Post: #1
Title: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-14-2003, 12:05 PM
Parent: #0
اول شيء الكديسة الكتلت هاشم ميرغني مفروض نفك فيها كلب سعران
معليش قبل كدا انا وعمي كنا راكبين لوري لقينا لينا كلب ضالي قلنا نعمل فيهو خير ونركبو معانا
تصدقوا حلف بالتكتلوا مايركب وراء
وبعد عشرة محاولات ولم تـنـجح كلها نزلت انا من جمب السواق وركبناه قدام
طبعاً مابنوم الا في السرير
ولو رميت ليهو كسرة و لحمة في الأرض مابياكلها
الا تديهو في الصينية
أخيراً اكتشفنا انو حق واحد خواجة وبسرعة رجعناه لأنو بالطريقة دي حايكمل علينا لحمنا وملاياتنا 00 ذكرني كلب الفنان ود الأمين 00 دي قصة تانية طبعاً
بالله كلابنا نحن طاقاها جنس شفقة
الراجل جاء يشيل لينا الفاتحة ورمى الكيس حقو في الأرض
قوم يا الكلب أخطف الكيس وأجري
والحلة كلها قامت ساكة الكلب لمن الراجل المغترب قال ليهم الكيس دا فيهو اقامات جاية من السعودية
وتاني جاء راجع كمل لينا الفاتحة
مالكم ياناس البورد جنيتو وللا شنو
عاوزين الصراحة وماتزعلوا مني
البورد اليومين ديل زي المرة الشينة
تعاين ليها المرة الأولى بطنك تطم
ولو تجرأت وعاينت المرة التانية لازم تخت جمبك جردل مليان تراب
طبعاً ماتنسوا قفة الليمون بتاعت عمو قرجة
وسياستكم دي كوم وباندوثكم كوم
والإنتحار الجماعي لآنسات البورد دا كوم تاني
طفشتوهن كلهن
كان هذا البورد مليئ بالرحيق والأزهار والفراشات وقوارير العطر
والآن كلو أنابيب غاز
كمان شنو 00 قال أساسي الجميل قال
بعد شوية واحد يطلع لينا ويقول لينا بدر الدين شنا الجميل
والمشكلة صاحبي وصديقي العزيز فلان 00 والله اسمو ناطي لي في حلقي
تفتح الباب تلقاه
تفتح التلاجة تلقاه
تفتح الإقامة تلقاه
تفتح حلقك تلقاه
تفتح المضاد الحيوي تلقاه
تفتح غتاية الحلة تلقاه
تحدثوا لنا عن السودان البسيط
حيث الحب بلا حدود والنخوة بلاحدود والرجولة بلا حدود والجمال بلا حدود
ارضعونا من الوطن 00 نريد ان نشرب من الأزيار
ان نجلس تحت الرواكيب
ان نأكل الكسرة والعصيدة والقراصة
ان نركب حمير اللبن 00 ان نصلح السراير وناكل فول الحاجات
نريد ان نزور المرضى في كل بقاع بلدي
وان نطمئنهم رغم اننا نعرف انهم في الرمق الأخير
السودان الآن يغتسل بالأمطار من الحزن الذي الم به
بغتسل ليداوي جراح الأطفال والمكلومين
اجلسوا لنا في بيوت العزاء
انقلوا لنا مايدور هناك
الحاصل شنو في سوق المدينة عرب وعناقريب ابوعشر وسمك الموردة
دا كلو نحن ماعارفين عنه حاجة
الأمطار تحتضن وطني من حلفا الى نمولي
ولاتهتم بما يدور في ميشاكوس
والقاش يوشك ان يلتف حول خصر كسلا ويقبلها
والنيل المتعطش للفيضان كتب وثيقة زواجه على كل المدن التي مر بها
والسوباط يكاد من فرط حبه لأهلي في جنوب السودان
يكاد ان يلتهمهم
اسبوعين وأنا احضر خطبة الجمعة في هذا البورد
طبعاً بمشي المسجد زول صلاة سااااااااكت
انقلونا الى السودان البسيط
أحملونا من مقاعدنا لنشتم انفاسه
ونتذوق رحيقه ونضم أهله ونقف اليه
المشكلة ما اقدر اشاكلكم لأنني سأشاكس وقتها فصيلة دمي وانفاسي
ومايحيرني أكثر أنكم أحبتي في هذا البورد تختلفون كثيراً
ولكن هسي لو كانت في سماية
تأكلون كلكم على صحن واحد
الكوز منكم
والكورة
والصحن المطرقع
وكراع العنقريب
والقطية
وغتاية الحلة
قال كديسة قال
|
Post: #2
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: سجيمان
Date: 07-14-2003, 12:11 PM
Parent: #1
الحمد لله......انا زول شلاليف ساااااكت
|
Post: #3
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-14-2003, 12:14 PM
Parent: #2
ياساتر
قال شلاليف قال
