شوك الشوق .. النص من كلمات الشاعر محمد الحسن حميد وفى الاسفل النص كاملاً.. ويلاحظ ان الراحل المقيم مصطفى سيد احمد قد اخذ منه مقاطع متفرقة وغناها .. ويظهر النص الجديد فى وحدة واحدة ومتكاملة ..
كانه كتب هكذا .. وهذا انما يدل على شاعرية الراحل المقيم

النص الكامل شوك الشوق محمد الحسن حميد ********* شوك الشوق لى الشوف آ خَىْ ضارب قطن النسج الحى يا منقاش أحزانى إنشرت وادى الفرح إتمدد صَى يا راحلين عِـنْ دُغُش الليل ما لاقيتو جناياً زى .. تكية نخل الفجُر الجاسِر فوق فى المتَرَة .. عَرَاجِنْ ضَى آ رعاوة .. العرب الرُّحّل ما لاقاكُنْ فى المطرانى ؟ فى كاويقْ الجرف الأمحل بين أسراب الرهو الراحِل ساند أكتاف الليل الميّل عِنْ ساساق الغيمة عليكُن بين رقراق الخيمة معاكُن ما أديتوهو شِوَىْ ... بى حرجل؟ ************* آ رطّانة الليلُن ليّل ما لاقاكُن فى ونساتكُن؟ بين الشادِى وبين كاساتكُن فى صلواتكن .. عِنْ دعواتكن أو .. دقساتكُن عِز خلواتكُن .. زول .. زول الله إن مِحِن .. آ .. بِسأل الهبّاد لى غُلبْ أخواتو الفرّاح عوّان الحلّىِ الفدّاع لى الليل ظُلماتو آ نجمات .. شقيش قولن لى ما لاقاك طالِع .. متدلّى ؟ المطيوب من طيبة أُمّاتو كالفجّاج .. الندّ نباتو موج البحر اللّحَمَر هوجتو وعِرق العِرِق .. اللاّوى ثباتو جانا الشَدر الأخَدَر منو ونار الشدر الأخَدَر جاتو فات شِقيش ... أب قولاً واحِد .. وليش ما يرجع من غُرباتو طوّل طُول .. ما طلّ علينا وقاطِع مِننا جواباتو الغابات جات تنشِد منو والعربان راجين جياتو أديناهم عرقو .. وعَلَقو صورتو يقلِّب فى كِتْباتو ضُل رشاشو .. ركيزة زولو ساعة سِلمو .. ويوم حوباتو سِن طوريتو ولون أبرولو حِس طنبورو البى نغماتو لهْلَب عِشق الناس الفقرا وبرّد جوفُن .. بى غنواتو ... ويا غنواتو الدخلت فينا تمرق .. جينا على جِلاّتو وجِيداً جينا .. طلقنا وشينا وش الدنيا الليلة حلاتو وش أطفالنا الليلة حلاتو وغنى معانا غنانا هويتو غنِّى العالم غنى حياتو لا ساومنا عليها قضيتو ولا فكينا من إيدنا .. وَصَاتُو ألف شليل يا نورة يفوتو عشان ما يجيك شليلك زاتو

شكرا الأخ شيبا

هده واحده من اغنيات مصطفي التي استمتع كثيرا لسماعها

واصل في اتحافنا بالفن الراقي

Quote: شوك الشوق لى الشوف آ خَىْ ضارب قطن النسج الحى يا منقاش أحزانى إنشرت وادى الفرح إتمدد صَى يا راحلين عِـنْ دُغُش الليل ما لاقيتو جناياً زى .. تكية نخل الفجُر الجاسِر فوق فى المتَرَة .. عَرَاجِنْ ضَى آ رعاوة .. العرب الرُّحّل ما لاقاكُنْ فى المطرانى ؟ فى كاويقْ الجرف الأمحل بين أسراب الرهو الراحِل ساند أكتاف الليل الميّل عِنْ ساساق الغيمة عليكُن بين رقراق الخيمة معاكُن ما أديتوهو شِوَىْ ... بى حرجل؟

شيبة ياراقي
تعجبني كتير الكلمات دي .. مرة سجلتها بصوتي عشان لمن اكون ماقادرة أقرأ اسمعها ..
لو تسمح ممكن نحفظها !!

تسلم ياشيبا يازعيم

تسلم ياشيبا يازعيم

الاعزاء سلوى

ملكة سبأ

Tiger18

شكرا جميلاً لكم

و نعتذر على الخطأ المطبعى فى عنوان البوست " شوك الشوك " والصحيح هو "شوك الشوق "


وهاكم لنك الحفظ

شوك الشوق بالعود
... .. اضغط هنا زر الماوس الايمن واختار حفظ…Save target as……
.....................

الرائع شيبا
تسلم
وكل الود