براد عشة بت فاطنة .... الشاي في السودان

يقال إن أول كوب من الشاي شربه إنسان هو الذي شربه الإمبراطور شي نبغ سنة 2737 قبل الميلاد. يقال أيضا إن الإمبراطور كان جالسا تحت شجرة يشرب الماء الدافئ ـ وهي عادة صينية لتهدئة الأعصاب ولا تزال ـ عندما سقطت ورقة من الشجرة التي كان يجلس تحتها فاتخذ الماء لونا أحمر قانيا.. هذه هي بداية الشاي.

ومُذهلة فوائد الشاي الأخضر ، الكثير من الناس يجهل هذه الفوائد، من تهدئة المعدة و إذابة الدهون وخفض الوزن إلى تهدئة الأعصاب والمساعدة على النوم العميق . وهناك حقائق مدهشة عن قدرة هذة النبتة الزكية في ضبط السكر وضغط الدم، ومحاربة الخرف أو الزهايمر

وفي السودان اعتاد الناس على شرب الشاي ثلاثة مرات تقريبا
شاي الصباح
شاي الضهر
وشاي المغربية
ومن المعروف أن البرامكة في السودان لديهم طقوس خاصة لشرب الشاي.
ولقد صدر كتاب للشاعر عبد الله الكاظم بعنوان (كبايات الشاي في دولة البرامكة)
والكتاب عبارة عن دراسة تراثية تاريخية لأدب الشاي عند البرامكة.
من يتحفنا بأجزاء من هذا الكتاب ؟

كذلك اهلنا الشايقية عرفوا بولعهم الشديد للشاي ؟

لن انسى بالطبع ان استأذن العزيزة عشة بت فاطنة
في عنوان البوست
فالبراد الذي تحمله ساعد في التحريض على جمع وكتابة المادة
تحياتي يا عشة
وللجميع

لن انسى بالطبع ان استأذن العزيزة عشة بت فاطنة
في عنوان البوست
فالبراد الذي تحمله ساعد في التحريض على جمع وكتابة المادة


عارفة يا خالد أحساسك الذى جعلك

تكتب هذا البوست ..

فكلما أرى صورة بروفايل أختنا عشة

أحس بشعور غامر بالالفة يجتاحنى

كأنها أخت أو أم أو صديقة قديمة

وأتمنى أن أشرب من يدها الشاى ..

ما أروع هذه المرأة الخضراء .

ابو النسب خالد

ان شاء الله تشرب الشاي عندنا في البلد
وسط الرمال و النخيل..
متي يرجع للشمال رونقه الجميل...ترجع ليالي
الشايقية المبهرة...
انا والله طاريك يام درق طاري العشيرة..
امانة ما" الحزافير" فاتتهم طفولة خصبة في الاجازات
في البلد..

نفسي عشة تورينا منو الفي الصورة..

Quote: نفسي عشة تورينا منو الفي الصورة..

بيان
سلام وشاي حريف
حكاية الصورة يا ستي ، كانت في مقهى اسموالساقية ، وسط فينا مقطوعة الطاري ، اول ما تدخلي تحس بالفة في المكان المعطر بعبق بخور التيمان ، والفة السودان ، صاحب المقهي صديق المقداد شيخ الدين عزمنا يوم مفتوح ، ودارت كبابي الشاي الجميلة ، واللقيمات الذي صنعته عزاز وصباح ، وهذه الحبشية التي كانت تقلي البن وتصب لنا الشاي كانت في خدمتنا طبعا لابسة توب سوداني لزوم ديكور المقهي فعجبتني هذه الامهرية فالتقط لها هذه الصورة ، هناك صور اخرى فانا اعشق صور الشاي فانشاالله انزلها ، التحية لحاكم صاحب المقهى واقول ليه أجمل يوم في فينا كان مقهاك الجميل فشكرا على الكرم وريحة البلد وشوق لتلك القعدة الجميلة حيث تآمرت المطرة مع كفتيرة الشاي لتنحت هذه اللحظات الى الابد ...
شكرا بيان

