Post: #1
Title: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-19-2005, 03:29 PM
لإنو في نوعية من الناس تكرهك ليها .. يكون الموضوع عن إتفاق القاهرة يجيك ناطي ويقول ليك (والله الموضوع في شكله مفيد لإنو تم في القاهرة وهي كما تعلمون بلد المعز وأصل المصريين هم فراعنة ولمزيدا من الإيضاح إقرأ هذا اللنك عن كيف كان يعيش الفراعنة)!!!!.
ودي ما مشكلة لكن المشكلة إنو في ناس بتصدق وتخش اللنكات الزي دي .. ودي برضو ما مشكلة لإنها زيادة معرفة وكدة ...
لكن المشكلة إنها تطلع من اللنك مخلوعة وتقعد تناقش صاحب الموضوع في الفراعنة وبناء الإهرامات والتحنيط وجد تحتمس وحبيبة أمنحتب !!! بعد شوية نلقى البوست مش خرج من مسارو !! بنلقى إنو ما في أي مسار زاتو !!!!
كمان في نوعية لنكات تانية عاملة زي البلاعة الفاتحة في نص الحلة بالليل .. تلقاها في وشك في نص المداخلة وتجي داخل خاتي في راسك إنها تبع الموضوع .. ولمن تخش تلقاها فخ كبير وإنو صاحب اللنك دا أكل بي عقلك حلاوة وغشاك عشان بس تمشي تخش العنوان بتاعو !!!
أها يا أخوانا بي صراحة كدي بتقروا أي لنك يقابلكم في البوستات ولا بتجلوهو عادي ؟؟!!
والله أنا شخصيا إنضربت كتير في اللنكات دي وبقيت كتير بجليها عادي زي الما شايفا ...
كدي النسمع كلامكم ...
|
Post: #2
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: هاشم نوريت
Date: 06-19-2005, 04:22 PM
Parent: #1
ياناذر
ياناذر
ياناذر
انا غايتو لنكات التسويق ما بقراها خاصة بتاعت الافكار دى
هاك الطماطم دا عجن ساى
|
Post: #3
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-19-2005, 04:26 PM
Parent: #2
تعرف يا هاشم ...
لنكات الأفكار دي بالذات أنا بتجيب لي حيرقان لما أشوفا !!!
لكن المشكلة إنو الزول ما بيعرفا مرات بيتخدع ويخش وفي النهاية بيطلع يا منظم يا كمان كاره الأفكار وناسا بي الله واحد ...
|
Post: #4
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-20-2005, 07:17 AM
Parent: #3
up
|
Post: #5
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: Hussein Mallasi
Date: 06-20-2005, 07:23 AM
Parent: #4
لا اضغط على اللنكات؛ كما لا استطيع
قراءة الاقتباسات الطويلة.
|
Post: #6
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: معتز تروتسكى
Date: 06-20-2005, 07:32 AM
Parent: #5
انا غايتو على حسب النت لو النت سريع وعندى وكت بخش اكشف
لكن بوستا الافكار التسويقيه مرات ضر مابخش ولا العناوين الزى جريدة ادار بقوم على النفس..
بعدين ملاسى الفيك التعرفت..
| Quote: قراءة الاقتباسات الطويلة. |
ماعندك استثناءات للقاعده؟؟
|
Post: #7
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-20-2005, 07:37 AM
Parent: #6
حسين ملاسي ..
صراحتك مبالغة لكن كدة في ناس جاهم منك إحباط ..
تروتسكي ..
