Post: #1
Title: الواحدة من ماتـقـول ليها خاطب تجفل منك !!!
Author: ابوحراز
Date: 09-10-2003, 09:27 AM
Parent: #0
أحببتها بعمق دون غيرها
كانت إمراة غير كل النساء
ووردة ليست كما الورود
هي قارورة عطر وبارقة امل
كانت كل حياتي وآمالي وطموحاتي وتطلعاتي
وعندما أدخل على هذا البورد
اجد انفاسها ورحيقها وعطرها وكل أنوثتها
وكانت قصة ملتهبة تلك التي بيني وبينها
قصة لو كتبت فصولها لحازت على الأوسكار دون تردد
لكنها عندما قررت أن تكون هذه العلاقة وردية وأبدية
قالت لي : اريد ان استخير يا ابوحراز
قلت ليها مالو ياحبيبتي استخيري كما تريدين
وانا سأستخير أيضاً
ولكن لم أكن اتوقع ان العوارة في الإستخارة ستكون بهذه الجدية
تخيلتها ستقوم بالإستخارة في مسكنها
ولكنها اتت خصيصاً الى مكة من أجل الإستخارة لأبوحراز
الله يكون في عونك يا ابوحراز
وهل هي أحسن مني أم هي أحسن مني
فقد استخرت أنا أيضاً
ولكن في الطائف
ونمت بعد الإستخارة
وماهي لحظات حتى أتاني حصان أبيض وضنبو أخضر
طبعاً ماعارف دا يكون حصان وللا فجلة ؟؟؟
وامتطيت حصاني لأقابلها
فجأة أقابل بدر الدين شنا وقرجة وهما يتسالمان
ياجماعة نحن ناقصين
بعديها صحيت من النوم
واستخارت الحبيبة الظريفة
ولكن ياليتها لم تستخير
فقد قطعت الموية والنور والاتصالات والبورد وكل شيء واختفت في الزحام
تكون شافت ليها شيطان وللا شنو ياجماعة ؟؟؟
قال البورد صار وطن قال
وطن شنو دا البيستخيروا فيهو ويقوموا مشتتين
|
Post: #2
Title: Re: الواحدة من ماتـقـول ليها خاطب تجفل منك !!!
Author: ايهاب
Date: 09-10-2003, 09:52 AM
Parent: #1
بتكون شافت ست النفر البعتها يا حروزه
|
Post: #3
Title: Re: الواحدة من ماتـقـول ليها خاطب تجفل منك !!!
Author: Ahlalawad
Date: 09-10-2003, 10:00 AM
Parent: #1
أو تكون لسة نايمة
|
Post: #4
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-10-2003, 10:06 AM
Parent: #3
ايهاب
اهل العوض
شكراً على المشاركة
انتو معاها وللا معاي
قال ست النفر قال
اهل العوض طمأنتنا شوية
يعني هي من أهل الكهف وللا شنو
الكلام دا قبل رمضان الماضي
اها نحن في انتظار انها تصحى
وللا جايز يكون في فاصل اعلاني
وبعدين نعرف النتيجة
|
Post: #5
Title: Re: الواحدة من ماتـقـول ليها خاطب تجفل منك !!!
Author: ترهاقا
Date: 09-10-2003, 10:14 AM
Parent: #4
بتكون شافت بدرالدين
|
Post: #7
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-10-2003, 10:22 AM
Parent: #5
ترهاقا
الله يجازيك ضحكتني
لكن الراجل الإسمو بدر الدين دا
الجابو يتحاوم شنو نص الليل ؟؟
|
Post: #6
Title: Re: الواحدة من ماتـقـول ليها خاطب تجفل منك !!!
