لماذا يقتصر شهر العسل على ايام الزواج وبس ؟؟

بعد شوية واحد من المتزوجين حايمد لي لسانو الطويل
ويقول لي :
كدي انت أول شيء لم لينا في العسل الياباني
قبل نشوف العسل التايواني
انا صاح لا هذا ولا ذاك
لا النوبة ولا الذكر
لا الباذنجان ولا الأسود
لكن عاوز انصحكم بأن تعطوا زوجاتكم هذا الحق
واوجه حديثي للعموم ولكن للمغتربين بصفة خاصة
فعندما تذهبون في اجازة
ارجو ان لاتنشغلوا بالضرائب وترعة كنانة والرهد وسباق الخيل وشارع 61
اجلسوا قليلاً معهن
ابتسموا لهن
ولابد أن تأخذوهن الى شهر عسل جديد
ليس من أجل انجاب أطفال جدد
بل من أجل دماء زوجية جديدة
وروح جديدة 00 ورحيق جديد وحياة متجددة دائماً
اذهبوا معهن لنفس الفندق الذي امضيتم معهن فيه لحظات السعادة الأولى
اشعروهن أحبتي بأنهن مازالن بحلاوتهن ورشاقتهن وجمالهن والقهن
فالسعادة في نظري يجب الا تنتهي بعد خلع فستان الزفاف
ومن لديه دستة أطفال
فاليترك ستة عند أمه والبقية عند أمها
أعيدوا لهن الحياة بطعمها الرائع
عوضوهن عن سنوات الحرمان
وأعطوهن زهرات مطعمة بالحب والأمل
وفوق هذا وذاك البسوهن الأبيض من جديد
لتكون حياتك بيضاء وسعيدة وبلا أحزان
فعندما يكون الحب كبيراً والحبيبة قمراً
فلن يكون الحب حزمة قش تأكلها النيران

شكرا على النصيحة
نصيحة إعلانية
بعدين مين قال إن كل الناس شهر عسلها ينتهي بانتهاء مراسم الدفن
شخصيا أحسب ان هذا الكلام لا يعنيني
لأننا (رئيس الميز وأنا) مازلنا بحمد الله في عسل مستمر
والله يديم العسل
وهاك العسل دا يا أبا حراز

,معليش يا أب حراز
يبدو إني شبيت ليك في حلقك
فعلا يجب أن لا تقتصرالأيام السعيدة في الحياة الزوجية على بدايتها
ومن أسباب استمرار هذه الأيام السعيدة قدرة الزوجين على التغلب على اختلافاتهما الطبيعية حيث أن كلا منهما آت من بيئة مختلفة
مجمتع أنثوي ومجتمع ذكوري
وقدرتهما على التغلب على الخلافات بين الأسرتين ، إن وجدت
وقدرتهما على التغلب على العنصر المادي الذي هو ضروري لاستمرار الحب والحياة السعيدة
وفوق ذاك
قدرتهما على التجديد وجعل الحياة حياة جادة سقياها رومانسية الحب

ضحكتني يا أهل العوض
اننشاء الله بتكون بتسوي في النصائح دي
ماتكون العملية كلها كلام جرايد
التجديد مهم جداً

زلة لسان..وزلة قدم تشرط الجينز الأصلي يا أب حراز
إنت قلت وبدون لماذا: يقتصر شهر العسل على أيام الزواج بس
قصدك
من يوم الدخلة
ليوم المرقة ولا شنو؟ وأن أيام العمر كلها شهر عسل؟

بناديها
الله يجازيك
انا اقصد طبعاً الثلاثة ايام المعروفة
الا يقولوا ليكم فنادق السوق العربي

