خربشة من ابوحراز لكل الزملاء الذين يستاؤون من عدم الرد على بوستاتهم

هناك قرية صينية قديمة تقع على ضفاف نهر اليانغستي
هذه القرية كانت لاتستفيد من هذا النهر
لان هناك جبل ضخم ومتغطرس كان يفصل مابين القرية والنهر
القرية تحب النهر بعمق 00 تريد ان تعانقه وأن تقبله وتراقصه وتتدفأ به وتريده ان يلتف حول خصرها وليكن مايكون !!!!
وكذلك النهر 00 يخالجه نفس هذا الشعور
لكنه لايستطيع ان ينط هذا الجبل
كما أن الجبل الأهوج كان لايريد لقصة الحب هذه ان تبدأ في وجوده
ولايريد لهذا الدفء ان يكتمل
فجأة قفز كهل عجوز ووقف بجوار الجبل
وبدأ بفأس صغيرة جداً في تحطيم هذا الجبل
هذا العجوز المسطول كان يريد أن يشق طريقاً في هذا الجبل الضخم
ولكن قبل ان يطرق الطرقة الثالثة وقف بجواره شاب من أمثال ابوحراز وأبو قزاز وأبو ساطور والمبتدئين على الطريق
فقال للكهل 00 ماذا تفعل ايها العجوز الأحمق
فقال له العجوز : اريد أن أحطم هذا الجبل لنذهب للنهر
قال الشاب : هل أنت مجنون ؟؟؟ أتريد ان تحطم جبلاً مثل هذا بفأس ؟؟
قال الشيخ : اعرف يا بني أن هذا الفاس لايمكنه ان يحطم هذا الجبل
ولكنني سأبدا اليوم بهذه الآلة المتواضعة
وستأتي الأجيال من بعدي لتواصل المشوار
وحتماً ستر تـقي الآلة يوماً ما وتدك هذا الجبل
وتعاقبت الأجيال وارتقـت الآلة
واستسلم الجبل واصبح من العلوج والطراطير
وفجاة وفي لحظة حميمية جداً
أعطت القرية شفتيها للنهر ليقبلها بعد حرمان شديد
ولكن النهر من هول المفاجأة ابتلع القرية بكاملها
إلا أنهم أعادوا بناءها من جديد
سردت هذه الواقعة التي تحكي عن العزيمة والإصرار والطموح
فقد شعرت أن زملائي الجدد عندما يدخلون البورد يستاؤون من عدم الرد عليهم
أكتبوا أحبتي كما تريدون فما زلنا مثلكم نتلمس الخطوات الأولى
وخربشوا بريشتكم كل مايخطر على بالكم
هنا نحن جميعاً نكتب لا لكي يردوا لنا ولا لكي يقرأووا لنا
بل نكتب من أجل أن نـتـنـفـس بعمق
ومن أجل أن نـهتـف
ومن أجل أن نسير ونحن حفاة الأقدام الى حيث يوجد تراب الوطن
أكتبوا عن أي شيء ولاتترددوا من مونيكا لوينسكي مرورا برزان الى ست النفر
ولاتنسوا ست الكسرة وبائع اللبن والزول البيصلح السراير
{ طبعاً ماتتصوروا انا محروق كيف على بتاع اللبن دا } ماتسألوا ليه ؟؟؟؟
نفسي أشتري لي حمار بيجي وألف في الخرطوم أتنين وابيع ليهم اللبن بعد الموظفين يمشوا الشغل 0
ياناس أكتبوا مايحلوا لكم
ستجدون من ينتقدكم
وستجدون من يقرأ لكم
وستجدون من يرد عليكم
وستجدون من يستخلص من كلماتكم عطره المفضل
وستجدون من تعجب بكم وتبادلكم الحب والتقدير
وستجدون من تحلف لكم أنها تحبكم بعمق وأنها لم تحب غيركم
لكنها تحب 26 واحد
ولكن قبل هذا وذاك
ستجدون هنا أخوة لكم
وستخرجون بصداقات رائعة
ولكن ليعلم الكثيرون منا
أننا مازلنا في روضة البورد
ولم ننهل سوى ربع قطرة من محيط العمالقة الذين به
ونحن نتمنى أن نكون تلاميذ لهم
ولكن 00 لنكتب 00 ونرسم 00 ونغني اغاني الفرح
وقبل هذا وذاك لنقف جميعا ثم ننحني للوطن

يديك العافية يابو حراز
والله انابستمتع بكتاباتك الي ان يغلبنى التعبير
ده كلام ذي الورد اكتبوا كتبنا...قريتوا ما قريتوا مامشكلتنا برضوا تاني كتبنا

ghurba
الله يجازيك
ضحكتني بالرد الحلو والممتع دا
شايف شعارك قلم
والقلم هو الذي يغازل الكتابة
هسي لو ختيت صورتك مش كان أحسن ليك من القلم دا
الصورة برضو عامل جذب
ولكن لو كانت شينة
والله لو كتبت عن صلاح إدريس مافي زول يشتغل بيك


