Post: #1
Title: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 06:39 AM
Parent: #0
اليومين ديل غايتو لو عاوز تدخل البورد
لازم تشيل ليك عكاز مضبب
لدي كم بوست كنت اود أن أنزلها لأخفف عليكم الكثير من معاناة الغربة
وأخفف على نفسي أولاً
وأهتف وأصرخ
ولكن كلما دخلت اجد شكلة لي رب السماء مولعة نار
واحد شايل عكازو
وواحد سالي سكينو
وواحدة رافعة البرطوش فوق
وواحدة تظعمت في شعر جارتها
واحد مادي لسانو لحدت مايقرب يلحسنا بيهو
بعدين ياجماعة شكلة العولمة دي سيبونا منها
ياتشاكلوا عديل كدا
يا خلونا نستمتع بما تبقى لنا من عمر ان كان في العمر بقية
صدقونا 00 نعاني الحرمان
ونعاني من عدم الزواج
وتتشحتف ارواحنا عندما نسمع بأحدهم ذاهب لشهر العسل
اتركونا من هذه المناوشات
فنحن بيت واحد وأسرة واحدة وفصيلة واحدة
لانريد منكم أن تختلفوا على السودان
بل نريد أن تنقلوا السودان الينا في هذا البورد
وين ازياركم الندية بالماء
وين الرواكيب الجميلة التي كانت تجلس عليها ستات الشاي
وين أهل العوض الذين يركبون اللواري في لوحة لم ار اروع منها في حياتي
وين ناس الكسرة بي شاي بي لبن
اسقونا يا أهلنا بالبورد اسقونا لأننا ظمآنون ظمآنون ظمآنون
نريد ان نفك وجع الرأس بقهوة ادروب
ونريد ان نلحس من سمن الحوازمة
ونأكل تمر الشمالية
ونرقص الكامبلا
ونشرب من السوباط
انقلونا الى السودان أو انقلوا السودان الينا
كل هذا لايهم
مايهمنا ان نعيش على نكهة وطننا
|
Post: #2
Title: Re: البورد اليومين ديل إلا تدخل ليهو بي عكاز مضبب
Author: james
Date: 08-26-2002, 06:54 AM
Parent: #1
نريد ان نفك وجع الرأس بقهوة ادروب
ونريد ان نلحس من سمن الحوازمة
ونأكل تمر الشمالية
ونرقص الكامبلا
ونشرب من السوباط
جميل ان تبوح بمشاعر صادقة
تنثرها عبر بوردينا البقي زي وطننا
فهي بحق لامست في دواخلي ما لامست
لك الاحترام
|
Post: #6
Title: Re: البورد اليومين ديل إلا تدخل ليهو بي عكاز مضبب
Author: banadieha
Date: 08-26-2002, 07:05 AM
Parent: #2
زي ما قال جيمس
بس العكاز المضبب يا أب حراز أحسن من طبيق
السفنجات والفكيك..اقصد أن العناصر المستنيرة
في البورد أكثر من التفل ولا بد أن تطغى تلك العناصر
المستنيرة على الضلمة..وهذا هو منطق الأشياء
واصل فقش التفاح وتوزيع الفصوص على الجميع وألا تفعل
يا أبا حراز تكون قد أنسقت مع الموجة العكرانة
|
Post: #8
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:10 AM
Parent: #6
قال عكرانة قال
انت اصبعك الماديهو زي منشار الحديد دا خاتيهو لي متين
دا ما وقتوا زاتوووووو
كدي اطبز ليك واحد وللا واحدة خلي الشكلة تسخن شوية
أما التفاح فأوعدك يا أخي أنني سأنثره اليكم
وساوزعه على الجميع بالتساوي
حتى لو أحرم نفسي من فص واحد أسد به ريقي
|
Post: #7
Title: Re: البورد اليومين ديل إلا تدخل ليهو بي عكاز مضبب
Author: ايهاب
Date: 08-26-2002, 07:06 AM
Parent: #2
والله يا ابو حراز انتا ما شفتا شي هسه البورد هادي والله زمان عكاز زاتو ما يحلك كان واقف بعيد تعاين ساي برضو بتجيك بنيه طاشه
المهم ياهو دا حال البورد واي ساحه مفتوحه لازم يكون فيها نوع من العراك ودا شر لا بد منو لكن موش انتا معاي انوبي مشاكلو دي ادانا حاجات كتيره حلوه وولحظات جميله وممتعه و جمعنا بي اخوان واخوات رائعين زيك كدا وفعلا كان لينا مساحه من الوطن وان كانت الكترونيه
لك كل الود والتحيه
|
Post: #10
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:16 AM
Parent: #7
الأخ ايهاب
لك التحية
اسمك جميل جدا ورائع
وناوي لو اتزوجت ومشيت شهر العسل وجبت لي ولد حا اسميه ايهاب
اها ايش رايك
لكن قول لي هو نحن ننخم متين للسودان
بالطبع الإختلاف بين السودانيين يحمل نفس نكهة الإتفاق بينهم
اذكر أن سفير جزائري كان بالسودان قال يوما ما
لقد حضرت مع أخوتي السودانيين جلسة بالبرلمان
وقد تشاجروا داخل البرلمان وتشابكوا بالأيدي
وعندما انتهت الجلسة خرجنا جميعاً وتناولنا طعام الغداء في بيت واحد
وقال مما أدهشني أن المتاشبكون بالأيدي جلسوا على صنية واحدة
وبعد ذلك رأيت أحدهم يصب الماء بالإبريق للآخر وكان قد تشابك معه حتى أدمى
هكذا السودانيون يا أخي
|
Post: #44
Title: Re: البورد اليومين ديل إلا تدخل ليهو بي عكاز مضبب
Author: safari
Date: 08-27-2002, 03:07 AM
Parent: #10
والله يا ابحراز حيرتنا لو قالو ليك زح من الشارع ساي تقول ماش الفندق
لكن بعد ما ترجع من الفندق ببقي ليك بمبي.
