Post: #1
Title: جدي الضهبان دا 00 راح في الحج
Author: ابوحراز
Date: 02-22-2003, 10:14 AM
أكبر مصيبة يرسلوا ليك من السودان واحد مدة صلاحيتو منتهية
دا جدي المكعكع الشالوه في الحمار والخرج لمن كان عاوز يمشي يعرس
كل سنة يقول لازم نحججو
لأنو بقول السنة دي آخر سنة ليهو في الدنيا
والكلام دا يقول فيهو من اربعين سنة
اها 00 نازلين وطالعين معاهو
وهناك في السودان قالوا ليهو في السعودية
حمامات الرجال لوحدهن
وحمامات النسوان لوحدهن
وهنا كل يوم نذاكر بيهو
اها في غفلة تووووووووووش دخل حمامات النسوان
والله 00 الله ستر
المطوعين لو مالقوه واحد عجوز ومكعكع كان حصلت مشكلة كبيرة
قلنا ياجدي ماشايف صورة المرة دي مرسومة فوق
الدخلك هنا شنو
قال ماشاف لامرة ولا أي شي
المشكلة لو اديتو 50 ريال وقلت ليهو دي 500
طوالي يقول ليك دي 50 ياولدي الباقي وين ؟؟
طبعاً صاحبنا مفتكر الحمامات دي هاملة زي عندنا في السودان
طبعاً ماشاء الله هناك الحمام بعيد
الواحد من يشيل الابريق ويمشي
زي الماشي يرفع كورنر
وبعدين الحكاية جايطة مازي هنا
ابوحراز يدخل
وست النفر تدخل
ورزان المغربي تدخل
وشكيرا تدخل
وفيفي عبدو تدخل
والحمير والبقر والخيل المسومة
بالمناسبة
ذهبت الى قرية من اهل العوض
واحد كان حملني وصية لأهله
اغرب شيء لاحظته عندهم ولم اعرف السبب في ذلك
لمن يعملوا { حمام }
تكون الحيطة بارتفاع متر واحد من الجهات الأربعة
يعني لمن تقعد مهما تكون قصير
بيكون راسك ورقبتك طالعات برة
والأظرف انك لمن تكون قاعد
ويأتي واحد ماشي من سكان اهل القرية
بيقوم يقول ليك
كيف حالك الضيف ؟؟
قال ضيف قال !!!!
|
Post: #2
Title: Re: جدي الضهبان دا 00 راح في الحج
Author: ايهاب
Date: 02-22-2003, 10:45 AM
Parent: #1
LOooooooooooooooooooOOOOOOOOOo
OOOOOOOOOOOOOOOOOoooooooooooooooo
ooooOOOOOOOOOOOOOOOOOOOOOOoooooooo
ooooooooooooooooooooooOOOOOOOOOOOO
OOOOOOOOOOOOOOOOOOOOOOOOOooooooooooooo
ooooooooooooooooOOOOOOOOOOOOOOOOOOOO
OOOOOOOOOOOOOOoooooooooooooooooOOOOOOOOO
OOOOOOOOOOOOoooooooooooooOOOOOOOOOOOOOO
OOOOOOOOOOOOOOOooooooooooooooOOLZ
واللله يا ابو حراز لي زمن ما ضحكتا كدا
كل سنه وانت طيب
و بالجد اشتقنا لي قفشاتك
تحياتي
|
Post: #3
Title: Re: جدي الضهبان دا 00 راح في الحج
Author: garjah
Date: 02-22-2003, 10:46 AM
Parent: #1
قااااعد
ويرد السلام كمان
|
Post: #4
Title: Re: جدي الضهبان دا 00 راح في الحج
Author: falcon
Date: 02-22-2003, 10:51 AM
Parent: #1
العزيز ابو حراز
كل عام و انت بخير
و الله و ما طالبني حليفة اليوم الصباح
كنت ناوي انزل
بوست اسأل عنك
فتحت المنبر لقيتك وش
قلنا اكيد الراجل دا
اشتغل مطوف مع ناس غرب اسيا ديل
لك التحية
|
Post: #5
Title: Re: جدي الضهبان دا 00 راح في الحج
Author: ابوحراز
Date: 02-22-2003, 10:56 AM
Parent: #4
قرجة
مافضل لي الا امشي اعضيهو
دي لحظات سلام دي
ايهاب
كيف حالك
طبعاً لسه جدنا قصصو كتيرة جدا في الحج
تصدق قال الا يضوق العصير المزاز
فالكون
قلت لي قال انا طالبو 100 شوفة
ياهو صاحبنا طبعاً
|
Post: #6
Title: Re: جدي الضهبان دا 00 راح في الحج
Author: Ahlalawad
Date: 02-22-2003, 11:04 AM
Parent: #1
أب حراز
كل سنة وانت وجدك طيبين ومعرسين
أها الدفع (الغرم) قروش النسوان الراحن منو فيكم؟
|
Post: #9
Title: Re: جدي الضهبان دا 00 راح في الحج
Author: ابوحراز
Date: 02-22-2003, 11:31 AM
Parent: #6
اهل العوض
بعد جدي نشلوه
طبعاً شلنا القروش منو
وقنا ليهو انشاء الله اول ماتجي تركب الطيارة بنديك ليهن