أنا بوافقك الرأي يا أبو حراز اننا نحن السودانيين رجال أو نساء ناس ما رومانسيين أبدا ... يعني يمكن الجيل الجديد اللي هو نحن أحسن شوية من ناس زمان اللي هم انتوا ... لكن السبب في كده ما بيرجع لي اننا نحن رائعين بالفطرة .. بل بالعكس جيلنا ده متعمق جدا .. لكن عارفو متعمق في شنو ؟؟
جيلنا متعمق في السطحية يا أبو حراز
looooooool
و يمكن ده السبب اللي بيخليهم رومانسيين شوية .. كل واحد فينا حايم بي ذاكرة بتاعة فيلم تايتانيك و عاوز يطبقها في حبيبتو
عارف أنا بتضايق جدا لما زول ينهر زوجتو أو يمشي معاها في السوق و يخليها جارية وراهو و ما يستناها .. أو يفتح الباب و يدخل قبليها في حاجة في الدنيا دي اسمها
Ladies first ..
و بعدين في مشكلة كبيرة جدا من ناحية النسوان ذاتهم .. الواحدة السودانية تتزوجها بي جاي .. بعد شهرين تعمل ليك فيها عجزت و تبطل المكياج و الكوفير و تبقي شينة فجأة .. فالراجل بيتصدم .. لكن بيقوم بيرد ليها الصدمة في تغيير معاملتو معاها
طبعا كلامي كتير و ما مفهوم ..و الله انا ذاتي ما فاهمو .. لكن انا الليلة حلفت طلاق اني أرد علي موضوعك ده .. أقصد حلفت يمين .. لأني طبعا ما اتزوجت عشان أطلق
لكن يا أبو حراز لسه في أمل فينا .. طالعين رومانسيين شديد .. و بنات جيلنا بيحبوا المكياج و الكوفير و الهدوم و الموبايلات .. يعني ما حتكون في أي مشاكل و حتكون حياتنا شهر عسل دائم ..
أسمح لي عشان ما أطول عليك أكتر من كده .. اني أدعوك لي حفل زفافي بعد عشرة سنوات .. تكون الدنيا الزمن داك اتصلحت .. و السودان تكون بقت فيهو ديموقراطية و رجال رومانسيين و نسوان بيتمكيجوا و يتكوفروا ..
لأنو لو جات الديموقراطية ما حتكون في أي مشكلة و الناس حينتبهوا لي المسائل دي .. و لو جينا للجد الغلط ما غلطهم .. الغلط غلط الظروف
الله يلعن الظروف اللي غيرت الشعب السوداني قدر ده
أنا طبعا طولت عليك ... و حتكون كرهتني .. لكن أنا زي ما قلت ليك حالف يمين أرد عليك .. عارف ليه لأنك زول رائع و مواضيعك جميلة
محمد

Modic
لك التحية ايها الرائع على هذا الطرح الجميل
ولكن بالرغم من اعجابي بما كتبت
الا ان هناك كلمة توقفت عندها كثيرا

قال اتكوفروا قال
تعرف دي عندنا في اهل العوض
معناها انو الواحدة تكون أكلت ليها شعيرية بايتة وعمت ليها كوفارة

بحب اضحك طبعا
ياسيدي وكال تقول كلمتك الظريفة
Ladies first ..
المراة فعلاً تحتاج الى كف صديق
تحتاج لقارورة عطر
تحتاج لكلمة حب
وتحتاج لوردة
وتحتاج لقبلة 00 لكن بعد الزواج
وليس كما نرى في جيلكم الحالي
من طرف يقنعها وتذهب معه ويذهب معها
نحن ياسيدي كنا نسهر الليالي من أجل ان نراها لمدة ثانية واحدة
من أجل أن نعطيها رسالة
أو نسمعها أغنية
ولكن جاء جيل النعجة دولي والموبايل والستالايتوالاسنكرس
لتتحول الحياة عما كانت عليه
ولكنهم رغم ذلك اعترف لك بأنهم رومانسيون
وهم يفوفوق رومانسية كينيت وينسليت في تايتانيك
لك التحية
ولجيلي وجيلك اتمنى أن نعطي زهرة حب لكل من نحب

أبو حراز أنا عرفت معني الكلمة في نفس اليوم بالصدفة .. قلت أرجع أصلحها لكن الانترنت كان مقطوع
يتكوفروا قال

مودك

موضوعك رووووووووعة يا ابو حراز
و لفتة جد مهمة
كفاية قسوة الحياة كمان نحنا
و بالكلمة الطيبة يحيا الانسان
ولاشهر عسل جديد
ممكن كلة بحبك
و لا كباية شاي تعملها انت يا ابو حراز و تنادي المدام في الحوش الورا تعمل تغيير
بس ممكن اديك تفسير شوية للسبب الاحنا فيه
اعد سماع اغنية عم عبدالرحيم
و برضو نحاول

