Post: #1
Title: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:05 AM
Parent: #0
السودانيات جميلات في كل شيء
ظريفات في كل شيء
بسيطات في كل شيء
رائعات
سابحات
قانتات
صابرات مهذبات
لكن الواحدة لو زعلت وخشمها اتكرمش واتكرفس
والله تاني مكوة بتاعت المغاسل الأوتوماتيكية ماتطرحوا في محلو
يعني لو مدت ليك بوزها
واتكرفست
واتكومت واتغطت
مشكلتك حاتكون كبيرة جداً
والله لاملايات يحلنك ولاعدة تحلك
اها لو جيت داخل ولقيت الصورة دي
عاوز اسال سؤال واحد
بتعمل شنو لو وجدت نفسك في الموقف دا
بتدقها وللا بتدق ليها دهب وللا بتدق سيد الدهب ؟؟؟
|
Post: #2
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: اساسي
Date: 05-31-2003, 08:09 AM
Parent: #1
بجدعها بالحيطة
انت يا ابو حراز بتوصف في مراة زعلانة
ولا في صباع معجون فاضي
|
Post: #3
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: HOPELESS
Date: 05-31-2003, 08:13 AM
Parent: #2
اكب فوقه جرد مويه
عشان تلين
ولا اجيب ليها مرايه واخليها تشوف رقبته عشان تخاف وتجي تتشعبط فوقي
|
Post: #5
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:18 AM
Parent: #3
HOPELESS
قال جردل موية قال
أديها من الجوائز الوقعت ليك
والله تنط ليك من السرير
لكن ماحاتتشعبط فيك برضو
|
Post: #4
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:15 AM
Parent: #2
حليل زمن الرجال البيجدعوا بالحيطة
والله انت بالذات جري لسوق الصاغة
عارفك لسانك طويل بس
وعارفك لاتستحمل دموع المراة
وكرفستها
|
Post: #6
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: bint algazeira
Date: 05-31-2003, 08:31 AM
Parent: #4
قول ليها انا ماشي احضر عرس صاحبي قال عايز يعرس في مرتو عشان زعلانه منو وصاره ليه وشها طول اليوم
ولا اقول ليك احسن جيب ليها قويشة دهب
ههههههههههه الله يهديك ياابوحراز
|
Post: #10
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:40 AM
Parent: #6
تحياتي بت الجزيرة
وينك ماباينة
وللا تكوني نطيتي الجبل
وركبتي البنطون مرة تانية
والله شيء جميل الواحد يقول ليها عاوز يحضر عرس صديقو
يعني معناها حاترمي البطانية وتقوم من السرير
ان كيدكن عظيم
قالت قويشة قالت
|
Post: #7
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: alsngaq
Date: 05-31-2003, 08:33 AM
Parent: #1
حروزة كيفك
تعرف لو مدت بوزها دي روعتها يا دوب ما بتظهر
والكلام يادوب معها بحلى لانو ح تكون ساكته تماما
بس اهم حاجة تستفيد من الفرصة دي كويس جدا وتطلع المشاعر
الحلوة الجواك كلها وصدقني بعد بوزيتها دي ح تشوف
ليك شهر كدا، تتمنى تاني كل فترة تكرمش وشها
وتمد بوزة مترين
|
Post: #12
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:44 AM
Parent: #7
alsngaq
كدي خلينا من دق المرة ودق الدهب
وخلينا من الكرفسة دي
انت وشك دا يطرحو ليك كيف
ما انت مكرمش أكتر من المرة دي ذاتها
غايتو كان وشك الفي الصورة دا هو وشك الحقيقي
ما اظن تلقى ليك مرة ولا مكرفسة ولامكرمشة
|
Post: #8
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: Hozy
Date: 05-31-2003, 08:34 AM
Parent: #1
اخي ابوحراز
انتم بتزعلوها مالكم
اصلا؟؟؟؟؟؟
مادام ماقادرين على الحردان والكرفسة
لووووول
والله موضوعك لذيذ
بس بيني وبينك النسوان جنوهم حردان اكتر من الرجال
ياربي يكون السبب شنو؟
تحياتي
|
Post: #13