قال ورد قال

ابو حراز
ده كلام عاد جنيت ولا عضاني كلب...
قال ختي صورتك بدل القلم ...اصلهم ناس فلان وفلان دايرين ليهم فرصة واخت الصورة سبب بلا سبب بقوا ناس سلام بلا غرض طيبين بلا مرض... واقوم افتح ليهم ينط ليك واحد تحرقوا الحكاية يقول ليك والله شينة ويطلع ليك من مافي قصة واهه يقوم ناس الاتحادات والتكتلات يقيفوا ليك معاه يازول انا مالي خليهم قروا قرو ما قروا الله يدينا البقراء لينا ويصحح لينا وياخوي بكرة لمن نحصل الكتابين والله كسير وسك وبلبصة تقيلة ..... هووووي يابو حراز ما تجرجرني خلاس خشمي ده وانا ستو...
قال صورة قال......

مرحب يا ابحراز
كلامك سمح ومعقول ويستاهل ضبيحة .... بس خايف عليك من موظفين نمرة اتنين والله كن جوك تشيل شيلتك براك

أبوحراز وكل الاخوة الأماجد في هذا البورد
لكم أكن كل تقدير وود
أبو حراز يا رائع والله كل يوم بنتعلم منك حاجة جديدة
الله يديك العافية ودمت رافداً مهماً لهذا البورد العملاق

Habib_bldo
يديك العافية
انت لسه بتتحاوم بي جاي في البورد
مش قبل فترة قلت ماشي تعرس


قال رائع قال
هو برا رائع دي البجيب ليكم المصائب شنو
خطيبتي كل ما أقول ليها إنتي ظريفة
تقوم تقول لي ظريفة دي تاني ماتقولها لي نهائي
قلت ليها لشنو طيب ؟؟
تصدق قالت لي معلومة غريبة جداً
قالت ظريفة دي الحمارة بتاعت جحا
الكلام دا صاح
وللا المصيبة دي بتكون بتهضرب من الملاريا

هو العرس كم مرة في العمر يا أبوحراز
شغلة هي خلينا نربي أولادنا ونعرس ليهم وربنا يدي الصحة والعافية للجميع

BOUSH
خلاص اللبن ماعاوزو
بصلح السراير بس

ابو حراز
يديك العافية ويديك الفى مرادك
حكاية تصليح السراير دى ذكرتنى نكتة
قالوا فى حبوبة كدة قاعدة فى ضل الضحا فى بيت بتها فى الخرتوم،سمعت واحد بالشارع بنادى:نلحم سراير ،نصلح عناقريب ردت عليه:اة بس، حليل زمن الرجال البكسروا العناقريب

الظاهر كانت ممغوسة من راجل بنتها
والله اعلم
لوووووووووووووول
تحياتى

يامهيرة انت من زمن السراير والعناقريب
الواطة بتحمل اي شئ


لووووووووول

طيب يا اب حراز
بس انا خايف بعد شوية لا نلم فى القرية ولا الجبل و لا حتى النهر

أسامة الخاتم
ربما ياسيدي
بإمكان القرية أن تذهب
والجبل المتغطرس يمكن أن يبتلعه النهر كما ابتلعت تايتانيك
واليانغستي يمكن ان يجف
لكن هناك نهر آخر
نهر بمساحة كل أنهار العالم مجتمعة
سيظل 00 لن يجف ولن ينضب ولن يتوقف عن العطاء
ولن ولن ولن ولن ولن ولن
انه نهر الحب الذي جمع قبيلة هذا البورد

حبيبنا ابحراز

اسعد الله اوقاتك بكل خير

حبيبنا انا من الذين عانو من هذه المشكلة ورغم اني لست جديد على البورد ولكني احسست في مرات كثيرة ان كتاباتي لاتجد من يعبرها ولعلي اصبت بالاحباط في احيان كتيرة ولكن اعود واكتب مرة تانية واقول عسى ولعل ان يجد هذه المواضيع الاهتمام . وحانواصل كتابة لانها من اخر الاشياء الجميلة التي بقت لنا بعد ذهاب الاخريات
ويديك العافية

ولك تحياتي

شرووم

الظريف ابو حراز تحياتي
تصور انني كنت واضع لك صورة انك زول متخصص جكس ونكات لكنك اليوم كذبت تصوري وكتبت باسلوب وفهم عالي وبصراحة موضوعك هذا يستحق ان يكون بوست الشهر ياسلام عليك يا ابوحراز كلامك كله صاح وعلي الجميع مواصلة الكتابة

ابويسرا
قال فهم عالي قال
هسع بقوم أجوطها ليكم
ياجماعة انتو ليه مفتكرني انا بتاع الحاجات دي
جد أنا كنت إمام المسجد في حلتنا وحافظ لي الآن 625 حديث
بعدين أزيدك من الشعر بيت
كنت بعزم للناس العيانين 00 لكن للأسف نسوان بس