تعال لي في الماسينجر سريع دي بتحصل مرة كل ستة شهور بس 
|
Post: #8
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: Frankly
Date: 06-20-2005, 07:40 AM
Parent: #1
الأخ ناذر
أنا عن نفسي لا اتابع الروابط إلا إذا كانت لها علاقة بالمقال
مثلاً كل الروابط التي ينزلها ياسر الشريف أنا لا أتابعها
المشكلة ما في الروابط المشكلة في إقحامها في أي مقال بدون أي صلة فقط للترويج
وهو عندي دليل من الفقر والإفلاس الذي يحس به صاحب الموضوع بأنّه لو فتح مقالاً بنفسة لما وجد من القرآء إلا العدد اليسير
لذلك يبحث عن مواضيع يكثر قرآؤها فيقحم فيه مواضيعه البائرة
ويا ليت الموضوع توقف عند هذا الحد بل وصل لإستغلال بوستات الأخرين لترويج بضاعته الخائرة والبائرة
فقد دخلت على بوست ......سيناريو إنهيار عرش جعفر نميري لنادوس 2000 وهو موضوع جد جميل عن علاقة الحكومة الأمريكية بنظام نميري وتشبية سيناريو زيارة وزير الخارجية الأمريكية لمصر بسيناريو زيارة بوش الأب للسودان في عهد نميري
ولكن ما إن دخلت وجدت فيها أكثر من عشر مداخلات لياسر الشريف فخرجت مسرعاً من ذلك البوست ولا أنصح أحدكم بزيارته
تحياتي
كمال
|
Post: #9
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: هاشم نوريت
Date: 06-20-2005, 07:53 AM
Parent: #8
فرانكلى رغم اننى ما بتكلم فى السياسة خلى الناس تعرض بضاعتها ليزيد
الفرار منهم على علم كلما يقراء الانسان صاحب الفطرة السليمة بعد الكتابات
يزداد قناعتا بان النميرى ...
ووبس الحبر قطع معليش.
ناذر اسف للتخريمة من موضع البوست
|
Post: #10
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-20-2005, 08:03 AM
Parent: #1
المشكلة يا فرانكلي إنو مرات كتيرة الواحد بيعتقد إنو اللنك له علاقة بالمقال لكن لمن يخش فيهو بيلقاهو زي الدعايات البتجيك ناطة مع فتح الإيميل !!! ومنها تلقى نفسك قريت ليك حاجات غصبا عنك .. أها في دي نعمل شنو ؟؟!!!
يا نوريك كلامك نظري أمكن سليم لكن من تجربة شخصية أقول ليك إنو ما سليم قول لي كييف ؟!!
يعني أنا جيت المنبر دا عشان إستفيد وبالتأكيد فيهو كمية من الأفكار والإتجاهات .. أها لمن ألقى لي زول ساكيني من بوست لي بوست زي الداير مني قروش وبيخت لي في لنكاتو زي الألغام قدامي أها في الحالة دي بكره ليك الزول دا هو وأفكارو وأشمو لي يوم الدين ومرات كمان بشم المنبر والمنابر المجاورة عشان العملية دي ..
لكن صراحة في ناس ما قصدها .. يعني ممكن تقول هم دراويش حبتين أو ما بيركزوا في الموضوع كويس وبيزرعوا ليك لنك عن طيب خاطر وعدم فهم كافي بالموضوع .. ديل أنا بعزرم بي جهري لكن برضو ما بيمنع إني أسب ليهم في سري لمن ربنا يغفر ليهم لأنهم ضيعوا لي وكتي ووكت السيرفر ساكت ..
|
Post: #11
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: معتز تروتسكى
Date: 06-20-2005, 08:23 AM
Parent: #10
Quote: تروتسكي ..
تعال لي في الماسينجر سريع دي بتحصل مرة كل ستة شهور بس |
|
Post: #12
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-20-2005, 08:44 AM
Parent: #11
تروتسكي ديل شنو بتاعين الكير النفاخين ديل
يا خي أنا ما صدقتا الليلة الهوت ميل فتح معاي ويادوب قريت إيميلك بتاع الكلمة ديك
وطوالي مشيت الماسنجر وإنتظرتك لقيتك مافي مع إنو شايفك قدامي في المنبر 3
ختيت ليك رسالة عشان تجيني سرعة وما جيتني قام السيرفر تاني عنقد معاي والهوت ميل والماسينجر قفلوا أها أعمل شنو عاد ؟؟
بعدين ياخي فك البلوك الإنتا عاملولي دا
|
Post: #13
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: معتز تروتسكى
Date: 06-20-2005, 08:59 AM
Parent: #12
نذار انا بعضيك
بطير ليك فى راسك
انت لمن كتبته لى
انا كلمتك مرات بكون اون لاين لكن بكون بعيد غاتس فى البلاوى دى اها بجى ادى طله مرات
والماسنجر اساسا كنت قافلو لمن لقيت كلامك مشيت فتحتو وبقيت منتظر
تجى تشرنى وتقول مبلكنى لانت كدى اظهر خليى بعدين نبللك
ياخ عندك جهاز وحاتك عاملو براك
ياخ .... النمله عديل كده
لا ايميل بفتح لاماسنجر
|
Post: #14
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-21-2005, 07:09 AM
Parent: #13
تروتسكي ولا تزعل ..