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:50 AM
Parent: #8
Hozy
حقيقة
أن المرأة السودانية لاتزعل كثيراً
وابسط الأشياء ترضيها
وتتميز بفصيلة دم خاصة جداً
ارى أناس متزوجون
يتخاصمون
ويتشاجرون
وبعد قليل تجدهم سمن على عسل
المراة السودانية أكثر ماتحتاجه كلمة حب
ولمسة وفاء
وبارقة أمل
انها جميلة حد الدهشة
وانها رائعة رائعة رائعة
وعندما تحبها وتغوص في اعماقها
تجدها امراة مختلفة جداً
كم جميل لو بقينا اصدقاء
واعني هنا المتزوجون والمتزوجات
اعترف بأن الزعل هو من ضمن مكونات طبق الحياة الزوجية
ولكنه ليس الطبق الرئيسي
|
Post: #9
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: bushramk
Date: 05-31-2003, 08:37 AM
Parent: #1
قوليها واحد صرّا وشة ...وقع منه
|
Post: #15
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:55 AM
Parent: #9
bushramk
ما استغرب له
ان بعض النساء تكون في غاية الجمال عندما لاتصر وجهها
والأغرب انها تكون أكثر جمالاً وروعة عندما تكون حردانة
ياربي السبب شنو
|
Post: #11
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: elsharief
Date: 05-31-2003, 08:41 AM
Parent: #1
العزيز ابو حراز
ادق ليها ذهب عشان تانى ماتزعل
|
Post: #17
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 08:59 AM
Parent: #11
ياشريف
بالغت لكن
انت من هسي بتتجرس كدا
حاتكون مشكلتك كبيرة بعدين
قلت لي حاتكون زول دهب ساااااااااااكت
نوعك دا ياهو البخرب علينا السوق
هسي شايفك صاري وشك
قلت الزول دا أكيد حايقول لي
حا امشي اطلع العكاز المضبب منتحت السرير
تجي ياراجل تقول دهب
قال عشان ماتزعل قال
|
Post: #14
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: رؤى الســقيـد
Date: 05-31-2003, 08:51 AM
Parent: #1
اب حراز انت بى طريقتك دى ما ح تعرس
خليك زول ايجابى و اذكر محاسن النساء و ابعد عن الصرصرة و الحردان الله لا جابوا
و اقول ليك سر الحردان هو وسيلة الضعيف
هسى المسالة اتطورت و بقى فى نقاش و حوار وكدا
و الله يعرس ليك و يهديك
قال ظريفات قال
|
Post: #21
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:12 AM
Parent: #14
رؤى السقيد
بالتأكيد ستكون رؤانا مختلفة جداً
ونحن جيل الحوار والنقاش والآيسكريم وكابوريا
لكن بيني وبينك مرات بتجيهن حردة بطالة جداً
والله لاينفع معاها حوار ولا عدةولاملايات
لكن رغم كل ذلك
فالمراة السودانية مازالت وسوف تظل في نظري
امرأة بسيطة جداً وغير مرهقة وغير مكلفة
وزعلها احياناً يكون مجرد سحابة صيف
صدقيني
رأيت واحدة بالسعودية هنا 00 كان زوجها قاسٍ معها وفظيع جداً
وكان يسيء اليها في كل يوم
وفجأة تعرض اصبعه لبتر بسبب ماكينة في العمل
وعندما أحضروه للمنزل
كان بحالة سيئة جداً
ولكن زوجته كانت بحالة أسوأ
لقد بكته كثيراً وبكت آلامه وتألمت له
فكانت هذه اللوحة التي امامي اروع ما رأيت
فقد تجسدت صور الإنسانية بكل معانيها
وفي لحظة رمت بكل ثقلها وهمومها وذكرياتها المريرة
وتفرغت لهذا الإنسان
ما أجملكن 00 بل ما أجمل نساء بلدي
|
Post: #49
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: al_msaa
Date: 06-10-2003, 04:26 PM
Parent: #21
ياحروزة ، حمدا لله على السلامة ، ولا كفارة ، ولا البركة فيكم ،، ياخى لخبطتنى ما عارف اقول ليك شنو ,,, انت ما قالوا مته .. ولا دا منو دا ؟؟؟؟
والله انا بكيت جنس بكاء ،،، ياخسارة دموعى
|
Post: #50