|
Post: #10
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Habib_bldo
Date: 07-14-2003, 12:29 PM
Parent: #3
أبو حراز يا حبيب قلبي سلام وتحية
بمناسبة الحمير والبرسيم والشجر سأكتب بالأخضر
الذي هتف به جماهير شعبنا في أكتوبر
وسأجعل الأرض تغني لنا ولك ولكل جميل يا أبوحراز
تعرف سبب تخلفنا عن ركب العالم شنو يا أبوحراز؟؟؟
ما تجهد نفسك في الإجابة ... أنا بجاوبك
خلينا الشغل وقعدنا للنضمي في البيخصنا والما بيخصنا
والبنعرف ليه والما بنعرفه
المهم إننا نخلق جدال ونقاش في الفاضي والمليان ونتخاصم في لا شيئ
ويا ريت أحلامك تتحقق وكل كلامنا يكون في الحب والسلام
ونعلم أولادنا نخوة وشجاعة السوداني لأني شايف كل الاجيال الطالعة
أجيال منهزمة ومليئة بأحاسيس الضآلة والكآبة
دعونا نذكرهم بقيمتهم الحقيقية حتى يخلعوا ثوب الذل ويلبسوا ثوب التطلع للمجد والعزة
معليش كلامي أصبح زي خطب جعفر نميري زمان الله لا زكرنا اسمه
|
Post: #22
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:16 AM
Parent: #10
حبيب بلدو
لك التحية ايها الأخضر وأنتي تمطرني بكلمات أكبر قامة مني 00 كلماتك جعلتني استغيث بحمامة نوح أن تأتي لي بغصن من الزيتون
صدقني انا لست ضد السياسة وكثيراً ماكتبت في الشرق الأوسط مواضيع سياسية 00 ولكن 00 الى متى نظل ننعق وجرح سوداننا ينزف 00 حرب في كل مكان 00 السوادني يقتل أخيه السوداني 00 والأطفال الأبرياء يتمزقون 00 لماذا الكلام الكثير والحكاوي التي لاطائل منها 00 لماذا لانجلس سوياً ونوقف هذا النزف 00 ولماذا كلما حاول وطني ان ينهض على قدميه تقوم شرزمة من ابناء الوطن بطرح الوطن على الأرض لينزف من جديد 0 آلاف الأمهات الأرامل وملائيين الأيتام كل ذلك بسبب السياسة المعوقة 00 نريد أن يكون السودان لكل السودانيين مثلما المطر والهواء 00 نحن شعب يشع بالسماحة فلماذا لانوظف هذه السماحة لكي نجعل السودان وطناً لكل سوداني
|
Post: #5
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: shiry
Date: 07-14-2003, 12:21 PM
Parent: #2
سلام مربع
بلاش نسيس النكته او نعنصرها
بعدين يجوا يقلبوا لينا
الطشت في وشنا
حلوه الطشت دي
قالو واحد متفلهم جدا جدا
خش السينما
وضع (البسكليته) بتاعتو
لمن جاء طالع لقى البسكليته
سرقوها
ما لقى حاجة يقولها
قال ليهم
بالله ياجماعة دي الفاظ دي
كنت عايز اقول ليك
يا ابو حراز
عامل جضومك دي
بالله دي الفاظ دي
هاههاهاهاهاها
امازحك ياشفيف
ماتقوم تحرش علينا الناس الشاكلين ديلك
ناس اساسي السمين
والله ابكي ليكم البورد كلو ما يوقف دموعي
|
Post: #23
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:31 AM
Parent: #5
شيري
اتمنى ان لا اسحرك 00 فالكلمات عندك تتشكل وتتطوع وتنثني لتخرج لنا في النهاية بلوحة في غاية الروعة والجمال 00 احس بأنفاس السودان في كلماتك وبطعم وحلاوة وطني مابين الحرف والحرف عندك 00 حتى الجضوم التي كتبتيها هنا تحمل نكهة خاصة وألقاً خاصاً 00 قالت اساسي السمين 00 بالغتي عديل 00 اساسي دا راجل رشيق جداً والله افتكرتوا بياكل مع نعومي كامل او ليز هيرلي وكلوديا شفر00 قال رشيق قال
انتو تعالوا هنا
الزول الإسمو سجيمان دا فك لينا شلاليفو دي وتاني ماجاء ياخدها 00 ليه
|
Post: #4
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ود العجمى
Date: 07-14-2003, 12:19 PM
Parent: #1
ابوحراز
والله مرة انا وشنتير كنا بنقطع فى ناس البورد
ولما جات سيرتك شنتير قال لى ابوحراز دا السودان زاتو
احبك جدا يا سيد السماحة
يا بكرى ابو بكر لو لينا عندك خاطر ترفع البوست دا