ولك تحياتي
سفاري
|
Post: #3
Title: Re: البورد اليومين ديل إلا تدخل ليهو بي عكاز مضبب
Author: قرشـــو
Date: 08-26-2002, 06:57 AM
Parent: #1
ابو حراز ازيك يا الحبوب
ياخوى سحروكم ولا ادوكم عين
فى شنو الناس تتشاكل وفى شنو الناس تحمر لى بعض
خلاص ولى عهد الانقسامات والاحترابات وعهد الجبروت والطغيان
البشارة الان بغد اجمل
ان لم يره اخرون فهنالك من يراه
|
Post: #5
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:03 AM
Parent: #3
قرشو
وعدتنا بالخروف
ودلة اعتقد أنها اقدر على شراء كل خرفان السودان
أشتاق اليك يا أخي كما تشتاق أودية الجفاف الى الماء وقت الصيف
من يرى شعارك
ومن يرى الشمس وهي تداعب سعف النخيل
يدرك تماماً أن الغد مشرق
وأن الشمس مشرقة
وأن جريد النخيل يغني لكل أهل بلادي
بأن السودان القادم
لك التحية
|
Post: #4
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 06:59 AM
Parent: #1
الأخ جيمس
هسه دا كلام وللا كلام جوليا
جميل يا أخي أن نعيش مع الوطن
وأن نشعر بنكهةأنفاسه عندما تختلط بأنفاسنا
|
Post: #15
Title: Re: البورد اليومين ديل إلا تدخل ليهو بي عكاز مضبب
Author: فنجري
Date: 08-26-2002, 07:37 AM
Parent: #4
ابوحراز ...تلحقنا وتنجدنا بي قفشاتك وروحك الحلوة...شنو انت بس بتشوف العكاكيز وام دلدوم .....غناء ودالبدري ...والشايقية ..
..ما شفتهم ...و الا اوركسترا الموصلي تقلت اضانك ....مع انك انت زول هجيج ....صاح....بعدين انا وصلت لي نتيجة نحن اكتر ناس ممكن نولع في ثانية وبي اقل شي ....حقو يدونا من برود الهنود شوية ...
فعشان كده البورد لازم يكون فيهو تخصصية ناس للمرح وناس للسياسة ..وناس للغني ..و ناس للشكل...الخ...
هسع اقتراحي ده ح يولع ناس ....مع انو اقتراح هذلي...المهم انا اقتنعت لازم نرضي بي واقعنا الفيهو كل الامزجة والاختلافات مع السعي للتغير...و انا واحد ناس البورد روض مزاجي ....و خلاني اقرا ما اكتب بدون استعجال وانفعال ...حتي ما اقع في المحظور ..شكرا ليك يا نكهة البورد
|
Post: #19
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:54 AM
Parent: #15
الأخ فنجري
لك التحايا المخلصة
وما اتحفتنا به انت اليوم لهو أكثر روعة
وقد جعلت قامتي قصيرة جدا بكتاباتك الرائعة
لكن لمن تقل لي
من اي قبيلة أنت
هل من اولئك الذين يتشابكون
ام من اولئك الذين يرقصون طرباً على ايقاعات الموصلي وحمزة والرائعون
غايتو انا ماعارف لكن بتاع كلو
يعني لو وجدت هجيج بدخل توش
ولو وجدت بكاء ببكي مع الجماعة
ولو وجدت شكلة بدخل بي عكاز جدي طوالي
ماعندي اي مشكلة
قال تفاحة البورد قال
|
Post: #9
Title: البورد اليومين ديل إلا تدخل ليهو بي عكاز مضبب
Author: garjah
Date: 08-26-2002, 07:15 AM
Parent: #1
أبحراز أخوي
سكينك الليلة في اللحم الحي
فعلا نعاني من نداءات المقاطعة ولا مقاطعة لاسرائيل
ولا للمنتجات الاسرائيلية التي بدأت تدخل البلد
وأطلع ليك من الكلام الناشف
وقالو أبحراز يوم دخلتو
داير يلطف الجو مع عروستو
وكانت لابسة فستان مرسومه فيه فراشة
نظر أبحراز للفراشة
وقال لعروستو يا سلام الفراشة دي حلوة
قامت ردت ليهو
هه دي ما فراشة ده أبو الدقيق
|
Post: #11
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:21 AM
Parent: #9
الأخ قرجة
وقالو أبحراز يوم دخلتو
داير يلطف الجو مع عروستو
وكانت لابسة فستان مرسومه فيه فراشة
نظر أبحراز للفراشة
وقال لعروستو يا سلام الفراشة دي حلوة
قامت ردت ليهو
هه دي ما فراشة ده أبو الدقيق
ياخوي طالما هي كل يوم بتجيب الدقيق وبتلخوا
عشان كدا كل الفراشات عندها ابو الدقيق
لكن ماقلت لي الفراشة دي راسمنها ليها وين
قال فراشة قال
ياخي اليوم داك في وقت للفراشات
والله ناوي لاصبحية ولايحزنون
الحفلة تنتهي بي جاي أمشي طوالي 000000000
ماتسألني حاتمشي وين انت عندك اتنين وعارف كل حاجة
قال ابو الدقيق قال
|
Post: #12
Title: Re: البورد اليومين ديل إلا تدخل ليهو بي عكاز مضبب
Author: ايهاب
Date: 08-26-2002, 07:29 AM
Parent: #11