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-10-2003, 05:44 PM
Parent: #49
المسا
مالك يا أخوي عاوز تلحقني جدي وحبوباتي
نحن الدنيا شفنا فيها شنو
طبعاً العبارة دي أكيد قاصدين بيها العرس
خلونا نعرس ونشوف شهر العسل البتكلموا فيهو الناس
وبعدين الواحد بعد كدا لو اتلحس ما مشكلة
قال بتاع الجبهة انا زولي لسه ما مات
ديل ناس شهيدا شهيدا شهيدا
دا كلام مهيرة طبعاً
|
Post: #16
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابو فاطمه
Date: 05-31-2003, 08:58 AM
Parent: #1
ابوحراز
شنو انت المدام زعلانه منك ولا شنو
المهم يا اخوي تعرف بعمل ليها شنو
بطيب خاطرى واحاول اراضيها
ياخي النسوان ديل جنس طيب وحنون ودايمن بيستحملونا
ما فيها اي حاجه لو نحن كمان استحملناهم
|
Post: #18
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:03 AM
Parent: #16
ابوفاطمه
هوووووووووووي يازول انا ماعرست لسه
لكن بيني وبينك البعرسها دي حا ابسطها خالص
اول شيء اول ماتزعل
حا أطلع ليها الكارت الأصفر
بسم الله الرحمن الرحيم
انا قلت الكارت الأصفر
اقصد الدهب الأصفر
حايكون جيبي مليان قوايش وحلق وسلاسل
اول ما اشوف خشمها عاوز يتلوي
بطلع لي مصيبةمن العندي
قال عكاز مضبب قال
|
Post: #19
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابو فاطمه
Date: 05-31-2003, 09:09 AM
Parent: #1
Quote: انا قلت الكارت الأصفر
اقصد الدهب الأصفر
حايكون جيبي مليان قوايش وحلق وسلاسل |
مقرش يا ابو حراز
اسمع سلف كيف
|
Post: #23
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:18 AM
Parent: #19
ابوفاطمة
طبعاً لو في قروش
اول شيء الواحد بيسافر نهائي وبيستقر هناك
لكن بيني وبينك الواحد ماعاوز يكشف عن اوراقو
بس منتظرين منكم كشف العرس
لكن الواحد مقرش في الجخ زي مابيقولوا
يعني الواحد لمن يسافر السودان
جخ شديييييييييد
كلو عشان تستقطب أكبر شعبية من الناس
ولكن حتماً عندما تدلف الى سرير النوم
تتعرى الحقائق حينها
وتشعر بنفسك أن رأسك لأسفل وأرجلك لأعلى
صدقني احلم بأن أجد مائة الف ريال فقط وليس مليون
والمشكلة عندما سافرت السودان في آخر إجازة
قررت أن أحلم بمائة وخمسين الف
لا ادري لماذا ؟؟
ولكن لنحلم كما نشاء
|
Post: #20
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: tariq
Date: 05-31-2003, 09:11 AM
Parent: #1
ابوفاطمة امممممم
قلت لىّ
|
Post: #25
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: قلقو
Date: 05-31-2003, 09:27 AM
Parent: #20
اخوى ابوحراز موضوعك دة بيذكرنى بى قصة الراجل الكل ما يعرس ليه واحدة فى خلال شهر شهرين تقوم تموت قام صاحبه سأله قال ليه ياخينا انت النسوان البيموتو ديل قاعد تلقاهم وين ؟
وسـؤآلى ليك انت النسوان المبوزات ديل بتلقوهم وين لأنو انا نفسى ومنايا القى المدام مبوزة وصاره قدومها عشان اردم ليك الجرايد والراديو وجنبهم كيس التمباك وادى ليك المدام عنقرتى وادخل ليك ى برنامج ثقافى حافل بدون نقة وبدون كلام كتير لكن وين ياصديقى دى احلام ظلوط.
قال دق ليها دهب قال
|
Post: #27
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:33 AM
Parent: #25
قلقو
اول شيء قلقو دي جاية من الزهج
والظاهر عليك انت مقلق اليوم كلو عشان كدا ماعاوز تديها اي فرصة تزعل
ذكرتني ود خالتي
ياخي دا مريض بالكورة لدرجة الجنون
يعني تلقى في بيته كل يوم عشرين جريدة بتاعت كورة
المشكلة والله يوم الزواج