فووووووووووووووووووق
|
Post: #7
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: HOPELESS
Date: 07-14-2003, 12:22 PM
Parent: #4
ابو حراز
القاتل اسمو كديسه محمد كديسه
كديسه واحده ما كفت
قال كيس فيهو اقامه قال
|
Post: #25
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:40 AM
Parent: #7
هوبليس
انا عارف انو الراجل مابيقصد شيء
وأكيد يكون متيم مثلنا بحب الفنان المتالق هاشم ميرغني
لكن دائماً التريث في مثل هذه الأخبار مطلوب 00 يعني واحد قبل فترة كان عاوز ليهو شيك عمرة 00 أها سألناه الأحوال كيف والمات منو 00 طوالي بالشفقة دي قال لينا اتوفى فكي عبد الرحمن 00 طبعاً دا راجل مهم جداً عندنا لأنه تميز بتحفيظ القرآن وله اقارب عندنا هنا 00 اها يازول فرشنا وشلنا الفاتحة والبكاء مايديك الدرب 00 وفي الآخر لقيناه واحد تاني 00 يعني عبد الرحمن تاني والمشكلة قريب واحد تاني من الجماعة 00 تاني مشينا شلنا الفاتحة والفراش طبعاً من جديد تلاتة يوم + تلاتة يوم سلفقة ساكت
بعيداً عن السياسة
تعال هنا ياراجل 00 انت مسجل في البورد يادوب ليك شهرين وعندك الف وخمسمائة مشاركة 00 يعني عاوزين تاكلونا حنك سااااااكت قال هوبليس قال
|
Post: #8
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Shinteer
Date: 07-14-2003, 12:26 PM
Parent: #4
ود العجمييييييييييي .. صاح أنا قلت ان ابو حراز ده السودان زاتو. لكن مش قلت ليك خلي الكلام ده في سرك؟ شكيتك علي سيدي أب جلابية
|
Post: #24
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:37 AM
Parent: #4
ود العجمي
بس كلمة [] أحبك [] دي لو كانت من بنت كان حاتكون طاعمة جداً لكن ياخسارة 00 قال بحبك قال 00 والله في حلتنا تقول لولد أحبك يسكوك من الحلة لحدت استراليا كداري سااااااكت 00 طبعاً مرة اشتكيت للمدير واحد وسيم جداً في المرحلة المتوسطة وطبعاً بعد ماشاكلتو 00 لكن مرات ماعارف ليه الواحد لمن يكون وسيم ويجي يشتكي ليهو واحد شين الناس كلها تتعاطف مع الوسيم ماعارف السبب شنو 00 أها قلت الراجل دا لازم اتغدى بيهو قبل مايتعشى بي 00 اها قلت للمدير : والله هيثم دا قال لي بحبك !!!! المدير لأول مرة يضحك قام قال لي : عليك الله ياعثمان امك حصل قالت ليك أحبك 00 قال هيثم قال
|
Post: #6
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Shinteer
Date: 07-14-2003, 12:22 PM
Parent: #1
ازييييك يا ابو هشاب. يبدو لي أبو طلح أحسن لانو جنك حطب وكماين
وين انت يا رايق؟ سمعت انك مختفي في برميل عسل .. تجلبغ سااااااي لحد ما كمل حتين جيت هنا
|
Post: #26
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:44 AM
Parent: #6
شنتير
ع س ل
والله لسه ماغتست في البرميل دا
لكن اليومين ديل جابو لينا شريط فيديو بتاع عرس من السودان
شوف ياشنتير آخر الزمن 00 أهل العوض بقوا يصوروا الحفلات بالفيديو 00 سبحان الله 00 من التكل والعواسة ونقل الموية انتقلوا الى باناسونيك وسوني وجي في سي 00 دنيا عجيبة
والمشكلة شنو الفنان من منطقتكم 00 والله ليهو دغيجة 00 بس زي قرمة اللحم 00 وبيغني كمان سيد الإسم 00 الله يرحكم يا الجابري 00 طبعاً الشريط فيهو حاجات ظريفة جداً 00 بالله في بنات خلينا اعمارهم تسعة وتمانية سنوات لكن هسي 00 عيييييييييييييييييييييك 00 الشغلانية عجيبة جداً 00 طبعاً أنا أمي خالص في الأمور دي 00 اها قاعد معاي واحد مترجم من ناس كابوريا وكارل لويس 00 واحد جنو حفلات 00 اها بسأل 00 دي مني 00 يقول لي دي ياخي أمل ماعرفتها 00 ودي مني : يقول ليك دي نهى بت الشيخ عدلان 00 طبعاً ماليها علاقة بالخاتم عدلان 00 الراجل طبعاً زهج مني وقال لي : انت اصلو ليك ساعة كاملة تقول دي مني ودي مني 00 الزول ابو شال دا مابتسأل منو ؟؟؟
