Post: #1
Title: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-02-2002, 07:07 AM
Parent: #0
ما أجمل بلادي
السودان
حيث الكرم والعطاء الدفاق
السماحة والبساطة والرحيق والجمال
حتى القبلات في بلادي لها طعم خاص والق خاص ونكهة خاصة
في المقرن 00 شاهدت اطول واروع قبلة في التاريخ
النيل الأزرق يقبل الأبيض في حميمية لم ار مثلها في كل مدن العالم
يقبلان بعضهما منذ ولدنا ويشكلان قبلة واحدة
لكن مايحيرني أن شرطة النظام العام
لم يأخذوا الأزرق الى مكاتبهم ليعاقبوه
ولم يستجوبوا الأبيض
|
Post: #2
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: soma
Date: 11-02-2002, 07:13 AM
Parent: #1
تسلم يا ابو حراز ذكرتنا بى سودانا الحبيب وهاك المقطع ده هديه ليك ولى كل الاحباب ..مقطع من قصيدة عشان نرجع وتحياتى لكم جميعا
وبعد ارجع اكون سواح فى بلدى اشوف الكنت بيه بسمع ...
شرقنا سواكن الشامخه جمال سنكات ومصوع ..
وفى ضفاف القاش اقيف ارتاح وجبال توتيل هناك اروع ..
وسط بلدى جزيرة الخير عطاها وفير لا بتكل ولا بتقنع ..
وفى الخرطوم لقاء النيل زى عاشقين متعانقين من المنبع ..
شمال الفن من مروى منبع التاريخ والمرتع ..
حكاويهم شعر منسوج فى العايش والودع ..
غربنا جمال وراحة بال نطوف ونشوف ونستمتع ..
جنوبنا الحاضر الماضى بى خيراتو جاد ونفع
وبعد أرجع اعانق بلدى بى لهفه عين تفرح وعين تدمع ..
عين تفرح وعين تدمع ....
عين تفرح وعين تدمع .....
اسماء صديق الطيب الجنيد
سلطنة عمان مسقط 17/3/2002
|
Post: #3
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-02-2002, 07:20 AM
Parent: #2
سوما
لوحة رائعة بوعة السودان
نقلتيني الآن الى عالم نحبه
وهواء نحبه
وانفاس نحبها
نقلتينا الى حيث يوجد حبل مشيمتنا
الى بساطة أهلي
وسماحتهم
وكرمهم
ورجولتهم
وشموخهم
ما أجمل قلمك
وهو يمنحنا هذه التأشيرة
لنرضع من ثدي الوطن دون فطام
|
Post: #5
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: قرشـــو
Date: 11-02-2002, 07:23 AM
Parent: #3
ابو حراز
بقيت تتكلم فى السياسة كمان
ياخوى انت مشيت زيارة لخطيبتك ولا كنت فى مؤتمر سرى للحزب الفلانى ؟؟
الاستاذة سومه
هكذا انتى روعة متدفقة فى كل شىء وهاهى كلماتك تعيدنا لجمال السودان وروعته ووصفه من بقاعه الجميلة كلها ..
دوما كما كنت اسمع الشاعر وجدان الامة ولسان حال الوطن وانتى كل ذلك فلك التحية عزيزتى
|
Post: #4
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: الجعلي
Date: 11-02-2002, 07:21 AM
Parent: #1
الرائع ابو حراز
رجعنا خلاص للكلام المنطط
يا اخوي والله نحن ما فضل فينا قلب للهجم ده
تسلم يا رائع
الجعلي
|
Post: #6
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-02-2002, 07:48 AM
Parent: #4
الجعلي
والله انت وقرشو قلوبكم محتاجة الى تروية
قال سياسة قال
قرشو مالك انت جنيت
اليومين ديل ماتشوف ليك بوست فيهو ريحة عرس
طوالي تنط فيهو
الحاصل عليك شنو ؟؟
الجعلي
تستاهل
القليب رهيف
قلت لي الخطيبة جضمتني
هي لو وقفت على كدا كويس
حصلت حاجات كتيرة
بقولها ليكم يوم السماية في جدة
مش وعدتونا في سمايتين
واحدة عرفناها حقت متوكل وطارت
التانية لي منو ؟؟
|
Post: #7
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: Abomihyar
Date: 11-02-2002, 09:24 AM
Parent: #1
أيها الرائع
وهل يملكون الجرأة؟
|
Post: #8
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-02-2002, 10:00 AM
Parent: #7
ابو مهيار
لا ادري اي جرأة تعني
ولكن الأبيض جريء
والأزرق جريء
يقبلان بلا حدود
على مرأى من الناس
والمارة
والشرطة والنظام
انها قبلة تغازل القانون بكل مواده
ولا شيء أمامنا الا ان نستسلم جميعا لما تقرره الطبيعة
|
Post: #9
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: Abomihyar
Date: 11-02-2002, 10:12 AM
Parent: #8
أقصد أي سلطة تجروء على منع الحبيين من التلاقي.