وحاتك جاييني كمبيوتر الأيامات الجاية من الخليج الزوول الوعدني بيهو قال سرعتو أسرع من الغزال وطيارة بس
إنتا بس أصبر لي شوية وما تتشنج ..
|
Post: #15
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-22-2005, 08:44 AM
Parent: #14
الإستفتاء مستمر ........
|
Post: #16
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: عادل ابراهيم عبدالله
Date: 06-22-2005, 09:05 AM
Parent: #15
والله يا ناذر انالو دخلت بوست ولقيت فيهو حيطة مش لنك بخش فيهو
يعني من باب تكمل فهم الزول وتشوف آخرووقاصد يسوقك لى وين
وبصراحة مرات لما اتابع لنكات(حلوة دي)بعينها برجع عشان اعرف الموضوع ذاتو شنو!!
وهسي كدي شوف ديل:
http://www.tirej.net
http://www.madeena.net
|
Post: #17
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-22-2005, 09:30 AM
Parent: #16
العزيز عادل
كيف أحوالك ..
والله من باب المعرفة كويس لكن بيكره الواحد لمن يلقى لنك ما عندو علاقة بالموضوع ..
هسي اللنك الاول بتاعك دا ظريف والله وفيهو معلومات جميلة عن الأكراد لكن أنا حا اكون مستغرب لو واحد ختاهو ليك في بوست هنا ؟؟!!
تلقى واحد خرم ليك عن مناقشاتو حول أسعار الكهرباء والموية وجاك ناطي قال ليك إنو المهندس بتاعا أساسا عراقي ومن كردستان وهاك اللنك دا عن تطور السينما في كردستان ..
أها زي النوعية دي ما بتكرهك الثافة ووزيرا ...
أما اللنك التاني يا عادل كان فخ عديييل كدة ودي زاتا النوعية الانا قاصدا
يعني معقول ياعادل أخش لي بنك ألقاهو معطل وفيهو كتابة زي اليافطة
تسلم للمرور ....
(بالمناسبة مرات اللنكات دي بتكون زي المدخل للهكر للتجسس على جهازك أعمل حسابك منها)
|
Post: #18
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: عادل فضل المولى
Date: 06-23-2005, 09:40 AM
Parent: #17
فوق فوق فوق
ناذر فوق
هذه الارجوزة ستسمعها ان كانت الحمى تنتابك (حمى امرأة والقصيد)
سؤالك مهم وانا اللنكات دي لازم افتشها وافتح ليها ويندوز جديد ومرات اوديها المفضلة لكن طالما ما الموضوع جاب ليهو هكرز وفايرس احسن نبعد بعيد منها خصوصاً انو اليومين ديل الجهاز جاب ليهو دغالة وتعسيمة ..
بالله ختنا في بالك وورينا اول بأول بي اللنكات المضروبة
شكراً عزيزي
|
Post: #19
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 06-24-2005, 04:15 AM
Parent: #18
الاخ عادل ..
| Quote: بالله ختنا في بالك وورينا اول بأول بي اللنكات المضروبة |
توووووووية يا مان كان زمان
حتى في البوست دا الأنا قصدت بيهو اللنكات المضروبة إنضربت فيهو
أطلع فوق شوية في حبيبنا عادل إبراهيم خاتيليهو لنكين كدة .. عليك الله خش في اللنك التاني كان ما لقيتو اكبر فخ تعال أسألني
لكن إتخايلي الشغلانة دي بقت قدر زي سيك الكوتشينة
إذا ربنا غطاك يكون رحمك منها وغذا كمان نافد فيك قدر الله ربنا يلطف بيك
|
Post: #20
Title: Re: سؤال غير فقري جدا : هل تقرأ اللنكات التي يضعها البعض في البوستات ؟؟!!
Author: ناذر محمد الخليفة
Date: 07-11-2005, 02:51 PM
Parent: #1
رفعت هذا البوست مرة اخرى لان ظاهرة اللنكات المضروبة عادت مرة اخرى وبصورة أشد مما كانت عليه قبلا .. !!!!
اليوم فقط إنضربت في 6 لنكات لا فائدة منها وخارجة عن الموضوع تماما !!!
متي سيتعلم الذين يضعون تلك اللنكات في بوستاتهم أنه عليهم التأكد من محتوياتها جيدا قبل زجها للقراء ؟!!!!
|
|