|
Post: #9
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: THE RAIN
Date: 07-14-2003, 12:28 PM
Parent: #1
أبو حراز
معنى الفآل وراحة البال
أبو حراز
طعم النقاء وصدق المعنى
اتنين بس منك يا حراز، والمنبر ده يبقى حقل أخضر، مش المنبر، السودان كله والله
دمت يا أخضر
|
Post: #12
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Tumadir
Date: 07-14-2003, 12:38 PM
Parent: #9
كل مرة يجى زول ينبذ البورد
ويقول البورد بقى ثقيل
اومسيخ
ونحن البنكتب الليل والنهار
عقدتونا عديييييل كجة
اها بعد دة
الله غالب
اها وكان سالناك انت بقي ما بتكتب ليه؟؟؟
|
Post: #28
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:58 AM
Parent: #12
تماضر
كلماتك رائعة حتى عندما تشاكلين أحداً منا
فهي تحمل في داخلها طفلة مشعة بالبراءة والحب والتقدير
ولاتدري ياسيدتي كم تجديني اتلهف لما تكتبين
اتابع أخبارك في امريكا واسبانيا ولندن والسودان
اسابق الرياح من أجل أن أقرأ اليك
قرأت لك قبل فترة بوستاً تردين فيه على زيارتك للندن
اعجبتني عبارة فيه مازال صداها يتردد في داخلي
لم اصبر فكتبتها لإنسان عزيز جداً
فقال لي : والله انت راجل كتاب جداً 00 لقد اسكرتني هذه العبارة
صدقيني لانود ان نعقد أحد ولكن نود ان نسمع منك مثل هذه الكلمات
منذ فترة وانتي لم تردي على بوستاتي
فتحايلت عليك
يعني ماتجي الا بالدفر
لك التحية ايتها الرائعة وانت تحملين هموم الوطن وتـتـنـفسينها
الهدية عملتي فيها شنو 00 لمن عرفت انك جاية لندن كلمت واحد من أصدقائي بالبورد قلت ليهو خليها تشتري لي هدية من محلات الفايد هارودز
ظريفة ينبذ دي 00 لقيتي ليك ذال وين ؟؟
|
Post: #27
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 08:51 AM
Parent: #9
ايها المطر الغزير
حينما تتساقط حباته لتروي ظمأ وطني 00
يااااااااااااااااه 00 ما أجمل لعب الأطفال حينما يتساقط المطر
وما أجمل الكلمات عندما تتحول الى غمام
فكلماتك دائماً تعطرني بأنفاسها المستخلصة من أثداء الوطن
السودان ياسيدي مليء بالرجال والقامات والنخيل الذي لايمكن ان تهزه الرياح
ومنبرنا لازال بهؤلاء الرجال والفراشات
ومازال أخضراً طالما أن وطني أخضر
والمنبر 00 رغم دمائه وسياسته ومشاكساته
إلا أنه مازال واحتنا في صحراء الغربة
ونذهب اليه دائماً في تلك اللحظات العصيبة التي نكتب فيها الشواهد على انفسنا
فنشرب من سليل كلماته
ونستنشق طيب عبيره وشذاه
نعم 00 المنبر مازال واحة لنا وسوف يظل
واعلم جيداً ان قلوبنا ملتحمة وانفاسنا ملتحمة
ولن نكون بعيدين عنه
لن نكون ولن نكون ولن نكون ولن نكون ولن نكون
|
Post: #11
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ABUHUSSEIN
Date: 07-14-2003, 12:37 PM
Parent: #1
أبـوحـراز الـجـمـيـل شــديـد
ســـــــلام كتير و شـوق أكـتر و حمدلله على السـلامة وين الغياب اوع تكون كيس
الإقامات كنت شايلوا إنت و شيت غشيت بيهو أهلنا المساكين .
و الله عايز الحق كلامك صاح البورد اليومين ديل بقى زي آخـر يوم في المدرسة
يعني يوم توزيع النتائج في الإبتدائية كل واحد عندوا تصفية حسابات مع واحد
و الدقشمان من باب المدرسة لغاية البيت. كـل واحد محمر ليهو لي واحد و بقول
ليهو أصبر لي و الله إلا أبكسنك .
يا ريت الناس تتكلم في أي شـئ لكن بي كـل هداوة و إحترام الباقين.
تسلم أبوحـراز و مرة تانية حمدا لله على الســلامة و ما تطول الغياب .