لكن طبعاً ماخلانا نمنا
كان مشينا الحرم يقول قروشي وين
كان جينا نرمي الجمرات يقول قروشي وين
في التقصير وهو مادي راسو
قال قروشي وين
|
Post: #7
Title: Re: جدي الضهبان دا 00 راح في الحج
Author: بت قضيم
Date: 02-22-2003, 11:11 AM
Parent: #1
ابو حراز
بالجد ضحكتني
وبالجد انت فاكهة البورد
حمد لله على سلامة العودة
|
Post: #8
Title: Re: جدي الضهبان دا 00 راح في الحج
Author: فنجري
Date: 02-22-2003, 11:21 AM
Parent: #7
العزيز ابو حراز .....طبعا من ضحك ايهاب قدامي الشمار كتلني و قلت لازم اشوف في البورد في شنو ....و اتفقعت من الضحك ....شكرا ليك لانك بتمرقنا من جو العمل التعيس ..
تعرف عندنا حبوبةلينا ..شايقية اخلاقها نتشة ..مشت الحج ,قامت طشت ليك من الصباح و لدها لما ليك فيها الساعة تلاتة مساء ..و هو عارفا ح تكون مسخنة ...و عاوز يبرد عليها .....قاليها حجي يا حاجة....انشاء الله السنة الجاية تمشي وتجي سالمة .....تعرف ردها كان شنو ...منو دي و الله لا انا لاحبيبا لي ما يجي البكان ده تاني ...
فانا رايي نعرسا لي جدك ده عشان ما يفكر يجيكم الحج تاني ....
تاني شكرا ليك .؟....
عماد بلول
|
Post: #10
Title: Re: جدي الضهبان دا 00 راح في الحج
Author: ابوحراز
Date: 02-22-2003, 11:35 AM
Parent: #7
شكرا بت قضيم
اها ما قلت ليك
طبعاً كل انواع العصاير ضاق منها
اها يوم شاف ليهو شافع شايل عصير مزاز
قال الا يدوه من دا
قلنا ليهو ياجدو دا عصير أطفال
قال لو ما اديتوني لا بمشي عرفى لا مزدلفة
اها جبنا ليهو حليب السعودية
بعد حراق روح دخلنا ليهو المزازة في خشمو
اها مفروض يشرب شوية شوية
بالله العظيم شفط ليك الصندوق شفطة واحدة لحدت الصندوق انطفق
قال مزاز قال
|
Post: #11
Title: Re: جدي الضهبان دا 00 راح في الحج
Author: sharnobi
Date: 02-22-2003, 03:12 PM
Parent: #1
خليك من جدك
انت حجيت ولا كنت مطوف وبس
عشان نتعامل معاك وفق وضعك الاجتماعى الجديد وطبعا اذا حجيت شيل شيلتك الغلطة بعشرة
ومشتاقين
جد
|
Post: #12
Title: Re: جدي الضهبان دا 00 راح في الحج
Author: ابوحراز
Date: 02-23-2003, 06:28 AM
Parent: #11
فنجري
شرنوبي
طبعاً حجينا معاهو
وأكتر منو كمان
دا مرة زهج وقال الجمرات كلهن لازم يرميهن في يوم واحد
قلنا ليهو ياجدو
كل شيطان لازم ليهو يوم
المشكلة العذبتنا أكتر إحرام جدو
والله الإحرام نصل منو أكتر من 20 مرة
المشكلة مابقع الا الإحرام التحت
والفوق مكرب شديد وماسك فيهو مسكة قوية جداً
يقع ونربطو ليهو 00 يقع ونربطو ليهو
والمشكلة مرات يقول لينا
انا ماقلت ليكم مادايرو الإحرام دا
انا ماكلمتكم من السودان قلت ليكم مادايرو
طبعاً ود خالتي كان معاي
بس دا قلنا مهمتك الإحرام دا
واول ماخلص الحج
قال نهائي مابقعد 00 السودان بس
ياجدو لازم ترتاح
قال لازم يمشي يرتاح مع مرتو هناك
قلنا اصلك متزوج نيكول كيدمان وللا جينفير لوبيز
ياها المرة المافيها سنون دي
قال مرتي قال
|
Post: #13
Title: Re: جدي الضهبان دا 00 راح في الحج
Author: almohndis
Date: 02-23-2003, 11:30 AM
Parent: #12
ابو حراز اخوى كل عام وانت بخير
والسنة دى عريس والحفلة بى مايكل جكسون
وهو انت هين
ولا اقول ليك خليهو فى عيد ميلاد المنتدى بتاع
السنة الجاية فى يناير 2004 اى الفى القاعة
عشان الكشف يكون سمين تخيل الف وتلتومائة
عضو نضرب فى كم قول فى طراده بكم
عيك 1300 طراده بتعمل ليها حسبة
وامكن تخلى البلاد ديك لى ناس
قرجة والعمدة انشاء الله ايدهم كورنيش الحمراء
وانت ولا يهمك ما ضمنته يلا افتح خشمك لى
الحراج .