امنة مختار بتنا النقية
القلوب يناتنا شواهد

Quote: عارفة يا خالد أحساسك الذى جعلك

العزيزة آمنة
تحياتي
نقرتيها!
احن لقهوة امي وشاي امي
في ضل الضحى وعنقريب هبابي

العزيزة بيان
خالة العيال
تحياتي

Quote: ان شاء الله تشرب الشاي عندنا في البلد

قولي يارب

ازيكم يا حبايب ، والاخوة والاخوات المتداخلين ،
صاحب البوست الحريف
شكرا على هذه الصباحية- حسب زوني طبعا -المفرحة فانا أقرأ في بوستك يا خالد وقدامي كباية شاي صباحية مك وهي أهم افتتاحية افتتح بها يومي اذا ما حصلت اليوم كلو حيتلخبط ، وزي ما قت الشاي في السودان حكاية فعلا تستاهل الكلام خاصة شاي البرامكة الذي يعتبر أهم شاي تجي بيه الشكرة والنبذة ، والبرامكة حسب ما قريت هم موالي اتراك في زمن العباسيين ويقال قد جار بهم السلاطين وتفرقوا بالبلاد ، وربما وصل بهم الحال الىينا والله اعلم ، وما يهمنا مجالس البرامكة التي نشات في ربوع كردفان واطراف دارفور ثم انتقلت العادة الى جبال النوبة ، واشتهروا بالظرف الكرم والكرم دا أهم بند فيه الشاي ، فتغنوا بالشاي واهله ومن صفاتهم ايضا النظافة ومساعدة الضعيف .
الحريف صوبن وظهر
وفي حريرة اتحكر
حامد التمساح العشاري المتقلد الشر
محمد -كفتيرتة- في النار وبرادة معدن
هذا ما قالته الشيخة في احدهم
والحريف هو الاسم الذي عرف به البرامكة
ومجالس البرامكة لها نظم واسس تحافظ عليها ولهم لجنة عليا هي سلطة المجلس تتكون من من الناظر ، والعمدة ، والشيخ ن والقاضي ، والافندي ، والملاحظ ، والدكتور والعسكري
مهمتهم تنفيذ قوانين البرامكة التي تقوم على النظافة والتقيد بسلوك الجماعة وقيمها وتقديم الشاي وعدم الاكل في الطرقات ، وكذلك ولكي تكون حريفا لابد من ان تقسم على دستورهم الذي يبين واجب الحريف والمحظورات التي عليه الا يرتكبها ومنها عدم التحدث الى اي كمكلي والكمكلي هو عضو سابق في الجماعة تم فصله وتم هجاؤه من قبل شعراء الجماعة .
وهذا شعر في هجاء الكمكلي وزوجه:
الكمكلي ابو نعلي
أقعد هناك من الناس
هدومك في وركك
مدوا له الشاي
ما بقول شكرا
يوقل الشاي مالو حار كدى
مراة الكمكلي
من اكل العيش سمينة كيف زي ابو عزة
تغلي جدادة وتحمرها
لكنها في الايام دي ما بتشرب الشاي
والسمنة ليست من مقايسهم الجمالية ، لذلك وصفوا زوجة الكمكلي بالسمنة، وعدم شرب الشاي وعدم شرب الشاي لعنة تحل بالذي لا يشرب الشاي ولشرب شاي عندهم طقوس وله جلسة وقعدة خاصة ، واثناء احتساء الشاي عليك ان تكون صامتا ولا تتجاذب الحديث مع جارك الا لماما وللضرورة ، وعلى الحريف الا يخلع نعليه او يمدد رجليه والضحك ممنوع اثنا الشرب لقداسة اللحظة ، ولمسكة الكباية ايضا طقس فلا تمسك من اعلاها ولا يلمس اصبعك ادناها ، ولا تاخد الكباية الا التي تليك ولا تضع الكباية على الارض ابدا ،÷ وتصف الكبابي ف شكل ثعبان او عقرب فاحذر اخذ الكباية التي تمثل راس الثعبان حتى لا تغرمك الجماعة .
ويعتبرون الورل حريفا لان الاسطورة تقول انه وجد ياكل ورق الشاي واغانيهم ف يالشاي كثيرة يقول شاعرهم :
يا اخوانا الشاي مواجبة كم
الحرفة قالو نعناع وهبهان
وعرق قرنجان وقرفاية دم
ويقولون ايضا :
المحبوب
ورق الشاي من الغرب
ابو راسا مقدود
بالدوبارة مكروب
بشربوه البرامكة النضاف
الفي ايدهم خيزران
وفي كرعيهم جزمة او مركوب
فارت الكفتيرة
وتمرالكبابي
وابسط القلوب
ومعظم الاخبار وجدتها في كتاب حسن ابشر الطيب -اطلالة في عشق الوطن -
والغريبة ياخالد قريت هذه المعلومات قبل كم يوم واشركت فيها ناس البيت ، شفت الصدف كيف يا يا حريف ، وهناك اغنية كانت تعجبني من ادب السجون في كتاب كوبر ، لهم شعر ظريف الشاي اعتقد قالوا محجوب شريف شفاه الله انشا الهل افتشو ا وبجيك صادة