|
Post: #31
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 10:08 AM
Parent: #11
ابوحسين
اذكر انني سافرت في العام الى السودان ربمات في نفس هذه الأيام
كنت اقود سيارة متهالكة من بورتسودان الى مدني
صدقني طيلة هذا اليوم كنت ابحث عن شمس السودان
لم تكن هناك شمس 00 بل غيوم وسحاب ومطر خفيف
كسرة وشاي ورواكيب وابناء من شرق السودان في غاية البساطة
ملأت كرشي بملاح بامية مفروكة حتى تعرق كل جسمي
كلما نظرت سواء لليمين او اليسار او لأعلى كما ينظر الأمريكان الآن خوفاً من الطائرات 00 كلما نظرت ارى البساطة تتقطر
تمنيت لحظتها لو نقلت هذه الصورة العجيبة لكل العالم
من حق كل منا ان يكتب عن أي شيء
والمواضيع السياسية أحياناً تصيبك بالدوار
وأحياناً تكون من اشهى الأطباق على مائدة سودانيز اونلاين
ونتمنى ان تكون كذلك وان لاتزيد بها جرعات الملح لأن كثيرون بالمنبر مصابون بالضغط وضيق التنفس وآلام العمود الفقري
|
Post: #32
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: cola
Date: 07-15-2003, 10:23 AM
Parent: #31
أبو حراز
اقول ليك شنو انت لذيذ لما مبالغة
الله يحفظك
|
Post: #13
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: elsharief
Date: 07-14-2003, 03:11 PM
Parent: #1
الاخ ابو حراز
حمدلله على سلامتك والبورد فقدك الفتره السابقه واصل فى كتاباتك
|
Post: #15
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: انور عمر
Date: 07-14-2003, 03:46 PM
Parent: #13
ابو حراز
بركة الجيت وحمد لله الف علي السلامة
وبي عودتك تعود للبورد حلاوته
|
Post: #33
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 10:27 AM
Parent: #15
الشريف
شكراً لك يا استاذ 00 انتم من تضخون الدماء فينا لإعادة الروح لحروفنا وكلماتنا المتواضعة
انور عمر لك التحية 00 اها الراجل كيف ماشاف وش مرتو لسه
والله حكاية غريبة جداً 00 الحمد لله نحن بتشوفها من تدخل الروضة مروراً بكل المراحل 00
|
Post: #16
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: haneena
Date: 07-14-2003, 03:46 PM
Parent: #13
أبو حراز
سلامات-والبورد نور بطلتك
وكلام اهلي الطيبين السمح والعديل والزين
سؤالي
إنت كنت مدسوس وييين؟
تلقاك أخدت ليك خفسة للسودان وجاي تعمل فيها مافي شي عاجباك
صح والا ما غلط؟
حمد الله علي السلامة
ولي قدام كلللنا
حنينة
|
Post: #34
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 10:34 AM
Parent: #16
حنينة
كلما اقرأ اسمك اتذكر اغنية حنيني اليك وليل الغربة أضناني
بالمناسبة الأغنية دي سبق وأن سمعتها بصوت الفنان المخضرم القامة العاقب محمد حسن 00 ياااااااااااااااااه غناها بالعود كانت رائعة وأكثر من رائعة وحسب معلوماتي الفنية البسيطة جداً انو العاقب محمد حسن أعطاها مقشرة للفنان محمد ميرغني 0
اشكرك فبطلتكم على بوستاتي البسيطة تشعرونني بأنني اعزف على الوتر المطلوب 00 وهذا التفاعل يخلق في داخلنا مزيداً من الإبداع
طبعاً السودان لسه لأنو الإجازة تأجلت لبعض الظروف ولكن قريباً انشاء الله سأكون هناك 00 اها لو كنتي من بورداب السودان ورينا بيتكم وين وياريت يكون في الخرطوم عشان نرسل ليكم اصحابنا من أهل العوض
|
Post: #14
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ودقاسم
Date: 07-14-2003, 03:38 PM
Parent: #1
أبو حراز الظريف
بالرغم من ظرافتك لكن
جني جنك
يا أخي مالك ما بتكتب في السياسة بصورة مباشرة ؟
في داعي للف والدوران والخوف من الكيزان ؟
|
Post: #17
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: peace builder
Date: 07-14-2003, 04:06 PM
Parent: #14
ابو حراز يا مطر
حمدا على سلامة العودة كنت في مشاكوس ولا ايه؟ يا زول يا زين
ما عارف ليه كل ما اقرا ليك بتخيل اني بعرفك من زمن واني ح الاقيك في السوق العربي حيث الكل يصرخ بي سبعة ونص! وبعد حق الله وبق الله اسالك اها ومن متين في السودان فتجيبني وانت تجفف حبات العرق الغزيرة بمنديل بشكير احمر او اخضر لا اذكر: والله لي كم يوم كده
بعدها احلف عليك تشرب شعير من اولاد عبد الله الزبير وتعتذر لمواعيد واحلف انا واجرجرك وتذعن وتقبل الدعوة
ونحن نرتشف الشعير الساااقط اسالك عن بكري والعصافير والازاهير بالبورد: تماضر واشراقة وسولارا مكة وفتحي وكل العقد الفريد
تنظر الي شذرا وتقول لي وما زلت تمسح جضومك بالبشكير: يا خوي انت بتعرفني؟
اصرخ بقوة حتى تسمعني وسط ضوضاء السوق بالحيل انت ما ابو حراز بتاع البورد