Author: قلقو
Date: 09-10-2003, 10:20 AM
Parent: #4
الأخ ابوحراز
هاردلك يازعيم لكن بى صورتك القاعدة بالجنبة دى ما أظن الموضوع كان عايز ليه استخارة
|
Post: #8
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-10-2003, 10:26 AM
Parent: #6
قلقو
يعني جفلت من الصورة
المشكلة في بدايةالعلاقة قالت الصورة حلوة جداً
وراسنا بقى كبير خالص
يكون دا كلام جرايد وللا شنو
بالله زمان كل ما افتح البريد القى ليك بطاقات وازهار وورود وأغاني وصور رائعة
بالله هسي كلو بيتزا هت
|
Post: #9
Title: Re: الواحدة من ماتـقـول ليها خاطب تجفل منك !!!
Author: ghurba
Date: 09-10-2003, 10:43 AM
Parent: #8
ابو حراز والله ضحكتني لمن ناس مكتبي اتخلعو.. انت مالك والاستخاره والجهجهة, كان تعمل الاستخاره قبل التورط لكن مابعد التورط الزول بستشير والشوره ذاتها بتكون حركه في شكل ورده قال ورود قال
|
Post: #12
Title: Re: الواحدة من ماتـقـول ليها خاطب تجفل منك !!!
Author: قلقو
Date: 09-10-2003, 10:52 AM
Parent: #8
ياابو حراز ياخوى انت تكون رسلت ليها صورة الان ديلون فى شبابه وعايز تدقس الجكس لكنه طلع تفتيحة.
هاردلك للمرة التانية وتانى ماتورى صورتك لى زول وكفاية الحصل وصورتك البجنبة دى علبك الله شيلا عشان ماتقطع رزقك ساكت
مع تحياتى
|
Post: #10
Title: Re: الواحدة من ماتـقـول ليها خاطب تجفل منك !!!
Author: الجندرية
Date: 09-10-2003, 10:45 AM
Parent: #1
لووووووووووووووول @ الأميرة النايمة
بالمناسبة هي صحت كيف .. نسيت القصة
ابو حراز
حننتني والله
قلت ليك ارجى بتي
قلت بتك صغيرة وانا بلعب في الزمن الضائع
شكلك كدا حتنتظر بتي
الله يكضب الشينة عاد
|
Post: #11
Title: Re: الواحدة من ماتـقـول ليها خاطب تجفل منك !!!
Author: maia
Date: 09-10-2003, 10:48 AM
Parent: #1
ما تستاهل يا ابوحراز وزي ما بيقولوا الشوايقة يا شريري عليك
لكن بس الجاب بدرالدين شنا وقرجة شنو في حلم استخارتك؟
شكلك يا زول النية ما كانت واصلة
|
Post: #13
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-10-2003, 11:06 AM
Parent: #11
اللهم لاشماتة
قلقو ومايا وغربة والجندرية
عارفكم كلكم شمتانين
اكيد حاتقولوا يستاهل ابوحراز
ياجماعة انا عملت ليكم شنو
قلقو
اها عاوزني اغير الصورة دي
ماعندك مشكلة حا أجيب واحدة أجمل منها
لكن انت صورتك وين
والله بعرف واحدين في البورد دا
الواحد لو نزل صورتو
والله البورد كلو يشتت
ياخي في واحدين عندهم جضوم كبار جداً
والله تعرف معانا واحد شين شناة عجيبة جداً
والله طبعاً دا بيساهر في البورد
لكن لو خيروه بين انزال الصورة أو ترك البورد لأختار الأخيرة دون تردد
هسي انا كلما اشوفه بطمئن أنو في واحد اشنى مني بالبورد
غربة والجندرية ومايا
دعواتكم معانا
لكن بيني وبينكم
حاجة فيها استخارة تاني ماعاوزها
الفحص قبل الزواج وعرفناه
ولكن لو كل زواج قبله استخارة
لذهب نصف الذين يودون الزواج الى الشارع
|
Post: #14
Title: Re: الواحدة من ماتـقـول ليها خاطب تجفل منك !!!