ابوحراز دقيقة ارد على مودك دا سطرين بس من بوستك
مودك انت ضربت فيني حتة مقلب انا قلت قايلاك راجل فاهم ... طلعت الفهم ذاتو و زيادة كمان عليه راقي معقولة بس الله يحفظك
بس حكاية على الطلاق دي حلللللللللللللوة معاك و دايرة ليها جلابية
و القميص دا لفو للقال دايرو
لا على الطلاق تلفو

عــــــــــــــزة الرائعة

كبرتي رأسي شديد كده .. لكن عارفة أنا فعلا بتضايق من اغفال الرجال السودانيين لمسألة التعامل الراقي مع المرأة ... و من اغفال المرأة السودانية لأنوثتها
أما بالنسبة للقميص : فهو مسكين قاعد في الدولاب ليهو شهر .. فجأة بقيت أكرهو ما بلبسو .. تماما كما يفعل الرجال السودانيين مع زوجاتهم .. لكن مع اختلاف بسيط :
ده قميص لا بيحس لا بيتكلم و لا محتاج حب
لكن ديك انسانة بتحس و بتحتاج حب و تملق في بعض الأحيان عشان تحس بانوثتها
لكن مادام حلفتي طلاق .. استنيني أطلع ألبس جلابية و أجي راجع أقول ليك : علي بالطلاق ألفو .. علي الطلاق ما أكسر طلاقك
و تسلمي يا رائعة

صاحبك محمد .. أو مودك .. أو كما تحبي ما مشكلة

ما ممكن الموضوع ده ما يكون هامي أي زول غيرنا

Up ..

عندنا كم أبو حراز نحن في الدنيا دي

azza
نحن محتاجون فعلاً الى ان نملص التوب الذي نلبسه الآن
اعني الثوب المليء بالعقد والغرور
يجب ان نقول لها كلمات من الحب والعشق
يجب ان نحملها في حدقات عيوننا
وان نغني لها كل اغاني اللقاء الأول
المرأة عندنا في السودان بسيطة جداً
لاتطمح الى عمارة من ثلاثة طوابق
او سيارة لكزس
تحتاج فقط لكلمة حب
ولمزيد من الدفء
تحتاج الى زوج وصديق وأخ

الحياة ياعازة تحتاج للكثير من التجديد
والكثير من الدماء
أعرف جيداً أن كلمة أحبك عندما تقولها لزوجتك
فهي كافية على ان تغير حتى من فصيلة دمها
اذن فلنعلن العام الجديد
عاماً للحب والسلام

الرائع دوما ابوحراز
موضوعك ذكرني الهند
وهي اقوي مثال للرومانسية في العالم
في الهند الزوجة لا تشعر انوا عندها خمسةاولاد وهي جالسة في مقهي مع زوجها لوحدهم وتعال شوف الريدة وتتعرف عليهم تلاقي عندها خمسة.
غير انو مش الوردة اللي انت تديها ليها في يدها عندهم وردة يضعها الزوج في راسها وعندما يضعها تشعر الزوجة بقمة الراحة النفسية
ولو شفتهم بس راكبين في اي وسيلة مواصلات تموت من الرومانسية لانها موجودة طول اليوم معاهم
داعندهم يوم في الاسبوع مخصص لها ويوم مخصص للاسرة كلها
حتي الاطفال لما يشوفوا الاهتمام بامهم
يزدادوا حب لوالدهم وامهم ويحوالوا يعطوا جزء من رومانسية والدهم
دا غير حبهم لبعض كاخوان
واديك مثال واحد اخونا اسلامي ملتزم لدرجة مبالغ فيها
قال لي لو مشيت السودان وتزوجت لاخذت زوجتي في موتر والف بيها داخل الحوش
وانا قلت ليهوا الكلام في الرومانسية نفسها بينهم مش جلسة الموتر
والله يا جماعة لما مشينا عشنا مع الناس ديك الواحد شعر كانوا قلبوا ما فيهوا رحمة من كثرة الاهتمام بالانسان
انا عندي جارتي مسيحية والله تعاملني كاني ابنهاوتسالني من امي وتطلب مني اتصل عليها
مرات الواحد يموت من الالم ويقول الله يخلي اهلنا الطيبين ما تجي حنيتهم الا ونحن في مرض ولا مسافرين
ومعليش علي الاطالة