شروم
يكفي أن هناك أشياء جميلة باقية
سنتشبث بها جميعاً إلى أن نصل الى بر الأمان
وحينها سنكتب ونكتب ونخربش ونرسم ونمزق أوراقنا ونعيد ترتيبها
صدقني
أحياناً كثيرة يقرأوون كلماتك وكلماتي المتواضعة
لكنهم لايردون
إلا أنهم يتنفسون هذه الكلمات رحيقاً
وهذا يكفي
معليش كتبت اسمك بواو واحدة 00 لكن إنت واوين

والله ياخوي النصيحة ليك يا الله كتبنا لمن الله غفر لينا في الفاضية والمليانةما في زولن كدي عبرنا

ميادة

يكفي ان بوستك الأخير 00 كيف تعرف ؟؟؟ تجاوز ال 70 رد وشارف عدد القراء على اللألف قاريء ألا يدل ذلك على أنك استطعتي العزف على أوتارنا لنخرج في النهاية بهذا الحوار الموسيقي والذي يدل على حضورك بقوة وسط قبيلة البورد 00 أكتبي كما تشاءيين وأمنحينا من ابداعك لنكتب نحن

ابو حراز
ان شاء عافيه
تصدق من الصباح داير اكتب فى الخصوص لكنخرجت لبعض المشاور
بجى تانى
ودعقاب

ودعقاب
الأرنب بتاعتك دي أدوها شاكوش وللا شنو ؟؟
منتظرين آراءكم النيرة
والتي ستفيدنا كثيراً في مواصلة مثل هذه الخربشات

وقبل هذا وذاك

لنقف جميعا وننحنى لأبى حراز، حتى تلامس الرؤوس أديم المحبة وتلتصق به وبأبى حراز، وحين ترتفع ثانية، يكون أبو حراز فى أعلى الرؤوس

دمت جميلا أيها الجميل حقا

تفاحة البورد تحياتي الغوالي لك ، ابوحراز جميعا من يقف دائما عند اول عتبات مشواره او حتى بداية طريق لابد من الصعاب والتغلب عليها يتطلب عزيمة واصرار
لذلك ضربت في وتراً حساس للجميع ولكن نصحيتي ليك اوع من بيع اللبن في نمرة 2 لانوا انا كنت ساكن فيها وعارف البئر وغطاءها بتتكسر كان جيت بهناك واحذرك كمان شغل السرائر ودي فيها نكتة مشهورة عندما كان يهم بعض اهل العوض بالتصليح والصياح فما كان من صاحب العمارة إلى أن ناداه وباقي النكتة ما اااااعندي الا تضرب تلفون من الباقي

تشــكر يا ملك على التشجيع والصينين حقيقة رمز للصمود والطموح يعني الناس المتجرسة دي كلهاحتغرق الناس بالابداع .. الله يديك العافية وشكراً على "اسم حمارة جحا" والله معلومة جديدة... بعدين يمين الله اشتري لبنك الحتبيعه نصت نهار ده انشاءالله زبادي ..

صدقوني ما قادر أكتب من الضحك
جنـنـتوني الله يجننكن

قال زبادي قال
حا ارد ليكم كلكم
الله يجازي محنك يامهيرة

اها يا أبوحراز مظاليم الهوا اتلمو جوك ـ في بوست المظاليم دا عله يصبح حائطآ للمبكي ــ
انا غايتو فعلآ عالجت مشكلتي ـ عندي ركن براي ومجان كمان وبقيت اكتب فيهو وارد علي نفسي ـ واكيد بعد كم سنة كده ـ اذا امد الله في الآجال ـ حيكون عندي اطول بوست في التاريخ ـ ههه ـ
واشكر الزعيم بكري علي اتاحة المساحة

ابوحراز
رااااااااااااائعه
وبس

يا اخونا
كلمونا دا ابو احراز
ولا انا الليله قاعد
مقلوب.بالمناسبة دى
واحد من مشجعى دار الرياضة
امدرمان كور درجة اولى
ماعند بيه شغله اه قامو
الجماعة ساقوه كوره للهلال
اه شاف حافظ كان بلعب فى العمل
باك لعلب مع الهلال جناح
اه دا حافظ ولا انا قاعد
مقلوب
قال اكتب كتبنا

أبو حراز لك التحيه
لكن ما بالغت يا ابراهيم على
وبالمناسبة في شباب عواطلية في الغربة وكل يوم في المساء يقولو النكات
شهر شهرين سبع أشهر سنه اثنين المهم حفظو كل النكات قامو عملو لى كل نكته رقم
والنكات بعيد عنك فيها المصروف والممنوع من الصرف والجائز
لما يجو يتونسو يقوم واحد يقول النكته رقم عشرين الجماعة يضحكو
وهكذا
اها يوم في سماية واهلنا العزابة معزومين وفي المجلس قالو
يا أخونا نفتح باب النكات طبعا الحكاية مختطة بنات نسوان
هنود بنغال وخليجيين والدور جاء على صاحبنا يلا يا معتز
ومعتز يعجبك اخر بدله واخر كرفته والمحفظه فاضيه
مسك المايك وقال (11) وما شفنا الا ومحمد جاي من هناك
وضرب علاء كف قال ليهو اسع دي نكتة تقولها قدام البنات