تسلم ابو حراز ودا من زوقك و ليك علي خروف السمايه
المهم في الاول تعزمنا للعرس
هو حا يكون متين تقريبا ؟
|
Post: #14
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:37 AM
Parent: #12
الأخ ايهاب
طيب سرعة ارسل الخروف
وكان عاوز رقم الحساب برسلو ليك بعد شوية
طبعاً زمان السماية دي تسمع بيها في السنة مرتين بس في الحلة كلها
لكن هسع ما شاء الله
العرس والفندق وحمل بدون تفكير
والوليد تسعة شهور مابتمهن تلقاهو نط وجاك مارق
|
Post: #13
Title: Re: البورد اليومين ديل إلا تدخل ليهو بي عكاز مضبب
Author: mohsin_alsla7aby
Date: 08-26-2002, 07:33 AM
Parent: #1
المبدع ابحراز
نحن بنتفرج بس لمن انت تظهر بنظهر معاك ليه !؟ اكيد الاجابه يعرفها الجميع ... يافاكهة البورد ارم لى قدام وامتعنا بكتاباتك الرائعة التى ادخلت علينا كتير من البهجه والارتياح
ياريت الناس لمن تتعارك شوية كده تروق المنقه يعنى يعملو لينا استراحه زى ما بيحصل فى السنما وبالذات لمن الفلم يكون هندى ومسخن خليك منهم انت بس اكتب ونحن فى الانتظار لنقرأ ما تكتب
دمت
|
Post: #16
Title: أعد....
Author: فنجري
Date: 08-26-2002, 07:39 AM
Parent: #13
ابوحراز ...تلحقنا وتنجدنا بي قفشاتك وروحك الحلوة...شنو انت بس بتشوف العكاكيز وام دلدوم .....غناء ودالبدري ...والشايقية ..
..ما شفتهم ...و الا اوركسترا الموصلي تقلت اضانك ....مع انك انت زول هجيج ....صاح....بعدين انا وصلت لي نتيجة نحن اكتر ناس ممكن نولع في ثانية وبي اقل شي ....حقو يدونا من برود الهنود شوية ...
فعشان كده البورد لازم يكون فيهو تخصصية ناس للمرح وناس للسياسة ..وناس للغني ..و ناس للشكل...الخ...
هسع اقتراحي ده ح يولع ناس ....مع انو اقتراح هذلي...المهم انا اقتنعت لازم نرضي بي واقعنا الفيهو كل الامزجة والاختلافات مع السعي للتغير...و انا واحد ناس البورد روض مزاجي ....و خلاني اقرا ما اكتب بدون استعجال وانفعال ...حتي ما اقع في المحظور ..شكرا ليك يا نكهة البورد
|
Post: #21
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 08:01 AM
Parent: #13
الأخ الصلحابي
أشكرك بحرارة على ظهورك مع اب حراز
وقد أخجلت تواضعي كثيرا
فأنا ما اقدمه اليكم هنا ليس الا رحيقكم الذي يغذي افكاري
ويخرج بهذه النكهة التي اتمني أن تلامس اوتاركم ومشاعركم
ياخوي بعيداً عن السياسة 00 صورتك ودوها وين
|
Post: #17
Title: Re: البورد اليومين ديل إلا تدخل ليهو بي عكاز مضبب
Author: miss_sudan
Date: 08-26-2002, 07:40 AM
Parent: #1
ياناس روقوا المنقة
|
Post: #18
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 07:47 AM
Parent: #17
مسز سودان
ما اروعك
وما الطفك
الآن نقلتي الينا السودان بكل تفاصيله
الحمار هذا ابحث عنه منذ زمن بعيد
وهذه الكارو التي يجرها امتعتني كثيرا
فقد ركبت فيها مع خطيبتي وزرنا أحد الأصدقاء بأمبدة
المشكلة أننا طلبنا منه أن ينزلنا بعيداً من المنزل حتى لاتجرح خطيبتي من صديقتها
الحمير عندنا ظريفة جداً
تأكل البرسيم
وتأكل الكنافة
وتأكل التمر
وتشرب من أعذب مياه العالم
وأجمل مايعجبني في الحمير السودانية صوتها
فهو بلا تغنج
وبلا ميوعة
انه السودان يا أختي رجولة في كل شيء
|
Post: #20
Title: Re: البورد اليومين ديل إلا تدخل ليهو بي عكاز مضبب
Author: ايهاب
Date: 08-26-2002, 08:00 AM
كدي انت عرس في الاول
بعد داك الخروف هين
|
Post: #22
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 08:05 AM
Parent: #20
والله يا ايهاب انا مسخن واقف نار
وكان الأماني بتحقق بس اغمض عين واحدة
والقى نفسي وسط الكوشة
بيني وبينك الكوشة دي قلتها ساكت كدا
بس القى نفسي وسط اللمة
معليش اعذرني بقيت أهضرب
قال امشي عرّس قال
|
Post: #23
Title: Re: البورد اليومين ديل إلا تدخل ليهو بي عكاز مضبب
Author: Al-Masafaa
Date: 08-26-2002, 08:10 AM
Parent: #22
ابحراز يا اخوي حليل زمن القراية ام دك و حرم مافي عكاز يقع في زول معانا هنا بس انتوا وحدوا الله و العنوا الشيطان و كل الناس هنا كل الناس صحاب كل الناس اهل و الماهم قراب قربن الامل