أعتقد أنها لا تملك الأدوات.
هذه القبلة تعبر عن نظامنا العام.
|
Post: #10
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: yasiko
Date: 11-02-2002, 04:25 PM
Parent: #9
ابوحراز
لا تنطبق عليهما قوانين الشريعة
لان القبلة في دائرة اختصاص ام درمان
التى ستخرج من الشريعة بلا حمص
لكن واضح انو طايرة ليك قبلة وحلم الجيعان عيش
|
Post: #11
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ABUHUSSEIN
Date: 11-02-2002, 06:21 PM
Parent: #1
أبو حـــــــــراز
يا خوي منو فينا المسطول نحن و لا إنت ؟؟؟؟؟
و الله البورد دا مفروض تكون فيهو رقابة على العنوانين
قبل يومين واحد حبيبتو مبللة بالمطر و نايمة معاهو في السرير
و إنت الليلة يقبلان بعضهما في المقرن ؟؟؟؟؟؟؟
عـــرســــوا علشان نرتاح من عنواينكم دي
و الله بعد العرس تقول كلام زي دا كان نشوف جضومك دي
معلقة شرموط في البلكونة
|
Post: #12
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-02-2002, 06:58 PM
Parent: #11
ابوحسين
ياجماعة جن شنو وسطلي شنو
دي جغرافيا عادية
نيل ماسك ليهو نيل
دي فيها حاجة
|
Post: #13
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ALZOLZATOO
Date: 11-02-2002, 10:06 PM
Parent: #1
لا سمبا لا ولا رمبا ولا رقص الهنود الحمر حول النار اها هيها اها هيها
يساوي ملتقى النيلين في الخرطوم ياسمرة ياسمرة
يا ابو حراز عرفنا اي حاجه كمان داير تفصل الابيض من الازرق وتخليهم زي قضيب السكه حديد هههههههههه يكه
ولا دي غيره بس قع قع قع
زاتووووووووو
|
Post: #14
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-03-2002, 06:10 AM
Parent: #13
ياسيكو
الزول زاتووووو
لكم التحية ايها الرائعون على مشاكساتكم معي
لا ادري
ولكنني حقاً لدي هواية غريبة جدا
وهي ان اتغزل في وطني
وجماله
ونيله
وسحبه وأمطاره
ربما هذه التشبيهات يحسبها بعضهم غريبة نوعا ما
لكنك تصل الى قمة المتعة حقيقة عندما تصل الى تشبيه يجمع مابين الحب والطبيعة
الصفاء والنقاء
الإنسانية والرومانسية
كتبت قبل فترة موضوعا نشر في صحيفة عكاظ السعودية
انزلوه بنفس العنوان
وهو يسمى : اتركوا جبال التاكا لترضع السماء
قال لي أحد اصدقائي الذي يقرأ لي كثيرا عندما قرأ الموضوع قبل ان ارسله للنشر
قال : لو ان موضوعك هذا قرأته في رمضان
فلا محالة أنني سوف أفطر
لكن السؤال
يجب علينا أن نظر للمعنى البعيد
ولا اصدق قولاً من ان العارضات التايلنديات عندما يعرضن حذاء جديد للجمهور فلا يلبسن سوى الحذاء
ولكن الشيء الذي يحيرني جدا
أن الجمهور الذي يشاهد العرض
يركز على الحذاء فقط
|
Post: #15
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: banadieha
Date: 11-03-2002, 06:35 AM
أب حراز..وقت الحوبة تلبد ويتضارى وراك الزول ذاتوو
وقت الموجة تتلبوا علينا الاتنين؟ شرفتوا والله
بس لا سياسة ولا حاجة
ولا شديدة ولا حاجة
لكن
يا أب حراز
حلم الجعان عيش
|
Post: #16
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: al_msaa
Date: 11-03-2002, 09:38 AM
والله رائع انت يا ابو حراز دائما
ايه المقالب بتاعتك دى ،،
انشاء الله يقلبوها عليك ناس الدورية
والله انا مفتكرك كشوك ، انت لسه حاييم بى جاى
قرشو دا ياجماعة صحى طارئ العرس ، ورونا الحاصل شنو يا ابو حراز
|
Post: #17
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-03-2002, 12:34 PM
Parent: #16
الرائع بناديها
مالابد ولا حاجة
من يوم تحادثنا مع بعض
بعديها نزلت بوست يا رجال هووووووووي
وللا دا ماعاوز تتحاوم عندو
امشي اقراهو
شوف كيف التعامل بيتم مع المرأة
كلكم دايشين ساكت
مكتبة ومطعم والسوبر ماركت والكورة وهلمجرا
اقعدوا معاهن شوية ياناس
امنحوهن الحنان والرقة
قولوا لهن اعذب الكلام
المساء
اها رايك شنو في الأسلوب الرائع دا
لاحظت الجماعة كتير منهم فتحو قروا البوست وانسحبوا
رد مافي يعني
اها تاني بشتغلكم نيل وجبال بس
|
Post: #18
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: zahjana
Date: 11-03-2002, 12:54 PM
Parent: #17
قبلة شنو ياابوحراز ....ابوحراز ده اكون جنه ولا شنو معقوله ياخي ....