الأخ أبـو حــــــراز

و الله ما عـنـدك عـــوجــة بـقـيت حــكـيـم كــمــان ؟؟؟؟؟؟


أســمـــع الـبـطـاقة المـلـح كـمـلـت و لا لـســه ؟؟؟؟



أسـي الجـمـاعة البدخلو في البوست بتاعك دا كان لميت منهم ريال ريال


مش كان إتصلت بي بت الناس المسكينة دي كل يوم ؟؟؟؟؟؟؟؟؟

ابو حراز

باقة منى بروعة كلماتك

والظاهر انو ما بتجينا عوجة

طالما بنلقى النصايح دى منكم

والحمد لله بدينا وبنشوف

يديك العافية

THE RAIN
والمطر الأسود في عيني يتساقط زخات زخات
قطراتكم هي من تمنحنا هذا الجمال
لنغتسل بها
ولنحرر أفكارنا ونجعلها تنطلق وتحلق كفراشة أسكرها الرحيق
صدقني
كان بيني وبين الجمال مسافة تعد بآلاف الكيلومترات
ولكن كلماتكم هي من دثرتنا بهذا الجمال
أنتم نبعي
وأنا نزلت إلى غياهب الجب
لألتقط هذا النبع وأرتوي منه قبل ان يلتقطه بعض السيارة


ghurba
الليييييييييييييييييييييييلة
معليش لمن قلت الصورة انا بصراحة ماقريت الإسم كويس
لكن برضو سامحونا انا بهضرب كتير مرات
قريتي بوستي بتاع الكلب
ذكرتيني بالعضة دي
البوست دا حلو امشي اقريه

مهيرة
والله مازلت أضحك من أمس على الحبوبة دي
المشكلة بتكون بتضحك على راجلها
يكون مدة صلاحيته انتهت وراقد 24 ساعة في العنقريب
وبقى زي التلفزيون يطلعوه المغرب ويدخلوه الساعة 11

العريس 00 ابراهيم علي
عجيبة 00 أهل العوض خلوا سراير الشكيـنـيـبة وسوق ابوعشر
بقو يمشوا يصلحوا سراير الخرطوم أتـنـيـن
والله كنت مفتكرهم ناس محليـيـن خالص
عليك الله قول النكتة بتاعتهم دي
تصدقني انا الخرطوم اتنين دي معلوماتي عنها بسيطة جداً
ولكن اهلها طيبين
فقد تعطلت سيارتي بجوار حديقة اشراقة ووجدت كل اهتمام
أخبار الجماعة شنو ؟؟
قال كوستي قال

NOON3
يعني اللبن ما حا يبور
أشكرك على التشجيع
واتمنى أن ننهل دائماً من حروفكم المضيئة ونستخلص منها عطرنا ورحيقنا


MUNIR
كيف انت
كنت غاتس وين ليك مدة ماباين
الركن بتاعك القاعد ولابد فيهو دا ورينو ليها
أكيد بتكون كاتل ليك كتلة
قال ركن قال

ابوفاطمة
اشكرك
لكن الروعة نستمدها من حروفكم وكلماتكم
وانتقاداتكم التي نعتبرها النبراس الذي يضيء لنا الطريق
فاطمة عمرها كم ؟؟؟؟؟؟

المهندس
ياهو ابوحراز ذاتو

الرشيد أحمد قاسم
قال 11 قال
معتز صاحب البدلة والنكتة وعرفناهو
لكن المسكين علاء دا مالو ياناس ذنبو شنو ؟؟
ماتقول لي كان واقف جمب معتز

والله يا ابوحسين زي ماقلت كان الجماعة الدخلوا ديل أدوني ريال ريال
الواحد مش حا يتصل
حايمشي يعرس عديييييييييييييل ويرجع
خاصة الناس الجدد ديل بيكونوا كريمين جداً

ARTIGA
شكراً على الباقة اللطيفة
لكن نحن برضو عاوزين تشجيع لأننا مازلنا في بداية الطريق
التحية ليكم ولكل الزملاء الذين أتـحفونا بانضمامهم للبورد

سلام مربع

الزول العسل
ابو حراز

شكلكم كده مقدم الاعتزال
او
لعلها شواكيش الخطيبه
هي من خلتك تفتح دكان
لبيع مثل هذه النصائح ذات الشان البورداتي
الجميل
شايفه كده الحكم والاقوال المنقمه
نازله زي المطر
ودي مابعملوها الا الناس الخلاااااص
رجلهم وا القبر
ولا الناس الخابطهم زول عزيز على راسهم

اوع تكون انت من الفئة الاولى
؟؟؟؟
دي ماعندها ليها حل
اما التانيه مقدور عليها
بنلقى ليك
بديله جاهزه
لخطيبتك الشينه ديك

شايفه اختنا امدر العسل
بتلقط في عرسااان لمعسكرنا
موش زي شروووم عايز يبور سوقنا
على خطيبته ام نخره الصناعيه ديك
اااااحي انا منها
اكلت مننا السوق