الأخ مهاجر
يكفي فقط ان نذكر تاج محل
فقد أختير من بين أجمل 7 حضارات تدخ فيها الإنسان وتفتقت عنها عبقريته
واختير تاج محل ثاني مبنى حضاري في العالم
حيث جاء سور الصين في المركز الأول
ثم تاج محل
ثم الاهرامات
فأوبرا سيدني
ثم قناة بنما
وتاج محل فعلا رمزاً للحب وتقدير المرأة في الهند
وقد سمعت أن ممتاز محل قد تم اعتقاله وسجنه ولكنه اشترط عليهم ان يتركوا له فتحة في زنزاته ليطل منها على تاج محل
وحققوا له رغبته

يا ابو حراز .. ياخي هي بي موية وينها؟ الله يلمنا في الثلاثة أيام المزعلاك دي

يا ابو حراز ؟؟ يا خي و الله بمواضيعك دي ذكرتني واحد كنت بعرفو زمممممممان .. سنة صفر هجرية .. الراجل ده مصيبة زيك كده و من قرية او مدينة اسمها بت ربيعة أو ود ربيعة ريفي المدينة عرب أو المناقل .. شفت الأو أو دي؟ المهم الرجل ده ما كان عندو كضوم زيك كده .. لكن ما بعيد يكون انت زاتك .. فسبحان مكضم الاحوال

قال شنتير قال
اها لاقيتو وين الراجل البشبهني دا
لأنو عندي اصحابي كتير في القرية دي
جايز يا ربي أكون دا انا
تعرف سافرت ليها أكتر من 10 مرات
احتمال أكون لاقيت خلقتك دي هناك
بعدين عندي صاحبي هنا في السعودية اسمو يوسف شنتير
لك أكيد دا ماهو
داك زول غنم ساااااااااكت
سارح في البر
ومرات لمن الأمور تدبرس معاي
بمشي اتونس معاهو شوية
الراجل عندو طبعاً جنس مصائب
خليها بس
وكمان طبعاً عزابي ياباني أصلي
يعني دا مابشوف لي مرأة نهائي
أخير نحن منو بألف مرة

بعدين حكاية التلاتة يوم دي مجننة ابوحراز براهو
ياخي دي مجننة البورد دا كلو
ابوحراز
وابو الزفت
وابومهيار
وابو القدح
طبعاً الجن اللطيف برضو راكب معانا في الموجة دي

قال ودربيعة قال

يوسف شنتير؟؟؟؟؟؟؟ الدرب دخل الطين. بالله عليك الله سلم لي عليه شديد و قول ليه شنتير الاكبر مشتاق ليك و لحكاويك .. و كلمو برضو يلاقيني شهر تلاتة السنة دي في أم كنيش. ما تنسى بالله إسم أم كنيش دي و تقوم تقلبها دوكة او ريكة

اها يا سيدي الزول البشبهك ده من ام ربيعة .. و أنا لاقيتو في خشم القربة .. زول ضلو ميت و كلامو بااارد لكن اي كلمة يقولها عبارة عن نكتة أو سخرية مررررة .. و على ما اذكر كان اسمو أيوب او حاجة زي دي .. حاجة زي يعني تكون شنو؟ حبوب، هبوب، عقروب .. اي حاجة تشبه أيوب

قال تلاتة ايام قال .. هو بالتيمم الله يلمك و يلمنا فيه

Abu Haraz:
I found this funny in Sudan.net

____________________________________________________________

Author ركن المحبطين والمحبطات من المتزوجين والمتزوجات
MahasAmerica
Oshi Tehraga
MahasAmerica
Oshi Tehraga