نظر الي مليا وانتفض: انا حكايات النشالين دي اصلها ما بتنفع معاي يللا على النظام العام .. قال ابو حراز قال
مع مودتي
|
Post: #41
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 07:35 AM
Parent: #17
لك التحية ايها المتفرد
فقد غمرتني كلماتك ولامست وتراً حساساً في داخلي
نقلتني في لحظة الى السودان
الى السوق العربي
حيث يطيب لي دائما ان اشرب العرديب هناك
ولكن للأسف كثيراً مايحرمني صاحب الكافتيريا منه
فعندما أجده يضع علىالمسجل فنان طالع جديد لاتعرف انه هل يغني ام يبكي
يومها لا اشرب اي عرديب لا في السوق العربي ولا في سوق ام دفسو
مشغوليات جعلتني لا ارد ولكن في طريقي للرد عليكم انشاء الله 00 اسعدتني رسالتك واتمنى مزيد من التعارف معك واوعدك اذا حضرت للسودان باذن الله ستكون ضمن اهتماماتي وسأزورك بإذن الله واتمنى أن أكون طابق العروس معاي 00 فكل زياراتي كنت أكون طابق لي جريدة عندما أكون بالخرطوم
|
Post: #36
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-15-2003, 10:57 AM
Parent: #14
ودقاسم
صدقني انا لايهمني من يحكم السودان سواء كيزان او انصار سنة أو حزب الخضر 00 مايهم ان ينهض وطني على قدميه وان يكون السودان للسودانيين وان ننعم بالحرية في كل مكان وان يكون الوطن وطناً للجميع 00 استاء في حالتين عندما أجد مسؤولاً كرشه مترهلة جداً وأجد في المقابل طفلاً جائعاً تكاد أضلاعه ان تتساقط والمشكلة هذا سوداني وذاك سوداني ايضاً 00 نريده أن يكون وطناً لنا بغض النظر عن الواننا واعراقنا وثقافتنا وديانتنا 00 السودان بلد واسع المساحة 00 وقبل هذا وذاك فهو واسع الصدر 00 اذن لماذا لانرتمي جميعنا على هذا الصدر لنرضع منه ونرتو منه جميعاً ؟؟؟
|
Post: #18
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Raja
Date: 07-14-2003, 04:38 PM
Parent: #1
أبو حراز العزيز الظريف
سلامات وتشكرات كثيراااات للغاية لأني وبصراحة كنت قد قررت منذ يومين مقاطعة البورد نهائياوعدم المشاركة إلا بالفرجة على بعض الموالد التي ينصبها معتادوها في بوستاتهم التي تشط ما بين السخف وقلة الذوق والأدب.. واخطرت الادارة بذلك، لكن كلامتك الخفيفة الظريفة سرت عن نفسي المغمومة من كلمات وتصرفات ثقيلة وتخرج عن المألوف من الأدب والاحترام بين ناس يفترض انهم لا يعرفون بعضهم إلا بالكلم الطيب والمداخلات البناءة ومشاركة الهموم يطرحها اصحابها على رفاق وجودوهم في هذا البورد..
عجبني جدا كلمة تطفيش آنسات البورد.. لأن هذا بالضبط ما حدث لي من مدعو في احد بوستاته إذ نعتني بالعبط وهو الذي لا يجرأ ان يعرف شخص مثلي لأن بيئته ومجتمعه وتفكيره لا تسمح له بأكثر من النظر تحت قدميه
عموما أشكرا مرة اخرى ، فبمثل هذه المداخلات نعرف ان البورد مازال بخير طالما به ناس تفكر هكذا، دمت يا أبوحراز
|
Post: #40
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 07:20 AM
Parent: #18
رجاء
أشكرك بحرارة على كلماتك اللطيفة 00 لقد كان الرجاء والأمل كبيراً ان تعود تلك الفراشات التي اختفت عن البورد رغم ان رحيقها مازال يعبق المكان 00 كم جميل ان تسعدكم كلماتي البسيطة جداً وأن تضيف نكهة أخرى الى نكهات البورد المتعددة 00 صدقيني 00 عندما أكتب بوستاً أتردد كثيراً في ارساله واشعر بأنه عبارةعن بوست معلب خصوصاً عندما تكون هناك بوستات طازجة وتتنفس وتتقطر رحيقاً ونبراساً وأملاً لعمالقة وأدباء هذا البورد 000 ولكنني في النهاية اتجرأ لأحشر معلباتي المنتهية الصلاحية 00 أحشرها على استحياء علها تستقطب ولو القليل من قراء البورد الذين انهكتهم الغربة وأشاخت بهم رغم أنهم في عنفوان شبابهم 00 لك التحية على الطلة والمشاركة 0 وقبل هذا وذاك التحية اليك لأنك بكلماتك الرقيقة أنتي وأمثالك تجعلونا نقف على أقدامنا
|
Post: #19
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: منعم
Date: 07-14-2003, 05:41 PM
Parent: #1
ابو حراز
يا جميل الدواخل
(انا قلت الدواخل وبس)
اقول ليك حاجة (ولا ما اقول ) انت عارف بمجرد ما قريت اسمك على البوست دة ابتسمت وفرحت جدآ .. لانى عارف انة المكان دة مفتقدك ومفتقد طعمك المميز .. وبعد ما قريت البوست وحكاية الكلب (الختف)الكيس لقيت انى كان عندى حق فى انى افرح بوجودك
ارجو انك ما تختفى تانى يا حبوب لانة وجودك بيدى المكان دة شئ من التنوع المحبوب
بالمناسبة انت جيمس بعد ما عرس بقى ما قاعد يخت صورة جوليا روبرتس لى شنو؟ 
|
Post: #20
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: yasiko
Date: 07-14-2003, 05:53 PM
Parent: #19
سلام
|
Post: #43
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 11:05 AM