___________
شكيتكم على الله يا بوش وبليير وصدام

قالت عسل
وين العسل ياشيري
نحن اتلحسنا زمااااااااان
قلنا كدي نفتح باب النصائح ونشوف آخرتها شنو
أصلو الزمن دا
ياتكون شيخ
ياتكون حرامي عشان تعيش كويس

الكلمات عندما تنزل كالمطر
لأنها تريد برذاذها أن تعانق فراشات البورد
وعشان ناس عمو قرجة مايزعلوا
فهذا الرذاذ سيلاطف حبات العرق على جبينهم
وسيحيلها الى طل
لك التحية
ولكل المبدعين في البورد

قصة اكثر من رائعة و اسلوب سهل ممتنع, وطبعا ما ح اقدر اجاريك
لذا لا ازيد على ابو حراز يا ابداع

manj

قال إبداع قال
الشعار بتاعك دا بخور وللا شنو
مالكم ياناس عاوزين تجنونا وتذكرونا العرس
بعد مانسونا ليه العلوج

يا ابوحراز البوست بتاعي من كترة ما باير اكون مطلعه في القمة، ودوبين ما بكون بجهز ارد علي نفسي القاه غتس للصفحة العشرين ــ يعني اقعد اليوم كله افتش فيهو ـ الا اسع ربطته ليك تب بي بوك مارك ـ يعني ممكن اجيهو ليك بعد شهر وافكه ليك للقمة ـ ههه ــ شفت عدم خفة الدم بتعزب سيدها كيف؟؟ وبالمناسبة يا ريت لو كل واحد حصر بوساته كلها في زاوية واحدة عشان الناس تقدر تتابع افكاره و استايله ـ
وبعدين كتلة شنو البكتلها، دا ياخي انا المكتول ومدفون في الركن داك ـ
ـ (واللا ما مدفون ما عارف!!) ــ

ابوحراز كيفنك ؟

انا طبعا من اوائل المطالبين بالتساوى فى الردود على الخربشات وطالبت وما زلت بالمساوة ( لم بقت زى مطالبة الجيكس للمساوة مع الرجال) المهم
ونحن سوف نكتب وسوف نواصل دون كلل او ملل عسى ولعل الله يفرجا

والتحية لك وللاخوة المشاركين

ابو حراز
يا اخوي فاطمه بتي لس طفله عمرها 3 سنوات

ابويوسف
أسأل الله أن يحفظ لك فاطمة والقادمات والقادمون على الطريق
اسم فاطمة من الأسماء الجميلة التي تعجبني
أوعا تقولوا الزول دا بتاع رزان وسوزان وجاكلين وجانيت


طارق
اكتب يا أخي ولا تمل
لدي عمي قمة في الطموح والإصرار
ولكن اصراره من النوع المشاتر
توفت زوجته
ولم يمهلها أن تتوسد قبرها قليلاً وبدا يخطب
ولكنه يمتلك إحساس رهيب جدا في اختياره
فلا يذهب الا لواحدة مطلقة
خاصة إذا كان زوجها مغترب
تصور مدى طموح هذا الشخص واحساسه
يمشي يطلب واحدة ويرفضوا ليهو
يرجع البيت يفطر وتاني يقوم يفتش
يعني مرة من الصباح لحد ساعة الفطور مشى لخمس نسوان
كلهن رفضن
وبعد دا كلو صاحبك والله جاء عادي وكأنه لم يحدث شيء
وفطر عادي
والغريبة لوحده أكل خمسة عيشات في الفطور
وشرب كبايتين شاي
وبعد دا كلو قال عاوز ياخد ليهو نومة ويمشي يفتش تاني

أها دا الطموح وللا بلاش
والله انا لو حصل لي مثل الحصل ليهو الا يودوني الشكينيبة وللا ابوحراز

قال ابوحراز قال

سلام

والله ابداع عديل كان ابيت وكان رضيت..ان خشيت البوست قبل كم يوم واستمتعت بالقراءة.. وانسحبت من الباب الخلفي... لكن خجلت من نفس و قلت ما ممكن الواحد يطلع ساكت بدون ما يدي الزول حقوا

شعاري ده انا زاتي ما عارفو شنو.. لكن على ما اعتقد ده "جعلي" بياكل النار

لك كل التحايا

ابوحراز
قلتا لى شيخ
اوا يكون زى شيوخ السعودية البحولوا الخمسةتالاف ريال لخمسين الف ريال بعد اسبوع لو ختوا فى شنطة مقفولة
في واحد اكلنى ميتين وخمسين ريال
مشيت العمرة بنية الزوغة...اهلى ودونى للشيخ عشان يعمل لي كواديك...واحد من الكشة والتانى عشان القى كفيل...ختيتم فى الجزلان ودقشتا الكرنتينا وقعدت في المطعم زى المقيم...ما وصية شيخ
ولما قالوا كشة..اخوك خلف رجل على رجل..ثقة
والجماعة قصدونى عدل وقالوا...هات الهوية
طلعتا ليهم كتابات الشيخ....بعد تلات ايام كنت في سواكن
قلتا لى ياتو شيخ انت