Author: tmbis
Date: 09-10-2003, 11:13 AM
Parent: #13
يا حروزة
اعمل حسابك الايام دي .قالو في فيروس جديد اسمو حبني قالوا بي مناسبة حداشر سبتمبر ..وانا والله خايف عليك اها أختر ما فيهو ..أنوبيرسل صور مضروبة عبر الماسينجر .. انا خايفك تكون اتورطه في الصورة بتاعت الزولة دي ..
يعني بأختصار ..تكون الشغلانةمفبركه من الحريف قرجة .. وهو معلم كبير طبعا تشهد له كل المحافل ..
لكن شفت يا اب حراز كان ما وصيت لي ست النفر .. شان تطير ليك خفتك ..ولقافتك دي في راسك ..
ابقي انا ما تمبس ..
ياخ انته وين من زمان ؟؟؟
|
Post: #34
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-14-2003, 07:21 AM
Parent: #14
تمبس
تعرف انا من يوم كنت في الثانوي وارسلت صورتي لواحدة لقيت عنوانها في مجلة وقامت بت الحلال دي رسلت الرد في مظروف جميل ولقيت طبعاً صورتي جوة الظرف لوحدها وكمان مقددة فيها عيوني 00 من يومها توبة ياحبوبة تاني مارسلت صورتي 0
الظريفة مايا
شكراً على المشاركة طبعاً لازم الواحد يتقّل دمو شوية ويعيد الكرة مرات ومرات ومرات ومرات والواحد يعمل فيها زي قريبو جاء للبت وقالوا ليهو عاوزنها تكمل الثانوي 00 قال بينتظرها 00 قالوا ليهو وكمان عاوزنها تكمل الجامعة 00 قال مامشكلة برضو بينتظر 00 قالوا ليهو وكمان حاتحضر رسالة الماجستير والدكتوراة والبروف 00 قال برضو حاينتظرها : اها الجماعة قاموا قالوا ليهو والله حرّقت روحنا 00 ياخي ماعاوزين نديك عديييييييييييييل !!!
بت قضيم 00 منوبيا 00 الأستاذ الموسيقار حمزة 00 رجاء الرائعة 00 الشمشارة توما
تعرفوا قالوا واحد برضو كان بيحب كل مرة وبيدوه شواكيش بسبب الإستخارة
الراجل من الغبينة قام عمل ليهو جريمة
وبسبب الجريمة تووووووووووش دخلوه السجن
القاضي للأسف كان برضو من الجنس اللطيف
والظاهر القاضية اخذت ليها شاكوش قبل كدا 00 يعني بتكره الرجال لدرجة قف
أها طوالي حكمت عليهو بالمادة 254 الإعدام شنقاً حتى الموت
ويوم جاء حكم الإعدام القاضية فكرت شوية
وقالت بدل العوانس عندنا كتيرات والعجايز ماليات الدنيا والأرامل وزوجات الشهداء بالكووووووووووم
كدي نعرض على المحكوم دا اقتراح
قامت في ساحة الإعدام جابت ليك كل النسوان العجايز والشينات
واحدات عمرهن ماضاقن العرس
واحدات كتلن رجالن وقعدن
اها قالت للراجل المحكوم عليه : لو اخترت واحدة من هؤلاء النسوة لتتزوج بها فإنني سألغي عنك حكم الإعدام
اها الراجل كان معصوب
بعدين فتحوا ليهو عيونو
قام شاف الحنظل والترمس واللالووووووووب قدامو
قال للقاضية : إعدام بس 00 ماعاوز أي عرس
قال شهيداً شهيداً شهيداً قال !!!
|
Post: #15
Title: Re: الواحدة من ماتـقـول ليها خاطب تجفل منك !!!