ياااااااااااااه...
ياخالد، والسرب الرائع...

مالكم، ومال ذكر الشاي، شاي العصرية، والفسحة، والحلة، والكباية، ورائحته، مجرد أن نغسل الايدي من الغدا، نسمع ايقاع صناعة الشاي، كبابة، وكفتيرة، وكانون (لم تخلق انابيب الغاز)، كانت الكفتيرا تجلس كالملكة على لهب الجمر، وبجوفها روح اثيري، يسمى مجاز شاي، بلون الآبري، والكبابة تلمع، ومتمرة، ومنعكس عليها شعاع الشمس الغاربة، كي تزيد الوضع سحرا أخر....

ثم تأتي رشا الصغيرة، ولأنها صغيرة، تود ان تعمل عشرات الاشياء في وقت، أن تعلب، وأن تحمل الشاي وأشياء تعرفهاهي، فتصطدم الكبابي مع بعضها، كي تؤذن بدنو خمرها المباح...

لونه غريب، ويتسلل البخار بدفء للأعالي، وحين تمسك الانامل بالكباية، تحس بأسطورته، بكائن صديق، بشاعر اتخذ شكل الماء الدافي، كي يعتق سماوات المعدة والذهن..

تمر رشا على اخوتي الكبار، أو على خالي، لو كان متغدى معنا، وأخيرا تم علينا، مرور القمر بنافذة شاعر، في ليل شتوي....

كنت اقول لابن اختي، وهو توأمي في العمر، بأن (الشاقي قال لي)، على وزن (حماري قال لي)، لتوفيق الحكيم، وكن نسرح ونكتب كل ما يقوله الشاي..

كم احب الشعوب التي تمجد الشياي، كالشعوب الضاحكة، العقميقة، اثيوبيا والحبشة، والبرامكة...
والآن اشجار بلدي، مليئة بملكات متوجات، استدرجتهن معاناة سافرة، كي يوزعن سحر الشاي، ونكتهه وفرادته، للحق أنهن رسل، يبعن التجلي، والذوق وشحذ الذهن، هذا الكائن الجميل، المسمى شائ...

اااااااااااااااااااااااااااااه، تضيع الكلمات من ذكرى شاي العصرية، مع أهلي، وجو حميم، مسكون بعاطفة الخيلان والعمات والخالات، وملائكة أخرى، تجل عن الوصف والحصر...

ااااااااااااااااه..!!

العزيز عشة
تحياتي
موضوع الشاي في السودان يطول عنه الحكي

- اشهر قهاوي الشاي
- اسماء كبابي الشاي ( عثمان حسين مثالا )
- عدة الشاي
- ست الشاي
- و.. و هل من مزيد المزيد

كبابي الطلبة !!
كباية مك
كباية الشب

العزيز(خالد)
سلام لك وللاسره الكريمه
اعجبنى كثيرا الموضوع لانى من مدمنى الشاى بكل الوانه وانواعه ذكرتنى باصدقاء اعزاء ابحث لهم عن ارقام النبيل(احمد حلولى)والرفيق(مصطفى كبير) مع كل تقديري
ناظم

شكرا خالد
كيفتني من الصباح!!