|
Post: #25
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 08:33 AM
Parent: #23
المسافا
فعلاً هنا كل الناس أهل
كل الناس صحاب
وتاكيدا لكلامك فإن عدد الأصدقاء الذين أضفتهم الى قائمتي بهذا البورد
يفوق كل من تعرفت عليهم خلال حياتي العملية
الأخ ايهاب
والله الظاهر عليك انتو برضو زيي كدا مسخن ونارك مولعة
انت متزوج وللا برضو زي جماعة البورد ديل الواحد تلقاه معاه حلة بتاعت شفع ويقول ليك انا ما معرس
|
Post: #24
Title: Re: البورد اليومين ديل إلا تدخل ليهو بي عكاز مضبب
Author: ايهاب
Date: 08-26-2002, 08:10 AM
Parent: #22
انت العرس قام بيك يا اب حراز اخوي
اخير ليك الحق نفسك
والله انا خايف فجعاءة كدا تجي تقول ليناباركو لي انا عرستا خلاص
وتاكلنا من العزومه
|
Post: #26
Title: Re: البورد اليومين ديل إلا تدخل ليهو بي عكاز مضبب
Author: shogon
Date: 08-26-2002, 08:51 AM
Parent: #24
تحيه طيبه
ابو حراز
لك مني اطيب ايضا تحيه على بوستك الجميل
فالمنبر بات جزء لا استطيع الانفصال عنه
ورغم كل شئ وجدت فيه سوداني الذي فارقته
وتغربت عنه 00000 فلك التحيه دوما على كلماتك
التي اعادتني اليه 000
تحياتي
|
Post: #32
Title: Re: البورد اليومين ديل إلا تدخل ليهو بي عكاز مضبب
Author: abushakosh
Date: 08-26-2002, 12:21 PM
ابو حراز
تحياتى
شوف ماتسمع لى كلام الناس الخمجانين ديل-الفصة دواس عديل كدي-تعرف الممثل علاء ولى الدين ماعارف في ياتو فيلم واحد ضربو ضرب-دقاه دق - تمام دق عيش بس قال ليه شنوباخى انتو ضرب ضرب شتيمة مافى
الموضوع هنا كيف انت ما حددت -ولا اقول واحد على مناطقكم ديك شايل
ليه شوال قش والدنيا مغيرب كدي واحد تاني عامل قطاع طريق -لبد لصاحيك بتاع القش واعاين ليه فى قفاه وادي ليك واحدة بعكاز مضبب فى فقرته -زولك ولا شوال القش مازح من محله اتلفت على الولد فطاع الطريق -فال ليه انت بتهذر ولا ننزل - تنقر داك قال ليه شنو
دحين بعد مرات الموضوع بكون هذار
اما موضوع عرسك ده ياخى والله انا بدعو الاحوان فى البورد ده كله احلوا لينا مشكلة عرسك دي عشان نشوف المدشوش ومغطىونمشى لمواضيع جديدة ذي قفة الملاح وكدىونسمع بجرس ابوحراز مع القفف وكيف شال القفة -دحين ياجماعة اصلوا العرس بالفاتحة ياناس ما حلال-حلال
وطبعا انا وراك وراك اصلى ساكن فى قفا حلتكم
|
Post: #35
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 03:02 PM
Parent: #32
ابوشاكوش
ظريفة ادوني لي شربة دي
الشربة العاوزها شنو
بعدين ياخي نحن بدري علينا على قفة الملاح
السنة الأولى دي كلها بتنكل على ابو النسب وبحرس ليهو البيت ساكت
بالنسبة للشكلة الفي البورد دي انشاء الله تكون هزار ساكت
|
Post: #38
Title: Re: البورد اليومين ديل إلا تدخل ليهو بي عكاز مضبب
Author: al_msaa
Date: 08-26-2002, 07:24 PM
دا لو العكاز المضبب بتاع الحراز لو مرقكك
والله من البورد دا ما يمقرقك الا السيف والمدفع الرشاش
اقول ليك كلام والله بس الليلة من البورد دا تمرقكك كرعيك
احسن دوشكا ياخوى ،،،
قال عكاز مضبب قال
|
Post: #27
Title: Re: البورد اليومين ديل إلا تدخل ليهو بي عكاز مضبب
Author: ALZOLZATOO
Date: 08-26-2002, 09:05 AM
Parent: #1
نلحس سمن الحوازمه
اها يا ابوحراز السمن بتاع الحوازمه ده لو مامديت لسانك ح تلحسو كيف وريني ههههههههههههه يكه
ابوي زمان كان بيقول لي طول لسانك وقصر يدك
وانا ماشي بالوصية بتاعتو
زاتوووووووووو
|
Post: #28
Title: Re: البورد اليومين ديل إلا تدخل ليهو بي عكاز مضبب
Author: ebrahim_ali
Date: 08-26-2002, 09:28 AM
Parent: #27