يخوى دخلت على وحده فى المسنجر اه من تانى
سؤال عمرك كم البعده تعرسنى اه سمح ولا شين
قالت ليها شفتى ابوحراز بتاع سودانيساولين
(عمال ليك دعاية) هو بالنسبة ترفولتا اه
طفشت لى اليوم تانى ماظهرت
بالله عليك الله ماله انت قالت شنو
اه اكت اتخرت علينا فى المنبر وقالنا
امكن حاردن جبت المقص داير اسرق
صورتك وانزل بوست بى صورتك
اه فى واحد شكال ليه واحد اه قاليه
أنا ماقدرك بجيب القدرك اه مشى
وجاء قاليهو اخوى مالقيته لكن دا
مركبو بتقدر عليه(ما المركب اخوه)
نرجع للصوره اه مليت مقص مقاسك
ورب ستر كنت ماشى ناس البستاين
اجيب مقص شدر
معليش ابوجراز اصلو الماسورة حلجت
ربنا يستر عليكم.
يعنى اهو تداعيات والله استاذ يحيى فضل الله
براه بتاع التداعيات
معليش يا دى خلاص
ابو حراز الايامات دى نصوصك ماله
والا نحن مالنه
بلغة الجماعة إشكالية النص ولا المتلقي
هو الموضوع كان شنو جدك مالو
|
Post: #14
Title: Re: جدي الضهبان دا 00 راح في الحج
Author: ابوحراز
Date: 02-23-2003, 12:00 PM
Parent: #13
almohndis
قال جدك مالو قال
والله راسي ذاتو جاتو دوخة
ماعارفك بتقول في شنو
اها انل بقيت زي جدي التاني
دا كمان أعمى وأطرش
يوم قابلو ليك تور هائج
اها التور نطح جدي
جدي طااااااااااااخ خبط الواطة
اها وديناهو المستشفى
ماصحى الا بعد أسبوع
اول كلمة قالها لينا
اسمعوا يا اولادي
سيد اللوري الصدمني دا انا ماعافي منو
لازم تاخذوا لي حقي منو
قال لوري قال
|
Post: #15
Title: Re: جدي الضهبان دا 00 راح في الحج
Author: james
Date: 07-17-2003, 09:09 AM
Parent: #1
تحياتي اب جضيمات
وانت تخرج الناس من العك والعجن ده
|
Post: #16
Title: Re: جدي الضهبان دا 00 راح في الحج
Author: Abd-Elrhman sorkati
Date: 07-17-2003, 11:30 AM
Parent: #1
العزيز أبو حراز
لك الحب 0000 يسلم فمك وكيبوردك
أنا بقترح طلتك علي الاقل كل يوم
مرة واحدة انشاء الله000عشان نرتاح
من بعض الاشياء البتفقع المرارة00
سلمت ياسيدي
|
Post: #17
Title: Re: جدي الضهبان دا 00 راح في الحج
Author: ghurba
Date: 07-17-2003, 12:55 PM
Parent: #16
ابو حراز يديك الفي مرادك والله الدخول لبوستاتك زي الدخول لواحه...بالله كتر طلاتك واعفينا من الغياب ...
|
Post: #18
Title: Re: جدي الضهبان دا 00 راح في الحج
Author: ابوحراز
Date: 07-19-2003, 11:01 AM
Parent: #17
جيمس
سوركتي
غربة
انتو البوستات دي بتنكتوها من وين
كلما افتح الاقيكم رافعين واحد من البوستات المنتهية الصلاحية
لكم كل حبي وتقديري
قال جضيمات قال
جوليا مشت وين
|
|