قمنا بعمل ملف كامل هن الشاي في مجلة
القافلة(ارامكو السعودية) وساوافيكم ببعض رسومه ومادته

اها يا عشة
انا ما قلت ليك عايز شاي
من ده؟

اها الحقينا فبل ما يكمل البراد ده

الشاي ما بيحلا علا في استكانة مظبطة
ولا كيف الكيف..؟؟

استاذ مامون احمد
دقايق وشايك يوصل
بس الكفتيرة تفور
يا البرامكة
لكن يا طيفور الكبابي
ما عند ك..

Quote: كذلك اهلنا الشايقية عرفوا بولعهم الشديد للشاي ؟ ]

خالد العبيد عندنا عما لينا قال الشاي دا نحن باهتننا بيهو ، نحن قاعدين ندور المريسي .

أبو قصي

في الخرطوم اشتهرت قهوة الزيبق وحاليا هي عمارة الدهب .
وفي امدرمان اشتهرت قهوة يوسف ودالفكي وهذه القهوة بالذات كانت ـ ايام السودان بخير ـ تبيع الشاي بي كبابي الشوب واللبن المقنن بي فريني واحد او ابـ قرشين حسب رواية عمنا صبحي اسكندر ، اضافة الى انهاكانت المكان الذي تم التحضير فيه لانقلاب حسن حسين عام 75 وكان يلتقي فيها شامبي والاحيمر وحسن حسين وبرشم .
تحياتي
ولي عودة

الأخ العزيز / خالد العبيد

تحية واحتراماً ..

استمتعت كثيراً بهذا البوست حد الانتشاء .. وأمامي الآن كباية شاي على كيف كيفك ...
غايتو ما عارف ليه تذكرت قصيدة لصديقي الشاعر / الواثق عبد الرحمن يقول في أحد مقاطعها ...

أنا فتشتك في ضل نيمه ...
في حرايا تشهي الغيمه ...
وفي ونسات الناس السمحه ...
وفي براد الشاي تلقيمه ...


مع خالص تحياتي وحبي ؛؛؛

إلى البرمكي الحريف في الكلكة
إلى شاعر الفحولة البدوية في عصر الخصيان المماليك
إلى الحدّاي راضي عبيدهن ، الملقب بنبّال هوسا في " الكلكة الحديبة الكلكة"

شعر:عالم عباس

تَعْزَافُ نايْ،
و (قِرْيافُ) شِعرٍ و شايْ.
كلا الشعر و الشاي، إن لمْ أَجِدْ،
قاتِلِي.
فيا صاحِبِي،
قد سلمتَ من الويل،
فالويلُ لي.
****
إنَّ بِي
لَهْفَةَ " البرمكيِّ " " الحريف"
على كوب شايٍ هني
ينعْنعُهُ حَبَقٌ مَنْدَلِي.
وفي مجلس الصدر،
عقدُ البرامكة الأكرمين،
الجهابذة الخيِّرين،
الجحاجحة الأخْيَرين،
سليل ابن برمك جعفر
والغالي علي.
مجلسٌ حضرةٌ ما غشاها
دَنِي.
****
أَدِرْ صِرْفَهُ البكر،
شاياً "مُدَنْكَلَ"
كأساً دهاقا
و طُفْ ب " التَّنِي"
****
مزعفرة الراح
مسكية الروح
طيبة الريح
قرقفةٌ في اللسانْ
و نكْهَتُهَا الطِّيبُ،
بين القَرَنْفُلِ و الحَبَّهَانْ.

عبيقُ النَفَسْ
مُنَعْنَعَةً من شذاً لا يغيضُ
تكاد تفيضُ
كما الخندريس،
إذا ما انْبَجَسْ.
****
الأعزُّ الألذُّ
كَعِزَّةِ دَمْعِ الرجال
إذا ما انحبسْ