عملنا الحفلة وبعد العشاء قلنا ليه اها امشي الكوفير جيب مرتك
تصدق قال شنو
قال ماقرا الجرايد لحد الآن
قام خالي قال ليهو
علي بالطلاق تقوم هسي تجيب المرة دي
اها رمى الجرايد في الكوشة وقام مشى جابها
بكرة وديتهم فندق النيل في مدني
صاحبك نزلت ليه الشنطة وشنطة العروس
كان جاء رفع المقعد
طلع كووووووووووم بتاع جرايد
قال شنو
عشان يتسلى بيهم في شهر العسل
والله لو كنت في مكانه رقم الغرفة ما حا اقراه
دا وقت جرايد
قال جرايد قال
|
Post: #22
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: bint_alahfad
Date: 05-31-2003, 09:16 AM
Parent: #1
سلامات
الراجل الواعى بيعرف يراضى المرا لما تكون ذعلانه..ويحسس المرأه أنو مستعد أنو يعمل المستحيل عشان يرضيها ما يعملها كأنو واجب وخلاص ولا يعاند هو كمان ويصر وشو لأنهم كده عمرهم ما حيتصالحوا والمرأه لو لمست صدق راجلهاوكبكبتو فى الأمور ده بالذات حتقدروا شديد..بس أهم حاجه يسرع يراضيها لأنو كلما تأخر كلا تعقدت الأمور أكثر
وفى أمان الله
لا اله الا الله
|
Post: #24
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:26 AM
Parent: #22
bint_alahfad
بالجد رد جميل ورائع جداً
وقد منحتيني ابتسامة في هذا الصباح العابس
يعني معناها الكبكبة بتلعب دور كبير جداً
فكلما رأتك زوجتك زول بتاع كبكبة كلما دخلت في قلبها
جد عندنا رجال مطيعين وظريفين جداً
اها معانا واحد هنا
دا شفتي في الكبكبة دي رقم واحد
القروش عند مرتو
والاقامة عند مرتو
وبطاقة البنط عند مرتو
ومفتاح العربية عند مرتو
ولمن يقول ليك ام مازن
خلاص الكلام انتهى
اها انشاء الله بعد الزواج حانستفيد من تجربتو
|
Post: #26
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: كوليل
Date: 05-31-2003, 09:32 AM
Parent: #1
الاخ أبو حراز
والله لانو أنحنا عشان ماقادرين نرضيهم
خليناهم عديـــــــــــل كدة مادام بتعرفو تعرسو
لازم كمان تعرفو ترضو
ده ذاتو الحامينا
|
Post: #28
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 05-31-2003, 09:44 AM
Parent: #26
كوليل
الله يجازيك ضحكتني
تعرف في ناس المشكلة بيعرفوا يعرسوا ومابيعرفوا يرضوا
والبغيظني شديد جداً
في بعض العزابة بيعرفوا ياكلوا ومابيعرفوا يسووا الأكل
والمشكلة الكبيرة وين
في بعض الناس عندهم عوارة بلا حدود
ومابيعرفوا اي شيء عن العرس
اها والله دي حقيقة حصلت عندنا قبل ايام
واحد متزوج مصرية وطلقها ثلاث طلقات
وحاول يرجع ليها
المهم زوجوها لواحد عوير وابله هناك
عشان يطلقوها منه ويتزوجها زوجها السابق
اها الراجل حلف يمين وقال مابيفكها
دي مرتو وهو حر فيها
تصدق أخيراً طلع بشقة وسيارة بيجو عشان يتنازل
قال عوير قال
السعودي طبعاً صاحبي شديد
قلت ليه هسي لو سقتني معاك وعرستها ليك لمدة يوم واحد بس مش كان أحسن
لأني حتماً سأتنازل عنها
|
Post: #29
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: Ahmed satoor
Date: 05-31-2003, 10:28 AM
Parent: #28
حرزرز
غايتو اسمع كلام المجرب
لو شـــفت حردة زى دى اول حاجة تعملها اعمل ما شايف ، وكمان ياريت تشيل التليفون وتخلق ليك قصة وكمان تضحك من جو قلبك (طبعا مافى زول فىالتليفون عشان ما يعتبرك مجنون ) وطوالى تلبس وتطلع واعمل مستعجل وما تنسى تودعها بطريقة كويسة بالرغم من إنها ما حترد طبعا ،
غايتو لو زوجتى بتقرا فى البورد حسع وشافت البورد ده ،طوالى تجهز لى سرير ياخوى - غايتو حتدخلنا فى مشاكل بس ادعو معاى ماتكون جنب الكمبيوتر.