Author: maia
Date: 09-10-2003, 11:24 AM
Parent: #1
ابوحراز
انت ذاتك الشلاقة العليك شنو ، كان من الاول تقطعها ناشف معاها وتقول ليها يا بت الناس عاوزاني ولا لأ عشان ما تعمل ليك فيها دور استخارة
لكن يا زول بيني وبينك بنصحك تعيد الكرة مرة اخرى حكاية عمنا بدرالدين دي ما مريحاني ، انت شكلك لخبطت الكيمان
|
Post: #16
Title: Re: الواحدة من ماتـقـول ليها خاطب تجفل منك !!!
Author: بت قضيم
Date: 09-10-2003, 11:35 AM
Parent: #1
لووووووووووول
يا ابوحراز والله بتجيب لي الهوا المدير بقول البت جنت مطنقرة تضحك لي شاشة كمبيوتر
ترهاقا
بااااااااااالغت
|
Post: #19
Title: Re: الواحدة من ماتـقـول ليها خاطب تجفل منك !!!
Author: manubia
Date: 09-10-2003, 12:40 PM
Parent: #16
والهي ياىابوحراز ما قادر امسك نفسي من الضحك،ياخي وينك انت الله يخليك لينا،لكن يا مان كنت داير تبيع ست النفر،اها قرجة وابراهيم قامو جو يزكيروك ليها,
تحياتي ليها وليك
|
Post: #18
Title: Re: الواحدة من ماتـقـول ليها خاطب تجفل منك !!!
Author: Hozy
Date: 09-10-2003, 12:38 PM
Parent: #1
الاخ الرائع ابو حراز
بصراحة حبيت اقول ليك نفس كلام الاخ أبي عن الاستخارة
انها مش حلم بل توفيق وتسهيل
وهو ماقصر ليك في الشرح
يلا كتر في الدعوات
واحنا معاك
والله يوفقك فيها
واذا لم يتم لا تحزن
يمكن لخير لك ولها، ولخير احسن منها كمان ولا يهمك
تمنياتي
|
Post: #20
Title: Re: الواحدة من ماتـقـول ليها خاطب تجفل منك !!!
Author: HAMZA SULIMAN
Date: 09-10-2003, 01:36 PM
Parent: #18
الحبيب
ابو حراز
حقيقى ضحكت ضحك شدييييييييييييييد
انت بتقول حكم
|
Post: #35
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-14-2003, 11:31 AM
Parent: #18
obay_uk
هووووووووزي
انتو ياخي ماتجوا الا بالدفر
يعني لازم يكون العنوان لافت للنظر عشان الواحد يسمع صوتكم ويقرأ ماتكتبه أناملكم الرقيقة 00 كويس انو البوست دا جابكم عندنا وسمعنا روائعكم الظريفة دي 00 بالجد امس اتذكرتكم وضحكت في اعماقي أثناء خطبة الجمعة 00 تعرف الإمام بعد ما انتهى من الجنة والنار وأكل الربا ومال اليتيم واللهم أنزل الغيث تصدق تحدث باسهاب عن الإستخارة وقال نفس كلامك الجميل دا وقلت ياربي الراجل دا قاعد يقرا معانا في سودانيز اونلاين وللا شنو 00 والغريبة كان يركز على الزواج والوظيفة وذكر ان الإنسان عليه ان يسعى وأن لاييأس وان يصلي ركعتين عند الإستخارة وأن ينام على وضوء 00 وسوف أعمل بنصيحتك وأستخير مرة أخرى 00 لكن المشكلة اذا الديك اقتنع البيقنع الدجاجة منو ؟؟؟
|
Post: #21
Title: Re: الواحدة من ماتـقـول ليها خاطب تجفل منك !!!
Author: Raja
Date: 09-10-2003, 02:05 PM
Parent: #1
العزيز عثمان
"ما لكش حل".. بجد ضحكت ضحكت ضحكت وقلت ياااااااه الواحد ليهو كم من ضحك زي ده... شكرا وتسلم
اما بخصوص الجكسوية المشت تستخير ولي الليلة ما رجعت.. ما عارفة نقول ليك شنو؟ خيرها في غيرها
|
Post: #22
Title: ابو حراز
Author: توما
Date: 09-10-2003, 03:48 PM
Parent: #1
ابو استخاره..اقصد ابو جضوم..هي ابو حراز ازيك
????خارج النص كدي انت مسعول من الخير يااخوي ست النفر خليتها
واحده شمشاره
|
Post: #23
Title: Re: الواحدة من ماتـقـول ليها خاطب تجفل منك !!!