قواريرُ رقراقةُ الرَّغْوِ
رائقةُ الصَّفْوِ
في رقّة الحِسِّ، بلُّورها الدُّرُّ
تَلْصِفُ
ضوّاءةٌ في الغلَسْ.
تضيء الوجوهَ البُدُورَ
الشُمُسْ،
وجوه البهاليل و الصيد،
أهلي،
رجال المروءات و البأس،
أهلي الثُّقاةُ الأباةُ
الكُمَاةُ الحُمُسْ.
فإن كشفتْ ساقها الحربُ
شوسٌ عُبُسْ.
و إن وضَعَتْ وِزرَها،
جبروا ما أراقوا
بمالٍ نصيحٍ فصيحٍ،
و صُمْتٍ خُرُسْ.
****
وإن رقّ أهلُ المكارم
راقوا،
وإذ ما أفاقوا
لطافٌ، رِقاقٌ
رهافٌ مُلُسْ.
و فيهم جمالٌ، وفيهم قُدُسْ.
كطلعة " فلاّتيةٍ "
أتْلَعَتْ من " تُلُسْ "
بَرَزَتْ بُرْهَةً، فاسْتَوَتْ
ثُمَّ غابتْ على رِسْلِها
في الظِّبَاءِ الكُنُسْ.
****
نفحةٌ من عبَقْ
على ذات شايٍ،
بذي حُمرةٍ،
كالشفقْ،
دماءُ الغزالةِ مسْكُوبَةً
في الغَسَقْ،
لدى مَجْفَلِ الصَّيْدِ،
قُرْبَ الرِّهيد،
و في حمرةٍ كالنبق
في طبق!
كخمرٍ، تسامَى بِرَاوُوقِهِ
فانْعَتَقْ
و كوبٍ، تدفق ضوءاً
شفيفاً شفيفاً،
كبَدْرِ السماء،
إذا ما اتَّسقْ.
فَطُفْ يا"حريفُ"
و ذُقْ رَشْفَةً، ذاقها أبكمٌ
فنطقْ.
وكل لسانٍ
مَطَقْ!!

أَدِرْ يا "ظريف"
و دِرْ يا " حريف"
و دُرْ بالرحيقِ على الأقربين
و ألْقِِ السلامَ، وجِئْ باليمين
و سَمِّ الإلَهَ،
وصلِّ و سلِّم
على خاتم المرسلين،
و جُدْ بالطريفِ
الرقيقِ العفيفِ،
و هات حُدَاءً
كجَلْوِ العروس
حداءً يجود، كغيم الخريف
يميتُ ويُحْيي،
ثقيلٌ خفيفْ
عنيفٌ لطيف.
****
خمرتنا الشاي،
خُطّابُها،
وحسبك أنّا سُكارى بها
فغنِّ لنا، نحن طُلاّبُها
و زكّ النفوس و أربابها
و حَكِّمْ " قوانين" شُرَّابها
و أقمْ شرعها العدل
ما بين أصحابها،
و املأ أباريق أحبابها
و اجْلُ أكوابها
و مُرْ عسكريها وحُجّابها
بألاَّ يطوفَ على بابها
كمكلي!
****
يا صديقي،
و" فكة ريقي "
و من فكَّ ضيقي
ومن بَلَّ شوقي و توقي
و صاحبني في طريقي،
و كان رفيقي،
رفيقي الحقيقي.
ألا ما أحَرَّ اشتياقي
إليك،
ألا ما أمَرَّ افتراقي
عنك،
و يا لوعتي واحتراقي،
وقدْ غَصَّتِ الأرضُ بالأخسرين،
و ذلّتْ رقابُ.
و جاعت سباعٌ، وهَرّتْ كلابُ
و ضاقت على الأكرمين
الرحابُ.
و ساد " الكماكلةُ" المُدَّعونَ
فما ثَمَّ عابُ!
فأمرٌ عُجابٌ، وقولٌ كِذابُ
فكُلٌ هَبَابٌ
تبابٌ تبابُ!!
****
أ يا توأم الروح، يا صاحبي
يا صَفَيِّي " الكَلَسْ "
ألا يا أُخَيّْ،
و إن ساءك اليوم
بؤسُ العشير،
وفقرُ الضميرِ،
و غَدْرُ النصيرْ،
و إنْ حَزَّ في النفْسِ
بغْيُ الغَوِيّْ.
فليسَتْ سِوَى
عَكْرَةٍ ثُمَّ تصْفُو،
و ليسَتْ سِوَى
غَمْرَةٍ تَنْجَلِي،
وإنْ كانَ جلمودَ صخرٍ
هَوَى مِنْ علِ،
وإن سامها المفلسون،
وإنْ نَطّ في رأسِها
كَمْكَلِي.