هذا الركن سيكون واحة ومنفذ للمحبطين فقط وهم اكثر من الهم على القلب.
وبما اننا ديمقراطيون اكثر من الديمقراطيين، فقد انضمت معى السيدة الحديدية، والفضلى، سيدة السودان الاولى، إحم...إحم.. اقصد الولية، فى هذا الركن...
وقد اصدرنا مرسوما باعتقال كل من يدعى بانه زوج سعيد او زوجة سعيدة تحت المادة المستحيلة من اين لكم السعادة ونحن زيتنا طالع...
كما تم حظر التجول يوميا من اية ساعة لكل ساعة. ويمنع منعا باتا دخول الصعاليك من العزابة والعزابيات السعداء لهذا الركن خشية انتقال العدوى..
ويراعى فى الاعضاء درجة عالية من الاحباط المشوب برغبة فى العودة الى بيت العزابة ومن ثم ترداد مقولة لا يلدغ المرء من جحر مرتين..
كما يمنع منعا باتا اصطحاب الاطفال وعلى العضو التظاهر بانه ما زال يفتش فى بت او ابن الحلال لاضفاء جو من الرومانسية على الركن..
يمكن للاعضاء قيام الليل والتهجد واقتناء سبح اللالوبة والتضرع لانقاذ ما تبقى من الصلعة الحلزونية والجلحة الجهنمية والقبضة الحديدية...
عنهم المناضلان محس اميريكا وشايقية كلفورنيا

AbuAla
قال ركن المحبطين قال
والله تعرف نحن بعد دا كدا الا يودونا ركن الأطفال

شنتير
تعرف الزول الضلو ميت دا ولاقيتو في خشم القربة دي
أكيد دا انا
لكن زمان ما كنت بتتكلم كدا
كان كلامي شوية
الا بيني وبينك دخلنا مرحلة الخرف

ودربيعة قرية وادعة ورائعة جداً وأهلها طيبون
ولها ابناء في شتى بقاع العالم
يحبون بعمق ويتألمون بعمق ايضاً
منها رجال لايصدأوون
ومنها نساء اروع ما رايت في الجمال
اذا صادقت احدهم
فإنك لامحالة ستقطع حبل مشيمتك عندهم
انهم رائعون بكل معنى الكلمة

لا قطع شك اياه انت تب .. و كمان بعد ما ذكرت لي ابوحراز .. و زياراتك للشيخ يوسف اب شرا يوم الجمعة بكون برضو شفتك هناك .. انا كنت بجي استمع للمداح .. ناس حمد و بلة المن الكمر و مجموعة اخرى .. و ناس كرداس و التاية و عبدللا

ياخي ما تنسى يوسف شنتير

قال شنتير قال

شنتير
الله يجازيك
انت برضو كنت بتجي للبنية بتاعت الشيخ وبتحضر المديح ؟؟
انا بي صراحة بجي لي حاجة تانية خالص
قال مديح قال

اها انا عندي حادثة مشهورة
حصلت لمن كان ناس بلة وحمد بمدحوا
لمن انا خطفت الصحن الفيهو القروش بتاعت المديح وقمت جاري بيهو
تتذكر الحادثة دي 00 ناس ابو حراز كلهم عارفنها

أبو حـــراز

كل سنه وإنت طيب


أسأل نفسك بينك وبينها....و...العارف لا يعـــرف

شفت يا ابو حراز يومك الخطفت الصحن داك نحن كان مشينا بنية الشيخ عبد الرحيم .. و بعد ما جينا راجعين لقينا باقي غبار السرقة قاعد .. اما انك بتاع صحانة .. يعني دي الحاجة التانية القاعد تمشي عشانها للشيخ يوسف؟
قال حاجة تانية قال

نايل
العدد متين حايصدر عشان ارسل ليك الموضوع
عارفك قاصدني
وزي ماوعدتك انا من اللحظة دي بوجه نداء محبة لكل اخواني واخواتي في سودانيز اونلاين بالكتابة في منتدى النيل
لك التحية وكل عام وانت بخير

شنتير
اذن اتفقنا يبدو انك من ناس ابوحراز
بالله عاوز اسألك من عمو نقد العميد وين الراجل الحبوب دا
كمان لو بتعرف حيدر بتاع وقاية النباتات ادينا خبر عنه
بس معديها لينا مديح ساااااااكت
خلينا نستفيد منك

قال صحن قال

يعني يا ابوحراز أنا لو من ابو حراز الجابني لصاحبك يوسف شنتير شنو؟ أنا بجيب ليك أخبار كتاكيت ود أب آمنة .. و حيدر بتاع نباتات مش كتاكيت عشان كده ما بعرفو
بالله انت دفعة محمد الكبير الكتبي؟ لا كان كده ما خاطي لو خرفت. نوديك مركز صحي عكاشة .. عملوا فيه قسم للعجزة و المسنين .. و الكهولة المشردة
قال الكتبي قال