والله ياابوحراز انا من قبيل ازازي من بوست لبوست قلت في الاخر اشوف بتاعك دا لكن اصلا ما متوقع في سويعات بس صحفتين يامفتري تملاهن عكاكيز وشلاليت وضرب غايتو الجماعة ديل خليهم براحتهم ياخوي بفتقلوا ويتشلتو ويرجعوا تاني ياكلو في بيتهم دا ما هو السودان شكلة لرب السماء شلاليت وجدع وفليق وشريط جلاليب وعراريق وتجي البيت محل الزراير مشروطة بتاعت الجلابية ابوك يعرفك على طول عملت شكلة بدل من يسالك يقوم يجلد تاني على جلدتك الانجلدتها ديك ويقول ليك لو ما فلقته لمن يجيب الدم ما تخشي جوه البيت تشيلك الهاشمية (هي ذاتها شنو) تمشى تبدا شكله تاني المهم انا حسي يا ابوحراز الجماعة الوصلهم طرف السوط كان ما جابو الدم وفلقوا الناس الشاكلوهم ما يدخلو البورد دا ابدا الا يجيبو الدم
اها هاك دي بخصوص الشلاليت
جاين انا وصاحبي من بحري لامدرمان وفي موقف بحري صاحبي عندو الفين ربطة العشرين جنيه الخضراء الزمان ديييييك وفي اثناء المدافرة في الحافلة صاحبي قاموا شرطو جيب الجلابية بتاعتوه وانسرقن القروش فتشنا جاي فتشنا جاي لمن زهجنا قلت ليهو ياخوي بعد كده الله يعوضك وركبنا تاني حافلة للشهداء في امدرمان وصاحبي يازول زهج ليك زهجة بنت كلب واخلاقه بقت في طرف نخرته بعد ما وصلنا ليك الشهداء صاحبي شاف ليك حرامي الجماعة قابضينوه في الشهداء على طول قام ملصق ليك في كف لمن وقع الحرامي الجماعة سالوه ياخي مالك كافت الزول دا قال ليهم انا حسي سرقني حرامي في بحري ههههههههههههههيييييييييييككككككككككة
حسي خلي الجماعة يشاكلوهم في محل تاني وما يقدروا يخلصوا حقهم يجوا يفشوا فينا هنا
|
Post: #29
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 09:50 AM
Parent: #28
الأخت شجون لك التحية أنتي ايتها الرائعة
وانا من المتابعين لريشتك التي رسمت لنا اروع الكلمات
ويسرني أختي أن انقلكم وتنقلونا للسودان
حيث الحب والروعة والجمال والطبيعة والبساطة والسماحة
الزول ذاتوووو
هو لسانك دا خلا حاجة مالحسها
الله يستر
بعدين ابوك دا قال ليك طول لسانك وقصر يديك
ليش ماكان يكون العكس
يعني لازم تخلي يدك طويلة ولسانك قصير
لكن بيني وبينك الطول دا كلو قبل العرس
لكن بعد العرس والله لسانك دا الا يسلوه ليك سل
الأخ ابراهيم
والله صاحبك زعلان زعل شديد
انت ماشفت الزول القعد يبكي في الحافلة وقال ياجماعة نشلوني والقروش ديل والله أجمع فيهم لي سنة كاملة عشان أمي عندها عملية
قام الحرامي بكل ذوق من الكرسي بتاعو وكان ببكي
وقال للراجل والله حننتني
خد قروشك مادام حقت عملية
وما وقف على كدا بل طلع ليهو 20 الف تبرع منه للعملية
انا حاضر القصة دي وكنت ماشي كوبر
وقلت للحرامي
اها العشرين الف دي لفحتها من وين
|
Post: #30
Title: Re: البورد اليومين ديل إلا تدخل ليهو بي عكاز مضبب
Author: Abomihyar
Date: 08-26-2002, 10:25 AM
Parent: #1
يارجل وينك
. ننده في أهلك ناس أب حراز وإنت قريب حدانا
.أو تتركنا وأهلك نهبا للطير والسابلة
|
Post: #31
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 11:53 AM
Parent: #30
ابومهيار
انت البوديك تنده بعيد شنو
اهو انا جنبك كورك ساكت للصباح
لكن بيني وبينك انا زاتي مرات بنزنق وبنده أهلي ديل
عشان الواحد يقدر يسافر السودان ويتلم على الجماعة
ماتفتكر الجماعة ناس خالي وعمي وجدي
ديل يطيروا في السما الأحمر
الجماعة ناس تانين خالص
قال ننده ابوحراز قال
|
Post: #33
Title: Re: البورد اليومين ديل إلا تدخل ليهو بي عكاز مضبب
Author: Tumadir
Date: 08-26-2002, 12:31 PM
Parent: #31
يعنى النكدى منوتقصد يابحراز
من ما شفتك كاتب واحدة رافعة برطوشا عرفتك قاصدنى انا...
الليلة امان ما وقع راجل!!!!!
|
Post: #36
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 03:08 PM
Parent: #33
لكن انتي ياتماضر لمن تجي داخة البود
مابتكوني لابسة اي حاجة
بتكوني حافية الأقدام احتراماً لجمهورك
نحن نخاف من لسانك كثيرا
ولا نخاف من الشبشب الأحمر
قالت وقع زول قالت
والله تلاقيك خوافة خلاص
القعونجة كيف معاك بتسوي ليك شنو
قابلت هشام الظريف في جدة
قال لي تماضر دي لو عاوز تخوفها بس جيب ليها دودة خضراء
وللا قعونجة وشوفها كان تقيف ليك
|
Post: #41
Title: Re: البورد اليومين ديل إلا تدخل ليهو بي عكاز مضبب
Author: Tumadir
Date: 08-26-2002, 10:41 PM
Parent: #36
وانا حالتى دايرة اعمل فيها حنكوشة ضفدعة دى بى عينى ماشفتها؟
فضحونا فضيحة ديل...