Author: garjah
Date: 09-10-2003, 05:20 PM
Parent: #1
حروزة ما تبطل كضبك ده
انا متين جيتك في النوم ؟؟
انا حتى الليلة ديك كنت بزور مستخير في مكة !!!هههههه
|
Post: #24
Title: Re: الواحدة من ماتـقـول ليها خاطب تجفل منك !!!
Author: بدرالدين شنا
Date: 09-10-2003, 06:52 PM
Parent: #1
بسم الله الرحمن الرحيم
حبيبي ابو حراز
سلام مدنكل
أسمع إنت لمن جيت تنوم نمت بي الخيرة ولا لخبت في الحروف وقدمت حرف الراء على حرف الياء؟؟؟
أجمل حاجة في حلمتك دي إنها جمعتني بي حبيبي قرجة
عليك الله كان نمت تاني شوفني مع أهل العوض كمان
ترهاقا سلام
جيتك جيتك .. تجاف؟؟؟
ميّا تحياتي
|
Post: #25
Title: Re: الواحدة من ماتـقـول ليها خاطب تجفل منك !!!
Author: كبسيبة
Date: 09-10-2003, 07:16 PM
Parent: #1
والله يابو حراز موتنى من الضحك
لكن خطيبتك الجفلة ده الله بحبها
ويمكن جاها فى المنام وحش
لوووووووول
 
|
Post: #26
Title: Re: الواحدة من ماتـقـول ليها خاطب تجفل منك !!!
Author: Rawia
Date: 09-10-2003, 10:54 PM
Parent: #1
Yemken hi ma kant jada wa lma alkalam dakhl al7oush gamt zagat
wa yemken kaman hi betkhaf men (alertebat)................
Kulaha de eftradat !!!!!!
|
Post: #27
Title: Re: الواحدة من ماتـقـول ليها خاطب تجفل منك !!!
Author: HOPEFUL
Date: 09-10-2003, 11:49 PM
Parent: #26
حروووووووووووزه
ماعجبني ليك
بس بيني وبينك
دي لا استخارات ولا سوت
دي كلها كانت لزوم المخارجه
يا حليل زمن ست النفر
الرضيانه بقرده
ارجع ليها يا زول
زوله واحده بتستحملك غيره مافي
أسمع إنت لمن جيت تنوم نمت بي الخيرة ولا لخبت في الحروف وقدمت حرف الراء على حرف الياء؟؟؟
لووووووووووووووووووووول
وتاني لووووووووووووووووووووول
ياودشنا بالغغغغغته
|
Post: #28
Title: Re: الواحدة من ماتـقـول ليها خاطب تجفل منك !!!
Author: bit barber
Date: 09-11-2003, 00:08 AM
Parent: #1
كيفك يا ابوحراز ...باجد ليكم وحشه
بالنسبه لفلانه الطارت دي ما تزعل بكره بتلاقي غيرها
مش بيقولوا كل فوله مسوسه وليها كيال اعور
|
Post: #29
Title: Re: الواحدة من ماتـقـول ليها خاطب تجفل منك !!!
Author: haneena
Date: 09-11-2003, 05:21 AM
Parent: #28
اخي ابو حراز
بركة الجيت...بركة الجيت
رجعت لينا الابتسامة بعد طول غياب
في البورد البقي زي بيت البكاء دة
غايتو ضحكتني بعد كنت راقدة اليوم كلو ما بين مغبية وواعية من اثر حمي الانفلونزا والدبرسة التي تصاحبها
وحمدت الله الاداني حبة حيل اجي اتاوق للبورد
والقي بوستك الظريف دة
لكن والله فكرة قصة الاستخارة دى
خليني الامشي استخير هسع دي-
الله اعلم كان تجيب نتيجة مع الحمي الاربعينية
والهضربة الحاصلة
بجيك راجعة
حنينة
|
Post: #30
Title: Re: الواحدة من ماتـقـول ليها خاطب تجفل منك !!!