قال شنتير قال
الكتبي قدامنا بي عشرة سنوات
لكن صديق شخصي
احتمال يكون نساني
لأنو قابلتو في حفل التخريج
وهو الذي قام بتقديم الحفل
انا صغير لسه ياشنتير
وطبعاً لسه عاوز اكمل قرايتي

غايتو
ود ربيعة دي نحن عندنا فيها عضام
ولحم
ودم

بلد ضيقة يا شنتير واب حراز

اهل العوض
قال عضام قال
خلاص ماتقرشوهن لينا كلهن
ادونا عضة معاكم
يعني طلعنا اصدقاء وقرايب ماشاء الله
انها قرية تحمل معاني خاصة وعبقاً خاصا
وعندما تسير على ارضها كأنك تضع قدميك على التاريخ
ولنا عودة

شهر العسل تلك الفترة الزمنية الحلوة في حياة كل عروسين ، سميت كذلك لحلاوتها ولما كان الحلو ما بيكمل كما يقولون كان لابد من أن تكون الفترة محدودة أو محددة لذلك إقترنت بشهر زمان لا أكثر ، فكان بالإمكان أن تكون التسمية بعام العسل تماماً مثل عام الرمادة في الجاهلية أو حتى العسل اللانهائي وأحسب أن الذين يكرهون الحلو ويفضلون أم فت فت وأخواتها لن تفرق معهم المسألة كثيراً وأيضاً أولئك الذين لديهم تسوس في أحد الأسنان أو المصابون بداء السكري شفاهم الله جميعاً .
الحياة الزوجية تتعرض شأنها شأن أي علاقة أخرى إلى فترات فتور وبرود ولا مبالاة وإذا لم يحاول كل طرف إسعاف العلاقة الزوجية فإن النفوس ستبتعد عن بعضها ويعم القلق والتوتر بين الأزواج
وعادة ما نتذكر أيام الزواج الأولى – عدا أبو حراز والذي أصبح أشهر عازب فوق الخمسين - تلك الأيام التي كان كل واحد منا يحاول التقرب أكثر فأكثر من الثاني والتي كنا نتحدث خلالها عن كل كبيرة وصغيرة تخصنا... سوف تظل هذه الأيام راسخة في الذاكرة وكأنها حلم فنتحدث عنها وكلنا حسرة وأمل في أن نعاودها... ونظل نحاول لكن الأيام ومشاكل الحياة تقف ضدنا فنستسلم للروتين وتصاب حياتنا الزوجية بالفتور... وتصبح اصابع الاتهام موجهة نحو كل طرف، هذا يتهم ذاك وينتهي الأمر بأن يتوارى كل واحد بمفرده في زاوية خياله وأحلامه ومشاكله... فتزداد الفجوة وتبعد أكثر فأكثر المسافات.و المتأمل في أسباب فتور الحياة الزوجية يجد أن تراكم بعض الأمور التافهة البسيطة جعل المشكلة تتفاقم
لذلك كان لابد من التغيير والقفز فوق حواجز الروتين والرتابة وبإعتبار أن أحد أهم ملامح الكون والحياة هو حالة التغيير والتبدل والتكامل أحياناً التي تتشكل في عملية الحركة الدائبة والمستمرة، فكل شيء يتحرك ليتحول إلى شيء جديد بعد أن تتفاعل مجموعة العناصر المختلفة في أجواء وظروف متعددة لتخلق وجوداً آخر لم يكن من قبل، وقد قال الفلاسفة قديماً: إن التغير قانون الوجود وإن الاستقرار موت وعدم، ومثلوا لفكرة التغير بجريان الماء فأنت لا تنزل النهر الواحد مرتين فإن مياهاً جديدة تجري من حولك.
التغيير قد يكون في أشياء جداً بسيطة إلا أنه ينبغي أن ندرك أن السطحية في إدراك عملية التغيير قد يحولها إلى إنتكاسة تحمل معها الكثير من السلبيات فتصبح تخلفاً. نحن فعلاً في حاجة إلى مزيدا من التجديد والتغيير حتى يكون العسل مستمراً ، ورغم كل هذا أخي أبو حراز أتأمرون الناس بالبر وتنسون أنفسكم ، وطبعاً البر بالكسر هنا وبرضو دي العملة الرسمية لجارتنا إثيوبيا