لكن انت سعيد الحظ البتشوف هشام فى طاهرة الدنيا دى.
|
Post: #45
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-27-2002, 06:28 AM
Parent: #41
قالت ضفدعة قالت
دا ماكلام الحنكوشات زاتهن
نحن بنقولها عديل بي ضبانتها
قعوووووووووووووووونجة
والماعجبه انشاء الله ياكل تبش
خطيبتي غريبة جدا
بتخاف من الجراد
قلت ليها مفروض الجراد دا يخاف منك
لأنك اليوم كلو جو التكل ودخاخينك ضاربة في السماء
والجراد جنو وجن الدخان
قالت فضحونا قالت
|
Post: #34
Title: Re: البورد اليومين ديل إلا تدخل ليهو بي عكاز مضبب
Author: Ahlalawad
Date: 08-26-2002, 12:44 PM
Parent: #1
أب حراز
ماك طيب
اصبحت كيف من عكاكيز امس
ان شاالله لقيت ليك واحد(ة)يعصر ليك لسانك
|
Post: #37
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-26-2002, 03:12 PM
Parent: #34
اهل العوض
الكرسي الساخن دا شيء صعب جدا
وخاصة الحلاقة كانت فينا اول واحد
اللسان اصبح ممدود زي بتاع صاحبك المعانا في البورد دا
بالله الزول دا لو ادوه نشاة بتاعت حلبة ياكلها كيف
اكيد دا بلغف لغف ساكت
قال عصرت ليك لسانك قال
|
Post: #39
Title: Re: البورد اليومين ديل إلا تدخل ليهو بي عكاز مضبب
Author: عزيز
Date: 08-26-2002, 08:12 PM
Parent: #37
أبوحراز جريعة العسل
حلاوتك تشرق وكان الزول ما انتبه لى روحه والله يروح فيها عدييييييل
لك التحية اخى وانت تنثر اريجك الفرايحى فى البورد تسكن به العواصف الهوجاء وتدخل على النفس راحة وطمانينة
بوستك يا أبوحراز اب عكازا مضبب فرج كربة من كرب البورد والله يفرج كربتك وتعرس وتمشى الفندق وبدل شهر عسل يكونوا ثلاثه ولا اقول ليك انا عازمك هنا فى هولندا بس انت اركب الطياره وتعال
لك التحية والحب
|
Post: #40
Title: Re: البورد اليومين ديل إلا تدخل ليهو بي عكاز مضبب
Author: تغريـــد
Date: 08-26-2002, 10:00 PM
Parent: #39
سلام يا ابو حراز ... مشتاقين
تعرف لو كان اتاخرت اكتر من كده .. انا كان سويت ليهم المديده حرقتني  ))) ... لكن ربك ستر
على العموم تاني ما تغيب قدر كده
|
Post: #42
Title: Re: البورد اليومين ديل إلا تدخل ليهو بي عكاز مضبب
Author: BAKASH
Date: 08-26-2002, 11:07 PM
Parent: #40
الاخ الفاضل ابو حراز
اولا لو كتبنا فيك قصايد وابيات ما وفينا جزءا من ابداعاتك ال بتقدمها وبصراحه مما دخلت البورد قدمت كل ما هو مبدع وجميل وبصراحه تخفف علينا كتير جدا والواحد ينتظر متين ينتهى من الشغل حتى يجرى يدخل البورد عشان يقرا بوستك الجديد والله يوم انا فى الصلاة عايز اضحك زى المجنون عشان كده نشكرك جدا وبعدين حكاية البورد ومشاكلو طبعا لازم لولا المشاكل ما بيحلى البورد بس شيل عكازك ولف
اخوك بكاش
|
Post: #43
Title: Re: البورد اليومين ديل إلا تدخل ليهو بي عكاز مضبب
Author: degna
Date: 08-27-2002, 01:18 AM
Parent: #42
تحياتي للعملاق ابو حراز ,,,
ذي ماشايف يا حبيبنا مشاكل وخناجر وسكاكين وسيوف حتطلع كمان , يااخوي حضر ليك جم سري وتعالي لجايه لانو في هجمات تتاريه متوحشه وابري سنونك بابرية قلم سنينه وتعالي,,,,,,,,,,,,,لوووول
دقنه البجاوي
|
Post: #46
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-27-2002, 06:35 AM
Parent: #1
الأخ سفاري
والله انت الحيرتني
لقيت اسمك انك رادي على البوست
قلت ارد ليك الجميل
بالله الوداك الصفحة رقم واحد شنو
دورتك ليك في الصفحة رقم ثلاثة لاسفاري ولاسهاري مالقيت
جيت الصفحة رقم اتنين مافضل لي الا اشتري لي سيارة اسكودا وأفتش بيها
جيت الصفحة رقم واحد لقيتك لابد هناك زي القرد
اعمل ليكم شنو
كلكم تسألوا عن شهر العسل
وقلنا بدل ماتضاربو احسن نغير ليكم جو شوية
قال حا ترجع وتلقى الفندق بمبي
انشاء الله يكون بيجي ولا أحمر زاتووووو بس كدي الواحد يلم فيهو
|
Post: #47
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 08-27-2002, 07:01 AM
Parent: #46
الأخ عزيز
انت العسل لأنك بجوار العسل
هولندا بلد الزهور