|
Post: #30
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: maia
Date: 05-31-2003, 10:51 AM
Parent: #1
ابوحراز
بس قول لي انت بتجيب الحاجات دي من وين ، والله احييك دي خبرة ما عادية في المراة السودانية ام تكشيرة شفت بالظبط زي الركشة لما تبوظ في نص الكبري
يعني يعملوا ليها شنو؟؟ ، وبعدين بصراحة في نسوان الزعل ده هواية عندهم يعني الوحدة لو ما كشرت او زعلت بتجيها حالة نفسية
وامورها بتجوط
يعني تقول الدنيا ناقصة تكشيرة
|
Post: #31
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: falcon
Date: 05-31-2003, 11:07 AM
Parent: #1
ابو حراز
و الله نفسي في بويزة و حردة ذي دي
تعرف عندي ورق و حاجات عاوزة ترتيب ليها زمن
و اهم شي انو الواحد يقدر يدخل البورد بدون مقاطعة
او يشوف التلفزيون بدون كلمة عاوزين المسلسل
دا اذا دخلت و لقيتها مبوزة بالليل
اما بالنهار
طواااالي علي مطعم الكبسة
لك التحية
|
Post: #32
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: khalid zamrawi
Date: 05-31-2003, 11:16 AM
Parent: #1
العزيز / ابو حراز
السلام عليكم ورحمة الله وبركاته ،،،
حقيقة المرأه مخلوق رقيق و حساس للغاية
وإذا تطرقنا و أسهبنا بالحديث عن كينونة المرأه لوجدت بداخلها مخلو ق أخر غيرنا تماماً " ورفقاً بالقوارير "
و المرأه ليست الزوجة فقط بل هى الأم و الأخت و الخالة و العمة
و كون أن الرجل حباه الله سبحانه و تعالى بالقوة وحتى بالميراث للذكر مثل حظ الأنثيين فهذه عظمة بحد ذاتها تجعنا نتصرف من خلالها و أن نتعامل مع المراه هذا المخلوق الحساس و التي تفيق حساسيته الزجاج فهو يؤثر و يتاثر بجميع العوامل المحيطة به سواء الداخلية و الخارجية و تظهر عليها تلقائياً و من الممكن أن نتعرفعلى مزياجيات المراه حتى من دون توجيه السؤال المباشر لها و نبدأ بالتعامل معها و تفريج همها و إحساسها بالأمن و الأمان و بعدها سوف ترى عجباً من الأمر
لا كرفسه و لا حردنه و الله المستعان
|
Post: #33
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-03-2003, 07:04 AM
Parent: #32
maia
أول شيء غبت يومين جيت مالقيت مرتي الحردانة
*************
قلت لي الواحدة مرات تكون زي الركشة
فعلاً بعضهن لما الواحدة تزعل بتجيب خبرك
والمشكلة في واحدات منهن الواحدة لمن تشوف أمها تزعل قدام راجلها
وتعمل ليك فيها خلاص هي الكل في الكل
بس برضو زعلنا مجرد سحابة صيف
اعرف أنه سينتهي
بكلمة حب او مودة
أو ملايات كأضعف الايمان
او الزيارة لمسجد الصائم ديمة في مدني حيث تكثر محلات العدة
قالت ركشة قالت
فالكون
الله يجازيك 00 عاوز تمشي تاكل الكبسة وتخليها حردانة
ذكرتني واحد أخونا
زوجتوا عندها شراهة غير عادية
شراهة طبعاً في شراء الثياب والريحة
أها هو معانا في الطائف
دا طبعاً طوالي بيعمل معاها شكلة أول مايصل مجسم المصحف
يعني قبل جدة بحوالي ثلاثين كيلومتر
اها قوم يا القدوم
وتبويزة لحدت جدة
وكمان مابتمشي السوق
شوف الظرافة دي كيف
صاحبك لمن شاف الشغلانية ماشة كويس
بقى بس متين يصل مجسم المصحف
يخلق شكلة من من العدم
زمراوي
كلام جميل جدا وفي الصميم
بالفعل المراة مخلوق رهيب جداً ورقيق وحساس ونضام
لكن حكاية زجاج دي بختلف فيها معاك
مرات الواحدة فعلاً تتحول الى زجاج لتكسر رأس زوجها
خاصة لو كان من النوع العكليد
وطبعاً لايفل الزجاج الا الزجاج
ولكن كما ترى فإنني اتعاطف كثيراً مع المراة السودانية
وذلك لشعوري انها تمتلك احساساً مرهفاً
وكل شيء عندها مؤقت
فلو وجدت الحب والكلمة الرقيقة والوفاء
فانها بالطبع لاتحتاج لأشياء أخرى
فهي يهمها الأمور المعنوية
|
Post: #35
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: khalid zamrawi
Date: 06-03-2003, 09:36 AM
Parent: #33
أبوا حراز
تسلم ياسيدي على الإطراء
و على فكرة أم العيال رجعت ولا لسه
|
Post: #36
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-03-2003, 09:42 AM
Parent: #35
زمراوي
عيال شنو
والله للشيء الشفناه ما أظن الواحد يعرس
اول شيء عاوزين نكمل الإغتراب
وبعدين القراية
ونشوف موضوع العيال
قال عيال قال
عيال شنو البنجيبهم الآن
شوال العيش خمسين الف
والرغيفة الف جنيه
ياخوي لازم الواحد يتريث شوية وبعد ماتخف الأسعار بعد كدة نتوكل على القفص الذهبي
خال فاطنة