Parent: #20
yasiko
طبعاً اشكرك مقدماً رغم ان الأغنية لم تفتح معي فجهازي قد شاخ وتآكل من الصدأ 00 بالله شنو الأغنية دي 00 ياريت لو اسمعها فربما تحمل لي انطباعات خاصة جداً 00 بعدين انت مختفي من مدة 00 اخبارك شنو
|
Post: #44
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: james
Date: 07-16-2003, 11:06 AM
Parent: #43
ممم
انت حلو
|
Post: #42
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 07:44 AM
Parent: #19
منعم
يا أخي نحن جميلين من كلو
دواخل وخوارج 00 الله يستر ماتكون الكلمة الأخيرة دي سياسة
ارجوك ماتبور علينا السوووووووق 00
اشكرك على كلماتك الظريفة
قال جيمس قال
والله صاحبك من يوم عرس ياكافي البلاء لاشفنا جوليا روبرتس ولا سلمى حايك
انت عارف المراة السودانية لاتقبل من زوجها ان لاينظر الا اليها
وكمان المشكلة وين
يقوم يكتب ليهو رسالة لواحدة 00 يعني حتى لو كانت وصفة طبية يكون الرماد كال حماد
انا برضو تعرف بعد ما أدخل المعمعة دي الخشيم حايقفلوه
والله تاني لاشهر عسل لا أهل العوض ماتشوفوهم
بعد العرس لازم الواحد يعقل شوية
ولازم الواحد يعمل حساب للمدام
لأنها لو زعلت منك ومدت بوزها واتكفرست 00 مافي ليك أي طريقة للمفاهمة الا تقبل على الحيطة 00
|
Post: #21
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: Kabar
Date: 07-15-2003, 06:20 AM
Parent: #1
أبوحراز..أخوي حبابك
ماتجي نعمل حملة ، نسميها السودان للسودانين، اية و اللــه هكذا حملة و هكذا إسم
و اذكر أول ما جا أخونا سيجيمان و لغته التربالة التي تجعله قريب منك ، قام قال الناس بتتكلم بلغة عجيبة
والناس قامت ، واحدين لغاية هسع ما قعدوا
مع انو الراجل كان عميق
المهم يا اخوي أساس الحملة يا ريت لو كل واحد أو واحدة يكتب لينا سودان، عشان نفهم بعضنا البعض
وعليك اللــه كن ما كتيت لينا عن المدينة عرب ، يمكن تجيب ليك طروة للناس الأذونا
وحبابك يا أصيل
ودمت
كبر
|
Post: #45
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 11:42 AM
Parent: #21
كبر
رغم أن السودان في قلبي 00 لكنني أشعر أحياناً بأنني أعيش فراغا عاطفياً عندما لا أكتب عن وطني لأن قصة الحب التي بيني وبينه لايمكن أن تنتهي لهذا تعجبني كثيراً الكتابة عن السودان
السودان الشامخ 00 البطل 00 البسيط 00 المتسامح
يعجبني الأطفال العراة وهم يلعبون مع حبات المطر 0000 طبعاً كثيراً ماعملتها
وما يؤسفني أنهم جلدوني لأنهم قالوا لي قد اتسخت ثيابك بالمطر
وعندما ملصتها ولعبت يومها مع الأطفال لم يسألني أحد
شيء ظريف جداً أن تكون بزيك القومي الذي ولدت به
يعجبني الغبار والكتاحة في بلدي
وأشياء كثيرة 00
المدينة عرب ما أجملها 00 هذه المدينة التي لا أنساها
فقد اشتريت منها ذات مرة خروف العيد وكنت في غاية الزهو والفخر
فهذه هي المرة الأولى التي اشتري بها الخروف بنفسي ومن حر مالي
وعندما أحضرته للمنزل وجدتهم جميعاً قد انبطحوا ارضاً وبدأوا ينظرون للخروف
تخيلت أن خروفي قد بنشرت إحدى أرجله
لكنهم سرعان مابدأوا يضحكون 00 فقد كانت نعجة
سوق المدينة عرب سوق رائع جداً 00 الشطة والويكة والعناقريب والسمك والحلاقة على الطبيعة بلا صالونات
قررت أن أحلق شعر رأسي علىالهواء مباشرة
وبدأ الحلاق يحكي لي عن فنانين لم اسمع بهم
ولكن فجأة ترك رأسي والفوطة والمقص والمرايا وهرب
وعرفت ان هناك كشة خدمة الزامية تحوم في السوق
|
Post: #29
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابو نور
Date: 07-15-2003, 09:37 AM
Parent: #1
احلي خمس حاجات في البورد ده تلاته
قرجه وابوحراز
ابونور
|
Post: #30
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابو نور
Date: 07-15-2003, 09:37 AM
Parent: #1
احلي خمس حاجات في البورد ده تلاته
قرجه وابوحراز
ابونور
|
Post: #35
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: haneena
Date: 07-15-2003, 10:46 AM
Parent: #30
ابوحراز
اهل العوض حبابهم عشرة في بيت ابوي الفي الخرطوم
لكن نحن في انجلترا السجم والرماد
لكن بنجي قريب-
لما الهمبريب يفتح شبابيك الحديد
حنينة
|
Post: #37
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ghurba
Date: 07-15-2003, 11:32 AM
Parent: #35
ابو حراز ازيك انا كنت طفشانه لانو بصراحه القصة بقت عكاكيز حايمه قلت انا ما ناقصه فليق احسن اتضاري في الركن واتاوق مره مره.... لكن تحت تحت كده الزعلك شنو من الصباح خلاك تفكها فينا ....لك الود نخاف نقول لك الحب تشتكينا ....قال احبك قال......