والله يا بلير بالغت ـ فعلآ صدق القال المؤمن صديق ــ زي نياتك دي هي البتدخل الجنة ــ ههه

سنكتب
يا شيخ اب حراز
وسنكتب وسنكتب وسنكتب
وما احلى الكتابة
حتى لو كانت في بيت العزابة
الكلام ده ليك يا المنطط عينيك
وما احلى ان يحمل احدنا قلما
ويأتي بورقة بيضاء
سرعان ما يتغير بياضها إلى زحمة
وستحكي عن شيئا ما
حتى ولو كانت تحتوي على خربشات
ولكن هناك نوع آخر من الكتابه
عندما تستخدم الكي بورد وتفتح صفحة
سودانيز اون لاين
هنا تختلف الكتابة
كلمة فثانية فأخرى
وسرعان ما يأتي الشباب ليساعدوك في هذه اللوحة
منهم من يضع البرواز
وثاني يأتي بالـ (قزاز) ومعه منديل
وآخر يحمل مسمار وشاكوش
الله يكفينا شر الشواكيش
وتكون اكتملت اللوحة بوضعها على الحائط
ولكن هناك من هم اعداء للجمال
ومثل هذا يحمل الشاكوش ويرميه على اللوحة
ليضيع جهد الجميع


اخي
الرشيد أحمد قاسم
ما يكون معتز ده انا زاتي
لكن مقلبت ليكم صاحبك علاء وتاني ما حا يجي معانا اي مناسبة
ومعاكم سلامة

منير 00 حبيب بلدو 00 معتز 00 غربة 00 بلير 00 مانج
وكل المشاركين في بوست الخربشة
لكم التحية من الأعماق
ونتمنى مزيدا من التواصل والإبداع
فهذا البورد اصبح قبلتـنا { بكسر القاف } واصبح متنفسنا
بل واحتنا التي نستريح ونتـفـيأ على ظلالها
امنحوا البورد لوحاتكم الرائعة
ودعونا نتأملها
ونعزف عليها
ونتراقص معها

هوى يا ابحراز امش عديل فوق دربك مالم ناس نمرة اتنين انت الظاهر شاكوش خطيبتك دا طيرليك المراريا فوق راسك
..........والله لكن يا مهيرة بالغتى لوووووووول وتانى لوووووووول
يا بلير انت آبنعمى مالقيت غير الكرنتينه لكن شكلك
كدا ما كانت نيتك سليمة يا مان عشان كداجاه الشيخ
ما لحقك انت متاكد آزول ناس الكشة ديل لحسوك من المطعم

منير
جزاك الله خير
اخوك زول الله

ود الجيلى اربع
اخوك قالوا ليهوا
فى الكرنتينا الجو سودانى
المطاعم والاكل سودانى ميه الميه
والشكس فارشين بالشاى المنعنع في السقيعة
اصلوا العبد لله كييف
المشكلة لا شفنا الشكس ولا شربنا الشاى
الله يجازى الشيخ السبب

ود الجعلي
تعرف ليه نمرة اتنين ؟؟؟
لأنو في واحدة هناك زي القمر 00 جمالها لمن عوير
لكن المشكلة مافي أي طريقة تشوفها
لأنها من جماعة ناس شيخ الهدية
ومافي أي طريقة الا باللبن دا
لكن لولقيت طريقة اشوفها
ليك علي
بكب اللبن كلو وبرجع فاضي

ابو حراز ازيك
ده انت ولا زول تاني؟
انت الكلام ده بتجيبوا من وين
ارجع يا زول لخبط زي ما بنلخبط
قال قال جبل ومتغطرس وين كمان في الصين
ست النفر اخبارها شنو يالله؟

تحياتي
زولة123

الزولة 123
هذه الخربشة منحـتـنا لها قطتك الصغيرة
كنا نلاعبها في غيابك
نخرب لها شعرها
وسرعان مانعيد ترتيبه من جديد
نسمع مواؤها 00 ونخالها أنها قد أتت لـتـقـضي على فيراننا
ولكننا عندما نتعقبها نجدها قد أتت بحزمة من الباقات والورود
افنقدناك 00 وافتقدك البورد 00وافتقدنا هترشتك
وافتقدنا حتى مضاداتك الحيوية والأرضية والجوية
ست النفر كما هي 00تريد ان تدخل البورد
وانا أريدها أن تدخل مع ناس شيخ الهدية

الاخ ابوحراز
لانك جميل لا يصدر منك الا كل جميل، فهذا قول حكيم، كم اتمنى ان يفهم هؤلاء ان المبدعين هم فخر الشعوب،/ونحن شعب متفردوحبانا الله بميزة التواضع وجعل مبدعينا يشاركونا هذا الحوش الالكتروني كما يقول يحيى فضل الله دون من ولا اذى، واتمنى مخلصا ان لا تبلغ الحماقة بالبعض منا الى حد تطفيشهم دون ذنب جنوه0 وكما ذكرت اخي ابو حراز فالكتابة يجب ان تكون نتاج رغبة لاسترضاء النفس
وكل ما يأتي بعد ذلك خير وبركة0
لدي صديق جميل يقول باستمرار "ياريت كل زول يعمل العليه ويمشي" وياريت كل واحد مننا يكتب العاوز يكتبه ويترك الباقي 0

