تراتيل–ديمة بتامل عيونك– ناجىقدسى وبسببها حطم مصطفىعوده- اهداء الى سمندلاوى

قصة اغنية
تراتيل– ديمة بتامل عيونك – ناجى قدسى وبسببها حطم مصطفى عوده- اهداء خاص الى العزيز سمندلاوى

..... للاستماع الى الاغنية يجب ان يتوفر بجهاز الحاسب لديك برنامج ريل بلير.........



عندما نقول إن الراحل المقيم مصطفى سيد احمد كان فناناً إستـثنائياً فهذه العبارة فى أبلغ معانيها لا تعبر بشكل دقيق عنه فناناً وانساناً . واذا قلنا أن مصطفى عليه رحمة الله لا يشبه إلا نفسه فهو تقصير فى حقه , لقد كان يتمتع بقدر من الإيثار وحب الناس ينم عن غنى النفس وعزتها وكان يرفض التنازل إلا عندما يحس أن هذا التنازل لن ينقص من قدره وكرامته شيئاً بقدر ما هو لصالح إنسان آخر وهى سماحة لا يقدر عليها إلا أصحاب النفوس والقلوب الكبيرة وكان دائماً ما يردد :-ان الخطأ الذى لا يغتفر هو ذلك الخطأ الذى لا أجد له مساحة فى دائرة تسامحى ..

وعندما كان الأصدقاء يطلبون منه أن يتنازل ويجارى سوق الغناء كان دائماً يردد :- الفنان لما يتنازل قيمتو شنو ؟؟..

واليوم نحن بصدد سرد احد المواقف الراسخة التى كان لمصطفى راى واضح فيها , وهى قصة الاغنية المعروفة باسم تراتيل والتى يقول مطلعها :- ليه بتسال ديمة بتامل عيونك وهى تكاد ان تكون غير مسموعة لعدد كبير من الناس

يقول الاستاذ محمد صالح مدير مدرة الراشدين بالحلة الجديدة :-

إنه قد حضر لزيارة مصطفى فى بداية الثمانينات بصحبة الملحن المعروف ناجى القدسى حيث أحضر له ناجى لحن جاهز,
و الكلمات للشاعر حسن ساتى وهى الاغنية المعروفة باسم( تراتيل )ويقول مطلعها (ليه بتسال ديمة بتامل عيونك ) وبدأت البروفات وكان أول لقاء بين ناجى ومصطفى ثم توالت اللقاءآت بمنزلى

وفى مرة من المرات قال لى ناجى حاول تقنع صاحبك مصطفى وقول ليهو إذا داير عدادات وقروش يتلحلح ويتحرك شوية , وبعد البروفة حاولت الحديث مع مصطفى عن طريق الهزل وقلت له ان الغناء فى الخرطوم دايرحركة شوية ففهمها مصطفى طوالى وقال لى عاوزنى أرقص .. كلم قريبك دة ويعنى ناجى قول ليهو إذا داير يطلعنى قرد أنا ما عايز غناهو دا .. وغضب غضبا شديد وكاد ان يحطم عوده على الارض وكان حازماً وجاداً ورفض أداء أغنية تراتيل الى أن أقنعناه بأن ناجى القدسى كان يمزح بطريقته المعروفة ..وحتى يرضيه ناجى فقد وعده بتلحين نص قصيدة (أجراس العودة أوجبل الزيتون ) وبالفعل فقد لحنها له وصادفت هذه القصيدة هوى لدى مصطفى وأعجب كثيراً باللحن


ايها الرائع الذى أهدانا إنسانيه ورحل أهدانا بوح نفسه غناءاً راقياً , عزز فى أعماقنا قيمة التفاؤل وعدم اليأس والإحباط , نم هانـئـاً عليك رحمة الله بقدر
ما أعطيت من إنسانيتك وبقدر ما أسعدت ,,,,



******************************************
تراتيل
*********
كلمات حسن ساتى
الحـان ناجـى القدسى
******************************************
ليه بتسأل .. ديمة بتامل عيونك
ياعيونى فى عيونك
باقة من ذكراى بتعطر فنونى
باقة من اشراق صباى فيها حبانى النسونى
فيها ليلات الفرح والاماسى الفى السنين
شن اسوى غير اعاين
غير اطيل النظره واتونس و اونس فى العيون
فى العيون الديمة بتفتح عيونى
ده البجنن شوقنا فينا
انو فى عينيك زمان بى حالو ساجد
والفرح الكان بعانق فينا ايام الفرح تلقاهو ساجد
والبراءة الكان بتتوشح طفولتنا وتناهد
والسهر آنسنا فيه الليلة فيها الليلة اتهجد
ساوى فى عينيك معابد ياعيون
مشتاق نعاند فيها تتلون تلونا وتعاند ياعيون
وبرضو تسال وديمة بتامل عيونك ياعيونى
وفى عيونك باقه من ذكراى بتقطر فنونى
حلوة عينيك بى زمانه والزمان الفينا شايلنا ومسافر
مرة ماضى .. ماضى غابر مرة حاضر .. حاضر ومرة باكر
***********
فى عيون طفله .. صباح العيد بتملا البيت بشائر ياعيون
المسافر لسة ماحط الرحال قال يشوفكن يلقى نفسو
فى بحوركن .. بحوركن خلى رحلو وقال مهاجر
ساب ديارو وقال مهاجر ذكرياتو وقال مهاجر
وبرضو اسال وديمة بتامل عيونك ياعيونى فى عيونك
باقة من ذكراى بتعطر فنونى باقة من اشراق صباى
فيها حيانى النسونى فيها ليلات الفرح والاماسى بالسنين
غابن وضاعن فى السنين وبرضو بسال وديمة بتامل عيونك


******************************



مصطفى سيد احمد وعمره 8 سنوات وتبدو عليه سودانية مبكرة
******************************



صورة نادر لمصطفى سيد احمد خلال فترة الثانوى

*****************************


صورة نادر لمصطفى سيد احمد خلال فترة عمله كمعلم بوزارة التربية والتعليم

****************************

فوق

العزيز سمندلاوى

رغم اننى قررت بكل طوعى الابتعاد لفترة عن البورد

قد تطول او تقصر

لكن اهديك هذه الرائعة وادرى ان لها وقع فى نفسك

ولك معهاومع مصطفى ذكريات جميلة