وينك انت ليك مدة ماباين
اشتقنالك بحرارة
قلت لي حاتجيب معاك وردة
بتقصد وردة الجزائرية
بالمناسبة
ليه السودانيين مابيهدوا ورود لزوجاتهم
والله متمني اشوف لي واحد شايل ليه زهرة حمراء
وماشي بيها على البيت عشان يهديها لزوجته
ماشرط المناسبة
في رايي ان كل الثواني الزوجية يجب ان تكون مناسبات
|
Post: #34
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: khal fatma
Date: 06-03-2003, 08:13 AM
Parent: #1
ابو حراز تحياتي يافاكهة البورد
بس في الحالة دي
بطلع من البيت طوالي
وبغيب لي كم ساعة
وبجي ومعاي وردة
ودمت
|
Post: #37
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: khal fatma
Date: 06-03-2003, 09:47 AM
Parent: #1
looooooooooooooooool
لاقصدي وردة حمراء
مش جزائرية
ماتجيب لينا مشاكل يابوحراز
|
Post: #38
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-03-2003, 11:02 AM
Parent: #37
خال فاطنة
قال وردة حمراء قال
انت الظاهر عليك عملتها
خاصة انك غبت ليك فترة طويلة
شايفك مخلوع كدا
تكون خلصت من شهر العسل وفكيتوا ناس ابوحراز في الهواء
|
Post: #39
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: شرير والبرتقاله
Date: 06-03-2003, 12:07 PM
Parent: #38
سلامات
موش المكوه بتفرد المكرمش
اشيل المكوة وعلى اقرب بلك اشغلها
كلما صرت وشيها وكرمشتو
نعمل ليها العملية التجميليه دي
واهي كلها محاولات للاصلاح
|
Post: #40
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: alfatih
Date: 06-03-2003, 12:26 PM
Parent: #1
ابو حراز يا خوي
....علي الطاحونة كلامك صحي
المرأه السودانيه دي اجمل حاجه شفتها
في حياتي....تقول لي التانيات ديلك ؟
المرأه السودانيه وكت تمد بوزا يعني بتعبر مرات عن
حبها بطريقه غير مباشره .....ودي محاوله شفتها عن قرب
كلمه صغيرونه تكفيها .....لكن وحات المكاشفي
شوف عيني ..الخواجات ديل المرا تزعل .....طوالي بتفكك عكس الهوا
وتشوف واحد تاني ...حتي كان عندها عيال
|
Post: #41
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: nile1
Date: 06-03-2003, 12:41 PM
Parent: #40
أبو حراز كيف حالك
متكرفسه دي ما خلاص جاااااهزه.....بس شوال وضهرية العربيه والخــــلا..وتشوف ليك كديسه تانيـــه...وبركه الجات منها
|
Post: #51
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-11-2003, 06:23 AM
Parent: #41
نايل1
انت اليومين ديل تنطط ساااااااااكت
الجماعة سافروا وللا شنو
قلت لي عملتها زي كديسة الخلاء
طبعاً عندنا واحد من العزابة اسمو الكديسة
طبعاً دا متكرفس اليوم كلو
ومابحب الشغل نهائي
انت عارف الكدايس لمن تأخذهن من البيت وتمشي ترميهن في الخلاء
المغرب تلقاهن رجعن تاني
اها دا لمن يوصفوا لينا شغل
نقوم نوديه
قبل مانرجع البيت
نلقاه رجع قبلنا
طبعاً يعجبك
لاصابونة حمام ولا بشكير ولامعجون ولاملاية ولابطانية ولاسرير ولاتمباك
كل شي سلفقة
|
Post: #42
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: khal fatma
Date: 06-10-2003, 09:45 AM
Parent: #1
العزيز ابو حراز
صحيح انا غبت مدة
بس جيتكم زي لمن مشيت منكم
ودي شكلي مابعملها قريب
عشان كدة لزلت اعتقد في الوردة الحمراء
كما يقول لي بعض الاصدقاء
من من تبدلت ورودهم الحمراء الى حلة الملاح
|
Post: #43
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-10-2003, 10:47 AM
Parent: #42
بالله من أكثر من ثلاثة ايام بفتش للمرأة الحردانة دي
لأني عاوز ارد على بعض الأصحاب الأعزاء
شكرا خال فاطمة
قلت ياربي المصيبة دي غتست وين
تاريها لسه مكرفسة
اها برد ليكم كلكم
طبعاً في بعضكم رد عن طريق المسنجر
لكن مفروض الواحد يكون واضح ويقول رايه عدييييييييل
الظاهر انهم ديل متزوجين
قال مكرفسة قال
|
Post: #44
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: Osama Mirghani
Date: 06-10-2003, 11:11 AM
Parent: #1
شوف يا أبو حراز..أنا حأديك خبرة 22 سنة ...الضلع الأعوج ده ان قمت تصلحه كسرته وان تركته لم يزل أعوج...فيا أخوي أنا أشوف أحسن تتركو أعوج بدل ماينكسر...يعني لو صرّت بوزه انت تعمل أضان الحامل طرشاء.....وده أقسي ما يغيظ أي امرأة...وحا تلاقي البوز رخي..وتوفر عليك مشوار الصايغ واللي هو أسوأ حل
...