عطبراوي
الجمال ياسيدي يمنحنا له الآخرون

نحسه في كلماتهم وفي رحيق حروفهم وحتى في انفاسهم
والإبداع طريق شاق وصعب
لكننا نحاول أن نحبو لنصل لأول درجة من سلمه
اعرف انه يمكن أن نتعثر من اول درجات السلم
ولكن بالعزيمة والإصرار والطموح يمكن لأي منا أن يبدأ الخطوة الأولى
تليها خطوات أخرى كثيرة جداً
في هذا البورد مدارس عريقة ومتفردة
وصدقني 00 انا قبل أن أكون عضوا به
كنت اتلصص على هؤلاء المبدعين من ثقب البورد
وعندما دخلت 00 دخلت على استحياء
تشابكت حينها على رأسي آلاف من علامات الإستفهام كتشابك غابات الملايو
كيف ياترى أجلس مع هؤلاء لنأكل من طبق واحد من مائدة سودانيزاونلاين؟؟؟
ولم أكن اتخيل أن هؤلاء المبدعين أناس عاديين جداً
عاديون عاديون عاديون
عاديون رغم أن الإبداع يجري في دمهم
وتحسه في أنفاسهم حتى يسكرك ويجعلك تـتـرنح
فعندما دخلنا عليهم
وقفوا لنا
وأجلسونا في مقاعدهم
وأعطونا أسرتهم وأغطيتهم وناموا على الأرض !!!!
وهذا في حد ذاته إبداع يمشي على قدمين

علي الطلاق ماعرفتك ياابوحراز........
ياخى بوستك دا ريح الشباب من موضوع ردو لي وما ردوا لي
....................
بعدين اديتنا درس في كيفية اقتلاع الرد.....
............
ولهذا....قررنا ترقيتك من رقيب اول ابحراز الي
اللواء ابوحراز.......
............
بالمناسبة اللواء ابوحراز دي....ياماااان جاية جية....وكمان قالوا ضفار في الجيش...يعنى ما ينوم وكدة
.............
في الختام..بوست اكثر من رائع......بس حقو تغير الصورة ...تجيب صورة المرة...او بت الجيران...
shereef

والله يا ابحراز كلامك دخل الحوش تب لكن تعال هنا انت عرفتها كيف طيب والله بى الجد تبقى جادى نديك الدايرا فى بالك والله بس بى الفاتحة لكن كان كنت بتهزر ما مشكلة
بس لانك ابحراز واعلم تماما انك لا تقصد الاساءة ولعلمى
انو نيتك سليمة جدا لكن برضو لوجادى انا معاك تب
والله واحدة من اخواتا عقدنا ليها بالانترنت وجدها زعلان
لى يوم الليلة لك تحياتى يا ابو النسب لكن تعال هنا
ست النفر دى بتقنعا كيف
لك تحياتى وكل الاشواق

والله كان ليك وحشة يا ابو حراز تختفى وتجى ببلاوى متلنلة

مرحب بيك تانى ومنتظرين المزيد.....مع تحياتى لكل الإخوة

Ahmed satoor
اشكرك أخي أحمد
قلت لي بلاوي متلتلة
المرة الجاية حاتجيكم بلاوي أكثر

وينك يامان ليك وحشة وماشفناك من مدة
الساطور أخبارو شنو

ود الجعلي
يازول هوووووووووي
انا بهترش ساكت
يا أخي نحن ناس اهل العوض
عاوزين لينا واحدة مسكينة محل ماتوديها تمشي
خلينا بالله من ناس يااااااااي وهااااااااي ديل
ود أختي عرس من العمارات
والله هسي محتار يسوي شنو
المصيبة جاتنا في الحلة هناك
قالت الكسرة مابتاكلها
ولبن الغنم مابتشربو 00 لازم نيدو
ولو قرصتها باعوضة
الحلة كلها تصحى من النوم تقول قرصها ثعبان
وجري نمشي بيها للمساعد الطبي
بدينا ليها دواء اسمو كورتيزون
قريباتي كلهن الحمد لله
الواحدة لمن تقرصها باعوضة تنكرش وتواصل نومها

قال الخرطوم اتنين قال

امدرماني
لواء مرة واحدة
شنو عاوز تعمل لينا تصنيف جديد في البورد
يعني الواحد يدخل معاكم وكيل رقيب
فجأة يجيب ليهوبوست جميل يطلع فوق الجماعة ناس ملازم ونقيب
لكن تصدق انا لا اقبل باللواء دي بس تعرف ليه ؟؟؟
واحد كانحرس لرئيس افريقيا الوسطى 00 كان عريف
فجأة يوم اتقلب الحارس على الرئيس
وقاك كتفوا بحبل جوة القصر
وبعديها طوالي على الإذاعة
في البيان الأول اعلن نفسو رئيس
وفي البيان التاني
رقى نفسو لرتبة مشير طوالي
انا عاوز مشير