اسلوبك جد رائع وأعجبني
ودعوتك لنا بتمضية شهر العسل في هولند اعتبرها مقبولة بس ارسل التذاكر
غايتو زولتي لو قلت ليها شهر العسل في امستردام
احتمال تحرق التكل وماتنجض ليهم الكسرة كويس
دي طموحها لحد فندق النيل
وخلاص لمن دخلت الألفية الثالثة قالت كسلا قالت
الحكاية كمان جابت ليها شهر عسل في هولندا
والله ايامك يا اب حراز
بس مايكون في سوادنيين كتار عندكم هناك
انا جني وجن المتاوقة الكتيرة
الأخت تغريد
المديدة الظريفة التي تقدميها لنا كل يومعلى شكل كلمات
هي من أطباقنا المفضلة في هذا البورد
فنكلها
وتجعلنا لاشعورياً نغرد حتى يصلنا طبقك الثاني
بكاش وينك ياخي
قلت لي الواحد يشيل عكازو ويلف
غايتو في جماعة العكاز اصلو ماينفع معاهم في البورد دا
بعضهم كان ماعضيته مابترتاح
وفي واحدة غايتو لو لاقيتها الا كان أجضمها ليكم عديل
صدقني شكلة السودانيين دايماً ظريفة
لأنها زي علبة الببسي لمن تفور
وبعدين زت زت زت الفرقاعات بتاعاتها تنتهي ويمشوا بيوتهم كأنو ما حصل شيء
دقنا
هسع كان في نص الشكلة جيت داخل هايج بي جملك دا مش بتفرتك الناس دي كلها
بعدين ياخي عاوز أسألك مالقيت ليك جمل دبل غمارة
|
Post: #48
Title: Re: البورد اليومين ديل إلا تدخل ليهو بي عكاز مضبب
Author: mohsin_alsla7aby
Date: 09-02-2002, 01:51 PM
Parent: #1
ابو حـــراز فاكهة البورد انت
دونك البورد ما ليهو طعم
|
Post: #49
Title: Re: البورد اليومين ديل إلا تدخل ليهو بي عكاز مضبب
Author: degna
Date: 09-04-2002, 05:00 AM
Parent: #48
تحياتي ياابو الفرح النبيل (ابو حراز )
قلت شنو الجمل الراكب فيه دا ,,,, هسع انط ليك
منو وافركش ليك الجوطه دي ,,,,,,,
سؤالك مافهمت منوا اي حاجه لوووول,,,,,
دقنه البجاوي
|
Post: #50
Title: Re: البورد اليومين ديل إلا تدخل ليهو بي عكاز مضبب
Author: ابوحراز
Date: 09-04-2002, 06:30 AM
Parent: #49
دقنة
اصلو السؤال في الكيمياء البكرها وبكره ابوها
السؤال ياخي في الجمل الراكب فيهو دا
شفت لي جمال كدا في السودان فيها سنامين
نحن في السعودية بنسميها دبل قبينة
شكلو حلو داك والله
حاول اركب واحد او اديني واحد معاك
قال ما فاهم قال
|
Post: #51
Title: في ريدة زي دي
Author: Wadmirghani
Date: 09-04-2002, 06:47 AM
Parent: #1
لكن انت سعيد الحظ البتشوف هشام فى طاهرة الدنيا دى
رد الاخت تماضر لابوحراز اثار شجوني وفتح المواجع...رد الاخت تماضر وافتخارها وحبها لاخيهاهشام...خلى دمعتي نزلت عديل كده لانو على طول اتذكرت اختي امل دائماً تفتخر بي وكتيره الحب والهتمام بكل اشائي وانا ابادلها نفس الاحساس وهي دائماً...المحامي ...الطبيب...الممرضة...الخ ...اذا قلت انني اوفيها حقها من الثناء الون كضاب... والله من العبرةلمن ما قادر اشوف ... ويا لها من شجون
شكراَ للاخت تماضر وللاخ ابوحراز
|
Post: #52
Title: Re: في ريدة زي دي
Author: ابوحراز
Date: 09-04-2002, 06:53 AM
Parent: #51
الأمل
ا
ل
أ
م
ل
كل من يحمل الأمل قادر على تغيير عبوس الآخرين الى ابتسامة
يكفي انها تحمل أهم مايسعى افنسان اليه
أن يتجرع الأمل صباحاً ومساء ليتشبث بالحياة
لهذا حتماً ستكون أملك هي الطبيبة والجراح والمداوي
عندما قابلت انا هشام في جدة لم أعهده بهذه الحيوية والمرح 00 عانقني بطريقة تشعرك بأنه يعرفك منذ ميلادك
فالتحية لكم جميعاً
والتحية الى أمل التي أشعلت فيك هذه الروح
اما انا فإن أخواتي لن ينسيني ابدا
فقد فلقت إحداهما
وظعت شعر الأخرى
وعضيت الكبيرة فقد كان جسمها أكبر مني
|
Post: #53
Title: Re: في ريدة زي دي
Author: قرشـــو
Date: 06-18-2003, 09:06 AM
Parent: #52
فوق فوق
|
Post: #54
Title: Re: في ريدة زي دي
Author: الزومـــــــه
Date: 06-18-2003, 09:30 AM
Parent: #53
العمدة قرشو
واصل هذا الغوص و طلع الدرر القديمة التي افتقدناها هذه الايام
أبو حراز فاكهة و روح حلوه اضاف للبورد متعة التذوق
لماذا هو مقل هذه الايام
|
Post: #55
Title: Re: في ريدة زي دي
Author: جدو