حواشي

الكلكة هي مدينة برام حاضرة الهبانية في غرب السودان، يقول الشاعر نبال هوسا أن " البلود تلاتة: "مكة العزاها الله، وتونس الخضرا، والكلكة الحديبة الكلكة"
القرياف في العامية السودانية هو الشوق العارم للشاي أو القهوة، يفعل بالمتقريفين الأعاجيب!
" البرامكة في دارفور هم المجموعة المتجانسة التي تجتمع لشرب الشاي وفق طقوس ونظام في غاية الدقة و الانضباط، يمتازون بالأدب الرفيع والنبل والشهامة، والكرم و الأريحية، والظرف والأناقة ، ينشدون الأشعار في الشاي ويستغرقون في وصفه ،وصفات شاربيه ربما باكثر مما وصفت به الخمر ونداماها، و " الكمكلي" هو عكس ذلك تماماً فهو لا يحسن شرب الشاي، ولا وصفه، وتلصق به كل الصفات الذميمة، من بخل وجبن وسوء هيئة، وخسة طبع.
الحبق نوع من النعناع
الغالي علي، المقصود هو الزعيم الناظر علي الغالي ناظر الهبانية عظيم السيرة كريم السجايا نبيل الخصال
" الشاي المدنكل في العامية هو الشاي الذي أعد بمستوى فائق من الجودة و الإتقان مذاقاً ومنظرا.
" التني" من الشاي أو القهوة، هي الكأس التي تلي البكر
الحبّهان هو من الأفاويه العطرة التي تستعمل لتنكهة الطعام و الشراب وتعرف في بعض البلاد العربية باسم الهيل
المال الفصيح كالأبقار والإبل والغنم، والمال الصامت كالذهب و النقود
" تلس" عاصمة نظارة الفلاتة في جنوب دارفور و القولة الرائجة عنها هي" تلس أم بناتاً مُلُسْ " وهي مشهورة بأن بها أجمل البنات و أجمل الأبقار و أجمل الخيل
الرهيد: أي "رهيد البَرْدي"، بأمالة الهاء وفتح الباء، من فضلك، منطقة مشهورة في جنوب دارفور.
المثل الشائع في دارفور للمنظر الحسن والعرض الجميل "جمال النبق في الطبق"
التمطُّق هو إحداث صوت بالشفة و اللسان يدل على استطابة طعم الشيء، وهي فصيحة
في مجلس البرامكة لشرب الشاي نظام وقواعد، وقضاة وجنود وحجاب، تعقد محكمة لمن يخرقون تلك القواعد تتفاوت أحكامها ومقدار المخالفة، الهدف منها التنبيه والتوجيه المهذب بحيث يرتضيه النفس وهي أكثر القوانين نفاذاً وإرضاءً للمتحاكمين فيما أعلم.
الكماكلة جمع كمكلي، و في عرف البرامكة هم الرعاع السفلة
الكَلَسْ في عاميتنا هو الشهم النبيل أخو البنات ذو المروءة و النجدة

سلام يا اهلنا
بوست يكيف
شكراً لكم / ن جميعاً

مافي زول / ة ينزل

برادك الصيني
القريافَ راميني

ناس فوق سلام
تعرفي يا الجندرية نحن عندنا براد سميناه براد تماضر براد شفاف
يشف الشاي ، ومناسبة التسمية لمن جاتنا تماضر ، اشترينا ملايات
وبراد وكبابي وسميناهن بتماضر ، حسي البيت كلو ما بشرب الا ببراد تماضر
صورناه بالشاي مع الكبابي انا واحمد العربي ، ولازم بنزل لي كم صورتو
شيلو براد تماضر ، جيبوا براد تماضر تشربي وتتني ..وتتلتي كمان
وفي صحتكم يا برامكة

جدو خالد

الشايقي مراتو سالتو بعد الغد

اعمل ليك شاي?

فرد عليها نان انا اغديت لى شنو?