|
Post: #47
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 11:57 AM
Parent: #35
حنينه
كيف هي مياه نهر التايمز
هل هي بطعم مياه نهر النيل
وكيف هي روعة الهايدبارك
هل هي بنكهة ستة ابريل والدندر
مسافة كبيرة مابين الخرطوم ولندن
ولكن يختزلها حبكم وحنينكم للسودان
لتصبح مسافة لاتسمح بمرور اشعة الليزر
لك التحية وأنتي ترحبين بأهل العوض من بلاد الضباب
تحياتي لليدي ديانا
وليز هيرلي
وكينت وينسيلت
وقبلها لكل السودانيين معكم
|
Post: #46
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-16-2003, 11:52 AM
Parent: #30
ابو نور
انت الأحلى
اشكرك على اللطافة والظرافة دي
احلى خمس وعرفناهم
وأحلى تلاتة
انت قلت ابوحراز وقرجة
اكيد التالت المقصود ست النفر
معليش طولت ماكتبت اسمها في البورد
امس عملت معاي شكلةبالتلفون
عشان كدة وعدتها
|
Post: #38
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابو فاطمه
Date: 07-15-2003, 11:45 AM
Parent: #1
ابوحراز
والله ختفت الموضوع ده من طرف لساني
|
Post: #39
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: almohndis
Date: 07-15-2003, 05:28 PM
Parent: #38
وين يازول
هذا الوبست عملتو ليك
يا رجل
وانت مسجل غياب اظن رحمة منك
الى الباندوث والناس المعنين برحمته
لا حياة لمن تنادى
أبو حراز لك اجر ما أدخلت البسمة والضحكة عام كامل :
|
Post: #48
Title: Re: البورد مهاترات وباندوث ودماء وسياسة معوقة وكمان دراويش وكدايس
Author: ابوحراز
Date: 07-19-2003, 11:29 AM
Parent: #39
المهندس
اشكرك بحرارة على هذا البوست الذي لم اراه ولم أقراه الا بعد ان رأيته الآن
والشكر لكل المشاركين فيه وتحية خاصة للفنانة المتألقة تماضر
وبالمناسبة رأيت لها صورة امس في جريدة الخرطوم
كانت صغيروووووووووووووووونة
آآآآآآه ياريت لو قابلتها يومها في مدني
كان حا اعضيها واقوم جاري صوووووووووف
اشكرك ياسيدي
والبسمة التي نمنحكم لها ما هي الا عصارة حبي لكم
واتمنى ان أكون من الذين يعطون البسمة دائماً
غربة وشوق
لك التحية
اول مرة اعرفك خوافة من العكاكيز
والله امبارح شاهدت برنامج في الفضائية السودانية
يحكي عن عادات الزواج في قبيلة الكبابيش على ما اعتقد
شيء أكثر من ظريف
يوم العرس جاء واحد وصدره وظهره مكشوفان
وربطوه من يديه
وجاء العريس ماسك سوط عنج طوييييييييييل
وبدأ يضرب في الراجل المسكين دا
كلما يضربوه النسوان يزغردن وهو يضحك
وأنا هنا انط واتراجف كلي زي الرافساني بقرة
ابوفاطمة
شلت شنو من خشمك
تستاهل كان لازم تتسرع وتنزل البوست دا من بدري
يعني برضك شايف المهاترات وكنت عاوز ترد
اها انا شلت ليك وش القباحة
جيمس
الحلو منو
الظاهر عليك لمن جيت ترد على البوست
كانت قدامك جوليا
كولا
لك التحية والتقدير على هذه الظرافة
وانت لذيذ برضو
بالمناسبة
انا بلعب تنس طاولة وشعارك دا اعاد لي ذكريات كثيرة جدا
صاحبك قرجة دا بيعلعب تنس ولا مابيلعب
والله انا خايف يكون مابيشوف الكورة نهائي
|
|