Date: 06-18-2003, 09:31 AM
Parent: #53
والله يا عمدة
البوست دا جبته في وقته
|
Post: #56
Title: Re: في ريدة زي دي
Author: nile1
Date: 06-18-2003, 09:56 AM
Parent: #55
أب حراز
الحكايه شنو؟؟؟؟ما عتدك هم غير الأكل واللحيس...إنت فضلت حاجه من الأكل...ماتراك هسع غلييييد وجضيماتك كبااااار زي لقيمات البكاء...بطنك المغلباك دي ودتك جده وقلنا ليك تعال ماعاوز تجينا...تمر الشايقيه تلقاهو وين غير عندنا كان دايرو تعال وحبابك ألف..بس والله أنا خايف تاكل ليك جريدة تمـــر..ولقيت ليك عروس بس طالبه تشوف صورتك....اوريها ليها؟؟؟؟؟؟؟؟؟؟؟
|
Post: #58
Title: Re: في ريدة زي دي
Author: ابوحراز
Date: 06-18-2003, 10:14 AM
Parent: #56
نايل
تعرف عندي نية ازور الرياض
لكن عاوزك تجمع لي بورداب الرياض كلهم
ماتكونوا بس زي بورداب جدة
يعني قصدي عاوزكم تكونوا زي بورداب الإمارات كلهم مع بعض
النخيل والسعف كلو على بعضو
بالله في جدة
تعاين شمال تلقى أساسي
تعاين يمين تلقى عمو قرجة
تعاين وراك تلقى عمو صالح ضرار
تعاين فوق تلقى ولد يازول يازول شايت الكورة وعاوزة تقع فيك
تحوّص شوية تلقى عمو قرشو رافع صحن الكمونية وبتدفق من الصحن وماجايب ليها خبر
قلت لي الطالبة دي وين
قال طالبة قال
نحن عاوزين حاجة جاهزة
|
Post: #57
Title: Re: في ريدة زي دي
Author: ابوحراز
Date: 06-18-2003, 10:04 AM
Parent: #55
يبدو أنكم اشتقتم للعكاكيز المضبـبـة
اشكركم والتحية لكم جميعاً
البورد فعلاً في حاجة الى رواقة شوية
يحتاج الى هدوء
ويحتاج الى مطر والى غيوم
الغربة هنا صعبة للغاية
وتصيبنا بالكثير من الملل
ولا واحة الا هذا الوطن 00 هذا البورد
هنا فقط نرتاح
ونتنفس
ونتفيأ
ونستنشق عبق السودان وعطره والقه
صدقوني
منذ أكثر من اسبوع
ادخل الى البورد
ثم اشرب الشاي كما تقول شيري
وأتاكي الباب وأخرج
نريد ان نجلس سوياً
ان نتصافح
ان نتعانق
ان نعيش الحلم الكبير
حلم العودة للوطن
حيث كل السودانيين رجال بكل ماتحمله الكلمة من معاني
حيث الرجال الذن لايصدأوون
وحيث النساء الللايئ يحملن شرف المليون ميل مربع
نريد ان نقعد مع هؤلاء البسطاء عبر هذا البورد
حيث كل البيوت في السودان لنا
وكل الشوارع والأزقة في السودان لنا
وكل الأمهات أمهاتنا
وكل الأطفال أطفال لنا
أتركوا السودان يتنفس
وأتركونا نتنفس
فأنتم جميعاً تملكون الكثير من الرحيق رغم اختلافكم
وتملكون الكثير من العطاء رغم سحناتكم
ومايحيرني
رغم اختلافكم أحياناً في هذا البورد
الا أنني اعرف تماماً أنه سيأتي يوماً ما وتأكلون جميعاً على طبق واحد
وهذا مايميز هذا الشعب
لكم التحية
والوقوف لوطني الكبير
|
Post: #59
Title: Re: في ريدة زي دي
Author: قرشـــو
Date: 06-18-2003, 10:36 AM
Parent: #57
ولمثل هذا الحديث وتلك الروح رفعنا البورد
فهل يتفاعل الناس مع هذه الروح السمحة ؟؟؟
|
Post: #60
Title: Re: في ريدة زي دي
Author: مهيرة
Date: 06-18-2003, 11:00 AM
Parent: #59
ابحراز اخوى
صباحاتك بيض
المصيبة التانية تكون قاعد فى بطن بوستك ومبسوط،ماسك فارتك من ضنبها، يجيك واحد ولا جماعة شايلين عكاكيزم، السلام ما يدوك ليه
اها زى ديل يسووا معاهم شنو؟
الشكية لابيدا قوية
والله نحن ما ناس عكاكيز
نحن ناس اقلام ساىىىىىىىىىى
اختونا يا ابان عكاكيز
تسلم ياب عكاز-قصدى ابحراز
تحياتى
|
Post: #61
Title: Re: في ريدة زي دي
Author: ابوحراز
Date: 06-18-2003, 12:05 PM
Parent: #60
قرشو
التحية اليك ولكل أصحابي بورداب جدة
شوفوا لينا مناسبةياجماعةخلونا نقابل بعض
أحييك على اهتمامك ببوستاتي المتواضعة
ولولا أن روحك جميلة وسمحة
لما كان هذا الجمال الذي نراه في بشاشتك وترحابك
لك التحية
مهيرة
جميل هذا القلم الذي تحملينه
فقد قرأته عدة مرات
وتفاعلت مع قلمك حد الجنون
هنا في هذا البورد
أنتي انسانةهادئة هدوء النيل في آذار
ولكنك عندما تدخلين الشرق الأوسط
وعبر بوابة الرأي
اجدك تحملين عكازاً مضبباً
لكنه علىهيئة قلم
عملتي لينا شنو في موضوع الكتاب ؟؟؟
|
|