اها الموضوع دا وقف ويين ما تطلعوا لينا بنتيجة و ملخص
دايرين حل

شكرا يا شباب
لكن
كل ما اقرا كلامكم
بتاكد انو رايى فى موضوع العرس بصورة عامة
( داير اقرا)

لانو بصراحة اليوم 24 ساعة فقط
والعمل داير 30 ساعة بالضبط
وبصعوبة بنطلع ساعات للنوم
وما فى اى طريقة لزوجة او خلافه
كان عرسنا واديناها شهر العسل كفاية
لكن طوالى ما فى طريقة

الملا عمر
عزة
ود الحلفاية
لكم التحية على المشاركة
الملا عمر
كلامك رائع جداً
ويبدو لي أن لك خبرة وباع طويل في التعامل مع الجنس اللطيف
ولكن مع اقرب الأقربين الى قلبك
زوجتك ورفيقة دربك
شتان مابين الملا عمر والملا عمر
ارى فيك شفافية متفردة
وياليت كل الأزواج يستمرون في العسل بعد خلع فستان الزفاف

عزة
النتيجة ياسيدتي ان نعطي جزءاً كبيراً من وقتنا لمن نحب
ان نجعلها دائماً فراشة تحلق في داخلنا
ان نشعرها بأنها في ثوب الزفاف دائماً
وان نعطيها المزيد من الرحيق

ود الحلفاية
مافي ليك مفر
فالزواج لابد منه
واعلم ياسيدي عندما تدخل هذه الحياة كما قال اصحاب الخبرة
ستشعر حينها ان كل وقتك يجب ان يكون اليها
ولتعلم ان سيدي ان شهر العسل الذي ستمضيه
سيكون امتداداً لشهور أخرى
لدي صديق في الحلفاية
ذهب الى شهر العسل
وحجز اسبوع في الفندق
ولكنه غرق
لم يغرق في جزيرة توتي
بل غرق في العسل ومكث بالفندق 45 يوم

قال حلفاية قال

أب حراز
كلام ظريييف
لاكين ما جاوبت على سؤالنا
أو بالأحرى (كما يقول أيوب صديق) سؤالك أنت لنفسك
متى يبدأ شهر العسل
الفي عمرك بقوا رؤساء دول وعدلوا ليهم الدساتير
أها - يعني الواحد لازم يبلسا فستان أبيض؟
ولا ممكن بـ ناكل مما نصنع

اهل العوض
تصدق أخي الأصغر لحس العسل قبل خمس سنوات
وانا الذي قمت بكل شيء
الشنطة والملابس والرييييييييييييييحة
وأجرة الفنان
والساوند
وحتى القعدة بتاعت الحناء
بس هو شاطر في حاجة واحدة بس
طبق المدام وفات بيها
وصاحبك دا معديها كلها غربة × غربة
عشان كدا انا لو مسكت في شهر العسل دا
والله ربنا يستر
ما أظن البورد دا أطل عليهو تاني

يا ابو حراز


صنيت كده .. انا قايلك في شهر العسل حسع

تاريك لسه بتزازي

tmbis
قال تمبس قال
اول شيء البت الفي الصورة دي مشت شهر العسل وللا لسه
تعرف ابوحراز مازال يتحاوم معاكم
كل يوم اقول الواحد ينقلع منكم ويشوف مصالحو في العسل العمل لينا هلاويس دا
لكن اوعدك اول ما يتحقق ذلك فإنني سأخبركم بكل ماحدث في العسل

أب حراز
أرجو ألا ندعو عليك بألا تضوق العسل
حتى لا نحرم من مشاركاتك المتميزة
عموما إن طعم العرس حلو ولذيذ
فهو راحات وأقداح نبيذ
كما قال ود بادي

على فكرة ، دعني أشد على يدك وأعبر عن اعجابي بتجويدك في الكتابة
أخص في ذلك عنايتك الفائقة بالنحو والصرف
حياك الله وزادك علما ورفعة
وخفف قدمك نحو العرس