Author: haneena
Date: 09-11-2003, 05:21 AM
Parent: #28
عفوا مكرر
|
Post: #31
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-12-2003, 09:07 AM
Parent: #30
أحييكم جميعاً
وأحيي كل المشاركين في بوست الإستخارة
وكل من قرأ ورد عليه وكل من قرأه ولم يرد
وأحيي كل من أعجبه البوست وأحيي كل من لم يعجبه
واقدم اعتذاري الشديد في التأخير عن الرد لكل المشاركين
فقد كنت في زيارة أحد ألأصدقاء
ولم أكن أتوقع انه من المداومين على قراة البورد
وقد حاول إغاظتي في الغداء
عندما أحضر لي ثلاثة صحون
عارفين فيها شنو
كانت كلها فجل
سأعود اليكم لأحدثكم عن رحلتي وعن الإستخارة انشا الله
الشكر لكم مقدما
|
Post: #32
Title: Re: الواحدة من ماتـقـول ليها خاطب تجفل منك !!!
Author: zola123
Date: 09-12-2003, 04:31 PM
Parent: #1
ابو حراز ازيك
قلت لي استخارة برضو؟؟
الزمن ده البنات خلو الاستخارة بشيلوا طوالي لووول\
بعدين لحظة
اي موضوع في البورد ده حتلقى شماره يا اما عند بت القبايل يا عند زولة
موضوعك ده اصله ما مر علي كان صدقت وطلعت من البورد
ولا دي تبع مواضيع ست النفر؟
تحياتي واتمنى انك ما تنقطع من البورد
زولة123
|
Post: #33
Title: Re: الواحدة من ماتـقـول ليها خاطب تجفل منك !!!
Author: منعمشوف
Date: 09-12-2003, 05:12 PM
Parent: #32
لووووووووول يا أبحراز
تعرف الحنان طفش ليه؟
لانك راكب الفجلة ما راكب حصان ابيض ضنبو اخدر
وعليك الله ما طول الغيبه
قال بوست الإستخارة قال
|
Post: #36
Title: Re: الواحدة من ماتـقـول ليها خاطب تجفل منك !!!
Author: Raja
Date: 09-14-2003, 03:25 PM
Parent: #1
العزيز عثمان
انا طبعا ما خليت الموضوع يعدي كده، وما نسيت انو انا بشتغل شنو؟ قوووووم اتصلنا ليك ببعض "المصادر" القريبة من مكان الاستخارة.. ووجدنا انو الجكسوية نبا إلى علمها وجود كل من: أم حراز، وحراز وأخوه الوسطاني حرزوني واختهم السغنتوتة حروزة... لوووووووووول
|
Post: #37
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-15-2003, 08:19 AM
Parent: #36
الأعزاء قرجة وبدر الدين شنا
رجاء 00 منعشوف 00 زوله 00 حنينه 00 بت بربر 00 هوبفل 00كبسيبة 00 راويه
اشكركم على تفاعلكم وكلماتكم الرقيقة التي أعطت البوست نكهة خاصة وجميل جداً أن اقرأ حروفكم التي سطرتها أناملكم الرائعة
وبمناسبة انو الجماعة ديل ماشافوني في الحلم الخاص بالإستخارة بهديكم الطرفة دي 00
قلتو ماكنتو في الحلمة دي 00 يعني بالعربي ماقابلتوني
ذكرتوني والي كان عندنا ظريف جداً