لكن مش فعلا الزوجة شر لابد منه...لكن شر لذيذ
|
Post: #45
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-10-2003, 11:22 AM
Parent: #44
اسامة
ضحكتني ياظريف
الظاهر انو اسامة مردخ
الله يستر على عمنا ميرغني
قت لي تعمل اضان الحامل طرشاء
يعني تهميش الحكاية لحدت البوذ مايرجع للحالة الطبيعية
اغرب شي
واحد قال لمن زوجتو تحرد وتتكرفس
بتاكل اليابس على الأخضر
يعني حالتها دي بتصاحبها حالة جوع وفوضى
قلت ليه الله يستر من الحالات التانية
طالما الفوضى في الجوع بس كتر ليها العيش والويكة
واحد قال لي عبر المسنجر انو زوجته لمن تحرد
بتقوم بتعضي المخدة
قلت ليه 00 المهم اعمل حسابك وكتر المخدات
|
Post: #46
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابو جهينة
Date: 06-10-2003, 11:44 AM
Parent: #45
أبو حراز : سلام كبير و مربع
حكاية حصلت هنا : في واحد متزوج و لسع ما جابوا أولاد. المهم الزوجة كثيرة ( الحرد ) و دايما زعلانة. عندها أختها هنا في حى تاني غير بعيد منها.
المهم مرة من ذات المرات حردت و مدت بوزا لغاية ما بقى قدر ( شلوفة الجمل ) و قدر ما حاول يراضي ، شي ملايات ، و شي حلل بريستو و شي إستشوارات ، و شي و شويات ، برضو مافي فايدة. المهم راحت عند أختها و الموضوع كبر في راسا.
زولنا إتصل مرة مرتين ، و بعد داك زهج و سابها بعد ما عديلو ( زوج أختها ) قال ليهو أتقل شوية.
المهم مرت أيام ، ثم أسبوع ثم أسبوعين ثم شهر ، أها الزوجة قلقت، قالت كدي أنشوف الراجل دة مالو مطنش. ضربت تلفون ، ردت عليها واحدة ( غنوجة ) :
آآآآآآآآآآآآآآآلو
إنت منو ؟
إنت الضاربة ولا أنا ؟
دة مش منزل فلان ؟
آآآآآآآآآآآآآآآآآآآآآي ، و إنت منو ؟
أنا مرتو.
آآآآآآآآآآآآآآآآآآآآآآآآآآآآآآ ، قولي مرتو الأولانية العاوز يطلقا ، أنا مرتو الجديدة. و تاني لو سمحت ما تضربي هنا. و بالمناسبة دي ، عفشك القديم كلو بعتو ، و جبنا عفش جديد لنج. أها ، لو سمحت ، حلة المحشي ما تتحرق مني.
---
و بالفعل طلقها نتيجة حردة لم تكن لها داعي أن تطول.
معليش طولت عليك. عافية
|
Post: #47
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: willeim andrea
Date: 06-10-2003, 12:02 PM
Parent: #1
ابو حراز والمطر... تعرف يا ظريف انا غايتو بعمل نايم... .. الا كان دهب ابيض... قال دهب فال ...
|
Post: #48
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ABUHUSSEIN
Date: 06-10-2003, 12:49 PM
Parent: #1
إنت مالك و مال مرتنا حتى دي إنت كمان عايز تعرفها
يا خي لم تعمل ليك مرة أسأل نفسك السؤال دا و جاوب
و بي صراحة كـدا إنت غايتو بت الناس البتقبل بيك دي
و طبعا حا تكون فـدائيـة و قنعانة من كـل الدنيا
غايتو دي من أول يوم حا تكون مكرفسة وشها و حردانة
لأنو شكلك إزعل و إحـرد.
|
Post: #52
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: aboalkonfod
Date: 06-11-2003, 11:20 AM
Parent: #48
الأخ ........ أبوحراز لك السلام
إذا المرة مدت بوزا مترين ، وكرفست وشها
وإتغطغطت بالملايات، والبطانيات .. ونست
الوليدات .. والبِِنيات .. وأهملت الأكلات
.. والشايات .. وعمل الجبنات .. المدنكلات
ونست جميل .. الكلمات .. والعبارات المنمقات
وقلبت البهجات .. والمسرات .. لي نكايات
وحرمت الزوج من المعانقات .. ولذيذ الرشفات
وعملت طناشات .. ونظام الما شايفات
وبالدس بقت الأكلات .. لمن الزوج يكب المخارجات
والزوج جوة البيت .. عاملات صايمات .. وحردانات
والوزن بدل ينقص زادلو .. كيلوهات وجرامات
وزولك بقا زي الكديسات ..
المحصورات في الزقاقات ..
