجرب الطريقة دي بس خايف أمشي السوق أقول لي صاحب المحل : عندك غراء لاصق بتاع فيران يقوم يقول لي : داير تقبض بيهو شنو ؟!!

ناذر،
انا لقيت ليك حل، لكن ممكن يعمل ليك اكتئاب(بعدين ما تجي تقول لي البصيرة ام حمد)، المهم لو ما قبلت انت حر.
لو عايز الفار ده يشرد شردة فار واحد من الغرفة و الي الابد، شغل ليهو القناة السودانية باستمرار.

صنفرة: اوعي يكون انت اصلاً مشغلا طوالي.

حبيبنا ناذر

سلام مربع

يااخوي انت فتشت شنط الهند الجبتها معاك ولا لسه لانو الفار بالمواصفات دي ما شفناه الا في كلابا في مدينة بومبي
وبسك الكديسه كمان وبيكون احوص كل عين في اتجاه .

جيب ليه TOM ويريحك منو

يا ناذر كان قبضت الفار اوكي

وكان لسة عرفت ليك سم فار يا الللللللة حبشي ماركة (جن)

والله ما فار كدايس ذاتووو ما يخليهم ليك




كسرة : فار شرب قزازة جن طلع من الاوضة وقال للكدايس يلعن دييينكم



منعم

ودا كديس قناص من وحدة مكافحة الإرهاب لمساندتكم !!

ودي كاميرا لرصد تحركات الفار الحفار !!

بعض الشبـــــــاب المتبرعين بالمســـــــــاعدة !!

أنور ..

Quote: لو عايز الفار ده يشرد شردة فار واحد من الغرفة و الي الابد، شغل ليهو القناة السودانية باستمرار. صنفرة: اوعي يكون انت اصلاً مشغلا طوالي.

والله تلفزيون السودان دا الدمو بقري أمكن ينفع مع الفار دا ويتحكر قداما ..

أها بعد داك كيف الدبارة ؟

جمال هباني ...

Quote: يااخوي انت فتشت شنط الهند الجبتها معاك ولا لسه لانو الفار بالمواصفات دي ما شفناه الا في كلابا في مدينة بومبي وبسك الكديسه كمان وبيكون احوص كل عين في اتجاه .

وعندنا كمان في شفاجي نقر في بنقلور الفار تعاين ليو تقول دا بيبي كنجارو من شدة ما كبير بس الظاهر هو عامل هدنة مع الكدسة لأني والله شفت بي عيني دي الفار قاعد قدام القهاوي وتجي الكديسة مارة بي قدامو كاسرة عينا وهو يحمر ليها زي التقول ما سك عليها حاجة !

عبد المنعم ..

Quote: وكان لسة عرفت ليك سم فار يا الللللللة حبشي ماركة (جن)

هو وينو هو الجن الفايض البيدوهو للفيران كمان

يا مولانا ..



القناص دا تبع رامبو الجبيل داك ولا في فصيلة تانية

ناذر ..
أرهقت الناس في الحل ..
مع إنه بسيط جدا ..

أرحل ..
و سوق خطواتك من فارا حتل حتلة ..
ده أحسن ليك ..
و أسلم ليك ..
تكون ارتحت من جرسة ..
تبدل بيت ... بعد بيتك ..
عشااان يمكن يكون سعران ....

قرض ..

Quote: أرحل .. و سوق خطواتك من فارا حتل حتلة .. ده أحسن ليك .. و أسلم ليك .. تكون ارتحت من جرسة .. تبدل بيت ... بعد بيتك .. عشااان يمكن يكون سعران ....

والله هو حل لكن خايف أرحل ولمن أصل ألقى الفار واقع متلب من شنطة الهدوم قدامي

يا أخوانا دقيقة لو سمحتو !!

المداخلة الجاية دي ممنوعة لي أقل من عمر تمنطاشر سنة !!

جاني إيميل في هو صورتين وتعليق وأنا حا أنزلو بي ضبانتو بدون تعليق من جانبي !!

Quote: اوعك يا ناذر تخت الشرك للفار الضكر تقوم تقع فيهو الفاره الانتايه ، و يقوم الوغد يستغل الفرصة

صنفرة :

قولو معاي سبحن الله !! ولا حياء في العلم !!
حتى الغدر والإنتهازية صفة موجودة عند الحيوانات !!

Quote: ولا حياء في العلم !! حتى الغدر والإنتهازية صفة موجودة عند الحيوانات !!

ههههههههههههههههههههههههههههه
يا زيزو الزول ارسل ليك الصور دي مسطول.
بعدين الفار دا كان قاعد في الخليج!!


صنفره:

والا بلاش.

معاذ ..

Quote: بعدين الفار دا كان قاعد في الخليج!!

دي قوية جدا والله

إشمعنى الخليج بالذات فيران الخليج مالم يعني

يا مولانا دا شنو دا !!!!

عندك كتائب مسلحة من الكدايس :



قناصة !!





كوماندور متشنجة !!

دا كلو مقابل أم سيسي الشايل مدفع الكاتيوشا دا :

ياناذر .. بس اغيب كام يوم تقوم تعلن الحرب وتحرك القوات ... انا وزير دفاع اونطة ؟؟؟


-
حاشية :
ما تسالني كيف بقيت وزير دفاع ؟ اشمعني انا يعني بس بشان جيت بالنهار وتحت الاضواء وماشي بكراعيني ولا راكب حمار طروادة المن الحديد ...

أبو بكر سلامات ..

Quote: ياناذر .. بس اغيب كام يوم تقوم تعلن الحرب وتحرك القوات ... انا وزير دفاع اونطة ؟؟؟

لا لا ما أونطة والله ..

شايفك مشغول واقف ألف أحمر في بوست سفارة البحرين داك فقلت ما أشتت جهودك وتركيزك في موضوعي الفارغ دا ...

بعدين الحرك القوات صحبك مولانا عادل أنا فاري ما حركتو من مكانو

Quote: بعدين الحرك القوات صحبك مولانا عادل أنا فاري ما حركتو من مكانو

يا ناذر
شوف ناس ملا عادل جماعة البنتا قووون دييل والافباباي دائما بيدخلو في شغلنا ولازم البيت الاخدر يقف موقف حازم والفار ما يدخل جحرو ابدا ابدا وتحت اي ظرف وتهديد ..
اما بخسوس موقعة البحرين فخلينا ليهم العلبة فاتحة اليسدوها كان بيقدرو؟؟؟

العزيز ناذر إنت مش في حاجة إسمها الفارة بتقوم في العضلات بس يكون الفار ده قاصدها .

وإنت زي ما شايف ظاهر عليك عضلات تبش .

فيصل رشوان ..

Quote: العزيز ناذر إنت مش في حاجة إسمها الفارة بتقوم في العضلات بس يكون الفار ده قاصدها . وإنت زي ما شايف ظاهر عليك عضلات تبش .

يعني الفار دا يكون داير يندرع لي في عضلاتي ولا شنو يعني

Quote: وإنت زي ما شايف ظاهر عليك عضلات تبش

يا زول ما تلاوز شوية تبشات من السوق أكلنا

العزيز نازر
طبعا اكتر حاجة شدتني
في البوست لغة السرد
واستخدامك للمفردة الدارجة بشكل جيد
امنياتي
حاجة كده
عشان ترتاج من الفار ده اتصل
بالفنان جمال فرفور
ودي وامنياتي
عاصم ابوحجل