اتصلوا الجماعة علينا في السعودية وقالوا الوالي حايسجل زيارة لأهل العوض قوم يا ابوحراز أجمع مية ريال من كل واحد ورسلناها ليهم 00 طبعاً جابوه عشان موضوع الموية والكهرباء 00 تصدقوا جاء اتكلم ليهم في شنو ؟؟؟
خطابه كله كان عن البارونة كوكس
دا ماموضوعنا بس كان معاه واحد موظف اسمو شيخ الحوري
والله مهمته ظريفة جداً
دا بس معين عشان يقول الله أكبر الله أكبر
يعني ماشي في ضل الوالي
كان الوالي نط 00 الله أكبر
كان أكل ليهو تسالي 00 الله أكبر
كان الوالي عطس 00 الله أكبر
والحالة كان الوالي عتر في الواطة 00 الله أكبر الله أكبر
أها يوم واحد من جماعتنا كان عاوز ليهو شوال سكر
وقال لازم يمشي للوالي دا ويقول ليهو أنا حلمت بيك وشفتك في الجنة
اها صاحبنا مشى
طوالي قال للوالي : والله أمس حلمت بيك ياسعادتو
قام الوالي قال ليهو : لمن حلمت بي كان معاي شيخ الحوري ؟؟؟؟
الراجل قال ليهو : لا
الوالي قال ليهو : اذن دا ما أنا
قال شوال سكر قال
|
Post: #38
Title: Re: الواحدة من ماتـقـول ليها خاطب تجفل منك !!!
Author: Nada Amin
Date: 09-15-2003, 10:33 PM
Parent: #1
عارف يا أبو حراز اتنين في البورد ده قدر ما أكون زعلانة و مدبرسة من أشوفهم بفرح، انت و أسامة الخاتم. عارف بحس بأنكم ناس طيبين و نيتكم صافيييية خالص ، ربنا يديم عليكم نعمة طيب النية عشان تزيدوا من قدرتنا الكسيحة على الابتسام.
لكن بس ما فاهمة علاقة الموضوع بالعنوان شنو ، ما تزيد حيرتنا برانا حيرانين.
|
Post: #39
Title: Re: الواحدة من ماتـقـول ليها خاطب تجفل منك !!!
Author: cantona_1
Date: 09-15-2003, 11:10 PM
Parent: #38
الأستاذ ابوحراز
حبوبتي الله يرحمها كانت بتقول لينا: ما تستعجلوا على العرس ..ياعيالي... العوين كتار الشم تطلع وتغيب عليهن
العوين هن النسوان بكلام ناس الغرب
والشم هي الشمس بكلام البقارة
وعليه صاحبتك دي حتندم ندامة الكسعي.. بس يا ابا حراز انت ما فهمت رد الجكس في البورد هنا ... كدا حاول اقرأ بين السطور ... في واحدات قالن ليك يا ابا حراز نحن هنا منتظرنك بس تعال خاصة هنايا ديك... كدي أقرا ردود الجكس وتعال ورينا رايك شنو
وبعدين ماتنسي المثل الشعبي دا: المرا زي ظلك .. كان مشيت عليها بتمشي منّك وكان مشيت منها بتمشي عليك.. ولا مش كدا يا هنايا
|
Post: #40
Title: Re: الواحدة من ماتـقـول ليها خاطب تجفل منك !!!
Author: Rawia
Date: 09-15-2003, 11:20 PM
Parent: #1
Cantona
اي تمام كدا كلامك مظبوط عرفتني دايرة اقول شنو
|
Post: #41
Title: Re: الواحدة من ماتـقـول ليها خاطب تجفل منك !!!