اصور الشايقي بتغدا عشان يشرب بعد الغد شاي

فيصل محمد خليل

العزيز عبدالغني
تحياتي
جابتك ريحة الشاي يا برمكي !
تشكر على المرور

Quote: ثم تأتي رشا الصغيرة، ولأنها صغيرة، تود ان تعمل عشرات الاشياء في وقت، أن تعلب، وأن تحمل الشاي وأشياء تعرفهاهي، فتصطدم الكبابي مع بعضها،

اها شفت دي برضو حقو يضيفوها لي ادب الشاي
لانو في ناس شتر انا منهم كثيرا ما اخدو علقة ساخنة عشان كشحو الشاي
تحياتي

العزيز ناظم
تحياتي
تشكر على المرور بهذا النفاج
اعرف احمد وساوصله تحياتك
ساحاول ان امدك بالتلفونات
تشكر

شكرا يا خالد على قعدة الشاي ... أشرب كميات كبيرة من الشاي ، استمتع به كثيرا ، وأفضله على أي مشروب آخر ... في البيت استخدم كباية عثمان حسين ، ولا أستبدلها بغيرها مهما كانت الظروف ... واشتهرت أسرة آل قاسم في منطقتنا بحبهم للشاي ... إذن المسألة وراثة ...
زوجتي فوزية بتعمل شاي عجب ،،، مقاسات مظبوطة ، ونكهات لا تقاوم ،،، اسألوا دكين من الموضوع ده ...
ويوميا أشرب كوبا من الشاي الأخضر ... وهو مفيد للغاية ...
في مرة من المرات وأنا مسافر بطريق بحر أبيض ومعي أسرتي ، توقفت في القطينة لتناول وجبة ،،، ثم جيئ بالشاي ، فطلبت ( كبايتي بالإسم ) ( عثمان حسين ) ... فضحكت عاليا امرأة كبيرة كانت تجلس في الطاولة المجاورة ... وقالت :
والله يا ولدي يا حليلك ، إنت من زمن الكباية عثمان حسين ؟

العزيز مامون
تحياتي
تشكر على المرور الجميل
كنت قبل ثلاثة سنوات في الشرقية
تصفحت (القافلة) باهتمام شديد لانهااصدارة ملفتة للنظر تماما
من ناحية المادة والاخراج حقيقة لا تشبهها مجلة سعودية
ارجو شاكرا رفد هذا البوست بجزء من مادة الشاي الواردة في القافلة
تحياتي

العزيز طيفور
تحياتي
حقيقة الاستكانة مهمة في قعدة الشاي
تشكر على المرور

الجميل خالد ..

شكراً على كباية الشاي الصباحية دي ..
والموضوع الشيق بنكهة الهيل ..
والجميل انو عاملاهو الجميلة عشة بيدها ..
بس بدون لقيمات ..

العزيز ابو قصي
تحياتي
اول حاجة طولنا من شاي جدة

Quote: نحن قاعدين ندور المريسي .

في دي مابراكم
وفي مثل بقول :
الشاي مريسة البقارة
تحياتي ليكم كلكم في جدة

العزيز ادريس
تحياتي

Quote: أنا فتشتك في ضل نيمه ... في حرايا تشهي الغيمه ... وفي ونسات الناس السمحه ... وفي براد الشاي تلقيمه ...

ده كلام جميل جدا

ذكرتني كلام لي عثمان بشرى بيقول

ياريتك كنت معاي
ياريتك
كان دوبت اعصاب الناي
في كاس وسقيتك

قديسة النار
لعيون البوست وعيون خالد

برادك الصيني
القريافة راميني

شاي وقهوة يا استاذ مامون

Quote: والجميل انو عاملاهو الجميلة عشة بيدها .. بس بدون لقيمات ..

معتصم الظريف لقيماتك جاهزة ومخمرة
وفي الطرق مع شاي في
براد تماض ر

الأخ خالد العبيد
تحياتي

Quote: احن لقهوة امي وشاي امي في ضل الضحى وعنقريب هبابي

من عصرأً بدري تعال
أو قبل صياح الديك
الشمس بتستناك
للمنزل بتوديك
تنجم وتشرب شاي
يا مطول من شاييك