|
Post: #19
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-03-2002, 02:29 PM
Parent: #18
زهجانة
طيب دي بسموها شنو في لغة الأدب
لغة الجفرافيا دي خليناها نهائي
اها طيب ممكن نقول ان الأبيض يعانق الأزرق في المقرن
او ممكن نسميها ومضة اللقاء
او فرحة اللقاء
او نيلان يتعانقان
|
Post: #20
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: garjah
Date: 11-03-2002, 03:17 PM
Parent: #19
قبلة شنو يا حروزة
الجماعة ديل شغلانتم مستمرة ليها الوف السنين
وجابو منها اولاد وبنات
تقول لي قبلة
لكن يا ابوحسين
قطعتنا من الضحك
قلت جضوم ابحراز مشرورة شرموط في البلكونة
يهووووووووووووووووووووووووووووويا
|
Post: #21
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-03-2002, 05:05 PM
Parent: #20
اعرف ياسيدي
ان لهما من الأبناء
السوباط
وعطبرة
والدندر
والرهد
والقاش هذا الذي يعانق كسلا في كل يوم
ولكنهما يحبان بعض
ويحكيان عن طبيعة اهل السودان
يتخاصمون
يتقاتلون
لكنهم يتحابون
ويتسامحون
ما اروع النيل في بلادي
وما اروعهما وهما يقبلان بعضهما منذ آلاف السنين
|
Post: #22
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: garjah
Date: 11-03-2002, 05:37 PM
Parent: #21
الله يعرس ليك ياحروزة
حتى تتوقف عن استعمال مفردات العناق والقبل
وتتحدث عن قفة الخدار
والبامبرز
|
Post: #23
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: yasiko
Date: 11-04-2002, 01:36 AM
Parent: #22
سلام ابوحراز
مقرن النيلين كيلو كام
الحبايب لفتوا الخلايق
بيني وبينهم قطعوا العلايق
ماهو عارف
ماهو عارف قدمه المفارق
يا محط آمالي السلام
في سموم الصيف لاح له بارق
لم يزل يرتاد المشارق
كان مع الأحباب نجمه شارق
ماله والأفلاك في الظلام
يا دهر أهوالك تسارق
منها كم كم شابت مفارق
ما علينا الفات كله فارق
رقنا وله نعيد الملام
من حطامك أنا غصني وارق
في شن أبقيت للطوارق
غير قليبا في همومه غارق
ولسانا برده الكلام
ويح قلبي الما انفك خافق
فارق ام درمان باكي شافق
يا أم قبايل ما فيك منافق
سقي أرضك صوب الغمام
يا بلادي كم فيك حاذق
غير الهك ما أم رازق
من شعاره دخول المأزق
يتفاني وشرفك تمام
مسرح الغزلان في الحدايق
والشوارع الغر والمضايق
قول لي كيف أمسيت دمت رايق
دام بهاك مشمول بالنظان
مجلس اللذات في النمارق
والترف لا زال وصفه خارق
ضاري حسك فاح جانا مارق
وله قاطعو الريح ما هو لام
في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الامام
أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام
أين مني الفي زهوه باسق
في شبابه نقي من مفاسق
بين ثيابه البيض المناسق
حولك اشبه رتل الحمام
يا بريد الجو فوقي حالق
ميل علي الروح ليها خالق
عدت سالم قول وأنت عالق
مقرن النيلين كيلو كام
الحبايب لفتوا الخلايق
بيني وبينهم قطعوا العلايق
ان دلال ان تيه كله لا يق
نحن ما مجينا الخصام
يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام
من فتيح للخور للمغالق
من علايل ابروف للمزالق
قدله يا مولاي خافي حالق
بالطريق الشاقه الترام
ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام
فرح
|
Post: #25
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-04-2002, 06:00 AM
Parent: #23
ياسيكو
لك التحية ايها الرائع وأنت تتحفنا بهذه الأغنية الجميلة
لقد تعمقت في وجداني وشممت فيها رائحة السودان
وعانقت بساطة أهله وأنا استمع اليها
انها تحمل كلمات رائعة رائعة
|
Post: #24
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 11-04-2002, 05:58 AM
Parent: #22
قرجة
قال قفة خدار قال
مكبرنا عليها مالك ياخي
نحن لسه صغار
بعدين بمبرز بتاع شنو عند ناس أهل العوض
قال بمبرز قال
بعدين تعال هنا
كلما أكتب لي بوست انشاء الله حتى عن السكة حديد
تجي تقول لي عرس عرس امشي اتزوج
هو الشغلانية دي بتخلي الواحد بعدين يسكت ساكت وللا شنو ؟؟
|
Post: #26
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: شرير والبرتقاله
Date: 03-03-2003, 02:07 PM
Parent: #24
مجرد احتفاء
ببوستات
قديمة
لها طعم
الفواكه
الاستوائية
وكل سنةوانتم بالف خير
|
Post: #27
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ELTOM
Date: 03-03-2003, 08:18 PM
Parent: #1
أبو مهيار،هذه أروع اضافه. ومافي لزوم للتوضيح. يقال أن المناضل العظيم عبد الرحمن الوسيلة تهكم على مقاطع الهايكو اليابانية التي أدخلها الشاعر الكبير صلاح أحمد ابرهيم في احدي دواوينه. كتب صلاح هذا المقطع
النيل وخيرات الأرض هنالك
ومع ذلك ومع ذلك.
علق صلاح قائلا:إنه برنامج حزبك يا عبدالرحمن
التوم
|
Post: #28
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: almohndis
Date: 03-03-2003, 09:32 PM
Parent: #27
اخى
ابوحراز
النيل الازرق عينو قويه
وماخائف والله لا بوليس
ولا حرس الصيد زاتو مابفكو
اخنونا yasnako
وجعت رقبتى
الله العافية
|
Post: #29
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 03-04-2003, 06:08 AM
Parent: #28
التوم
المهندس
لكم التحية
القبلة دي كانت غاتسة في أعماق البورد
الجابكم شنو تنكتوها هسي
فعلاً النيل الأزرق قوي جداً
والنيل البيض رومانسي
وكلاهما يعشق الآخر
انها قصة حب من نوع خاص
وطعم خاص ونكهة خاصة تحمل كل انفاس السودان والسودانيين
|
Post: #30
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: Ahmed satoor
Date: 03-04-2003, 06:26 AM
Parent: #1
عنوان ذكى ومثير للفضول يا ابو حراز
|
Post: #31
Title: Re: يقبلان بعضهما في المقرن على مرأى من شرطة النظام العام والشرطة تـتـفرج
Author: ابوحراز
Date: 03-04-2003, 11:45 AM
Parent: #30
Ahmed satoor
لك التحية
هذه العنوانين الرائعة والذكية كان يستعملها عمر الحاج موسى دائماً في كلماته
فيجعل منها نكهة خاصة ومميزة
تعجبني المدن التي تقبّل الأنهار وتجلس على أحضانها
يعجبني ذلك العشق الطويل مابين مدني والأزرق
والحصاحيصا هذه المدينة التي تعجبني كثيراً
كلما أأتي إليها أجدها تكاد تسقط على النهر
الأنهار في وطني عندما تغضب
فإن الغيرة تتملكها
لهذا تزأر وتثور
ولكنها عندما تأخذ قبلتها تعود أدراجها مرة أخرى
بل وتصوم عن الفيضان والهيجان
انها لغة مابين المحبين
لانستطيع ان نعرف سرها
|
|