Author: Raja
Date: 09-16-2003, 11:16 AM
Parent: #1
كنتونا.. اخيرا ظهرت.. حمدالله على السلامة.. وشنو حكاية ردود الجكس.. انت ما شفت ردي الأخير ولا شنو؟ كدي شوفو وقول لي رايك شنو
|
Post: #42
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-17-2003, 09:05 AM
Parent: #41
ندى أمين
اتمنى أن ندخل عليكم الإبتسامة فهي في عصرنا اصبحت عملة نادرة جداً وجميل أن تعطي الإبتسامة للآخرين حتى لو كان الحزن يغلف كل أحاسيسك 00 بالمناسبة بنت أختي اسمها ندى وأنا من إخترت لها الإسم لكن أمها تقول إتوحمت ليها على ناقة 00 المصيبة طويلة طول شديد ولسه منتظرة ود الحلال والمشكلة أهلنا كلهم قصار وعراض الواحد منهم لو قطعوا رقبتو يبقى زي القرمة البيكسرو فيها اللحم
كانتونا
يا أخوي مسؤول من الخير 00 كانتونا دا مش اللاعب البمشي يلبع الجماهير في المدرجات وبينزل وللا دا واحد تاني ؟؟
تعرف الواحد الا يعضيك
من امس ومن يوم قلت الجكس تاني ماجات واحدة تتحاوم في البوست
في الحلم طيرتوهن مننا
وفي البورد برضو
وانت ماعارف نحن في السعودية
كلما تقبل يلاقوك الرجال
محلات ممنوع دخول النساء
ومحلات ممنوع دخول الرجال
الحمد لله انا في بيت العزابة بصحى من النوم آخر واحد
يعني لو صحيت معاهم الله قال بي قولك
الفاتح خشمو ماتعرفوا 00 والشناة طبعاً ماشاء الله ماتديك الدرب
بعدين منو القال ليك الجكس قالوا تعال
والله نحن زي ماقال الملا عمر بقينا في المرحلة التانية
حيث يمرر الرجل بمرحلتين 00 مرحلة تجري النساء عليه
ومرحلة بيجرن منو
قال استاذ ابوحراز قال
راوية 0000 رجاء 00 شكراً كتير على مشاركتكم ودعمكم المعنوي الذي خفف علينا وقع صدمة الإستخارة وبهذه المشاركات منحتوني الأمل مرة أخرى فالحياة لاتتوقف والشمس تشرق في كل يوم 00 لكما التحية دائماً 0
|
Post: #43
Title: Re: الواحدة من ماتـقـول ليها خاطب تجفل منك !!!
Author: bint algazeira
Date: 09-17-2003, 11:50 AM
Parent: #42
شكراً كتير على مشاركتكم ودعمكم المعنوي الذي خفف علينا وقع صدمة الإستخارة وبهذه المشاركات منحتوني الأمل مرة أخرى فالحياة لاتتوقف والشمس تشرق في كل يوم
--------------------------------------------------------------------------------
كم جميل لو بقينا أصدقاء
ابوحراز سلام
كفاره ياابوحراز
الجاتك في خطوبه سامحتك
بركه الما جاتك في مالك
تعيش وتستخير
لكم تحياتي
|
Post: #44
Title: Re: الواحدة من ماتـقـول ليها خاطب تجفل منك !!!
Author: ابوحراز
Date: 09-17-2003, 12:19 PM
Parent: #43
كل واحدة يبدأ اسمها ببت مختفية الأيام دي
ماعارف الحاصل شنو
بت الجزيرة مختفية
وبت بربر
وبت الأحفاد
وبت الغالي
وبت قضيم
وبت النيل الأبيض
الحاصل شنو
بالله هسي الواحد لو لقى العصفور الظريف دا وركب عليهو
مش كان أحسن من الحصان المكعكع دا
فالعصافير الجميلة تأخذك الى حيث تريد
ويكفي الطير المهاجر الذي حمل رسائل صلاح أحمد ابراهيم
حملها وهي طازجة ليبثها للحبيبة
فالطيور تحمل لنا أنفاس الوطن
وما أجمل الوطن يابت الجزيرة
وليس هناك مكان أجمل من الوطن
شكراً للمشاركة والدعم المعنوي
ابوحراز
|
|
وها نحن ندعو بأن يسهل الله لكما