..بوست اكثر من رائع......بس حقو تغير الصورة ...تجيب صورة المرة...او بت الجيران...
.....................
الكلام دا برضو كتبتوا انا...مالو

ياولدنا ممنوع من الصرف....ولا ماعجبك...

omdurmani
تاني جيت راجع
انا رديت امس
يعني سيك سيك معلق فيك

اها اول شيء بشكرك على شعورك تجاه البوست
واتمنى ان نمنحكم الروعة طالما أنكم منحتونا ابداعكم
بنتك الصغيرة أخبارها شنو
مش جابو ليك بت قبل فترة

بعدين موضوع الصورة دا حا أنظر فيهو
معظم اعضاء البورد طالبوني بتغيير الصورة ووضع صورة حديثة
طبعاً أغلبهم عبر المسنجر
أها انشاء الله عاوز اشتري لي بدلة واتصور بيها ومنها اعرس بيها
يعني لازم الخسارة تكون مرة واحدة
والله عندي صورة في الابتدائي لو ختيتها ليكم
لا يفضل بكري ابوبكر
لاقرشو لاتماضر
كلكم حاتهربوا من البورد
يا اخي دي صورة انا ذاتي لمن اشوفها بتشهد وبقول سبحان الله
القميص فيه زرارة واحدة
وواحدة من السنون طالعة برة ماعارف طلعت كيف
وفي حاجات تانية جمب الأنف بلغة الحناكيش دي ماعاوز اقولها لكن باينة في الصورة

قال ست النفر قال
انا مجنون وللا عاضيني كلب عشان أخت ليكم صورتها هنا

ماهو شعورك اذا لم يرد احد على موضوعك

!! لاشك أن أحدا عندما يطرح موضوعاً ويجد مشاركة الأعضاء

وتجاوبهم معه بالرد عليه فإن ذلك يسعده ويدفعه إلى المزيد

ألا توافقوني على ذلك ؟؟؟

لا أريد هذا الجواب

سؤالي إذا طرحت موضوعاً أو مشاركة

ولم تجد من يرد عليها فماهو شعورك

أبو حراز : السلام يا أبو الرجال.
قصتك فعلا شيقة ، و تدفع الكثيرين ليحذوا حذو أهالي تلك القرية .

أها ، إنت عاوز الحمار البيجي ( داراوي ) ولا ( من زرايب كوكو ) ؟

و بعدين ليه مصر على بيع اللبن في الوكت داك ؟ لو عندك سبب مقنع قول لي عشان أوزع بالرقشة ؟

تسلم.

ميادة
لك التحيةوالتقدير
بالنسبة لسؤالك الأخير
فكما قلت فأنا صدقيني لا أكتب اي بوست لكي يردالآخرون عليه
أنا أكتب من أجل ان اتنفس
ومن أجل ان افرغ شحنة كبيرة من المشاعر أحملها في داخلي
ويكفي ان يقرأ الناس لي
وحدث في مرة من المرات أنانزلت بوست بعنوان الضمائر الصدئة
طبعاًولا اي حد ما رد على البوست
قمت رديت عليهو براااااي

هو اسة واحنا بييي حالتي دي بطلع في الروح يعني لو حصل لي زي الحصل ليك دة كان زمااااااااان مت من الاحباط

هوووووووووووووي يا ابو حراز

بدور تعقل علي اخر عمرك ولا شنو؟؟
شنو النضمي الظريف ولزيز دا

مبادر شاكوش ولا شنو؟؟



-

منكم نستفيد يا سيد (النفر) ..انت قايلني ما عملتها?
بدل الرد اثنين..والماقرا حقو راح..شفت ليك مساخة اكثر من كدة?

ابوحراز
كلام جميل من رجل جميل.
معك قلبا وقالبا...

جهينة
اشكرك على طيب المشاعر
الكلام الجميل ليس كلامي
وانما هوخلاصة أنفاسكم حولتها وترجمتها الى كلمات

ميادة
سيأتي يوماً ماولاتجدي فيه الوقت الكافي للرد
ستأتيك الردود من كل مكان
وستهطل عليك كما المطر

زمراوي
الجمال في كلماتكم وفي حروفكم
والجمال في ردودكم التي تدفع لمزيد من الإبداع
وما الحوار الذي يتم بيننا ليس حوار بالكلمات
بل حوار بالأنفاس والروح
حوارخلق بيننا علاقة قوية
وفوق هذا وذاك خلق منا قبيلة واحدة
sing
لكم التحايا على المشاركة
تقول الحكمة 00 ان توقد شمعة خيراً من أن تلعن الظلام
ربما نحمل هذه الشمعة
وربما تنطفيء قبل ان تحقق هدفها
ولكن لماذا لانضيئها مرة أخرى
لنكتب ثم نكتب ثم نكتب
فإنقرأوا لنا فشيء جميل
وإن لم يقرأوا فيكفي أننا تـنـفسنا بعمق

هوبليس
كلما اوشك الإنسان على التعقل
كلما اقترب من الجنون
والمجانين
هم من أكثر المبدعين في بلادي