ورقد رهيف ورقيق .. زي الطايوقات
منع المرقات .. والزيارات
وفي الشغل أدوهو الانزارات
بالقطاعي ... وبالجملات ..
ولي أصحابو ختا ناااشف ..
وقطع الأرحام ... والصلات
حالتو بقت تحنن .. المسلمات .. والكافرات
بقا زي اليتميات الفقدو الأباء .. والأمهات
... أها يا أخوي في الحالة الزي دي بعلن حالة
الطوارئ .. وبدق ليها "ظار" .... لأنو بكون
راكب المرة جن كلكي أحمر، الجن الزي دة اسمو
المشوطن ... بضبح ليها جدادة حمرة .. وبلبسها
صديري أحمر .. وبجيب ليها خلال " بضم الخاء" 3
لأنو في أحتمال يكون راكبها يا أحمد البشير
العربي .. يا الجن الحبشي .. والأتنين ما ساهلين
وإذا طلبت كباية عركي مدنكلة .. شيل شيلتك ..
وسجم خشمك والرماد كال حبوبتك، ومرة جيرانكم ..
مرة جيرانكم طبعا .. حا تغير من الدلع الظاري
دة .. وحا تعمل فيها دايخة .. لزوم الشراب وكدة ..
وبرضو حا تمد بوزها لي زوجها عشان يعمل ليها ظار
بالوصفة حا تكون إتخلصت من مد بوز المرة ..
المصيبة الأكبر في بوزك إنت يا أخوي أبوحراز ..
لأنو بوزك حا يبقا زي خرطوم الموية بتاع ناس
الحريقة .. بعد ما .. دينك .. وجيبك إنقدة
والحال حا يتقلب .. إنت بوزك مادي قدام ..
والمرة بعد ما قرطعت "المحروق" بوزا بقا مطروح
.. يعني بعد دة الفرصة أمامك للتعادل ... كيف
خليها للمرة الجاية ..
قال دهب قال ... أنا ما بني شنقول، ولا ساحل الدهب
أها ودعتك الله
|
Post: #53
Title: Re: أها لو لـقـيت مرتـك مكرفسة وحردانة بـتـعـمل ليها شنو ؟؟؟
Author: ابوحراز
Date: 06-15-2003, 09:58 AM
Parent: #52
جهينة
والله الراجل دا سواها في المدام المكرفسة دي
يعني ولا اتلفت يمين ولاشمال
زعلت قام عرس فيها
والله الدنيا فيها مصائب عجيبة
قال روضة قال
وليام اندريا
كيف تعمل نايم والمدام مكرفسة وحردانة
لازم يا أخي تتلحلح شوية وتمشي ل سيد الدهب عشان تشوف ليك حل
قالوا مرات الزعل حالة من حالات الحب
يعني حياناً تريد ان تلفت النظر اليها
وان تجد الإهتمام الكافي
والدهب الكافي
والملايات الكافية
شد حيلك يا اندريا
القال ليك تعرس من بدري منو
ابوحسين
حسين أخبارو شنو
قلت لي بت الناس حاتكون حردانة مني يعني
لا ماتخاف انا حا ابسطها ليك خالص
ماتفهمونا غلط
يعني بالذهب والملايات والعدة والكلام المعسول الجميل
تاني عاوزة شنو أكتر من كدا
ودخاتي كان عاوز يرحل المدام
من أهل العوض للخرطوم
بالله دي مش طفرة كبيرة جداً
اها يوم جاء بالعربية عشان الرحيل
لقى ليك بيت ناس حماتو بكاء طالع للسماء
هوووووووي ياناس المات منو
قالوا ليهو مش انت عاوز ترحل المرة
اها 00 لمن دخل لقى المدام تبكي بحرقة وامها وحبوبتها
المشكلة أمو ذاتها لقاها تبكي معاهم
اها خم المدام من وسطهم وركبها في العربية
وقام سألها في الطريق
بتبكي لشنو يابت الحلال
قامت قالت ليهو : دي حركات جيش ياظريف
قال رحيل قال
بستغرب الواحدة لمن تجي ماشة شهر العسل بتبكي لشنو ؟؟؟؟
والبستغرب ليهو أكثر صديقاتها بيبكن برضو
والمشكلة مرات وزير العريس بيبكي
دا شهر عسل دا وللا مقابر ؟؟؟؟؟
ابوالقنفد
والله ابوالقفند صااااااااااااااااح
صديقة خطيبتي زي السحلية والمشكلة بتخاف من ابوالقنفد
تعال هنا
النضمي الكتير بتجيبو من وين
قال جن كلكي قال
لو انت بالهترشة دي
ما أظنك تدي المدام فرصة تحرد وللا تتكرفس
|
|